ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
’ಜೆದ್ನಾಂ ತುಂ ಹೆರಾಂಚಾ ಬರ್ಯಾಪಣಾವಿಶ್ಯಾಂತ್ ಚಿಂತಾಯ್, ತೆದ್ನಾಂ ತುಜೆಂ ಬರೆಂಪಣ್ ಅಪಾಪಿಂ ಜಾತೆಲೆಂ’ - ಡಯಾನ್ ಡಿ’ಸೋಜ್
ಕೊಂಕ್ಣಿ ಕಾರ್ಭಾರಿ - 7.
ಡಯಾನ್ ಡಿ’ಸೋಜ್
ಮಟ್ವ್ಯಾನ್ ವಳೊಕ್
ಜಲ್ಮಾಲ್ಲಿ ತಾರಿಕ್: 16 ಜನೆರ್
1964
ಆವಯ್-ಬಾಪಾಚೆಂ ನಾಂವ್: ಮಾನೆಸ್ತಿಣ್ ಬೆನಡಿಕ್ಟಾ ಡಿ’ಸೋಜ್ ಆನಿ ದೆ|ಮೌರಿಸ್ ಡಿ’ಸೊಜ್
ಕಾಜಾರಾಚೊ ದೀಸ್: 26
ಮಾಯ್ 1994
ಪತಿಣ್: ಲವೀನಾ ಡಿ’ಸೋಜ್, ಮೂಡ್ಬೆಳ್ಳೆ
ಭುರ್ಗಿಂ: ಡೆಲ್ಫಿನಾ, ಡೆನಿಕಾ
ಇಸ್ಕೊಲ್: ಪ್ರಾಥಮಿಕ್ ಶಿಕಾಪ್ ಸಾಂ|ಜುಜೆಚೆಂ ಇಸ್ಕೊಲ್, ಬೆಳ್ಮಣ್
ಕೊಲೆಜ್: ಸಾಂ|ಲುವಿಸ್ ಕೊಲೆಜ್, ಮಂಗ್ಳುರ್
ಏಕ್ ಖರೊ ಮುಖೆಲಿ, ಸದಾಂಚ್ ಹಾಸ್ತ್ಯಾ ತೊಂಡಾಚೊ, ಖುಶಾಲಿ ಸ್ವಭಾವಾಚೊ, ಸದಾಂಚ್ ಹೆರಾಂಚಾ ಗರ್ಜೆಕ್ ಪಾಂವ್ಚೊ ಮಾತ್ರ್ ನ್ಹಯ್ ಏಕ್ ಬರವ್ಪಿ, ಉಲವ್ಪಿ, ಸಂಘಟಕ್, ನಟ್ - ಹೆರಾಂ ಪಾಸತ್ ಜಿಯೆಂವ್ಚಿಚ್ ಖರಿ ಮನ್ಶಾಚಿ ಜಿಣಿ ಮ್ಹಳ್ಳೆಂ ತತ್ವ್ ಕಾಳ್ಜಾಥಾವ್ನ್ ಮಾನುನ್ ಘೆಂವ್ಚೊ ಜೊ ಕೊಂಕ್ಣಿ ಭಾಸ್, ಕೊಂಕ್ಣಿ ಸಮಾಜೆಖಾತಿರ್ ದಿಸಾಚೊ ಅಪ್ಲೊ ಚಡ್ತಾವ್ ವೇಳ್ ಖರ್ಚುಂವ್ಚೊ ಎಕ್ಲೊ ಪರ್ಗಾಂವಾಂತ್ ಆಸಾ ತರ್ ತಾಕಾ ವಳ್ಕೊಂಕ್ ಭೋವ್ ಸಲೀಸ್ - ತೊಚ್ಚ್ ಜಾವ್ನಾಸಾ ಡಯಾನ್ ಡಿ’ಸೋಜ್, ಮುಕಾಮಾರ್.
ಸಮಾಜೆಂತ್ ಬರೊ
ವಾವ್ರ್ ಕರ್ಚಾಂಕ್ ವೆಗ್ಗಿಂ ವಳ್ಕೊನ್, ತಾಂಕಾ ಉತ್ತೇಜನ್ ಆನಿ ಪ್ರೋತ್ಸಾಹ್
ದೀವ್ನ್, ತಾಂಕಾ ಜೊಕ್ತೊ ಮಾನ್ ಮೆಳಾಶೆಂ ಕರುಂಕ್
ಪೆಚಾಡ್ಚೊ
ಹೊ ಸದಾಂ ಪರ್ದ್ಯಾಪಾಟ್ಲ್ಯಾನ್ ರಾವೊನ್ ಆಪ್ಲಿಂ ಕಾಮಾಂ ಕರ್ತಾ. ಆಜ್ ದಾಯ್ಜಿದುಭಾಯ್
ಸಂಘಟನ್ ಕೊಂಕ್ಣಿ ಸಂಸಾರಾಂತ್
ಇತ್ಲೆಂ ಭಳಿಶ್ಟ್ ಜಾವ್ನ್ ಉಭೆಂ ಜಾಲಾಂ ತರ್ ಹ್ಯಾ ಭಾಂದ್ಪಾಂತ್
ಹಾಚಾ ಮಿನತೆಚೊ ಜಾಯ್ತೊ ಘಾಮ್ ಮಿಸ್ಳಾಲಾ ಮ್ಹಳ್ಳೆಂ
ಸತ್ ಕೊಣ್ಯ್ ನೆಗಾರ್ ಕರಿಶೆನಾಂತ್ ಮ್ಹಳ್ಳಿ ಮ್ಹಜಿ ಪಾತ್ಯೆಣಿ ಜಾವ್ನಾಸಾ.
ಹಾಚಾ ಶೆಗುಣಾಂಚಾ ಹ್ಯಾ ಪುಂಜ್ಯಾಕ್ ಜೊಕ್ತೊ ಮಾನ್ ದಿಂವ್ಚಾಕ್ ದಾಯ್ಜಿದುಭಾಯ್
ಸಂಘಟನಾನ್ ಜೊಕ್ತೆಂ ಮೇಟ್ ಕಾಡ್ಲಾಂ ಆನಿ ’ದಾಯ್ಜಿ ವಾವ್ರಾಡಿ
ಪುರಸ್ಕಾರ್’ ಖಾತಿರ್ ಡಯಾನ್ ಡಿ’ಸೋಜಾಕ್ ವಿಂಚುನ್
ಹ್ಯಾ ಪುರಾಸ್ಕಾರಾಚೆಂ ಮೋಲ್ ಚಡಯ್ಲಾಂ.
[ದಾಯ್ಜಿ
ವಾವ್ರಾಡಿ ಪುರಸ್ಕಾರ್ ಫಾವೊ ಜಾಲ್ಲ್ಯಾ ಮಾನೆಸ್ತ್ ಡಯಾನ್ ಡಿ’ಸೋಜಾಕ್ ದಾಯ್ಜ್
ಪಂಗಡ್ ಗೌರವಾನ್ ಮಾನ್ ದಿತಾ ತಶೆಂಚ್ ಕೊಂಕ್ಣಿ ಕಾರ್ಭಾರಿ ಜಾವ್ನ್
ಮಾಂದುನ್ ಘೆಂವ್ಕ್ ವ್ಹಡ್ ಸಂತೊಸ್ತಾ]
1. ಡಯಾನ್, ತುಂ ಸದಾಂಚ್ ಹೆರಾಂಚೆಂ ಬರೆಂಪಣ್ ವಳ್ಕತಾಯ್, ತಾಂಕಾಂ ಜೊಕ್ತೊ ಮಾನ್ ಮೆಳೊಂಕ್ ಪೆಚಾಡ್ತಾಯ್ ಆನಿ ತುಂ ಖುದ್ದ್ ಪರ್ದ್ಯಾಪಾಟ್ಲ್ಯಾನ್ ಲಿಪೊನ್ ಬೊಸ್ತಾಯ್. ಆತಾಂ ತುಕಾ ಪರ್ದ್ಯಾಪಾಟ್ಲೊ ವೋಡ್ನ್ ಮುಖಾರ್ ಹಾದ್ನ್ ಜೊಕ್ತೊ ಮಾನ್ ದಿತಾನಾ ಕಿತೆಂ ಭಗ್ತಾ?
(ಹಾಸೊನ್) - ಸತ್ ಸಾಂಗೊಂ ತರ್, ಮ್ಹಕಾ ಕಿತ್ಯಾಕ್ಗೀ ಹೊ ಪುರಸ್ಕಾರ್ ಭೋವ್ ಝಡಾಯೆಚೊ ಮ್ಹಣ್ ಭೊಗ್ತಾ ಆನಿ ಹಾಂವ್ ಹಾಕಾ ಫಾವೊ ಜಾಲ್ಲೊ ವ್ಯಕ್ತಿ ನ್ಹಯ್ ಮ್ಹಣ್ ಭೊಗ್ತಾ. ಹಾಂವ್ ಇತ್ಲೆಂಚ್ ಚಿಂತಾಂ ಜಶೆಂ ಆಮಿಂ ಬ್ಯಾಂಕಾಂತ್ ಆಮ್ಚೊ ದುಡು ದವರ್ನ್ ವ್ಹಾಡ್ ಘೆತಾಂವ್ ತಶೆಂಚ್, ಮ್ಹಜೊ ಸಮಾಜಿಕ್ ವಾವ್ರ್ಚ್ ಮ್ಹಜೆಂ ಬಂಡ್ವಾಳ್, ಆನಿ ಹ್ಯಾ ಖಾತಿರ್ ಮೆಳ್ಚೆ ಪುರಸ್ಕಾರ್ ಹಾಚಿ ವ್ಹಾಡ್ ಮ್ಹಣ್
ಚಿಂತಾಂ.
ಅನ್ಯೇಕ್
ಧಾದೊಸ್ಕಾಯೆಚಿ ಗಜಾಲ್ ಖಂಚಿಗೀ ಮ್ಹಳ್ಯಾರ್, ಜೆಜುನ್ ಸಾಂಗ್ಲ್ಲೆಪರಿಂ,
ಖಂಚಾಯ್ ಪ್ರವಾದಿಕ್ ಆಪ್ಲ್ಯಾ ಸ್ವಂತ್ ಗಾಂವಾಂತ್ ಮಾನ್
ಮೆಳಾನಾ, ತಶೆಂ ಆಮ್ಚಾ ಕ್ರಿಸ್ತಾಂವ್ ಸಮಾಜೆನ್
ಆಮ್ಚಾಂಕ್ ಮಾನ್ ದಿಂವ್ಚೊ ಭೋವ್ ಉಣೆಂ. ಪುಣ್ ಮ್ಹಜಾ
ವಾಂಟ್ಯಾಕ್ ಹೆಂ ಸತ್ ನ್ಹಯ್.
2. ತುಂ ಕೆದ್ನಾಂಯ್ ಹೆರಾಂಕ್ ಮಾನ್ ಮೆಳಾಶೆಂ ಕರುಂಕ್, ಹೆರಾಂಕ್ ಶಾಭಾಸ್ಕಿ ದೀಂವ್ಕ್ ಪೆಚಾಡ್ತಾಯ್ ಕಿತ್ಯಾಕ್?
ಹೆಂ ಆಮ್ಚೆಂ ದುರ್ಭಾಗ್ಪಣ್ ಮ್ಹಣೊಂಗಿ ವಾ ಆಮ್ಚಾ ಸಮಾಜೆಚೆರ್ ಪಡ್ಲ್ಲೊ ಶಿರಾಪ್ ಮ್ಹಣೊಂಗೀ ತೆಂ ಮ್ಹಾಕಾ ಸಮ್ಜಾನಾ, ಪುಣ್ ಸತ್ ಹೆಂ ಕೀ, ಆಮ್ಚಾ ಸಮಾಜೆಂತ್ ವೆವೆಗ್ಳ್ಯಾ ಶೆತಾಂನಿ ಜಿತ್ಲೆ ವಾವ್ರ್ ಕರ್ತೆಲೆ ಆಸಾತ್, ತೆದ್ನಾಂ ತಾಂಕಾಂ ಕೊಣ್ಯ್ ವಳ್ಕಾನಾ ಯಾ ಶಾಭಾಸ್ಕಿ ದೀಂವ್ಕ್ ವಚಾನಾ. ಆನಿ ಜರ್ ಕೊಣ್ಯ್ ಎಕ್ಲೊ ತಾಕಾ ವಳ್ಕಾತಾ ಆನಿ ಮಾನ್ ದಿತಾ ತರ್ ಏಕ್ ಬರೆಂ ಉತಾರ್ ಆಮ್ಚಾ ಲೊಕಾಂ ಥಾವ್ನ್ ಸುಟಾನಾ. ಹಾಂವ್ ನೆಣಾಂ ಹೆಂ ಕಿತ್ಯಾಕ್ ಅಶೆಂ ಮ್ಹಣ್. ಹಿ ಆಮ್ಚಿ ಕುರ್ಲ್ಯಾಂಚಾ ಸಮಾಜೆಚಿ ಮನೋಗತ್ ಕೆನ್ನಾ ಬದಲ್ತಾ ಮ್ಹಳ್ಳೆಂ ಹಾಂವ್ ನೆಣಾಂ. ಜೀವ್ ಆಸ್ತಾನಾ ವಳ್ಕಾನಾಂತ್, ಆನಿ ಉಪ್ರಾಂತ್ ಮೊರ್ತಚ್ ತಾಕಾ ಫುಲಾಂ ಘಾಲ್ತಾತ್ ಆನಿ ದುಖಾಂ ಗಳಯ್ತಾತ್.
ಹಾಂವ್ ಕಾರ್ಯಾಳ್ ಮನಿಸ್ ದೆಖುನ್ ಹೆರಾಂಚೊ ವಾವ್ರ್ ಮ್ಹಜಾ ದೊಳ್ಯಾಂಕ್ ದಿಸಾನಾಸ್ತಾಂ ವಚಾನಾ, ಜರ್ತರ್ ತೊ ವಾವ್ರ್ ನಾಂವಾಖಾತಿರ್ ಕರ್ಚೊ ಯಾ ಕೆಲ್ಲೊ ನ್ಹಯ್ ತರ್.
3. ಆಮ್ಚಿ ಸಮಾಜ್ ಭಳ್ವಂತ್ ಸಮಾಜ್ ಕರುಂಕ್ ತುಜಿ ಸಲ್ಹಾ ಕಸಲಿ?
ಸಮಾಜ್ ಮ್ಹಳ್ಯಾರ್ ಕಿತೆಂ?
ಸಮಾಜ್ ಮ್ಹಳ್ಯಾರ್ ಗುಡೆ ದೊಂಗೊರ್ ನ್ಹಯ್, ಫಾತೊರ್ ನ್ಹಯ್ - ಬಗಾರ್ ಲೋಕ್.
ಲೋಕ್ ಮ್ಹಳ್ಯಾರ್ ಕೊಣ್?
ಹಾಂವ್, ತುಂ ಮ್ಹಜೆಂ ಕುಟಾಮ್ ಆನಿ ತುಜೆಂ
ಕುಟಾಮ್.
ಇತ್ಲೆಂ ಮತಿಂತ್ ದವ್ರುನ್ ಆಮಿಂ ಆಮ್ಚಾ ಘರಾಂತ್ ಪಯ್ಲೆಂ ಆಮಿಂ ಬರಿಂ ಜಾವ್ನ್ ಜಿಯೆಂವ್ಕ್ ಸಕ್ತಾಂವ್ ತರ್, ಆಮ್ಚಾ ಸೆಜಾರಾ ಆಮಿಂ ಬರ್ಯಾನ್ ಜಿಯೆಂವ್ಕ್ ಸಕ್ತಾಂವ್ ತರ್, ಆಮ್ಚಾ ಫಿರ್ಗಜೆಂತ್ ಬರ್ಯಾನ್ ಜಿಯೆಂವ್ಕ್ ಸಕ್ತಾಂವ್ ತರ್, ಬರಿ ಸಮಾಜ್ ಅಪ್ಶೆಂಚ್ ಥಂಯ್ಸರ್ ರುತಾಂ ಜಾತೆಲಿ. ಆಮಿಂ ಪಯ್ಲೆಂ ಬರೆಂ ಚಿಂತಾಪ್ ಚಿಂತ್ಚಿ ಗರ್ಜ್ ಆಸಾ. ಜೆದ್ನಾಂ ಆಮಿಂ ಕಾಳೊಕಾಕ್ ದುರ್ಸಾನಾಸ್ತಾನಾ ವಾತ್ ಧರುಂಕ್ ಮುಖಾರ್ ಆಯ್ಲ್ಯಾಂವ್ ತರ್ ಥಂಯ್ಸರ್ ಅಪಾಪಿಂಚ್ ಜಾಯ್ತೆಂ ಬರೆಂಪಣ್ ಜಾಂವ್ಕ್ ಸಾಧ್ಯ್ ಆಸಾ.
4. ಆಮ್ಚೆ ಚಡ್ತಾವ್ ಮುಖೆಲಿ ಬರಿ ಸಮಾಜ್ ಭಾಂದುನ್ ಹಾಡ್ಚಾಂತ್ ಕಿತ್ಯಾಕ್ ಸಲ್ವಾತಾತ್?
ಬರಿ ಸಮಾಜ್ ಭಾಂದುನ್ ಹಾಡ್ಚೆಂ ಯೋಜನ್ ಹಜಾರ್ ಮೈಲಾಂಚೆಂ ಪಯ್ಣ್ ಜಾವ್ನಾಸಾ, ಆನಿ ತೆಂ ಎಕಾ ಮೆಟಾಂತ್
ಆರಂಬ್ತಾ.
ಆಮ್ಚಾ ಚಡ್ತಾವಾಂಕ್ ಬರಿಂ ಕಾಮಾಂಚಿ ಸುರ್ವಾತ್ ಕರ್ತಾನಾ ಠೀಕಾ ಘೆಂವ್ಕ್ ಕಳಾನಾ ವಾ ಠೀಕಾ ಘೆಂವ್ಚಿ ಶ್ಯಾಥಿ ನಾ, ದೆಖುನ್ ತಾಣಿಂ ಸುರ್ವಾತ್ ಕೆಲ್ಲಿಂ ಕಾಮಾಂ ಥಂಯ್ಂಚ್ ಸೊಡ್ತಾತ್. ಹೆಂ ಸಮಾಜೆಕ್ ಬರೆಂ ನ್ಹಯ್. ಹ್ಯಾ ಸಂಸಾರಾಂತ್ ಬರಿಂ ಕಾಮಾಂ ಕೆಲ್ಲ್ಯಾ ಕೊಣಾಯ್ಕ್ಯ್ ಠೀಕಾ ಮೆಳೊಂಕ್ ನಾ ಮ್ಹಳ್ಳೊ ಮತ್ಲಬ್ ನ್ಹಯ್. ಪುಣ್ ತ್ಯಾ ಠೀಕಾಂಕ್ ಕಶೆಂ ಸ್ವಿಕಾರ್ ಕರುನ್ ಅಪ್ಲೆಂ ಮಿಸಾಂವ್ ಮುಖಾರುನ್ ವರಿಜಾಯ್ ಮ್ಹಳ್ಳೆಂ ತಾಂಕಾಂ ಸಮ್ಜಾಲ್ಲೆಂ ದೆಖುನ್ ತಾಂಚ್ಯಾನ್ ಬರಿಂ ಕಾಮಾಂ ಕರುಂಕ್ ಸಾಧ್ಯ್ ಜಾಲೆಂ ಮ್ಹಳ್ಳೊ ಅರ್ಥ್
ಎಡಿಸನ್ ಪಳೆ, ಲೊಕಾಂನಿ ತಾಕಾ ಕೆಪ್ಪೊ ಮ್ಹಳೆಂ ತರ್ಯ್ ಅಪ್ಲೆಂ ಸಾಧನ್ ಮುಖಾರುನ್ ತೊ ಏಕ್ ವಿಗ್ಯಾನಿ ಜಾಲೊ. ದೆಖುನ್ ತುಂ ಖಂಯ್ಚೆಂಯ್ ಬರೆಂ ಕಾಮ್ ತುಜಾ ಅಂತಸ್ಕರ್ನಾಕ್ ಸರಿ ಜಾವ್ನ್ ಕರ್ತಾಯ್ ತರ್, ಹೆರಾಂಚೆಂ ಗಣ್ಣೆಂ ಕರಿನಾಕಾ, ತುಜೆಂ ಮಿಸಾಂವ್ ಮುಖಾರುನ್ ವರ್. ಆನಿ ಅಶೆಂ ಕರ್ಚೆ ಮುಖೆಲಿ ಕೆದಿಂಕ್ಚ್ ಸಲ್ವಾನಾಂತ್.
5. ಆಜ್ಕಾಲ್ ಗಾಂವಾಂತ್ ಕೊಂಕ್ಣಿ ವಾವ್ರ್ ಕರಿಜಾಯ್ ಆಸ್ಲ್ಲಿಂ ’ಲಿಪಿ’ ಮ್ಹಳ್ಳೆ ದೊರೆ ಉಭಾರುನ್ ಎಕಾಮೆಕಾಚಿಂ ಮಾಸಾಂ ಖಾಂವ್ಕ್ ಲಾಗ್ತಾನಾ ಗಲ್ಫಾಂತ್ ಕೊಂಕ್ಣಿ ವಾವ್ರ್ ಕರ್ಚಾಂನಿ ’ಪೊಯ್ಶ್ಯಾಂಚಾ ಭಳಾನ್ ನಾಂವಾಖಾತಿರ್ ವಾವ್ರ್ ಕರ್ಚೊ’
ಮ್ಹಳ್ಳೊ ಅಪ್ರಾಧ್ ಥಾಪ್ತಾನಾ ತುಕಾ ಕಶೆಂ ಭಗ್ತಾ?
ಪಯ್ಲೆ ಸುವಾತೆರ್ - ಪೊಯ್ಶ್ಯಾಚಾ ಭಳಾನ್ ನಾಂವ್ ಜೊಡ್ಚೆ ಆಮ್ಚೆ ಮಧೆಂ ಜಾಯ್ತೆ ಆಸಾತ್ ಮ್ಹಳ್ಳೆಂ
ಸತ್ ಪುಣ್ ಸಗ್ಳ್ಯಾಂನಿ ತಶೆಂ ಕರ್ಚೆಂ ಮ್ಹಳ್ಳೆಂ ಹಾಂವ್
ಒಪುನ್ ಘೆನಾ. ಕಿತ್ಯಾಕ್ ಮ್ಹಳ್ಯಾರ್ ಸಮಾಜೆಂತ್ ದೋನ್ ಪ್ರಕಾರಾಚೊ ಲೋಕ್ ಜಿಯೆತಾ;
ಪಯ್ಲೊ; ಅಪ್ಲ್ಯಾ ಮತ್ಲಭಾಖಾತಿರ್ ಮಾತ್ರ್ ಸಮಾಜ್ಸೆವೆಚೆಂ
ಕಾಮ್ ಕರ್ತಾ.
ದುಸ್ರೊ; ಸಮಾಜ್ಸೆವೆಚೆಂ
ಕಾಮ್ ಕರ್ಚೊಚ್ ಆಪ್ಲೊ ಮತ್ಲಬ್ ಮ್ಹಳ್ಳ್ಯಾ ಅರ್ಥಾನ್ ಫಕತ್ತ್ ಕಾಮ್ ಕರ್ನ್ ವೆತಾ.
ಆತಾಂ ಹೊ ಆಪ್ರಾದ್ ಥಾಪ್ಲ್ಲೆ ಯಾ ಥಾಪ್ಚೆ ಚಡ್ತಾವ್ ಗಲ್ಫಾಚಿ ಪರಿಗತ್ ನೆಣಾಸ್ಚೆ ನೆಣಾರಿ, ತೆಂ ಚಿಂತಾತ್ ಆಸ್ಯೆತ್ ಹಾಂಗಾಸರ್ ಪೊಯ್ಶ್ಯಾಂಚೆ ರೂಕ್ ಆಸಾತ್ ಆನಿ ತೆ ರೂಕ್ ಹಾಲಯ್ತಚ್ ಪೊಯ್ಶೆ ಪಡ್ತಾತ್. ತಶೆಂ ನ್ಹಯ್, ಹಾಂಗಾಸರ್ ಕಿತ್ಲೆಶ್ಯಾ ಕಶ್ಟಾಂತ್ ಆಸ್ಚೆ ಧಾರಾಳ್ ಮನಿಸ್ ಆಸಾತ್. ಭೊವ್ಶಾ ಡಾ|ಕಿರಣ್ ಬೇಡಿ ಹಾಂಗಾಸರ್ ಆಯ್ಲಿ ತರ್ ಹಾಂಗಾಚಿ ಪರಿಗತ್ ಪಳೆವ್ನ್ ’ಜಯ್ಲ್’ ಮ್ಹಳ್ಳ್ಯಾ ಸಬ್ಧಾಚೊ ಅರ್ಥ್ ಬದ್ಲುಂಕ್ ಆಸಾ. ಕಿತ್ಲೊಸೊ ಲೋಕ್ ಹ್ಯಾ ಗರ್ಮೆಂತ್ ಅಪ್ಲ್ಯಾ ಕುಟ್ಮಾಚಾ ಬರ್ಯಾಪಣಾಪಾಸತ್ ಹಾಂಗಾಸರ್ ವಾವ್ರ್ ಕರುನ್ ಆಸಾತ್. ಹಾಂಕಾಂ
ಎಕ್ಟಾಂವ್ನ್ ಕೊಂಕ್ಣಿ ವಾವ್ರ್ ಕರ್ಚೆಂ ಕಾಮ್ ಖಂಡಿತ್
ಸಲೀಸಾಯೆಚೆಂ ಕಾಮ್
ನ್ಹಯ್.
ಪುಣ್ ಹೊ ಅಪ್ರಾದ್ಯ್ ಆಮಿ ಬರ್ಯಾ ಸ್ಪಿರಿತಾನ್ ಘೆಂವ್ಚೊ ಗರ್ಜೆಚೊ, ಕೊಣ್ಯ್ ಸಾಂಗ್ತಾ ಮ್ಹಣ್ತಚ್ ಗೊಡೊ ಗಾಡಾಂವ್ ಜಾಯ್ನಾ.
5. ಪರ್ಗಾಂವಾಂತ್ ಆಜ್ ಕೊಂಕ್ಣಿಚೆಂ ಬಳ್ವಂತ್ ವಾರೆಂ ವ್ಹಾಳೊಂಕ್ ದಾಯ್ಜಿದುಭಾಯ್ ಸಂಸ್ಥ್ಯಾಚೊ ಮೊಟೊ ಹಾತ್ ಆಸಾ, ಆನಿ ಹಾಚಿ ಸುರ್ವಾತ್ ಕೆಲ್ಲ್ಯಾಂತ್ಲೊ ಎಕ್ಲೊ ಜಾವ್ನ್ ಆಸ್ಚಾ ತುಕಾ ಹ್ಯಾವಿಶಿಂ ಕಿತೆಂ ಭೊಗ್ತಾ?
ಭೋವ್ ಸಂತೊಸ್ ಭೊಗ್ತಾ ಮ್ಹಾಕಾ ಇತ್ಲೊ ವ್ಹಡ್ಲೊ ಮಾನ್ ದಿತಾನಾ. ಪುಣ್ ಫಕತ್ತ್ ದಾಯ್ಜಿದುಭಾಯ್ನ್ ಮಾತ್ರ್ ಹ್ಯಾ ಶ್ರೇಯಾಕ್ ಫಾವೊ ಜಾಲ್ಲೆಂ ಮ್ಹಣ್ ಹಾಂವ್ ಸಾಂಗಾನಾ, ಆಮ್ಚಾ ಭಂವ್ತೊಣಿಂ ಸಭಾರ್ ಹೆರ್ ಸಂಘಟನಾಂ ಆಸಾತ್ ಆನಿ ತಾಂಚೊಯ್ ಖೂಬ್ ವಾವ್ರ್ ಹಾಂತುಂ ಆಸಾ.
ಅಶೆಂ ಮ್ಹಣೊನ್ ಪರ್ಗಾಂವಾಂತ್ ಆಸ್ಚಾ ಸರ್ವ್ ಸಂಘಟನಾಂತ್ ಸಮಾಜ್ ಸೆವಾ ಜಾತಾ ಮ್ಹಣ್ಚೊ ಮ್ಹಜೊ ಇರಾದೊ ನ್ಹಯ್, ಪುಣ್ ಜಾಯ್ಜಯ್ ಮ್ಹಳ್ಳಿ ಆಶಾ. ಜರೀ ತರೀ ಎಕಾ ಸಂಸ್ಥ್ಯಾಚೊ ಎಕ್ಲೊ ಕೊಣ್ಯ್ ಭುಕೆಂತ್, ಪಿಡೆಂತ್ ವಳ್ವಳ್ತೆಲ್ಯಾಚೆ ಕಸ್ಟ್ ಸಮ್ಜೊಂಕ್ ಸಕಾನಾ ತರ್ ತೊ ಖಂಚಾಯ್ ಸಂಸ್ಥ್ಯಾಂತ್ ಆಸೊಂಕ್ ನಾ-ಫಾವೊ ಜಾಲ್ಲೊ ವ್ಯಕ್ತಿ.
ಅನ್ಯೇಕ್ ವಿಷಯ್ - ಆಮ್ಚಾ ಚಡ್ತಾವ್ ಸಂಸ್ಥ್ಯಾಂಚಿ ನದರ್ ವಿಸ್ತಾರ್ ಜಾಂವ್ಚಿ ಗರ್ಜ್ ಆಸಾ. ತಾಂಕಾಂ ಆಪ್ಲ್ಯಾ ಫಿರ್ಗಜೆಭಾಯ್ಲೆಂ ಕಿತೆಂಚ್ ಪಡೊನ್ ವಚೊಂಕ್ ನಾ, ಹೆಂ ಬರೆಂ ನ್ಹಯ್. ಅಶೆಂ ಮ್ಹಣ್ತಾನಾ ದೆ|ಚಾ.ಫ್ರಾಚಾ ಎಕಾ ಉತ್ರಾಚೊ ಉಡಾಸ್ ಯೆತಾ; ’ಕಿಡೊ ಶೆಣಾಂತ್ ಜಿಯೆತಾತ್ ಮ್ಹಣ್ ಕಾಂಯ್ ರೆಡೊ ಶೆಣ್ ಘಾಲ್ಚೆಂ ರಾವಯ್ತಾವೆ?’
ತಶೆಂ ಮ್ಹಣ್ ಅಸಲೆ ಸಂಸ್ಥೆ ಬರಿಂ ಕಾಮಾ ಬಿಲ್ಕುಲ್ ಕರಿನಾಂತ್ ಮ್ಹಣ್ಚೊ ಮ್ಹಜೊ ಇರಾದೊ ನ್ಹಯ್.
6. ತುಂ ಏಕ್ ಮುಖೆಲಿ, ಏಕ್ ಬರವ್ಪಿ, ಏಕ್ ಉಲವ್ಪಿ, ಏಕ್ ನಟ್, ಏಕ್ ಸಮಾಜ್ ಸೆವಕ್ - ಖಂಚೆಂ ತುಕಾ ಚಡ್ ಮಹತ್ವಾಚೆಂ?
ನಟನ್ ಮ್ಹಜೆಂ ಖಾಸ್ ದೆಣೆಂ.
ಹಾಂವ್ ಚಿಂತಾಂ ಉಲವ್ಪಾಚೆಂ ದೆಣೆಂ ಚಡ್ ಮಹತ್ವಾಚೆಂ. ಆಮ್ಚಾ ಸಮಾಜೆಂತ್ ಬರೆ ಉಲವ್ಪಿ ಭೋವ್ ಉಣೆ ಆಸಾತ್.
ಕಿತ್ಯಾಕ್ ಮ್ಹಳ್ಯಾರ್ ಬರೆಂ ಉಲವ್ಣೆಂ ಆಸ್ಲ್ಯಾರ್ ಲೊಕಾಂಕ್ ಏಖ್ ಬರೊ ಇರಾದೊ ಅಪುರ್ಭಾಯೆನ್ ಸಮ್ಜಾವ್ಯೆತ್, ಅಪುರ್ಭಾಯೆಚೊ ಇರಾದೊ ಅತ್ತ್ಯುತ್ತಮ್ ಇರಾದ್ಯಾಪರಿಂ ಸಮ್ಜಾವ್ಯೆತ್.
7. ತುಂ ಕಥೊಲಿಕ್ ಯುವ ಸಂಚಾಲನಾ ಥಾವ್ನ್ ಉದೆಲ್ಲೊ ಮುಖೆಲೊ, ತುಜಾ ಮುಖೇಲ್ಪಣಾಚೆರ್ ಸಿವೈಯಮ್ ಹಾಚೊ ಪ್ರಭಾವ್ ಕಿತ್ಲೊ ಆಸಾ?
ಸತ್ ಸಾಂಗ್ಚೆಂ ತರ್, ಕಥೊಲಿಕ್ ಯುವಸಂಚಾಲನಾಚೊ ಶೆಂಭೊರ್ ಠಕ್ಕೊ ಪ್ರಭಾವ್ ಮ್ಹಜೆರ್ ಆಸಾ. ಮ್ಹಜಾ ಆವಯ್ ಬಾಪಾಯ್ಚಾ ಬೆಸಾಂವಾಸವೆಂ.
ಆಮ್ಚೆ ಚಡ್ತಾವ್ ಮುಖೆಲಿ ’ಸೆವೆಧ್ವಾರಿಂ ಮುಖೇಲ್ಪಣ್’ ಮ್ಹಳ್ಳೊ ಧ್ಯೇಯ್ ’ಮುಖೇಲ್ಪಣಾಧ್ವಾರಿಂ ಸೆವಾ’ ಮ್ಹಣ್ ಅಪಾರ್ಥ್ ಕರ್ನ್ ಘೆತಾತ್. ಹೆಂ ಖರೆಂ ಮುಖೇಲ್ಪಣ್ ನ್ಹಂಯ್.
ಆಮಿಂ ಮೊತಿಂ ಹೊಗ್ಡಾಂವ್ಕ್ ಪುರೊ, ಪುಣ್ ತೆಂ ಮೊತಿಂ ಪಾಟಿಂ ಮೆಳಾತ್.
ಆಮಿಂ ಭಾಂಗಾರ್ ಹೊಗ್ಡಾಂವ್ಕ್ ಪುರೊ, ಪುಣ್ ತೆಂ ಭಾಂಗಾರ್ ಪಾಟಿಂ ಮೆಳಾತ್.
ಪುಣ್ ಆಮ್ಕಾಂ ಆಮ್ಚೆಂ ತರ್ನಾಟ್ಪಣಾಚೆ ದೀಸ್ ವಾಯ್ಟಾಕ್ ಖರ್ಚಿಲೆ ತರ್ ತೆ ಪಾಟಿಂ ಮೆಳ್ಚೆನಾಂತ್.
ದೆಖುನ್ ಹಾಂವ್ ಆತಾಂಚಾ ಸರ್ವ್ ಯುವಜಣಾಂಕ್ ಉಲೊ ದಿತಾಂ, ತುಮ್ಚಾ ಫಿರ್ಗಜೆಂತ್ ಆಸ್ಚಾ ಯುವಸಂಚಾಲನಾಂತ್ ಮೆತೆರ್ ಜಾಂವ್ಕ್.
8. ದೇವ್ ಬರೆಂ ಕರುಂ ಡಯಾನ್ ತುಜಾ ಅಮೊಲಿಕ್ ವೆಳಾಕ್.
ತುಕಾಯ್ ದೇವ್ ಬರೆಂ ಕರುಂ.
ಹ್ಯಾ ಆಧ್ಲೆ ಕಾರ್ಭಾರಿ: 1, 2, 3, 4, 5, 6
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
