ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕೊಂಕ್ಣಿ ಉಲಯ್, ಕೊಂಕ್ಣಿ ಉರಯ್, ಕೊಂಕ್ಣಿ ಆಮ್ಚಿ ಆವಯ್.
ಕೊಂಕ್ಣಿ ಅಭಿಯಾನ್ ಸಮಿತಿ ಮ್ಹಳ್ಯಾರ್ ಕಿತೆಂ?
1 . ಕೊಂಕ್ಣಿ ಅಭಿಯಾನ್ ಸಮಿತಿ ಮ್ಹಳ್ಯಾರ್ ಕಿತೆಂ?
ಕೊಂಕ್ಣಿ ಅಭಿಯಾನ್ ಸಮಿತಿ ಮ್ಹಳ್ಯಾರ್ ಕೊಂಕ್ಣೆಚೊ ಮೋಗ್ ಆಸೊನ್, ಕೊಂಕ್ಣೆ ಖಾತಿರ್ ಕಿತೆಂ ಪುಣೀಂ ಕರ್ಚೆ ಅತ್ರೆಗ್ ಆಸ್ಚಾ ಉರ್ಭೆವಂತ್ ಕೊಂಕ್ಣಿ ಮೊಗಿಂಚೊ ಪಂಗಡ್. ಹ್ಯಾ ಕೊಂಕ್ಣಿ ಅಭಿಯಾನ್ ಸಮಿತಿಚೊ ಪ್ರಮುಕ್ ಇರಾದೊ ಜಾವ್ನಾಸಾ - ಕೊಂಕ್ಣಿ ಲೊಕಾಂಲಾಗಿಂ ವಚೊನ್, ಕೊಂಕ್ಣಿ ಪತ್ರಾಂ ಚಲಂವ್ಕ್ ಕಸ್ಟೊಂವ್ಚಾ ಆಮ್ಚಾಂ ಭಾವಾಂಕ್, ತಾಂಚಾ ಪತ್ರಾ ಖಾತಿರ್ ವರ್ಗಣ್ಯೊ, ಜಾಹಿರಾತಾಂ ಎಕ್ಟಾಂಯ್ ಕರುನ್ ಇಲ್ಲೊ ಕುಮ್ಕೆಚೊ ಹಾತ್ ದಿಂವ್ಚೊ.
2 . ’ಕೊಂಕ್ಣಿ ಉಲಯ್, ಕೊಂಕ್ಣಿ ಉರಯ್, ಕೊಂಕ್ಣಿ ಆಮ್ಚಿ ಆವಯ್’ ಮ್ಹಳ್ಯಾರ್ ಕಿತೆಂ?
ಕೊಂಕ್ಣಿ ಅಭಿಯಾನ್ ಸಮಿತಿಚೆ ಧ್ಯೇಯ್ ಜಾವ್ನಾಸಾತ್ ’ಕೊಂಕ್ಣಿ ಉಲಯ್, ಕೊಂಕ್ಣಿ ಉರಯ್, ಕೊಂಕ್ಣಿ ಆಮ್ಚಿ ಆವಯ್’. ಆಮಿಂ ಅಸಲ್ಯಾ ಎಕಾ ಪಾಂವ್ಡ್ಯಾರ್ ಪಾವ್ಲ್ಯಾಂವ್ಕೀ, ಆಮಿಂ ಚಿಂತಿಜಾಯ್ ಆನಿಂ ಸಮ್ಜಾಜಾಯ್ಚ್ ಪಡ್ಲಾಂಕೀ - ಕೊಂಕ್ಣಿ ವಾವ್ರ್ ಮ್ಹಳ್ಯಾರ್ ಫಕತ್ ಬಾಬ್ ಎರಿಚ್ ಒಝೆರಿಯೊಚೊ, ಯಾ ಬಾಬ್ ಪಾವ್ಲ್ ಮೊರಾಸಾಚೊ ನ್ಹಯ್, ಬಗಾರ್ ಆಮಾಂ ಸರ್ವಾಂಚೊ ದೆಕುನ್ ಎಕಾ ಮನಾಂತ್ ಎಕ್ವಟಿತ್ ಜಾವ್ನ್ ಹೊ ವಾವ್ರ್ ಕರ್ಚೊ ಗರ್ಜೆಚೊ. ಆನಿಂ ಎಕ್ವಟಿತ್ ರಿತಿನ್ ಕರ್ಚೊ ಹೊ ವಾವ್ರ್ ಖಂಡಿತ್ ಕೊಂಕ್ಣೆಕ್ ಫಾಯ್ದ್ಯಾಚೊ ಜಾತಲೊ. ಎಕಾಮೆಕಾ ಮೊಸ್ರಾನ್ ಭರೊನ್ ಖೊಡಿ ಕಾಡ್ಚಾ ಬದ್ಲಾಕ್ ಕಾಂಯ್ ಪುಣಿಂ ಕೊಂಕ್ಣೆಖಾತಿರ್ ಕರ್ನ್ ಧಾಕಂವ್ಚೆಂ ಚಿಂತಾಪ್ ಉಟಂವ್ಚೆಂ ಆಮ್ಚೆಂ ಏಕ್ ಲ್ಹಾನ್ ಪ್ರೇತನ್.
3 . ಕೊಂಕ್ಣಿ ಅಭಿಯಾನ್ ಸಮಿತಿಚಿ ಗರ್ಜ್ ಕಸಲಿ?
’ಪ್ರಗತಿ’ಚಾ ನಾಂವಾರ್ ಆಮಿಂ ಆತಾಂ ಫಾಸ್ಟ್ಲಾಯ್ಫಾಂತ್ ಜಿಯೆತಾಂವ್, ಹಾಂಗಾಸರ್ ಹರ್ಯೆಕ್ ಸಂಗ್ತ್ಯೊ ತುರ್ತಾನ್ ಜಾತಾತ್ ಆನಿಂ ಹಾಂಕಾಂ ಸಹಕಾರ್ ದಿಂವ್ಚಾಕ್ ಮೆಶಿನಾಂಯ್ ಆಸಾತ್. ಅಸಲ್ಯಾ ಬದ್ಲಾಪಾಕ್ ಆಮಿಂ ಪ್ರಗತಿ ಮ್ಹಣ್ ವೊಲಾಯ್ಲಾಂ. ಆತಾಂ ಆಮಿಂ ಪರ್ಗಾಂವಾಂತ್ ಆಸ್ಚಾ ಆಮ್ಚಾ ಮೊಗಾಚಾ ಮನ್ಶಾಲಾಗಿಂ ಎಕಾಮೆಕಾ ಸಂಪರ್ಕ್ ಕರ್ಚಾಕ್ ಫಕತ್ ಕಾಗ್ದಾಂ ಬರವ್ನ್ ತಾಂಚಾ ಜಾಪಿಕ್ ರಾಕ್ಚಿ ಗರ್ಜ್ ನಾ. ಆಮ್ಕಾಂ ಮೊಬಾಯ್ಲಾಂ ಆಸಾತ್; ಎಸ್ಸೆಮೆಸ್ ಧಾಡುಂಕ್, ಆಮ್ಕಾಂ ವೋಯ್ಸ್ ಮೇಯ್ಲ್ ಆಸಾತ್, ಆಮ್ಕಾಂ ವಿಡಿಯೊ ಚಾಟ್ ಕರ್ಯೆತ್, ಇಮೇಯ್ಲಾಂ ಧಾಡ್ಯೆತ್ - ಅಸಲ್ಯಾ ಸಭಾರ್ ತಾಂತ್ರಿಕತೆಚೊ ಫಾಯ್ದೊ ಆಮ್ಕಾಂ ದಿಲಾ ಪ್ರಗತೆನ್. ಅಶೆಂ ಆಮ್ಚಿಂ ಮತ್, ಆಮ್ಚೆಂ ಚಿಂತಾಪ್ ಇತ್ಲೆಂ ವೆವ್ಹಾರಿಕ್ ಜಾಲಾಂ ಮ್ಹಳ್ಯಾರ್, ಆಮ್ಕಾಂ ವಿಸರ್ ಪಡ್ಲ್ಯಾ; ಆಮ್ಚಿ ಅಸ್ಮಿತಾಯ್, ಆಮ್ಚಿ ಸಂಸ್ಕ್ರತಿ, ಆಮ್ಚಿ ಭಾಸ್ ಮೊರ್ನಾಚೆ ಸ್ತಿತೆರ್ ಆಸಾ. ಆಮಿಂ ಫಕತ್ತ್ ಹಾತ್ ಭಾಂಧುನ್ ಉಭೆ ರಾವ್ಲ್ಯಾರ್ ಜಾಯ್ನಾಂ. ಅಸಲ್ಯಾ ಅಭಿಯಾನಾಂಚಿ ಭೋವ್ ಚಡ್ ಗರ್ಜ್ ಆಸಾ ಸಗ್ಳ್ಯಾ ಸಂಸಾರ್ಭರ್. ಅಸಲ್ಯಾ ಅಭಿಯಾನಾಧ್ವಾರಿಂ ಆಮ್ಚಾ ಲೊಕಾಂಲಾಗಿಂ ಗೆಲ್ಯಾಂವ್ ತರ್ ಖಂಡಿತ್ ತೊ ಆಮ್ಕಾಂ ತಾಂಚೊ ಸಹಕಾರ್ ದಿತಲೊ ಆನಿಂ ಕೊಂಕ್ಣ್ ಇಭಾಸ್, ಕೊಂಕ್ಣಿ ಪತ್ರಿಕೋಧ್ಯಮ್, ಕೊಂಕ್ಣಿ ಕಾರ್ಯಿಂ, ಕೊಂಕ್ಣಿ ಸಂಗೀತ್ ಅಶೆಂ ಕೊಂಕ್ಣೆಚಾ ಹರ್ಯೆತಾ ಶೆತಾಕ್ ಪಾಟಿಂಬೊ ಮೆಳಾತ್. ಆತಾಂ ವ್ಹಡ್ಲೆಂ ಸವಾಲ್ ಹೆಂ; ’ಹಿಂ ಕಾಮಾಂ ಕೊಣಾಚಿಂ?’ - ಆಮಿಂ ಫಕತ್ತ್ ಕಾಳೊಕಾಕ್ ದುರ್ಸತೆಲಿಂ ನ್ಹಯ್, ಬಗಾರ್ ವಾತ್ ಪೆಟಂವ್ಕ್ ಮುಖಾರ್ ಆಯಿಲ್ಲಿಂ.
4 . ಕೊಂಕ್ಣಿ ಅಭಿಯಾನ್ ಸಮಿತಿ ಏಕ್ ಸಂಚಾಲನ್ಗೀ?
ನ್ಹಯ್. ಕೊಂಕ್ಣಿ ಅಭಿಯಾನ್ ಸಮಿತಿ ಬಿಲ್ಕುಲ್ ಕಸಲೆಂಚ್ ಸಂಚಾಲನ್ ನ್ಹಯ್, ಹಾಂಗಾಸರ್ ಕೊಣಾಯ್ಚಿಯ್ ವೆಕ್ತಿಪುಜಾ ಜಾಂವ್ಚಿನಾ, ಹೊ ಕೊಣಾಯ್ಚೊಯ್ ಅಭಿಮಾನಿ ಪಂಗಡ್ ನ್ಹಂಯ್. ಹಾಂಗಾಸರ್ ಫಕತ್ ವಾವ್ರ್ ಜಾತಲೊ - ಜೊ ಕೊಂಕ್ಣಿ ರುಕಾಚಾ ಪಾಳಾಂಕ್ ಶೆಳ್ ದಿಂವ್ಚೆ ತಸಲೊ. ಎಕಾ ಮನಾನ್ ಎಕ್ಟಾಂಯ್ ಜಾಲ್ಲ್ಯಾ ಕೊಂಕ್ಣಿ ಮೊಗಿಂಚೊ ಪಂಗಡ್. ಹಾಂಗಾಸರ್ ಕೊಣ್ಂಚ್ ಊಂಚ್ ಯಾ ನೀಚ್ ಮ್ಹಣ್ ನಾ. ಕಸ್ಲೇಯ್ ಹುದ್ದೆ ನಾಂತ್. ಜೊ ಕೋಣ್ ಮುಖೇಲ್ಪಣ್ ಘೆತಾ - ತೊ ಸೆವಕ್ ಜಾವ್ನಾಸ್ತಲೊ. ಹಾಚೆಂ ವಾಜ್ಬಿ ಕಾರಾಣ್ ಜಾವ್ನಾಸಾ - ಬರಿಂ ಕಾಮಾಂ ಕರ್ಚೊ ಮಾತ್ರ್ ಇರಾದೊ ಆಸಾ ತರ್ - ತೆಂ ಸಂಚಾಲನಾಂ ನಾಸ್ತಾನಾ ಸಯ್ತ್ ಕರುಂಕ್ ಸಾಧ್ಯ್ ಆಸಾ. ಕಿತ್ಯಾಕ್ ಮ್ಹಳ್ಯಾರ್ ಕೊಂಕ್ಣಿ ಸರ್ವ್ ವೆಕ್ತಿಂಚಾಕೀ, ಸರ್ವ್ ಸಂಚಾಲನಾಚಾಕೀ ಉಭಾರಾಯೆರ್ ಆಸಾ ಆನಿಂ ಆಸ್ತೆಲಿ.
5 . ಕೊಂಕ್ಣಿ ಅಭಿಯಾನ್ ಸಮಿತಿಚಾ ವಾವ್ರಾಡ್ಯಾಂಕ್ ಕಮಿಶನ್/ಸಾಂಬಾಳ್ ಆಸಾಗೀ?
ನಾ - ಬಿಲ್ಕುಲ್ ನಾ. ಕೊಂಕ್ಣಿ ಅಭಿಯಾನ್ ಸಮಿತಿಚಾ ವಾವ್ರಾಡ್ಯಾಂಕ್ ಕಸಲೆಂಚ್ ಕಮಿಶನ್ ಯಾ ಮುನಾಫೊ ಆಸ್ಚೊನಾ. ಹ್ಯಾ ಅಭಿಯಾನಾಚೊ ಪ್ರಮುಕ್ ಇರಾದೊ ಜಾವ್ನಾಸಾ ಆಮ್ಚಾ ವಳ್ಕಿಚಾಂಕ್, ಸಯ್ರ್ಯಾ-ಧಯ್ರ್ಯಾಂಕ್ ಮೆಳೊನ್ ತಾಂಚೆಲಾಗಿಂ ಕೊಂಕ್ಣಿ ಪತ್ರಾಂ ಖಾತಿರ್ ಸಹಕಾರ್ ಮಾಗ್ಚೊ ಶಿವಾಯ್ ಕಸಲೊಚ್ ಪ್ರತಿಫಳ್ ಆಶೆಂವ್ಚೊ ನ್ಹಯ್.
6 . ಕೊಂಕ್ಣಿ ಅಭಿಯಾನ್ ಸಮಿತಿಂತ್ ಕಾಂಯ್ ಫಂಡ್ ಆಸಾಗೀ?
ನಾ - ಕೊಂಕ್ಣಿ ಅಭಿಯಾನ್ ಸಮಿತಿಂತ್ ಕಸಲೊಚ್ ದುಡ್ವಾಚೊ ಫಂಡ್ ಆಸ್ಚೊನಾ. ತೊ ಇರಾದೊ ಬಿಲ್ಕುಲ್ ಕೊಂಕ್ಣಿ ಅಭಿಯಾನ್ ಸಮಿತಿಕ್ ನಾ.
7 . ಕೊಂಕ್ಣಿ ಅಭಿಯಾನ್ ಸಮಿತಿಕ್ ಕೊಣೆಂ/ಕಶೆಂ ಮೆಳ್ಯೆತ್?
ಕೊಂಕ್ಣೆಚೊ ಖರೊ ಮೋಗ್ ಕಾಳ್ಜಾಂತ್ ಆಸ್ಚಾ ಕೊಣೆಂಯ್ ಹ್ಯಾ ಅಭಿಯಾನಾಂತ್ ವಾಂಟೆಲಿ ಜಾವ್ಯೆತ್. ಕೊಣಾಕ್ ಕೊಂಕ್ಣೆ ಖಾತಿರ್ ಕಿತೆಂ ಪುಣೀಂ ಕರ್ಯಾಂ ಮ್ಹಳ್ಳೆಂ ಚಿಂತಾಪ್ ಆಸಾ ತಾಣಿಂ ಹ್ಯಾ ಅಭಿಯಾನಾಂತ್ ಮೆಳ್ಯೆತ್, ಹಾಂತುಂ ಕೊಣಾಯ್ಕ್ಯ್ ಕಸಲೊಚ್ ಕಡ್ಡಾಯ್ ನಾ. ಕೊಣೆಂಯ್ ಸಂಸಾರಾಚಾ ಖಂಯ್ಚಾಯ್ ಕೊನ್ಶಾಥಾವ್ನ್ಯ್ ಹ್ಯಾ ಅಭಿಯಾನಾಂತ್ ವಾಂಟೆಲಿ ಜಾವ್ಯೆತಾ.
8 . ಕೊಂಕ್ಣಿ ಅಭಿಯಾನ್ ಸಮಿತಿಚೆ ವಾವ್ರಾಡಿ ಪತ್ರಾಂಚೆ ಸೇಲ್ಸ್ಮೆನ್ಗೀ?
ಹೆಂ ತ್ಯಾ ತ್ಯಾ ಮನ್ಶಾಚಾ ಮನೋಧರ್ಮಾಚೆರ್ ಹೊಂದ್ವೊನ್ ಆಸಾ. ವೆವ್ಹಾರಿಕ್ ಗಿನ್ಯಾನಾಚೊ ಮನಿಸ್ ಹೆರಾಂಚೊ ವಾವ್ರ್ ಕಾಂಯ್ ಫಾಯ್ದ್ಯಾಚೊ ಜಾವ್ಯೆತ್ ಮ್ಹಣ್ ಲೆಕಿತ್. ನಂಜ್ಯಾಳೊ ಮನಿಸ್ ಹ್ಯಾ ವಾವ್ರಾಕ್ ದೆಂವ್ಲ್ಲ್ಯಾಂಕ್ ತುಕ್ಲಾಯ್ತ್. ಪುಣ್ ಸಮ್ಜಣೆಚೊ ಮನಿಸ್ ಮಾತ್ರ್ ಹ್ಯಾ ವಾವ್ರಾಕ್ ವಳ್ಕೊಂಕ್ ಸಕ್ತಾ. ಕೊಂಕ್ಣಿ ಅಭಿಯಾನ್ ಸಮಿತಿಚೊ ಇರಾದೊ ಕೋಣ್ ಕಸಲೊ ಮ್ಹಳ್ಳೆಂ ರುಜು ಕರ್ಚೊ ನ್ಹಯ್, ಫಕತ್ ವಾವ್ರ್ ಕರ್ಚೊ - ಕಿತೆಂಚ್ ವೆಕ್ತಿಗತ್ ಪ್ರತಿಫಳ್ ಆಶೆನಾಸ್ತಾಂ. ಕೊಂಕ್ಣಿ ಅಭಿಯಾನಾಚಾ ವೆಳಾರ್ ಫಕತ್ ಕೊಂಕ್ಣಿ ಪತ್ರಾಂಚಿ ವರ್ಗಣಿಂ ಘೆತಾಂವ್ ಮಾತ್ರ್ ನ್ಹಯ್, ಬಗಾರ್ ಕೊಂಕ್ಣಿ ಬುಕಾಂಕ್, ಕೊಂಕ್ಣಿ ಸಂಗೀತ್ ಕೊವ್ಳ್ಯಾಂಕ್ ಘೆವ್ನ್ ಆಮಿಂ ವೆತಾಂವ್ ಕೊಂಕ್ಣಿ ಲೊಕಾಲಾಗಿಂ. ಇತ್ಲೆಂಚ್ ನ್ಹಯ್, ಹ್ಯಾ ವರ್ಸಾ ಆಮಿಂ ಕೊಂಕ್ಣಿ ಶೆತಾಂತ್ ವಾವ್ರ್ ಕೆಲ್ಲ್ಯಾಂಚೊ ವಾವ್ರ್ ಸಂಸಾರ್ಭರ್ ಲೊಕಾಂನಿ ವಳ್ಕೊಂಚಾಕ್ ತಾಂಚಾ ವಾವ್ರಾಚೊ ವಿವರ್ಯ್ ಎಕ್ಟಾಂಯ್ ಕರ್ತಾಂವ್. ಎದೊಳ್ಚ್ ಹೆಂ ಕಾಮ್ ಆಮಿಂ ಸುರು ಕೆಲಾಂ ’ಕೊಂಕಣ್ ಕಲಾಕಾರ್’ ಮ್ಹಳ್ಳೆಂ ಅಂಕಣ್ www.mangalorean.com ಹಾಂತುಂ ಪರ್ಗಟೊನ್ ಆಸಾ.
9 . ಕೊಂಕ್ಣಿ ಅಭಿಯಾನ್ ಸಮಿತಿಚೆಂ ಮೂಳ್ ಇರಾದೆ ಆನಿಂ ಶೆವೊಟ್ ಕಸಲೊ?
ಕೊಂಕ್ಣಿ ಅಭಿಯಾನ್ ಸಮಿತಿಚೊ ಮೂಳ್ ಇರಾದೊ ಕೊಂಕ್ಣಿ ಪತ್ರಾಂಕ್ ಆರ್ಥಿಕ್ ಮಜತ್ ದಿಂವ್ಚೊ ಆನಿಂ ಅಸಲ್ಯಾ ವಾವ್ರಾಥಾವ್ನ್ ಕೊಂಕ್ಣಿ ಪತ್ರಾಂಕ್ ಭರ್ಪೂರ್ ಆರ್ಥಿಕ್ ಮಜತ್ ಮೆಳಾಜಾಯ್. ಕೊಂಕ್ಣಿ ಸಮಾಜೆಕ್ ಎಕ್ವಟಿತ್ ಕರ್ಚೊ ಆಮ್ಚೊ ಇರಾದೊ ಶಿವಾಯ್ ಮೊಡ್ಚೊ ನ್ಹಯ್. ಸಂಸಾರ್ಭರ್ ಕೊಂಕ್ಣೆಚಾ ವಾವ್ರಾಕ್ ನವ್ಯೊ ವಾಟೊ ಉದೆವ್ನ್ ಯೇಜಾಯ್. ಕೊಂಕ್ಣಿ ಕಲಾಕಾರಾಂಕ್ ಲೊಕಾಂ ಥಾವ್ನ್ ಸಹಕಾರ್ ಮೆಳಾಜಾಯ್. ಹೊಚ್ ಆಮ್ಚೊ ಇರಾದೊ.
10 . ಕೊಂಕ್ಣಿ ಅಭಿಯಾನ್ ಸಮಿತಿಚಾ ವಾವ್ರಾಕ್ ಕೊಂಕ್ಣಿ ಪತ್ರಾಂಚಿ ವಿಂಚವ್ಣ್ ಕಶಿ ಜಾತಾ?
ಪತ್ರಾಂಚಿ ಪರಿಗತ್ ಆನಿಂ ತಾಂಚೆಂ ಚಿಂತಾಪ್, ವಾವ್ರ್ ಪಳೆವ್ನ್ ಆಮಿಂ ಪತ್ರಾಕ್ ವಿಂಚ್ತಾಂವ್. ಹರ್ಯೆಕಾ ವರ್ಸಾಕ್ ಎಕೆಕ್ ಪತ್ರ್ ಆಮ್ಚಾ ಅಭಿಯಾನಾಕ್ ಆಮಿಂ ವಿಂಚ್ತಾವ್ ತರ್ಯೀ ಹೆರ್ ಪತ್ರಾಂಚಾ ಸಂಪಾದಕಾಂಚಿ ಪರ್ವಣ್ಗಿ ಆಸ್ಲ್ಯಾರ್ ಮಾತ್ರ್ ತ್ಯಾ ಪತ್ರಾಂಚೊ ವರ್ಗಣ್ಯೊ ಘೆತಾಂವ್. ಅಶೆಂ ಆಮಿಂ ವಿಂಚ್ಲ್ಲ್ಯಾ ಪತ್ರಾಚಿ ಏಕ್ ವರ್ಗಣಿ ಪಾಂಚ್ ವರ್ಸಾಂಚಿ ಜಾವ್ನಾಸ್ತೆಲಿ. ಹ್ಯಾ ಪಾಂಚ್ ವರ್ಸಾಂಚಿ ವರ್ಗಣಿ ಘೆಂವ್ಚೊ ಪ್ರಮುಕ್ ಇರಾದೊ ಖಂಯ್ಚೊಗೀ ಮ್ಹಳ್ಯಾರ್ ಆಮಿಂ ವಾವ್ರ್ ಕರ್ಚೊ ತ್ಯಾ ಪತ್ರಾಕ್ ಖರೊಚ್ ಫಾಯ್ದ್ಯಾಚೊ ಜಾಯ್ಜಾಯ್ ಮ್ಹಳ್ಳ್ಯಾ ಎಕಾಚ್ ಇರಾದ್ಯಾನ್.
11 .ಕೊಂಕ್ಣಿ ಅಭಿಯಾನ್ ಸಮಿತಿನ್ ಎದೊಳ್ ಪರ್ಯಾಂತ್ ಕೆಲ್ಲಿಂ ಕಾಮಾಂ ಕಸಲಿಂ?
(2003-) ಕುವೆಯ್ಟಾಂತ್ ಕೊಂಕ್ಣಿ ಅಭಿಯಾನ್ ಸಮಿತಿಚೆಂ ಉಗ್ತಾವಣ್ ಕಾರ್ಯೆಂ 2003 ಇಸ್ವೆಚಾ ಸಪ್ತೆಂಬರ್ ಮಯ್ನ್ಯಾಂತ್ ವಲ್ಲಿ ಕ್ವಾಡ್ರಸಾಚಾ ಘರಾಂತ್ ಚಲ್ಲೆಂ. ಹ್ಯಾ ವರ್ಸಾಚಾ ಅಭಿಯಾನಾಕ್ ’ದಿವೊ ಹಾಪ್ತ್ಯಾಳೆಂ’ ವಿಂಚ್ಲೆಂ, ಆನಿಂ ತೀಸ್ ಉರ್ಭೆವಂತ್ ಮುಖೆಲಿ ಎಕ್ಟಾಂಯ್ ಜಾವ್ನ್ ದೋನ್ ಮಯ್ನ್ಯಾಂ ಭಿತರ್ ಪಾಂಚ್ ವರ್ಸಾಂಚೊ 165 ವರ್ಗಣ್ಯೊ ಎಕ್ಟಾಂಯ್ ಕರ್ನ್ ದಿಲ್ಯೊ. ಇತ್ಲೆಂಚ್ ನ್ಹಯ್ ರಾಕ್ಣೊ, ಕಾಜುಲೊ, ಸೆಕ್ಯುಲರ್ ಸಿಟಿಜನ್, ಝೆಲೊ, ಕುಟಾಮ್ ಅಶೆಂ ಹೆರ್ ಪತ್ರಾಂಚೊ ವರ್ಗಣ್ಯೊಯ್ ಎಕ್ಟಾಂಯ್ ಕರುನ್ ದಿಲ್ಯೊ. ಹ್ಯಾ ಅಭಿಯಾನ್ ಸಮಿತಿಚೆಂ ಸಂಯೋಜಕ್ಪಣ್ ವಲ್ಲಿ ಕ್ವಾಡ್ರಸಾನ್ ಘೆತ್ಲ್ಲೆಂ. ಹ್ಯಾ ಅಭಿಯಾನ್ ಸಮಿತಿಚೆಂ ಉಗ್ತಾವಣ್ ಅಲೆಕ್ಸಾಂಡರ್ ಫೆರ್ನಾಂಡಿಸ್, ಶಿರ್ವಾಂ ಹಾಣೆಂ ಕೆಲ್ಲೆಂ
(2004-) ಕುವೆಯ್ಟಾಂತ್ ಕೊಂಕ್ಣಿ ಅಭಿಯಾನ್ ಸಮಿತಿಚೆಂ ಉಗ್ತಾವಣ್ ಕಾರ್ಯೆಂ 2004 ಇಸ್ವೆಚಾ ನವೆಂಬರ್ ಮಯ್ನ್ಯಾಂತ್ ಡಾನ್ ಬೊಸ್ಕೊ ಇಸ್ಕೊಲಾಂತ್ ಚಲ್ಲೆಂ. ಹ್ಯಾ ವರ್ಸಾಚಾ ಅಭಿಯಾನಾಕ್ ’ಮಿತ್ರ್ ಹಾಪ್ತ್ಯಾಳೆಂ’ ವಿಂಚ್ಲೆಂ, ತಶೆಂಚ್ ಸಿಜ್ಯೆಸ್ ತಾಕೊಡೆಚೆ ’ಹಾಯ್ ಹಾಯ್ ದುಭಾಯ್ ’ ಬುಕಾಕ್ ಅಭಿಯಾನಾವೆಳಿಂ ಲೊಕಾಂಕ್ ವಿಕುಂಕ್ ವಿಂಚ್ಲೊ. ಹ್ಯಾ ಅಭಿಯಾನ್ ಸಮಿತಿಚೆಂ ಸಂಯೋಜಕ್ ಜಾವ್ನ್ ಲೆಸ್ಲಿ ನೊರೊನ್ಹಾ, ಕುಲ್ಶೇಕರ್ ತಶೆಂಚ್ ಸಂಪರ್ಕ್ ಪ್ರತಿನಿಧಿ ಜಾವ್ನ್ ಹೆನ್ರಿ ಲುವಿಸ್, ಸಾಸ್ತಾನ್ ಹಾಂಕಾಂ ನಮ್ಯಾರ್ಲೊ. ಕುವೆಯ್ಟ್ ಕೊಂಕ್ಣಿ ಸಮಾಜೆಚೊ ಮುಖೆಲಿ ಪಾಸ್ಕಲ್ ಬಿ. ಪಿಂಟೊನ್ ಹ್ಯಾ ಸಮಿತಿಚೆಂ ಉಗ್ತಾವಣ್ ಕೆಲೆಂ.
(2005-) ದುಭಾಯಾಂತ್ ಕೊಂಕ್ಣಿ ಅಭಿಯಾನ್ ಸಮಿತಿಚೆಂ ಉಗ್ತಾವಣ್ ಕಾರ್ಯೆಂ ಬೆಳ್ಳೆವಿಶನ್ ದುಭಾಯ್ ಹಾಚೊ ಅಧ್ಯಕ್ಶ್ ಎಲಿಯಾಸ್ ಡಿ’ಸೊಜಾಚಾ ಘರಾಂತ್ ಚಲ್ಲೆಂ. ಹ್ಯಾ ವರ್ಸಾಚಾ ಅಭಿಯಾನಾಕ್ ’ಮಿತ್ರ್ ಹಾಪ್ತ್ಯಾಳೆಂ’ ವಿಂಚ್ಲೆಂ, ತಶೆಂಚ್ ಸಂಯೋಜಕ್ ಜಾವ್ನ್ ನವೀನ್ ಸಿಕ್ವೇರಾ, ಬ್ರಹ್ಮಾವರ್ ಆನಿಂ ಸಂಪರ್ಕ್ ಪ್ರತಿನಿಧಿ ಜಾವ್ನ್ ಪ್ರವೀಣ್ ತೌರೊ, ಕುಲ್ಶೇಕರ್ ಹಾಕಾ ನಮ್ಯಾರ್ಲೊ. ಹೆಂ ಅಭಿಯಾನ್ ಲೊಕಾಮೊಗಾಳ್ ಕೊಂಕ್ಣಿ ವಿಚಾರ್ವಂತ್, ಕವಿ, ಆಂಡ್ರು ಎಲ್ ಡಿ’ಕುನ್ಹಾ ಹಾಣೆಂ ಉಗ್ತಾವಣ್ ಕೆಲೆಂ. ಚಡ್ತಿಕ್ ವಿವರಾಂಕ್ ತುಮಿಂ ಸಂಪರ್ಕ್ ಕರ್ಯೆತಾ info@daaiz.com ಯಾ ಸಕಯ್ಲ್ಯಾ ಖಂಚಾಯ್ ವೆಬ್ಸಾಯ್ಟಾಂಕ್ ಭೆಟ್ ದಿವ್ಯೆತಾ;
(ಕೊಂಕ್ಣಿ ಅಭಿಯಾನ್ ಸಮಿತಿಂತ್ ವಾಂಟೆಲಿ ಜಾಲ್ಲಿಂ ಸಾಯ್ಟಾಂ); www.maibhas.com, www.mangalorean.com, www.bellevision.com, www.konkaniworld.com ಯಾ ’ದಿವೊ’ ಆನಿಂ ’ಮಿತ್ರ್’ ಕೊಂಕ್ಣಿ ಹಾಪ್ತ್ಯಾಳಿಂ ವಾಚಾ.
ಕೊಂಕ್ಣಿ ಅಭಿಯಾನ್ ಸಮಿತಿಚಾ ವಾವ್ರಾಕ್ ಲಗ್ತಿ ಜಾಲ್ಲಿಂ ಲೇಖನಾಂ
ಕೊಂಕ್ಣಿ ಭಾಸೆಚಿ ತಶೆಂಚ್ ಕೊಂಕ್ಣಿ ಪತ್ರಾಂಚಿ ಆಯ್ಚಿ ಪರಿಗತ್ - ಲೇಖನ್
ಸ್ಪಿರಿತಾಚೊ ವಾವ್ರ್ ಖಂಡಿತ್ ಫಳ್ ದಿತಾ - ಲೇಖನ್
ಕೊಂಕ್ಣಿ ಅಭಿಯಾನ್ ಸಮಿತಿಕ್ ಆಯಿಲ್ಲೆ ಸಂದೇಶ್-ಅಭಿಪ್ರಾಯ್
ಕೊಂಕ್ಣಿ ಅಭಿಯಾನ್ ಸಮಿತಿಚೊ ಎದೊಳ್ಚೊ ವಾವ್ರ್
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications