’ಕೊನ್ಶ್ಯಾಂತ್

ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್‍ಯಾಂತ್, ಕೊಂಕಣಿ ಖಾತಿರ್.

ಕವಿತಾಪಾಠ್ ಮ್ಹಳ್ಯಾರ್ ಕಿತೆಂ ಮ್ಹಳ್ಳ್ಯಾಚಾ ಸವಿಸ್ತಾರ್ ವಿವರಾಂಕ್ ಹ್ಯಾ ಪಾನಾಕ್ ಭೆಟ್ ದಿಯಾ

’ಕೊನ್ಶ್ಯಾಂತ್ ಥಾವ್ನ್ ಮನ್ಶ್ಯಾಂತ್’ ಹಾಡಂವ್ಚೊ ವಾವ್ರ್ 

ಹೇಮಾಚಾರ್‍ಯ ಕೊಂಕ್ಣಿ ಪತ್ರಿಕೋಧ್ಯಮ್ ಶೆತಾಂತ್ ಮಾಲ್ಘಡೊ ತಶೆಂಚ್ ಏಕ್ ಜವಾಬ್ಧಾರೆಚೊ  ಸಾಹಿತಿ, ಕಲಾಕಾರ್. ಕೊಂಕ್ಣಿ ಭಾಸೆಚೊ ಮೋಗ್ ಆಸ್ಚೊ ಹೊ ಕೊಂಕ್ಣಿ ವಾವ್ರ್ ಕರ್ತೆಲ್ಯಾಂಕ್ ವ್ಹಡಾ ಜತ್ನೆನ್ ಆನಿ ಮಾಯಾಮೊಗಾನ್ ಚಲಯ್ತಾ ಆನಿಂ ಮಾರ್ಗ್‌ದರ್ಶನ್ ದಿತಾ. ಏಕ್ ನಾಟಕ್‌ಕಾರ್, ನಟ್, ಅಂಕಣ್‌ಗಾರ್, ಕಾಣ್ಯೆಗಾರ್, ಪತ್ರಿಕೋಧ್ಯಮಿ ತಶೆಂಚ್ ಏಕ್ ಪ್ರಭುದ್ದ್ ಸಾಹಿತಿ, ಕುವೆಯ್ಟಾಂತ್ ’ದಾಯ್ಜ್’ ಪಂಗ್ಡಾನ್ ಚಲವ್ನ್ ವರ್ಚಾ ಕವಿತಾಪಾಠ್ ಹಾಚೆರ್ ಜಾಂವ್ಚಾ ಬೂಕ್ ಸಮೀಕ್ಶಾವಿಶಿಂ ಅಪ್ಲೆ ವಿಚಾರ್ ಅಶೆ ಬರಯ್ತಾ. [ಹೆಂ ಕವಿತಾಪಾಠ್ ಹಾಚೊ ಪಯ್ಲೊ ಬೂಕ್ ಹಾಚೆಂ ಏಕ್ ಪ್ರಸ್ತಾವನ್]

ಹೇಮಾಚಾರ್‍ಯ

ಓಂ: ಅಸತೋಮಾ ಸಧ್ಗಮಯ 

ತಮಸೋಮ ಜ್ಯೊತಿರ್ಗಮಯ 

ಮ್ರತ್ಯುಮ ಅಮೃತ್ಯಮಯ 

"ಅಸತಾಥಾವ್ನ್ ಸತಾತೆವ್ಶಿಂ, ನಶ್ವರಾಥಾವ್ನ್ ಶಾಶ್ವತಾತೆವ್ಶಿಂ, ಕಾಳೊಕಾಥಾವ್ನ್ ಉಜ್ವಾಡಾತೆವ್ಶಿಂ ಆಮ್ಕಾಂ ತಾಂಡುನ್ ವರ್ ಪರಮೇಶ್ವರಾ"- ಹೆಂ ಮ್ಹಜೆಂ ಮಾಗ್ಣೆಂ, ಜೆದ್ನಾಂ ಥಾವ್ನ್ ಹಾಂವ್ ಮಾಗೊಂಕ್ ಶಿಕ್ಲಾಂ ತೆದ್ನಾಂ ಥಾವ್ನ್.

ಮನ್ಶ್ಯಾಜಿವಿತ್ ಅಸ್ಕತ್, ಹಾಂಗಾಚಾ ಬಾಜಾರಾಂತ್ ಸತ್ ಆನಿ ಅಸತ್ ದೋನೀ ಬರ್ಶಿಂ ವಿಗ್ತೆಂ ಮೆಳ್ತಾ. ಕಾಳೊಕ್ ಮನ್ಶ್ಯಾಚೆ ಮತಿಂತ್‌ಯಿ ಆಸಾ, ಭಾಯ್ರ್‌ಯಿ ಆಸಾ. ಸಂಸಾರಾಚಾ ನಶ್ವರ್ ಸಂಗ್ತಿಂತ್ ಆಮಿ ಆಂಗಾಲಾಪ್ ಕರ್ಚೊ ಆಸ್ತಾ - ದುಡು, ಭಾಂಗಾರ್, ಬಿಡಾರ್-ಮೊಟಾರ್, ಹುದ್ದೆ, ಶೆತ್-ಭಾಟ್, ಇತ್ಯಾದಿ. ಪುಣ್ ಶಾಶ್ವತ್ ಉರಯ್ಜೆ ಜಾಲ್ಲೆ ಸಂಗ್ತಿವಿಶಿಂ ಆಮಿ ತಕ್ಲಿ ಅಟಯ್‌ನಾಂವ್.

ಆಮಿ ಮಾಗಾತ್ ಗೆಲೆ, ದೆವಾನ್ ದಿತಾ’ಸರ್. ಮಾಗ್ಲೆಲೆಂ ಮೆಳ್ಳೆನಾ, ತರ್ ಖುಬಾಳ್ಳೆ, ದೆವಾಕ್’ಚ್ ದುರ್‍ಸಾಲೆ, (ತುಜೆಲಾಗಿಂ ಪಯ್ಲೆ ಪಾವ್ಟಿ ಆನಿ ನಿಮಾಣೆ ಪಾವ್ಟಿಂ ಮಾಗ್ಚೆಂ.....ದಿತಾಯ್‌ಗಿ ನಾ...) ದಿಲೆಂ ತರ್ ಮಿಸಾಂವ್ ತಿರ್‍ಸಾಲೆಂ.

ಅಸ್ಕತ್ ಸೈಂಭಾಚೆ ಆಮಿ, ಫಕತ್ ಮಾಗೊನ್ ಘೆಂವ್ಚ್ಯಾಂತ್ ಅನಿ ಖಾಂವ್ಚ್ಯಾಂತ್ ವಿಶ್ವಾಸ್ ದವರ್ತಾಂವ್, ಕರ್ನೆಂತ್ ನಹಿಂ.

ಆತಾಂ ಕೊಂಕ್ಣಿ ಸಾಹಿತ್ಯಚಾ ಸಂಸಾರಾಚೆರ್ ದೀಷ್ಟ್ ಖಂಚವ್ಯಾಂ. ಹಾಂಗಾಸರ್‌ಯೀ ವರ್ಸಾಂ ಆಧಿಂ ಥಾವ್ನ್ ಮಾಗ್ಣಿಂ ಆಮಿ ಆಯ್ಕಾಲ್ಯಾಂತ್. ಕೊಂಕ್ಣೆಕ್ ಬರೊ ಪುಡಾರ್ ದೀ ದೆವಾ, ಹಿ ಭಾಸ್ ಜಿವಿ ಉರಯ್ ದೆವಾ, ಅನಿ ತಿ ಉಲಯ್ತೆಲ್ಯಾಂಕ್ ಜಿವಂತ್ ದವರ್ ದೆವಾ (ಕಿತ್ಯಾಕ್ ನವಿಂ ಜಲ್ಮೊನ್ ಯೆಂವ್ಚಿಂ ಕೊಂಕ್ಣೆಂತ್ ಉಲಯ್ತಿತ್ ಮ್ಹಳ್ಳಿ ಹಮಿದಾರಿ ನಾ!), ಕೊಂಕ್ಣೆಕ್ ಸಂವಿದಾನಾಚೆ ಆಟ್ವೆ ವೊಳೆರಿಂತ್ ಸ್ಥಾನ್ ಮೆಳಯ್ ದೆವಾ. (ಆಟ್ವೆ ವೊಳೆರಿಂತ್ ಕೊಂಕ್ಣಿ ರಿಗೊನ್ ಪಂದ್ರಾ ವರ್‍ಸಾಂ ಸಂಪ್ಲಿಂ, ಥೊಡೆ ಅಜೂನ್ ಮಾಗ್ತಾತ್!)

ಆಸ್ಕತ್ ಸೈಂಭಾಚೆ ಆಮಿ, ಪಕತ್ ಮಾಗೊನ್ ಖಾಂವ್ಚ್ಯಾಂತ್ ವಿಶ್ವಾಸ್ ದವರ್‍ತಾತ್, ಕರ್ನೆಂತ್ ನಹಿಂ. ಯಥಾ ಕರ್ನಿ ತಥಾ ಭರ್ನಿ.

ಕೊಂಕ್ಣಿ ಜಿವಿ ದವರುಂಕ್ ದೆವಾಲಾಗಿಂ ಮಾತ್ರ್ ಮಾಗ್ಲ್ಯಾರ್ ಪಾವಾನಾ, ತಿ ಜಿವಿ ದವರುಂಕ್ ಅಮಿ ಕಿತೆಂ ಕರ್‍ಯೆತ್ ತೆಂ ಜಿಂತುಂಕ್ ಜಾಯ್. ಹಿ ಭಾಸ್ ಸ್ವತಾಚೆ ಜಿಬೆರ್ ಪಯ್ಲಿ ಘೊಳಂವ್ಕ್ ಜಾಯ್, ಪತ್ರಾಂಚೆರ್ ಛಾಪುನ್ ಆಯ್ಲೆಲಿ ರೊಕ್ಡೆ ದೀವ್ನ್ ವಾಚುಂಕ್ ಜಾಯ್, ದುಸ್ರ್ಯಾಂನಿ ವಾಚಿಸಾರ್‍ಕೆಂ ವತ್ತಡ್ ಘಾಲುಂಕ್ ಜಾಯ್ (ತಾಂಕಾ ಪುಂಕ್ಯಾಕ್ ವಾಚುಂಕ್ ದೀವ್ನ್ ನಹಿಂ!)

ಹಾಲಿಂಚ್ ಎಕೆ ಬಾಯ್ಲೆನ್ ಆಪ್ಲ್ಯಾ ಘೊವಾಕ್ ಸಾಂಗ್ಚೆಂ ಆಯ್ಕಾಲೆಂ ಹಾಂವೆ: "ಆಳೆಯಾ, ಸೆಜಾರಾ ಕೋಣ್ ಮಂಗ್ಳುರಿ ಭಾಯ್ಲ್ ಆಯ್ಲ್ಯಾ, ತಿಕಾ ಕೊಂಕ್ಣಿಂ ಪತ್ರಾಂ ವಾಚ್ಚಿ ಪಿಸಾಯ್ ಖಂಯ್. ಆಮಿ ವಾಚುನ್ ಕಾಡ್ಲೆಲಿಂ ಪತ್ರಾಂ, ಪುಸ್ತಕಾಂ ವಿಚಾರ್ತಾ".

ಘೊವಾನ್ ಮ್ಹಳೆಂ: "ಜರ್ ತೀಸ್ ಹಜಾರ್ ರುಪಿಯಾ ಖರ್ಚುನ್ ಹಾಂಗಾ ಆಯ್ಲ್ಯಾ ತರ್ ತೀನ್ ದಿರಮ್ ಯೆಟುನ್ ಎಕ್ ಕೊಂಕ್ಣಿ ಪತ್ರ್ ವಾಚ್ಚಿ ತಾಂಕ್ ತಿಕಾಯ್ ಆಸ್ತೆಲಿ. ತಿಕಾ ಅಮ್ಕ್ಯಾ ದುಕಾನಾಚೆಂ ನಾಂವ್ ಸಾಂಗ್, ಆವಯ್ಚೊ ಆನಿ ತಿಚೆ ಭಾಶೆಚೊ ತಿಚೆ ಪುತಾಕ್ ಮೋಗ್ ಆಸಾ ತರ್ ತೊ ಹಾಡ್ನ್ ದಿತೊಲೊ".

ಕಿತ್ಲ್ಯಾ ಅಮ್ಚೆ ಘರಾಂನಿ ಆಸಲಿಂ ಉತ್ರಾಂ ಆಯ್ಕೊಂಕ್ ಮೆಳಾನಾಂತ್?

ಬರಯ್ತಾ ಕೋಣ್‌ಯ್ ಜಾಂವ್, ಛಾಪ್ತಾ ಕೊಣ್‌ಯ್ ಜಾಂವ್, ಆಮ್ಕಾಂ ಫುಕಟಾಕ್ ವಾಚ್ಲ್ಯಾರ್ ಜಾಲೆಂ. ಉಪ್ರಾಂತ್ ವೇಳ್ ಮೆಳ್ತಾನಾ ಕೊಂಕ್ಣೆಚಾ ಉದರ್ಗತೆಖಾತಿರ್ ಮಾಗ್ಚೆಂ, ತೊ ಪಳೆವ್ನ್ ಘೆತಲೊ.

ಪುಣ್ ಆಮಿ ತಿತ್ಲೆ ನಿರಾಶ್‌ವಾದಿ ನಾ ಜಾಂವ್ಯಾ, ಆಮ್ಚೆ ಮಧೆಂ ಆಸಾತ್ ಥೊಡೆ ತ್ಯಾಚ್ ಕೊಂಕ್ಣಿ ಮಾಯೆಚಾ ಉದರಾಂತ್ ಜಲ್ಮೊನ್ ಆಯ್ಲೆಲೆ. ತಾಣಿಂ ಕೊಂಕ್ಣೆಚಾ ಸಾಲ್ವಾಸಾಂವಾಚೆಂ ಶಪಥ್ ಘೆತ್ಲಾಂ. ತೆ ಮಾಗಾನಾಂತ್, ಕೃತ್ಯಾಂನಿ ಕರ್ನ್ ದಾಕಯ್ತಾತ್. ಆಪ್ಲ್ಯಾ ಮಾಯ್‌ಭಾಶೆಚೆಂ ಋಣ್ ಹರ್ಯೆಕ್ಲ್ಯಾನ್ ಪಾರಿಕ್ ಕರ್ಚೆಂ ಪರಮ್ ಧರ್ಮ್ ಮ್ಹಳ್ಳೆಂ ಸತ್ ತೆ ಸಂಸಾರ್‌ಭರ್ ಪಾಚಾರ್ತಾತ್, ಜಶೆಂ ಕೊಂಕ್ಣಿ ಕೊಗುಳ್ ವಿಲ್ಪಿ ರೆಬಿಂಬಸಾನ್ ವರ್ಸಾಂ ಅಧಿಂ ಗಾವ್ನ್ ಕಾಡ್ಲಾಂ:

ಗರ್ಬಾಂತ್ ತುಜ್ಯಾಗೆ ಅಮಿ ಜನ್ಮಾಲ್ಲಿಂ ಭುರ್‍ಗಿಂ 

ಭಾಶೆ ಸೇವಾ ಕರುಂಕ್ ರಾಕ್ ದೇವಾ ಸರ್ಗಿಂ 

ಚರಣಾಂ ಪಡೊನ್ ಅಮ್ಚಿ ಅರ್ಗಾಂ ಭೆಟಯ್ತಾಂವ್ 

ವರ್ಣಾಂ ವರ್ಣಾಂನಿ ತುಕಾ ತೊರ್ಣಾಂ ಚಡಯ್ತಾಂವ್ 

ತುಜೆಂ ನಾಂವ್ ಸೊಭಯ್ತಾಂವ್..... 

ಜಯೊ, ಜಯೊ, ಜಯೊ ತುಕಾ ಕೊಂಕಣಿ ಮಾತಾ. 

ಕಿತ್ಲಿ ವ್ಹಡ್ ಸ್ಥುತಿ, ಮಾನ್ ಅನಿ ಮಹಿಮಾ, ಕೊಂಕ್ಣಿ ಮಾಯೆಕ್! ಕೊಂಕ್ಣಿ ಕೊಗೊಳೆನ್ ಆಶೆಂ ಗಾಯ್ತಾನಾ ಆಂಗಾಂತ್ ರಗಾತ್ ವಾಳ್ಚೊ ಕೊಣೀ ನುತ್ತಾ ಬಸ್ತಲೊ? ಕೆದಿಂಕ್’ಚ್ ನಾ.

’ದಾಯ್ಜ್’ ಪಂಗ್ಡಾನ್ ಹಾತಿಂ ಘೆತ್‌ಲ್ಲೊ ವಾವ್ರ್’ಯಿ ವಿಲ್ಫಿನ್ ಬರವ್ನ್ ಕಾಡ್ಲೆಲ್ಯಾ ಸ್ಥುತೆಥಾವ್ನ್ ಅಥ್ವೊ ನ್ಹಯ್. ತೇಯ್ ಕೊಂಕ್ಣಿ ಮಾಯೆಚಾ ಗರ್ಭಾಂಥಾವ್ನ್ ಜಲ್ಮೊನ್ ಆಯ್ಲೆಲೆ ಕೊಂಕ್ಣಿ ವೀರ್ ಸುಪುತ್ರ್, ಭಾಶೆಚಾ ಸೆವೆಖಾತಿರ್ ಕಮರ್ ಬಾಂದ್ಲೆಲೆ, ಭಾಶೆಚಾ ಆನಿ ಸಾಹಿತ್ಯಾಚಾ ಉದರ್ಗತೆಖಾತಿರ್ ದೀಸ್ ರಾತ್ ಎಕ್ ಕರ್ಚೆ ಮುಖಾಂತರ್ ತೆ ಆಪ್ಲೆ ಮಾಯ್‌ಭಾಶೆಚಾ ಮಾನಾಕ್ ರಂಗಾರಂಗಾಳ್ ತೊರ್‍ಣಾಂ ಚಡಯ್ತಾತ್, ಜಾಂವ್ಕ್ ಪುರೊ ಕೊಂಕ್ಣಿ ಪತ್ರಾಂ, ಪುಸ್ತಕಾಂ ಘರಾ ಘರಾಂನಿ ವಿಕುನ್, ಕೊಂಕ್ಣಿ ಕಾರ್ಬಾರ್‍ಯಾಂಕ್ ಆರ್‍ಥಿಕ್ ದಿಗೊ ಜಾವ್ನ್, ಜಾಂವ್ಕ್ ಪುರೊ ಕೊಂಕ್ಣಿ ಕವಿತಾಂಚಿ ಆನಿ ಪುಸ್ತಕಾಂಚಿ ಖೊಡ್ ಕಾಡ್ಚೆ ಮುಖಾಂತರ್.

ಅನಿ ಆತಾಂ ಪುಸ್ತಕಾಂಚಿ ಸಮೀಕ್ಶಾ ವಾ ಖೊಡ್ ಕಾಡ್ಚಿ ಕಾಮಾಸಾಳಾಂ ಮಾಂಡುನ್ ಹಾಡ್ಚಿಂ ತಾಂಚಿ ಯೆವ್ಜಣಿ ಆನಿ ತಿ ಖೊಡ್ ಪ್ರಕಟ್ ಕರ್ಚೆಂ ಸಾಹಸ್ ಆಮಿ ಹ್ಯಾ ಅದೀ ಕೊಂಕ್ಣಿ ಸಾಹಿತ್ಯಾಚಾ ಸಂಸಾರಾಂತ್ ದೆಕ್ಲೆಲೆಂ ಆನಿ ಆಯ್ಕಾಲ್ಲೆಂ ಆಸಾ ತರ್ ತೆಂ ಭೋವ್ ಉಣೆಂ. ಮಾನಾದಿಕ್ ವಿಲ್ಲಿ ದೆ’ಸೆಲ್ವಾಂನಿ, ಚಾ.ಫ್ರಾ. ಬಾಬಾನ್, ಮೆಲ್ವಿನ್ ರೊಡ್ರಿಗಸ್ ತಸಲ್ಯಾ ಕೊಂಕ್ಣಿ ಸಾಹಸಿಂನಿ ತ್ಯಾ ದಿಶೆನ್ ಹಾತಿಂ ಘೆತ್ಲೊಲೊ ವಾವ್ರ್ ಸೊಡ್ಲ್ಯಾರ್ ಖಂಚ್ಯಾಯ್ ಮಂಡಳೆನ್, ಪರಿಶದೆನ್ ಹ್ಯಾ ದಿಶೆನ್ ಚಿಂತ್ಲೆಲೆಂ ನಾ.

ಆತಾಂ ’ದಾಯ್ಜ್’ ಪಂಗಡ್, ತಾಂತುಂಯ್ ಹ್ಯಾ ಪಂಗ್ಡಾಚೊ ಯೆಜ್ಮಾನ್, ಚತುರ್ ಸಂಘಟಕ್ ಆನಿ ಶ್ರೇಶ್ಟ್ ಕವಿ, ವಲ್ಲಿ ಕ್ವಾಡ್ರಸ್, ಆಪ್ಲ್ಯಾ ಸಾಂಗೊಡ್ಯಾಂಕ್ ಯೆಕ್ಟಾಂಯ್ ಕರುನ್ ಘೆವ್ನ್, ’ಕೊನ್ಶ್ಯಾಂತ್ ಆಸ್ಚ್ಯಾ ಸಾಹಿತ್ಯಾಕ್ ಅನಿ ಸಾಹಿತ್ಯಾಕಾರಾಂಕ್ ಮನ್ಶ್ಯಾಂತ್ ಹಾಡ್ಚ್ಯಾ ವಾವ್ರಾಕ್ ಆಯ್ತೊ ಜಾಲಾ.

ತಾಚಾ ಮಿಸಾವಾಂತ್ ಆಮಿ ಜಯ್ತ್ ಆಶೆತಾಂವ್, ಆನಿ ತಾಚಿ ಪಾಟ್ ಥಾಪ್ಡುನ್ ತಾಚೆ ಭುಜಾಂನಿ ಬಳ್ ಭರ್ತಾಂವ್.

ತಶೆಂಚ್ ಜಾಂವ್.

ಹೇಮಾಚಾರ್ಯಾ 

ಸಂಚಾಲಕ್, ’ದಾಯ್ಜಿ ದುಬಾಯ್’ -ಕೊಂಕ್ಣಿ ಬರ್‍ಪ್ಯಾಂಚೊ ಎಕ್ತಾರ್ ಆನಿ ’ದಾಯ್ಜಿ ರಂಗ್ ಮಂದಿರ್’. ದುಬಾಯ್,

ಜುಲಾಯ್ 1 ತಾರಿಕ್.

ಕವಿತಾಪಾಠ್

ಕವಿತಾಪಾಠ್ ಕಿತ್ಯಾಕ್ ಗರ್ಜ್?

ಪಾಟಿಂ ದಾಯ್ಜ್ ಪಾನಾಕ್

About us | Feedback | Contact us
Copyright © 2005 DAAIZ.COM All rights reserved. Page concept, designed and maintained by Ashawadi Publications