[ಮೊಗಾಚಿ ಕಥಾ]

ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್‍ಯಾಂತ್, ಕೊಂಕಣಿ ಖಾತಿರ್.

ವಿಂಚ್ಣಾರ್ ಮಟ್ವಿಕಾಣಿ: ಏಕ್ ಮೊಗಾಚಿ ಕಥಾ

ವಲ್ಲಿ ಕ್ವಾಡ್ರಸ್

ವಲ್ಲಿ ಕ್ವಾಡ್ರಸ್: ಕೊಂಕ್ಣಿ, ಕಾನಡಿ ಭಾಸೆಂತ್ ಪಾಟ್ಲ್ಯಾ ಪಂಚ್ವೀಸ್ ವರ್ಸಾಂ ಥಾವ್ನ್ ಲಗ್ಬಗ್ ದೊನ್ಶಾಂ ವಯ್ರ್ ಮಟ್ವ್ಯೊ ಕಾಣ್ಯೊ ಬರಯ್ಲ್ಯಾತ್. ಸ್ವತಾಚೆ ತೀನ್ ಬೂಕ್ ’ಆಶಾವಾದಿ’, ’ಖಿಳೊ’, ’ಕಂಗಾಲ್ ಆನಿ ತಾಚಿ ಕುಕ್ಕೆಹಳ್ಳಿ’ ಪರ್ಗಟ್ಲ್ಯಾತ್, ಹೆರಾಂಚಾ ಕಾಣ್ಯಾಂಚೊ ಬೂಕ್ ’ಕುಳ್ವಾರ್ಚೆಂ ದಾಯ್ಜ್’, ’ಸರ್ಗಾವಯ್ಲಿ ಮಾಂಯ್’ ಬುಕಾಂಚೆಂ ಸಂಪಾದನ್ ಕೆಲಾಂ, ಕರ್ನಾಟಕ್ ಕೊಂಕ್ಣಿ ಸಾಹಿತ್ಯ್ ಅಕಾಡೆಮಿಚಾ ಶೆಕ್ಡ್ಯಾಚ್ಯೊ ವಿಂಚ್ಣಾರ್ ಕೊಂಕ್ಣಿ ಮಟ್ವ್ಯೊ ಕಾಣ್ಯೊ ಬುಕಾಚೊ ಸಂಗ್ರಹಕ್ ಜಾವ್ನಾಸಾ. ಕೊಂಕ್ಣಿ ಮಟ್ವ್ಯಾ ಕಾಣ್ಯಾಂಚೆಂ ಅಂಕಣ್ ’ಮುಖಾಂ’ ಚಲವ್ನ್ ವೆಲಾಂ ತಶೆಂಚ್ ಪ್ರಸ್ತುತ್ ಚ್ಯಾರ್ ಅಂಕಣಾಂ, ’ಕಥಾಮೃತ್’, ’ಕಥಾದಾಯ್ಜ್’, ’ಕಥಾಝರ್’, ’ಕಥಾಂಕರ್’ ಚಲವ್ನ್ ವರ್ತಾ. ಮಟ್ವ್ಯಾ ಕಾಣ್ಯಾಂಚೆರ್ ಅಧ್ಯಯನ್ ’ಕಥಾಪಾಠ್’ ಚಲವ್ನ್ ವೆಲಾಂ. ರಾಕ್ಣೊ ಸಾಹಿತಿಕ್ ಸ್ಪರ್ಧ್ಯಾಂತ್ ತೀನ್ ಪಾವ್ಟಿಂ ಇನಾಮಾಂ ಜಿಕ್ಲಾ. ಹಾಚ್ಯೊ ತೀನ್ ಮಟ್ವ್ಯೊ ಕಾಣ್ಯೊ ನಾಟ್ಕುಳೆ ಜಾವ್ನ್ ಖೆಳಯ್ಲ್ಯಾತ್. ಧಾಂವ್ಣಿ (ದೆ|ಜೊರ್ಜಿ ಪೀಂತ್, ಆಯ್ಕೊಳ್), ಖಣ್ (ವಲ್ಲಿ ಕ್ವಾಡ್ರಸ್), ಗೂಂಡಾ (ಮೆಲ್ವಿನ್ ಜೆ. ವಾಸ್).

ಹೆರ್ ಕಾಣ್ಯೊ: ಕ್ರಿಸ್ಮಸ್ ಕಾಣಿಕ್, ಏಕ್ ಕ್ರಿಕೆಟ್ ಹೀರೊ, ಬಾಂಯ್, ಖಣ್, ಕುಡ್ಡೊ, ಜಾಂಬ್ಳಾಂಚೊ ರೂಕ್, ಆಶಾವಾದಿ.

’ಕಿರಾ ಸಾಳೆರಿಚಿ ಜೊಡಿ’ ಹಿಂಚ್ ಉತ್ರಾಂ ತಾಂಚಾ ಕಾಜಾರಾಚಾ ದಿಸಾಕ್ ಆಯಿಲ್ಲ್ಯಾ ಲೊಕಾಂನಿ ಉಚಾರ್‌ಲ್ಲಿಂ.

ಅಜೀಕ್ ಚಡುಣೆಂ ದೇಡ್ ವರ್ಸಾಧಿಂ!

ಹ್ಯಾ ದೇಡ್ ವರ್ಸಾಂನಿ ಜಾಯ್ತಿ ಬದ್ಲಾವಣ್ ಜಾಲ್ಯಾ. ಕಾಜಾರಾಧಿಂ ಭಾಡ್ಯಾಚಾ ಕೊಟ್ರೆಂತ್ ರಾವೊನ್ ಆಸ್‌ಲ್ಲೊ ತೊ ಆತಾಂ ಶ್ಹೆರಾಂತ್ ಅಪ್ಲಿಚ್ ಮ್ಹಳ್ಳಿ ಏಕ್ ಲ್ಹಾನ್ ಕೊಟ್ರಿ ಮೊಲಾಕ್ ಘೆಂವ್ಕ್ ಸಕ್ಲಾ. ಲ್ಹಾನ್ ತರ್‌ಯ್ ಗರ್ಜೆಚ್ಯೊ ಸರ್ವ್ ವಸ್ತು ಆಸಾತ್, ವಾಶಿಂಗ್ ಮಿಶಿನಾ ಥಾವ್ನ್ ಕಂಪ್ಯೂಟರ್ ಪರ್‍ಯಾಂತ್, ಎ.ಸಿ ಥಾವ್ನ್ ಡಿವಿಡಿ ಪರ್‍ಯಾಂತ್ ಹರ್‍ಯೆಕ್ ತಾಂಗೆರ್ ಆಸಾ.

ತೊ ಎಕಾ ಖಾಸ್ಗಿ ಲೇಕ್-ತಪಾಸ್ಣೆಚಾ ಕಂಪ್ಣೆಚೊ ಮುಖೇಸ್ತ್ ತರ್‌ಯ್ ಅಪ್ಲ್ಯಾ ಎದೊಳ್ಚಾ ಸರ್ವ್ ಜೊಡಿಕ್ ಎಕ್ಟಾಂವ್ನ್, ಕಾಂಯ್ ಇಲ್ಲೆಂ ಬೆಂಕಾಚೆಂ ಲೋನ್ ಕಾಡ್ನ್ ಕೊಟ್ರಿ ಕಶಿ ತರ್‌ಯ್ ಕೆಲಿ ಪುಣ್ ಫಕತ್ತ್ ವೊಣದಿಂ ಮಧೆಂ ಜಿಯೆಂವ್ಕ್ ಜಾತಾ? ತೆಂ ಮಧ್ಯಮ್ ಘರಾಣಾಂತ್ಲೆಂ ತರ್‌ಯ್ ದೊಗಾಂ ಭಾಂವಾಂಕ್ ಎಕ್ಲೆಂಚ್ ಭಯ್ಣ್ ದೆಖುನ್ ಕಾಜಾರ್ ಜಾಂವ್ನ್ ಯೆತಾನಾ ದರಬಸ್ತ್ ವಸ್ತು ಹಾಡ್ನ್ ಆಯಿಲ್ಲೆಂ. ದೊತಿ ರುಪಾರ್ ನ್ಹಂಯ್ ತರ್‌ಯೀ ದೆಣ್ಯಾ ರುಪಾರ್.

ಹೆಂ ಸಗ್ಳೆಂ ಘಡ್‌ಲ್ಲೆಂ ಹ್ಯಾ ದೇಡ್ ವರ್ಸಾಂತ್.

ಶ್ಹೆರಾಚಿ ತಿಚ್ಚ್ ಯಾಂತ್ರಿಕ್ ಜಿಣಿ - ಎಕಾ ಸಕಾಳಿಂ ತೊ ಘರಾ ಭಾಯ್ರ್ ಗೆಲ್ಯಾರ್ ಪಾಟಿಂ ಯೆತಾನಾ ಕಾಳೊಕ್. ದೀಸ್‌ಭರ್ ಘರಾಂತ್ ತೆಂ ಎಕ್ಸುರೆಂ, ಅಪ್ಲೆಂ ಕಾಮ್, ಘರ್ಚಿ ನಿತಳಾಯ್, ರಾಂಪಾದ್ ಆನಿ ವೇಳ್ ಮೆಳ್ತಾನಾ ವಾಚಾಪ್, ಟಿವಿ, ಕಂಪ್ಯೂಟರ್ ಆನಿ ಥೊಡಿಂ ಮ್ಯಾಗಜಿನಾಂ ವಾಚುನ್ ದೀಸ್ ಸಾರ್‍ತಾಲೆಂ.

ಎಕಾ ದಿಸಾ ಸಕಾಳಿಂಚೊ ನಾಸ್ಟೊ ಕರ್ಚಾ ಮೆಜಾರ್ ಬಸೊನ್ ತೆಂ ಮ್ಹಣಾಲೆಂ;

"ಹಾವೆಂ ಕಾಲ್ ಎಕಾ ಮ್ಯಾಗಜಿನಾರ್ ವಾಚ್ಲೆಂ.. ಘೊವ್ ಭಾಯ್ಲೆ ಮಧೆಂ ಮೋಗ್ ಚಡಂವ್ಕ್ ಥೊಡಿಂ ವಿಧಾನಾಂ ಆಸಾತ್.."

".................." ತೊ ಕಿತೆಂಚ್ ಉಲಯ್ಲೊನಾ ತರ್‌ಯ್ ದೊಗಾಂಚೆ ದೊಳೆ ಎಕಾಮೆಕಾ ಭೆಟ್ಲೆ ಆನಿ ಥೊಡ್ಯೊ ಮೌನ್ ಘಡ್ಯೊ ತಾಂಚೆ ಮಧೆಂ ಪಾಶಾರ್ ಜಾಲ್ಯೊ.

"ತುಂ ಆಯ್ಕತಾಯ್‌ಮೂ?... ಘೊವ್ ಬಾಯ್ಲೆ ಮಧೆಂ ಸುರ್‍ವೆರ್ ಆಸ್ಚೊ ಮೋಗ್ ಉಪ್ರಾಂತ್ ಆಸಾನಾ ಕಂಯ್, ದೆಖುನ್ ದಿಸಾನ್ ದೀಸ್ ತಾಂಚೆ ಮಧೆಂ ನಾ-ಸಮ್ಜಣಿ, ದುಭಾವ್, ಮನಸ್ತಾಪ್, ಚಡೊನ್ ಯೆತಾ ಖಂಯ್, ಪುಣ್ ಹಿಂ ವಿಧಾನಾಂ ಆಪ್ಣಾಯ್ಲಿಂ ತರ್ ಹೆಂ ಸರ್ವ್ ಆಡಾಂವ್ಕ್ ಸಾಧ್ಯ್ ಆಸಾ.."

"?????" ಪರತ್ ತಾಣೆಂ ದಿಶ್ಟಿನ್ಂಚ್ ಸವಾಲಾಂ ಕೆಲಿಂ.

"ಆಮಿ ಎಕಾಮೆಕಾ ಥಂಯ್ ಆಸ್ಚೆಂ ಉಣೆಂಪಣ್, ಚುಕಿ ಸೊಧುನ್ ಕಾಡಿಜಾಯ್ - ಘೊವಾನ್ ಬಾಯ್ಲೆಚ್ಯೊ ತಶೆಂಚ್ ಬಾಯ್ಲೆನ್ ಘೊವಾಚ್ಯೊ.. ಅಶೆಂ ಮುಖಾಮುಖಿ ಜಾವ್ನ್ ತ್ಯೊ ಚುಕಿ ಎಕಾಮೆಕಾ ಧಾಖವ್ನ್, ಉಪ್ರಾಂತ್ ತ್ಯೊ ಚುಕಿ ತಿದ್ವುನ್ ಜಿಯೆಲ್ಯಾರ್ ಖರೆಂಚ್ ಜಾವ್ನ್ ಘೊವ್ ಬಾಯ್ಲೆಚೊ ಮೊಗಾಚೊ ಬಾಂಧ್ ಘಟ್ ಕರ್‍ಯೆತ್"

"..............." ಪರತ್ ತೊ ಮೌನ್ ರಾವ್ಲೊ.

"ಆಮಿ ಕಿತ್ಯಾಕ್ ಹಿಂ ವಿಧಾನಾಂ ಆಪ್ಣಾಯ್ನಾಯೆ? ಆಜ್ ಆಮಿ ಎಕಾಮೆಕಾಚ್ಯೊ ಚುಕಿ ಮೆಜುಂಕ್ ಧರ್‍ಯಾಂ.. ಭೋವ್ಶಾ ಫಾಲ್ಯಾಂ ಆಮ್ಕಾಂ ಮುಖಾಮುಖಿ ಉಲಂವ್ಕ್ ಆವ್ಕಾಸ್ ಕರ್ನ್ ತ್ಯೊ ಎಕಾಮೆಕಾ ಸಾಂಗ್ಯಾಂ"

ತರ್‌ಯೀ ತೊ ಕಿತೆಂಚ್ ಉಲಯ್ಲೊನಾ..

ತೊ ದೀಸ್ ಮುಖಾರ್ ಗೆಲ್ಲೆಪರಿಂಚ್.. ತಿ ತಿಚೆಯಿತ್ಲ್ಯಾಕ್ ಆನಿ ತೊ ತಾಚೆಯಿತ್ಲ್ಯಾಕ್ ಆಪಾಪ್ಲ್ಯಾ ಕಾಮಾಂತ್ ಬುಡ್ಲಿಂ...

ಸಾಂಜೆರ್ ತೊ ಕಾಮಾಥಾವ್ನ್ ತಡವ್ ಕರ್ನ್ ಆಯಿಲ್ಲೊ ದೆಖುನ್ ಆಯಿಲ್ಲೊಚ್ ನಾವ್ನ್ ಜೇವ್ನ್ ನಿದ್ಲೊ..

ಸಕಾಳಿಂಚೆಂ ಅಲಾರಾಮ್ ಅರ್ಧೆಂ ವೋರ್ ವೆಗ್ಗಿಂ ದವರ್‌ಲ್ಲೆಂ ದೆಖುನ್ ದೊಗಾಂಯ್ ಸದಾಂಚ್ಯಾಕೀ ವೆಗ್ಗಿಂ ಉಟ್ಲಿಂ..

ಸಕಾಳಿಂಚಿ ನಿತಳಾಯ್ ಕರುನ್ ತಿಂ ಸಕಾಳ್ಚೊ ನಾಸ್ಟೊ ಕರ್ಚಾ ಮೆಜಾರ್ ಬಸ್ಲಿಂ.

"ಬರೆಂ.. ತರ್ ಆತಾಂ ಆಮಿಂ ಎಕಾಮೆಕಾ ಥಂಯ್ ಸೊಧ್‌ಲ್ಲ್ಯೊ ಚುಕಿ ಸಾಂಗ್ಯಾಂ.." ತೆಂ ಮ್ಹಣಾಲೆಂ.

"ಮೊಗಾ... ಹಾಂವ್ ಕಾಲ್ ಸಗ್ಳೊ ದೀಸ್‌ಭರ್ ಚಿಂತುನ್ ಬಸ್ಲೊಂ.." ತೊ ಉಲಂವ್ಕ್ ಲಾಗ್ಲೊ.

"ವ್ಹಯ್.. ಹಾಂವ್‌ಯೀ.. ದೀಸ್‌ಭರ್ ಚಿಂತುನ್ ಏಕ್ ಲಿಸ್ಟ್ ಕೆಲ್ಯಾ.. ತುಜ್ಯಾ ಸರ್ವ್ ಚುಕಿಂಚಿ..." ತೆಂ ತಾಚಿಂ ಉತ್ರಾಂ ಮಧೆಂಚ್ ರಾವವ್ನ್ ಸಾಂಗಾಲಾಗ್ಲೆಂ;

"ತುಂ ಸಕಾಳಿಂ ಉಟ್ತಚ್ ಮ್ಹಜೆರ್ ಏಕ್ ಮೊಗಾಳ್ ದೀಶ್ಟ್ ಸಯ್ತ್ ಘಾಲಿನಾಂಯ್.. ಹಿ ತುಜಿ ಪಯ್ಲಿ ಚೂಕ್.. ದುಸ್ರಿ.. ತುಂ ಕಾಮಾಕ್ ವೆತಾನಾ ಮ್ಹಾಕಾ ಪೊಟ್ಲುನ್ ಧರ್ನ್ ಕೀಸ್ ದಿನಾಂಯ್... ತಿಸ್ರಿ.... ಚೊವ್ತಿ... ಪಾಂಚ್ವಿ.... ಸವಿ....." ತೆಂ ಸಾಂಗೊನ್ಂಚ್ ಗೆಲೆಂ.

ಏಕ್.. ದೋನ್.. ತೀನ್.. ತೀನ್ ಪಾನಾಂಭರ್ ಘೊವಾಚ್ಯೊ ಚುಕಿ ಸೊಧುನ್ ತಿಣೆ ಬರಯಿಲ್ಲ್ಯೊ..

ತ್ಯೊ ಚುಕಿ ವಾಚುನ್ ಸಾಂಗ್ತಾನಾ ತೆಂ ಅಪ್ಲ್ಯಾ ಘೊವಾಚ್ಯಾ ದೊಳ್ಯಾಂನಿ ದುಃಖಾಂ ಭರೊನ್ ಯೆಂವ್ಚಿಂ ಪಳೆಲಾಗ್ಲೆಂ ತರ್‌ಯ್ ವಾಚುನ್ಂಚ್ ಗೆಲೆಂ.

ಸುಮಾರ್ ವೆಳಾ ಉಪ್ರಾಂತ್.. ತಿಚಿ ಲಿಸ್ಟ್ ಕಾಬಾರ್ ಜಾಲಿ ಆನಿ ತೆಂ ಅಪ್ಲ್ಯಾ ಘೊವಾಚಿ ಲಿಸ್ಟ್ ಆಯ್ಕೊಂಕ್ ರಾಕೊನ್ ರಾವ್ಲೆಂ.

"ಹಾವೆಂ ಕಾಲ್ ದೀಸ್‌ಭರ್ ಚಿಂತ್ಲೆಂ ಮೊಗಾ.." ತೊ ಉಲಂವ್ಕ್ ಲಾಗ್ಲೊ.

"ಪುಣ್.. ಮ್ಹಾಕಾ ಭಿಲ್ಕುಲ್ ತುಜಿ ಏಕ್ ಚೂಕ್‌ಯ್ ದಿಸ್ಲಿನಾ..... ಮ್ಹಾಕಾ ತುಂ ಹರ್ ದಿಸಾ.. ಹರ್ ಸಂದರ್ಭಾಂತ್.. ಹರ್ ಪರಿಗತೆಂತ್ ಬರೆಂಚ್ ಲಾಗ್ತಾಯ್.. ಆನಿ ಹಾಂವ್ ತುಜೊ ಸದಾಂಚ್ ಮೋಗ್ ಕರ್ತಲೊಂ... ತುಂ ಕಶೆಂ ಆಸಾಯ್ ತೆಂಚ್ ಮ್ಹಾಕಾ ಸೊಭಿತ್ ಆನಿ ಬರೆಂ....."

ತೆಂ ಪಳೆಂವ್ಚಾರ್ ಪಡ್‌ಲ್ಲೆಂ ಪುಣ್ ಆತಾಂ ತಿಚಾ ಕಾಳ್ಜಾನ್ ರಡೊಂಕ್ ಧರ್‌ಲ್ಲೆಂ.

ಅನೇಕ್

ವ್ಯಾ

ಕಾಣ್ಯೆಗಾರ್]