ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಪರತ್ ಏಕ್ ನತಾಲಾಂಚೆಂ (ಕ್ರಿಸ್ಮಸ್) ಫೆಸ್ತ್
ವರಸ್ : 2004
ಅಂಕೊ : 6
ಮಯ್ನೊ : ದಸೆಂಬರ್
ಸಂಪಾದಕೀಯ್ - 6 .
ವಲ್ಲಿ ಕ್ವಾಡ್ರಸ್
ವರ್ಸಾನ್ ವರ್ಸಾ ದಸೆಂಬ್ರಾಚಾ ಪಂಚ್ವೀಸ್ ತಾರಿಕೆರ್ ಯೆಂವ್ಚೆಂ ನತಾಲಾಂಚೆಂ ಫೆಸ್ತ್ ಸಂಸಾರ್ಭರ್ ಸಂಬ್ರಮಾಚೊ ದೀಸ್, ಆಮ್ಚೊ ದೇವ್ ಮನಿಸ್ ಜಾವ್ನ್ ಜಲ್ಮಾಲ್ಲೊ ದೀಸ್.
ಘರಾಂನಿ ಕುಸ್ವಾರ್, ಘರಾಂನಿ ಯಾ ಆಂಗ್ಣಾಂನಿ ಗರ್ದಾನಾಚೊ ಗೊಟೊ, ಗೊಟ್ಯಾಂತ್ ತಾರಾಂ, ಗುಡೆ ದೊಂಗೊರ್, ಘರಾಂ, ರೂಕ್, ಆನಿಂ ತ್ಯಾ ಮಧೆಂ ಏಕ್ ಲ್ಹಾನ್ ಕೊಲ್ವಾಚೆಂ ಪಾಕೆಂ ಆನಿಂ ತ್ಯಾ ಪಾಕ್ಯಾಭಿತರ್ ಆಸ್ಚಾ ಗೊರ್ವಾಂಮಧೆಂ ಏಕ್ ನಾಗ್ಡೊ ಬಾಳೊಕ್, ತ್ಯಾ ಬಾಳ್ಕಾಸವೆಂ ಏಕ್ ಅಸ್ಕತ್ ಆವಯ್ ಆನಿಂ ಏಕ್ ಖಾಲ್ತೊ ಬಾಪುಯ್.
ವಯ್ರ್ ಉಮ್ಕಾಳ್ಚೆ ಆಂಜ್ ಭಡ್ವೆ, ಮುಖ್ಲ್ಯಾನ್ ದೀಸ್ರಾತ್ ಚರೊವಾರ್ ಆಸ್ಚೊ ಶೆಳಿಯೊ, ಆನಿಂ ತ್ಯಾ ಶೆಳಿಯಾಂಕ್ ರಾಕ್ಚೆ ಭಡ್ವೆ. ವಾ! ಕ್ರಿಸ್ಮಸ್ ಮ್ಹಳ್ಯಾರ್ ಕಿತ್ಲೊ ವಡ್ಲೊ ಸಂಭ್ರಮ್ ಆಮ್ಕಾಂ? ಮದ್ಯಾನೆ ರಾತಿಂ ಇಗರ್ಜೆಂತ್ ವೈಭವಾಚೆಂ ಮೀಸ್, ಸಗ್ಳೊ ಲೋಕ್ ನವ್ಯಾ/ಪರ್ನ್ಯಾ ಪರ್ಮಳಿಕ್ ತೇಲ್ ವೊತ್ಲ್ಲ್ಯಾ ಸುಟಾರ್, ಬುಟಾರ್, ಕೊಟಾರ್, ಪೇಂಟಾರ್. ಕ್ರಿಸ್ಮಸ್ ಕೇಕ್, ಕ್ರಿಸ್ಮಸ್ ಕ್ಯಾರಲ್, ಕ್ರಿಸ್ಮಸ್ ಕಾರ್ಡಾಂ ಅಶೆಂ ಭೊಗ್ತಾಕೀ ಜೆಜುನ್ ಏಕ್ ಪಾವ್ಟಿಂ ನ್ಹಯ್, ಅನ್ಯೇಕ್ ಪಾವ್ಟಿಂ ಜಲ್ಮಾಜಯ್ ಆಸ್ಲ್ಲೆಂ ಮ್ಹಣ್.
ಪುಣ್ ಹೆಂ ಸವಾಲ್ ಅಸ್ವಾಭಾವಿಕ್ ಮ್ಹಳ್ಳೆಂ ಹಾಂವ್ಯ್ ಜಾಣಾಂ. ರಾತಿಂ ಸುರು ಜಾಲ್ಲ್ಯಾ ಹ್ಯಾ ಫೆಸ್ತಾಚೆಂ ಆಚರಣ್ ಜಾತಾ ದುಸ್ರೆ ದಿಸಾ, ಮಾಸ್, ಪೊಳಿ, ಸೊರ್, ಗಾಯನ್, ನಾಚ್ ಪಾರ್ಟ್ಯೊ ಆನಿಂ ಧೆಂಕ್. ಥೊಡಿಂ ಅಪ್ಣಾಖಾತಿರ್ ಆನಿಂ ಥೊಡಿಂ ಹೆರಾಂ ಖಾತಿರ್ ಹೆಂ ಫೆಸ್ತ್ ಆಚರಣ್ ಕರ್ತಾನಾ ಲೋಕ್, ಆಸೊಂ ತೊ ಗಾಂವಾಂತ್ ಯಾ ಪರ್ಗಾಂವಾಂತ್. ಫೆಸ್ತಾಚೆಂ ಕಾರಾಣ್ ಎಕ್ಚ್ - ಆನಿಂ ತೆಂ ಜಾವ್ನಾಸಾ ಆಮ್ಚಾ ಸೊಮ್ಯಾನ್ ಜಲ್ಮಾಲ್ಲೊ ದಿವಸ್ ಭೋವ್ ಸಂಭ್ರಮಾನ್ ಆಚರಣ್ ಕರ್ಚೊ. ಅಜಿಕ್ ಚಡುಣೆಂ ಪಂದ್ರಾ ವರ್ಸಾಧಿಂ ಮ್ಹಾಕಾ ನತಾಲಾಂಚಾ ಫೆಸ್ತಾಚಾ ಸಂಧರ್ಭಾರ್ ಆಯಿಲ್ಲ್ಯಾ ಎಕಾ ಕಾರ್ಡಾಂತ್ ಆಸ್ಲ್ಲಿಂ ಉತ್ರಾಂ ಹಿಂ; The most important thing in CHIRSTMAS is the CHRIST and not the MAS.
ಭೋವ್ಶಾ ಆಮ್ಚಾ ಸಗ್ಳ್ಯಾ ಚಿಂತ್ಪಾಕ್ ಸವಾಲ್ ಕರ್ಚೆಂ ಹೆಂ ಪರ್ಯಾಯ್ ಚಿಂತಾಪ್ ಆಮ್ಕಾಂ ಜಾಯ್ತಿಂ ಸವಾಲಾಂ ಕರ್ತಾತ್. ಆಮ್ಚಾ ಚಿಂತ್ಪಾಚಾ ಸಭಾರ್ ಪಾಳಾಂಕ್, ಮುಳಾಂಕ್ ಉಸ್ತಿತಾತ್.
ಅಡೂಕ್ ದಿಸೊಂಕ್ ಪುರೊ ತರ್ಯ್ ಏಕ್ ಸಂಗತ್ ಮಾತ್ರ್ ಆಮಿಂ ನೆಗಾರ್ ಕರ್ತಾಂವ್ ಪೆದ್ರುನ್ ಜೆಜುಕ್ ನೆಗಾರ್ ಕೆಲ್ಲೆಪರಿಂ, ಆನಿಂ ತೆಂ ಜಾವ್ನಾಸಾ ಆಮಿಂ ಕ್ರಿಸ್ತಾ ಥಾವ್ನ್ ಭೋವ್ ಪಯ್ಸ್ ವಚೊನ್ ವಚೊನ್ ಕ್ರಿಸ್ಮಸಾಚೆಂ ಆಚರಣ್ ಕರ್ತಾಂವ್. ಆಮ್ಚಿಂ ಮತ್ ಇತ್ಲಿ ಲೌಕಿಕ್ ಜಾಲ್ಯಾಕೀ, ಅಸಲೆಂ ಚಿಂತಾಪ್ ಚಿಂತ್ಚೆಂ ಸಯ್ತ್ ಮಾ-ಪಾತಕ್ ಮ್ಹಣ್ ಲೆಖ್ಚೆ ಚಡ್ತಾವ್ ಸಗ್ಳೆ. ಕಿತ್ಯಾಕ್? ನತಾಲಾಂಚಾ ಫೆಸ್ತಾಚೊ ನೀಜ್ ಘುರ್ತ್ ಕಸಲೊ? ಆಚರಣ್? ಕಶೆಂ?.
ದೇವ್ ಪೂತ್ ಜೆಜುಕ್ ತಾಣೆಂಚ್ ರಚ್ಲ್ಲ್ಯಾ ಸಂಸಾರಾಂತ್ ಅಪ್ಲೊಚ್ ಏಕ್ ಬಂಗ್ಲೊ ಬಾಂಧುನ್ ಉಂಚ್ಲ್ಯಾ ಸೊಸಾಯ್ಟಿಚಾ ಮನ್ಶಾಂಪರಿಂ IಅU ಂತ್ ಜಲ್ಮ್ ಘೆವ್ಯೆತೊನೆ? ಆಮ್ಚೊ ದೇವ್ ತೊ, ಕಿತ್ಯಾಕ್ ಆಮ್ಕಾಂ ಆಮ್ಚೆಂ ಮಟ್ಟ್ (ವಾ ಅಸ್ತಿತ್ವ್) ಸಕ್ಲಾ ದೆಂವಂವ್ಕ್ ಗತ್ ಆಧಾರ್ ನಾತ್ಲ್ಲ್ಯಾಂಪರಿಂ ಗೊಟ್ಯಾಂತ್ ಜಲ್ಮಾಜಯ್ ಆಸ್ಲ್ಲೆಂ? ಕಿತೆಂ ಹಾಚೊ ಘುರ್ತ್? ಏಕ್ ಘಡಿ ನಿಯಾಳ್ ಕೆಲೊ ತರ್, ದಿಸ್ಚೆಂ ಸತ್ ಭೋವ್ ಮಾರ್ಮಿಕ್;
ಜೆಜು ಆಯಿಲ್ಲೊ ಲ್ಹಾನ್ವಿಕಾಯೆಚಿ ನಿಶಾನಿ ಘೆವುನ್, ಖಾಲ್ತೆಪಣಾಚಿ ನಿಶಾನಿ ಘೆವುನ್, ಗತ್ ಆಧಾರ್ ನಾತ್ಲ್ಲ್ಯಾಂ ಪಾಸತ್. ಆನಿಂ ಆಮಿಂ ಪ್ರತಗೆಚಾ ದೊಣ್ಪ್ಯಾಚೆರ್ ಚಡೊನ್ ಕಿತೆಂ ಕರ್ತಾಂವ್? ಆಮ್ಕಾಂ ಹೆರಾಂಚಿ ಗರ್ಜ್ ಸಮ್ಜೊಂವ್ಚಿ ಮತ್ ವಿಶೆವಾರ್ ಆಸಾ (ವಾ ಮೆಲ್ಯಾ), ಹೆರಾಂಚೊ ಹುಸ್ಕೊ ಮತಿಂತ್ ದವರುಂಕ್ ಆಮಿಂ ಕಾಂಯ್ ಪ್ರವಾದಿ ನ್ಹಯ್.
ತರ್ ಸಾಂಗಾ, ಆಮಿಂ ಕ್ರಿಸ್ತಾಸವೆಂ ಹೆಂ ಫೆಸ್ತ್ ಕರ್ತಾಂವ್ ವಾ ಲುಸಿಫೆರಾಸವೆಂ? ಆಮಿಂ ಪ್ರವಾದಿ ನ್ಹಯ್, ಆಮ್ಕಾಂ ಸಾಕ್ರಿಫಿಸ್ ಕರುಂಕ್ ನಾಕಾ, ಖುರ್ಸಾರ್ ಚಡೊಂಕ್ ನಾಕಾ, ಆಮ್ಕಾಂ ಆಮ್ಚೊ ರಾಟಾವಳ್ಯೊ ಆಸಾತ್, ಆಮ್ಚೆಂ ಕುಟಾಮ್ ಆಸಾ, ನಿರ್ಗತಿಕಾಂಕ್ ಕುಮೊಕ್ ಕರ್ಚೆಂ ಕಾಮ್ ಸಮಾಜ್ಸೆವಕಾಚೆಂ.
ಬರೆಂ - ಭಾರಿ ಬರೆಂಚ್.
ಪುಣ್ ಆಮಿಂ ಏಕ್ ಘಡಿ ಚಿಂತ್ಯಾಂ ಜರ್ತರ್ ತ್ಯಾ ನಿರ್ಗತಿಕಾಂ ಪಯ್ಕಿ ಆಮ್ಚೊಚ್ ಎಕ್ಲೊ ಭಾವ್, ಯಾ ಆಮ್ಚಿಚ್ ಏಕ್ ಭಯ್ಣ್ ಆಸ್ತಿ ತರ್ ಆಜ್ ಆಮ್ಚಾ ಚಿಂತ್ಪಾಕ್ ಹಿ ಭಿಜುಡಾಯ್ ಯೆತಿಗೀ? ಆಮಿಂ ಪ್ರವಾದಿ ನ್ಹಯ್;
ಬರೆಂ, ಪುಣ್ ಆಮಿಂ ಎಕಾ ದಿಸಾಖಾತಿರ್ ಪುಣೀಂ ಮನಿಸ್ ತರೀ ಜಾಲ್ಲ್ಯಾಂವ್ ತರ್? ನತಾಲಾಂಚಾ ಫೆಸ್ತಾದಿಸಾ ಪುಣಿಂ ಆಮಿಂ ಎಕಾ ನಾಗ್ಡ್ಯಾಕ್ ನೆಸೊಂಕ್ ದೀಂವ್ಕ್ ಸಕ್ಲ್ಯಾಂವ್, ಎಕಾ ನಿರ್ಗತಿಕಾಕ್ ಪುಣಿಂ ಆಸ್ರೊ ದೀಶೆ ಕರುಂಕ್ ಸಕ್ಲ್ಯಾಂವ್, ಎಕಾ ಬೆಕಾರಿಕ್ ತರ್ಯ್ ಕಾಮ್ ಮೆಳಾಶೆಂ ಕರುಂಕ್ ಸಕ್ಲ್ಯಾಂವ್, ಎಕಾ ದುಖೆಸ್ತಾಚಿಂ ದುಖಾಂ ಪುಸುಂಕ್ ಸಕ್ಲ್ಯಾಂವ್ ತರ್ ಆಮ್ಕಾಂ ಕ್ರಿಸ್ತಾಕ್ ಸೊಧುನ್ ವೆಚಿ ಗರ್ಜ್ ಪಾಡ್ತಿನಾ, ಬಗಾರ್ ಕ್ರೀಸ್ತ್ಚ್ ಆಮ್ಕಾಂ ಸೊಧುನ್ ಯೆತೊ ನ್ಹಯ್ಗೀ? ಆನಿಂ ಅಶೆಂ ಜರ್ ಆಮಿಂ ಕರುಂಕ್ ಪಾವ್ಲ್ಯಾಂವ್ ತರ್ ಮಾತ್ರ್ ಆಮಿಂ ಆಚರಣ್ ಕರ್ಚಾ ಫೆಸ್ತಾಕ್ ಖರೊ ಅರ್ಥ್ ಯೇಂವ್ಕ್ ಸಕಾತ್ ನ್ಹಯ್ಗೀ? ಕಿತ್ಯಾಕ್ ಮ್ಹಳ್ಯರ್ ಸಂತೊಸ್ ವಾಂಟ್ಲೊ ತರ್ ದೊಡ್ತೊ ಜಾತಾ.
ಆನಿಂ ನತಾಲಾಂಚಾ ಫೆಸ್ತಾಚೊ ಸಂದೇಶ್ ಹೊಚ್ - ಸಂತೊಸ್ ಎಕಾಮೆಕಾ ವಾಂಟುನ್ ಘೆಂವ್ಚೊ - ಖರ್ಯಾ ಕ್ರೀಸ್ತಿ ಶೆಗುಣಾನ್.
ಸರ್ವ್ ದಾಯ್ಜ್ ವಾಚ್ಪ್ಯಾಂಕ್ ಹ್ಯಾ ನತಾಲಾಂಚಾ ಫೆಸ್ತಾಚೆ ರಾಸ್ ರಾಸ್ ಉಲ್ಲಾಸ್ ಪಾಟಯ್ತಾಂ. ಭೋವ್ ಖಾಲ್ತೆಪಣಿಂ,
- ವಲ್ಲಿ ಕ್ವಾಡ್ರಸ್, ಅಜೆಕಾರ್
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
