ಕವಿತಾकविताPoem
ಕೊಣ್?’
ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಉತ್ರಾಂತ್ ಸೂತ್ರಾಂ
ಮಯ್ನ್ಯಾಚೊ ಕವಿ - 1
ಸೂತ್ರ್ 1: ಮ್ಹಜೊ ಪೆಲೊ ಕೊಣ್?
ಕಾವ್ಯಾದಾಸ್
ದೆವಾನ್ ರಚ್ಲೆಲ್ಯಾ ಹ್ಯಾ ಸಂಸಾರಾಂತ್ ಮನ್ಶ್ಯಾಕ್ ಕಷ್ಟಾಂಚೆಂ ಖಂಚೆಂ? ಆಜ್ ಮನಿಸ್ ಸುಕ್ಣ್ಯಾಪರಿಂ ಉಭೊಂಕ್ ಸಕ್ತಾ, ಮಾಸ್ಳೆಪರಿಂ ಉದ್ಕಾಪಂದಾ ಉಪ್ಯೆಂವ್ಕ್ ಸಕ್ತಾ, ವಾರ್ಯಾರ್ ಉಭೊಂಕ್ ಸಕ್ತಾ, ಭುಮೆಚೆರ್ ಮಾತ್ರ್ ನ್ಹಂಯ್; ಚಂದ್ರಾಕ್ ಸಯ್ತ್ ಉಡೊಂಕ್ ಸಕ್ತಾ. ಎಕಾ ಖಿಣಾನ್ ಸಂಸಾರ್ ಭಸ್ಮುಂಕ್ ಸಯ್ತ್ ಸಕ್ತಾ. ತರ್ಯ್ ಹ್ಯಾ ಸಂಸಾರಾಂತ್ ಜಾಯ್ತೆಂ ಆಸಾ ತೆಂ ಮನಿಸ್ ಅಜೂನ್ ಸಮ್ಜೊಂಕ್ ಸಕೊಂಕ್ ನಾ, ರಚುಂಕ್ ಸಕೊಂಕ್ ನಾ. ಘಡುಂಕ್ ಸಕೊಂಕ್ ನಾ. ಕಿತೆಂ ಮನಿಸ್ ಅಪ್ಲೆಂ ಆವ್ಕ್ ರಚುಂಕ್ ಸಕ್ತಾ? ಅಪ್ಲೆಂ ನಶಿಬ್ ರಚುಂಕ್ ಸಕ್ತಾ? ಆಪ್ಲ್ಯಾ ಕುಟ್ಮಾಕ್ ಪರತ್ ರಚುಂಕ್ ಸಕ್ತಾ? ಮೋಗ್ ರಚುಂಕ್ ಸಕ್ತಾ? ಹಿಂ ಸವಾಲಾಂ ಫಕತ್ತ್ ಅಧುರಿಂಚ್ ಜಾವ್ನ್ ಉರ್ತಾನಾ ಲಿಪ್ತೆಂ ಸತ್ ಅಪ್ಶೆಂಚ್ ಉಗ್ಡಾಪೆಂ ಜಾತಾ - ಮನಿಸ್ ಅಪ್ಣಾಕ್ ಸಮ್ಜೊಂಕ್ ಅಜೂನ್ ಸಕೊಂಕ್ ನಾ, ಮನ್ಶಾಕ್ ಅಪ್ಣಾಚೊ ಪೆಲೊ ಮ್ಹಳ್ಯಾರ್ ಕೊಣ್? ಮ್ಹಳ್ಳೆಂ ಸಮ್ಜೊಂವ್ಚಾಧಿಂ ಪಯ್ಲೆಂ ’ಅಪ್ಲೊ’ ಕೊಣ್ ಮ್ಹಣ್ ಸಮ್ಜೊಂವ್ಚಿ ಭೋವ್ ಗರ್ಜ್ ಮ್ಹಳ್ಳೆಂ ಸತ್.
ಹೆಂಚ್ ಚಿಂತಾಪ್ ವ್ಹಾಳಂವ್ಚಾ ಇರಾದ್ಯಾನ್ ’ಉತ್ರಾಂತ್ ಸೂತ್ರಾಂ’ ಅಂಕಣಾಚಾ ಪಯ್ಲ್ಯಾ ಆಂಕ್ಡ್ಯಾಂತ್ ’ಮ್ಹಜೊ ಪೆಲೊ ಕೊಣ್?’ ಮ್ಹಳ್ಳೆಂ ಸೂತ್ರ್ ದಿಲ್ಲೆಂ, ಆನಿ ಹ್ಯಾ ಸೂತ್ರಾಕ್ ಸುಟಂವ್ಕ್ ನವೆ ಕವಿ ಆಯ್ಲ್ಯಾತ್ ಮಾತ್ರ್ ನ್ಹಂಯ್, ಅಪುರ್ಭಾಯೆಚಿಂ ಚಿಂತ್ನಾಂ-ವಿಚಾರಾಂಚಿಂ ಕವಿತಾ ಘೆವ್ನ್ ಆಯ್ಲ್ಯಾತ್ ಮ್ಹಣ್ತಾನಾ ನವ್ಯಾಂಕ್ ಖಂಡಿತ್ ಜಾವ್ನ್ ಫುಡ್ಲ್ಯಾ ಆಂಕ್ಡ್ಯಾಂನಿ ನವಿಂ ನವಿಂ ಪ್ರೇರಣಾಂ ಮೆಳ್ಚಾಂತ್ ದುಭಾವ್ ನಾ.
ಆಮಿಂ ಅಸಾಮಾನ್ಯ್ ಸಂಗ್ತೆಕ್ ಹಕೀಗತ್ ದೀಂವ್ಕ್ ಸಕ್ತಾಂವ್ ತರ್ಯ್, ವಾಸ್ತವಾರ್ ಆಮಿ ಭೋವ್ ಸಾಮಾನ್ಯ್ ಆನಿ ಸಂಪಿಂ ಸಂಗತ್ ಕರುಂಕ್ ಬಿಕ್ಕಾತಾಂವ್ ಮ್ಹಳ್ಳೆಂ ಚಿಂತಾಪ್ ’ವಾಸ್ತವ್’ ಕವಿತೆಂಚ್ ಭೋವ್ ಅಪುರ್ಭಾಯೆನ್ ವ್ಹಾಳಯ್ತಾ ಕವಿ ಬಾಬ್ ಮೆಲ್ವಿನ್ ಜೆ. ವಾಸ್, ಕೆಲರಾಯ್.
ಕವಿ ಬಾಬ್ ಆಸ್ಟಿನ್ ಪ್ರಭುಕ್ ಮ್ಹಜಾ ಭಂವಾರಿಂ ಜಿಯೆಂವ್ಚೊ ಹರ್ಯೆಕ್ ಮನಿಸ್ ಮ್ಹಜೊ ಪೆಲೊ, ದೆಖುನ್ ತಾಚಿ ತಾನ್ ಮ್ಹಜಿ ತಾನ್, ತಾಚಿ ಭುಕ್ ಮ್ಹಜಿ ಭುಕ್ ಮ್ಹಣ್ಚೆಂ ಸೊಭಿತ್ ಚಿಂತಾಪ್ ವ್ಹಾಳಯ್ತಾ.
ಅಪ್ರೂಪ್ ಕವಿ ಬಾಬ್ ಜೆರಿ ಡಿ’ಮೆಲ್ಲೊ ವಾಸ್ತವಾಕ್ ಧಾಖಂವ್ಕ್ ಏಕ್ ಆರ್ಸೊ ಹಾಡ್ನ್ ಆಯ್ಲಾ, ಆನಿ ತ್ಯಾ ಆರ್ಶ್ಯಾಂತ್ ದೆಖ್ತಾನಾ ಆಮ್ಕಾಂ ದಿಸ್ತಾ ಸಗ್ಳೆಂ ವಿಚಿತ್ರ್ ಆನಿ ಅಸ್ತ್ವೆಸ್ತ್. ಇತ್ಲೊ ಸೊಭಿತ್ ಆನಿ ಮಹಾನ್ ಮನಿಸ್ ಆರ್ಶ್ಯಾಂತ್ ದಿಸ್ತಾ ’ಏಕ್ ಕಿಡೊ’. ದೆಖುನ್ ವ್ಹಡ್ಲ್ಯಾ ದೆವಾಚೆಂ ಬೆಸಾಂವ್ ಆಮ್ಚೆರ್ ಆಸ್ತಾನಾ ಧಾಕ್ಟ್ಯಾ ದೆವಾಚಾಂಕ್ ಕಿತ್ಯಾಕ್ ಗುಮಾನ್? ಜೆದ್ನಾಂ ಆಮ್ಚಿಂ ನಾಂವಾಂ ದುದಾ ಫಾತ್ರಾಂನಿ ಝಿಳ್ಮಿಳ್ತಾನಾ ಹೆರಾಂಚೆ ಕಷ್ಟ್ ಪಳೆಂವ್ಚಿ ಆಮ್ಚಿ ನದರ್ ಕುಡ್ಡಿ ಜಾಲ್ಲಿ ಹ್ಯಾ ಆರ್ಶ್ಯಾಂತ್ ಪಳೆವ್ಯೆತಾ.
ಕವಯತ್ರಿ ಬಾಯ್ ವಾಯ್ಲೆಟ್ ಪಿರೇರಾ ಭಳಿಶ್ಟ್ ಹಾತೆರ್ ಘೆವ್ನ್ ಆಯ್ಲ್ಯಾ, ಜೆದ್ನಾಂ ಹ್ಯಾ ಸಂಸಾರಾಂತ್ ಚುರಿ-ತಾಲ್ವಾರ್ ಜಾಂವ್ ಬಂದೂಕ್-ಬೊಂಬ್ ಜಾಂವ್ ಕಿತೆಂಚ್ ಕರುಂಕ್ ಸಕಾನಾಂತ್, ತೆದ್ನಾಂ ಹೆಂ ಹಾತೆರ್ ಜರೂರ್ ಕಿತೆಂಯ್ ಕರುಂಕ್ ಸಕ್ತಾ. ಪುಣ್ ಹೆಂ ಹಾತೆರ್ ಧರುಂಕ್ ಕಾಳ್ಜಾಂತ್ ಊಬ್ ಆಸ್ಚಿ ಗರ್ಜ್, ಭಿವ್ಕುರ್ಯಾಂಕ್ ವಾ ಲಜ್ಮಾಂಡ್ಯಾಂಕ್ ಹೆಂ ಹಾತೆರ್ ಧರುಂಕ್ ಸಾಧ್ಯ್ ನಾ, ಕಿತ್ಯಾಕ್ ಆಪ್ಣಾಕ್ ಹಲ್ಕ್ ಕರ್ಚಾಂಕ್ ಅಪುಣ್ ಬರೆಂಚ್ ಕರ್ತೆಲಿಂ ಮ್ಹಳ್ಳೆಂ ಕರ್ನ್ ಧಾಖಂವ್ಚೆಂ ಹಾತೆರ್ ಚಿಲ್ಲರ್ ನ್ಹಂಯ್. ತಸಲ್ಯಾಂಕ್ ಹ್ಯಾ ಸಂಸಾರಾಂತ್ ಜಾಯ್ತೆಂ ಸೊಸುಂಕ್ ಆಸ್ತಾ.
ಕವಿ, ಕಾಣ್ಯೆಗಾರ್, ನಾಟಕಿಸ್ತ್, ಚಿಂತ್ಪಿ ಬಾಬ್ ಲ್ಯಾನ್ಸಿ ಪಿಂಟೊ ನಾಯಕ್ ಹಾಚಿ ನದರ್ ಮಾತ್ಶಿ ಗುಂಡಾಯೆಕ್ ಗೆಲ್ಯಾ ಮ್ಹಳ್ಳೆಂ ತಾಚೆಂ ಕವಿತಾ ವಚ್ತಾನಾಂಚ್ ಗೊಮ್ತಾ. ’ಮ್ಹಜೊ ಪೆಲೊ ಕೊಣ್’ ಮ್ಹಣ್ ಸಮ್ಜೊಂವ್ಚಾಧಿಂ ’ಅಪ್ಲೊ ಕೊಣ್’ ಮ್ಹಳ್ಳೆಂ ಪಯ್ಲೆಂ ಸಮ್ಜಲ್ಯಾರ್ ’ಮ್ಹಜೊ ಪೆಲೊ’ ಸ್ವಶ್ಟ್ ದಿಸ್ತಾ ಮ್ಹಳ್ಳೆಂ ಚಿಂತಾಪ್ ಆಪ್ಲ್ಯಾ ಕವಿತೆಂತ್ ವ್ಹಾಳಯ್ತಾ. ಹಾಂಗಾಸರ್ ’ನಾಟಕಿಸ್ತ್’ - ಮ್ಹಳ್ಳೊ ಸಬ್ಧ್ ಹೆಚ್ಚ್ಖಾತಿರ್ ವಾಪರ್ಲಾ - ಕಿತ್ಯಾಕ್ ಮ್ಹಳ್ಯಾರ್ ಹಿ ನದರ್ ಎಕಾ ಬರ್ಯಾ ನಾಟಕಿಸ್ತಾಚಿ ನದರ್. ಆನಿ ಅಸಲಿಂ ಕವಿತಾ ಸಾಮಾಜಿಕ್ ಪರಿವರ್ತನಾಕ್ ವಾಟ್ ಧಾಖಯ್ತಾತ್.
ಕವಿ ಬಾಬ್ ಪ್ರಸನ್ನ್ ನಿಡ್ಡೋಡಿ ಮಾತ್ಸೊ ವಿಡಂಬನ್ಕಾರ್ ಜಾಲಾ ಹ್ಯಾ ಕವಿತೆಂತ್, ಅಪ್ಣಾನ್ ’ಅಪ್ಲೊ ಪೆಲೊ ಕೊಣ್’ ಮ್ಹಣ್ ಸೊಧ್ಚಾ ಬದ್ಲಾಕ್, ಹೆರಾಂನಿ ಮ್ಹಾಕಾ ತಾಂಚೊ ಪೆಲೊ ಕರ್ನ್ ಘೆತ್ಲ್ಲೆಂ ತರ್ ಕಿತ್ಲೆಂ ಬರೆಂ ಆಸ್ಲ್ಲೆಂ ಮ್ಹಣ್ ವಿಚಾರ್ತಾ.
ಕವಿ ಬಾಬ್ ಅನಿಲ್ ಪೆರ್ನಾಲ್ ಏಕ್ ಅಪುರ್ಭಾಯೆಚೆಂ ಕವಿತಾ ಘೆವ್ನ್ ಆಯ್ಲಾ. ಹಾಂಗಾಸರ್ ಮನ್ಶಾಕ್ ಮನಿಸ್ಚ್ ಅಂತ್ಯ್ ಜಾವ್ನಾಸ್ಚೆಂ ಚಿಂತಾಪ್ ವ್ಹಾಳಯ್ತಾ, ನೆಣಾರಿ ಜಾವ್ನ್ ಗರ್ಭಾಂತ್ ಆಸ್ತಾಂ ಸಯ್ತ್ ಮನಿಸ್ಚ್ ಮನ್ಶಾಚೆಂ ನಾಸ್ ಕರ್ತಾ, ಜಿಯೆತಾನಾ ಸಯ್ತ್ ಕೊಣಾಚಾ ಹಾತಾಚಿ ಬಾವ್ಲಿ ಜಾಂವ್ಕ್ ಪಡ್ತಾ, ಆನಿ ಮೊರ್ತಾನಾ ಹಾರಿಂ ಹಾರಿಂನಿ ಜಮೊ ಜಾತಾ. ಹ್ಯಾ ಸರ್ವ್ ಲೊಕಾಂಪಯ್ಕಿ ’ಅಪ್ಲೊ ಪೆಲೊ’ ಮ್ಹಳ್ಳೊ ಕೊಣ್? ಮ್ಹಳ್ಳೆಂ ಸವಾಲ್ ಅಧುರೆಂಚ್ ಉಭೆಂ ರಾವ್ತಾ.
ಕವಿ ಬಾಬ್ ರೋಶನ್ ರೊಡ್ರಿಗಸಾಕ್ ದೇವ್-ಧರ್ಮಾ ಮಧೆಂ ಅಡ್ಚೊನ್ ಗೆಲ್ಲ್ಯಾ ಮನ್ಶಾಚಾ ವೆವೆಗ್ಳ್ಯಾ ರುಪಾಂ ಮಧೆಂಯೀ ಹಿ ಘುಸ್ಪಡಾಯ್ ಉದೆತಾ, ಆನಿ ಖರೆಂಪಣಿ ಅಪ್ಲೊ ಪೆಲೊ ಮ್ಹಳ್ಯಾರ್ ಕೊಣ್ ಮ್ಹಳ್ಳೆಂ ಸಮ್ಜೊಂಕ್ ಖರೆಂಚ್ ಧರ್ಮಾಚೊ ಆಸೊರ್ ಘೆಂವ್ಚಿ ಗರ್ಜ್ ಸುಸ್ತಾತಾ.
ಕವಿ ಬಾಬ್ ವಿನ್ಸಿ ಮೆಲ್ಕಾರ್ಚ್ಯಾ ಕವಿತೆಂತ್ ಕವಿತಾ ನಾಯಕ್ ಖುದ್ದ್ ಅಪುಣ್ ಕಂಗಾಲ್ ರಿತಿನ್ ಜಿಯೆವ್ನ್ ಆಸಾಂ, ದೆಖುನ್ ಕೊಣ್ಯ್ ಅಪ್ಲ್ಯಾ ಸೊಧ್ನೆರ್ ಯೆತಿತ್ಗಾಯ್ ಮ್ಹಳ್ಳೆಂ ಚಿಂತಾಪ್ ದವರುನ್ ಆಸ್ಚೆಂ ಆಪ್ಲ್ಯಾ ಕವಿತೆಂತ್ ದಿಸೊನ್ ಯೆತಾ.
ಕವಿ ಬಾಬ್ ವಲ್ಲಿ ಕ್ವಾಡ್ರಸಾಕ್ ಕಿತ್ಯಾಕ್ಗೀ ಪಾರಂಪರಿಕ್ ರಿತಿನ್ ಚಲ್ಚೆಪರಿಂಚ್ ಆಜ್ ಪರ್ಯಾಂತ್ ಚಲೊನ್ ಆಸಾ - ವಾಗ್ ಗಾಯೆಕ್ ಧರ್ತಾ, ಮಾಜಾರ್ ಉಂದಿರ್ ಧರ್ತಾ ಆನಿ ದಿವೊಡ್ ಮಾಣ್ಕ್ಯಾಕ್ ಗಿಳ್ತಾ - ಪುಣ್ ಮನಿಸ್ ಮಾತ್ರ್ ಬದಲ್ಲಾ ಆನಿ ಮನ್ಶಾಕ್ಚ್ ಖಾತಾ ಆನಿ ಸವಾಲ್ ಕರ್ತಾ ’ಮ್ಹಜೊ ಪೆಲೊ ಕೊಣ್?’ ಮ್ಹಳ್ಳೆಂ ಸವಾಲ್ ಕರ್ಚೆಂ ದಿಸೊನ್ ಯೆತಾ.
ಕವಯತ್ರಿ ಬಾಯ್ ನಂದಿನಿಕ್ ದೆವಾಳಾಂತ್ ದಿಸ್ಚಾ ಹಜಾರ್ ಗಳ್ಯಾಂಚಾ ಹಜಾರ್ ತಾಳ್ಯಾಂಚಾ ಮನ್ಶಾಂನಿ ಎಕ್ವಟಿತ್ ರಿತಿನ್ ದೈವಿಕ್ ಭಕ್ತ್ ಗಾಯ್ತಾಸ್ತಾನಾ ಸಯ್ತ್ ತಾಂಚೆಮಧೆಂ ಕೊಣ್ ಕೊಣಾಚೊ ಪೆಲೊ ಮ್ಹಳ್ಳೆಂ ಸವಾಲ್ ಗೊಮ್ತಾ. ಮನಿಸ್ ಭಾಯ್ಲ್ಯಾ ದೆಖಿಕ್ ಕಿತ್ಲೊ ಡೋಂಗ್ ಕರಿತ್ ತರ್ಯೀ ಭಿತರ್ಲೆ ಭಿತರ್ ಹರ್ಯೆಕ್ಲೊ ಮನಿಸ್ ಎಕ್ಸುರೊಚ್ಚ್ ಮ್ಹಳ್ಳೆಂ ಅಪುರ್ಭಾಯೆಚೆಂ ಚಿಂತಾಪ್ ವ್ಹಾಳಯ್ತಾ.
ಮಾಲ್ಘಡೊ ಕವಿ ಬಾಬ್ ಕಾವ್ಯಾದಾಸ್ ಮುಳಾವಿಂ ಸವಾಲಾಂ ಆಟಾಪ್ಚೆಂ ಕವಿತಾ ಘೆವ್ನ್ ಆಯ್ಲಾ, ಮೊಳ್ಬಾಕ್ ನಿಸಣ್ ಭಾಂದ್ಚೊ, ಲಿಪ್ತಿಂ ತಾರಾಂ ಮೆಜ್ಚೊ ಮನಿಸ್ ಹ್ಯಾ ಸಂಸಾರಾಂತ್ ಕಿತೆಂಯ್ ಕರುಂಕ್ ಸಕ್ತಾ ಪುಣ್ ಅಜೂನ್ ’ಅಪ್ಲೊ ಪೆಲೊ ಕೊಣ್’ ಮ್ಹಳ್ಳೆಂ ಸಮ್ಜೊಂಕ್ ಸಕೊಂಕ್ ಪಾವೊಂಕ್ ನಾ. ಹ್ಯಾ ಸಂಸಾರಾಂತ್ ತೊ ರಾಯ್ ತರ್ಯ್ ಹ್ಯಾ ಸವಾಲಾಂಕ್ ಅಜೂನ್ ಸಮ್ಜೊಂಕ್ ಪಾವೊಂಕ್ ನಾಂ ಮ್ಹಣ್ ಅಪ್ಲ್ಯಾ ಕವಿತೆಂತ್ ಉಚಾರ್ತಾ ಆನಿ ಮಯ್ನ್ಯಾಚೊ ಕವಿ ಜಾವ್ನ್ ವಿಂಚೊನ್ ಯೆತಾ. ಹ್ಯಾ ಖಾತಿರ್ ತಾಕಾ ಉಲ್ಲಾಸ್.
ಉತ್ರಾಂತ್ ಸೂತ್ರಾಂ - 1: ಮ್ಹಜೊ ಪೆಲೊ ಕೊಣ್?
[ವಾಂಟೆಲಿ ಜಾಲ್ಲಿಂ]
2. ಮೆಲ್ವಿನ್ ಜೆ. ವಾಸ್ ಕೆಲರಾಯ್/ಕುವೇಯ್ಟ್.
3. ಆಸ್ಟಿನ್ ಡಿ’ಸೊಜ್ ಪ್ರಭು ನಂತೂರ್/ಅಮೆರಿಕಾ.
4. ವಾಯ್ಲೆಟ್ ಜೆ. ಪಿರೇರಾ, ದುಭಾಯ್.
5. ಜೆರಿ ಡಿ’ಮೆಲ್ಲೊ ಬೊಂದುರ್/ಕೆನಡಾ.
6. ಲ್ಯಾನ್ಸಿ ಪಿಂಟೊ ನಾಯಕ್ ಕುಲ್ಶೇಕರ್/ಕುವೇಯ್ಟ್.
12. ವಲ್ಲಿ ಕ್ವಾಡ್ರಸ್ ಅಜೆಕಾರ್/ಕುವೇಯ್ಟ್.
ತುಜೊ ಪೆಲೊ [ಮಯ್ನಾಚೆಂ ಕವಿತಾ]
ಮೊಳ್ಬಾಕ್ ನಿಸಣ್ ಘಡ್ಲಿಯ್ ತುವೆಂ
ಮೆಜ್ಲಿಂಯ್ ಲಿಪ್ತಿಂ ತಾರಾಂ
ವಿಶಾಲ್ ಅನಂತ್ ಅಂತ್ರಳಾಚೆರ್
ಬಾಂದ್ಲಿಂಯ್ ಚಲ್ಚಿಂ ಘರಾಂ
ದರ್ಯಾಕ್ ಬಾಂಧುನ್ ಜಯ್ತಾ ಸಾಂಖೊವ್
ಶ್ಹೆರಾಂಕ್ ಭಂವ್ಡೆಕ್ ಧಾಡ್ಲೆಂಯ್
ಉದ್ಕಾ ಭಿತರ್ ಪಾಗೊರ್ ಘಡುನ್
ಮಾಸ್ಳ್ಯಾಂಕ್ ಶೆರ್ಮೆವ್ನ್ ಸೊಡ್ಲೆಂಯ್
ಚಂದ್ರೆಮಾರ್ ಪಾಂಯ್ ತೆಂಕ್ತಚ್ ತುವೆಂ
ಫುಂಕ್ಲೆಂಯ್ ಜಯ್ತಾ ತುರ್ಭೆಂತ್
ಪಯ್ಸ್ ಪಯ್ಸ್ ತಾರಾಂ ಗ್ರಹಾಂ ಜಾಲಿಂ
ತುಜೆಂ ಶ್ಯಾಥಿಯೆಚೆಂ ಶೆತ್
ಪ್ರಕೃತಿ ಘುಟ್ ಫೊಡ್ಲೆಯ್ ತುವೆಂ
ಗುಪಿತ್ ಉರ್ಲೆಂನಾ ಕಾಂಯ್
’ಅಸ್ಕತ್ ಮನಿಸ್’ ಅಸ್ಕತ್ ನ್ಹಂಯ್ ಆಜ್
ತೊ ರಾಯ್, ಸಗ್ಳ್ಯಾನ್ ಸದಾಂಯ್
ಅಂತ್ರಳಾಚೆರ್ ಚಲೊಂಕ್ ಶಿಕ್ಲೊಯ್
ತಾರಾಂಕ್, ಜಿವಿಂಕ್ ಸೊದುನ್
ತರೀ ತುಜೊ ಸೆಜಾರಿ - ಹಾಯ್
ಪರ್ಕೊಚ್ ಉರ್ಲಾ ಅಜೂನ್
ಹರ್ಯೆಕ್ ಮನಿಸ್ ತುಜೊ ಪೆಲೊ
ದವರ್ ಧ್ಯಾನಿಂ, ಮನಿಂ
ತಾಚೆ ಸೆವೆಂತ್, ಮೊಗಾಂತ್, ಆಸಾ
ಸರ್ಗಾರ್ ತುಜಿ ಜಿಣಿ.
ವಾಸ್ತವ್! [- ಮೆಲ್ವಿನ್ ಜೆ. ವಾಸ್, ಕೆಲರಾಯ್]
ದರ್ಯಾ ವೆಳೆಕ್
ಮೊಗಾನ್ ಉಮೊ ದೀಂವ್ಕ್ ಅತ್ರೆಗ್ಚಾ
ತರ್ನ್ಯಾ ಲ್ಹಾರಾಕ್
ಪಳೆವ್ನ್
ತ್ಯಾ ರೆಂವೆನ್ ವಿಚಾರ್ಲೆಂ
ಹಿ ತುಜಿ ತಾನ್ ಕೆದ್ನಾಂ ಭಾಗಾತ್?
ಸಾಳ್ಕಾ ದೊಳ್ಯಾಂಚೆಂ
ಲ್ಹಾರ್
ಕಾಜಾಳಾ ಇಡ್ಯಾಂತ್
ಹಾಸ್ಲೆಂ
ಸಮ್ಜೊಂಕ್
ಸಕಾನಾತ್ಲೆಲೆಂ ಕಾಳಿಜ್
ಮೂಟ್ಭರ್ ಉದ್ಕಾಂತ್ ಬುಡೊನ್ ಮೆಲೆಂ.
ಫುಲ್ಲ್ಲ್ಯಾ ಫುಲಾಕ್
ಮಯ್ಪಾಸಾನ್ ವೆಂಗುಂಕ್ ಆಶೆಂವ್ಚಾ
ಸೊಭಿತ್ ಪಿಸೊಳ್ಯಾಕ್ ಪಳೆವ್ನ್
ತ್ಯಾ ದೆಂಟಾನ್ ವಿಚಾರ್ಲೆಂ
ಹಿ ತುಜಿ ಭುಕ್ ಕೆದ್ನಾಂ ಥಾಂಬಾತ್?
ಪಾಕಾಟೆ ದೊಡುನ್ ಪಿಸೊಳೆಂ
ದಿಷ್ಟಿ ಮುಳಾಂತ್ ಉಲಯ್ಲೆಂ
ಸಮ್ಜೊಂಕ್
ಸಕಾನಾತ್ಲೆಲೆಂ ಕಾಳಿಜ್
ಕಾಂಟ್ಯಾಂನಿ ಶಿರ್ಕೊನ್ ದಡ್ಬಡೊನ್
ಮೆಲೆಂ.
ಖಚ್ರ್ಯಾ ಡಬ್ಬ್ಯಾಂತ್
ಆಶೆನ್ ಉಸ್ತುನ್ ಆಸ್ಚಾ
ನೆಣ್ತ್ಯಾ ಬಾಳಾಕ್ ಪಳೆವ್ನ್
ಹಾವೆಂಯಿ ವಿಚಾರ್ಲೆಂ
ಹೊ ’ಮ್ಹಜೊ ಪೆಲೊ’
ಮ್ಹಣ್ತಾತ್ ತೊ ಕೋಣ್?
ಭರಫಾ ಕಾಸ್ತಾಚೆಂ ಕಾಳಿಜ್
ಹರ್ಧ್ಯಾ ಗುಡಾಂತ್ ಕಡ್ಲೆಂ
ಸಮ್ಜೊಂಕ್
ನಾತ್ಲೆಲೆಂ ಮನ್
ಕುರ್ಡ್ಯಾ ದೊಳ್ಯಾಂನಿ
ಪಾಂಯ್ ವೊಡೀತ್ತ್ ಗೆಲೆಂ!
ಮ್ಹಜೊ ಪೆಲೊ! [- ಆಸ್ಟಿನ್ ಪ್ರಭು ನಂತೂರ್/ಚಿಕಾಗೊ]
ಮ್ಹಜೊ
ಪೆಲೊ ಉತ್ವಾರ್ ಆಸ್ಚೊ
ಗೊಡಾ ಪೆಳೊ ನ್ಹಂಯ್!
ಬಗಾರ್ ತೊ ಜಾವ್ನಾಸಾ
ಮ್ಹಜ್ಯಾ ಸಮಾಜೆಂತ್ಲೊ
ಸದಾಂಚ್ ಗರ್ಜ್ ಆಸೊನ್
ಹಾತಿಂ ಪಯ್ಶೆ ನಾಸ್ಚೊ
ಮ್ಹಜೆ ತಸ್ಲೊ ಏಕ್ ಮನಿಸ್
ತಾಚಿ ಗರ್ಜ್ಚ್ಚ್ ಮ್ಹಜಿ ಗರ್ಜ್
ತಾಚಿ ಮರ್ಜಿಚ್ಚ್
ಮ್ಹಜಿ ಮರ್ಜಿ
ತಾಚೆಂ ಘರ್ಚ್ಚ್ ಮ್ಹಜೆಂ ಘರ್
ತಾಚಿ ಭುಕ್ಚ್ಚ್
ಮ್ಹಜಿ ಭುಕ್
ತಾಚೆಂ ಕುಟಾಮ್ಂಚ್ ಮ್ಹಜೆಂ ಕುಟಾಮ್
ಜೆನ್ನಾಂ
ಹಾಂವ್ ತಾಕಾ ಮೆಳ್ತಾಂ
ತಾಚಿ ಹಕೀಗತ್ ವಿಚಾರ್ತಾಂ
ತಾಚ್ಯಾ ಗರ್ಜಾಂಕ್
ಪಾವ್ತಾಂ
ತಾಕಾ ಜಾಯ್ ತಿ ಕುಮಕ್ ದಿತಾಂ
ತೆನ್ನಾಂ
ಹಾಂವ್ ತಾಚೊ ಪೆಲೊ ಜಾತಾಂ
ಪೆಲೊ ಮ್ಹಳ್ಯಾರ್ ಮ್ಹಾಕಾ
ಏಕ್ ಮಿತ್ರ್/ಮಿತ್ರಿಣ್ ಜಾವ್ಯೆತ್
ಏಕ್ ಈಷ್ಟ್/ಇಷ್ಟಿಣ್ ಆಸ್ಯೆತ್
ಎಕಾಮೆಕಾಚೊ
ಮಾಯಾಮೋಗ್
ಆಪ್ಲ್ಯಾ ಕಾಳ್ಜಾಚೊ ಉಧ್ವೇಗ್ ಕಸೊ
ಚಿಂತ್ನಾನ್,
ಸಬ್ಧಾನ್ ಆನಿ ಕರ್ನೆನ್
ಏಕಾಚ್ಚ್ ತಾಕ್ಡೆರ್ ತುಕುನ್
ಸಮತಾವಾದಾಂತ್
ಮಿಸ್ಳೊನ್
ಜಾತ್-ಕಾತ್ ಮ್ಹಳ್ಳಿ ಕೊಸ್ಳೊನ್
ಭಾಸ್-ಧರ್ಮ್ ಮ್ಹಳ್ಳೆಂ ಫಾಸ್ಳಾವ್ನ್
ಹಾತಾಕ್ ಹಾತ್ ದೀವ್ನ್ ಮೋಗಾನ್
ತುರಂತ್ ಉಪ್ಕಾರಿ ವೇಗಾನ್
ಅಕಾಂತಾಂತ್ ಪಾತ್ರ್ ಘೆಂವ್ಚೊ
ಆನಿ ಏಕಾಮೆಕಾಚಿ
ಪ್ರೀತ್ ಸೆಂವ್ಚೊ
ತೊಚ್ಚ್ ಮ್ಹಜೊ ಪೆಲೊ!
ಮ್ಹಜೊ ಪೆಲೊ ಕೋಣ್? [ - ವಾಯ್ಲೆಟ್ ಜೆ. ಪಿರೇರಾ]
ಕೋಣ್ ಮ್ಹಜೊ
ಪೆಲೊ?
ಮ್ಹಜೆಂ ಬೆಸಾಂವ್ ಯಾ ಶಿರಾಪ್ ?
ಪಾಂವ್ಚೊ ನಾ ಹಾಂವ್ ಕಾಂಯ್ ಪಶ್ಚಾತ್ತಾಪ್
ಹಾಂವ್ ಸೊಸ್ಣಿಕ್ ತರ್ ಪೆಲೊ ಮ್ಹಜೆಂ
ಬೆಸಾಂವ್
ಪೆಲೊ ಖೊಟೊ ತರ್ ನಿಜಾಯ್ಕಿ ತೊ ಶಿರಾಪ್
ಕೋಣ್ ಮ್ಹಜೊ ಪೆಲೊ ?
ಮ್ಹಜೊ ಪೆಲೊ ಕರ್ತಾ ಮ್ಹಜಿ ನಕ್ಲಾಂ
ಕೆನ್ನಾ ಕೆನ್ನಾ ಖೆಳ್ಕುಳಾಂನಿ ಘಾಲ್ತಾ
ಮ್ಹಾಕಾ ಸಕ್ಲಾ
ತರೀ ತೊ ಜಾಂವ್ಚೊ ನಾ ತಾಚ್ಯಾ ಕರ್ತುಬಾಂನಿ
ವರ್ತೊ
ಪೆಲೊ ದುಸ್ಮಾನ್ ತರ್ ಹಾಂವ್ ಜಾತಾಲೊಂ ಖಾಲ್ತೊ
ಕೋಣ್ ಮ್ಹಜೊ ಪೆಲೊ?
ಮ್ಹಜೊ ಪೆಲೊ ಕಶ್ಟಾಂತ್ ಸಾಂಪ್ಡಾಲ್ಲೊ
ಪೊಟಾಚಿ ಭುಕ್ ಥಾಂಭಂವ್ಕ್ ಕಶ್ಟೊಂವ್ಚೊ
ತೊ ಕೋಣ್ ಪಿಡೆಂತ್ ಭಲಾಯ್ಕಿ ಆಶೆಂವ್ಚೊ
ಜಾತಲೊಂ ಹಾಂವ್ ಆಧಾರ್ ತಾಚ್ಯಾ ಕುಮ್ಕೆಚೊ
ಕೋಣ್ ಮ್ಹಜೊ ಪೆಲೊ ?
ಗ್ರೇಸ್ತ್ ವಾ ದುಬ್ಳೊ - ಕೊಣೀ ತೊ ಆಸೊಂ
ಮ್ಹಾಕಾ ತೊ ಜಾವ್ನಾಸಾ ರಚನ್ ದೆವಾಚೊ
ಲ್ಹಾನ್ ವಾ ವ್ಹಡ್, ಭಿಕಾರಿ ವಾ ಧನಿ
ಸಾಸ್ಣಾ ವಿಶೆವ್ ತ್ಯಾಚ್ಚ್ ಮಾತ್ಯೆಂತ್ ಘೆಂವ್ಚೆ
ಸರ್ವಾಂನಿ
ಕೋಣ್ ಮ್ಹಜೊ ಪೆಲೊ ?
ಹಾಂವ್ ಜಾವ್ನಾಸಾಂ ಪೆಲೊ ಸರ್ವಾಂಚೊ
ಖಂಚಾಯ್ ಘಡ್ಯೆ ಹಾತ್ ತಯಾರ್ ಕುಮ್ಕೆಚೊ
ನಾಕಾ ಭೇಧ್ ಖಂಚಾಯ್ ಜಾತಿ ಧರ್ಮಾಚೊ
ಎಕಾಮೆಕಾ ಆಧಾರ್ಸುನ್ ಜಾವ್ಯಾಂ ಪೆಲೊ
ಲೊಕಾ ಮೊಗಾಚೊ
ಪೆಲೊ...! ಆಪ್ಲೊ...? [ - ಜೆರಿ ಡಿ’ಮೆಲ್ಲೊ ಬೆಂದುರ್, ಕೆನಡಾ]
ಸ್ವಾರ್ಥಿ ಸಾಯೆನ್ ರೆವ್ಡಾಲ್ಲೆ ದೊಳೆ
ಚೊಂವ್ಕ್ ಪೆಲ್ಯಾಕ್ ಸಕಾನಾ ಜಾಲೆ
ಹಾಂವ್.. ಏವ್.. ಫಳಾಂ.. ವ್ಹೆಪಾರ್
ಹೊಚ್ಚ್ ಜಾಲಾ.. ಮ್ಹನ್ಶಾ ಭಂವಾರ್
ಭುಕ್
ಹೆರಾಂಚಿ.. ಕಶ್ಟ್ ಪೆಲ್ಯಾಚೆ..
ಕೊಣಾಚೆಂ ಕಿತ್ಯಾ ಮ್ಹಾಕಾ ಪಡೊನ್ ಗೆಲಾಂ..?
ತೆ ಸರ್ವ್ ಧಾಕ್ಟ್ಯಾ ದೆವಾಚೆ..
ವ್ಹಡ್ಲ್ಯಾ ದೆವಾನ್ ಮ್ಹಜೆರ್ ಬೆಸಾಂವ್ ವೊತ್ಲಾಂ...
ದಿಲೆಂ ದಾನ್.. ವ್ಹಡ್ ಜಾಲೆಂ ನಾಂವ್
ಕಾಂತಯ್ಲ್ಯಾ ಚರಿತ್ರಾ ಫಾತ್ರಾ ಫಳಿಯಾನಿಂ
ದಾರಾರ್ ಭಿಕಾರಿ ಮಾಗ್ತಾ ಪಾಂವ್
ಪಾಪ್ಸಿಲಾ ತಾಕಾ ರಾಕ್ಕೊಸ್ ಸುಣ್ಯಾನಿಂ...
ಮ್ಹಜಿ ಕಾತ್.. ತಾಚಿ ಜಾತ್..
ವೊಂಪ್ಲಾಂ ವೀಕ್ ನಿತಳ್ ವಾಟ್ಲೆಂನಿ
ರಸ್ತ್ಯಾರ್ ಬೊಬಾಟ್ತಾ ನಿರಾಪ್ರಾಧಿ ರಗಾತ್
ಕಾನ್ ಧಾಂಪ್ಲ್ಯಾತ್ ವಯ್ಲ್ಯಾ ದೆವಾಂನಿ..
ರಾವ್ತೆಲೆಂ
ಹರ್ ಜಿಣಿಯೆ ರೋದ್
ಆಜ್ ಆಸೊನ್ ಫಾಲ್ಯಾಂ ಮಾತಿಯೆಕ್
ಸಾಂಡುನ್ ಮನ್ಶಾ ತುಜೊ ಸ್ವಾರ್ಥ್
ತಾಂಡುನ್ ಕಾಳೊಕ್ ಯೇ ಉಜ್ವಾಡಾಕ್
ಸೊಧುನ್
ಸ್ವಭಾವ್ ಸ್ವಾರ್ಥಿ ಕುರ್ಲ್ಯಾಂಚೊ
ಪಾಡಾವ್ ಕರ್ಯಾಂ ಮೊಸ್ರಿ ಸಂಸಾರಾಚೊ
ಸಂದೇಶ್ ಘೆವುನ್ ಶಾಂತಿ-ಕುಂವರಾಚೊ
ಕರ್ಯಾಂ ಮೋಗ್ ಆಮ್ಚ್ಯಾ
ಪೆಲ್ಯಾಂಚೊ
ಮ್ಹಜೊ ’ಆಪ್ಲೊ’ ಕೋಣ್? [- ಲ್ಯಾನ್ಸಿ ಪಿಂಟೊ ನಾಯಕ್]
ಸಾಂಗಾರೇ ಬಾಬಾ, ಸಾಂಗ್ಗೋ ಮಾನಾ,
ಮ್ಹಜೊ ’ಆಪ್ಲೊ’ ಕೋಣ್?!
ಸಾಂಗ್ತಾಂ ತುಕಾ, ರಾಕ್ತಾಂ
ತಾಕಾ,
ಮ್ಹಜಿ ’ಪೆಲ್ಯಾ’
ಧೋಣ್!?
ಆವಾಯ್ಚ್ಯಾ ಉದರಾಕ್ ಆಡ್ ಚಿರುನ್,
ಭುಂಯ್ ಪಡ್ಲೊಂ ಉಸ್ವಾಸ್
ಧರುನ್,
ಪಯ್ಲ್ಯಾ ಬೊಬೆಕ್ ನಿತಳ್ ಕರುನ್,
’ಸಂತೊಸ್’ ಹಾಡ್ಲೊ ಘರ್
ಭರುನ್.
ಕಿತೆಂ ಉಲ್ಲಾಸ್? ಕಿತೆಂ ದಭಾಜೊ?
ಚಾರ್ ಭಂವ್ತಿಂ, ಫಕತ್
’ಆಪ್ಲೊ’!
ಆಯ್ಕೊಂಕ್ ಭಂವಾರಿಂ, ತಾಳೊ ಮ್ಹಜೊ
’ಫೆಸ್ತಾ ಖಜ್ನೊ’ ಅಂತ್ರಾಳಿಂ
ಗಾಜ್ಲೊ!
ಘರಾಂತ್ ಆಪ್ಲೊ, ತೆರಾಂತ್
ಆಪ್ಲೊ
ಮೆಟ್ ಘಾಲ್ಲ್ಯಾ ಗಾವಾಂತ್ ಆಪ್ಲೊ!
ಕಿತೆಂ ಮೋಗ್, ಕಿತೆಂ ಸಾಂಗಾತ್?
ರಾಗ್ ಕರ್ತಾಲೆಚ್ ಕೋಣಿ ನಾಂತ್!
ಇಸ್ಕೊಲಾಕ್ ವಚೊತ್,
ವ್ಹಡ್ ಜಾತಾಂ
ಹುಶಾರ್ಗಾಯೆನ್ ಹಾಂವ್ ಮುಖಾರ್
ವೆತಾಂ
’ಆಪ್ಲೊ-ಆಪ್ಲೆ’ ಚಿಂತುಂನ್ಚ್ ಚಲ್ತಾಂ
’ಪೆಲೊ ಆಸಾಗಿ?’ ಸವಾಲ್ಯಿ ಕರ್ತಾಂ!?
ಕಷ್ಟ್ ಕಾಡ್ನ್, ಮಿನತೆನ್ ಜೊಡ್ನ್,
ಚಾರ್ಯ್ ಭಂವ್ತಿಂ ಕುಮ್ಕೆಕ್
ಪಾವ್ತಾಂ.
ಭಿತರ್ಲ್ಯಾನ್ ಖರ್ಗೊನ್, ಬಾಯ್ಲ್ಯಾನ್
ನರ್ಗೊನ್,
ಸರ್ವ್ ’ಆಪ್ಲ್ಯಾಂಚಿಂ’ ದು:ಖಾಂ
ಪುಸ್ತಾಂ.
ಆತಾಂ ಜಾಂಟ್ಯಾ ಪ್ರಾಯೆಕ್ ಪಾವ್ಲಾಂ!
’ಪಾಟಿಂ ಪಳೆತಾನಾ’
ವಿಚಿತ್ರ್ ದಿಸ್ತಾ!?
ಚಾರ್ ಭಂವ್ತಿಂ ಉಜೊ, ಮೊಸೊರ್,
’ಆಪ್ಲ್ಯಾಂಚೊ’ ಝಳ್ಕಾನಾ ಕಿತೆಂಚ್
ಆಸೊರ್!!
ಆಪ್ಲ್ಯಾಂಚೊ ’ಆಂಜ್’ ಜಾವ್ನ್ ಜಲ್ಮಾಲ್ಲೊಂ
ಆಪ್ಲ್ಯಾಂನಿಚ್ ಬರೊ ಕರ್ನ್ ಪಿಳ್ಲ್ಲೊ
ಆಪ್ಲ್ಯಾಂಚ್ಯಾ ಗರ್ಜಾಂ ಆಕಾಂತಾಂತ್ ಝರ್ಲ್ಲೊಂ
’ಆಜ್ಯಾಪಾಂನಿ’ ಫೊಂಡಾಕ್
ಪಾಂವ್ಚೊ ಉರ್ಲ್ಲೊಂ!
ರಡ್ತಾ ಮನ್ ಬಸೊಂನ್ ಚಿಂತ್ತಾನಾ
ಆಪ್ಲ್ಯಾನಿಂಚ್ ನಂಯ್ಗೀ,
’ಪೆಲೊ’ ರಚ್ಲೊ?
"ಆಪ್ಲೊ" ಸಂಸಾರ್ ದೆವಾಚೊ ಆಸ್ತಾನಾ....!
’ಪೆಲೊ’ ಮ್ಹಳ್ಳೊ ’ದೆಂವ್ಚಾರ್’ ಘುಸ್ಲೊ!???
ಮ್ಹಜೊ ಪೆಲೊ ಕೊಣ್? [- ಪ್ರಸನ್ನ್ ನಿಡ್ಡೋಡಿ]
ಘರಾ ಕುಶಿ ರಾವ್ತಾ ರಾಟಾವಳಿಂನಿ
ವ್ಯಸ್ತ್ ದಿಸ್ತಾ
ಏಕ್ ಗೇಣ್ ಪೋಟ್ ಭರುಂಕ್ ರಾವಾನಾಸ್ತಾಂ ಘೊಳ್ತಾ
ಹೆವ್ಶಿಂ ತೆವ್ಶಿಂ ಭೆಟ್ತಾ ಹಾಸೊನ್ ಸ್ವಾಗತ್ ದಿತಾ
ಅಪ್ಲೆಂ ಕರ್ಮ್ ಅಪ್ಲಿಂ ಸೂತ್ರಾಂ ಸದಾಂ ಸಾಂಭಾಳ್ತಾ
ಹೊಚ್ಚ್ಗೀ ಮ್ಹಜೊ ಪೆಲೊ..?
ಪಯ್ಣಾರ್ ಆಸ್ತಾಂ ಜಾಗೊ ಬಸ್ಕಾ ಸೊಡುನ್ ದಿತಾ
ಕಷ್ಟಾಂ ಆಕಾಂತಾಂತ್ ಕುಮ್ಕೆ ಹಾತ್ ವೊಡ್ಡಾಯ್ತಾ
ಬರ್ಯಾ ಫಾಲ್ಯಾಕ್ ಸರ್ವ್ ಆಧಾರ್ ಹಾಂವ್ ತಯಾರ್
ಮ್ಹಣ್ತಾ
ಕಾಯ್ದೊ ಸಾಂಭಾಳ್ತಾ ಫಾಯ್ದೊ ಜೋಡ್ನ್ ದಿತಾ
ಹೊಚ್ಚ್ಗಿ ಮ್ಹಜೊ ಪೆಲೊ..?
ತಾಚ್ಯಾ ಗರ್ಜಾಂಕ್ ಹಾಂವ್ ಕಿತ್ಯಾಕ್ ತಾಚೊ
ಪೆಲೊ ನಾ?
ತಾಚಿ ದೂಕ್ ತಾಚೆ ಕಷ್ಟ್ ಸ್ವತಾಚೆಚ್ಚ್
ವ್ಹಯ್ಮೂ?
ಮ್ಹಾಕಾ ಮ್ಹಜೆಂ ವೊಜೆಂ ಆಸಾ - ಏಕ್
ಹಾತ್ ದೀಂವ್ಕ್ ಜಾತಾ?
ಮ್ಹಜೆಂ ಕುಟಾಮ್, ಮ್ಹಜೆಂ ಬದಿಕ್,
ಮ್ಹಜೆಂ ಕಾಮ್,
ಮ್ಹಜೆಂ ಸುಖ್..
ಹಾಂವ್ ತಾಚೊ ಪೆಲೊ ಕಸೊ..?
ಅಸಲ್ಯಾ ಎಕಾ ಗಾ೦ವಾ೦ತ್.. [- ಅನಿಲ್ ಪೆರ್ನಾಲ್/ಮಸ್ಕತ್]
ಕಸಾಪ್ಪ್ಯಾಚಾ
ಹಾತಾಚಿ ಬಾವ್ಲಿ ಹಾ೦ವ್
ಗಾಣ್ಯಾಕ್ ಗಾಲ್ಲ್ಯಾ ಕೊಬಾ ಸರಿ
ಚಿ೦ವೊಡ್-ಚಿ೦ವೊಡ್ ಮ್ಹಜಿ ಜೀಣ್
ಸಾ೦ಗಾ ಮ್ಹಕಾ ಸಾ೦ಗಾ ಆತಾ೦
ಮ್ಹಜೊ ಹಾ೦ಗಾ ಪೆಲೊ ಕೋಣ್!?
ಗರ್ಭಾ೦ತ್ ತರೀ ಘೆತಿ೦ ಸುಶೆಗ್
ತಲ್ವಾರ್ಯೊ ಘೆವುನ್ ಅಯ್ಲೆ ಚಿರು೦ಕ್
ಮಾಸಾಚೊ ಮುದೊ ಜಸೊ ಸಾಫ್ ಕೆಲೆ೦ ಖಬ್ರೆವಿಣ್
ಸಾ೦ಗಾ ಮ್ಹಕಾ ಸಾ೦ಗಾ ಆತಾ೦
ಮ್ಹಜೊ ಹಾ೦ಗಾ ಪೆಲೊ ಕೋಣ್!?
ಫಾ೦ತ್ಯಾರ್ ಥಾವ್ನ್ ರಾತಿ೦ ಪರ್ಯಾ೦ತ್
ವೆಡ್ಕೊ ನಾ೦ ಮ್ಹಜ್ಯಾ ಹಾತಾ೦-ಪಾ೦ಯಾ೦ಕ್
ನೆ೦ಟ್ತುಲೆ ಹಾತ್ ಹೆ ಕಸಾಯ್ಗಾರಾ ತ್ರಾಣ್
ಸಾ೦ಗಾ ಮ್ಹಕಾ ಸಾ೦ಗಾ ಆತಾ೦
ಮ್ಹಜೊ ಹಾ೦ಗಾ ಪೆಲೊ ಕೋಣ್!?
ಗಮ್ಸ್ಯಾ೦ಚಾ ಉಮ್ಯಾ೦ಕ್ ಆತಾ೦ ಉಭ್ಲಾ ಪಿರಾಣ್
ಭಿರ್ಮತೆಚಿ೦ ದುಃಖಾ೦ ಕಿತೆ೦
ಮೊರ್ನಾಕ್ ಮ್ಹಜ್ಯಾ ಹಜಾರ್ ಜಣ್
ಸಾ೦ಗಾ ಮ್ಹಕಾ ಸಾ೦ಗಾ ತುಮಿ೦ಚ್ಚ್
ಮ್ಹಜೊ ಹಾ೦ಗಾ ಪೆಲೊ ಕೋಣ್!!?
ಎಕ್ಸುರಿಂ ದುಃಖಾಂ [- ವಿನ್ಸಿ ಮೆಲ್ಕಾರ್]
ಆವಯ್
ಬಾಪಾಯ್ ಕೊಣ್ ಮ್ಹಣ್ ನೆಣಾಂ
ಮೊಗಾನ್ ವೇಂಗ್ ಮಾರ್ತೆಲಿಂ ನಾಂತ್
ದಿಸಾನ್ ದೀಸ್ ಸುರ್ಯೊ ಬುಡ್ತಾ ಉದೆತಾ
ಜಿವಿತ್ ಅಖೇರ್ ಜಾಂವ್ಕ್ಚ್ ನಾ..
ಕೊಲ್ವಾ ವಾಳಯ್ ಪಾಕ್ಯಾ ಶಿವಾಯ್ ದುಸ್ರೆಂ
ಪಾಕೆಂ ನಾ
ಚಿಮ್ಣೆ ದಿವ್ಯಾ ಶಿವಾಯ್ ದುಸ್ರೊ ಉಜ್ವಾಡ್
ನಾ
ಮೀಟ್ ಪೇಜ್ ಶಿವಾಯ್ ಕುಂಡ್ಲ್ಯಾಂತ್ ಕಸ್ಲೇಂಯ್ ಶಿಜ್ಲೆಂನಾ
ಕೊಡು ಶಿವಾಯ್ ಗೋಡ್ ಚಾಕ್ಲೆಂನಾ
ಆಪ್ಣಾಚಿಂ ಲಾಗಿಂ ಕೊಣ್ಚ್ ನಾಂತ್
ಕಾಂಟ್ಯಾ ವಾಟೆ ಶಿವಾಯ್ ದುಸ್ರಿ ವಾಟ್ ದೆಕ್ಲಿನಾ
ಆಶೆಚ್ಯಾ ಸಂಸಾರ್ ಮತಿಂತ್ ರಿಗವ್ನ್
ಆಂಯ್ಡೊ ಗಳವ್ನ್ ರಾವ್ಲೊ ಚುಕಾನಾಸ್ತಾಂ
ನಿದೆಚ್ಯಾ ಸ್ವಪ್ಣಾಂತ್ ರಾಯ್
ರಾವ್ಳೆರ್ ಬಾಂಧ್ತಾಂ
ಜಾಗೊ ಜಾಲೊಂ ತರ್ ಭಿಕಾರಿ ಜಾವ್ನಾಸ್ತಾಂ
ಸಮಾಜೆಂತ್ ಸ್ಥಾನ್ ಮಾನಾಕ್ ಆಶೆವ್ನ್
ಲೊಳೊನ್ ಆಸಾಂ ಧುಳಿಚ್ಯಾ ಕಣಾಂತ್.
ಗಳಯ್ತಾಂ ಹಾಂವ್ ಎಕ್ಸುರಿಂ ದುಃಖಾಂ
ಮ್ಹಜೊ ಪೆಲೊ ಮ್ಹಣ್ಚಿಂ ನಾಂತ್ ಕೊಣ್ಂಚ್
ದೆಖ್ತಾಂ ಮ್ಹಳ್ಳೊ ಸಂತೊಸಾಚೊ ಉಜ್ವಾಡ್
ರಾಕೊನ್ ರಾವ್ಲಾಂ ಉಗ್ತೆ ದವ್ರುನ್ ದೊಳೆ.
ಮ್ಹಜೊ ಪೆಲೊ ಕೊಣ್? [- ರೋಶನ್ ರೊಡ್ರಿಗಸ್, ದುಭಾಯ್]
ರಾಜಕಾರಣಿ ಚಿಂತಾ ಮತ್ದಾರ್ ಮ್ಹಣ್ ಮ್ಹಜೊ ಪೆಲೊ
ದೊತೊರ್ ಚಿಂತಾ ಪಿಡೆಸ್ತ್ ಮ್ಹಣ್ ಮ್ಹಜೊ ಪೆಲೊ
ಶಿಕ್ಷಕ್ ಚಿಂತಾ ವಿಧ್ಯಾರ್ಥಿ ಮ್ಹಣ್ ಮ್ಹಜೊ ಪೆಲೊ
ಸಾವ್ಕಾರ್ ಚಿಂತಾ ನವ್ಕರ್ ಮ್ಹಣ್ ಮ್ಹಜೊ ಪೆಲೊ
ಆವಯ್ ಚಿಂತಾ ಭುರ್ಗೆಂ ಮ್ಹಣ್ ಮ್ಹಜೊ ಪೆಲೊ
ವಕೀಲ್ ಚಿಂತಾ ಕಕ್ಷೆಗಾರ್ ಮ್ಹಣ್ ಮ್ಹಜೊ ಪೆಲೊ
ಭಿಕಾರಿ ಚಿಂತಾ ಭಿಕ್ ದಿಂವ್ಚೊ ಮ್ಹಣ್ ಮ್ಹಜೊ ಪೆಲೊ
ಸರ್ವ್ ಚಿಂತಾತ್ ತರ್ ಮನ್ಶಾಕುಳ್ ಮ್ಹಣ್ ಮ್ಹಜೊ
ಪೆಲೊ
ಜಾತಿಂ ಖಾತಿರ್ ಹಿಂ ಝಗಡ್ತಾನಾ ಖಂಯ್ ಆಸಾ ಮ್ಹಜೊ ಪೆಲೊ
ಸಕ್ಡಾಂಚೆಂ ರಗಾತ್ ತಾಂಬ್ಡೆಂ ಕಿತ್ಯಾಕ್ ವಿಸರ್ತಾ ಮ್ಹಜೊ ಪೆಲೊ
ಖಾಣಾ, ದೆವಾ ಅಮ್ಚೆಂ ಕಿತ್ಯಾಕ್ ಜೀವ್ ಕಾಡ್ತಾ ಮ್ಹಜೊ ಪೆಲೊ
ವಾಟೆ ಖಾತಿರ್ ಕಿತ್ಯಾಕ್ ಘಾಲ್ತಾ ಕಾಂಟೆ ಮ್ಹಜೊ ಪೆಲೊ
ಮೊಗಾ ಖಾತಿರ್ ಕಿತ್ಯಾಕ್ ಕಸಾಯ್ ಜಾತಾ ಮ್ಹಜೊ ಪೆಲೊ
ಜುಗಾರ್, ಸೊರೊ, ವಿಕ್ತಾನಾ ಖಂಯ್ ಆಸಾ ಮ್ಹಜೊ ಪೆಲೊ
ಚಲಿಯಾಂ ಸ್ತ್ರೀಯಾಂಚೆರ್ ಭಲತ್ಕಾರ್ ಕರ್ತಾ ಮ್ಹಜೊ ಪೆಲೊ
ಪಯ್ಶೆ ಆಸ್ಗಿ ಮ್ಹಜೊ ಪೆಲೊ
ನಾಂವ್, ಗೌರವ್, ಘಮಂಡ್ಗೀ ಮ್ಹಜೊ ಪೆಲೊ
ಪೆಲ್ಯಾಂಕ್ ಬೋಟ್ ಜೊಕ್ಚೊ ಹಾಂವ್ಗಿ ಪೆಲೊ
ಅಶೆಂ ತರ್ ಖಾಂದ್ ಮಾರುಂಕ್ ಯೇತ್ಗೀ ಮ್ಹಾಕಾ ಮ್ಹಜೊ ಪೆಲೊ
ಸೆಜಾರ್ಚೊಗೀ ಮ್ಹಜೊ ಪೆಲೊ? ಗರ್ಜ್ಗೀ ಮ್ಹಾಕಾ ಪೆಲೊ
ಮ್ಹಾಕಾ ವಳ್ಕಿಚೊ ಜಾಣಾ ಆಸ್ಲ್ಲೊಗೀ ಮ್ಹಾಕಾ ಮ್ಹಜೊ ಪೆಲೊ
ಘರಾ ಕುಟ್ಮಾಂತ್ ಸಮಾ ನಾಂತರ್ ಖಂಯ್ ಸೊಧುಂ
ಪೆಲ್ಯಾಕ್
ಜೆಜುಚಿಂ ಉತ್ರಾಂ ಯೆದೊಳ್ ಹಾಂವ್ ಸಮ್ಜೊಂಕ್ ಸಕ್ಲ್ಲೊಂ ತರ್
ಕೊಣ್ ಮ್ಹಣ್ ಮ್ಹಜೊ ಖರೊ ಪೆಲೊ?
ಅಪ್ಲೊ ಪೆಲೊ [- ನಂದಿನಿ]
ಪಾಚ್ವ್ಯಾ ಪಾನಾರ್ ದೊವಾ ಮೊತಿಯಾಂನಿ
ಸಜೊನ್ ರಾವ್ಲಾ ಗುಲೊಬ್ ದುಲೊಬಿ
ಚಾನ್ನ್ಯಾ ರಾತಿಂತ್ ಪುನ್ವೆ ವಾತಿಂತ್
ಆಂಗಾರ್ ಭರುನ್ ಸೊಭಾಯ್ ಸುಂದರ್
ತ್ಯಾಯೀ ಸೊಭಾಯೆ ವಾಂಟೊ ಕಿತ್ಲೊ ಆಪ್ಲೊ ಕಿತ್ಲೊ ಪೆಲೊ?
ಫಾಂತೊಡೆಚೊ ವೇಳ್ ಮೊನೊ
ಧ್ಯಾನಾರ್ ಆಸಾಂ ಧಾಂಪುನ್ ದೊಳೊ
ಮತಿಪಡ್ದ್ಯಾರ್ ನಾಚ್ತೇ ಆಸಾ ಮನ್ಶಾಂಚಿರೆ ರಾಸ್ ರಾಸ್
ಮನ್ಶಾಂ ಆಮ್ಚಿಂ, ಮನ್ಶಾಂ ತಾಂಚಿಂ; ತುಜಿಂ ಮ್ಹಜಿಂ ಸರ್ವಾಂಚಿಂ
ಹಾಂಚಾಯಿ ಮಧೆಂ ಮನ್ಶಾಂ ಕೊಣ್, ಕೊಣ್
ಆಪ್ಲಿಂ
ಕೊಣ್ ಪೆಲಿಂ?
ದೆವಾ ತುಜಾ ದೆವಳಾಂತ್ ಲೋಕ್ ಬಾರಾ ಹಜಾರ್
ಹಜಾರ್ ತಾಂಚೆ ಗಳೆ ಹಜಾರ್ ತಾಂಚೆ ತಾಳೆ
ಮೆಳೊನ್ ದಿತಿತ್ ತುಕಾ ಬಾಪಾ ಭಕ್ತಿಚೆ ಉಲೆ
ಹಜಾರಾಂಚೊ ಜಾಲೊ ಸೊಮಿಯಾಂ ಎಕ್ವಟಿ ತಾಳೊ
ತ್ಯಾ ಉಲ್ಯಾಂತ್ ಹಜಾರಾಂಚಾ ಸೊಧುಂ ಕಶೆಂ ಕೊಣ್
ಕೊಣಾಕ್ ಪೆಲೊ?
ಧಾಂವ್ತಾ ಗಾಡಿ ರಯ್ಲಾಚಿ ಪಾಟ್ಯಾ ಲಾಂಬಾಯೆಕ್
ಧಾಂವಾಧಾಂವಿ ತಿಚಿ ಧಾಂವ್ ಜಬ್ಬೊರ್ ತಿಚಿ ಖರಸ್
ಸಂಸಾರಾಚಿಂ ರುಪಾಂ ಸರ್ವ್ ಘೆವುನ್ ಆಪ್ಲ್ಯಾ ಗರ್ಭಾಂತ್
ಪನ್ನಾಸ್ ಜಾತಿ ಪನ್ನಾಸ್ ಕಾತಿ ಪಯ್ಣಾರಿ ತೆ ತಿಚೆಚ್
ಎಕಾಲೆಕಾನ್ ಘೆವ್ನ್ ಧಾಂವ್ತಾ ಮ್ಹಣೊನ್
ಆಪ್ಣಾಕ್ ನಾ
ಕೊಣ್ ಪೆಲೊ.
ಇಶ್ಟಾಂಚಾ ವೊಳಿಂತ್ ಆನಿ ಪ್ರೇಮಿಂಚಾ ಮೆಳಿಂತ್
ಕುಟ್ಮಾ ಸಯ್ರ್ಯಾಂಚಾ ಗವ್ಜೆಗಲಾಟ್ಯಾಂತ್
ಸಂತೊಸ್ ಭರೊನ್ ಉಮಾಳ್ತಾನಾ ಜಿಣಿಯೆ ಕಾಟ್
ಮ್ಹಜೆಂ ತುಜೆಂ ಮ್ಹಣೊನ್ ಮೆಜ್ತಾ ಮೊಡುನ್ ಬೊಟ್
ಪ್ರಕೃತೆಚಾ ಆವ್ರಾವ್ಹಾಳ್ಯಾಂತ್ ವೆತಾನಾ ವ್ಹಾಳೊನ್, ಕೊಣ್
ಆಪ್ಲೊ
ಕೊಣ್ ಪೆಲೊ?
ಮ್ಹಜೊ ಪೆಲೊ ಕೊಣ್? [- ವಲ್ಲಿ ಕ್ವಾಡ್ರಸ್]
ವಾಗಾನ್
ಗಾಯೆಕ್ ಧರ್ಲೆಂ
ಸಿಸ್ರಿನ್ ಮಾಸ್ಳೆಕ್ ಗಿಳ್ಳೆಂ
ಮಾಜ್ರಾನ್ ಉಂದಿರ್ ಧರ್ಲೆ
ದಿವ್ಡಾನ್ ಮಾಣ್ಕ್ಯಾಂಕ್ ಗಿಳ್ಳೆಂ
ಆಬ್ಳೆ ಮನ್ಶಾನ್
ಅಪ್ಲ್ಯಾಂಕ್ಚ್ ಧರ್ಲೆಂ
ಆನಿ ವಿಚಾರ್ಲೆಂ
’ಮ್ಹಜೊ ಪೆಲೊ ಕೊಣ್?’
About
us | Feedback | Contact us
Copyright
© 2005 DAAIZ.COM All rights reserved.
Page concept, designed and maintained by Ashawadi
Publications
More in Daaiz
Send your comments to author on this writing
This is not a comment box. Nothing you write here appears on the site or is shown to any other reader: it is sent to him by email, privately, and he replies to you directly if a reply is called for.