ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ವಿಂಚ್ಣಾರ್ ಮಟ್ವಿಕಾಣಿ: ಜಾಂಬ್ಳಾರುಕಾಚ್ಯಾ ಕಾಟ್ಯಾಚೊ ಏಕ್ ಜುಬ್ಲೆವ್
ವಲ್ಲಿ ಕ್ವಾಡ್ರಸ್
ವಲ್ಲಿ ಕ್ವಾಡ್ರಸ್: ಕೊಂಕ್ಣಿ, ಕಾನಡಿ ಭಾಸೆಂತ್ ಪಾಟ್ಲ್ಯಾ ಪಂಚ್ವೀಸ್ ವರ್ಸಾಂ ಥಾವ್ನ್ ಲಗ್ಬಗ್ ದೊನ್ಶಾಂ ವಯ್ರ್ ಮಟ್ವ್ಯೊ ಕಾಣ್ಯೊ ಬರಯ್ಲ್ಯಾತ್. ಸ್ವತಾಚೆ ತೀನ್ ಬೂಕ್ ’ಆಶಾವಾದಿ’, ’ಖಿಳೊ’, ’ಕಂಗಾಲ್ ಆನಿ ತಾಚಿ ಕುಕ್ಕೆಹಳ್ಳಿ’ ಪರ್ಗಟ್ಲ್ಯಾತ್, ಹೆರಾಂಚಾ ಕಾಣ್ಯಾಂಚೊ ಬೂಕ್ ’ಕುಳ್ವಾರ್ಚೆಂ ದಾಯ್ಜ್’, ’ಸರ್ಗಾವಯ್ಲಿ ಮಾಂಯ್’ ಬುಕಾಂಚೆಂ ಸಂಪಾದನ್ ಕೆಲಾಂ, ಕರ್ನಾಟಕ್ ಕೊಂಕ್ಣಿ ಸಾಹಿತ್ಯ್ ಅಕಾಡೆಮಿಚಾ ಶೆಕ್ಡ್ಯಾಚ್ಯೊ ವಿಂಚ್ಣಾರ್ ಕೊಂಕ್ಣಿ ಮಟ್ವ್ಯೊ ಕಾಣ್ಯೊ ಬುಕಾಚೊ ಸಂಗ್ರಹಕ್ ಜಾವ್ನಾಸಾ. ಕೊಂಕ್ಣಿ ಮಟ್ವ್ಯಾ ಕಾಣ್ಯಾಂಚೆಂ ಅಂಕಣ್ ’ಮುಖಾಂ’ ಚಲವ್ನ್ ವೆಲಾಂ ತಶೆಂಚ್ ಪ್ರಸ್ತುತ್ ಚ್ಯಾರ್ ಅಂಕಣಾಂ, ’ಕಥಾಮೃತ್’, ’ಕಥಾದಾಯ್ಜ್’, ’ಕಥಾಝರ್’, ’ಕಥಾಂಕರ್’ ಚಲವ್ನ್ ವರ್ತಾ. ಮಟ್ವ್ಯಾ ಕಾಣ್ಯಾಂಚೆರ್ ಅಧ್ಯಯನ್ ’ಕಥಾಪಾಠ್’ ಚಲವ್ನ್ ವೆಲಾಂ. ರಾಕ್ಣೊ ಸಾಹಿತಿಕ್ ಸ್ಪರ್ಧ್ಯಾಂತ್ ತೀನ್ ಪಾವ್ಟಿಂ ಇನಾಮಾಂ ಜಿಕ್ಲಾ. ಹಾಚ್ಯೊ ತೀನ್ ಮಟ್ವ್ಯೊ ಕಾಣ್ಯೊ ನಾಟ್ಕುಳೆ ಜಾವ್ನ್ ಖೆಳಯ್ಲ್ಯಾತ್. ಧಾಂವ್ಣಿ (ದೆ|ಜೊರ್ಜಿ ಪೀಂತ್), ಖಣ್ (ಸ್ವ), ಗೂಂಡಾ (ಮೆಲ್ವಿನ್ ಜೆ. ವಾಸ್).
ಹೆರ್ ಕಾಣ್ಯೊ: ಏಕ್ ಕ್ರಿಕೆಟ್ ಹೀರೊ, ಬಾಂಯ್, ಖಣ್, ಕುಡ್ಡೊ, ಜಾಂಬ್ಳಾಂಚೊ ರೂಕ್, ಆಶಾವಾದಿ, ಏಕ್ ಮೊಗಾಚಿ ಕಥಾ, ಸಂಬಂಧ್, ಶನಿ, ಖುರ್ಸಾವಾಟ್, ಕಂಟ್ರಿ ಆವಯ್, ಭಾಂದ್, ಸುಟ್ಕಾ, ಅಜ್ಜಿಕುಂಜ, ಜಿಣ್ಯೆ ಸೂತ್ರ್, ಮಾರ್, ತೆಂ ಆನಿ ಹಾಂವ್, ಅನಾವರಣ್, ಮತಾಂತರ್, ಸೊಲ್ಲೊ, ಜಿಣ್ಯೆ ಸಾಂಗಾತಿ, ಮಾಪ್, ರೆತಿರ್, ಬಂಧಡ್.
ಕುಕ್ಕೆಹಳ್ಳೆಂತ್ ಹಾಚಾಧಿಂ ಅಸಲೆ ಜಾಯ್ತೆ ಜುಬ್ಲೆವ್ ಜಾಲ್ಯಾತ್ ಆನಿ ಹ್ಯಾ ಗಾಂವ್ಚಾ ಬೊಡಾಂನಿ ತೆ ಚೊಯ್ಲ್ಯಾತ್. ಕೊಣಾಚೆಂ ಕಾಜಾರ್ ಜಾವ್ನ್ ಧಾ ವರ್ಸಾಂಚೊ ಜುಬ್ಲೆವ್, ಕೊಣಾಕ್ ಪಂಚ್ವೀಸ್ ವರ್ಸಾಂ, ಕೊಣಾಕ್ ಪಾಂತೀಸ್ ವರ್ಸಾಂಚೊ ಜುಬ್ಲೆವ್. ತಶೆಂಚ್ ಕೊಣಾಕ್ ಜಲ್ಮೊನ್ ಪನ್ನಾಸ್, ಪಂಚ್ವೀಸ್ ವರ್ಸಾಂಚೊ, ಕೊಣಾಕ್ ಪನ್ನಾಸ್ ವರ್ಸಾಂಚೊ ಆನಿ ಕೊಣಾಕ್ ಸಾಟ್, ಸತ್ತರ್ ವರ್ಸಾಂಚೊ ಜುಬ್ಲೆವ್ ತವಳ್ ತವಳ್ ಸಂಸಾರಾಚಾ ಹೆರ್ ಜಾಗ್ಯಾಂನಿ ಜಾಂವ್ಚೆಪರಿಂಚ್ ಕುಕ್ಕೆಹಳ್ಳೆಂತ್ಯ್ ಜಾತಾಲೊ.
ಹೊ ಜುಬ್ಲೆವ್ ಫಕತ್ತ್ ಮನ್ಶಾಂಕ್ ಮಾತ್ರ್ ಲಾಗು ಜಾಂವ್ನ್ ನಾತ್ಲ್ಲೊ, ಕೆದ್ನಾಂ ಮಾರಿಗುಡಿಕ್ ಪಂಚ್ವೀಸ್ ವರ್ಸಾಂ ಭರ್ಲ್ಲೊ ಜುಬ್ಲೆವ್ ತರ್ ಕೆದ್ನಾಂ ಪಳ್ಳೆಕ್ ಧಾ ವರ್ಸಾಂ ಭರ್ಲ್ಲೊ ಜುಬ್ಲೆವ್.. ಕೆದ್ನಾಂ ದಿವ್ಳಾಕ್ ತೀಸ್ ವರ್ಸಾಂ ಭರ್ಲ್ಲ್ಯಾಕ್ ಜುಬ್ಲೆವ್ ತರ್ ಕೆದ್ನಾಂ ಕುಕ್ಕೆಹಳ್ಳೆಚಾ ಇಸ್ಕೊಲಾಕ್ ಪಂಚ್ವೀಸ್ ವರ್ಸಾಂಚೊ ಜುಬ್ಲೆವ್.. ಇತ್ಲೆಂ ಸರ್ವ್ ಭೊಗ್ಲ್ಲ್ಯಾ ಕುಕ್ಕೆಹಳ್ಳೆಚಾ ಪರ್ಜಾಂಕ್ ಆಬ್ಳೆ ಅಥ್ವೊಚ್ ಜುಬ್ಲೆವ್ ಉದೆಲ್ಲೊ.. ಜಾಂಬ್ಳಾರುಕಾಚಾ ಕಾಟ್ಯಾಕ್ ಧಾ ವರ್ಸಾಂ ಭರ್ಲ್ಲೊ ಜುಬ್ಲೆವ್..
ಕೊಣ್ಯ್ ಪಾತ್ಯೆತ್ಗಿ ಹೆಂ! ನರ್ ಮನಿಸ್ ಜಾಲ್ಲೊ ಕುಕ್ಕೆಹಳ್ಳೆಚಿ ಕಾಂಯ್ ಥೊಡಿ ಮಾಹೆತ್ ನಾತ್ಲ್ಲೊ ಖಂಡಿತ್ ಹೆಂ ವೊಪುನ್ ಘೆಂವ್ಕ್ ತಯಾರ್ ನಾ. ತರ್ಯೀ ಹೆಂ ಸತ್.. ಅಪುಟ್ ಸತ್.. ನ್ಹಯ್ ಫಕತ್ತ್ ಮಂತ್ರಿ ಕಾಮಿಲ್ ಕಾಮ್ತಿ ಹೆಂ ಉಚಾರ್ತಾ ಮ್ಹಳ್ಳ್ಯಾಕ್, ಬಗಾರ್ ಹೆಂ ಸತ್ ಮ್ಹಣ್ ರುಜು ಕರ್ಚ್ಯೊ ವಾಟೊಯ್ ಜಾಯ್ತ್ಯೊ ಆಸಾತ್ ದೆಖುನ್..
ಅಜೀಕ್ ಇಕ್ರಾ ವರ್ಸಾಂಧಿಂ ಮಲ್ನಾಡ್ ಥಾವ್ನ್ ಎಲಿಸಾಂವಾಂತ್ ಜಿಕೊನ್ ಆಯಿಲ್ಲೊ ಫುಡಾರಿ ಕಾಮಿಲ್ ಕಾಮ್ತಿನ್ ಪಯ್ಲೆಂ ಕರುಂಕ್ ಚಿಂತ್ಲ್ಲೆಂ ಬರೆಂ ಕಾಮ್ ಮ್ಹಳ್ಯಾರ್ ರಸ್ತೊ ದುರಸ್ತ್ ಕರ್ಚೆಂ. ಕೊಣ್ ಸಾಂಗ್ತಾಲೊ ಬ್ರಿಟಿಶಾಂನಿ ಆಮ್ಚೊ ದೇಸ್ ಸೊಡ್ನ್ ವೆಚಾಕಾಳಾರ್ ಕೆಲ್ಲೊ ರಸ್ತೊ ಅಜೂನ್ ಆಸ್ಲ್ಲೊ. ಮಧೆಂ ಮಧೆಂ ತ್ಯಾ ರಸ್ತ್ಯಾಂನಿ ದರಬಸ್ತ್ ಫೊಂಡ್ ಆಸ್ಲ್ಲೆ. ದಿಸಾಕ್ ಏಕ್ ಬಸ್ಸ್ ಮಲ್ನಾಡ್ ಥಾವ್ನ್ ಕುಕ್ಕೆಹಳ್ಳೆಕ್ ಯೇವ್ನ್ ವೆತಾಲೆಂ. ತಾಚೆ ಶಿವಾಯ್ ಏಕ್ ರಿಕ್ಶಾ ಜಾಂವ್ ಕಾರ್ ಜಾಂವ್ ಆಯ್ಲೆಂ ತರ್ ಭಾರಿ ಅಪ್ರೂಪ್, ತೆಂಯ್ ಕಾಂಯ್ ಪಳ್ಳೆಕ್ ಕೊಣ್ಯ್ ಚೆಡುಂ ಸೊಧುನ್ ಕೊಣ್ ಎಕ್ಲೊ ಮಾಪ್ಳೊ ವ ವ್ಹಡ್ಲ್ಯಾ ಫೆಸ್ತಾಕ್ ಸಯ್ರೊ ಜಾವ್ನ್ ಇಗರ್ಜೆಕ್ ಯೆಂವ್ಚೆ ಪಾದ್ರಿಗಾರ್ ವ ಎಲಿಸಾಂವಾಚಾ ಸಂದರ್ಭಾರ್ ಕಾಂಯ್ ಥೊಡ್ಯೊ
ಗಾಡಿಯೊ ಹೆಣೆ ತೆಣೆಂ ಪಾಶಾರ್ ಜಾತಾಲ್ಯೊ ಸೊಡ್ಲ್ಯಾರ್ ಹ್ಯಾ ರಸ್ತ್ಯಾಂನಿ ಚಡಾವತ್ ಪಾಶಾರ್ ಜಾಂವ್ಚೊ ಬೊಯ್ಲಾ ಗಾಡಿಯೊ ಆನಿ ಥೊಡಿಂ ಸಾಯ್ಕಲಾಂ ಮಾತ್ರ್..
’ಕುಕ್ಕೆಹಳ್ಳೆಕ್ ಬರೊ ಫುಡಾರ್ ಆಸಾ.. ಆನಿ ದೂರ್ದೃಶ್ಟಿ ಆಸ್ಚಾ ಮ್ಹಾಕಾ ತೆಂ ಆತಾಂಚ್ ಕಳ್ತಾ’ ಮ್ಹಳ್ಳೆಂ ಉತಾರ್, ಜೆದ್ನಾಂ ಎಲಿಸಾಂವಾಕ್ ಉಭೊ ರಾವ್ತಾನಾ ಕಾಮಿಲ್ ಕಾಮ್ತಿನ್ ಸಾಂಗ್ಲ್ಲೆಂ ಚಡ್ತಾವಾಂನಿ ಆಯ್ಕಾಲ್ಲೆಂ ತರ್ಯೀ ಕೊಣೆಂಚ್ ಹೆಂ ತಿತ್ಲೆಂ ಮತಿಕ್ ಗೆಲ್ಲೆಂ ನಾ. ಪುಣ್ ಮಲ್ನಾಡ್ ಆನಿ ಕುಕ್ಕೆಹಳ್ಳೆ ಮಧ್ಲೊ ರಸ್ತೊ ದುರಸ್ತ್ ಕರ್ಚೆಂ ಕಾಮ್ ಸುರು ಕರ್ತಾನಾ ಹಳ್ತಾರ್ ಎಕೆಕ್ಲ್ಯಾನ್ಂಚ್ ಕಾಮಿಲ್ ಕಾಮ್ತಿಚೆರ್ ವಿಶ್ವಾಸ್ ದವ್ರುಂಕ್ ಧರ್ಲೆಂ...
ಪುಣ್ ಕುಕ್ಕೆಹಳ್ಳೆಚಾ ಪೆಂಟೆಸಾಲಾಂತ್ ಆಸ್ಚೆ ದೋನ್ ರೂಕ್ - ಏಕ್ ಘೊಟ್ಕಾಚೊ ರೂಕ್ ತರ್ ಅನ್ಯೇಕ್ ಜಾಂಬ್ಳಾಂಚೊ ರೂಕ್ ಸರ್ಕಾರಾಕ್ ಸಮಸ್ಯಾಂಕ್ ಆವ್ಕಾಸ್ ಕರ್ನ್ ದಿತಾಲೊ. ಸತ್ ಸಾಂಗ್ಚೆಂ ತರ್ ಕಾರಾಣಾಂ ಸಭಾರ್ ಆಸ್ಲ್ಲಿಂ - ಘೊಟ್ಕಾ ರುಕಾಚಾ ಸಕ್ಲಾ ಭುತಾಚೊ ಫಾತೊರ್ ಆಸ್ಲ್ಲ್ಯಾನ್ ತವಳ್ ತವಳ್ ಥಂಯ್ಚರ್ ಪುಜಾ ಚಲ್ತಾಲಿ ದೆಖುನ್ ತೊ ರೂಕ್ ಖಾತರ್ಲ್ಯಾರ್ ಆಮ್ಕಾಂ ಅವ್ಮರ್ಯಾದ್ ಮ್ಹಣ್ಚೊ ಥೊಡೊ ಲೋಕ್, ತರ್ ಜಾಂಬ್ಳಾಂಚಾ ರುಕಾಸಕ್ಲಾ ಸಾಂಜೆರ್ ಕಾಂಯ್ ಇಲ್ಲೆಂ ಪಿಟ್ಕ್ ಘೊಟುನ್ ಗಾಂವ್ಚೊ ಖಬ್ರೊ ಮಾರುಂಕ್ ಸಾಂಗ್ಲ್ಲೊ ಜಾಗೊ. ಆಜ್ ಕೊಣ್ ಕೊಣಾಪಾಟ್ಲ್ಯಾನ್ ಗೆಲಾಂ ಕೊಣಾಚೆಂ ಪೋಟ್ ಉಭಾರ್ ಜಾಲಾಂ. ಕೊಣೆಂ ಗರ್ಭ್ ಕಾಡ್ಲಾ. ಕೊಣ್ ಆಜ್ ಆಸ್ಪತ್ರೆಕ್ ಗೆಲಾಂ... ಸಗ್ಳಿ ಖಬಾರ್ ಜಾಂವ್ಚೊ ಜಾಗೊ ಹೊಚ್ಚ್..
ಇತ್ಲೆಂಚ್ ನ್ಹಯ್ ಗಾಂವಾಂತ್ ಪಯ್ಲೆಪಾವ್ಟಿಂ ಪೆಪ್ಸಿ ಆನಿ ಕೊಕಾಕೊಲಾಚೆಂ ಬ್ಯಾನರ್ ಜಾಂಬ್ಳಾಂಚಾ ರುಕಾರ್ ಪಡ್ಲ್ಲೆಂಚ್ ಕುಕ್ಕೆಹಳ್ಳೆಚಿ ಕೀರ್ತ್ ವಿಸ್ತಾರ್ಲ್ಲಿ. ಕಸ್ಲಿಗೀ ನವಿ ಕಳಾ ಕುಕ್ಕೆಹಳ್ಳೆಕ್ ಆಯಿಲ್ಲೆಪರಿಂ ಜಾತಾಲೆಂ. ಹೆಚ್ಚ್ ಸಂದರ್ಭಾರ್ ಗಾಂವ್ಚೆ ಥೊಡೆ ಮಾನಾರ್ ಅಮೆರಿಕಾನ್ ಇರಾಕಾಚೆರ್ ಕೆಲ್ಲ್ಯಾ ಝುಜಾಚೆರ್ ಅಪಾಪ್ಲೆ ವಿಚಾರ್ ಉಚಾರ್ತಾಲೆ. ಕೊಣ್ ಬುಶ್ಶಾಕ್ ಆನಿ ಬೆನಿಟೊ ಮುಸಲೋನಿಕ್ ತುಲನ್ ಕರ್ತಾನಾ ಆನಿ ಕೊಣ್ ಬೊಡಾಂ ವಾಜಪೇಯಿಚಿ ತಕ್ಲಿ ಆನಿ ಸರ್ದಾರ್ ವಲ್ಲಭ ಬಾಯ್ ಪಟೇಲಾಚಾ ತಕ್ಲೆಸವೆಂ ತುಲನ್ ಕರ್ತಾಲೆ ಹೆಚ್ಚ್ ಜಾಗ್ಯಾರ್.. ಆನಿ ಕೊಣಾಚಾ ತರ್ಕಾಂನಿ ಮೊರಾರ್ಜಿ ದೇಸಾಯಿಚಾ ಸಮಾಜ್ವಾದ್ ಆಸ್ತಾಲೆಂ ತರ್ ಆನಿ ಕೊಣ್ ಹಿಟ್ಲರಾಚಾ ತತ್ವಾಂವಿಶಿಂ ಉಲಯ್ತಾಲೆ.. ಸಕ್ಕಡ್ ಹ್ಯಾಚ್ಚ್ ಜಾಂಬ್ಳಾಂಚಾ ರುಕಾಚಾ ಪಂದಾ.
ಸತ್ ಸಾಂಗ್ಚೆಂ ತರ್ ಹೊ ಜಾಂಬ್ಳಾಂಚೊ ರೂಕ್ ಜಲ್ಮೊನ್ ರಾಕ್ಕೊಸಾಪರಿಂ ವ್ಹಾಡೊನ್ ರಾವ್ಲಾ ಮಾತ್ರ್ ಶಿವಾಯ್, ಕಾಂಯ್ ಹಾಂತುಂ ಏಕ್ ಜಾಂಬ್ಳಾಚೆಂ ಪಿಂಪ್ರೆಂ ಕೊಣೆಂಯ್ ಅಜೂನ್ ಪಾಸೊನ್ ದೆಕ್ಲ್ಲೆಂ ನಾ. ತರ್ಯೀ ತೊ ರೂಕ್ ಕುಕ್ಕೆಹಳ್ಳೆಚಾ ಅಸ್ತಿತ್ವಾಚಿ ಕುರುಃ ದೆಖುನ್ ತೊ ಕಾತರ್ಲ್ಯಾರ್ಯ್ ಜಾಂವ್ಚೆಂ ವಿಶೇಷ್ ಬರೆಂಪಣ್ ಕಿತೆಂಚ್ ನಾತ್ಲ್ಲ್ಯಾನ್ ಕಾಮಿಲ್ ಕಾಮ್ತಿನ್ ಎಲಿಸಾಂವ್ ಜಿಕ್ಚಾ ಸಂದರ್ಭಾರ್ ಹ್ಯಾ ರುಕಾಕ್ ಪೊಟ್ಟು ಫಾತ್ರಾಂಚೆಂ ಏಕ್ ಕಾಟೆಂ ಭಾಂದುನ್ ತಾಚೆರ್ ಚುನೊ ಕಾಡಯಿಲ್ಲ್ಯಾನ್ ಆತಾಂ ಗಜಾಲಿ ಕರ್ತೆಲ್ಯಾಂಕ್ ಫೊಣ್ಣ್ ಘಾಲ್ಲೆಪರಿಂ ಜಾಲ್ಲೆಂ.
ಎಕಾ ರಿತಿನ್ ಸಾಂಗ್ಚೆಂ ತರ್ ಕಾಮಿಲ್ ಕಾಮ್ತಿಕ್ ಎಲಿಸಾಂವ್ ಜಿಕೊಂಕ್ ಹೆಂ ಕಾಟೆಂ ಏಕ್ ನ್ಹಯ್ ಎಕಾ ರಿತಿನ್ ಕಾರಾಣ್ ಜಾಲ್ಲೆಂ.. ಆಸೊಂ.. ಹಿ ಪರ್ನಿ ಗಜಾಲ್.. ಅಜೀಕ್ ಪರ್ನಿಂಚ್ ಮ್ಹಣ್ಯೆತಾ. ಕಿತ್ಯಾಕ್ ಹೆಂ ಅಜೀಕ್ ಧಾ ವರ್ಸಾಂಧ್ಲಿ ಗಜಾಲ್. ಆಜ್ ಕಾಮಿಲ್ ಕಾಮ್ತಿನ್ ಜಾಯ್ತೆಂ ನಾಂವ್ ವೆಲಾಂ. ಕುಕ್ಕೆಹಳ್ಳೆಂತ್ ಘರಾಂನಿ ಟಿವಿ ಆಯ್ಲ್ಯಾ, ಪಯ್ಲೆಂ ಮಲ್ನಾಡ್ಚಾ ಕಾಂತಿ ಟಾಕಿಸಾಂತ್ ಲಾಗ್ಲ್ಲೆಂ ಮಲ್ಯಾಳಿ ಸೆಕ್ಸ್ ಪಿಚ್ಚರ್ ಪಳೆಂವ್ಕ್ ಸಾಯ್ಕಲ್ ಗುಡ್ಡಾವ್ನ್ ವಚೊಂಕ್ ಪಡ್ತಾಲೆಂ ಪುಣ್ ಆತಾಂ ಟಿವಿಂನಿ ಪಳೆವ್ಯೆತ್ ಜಾಲ್ಲೆಂ. ಪಯ್ಲೆಂ ರೇಡಿಯೊಚೆರ್ ಅಮೀನ್ ಸಯಾನಿಚೊ ಮಧುರ್ ತಾಳೊ ಮಾತ್ರ್ ಆಯ್ಕೊಂಕ್ ಆಸ್ಲ್ಲೆಂ ತರ್ ಆತಾಂ ಬಿಪಾಶಾಚೆ ಮೊಮ್ಮೆ ಥಾವ್ನ್ ಲಾರಾಚೆ ಕುಲೆ ಕಶೆ ಆಸಾತ್ ಮ್ಹಳ್ಳೆಂ ಗಾಂವ್ಚೆ ಕಾಲ್ಚೆ ಪೊರ್ಚೆ ಪಿಲೆ ಸಯ್ತ್ ಜಾಣಾಂತ್. ಪಯ್ಲೆಂ ಪೆಪ್ಸಿ, ಕೋಕಾ ಕೋಲಾಚಾ ಬ್ಯಾನರಾಂಕ್ ಪಳೆವ್ಯೆತ್ ಮಾತ್ರ್ ಅಸ್ಲ್ಲೆಂ ತರ್ ಆತಾಂ ಕುಕ್ಕೆಹಳ್ಳೆಚಾ ಹರ್ಯೆಕಾ ಹೊಟೆಲಾಂನಿ ಪೆಪ್ಸಿ ಆನಿ ಕೊಕ ಕೊಲಾ ಮೆಳ್ತಾಲೆಂ.
ಹಾಂ ಸಾಂಗೊಂಕ್ ವಿಸರ್ಲೊಂ ನೆ? ಆತಾಂ ಕುಕ್ಕೆಹಳ್ಳೆಂತ್ ದರಬಸ್ತ್ ಹೊಟೆಲಾಂ ಆಸಾತ್, ಮಾಸ್ ಮಾಸ್ಳೆಚಿಂ, ಶಿವಳ್ಳಿ ಬಾಮುಣಾಂಚಿಂ ತಶೆಂಚ್ ಕೊಂಕ್ಣ್ಯಾಂಚಿಂ ಸಯ್ತ್. ಹ್ಯಾ ಸರ್ವಾಂಕ್ ಹೊಟೆಲಾಂ ಮ್ಹಣೊಂಕ್ ಜಾಯ್ನಾಂ ತರ್ಯೀ ಘರ್-ಕಮ್-ಹೊಟೆಲಾಂ, ಥೊಡಿಂ ಗಿಟ್ಕೆ ಭವನ, ಆನಿ ದಿಸಾಚಾ ಫರಾರ್ ಗೋಳಿಬಜೆ, ಪೋಡಿ ವ ಬನ್ಸ್ ಭಾಜ್ಲ್ಲೊ ಪರ್ಮಳ್ ಎಕಾ ಜಾಗ್ಯಾರ್ ತರ್ ಮಾಸ್ಳಿ ಭಾಜ್ಚೊ ಪರ್ಮಳ್ ಅನ್ಯೇಕಾ ಜಾಗ್ಯಾರ್..
ಏಕ್ ದೋನ್ ಬಾರಾಂಯ್ ಉಗ್ತಿಂ ಜಾಲ್ಯಾಂತ್... ಮ್ಹಣ್ತಾನಾ ಕುಕ್ಕೆಹಳ್ಳಿ ಆತಾಂ ಏಕ್ ಹಳ್ಳಿ ಜಾವ್ನ್ ಉರೊಂಕ್ ನಾ.. ಪೆಂಟೆಸಾಲಾಂತ್ ಎಕಾ ಸಾಲಾರ್ ಉಭ್ಯೊ ರಿಕ್ಷಾ. ಆತಾಂ ಜಾಂಬ್ಳಾಂಚಾ ಕಾಟ್ಯಾರ್ ಕೊಣ್ಂಚ್ ಬೊಸಾನಾಂತ್, ಆದ್ಲಿಂ ಸಾಯ್ಕಲಾಂ ಆತಾಂ ಕೊನ್ಶಾಕ್ ಪಡ್ಲ್ಯಾಂತ್. ಪುಣ್ ವರ್ಸಾನ್ ವರಸ್ ತ್ಯಾ ಜಾಂಬ್ಳಾಂಚಾ ಕಾಟ್ಯಾಭಂವಾರಿಂ ಶಬರಿಮಲೆ ಅಯ್ಯಪ್ಪಚೆ ಭಕ್ತ್ ಜಮ್ತಾತ್..
ಧಾ ವರ್ಸಾಂನಿ ಕಿತ್ಲಿ ಬದ್ಲಾವಣ್ ಜಾಲ್ಯಾ?
ಸಾಂಗ್ಲ್ಲೆಪರಿಂ ವಿಸರ್ಲೊಂ - ಕುಕ್ಕೆಹಳ್ಳೆಂತ್ ತೆಂ ಘೊವ್ ಮೆಲ್ಲೆಂ ಕಮಲುನ್ ಘರಾಕ್ ನಳೆ ಘಾಲ್ಯಾತ್.. ಘೊವ್ ಆಸ್ತಾನಾ ಕೊಲು ಮಾತ್ರ್ ಆಸ್ಲ್ಲೊ. ಪುಣ್ ತೊ ಎಕ್ಲ್ಯಾ ದಿವೊರ್ಲ್ಯಾಸವೆಂ ಘಾಟಾಕ್ ಧಾಂವ್ಲ್ಲ್ಯಾ ಉಪ್ರಾಂತ್ ನಳೆ ಪಡ್ಲ್ಯಾತ್.. ತವಳ್ ತವಳ್ ಕಾಮಿಲ್ ಕಾಮ್ತಿಚೆಂ ಕಾರ್ ರಾತಿಚೆಂ ಯೇವ್ನ್ ಥಂಯ್ ರಾವ್ತಾ ಮ್ಹಣ್ ಗಾಂವಾರ್ ಗುಸುಗುಸು.. ಪುಣ್ ಕಮಲುಚಾ ಘರಾಂನಿ ಯೆಂವ್ಚೆ ವೆಚೆ ಉಣೆ ನಾಂತ್ ಮ್ಹಣ್ಚಾಕ್ ಹೊಟೆಲಾಂ-ಬಾರಾಂತ್ ಕಾಮ್ ಕರ್ಚೆಚ್ ಗೊವಾಯ್ ದಿತಾತ್..
ಆಯ್ಲೆವಾರ್ ನೆಪಾಲಾಥಾವ್ನ್ ಆಪ್ಲ್ಯಾ ಮೌಶೆಚ್ಯೊ ದೊಗಿ ಧುವೊ ಆಯ್ಲ್ಯಾತ್ ಮ್ಹಣ್ ಕಮಲು ಕೊಣಾಲಾಗಿಂಗೀ ಸಾಂಗ್ತಾಲೆಂ ಖೈಂ. ಹ್ಯಾ ಗಾಂವ್ಚಾ ಬಾಯ್ಲಾಂಕ್ಯ್ ಅಧಿಕಪ್ರಸಂಗ ಇಲ್ಲೆಂ ಚಡ್ಚ್. ತೆಂ ಕೊಣ್ಗೊ? ಕಿತ್ಯಾಕ್ ತುಮ್ಘೆರ್ ರಾವ್ತಾಗೊ? ತೆ ಕೊಣ್ಗೊ ತಾಂಕಾಂ ಮೆಳೊಂಕ್ ಯೆತಾತ್? ತಿಂ ಕಾಜಾರಿಂಗೊ? ನಾಂ ಜಾಲ್ಯಾರ್ ಹ್ಯಾ ಮಿಸಾಕ್ ವೆಚಾ ಬಾಯ್ಲಾಂಕ್ ಕಿತ್ಯಾಕ್ ಹೆ ಜಕ್ಕೆ ಮ್ಹಣ್ ತುಮಿಂಚ್ ಸಾಂಗಾ?
ಪುಣ್ ಕಮಲು ಮಾತ್ರ್ ದಿಸಾನ್ದೀಸ್ ವ್ಹಾಡೊನ್ ವೆತಾಲೆಂ. ಗಾಂವಾಂತ್ ಕಾಂಯ್ ವಡ್ಲ್ಯಾಂಚಿ ಪಂಚೇತ್ಗಿ ಆಸ್ಲ್ಯಾರ್ ತಿ ಜಾಂವ್ಚಿ ಕಮಲುಗೆರ್ಚ್. ಆನಿ ಹ್ಯಾ ಜಾಂಬ್ಳಾರುಕಾನ್ ಮೌನ್ಪಣಾಂತ್ ತರ್ಯೀ ಜಾಯ್ತೆಂ ಆಯ್ಕಲಾಂ, ಪಳೆಲಾಂ. ತರ್ಯೀ ತವಳ್ ತವಳ್ ಅಪ್ಲೆ ಫಾಂಟೆ ಹಾಲವ್ನ್ ತೊ ರೂಕ್ ಉಲಂವ್ಕ್ ಧರ್ತಾನಾ ಆಯ್ಕತೆಲಿಂ ತರ್ಯೀ ಕೊಣ್??
ಕಾಟ್ಯಾಕ್ ಧಾ ವರ್ಸಾಂ ಭರ್ಲ್ಲೆಂ ಕಾಮಿಲ್ ಕಾಮ್ತಿಕ್ ಭಾಜ್ಲ್ಲೆಂ ಮೆಳ್ಲ್ಲೆಪರಿಂ ಜಾಲ್ಲೆಂ. ಕಿತ್ಯಾಕ್ ಮ್ಹಳ್ಯಾರ್ ವೆಗಿಂಚ್ ಎಲಿಸಾಂವ್ ಆಸ್ಲ್ಲೆಂ. ತ್ಯಾ ಭಾಯ್ರ್ ಆಜ್ಕಾಲ್ ಟಿವಿ ಮಾಧ್ಯಮಾಂ ಯೇವ್ನ್ ಲೋಕ್ ಚಡಿತ್ ಜಾಣಾಂ ಜಾಂವ್ಕ್ ಲಾಗ್ತಾನಾ, ಹ್ಯಾ ಪಾವ್ಟಿಂ ಮಲ್ನಾಡ್ಚೊ ಎಕ್ಲೊ ದಾಕ್ತೆರ್ ಕಾಮಿಲ್ ಕಾಮ್ತಿಚಾ ವಿರೋದ್ ಎಲಿಸಾಂವಾಕ್ ರಾಂವ್ಚಾರ್ ಆಸಾ ಮ್ಹಳ್ಳಿ ಖಬಾರ್ ತಾಚ್ಯಾಯ್ ಕಾನಾಂಕ್ ಪಡ್ಲ್ಲ್ಯಾನ್ ಅಪ್ಲೆಂ ಥಳ್ ಘಟ್ ಕರುಂಕ್ ಕಾಮಿಲ್ ಕಾಮ್ತಿನ್ ಜಾಯ್ತೊ ಆಟೊವ್ ಘಾಲ್ಲೊ..
ತೊ ಜಾಣಾಂ ಮಲ್ನಾಡ್ಚಾ ಭಂವ್ತೊಣಿಂ ಆಸ್ಚೊ ಚಡ್ ಲೋಕ್ ಕುಕೆಹಳ್ಳೆಚೊ ಮ್ಹಳ್ಳೆಂ. ದೆಖುನ್ ತಾಣೆಂ ಹ್ಯಾ ಕಾಟ್ಯಾಚಾ ಧಾ ವರ್ಸಾಂಚೊ ಜುಬ್ಲೆವ್ ಗಡ್ದಾಯೆನ್ ಆಚರಣ್ ಕರುಂಕ್ ಯೆವ್ಜಿಲ್ಲೆಂ. ತಶೆಂಚ್ ತಾಕಾ ಪೊಸ್ಚೆಂ ಥೊಡೆ ಪತ್ರ್ಕರ್ತ್. ತಾಂಚಿಂ ಕಾಮಾಂ ಫಕತ್ ಕಾಮಿಲ್ ಕಾಮ್ತಿಚಾ ಕಾಮಾಂಕ್ ಹೊಗ್ಳಿಕ್ ದಿಂವ್ಚೆಂ. ತ್ಯಾ ಖಾತಿರ್ ತಾಂಕಾಂಯ್ ಜಾಯ್ ಆಸ್ಚೆಂ ಸಗ್ಳೆಂ ಮೆಳ್ತಾಲೆಂ.. ಸೊರೊ, ಪೊಯ್ಶೆ, ಚೆಡ್ವಾಂ...... ಕಾಮಿಲ್ ಕಾಮ್ತಿಚೆಂ ರಾಜ್ ವೆವಸ್ತಿತ್ ಥರಾನ್ ಚಲ್ತಾಲೆಂ..
ಆವಾಜ್ ಉಟಯಿಲ್ಲ್ಯಾಂಚೆಂ ಅಸ್ತಿತ್ವ್ ನಪಂಯ್ಚ್ ಕರ್ಚಿಂ ವಿಧಾನಾಂಯ್ ಕಾಮಿಲ್ ಕಾಮ್ತಿನ್ ಸೊಧ್ಲ್ಲಿಂ. ಗರ್ಜ್ ಪಡ್ತಾನಾ ಅಪ್ಲೊ ರಂಗ್ ಬದ್ಲುಂಚಿ ವಿಧ್ಯಾ ಬರ್ಯಾನ್ ಜಾಣಾ ಆಸ್ಚೊ ಕಾಮಿಲ್ ಕಾಮ್ತಿ ಉಲಂವ್ಣ್ಯಾಂತ್ ಸುಭಾಗಿ ದೆಖುನ್ ಚಡ್ತಾವ್ ಲೋಕ್ ತಾಕಾ ಫಕತ್ತ್ ಆಯ್ಕತಾಲೊ..
ಪುಣ್ ಹೊ ಜುಬ್ಲೆವ್ ಸಾದೊ ಜುಬ್ಲೆವ್ ನ್ಹಯ್ ಆಸ್ಲ್ಲೊ. ಮಲ್ನಾಡ್ ಥಾವ್ನ್ ಕುಕ್ಕೆಹಳ್ಳೆ ಪರ್ಯಾಂತ್ ಹರ್ಯೆಕಾ ಕರೆಂಟಾಚಾ ಖಾಂಬ್ಯಾಂನಿ ಪೊಸ್ಟರಾಂ, ಬ್ಯಾನರಾಂ ಎದೊಳ್ಚ್ ಘಾಲ್ಲಿಂ. ತವಳ್ ತವಳ್ ಪತ್ರಾಂನಿ, ಟಿವಿಂನಿ ಹ್ಯಾ ಜುಬ್ಲೆವಾಚಾ ಮಹತ್ವಾವಿಶಿಂ ಪರ್ಗಟ್ತಾಲೆ/ಪ್ರಚಾರ್ ಕರ್ತಾಲೆ. ದೋನ್ ಜಯ್ತಾಕಾರಾಚಿಂ ತೋರ್ಣಾಂ ಭಾಂದ್ಲ್ಲಿಂ ತಶೆಂಚ್ ಸುಂರ್ಗಾರಾಂವ್ಚೆಂ ಕಾಮ್ ಚಾಲು ಆಸ್ಲ್ಲೆಂ.
ಆಯ್ಲೆವಾರ್ ಎಕಾ ಟಿವಿಂನಿ ಕಾಮಿಲ್ ಕಾಮ್ತಿಚೆಂ ಸಂದರ್ಶನ್ ಘೆತ್ಲೆಂ ಆನಿ
ತಾಂತುಂ ಕಾಮಿಲ್ ಕಾಮ್ತಿ ವ್ಹಡಾ ಸಂತೊಸಾನ್ ಸಾಂಗ್ತಾ;
"ಅಜೀಕ್ ಧಾ ವರ್ಸಾಂಧ್ಲಿ ಪರಿಗತ್ ಅಥ್ವಿಚ್ ಆಸ್ಲ್ಲಿ. ಪುಣ್ ಆಜ್ ಕುಕ್ಕೆಹಳ್ಳೆಂತ್ ಕಿತೆಂ ನಾ? ಎಕುಣ್ಸಾಟ್ ಘರಾಂನಿ ನಳೆ ಘಾಲ್ಯಾತ್, ಅಟ್ರಾ ಘರಾಂನಿ ಟೆರೆಸಾಚಿಂ ಘರಾಂ ಭಾಂದ್ಲ್ಯಾಂತ್, ಆಮ್ಚಾ ಗಾಂವಾಂರ್ ಆತಾಂ ಘರಾಂ ಘರಾಂನಿ ಮೊಗ್ರಿಂ ಫುಲ್ತಾತ್, ಘರಾಂನಿ ಟಿವಿ ಆಯ್ಲ್ಯಾ, ಲೊಕಾಂಕ್ ಭಂವೊಂಕ್ ರಿಕ್ಶಾ ಆಸಾತ್, ಕರೆಂಟ್ ಆಯ್ಲಾಂ. ಕುಕ್ಕೆಹಳ್ಳೆಂತ್ ಎಕ್ಲೊಯ್ ಡಾಕ್ಟರ್ ನಾತ್ಲ್ಲೊ. ಪುಣ್ ಆಜ್ ತೇಗ್ ಆಸಾತ್. ಹಾಂವ್ ಜಾಣಾಂ ಹೆಂ ಸರ್ವ್ ಫಕತ್ತ್ ತ್ಯಾ ಜಾಂಬ್ಳಾಂಚಾ ರುಕಾಚೆಂ ಕಾಟೆಂ ಭಾಂದ್ಲ್ಲ್ಯಾಚೊ ಫಳ್..
ಆದಿಂ ಕೊಲೆಜಿಚೆಂ ಶಿಕಾಪ್ ಶಿಕ್ಚ್ಯಾಕ್ ಫಕತ್ತ್ ಮಲ್ನಾಡ್
ಮಾತ್ರ್ ಆಸ್ಲ್ಲಿ ತರ್ ಆಜ್ ಕುಕ್ಕೆಹಳ್ಳೆಂತ್ಲಿಂ ಚೊವ್ಗಾಂ ಅಮೆರಿಕಾಂತ್ ಶಿಕ್ತಾತ್..
ತೆಂ ಕಾಟೆಂ ಭಾಂದ್ಲ್ಲೆಂಚ್ ಗಾಂವ್ಚಿ ನಕ್ಶಾ ಪಳೆ ಬದಲ್ಲಿ.. ವರ್ಸಾನ್ ವರಸ್ ಪಾವ್ಸ್ ಯೆತಾ, ಕುಕ್ಕೆಹಳ್ಳೆಂತ್ ಆಂಬೆ, ಪೊಣೊಸ್, ಪೆರಾಂ, ಅಣ್ಸಾಂ, ಕಾಜು, ನಾರ್ಲ್, ಪೊಪ್ಳಾಂ ದರಬಸ್ತ್ ಜಾತಾತ್. ತ್ಯಾ ಶಿವಾಯ್ ಆತಾಂ ಮಲ್ಬಾರ್ಚೆ ಮಲ್ಯಾಳಿ ಯೇವ್ನ್ ಕೋಕೊ, ರಬ್ಬರಾಂ ಲಾವ್ನ್ ಜಾಗ್ಯಾಚಿ ವೃದ್ದಿ ಕರುನ್ ಆಸಾತ್.. ಸತ್ ಸಾಂಗ್ತಾಂ ಕಾಟೆಂ ಭಾಂದ್ಚಾಧಿಂ ಆಮ್ಚಾ ಗಾಂವಾಂತ್
ಲಗ್ಭಗ್ ಸತ್ತರ್ ಕೊಲ್ವಾಚಿಂ ಘರಾಂ ಆಸ್ಲ್ಲಿಂ ಪುಣ್ ಆತಾಂ ಕೊಲ್ವಾಚಿಂ ಘರಾಂ ಬೊಟಾಂನಿ ಮೆಜ್ಯೆತಾ." ಕಾಮಿಲ್ ಕಾಮ್ತಿ ಉಲಯ್ತಚ್ ಆಸ್ಲ್ಲೊ..
"ಗಾಂವಾಕ್ ಉದ್ದಾರ್ ಕೆಲಾಂ ಮ್ಹಣ್ಚಾ ಕಾಟ್ಯಾನ್ ಗಾಂವಾಕ್ ಇತ್ಲೆಂ ದಿಲಾಂ ಪುಣ್ ತ್ಯಾ ರುಕಾಂನಿ ಏಕ್ ಜಾಂಬಳ್ ಜಾಲ್ಲೆಂ ನಾಮೂ?" ಮಧೆಂಚ್ ಸಂದರ್ಶಕಾನ್ ಸವಾಲ್ ಕೆಲೆಂ.
ಕಾಮಿಲ್ ಕಾಮ್ತಿ ಸುಮಾರ್ ವೇಳ್ ಚಿಂತುನ್ ಉಲಯ್ಲೊ "ಪಳೆಯಾ, ಖಂಯ್ಚೀಯ್ ವಾತ್ ಆಪ್ಣಾಖಾತಿರ್ ಪೆಟಾನಾ, ಖಂಯ್ಚೇಂಯ್ ಫುಲ್ ಆಪ್ಣಾಖಾತಿರ್ ಫುಲಾನಾ, ತೆಚ್ಚ್ ಪರಿಂ ಹ್ಯಾ ಖಾಟ್ಯಾನ್ ಅಪಾಣಾಖಾತಿರ್ ಕಿತೆಂಚ್ ದವರಿನಾಸ್ತಾಂ ಗಾಂವಾಕ್ ದಿಲಾಂ". ಹೆಂ ಸರ್ವ್ ಹ್ಯಾ ಧಾ ವರ್ಸಾಂನಿ ಜಾಲಾಂ.. ಫಕತ್ತ್ ಧಾ ವರ್ಸಾಂನಿ... ಕಾಮಿಲ್ ಕಾಮ್ತಿ ಉಲವ್ನ್ಂಚ್ ವೆತಾಲೊ..
ಕುಕ್ಕೆಹಳ್ಳೆಚಾ ಎಕಾ ಹೊಟ್ಲಾಂತ್ ಟಿವಿ ಆಸ್ಲ್ಲಿ. ಸಭಾರ್ ಲೋಕ್ ಹೆಂ ಸಂದರ್ಶನ್ ಆಯ್ಕಾತಾಸ್ತಾನಾ ಪಾಟ್ಲ್ಯಾನ್ ಕೊಣ್ಗೀ ಉದ್ಘಾರ್ತಾಲೊ "ಧಾ ವರ್ಸಾಧಿಂ ಆಮ್ಚಾ ಘರ್ಚಿ ಗಾಯ್ ಪೊಟ್ಟು ಬಾಂಯ್ತ್ ಪಡೊನ್ ಮೆಲ್ಲಿ"
ಸಗ್ಳೆ ಕಾನ್ ದೊಳೆ ಸೊಡ್ನ್ ಟಿವಿಕ್ ಪಳೆಂವ್ಚಾರ್ ಪಡ್ಲ್ಲೆ...
************
[2006 ಇಸ್ವೆಚ್ಯಾ ಜುಲಾಯ್ ಮಯ್ನ್ಯಾಂತ್ ’ಆಮ್ಚೊ ಯುವಕ್’ ಪತ್ರಾಚೆರ್ ಮೆಲ್ವಿನ್ ಪೆರ್ನಾಲಾನ್ ಪರ್ಗಟ್ಲ್ಲಿ ಕಾಣಿ]
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
