ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
’ಜೆದ್ನಾಂ ತುಂ ಹೆರಾಂಚಾ ಬರ್ಯಾಪಣಾವಿಶ್ಯಾಂತ್ ಚಿಂತಾಯ್, ತೆದ್ನಾಂ ತುಜೆಂ ಬರೆಂಪಣ್ ಅಪಾಪಿಂ ಜಾತೆಲೆಂ’ - ಡಯಾನ್ ಡಿ’ಸೋಜ್
ಕೊಂಕ್ಣಿ ಕಾರ್ಭಾರಿ - 20.
ನಾಂವ್: ಗ್ರೇಶಿಯನ್ ಜೋಸೆಫ್ ಡಿ’ಸೋಜ್.
ಜಲ್ಮಾಲ್ಲಿ ತಾರಿಕ್: 3 ಜೂನ್ 1951.
ಫಿರ್ಗಜ್: ಇಜಯ್ (ಮಂಗ್ಳುರ್).
ಆವಯ್ ಬಾಪಾಯ್ಚೆ ನಾಂವ್: ದೆವಾದೀನ್ ಪಿಯಾದಾ ಡಿ’ಸೋಜ್ ಆನಿ ದೆವಾದೀನ್ ಸಾಲ್ವಾದೊರ್ ಡಿ’ಸೋಜ್.
ಪತಿಣ್: ವೀರಾ ಡಿ’ಸೋಜ್.
ಭುರ್ಗಿಂ: ದೆ|ಅಲಿಟಾ ಆನಿ ಎನಿಕಾ ಡಿ’ಸೋಜ್.
ಸಂಗೀತ್ ಕೊವ್ಳ್ಯೊ:
’ಕೊಂಕಣಿ ಸಂಗೀತ್ ಲ್ಹಾರಾಂ’
’ಗ್ರೇಶಿಯನ್ಸ್ ಕೊಂಕಣಿ ಮೆಲೊಡೀಸ್’
[ಮಾನೆಸ್ತ್ ಗ್ರೇಶಿಯನಾಸವೆಂ ಮೆಲ್ವಿನ್ ಜೆ. ವಾಸ್]
ಪಳೆಂವ್ಕ್ ಗಂಭೀರ್ ದಿಸ್ತಾ ತರ್ಯೀ, ಕಾಳ್ಜಾಂತ್ ತಿತ್ಲೊಚ್ ಮೊವಾಳ್, ಮೊಗಾಯ್, ಮಾಯ್ಪಾಸಿ ತಶೆಂಚ್ ಉತ್ರಾಂ ಉತ್ರಾಂನಿ ಹಾಸಂವ್ಚಿ ಕಲಾ (Sence of humour) ಆಸ್ಚೊ ಮಾನೆಸ್ತ್ ಗ್ರೇಶಿಯನ್ ಡಿ’ಸೋಜಾಕ್ ಏಕ್ ನಟ್ ಜಾಂವ್ಚಿ ಸರ್ವ್ ಅರ್ಹತಾ ಆಸಾ ತರ್ಯೀ ತಾಚೊ ಪಯ್ಲೊ ಮೋಗ್ ಗಾಂವ್ಚೊ. ಸಂಗೀತ್ ತಾಚ್ಯಾ ಕಾಳ್ಜಾ-ಮನಾಂತ್ ರೊಂಬೊನ್ ಆಸ್ಚೆಂ ತಾಲೆಂತ್. ಪುಣ್ ಕೊಂಕ್ಣಿ ಸಾಹಿತ್ಯಾಕ್ಯೀ ತೊ ತಿತ್ಲೊಚ್ಚ್ ಖಾಯ್ಸ್ ಕರ್ತಾ, ಬರ್ಯಾ ಸಾಹಿತ್ಯಾಚಿ ವಳೊಕ್ ಆಸ್ಚೊ ಹೊ ವಿಂಚ್ಣಾರ್ ಪದಾಂಕ್ ತಾಳೆ ಬಸಯ್ತಾ ತಶೆಂಚ್ ಗಾಯ್ತಾ. ದೆ|ಜೊರ್ಜಿ ಪಿಂತ್ ಆಯ್ಕೊಳ್, ದೆ|ಜೊನಿ ಸುರತ್ಕಲ್ ಹಾಂಚೆಸವೆಂ ಭೋವ್ ಲಾಗ್ಸಿಲೊ ಸಂಪರ್ಕ್ ಆಸ್ಚಾಂತ್ಲೊ ಹೊಯೀ ಎಕ್ಲೊ. ಕೊಂಕ್ಣೆಂತ್ಲ್ಯಾ ಕಲಾಕಾರಾಂಲಾಗಿಂ ಆಸ್ಚೆಂ ಧನ್ ದಿರ್ವೆಂ ತರ್ಯೀ ಕಸ್ಲೆಂ? ಕಾಳಿಜ್ಭರ್ ಮೋಗ್, ತೋಂಡ್ಭರ್ ಉತ್ರಾಂ. ಖರೆಂಚ್ ಜಾವ್ನ್ ಹಾಚೆ ವಿಚಾರ್ ಹಾಚ್ಯಾ ಸಭಾರ್ ಅಭಿಮಾನಿಂಕ್ ದಿಂವ್ಚ್ಯಾಕ್ ಆಮಿ ಘೆತ್ಲ್ಲೆಂ ಸಂದರ್ಶನ್ ಹೆಂ. - ಸಂ.
ಸಂವಾದ್ ಚಲವ್ಪಿ: ಮೆಲ್ವಿನ್ ಜೆ. ವಾಸ್, ಕೆಲರಾಯ್.
1. ಕುವೆಯ್ಟಾಂತ್ 'Konkani Talents' ಮ್ಹಳ್ಳೊ ಪಂಗಡ್ ತುಮಿಂ ಘಡ್ಲೊ. ಕೊಂಕ್ಣಿ ಕಾರ್ಯಿಂ ತುಮಿಂ ಚಲಯ್ತಾತ್ ಆಸ್ತಾಂ ’ಕೊಂಕ್ಣಿ ತಾಲೆಂತಾಂ’ ಮ್ಹಳ್ಳೆಂ ನಾಂವ್ ಚಡ್ ಸೊಭ್ತೆಂ ನ್ಹಂಯ್ವೆ? ಕೊಂಕ್ಣಿ ಟ್ಯಾಲೆಂಟ್ಸಾವಿಶಿಂ ಥೊಡೆಂ ಸಾಂಗ್ಶಾತ್ಗೀ?
ಜಾ: ಹೆಂ ವಿಪರ್ಯಾಸ್ ತರ್ಯೀ ಸತ್, ಆಮ್ಚಾ ದೀಸ್ಪೊಡ್ತ್ಯಾ ಜಿಣ್ಯೆಂತ್ ಆಮಿಂ ವಾಪಾರ್ಚೆ ಜಾಯ್ತೆ ಸಬ್ಧ್ ಹೆರ್ ಭಾಸೆಂತ್ಲೆಂ ಅಜೂನ್ ಆಮಿ ವಾಪಾರ್ತಾಂವ್. ಎಸಿ, ಫ್ಯಾನ್, ಸೋಫಾ, ಡಾಕ್ಟರ್ ಅಶೆಂ ಸಭಾರ್ ಆಸಾತ್. ತಾಂಚೆಂ ಹರ್ಯೆಕ್ ಪರ್ಯಾಯ್ ಕೊಂಕ್ಣಿ ಸಭ್ದ್ ಸೊಧುನ್ ವ್ಹಾಪಾರ್ ಕೆಲ್ಯಾರ್ ಆಮ್ಚಾ ದೀಸ್ಪೊಡ್ತ್ಯಾ ಜಿವನಾಂತ್ ಗರ್ಜೆಭಾಯ್ಲಿ ಗುಸ್ಪೊಡ್ ಹಾಡ್ಲ್ಲೆಪರಿಂ ಜಾಯ್ತ್. ’ಕೊಂಕಣಿ ಟ್ಯಾಲೆಂಟ್ಸ್’ ಮ್ಹಳ್ಳೊ ಸಬ್ಧ್ ವ್ಹಾಪಾರ್ಚ್ಯಾಧಿಂ ಆಮ್ಚಾ ಮತಿಂತ್ ಆಸ್ಲ್ಲೆಂ ಚಿಂತಾಪ್ ಇತ್ಲೆಂಚ್; ಕುವೆಯ್ಟಾಂತ್ ಆಸ್ಚಾ ಸರ್ವ್ ಕೊಂಕ್ಣಿ ಲೊಕಾಂಕ್ ಸಮ್ಜಾಸಾರ್ಕೊ ಏಕ್ ಸಬ್ಧ್ ವಿಂಚ್ಚೊ. ದೆಖುನ್ ಹೆಂ ’ಕೊಂಕಣ್ ಟ್ಯಾಲೆಂಟ್ಸ್’ ಜಾಲೆಂ. ಪುಣ್ ಆಮ್ಚೊ ಇರಾದೊ ಕೊಂಕ್ಣಿ ತಾಲೆಂತಾಂಕ್ ಉತ್ತೇಜನ್ ಆನಿ ಪ್ರೋತ್ಸಾಹ್ ದಿಂವ್ಚೊ. ಜರ್ ತರ್ ಆಮಿಂ ಕರ್ಚೆಂ ಕಾಮ್ ಕೊಂಕ್ಣೆಚೆಂ ತರ್, ನಾಂವಾನ್ ಕಿತೆಂ ಆಸಾ?
’ಕೊಂಕಣ್ ಟ್ಯಾಲೆಂಟ್ಸ್’ ಏಕ್ ಸಂಚಾಲನ್ ನ್ಹಂಯ್, ಬಗಾರ್ ಕೊಂಕ್ಣಿ ಸಂಗೀತ್ ಶೆತಾಂತ್ ಉದೆವ್ನ್ ಯೆಂವ್ಚ್ಯಾ ತಾಲೆಂತಾಂಕ್ ಸೊಧುನ್, ತಾಂಕಾಂ ಜೊಕ್ತೊ ಆವ್ಕಾಸ್ ರಚುನ್ ದಿಂವ್ಚೊ ಆನಿ ತಾಂಚ್ಯಾ ತಾಲೆಂತಾಕ್ ಮುಖಾರ್ ಹಾಡಂವ್ಕ್ ಪ್ರೇತನ್ ಕರ್ಚೊ. ಕಿತ್ಯಾಕ್ ಮ್ಹಳ್ಯಾರ್ ಏಕ್ ಪಾವ್ಟಿಂ ಫಾಮಾದ್ ಜಾಲ್ಲ್ಯಾ ಗಾವ್ಪ್ಯಾಕ್ ಲೋಕ್ ಸಲೀಸಾಯೆನ್ ವಳ್ಕತಾ, ಪುಣ್ ನಾಂವ್ ನಾಸ್ತಾಂ ಫಕತ್ತ್ ಪ್ರತಿಭಾ ಆಸ್ಚಾಂಕ್ ಲೊಕಾಸಮೊರ್ ಹಾಡುಂಕ್ ಕೊಣೆಂ ತರ್ಯೀ ಮುಖೇಲ್ಪಣ್ ಘೆಂವ್ಚಿ ಗರ್ಜ್ ಆಸಾ. ಆಜ್ ಆಮ್ಕಾಂ ವರ್ತೊ ಸಂತೊಸ್ ಜಾತಾ ಪಳೆವ್ನ್ ಆಯ್ಚಿಂ ಥೊಡಿಂ ಬರಿಂ ಗಾವ್ಪ್ಯಾಂಕ್, ಕಿತ್ಯಾಕ್ ತಾಂಕಾಂ ಪಯ್ಲೊ ಆವ್ಕಾಸ್ ಕರ್ನ್ ದಿಲ್ಲೊ ಕೊಂಕಣ್ ಟ್ಯಾಲೆಂಟ್ಸಾನ್.
2. ಜೊನಿ ಸುರತ್ಕಲ್ವಿಶಿಂ ತುಮ್ಚೆ ಖಾಸ್ಗಿ ವಿಚಾರ್ ಕಸ್ಲೆ? ಹ್ಯಾ ವಿಶಿಂ ದೋನ್ ಸಬ್ಧ್ ಸಾಂಗ್ಶಾತ್?
ಜಾ: ಎಕಾ ಸಬ್ಧಾನ್ ಸಾಂಗ್ಚೆಂ ತರ್ - ತೊ ಭರ್ಲ್ಲೊ ಕೊಳ್ಸೊ ಜಾವ್ನಾಸ್ಲೊ. ಕೊಂಕ್ಣೆಕ್ ಲಗ್ತಿ ಜಾಲ್ಲ್ಯಾ ಚಡ್ತಾವ್ ಹರ್ಯೆಕಾಂತ್ ತಾಚಿ ಜಾಣ್ವಾಯ್ ಆನಿ ಗಿನ್ಯಾಯ್ ವಿಶೇಸ್. ಕಿತ್ಯಾಕ್ ಮ್ಹಳ್ಯಾರ್ ತೊ ತಿತ್ಲೊ ಹೆಳ್ಲ್ಲೊ, ವಾಚ್ಪಾಂತ್ ತಶೆಂಚ್ ವಾವ್ರಾಂತ್. ತರ್ಯೀ ತೊ ಸಾದೆಂಪಣ್ ಪಸಂದ್ ಕರ್ತಾಲೊ, ಕೆದಿಂಚ್ ವೆದಿಚೆರ್ ಮಾನ್ ತೊ ಆಶೆಲ್ಲೊನಾ, ಕಿತ್ಲೊ ವಾವ್ರ್ ಕೆಲ್ಯಾರೀ, ತಾಣೆಂ ಹೆರಾಂಕ್ ಮಾನ್ ದಿಲಾ ವಾ ದಿವಯ್ಲಾ ಶಿವಾಯ್ ಕೆದಿಂಚ್ ಶಾಲಾಂ, ಫಳಾಂ ಘೆಂವ್ಕ್ ನಾಂತ್. ಆಜ್ ಖರೆಂಚ್ ಜಾವ್ನ್ ಜೊನಿಚಾ ಗೈರ್ ಹಾಜ್ರೆಂತ್ ಕುವೆಯ್ಟಾಂತ್ ಕೊಂಕ್ಣೆಚೊ ಜಾಗೊ ರಿತೊ ಆಸ್ಚೊ ಸ್ವಶ್ಟ್ ದಿಸ್ತಾ.
3. ಜೆರಾಲ್ ರಿತಿನ್ ಆಯ್ಚಾ ಕೊಂಕ್ಣಿ ಪರಿಗತೆವಿಶಿಂ, ಪ್ರತ್ಯೇಕ್ ಜಾವ್ನ್ ಕುವೆಯ್ಟಾಂತ್ಲ್ಯಾ ಕೊಂಕ್ಣಿ ಪರಿಗತೆವಿಶಿಂ ತುಮ್ಚಿ ಅಭಿಪ್ರಾಯ್ ಕಸ್ಲಿ?
ಜಾ: ಕುಜ್ನಾಂತ್ ಸಾಸ್ಪೊನ್ ಆಸ್ಲ್ಲಿ ಕೊಂಕ್ಣಿ ಆತಾಂ ಸಾಲಾಕ್ ಪಾವ್ಲ್ಯಾ. ಫುಡೆಂ ಭರ್ಮಾನ್ ಹರ್ಯೆಕಾ ಲೊಕಾಂಚಾ ಕಾಳ್ಜಾಂನಿ ತಿ ರಿಗ್ತಲಿ ಮ್ಹಳ್ಳೊ ಆಶಾವಾದ್ ಮ್ಹಜೊ. ಪಾಟ್ಲ್ಯಾ ಸಭಾರ್ ವರ್ಸಾಂ ಥಾವ್ನ್ ಪಳೆವ್ನ್, ಸಮ್ಜೊನ್ ಆಯಿಲ್ಲೆಪರಿಂ, ಆಧ್ಲಿ ತಶೆಂಚ್ ಆತಾಂಚಿ ಕೊಂಕ್ಣಿ ಪರಿಗತ್ ಜಾಯ್ತಿ ಸುಧ್ರೊನ್ ಆಯ್ಲ್ಯಾ. ಹಾಕಾ ಪಾಟಿಂಬೊ ದಿಂವ್ಚಾಕ್ ಜಾಯ್ತ್ಯಾನಿ ಜಾಯ್ತ್ಯಾ ರಿತಿರ್ ವಾವ್ರ್ ಕೆಲ್ಲೊ ಕಾರಾಣ್ ಜಾವ್ನಾಸಾ. ಆಮ್ಚಾ ಮಾ|ಮೆಲ್ವಿನ್ ಡಿ’ಕುನ್ಹಾನ್ ಕುವೆಯ್ಟಾಂತ್ ಕೊಂಕ್ಣಿ ಮಿಸಾಂ ಚಡಯ್ಲಿಂ ಆನಿಂ ಭೋವ್ ಸಂತೊಸಾಚಿ ಗಜಾಲ್ ಖಂಚಿಗೀ ಮ್ಹಳ್ಯಾರ್ ಹಿಂ ಹರ್ಯೆಕ್ ಕೊಂಕ್ಣಿ ಮಿಸಾಂನಿ ಲೋಕ್ ಹಾರಿಂ ಹಾರಿಂನಿ ಯೆತಾ.
ಅಶೆಂ ಪಳೆಂವ್ಕ್ ಗೆಲ್ಯಾರ್ ಪರ್ಗಾಂವ್ಚಾ ಲೊಕಾಂ ಥಂಯ್ ಕೊಂಕ್ಣಿ ಮೋಗ್ ಆಸ್ಲ್ಲೊ, ಆಸಾ ಪುಣ್ ಜೊಕ್ತೊ ಸಂದರ್ಭ್ ನಾಸ್ತಾಂ ಹಳ್ತಾರ್ ಕುರ್ವೊನ್ ವೆತಾಲೊ. ಪುಣ್ ಕೊಂಕ್ಣೆಂತ್ ಆತಾಂ ನವಾಲಾಂ ಘಡ್ಲ್ಯಾಂತ್ ಮ್ಹಣ್ ಹಾಂವ್ ಸಾಂಗಾನಾ, ಕಿತ್ಯಾಕ್ ಮ್ಹಳ್ಯಾರ್ ಆಮ್ಚಿಂ ಕೊಂಕ್ಣಿ ಪತ್ರಾಂ ಅಜೂನ್ ಕಶ್ಟಾರ್ ಆಸಾತ್, ಆಮ್ಚೆ ಕೊಂಕ್ಣಿ ಕಲಾಕಾರ್ ಅಜೂನ್ ನಶ್ಟಾರ್ ಆಸಾತ್, ಆಮ್ಚೆ ಕೊಂಕ್ಣಿ ಸಾಹಿತಿ ಅಜೂನ್ ಬೂಕ್ ಕಾಡ್ನ್ ಸಂಕಶ್ಟಾರ್ ಆಸಾತ್. ಪುಣ್ ಸಮಧಾನೆಚಿ ಗಜಾಲ್ ಖಂಯ್ಚಿಗೀ ಮ್ಹಳ್ಯಾರ್ ಆಮ್ಚೆ ಜಾಯ್ತೆ ಸಂಘ್ ಸಂಸ್ಥೆ ಹ್ಯಾ ಕಲಾಕಾರಾಂಕ್, ಮಾನ್, ಸಮ್ಮಾನ್, ಪುರಸ್ಕಾರ್ ದಿತಾತ್ ಆನಿ ಹಳ್ತಾರ್ ಪರಿಗತಿ ಬದ್ಲೊನ್ ಕೊಂಕ್ಣಿ ಕಲಾಕಾರಾಂಚಿ ಪರಿಗತ್ ಸುಧ್ರೊಂಕ್ ಆವ್ಕಾಸ್ಯೀ ಲಾಭ್ತಲೊ ಮ್ಹಣ್ ಆಶೆವ್ಯೆತ್ - ಹಿಚ್ಚ್ ಮ್ಹಜಿ ಅಭಿಪ್ರಾಯ್.
4. ಕೊಂಕ್ಣೆಚೊ ಫುಡಾರ್ ತುಮ್ಚೆಪ್ರಕಾರ್ ಕಸೊ ಆಸಾ?
ಜಾ: ಕೊಂಕ್ಣೆಕ್ ಬರೊ ಫುಡಾರ್ ಆಸಾ, ಎದೊಳ್ ಪರ್ಯಾಂತ್ ಆಮಿಂ ಸ್ವಪ್ಣಾಂ ಪಳೆಲ್ಲ್ಯಾಂವ್ ಮಾತ್ರ್, ಆತಾಂ ಆಮಿಂ ತಿಂ ಜ್ಯಾರಿ ಜಾಂವ್ಚಿಂ ಪಳೆತೆಚ್ಚ್ ಆಸಾಂವ್, ಆಜ್ ಆಮ್ಚಾ ಮಂಗ್ಳುರಾಂತ್ಲ್ಯಾ ಇಸ್ಕೊಲಾಂನಿ ಕೊಂಕ್ಣಿ ಶಿಕಯ್ತಾತ್. ಮ್ಹಣ್ತಚ್ ಕೊಂಕ್ಣೆಕ್ ನವೊ ಜೀವ್ ಭರ್ಲಾಶೆಂ ಭಗ್ತಾ. ದೆಕುನ್ ಕೊಂಕ್ಣಿ ಭಾಸ್ ಆಳ್ವತಾ ಮ್ಹಳ್ಳೆಂ ದುರ್ಸೊಣೆಂ ಮ್ಹಜೆಪ್ರಕಾರ್ ಪೊಕೊಳ್. ಕೊಂಕ್ಣಿ ಅನಿಕ್ಯೀ ಜಿವಾಳ್ ಜಾತೆಲಿ, ಫುಲ್ತೆಲಿ ಮ್ಹಳ್ಳೆಂ ಮ್ಹಜೆಂ ಚಿಂತಾಪ್.
5. ತುಮಿಂ ಎದೊಳ್ ಪರ್ಯಾಂತ್ ತುಮ್ಚಾ ಜಿಣ್ಯೆಂತ್ ಕೊಂಕ್ಣೆಖಾತಿರ್ ಕೆಲ್ಲ್ಯಾ ವಾವ್ರಾಂತ್ ಸಮಧಾನ್ ವಾ ತೃಪ್ತಿ ಜೊಡ್ಲ್ಯಾ?
ಜಾ: ಸಮಧಾನ್ ಆಸಾ ಪುಣ್ ತೃಪ್ತಿ ನಾ. ಕಿತ್ಯಾಕ್ ಮ್ಹಳ್ಯಾರ್ ಕೊಂಕ್ಣೆಚ್ಯಾ ವಾ ಖಂಚ್ಯಾಯ್ ಭಾಸೆಂತ್ಲ್ಯಾ ಕಲಾಕಾರಾಕ್ ಜೀಣ್ಭರ್ ಸಾಧನ್ ಕರ್ಚೆಂ ಜಾಯ್ತೆಂ ಆಸ್ತಾ, ಏಕ್ ಮೇಟ್ ಚಡ್ತಚ್ ತಾಕಾ ಅನ್ಯೇಕ್ ಮೇಟ್ ಚಡ್ಚಿ ತಾಳ್ಣಿ ಆನಿ ಆಶಾ ಉಭ್ಜತಾ, ತೆಂ ಚಡ್ತಚ್ ಅನ್ಯೇಕ್.. ಅಶೆಂ ಮನ್ಶ್ಯಾ ಆಶೆಂಕ್ ಮುಟಿಂತ್ ದವ್ರುಂಕ್ ಸಾಧ್ಯ್ ನಾ. ಎಕಾಲೆಕಾರ್ ತೆಂ ಬರೆಂಚ್ - ಜೆದ್ನಾಂ ಪರ್ಯಾಂತ್ ಎಕಾ ಭಾಸೆಚ್ಯಾ ಖಂಚ್ಯಾಯ್ ಪ್ರಕಾರಾಚಿ ವ್ಹಾಡಾವಳ್ ಹ್ಯಾವರ್ವಿಂ ಜಾಯ್ತ್ ತರ್ ತಸಲಿಂ ಮೆಟಾಂ ಹರ್ಯೆಕಾ ಕಲಾಕಾರಾನ್ ಚಡೊಂಕ್ ಜಾಯ್. ಆಮ್ಚಾ ಕೊಂಕ್ಣೆಂತ್ ಖಂಚ್ಯಾಯ್ ಪ್ರಕಾರಾಂತ್ ಪುರ್ತೊ ವೇಳ್ ಘಾಲುಂಖ್ ಗೆಲ್ಯಾರ್ ಕುಟ್ಮಾಕ್ ವಾಟೆರ್ ಘಾಲಿಜಾಯ್ ಪಡಾತ್. ಅಸಲೆ ಜಾಯ್ತೆ ಧಾಖ್ಲೆ ಕೊಂಕ್ಣೆಂತ್ ಆಸಾತ್, ಕೊಂಕ್ಣಿ ಕೊಂಕ್ಣಿ ಮ್ಹಣೊನ್ ಅಖ್ರೇಕ್ ವಾಟೆರ್ ಪಡೊನ್ ಮೆಲ್ಲೆ ಕಲಾಕಾರ್ ಆಸಾತ್. ತಶೆಂ ಆಸ್ತಾಂ ಆಮ್ಚೊ ದೀಸ್ಪಡ್ತೊ ಗ್ರಾಸ್ ಜೊಡ್ಚಿ ವಾಟ್ ಪಯ್ಲೆಂ ಆಮಿ ವಿಂಚಿಜಾಯ್, ಆನಿ ಆಮ್ಚಾ ದೀಸ್ಪೊಡ್ತ್ಯಾ ವಾವ್ರಾಮಧೆಂ ಮೆಳ್ಚಾ ವೆಳಾಂತ್ ಇಲ್ಲೊ ವೇಳ್ ಕೊಂಕ್ಣೆಕ್ ದಿಲೊ ತರ್ ಧಾರಾಳ್ ಪುರೊ. ಮ್ಹಜ್ಯಾ ತಾಂಕಿಭಿತರ್ ಜ್ಯೆ ಕಿತೆಂ ಜಾತಾ ವಾ ಜಾಲಾಂ ತೆಂ ಹಾಂವೆಂ ಕೆಲಾಂ.
6. ತುಮ್ಚ್ಯಾ ಜಿಣ್ಯೆಂತ್ ತುಮ್ಕಾಂ ಥರ್ಥರಾಯಿಲ್ಲೆಂ ಘಟನ್ ವಾ ಘಡಿತ್ ಕಾಂಯ್ ಆಸಾ?
ಜಾ: ವ್ಹಯ್!, ಮ್ಹಜಿ ಮಾಲ್ಘಡಿ ಧುವ್ ಜೆದ್ನಾಂ ಅಂತರ್ಲೆಂ - ಹ್ಯಾ ಘಡಿತಾನ್ ಮ್ಹಾಕಾ ತಶೆಂಚ್ ಮ್ಹಜ್ಯಾ ಪತಿಣೆಕ್ ಥರ್ಥರಾಯ್ಲೆಂ ಮಾತ್ರ್ ನ್ಹಂಯ್ ಜಿವಿತಾಂತ್ ಶೆವ್ಟಾಯ್ಲೆಂ. ತೆಚ್ಚ್ ದಿಸಾ ಮ್ಹಜೊ ಅನ್ಯೇಕ್ ಖಾಸ್ ಮಿತ್ರ್ ಬೆನೆಟ್ ಪಿಂಟೊಯೀ ಅಂತರ್ಲೊ.
7. ಆಮ್ಚಾ ಕೊಂಕ್ಣಿ ಸಮಾಜೆಂತ್ ಆಮಿಂ ಜಾವ್ನ್ ಕರಿನಾತ್ಲ್ಲೆಂ ಹೆರಾಂನಿ ಕರ್ತಾನಾ ಪಳೆಂವ್ಕ್ ಜಾಯ್ನಾ - ಅಶೆಂ ಕಿತ್ಯಾಕ್?
ಜಾ: ಎಕಾಚ್ಚ್ ಉತ್ರಾನ್ ಸಾಂಗ್ಚೆಂ ತರ್ - ಹೊ ಮೊಸೊರ್!. ದೆಖುನ್ ಆಮ್ಚಿ ಸಮಾಜ್ ದಿಸಾನ್ ದೀಸ್ ಮೊಡೊನ್ ವೆತಾ ತರ್ಯೀ ಆಮಿಂ ಎದೊಳ್ಯೀ ಲಿಸಾಂವ್ ಶಿಕೊಂಕ್ ನಾಂವ್, ಆತಾಂಯ್ ಶಿಕಾನಾಂವ್, ಆನಿ ಫುಡೆಂಯೀ ಶಿಕ್ಚೆಂನಾಂವ್. ಎಕಾ ರಿತಿಚಿ ಆಳ್ಸಾಯ್, ಆಮ್ಕಾಂ ಕಿತೆಂ ಪಡೊನ್ ಗೆಲಾಂ ಮ್ಹಳ್ಳೆಂ. ಹೊ ಮೊಸೊರ್ ಎಕಾ ಹಂತಾ ಪರ್ಯಾಂತ್ ಬರೊ. ಪುಣ್ ಹಳ್ತ್ ಮಿರ್ವೊನ್ ಗೆಲ್ಯಾರ್ ಭೋವ್ ಪಾಡ್ - ಕೊಂಕ್ಣೆಚ್ಯಾ ಮಟ್ಟಾಕ್.
8. ತುಮಿಂ ’ಪ್ಯಾರಡೇಲಾ’ ಚೆ ಸಕ್ರಿಯ್ ಸಾಂದೆ ಜಾವ್ನಾಸ್ಲ್ಲ್ಯಾತ್, ಪ್ಯಾರಡೆಲಾವಿಶಿಂ ಇಲ್ಲೆಂ ಸಾಂಗ್ಶಾತ್?
ಜಾ: ಪ್ಯಾರಡೆಲಾ ಮ್ಹಳ್ಯಾರ್ ಆಮಿಂಚ್ ಇಜಯ್ಚ್ಯಾ ಥೊಡ್ಯಾ ಉರ್ಭೆವಂತ್ ಯುವಜಣಾಂನಿ, ತಶೆಂಚ್ ಹೆರ್ ಫಿರ್ಗಜೆಚ್ಯಾ ಥೊಡ್ಯಾ ಆಮ್ಚಾ ಇಶ್ಟಾಂನಿ ಎಕ್ಟಾಂಯ್ ಜಾವ್ನ್, ಕೊಂಕ್ಣಿ ತಾಲೆಂತಾಂ ಸೊಧುನ್, ತಾಂಕಾಂ ಆವ್ಕಾಸ್ ಕರುನ್ ದಿಂವ್ಚಾಕ್ ಆಸಾ ಕೆಲ್ಲೊ ಪಂಗಡ್.
9. ಮಿಕ್ಮ್ಯಾಕ್ಸ್ ಆನಿ ತುಮ್ಚೆ ಮಧ್ಲೊ ಭಾಂಧ್ - ಹ್ಯೇವಿಶಿಂ ದೋನ್ ಸಬ್ಧ್ ಸಾಂಗ್ಶಾತ್?
ಜಾ: ಮ್ಹಜೊ ಖಾಸ್ ಮಿತ್ರ್ ತಶೆಂಚ್ ಮ್ಹಜೊ ಪ್ರತಿಸ್ಪರ್ಧಿ ಮಿಕ್ಮ್ಯಾಕ್ಸ್ ಖರೊಚ್ಚ್ ಜಾವ್ನ್ ಮ್ಹಜೊ ಖಾಸ್ ಮಿತ್ರ್. ಆಮಿಂ ಎಕಾಮೆಕಾ ಸ್ಪರ್ಧೊ ಆಸ್ಲೊ ತರ್ಯೀ ಆಮಿಂ ಲಾಗ್ಶಿಲೆ ಮಿತ್ರ ಜಾವ್ನಾಸ್ಲ್ಲ್ಯಾಂವ್. ತಾಚೆಲಾಗಿಂ ತಾಲೆಂತಾಚೊ ಪುಂಜೊಚ್ ಆಸ್ಲೊ. ಆಜ್ ತೊ ಆಮ್ಚೆ ಮಧೆಂ ನಾ ಮ್ಹಣ್ತಚ್ಚ್ ತಾಚೆವಿಶಿಂ ಉಲ್ಲೇಕ್ ಕರ್ನ್ ಕಸ್ಲೊಚ್ಚ್ ಫಾಯ್ದೊ ನಾ. ಪುಣ್ ಮ್ಹಜ್ಯಾ ಜಿಣ್ಯೆಂತ್ ಹಾಂವೆಂ ಕೊಂಕ್ಣೆಂತ್ ಮೆಳ್ಲ್ಲ್ಯಾ ಭೋವ್ ತಾಲೆಂತ್ವಂತ್ ಕಲಾಕಾರಾಂ ಪಯ್ಕಿಂತ್ ಮಿಕ್ಮ್ಯಾಕ್ಸ್ ಎಕ್ಲೊ ಮ್ಹಣ್ ಖಂಡಿತ್ ಸಾಂಗ್ತಾಂ.
10. ತುಮಿಂ ಏಕ್ ಗಾವ್ಪಿ, ತುಮ್ಕಾಂ ಸಂಗೀತಾಂತ್ ಕೊಣಾಚೆಂ ಪ್ರೇರಣ್ ಲಾಭ್ಲೆಂ?
ಜಾ: ಖಂಡಿತ್ ಜಾವ್ನ್ ಮ್ಹಾಕಾ ಪ್ರೇರಣ್, ದೇಕ್, ಆದರ್ಶ್ ಜಾವ್ನಾಸಾ ಕೊಂಕ್ಣಿ ಕೊಗುಳ್ ವಿಲ್ಫಿ ರೆಬಿಂಬಸ್. ತಾಚೆ ಥಾವ್ನ್ ಹಾಂವ್ ಮೊಸ್ತ್ ಶಿಕೊನ್ ಆಯ್ಲಾಂ.
11. ತುಮ್ಚಾ ಜಿಣ್ಯೆಂತ್ ತುಮ್ಕಾ ಪ್ರೇರಣ್/ಆಧಾರ್/ಪಾಟಿಂಬೊ ದಿಲ್ಲಿಂ ಕೊಣ್?
ಜಾ: ಮ್ಹಜ್ಯಾ ಜಿಣ್ಯೆಂತ್ ಮ್ಹಾಕಾ ಜಾಯ್ತ್ಯಾಂನಿ ಜಾಯ್ತ್ಯಾ ರಿತಿರ್ ಆಧಾರ್ ದಿಲಾ, ಪಾಟಿಂಬೊ ದಿಲಾ. ಕುವೆಯ್ಟಾಕ್ ಹಾಂವ್ ಆಯಿಲ್ಲ್ಯಾ ಥಾವ್ನ್ ಮ್ಹಾಕಾ ಆಧಾರ್ ದಿಲ್ಲೆ ಜಾವ್ನಾಸಾತ್ ಲಾರೆನ್ಸ್ ಪಿಂಟೊ ಆನಿ ಲುವಿಸ್ ರೊಡ್ರಿಗಸ್, ತಶೆಂಚ್ ಮ್ಹಾಕಾ ಆಧಾರ್ ದಿಲ್ಲೆ ಹೆರ್ ಜಾವ್ನಾಸಾತ್ ಗ್ರೇಶಿಯನ್ ರೊಡ್ರಿಗಸ್, ಲ್ಯಾನ್ಸಿಲೋಟ್ ಪಿಂಟೊ ಇಜಯ್, ತೋಮಸ್ ಮೋರಸ್. ತಶೆಂಚ್ ಮ್ಹಜ್ಯಾ ಪತಿಣೆನ್ ದಿಲಾ.
12. ದಾಯ್ಜ್.ಕೊಮ್ ತುಮಿಂ ವಾಚ್ಲಾಂ? ವಾ ದಾಯ್ಜ್.ಕೊಮ್ವಿಶಿಂ ತುಮಿಂ ಆಯ್ಕಲಾಂ? ತರ್ ತುಮ್ಚೆ ವಿಚಾರ್ ಕಸ್ಲೆ?
ಜಾ: ಎದೊಳ್ ಪರ್ಯಾಂತ್ ಏಕ್ ದೀಸ್ ಸಯ್ತ್ ಉದೆಂವ್ಕ್ ನಾ ಹಾವೆಂ ದಾಯ್ಜ್.ಕೊಮ್ ವಾಚಿನಾತ್ಲ್ಲೊ. ಜಿತ್ಲಿಂ ಕೊಮಾಂ ಆಸಾತ್ಗೀ, ತಿತ್ಲಿಂ ಹಾಂವ್ ವಾಚ್ತಾಂ, ದಾಯ್ಜ್ ಡಾಟ್ ಕೊಮ್ ಮ್ಹಜೆಂ ಕಾಳ್ಜಾಕ್ ಲಾಗ್ಶಿಲೆಂ ಸಾಯ್ಟ್. ಹಾಂತುಂ ತುಮಿಂ ಜ್ಯೆ ಆಧ್ಲೆಂ ಕೊಂಕ್ಣಿ ದಾಯ್ಜ್ ಪರತ್ ಜಿವಾಳ್ ದವ್ರುಂಕ್ ಸಾಧನ್ ಕರ್ತಾತ್ - ತೆಂ ಭೋವ್ ಕಶ್ಟಾಂಚೆಂ ಆನಿ ಗರ್ಜೆಚೆಂ ಕಾಮ್. ಆಯ್ಚಾ ಚಡ್ತಾವ್ ಲೊಕಾಕ್ ಆಮ್ಚಾ ಕೊಂಕ್ಣೆಂತ್ಲ್ಯಾ ಆಧ್ಲ್ಯಾ ಲೇಖಕಾಂಚಿ ವಳೊಕ್ ಸೊಡ್ಯಾಂ ನಾಂವ್ ಸಯ್ ಆಯ್ಕಾನಾತ್ಲ್ಲೆ ಆಸಾತ್. ತುಮ್ಚಾ ಮಿನತೆನ್ ಕೊಂಕ್ಣೆಚೊ ಸಾಹಿತಿಕ್ ವಾವ್ರ್ ಕೆಲ್ಲ್ಯಾ ಹ್ಯಾ ಸರ್ವ್ ಪರ್ನ್ಯಾ ತಶೆಂಚ್ ತರ್ನ್ಯಾ ಲೇಖಕಾಂಚೆಂ ವಿಂಚ್ಣಾರ್ ಸಾಹಿತ್ಯ್ ತುಮಿ ಪರ್ಗಟ್ಚೆಂ ನಿಜಾಯ್ಕೀ ವರ್ತೆಂ ಕಾಮ್. ಎಕಾ ಇಂಗಿಷ್ ಉತ್ರಾನ್ ಸಾಂಗ್ತಾಂ (ಮಾಫ್ ಕರಾ) ’ಎಕ್ಸೆಲ್ಲೆಂಟ್’ (Excellent).
13. ಕೊಂಕ್ಣಿ ಕಾರ್ಭಾರಿ ಅಂಕಣಾವಿಶಿಂ ತುಮ್ಚಿ ಅಭಿಪ್ರಾಯ್ ಕಸಲಿ?
ಜಾ: ಹಾವೆಂ ಸಮ್ಜಲ್ಲೆಪ್ರಕಾರ್ ಕೊಂಕ್ಣಿ ಕಾರ್ಭಾರಿ ಅಂಕಣ್, ಕೊಂಕ್ಣೆಂತ್ ವೆವೆಗ್ಳ್ಯಾ ಶೆತಾಂನಿ ವೆವೆಗ್ಳ್ಯಾ ರಿತಿರ್ ಪರ್ದ್ಯಾ ಪಾಟ್ಲ್ಯಾನ್ ಕಾಮ್ ಕರ್ಚ್ಯಾಂಕ್ ತುಮಿಂ ಸೊಧುನ್ ಕಾಡ್ನ್ ಮುಖಾರ್ ಹಾಡ್ಲಾಂ, ಹೆಂ ಕಾಮ್ ಖರೆಂಚ್ ಜಾವ್ನ್ ಭೋವ್ ಕಶ್ಟಾಂಚೆಂ. ಹೆಂ ಕಾಂಯ್ ಕೊಣಾಯ್ಕೀ ಫುಂಕ್ಯಾಚಿ ಪಬ್ಲಿಸಿಟಿ ದಿಂವ್ಚೆಂ ಅಂಕಣ್ ನ್ಹಂಯ್, ತಸಲಿ ಪಬ್ಲಿಸಿಟಿ ಹ್ಯಾ ಕಾರ್ಭಾರ್ಯಾಂಕ್ ಜಾಯ್ ಮ್ಹಣ್ಯೀ ನಾ, ಆನಿ ತಸಲಿ ನಾಂವ್/ಪಬ್ಲಿಸಿಟಿ ಆಶೆತೆಲ್ಯಾಂಕ್ ತುಮಿಂ ಆವ್ಕಾಸ್ಯೀ ದೀನಾಂತ್ - ಹೆಂ ತುಮ್ಚೆಂ ಪ್ರಾಮಾಣಿಕ್ಪಣ್ ಆನಿ ಕೊಂಕ್ಣೆಚೊ ಹುಸ್ಕೊ ಧಾಖಯ್ತಾ.
14. ದಾಯ್ಜ್ ವಾಚ್ಪ್ಯಾಂಕ್ ತುಮ್ಚೆ ಸಂದೇಶ್ ಕಸ್ಲೆ?
ಜಾ: ಕೊಂಕ್ಣಿ ಆಮ್ಚಿ ಆವಯ್ಭಾಸ್, ತಿಕಾ ದಿಲ್ಲೊ ವಾ ದಿಂವ್ಚೊ ಮಾನ್ ಆಮ್ಚಾಚ್ ಆವಯ್ಕ್ ಮಾನ್ ದಿಲ್ಲೆಪರಿಂ ದೆಖುನ್ ಭರ್ಮಾನ್ ಕೊಂಕ್ಣಿ ಉಲಯಾ, ಪ್ರಚಾರ್ ಕರಾ ತಶೆಂಚ್ ಕೊಂಕ್ಣಿ ಕಲಾಕಾರಾಂಕ್ ತುಮ್ಚಾ ತಾಂಕಿಚೊ ಪ್ರೋತ್ಸಾಹ್ ದಿಯಾ. ಕಿತ್ಯಾಕ್, ಕೊಂಕ್ಣಿ ಕಲಾಕಾರ್ ಜಾವ್ನಾಸಾತ್ ಕೊಂಕ್ಣೆಚೆ ಖಾಂಬೆ ಆನಿ ಜರ್ ಖಾಂಬೆಚ್ ಕೊಸ್ಳೊನ್ ಪಡ್ತಿತ್ ತರ್ ಉಪ್ರಾಂತ್ ಕೊಂಕ್ಣೆಂತ್ ಕಿತೆಂ ಉರ್ಲೆಂ?
15. ದೇವ್ ಬರೆಂ ಕರುಂ ಗ್ರೇಶಿಯನಾಬ್ ತುಮ್ಚಾ ಅಮೊಲಿಕ್ ವೆಳಾಕ್ ತಶೆಂಚ್ ಅಪುರ್ಭಾಯೆಚ್ಯಾ ವಿಚಾರಾಂಕ್.
ಜಾ: ದೇವ್ ಬರೆಂ ಕರುಂ ಮೆಲ್ವಿನ್ ತುಕಾ ತಶೆಂಚ್ ವಲ್ಲಿಯಾಬಾಕ್. ತುಮ್ಚಿಂ ಕಾಮಾಂ ಅಶಿಂಚ್ ಬರಿಂಚ್ ಆಸೊಂದಿತ್ ಆನಿ ಸರ್ವ್ ಲೊಕಾಂಕ್ ಹಾಂಚೊ ಫಾಯ್ದೊ ಲಾಭೊಂದಿ ಮ್ಹಣ್ ಆಶೆತಾಂ.
ಹ್ಯಾ ಆಧ್ಲೆ ಕಾರ್ಭಾರಿ: 1, 2, 3, 4, 5, 6, 7, 8, 9, 10, 11, 12, 13, 14, 15, 16, 17, 18, 19
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
