ಕವಿತಾकविताPoem
ಕೊಣಾಚಿಂ
ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ತಿಂತೆರಾಂತ್ ಪಿಂತುರ್
ಪಿಂತುರ್ - 11
ವಿಶಯ್: ಹಿಂ ಭುರ್ಗಿಂ ಕೊಣಾಚಿಂ
ಪಿಂತುರ್, ತಿಂತೆರ್ ಆನಿ ಪ್ರೇರಣಾಂ
ತಿಂತೆರಾಂತ್ ಪಿಂತುರಾಂತ್ಲೆಂ ಹ್ಯಾ ಮಯ್ನ್ಯಾಚೆಂ ಪಿಂತುರ್ ’ಭುರ್ಗ್ಯಾಂಚೆಂ’ - ಭುರ್ಗೆಂ ಸಾಂಕೇತ್ ಜಾವ್ನಾಸಾ ಮುಗ್ದತಾಚೆಂ, ನಿತಳ್ ಚಿಂತ್ಪಾಚೆಂ, ನೆಣಾರ್ಪಣಾಚೆಂ, ಕಸ್ಲೆಂಚ್ ಕಪಟ್ಪಣ್ ನಾತ್ಲ್ಲೆಂ. ಹಾಂಗಾಸರ್ ಕವಿತಾ ಬರಯಿಲ್ಲ್ಯಾ ಸರ್ವ್ ಕವಿಂಚಿಂ ಚಿಂತ್ನಾಂಯ್ ಪ್ರಭುದ್ದ್ ಜಾವ್ನ್ ಉದೆಲ್ಯಾಂತ್. ಚಡಾವತ್ ಕವಿತೆಂನಿ ಹುಸ್ಕೊ, ಖಂತ್-ಭಿರ್ಮತ್, ದಯಾಮಯಾ, ಮೋಗ್-ಮಾಯ್ಪಾಸ್ ಉಟೊನ್ ದಿಸ್ತಾ.
ಕವಿ ಆಸ್ಟಿನ್ ಪ್ರಭು ಮನ್ಶಾಂ ಸಂಯ್ಬಾಚೆಂ ಸಮಾನತಾವಾದ್ ಅಪ್ಲ್ಯಾ ಕವಿತೆಂತ್ ಪಾಚಾರ್ತಾ;
’ಆಮ್ಕಾಂ ಖೆಲ್ಲ್ಯಾ ತಿತ್ಲೆಂಯ್ ಪಾವಾನಾ
ಹಾಂಕಾಂ ಖಾಂವ್ಕ್ ಭಿಲ್ಕುಲ್ ಮೆಳಾನಾ’
ಪುಣ್ ಹಕೀಗತೆಂತ್ ಗ್ರೇಸ್ತ್ ಮನಿಸ್ ಗ್ರೇಸ್ತ್ ಜಾತೇಚ್ ವೆತಾನಾ ದುಬ್ಳೊ ದಿಸಾನ್ ದೀಸ್ ದುಬ್ಳೊ ಜಾತೆಚ್ ವೆತಾನಾ ಸಮಾನತಾವಾದ್ ಮಾತ್ರ್ ಹ್ಯಾ ಹಕೀಗತೆಚಾ ದಾವೆಂತ್ ಬಾಜ್ತಾ, ಲಾಸ್ತಾ, ಕರ್ಪತಾ....
ಕವಿ ವಿನ್ಸಿ ಮೆಲ್ಕಾರಾಚೆಂ ಹ್ಯಾ ಪಾವ್ಟಿಚೆಂ ಕವಿತಾ ಅಪುರ್ಭಾಯೆಚೆಂ -
’ಮೂಟ್ ಆರಾಂವ್ಕ್ ಪಳೆತಾಂ ಕಿತೆಂಚ್ ಮೆಳಾನಾ
ಕೊಣೆಂ ನಾಡ್ಲಾಂಗೀ ಮ್ಹಣ್ ದುಭಾವ್ ಪಾವ್ತಾಂ
ಮ್ಹಾಕಾಚ್ ಹಾಂವ್ ಸೊಧ್ತಾಂ, ಏಕ್ ಅಶೀರ್ ವಾಟ್ ಚಲೊನ್
ಕೊಣಾಕ್ಯೀ ಲೆಖಿನಾಸ್ತಾಂ, ಕೊಣಾಕ್ಯೀ ಸಮ್ಜಾನಾಸ್ತಾಂ’
ಹ್ಯಾ ಸಂಸಾರಾಂತ್ ಭಿಕ್ ಮಾಗ್ಚಾ ಗರೀಬ್ ಭುರ್ಗ್ಯಾಂ ಮಧೆಂ ಕವಿ ’ಹಾಂವ್ ಕೊಣ್? ಮ್ಹಜೆಂ ಅಸ್ತಿತ್ವ್ ಕಸಲೆಂ?’ ಮ್ಹಳ್ಳೆಂ ಅಪ್ಲ್ಯಾ ಕೊಶೆಡ್ದಾಕ್ ಸವಾಲ್ ಕರ್ಚೆಂ ಧಯ್ರಾಧಿಕ್ ಚಿಂತಾಪ್ ಉಟೊನ್ ದಿಸ್ತಾ.
ಅಸಲೆಂಚ್ ಚಿಂತಾಪ್ ಕವಿ ಪ್ರಸನ್ನ್ ನಿಡ್ಡೋಡಿ ಕರ್ತಾ ಏಕ್ ಮೇಟ್ ಮುಖಾರ್ ದವ್ರುನ್. ತಾಕಾ ಹಿಂ ಭುರ್ಗಿಂ ಕಾಂಯ್ ಅಪ್ಲಿಂಚ್? ಎಕಾ ನ್ಹಂಯ್ ಎಕಾ ರಿತಿನ್ ತ್ಯಾ ಭುರ್ಗ್ಯಾಂಚಾ ನಾಗ್ಡೆಪಣಾಕ್, ಭುಕೆಕ್, ಕಾರಾಣ್ ಹಾಂವ್ಗಾಯ್? ಕಾಂಯ್ ತಾಂಚಾ ಭುಕೆಚಿ ಬೋಬ್ ಆಪ್ಲ್ಯಾ ಕಾನಾಂಕ್ ಆಯ್ಕೊಂಕ್ ನಾ? ಕಾಂಯ್ ತಾಂಚಿ ಲಜ್ ಆಮ್ಚಾ ದೊಳ್ಯಾಂಕ್ ದೊಸೊಂಕ್ ನಾ? ಕಾಂಯ್ ತಾಂಚಿ ದೂಕ್ ಆಮ್ಚಾ ಕಾಳ್ಜಾಕ್ ಭಗೊಂಕ್ ನಾ? ಮ್ಹಳ್ಳಿಂ ಸವಾಲಾಂ ಕರ್ಚಿಂ ದಿಸೊನ್ ಯೆತಾ. ಆನಿ ಜೆದ್ನಾಂ ಏಕ್ ಕವಿ ಅಸಲೆಂ ಚಿಂತಾಪ್ ಖುದ್ದ್ ಆಪ್ಣಾಕ್ ವಿಚಾರುಂಕ್ ಸಕ್ತಾ ತೆದ್ನಾಂ ಖಂಡಿತ್ ತಾಚಾ ಕವಿತಾಕ್ ನೀಜ್ ಜೀವ್ ಮೆಳ್ತಾ.
ಕವಿ ಫ್ರಾನ್ಸಿಸ್
ಫುಡ್ತಾದೊಕ್ ಹ್ಯಾ ಭುರ್ಗ್ಯಾಂಚೆಂ ಜಿವಿತ್, ಅಪ್ಲ್ಯಾ
ಜಿವಿತಾಚೊ ನಿಯಾಳ್ ಕರುನ್ ದಿತಾನಾ, ತೊ ಮಟ್ವ್ಯಾನ್
ಮನ್ಶಾಚಾ ಜಿಣ್ಯೆಚ್ಯಾ ಸುರ್ವಾತೆ ಥಾವ್ನ್ ಅಖ್ರೇಚಾ ದಿಸಾಂ
ಪರ್ಯಾಂತ್ ತಾಣೆಂ ಕಾಡುಂಕ್ ಆಸ್ಚಾ ಮೆಟಾಂವಿಶಿಂ ನಿಯಾಳ್
ದಿತಾ ತಶೆಂಚ್ ಬರೊ ಸಂದೇಶ್ ದಿತಾ; ’ಜೊ ಮನಿಸ್
ಚಲ್ತಾ, ತೊ ಪೋಂತ್ ಪಾವ್ತಾ ಆನಿ ಜೊ ರಾವ್ತಾ, ತೊ ಸಂಪ್ತಾ’.
ಕವಯತ್ರಿ ನಿರ್ಮಲಾ ಬಾಯ್ ಹ್ಯಾ ಭುರ್ಗ್ಯಾಂ ಥಂಯ್ ಆಂಜ್ ಭಡ್ವ್ಯಾಂಕ್ ದೆಖ್ತಾ. ನ್ಹಂಯ್ ರುಪಾನ್ ಬಗಾರ್ ಕಸಲೆಂಚ್ ಕಪಟ್ಪಣ್ ನಾತ್ಲ್ಲಿಂ ಹಿಂ ಭುರ್ಗಿಂ ಖರೆಂಚ್ ಜಾವ್ನ್ ಆಂಜ್ ಭಡ್ವ್ಯಾಂಪರಿಂ ದಿಸ್ಚಾಮ್ತ್ ನವಾಲ್ ನಾ. ಆನಿ ಹೆಂ ಚಿಂತಾಪ್ ಭೋವ್ಶಾ ಏಕ್ ಬಾಯ್ಲೆಕ್/ಸ್ತ್ರೀಯೆಕ್ ಮಾತ್ರ್ ಯೇಂವ್ಕ್
ಸಾಧ್ಯ್.
ಗೊಂಯ್ಚೊ ಕವಿ ಮಾರಿಯಾನೊ
ಲೂಕಸ್ ದಿನಿಜ್ ಬಾಬ್ ಏಕ್ ವೆಗ್ಳೆಂಚ್ ಕವಿತಾ ಘೆವ್ನ್
ಆಯ್ಲಾ - ಹ್ಯಾ ಸಂಸಾರಾಂತ್ ಇತ್ಲೆಂ ಸರ್ವ್ ಬದಲ್ಲಾಂ ವ
ಬದ್ಲೊನ್ ಆಸ್ತಾಂ ಹ್ಯಾ ದೊಗಾಂ ಭಿಕಾರಿಂ ಭುರ್ಗ್ಯಾಂಕ್
ಪಳೆತೆಚ್ಚ್ ಜಾಂವ್ಚೆಂ ತರ್ಯ್ ಕಿತೆಂ? ಮನಿಸ್ ಸಗ್ಳೊ
ನಿದೊನ್ ಆಸಾ ಅಜೂನ್ಯೀ ಮ್ಹಳ್ಳೊ ಅಪುರ್ಭಾಯೆಚೊ
ಸಂದೇಶ್ ದಿತಾ ಹೆಂ ಕವಿತಾ.
ಕವಯತ್ರಿ ವಾಯ್ಲೆಟ್ ಬಾಯ್ ಫಕತ್ತ್ ಉಲವ್ಪಿಣ್ ನ್ಹಂಯ್ ಬಗಾರ್ ಕಾರ್ಯರುಪಾರ್ ಕರ್ನ್ ಧಾಖಂವ್ಚಿ ತಿಚಿ ತಾಂಕ್. ತಿ ಕವಯತ್ರಿ ಆಯ್ಲೆವಾರ್ಚಿ ತರ್ಯ್ ಏಕ್ ಸಮಾಜ್ ಸೇವಕಿ ಜಾವ್ನ್ ದಾಕ್ಡ್ಯಾಂ ಥಾವ್ನ್ ವಳ್ಕಿಚಿ. ಪುಣ್ ಪರ್ದ್ಯಾಭಿತರ್ ತಿಣೆ ಕರ್ಚಿ ಸಮಾಜ್ ಸೆವಾ ತಿಳುಂಕ್ ಸಗ್ಳಿಂ ಸಕಾನಾಂತ್ ಯಾ ಪಾವಾನಾಂತ್. ಹಿಂ ಭುರ್ಗಿಂ ಕೊಣಾಚಿಂಯ್ ಜಾಂವ್. ಪುಣ್ ಅಸಲ್ಯಾ ಭುರ್ಗ್ಯಾಂಕ್ ಆಮಿಂ ಬರೆಂ ಶಿಕಾಪ್ ದಿವ್ಯಾಂ ಮ್ಹಳ್ಳೆಂ ಅಪುರ್ಭಾಯೆಚೆಂ ಚಿಂತಾಪ್ ಅಪ್ಲೆ ಕವಿತೆಂತ್ ವ್ಹಾಳಂವ್ಚಾ ಹಿಕಾ ಖರೆಂಚ್ ಜಾವ್ನ್ ಮಾನ್ ಫಾವೊ.
ಕವಿ ಮೆಲ್ವಿನ್ ವಾಸ್ ಹರ್ಶೆಂಚೆಪರಿಂ ಸಂಸಾರಾಕ್ ಏಕ್ ತಮಾಶ್ಯಾಚೆಂ ಘರ್ ಕರ್ನ್ ಸೊಭಾಯ್ ಪಳೆಂವ್ಚಾ ದೆವಾಚೆರ್ (ಪದ್ವೆದಾರಾಂಚೆರ್) ಶಿಣ್ ತಶೆಂಚ್ ತಾತ್ಸಾರ್ ಉಚಾರ್ತಾ. ಕವಿ ಅಪ್ಣಾನ್ ಚಿಂತ್ಲ್ಲೆಂ ಕೆದಿಂಚ್ ಜಾಂವ್ಕ್ ನಾ - ಅಪ್ಣಾಕ್ ದೆವಾಳ್ ರಚ್ಲೆಂ ಪುಣ್ ದೆವಾನ್ ದುಸ್ರೆಂಚ್ ವಿಂಚ್ಲೆಂ. ಅಪ್ಣಾನ್ ಪುಜಾ ಕರುಂಕ್ ದೂದ್ ಆನಿ ಹಳದ್ ಹಾಡ್ಲಿ ಪುಣ್ ತಾಚ್ಯಾಧಿಂ ಹ್ಯಾ ಮಾಸೂಮ್ ಭುರ್ಗ್ಯಾಂಚಾ ದುಖಾಂನಿ ತಾಂಕಾಂ ಧುವ್ನ್ ಜಾಲ್ಲೆಂ ಮ್ಹಳ್ಳಿ ಸಂಕೀರ್ಣತಾ ಆಪ್ಲ್ಯಾ ಕವಿತೆಂತ್ ಪಾಚಾರ್ಲಾಂ ಆಸ್ತಾಂ ಖರೆಂಚ್ ಜಾವ್ನ್ ಹೆಂ ದೆವಾಳ್ ಭೋವ್ ವ್ಹಡ್ ಮೂರ್ತ್ ಜಾವ್ನ್ ಉಭಿ ಕೆಲ್ಯಾ.
ಕವಯತ್ರಿ ಬಾಯ್ ನಂದಿನಿಕ್ ಹ್ಯಾ ಭುರ್ಗ್ಯಾಂ ಥಾವ್ನ್ ಉಪ್ಕಾರ್ ಜೊಡ್ಚೆ ಸಮಾಜೆಂತ್ಲೆ ವೆವೆಗ್ಳೆ ವರ್ಗ್ ದಿಸ್ತಾತ್ - ಮಂತ್ರಿವರ್ಗ್, ಪುನೆವಂತ್, ಉಂಚ್ಲ್ಯಾ ಜಾತಿಚೆ, ಸಮಾಜೆಚೆ ಗಣ್ಯ್ ವರ್ಗ್ - ಪುಣ್ ಇತ್ಲೆ ವರ್ಗ್ ಆಸೊನ್ಯೀ ಹಿಂ ಭುರ್ಗಿಂ ಥಂಯ್ಚ್ ಆಸಾತ್ ನಾಕಾರ್ ಕಿರ್ಮೆಂ ಗಳವ್ನ್, ಉಗ್ತೊ ಕುಲೊ ಧಾಖವ್ನ್, ಅರ್ಧೆಂ ಪೋಟ್ ಭರುನ್. ದೆಖುನ್ ತಿ ಉಲೊ ದಿತಾ
’ಕೊಣ್ ತರ್ಯ್ ಹಾಂಚಾ ಜಿವಿತಾಕ್ ರಂಗ್ ದಿಯಾ’ ಮ್ಹಣ್.
ಮ್ಹಾಕಾ ಕಿತ್ಯಾಕ್ಗಿ ಹ್ಯಾ ಪಿಂತುರಾಂತ್ ಹ್ಯಾ ಭುರ್ಗ್ಯಾಂಚಿ ಆವಯ್ ಬಾಪುಯ್ ದಿಶ್ಟಿಕ್ ಪಡ್ತಾತ್ - ಆನಿ ವ್ಯಂಗ್ಯತಾ ದಿಸೊನ್ ಯೆತಾ. ದೆಖುನ್ ಆವಯ್ ಫಿಂರ್ಗಿ ಆನಿ ಬಾಪುಯ್ ಫಿಂರ್ಗಿ - ಪುಣ್ ಹಿಂ ಕಂಟ್ರಿ ಭುರ್ಗಿಂ ಕೊಣಾಚಿಂ? ಮ್ಹಳ್ಳೆಂ ಪದ್ ಅಪಾಪಿಂ ಘಡೊನ್ ಆಯ್ಲೆಂ ಆನಿ ತೆಂಚ್ ಹಾಂಗಾಸಾರ್ ದಿಲಾಂ.
ಕವಿ ’ಆರ್ಯನ್ ತಾಕೊಡೆ’ ಚಿಂತ್ಪಾನ್ ಕವಿ ’ಬಾಬ್ ಪ್ರಸನ್ನ್’ ಪರಿಂಚ್ ಥೊಡಿಂ ಪಾವ್ಲಾಂ ಮುಖಾರ್ ಕಾಡುನ್ ತಿಂ ಭುರ್ಗಿಂ ಹೆರ್ ಕೊಣ್ಚ್ ನ್ಹಂಯ್ ಬಗಾರ್ ಖುದ್ದ್ ಹಾಂವ್ ಮ್ಹಳ್ಳೆಂ ಚಿಂತಾಪ್ ಚಿಂತುಂಕ್ ಸಕ್ಲಾ - ಹಿ ಎಕಾ ಪ್ರಾಮಾಣಿಕ್ ಕವಿಚಿ ಶ್ಯಾಥಿ ಮ್ಹಣ್ ಹಾಂವ್ ಸಮ್ಜತಾಂ. ಜೆದ್ನಾಂ ಸಮಾಜೆಂತ್ ದಣ್ಸಲ್ಲ್ಯಾಂಚಿ ಜಿಣಿ ಖುದ್ದ್ ಭೊಗುಂಕ್ ಪ್ರೇತನ್ ಕರ್ತಾಂವ್ ತೆದ್ನಾಂ ತ್ಯಾ ಕವಿತೆಕ್ ಜೀವ್ ಲಾಭ್ತಾ. ಕಿತ್ಯಾಕ್ ಕವಿತೆಕ್ ರೂಪ್ ಮಾತ್ರ್ ನ್ಹಂಯ್ ಜೀವ್, ತ್ರಾಣ್ ಆಸ್ಚೆಂ ಭೊವ್ ಗರ್ಜೆಚೆಂ.
ಬಾಯ್ ಪ್ರಿಯಾ
ಸಿಕ್ವೇರಾ ಹಿಚ್ಯಾ ಕವಿತಾಪ್ರತಿಭೆವಿಶಿಂ ದೋನ್ ಸಬ್ಧ್
ಪರತ್ ಹಾಂಗಾಸರ್ ಸಾಂಗಾನಾಂ ತರ್ ಹಾಂವ್ ಚುಕಿದಾರ್
ಜಾಯ್ನ್. ಪಾಟ್ಲ್ಯಾ ದೋನ್ ವರ್ಸಾಂನಿ ಪ್ರಾಮಾಣಿಕ್
ರಿತಿನ್, ವರ್ತೆ ಮಿನತೆನ್ ಕವಿತಾಚೆಂ ಅಧ್ಯಯನ್ ಕರುನ್
ಆಯಿಲ್ಲೆಂ ಹೆಂ ಹ್ಯಾ ಪಾವ್ಟಿಂ ಇತ್ಲೆಂ ಅಪುರ್ಭಾಯೆಚೆಂ
ಕವಿತಾ ಘೆವ್ನ್ ಆಯ್ಲಾಂ ಮ್ಹಳ್ಯಾರ್, ಹೆಂ ಕವಿತಾ ಪರತ್
ಪರತ್ ವಾಚುಂಕ್ ಪ್ರೇರಣ್ ದಿತಾ. ದರ್ಯಾಚಿ ಸೊಭಾಯ್
ಪಳೆತೆಲೆಚ್ಚ್ ಭರೊನ್ ಗೆಲ್ಲ್ಯಾ ಹ್ಯಾ ಸಂಸಾರಾರ್
ವೊತಾಂತ್ ರೆಂವೆಚಾ ರಾಶಿಚೆರ್ ಕರ್ಪೊಂವ್ಚಾ ರೆಂವೆಕ್
ಗುಡ್ಡಾಂವ್ಚೆ/ಮಸ್ತುಂಚೆ ಚಡ್. ಸಂಕೀರ್ಣ್ ಇಮಾಜಿಂಕ್
ಲಿಪಂವ್ಚೆಂ ಹೆಂ ಕವಿತಾ ಹ್ಯಾ ದೋನ್ ಇಮಾಜೆಂಕ್ ಮುಖಾರ್
ದವ್ರುನ್ ವ್ಹಡ್ಲಿ ಜಯ್ತ್ ಕಾಣಿಂಚ್ ಸಾಂಗೊನ್ ಸೊಡ್ತಾ.
ಮಾಲ್ಗಡೊ ಕವಿ ಕಾವ್ಯಾದಾಸ್ ಜಿಣ್ಯೆ ಆನ್ಭೋಗಾಂತ್ ಪಿಕ್ಲ್ಲೊ ಜಾಂಟೊ ದೆಖುನ್ ತಾಚಿ ನದರ್, ತಾಣೆಂ ಸಮ್ಜಂವ್ಚಿ ರೀತ್, ತಾಚಿಂ ಉತ್ರಾಂ ತಿತ್ಲಿಂಚ್ ಪ್ರಭುದ್ದ್ ದೆಖುನ್ ತಾಚೆಂ ಕವಿತಾಯ್ ತಿತ್ಲೆಂಚ್
ಪ್ರಭುದ್ದ್. ಮನ್ಶ್ಯಾಚಿ ಜಿಣಿಂಚ್ ಏಕ್ ಪಿಸಾಯ್ ಮ್ಹಣ್ತಾತ್
ಜಾಯ್ತೆ ತತ್ವ್ಗಿನ್ಯಾನಿ ಆನಿ ಜಾಣ್ತೆ. ಆನಿ ಹಿ ಪಿಶಿ ಜಿಣಿ ಜಿಯೆತಾನಾ
ಮನಿಸ್ ಜಾಯ್ತೆ ರಿತಿನ್ ಹ್ಯಾ ಪಿಶೆಪಣಾಕ್ ಎಕಾ ನ್ಹಂಯ್
ಎಕಾ ರಿತಿನ್ ಹರ್ಯೆಕಾ ದಿಸಾ ಭೆಟ್ತಾ. ಕೊಣಾಕ್ ಉಲಂವ್ಚೆಂ ಪಿಶೆಂ
ತರ್ ಕೊಣಾಕ್ ಉಲಂವ್ಕ್ ಕರ್ಚೆಂ ಪಿಶೆಂ, ಕೊಣಾಕ್ ನಾಚೊಂಕ್
ಪಿಶೆಂ ತರ್ ಕೊಣಾಕ್ ನಾಚಂವ್ಚೆಂ ಪಿಶೆಂ. ಕೊಣಾಕ್ ಖೆಳ್ಚೆಂ
ಪಿಶೆಂ ತರ್ ಕೊಣಾಕ್ ಖೆಳಂವ್ಚೆಂ ಪಿಶೆಂ. ಕವಿಕ್ ಮಾತ್ರ್
ಹ್ಯಾ ಸರ್ವ್ ಪಿಶ್ಯಾಂವಿಶಿಂ ಬರಂವ್ಚೆಂ ಪಿಶೆಂ.
ಕವಿ ವಿಲ್ಸನ್ ಕಟೀಲ್ ಹಾಚೆಂ ವೆಕ್ತಿತ್ವ್ ಕಶೆಂ ವೆಗ್ಳೆಂಚ್ಗೀ ತೆಚ್ಚ್ಪರಿಂ ಚಿಂತಾಪ್ಯ್, ಸ್ವಪ್ಣಾಂಯ್ ವೆಗ್ಳಿಂಚ್ ದೆಖುನ್ ಕವಿತಾಯ್ ವೆಗ್ಳೆಂಚ್ ಪುಣ್ ಅಪುರ್ಭಾಯೆಚೆಂ. ತಾಕಾ ಹ್ಯಾ ಪಾವ್ಟಿಚೆಂ ಪಿಂತುರ್ ಕಿತ್ಯಾಕ್ಗೀ ಕವಿ ಸಂಸಾರಿ ’ಖಚ್ರೊ’ ಜಾಲ್ಲೆಪರಿಂ ಭಗ್ತಾ ಆನಿ ಫಾಂತ್ಯಾಚೆಂ ಸ್ವಪಾಣ್ ಸುರ್ಯಾಚೆಂ ಕಿರಣ್ ಪಡ್ತಚ್ ಖಚ್ರೊ ಜಾಂವ್ಚೆಪರಿಂ ಭಗ್ತಾ.
ಕವಿತೆಚಾ ಎಕೆಕಾ ಉತ್ರಾಂನಿ ಕಾಣಿ ಸಾಂಗ್ಚಿ ಕಲಾ ಜಾಣಾ ಆಸ್ಚಾ ಕವಿಂಚಾ ಮೆಳಿಂತ್, ಕೊಂಕ್ಣೆಚೊಯ್ ಎಕ್ಲೊ ಕವಿ ಮ್ಹಾಕಾ ಉಟೊನ್ ದಿಸ್ತಾ. ಆನಿ ತೊ ಜಾವ್ನಾಸಾ ಎಚ್ಚೆಮ್. ಆನಿ ಹ್ಯೇ ಪಾವ್ಟಿಂ ಸಯ್ತ್ ಅಪುರ್ಭಾಯೆಚೆಂ ಕವಿತಾ ಘೆವ್ನ್ ತೊ ಹಾಂಗಾ ಆಯ್ಲಾ. ವೆಳಾಕಾಳಾಕ್ ಸರಿ ಜಾವ್ನ್ ಮನಿಸ್ ಜಶೆಂ ಹಿ ಧರ್ತಿ ಆನಿ ಹೆರ್ ಜೀವಿ, ಫುಲಾಂ ಸಯ್ತ್ ಅಪಾಪ್ಲಿ ತಾನ್ ಭಾಗಯ್ತಾತ್. ಪುಣ್ ಜೆದ್ನಾಂ ಸಂಯ್ಬಿಕ್ ರಿತಿನ್ ಜೆದ್ನಾಂ ಏಕ್ ಮೂಸ್ ತಾನೆತಾನಾ, ನಾಸಾಚೆಂ ಮುಳ್ ಸೊಧ್ಚಿ ಪಿಸಾಯ್ ಘೆತ್ಲ್ಲ್ಯಾ ಫುಲ್ಲ್ಲ್ಯಾ ಫುಲಾಂಚಿ ಆಶಾ ಕಿತ್ತುನ್ ಪರ್ಯಾಂತ್!?ಕವಿ
ರೋಬರ್ಟ್ ಫೆರ್ನಾಂಡಿಸ್ ಹ್ಯಾ ಪಿಂತುರಾಂತ್ ದೋನ್ ರಿತಿಚೆ ವರ್ಗ್ ಪಳೆತಾ, ಏಕ್ ವರ್ಗಾಂತ್ ಸರ್ವ್ ಸಂಸಾರಿ ಸವ್ಲತಾಯೊ ಆಸ್ಚಿಂ ಭುರ್ಗಿಂ ತರ್ ಅನ್ಯೇಕಾ ವರ್ಗಾಂತ್ ಕುಲೊ ಧಾಂಪುಂಕ್ ಏಕ್ ಸುತಾಕುಡ್ಕೊ ನಾತ್ಲ್ಲಿಂ ಭುರ್ಗಿಂ. ಹಾಂಚೆ ಮಧೆಂ ಫರಕ್ ಸೊಧುನ್ ಸೊಧುನ್ ಕವಿಕ್ ಅಖ್ರೇಕ್ ದಿಶ್ಟಿಕ್ ಪಡ್ತಾ ರಚ್ಣಾರಾನ್ ಭೊಗ್ಚಿ ತಮಾಶಾ. ನಾತ್ಲ್ಲೆಂ ಚಿಂತುನ್ ತಕ್ಲಿ ಪಾಡ್ ಕರ್ಚ್ಯಾಕೀ ಆಸ್ಚಾಂತ್ ಸಮಧಾನ್ ಘೆಂವ್ಚೆಂ ಸೂತ್ರ್ ಹ್ಯಾ ಕವಿತೆಂತ್ ವೆಕ್ತ್ ಕರ್ಚೆಂ ಹೆಂ ಕವಿತಾ ಖರೆಂಚ್ ಮಯ್ನ್ಯಾಚೆಂ ಕವಿತಾ ಜಾವ್ನ್ ವಿಂಚೊನ್ ಯೆತಾನಾ - ಕವಿಕ್ ಉಲ್ಲಾಸ್!.
[ವಾಂಟೆಲಿ ಜಾಲ್ಲಿಂ]
1. ರೋಬರ್ಟ್ ಫೆರ್ನಾಂಡಿಸ್ ಉದ್ಯಾವರ್/ದುಭಾಯ್.
3. ಮೆಲ್ವಿನ್ ಜೆ. ವಾಸ್, ಕೆಲರಾಯ್/ಕುವೇಯ್ಟ್.
4. ನಿರ್ಮಲಾ ಗೋವಿಯಸ್, ಬೆಂದುರ್/ಮಸ್ಕತ್.
5. ವಾಯ್ಲೆಟ್ ಜೆ. ಪಿರೇರಾ, ಕುಲ್ಶೇಕರ್/ದುಭಾಯ್.
6. ಆಸ್ಟಿನ್ ಡಿ’ಸೋಜ್ ಪ್ರಭು, ನಂತೂರ್/ಚಿಕಾಗೊ.
10. ಪ್ರಿಯಾ ಸಿಕ್ವೇರಾ, ಫೆರಾರ್/ಕುವೇಯ್ಟ್.
11. ಮಾರಿಯಾನೊ ಲೂಕಸ್ ದಿನಿಸ್, ಗೊಯಾಂ/ಕುವೇಯ್ಟ್.
12. ಫ್ರಾನ್ಸಿಸ್ ಫುರ್ಟಾಡೊ, ಕಲೀನಾ, ಮುಂಬಯ್.
13. ವಿನ್ಸಿ ಮೆಲ್ಕಾರ್, ಬೆಂಗ್ಳುರ್.
1. ಫರಕ್ ಆಮ್ಕಾಂ ತುಮ್ಕಾಂ [ಮಯ್ನ್ಯಾಚೆಂ ಕವಿತಾ]
ರೋಬರ್ಟ್ ಫೆರ್ನಾಂಡಿಸ್ಅಮ್ಕಾಂ
ತುಮ್ಕಾಂ ಫರಕ್ ಇತ್ಲೊಚ್
ತುಮ್ಚೊ ಜಲ್ಮ್ ಸರ್ವಾಂಕ್ ಸಂಭ್ರಮ್
ಪಾಳ್ಣ್ಯಾರ್ ತುಮ್ಚ್ಯಾ ನೆಟಯ್ಲಿಂ ಫುಲಾಂ
ಕಾಣಿಕಾಂಸವೆಂ ಪಾಠಯ್ಲೆ ಉಲ್ಲಾಸ್
ಸರ್ಕಾರಿ ಥಳಾರ್ ಅಮ್ಚೊ ಜಲ್ಮ್
ದಾಕ್ತೆರ್-ನರ್ಸಾಂಕ್ ಅಮ್ಚೆರ್ ಶಿಣ್
ಇಲ್ಲ್ಯೊ ಗಾಳಿ ಇಲ್ಲೊ ತಾತ್ಸಾರ್
ಪಾವ್ತಾಂವ್ ಕಶೆಂಯ್ ಘರಾ ಬಾಗ್ಲಾರ್
ಅಮ್ಕಾಂ ತುಮ್ಕಾಂ ಫರಕ್ ಇತ್ಲೊಚ್
ತುಮ್ಚ್ಯಾ ಅವಯ್ಕ್ ಭರ್ಪೂರ್ ವಿಶೆವ್
ಜರ್ ಇಲ್ಲಿಶಿ ಶೆಳ್ ಜಾಲ್ಯಾರೀ
ವೆಳಾ-ವೆಳಾರ್ ವಯ್ಜ್ ಹಾಜರ್
ಅಮ್ಚ್ಯಾ ಅವಯ್ಕ್ ಖಂಯ್ ಪುರ್ಸತ್?
ನಾ ವಿಶೇಸ್ ಖಾಣ್ ಹುನ್ ಉದ್ಕಾ ನ್ಹಾಣ್
ರಚ್ನಾರಾ-ಉಸ್ಕ್ಯಾರ್ ಘಾಲುನ್ ಭಾರ್
ಗೆಲಿ ಕಾಮಾಂಕ್ ಸೊಡಿತ್ತ್ ಸುಸ್ಕಾರ್
ಅಮ್ಕಾಂ ತುಮ್ಕಾಂ ಫರಕ್ ಇತ್ಲೊಚ್
ತುಮಿ ವೆತಾತ್ ನರ್ಸರಿ ಶಾಲಾಕ್
ಬ್ಯಾಗ್, ಬೂಕ್, ಟಿಫಿನ್, ಪೆನ್ನಾಂ
ಜಲ್ಮಾ ದಿಸಾ ಸಂದೇಶ್ ಫೊನಾಂ
ಕುಜ್ನಾಂತ್ ಅಮ್ಚ್ಯಾ ಧುಂವರ್ ಉಠ್ತಾಂ
ಮಾತ್ಯೆ ಮೊಡ್ಕೆಂತ್ ಪೇಜ್ ಶಿಜ್ತಾ
ನ್ಹೆಣಾಂವ್ ಆಮಿ ಹೆರ್ ಖಾಣಾಂ
ನಾ ಜಲ್ಮಾ ದೀಸ್ ನಾ ಸೊಭಾಣಾಂ
ಅಮ್ಕಾಂ ತುಮ್ಕಾಂ ಫರಕ್ ಇತ್ಲೊಚ್ಚ್
ಬರೆಂ ಶಿಕೊನ್ ಭಾಂದುಂಕ್ ಫುಡಾರ್
ತುಮಿ ಪಾವ್ತಾತ್ ಪಯ್ಸ್ ಗಾಂವಾರ್
ಅಮ್ಚೆಂ ಶಿಕಾಪ್ ರಾವ್ತಾ ಅರ್ಧ್ಯಾರ್
ಅಮಿ ಅಮ್ಚಿಂ ಪೋಟಾಂ ಭರುಂಕ್
ಹಾಂಡ್ಯೊ ಘಾಸ್ತಾಂವ್ ಧರಣ್ ಪುಸ್ತಾಂವ್
ನವೆಂ ವಸ್ತುರ್ ಸ್ವಪಣ್ಂಚ್ ತರೀ
ಪರ್ನೆ ಜೆಂ ಆಸಾ ಪುರ್ತೆಂ ನ್ಹೆಸ್ತಾಂವ್
ಫರಕ್ ಅಮ್ಕಾಂ ತುಮ್ಕಾಂ ತರೀ
ಸುಖಿ ಆಮಿಂಚ್ ಸಂಸಾರ್ ಒಪ್ತಾ
ದುರ್ಬಳ್ಕಾಯೆಚಿ ಜಿಣಿ ಅಮ್ಚಿ
ರಚ್ನಾರಾಕ್ ಭೋವ್ಶಾ ಬರಿಚ್ ಸೊಭ್ತಾ!
2. ಹಿಂ ಕೊಣಾಚಿಂ ಭುರ್ಗಿಂ? [ನಂದಿನಿ]
ಜಲ್ಮಾಕ್ ಆಯ್ಲಾ ಜೀವ್, ತೊ ಕೊಣಾಚೊಯ್ ಜಾಂವ್
ಬಾಪಾಚಾ ಮೊಗಾಚಿ ದೀತ್ ಖರಿ ರುಜ್ವಾತ್
ತರಿ ಜಲ್ಮಾತಾನಾ ಲುಟ್ಲೆಂ ಕೊಣೆಂ ಹಾಂಚೆಂ ದಾಯ್ಜ್?
ಉಗ್ತ್ಯಾ ಆಂಗಾರ್, ಉಗ್ತ್ಯಾ ಪಾಯಾರ್, ಪಡ್ಲಿಂ ಕ್ಶುಂ ಉಗ್ತ್ಯಾ ರಸ್ತ್ಯಾರ್?
ಘರ್ ನಾ, ದಾರ್ ನಾ; ಆಪ್ಲೆಂ ಪೆಲೆಂ ನಾಂಚ್ ನಾ,. . .. . .
ಹಿಂ ಕೊಣಾಚಿ ಭುರ್ಗಿಂ?
ಸರ್ಗಾಕ್ ವೆಚಾಕ್ ತುಕಾ ಮಾಕಾ ಜಾಯ್ ಹಾಂಚೆಂ ರೂಪ್
ಪುಣ್ ಹಾಂಕಾಂ ಖರೆಂಚ್ ಲಾಗ್ಲಾಂ ಜಲ್ಮಾಚೆಂ ಪಾಪ್
ಜಲ್ಮಾ ಘಡಿಯೆ ಹಾಂಕಾಂ, ಉಗ್ತೆಂ ಕಶೆಂ ಇಂಫೆರ್ನಾಚೆಂ ದಾರ್?
ಬೂಕ್ ನಾ, ಲಿಖ್ಣಿ ನಾ; ಇಸ್ಕೊಲ್ ಶಿಕ್ಪಾಚೆಂ ನಾಂವ್ ನಾ
ಜೆವ್ತೆಲಿಂ ಕಶಿಂ ಸುಖಾಚಿ ಉಂಡಿ,. .. . .. . ಹಿಂ ಕೊಣಾಚಿಂ ಭುರ್ಗಿಂ?
ಆಸೊಂ ತಿಂ ಆಸೊಂ, ಪೂನ್ ಜೊಡ್ಚಾ ಭಕ್ತಿವಂತಾಂಕ್
ಜಾಯ್ ತಿಂ ಜಾಯ್, ವೋಟ್ ಮಾಗ್ಚಾ ಮಂತ್ರಿವರ್ಗಾಂಕ್
ಸಮಾಜ್ ಸೇವಕ್ ಕರ್ತಲೆ ಕಿತೆಂ, ಹಾಂಚೆವಿಣೆಂ ರಿತೆಂ ಜೀವನ್
ಸದಾಂ ಕಾಳ್ ಆಸೊಂದಿತ್, ಸಬಾರಾಂನಿ ಜೊಡ್ಚಾಕ್ ಸರ್ಗಾರಾಜ್
ತಿಂ ಕಶಿಂಯ್ ನ್ಹಯ್ ತುಜಿಂ ಮ್ಹಜಿಂ,. . . .. . . ..
ತಿಂ ಕೊಣಾಚಿಂ ಭುರ್ಗಿಂ?
ಕೊಣಿ ತರಿ ರಂಗ್ ಭರಾ, ರಂಗ್ ಭರಾ, ಸುಕ್ಲೆಲ್ಯಾ ಪೊಲ್ಯಾಂಕ್
ದಾನ್ ದಿಯಾ ಖಾಣ್ ದಿಯಾ ದವರ್ಯಾ ಕಶೆಂ ತರೀ ಜೀವ್
ಆಮಿಂಚ್ ತಾಂಚೆಂ ದಿರ್ವೆಂ ಸಾಂಬಾಳುಂಯಾಂ ತಿಂ ನೆಣಾರಿಂ, ತಿಂ ಅಸ್ಕತ್ !
ಆಸ್ಯೆತ್ ತಿಂ ಲ್ಹಾನಾಂಚಿಂ, ಚರ್ಬೆಲ್ಲ್ಯಾ ಸಾವ್ಕಾರಾಂಚಿಂ, ಬೆಜವಾಬ್ದಾರ್ ಬಾಮ್ಣಾಂಚಿಂ!
ಪುಣ್ ತಿಂ ನ್ಹಂಯ್ ತುಜಿಂ ಮ್ಹಜಿಂ,. . . . . . .. . . . .
ತಿಂ ಕೊಣಾಚಿಂ ಭುರ್ಗಿಂ?
ಕಾಳ್ಯೊ ಕಾತಿ, ಕಾಳ್ಕ್ಯೊ ಮತಿ, ಎಕ್ಸುರ್ಯೊ ತಾಂಚ್ಯೊ ರಾತಿ
ಭಂವ್ತಿಂ ಭುಂಯ್ ರಿತಿ ಸುಕಿ, ಬಿರ್ಮತ್ ಪಾಪ್ ದುಬ್ಳಿಂ ಧಾಕ್ಟಿಂ
ತರೀ ತೊಂಡಾರ್ ಹಾಸೊ ಕಶ್ಯೊ, ಫೊಂಡಾರ್ ಫುಲ್ಲ್ಲ್ಯೊ ಲಿಲ್ಲಿಯೊ ತಶ್ಯೊ
ಹಾಸೊಯ್ ಆಸೊಂ, ತಿಂಯ್ ಆಸೊಂ, ತಿಂ ನ್ಹಯ್ ಆಮಾ ಕೊಣಾಚಿಂ
ನ್ಹಯ್ ತಿಂ ತಾಂಚಿಂ ಹಾಂಚಿಂ, ಆಸೊಂ,.. . . . . .. ..
ಆಸೊಂ ತಿಂ ದೆವಾಚಿಂ ಭುರ್ಗಿಂ!!
3. ದೆವಾಳಾಚಿಂ ಸೊಧ್ನಾಂ [ಮೆಲ್ವಿನ್ ಜೆ. ವಾಸ್, ಕೆಲರಾಯ್]
ಹಾವೆಂ ತುಕಾ ಸೊಧ್ಲೆಂ
ಹಾವೆಂಚ್ ರಚ್ಲೆಲ್ಯಾ ತ್ಯಾ ದೆವಾಳಾ ಭಿತರ್
ತುವೆಂ ಮಾತ್ರ್ ವಿಂಚ್ಲೆಂ
ವಿಶೆವಾ ತಾರಾಣ್ ಹ್ಯಾ ಆಲಯಾಚಾ ದಾರ್ವಾಟ್ಯಾರ್
ಮಯ್ಲಾಂ ಮಯ್ಲಾಂ ಚಲೊನ್
ತ್ಯಾ ದೆವಾಳಾಚಿ ಘಾಂಟ್ ಶೃದ್ದೆನ್ ವ್ಹಾಜಯ್ತಾಂ
ಮ್ಹಜ್ಯಾ ಕಾನಾಂ ಸಕ್ತೆಕ್
ಪಡ್ಲೆಲೆಂ ದಾಂಪಣ್ ಉಘಡ್ಚೆಂ ತ್ರಾಣ್ ನಾಸ್ತಾಂ
ಬಾಂಗಾರಾ ತಾಂಬ್ಲೆರಾಂತ್
ತುಜ್ಯಾ ಪಾಂಯಾಂಥಳಾರ್ ಭಕ್ತೆನ್ ನೈವೇಧ್ಯ ಅರ್ಪಿಲಾಂ
ಸಂದ್ಯಾ ಆಸ್ತಮ್ತೆಂತ್
ವ್ಹಾಳ್ಲ್ಲ್ಯಾ ಗಾಯನಾಂನಿ ಮಿಸ್ತಾ ತುಜ್ಯಾ ಭುಕೆಕ್ ಥಾಂಬಯ್ಲಾಂ
ತುಜ್ಯಾ ಮಾತ್ಯಾಕ್
ದುದಾ ಹಳದಿಚೆಂ ಅಭಿಶೇಕ್ ತಯಾರ್ ಕೆಲಾಂ
ನಯನಾಂ ಥೆಂಬ್ಯಾಂನಿ
ಪಾಂಯಾಂ ತಾಳುವೆಕ್ ತುಜ್ಯಾ ಶೆಕುನ್ ಜಾಲಾಂ
ಕಿತೆಂ ಕರುಂ ಆತಾಂ?
ಹ್ಯಾ ನೈವೇಧ್ಯಕ್ ಆನಿ ಹಳ್ದಿ ದುದಾಕ್ ಸಾಂಗ್ ಮ್ಹಾಕಾ
ಮ್ಹಜ್ಯಾ ದಾರ್ವಾಟ್ಯಾರ್
ತುಜ್ಯಾ ವೈಭವಾಚೆಂ ದೆವಾಳ್ ಉಭೆಂ ಜಾಲಾಂ ಆಸ್ತಾಂ!
4. ಹಿಂ ಕೊಣಾಚಿಂ ಭುರ್ಗಿಂ? [ನಿರ್ಮಲಾ ಗೋವಿಯಸ್]
ಹಿಂ ಕೊಣಾಚಿಂ ಭುರ್ಗಿಂ
ದಿಸ್ತಾತ್ ಕೊಣಾ ಸಾರ್ಕಿಂ
ರಚ್ನಾರಾಚಾ ಅಶಿರ್ವಾದಾನಿಂ ಭರ್ಲ್ಲೊ ತುರೊ
ವಾ ರಾಗಾಚಾ ಕೆಂಡಾ ಥಾವ್ನ್ ಉಸ್ಳಾಲ್ಲ್ಯಾ ಕಿಠಾಳಾಸೊ ಮುರೊ?
ಅರ್ದೆಂ ಕುರೆಂ ನೆಸ್ಲ್ಯಾಂತ್ ಖರೆಂ
ಪೊಟ್ ಅರ್ದೆಂ ರಿತೆಂ
ಶಿತಳ್ ನಿತಳ್ ಹಾಸೊ ಪ್ರಕಾಸಾಚೊ
ದೆಖ್ತಾಂ ಯಾಧ್ ಹಾಡ್ತಾ ಆಮ್ಚಾ ಭಡ್ವ್ಯಾಂಚೊ
ಅವಯ್ ಬಾಪಯ್ಚಿಂ ಸೊಧ್ನಾಂ
ಫುಡಾರ್ ಕಸೊ ಮ್ಹಳ್ಳಿಂ ಚಿಂತ್ನಾಂ
ರಿತಿಂ ಅಪ್ಲಿಂ ಸ್ವಪ್ಣಾಂ, ಎಕ್ಸುರ್ಪಣಾಚಿಂ ನಾಸ್ತಾಂ ಭಗ್ಣಾಂ
ಆಂಜಾಳ್ ಹಾಸೊ ಮುಕಾಮಳಾರ್ ಫಾಂಕ್ತಾ ಸದಾಂ
ಲ್ಹಾನಾಂ ಭುರ್ಗ್ಯಾಂಚೊ ಮೋಗ್ ಕರ್ಚಾ ಸೊಮಿಯಾಕ್
ಬಿರ್ಮತ್ ದಿಸೊನ್ ಹ್ಯಾ ನೆಂಟ್ಯಾಚಿ
ಕರುನ್ ತಾಂಕಾಂ ಗಿರೇಸ್ತ್
ಅಪ್ಲಿಂ ವಿಜ್ಮಿತಾಂ ಪಾಚಾರಿತ್ ಸಂಸಾರಾರ್.
ಯಾದ್ ಗಿರೆಸ್ತ್ ಕೆಲ್ಲ್ಯಾ ಸೊಮಿಯಾಚಿ, ಉಪ್ಕಾರ್ ಬರೆಂ ಕೆಲ್ಲ್ಯಾ ಧನ್ಯಾ ದೆವಾಚಿ
ಬಾವ್ಡುನ್ ಜಿಯೆತಿತ್ ಹಿಂ ನೆಣ್ತಿಂ ತರ್ನಾಪಣಾರ್?
ಗಿರೆಸ್ತ್ಕಾಯ್ ಪರ್ಜಳಿಕ್ ಸೊಭ್ತಾನಾ,
ಅನಿತ್ ಲಾಗಿಂ ಚೊಯ್ತಾನಾ ಆಂಜಾಳ್ ಪ್ರಕಾಸ್ ಉರಾತ್ ಜಿವಾಳ್?
ನಾ, ಸಾದ್ಯಾ ಕಾಳ್ಕ್ಯಾ ದುಬ್ಳೆಪಣಾಕ್ ವಿಸ್ರೊನ್,
ಮಜಾ ಮಾರ್ತಿತ್ ಆತಾಂ ಹಾಂಕಾರಾನ್.
5. ಹಿಂ ಭುರ್ಗಿಂ ಕೊಣಾಚಿಂ!? [ವಾಯ್ಲೆಟ್ ಜೆ. ಪಿರೇರಾ]
ಹಿಂ ಭುರ್ಗಿಂ ಕೊಣಾಚಿಂ
ಆಸಾತ್ಗೀ ಹಾಂತು ಮ್ಹಜಿ ವಾ ತುಜಿಂ?
ಹಾತಾಂತ್ ನಾಕಾರಿ ವಸ್ತು ಘೆವುನ್
ಹಾಸ್ತಾತ್ ತಿಂ ಮೆಳ್ಲ್ಲ್ಯಾಂತ್ ಸಂತೊಸ್ ಪಾವೊನ್
ಆಸಾತ್ಗೀ ತುಜೆಂ ಥಂಯ್ ಕಾಳಿಜ್ ಭಿರ್ಮೊತಿಚೆ
ಹ್ಯಾ ಭುರ್ಗ್ಯಾಂಕ್ "ಮ್ಹಜಿಂ" ಮ್ಹಣ್ ಅಪ್ಣಾಂವ್ಚೆಂ
ಭಗ್ಲಾಂಗೀ ಕೆನ್ನಾಯ್ ಆಮ್ಕಾಂ ಹಾಂಚೊ ಹುಸ್ಕೊ
ಕಿತ್ಯಾಕ್ ಹಿಂ ಭುರ್ಗಿಂ ಪರ್ಕ್ಯಾಚಿಂ!
ಹಿಂ ಭುರ್ಗಿಂ ಕೊಣಾಚಿಂ
ಹಿಂ ಭುರ್ಗಿಂ ವಾ ತುಜಿಂ?
ದಿತಾಂವ್ ನ್ಹಂಯ್ಗೀ ತಾಂಕಾ ನೆಸಾಣ್ ರಸ್ಮಾಚೆಂ
ಖಾಣ್ ಜೆವಾಣ್ ತೆಂ ತಾಂಚಾ ಪಸಂದೆಚೆಂ
ಭಾಯ್ರ್ ಭಿತರ್ ವೆತಾನಾ ಸಾಂಗಾತ್ ಆಯಾಂಚೆಂ
ಜೀವನ್ ಸಾರ್ತಾತ್ ನ್ಹಂಯ್ಗೀ ಗ್ರೇಸ್ತಾಂಚೆಂ
ಶಿಕಾಪ್ ಶಿಕೊಂವ್ಕ್ ನಾಕಾ ತರೀ ಕಾಯ್ದ್ಯಾಂಚೆಂ
ಕಿತ್ಯಾಕ್ ಹಿಂ ಭುರ್ಗಿಂ ನ್ಹಂಯ್ ಪರ್ಕ್ಯಾಚಿ!!
ಹಿಂ ಭುರ್ಗಿಂ ಕೊಣಾಚಿಂ
ಹಿಂ ಭುರ್ಗಿಂ ಆಮಾಂ ಸರ್ವಾಂಚಿಂ
ಉಟಯಾ ತಾಂಕಾ ವಯ್ರ್ ದೀವ್ನ್ ಹಾತ್ ಕುಮ್ಕೆಚೊ
ಇಲ್ಲೆ ಉರವ್ನ್ ಕರ್ಯಾಂ ಕರ್ನ್ಯೊ ದಾನಾಚೊ
ಏಕ್ ಜಾವ್ನ್ ದಿವ್ಯಾಂ ಶಿಕಾಪ್ ದುಬ್ಳ್ಯಾ ದಾಕ್ಟ್ಯಾಂಕ್
ಸೊಡ್ಚೆಂ ನಾಕಾ ಹ್ಯಾ ಭುರ್ಗ್ಯಾಂಕ್ ಜಿಣಿಂ ವಿಭಾಡುಂಕ್
ಬೆಸಾಂವ್ ಘಾಲ್ತೊಲೊ ದೇವ್ ತುಜೆರ್ ಆನಿ ಮ್ಹಜೆರ್
ಮೆಲ್ಯಾ ನಂತರ್ ಇನಾಮ್ ಆಸ್ತೆಲೆ ಸರ್ಗಾಚೆರ್
ಅಪ್ಣಾವ್ಯಾಂ ಹ್ಯಾ ನೆಂಟ್ಯಾಕ್ ಚಿಂತುನ್ "ಹಿಂ ಭುರ್ಗಿಂ ದೆವಾಚಿಂ"!!!
6. ಅಶೆಂ ಕಿತ್ಯಾಕ್? [ಆಸ್ಟಿನ್ ಪ್ರಭು]
ಥೊಡೆ ಪಾವ್ಟಿಂ ದುಃಖಾಂ ಯೆತಾತ್
ಮ್ಹಜಿಂ ಭುರ್ಗಿ ಶಾಲಾಂಕ್ ವೆತಾತ್
ತಾಂಕಾಂ ತಾಂಚಿ ಆವಯ್ ಕಾರಾರ್ ಪಾಯ್ತಾ
ತಿಂ ಉಂಚ್ಲ್ಯಾ ಶಾಲಾಂಕ್ ಶಿಕೊಂಕ್ ವೆತಾತ್
ತಾಂಕಾಂ ಪಯ್ಶೆ ಆಮಿಂ ಭರ್ತಾಂವ್
ಪುಣ್ ಆಮ್ಚೆ ಭಂವಾರಿಂ ಹೆರಾಂ ಆಸಾತ್
ಥೊಡ್ಯಾಂಲಾಗಿಂ ಪಯ್ಶೆಚ್ಚ್ ನಾಂತ್
ಥೊಡ್ಯಾಂಕ್ ಕಾರಾಂ ನಾಂತ್
ತಾಂಚಿಂ ಭುರ್ಗಿಂ ಶಾಲಾಂಕ್ ವೆತಾತ್
ಸರ್ಕಾರಿ ಶಾಲಾಂನಿ ತಿಂ ಶಿಕ್ತಾತ್
ಪಾಂಯ್ ವಾಟೆನ್ ತಿಂ ಚಲೊನ್ ವೆತಾತ್
ಪಾವ್ಸ್ ಯೇಂವ್ ವ ಬರಫ್ ಪಡೊಂ
ತಾಂಕಾ ಹಾಡುಂಕ್ ಕೋಣ್ಂಚ್ ನಾಂತ್
ಹಾಂಗಾಸರ್ ಹಿ ಚೂಕ್ ಕೊಣಾಚಿ?
ಹ್ಯಾ ಭುರ್ಗ್ಯಾಂನಿ ಹ್ಯಾ ಸಂಸಾರಾಂತ್
ಕೊಣಾಕ್ ಕಿತೆಂ ವಾಯ್ಟ್ ಕೆಲಾಂ?
ದೆವಾನ್ ರಚ್ಲೆಲ್ಯಾ ಹ್ಯಾ ಸಂಸಾರಾಂತ್
ದುಬ್ಳಿಂ ಜಾವ್ನ್ ಜಲ್ಮೊಂಚೆಂ ಕಿತ್ಯಾಕ್?
ಸರ್ವ್ ಸಾಮಾನ್ಯ್ ಜೀವನ್ ಜಿಯೆಂವ್ಕ್
ದುಬ್ಳ್ಯಾಂಕ್ ಕೋಣ್ ಕುಮಕ್ ಕರಿತ್?
ಆಮ್ಕಾಂ ಖೆಲ್ಲ್ಯಾ ತಿತ್ಲೆಂಯ್ ಪಾವಾನಾ
ಹಾಂಕಾಂ ಖಾಂವ್ಕ್ ಭಿಲ್ಕುಲ್ ಮೆಳಾನಾ
ಶಾಲಾಂಕ್ ವಚೊಂಕ್ ಪಯ್ಶೆ ನಾಂತ್
ಘರಾಂನಿ ಜೇಂವ್ಕ್ ಬೊಶಿಯೊ ನಾಂತ್
ದೇವಾಚಿಚ್ಚ್ ಹಿ ಮ್ಹಾಚೂಕ್ ಮ್ಹಣೊಂ?
ಗ್ರೇಸ್ತಾಂ ಚಡ್ತಾವ್ ಗ್ರೇಸ್ತ್ಚ್ಚ್ ಜಾತಾತ್
ದುಬ್ಳಿಂ ಭುರ್ಗಿಂ ದುಬ್ಳಿಂಚ್ ಉರ್ತಾತ್
ಹೆಂ ಭಿಲ್ಕುಲ್ ಸಾರ್ಕೆಂ ನ್ಹಂಯ್
ಸರ್ವ್ ಭುರ್ಗ್ಯಾಂನಿ ಸರ್ವಾಂ ಪರಿಂ
ಬರ್ಯಾ ಥರಾನ್ ಜಿಯೆಂವ್ಕ್ ಜಾಯ್
ಬರೆಂ ಶಿಕಾಪ್ ಜೊಡುಂಕ್ ಜಾಯ್
ಮನ್ಶ್ಯಾಂಪರಿಂ ಜಿಯೆಂವ್ಕ್ ಜಾಯ್
7. ಹಿಂ ಕೊಣಾಚಿಂ ಭುರ್ಗಿಂ?! [ಆರ್ಯನ್ ತಾಕೊಡೆ]
ಜಿಣ್ಯೆಚೊ ಎಕಾ ಕುಶಿಚೊ ಆರ್ಸೊ
ಚಿರ್ಪುಟ್ ಚೂರ್ ಜಾವುನ್, ಹಜಾರಾಂನಿ
ರುಪಾಂ ಘೆವುನ್ ಹೆಡಾಯ್ತಾ..
ಭೋವ್ ಖಾಸ್ ವಿಚಾರಾಂಚೊ
ಥರಾವಳ್ ಖಂತ್ ಬೆಜಾರಾಯೆಚೊ
ಮೊಲಾಧಿಕ್ ವಾಂಟೊ ಮನ್ಶ್ಯಾ ಮೊಗಾಕ್ ಲಾಲೆಂವ್ಚೊ..
ಬಾವ್ಕುರೆಂ ಜಿಣೆಂ ಜಾಲಾಂಮೂ ಏಕ್ದಂ ಬುರ್ಶೆಂ
ರುಕಾಸಾವ್ಳೆಕ್ ವಿಶೆವ್ ಘೆಯಾ..!
ಘಾಸ್ಭರ್ ಜೇಂವ್ಕ್ ಮೆಳ್ಳೆಂ ತರ್
ಜಿವಿತಾಚೆಂ ಅಮೃತ್ ಮ್ಹಣ್ ಸಮ್ಜಾ..!
ಚಿಕ್ಲಾಂತ್ ಬುಡೊನ್ ಮಾತಿ ಖೆಲ್ಲ್ಯಾ ಲೊಂಕ್ಡಾಬರಿ..
ಪಿಂಜ್ರ್ಯಾಂತ್ ಧರ್ಲ್ಲ್ಯಾ ಸವ್ಲ್ಯಾಬರಿ..
ಜಾಲಾಮೂ ಜಿಣಿ ಪಡ್ಲ್ಲ್ಯಾ ಆಯ್ದನಾಕ್ ಘಾಲ್ಲೆಂ ಗಿಲಿಟ್
ಆಮಿ ಕೊಣಾಚಿಂ..? ಆಮಿ ಕೊಣಾಚಿಂ?
ಸೊಂಭಾನಾಮೂ ದೀಸ್ಭರ್ ಮಾಗ್ಲ್ಯಾರೀ ಬುಂಯಾಂವ್!
ಮರ್ಣಾಪ್ರಾಸ್ ಪಾಸ್ಟ್ ಜಿವಿತ್..!
ಮೆಳ್ಳೊ ತರ್ ಮದರ್ ತೆರೆಜಾ ಭಾಶೆನ್..
ಮೊಗಾಚೊ ಏಕ್ ಆಂಬುರ್ಕೊ ಹಾಸೊ..
ಏಕ್ಚ್ ಏಕ್ ಮೊವಾಳ್ ಸ್ಪರ್ಶ್..!
ಛೇ.. ಮರ್ಣಾಪ್ರಾಸ್ ಪಾಸ್ಟ್ ಜಿವಿತ್...
8. ಹಿಂ ಭುರ್ಗಿಂ ಕೊಣಾಚಿಂ?! [ಪ್ರಸನ್ನ್, ನಿಡ್ಡೋಡಿ]
ಹಾಯ್.. ಸಂಸಾರಾ ವಿಚಿತ್ರ್ ತುಜಿಂ ನವಾಲಾಂ
ಪಳೆ ತುಜೆಂ ಬಾಳ್ ಖಚ್ರ್ಯಾ ಡಬ್ಬ್ಯಾಂತ್
ಏಕ್ ಆರಾಯ್ತಾ, ದುಸ್ರೆಂ ಪಿಂರ್ಗಾತಾ, ತಿಸ್ರೆಂ ನರ್ಗತಾ
ಭಂವ್ತಿಂ ಹಾಂವ್ ಚಲ್ತಾಂ ನಾಕಾಕ್ ಧರುನ್ ಬೊಟಾಂ
ದುರ್ಸತಾಂ ತಾಂಕಾಂ ಹಾಂಕಾಂ ಕೊಣೆಂ ಕೆಲ್ಯಾಂತ್ ತಾಂಕಾಂ..
ಚಡ್ಡಿ ಸಕ್ಲಾ ಉಗ್ತೆಂ ಹರ್ದೆಂ ಇಂಜ್ಕರ್ ಪಳೆ ಆಂಗ್ಲೆಂ
ಗಳವ್ನ್ ಕಿರ್ಮೆ ಹಾತಾ-ಪಾಟಿರ್ ಪಿಂಜ್ಕರ್ ದಾಟ್ ಮ್ಹೆಳಿ ಗೋಣಿ
ಪ್ಲಾಸ್ಟಿಕ್ ವ್ಹಾಣೊ, ಚಿಡ್ಕಾಲ್ಲಿಂ ಪ್ಲಾಸ್ಟಿಕ್, ದೊಡ್ಲ್ಲಿಂ ಪೆಪರಾಂ,
ಬಾಟ್ಲ್ಯೊ
ಆರಾವ್ನ್ ನೆರಾವ್ನ್ ವಾವಯ್ತಾಂ ಪರ್ವಾನಾ ಕಸ್ಲೊಯ್ ಭುರ್ಸೊ
’ಭುಕ್’ ತಿ ವೊಡ್ತಾ ತುಕಾ ಮ್ಹಾಕಾ ಆನಿ ತಾಕಾ..
ವಿವಿಧ್ ಕರ್ನಿ, ವಿಚಿತ್ರ್ ಭಗಾಪ್, ಉಂಚ್ಲಿ ಆಶಾ, ವ್ಹಡ್ ಫಾಯ್ದೊ
ಕೊಣಾಕ್ ಪೊಟಾಚಿ ಭುಕ್, ತರ್ ಕೊಣಾಕ್ ಮತಿಚಿ, ದಾಯ್ಜಾಚಿ, ಕುಡಿಚಿ
’ಹಾವೆಂ’ ಕರ್ಚೆಂ ಸರ್ವ್ ಬರೆಂ ಉರ್ಭೆನ್ ಆನಿ ಮೊಗಾನ್
’ತಾಣಿಂ’ ಚರ್ಬೆನ್, ಹೊರ್ಭೊಸಾನ್ ಆನಿ ಆಬ್ಲೆಸಾನ್
ದೋನ್ ನ್ಹಂಯ್ ಬಾರಾ ಜಾಯ್ ರಸ್ತೊ ಉಗ್ತೊ ಆಸಾ ಕೊಣಾಕ್..?
ಖಚ್ರ್ಯಾಂತ್ ವಾಡೊನ್ ಮ್ಹೆಳೆಂ ಭೊಖಾವ್ನ್ ಲಾವಾರಿಸ್ ಹಜಾರ್...
ಕೆದ್ನಾಂ ಜಾಯ್ತ್ ಪರ್ಯಾರ್ ಮನಿಸ್-ಮನ್ಶಾಕ್ ಆಧಾರ್
ಕೊಣೆಂ ಕೆಲ್ಲೆಂ ೠಣ್ ಕೊಣಾಕ್ ಕರುಂಕ್ ಫಾರಿಕ್
’ಭುಕ್’ ಥಾಂಬಾನಾ, ದುಃಖಾಂ ರಾವಾನಾಂತ್ ಭಿಕೆಕ್ ವೊಡ್ಡಾಯ್ತಾತ್ ಹಾತ್
ಹಾಂವ್ ಚೊಯ್ನಾ, ಕಾನ್ ಹಾಲಯ್ನಾ, ತೊಂಡ್ ಉಘಡ್ನಾ
ಮ್ಹಜೆಕಡೆ ಕಿತೆಂ ಆಸಾ ಸರ್ಕಾರ್ ನ್ಹಂಯ್ಗಿ ಜವಾಬ್ಧಾರ್..?
ಕರ್ತಾ ಹಾತ್ ಉದಾರೊ ಸರ್ಕಾರಾಕ್ ಕರುನ್ ಹಿಶಾರೊ..
ಕೋಣ್ ಜಾಣಾಂ ’ತಿಂ’ ನೆಣ್ತಿಂ ಲಾಚಾರ್. ಸರ್ಕಾರಾಚಿಂ ಯಾ ಮ್ಹಜಿಂ..?!
9. ಹಿಂ ಭುರ್ಗಿಂ ಕೊಣಾಚಿಂ?! [ವಲ್ಲಿ ಕ್ವಾಡ್ರಸ್]
ಗಳ್ಯಾಂ ಸಾಂಕ್ಳಿ ಸೊಣ್ಯಾಚಿ
ಹಿಂ ಭುರ್ಗಿಂ ಕೊಣಾಚಿಂ (2)
ಬಾಪುಯ್ ತೊ ಫಿಂರ್ಗಿಂ ಆನಿ ಆವಯ್ ತಿ ಫಿಂರ್ಗಿಂ
ಹಿಂ ಕೊಂಕ್ಣಿ ಭುರ್ಗಿಂ ಕೊಣಾಚಿಂ? (2)
ಬಾಪುಯ್ ತೊ ಗೊರೊ ಆನಿ ಆವಯ್ ತಿ ಗೊರಿ
ಹಿಂ ಕಾಳಿಂ ಭುರ್ಗಿಂ ಕೊಣಾಚಿಂ? (2)
ಬಾಪುಯ್ ತೊ ಸುಟಾರ್ ಆನಿ ಆವಯ್ ತಿ ಸುಟಾರ್
ಹಿಂ ನಾಗ್ಡಿಂ ಭುರ್ಗಿಂ ಕೊಣಾಚಿಂ? (2)
ಬಾಪುಯ್ ತೊ ದಾಕ್ಟರ್ ಆನಿ ಆವಯ್ ತಿ ಡಾಕ್ಟರ್
ಹಿಂ ಭಿಕಾರಿ ಭುರ್ಗಿಂ ಕೊಣಾಚಿಂ? (2)
ಬಾಪುಯ್ ಪುಣ್ ರಡ್ತಾ ಆನಿ ಆವಯ್ ಪುಣ್ ರಡ್ತಾ
ಹಿಂ ಹಾಸ್ಚಿಂ ಭುರ್ಗಿಂ ಕೊಣಾಚಿಂ? (2)
10. ತರ್ ಆಮಿ ಕೊಣ್?! [ಪ್ರಿಯಾ ಸಿಕ್ವೇರಾ, ಫೆರಾರ್]
ತ್ಯಾ ವಿಶಾಲ್ ಸಾಗೊರಾ ಥಾವ್ನ್ ಭಾಯ್ರ್ ಪಡೊನ್
ಲೊಳೊನ್ ಆಸಾಂವ್ ಹ್ಯಾ ವೆಳೆರ್
ಪಡ್ಲ್ಯಾಂವ್ಗಿ ಯಾ ಉಡ್ಲ್ಯಾಂವ್?
ಕಶೆಂ ಭಾಯ್ರ್ ಆಯ್ಲ್ಯಾಂವ್?
ಜಾಣಾಂ ತರೀ ಕೋಣ್
ಥೊಡಿಂ ರೆವೆಂ ಬಿತರ್
ಆನಿಂ ಥೊಡಿಂ ರೆವೆಂ ವಯ್ರ್
ತರ್ ಆಮಿಂ ಕೊಣಾಚಿಂ?
ಧರ್ಯಾಚಿಂಗಿ ಯಾ ವೆಳೆಚಿಂ?
ದರ್ಯಾಚಿ ಸೊಭಾಯ್ ಚಾಕ್ಚಿಂ ಸಭಾರ್
ಆಮ್ಕಾಂ ಗುಡ್ಡಾಂವ್ಚಿ ಜಣಾಂ ಹಜಾರ್
ಕಿತ್ಯಾಕ್ ಆಶೆಂ ಮಸ್ತಿತಾತ್?
ರೆಂವೆ ಭಿತರ್ ಪುರ್ತಾತ್
ಜಣಾಂ ತರೀ ಕೋಣ್?
ಸಾಂಗಾಂತಿ ಮ್ಹಜೆ ಆಸಾತ್ ಖುಶೆನ್ ಧರ್ಯಾ ಭಿತರ್
ಆಮಿಂ ಥೊಡಿಂ ಸುಕ್ತಾಂವ್ ರೆವೆಂ ವಯ್ರ್
ತರ್ ಆಮಿಂ ಕೊಣಾಚಿಂ?
ಧರ್ಯಾಚಿಂಗಿ ಯಾ ವೆಳೆಚಿಂ?
ಆಮ್ಚಿ ತಿ ನಿರ್ಜೀವ್ ಸೊಭಾಯ್ ಪಳೆವ್ನ್
ಖುಶೆನ್ ವರ್ತಾತ್ ಆಮ್ಕಾಂ ಪೊತೆಂ ಭರ್ನ್
ಪುಣ್ ಕಿತ್ಯಾಕ್ ವಾಟೆರ್ ಶಿಂಪ್ಡಾಯ್ತಾತ್?
ಎಕ್ಸುರಿಂ ಆಮ್ಕಾಂ ಕರ್ತಾತ್
ರೆಂವೆ ಥಾವ್ನ್ ಸುಕಿಧಾಡೆಕ್ ಪಾವವ್ನ್
ಸಂತೊಸ್ ತಿಂ ಪಾವ್ತಾತ್
ತರ್ ಆಮಿಂ ಕೊಣಾಚಿಂ?
ಧರ್ಯಾಚಿಂಗಿ ಯಾ ವೆಳೆಚಿಂ?
ತುಮಿಂ ಸೊಭಾಯ್ ಚಾಕ್ತೆಲ್ಯಾಂನೊ
ಗುಡ್ಡಾವ್ನ್ ಮಸ್ತಿತೆಲ್ಯಾಂನೊ
ದರ್ಯಾಕ್ ವರುನ್ ಘಾಲಾ
ಆಶೆಂ ಪರಾತ್ತಿನಾಂವ್ ಆಮಿಂ
ಸಾದ್ಯ್ ಜಾಲ್ಯಾರ್ ಮಸ್ತುಂಚೆಂ ಸೊಡಾ
ಖೆಳ್ಕುಳಾಂ ಕರ್ಚಿಂ ರಾವಯಾ
ಆಮ್ಕಾಂ ರೆಂವೆರ್ಚ್ ಜಿಯೆಂವ್ಕ್ ಸೊಡಾ!!!
11. ಆಜೂನ್ಯೀ [ಮಾರಿಯಾನೊ ಲೂಕಸ್ ದಿನಿಜ್]
ಜಿಳ್ಮಿಳ್ ಥಂಡ್ ಶೀತಲ್ ವಾರೊ ಫಾಂತ್ಯಾಪರಾರ್
ಸುಕ್ಣಿಂ ಉಟೊನ್ ಮಧುರ್ ಗೀತ್ ಗಾಯ್ತಾತ್ ಬೊಸೊನ್ ಝಡಾರ್
ಏಕ್ ಸುಪುರ್ಲೆಂ ಪಿಸೊಳೆಂ ಗುಸ್ಪೊನ್ ತಣಾ ಕರ್ಡಾರ್
ಅಜೂನ್ಯೀ ಭರ್ಮೆತಾ ನಿದೊನ್ ಫುಲಾ ಪಾಂಕ್ಳ್ಯಾರ್
ದೊಳ್ಳೆಂ ಧೊವಾನ್ ಬಿಜ್ಲ್ಯಾತ್ ತರ್ಯೀ ಸಪ್ಣಾಂ ಪೊಯ್ತಾಂ
ತಾಂಬ್ಡೆಂ ಮೊಳೊಬ್ ಪಳೆವ್ನ್ ಪಾಂಕಾಂ ಪಾಪುಡ್ತಾಂ
ರಾತ್ರ್ ಸಂಪೊನ್ ಚಾಂದ್ನ್ಯಾಚಿಂ ಜಾಲಿಂ ಖಬರ್ ವೊರಾಂ
ಅಜೂನ್ಯೀ ದಾರಾಂ ಬಂಧ್ ಕರುನ್ ಆಸಾತ್ ಸಗ್ಳಿಂ ಘರಾಂ
ಘರಾಂತ್ ವಾಸ್ರುಂ, ಶಿಂಗಾ ಮಾರ್ತಾಲಿಂ ಎಕಾಮೆಕಾ
ಶೆತ್ಕಾರಿ ಉಟೊನ್ ಲಾಗ್ಲೊ ಸೊಧುಂಕ್ ಗೊರ್ವಾಂ ದಯ್ಯಾಂ
ಸಗ್ಳ್ಯೆ ಶೆತಾ ಕುಣ್ಗ್ಯೊ ಕೊಸುನ್ ಕಾಡ್ಲ್ಯೊ ಘಾಲುನ್ ಜೊತಾಂ
ಪುಣ್ ಅಜೂನ್ಯೀ ಶೆತಾಂತ್ ನಾಂತ್, ನತ್ತುಂಗ್ ನಾಂ..
ಆಂಗ್ಣಾಂತ್ಲ್ಯಾ ಪಾರಿಜತಕಾಕ್ ಫುಲ್ಲ್ಯಾಂತ್ ಸುಗಂಧಿ ಫುಲಾಂ
ಪರ್ಮಳ್ ಪಡೊನ್ ಜಾಲ್ಯಾಂತ್ ಸಗ್ಳಿಂ ಘರಾ,
ಶೆಳವ್ ವಾರೊ ಮಾರುನ್ ಝಡ್ತಾತ್ ಸಗ್ಳಿಂ ತಿಂ ಫುಲಾಂ
ಫುಲಾ ಎಕ್ಟಾವ್ಪಿಂ ಅಜೂನ್ಯೀ ನಿದೆಂತ್ ಭುರ್ಗಿಂ ಬಾಳಾ
ರಾತ್ರ್ ಸಂಪೊನ್ ಶಿಂಪಡ್ಲಿಂ ಸುರ್ಯಾ ಕಿರ್ಣಾಂ
ರಾಕ್ಣ್ಯಾಂನಿ ಚರೊವಾಕ್ ಸೊಡ್ಲಿಂ ಅಪ್ಲಿಂ ಗೊರ್ವಾಂ
ದೂದ್ಕಾರ್ನ್ ಧರುನ್ ದುದಾಚಿಂ ಘೆವ್ನ್ ಆಯ್ದಾನಾಂ
ಪುಣ್! ದೂದ್ ಘೆವ್ಪಿ ಅಜೂನ್ಯೀ ಉಟೊಂಕ್ ನಾಂ.
ರಾತ್ರ್ ಸಂಪಯ್ಲಿ ನೀದ್ ಗೆಲಿ ಕೊಣಾಕ್ಚ್ ಖಬಾರ್ ನಾಂ
ರಾತ್ರಿಚಿಂ ಮೌಜಾಂ ಕಿತೆಂ ಕೆಲೆಂ? ಕೊಣ್ ಜಾಣಾಂ?
ಸುಕ್ಣಿಂ, ಜಾನ್ವಾರಾಂ, ಉಟೊನ್ ಅಪಾಪ್ಲಿಂ ಕಾಮಾ
ಪುಣ್! ಮನಿಸ್ ಮಾತ್ರ್ ಅಜೂನ್ಯೀ ನಿದೆಂತ್ಲೊ ಜಾಗೊವ್ನಾಂ!.
12. ಮೆಟಾಂ [ಫ್ರಾನ್ಸಿಸ್ ಫುಡ್ತಾದೊ, ಕಲೀನಾ]
ಪಯ್ಲೆಂ ಮೇಟ್, ಆಬಾನ್ ಹಾತ್ ಧರ್ನ್ ಶಿಕಯ್ಲ್ಲೆಂ ಮೇಟ್,
ಉಟೊಂಕ್ ಜಾಯ್ನಾತ್ಲ್ಯಾರ್ಯಿ, ಲಕೊನ್ ಲಕೊನ್ ಕಾಡ್ಲ್ಲೆಂ ಮೇಟ್,
ಪಡ್ತಾಂ ಪಡ್ತಾಂ ಮಾಂಯ್ಕ್ ಧರುಂಕ್ ಮ್ಹಣ್ ಕಾಡ್ಲ್ಲೆಂ ಮೇಟ್,
ಧರ್ಣಿರ್ ಪಡೊನ್, ರಡೊನ್ ಪರ್ತ್ಯಾನ್ ಉಟೊನ್ ಕಾಡ್ಲ್ಲೆಂ ಮೇಟ್.
ಮಾಂಯ್ ಭರಯ್ತಾನಾ ಮುಕಾರ್ ಮುಕಾರ್ ಧಾಂವಲ್ಲೆಂ ಮೇಟ್.
ಮಾಜ್ರಾಚಿ ಅನಿ ಸುಣ್ಯಾಚಿ ಶಿಮ್ಟಿ ವೋಡ್ನ್ ಖೆಳ್ಲ್ಲೆಂ ಮೇಟ್,
ಸ್ಲೇಟ್ ಅನಿಂ ಬುಕಾಚೆಂ ಪೊತೆಂ ಘೆವ್ನ್ ಇಸ್ಕೊಲಾಕ್ ಚಲ್ಲ್ಲೆಂ ಮೇಟ್,
ಕ್ಲಾಸಿಚ್ಯಾ ಚೆಡ್ಯಾಂಕ್ ಬಾಂಗ್ಡೊ ದೀವ್ನ್ ತಾರ್ಲೊ ಘೆತ್ಲ್ಲೆಂ ಮೇಟ್.
ಹಾತಾಂತ್ ವಾತ್ ಘೆವ್ನ್, ಧವ್ಯಾ ನೆಸ್ಣಾಂತ್ ಆಲ್ತಾರ್ ಚಡ್ಲ್ಲೆಂ ಮೇಟ್,
ಸ್ಪರ್ದ್ಯಾಂನಿ ಪಾತ್ರ್ ಘೆವ್ನ್ ದೆಡಾ ಪಾಂಯಾಂನಿಂ ಘರಾ ಪಾವ್ಲ್ಲೆಂ ಮೇಟ್,
ಇನಾಮ್ ಮೆಳ್ತಾನಾಂ, ಘರ್ಚಾಂಕ್ ದಾಖಂವ್ಕ್ ಧಾಂವಲ್ಲೆಂ ಮೇಟ್,
ಆಂತಿಮ್ ವರ್ಸಾ, ಉತ್ತೀರ್ಣ್ ಜಾವ್ನ್ ಉಡಿ ಮಾರ್ಲ್ಲೆಂ ಮೇಟ್.
ವಿದ್ಯಾಲಯಾಂತ್, ಊಂಚ್ ಶಿಕ್ಪಾಕ್ ನಿರ್ಣಯ್ ಘೆತಲ್ಲೆಂ ಮೇಟ್,
ಕುಲಪತಿಥಾವ್ನ್ ಪದವಿ ಘೆಂವ್ಕ್ ವಿಶ್ವಾಸಾನ್ ರಾವಲ್ಲೆಂ ಮೇಟ್,
ಬರ್ಯಾ ಹುದ್ದ್ಯಾಕ್ ಅರ್ಜ್ಯೊ ಘೆವ್ನ್, ಸಂಸ್ಥ್ಯಾಂಕ್ ಭೆಟ್ಲ್ಲೆಂ ಮೇಟ್,
ಪ್ರತಿಷ್ಟಿತ್ ಹುದ್ದೊ ಮೆಳ್ತಚ್, ವ್ಹಡಿಲಾಂಕ್ ವೆಂಗೆಲ್ಲೆಂ ಮೇಟ್.
ಯುವ ಸಮ್ಮೇಳನಾಂತ್ ಚಲಿಯೆಕ್ ಪಳೆವ್ನ್ ರೂಕ್ ಜಾಲ್ಲೆಂ ಮೇಟ್,
ತ್ಯಾ ಚಲಿಯೆಚೊ ಹಾತ್ ಧರ್ನ್, ಆಲ್ತಾರಿ ಮುಕಾರ್ ವೆಲ್ಲೆಂ ಮೇಟ್,
ಕಾಜಾರಾಚಾ ಸಾಲಾಂತ್ ವ್ಹಕ್ಲೆ ಸಾಂಗಾತಾ ನಾಚ್ಲ್ಲೆಂ ಮೇಟ್,
ರಡ್ತ್ಯಾ ವಕ್ಲೆಚೆ ನಾಜೂಕ್ ಹಾತ್ ಧರ್ನ್ ಘರಾ ಹಾಡ್ಲ್ಲೆಂ ಮೇಟ್.
ಜಿಣ್ಯೆಚೆಂ ತಾರುಂ, ವಾದಾಳಾಂತ್ಲೆಂ ವಾಂಚವ್ನ್ ಹಾಡ್ಲ್ಲೆಂ ಮೇಟ್,
ಸುಖಾ ದುಃಖಾಂತ್, ಪಾವ್ಸ್ ಅನಿಂ ವೊತಾಂತ್ ಚಲ್ತಚ್ ರಾವ್ಲ್ಲೆಂ ಮೇಟ್,
ಭುರ್ಗ್ಯಾಂಕ್ ಬರಿ ದೇಖ್, ಸಮೊಡ್ತಿಚಿ ಶಿಕವ್ಣ್ ದೀಂವ್ಕ್ ವಾವುರ್ಲ್ಲೆಂ ಮೇಟ್,
ಮಾಂಯ್ ಬಾಬಾಚ್ಯಾ ಮರ್ಣಾ-ಫೊಂಡಾಕಡೆ ಕಾಡ್ಲೆಲೆಂ ದುಃಖೇಸ್ತ್ ಜಡ್ ಮೇಟ್.
ಉತರ್ ಪ್ರಾಯೆರ್, ಆದ್ಲೆಂ ನಿಯಾಳ್ನ್ ದೆವಾಕ್ ಅರ್ಗಾಂ ದಿಂವ್ಚೆಂ ಏಕ್ ಮೇಟ್,
ಅಸ್ಕತ್ ಕೂಡ್, ಮನಾಂತ್ ಭಿರಾಂತ್, ತರೀ ವಿಚಿತ್ರ್ ಭರ್ವಸ್ಯಾಚೆಂ ಮೇಟ್,
ಸಂಸಾರಾಂತ್ ಅಯಿಲ್ಲ್ಯಾ ಸಕ್ಟಾಂಕ್ ಏಕ್ ನಿಮಾಣೆ ಕಾಡುಂಕ್ ಅಸಾ ಮೇಟ್,
ಜಿಣಿಯೆಂತ್ ಕಸೆಂ ಕೆಲಾಂಯ್, ತಸೆಂಚ್ ಲಾಭ್ತೆಲೆಂ ಸಾಸ್ಣಾಚೆಂ ಮೇಟ್.
13. ಮ್ಹಾಕಾ ಮ್ಹಜೊಚ್ ಸೊಧ್! [ವಿನ್ಸಿ, ಮೆಲ್ಕಾರ್]
ವಿಶಾಲ್ ಜಾಗೊ ಆಸ್ಲ್ಯಾರೀ ಸಾವ್ಳೆಕ್ ಪಾಕೆಂ ನಾ
ಬೆಸಾಯ್ ಫಳಾಭರಿತ್ ಆಸ್ಲ್ಯಾರೀ ಹ್ಯಾ ಪೊಟಾಕ್ ಭುಕ್ ನಾ
ಸುತಾಂ ಭರೊನ್ ವೊಮ್ತೊಲ್ಯಾರೀ ಹ್ಯಾ ಆಂಗಾಕ್ ವಸ್ತುರ್ ನಾ
ಸಮಾಜೆಂತ್ ಹ್ಯಾ ಜಿವಾಕ್ ಮಾನ್ ಗೌರವ್ ನಾ
ವೊಂಟಾರ್ ಹಾಸ್ಯಾಂ ಕಿರಣ್ ಸದಾಂಚೆಂ
ದೀಸ್ ಸಂಪಯ್ತಾಂ ಸಂತೊಸಾನ್ ಸಕಾಳ್ ಸಾಂಜೆಚೆಂ
ವಿಶೆವ್ ಘೆತಾಂ ಥಂಡ್ ವಾರ್ಯಾ ರುಕಾ ಸಾವ್ಳೆಚೆಂ
ಭಗ್ತಾ ಕ್ಷಣಿಕ್ ಸುಖ್ ಹ್ಯಾ ಜಿಣ್ಯೆ ಮಧೆಂ
ಮೂಟ್ ಆರಾಂವ್ಕ್ ಪಳೆತಾಂ ಕಿತೆಂಚ್ ಮೆಳಾನಾ
ಕೊಣೆಂ ನಾಡ್ಲಾಂಗೀ ಮ್ಹಣ್ ದುಭಾವ್ ಪಾವ್ತಾಂ
ಮ್ಹಾಕಾಚ್ ಹಾಂವ್ ಸೊಧ್ತಾಂ, ಏಕ್ ಅಶೀರ್ ವಾಟ್ ಚಲೊನ್
ಕೊಣಾಕ್ಯೀ ಲೆಖಿನಾಸ್ತಾಂ, ಕೊಣಾಕ್ಯೀ ಸಮ್ಜಾನಾಸ್ತಾಂ
ಮ್ಹಜೊ ಆವಾಜ್ ಹಾಂವ್ಂಚ್ ಆಯ್ಕತಾಂ
ಉಜ್ವಾಡ್ ಅಸೊನ್ಯೀ ಚಲ್ತಾಂ ಧಲ್ತಾಂ ಆಂಧ್ಕಾರಾಂತ್
ಕಠೀಣ್ ಕರ್ಗತಾಂ ನಿತ್ರಾಣ್ ಜಾವ್ನ್ ಸಲ್ವತಾಂ
ಹಾಂವ್ ಕೊಣ್ ಮ್ಹಳ್ಳ್ಯಾ ದುಭಾವಾನ್
ಮ್ಹಾಕಾ ಹಾಂವ್ಂಚ್ ಸೊಧುನ್ ಘೆತಾಂ..
14. ಪಿಶೆಂ ಕವಿತಾ [ಕಾವ್ಯಾದಾಸ್]
ಥೊಡ್ಯಾಂಕ್ ಆಶಾ ಖೆಳಾಂಕ್, ನಾಚಾಂತ್
ಥೊಡ್ಯಾಂಕ್ ವಾಚ್ಪಾ ಪಿಶೆಂ
ಥೊಡ್ಯಾಂಕ್ ನಾಟಕ್, ಸಿನೆಮಾಂನಿ
ಜೀವ್ಚ್ ಠೆವ್ಲಾ ಜಶೆಂ
ಥೊಡ್ಯಾಂಕ್ ಆಶಾ ಸಾಂಜೆ ವೆಳಾರ್
ಭಂವೊಂಕ್ ವಚೊಂಕ್ ಸದಾಂಯ್
ಥೊಡ್ಯಾಂಕ್, ತಸ್ತ್ಯಾ ಮಧೆಂಚ್ ರಾವೊನ್
ನದರ್ ಚಲಿಯಾಂಚೆರ್ ಕಾಂಯ್
ಥೊಡ್ಯಾಂಕ್ ಪಿಶೆಂ - ಅಪುಣ್ ಶಾಣೊ,
ಗಾಜಂವ್ಕ್ ಗಾಯ್ತಾತ್ ಗಾಣಾಂ
ಥೊಡೆ ಬಾಂಧ್ತಾತ್ ವ್ಹಡಿಲಾಂಚ್ಯಾ
ಕಾನಾಂಕ್ರೆ ವಾಂಯ್ಗಾಣಾಂ
ಥೊಡ್ಯಾಂಕ್ ಆಶಾ ಸಾಂಗೊಂಕ್ ಕಥಾ
ಥೊಡ್ಯಾಂಕ್, ಲಿಖುಂಕ್ ಪದಾಂ
ಛಾಪ್ಯಾಂತ್ ಆಪ್ಲೆಂ ನಾಂವ್ ಪಳೆಂವ್ಚ್ಯಾಕ್
ಸಾಧನ್ ಚಲ್ತಾ ಸದಾಂ
ಥೊಡ್ಯಾಂಕ್ ಪಿಶೆಂ - ಸೊಧಾಪ್ ತಾಂಚೆಂ -
ಶೆಜ್ಪಾ ಶಿಜ್ತಾ ಕಿತೆಂ?
ಪಿಶೆ ಬಾವ್ಡೆ, ಆಪ್ಲ್ಯಾಚ್ ಘರಾ
ಕುಜ್ನಾಂತ್ ಸಗ್ಳೆಂ ರಿತೆಂ
ಥೊಡ್ಯಾಂಕ್ ಆಶಾ ಹಾಸಂವ್ಕ್ ಹೆರಾಂಕ್ -
ಥೊಡ್ಯಾಂಕ್, ಹೆರಾಂಕ್ ಮೊಡುಂಕ್;
ಮ್ಹಾಕಾ? ಹ್ಯಾ ಸರ್ವ್ ಪಿಶ್ಯಾಂ ವಿಶ್ಯಾಂತ್
ಪಿಶೆಂ ಕವನ್ ಘಡುಂಕ್
15. ನಿವ್ಳಿ ಫುಲಾಂ [ಎಚ್ಚೆಮ್]
ಮಾತ್ಯೆ ಮಾಯೆಕ್ ಲಾಗ್ಲಿ ಕಶಿ
ತಾನ್ ತರ್ನ್ಯಾ ಸುರ್ಯಾ ಕಿರ್ಣಾಚಿ
ಪೋಟ್ ಕಾತರ್ನ್ ಕಿತ್ಯಾಕ್ ವ್ಹಾಳಯ್ಲೆಂ
ಖರಸ್ ಕಸ್ಲಿ ವ್ಹಾಳ್ಚ್ಯಾ ಉದ್ಕಾಚಿ.
ತರ್ನ್ಯಾ ಫಾಂತ್ಯಾರ್ ಕಿತ್ಯಾಕ್ ಉಟ್ಲೊ
ರಾಯ್ಕುಂವರ್ ರಾಣಿಯೆ ವೆಂಗೆತ್ಲೊ
ಪಿಸಾಯ್ ಕಸ್ಲಿ ರಿಗ್ಲಿ ಮನಾಂತ್
ಮೊರ್ನಾ ಮೂಳ್ ಸೊಧುನ್ ವೆಚಿ
ಮಾಯೆ ತಾನ್ ಭಾಗ್ತಾಂ ಭಾಗ್ತಾಂ
ಫಾಂಟಿಯೆ ಫಾಂಟಿಯೆರ್ ಫುಲಾಂ ಫುಲ್ಲಿಂ
ರಾಯಾ ಪಿಸಾಯ್ ಸುಟ್ತಾಂ ಸುಟ್ತಾಂ
ಸಂಯ್ಭಾ ದಿಕಾನ್ ಭರೊನ್ ರಾವ್ಲಿಂ
ಆಜ್ ....
ಮಾಯೆ ತಾನ್ ಮುಸಾ ವೊಂಟಾರ್
ರಾಯಾ ಪಿಸಾಯ್ ಫುಲಾ ಪಾಕ್ಳೆರ್.
16. ಖಚ್ರೊ [ವಿಲ್ಸನ್ ಕಟೀಲ್]
ರಸ್ತೊ ಝಾಡ್ಚೊ ಹಾಂವ್
ಮದ್ಯಾನ್ ರಾತಿಚ್ಯಾ
ಮಂದ್ ಚಾಂದ್ನ್ಯಾಂತ್
ಸಪ್ಣೆತಾಂ
ಏಕ್ ದೀಸ್......
ತೆಂಕ್ಡೆಕ್ ಲಾಲ್ಲೊ
ಸಾರ್ಣಿಖುಂಟೊ ಮ್ಹಜೊ
ಅಂತ್ರಳಾಕ್ ಪಾವ್ತಲೊ
ನಕ್ತಿರಾಂ ಆರಾವ್ನ್
ರಾಸ್ ಫಾಲುನ್
ಕಚ್ರ್ಯಾಂತ್ ಫುಡಾರ್ ಉಸ್ತುಂಚ್ಯಾಂಚೆಂ
ಜಿವಿತ್ ಉಜ್ವಾಡಾಯ್ತಲೊಂ
ಪೂಣ್.......
ಫಾಂತ್ಯಾರ್ ಜಾಗ್ಲ್ಲೊ ಸುರ್ಯೊ
ಕಿರ್ಣಾಂ ಇರ್ ಉಸಯ್ತಾನಾ
ಮ್ಹಜ್ಯಾ ಸಪ್ಣಾಂಚೊ ಕಚ್ರೊ ಜಾತಾ
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
More in Daaiz
Send your comments to author on this writing
This is not a comment box. Nothing you write here appears on the site or is shown to any other reader: it is sent to him by email, privately, and he replies to you directly if a reply is called for.