ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ವಿಂಚ್ಣಾರ್ ಮಟ್ವಿಕಾಣಿ: ಶನಿ
ವಲ್ಲಿ ಕ್ವಾಡ್ರಸ್
ವಲ್ಲಿ ಕ್ವಾಡ್ರಸ್: ಕೊಂಕ್ಣಿ, ಕಾನಡಿ ಭಾಸೆಂತ್ ಪಾಟ್ಲ್ಯಾ ಪಂಚ್ವೀಸ್ ವರ್ಸಾಂ ಥಾವ್ನ್ ಲಗ್ಬಗ್ ದೊನ್ಶಾಂ ವಯ್ರ್ ಮಟ್ವ್ಯೊ ಕಾಣ್ಯೊ ಬರಯ್ಲ್ಯಾತ್. ಸ್ವತಾಚೆ ತೀನ್ ಬೂಕ್ ’ಆಶಾವಾದಿ’, ’ಖಿಳೊ’, ’ಕಂಗಾಲ್ ಆನಿ ತಾಚಿ ಕುಕ್ಕೆಹಳ್ಳಿ’ ಪರ್ಗಟ್ಲ್ಯಾತ್, ಹೆರಾಂಚಾ ಕಾಣ್ಯಾಂಚೊ ಬೂಕ್ ’ಕುಳ್ವಾರ್ಚೆಂ ದಾಯ್ಜ್’, ’ಸರ್ಗಾವಯ್ಲಿ ಮಾಂಯ್’ ಬುಕಾಂಚೆಂ ಸಂಪಾದನ್ ಕೆಲಾಂ, ಕರ್ನಾಟಕ್ ಕೊಂಕ್ಣಿ ಸಾಹಿತ್ಯ್ ಅಕಾಡೆಮಿಚಾ ಶೆಕ್ಡ್ಯಾಚ್ಯೊ ವಿಂಚ್ಣಾರ್ ಕೊಂಕ್ಣಿ ಮಟ್ವ್ಯೊ ಕಾಣ್ಯೊ ಬುಕಾಚೊ ಸಂಗ್ರಹಕ್ ಜಾವ್ನಾಸಾ. ಕೊಂಕ್ಣಿ ಮಟ್ವ್ಯಾ ಕಾಣ್ಯಾಂಚೆಂ ಅಂಕಣ್ ’ಮುಖಾಂ’ ಚಲವ್ನ್ ವೆಲಾಂ ತಶೆಂಚ್ ಪ್ರಸ್ತುತ್ ಚ್ಯಾರ್ ಅಂಕಣಾಂ, ’ಕಥಾಮೃತ್’, ’ಕಥಾದಾಯ್ಜ್’, ’ಕಥಾಝರ್’, ’ಕಥಾಂಕರ್’ ಚಲವ್ನ್ ವರ್ತಾ. ಮಟ್ವ್ಯಾ ಕಾಣ್ಯಾಂಚೆರ್ ಅಧ್ಯಯನ್ ’ಕಥಾಪಾಠ್’ ಚಲವ್ನ್ ವೆಲಾಂ. ರಾಕ್ಣೊ ಸಾಹಿತಿಕ್ ಸ್ಪರ್ಧ್ಯಾಂತ್ ತೀನ್ ಪಾವ್ಟಿಂ ಇನಾಮಾಂ ಜಿಕ್ಲಾ. ಹಾಚ್ಯೊ ತೀನ್ ಮಟ್ವ್ಯೊ ಕಾಣ್ಯೊ ನಾಟ್ಕುಳೆ ಜಾವ್ನ್ ಖೆಳಯ್ಲ್ಯಾತ್. ಧಾಂವ್ಣಿ (ದೆ|ಜೊರ್ಜಿ ಪೀಂತ್, ಆಯ್ಕೊಳ್), ಖಣ್ (ವಲ್ಲಿ ಕ್ವಾಡ್ರಸ್), ಗೂಂಡಾ (ಮೆಲ್ವಿನ್ ಜೆ. ವಾಸ್).
ಹೆರ್ ಕಾಣ್ಯೊ: ಏಕ್ ಕ್ರಿಕೆಟ್ ಹೀರೊ, ಬಾಂಯ್, ಖಣ್, ಕುಡ್ಡೊ, ಜಾಂಬ್ಳಾಂಚೊ ರೂಕ್, ಆಶಾವಾದಿ, ಏಕ್ ಮೊಗಾಚಿ ಕಥಾ, ಸಂಬಂಧ್.
"ಟ್ರಣ್...."
ಮ್ಹಜ್ಯಾ ಬಾಯ್ಲೆನ್ ಆಪ್ಲ್ಯಾ ಮಧುರ್ ತಾಳ್ಯಾನ್ ಲಾಂಭಾಯೆಚೊ ಬಾಂಗ್ ಸುರು ಕೆಲ್ಲೊಚ್ಚ್ ಮ್ಹಾಕಾ ವೆಂಗ್ಲ್ಲಿ ನಿದೆದೇವಿ ಎಕಾಚ್ಚ್ಫರಾಂ ಮ್ಹಾಕಾ ಸೊಡ್ನ್ ಧಾಂವ್ಲಿ. ಹರ್ಶೆಂಚ್ಯಾಕೀ ಚಡ್ ಕ್ರೂರ್ ಆನಿ ಲಾಂಬ್ ಜಾವ್ನಾಸ್ಲ್ಲಿ ತಿ ಬೋಬ್.
ಪಾಟ್ಲ್ಯಾ ಚಡುಣೆ ಚಾಳೀಸ್ ದಿಸಾಂನಿ ಹೆ ಭಾಂದ್ಪಾಸ್ ನಾತ್ಲ್ಲೆ. ಚಾಳಿಸ್ ದಿಸಾಂಚಿ ರಜಾ ಕಾಭಾರ್ ಕರ್ನ್ ಆಪ್ಲ್ಯಾ ಕುಡಾಕ್ ಕಾಲ್ಚ್ ರಾತಿಂ ಪಾವ್ಲ್ಲೊಂ. ಪರತ್ ತೆಂಚ್ ಕೂಡ್, ತಿಚ್ಚ್ ಖಾಟ್, ತಿಚ್ಚ್ ಗಜ್ಡಿ ಆನಿ ತಿಚ್ಚ್ ಬಾಯ್ಲ್; ಅಪ್ಲೆಂ ಎಲರಾಮಾಚೆಂ ಘಡಿಯಾಳ್.
ದೊಳೆ ಘಸ್ಟುನ್ ಏಕ್ ಪಾವ್ಟಿಂ, ಗಾದ್ಯಾಂತ್ಲೊ ಹಾಫ್ತ್ಯಾದ್ಲೊ ಸೊರ್ಮುಣ್ ಪಾಲ್ವೊನ್ ತಾಂತ್ಲೊ ಧುಂವರ್ ಯೆಂವ್ಚ್ಯಾಪರಿಂ ಮ್ಹಜಿ ಬಾಯ್ಲ್ ಮ್ಹಜೆರ್ ಅಪ್ಲಿ ಗಿದಾಳ್ ನದರ್ ಘಾಲ್ತಾಲಿ.
ಆಯ್ಚ್ಯಾನ್ ಆಪ್ಣಾಕ್ ಹೆಂ ಸದಾಂಚೆಂ, ಉಟ್ಚೆಂ, ತೋಂಡ್ ಧುಂವ್ಚೆಂ, ಖಾಡ್-ಮಿಶಿಯೊ ಕಾಡ್ಚ್ಯೊ, ದಾಂತ್ ಘಾಸ್ಚೆಂ, ಭಾಯ್ರ್ ವಚೊನ್ ಡಾಯ್ರಿ ಥಾವ್ನ್ ದೂದ್ ಹಾಡ್ಚೆಂ, ಚಾ ಕರ್ಚಿ, ಕುಡಾಚ್ಯಾ ದಾರಾರ್ ಉಮ್ಕಾಳ್ಚಾ ಫುಲಾಂಚೊ ಕಾಟ್ ಹಾಡ್ನ್ ಆಲ್ತಾರೆಕ್ ಘಾಲ್ಚೊ, ಆನಿ ಪೆಪರಾಚೆರ್ ಎಕೊಡಿ ದೀಷ್ಟ್ ಘಾಲುನ್ ಸದಾಂಚಿ ತಯಾರಾಯ್. ಹೆಂ ಸರ್ವ್ ಕರುಂಕ್ ಎಕಾ ಮತಿಚಿ ಗರ್ಜ್ ನಾತ್ಲ್ಲಿ. ಪಾಟ್ಲ್ಯಾ ಸಭಾರ್ ವರ್ಸಾಂ ಥಾವ್ನ್ ಹೆಂ ಯಾಂತ್ರಿಕ್ ರಿತಿನ್ ಘಡೊನ್ ಆಸಾ ಮ್ಹಜ್ಯಾ ಜಿಣ್ಯೆಂತ್.
ಹಾಂವ್ ಹೊಕ್ಲೆಸವೆಂ ರೊಸಾಕ್ ಬೊಸೊಂಕ್ ಸುಡ್ಸುಡ್ಚ್ಯಾ ದೆಡಿಯಾಂಪರಿಂ ಸುಡ್ಸುಡಾಯೆನ್ ನ್ಹಾಣಿಯೆಕ್ ರಿಗ್ಲೊಂ. ಲಾಂಬಾಯೆಚಿ ಏಕ್ ಜಾಂಬಾಯ್ ಕಾಡ್ನ್. ನ್ಹಾಣ್ಯೆ ಭಿತರ್ ಭಾಗೊನ್ ಪೋಟ್ ಪಾಟಿಕ್ ಲಾಗ್ಲ್ಲ್ಯಾ ಹಾಡ್ಕುಟೆಂ ಜಾಲ್ಲ್ಯಾ ಕೊಲ್ಗ್ಯಾಚೊ ಪಾನೊ ತಾಚ್ಯಾ ಪಿಲಾಂನಿ ಚಿಂವ್ಚೆಪರಿಂ, ಭಾಗ್ಲ್ಲ್ಯಾ ಆಪ್ಲ್ಯಾ ಟೂತ್ ಪೇಸ್ಟಾಕ್ ಪಿಳುಂಕ್ ಲಾಗ್ಲೊಂ. ಬ್ರಶ್ ತೊಂಡಾರ್ ಘಾಲ್ನ್, ಹಳ್ತಾರ್ ಅಪ್ಲೆಂ ಸದಾಂಚೆಂ ಎಫ್.ಎಮ್ ಮ್ಯೂಜಿಕ್ ಚಾಲು ಕರ್ನ್ ಕಶಿಯೀ ನ್ಹಾಣ್ ಮುಗ್ದಿಲಿ.
ಸುರ್ಯಾಚಿಂ ಕಿರ್ಣಾಂ ಎದೊಳ್ಚ್ ಹೊಕಾಲ್ ಜಾಲ್ಲ್ಯಾ ಆಪ್ಲ್ಯಾ ಕುಡಾಭಿತರ್ ಸಯ್ರ್ಯಾಂ ಪರಿಂ ಆಯ್ತಿಂ ಜಾವ್ನ್ ಆಪ್ಣಾಕ್ ರಾಕ್ತಾಲಿಂ. ಅಪ್ಲಿ ದೀಷ್ಟ್ ಕುಡಾಭಿತರ್ ಹಾಂವೆಂ ಘುಂವ್ಡಾಯ್ಲಿ. ದಾಂಡಿಯೆಚೆರ್ ಎದೊಳ್ಚ್ ಚಿಡ್ಡೊನ್ ಮುಡ್ಡೊನ್ ಪಡ್ಲ್ಲಿಂ ಅಪ್ಲಿಂ ಮ್ಹೆಳಿಂ ವಸ್ತುರಾಂ ಕರೆಜ್ಮಾಂತ್ ಕುಮ್ಸಾರ್ ಜಾಂವ್ಕ್ ತಯಾರ್ ರಾವ್ಲ್ಲ್ಯಾ ಪಾತ್ಕ್ಯಾಂಪರಿಂ ರಾಕ್ತಾಲಿಂ; ನಿತಳ್ ಜಾಂವ್ಕ್. ಅನ್ಯೇಕಾ ಕುಶಿನ್ ಸುಕ್ಯಾ ತಾಟ್ಯಾಪರಿಂ ಸುಕೊನ್ ರಾಕ್ಚಿಂ ವಸ್ತ್ರಾಂ, ಬಿಛಾಣ್ಯಾಚೆರ್ ನವ್ಯಾ ಹೊಕ್ಲೆನ್ ಪಯ್ಲಿ ರಾತ್ ಪಾಶಾರ್ ಕರ್ನ್ ಉಟ್ತಾನಾ ದಿಸ್ಚ್ಯಾ ಕೆಸಾಂಪರಿಂ ಅಪ್ಲೆಂ ಬಿಛಾಣೆಂ, ಅಪ್ಣಾಕ್ ನಿತಳ್ ದವ್ರುಂಕ್ ಉಲೊ ದಿತಾಲೆಂ.
ಖಂಚೆಂಯೀ ಸಾರ್ಕೆಂ ದವ್ರುಂಕ್ ವೆಚ್ಯಾ ಪಯ್ಲೆಂ ಭಾಯ್ರ್ ವಚೊಂಕ್ ಡಾಯ್ರಿಂತ್ ದೂದ್ ಹಾಡ್ಚೆಂ ಆನಿ ಚಾ ಪಿಯೆಂವ್ಚೆಂ ಅವಶ್ಯ್ ಮ್ಹಣ್ ಭಗ್ಲೆಂ. ವೆಗಿಂ ವೆಗಿಂ ನ್ಹೆಸೊನ್, ಎದೊಳ್ಚ್ ಅರ್ಧೆಂ ಉಗ್ತೆಂ ಆಸ್ಲ್ಲೆಂ ಜನೆಲ್ ಸಗ್ಳೆಂ ಉಗ್ತೆಂ ಕರುನ್, ಹಾಂವ್ ಕುಡಾಚೆಂ ಬಾಗಿಲ್ ಉಗ್ತೆಂ ಕರಿಲಾಗ್ಲೊಂ ತಿತ್ಲೆಂಚ್!
ಭಾಯ್ರ್ ಬಾಗ್ಲಾಚಾ ಹುಂಬ್ರಾರ್ ನಿದೊನ್ ಆಸ್ಲ್ಲೆಂ ಏಕ್ ಮ್ಹಾಜಾರ್ ’ಮ್ಯಾಂವ್’ ಕರ್ನ್ ಉಟ್ಲೆಂ. ಛೆಕ್ಕ್ - ಸಕಾಳಿಂ ಫುಡೆಂ ಮ್ಹಾಜಾರ್? ತೆಂಯೀ ಕಾಳೆಂ ಮ್ಹಾಜಾರ್? ದೆವಾ ಮ್ಹಜ್ಯಾ! ಅಸಲ್ಯಾ ಮ್ಹಾಜ್ರಾಕ್ ಅಪ್ಣಾನ್ ಎದೊಳ್ ಪಳೆಲ್ಲೆಂ ನಾ. ಏಕ್ಧಮ್ ಕಾಳೆಂ ಆನಿ ಲಾಂಬ್ ಲೊಂವೆಚೆಂ ಮ್ಹಾಜಾರ್, ದಾಟೆಂ ಮೊಟೆಂ ಮಾಜಾರ್. ಗುಡ್ಯಾರ್ ಆಸ್ಲ್ಲ್ಯಾ ಪೊಣ್ಸಾರುಕಾರ್ ಆಸ್ಲ್ಲ್ಯಾ ಎಕ್ಸುರ್ಯಾ ದಾಟ್ಯಾ ಮೊಟ್ಯಾ ಪೊಣ್ಸಾಪರಿಂ ತಾಚೆಂ ಪೋಟ್. ಆನಿ ತಾಂಬ್ಡೆ ದೊಳೆ ಅಪ್ಣಾಕ್ಚ್ ಘಡಿಭರ್ ಪಳೆಲಾಗ್ಲೆಂ. ಕಸಲೊ ತಾಳೊ ಹಾಬಾ ಹೊ? ಮಾಜಾರ್ ಆಪ್ಣಾಕ್ ಪಳೆವ್ನ್ ಧಾಂವ್ಚಿ ತಯಾರಾಯಿ ಕರ್ತಾನಾ ಹಾಂವೆಂ ಕಾಂಪ್ಚೆ ಮ್ಹಜೆ ಪಾಂಯ್ ಧರ್ಣಿಕ್ ಮಾರ್ನ್ ಆವಾಜ್ ಕೆಲೊ. ಮಾಜಾರ್ ಧಾಂವ್ಲೆಂ. ಅಪ್ಲೆಂ ಭ್ಯೆಂಯೀ ಇಲ್ಲೆಂ ನಿಂವ್ಲೆಂ ಸದ್ದ್ಯಾಕ್.
ದೂದ್ ಹಾಡುನ್ ಪಾಟಿಂ ಯೆತಾನಾ ’ಕಾಳೆಂ ಮಾಜಾರ್’ ಪರತ್ ಉಡಾಸಾಕ್ ಆಯ್ಲೆಂ. ಸಕಾಳಿಂ ಫುಡೆಂ ಅಪ್ಣೆಂ ಮಾಜ್ರಾಕ್ ಪಳೆಲೆಂ. ತರ್ ಆಯ್ಚೊ ದೀಸ್ ಖಂಡಿತ್ ಆಪ್ಣಾಕ್ ಶನಿ - ಹಾವೆಂ ಮತಿಂಚ್ ಲೇಕ್ ಘಾಲೆಂ.
ದೂದ್ ಘೆವ್ನ್ ಪಾಟಿಂ ಬಾಗ್ಲಾಲಾಗಿಂ ಪಾವ್ತಾನಾ, ಚಾಳಿಸ್ ದಿಸಾಧ್ಲಿ ಫುಲಾಂಚಿ ಪೆಕೆಟ್ ಸುಕೊನ್ ಆಪ್ಣಾಕ್ ರಾಕ್ತಾಲಿ. ಪೆಪರ್ ಆಜ್ ಯೇಂವ್ಕ್ ನಾತ್ಲ್ಲೆಂ. ಹಾಂವ್ ಕೊಡಾಭಿತರ್ ಯೇವ್ನ್ ದಾರ್ ಧಾಂಪ್ಲೆಂ.
ಕುಜ್ನಾಕ್ ರಿಗ್ತಾನಾ ಕುಜ್ನಾಂತ್ಯೀ ತಿಚ್ಚ್ ಅವ್ಯವಸ್ಥಾ; ಎಕಾ ಕುಶಿನ್ ಧುಳಿಂತ್ ಬುಡ್ಲ್ಲ್ಯೊ ಬೊಶಿಯೊ, ಅನ್ಯೇಕಾ ಕುಶಿನ್ ಗ್ಲಾಸ್.
ಚಾ ಕರುಂಕ್ ಹಾವೆಂ ಉದಾಕ್ ಕಾಡ್ನ್ ತಾಂತುಂ ಚಾಯೆಪಿಟೊ ಘಾಲ್ನ್ ಗ್ಯಾಸ್ ಪೆಟಂವ್ಕ್ ಲಾಗ್ಲೊಂ - ಪುಣ್ ಗ್ಯಾಸ್ ಪೆಟ್ಲೊನಾ. ಛೆಕ್ಕ್! ರಜೆರ್ ವೆಚ್ಯಾಧಿಂ ಮುಗ್ದೊನ್ ಆಯಿಲ್ಲ್ಯಾ ಗ್ಯಾಸಾಕ್ ಥಂಯ್ಚ್ ಸೊಡ್ನ್ ಆಪ್ಣಾನ್ ಗೆಲ್ಲೊ ಉಡಾಸ್ ಆಯ್ಲೊ. ’ಹೆಂ ಸರ್ವ್ ತ್ಯಾ ಮಾಜ್ರಾವರ್ವಿಂ’ ಹಾಂವ್ ಅಪ್ಲೇಸ್ತಕಿಂ ಪುರ್ಪುರ್ಲೊಂ. ಆತಾಂ ದೂದ್ ಹುನ್ ಕರಿನಾತ್ಲ್ಯಾರ್ ತೆಂ ಸಾಂಜೆರ್ ಪಾಡ್ ಜಾತಾ. ಉಡಂವ್ಕ್ ಪೊಟಾಕ್ ಉಜೊ ಯೆತಾ. ದೆಕುನ್ ತೆಂ ಶೆಳೆಂಚ್ ದೂದ್ ಪಿಯೆವ್ನ್ ಹರ್ಶೆಂಚ್ಯಾಕೀ ಧಾ ಮಿನುಟಾಂ ವೆಗಿಂಚ್ ಆಯ್ತೊಂ ಜಾಲೊಂ. ಅನಿಕ್ಯೀ ಶನಿ ನಾಕಾ ಆಸ್ಲ್ಲಿ ಅಪ್ಣಾಕ್. ವೊರಾಂ ಚಡುಣೆಂ ಪಾವ್ಣೆಂ ನೋವ್. ಭರ್ತಿ ನೊವಾಂಕ್ ಬಸ್ಸ್ ಯೆತಾ ಆನಿ ಬಸ್ಸ್ಟೋಪ್ ಆಪ್ಲ್ಯಾ ಕುಡಾ ಮುಖ್ಲ್ಯಾನ್ಂಚ್ ಆಸಾ ತರ್ಯೀ ಅಪುಣ್ ವೆಗಿಂಚ್ ಸ್ಟೊಪಾರ್ ಪಾವ್ಲೊಂ.
ಏಕ್ ದೋನ್ ವಳ್ಕಿಚಿಂ ತೊಂಡಾಂ ಆಪ್ಣಾಕ್ ಪಳೆವ್ನ್ ಹಾಸ್ಲಿಂ. ಕಿತ್ಯಾಕ್ಗೀ ತಾಂಚ್ಯೊ ಹಾಸೊಯೀ ಆಪ್ಣಾಕ್ ಪುನ್ವೆಚ್ಯಾ ರಾತಿಚಾ ಚಂದ್ರಾಚೊ ಉಡಾಸ್ ಹಾಡಿಲಾಗ್ಲ್ಯೊ. ರಾಕ್ಲೊಂ.. ರಾಕ್ಲೊಂ.. ಹರ್ಶೆಂಚ್ಯಾಕೀ ಬಸ್ಸ್ ಧಾ ಮಿನುಟಾಂ ವೇಳ್ ಕರ್ನ್ಂಚ್ ಆಯ್ಲೆಂ. ಹಾಂವ್ ವಗೊ ರಾವ್ಲೊಂ.
ಮ್ಹಜೆಲಾಗಿಂ ದುಸ್ರಿ ವಾಟ್ಯಿ ನಾತ್ಲ್ಲಿ.
ಹಾಂವ್ ಬಸ್ಸ್ ಚಡ್ಲೊಂ. ದೆವಾ ಮ್ಹಜಾ, ರಾಕ್ ತುಂ ಮ್ಹಾಕಾ ಆಜ್ ಕಿತೆಂ ಸರ್ವ್ ಘಡೊಂಕ್ ಆಸಾ ತೆಂ ಹಾಂವ್ ನೆಣಾಂ.
ಕಾಳ್ಜಾಂತ್ ಹಜಾರ್ ಮುಸ್ಳಾಂನಿ ಮಾರ್ಲ್ಲೊ ಅನ್ಭೋಗ್ ಜಾತಾಲೊ. ಹಾಕಾಯೀ ಕಾರಾಣ್ ಆಸ್ಲ್ಲೆಂ. ಆಪ್ಣಾನ್ ತೀಸ್ ದಿಸಾಂಚಿ ರಜಾ ಘೆತ್ಲ್ಲಿ ಆನಿ ಪಯ್ಲೆ ಪಾವ್ಟಿಂ ಚಾಳೀಸ್ ದೀಸ್ ಕರ್ನ್ ಪಾಟಿಂ ಯೆಂವ್ಚೆಂ ಆನಿ ಆಜ್ಚ್ ಹೆಂ ಘಡಾಜಯ್ಗೀ?
ಸಕಾಳಿಂಫುಡೆಂ ತೆಂ ಪನ್ವತಿ ಮಾಜಾರ್? ದಳ್ದಿರ್ ಮಾಜಾರ್? ಛೆಕ್ಕ್... ಹಾಂವ್ ಚಿಂತುನ್ಂಚ್ ಗೆಲೊಂ.
ತೀಸ್ ದಿಸಾಂಚಿ ರಜಾ, ಚಾಳೀಸ್ ದೀಸ್ ಸಂಪವ್ನ್ ಆಯ್ಚೊ ಪಯ್ಲೊ ಕಾಮಾಚೊ ದೀಸ್, ಪರ್ತುನ್ ಧಾ-ಪಂದ್ರಾ ಮಿನುಟಾಂ ವೇಳ್. ಪುಣ್ ಖಾಸ್ಗಿ ಕಂಪ್ಣೆಂತ್ ಕಾಮ್ ಕರ್ಚ್ಯಾ ಮ್ಹಾಕಾ ಕೊಣ್ ಸಮ್ಜತೆಲಿಂ? ಮ್ಹಜ್ಯಾ ಬೊಸಾಕ್ ಕಶೆಂ ಸಮ್ಜಾಂವ್ ಹಾಂವ್? ಘರಾ ಹಾಂವೆಂ ಮಾಜಾರ್ ಪಳೆಲೆಂ ಆನಿ... ಸಗ್ಳೆಂ ವಿವರ್ಸಿಲ್ಯಾರ್ ತೊ ಮ್ಹಜ್ಯಾ ಕಾನ್ಸುಲಾರ್ ವ್ಹಾಜಂವ್ಕ್ ಆಸಾ.. ಹಾಂವ್ ಚಿಂತುನ್ಂಚ್ ಪಡ್ಲೊಂ.
ಕಶೆಂಯಿ ಬಸ್ಸ್ ಆಫಿಸಾಲಾಗಿಂ ಪಾವ್ಲೆಂ. ವೋಚ್ ಪಳೆಲೆಂ. ಬರ್ತಿ ಸತ್ರಾ ಮಿನುಟಾಂ ತಡವ್. ವೆಗಿಂ ವೆಗಿಂ ಹಾಂವ್ ಅಮ್ಸೊರಾನ್ ಆಫಿಸಾಕ್ ರಿಗ್ಲೊಂ. ಪಳೆತಾನಾ ಬೋಸ್ ಯೇಂವ್ಕ್ ನಾ ಮ್ಹಳ್ಳೆಂ ಆಮ್ಚೆ ಕ್ಲಾರ್ಕ್ ಭಾಯ್ರ್ ರಾವೊನ್ ಧುಂವರ್ ಸೊಡ್ಚೆಂ ಪಳೆತಾನಾ ಕಳ್ಳೆಂ. ಕುಡಿಂತ್ ಇಲ್ಲೆಂ ಧಯ್ರ್ ಭರ್ಲೆಂ ಆನಿ ಅಪ್ಲಿ ಕೂಡ್ ನೀಟ್ ಕರ್ನ್ ಆಫಿಸಾಕ್ ರಿಗ್ಲೊಂ.
ಬೊಸಾಚ್ಯಾ ಕ್ಯಾಬಿನಾ ಭಾಯ್ರ್ ತಾಚಿ ಸೆಕ್ರೆಟರಿ ಸೋಫಿ ಬಸ್ತಾ. ಸೋಫಿಚ್ಯಾ ಮುಖ್ಲ್ಯಾ ಮೆಜಾರ್ ಮ್ಹಜಿ ಬಸ್ಕಾ. ಹಾಂವ್ ಬಸ್ಲ್ಲೊಂಚ್ ಕೊಲ್ಯಾಪರಿಂ ಸೋಫಿಚೆರ್ ದೀಷ್ಟ್ ಘಾಲಿ. ತೆಂ ಎದೊಳ್ಚ್ ಫೊನಾರ್ ಪುಸ್ಪುಸ್ತಾಲೆಂ. ಆನಿ ಅಪ್ಲಿ ದೀಷ್ಟ್ ಮ್ಹಜೆರ್ ಘಾಲ್ನ್ ಪಳೆತಾಲೆಂ.
ಹಾಂವ್ ಭಿತರ್ಲೆ ಭಿತರ್ಚ್ ಕಾಂಪ್ಲೊಂ.
ಭೋವ್ಶಾ ತೆಂ ಮ್ಹಜೆವಿಶಿಂ ಬೊಸಾಲಾಗಿಂ ಉಲಯ್ತಾ ಆಸ್ಯೆತ್, ಆನಿ ಬೋಸ್ ಭೋವ್ಶಾ ಮ್ಹಜೆವಿಶಿಂ ತಾಚೆಲಾಗಿಂ ವಿಚಾರ್ತಾ ಜಾಂವ್ಕ್ ಪುರೊ; ಹಾಂವ್ ಆಯ್ಲಾಂಗಿ? ಕಿತ್ಲ್ಯಾ ವೆಳಾರ್ ಆಯ್ಲಾಂ?.. ಆನಿ ಸೊಫಿ ಭೋವ್ಶಾ ಸಾಂಗ್ತಾ ಜಾಂವ್ಕ್ ಪುರೊ ಆತ್ತಾಂ ಆಯ್ಲೊ.. ಲೇಟ್ ಆಯ್ಲೊ.. ಇತ್ಯಾದಿ.. ಛೆಕ್ಕ್. ಎದೊಳ್ ಮ್ಹಣಾಸರ್ ಅಪ್ಣಾನ್ ಕೆದಾಳಾಯಿ ಹರ್ಶೆಂಚ್ಯಾಕೀ ಚಡಿತ್ ರಜಾ ಕಾಡ್ಲ್ಲಿನಾ. ಪುಣ್ ಹೆಚ್ಚ್ ಪಾವ್ಟಿಂ ಕಡಿಜೆಗೀ? ಹಾಂವ್ ಚಿಂತುನ್ ಪಡ್ಲೊಂ.
ಮ್ಹಜ್ಯಾ ಮೆಜಾಚೆರ್ ಎಕ್ಚ್ಚ್ ವಸ್ತ್ ಹಾವೆಂ ದವರ್ಲೆಲ್ಯಾ ಜಾಗ್ಯಾರ್ ನಾತ್ಲ್ಲಿ. ಫಾಯ್ಲಾಂ ಉಸ್ತುನ್ ಘಾಲ್ಲಿಂ. ಡ್ರಾವರಾಂತ್ ಸಗ್ಳ್ಯೊ ವಸ್ತು ಬಾಜಾರಾಂತ್ಲ್ಯಾ ಮಾಸ್ಳ್ಯಾಂಪರಿಂ ರಾಸ್ ಪಡ್ಲ್ಲ್ಯೊ. ತಿತ್ಲ್ಯಾರ್ ಸೋಫಿ ಮುಖಾರ್ ಉಭೆಂ ಜಾಲೆಂಚ್!. ತೊಂಡಾ ಭಿತರ್ಲಿಂ ಮೊತಿಯಾಂ ಧಾಖಯ್ತ್ ಉಲಯ್ಲಾಗ್ಲೆಂ "ವೆಲ್ಕಮ್ ಬ್ಯಾಕ್, ಕಿತೆಂ ಲಾಂಬ್ ರಜಾ ಕಾಡ್ಲಿಯ್? ಕಾಂಯ್ ಗುಡ್ ನ್ಯೂಸ್.."
ಹಾವೆಂ ಮ್ಹಜೊ ತಾಳೊ ಸದಿಲ್ ಕೆಲೊ "ಥ್ಯಾಂಕ್ ಯೂ.. ಬೋಸ್ ನಾಂಗಿ?"
"ಹೋ... ಸಾಂಗ್ಲ್ಲೆಪರಿಂ ಉಡಾಸ್ ಆಯ್ಲೊ.. ಬೋಸ್ ಡೆಲ್ಲಿ ಗೆಲಾ, ಬೋವ್ಶಾ ಆಜ್ ಯೇಂವ್ಕ್ ಪುರೊ. ತುಂ ಎದೊಳ್ ಯೇಂವ್ಕ್ ಪುರೊ ಮ್ಹಣ್ ಚಿಂತುನ್ ಜಾವ್ಯೆತ್, ತುಕಾ ಬೊಸಾನ್ ಕಿತೆಂಗೀ ಎಕಾ ಎನ್ವಲಪಾಂತ್ ಘಾಲ್ನ್ ದಿಲಾಂ.. ಧರ್ ಹೆಂ ಎನ್ವಲಪ್.." ತೆಂ ಉಲವ್ನ್, ಅಪ್ಲ್ಯಾ ಡ್ರಾವರಾಂತ್ಲೆಂ ಏಕ್ ಎನ್ವೆಲಪ್ ಹಾಡ್ನ್ ದಿಲೆಂ.
ಮ್ಹಾಕಾ ಆತಾಂ ಸಕಾಳಿಂ ಪಳೆಲ್ಲೆಂ ಮಾಜಾರ್ ಉಡಾಸಾಕ್ ಆಯ್ಲೆಂ ಆನಿ ತೆಂ ಎನ್ವಲಪ್ ಘೆತಾನಾ ಅಪ್ಣಾಚೆ ಹಾತ್ ಆತಾಂ ಕಾಂಪೊಂಕ್ ಲಾಗ್ಲೆ. ’ಹೆಂ ಕಿತೆಂ?’ ಮ್ಹಣ್ ವಿಚಾರ್ಚೆಂ ಧಯ್ರ್ ಮ್ಹಜೆಲಾಗಿಂ ನಾತ್ಲ್ಲೆಂ. ಹರ್ಶೆಂಚೆಪರಿಂ ಜಾಲ್ಲೆಂ ತರ್ ಹೆಂ ಎನ್ವಲಪ್ ಉಘಡ್ನ್ ವಾಚ್ತೊಂ ಕೊಣ್ಣಾ. ಪುಣ್ ಆಯ್ಚಾ ದಿಸಾ ಮ್ಹಜೆಸಮೊರ್ ಯೇಂವ್ಕ್ ಆಸ್ಚಾ ಶನಿ ಥಾವ್ನ್ ರಾಕೊನ್ ವ್ಹರ್ ದೆವಾ - ಮತಿಂತ್ ದೆವಾಚೊ ನಿಯಾಳ್ ಕೆಲೊ.
ಸಕಾಳಿಂ ಚ್ಹಾ ಸಯ್ತ್ ಪಿಯೆನಾಸ್ತಾಂ ಆಯಿಲ್ಲ್ಯಾವರ್ವಿಂ ಪೊಟಾಂತ್ ಕಿಡೆ ಉಚಾಂಬಳ್ ಜಾವ್ನ್ ಆವಾಜ್ ಕರ್ತಾಲೆ. ಉಟೊನ್ ಭಾಯ್ರ್ ವಚೊನ್ ಕ್ಯಾಂಟಿನಾಂತ್ ಚ್ಹಾ ಪಿಯೆಂವ್ಕ್ ಮನ್ ಜಾಲೆಂ ತರ್ಯೀ ಕಾಂಯ್ ತ್ಯಾಚ್ ವೆಳಾರ್ ಬೋಸ್ ಯೇತ್ ತರ್ ಪರ್ತುನ್ ಅನ್ಯೇಕ್ ಶನಿ ನಾಕಾ ಮ್ಹಣ್ ವಗೋ ಬೊಸ್ಲೊಂ.
ತ್ಯೇ ಕಂಪ್ಣೆಚೊ ಪ್ರಮುಖ್ ಗುಮಾಸ್ತ್ ಹಾಂವ್ ಜಾಲ್ಲೆವರ್ವಿಂ ತಿತ್ಲೆ ಸಲೀಸಾಯೆನ್ ಕಾಮಾಂತ್ಲೆಂ ಕಾಡ್ಚೊನಾ ಅಪ್ಲೊ ಬೋಸ್ ಮ್ಹಳ್ಳಿ ಪಾತ್ಯೆಣಿ ಆಸ್ಲ್ಲಿ ತರ್ಯೀ ಆಯ್ಚಾ ದಿಸಾ ಕಿತೆಂಯ್ ಘಡೊಂಕ್ ಸಾಧ್ಯ್ ಆಸಾ ಮ್ಹಣ್ ಗೊಮ್ಲೆಂ.
ಘಡ್ಯಾಳಾಚೊ ಕಾಂಟೊ ಕಿತೆಂಚ್ ಫಿಕಿರ್ ನಾಸ್ತಾಂ ಮುಖಾರ್ ವೆತಾಲೊ. ಏಕ್ ಘಡಿ ತೆಂ ಕಾಗಾದ್ ಫಡ್ನ್ ವಾಚ್ಯಾಂ ಮ್ಹಳ್ಳಿ ತಾಳ್ಣಿಂ ಆಯ್ಲಿ ಪುಣ್ ದುಸ್ರೆ ಘಡ್ಯೆ ಮತಿಂತ್ ’ಆಜ್ ನಾಕಾ’ ಮ್ಹಣ್ ಅನ್ಯೇಕ್ ತಾಳೊ ಜಾಗ್ವಣ್ ದಿತಾಲೊ.
ಎಕೆಕ್ಲೆಚ್ ಸಾಂಗಾತಿ ಉಟೊನ್ ಭಾಯ್ರ್ ವಚೊನ್ ಧುಂವರ್ ಸೊಡ್ತಾಲೆ. ಹೆಂ ದಫ್ತರ್ ಮ್ಹಜ್ಯಾ ಜಿಣ್ಯೆಚೊ ಏಕ್ ವಾಂಟೊಚ್ ಜಾವ್ನ್ ಗೆಲಾಂ. ಹೆಂಚ್ ಕೂಡ್, ಹೆಂಚ್ ಮೇಜ್-ಕದೆಲ್, ಹೊಚ್ ಪಾಂಖೊ ಪಾಟ್ಲ್ಯಾ ಸಭಾರ್ ವರ್ಸಾಂ ಥಾವ್ನ್ ’ಅಪ್ಲೆಂ’ ಮ್ಹಳ್ಳೆಂ ಚಿಂತಾಪ್ ದಿತಾ. ಸಾಂಗಾತಿ ಥೊಡೆ ನವೆ ಥೊಡೆ ಪರ್ನೆಂ, ಎಕೆಕಾ ಜಾತಿಚೆ, ಎಕೆಕಾ ಕಾತಿಚೆ, ಎಕೆಕಾ ಚಿಂತ್ನಾಂಚೆ, ಎಕೆಕಾ ಮಂತ್ನಾಚೆ.
ಸದಾಂಚೆಪರಿಂ ಸಾರ್ಕೆ ಸಾಡೆ ಧಾ ವೊರಾಂಕ್ ಪೊಯೊನ್ ಬಾಲು ಚ್ಹಾ ಹಾಡ್ನ್ ಆಯ್ಲೊ. ಹಾಂವ್ ತಾಕಾಚ್ಚ್ ರಾಕ್ತಾಲೊಂ ಮ್ಹಳ್ಳೆ ಜೀನ್ಸಿಂ ವೆಗಿಂ ವೆಗಿಂ ಹುನ್ ಚ್ಹಾ ಪಿಯೆವ್ನ್ ಘಡ್ಯೆನ್ ಗ್ಲಾಸ್ ಖಾಲಿ ಕೆಲೊ.
ಮುಖ್ಲ್ಯಾ ಮೆಜಾರ್ ಬೊಸ್ಲ್ಲೊ ಮಹಂತಾ ಘಡ್ಯೆನ್ ಬಾಲುಚೆರ್ ಶಿಣ್ಲೊ "ತುಕಾ ಕಿತ್ಲೆ ಪಾವ್ಟಿಂ ಸಾಂಗ್ಲಾಂ ವೆಗಿಂ ಚ್ಹಾ ಹಾಡ್ ಮ್ಹಣ್. ಪುಣ್ ಸದಾಂ ತುವೆಂ ಚ್ಹಾ ಹಾಡ್ತಾನಾ ವೇಳ್"
ಬಾಲು ಅಪ್ಣಾಕ್ ಉದ್ದೇಶುನ್ ಸಾಂಗ್ಲ್ಲೆಂ ನ್ಹಂಯ್ ಮ್ಹಳ್ಳೆ ಜೀನ್ಸಾರ್ ಶೀದಾ ಗೆಲೊ, ಅಪ್ಲೆ ಕಾನ್ ಸಯ್ತ್ ಹಾಲಯ್ನಾಸ್ತಾಂ.
ಮಹಂತಾ ಬೊಸಾಚೊ ಖಾಸ್ ಮನಿಸ್, ಸಭಾರ್ ಪಾವ್ಟಿಂ ಬೋಸ್ ಅಪ್ಣಾಸವೆಂ ಮಹಂತಾಕ್ ಅಪ್ಲ್ಯಾ ಮಿಟಿಂಗಾಂಕ್, ಕೋನ್ಫರೆನ್ಸಾಂಕ್ ಆಪವ್ನ್ ವರ್ತಾಲೊ. ತಿತ್ಲೆಂಚ್ ನ್ಹಂಯ್, ಆಫಿಸಾಂತ್ ಬೋಸ್ ನಾತ್ಲೆಲ್ಯಾವೆಳಾರ್ ಕಿತೆಂ ಘಡ್ತಾ ತಾಚೊ ವಿವರ್ ಸಗ್ಳೊ ಮಹಂತಾ ಬೊಸಾಕ್ ದಿತಾ. ಆನಿ ತೊ ಬೊಸಾಚೊ ಚಮ್ಚಾ ಮ್ಹಳ್ಳೆಂ ಹಾಂವೆಂಯೀ ಆಯ್ಕಾಲಾಂ.
"ಆಜ್ಕಾಲ್ ಕೊಣಾಕ್ಯೀ ಕಾಮ್ ಸಾಂಗ್ಲ್ಲೆಪರಿಂ ನಾ ಹಾಬಾ" ಮಹಂತಾ ಮ್ಹಜೆಲಾಗಿಂ ಪುಸ್ಪುಸ್ಲೊ, ಹಾಂವೆಂಯ್ ಕೃತಕ್ ಹಾಸೊ ದೀವ್ನ್ ತಾಚ್ಯಾ ಉತ್ರಾಂಚೆರ್ ವ್ಹಜನ್ ಘಾಲೆಂ.
ಆಫಿಸಾಂತ್ಯಿ ಕೊಣ್ ಎಕ್ಲೊ ಫೊನಾರ್ ಉಮ್ಕಾಳ್ತಾಲೊ. ಕೊಣ್ ಎಕ್ಲೊ ಇಂಟರ್ನೆಟ್ಟಾರ್ ಲೊಳ್ತಾಲೊ, ಆನಿ ಕೊಣ್ ಎಕ್ಲೊ ಪೆಪರಾಂತ್ ತಿಳ್ತಾಳೊ, ಮುಖ್ಲ್ಯಾ ಪಾನಾಂನಿ ಖಬಾರ್ ವ್ಹಡ್ಲ್ಯಾ ಅಕ್ಷರಾಂನಿ ಛಾಪೊನ್ ಆಯಿಲ್ಲಿ, ಶೆಜಾರ್ಚಾ ಗಾಂವಾಂತ್ ಆಯಿಲ್ಲ್ಯಾ ಆವ್ರಾಚಿ ಖಭಾರ್! ಸಭಾರ್ ಘರಾಂ ಕೊಸ್ಳಾಲ್ಲಿಂ ಆನಿ ಜಯ್ತಾಕಾರಾಚೆ ರೂಕ್ ಪರ್ತಾಲ್ಲೆ. ಹಾಂವೆಂಯೀ ಪಯ್ಸ್ ಥಾವ್ನ್ ಎಕೊಡಿ ನದರ್ ದಿಸಾಳ್ಯಾಚೆರ್ ಚರಯ್ಲಿ. ಸರ್ವ್ ವ್ಹಾಳೊನ್ ವೆಚ್ಯೊ ತಸ್ವೀರೊ ಆಸ್ಲ್ಲ್ಯೊ. ಮತಿಂತ್ ಏಕ್ ಸವಾಲ್ ಉದೆಲೆಂ "ಸರ್ವ್ ವ್ಹಡ್ ರೂಕ್ ತ್ಯಾ ಆವ್ರಾಕ್ ಪರ್ತಾಲ್ಯಾತ್, ಪುಣ್ ಲ್ಹಾಲ್ಹಾನ್ ಅಸ್ಕತ್ ಝಾಡಾಂ ಕಿತ್ಯಾಕ್ ಪರ್ತೊಂಕ್ ನಾಂತ್?"
ಮಹಂತಾ ಆಪ್ಣಾಲಾಗಿಂ ಯೇವ್ನ್ ಕಿತೆಂಗೀ ಪುಸ್ಪುಸ್ಲೊ. ಆತಾಂ ತಾಚಿ ಖಬಾರ್ ಕಿತೆಂಗೀ ವಿಂಗಡ್ ಆಸ್ಲ್ಲಿ. ಅಪ್ಲೆ ಕಾನ್ಯೀ ಆತುರಾಯೆನ್ ನೀಟ್ ಜಾಲೆ. "ತುಕಾ ಕಳಿತ್ ಆಸಾಗೀ ಸೋಫಿಕ್ ನವೊ ಬೋಯ್ಫ್ರೆಂಡ್ ಮೆಳ್ಳಾ ಮ್ಹಳ್ಳೆಂ?"
ಮಹಂತಾ ಆನಿ ಸೋಫಿ ಮೊಸ್ತ್ ಪಾವ್ಟಿಂ ಪಿಕ್ಚರಾಕ್ ಗೆಲಿ ಗಜಾಲ್ ಹಾಂವ್ ಜಾಣಾಸ್ಲ್ಲೊಂ. ಮಹಂತಾ ದುಸ್ರೆ ದೀಸ್ ಯೇವ್ನ್ ಕೆದ್ನಾಂಯೀ ಆಫಿಸಾಂತ್ ಬಡಾಯ್ ಉಲಯ್ತಾಲೊ. ಆಮಿ ಹೆಂ ಪಿಕ್ಚರ್ ಪಳೆಲೆಂ.. ತೆಂ ಪಿಕ್ಚರ್ ಪಳೆಲೆಂ. ಆಮಿಂ ಹಾಂಗಾ ಭಂವ್ಲ್ಯಾಂವ್.. ಥಂಯ್ ಗೆಲ್ಯಾಂವ್...
ಭೋವ್ಶಾ ಪಾಟ್ಲ್ಯಾ ಥೊಡ್ಯಾ ಹಾಫ್ತ್ಯಾಂ ಥಾವ್ನ್ ಹ್ಯಾ ಫಟ್ಟಿಂಗಾಚ್ಯಾ ಕರ್ತುಬಾಂನಿ ಸೋಫಿ ಕಾಂಠಾಳ್ಳಾಂ ಜಾವ್ಯೆತ್ ಮ್ಹಣ್ ಹಾಂವೆಂ ಮ್ಹಜ್ಯಾ ಮತಿಂತ್ಂಚ್ ಲೇಕ್ ಘಾಲೆಂ.
ಆಜ್ ಕಿತೆಂಗೀ ಕಾಮ್ ಕರುಂಕ್ ಉರ್ಭಾ ಆಯ್ಲಿನಾ.
ಅಶೆಂಚ್ ಖಬ್ರಾಂನಿ ಬುಡ್ತಾನಾ, ಬೊಸಾಚಾ ಕುಡಾ ಥಾವ್ನ್ ಸೋಫಿ ಫಾಯ್ಲಾಂ ಘೆವ್ನ್ ಭಾಯ್ರ್ ಆಯ್ಲೆಂ. ಮಹಂತಾ ಉಟೊನ್ ಸೋಫಿಕಡೆ ಶೇಲೆ ಕರಿಲಾಗ್ಲೊ. ಎಕಾ ಘಡ್ಯೆ ಮ್ಹಾಕಾ ತೊ ಅಮೀಬಾಪರಿಂ ದಿಸ್ಲೊ. ಕಶೆಂ ಅಮೀಬಾ ಘಡ್ಯೆನ್ ಅಪ್ಲೆಂ ಆಕಾರ್ ಬದ್ಲಿತಾ ತಶೆಂಚ್ ಹೊಯ್!. ಭೋವ್ಶಾ ಜಯ್ತಾಚೆಂ ಸೂತ್ರ್ ಹೆಂಚ್ಗಾಯ್? ಮನಿಸ್ ಖಂಚ್ಯಾ ಘಡ್ಯೆ, ಕಸೊ, ಕೆದಾಳಾ, ಖಂಯ್, ಕಿತ್ಯಾಕ್ ಬದಲ್ತಾ?.. ಎಕಾ ಪಾಟ್ಲ್ಯಾನ್ ಹಜಾರ್ ಸವಾಲಾಂ ಉದೆಲಿಂ ಘಡ್ಯೆನ್.
ವೆಳಾಚಿಂ ರೊದಾಂ ಫುಡೆ ಸರ್ತಾಲಿಂ ವೆಗಾನ್. ವೊರಾಂ ಭರ್ತಿ ಭಾರಾ ಜಾತಾನಾ ದುಸ್ರೆ ಪಾವ್ಟಿಂ ಚ್ಹಾ ಘೆವ್ನ್ ಹ್ಯಾ ಪಾವ್ಟಿಂ ಬಾಲುಚ್ಯಾ ಬದ್ಲಾಕ್ ಚಾಚಾ ಆಯ್ಲೊ. ಸಗ್ಳ್ಯಾಂಚಾ ಮೊಗಾಚೊ ಮಾಲ್ಘಡೊ ಚಾಚಾ. ಚಾಚಾನ್ ಮಹಂತಾಕ್ ಚ್ಹಾ ದಿತಾಸ್ತಾನಾ ತಾಚಾ ತೊಂಡಾಚೊ ಛಾರೊ ಬದ್ಲಾಲೊ ಆನಿ ಹಾತ್ ಮಾತ್ಸೆ ಕಾಂಪ್ಲೆ ತಾಚೆ. ಮಹಂತಾ ಚಾಚಾಕ್ಯ್ ಬೊಬಾಟ್ಲೊ.
"ಚಾಚಾ ಆಯ್ಚ್ಯಾನ್ ತುಂಚ್ ಚ್ಹಾ ಹಾಡ್.. ತ್ಯಾ ಬೇಕೂಫ್ ಬಾಳುನ್ ಧಾಡಿನಾಕಾ"
ಚಾಚಾ ಭೆಷ್ಟೆಂಚ್ "ಜಾಯ್ತ್" ಮ್ಹಳ್ಳೆ ಜಿನ್ಸಾರ್ ತಕ್ಲಿ ಹಾಲವ್ನ್ ವೆತಾಸ್ತಾನಾ ಮ್ಹಜ್ಯಾ ಮತಿಂತ್ ಅನ್ಯೇಕ್ ಸವಾಲ್ ಉದೆಲೆಂ "ಖಾಲ್ತೆಂಪಣ್ ಆನಿ ಭ್ಯೆಂ ವಿವಿಂಗಡ್.. ಪುಣ್ ಕಿತ್ಯಾಕ್ ಮನಿಸ್ ಹ್ಯಾ ದೊನಾಂ ಮಧ್ಲೊ ತಫಾವತ್ ಸಮ್ಜೊಂಕ್ ಚುಕ್ತಾ?"
ತೆದಾಳಾಚ್ಚ್ ಥೊಡ್ಯಾ ಘಡ್ಯಾಂ ಆಧ್ಲ್ಯಾ ಆಪ್ಲ್ಯಾ ಮತಿಚ್ಯಾ ಸವಾಲಾಕ್ ಜಾಪ್ ಝಳ್ಕಾಲಿ. ’ಝಾಡಾಂ ಆವ್ರಾಂತ್ ವ್ಹಾಳೊನ್ ವಚಾನಾಂತ್, ಕಿತ್ಯಾಕ್ ಮ್ಹಳ್ಯಾರ್ ತಾಂಕಾಂ ಬಾಗ್ವೊಂಕ್ ಕಳಿತ್ ಆಸಾ. ಪುಣ್ ರುಕಾಂಕ್ ಬಾಗ್ವೊಂಕ್ ಕಳಿತ್ ನಾ’.
ಕಶೆಂ ಬಾಲು ಆನಿ ಚಾಚಾಮಧೆಂ ಫರಕ್ ಆಸ್ಲ್ಲೆಪರಿಂ, ಮಹಂತಾನ್ ತಶೆಂ ವ್ಹಡ್ ತಾಳ್ಯಾನ್ ಬೊಬಾಟ್ಲ್ಲೆಂ ತಾಚ್ಯಾ ಸಭ್ಯತಾಚೆರ್ ಸವಾಲ್ ಕರ್ತಾಲೆಂ. ’ಮನ್ಶ್ಯಾಚಿ ಸಭ್ಯತಾಯೀ ಭಾಯ್ಲ್ಯಾ ಲೊಕಾಂಕ್ ಕಿತ್ತುನ್ ಮ್ಹಣಾಸರ್ ಪರ್ಯಾಂತ್ ಫಟಯ್ತಾಂವ್ ಹಾಂಚೆರ್ ದೊಂದ್ವೊನ್ ಆಸ್ತಾ.’
ಹಾಂವ್ ಚಿಂತುನ್ಂಚ್ ಗೆಲೊಂ. ಅಪ್ಲೊ ಆಯ್ಚೊ ದೀಸ್ ಏಕ್ ಬರ್ಯಾನ್ ಪಾಶಾರ್ ಜಾಲ್ಯಾರ್ ಪುರೊ ದೆವಾ ಮ್ಹಣ್ ಮತಿಂತ್ ದೆವಾಕ್ ಉಲೊ ಮಾರಿಲಾಗ್ಲೊಂ. ತರ್ಯೀ ಮತಿಂತ್ ತ್ಯಾ ಕಾಗ್ದಾವಿಶಿಂ ಎಕಾಥರಾಚೊ ಕಾಂಪ್ ಆಸ್ಲ್ಲೊ.
ಅಸೊಚ್ಚ್ ದನ್ಪಾರ್ ಉತರ್ಲೊ ಆನಿ ಸಾಂಜ್ ಜಾವ್ನ್ ಆಯ್ಲೊ. ಸಗ್ಳಿಂ ವೆಚ್ಯಾ ತಯಾರಾಯೆನ್ ಬುಡ್ಲಿಂ, ಸಗ್ಳ್ಯಾಂ ಸವೆಂ ಹಾಂವ್ಯೀ.
ತಿತ್ಲ್ಯಾರ್!!
ಶನಿ ಶನಿ ಮ್ಹಳ್ಳೆಪರಿಂ ಬೋಸ್ ಆಯ್ಲೊಚ್ಚ್. ಹಾಕಾಯೀ ದಳ್ದಿರ್ಯಾಕ್ ಆತಾಂಚ್ ವೇಳ್ ಮೆಳಾಜೆಗೀ? ಹಾಂವ್ಯೀ ಮತಿಭಿತರ್ಚ್ ಚಿಂತುನ್ ಪಡ್ಲೊಂ.
ಘಡ್ಯೆನ್ ಮ್ಹಜ್ಯಾ ಮತಿಂತ್ಲ್ಯಾ ಪರ್ದ್ಯಾಚೆರ್ ತೆಂಚ್ ಸಕಾಳಿಂಚೆ ಮಾಜಾರ್ ಪಾಶಾರ್ ಜಾಲೆಂ ಆನಿ ಮ್ಹಜಿ ಕೂಡ್ ಭಾರೀಕ್ ಕಾಂಪ್ಲಿ. ಅಪ್ಲ್ಯಾ ಬೊಲ್ಸಾಂತ್ ದೊಡುನ್ ದವರ್ಲ್ಲೆಂ ಕಾಗಾದ್ ಸಯ್ತ್ ಕಾಂಪ್ತಾಶೆಂ ಭೊಗ್ಲೆಂ. ಕಾಳ್ಜಾಚೆ ದಡ್ದಡೆ ಅನಿಕ್ಯ್ ಚಡ್ಲೆ. ಹಾವೆಂ ಘಡಿಯಾಳ್ ಚೊಯ್ಲೆಂ. ಅನಿಕ್ಯೀ ವೀಸ್ ಮಿನುಟಾಂ ಆಸಾತ್. ತಿತ್ಲ್ಯಾರ್ ಸೋಫಿಕ್ ಇಂಟರ್ಕೊಮಾಂತ್ ಬೋಸಾನ್ ಕಿತೆಂಗೀ ಸಾಂಗ್ಲೆಂ. ಸೋಫಿ ಆಪ್ಣಾಕ್ ಸಾಂಗಾಲಾಗ್ಲೆಂ "ತುಕಾ ಬೋಸ್ ಆಪಯ್ತಾ".
ಹಾಂವ್ ಕಾಂಪ್ಚಿ ಅಪ್ಲಿ ಕೂಡ್ ಘೆವ್ನ್ ಬೊಸಾಚ್ಯಾ ಕುಡಾಕ್ ರಿಗ್ಲೊಂ "ಸೊರ್ರಿ ಸರ್.. ಹ್ಯೇ ಪಾವ್ಟಿಂ ಹಾಂವೆಂ ಎಪ್ಪ್ಲಾಯ್ ಕೆಲ್ಲ್ಯಾಚ್ಯಾಕೀ ಚಡ್ ರಜಾ ಕಾಡ್ಲಿ, ಆನಿ ಧಾ ದೀಸ್ ತಡವ್ ಕರ್ನ್ ಆಜ್ಚ್ ಆಫಿಸಾಕ್ ಆಯ್ಲೊಂ" ಹಾಂವೆಂಚ್ ಉಲವ್ಣ್ಯಾಚಿ ಸುರ್ವಾತ್ ಕೆಲಿ.
"ಮಿಸ್ಟರ್ ಸುವಾರಿಸ್, ತರ್ ತುವೆಂ ತೆಂ ಮೆಮೊ ವಾಚುಂಕ್ ನಾಂಯ್?" ತಾಣೆಂ ಮ್ಹಜ್ಯಾ ಬೊಲ್ಸಾಂತ್ ಆಸ್ಚಾ ಎನ್ವಲಪಾಚೆರ್ ದೀಷ್ಟ್ ಘಾಲ್ನ್ ವಿಚಾರ್ಲೆಂ.
"ನಾ.." ಹಾವೆಂ ಶಿಂಪಿ ಗೀಳ್ನ್ ಜಾಪ್ ದಿಲಿ.
"ಬರೆಂ.. ತರ್ ಆಜ್ ಹಾಂವ್ಯೀ ಇಲ್ಲೊಂ ಬಿಝಿ ಆಸಾಂ. ತೊ ಮೆಮೊ ವಾಚ್ ಆನಿ ಪುರ್ತಿ ತಯಾರಾಯ್ ಕರ್ನ್ ಫಾಲ್ಯಾಂ ಯೇ.. ಫಾಲ್ಯಾಂ ಉಲವ್ಯಾಂ".
ಕಿತ್ಯಾಕ್ಗೀ ಬೊಸಾಚೊ ತಾಳೊ ಅಪ್ಣಾಕ್ ಪಸಂದ್ ಜಾಲೊನಾ. ಪುಣ್ ದುಸ್ರೆಂ ಕಿತೆಂಚ್ ಉಲಂವ್ಕ್ ಆವ್ಕಾಸ್ ದಿಂವ್ಚ್ಯಾ ಪಯ್ಲೆಂ ತಾಣೆಂ ಎಕಾ ಹಾತಾಂತ್ ಪರತ್ ಫೋನ್ ಉಕಲ್ಲೊ ಆನಿ ಹಾಂವ್ ದಾರಾತೆವ್ಶಿಂ ಮೆಟಾಂ ಕಾಡಿಲಾಗ್ಲೊಂ.
ಭಾಯ್ರ್ ಯೆತಾನಾ ಕಪಲಾರ್ ಉದೆಲ್ಲೊ ಘಾಮ್ ವೆಗಿಂ ವೆಗಿಂ ಪುಸಿಲಾಗ್ಲೊಂ. ಸಾಯ್ಭಾ ದೆವಾ ಹ್ಯಾ ಸಂಸಾರಾಕ್ ತುವೆಂ ರಚ್ತಾನಾ ಕಸಲ್ಯಾ ರಚ್ನೆಕ್ ತುವೆಂ ರಚ್ಲಾಂಯ್ ದೆವಾ? ಹ್ಯಾ ದಳ್ದಿರ್ ಮಾಜ್ರಾಂಕ್ ಕಿತ್ಯಾಕ್ ರಚ್ಲಾಯ್? ಆನಿ ಮಾಜ್ರಾಕ್ ಪಳೆವ್ನ್ ಮ್ಹಜೊ ಸಗ್ಳೊ ದೀಸ್, ಭೋವ್ಶಾ ಸಗ್ಳಿ ಜಿಣಿ ಸತ್ತ್ಯಾನಾಸ್ ಜಾಲಿ. ಎದೊಳ್ ಮ್ಹಾಕಾ ಲಾಭೊಂಕ್ ನಾತ್ಲ್ಲೊ ಮೆಮೊ ಆಜ್ ಮ್ಹಾಕಾ ಮೆಳ್ಳೊ.
ಕಶೆಂಯೀ ಆಫಿಸ್ ಮುಗ್ದುನ್ ಹಾಂವ್ ಆಪ್ಲ್ಯಾ ಕುಡಾ ತೆವ್ಶಿನ್ ವಚೊಂಕ್ ಬಸ್ಸಾರ್ ಚಡ್ಲೊಂ. ಕಾಳ್ಜಾಚೆ ದಡ್ಧಡೆ ಕಶೆಯಿ ಮಾತ್ಸೆ ರಾವ್ಲೆ. ಕಿತೆಂಯಿ ಜಾಂವ್, ಆಜ್ ಯಾ ಫಾಲ್ಯಾಂ ವಾಸ್ಚೆಂ ಆಪ್ಣಾನ್ಂಚ್ ದೆಕುನ್ ಹಾವೆಂ ಕಾಳಿಜ್ ಘಟ್ ಕರ್ನ್, ಆತಾಂಚ್ ತೆಂ ಕಾಗಾದ್ ವಾಸ್ಚೆಂ ಮನ್ ಕೆಲೆಂ. ಬಸ್ಸಾರ್ ಬಸ್ಲ್ಲೆಕಡೆಚ್ ತೆಂ ಎನ್ವಲಪ್ ಉಗ್ತೆಂ ಕೆಲೆಂ;
ಮ್ಹಾಕಾ ಖರೆಂಚ್ ಅಜ್ಯಾಪ್ ರಾಕೊನ್ ಆಸ್ಲ್ಲೆಂ.
ಮ್ಹಾಕಾ ಬೊಸಾನ್ ಕಂಪೆನಿಚೊ ಅಸಿಸ್ಟಂತ್ ಜನರಲ್ ಮ್ಯಾನೆಜರ್ ಜಾವ್ನ್ ಪ್ರೊಮೋಶನ್ ದಿಲ್ಲೆಂ. ತಾಚೆಸವೆಂ ಮ್ಹಜೊ ಸಾಂಭಾಳ್ಯೀ ಚಡಯಿಲ್ಲೊ ಆನಿ ಕಂಪೆನಿಚ್ಯಾ ಲೆಖಾಚೆಂ ಘರ್ಯೀ ದಿಲ್ಲೆಂ. ಹಾವೆಂ ಮ್ಹಜೆ ದೊಳೆ ಪರತ್ ಘಸ್ಟುನ್ ವಾಚುಂಕ್ ಲಾಗ್ಲೊಂ.. ದೋನ್ ತೀನ್ ಪಾವ್ಟಿಂ ವಾಚ್ತಾನಾ ಮ್ಹಾಕಾ ಹಳ್ತಾಚಿ ಪಾತ್ಯೆಣಿ ಆಯ್ಲಿ.
ಮ್ಹಳ್ಯಾರ್! ಅಪ್ಣಾನ್ ಹ್ಯಾ ಕಂಪೆನಿಕ್ ಪಾಟ್ಲ್ಯಾ ದೇಡ್ ದಾಕ್ಡ್ಯಾಚಿ ಸೆವಾ ದಿಲ್ಲಿ ಆಜ್ ಫಳಾಭರಿತ್ ಜಾಲಿ ಮ್ಹಳ್ಳೊ ಸಂತೊಸ್ ಜಾಲೊ.
ಅಶೆಂ ಚಿಂತ್ನಾಂನಿ ಕೆದಾಳಾ ಅಪ್ಲೆಂ ಕೂಡ್ ಆಯ್ಲೆಂ ತೆಂ ಕಳ್ಳೆಂಚ್ ನಾ. ಅಪ್ಲ್ಯಾ ಸ್ಟೋಪಾಕ್ ಲಾಗಿಂ ಜಾತಾನಾ ಹಾಂವ್ ದೆಂವೊಂಕ್ ಉಭೊ ಜಾಲೊಂ. ತೆಚ್ಚ್ ವೆಳಾರ್ ಡ್ರಾಯ್ವರಾನ್ ಎಕಾಚ್ಚ್ಫರಾಂ ಬ್ರೇಕ್ ಮಾರ್ತಾನಾ ಹಾಂವ್ ಮುಖಾರ್ ಪರ್ತಾಲೊಂ. ಕಸೊಯೀ ಸುಧಾರ್ಸುನ್ ದೆಂವ್ಲೊಂ. ದೆಂವೊನ್ ಕಿತೆಂ ಪಳೆತಾಂ ಹಾಂವ್? ಬಸ್ಸಾಕ್ ಆಪ್ಟೊನ್ ಧರ್ಣಿಕ್ ಶೆವ್ಟಲ್ಲ್ಯಾ ತ್ಯಾ ಕಾಳ್ಯಾ ಮಾಜ್ರಾಚ್ಯಾ ಕುಡಿ ಥಾವ್ನ್ ತಾಂಬ್ಡೆಂ ರಗಾತ್ ವ್ಹಾಳ್ತಾಲೆಂ ಆನಿ ತಾಚೆ ತಾಂಬ್ಡೆ ದೊಳೆ ಉಗ್ತೆಚ್ ಆಸ್ಲ್ಲೆ ತರ್ಯೀ ತೆಂ ಮಾಜಾರ್ ಥಂಯ್ಚ್ ಮೆಲ್ಲೆಂ.
ಮ್ಹಾಕಾ ಏಕ್ ಘಡ್ಯೆ ಅಪ್ಣಾಚೆರ್ ಆನಿ ಅಪ್ಲ್ಯಾ ಚಿಂತ್ನಾಂಚೆರ್ ಎಕಾ ರಿತಿಚೊ ರಾಗ್ ಆನಿ ಕಾಂಥಾಳೊ ಆಯ್ಲೊ. ಆನಿ ಪಯ್ಲೆ ಪಾವ್ಟಿಂ ಅಪ್ಲೊ ಕೊಣ್ಗೀ ಮೆಲೊ ಮ್ಹಳ್ಳೆಂ ಚಿಂತಾಪ್ ತ್ಯಾ ಮೆಲ್ಲ್ಯಾ ಮಾಜ್ರಾಕ್ ದೆಖ್ತಾನಾ ಕಾಳ್ಜಾಂತ್ ಭರೊನ್ ಆಯ್ಲೆಂ. ಹಾಂವ್ ಅಪ್ಲ್ಯಾ ಕುಡಾತೆವ್ಶಿಂ ಮೆಟಾಂ ಕಾಡಿಲಾಗ್ಲೊಂ.
ಕುಡಾಕ್ ರಿಗ್ತಚ್ ಮ್ಹಜ್ಯಾ ಮತಿನ್ ಮ್ಹಾಕಾಚ್ಚ್ ಸವಾಲ್ ಕರುಂಕ್ ಧರ್ಲೆಂ ’ಕೊಣ್ ಶನಿ?’
[ಹಿ ಕಾಣಿ 2002 ಇಸ್ವೆಂತ್ ’ಕಾಣಿಕ್’ ಪತ್ರಾಚೆರ್, ತಶೆಂಚ್ ವಲ್ಲಿ ಕ್ವಾಡ್ರಸಾಚ್ಯಾ ಫುಡ್ಲದ್ ಮಟ್ವ್ಯಾ ಕಾಣ್ಯಾಂಚೊ ಜಮೊ ’ಆಶಾವಾದಿ’ಚೆರ್ ಪರ್ಗಟ್ಲ್ಯಾ]
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
