ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಮಟ್ವಿ ಕಥಾ: ಕೊರ್ಗೊರ್ಲೆಂ
ಜೊರ್ಜಿ ಪೀಂತ್ ಆಯ್ಕೊಳ್: ಕೊಂಕ್ಣಿ ಸಾಹಿತ್ಯಾಂತ್ ಮ್ಹಾಕಾ ಹಾಚಿ ಸಳಾವಳ್ ಜಾಲ್ಲಿ ತಾಚಾ ಅಖ್ರೇಚಾ ಥೊಡ್ಯಾ ವರ್ಸಾಧಿಂ ತರ್ಯ್ ಹಾಂವೆಂ ಕಾಳ್ಜಾ ಮನಾನ್ ಏಕ್ ಪ್ರಾಮಾಣಿಕ್ ಸಾಹಿತಿ, ಚಿಂತ್ಪಿ ಮ್ಹಣ್ ಮಾಂಧುನ್ ಘೆತ್ಲ್ಲ್ಯಾ ಭೋವ್ ಥೊಡ್ಯಾಂ ಪಯ್ಕಿ ಹೊ ಎಕ್ಲೊ. ಆಮಿಂ ಜಾಯ್ತೆಪಾವ್ಟಿಂ ಎಕಾಮೆಕಾ ರಾಗ್ ಕೆಲಾ ತರ್ಯ್ ಎಕಾಮೆಕಾ ಥಂಯ್ ಗೌರವ್ ಆನಿ ಅಭಿಮಾನ್ ದವರ್ಲಾ. ಹಿ ಭೋವ್ಶಾ ತಾಚಾ ಹೆರ್ ಪಂಚ್ವೀಸ್ ಕಾಣ್ಯಾಂ ತಸಲಿಚ್ಚ್ ಆನಿ ತೆಚ್ಚ್ ಪರಿಪಕ್ವ್ ವಿಚಾರಾಂಚಿ, ತಿಚ್ಚ್ ಮನಿಸ್ ಆನಿ ಜಾತ್-ಕಾತ್ ಮ್ಹಳ್ಳ್ಯಾ ಪರ್ಧ್ಯಾ ಮಧೆಂ ಶಿರ್ಕಾಲ್ಲಿ, ತುಕಾ ಜರೂರ್ ರುಚ್ತೆಲಿ ಮ್ಹಣ್ ಪಾತ್ಯೆತಾಂ..
[ಹಿ ದೆ|ಜೊರ್ಜಿ ಪೀಂತ್ ಆಯ್ಕೊಳ್ ಹಾಚಿ ಅಖ್ರೇಚಿ ಮಟ್ವಿಕಾಣಿ]
ಜೊರ್ಜಿ ಪೀಂತ್ ಆಯ್ಕೊಳ್
[10-08-1956 - 11-05-2003]
ಸಾಂಜ್ ಜಾವ್ನ್ ಆಯಿಲ್ಲಿ. ದೀಸ್ ಬುಡ್ಲ್ಲೊ ಆನಿಂ ದಿಗಂತಾರ್ ದಿಸಾಚೊ ನಿಮಾಣೊ ಪರ್ಜಳ್ ನಪಂಯ್ಚ್ ಜಾಂವ್ಚಾ ತಯಾರಾಯೆರ್ ಆಸ್ಲ್ಲೊ. ಮ್ಹಜಾ ಮತಿಂತ್ಯೀ ಸಾಂಜ್ ಜಾಲ್ಲಿ. ಕಠೀಣ್ ಖಾಲಿಪಣಾನ್ ಧಾಡ್ ಘಾಲ್ಲಿ. ಉರ್ಲ್ಲಿಂ ಫಕತ್ ಸವಾಲಾಂ. ಚಿಂತ್ನಾಂಚಿಂ ಲಾರಾಂ. ಭಿತರ್ಲ್ಯಾ ಭಿತರ್ ಉಮಾಳ್ಚ್ಯಾ ಭಗ್ಣಾಂಚಿಂ ವಾದಾಳಾಂ. ಮನ್ಶಾಕ್ ದೆವಾನ್ ಆಪ್ಲ್ಯಾಚ್ ಸಾರ್ಕ್ಯಾಚೊ ಜಾವ್ನ್ ರಚ್ಲಾ. ತರೀ ಮನ್ಶಾ ಮನ್ಶಾ ಮಧೆಂ ಇತ್ಲೊಯ್ ಫರಕ್ ಕಿತ್ಯಾಕ್? ಹೆಂ ದೆವಾನ್೦ಚ್ ದಿಲ್ಲೆಂ ಫರಕ್ ವ ಮನ್ಶಾನ್ ಕರ್ನ್ ಘೆತ್ಲ್ಲೆಂ? ಆಪ್ಲ್ಯಾ ನಶೀಬಾಂತ್ ಭೊಗ್ಲ್ಲೆಂ ವಾ ಆದ್ಲ್ಯಾ ಜಲ್ಮಾಂತ್ಲ್ಯಾ ಆಪ್ಲ್ಯಾ ಕರ್ಮಾಂಚೊ ಫಳ್ ಜಾವ್ನ್ ಮೆಳ್ಲ್ಲೆಂ? ಕಿತ್ಯಾಕ್ ಹೆಂ ಫರಕ್? ಕಿತ್ಯಾಕ್?
ತ್ಯಾ ಗೈರ್ ಸಾಂಜೆರ್ ಮುಖ್ಲ್ಯಾ ಪಾಡಿಂತ್ಲೆಂ ಖೊಮಾಟ್, ಭಾತೆಣಾಚಾ ಮುಟ್ಯಾಪರಿಂ ದಿಸ್ತಾಲೆಂ. ಆಜ್ ತಾಂತುಂ ಚಿಮ್ಣಿ ಜಳಾನಾತ್ಲ್ಲಿ. ಚಿಮ್ಣಿಂಚ್ ನ್ಹಂಯ್, ರಾಂದ್ಣಿರ್ ಉಜೊಯ್ ಜಳೊಂಕ್ನಾ ಆಸ್ತಲೊ. ಮ್ಹಾತಾರೆಂ ಕೊರಪುಲು ಕಾಂಯ್ ರಡೊನ್ ರಡೊನ್ ಕಂಗಾಲ್ ಜಾವ್ನ್ ತಶೆಂಚ್ ನಿದ್ಲಾಂ ಆಸ್ತೆಲೆಂ. ತಾಚ್ಯಾ ಮಾತಾರ್ಪಣಾರ್ ತಾಕಾ ಆಸ್ರೊ ಜಾಂವ್ಚೆಂ ತಾಚೆಂ ಧುವ್ ಚಿನ್ನಿ ಆಜ್ ಮಾತ್ಯೆಕ್ ಸಾರೆಂ ಜಾಲ್ಲೆಂ. ಚಿನ್ನಿಚೊ ಉಡಾಸ್ ಯೆತಾನಾ ಮ್ಹಜಿ ಮತ್ ಪಾಟಿಂ ಧಾಂವ್ಲಿ. ಆಮಿಂ ದೊಗಾಂಯ್ನೀ ಸಾಂಗಾತಾ ಬಸೊನ್ ಸುಕ್ಲ್ಲೆ ಉಂಡೆ ಖಾಂವ್ಚೆಂ ದ್ರಶ್ಯ್ ಮ್ಹಜಾ ದೊಳ್ಯಾಂ ಮುಖಾರ್ ಆಯ್ಲೆಂ.
"ನಾಗೆರೆ, ತೆಂ ತುವೆಂ ಖಾಂವ್ಚೆಂ ನ್ಹಂಯ್, ಯೇ ತುಕಾ ದುಸ್ರೊ ದಿತಾಂ." ಕೊರಪುಲುನ್ ಮ್ಹಜಾ ಹಾತಾಂತ್ಲೊ ಸುಕೊ ಉಂಡ್ಯಾ ಕುಡ್ಕೊ ವೋಡ್ನ್ ಘೆವ್ನ್ ಚಿನ್ನಿಕ್ ದೀವ್ನ್ ಆಪ್ಲೆ ವೊಂಟಿಯೆಂತ್ ಲಿಪಯಿಲ್ಲೊ ಬರೊ ಮೋವ್ ಉಂಡೊ ಮ್ಹಾಕಾ ದಿಲ್ಲೊ.
"ತುಂ ತ್ಯಾ ಕೊರಪುಲುಚೆಂ ದೂದ್ ಖಾವ್ನ್ ವ್ಹಡ್ ಜಾಲ್ಲೊಯ್ರೇ ಪುತಾ" ಮ್ಹಜಿ ಆವಯ್ ಕೆದಾಳಾಯ್ ಸಾಂಗ್ತಾಲಿ ಮ್ಹಾಕಾ. "ದೆಖುನ್ ತುಕಾ ತಾಪ್ ಶೆಳ್ ಕಿತೇಂಯ್ ಯೇನಾ" ಹಾಂವೆಂ ಮ್ಹಜಾ ಬಾಬಾಕ್ ಪಳೆಂವ್ಕ್ನಾ. ಮಾಂಯ್ ಕೂಲಿಚಾ ಕಾಮಾಕ್ ವೆತಾನಾ ಮ್ಹಾಕಾ ಕೊರಪುಲುಲಾಗಿಂ ಸೊಡ್ನ್ ವೆತಾಲಿ ಖಂಯ್. ತಶೆಂ ಚಿನ್ನಿ ಆನಿ ಹಾಂವ್ ಸಾಂಗಾತಾ ಸಾಂಗಾತಾಚ್ ವಾಡ್ಲ್ಲ್ಯಾಂವ್. ಮಾಂಯ್ ಕಾಮ್ ನಾಸ್ತಾನಾ ಘರಾ ಆಸ್ಲ್ಯಾರ್ ಮ್ಹಾಕಾ ಕೊರಪುಲುಗೆರ್ ಧಾಡಿನಾತ್ಲ್ಲಿ. ತೆದಾಳಾ ಹಾಂವೆ ಕಿತ್ಯಾಖಾತಿರ್ ತರೀ ರಡ್ಲ್ಯಾರ್ ಯಾ ಸಳ್ ಕೆಲ್ಯಾರ್ ಆನಿಂ ತೆಂ ಕೊರಪುಲುಚಾ ಕಾನಾಂಚೆರ್ ಪಡತ್ ತರ್ ತೆಂ ಆಸಾ ತಶೆಂಚ್ ಧಾಂವೊನ್ ಯೆತಾಲೆಂ. ತಾಚಾ ಪಾಟ್ಲ್ಯಾನ್ ಚಿನ್ನಿ. ತಾಂಕಾಂ ಪಳೆಯ್ತಾನಾ, ಮ್ಹಾಕಾ ಹಾಂವ್ ರಡ್ಲ್ಲೊಂ ಕಿತ್ಯಾಕ್ ತೆಂ ವಿಸರ್ ಪಡ್ತಾಲಿ. ಹಾಂವ್ ಆನಿ ಚಿನ್ನಿ ಆಂಗ್ಣಾಂತ್ ಖೆಳ್ತಾನಾ ಮಾಂಯ್ ಆನಿ ಕೊರಪುಲು ಸೊಪ್ಯಾರ್ ಬಸೊನ್ ಪಾನ್ಪೊಡ್ ಖಾವ್ನ್ ಗಜಾಲಿ ಕರ್ತಾಲಿಂ.
"ಮಾಂಯ್ ತೀಂ ಆಮ್ಗೆರ್ ಭಿತರ್ ಕಿತ್ಯಾಕ್ ಯೇನಾಂತ್?" ಹಾಂವೆಂ ಜಾಯ್ತೆ ಪಾವ್ಟಿಂ ಮಾಂಯ್ಲಾಗಿಂ ವಿಚಾರ್ಲ್ಲೆಂ. ಆನಿ ತಿಚಿ ಕೆದಾಳಾಯ್ ಎಕ್ಚ್ ಜಾಪ್ "ತಿಂ ಕೊರ್ಗೊರ್ಲಿಂ ಪುತಾ, ದೆಖುನ್ ತೀಂ ಆಮ್ಗೆರ್ ಬಿತರ್ ಯೇನಾಂತ್" ತೆದಾಳಾ ಮ್ಹಾಕಾ ಬೊಗ್ತಾಲೆಂ - ಭೋವ್ಶಾ ಆಮ್ಚಿ ಕಿತೇಂಯ್ ಚೂಕ್ ಆಸ್ತೆಲಿ. ದೆಖುನ್ ತೀಂ ಆಮ್ಘೆರ್ ಭಿತರ್ ಯೇನಾಂತ್ ಕೊಣ್ಣಾಂ ಮ್ಹಣೊನ್. ಪೂಣ್ ತಶೆಂ ವಿಚಾರುಂಕ್ ಕಳಾನಾತ್ಲ್ಲೆಂ.
ಮ್ಹಾಕಾ ಕಳೊಂಕ್ ಸುರು ಜಾಲ್ಲೆಂ ಆಮಿಂ ಇಸ್ಕೊಲಾಕ್ ವೆತಾನಾ. ಚಿನ್ನಿ ಮ್ಹಜಾಕೀ ಏಕ್ ವರ್ಸಾಕ್ ವ್ಹಡ್ ತರೀ ಆಮ್ಕಾಂ ಸಾಂಗಾತಾಚ್ ಇಸ್ಕೊಲಾಕ್ ಭರ್ತಿ ಕೆಲ್ಲೆಂ. ತೇಂಯ್ ಮಾಂಯ್ಚಾ ವತ್ತಾಯೆಕ್ ಲಾಗೊನ್ ಆನಿ ಮಾಂಯ್ನ್ ವತ್ತಾಯ್ ಕೆಲ್ಲಿ ಚಿನ್ನಿ ಯೇನಾಂ ತರ್ ಹಾಂವ್ ಇಸ್ಕೊಲಾಕ್ಚ್ ವಚಾನಾ ಮ್ಹಣೊನ್ ಸಳ್ ಕೆಲ್ಲ್ಯಾನ್. ತಶೆಂ ಆಮಿಂ ಸಾಂಗಾತಾಚ್ ಹಾತಾಕ್ ಹಾತ್ ಧರ್ನ್ ವೆತಾನಾ ವ್ಹಡ್ ಬುರ್ಗ್ಯಾಂನಿ ತುಕ್ಲಾಂವ್ಚೆಂ ಆಸ್ಲ್ಲೆಂ.
"ತೋಯ್ ಕೊರ್ಗೊರೇ ಅಳೆ ಕೊರ್ಗೊರ್ಲ್ಯಾಚೊ ಹಾತ್ ಧರ್ನ್ ಯೆತಾ" ತಶೆಂ ಮ್ಹಾಕಾ ಇಸ್ಕೊಲಾಂತ್ ’ಕೊರ್ಗೊ’ ಮ್ಹಣೊನ್ ಆಡ್ ನಾಂವ್ ಪಡ್ಲ್ಲೆಂ. ಆನಿ ಸವ್ಕಾಸಾಯೆನ್ ಮ್ಹಾಕಾ ಕಳ್ಲ್ಲೆಂ ಚಿನ್ನಿಚಿ ಜಾತ್ ಕೀಳ್ ಮ್ಹಜಿ ಜಾತ್ ಊಂಚ್ ಮ್ಹಣೊನ್. ಪೂಣ್ ಮ್ಹಾಕಾ ಕಿತ್ಯಾಕ್ಗೀ ಚಿನ್ನಿ ಮುಖಾರ್ ಹಾಂವ್ ಊಂಚ್ ಮ್ಹಣೊನ್ ಭಗೊಂಕ್ಚ್ ನಾ. ಥೊಡ್ಯಾ ತೆಂಪಾನ್ ಚಿನ್ನಿಚೆಂ ಇಸ್ಕೊಲ್ ಬಂದ್ ಜಾಲೆಂ. ಭಾಟಿಯೊ ಆನಿಂ ಕುರ್ಪಾಣೆ ವೊಳುಂಕ್ ಕೊರಾಪುಲುನ್ ತಾಕಾ ಘರಾ ರಾವಯ್ಲೆಂ. ಹಾಂವ್ ಎಕ್ಲೊಚ್ ಇಸ್ಕೊಲಾಕ್ ವೆತಾಲೊಂ. ಪಾಟಿಂ ಯೆತಾನಾ ಶೀದಾ ಕೊರಪುಲುಲಾಗೆರ್ಚ್ ವೆತಾಲೊಂ. ವಾಲಿ ಹಾಡುಂಕ್ ರಾನಾಕ್ ಗೆಲ್ಲೆಂ ಚಿನ್ನಿ, ಮ್ಹಜೆಖಾತಿರ್ ಕಿತೆಂ ತರೀ ಹಾಡ್ನ್ ದವರ್ತಾಲೆಂ. ಗಿಮಾಂತ್ ತರೀ ಆಂಬೆ, ಬಿಂಡಾಂ, ಚಾಂಪೆರಾಂ, ಕಿತೆಂ ತರ್ ಈ ದವರ್ತಾಲೆಂಚ್. ನಾಂತರ್ ಆಣಸ್, ಈಂದಾ ಝಡಾಚೊ ಗಿರೊಪ್, ಅಶೆಂ ಕಿತೆಂ ತರೀ ಆಸ್ತಾಲೆಂಚ್.
ಝಳಾರಿಂಚಾ ಮಾರಾಕ್ ಹಾಂವ್ ಶಿಂತಿದಾರ್ ಆಯ್ಲೊಂ. ಮ್ಹಜೊ ಚೆರ್ಕೊ ಮ್ಹಾಕಾ ಸೊಧುನ್ ಘರಾಚಾ ಟೆರೆಸಾರ್ ಆಯಿಲ್ಲೊ.
"ಡಾಡಾ ಡಾಡಾ ಮಮ್ಮಿ ಆಪಯ್ತಾ" ಟೆರೆಸಾಚಿಂ ಮೆಟಾಂ ಪುರ್ತಿಂ ಚಡಾನಾಸ್ತಾಂ ಥಂಯ್ ಥಾವ್ನ್೦ಚ್ ಸಾಂಗಾಲಾಗ್ಲೊ.
"ಆತ್ತಾಂ ಯೆತಾಂ ಮ್ಹಣೊನ್ ಸಾಂಗ್" ಹಾಂವೆಂ ಖಂಯ್ಗೀ ಪಯ್ಸ್ ಥಾವ್ನ್ ಜಾಪ್ ದಿಲಿ.
"ಮಮ್ಮಿನ್ ಅತಾಂಚ್ ಯೇಜೆ ಮ್ಹಣೊನ್ ಸಾಂಗ್ಲಾಂ" ಹಟ್ಚ್ ಕರಿಲಾಗ್ಲೊ.
ಹಾಂವ್ ತೇರ್ಸ್ ಕರ್ತಾಂ, ಜಾವ್ನ್ ಯೆತಾಂ ಮ್ಹಣೊನ್ ಸಾಂಗ್, ಹಾಂವೆಂ ಫಟ್ ಮಾರ್ಲಿ. ತಾಕಾ ಕಿತೆಂ ಸಂಜಾಲೆಂಗೀ, ಮೆಟಾಂ ದೆಂವೊನ್ ಚಲ್ಲೊ.
"ಹಾವ್ ಸ್ಟುಪಿಡ್" ಮ್ಹಣೊನ್ ಬಾಯ್ಲೆನ್ ಮ್ಹಾಕಾ ಆಯ್ಕಾಸಾರ್ಕೆಂ ಪುರ್ಪುರ್ಲ್ಲೆಂ ಮ್ಹಜಾ ಕಾನಾರ್ ಪಡ್ಲೆಂ.
ಆತಾಂ ಖೊಮ್ಟಾಚೊ ಆಕಾರ್ ಮಾತ್ರ್ ದಿಸ್ತಾಲೊ, ವಯ್ ಖೊಮ್ಟಾಚೊ ತರೀ ಆಕಾರ್ ದಿಸ್ತಾ, ಪುಣ್ ಆಕಾರ್ ಕಸಲೊ? ತ್ಯಾ ಆಕಾರಾ ಭಿತರ್ಲೆಂ ರೂಪ್ ಕಸಲೆಂ? ಮ್ಹಾಕಾ ಸಮ್ಜಾಲೆಂನಾ. ಹ್ಯಾ ಆಧಿಂ ಕಿತ್ಯಾಕ್ ಹಾಂವ್ ಆಪ್ಣಾ ವಿಶ್ಯಾಂತ್ ಚಿಂತುಂಕ್ ಥಾಂಬೊಂಕ್ನಾ? ಚಿನ್ನಿಚ್ಯಾ ಮರ್ಣಾನ್ ಮ್ಹಾಕಾ ಇತ್ಲೊಯ್ ಥಂಡ್ಗಾರ್ ಕೆಲಾ? ಮ್ಹಾಕಾ ಸಮ್ಜಾಲೆಂನಾ. ತಾಚೆ ಆನಿ ಮ್ಹಜೆ ಮಧೆಂ ಕಸಲೊ ಭಾಂದ್ ಆಸ್ಲ್ಲೊ? ಫಕತ್ ಎಕ್ಚ್ ಸ್ತ್ರೀಯೆಚಾ ದುದಾಚೊ? ವ ತಾಚ್ಯಾಕೀ ವರ್ತೊ? ವಯ್ ತರ್ ಕಸಲೊ?
ಮಾಂಯ್ನ್ ಕೊಣಾ ಪಾದ್ರ್ಯಾಬಾಂಚೆ ಹಾತ್ ಪಾಂಯ್ ಧರ್ನ್ ಮ್ಹಾಕಾ ಎಕಾ ಹೊಸ್ಟೆಲಾಂತ್ ಘಾಲ್ಲೊ. ಮ್ಹಾಕಾ ರಜೆರ್ ವಚೊಂಕ್ ನಾತ್ಲ್ಲೆಂ. ಮಯ್ನ್ಯಾ ದೋನ್ಂಅಯ್ನ್ಯಾಕ್ ಏಕ್ ಪಾವ್ಟಿಂ ಮಾಂಯ್ಂಚ್ ಮೆಳೊಂಕ್ ಯೆತಾಲಿ. ಗಿಮೆಚ್ಯಾ ರಜೆರ್ ಮಾತ್ರ್ ಘರಾ ವೆತಾಲೊ. ಮಾಂಯ್ ಆಯಿಲ್ಲೆ ತೆದ್ನಾಂ ಚಿನ್ನಿ ಕೊರಪುಲು ಪಿಸೊಳ್ಯಾಂಬರಿಂ ರಾನಾಂತ್, ದೊಂಗ್ರಾರ್, ವ್ಹಾಳಾಂತ್ ಭಂವ್ತಲ್ಯಾಂವ್, ಜಾಂಬ್ಳಾಂ, ಬೆಣ್ಸಾಂ, ಜಮವ್ನ್ ರುಕಾಮುಳಾ ಬಸೊನ್ ಖಾತಾಲ್ಯಾಂವ್. ತಳ್ಯಾಂತ್ ಉಪೆತೆಲ್ಯಾಂವ್. ರುಕಾರ್ ಚಡ್ಚಾಂತ್ ಜಾಂವ್ ಉಪ್ಯೆಂವ್ಚಾಂತ್ ಜಾಂವ್ ಚಿನ್ನಿ ಮ್ಹಜ್ಯಾಕ್ಯೀ ಹುಶ್ಯಾರ್. ಏಕ್ ಪಾವ್ಟಿಂ ಸಾಳ್ಕಾಚ್ಯೊ ವಾಲಿ ಪಾಂಯಾಂಕ್ ರೆವ್ಡೊನ್ ಬುಡ್ಚ್ಯಾರ್ ಆಸ್ಲ್ಲ್ಯಾ ಮ್ಹಾಕಾ ತಾಣೆಂಚ್ ವೋಡ್ನ್ ವಯ್ರ್ ಕಾಡ್ಲ್ಲೊ. ಹಾಂವ್ ಭಿಂಯಾನ್ ಧೊವ್ಶೆವ್ನ್ ಗೆಲ್ಲೊಂ.
"ಭಿಂಯೆಲೊಯ್ಗೀ ನಾಗೆರೆ?" ಮ್ಹಣೊನ್ ತಾಣೆಂ ಮ್ಹಾಕಾ ಪೊಟ್ಲುನ್ ಧರ್ಲ್ಲೊ. ತ್ಯಾ ವೆಂಗೆಂತ್ ಮ್ಹಜಿ ಭಿರಾಂತ್ ನಾಂವ್ ನಾಸ್ತಾಂ ಗೆಲ್ಲಿ. ದುಸ್ರೆ ದೀಸಾ ಹಾಂವ್ ಪಾಟಿಂ ಹೊಸ್ಟೆಲಾಕ್ ಗೆಲ್ಲೊಂ. ಉಪ್ರಾಂತ್ ಚಿನ್ನಿ ಮ್ಹಾಕಾ ಪಳೆಂವ್ಕ್ ಮೆಳ್ತಾನಾ ವರ್ಸಾಂ ಉತರ್ಲ್ಲಿಂ.
ಜಿಣ್ಯೆಚಿ ಧಾಂವ್ಣಿ ತರಿ ಕಿತ್ಲಿ ವಿಚಿತ್ರ್? ಹಾಂವ್ ಗಾಂವ್ ದೇಸ್ ಭಂವ್ಲೊಂ. ಹಾಸ್ಟೆಲಾಂತ್ಲೊ ಭಾಯ್ರ್ ಸರೊನ್ ಗ್ಯಾರೆಜಿಂತ್ ಕಾಮಾಕ್ ಲಾಗ್ಲೊಂ. ಗ್ಯಾರೆಜಿಂತ್ ಪಿಯೆಂವ್ಕ್ ಶಿಕ್ಲೊಂ. ತಶೆಂ ಏಕ್ ದೀಸ್ ಪಿಂಯೆವ್ನ್ ಯೇವ್ನ್ ಮಾಂಯ್ಲಾಗಿಂ ಝಗ್ಡೊನ್ ಆಸ್ತಾನಾ ತಾಳೊ ಆಯ್ಕೊನ್ ಚಿನ್ನಿ ಆಯಿಲ್ಲೆಂ. ತಾಕಾ ಪಳೆವ್ನ್ ಮ್ಹಜೆಂ ಆಮಾಲ್ ದೆಂವ್ಲ್ಲೆಂ.
"ಕೆದಾಳಾ ಆಯಿಲೆಂಯ್ ಚಿನ್ನಿ?" ಆಡ್ ಪಡ್ಚಿ ಜೀಬ್ ಸಾಂಭಾಳ್ನ್ ಹಾಂವೆಂ ವಿಚಾರ್ಲೆಂ.
"ಹಾಂವ್ ಆತಾಂ ಆಮ್ಮಾಗೆರ್ಚ್ ರಾವೊಂಕ್ ಆಯ್ಲ್ಯಾಂ ನಾಗೆರೆ" ತಾಣೆಂ ಸಾಂಗ್ಲ್ಲೆಂ.
"ಕಿತ್ಯಾಕ್ ಚಿನ್ನಿ? ತುಜಾ ಘೊವಾಕ್ ಕಿತೆಂ ಜಾಲೆಂ?" ಹಾಂವೆ ವಿಚಾರ್ತಾನಾ ತಾಚ್ಯಾ ತೊಂಡಾರ್ ಕಸಲಿಂಚ್ ಭಗ್ಣಾಂ ನಾತ್ಲ್ಲಿಂ.
"ತೊ ಮೆಲೊ ನಾಗೆರೇ, ರಾನಾಕ್ ಗೆಲ್ಲೊ ಜಿವ್ದಾಳ್ ಚಾಬೊನ್ ಮೆಲೊ"
ತಾಚಾ ತಾಳ್ಯಾಂತ್ ಕಿತೆಂ ತರೀ ದೂಕ್ ಆಸಾ ತರ್ ತಿ ವಳ್ಕೊಂಚೆಂ ಸಾಧನ್ ಕರ್ನ್ ಹಾಂವ್ ಸಲ್ವಾಲೊಂ.
"ಚಿನ್ನಿ ತುಂಚ್ ಸಾಂಬಾಳ್ಗೋ ತಾಕಾ. ಜಾತಾ ಜಾಲ್ಯಾರ್ ಇಲ್ಲಿ ಬೂದ್ ಸಾಂಗ್" ಮ್ಹಣೊನ್ ಮಾಂಯ್ ನಿದೊಂಕ್ ಗೆಲಿ. ಆಮಿ ಸೊಪ್ಯಾರ್ ಬಸೊನ್ ಗಜಾಲಿ ಕರಿಲಾಗ್ಲ್ಯಾಂವ್. ಚಿನ್ನಿ ಮ್ಹಾಕಾ ತಾಚಾ ಕಾಜಾರಾ ವಿಶ್ಯಾಂತ್, ಘೊವಾನ್ ಮಾರ್ಚೆವಿಶ್ಯಾಂತ್ ಸಗ್ಳೆಂ ಸಾಂಗೊನ್೦ಚ್ ಆಸ್ಲ್ಲೆಂ. ಹಾಂವ್ ಆಮಾಲಾಚಾ ಫೊರ್ಸಾರ್ ಬೊಸ್ಲ್ಲೆಕಡೆಚ್ಚ್ ಕಸೊಂ ಪರ್ತಾಲೊಂ ಮ್ಹಾಕಾಚ್ ಖಬಾರ್ ನಾ.
ಖಂಯ್ಗೀ ಅರ್ಧ್ಯಾ ರಾತಿಂ ಜಾಗ್ ಜಾತಾನಾ ಭಾಯ್ರ್ ಕಿಡಿಕಿಟಾರಾಂಚಿ ಬೊಬಾಟ್ ಆಯ್ಕಾತಾಲಿ. ವಯ್ರ್ ಪಳೆತಾನಾ ಕೊಲ್ವಾಚಾ ಪಾಕಾಚ್ಯಾ ಬಗ್ಲೆನ್ ಮೊಳಾಬ್ ಆನಿ ನೆಕೆತ್ರಾಂ ದಿಸ್ತಾಲಿಂ. ಸಾರ್ಕಿ ಜಾಗ್ಶೀ ಜಾತಾನಾ ಮ್ಹಾಕಾ ಕಳ್ಳೆಂ ಚಿನ್ನಿ ಮ್ಹಜಿ ತಕ್ಲಿ ಆಪ್ಲ್ಯಾ ಉಸ್ಕ್ಯಾರ್ ದವರ್ನ್ ವೊಣ್ತಿಕ್ ವೊಣ್ಕೊನ್ ಜೆಮೆತಾಲೆಂ. ಮ್ಹಜೆಂ ಕಾಳಿಜ್ ತೊಂಡಾಂತ್ ಆಯಿಲ್ಲೆಂ. ಹಾಂವ್ ಉಟೊನ್ ಬಸ್ತಾನಾ ಚಿನ್ನಿಂಯ್ ಜಾಗ್ಲೆಂ.
"ಜಾಗ್ ಜಾಲಿಗೀ ನಾಗೆರೆ?" ರಾತಿಚಾ ಕಾಳೊಕಾಂತ್ಯಿ ತಾಣೆಂ ಹಾಸ್ಲ್ಲೆಂ ತಾಚಾ ಪೊವ್ಳ್ಯಾಂ ತಸಲ್ಯಾ ದಾಂತಾಂನಿ ಕಳ್ತಾಲೆಂ.
"ತುಂ ಘರಾ ವಚೊಂಕ್ನಾಂಯ್ ಚಿನ್ನಿ!?" ಮ್ಹಾಕಾ ಕಿತೆಂ ಉಲಂವ್ಚೆಂ ಕಳೊಂಕ್ನಾ.
"ಮಾಗೆರೆ ಸೊರೊ ಪಿಯೆವ್ನ್ ಮ್ಹಜೊ ಘೊವ್ ಮೆಲೊ. ತುಂವೆಂಯ್ ತಶೆಂ ಜಾಂವ್ಕ್ ನಜೊ ನಾಗೆರೆ" ಆತಾಂ ತಾಚ್ಯಾ ತಾಲ್ಯಾಂತ್ ಕಠೀಣ್ ದೂಃಖ್ ಆಸ್ಲ್ಲಿ. ಮ್ಹಾಕಾ ಕಿತೆಂ ಸಾಂಗ್ಚೆಂ ಕಳ್ಳೆಂನಾ. ಹಾಂವ್ ವಗೊಚ್ ರಾವ್ಲ್ಲೊಂ.
"ನಾಗೆರೆ, ಹಾಂವ್ ಕೊರ್ಗೊರ್ಲಿಂ. ಮ್ಹಾಕಾ ದಾಲಿಯೊ ವೊಳ್ಚಾ ಶಿವಾಯ್ ಆನಿಂ ಉಸ್ಟೆಂ ಖಾಂವ್ಚಾ ಶಿವಾಯ್ ದುಸ್ರೊ ಫುಡಾರ್ ನಾ. ಪುಣ್ ತುಕಾ ತಶೆಂ ನಂಯ್ ನಾಗೆರೆ. ತುವೆಂ ಆಮ್ಚೆ ದೊಗಾಂಯ್ ಖಾತಿರ್, ತುಜೊ ಫುಡಾರ್ ಉಭೊ ಕರಿಜೆ"
ತಾಣೆಂ ತಶೆಂ ಸಾಂಗ್ತಾನಾ ಮ್ಹಜೊ ತಾಳೊ ಭರೊನ್ ಆಯಿಲ್ಲೊ. ’ಬುರ್ಗ್ಯಾಪಣಾ ಉಪ್ರಾಂತ್ ಪಯಿಲ್ಲೆ ಪಾವ್ಟಿಂ ಹಾಂವ್ ತಾಕಾ ಪೊಟ್ಲುನ್ ಧರ್ನ್ ರಡ್ಲ್ಲೊಂ.
"ನಾಂ ಚಿನ್ನಿ, ಆನಿ ಹಾಂವ್ ಜೀವ್ ಆಸ್ತಾ ಪರ್ಯಾಂತ್ ಸೊರ್ಯಾಚೊ ಥೆಂಭೊ ಆಪ್ಡಿನಾ" ಹಾಂವೆಂ ತಾಕಾ ಉತಾರ್ ದಿಲ್ಲೆಂ.
ತ್ಯೇ ದೀಸ್ ಥಾವ್ನ್ ಹಾಂವ್ ಸಾಧನಾರ್ ಪಡ್ಲ್ಲೊಂ. ವೆಗಿಂಚ್ ಗಲ್ಫಾಕ್ ಪಾವ್ಲ್ಲೊಂ. ಕೊಲ್ವಾಚಾ ಘರಾಚ್ಯಾ ಜಾಗ್ಯಾರ್ ಟೆರೆಸಾಚೆಂ ಘರ್ ಉಭೆಂ ಜಾಲ್ಲೆಂ. ಬರ್ಯಾ ಘರಾಣ್ಯಾಂತ್ಲ್ಯಾ ಚೆಡ್ವಾಲಾಗಿಂ ಮ್ಹಜೆಂ ಕಾಜಾರ್ಯ್ ಜಾಲ್ಲೆಂ. ಚಿನ್ನಿಲಾಗಿಂ ಮ್ಹಜಿ ಸಳ್ಗಿ ಪಳೆವ್ನ್ ಆಮೆಂ ಗೊವಾ ಬಾಯ್ಲೆ ಮಧೆಂ ಝಗ್ಡೆಂಯ್ ಜಾಲ್ಲೆಂ. ಆನಿ ತಾಕಾ ಸೊಧುನ್ ಗೆಲ್ಯಾರ್ ಚುಕವ್ನ್ ಕಾಡ್ತಾಲೆಂ. ದೀಸ್ಭರ್ ರಾನಾಂತ್ ವೇಳ್ ಪಾಶಾರ್ ಕರ್ತಾಲೆಂ. ತಾಚೆವಿಶಿಂ ಜಾಯಿತ್ತ್ಯೊ ಖಬ್ರೊಯ್ ಆಯ್ಕೊಂಕ್ ಮೆಳ್ತಾಲ್ಯೊ. ಏಕ್ ಪಾವ್ಟಿಂ ತಾಕಾ ಪೊಯ್ಶೆ ದೀಂವ್ಕ್ ಗೆಲ್ಲ್ಯಾಕ್ ತೆಂ ಕಿಡ್ಕಿಡೊನ್ ಹಾಸ್ಲ್ಲೆಂ.
"ಹೆ ಪೊಯ್ಶೆ ನಾಗೆರೆ, ಮ್ಹಾಕಾ ಕಿತೆಂ ಕರುಂಕ್? ಮ್ಹಜೆ ಹಾತ್ಪಾಂಯ್ ಚಲ್ತಾ ಪರ್ಯಾಂತ್ ಮ್ಹಾಕಾ ಜಾಯ್ಪುರ್ತೆಂ ಹಾಂವ್ ಜೊಡ್ತಾಂ. ಆನಿಂ ಮ್ಹಾಕಾ ತಿತ್ಲೆಂಚ್ ಪುರೊ. ತಾಂತುಂ ತುಜಾ ಬುರ್ಗ್ಯಾಂಕ್ ಕಿತೆಂ ತರೀ ಘೆ" ಮ್ಹಣೊನ್ ಪಾಟಿಂ ದಿಲ್ಲೆ ತಾಣೆಂ.
ಆನಿಂ ಕಾಲ್ಚ್ಯಾ ದಿಸಾ, ಮ್ಹಜೊ ಚೆರ್ಕೊ ವಾಳಾಂತ್ ನಾಂವ್ಕ್ ಗೆಲ್ಲೊ. ತಾಚಾ ಪಾಂಯಾಂಕ್ ಸಾಳ್ಕಾಚೊ ವಾಲಿ ರೆವ್ಡತಾನಾ ಚಿನ್ನಿನ್೦ಚ್ ಉದ್ಕಾಕ್ ಉಡೊನ್ ಬಚಾವ್ ಕೆಲ್ಲೊ. ಪೂಣ್ ಹೆ ಪಾವ್ಟಿಂ ಸಾಳ್ಕಾ ವಾಲಿಂನಿ ತಾಕಾ ಉದ್ಕಾಚಾ ಗರ್ಭಾಂತ್ ವೊಡ್ಲ್ಲೆಂ.
ಪಯ್ಸ್ ದಿಗಂತಾರ್ ಏಕ್ ನೆಕೆತ್ರ್ ಚಡ್ ಪರ್ಜಳ್ತಾ ತಶೆಂ ದಿಸ್ಲೆಂ ಮ್ಹಾಕಾ. ಹಾಂವ್ ತೆರೆಸಾಥಾವ್ನ್ ದೆಂವೊನ್ ಘರ್ಚಿಂ ಮೆಟಾಂ ದೆಂವ್ತಾನಾ ಬಾಯ್ಲೆನ್ ಸವಾಲ್ ಕೆಲೆಂ.
"ಖಂಯ್ ವೆತಾಯ್ ಆತಾಂ?" ಹಾಂವ್ ಜಾಪ್ ದೀನಾಸ್ತಾಂ ಖೊಮ್ಟಾ ಕುಶಿನ್ ಚಲೊಂಕ್ ಲಾಗ್ಲೊಂ.
"ತ್ಯಾ ಕೊರ್ಗೊರ್ಲ್ಯಾಗೆರ್ ವೆತಾಯ್ ಆತಾಂ?" ಪುರ್ಪುರೊನ್ ಬಾಯ್ಲೆನ್ ಬಾಗ್ಲಾಕ್ ಖಿಳ್ ಘಾಲ್ಲಿ ಆಯ್ಕಾಲಿ ಮ್ಹಾಕಾ.
ಹಾಂವ್ ಕಾಳೊಕಾಂತ್ಲ್ಯಾನ್ ಮುಖಾರ್ ಗೆಲೊಂ. ಕೊರಪುಲುಸಂಗಿಂ ಬಸೊನ್ ದೋನ್ ದುಃಖಾಂ ಗಳಂವ್ಕ್.
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
