ಕವಿತಾकविताPoem
[ಬರವ್ಪಿ...!]
This poem is available in its original Kannada only.
ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಪಿಂತುರಾಚೆರ್ ಪ್ರೇರಣ್ ಜೊಡುನ್ ಕವಿತಾ ಬರಂವ್ಕ್ ’ತಿಂತೆರಾಂತ್ ಪಿಂತುರಾಂ’ ಅಂಕಣಾಕ್ ಭೆಟ್ ದಿ.
ಕೊಂಕ್ಣಿ ಬರವ್ಪಿ...! [- ವಲ್ಲಿ ಕ್ವಾಡ್ರಸ್]
ಮರಣ್...! [- ಕ್ಲೆರೆನ್ಸ್ ಕೈಕಂಬ]
ಆಸಾತ್ಗೀ ಕೊಣೀಂ ಮೊರ್ತೆಲೆ
ಯಾ ಮೊರ್ನಾಚ್ಯೆ ರಿಸ್ಕೆರ್ ಆಸ್ಲೆಲೆ
ಆರ್ ಮಾರ್ಲ್ಲೆ ಯಾ ಪೆಂಕಾಟ್ ಮೊಡೊನ್ ಪಡ್ಲೆಲೆ
ಕೊಂಕ್ಣಿ ಸಾಹಿತ್ಯ್ ರಚುನ್
ಆಳ್ವೊನ್ ವೆಚೆತಸಲೆ?
ಕಾಲ್ಚೊ ಕಾಲ್ ಮಾಂಯ್ಚೊ
ಆಯ್ಚೊ ಸುನೆಚೊ
ಮಾಂಯ್ ಆತಾಂ ಮೊರೊಂಕ್ ತೆಂಕ್ತಾನಾ
ಸುನೆಕ್ ಖಂತ್ ಧುವೆಚಿ
ಆಸಾತ್ಗೀ ಕೊಣೀಂ ಮೊರೊಂಕ್ ತೆಂಕ್ಲ್ಲಿಂ
ಕವಿತಾ ಹಾಂವ್ ಬರಂವ್ಕ್ ಬೊಸ್ಲಾಂ
ಲೇಖನಾಂ ಎದೊಳ್ಚ್ ಆಯ್ತಿಂ ಕೆಲ್ಯಾಂತ್
ಮೆಲ್ಲೆ ತಕ್ಷಣ್ ಖಬಾರ್ ದಿಯಾ
ತುವಾಲೊಯ್ ಆಸಾ
ಸಿಸ್ರಿಚಿಂ ದುಃಖಾಂಯ್ ಆಸಾತ್
ಜೀವ್ ಆಸ್ತಾಂ ಸುಣೆಂಯ್ ಹುಂಗಾನಾ ತರ್ ಕಿತೆಂ
ಮೆಲ್ಲ್ಯಾ ಉಪ್ರಾಂತ್ ಆಸಾಂವ್ ನಿಯೆ?
ಮೊಡೆಂ ನಾಣಂವ್ಕ್, ಸಜಂವ್ಕ್
ಹೊಗ್ಳಿಕ್ ಪಾಚಾರುಂಕ್, ವಡ್ವಿಕ್ ಗಾಂವ್ಕ್
’ಅಮರ್ ಸಾಹಿತಿ’ ಬಿಲ್ಲೆ ದೀಂವ್ಕ್
ತುರೆ ವಿಣುಂಕ್, ಕೀರ್ತನಾಂ ಗಾಂವ್ಕ್
ದೆವಾಚ್ಯಾ ಉಜ್ವ್ಯಾ ಕುಶಿಕ್ ಬಸಂವ್ಕ್
ಕೊಣೀಂ ನಾಂತ್ಗೀ ಕಿತೆಂ?
ನಾಂತ್ ತರ್ ಜೀವ್ ಆಸ್ತಾನಾ ದೊಳೆ ಸೊಡ್ನ್ ಪಳೆಂವ್ಕ್
ಮೊರ್ಚಾ ಕೊಂಕ್ಣಿ ಭಾವಾಕ್
ಏಕ್ ಥೆಂಬೊ ನೀಸ್ ಸೊಡುಂಕ್
ಜೈ ಕೊಂಕಣಿ!
[ಹೆಂ ಕವಿತಾ ಕಟ್ಪುತ್ಳಿ ಬುಕಾಂತ್ ಪರ್ಗಟ್ಲಾಂ]
ಹೆ
ಮನ್ಶಾ...
ಹಾಕಾಚ್ಚ್ ಮ್ಹಣ್ಚೆಂಗೀ
ಮರಣ್ ಮ್ಹಣ್
ಚಿತ್ಳಾ ಬರಿ ಉಡ್ಚೊ
ಮಾಂಕ್ದಾ ಬರಿ ಧಾಂವ್ಚೊ
ವಾಗಾ ಬರಿ ಘರ್ಜೆಂವ್ಚೊ
ಅಸಲ್ಯಾ ಆಶೆನ್ ಪಯ್ಶೆ ಪುಂಜಾಂವ್ಚೊ
ತುಂಚ್ಚ್ ... ತುಂ...
ಎಕಾಚ್ಚ್ಫರಾ..
ಏಕಾಚ್ ಖಿಣಾನ್..
ಪಟ್ಟ್ ಕರುನ್...
ಪುಗ್ಲ್ಲೊ ಪೊಸ್ಕಾಟೊ ಫುಟ್ಚ್ಯಾ ಬರಿ
ನ್ಹಂಯ್
ಮಾತಿಯೆ ಮೊಡ್ಕಿ ಧರ್ಣಿರ್ ಪಡ್ಚ್ಯಾ ತಶೀಯ್
ನ್ಹಂಯ್
ಕುಸ್ಕುಟ್ ಆವಾಜ್ ನಾಸ್ತಾಂ ಫುಟೊನ್ ಗೆಲೊಯ್..
ಸಟ್ಟ್ ಕರುನ್
ವಾರ್ಯಾ ಧುಳಿಂತ್ ವಿಲೀನ್ ಜಾಲೊಯ್
ಪೊಸ್ಕಾಟ್ಯಾ ಕುಡ್ಕೆ ಸಾಂಡಿನಾಸ್ತಾಂ
ಮೊಡ್ಕೆ ಕುಡ್ಕೆ ಉರಯ್ನಾಸ್ತಾಂ
ಪಟ್ಟ್ ಕರುನ್ ಸಾಸ್ಣಾಕ್ ಗೆಲೊಯ್
ಆತಾಂ...
ತುಜೊ ಜೀವ್ ಮಾತ್ ನೆಣಾಂ..
ತುಜೊ ಅತ್ಮೊ ದೆಖ್ತಾ ಕೊಣ್ಣಾ...
ತುಜ್ಯಾ ಖಾಲಿ ಜಿವಾಕ್
ಪಳೆವ್ನ್
ರಡ್ಚಿಂ
ಸಿಸ್ರಿ ದುಖಾಂ ಗಳಂವ್ಚಿಂ
ತುಜಿಂ ಮ್ಹನ್ಶಾಂ...
ತುಜ್ಯಾ ಧಗ್ಲ್ಯಾಕ್
ಸೊಡ್ತಿ ಘಾಲುಂಕ್ ರಾಕೊನ್ ರಾವ್ಲ್ಯಾಂತ್ ..
ಹೆಂ ಕೊಂಕ್ಣೆಚೆಂ ಏಕ್ ದುರ್ಭಾಗ್ಪಣ್ ಮ್ಹಣೊಂಗಿ ವ ಶಿರಾಪ್ ಮ್ಹಣೊಂ ತೆಂ ಕಳಾನಾ. ಆಮ್ಚಾ ಕೊಂಕ್ಣೆಂತ್ ಮಾತ್ ಹೆಂ ವಿಪ್ರೀತ್ ಆಸಾ. ಏಕ್ ವಾಗ್ ಚುಕೊನ್ ಬಾಂಯ್ತ್ ಪಡ್ಲೊ ತರ್ ಸರ್ವಾಂನಿ ಮೆಳೊನ್ ’ಮ್ಹಜೆಂಯ್ ಖೆಲಾಂ.. ಮ್ಹಜೆಂಯ್ ಖೆಲಾಂ’ ಮ್ಹಣ್ ಫಾತೊರ್ ಮಾರ್ಚೆಂ.. ಖೆಲ್ಲೆಂ ಕಿತೆಂ? ಗೊಂಯ್ಟಾಂಯೆ? ಮ್ಹಳ್ಳೆಂ ಫಾತೊರ್ ಮಾರ್ಚಾ ಖುದ್ದ್ ತಾಂಕಾಂಯ್ ಕಳಿತ್ ನಾ. ಆಸೊಂ!! ಹೊಚ್ಚ್ ಆಮ್ಚೊ ಸಂಸಾರ್.
ತೆಚ್ಚ್ಪರಿಂ ಜೀವ್ ಆಸ್ತಾನಾ ಜೀವ್ ಆಸ್ಚಾಂಕ್ ’ಜೀವ್ ಆಸಾಗೀ ಮೆಲಾಗಿ?’ ಮ್ಹಣ್ ಸಯ್ತ್ ಪಳೆಂವ್ಕ್ ಆಮ್ಕಾಂ ಪುರ್ಸತ್ ಖೈಂ ಆಸಾ? ಪುಣ್ ತಿ ನಾತ್ಲ್ಲಿ ಪುರ್ಸತ್ ಖಂಡಿತ್ ಜಾವ್ನ್ ಮೊರ್ತಚ್ ಜಾತಾ. ಸಿಸ್ರಿಚಿಂ ದುಖಾಂ ಗಳಂವ್ಕ್, ಹರ್ದೆಂ ಬಡವ್ನ್ ರುದಾನ್ ಕರುಂಕ್, ಕೊಂಕ್ಣಿ ಮಾಯೆನ್ ಎಕಾ ಪುತಾಕ್ ಸಾಂಡ್ಲೆಂ ಮ್ಹಣ್ ಬೊಬಾಟ್ ಮಾರುಂಕ್. ಪುಣ್ ಮೊರ್ಚಾಧಿಂ ಹೊಚ್ಚ್ ಪೂತ್ ’ಭುತ್’ ಮ್ಹಣ್ ಉಚಾರ್ಲ್ಲೆಂ ಸತ್ ಮಾತ್ ಕೊಂಕ್ಣಿ ಮಾಯೆಶಿವಾಯ್ ಹೆರ್ ಕೊಣ್ ಜಾಣಾಂ?
ಹ್ಯಾ ಹಿಪೊಕ್ರಿತಾಂಚಾ ಸಮಾಜೆಂತ್ ಅಸಲ್ಯಾ ಹಿಪೊಕ್ರೆಸಿಕ್ ಉಗ್ತಾಂವ್ಕ್ ಹಿಂ ದೋನ್ ಕವಿತಾ ಹಾಂಗಾಸರ್ ಪರ್ಗಟ್ ಕೆಲ್ಯಾಂತ್. ಆಸೊಂ! ಆತಾಂ ಆಮಿಂಯ್ ತಿಂ ವಾಚುನ್ ದುಖಾಂ ಪುಸುಂಕ್ ತುವಾಲೆ ವಿಂಚ್ಯಾಂ ಆನಿ ಪಿಯಾವ್ ಪುಣಿಂ ಸೊಧ್ಯಾಂ..
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
More in Daaiz
Send your comments to author on this writing
This is not a comment box. Nothing you write here appears on the site or is shown to any other reader: it is sent to him by email, privately, and he replies to you directly if a reply is called for.