ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ವಿಂಚ್ಣಾರ್ ಮಟ್ವಿಕಾಣಿ: ಜಾಂಬ್ಳಾಂಚೊ ರೂಕ್
ವಲ್ಲಿ ಕ್ವಾಡ್ರಸ್
ವಲ್ಲಿ ಕ್ವಾಡ್ರಸ್: ಕೊಂಕ್ಣಿ, ಕಾನಡಿ ಭಾಸೆಂತ್ ಪಾಟ್ಲ್ಯಾ ಪಂಚ್ವೀಸ್ ವರ್ಸಾಂ ಥಾವ್ನ್ ಲಗ್ಬಗ್ ದೊನ್ಶಾಂ ವಯ್ರ್ ಮಟ್ವ್ಯೊ ಕಾಣ್ಯೊ ಬರಯ್ಲ್ಯಾತ್. ಸ್ವತಾಚೆ ತೀನ್ ಬೂಕ್ ’ಆಶಾವಾದಿ’, ’ಖಿಳೊ’, ’ಕಂಗಾಲ್ ಆನಿ ತಾಚಿ ಕುಕ್ಕೆಹಳ್ಳಿ’ ಪರ್ಗಟ್ಲ್ಯಾತ್, ಹೆರಾಂಚಾ ಕಾಣ್ಯಾಂಚೊ ಬೂಕ್ ’ಕುಳ್ವಾರ್ಚೆಂ ದಾಯ್ಜ್’, ’ಸರ್ಗಾವಯ್ಲಿ ಮಾಂಯ್’ ಬುಕಾಂಚೆಂ ಸಂಪಾದನ್ ಕೆಲಾಂ, ಕರ್ನಾಟಕ್ ಕೊಂಕ್ಣಿ ಸಾಹಿತ್ಯ್ ಅಕಾಡೆಮಿಚಾ ಶೆಕ್ಡ್ಯಾಚ್ಯೊ ವಿಂಚ್ಣಾರ್ ಕೊಂಕ್ಣಿ ಮಟ್ವ್ಯೊ ಕಾಣ್ಯೊ ಬುಕಾಚೊ ಸಂಗ್ರಹಕ್ ಜಾವ್ನಾಸಾ. ಕೊಂಕ್ಣಿ ಮಟ್ವ್ಯಾ ಕಾಣ್ಯಾಂಚೆಂ ಅಂಕಣ್ ’ಮುಖಾಂ’ ಚಲವ್ನ್ ವೆಲಾಂ ತಶೆಂಚ್ ಪ್ರಸ್ತುತ್ ಚ್ಯಾರ್ ಅಂಕಣಾಂ, ’ಕಥಾಮೃತ್’, ’ಕಥಾದಾಯ್ಜ್’, ’ಕಥಾಝರ್’, ’ಕಥಾಂಕರ್’ ಚಲವ್ನ್ ವರ್ತಾ. ಮಟ್ವ್ಯಾ ಕಾಣ್ಯಾಂಚೆರ್ ಅಧ್ಯಯನ್ ’ಕಥಾಪಾಠ್’ ಚಲವ್ನ್ ವೆಲಾಂ. ರಾಕ್ಣೊ ಸಾಹಿತಿಕ್ ಸ್ಪರ್ಧ್ಯಾಂತ್ ತೀನ್ ಪಾವ್ಟಿಂ ಇನಾಮಾಂ ಜಿಕ್ಲಾ. ಹಾಚ್ಯೊ ತೀನ್ ಮಟ್ವ್ಯೊ ಕಾಣ್ಯೊ ನಾಟ್ಕುಳೆ ಜಾವ್ನ್ ಖೆಳಯ್ಲ್ಯಾತ್. ಧಾಂವ್ಣಿ (ದೆ|ಜೊರ್ಜಿ ಪೀಂತ್, ಆಯ್ಕೊಳ್), ಖಣ್ (ವಲ್ಲಿ ಕ್ವಾಡ್ರಸ್), ಗೂಂಡಾ (ಮೆಲ್ವಿನ್ ಜೆ. ವಾಸ್).
ಹೆರ್ ಕಾಣ್ಯೊ: ಕ್ರಿಸ್ಮಸ್ ಕಾಣಿಕ್, ಏಕ್ ಕ್ರಿಕೆಟ್ ಹೀರೊ, ಬಾಂಯ್, ಖಣ್, ಕುಡ್ಡೊ.
ಮಲ್ನಾಡ್ ಕಾಮಿಲ್ ಕಾಮ್ತಿನ್ ಕುಕ್ಕೆಹಳ್ಳೆಂತ್ ಯೇವ್ನ್ ಅಜಿಕ್ ಚಡುಣಿಂ ಎಕುಣ್ಚಾಳಿಸ್ ವರ್ಸಾಂ ಜಾಲಿಂ ತರ್ಯ್ ತಾಚಾ ಲೊರಾಸವೆಂ ’ಮಲ್ನಾಡ್’ ಚಿಡ್ಕಾಲ್ಲೆಂ ದೆಕುನ್, ಅಜೂನ್ ಪರ್ಯಾಂತ್ ಲೋಕ್ ತಾಕಾ ಮಲ್ನಾಡ್ಚೊ ಮ್ಹಣೊನ್ಂಚ್ ವಳ್ಕಾತಾಲೊ. ದೀಸ್ಪಡ್ತೊ ಗ್ರಾಸ್ ಜೊಡ್ಚಾಕ್ ಜಾಂವ್ ವಾ ಅಪ್ಲ್ಯಾಚ್ ಗಾಂವಾಂತ್(ಮಲ್ನಾಡಾಂತ್) ಸಸಾರ್ ಜಾವ್ನ್ ಜಾಂವ್ - ಕಾಮ್ತಿಕ್ ಕುಕ್ಕೆಹಳ್ಳೆಂತ್ ಘರ್ ಕರುಂಕ್ ಕಸಲೀಂಯ್ ಕಾರಾಣಾಂ ಆಸ್ಯೆತ್. ಪುಣ್ ಅಖ್ಖ್ಯಾ ರಾಜ್ಯಾಂತ್ ತಾಣೆಂ ಎದೊಳ್ಚ್ ನಾಂವ್ ವೆಲ್ಲೆಂ ದೆಕುನ್ ಕುಕ್ಕೆಹಳ್ಳೆಂತ್ ತೊ ಸರ್ವಾಂಕ್ ಮೊಗಾಚೊ ಜಾಲ್ಲೊ. ದುಬ್ಳ್ಯಾಂಚೊ ದಾತಾರ್ ಜಾಲ್ಲೊ.
ಕುಕ್ಕೆಹಳ್ಳೆಂತ್ ಪೆಂಟೆಲಾಗಿಂತ್ಲ್ಯಾನ್ ಜುಳುಜುಳು ವ್ಹಾಳ್ಚಾ ವ್ಹಾಳ್ಯಾದೆಗೆಂತ್ ತಾಚೆಂ ಘರ್ ಆನಿಂ ಘರಾ ಮುಖಾರ್ ತಾಣೆ ರೊಯಿಲ್ಲಿ ಜಾಂಬ್ಳಾಂಚಿ ರೊಂಪಿ ಆಜ್ ವ್ಹಡ್ ಜಯ್ತಾಚೊ ರೂಕ್ ಜಾಲಾ. ರುಕಾಚೆರ್ ಸುಕ್ಣ್ಯಾಂನಿ ಸಯ್ತ್ ಆಪ್ಲಿಂ ಪಟ್ಟಾಂ ಬಾಂದ್ಲ್ಯಾಂತ್, ಗಾಂವ್ಚೊ ಲೋಕ್ ಹ್ಯಾ ರುಕಾಚಿಂ ಜಾಂಬ್ಳಾಂ ಖಾತಾತ್, ಹಿಂದ್ವಾಂಚಿಂ ಹ್ಯಾ ರುಕಾಚಿ ಪುಜಾ ಕರ್ತಾತ್, ಕಾಜಾರಾಂ ಸೊಭಾಣಾಂಕ್ ಹ್ಯಾಚ್ ರುಕಾಚಿಂ ಪಾನಾಂ ಸಯ್ತ್ ಖುಂಟುನ್ ವರ್ತಾತ್ ಆನಿಂ ಆಪ್ಲ್ಯಾ ಮಾಟ್ವಾಚಾ ಖಾಂಬ್ಯಾಂಕ್ ತಿಂ ನೆಸವ್ನ್ ಸೊಭಯ್ತಾತ್. ಅಶೆಂ ಕುಕ್ಕೆಹಳ್ಳೆಚಾ ಎಕೆಕಾ ಮನ್ಶಾಕ್ ಸಯ್ತ್ ಹ್ಯಾ ರುಕಾಚಿ ವಳೊಕ್ ಆಸಾ ತರ್ಯ್ ಸತ್ ಗಜಾಲ್ ಹಿ ಕೀ ಹೆಂ ಝಡ್ ರೊಯಿಲ್ಲೆಂ ಜಾವ್ನಾಸಾ ಕಾಮಿಲ್ ಕಾಮ್ತಿನ್ಂಚ್.
ತಶೆಂ ಮ್ಹಣ್ ಕಾಮಿಲ್ ಕಾಮ್ತಿ ಬರೊ ಮ್ಹಣ್ ಬರೊಯ್ ನ್ಹಯ್, ಪಾಡ್ ಮ್ಹಣ್ ಪಾಡ್ಯ್ ನ್ಹಯ್. ತರ್ನಾಟ್ಪಣಾರ್ ತಾಕಾ ಕುಕ್ಕೆಹಳ್ಳೆಂತ್ ಘರ್ ಕರ್ಚಾವಗ್ತಾಂ ಜಾಯ್ತೆ ಕಸ್ಟ್ ಸಂಕಸ್ಟ್ ಸೊಸುಂಕ್ ಪಡ್ಲ್ಲೆ. ತೇಂಯ್ ಗಾಂವ್ಚಾ ಪಟೆಲಾಥಾವ್ನ್. ಜಿವಾನ್ ಪುಡ್ಪುಡಿತ್ ಜಾವ್ನ್ ಆಸ್ಲ್ಲೊ ಕಾಮ್ತಿ ಸದಾಂಯ್ ಪಟೆಲಾಚಾ ದೊಳ್ಯಾಂಕ್ ತೊಪ್ತಾಲೊ - ರಿತ್ಯಾ ಪಾಂಯಾಂಕ್ ಲಜೆಚೊ ಕಾಂಟೊ ತೊಪ್ಲ್ಲೆಪರಿಂ. ಪಟೆಲಾಕ್ ಗಾಂವಾಂತ್ ಆಪ್ಲಿಚ್ ಮ್ಹಳ್ಳಿ ರಾಜಕೀಯ್ ಪಾಡ್ತ್ ಭಾಂದುಂಕ್ ಜಾಯ್ ಆಸ್ಲ್ಲೆಂ. ಆನಿಂ ತಾಚಾ ರಾಜ್ವಟ್ಕೆಕ್ ಸವಾಲ್ ಕರ್ಚಿ ಶ್ಯಾಥಿ ಫಕತ್ ಕಾಮ್ತಿಕ್ ಮಾತ್ರ್ ಆಸ್ಲ್ಲಿ.
ಅಶೆಂ ಎಕಾ ದಿಸಾ ಕುಕ್ಕೆಹಳ್ಳೆಂತ್ಲ್ಯಾ ಎಕಾ ಗಡಂಗಾಂತ್ ಎಕ್ಲ್ಯಾಚಿ ಖುನ್ ಜಾಲಿ. ಖುನಿ ಜಾಲ್ಲೊ ವೆಕ್ತಿ, ಹಾಪ್ತ್ಯಾಧಿಂ ಕಾಮ್ತಿಲಾಗಿಂ ಝಗ್ಡೆಂ ಕೆಲ್ಲೊ ದೆಕುನ್ ಲೊಕಾಂಚೊ ದುಭಾವ್ ಕಾಮ್ತಿಚೆರ್ ಆಸ್ಲ್ಲೊ. ಅಶೆಂ ಖೈದ್ ಜಾಲ್ಲೊ ಕಾಮ್ತಿ ಚಾರ್ ವರ್ಸಾಂ ಜಯ್ಲಾಂತ್ ರಾವೊನ್ ಉಪ್ರಾಂತ್ ಕಸಲಿಚ್ ರುಜ್ವಾತ್ ನಾ ಮ್ಹಳ್ಳ್ಯಾ ನಿಬಾನ್ ಭಾಯ್ರ್ ಆಯ್ಲೊ. ತೊ ಭಾಯ್ರ್ ಯೆವುನ್ ದೋನ್ ಮಯ್ನ್ಯಾಂ ಭಿತರ್ಚ್ಚ್ ಗಾಂವ್ಚೊ ಪಟೆಲ್ ನಪಂಯ್ಚ್ ಜಾಲ್ಲೊ. ತೊ ಖೈಂ ಗೆಲೊ? ಕಿತೆಂ ಜಾಲೊ ಮ್ಹಳ್ಳೆಂ ಅಜೂನ್ ಪರ್ಯಾಂತ್ ಕುಕ್ಕೆಹಳ್ಳೆಕ್ ಏಕ್ ಮಿಸ್ತೆರ್ಚ್ ಜಾಲಾ.
ಅಶೆಂ ಕುಕ್ಕೆಹಳ್ಳೆಂತ್ ಏಕ್ ಮುಖೆಲಿ ಜಾವ್ನ್ ಉದೆಲ್ಲೊ ಕಾಮ್ತಿ, ಕಾಜಾರ್ ಜಾಲೊ ಆನಿಂ ಘರ್ದಾರ್ ಕೆಲೆಂ ಆನಿಂ ಘರಾ ಮುಖಾರ್ ಆಸ್ಚಾ ಆಂಬ್ಯಾಚಾ ರುಕಾಕ್ ಹ್ಯಾ ಪಾವ್ಟಿಂ ಘಡ್ಗಡೊ ಮಾರೊನ್ ತೊ ಬಾವೊನ್ ಆಯಿಲ್ಲೊ. ಕುಕ್ಕೆಹಳ್ಳೆಚಾ ಚರಿತ್ರೆಚೊ ವಾಂಟೊ ಜಾಲ್ಲ್ಯಾ ಹ್ಯಾ ರುಕಾಕ್ ಗಾಂವ್ಚೊ ಲೋಕ್ ಸಯ್ತಾನಾಚೊ ಫಾತೊರ್ ದವ್ರುನ್ ಪುಜಾ ಕರ್ತಾಲೊ. ಆತಾಂ ಹೊ ರೂಕ್ ಮೊರೊನ್ ಯೆತಾನಾ ಕಾಮ್ತಿನ್ ಮಲ್ನಾಡ್ಚಾ ಅಪ್ಲ್ಯಾ ಮೌಸೆಚಾ ಘರಾ ಥಾವ್ನ್ ಹಾಡ್ಲ್ಲಿಂ ಏಕ್ ಜಾಂಬ್ಳಾಂಚಿ ರೊಂಪಿ ರೊಯ್ಲಿ. ಆನಿಂ ತ್ಯಾ ರೊಂಪ್ಯೆ ಭಂವ್ತೊಣಿಂ ಏಕ್ ಲ್ಹಾನ್ಶೆಂ ಕಾಟೆಂಯ್ ಭಾಂದ್ಲೆಂ.
ದೀಸ್ ಪಾಶಾರ್ ಜಾಲ್ಲೆಪರಿಂ ಹಿ ರೊಂಪಿ ವ್ಹಡ್ ಜಾಲಿ ಆನಿಂ ಕುಕ್ಕೆಹಳ್ಳೆಚಾ ಲೊಕಾಂಚಾ ಕಾಳ್ಜಾ-ಮನಾಂಕ್ ಉಲ್ಲಾಸ್ ಫಾಂಕಂವ್ಕ್ ಲಾಗ್ಲಿ. ಇತ್ಲ್ಯಾರ್ ತೊ ಘಡ್ಗಡೊ ಪಡ್ಲ್ಲೊ ರೂಕ್ ಪುರ್ತೊ ಸುಕೊನ್ ಗೆಲ್ಲೊ ಆನಿಂ ಲೊಕಾಂನಿ ಮೆಳೊನ್ ತೊ ಸಯ್ತಾನಾಚೊ ಫಾತೊರ್ ಹ್ಯಾ ಜಾಂಬ್ಳಾಂಚಾ ರೊಂಪಿಯೆಲಾಗಿಂ ದವರ್ಲೊ. ಹೆಂ ಸರ್ವ್ ಅಜಿಕ್ ಎಕುಣ್ಚಾಳಿಸ್ ವರ್ಸಾಧ್ಲಿ ಗಜಾಲ್.
*********************ಆಜ್!
ಕುಕ್ಕೆಹಳ್ಳಿ ಬದಲ್ಲ್ಯಾ. ಆತಾಂ ಗಾಂವಾಕ್ ಬಸ್ಸಾಂ ಯೆತಾತ್, ಲೊಕಾಲಾಗಿಂ ದುಡು ಜಾಲಾ. ಕುಕ್ಕೆಹಳ್ಳೆಚೊ ಲೋಕ್ ರಿಕ್ಶಾರ್ ಭಂವ್ತಾ. ಪಾರ್ಪೊಳ್ ತರ್ನಾಟ್ಯಾಂಕ್ ಲಾಯ್ನ್ ಮಾರುಂಕ್ ಪೆಂಟೆಕ್ ವೆಚಿ ಗರ್ಜ್ ನಾ, ಕುಕ್ಕೆಹಳ್ಳೆಂತ್ಚ್ ಲೋಕ್ ಜಮ್ತಾ. ಕುಕ್ಕೆಹಳ್ಳೆಂತ್ಯ್ ಹೊಟ್ಲಾಂ ಜಾಲ್ಯಾಂತ್, ಇಸ್ಕೊಲಾಂ ಜಾಲ್ಯಾಂತ್. ಆತಾಂ ಲೊಕಾಕ್ ಪುಜಾ-ಪಾಟ್ ಕರುಂಕ್ ದೀವ್ಳ್ ಆಸಾ ಆನಿಂ ಹ್ಯಾ ಸರ್ವಾಂಕ್ ಮಿಕ್ವೊನ್ - ಕುಕ್ಕೆಹಳ್ಳಿ ಆತಾಂ ರಾಜ್ಯಾಂತ್ ಚಡಾವತ್ ಲೊಕಾಂಕ್ ವಳ್ಕಿಚಿ ಜಾಲ್ಯಾ. ಹಾಚೆಂ ಕಾರಾಣ್ ಇತ್ಲೆಂಚ್ - ಕಾಮಿಲ್ ಕಾಮ್ತಿ ಎಲಿಸಾಂವ್ ಜಿಕೊನ್ ಏಕ್ ಫುಡಾರಿ ಜಾಲಾ. ಗಾಂವ್ಚೊ ಲೋಕ್ ತಾಕಾ ದೇವ್ ಮ್ಹಣ್ ಮಾಂಧ್ತಾ. ತೊ ಆಪ್ಲ್ಯಾ ಕುಟ್ಮಾಸವೆಂ ಶೆರಾಂತ್ ವಸ್ತಿ ಕರ್ತಾ ತರ್ಯ್ ಪಾಂಚ್ ವರ್ಸಾಂಕ್ ಏಕ್ ಪಾವ್ಟಿಂ ಪುಣೀಂ ಚುಕಾನಾಸ್ತಾಂ ಕುಕ್ಕೆಹಳ್ಳೆಕ್ ಭೆಟ್ ದಿತಾ.
ಕಾಮ್ತಿ ಚಡ್ ಶಿಕ್ಪಿ ನ್ಹಯ್, ಶಿಕ್ಪಿ ಜಾಲ್ಲೊ ತರ್ ಭೋವ್ಶಾ ತೊ ಫುಡಾರಿ ಜಾತೊಚ್ ನಾ. ತರ್ಯ್ ಸಮಾಜ್ವಾದಾ ವಿಶ್ಯಾಂತ್ ತಾಚಿ ಮಾಹೆತ್ ಆನಿಂ ಸಮ್ಜೊಣಿ ವಿಶೇಷ್. ಖೈಂಸರ್ ತೊ ಗೆಲ್ಯಾರ್ಯ್ ಭಾಶಣಾಂ ದಿಂವ್ಚಾಂತ್ ತಾಕಾ ಮಿಕ್ವಲ್ಲೊ ಕೊಣ್ಂಚ್ ನಾತ್ಲ್ಲೊ. ಉಲಂವ್ಕ್ ಸುರು ಕೆಲ್ಯಾರ್ ಉದ್ಕಾಭಾಶೆನ್ ಉಲಯ್ತಾಲೊ. ಲೊಕಾಂಚಾ ಕಾನಾಚೊ ಕಾನ್ಪೊ ಬೊಸ್ತಾವರೇಗ್ ಬೊಭಾಟ್ತಾಲೊ. ಕುಕ್ಕೆಹಳ್ಳಿ ಆನಿಂ ಮಲ್ನಾಡಾಂತ್ ತಾಚಾ ನಾಂವಾರ್ ದೆವಾಚಿ ಪುಜಾ ಚಲ್ತಾಲಿ, ತಾಕಾ ಕಾಂಯ್ ಶೆಳ್ ತಾಪ್ ಯೇತ್ ತರ್, ಘಡ್ಯೆನ್ ತಿ ಖಭಾರ್ ಹರ್ಯೆಕಾ ಪತ್ರಾಂನಿ ಯೆತಾಲಿ. ತಾಣೆಂ ಪೊಸುನ್ ದವರ್ಲೆಲೆ ಪತ್ರ್ಕರ್ತ್ ಆಸ್ಲ್ಲೆ ಆನಿಂ ತೆ ತವಳ್ತವಳ್ ಚುಕಾನಾಸ್ತಾಂ, ಪತ್ರಾಂನಿ ತಾಚಿ ಸ್ತುತಿ ಗಾಯ್ತಾಲೆ.
ಆಯ್ಲೆವಾರ್ ರಾನಾಂಕ್ ರುಕಾಂಕ್ ನಾಸ್ ಕರ್ಚಾ ವಿರೋಧ್ ಅಭಿಯಾನ್ ಚಲ್ಲೆಂ, ಆನಿಂ ತಾಂತುಂ ಕುಕ್ಕೆಹಳ್ಳೆನ್ಯ್ ವಾಂಟೊ ಘೆತ್ಲೊ. ಗಾಂವಾಂತ್ ರೂಕ್ ಆಸ್ಲ್ಯಾರ್ ಕಿತ್ಲೊ ಫಾಯ್ದೊ ಆಸಾ ಮ್ಹಳ್ಳ್ಯಾ ವಿಶ್ಯಾಚೆರ್ ಕಾಮ್ತಿನ್ ದೋನ್ ವೊರಾಂ ಭಾಶಣ್ ಬಿಗ್ದಿಲ್ಲೆಂ. ಅಪ್ಣಾನ್ ರೊಯಿಲ್ಲಿ ಜಾಂಬ್ಳಾಚಿ ರೊಂಪಿಯೆಚಿ ರುಜ್ವಾತ್ ತಾಣೆಂ ಲೊಕಾಂಕ್ ದಿಲಿ. ಆತಾಂ ತೊ ಕುಕ್ಕೆಹಳ್ಳೆಂತ್ಲೊ ವಡ್ಲೊ ರೂಕ್ ಜಾಲಾ ತರ್ಯ್ ತಾಚಿ ರೊಂಪಿ ಲಾಯಿಲ್ಲಿ ಕಾಮ್ತಿನ್ ಮ್ಹಳ್ಳೆಂ ಸದಾಂ ತೊ ಜಾಂಬ್ಳಾಂಚೊ ರೂಕ್ ವೊಪುನ್ ಘೆತಾ ಆನಿಂ ಆಪ್ಲೆಂ ಫಾಂಟೆ ಹಾಲಯ್ತಾ.
ಪರಿಸರ್ವಾದಿಂಕ್ ಕಾಮ್ತಿಚೆರ್ ಭರೊ ಅಭಿಪ್ರಾಯ್ ಆಸಾ, ಕಾಮ್ತಿನ್ ತೆಂ ಝಡ್ ಲಾಯಿಲ್ಲೆಂ ಗಾಂವ್ಚಾ ವಾಡಾವಳೆಕ್ ಮ್ಹಳ್ಳೆಂ ತಾಣಿಂ ಎದೊಳ್ಚ್ ಒಪುನ್ ಘೆತ್ಲಾಂ. ತಾಣಿಂ ಎದೊಳ್ಚ್ ಕಾಮ್ತಿಚಾ ಬರ್ಯಾ ಮನಾಕ್ ಹೊಗ್ಳಿಕ್ ಉಚಾರ್ಲ್ಯಾ. ಕಾಮ್ತಿ ದೆವಾಸ್ಪಣಾಚೊ ಮನಿಸ್ ದೆಕುನ್, ಸಯ್ತಾನಾಚೊ ಫಾತೊರ್ ಆಸ್ಚಾ ರುಕಾಕ್ ಘಡ್ಗಡೊ ಪಡ್ತಾನಾ ಹಿ ರೊಂಪಿ ರೊಯಿಲ್ಲಿ ಮ್ಹಣ್ ಥೊಡ್ಯಾಂಚೊ ವಾದ್. ಅನ್ಯೇಕಾ ಪರಿಸರ್ವಾದಿಚೊ ವಾದ್ ವೆಗ್ಳೊಚ್;
’ಕಾಮ್ತಿ ಏಕ್ ಮನ್ಶಾಪಣಾಚೊ ಮನಿಸ್ ದೆಕುನ್ ಹೊ ರೂಕ್ ಸುಕ್ಣಿಂ ಸವ್ಜಾಂಕ್ ಸಯ್ತ್ ಘೊಂಟೆರ್ ಬಾಂಧುಂಕ್ ಆವ್ಕಾಸ್ ಜಾಂವ್ದಿ ಮ್ಹಳ್ಳ್ಯಾ ನದ್ರೆನ್ ತಿ ರೊಂಪಿ ರೊಯ್ಲಿ’ ಮ್ಹಣಾಲೆ. ಸಮಾಜ್ವಾದಿ ಮನಿಸ್ ತಾಕಾ ಹೊಗ್ಳಿಕ್ ಪಾಟವ್ನ್ ಮ್ಹಣಾಲೆ ’ಸಮಾಜೆಕ್ ಎಕಾಮೆಕಾ ಎಕ್ವಟಿತ್ ಜಾವ್ನ್ ಉರಾಜೆ ತರ್ ದೇವ್ ಯಾ ಭಕ್ತ್ ಅಸಲೆ ವಿಚಾರ್ ಗರ್ಜೆಚೆ, ದೆಕುನ್ ಕಾಮ್ತಿನ್ ಆವ್ಕಾಸ್ ಕರ್ಚಾಕ್ ಹೆಂ ಝಡ್ ರೊಯಿಲ್ಲೆಂ’ ಮ್ಹಣ್ ಸಾಂಗಾಲಾಗ್ಲೆ.
ಕಿತೆಂ ಜಾಲ್ಯಾರ್ಯ್ ಖರೆಂ ಸತ್ ತೆಂ ಕಾಮ್ತಿಚಾ ಕಟ್ಟ್ಯಾಂತ್ ಆಸ್ಚೆಂ ಥಂಯ್ಚ್ ಉರ್ಲೆಂ;
ಹ್ಯಾ ರುಕಾಯ್ ಸಯ್ತ್ ಜಾಯ್ತೊ ಸಂಸಾರ್ ಪಳೆಲಾ, ಜಾಯ್ತೊ ಸಾಕ್ರಿಫಿಸ್, ಜಾಯ್ತ್ಯೊ ಹೊಮ್-ಬಲಿಯೊ ಚೊಯ್ಲ್ಯಾತ್, ಜಾಯ್ತಿಂ ಮೊನಿಂ ರುದಾನಾಂ ಪಳೆಲ್ಯಾಂತ್, ಮೊನೊ ಜಾವ್ನ್ ಜಾಯ್ತಿಂ ಸಾಲ್ವಾರ್ ಜಾಲ್ಲಿಂ ನಿಸ್ಕಳ್ಪಣಾಂ ಪಳೆಲ್ಯಾಂತ್, ಜಾಯ್ತ್ಯಾ ಮಾನ್ ಮನ್ಶಾಂಚಾ ತಾನ್-ಭುಕೆಚಿ ವಳೊಕ್-ಝಳಕ್ ರುಕಾಕ್ ನಖ್ಖಿ ಆಸಾ ತರ್ಯ್ ರೂಕ್ ಮೊನೊ ದೆಕುನ್ ಮೊನೊಂಚ್ ಆಸಾ. ಸಯ್ತಾನಾಚೊ ಫಾತೊರ್ ದವರ್ನ್ ಹ್ಯಾ ರುಕಾಚೆರ್ ಸಯ್ತಾನ್ ಆಸಾ ಮ್ಹಣ್ ರುಕಾಚಾ ನಾಂವಾರ್ಯ್ ಜಾಯ್ತೆಂ ಬಲಿಯೆಚೆಂ ಮನ್ಶಾಚೆಂ ರಗಾತ್ ವ್ಹಾಳ್ಳಾಂ ತೆಂ ರೂಕ್ಯ್ ಜಾಣಾಂ.
ಆತಾಂ ಪರಿಗತ್ ಬದ್ಲೊನ್ ಆಯ್ಲ್ಯಾ, ಗಾಂವಾಂತ್ ಶಿಕ್ಪಿ ಉದೆಲ್ಯಾತ್, ತಾಚೆ ವಿರೋಧ್ ಎಲಿಸಾಂವಾಕ್ ಹೆರ್ ಜಾತಿಚೆ ಉಭೆ ಜಾಲ್ಯಾತ್ ಪುಣ್ ಹಿ ಭಿರಾಂತ್ ತಾಕಾ ತಿತ್ಲಿ ನಾ ಜಿತ್ಲಿ ತಾಚಾಚ್ ಜಾತಿಚೊ ಎಕ್ಲೊ ತಾಚೆವಿರೋಧ್ ರಾವ್ಲ್ಲೆ ತಿತ್ಲಿ. ತರ್ಯ್ ತೊ ಕಾಂಯ್ ಉಣ್ಯಾಚೊ ನ್ಹಂಯ್, ಕಾಮಿಲ್ ಕಾಮ್ತಿ ವೆಗಿಂಚ್ ಹ್ಯಾ ಜಾಂಬ್ಳಾಂಚಾ ರುಕಾಲಾಗಿಂ ಏಕ್ ಲ್ಹಾನ್ ದೀವ್ಳ್ ಭಾಂದುಂಕ್ ಚಿಂತುನ್ ಆಸಾ. ಕಶೆಂ ಪುಣೀಂ ಏಕ್ ಲ್ಹಾನ್ ಮಂದಿರ್ ಭಾಂಧಿಜಾಯ್ ಆನಿಂ ಕುಕ್ಕೆಹಳ್ಳೆಚಾ ಗಾಂವಾಕ್ ಸಮರ್ಪಿತ್ ಕರಿಜಾಯ್ ಅಶೆಂ ತೊ ಲೇಕ್ ಘಾಲ್ತಾಲೊ. ಕಿತ್ಯಾಕ್ ತೊ ಖರೊಚ್ ಜಾಣಾಸ್ಲ್ಲೊ ಯೆಂವ್ಚಾ ಎಲಿಸಾಂವಾಕ್ ತಾಕಾ ಕಿತೇಂಯ್ ಜಿಕಂವ್ಕ್ ಸಕ್ತಾ ತರ್ ತೊ ಜಾಂಬ್ಳಾಂಚೊ ರೂಕ್ ಮಾತ್ರ್ ಮ್ಹಳ್ಳೆಂ.
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
