ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ವಿಂಚ್ಣಾರ್ ಮಟ್ವಿಕಾಣಿ: ಜಿಣ್ಯೆ ಸಾಂಗಾತಿ
ವಲ್ಲಿ ಕ್ವಾಡ್ರಸ್
ವಲ್ಲಿ ಕ್ವಾಡ್ರಸ್: ಕೊಂಕ್ಣಿ, ಕಾನಡಿ ಭಾಸೆಂತ್ ಪಾಟ್ಲ್ಯಾ ಪಂಚ್ವೀಸ್ ವರ್ಸಾಂ ಥಾವ್ನ್ ಲಗ್ಬಗ್ ದೊನ್ಶಾಂ ವಯ್ರ್ ಮಟ್ವ್ಯೊ ಕಾಣ್ಯೊ ಬರಯ್ಲ್ಯಾತ್. ಸ್ವತಾಚೆ ತೀನ್ ಬೂಕ್ ’ಆಶಾವಾದಿ’, ’ಖಿಳೊ’, ’ಕಂಗಾಲ್ ಆನಿ ತಾಚಿ ಕುಕ್ಕೆಹಳ್ಳಿ’ ಪರ್ಗಟ್ಲ್ಯಾತ್, ಹೆರಾಂಚಾ ಕಾಣ್ಯಾಂಚೊ ಬೂಕ್ ’ಕುಳ್ವಾರ್ಚೆಂ ದಾಯ್ಜ್’, ’ಸರ್ಗಾವಯ್ಲಿ ಮಾಂಯ್’ ಬುಕಾಂಚೆಂ ಸಂಪಾದನ್ ಕೆಲಾಂ, ಕರ್ನಾಟಕ್ ಕೊಂಕ್ಣಿ ಸಾಹಿತ್ಯ್ ಅಕಾಡೆಮಿಚಾ ಶೆಕ್ಡ್ಯಾಚ್ಯೊ ವಿಂಚ್ಣಾರ್ ಕೊಂಕ್ಣಿ ಮಟ್ವ್ಯೊ ಕಾಣ್ಯೊ ಬುಕಾಚೊ ಸಂಗ್ರಹಕ್ ಜಾವ್ನಾಸಾ. ಕೊಂಕ್ಣಿ ಮಟ್ವ್ಯಾ ಕಾಣ್ಯಾಂಚೆಂ ಅಂಕಣ್ ’ಮುಖಾಂ’ ಚಲವ್ನ್ ವೆಲಾಂ ತಶೆಂಚ್ ಪ್ರಸ್ತುತ್ ಚ್ಯಾರ್ ಅಂಕಣಾಂ, ’ಕಥಾಮೃತ್’, ’ಕಥಾದಾಯ್ಜ್’, ’ಕಥಾಝರ್’, ’ಕಥಾಂಕರ್’ ಚಲವ್ನ್ ವರ್ತಾ. ಮಟ್ವ್ಯಾ ಕಾಣ್ಯಾಂಚೆರ್ ಅಧ್ಯಯನ್ ’ಕಥಾಪಾಠ್’ ಚಲವ್ನ್ ವೆಲಾಂ. ರಾಕ್ಣೊ ಸಾಹಿತಿಕ್ ಸ್ಪರ್ಧ್ಯಾಂತ್ ತೀನ್ ಪಾವ್ಟಿಂ ಇನಾಮಾಂ ಜಿಕ್ಲಾ. ಹಾಚ್ಯೊ ತೀನ್ ಮಟ್ವ್ಯೊ ಕಾಣ್ಯೊ ನಾಟ್ಕುಳೆ ಜಾವ್ನ್ ಖೆಳಯ್ಲ್ಯಾತ್. ಧಾಂವ್ಣಿ (ದೆ|ಜೊರ್ಜಿ ಪೀಂತ್), ಖಣ್ (ಸ್ವ), ಗೂಂಡಾ (ಮೆಲ್ವಿನ್ ಜೆ. ವಾಸ್).
ಹೆರ್ ಕಾಣ್ಯೊ: ಏಕ್ ಕ್ರಿಕೆಟ್ ಹೀರೊ, ಬಾಂಯ್, ಖಣ್, ಕುಡ್ಡೊ, ಜಾಂಬ್ಳಾಂಚೊ ರೂಕ್, ಆಶಾವಾದಿ, ಏಕ್ ಮೊಗಾಚಿ ಕಥಾ, ಸಂಬಂಧ್, ಶನಿ, ಖುರ್ಸಾವಾಟ್, ಕಂಟ್ರಿ ಆವಯ್, ಭಾಂದ್, ಸುಟ್ಕಾ, ಅಜ್ಜಿಕುಂಜ, ಜಿಣ್ಯೆ ಸೂತ್ರ್, ಮಾರ್, ತೆಂ ಆನಿ ಹಾಂವ್, ಅನಾವರಣ್, ಮತಾಂತರ್, ಸೊಲ್ಲೊ.
"ಹ್ಯೇ ಪಾವ್ಟಿಂ ಹ್ಯಾ ಗಾಡ್ವಾಚಿ ಸಯ್ರಿಕ್ ಚುಕತ್ ತರ್ ತೆಂ ಮಾದ್ರಿಂಕ್ ವಚೊಂದಿ"
ಥೊಡ್ಯಾ ದಿಸಾಧ್ಲೆಂ ಹೆಂ ಉತಾರ್ ಆಯ್ಕಲ್ಲೆ ಥಾವ್ನ್ ಸಿಲ್ವಿಚ್ಯಾ ದೊಳ್ಯಾಂಕ್ ರಾತಿಚೆಂ ನೀದ್ ಪಡಾನಾತ್ಲ್ಲಿ.
ತಶೆಂ ಮ್ಹಣೊನ್ ಹಾಚ್ಯಾಕೀ ನಿರ್ದಯ್ ಉತ್ರಾಂ ಆಯ್ಕೊನ್ ಸವಯ್ ಜಾಲ್ಲ್ಯಾ ಸಿಲ್ವಿನ್ ಅಜೂನ್ ಪಾಸೊನ್ ಹ್ಯೇವಿಶಿಂ ಕಿತೆಂಚ್ ಕೆಲ್ಲೆಂನಾ. ಕರ್ಚೆಂ ತರ್ಯೀ ಕಿತೆಂ?
ಕಾಂಯ್ ಸಾಲಾಂತ್ ಎಕ್ಸುರೆಂ ನಿದ್ಲ್ಲ್ಯಾ ತಾಣೆಂ ಕಾಂಯ್ ರಾತ್ಚ್ಯಾ ಮಧ್ಯಾನೆರ್ ಉಟೊನ್ ಅಂಕ್ವಾರ್ ಮರಿಯೆಚ್ಯಾ ಇಮಾಜೆಸಮೊರ್ ದಿಂಬಿ ಘಾಲುನ್ ಗುಪ್ತಿಂ ರಡೊನ್ ವಿಳಾಪ್ ಮಾತ್ರ್ ಕರಿಜಾಯ್ ಶಿವಾಯ್, ಸಿಲ್ವಿಚಿ ಜಿಣಿ, ತೀಯ್ ಪಾಟ್ಲ್ಯಾ ಥೊಡ್ಯಾ ಮಯ್ನ್ಯಾಂನಿ ಸಿಲ್ವಿನ್ ಸಾರ್ಲ್ಲೆ ದೀಸ್, ಆನಿ ಭಗ್ಲ್ಲೆ ಆಟೆವಿಟೆ ಫಕತ್ತ್ ಘರ್ಚ್ಯೊ ಮೊನ್ಯೊ ವೊಣೊದಿ ಮಾತ್ರ್ ಜಾಣಾಂತ್.
"ಜಲ್ಮ್ ದಿಲ್ಲಿ ಆವಯ್ ನಾತ್ಲ್ಲ್ಯಾ ಭುರ್ಗ್ಯಾನ್ ವಾಂಚೊನ್ ಕಾಂಯ್ ಫಾಯ್ದೊ ನಾ" - ಸೆಜಾರ್ಚ್ಯಾಂಚ್ಯಾ ಲೊಕಾಂಚ್ಯಾ ಜಿಬೆರ್ ಗಾಜೊನ್ ಆಸ್ಚೆಂ ಹೆಂ ಉತಾರ್ ಕಿತ್ಲೆಂ ಸತ್?
"ಬಾಪುಯ್ ಹೆಂ ಸರ್ವ್ ಜಾಣಾಂ ತರ್ಯೀ ವಿರೋಧ್ ಕರ್ಚಿ ತಾಚಿ ಶ್ಯಾಥಿ ಭೋವ್ಶಾ ಅಪ್ಲೆ ಪಯ್ಲೆ ಬಾಯ್ಲೆಕ್ ಸಿಮೆಸ್ತ್ರಿಚ್ಯಾ ಫೊಂಡಾಂತ್ ಪುರ್ತಾನಾಂಚ್ ಪುರ್ಲ್ಯಾ ಜಾಯ್ಜಯ್". ಲೋಕ್ ಘುಟಾನ್ ತರ್ಯೀ ನಾನಾ ರಿತಿರ್ ಉಲಯ್ತಾಲೊ.
ಭುರ್ಗ್ಯಾಪಣಾಲ್ಯಾ ದಿಸಾಂನಿ ಸಯ್ತ್ - ಪ್ರಾಯೆನ್ ವ್ಹಡ್ಲೆಂ ದೆಖುನ್ ಲ್ಹಾನಾ ಭಾಂವ್ಡಾಂಕ್ ಸೊಸುನ್ ಜಿಯೆಲ್ಲೆಂ ಚೆಡುಂ, ವ್ಹಡ್ ಜಾವ್ನ್ ಕಾಂಯ್ ದೆವಾನ್ ಅಪ್ಣಾಕ್ ನಿರ್ಮಿಲ್ಲ್ಯಾ ಚಲ್ಯಾಚೊ ಹಾತ್ ಧರುನ್ ವೆತಾಸರ್ ಕಾಂಯ್ ರೆಚೆಲಾಚ್ಯಾ ಜಿವಾಕ್ ಸುಶೆಗ್ ನಾತ್ಲ್ಲೊ. ಹಾಕಾ ಕಾರಾಣ್ಯೀ ಆಸ್ಲೆಂ ಮ್ಹಣ್ಯೆತ್. ಜಲ್ಮೊನ್ ಮಯ್ನ್ಯಾ ಭಿತರ್ ಆವಯ್ಕ್ ಗಿಳ್ಲ್ಲೆಂ ಚೆಡುಂ ಮ್ಹಳ್ಳೊ ಬಿಲ್ಲೊ ಲ್ಹಾನ್ಪಣಾರ್ ಥಾವ್ನ್ ಸದಾಂಚೊ ಜಾಲ್ಲೊ ಸಿಲ್ವಿಕ್. ಪಳೆಂವ್ಕ್ ಸಾವ್ಳೆಂ ಜಾವ್ನಾಸೊನ್ ಆಂಗ್ಭರ್ ಧವಿಂ ಶಿಬಾಂ - ಕಾಂಯ್ ಕೋಡ್ ಲಾಗ್ಲ್ಲ್ಯಾಂಪರಿಂ. ರಾಂದುಂಕ್ ಶಿಕೊಂಕ್ನಾತ್ಲ್ಲೆಂ ತರ್ಯೀ ಘರ್ಚ್ಯಾ ಹೆರ್ ಕಾಮಾಂತ್ ಮಾತ್ರ್ ಸಕಾಳಿಂಚಿ ಚಾ ಕರ್ಚೆಂ, ಘರ್-ವಸ್ತ್ರಾಂ ನಿತಳ್ ಕರ್ಚೆಂ ಥಾವ್ನ್ ರಾತಿಚೆಂ ಜೇವ್ನ್ ಆಯ್ದನಾಂ ಘಾಸುನ್, ಕೂಜ್ನ್ ಪುಸುನ್ ನಿದ್ತಾ ಪರ್ಯಾಂತ್ ಹರ್ಯೆಕ್ ಕಾಮ್ ಕರ್ಚೆಂ ತಾಣೆಂಚ್ ಆಸ್ಲೆಂ. ಪಯ್ಲೆಂ ಶಿಕಂವ್ಚ್ಯಾ ನಿಬಾನ್ ಲ್ಹಾನ್ ಪ್ರಾಯೆರ್ ಸುರ್ವಾತ್ ಕೆಲ್ಲ್ಯಾನ್ ಕೆದಿಂಚ್ ಸಿಲ್ವಿನ್ ಮೌಶೆಚ್ಯೊ ಗಾಳಿ ಸೊವ್ಯೊ ಆಯ್ಕನಾಸ್ತಾಂ ನಿದೊಂಕ್ ಗೆಲ್ಲೊ ಉಡಾಸ್ ನಾ.
ಗಾಂವಾಂತ್ ಪಿಯುಸಿ ಪರ್ಯಾಂತ್ ಶಿಕೊನ್ ಗಲ್ಫಾಕ್ ಯೇವ್ನ್ ಎಕಾ ಖಾಸ್ಗಿ ಕಂಪ್ಣೆಂತ್ ಗುಮಾಸ್ತ್ ಜಾವ್ನ್ ಕಾಮಾಚಿ ಸುರ್ವಾತ್ ಕೆಲ್ಲ್ಯಾ ಗುಸ್ತಾಂವಾಕ್ ಗಲ್ಫಾಂತ್ ಚಡ್ತಾವ್ ವಳ್ಕತಾತ್. ಮಾಗ್ಣ್ಯಾ ಜಮಾತೆಚೊ ಮುಖೆಲಿ ತೊ. ತೆಚ್ಚ್ಪರಿಂ ಇಗರ್ಜೆಂತ್ ಸದಾಂಚಿಂ ಮಾಗ್ಣಿಂ, ಕಾಂತಾರಾಂ ಶಿಕಂವ್ಚೊ ತೊ. ಆನಿ ತಾಚೆಸವೆಂ ಕಾಂತಾರಾಂ ಶಿಕಂವ್ಚಿ ರೆಚೆಲ್ ಬಾಯ್ ಮ್ಹಳ್ಯಾರ್ ಸಗ್ಳಿಂ ವಳ್ಕತಾತ್.
ಎಕಾ ಖಾಸ್ಗಿ ಕಂಪ್ಣೆಂತ್ ಸೆಕ್ರೆಟರಿ ಕಾಮ್ ಕರ್ನ್ ಆಸ್ಚಿ ರೆಚೆಲ್ ಬಾಯ್ ಗರ್ಜೆವಂತ್ ಲೊಕಾಂಕ್ ಆಸ್ರೊ ಮ್ಹಣ್ ಸಭಾರಾಂ ಮಾಂದ್ತಾತ್. ಸಭಾರಾಂಕ್ ಹಿಣೆ ಸಯ್ರಿಕ್ ಸೊಧುನ್ ದಿಲ್ಯಾ. ಕಾಮಾಂ ತಲಾಸ್ ಕರುನ್ ದಿಲ್ಯಾಂತ್. ಇಗರ್ಜೆಂತ್ ಸದಾಂಚೊ ತೇರ್ಸ್ ಹಿಂ ಚುಕಯ್ನಾಂತ್. ಹಾಫ್ತ್ಯಾಚ್ಯೊ ಮಾಗ್ಣ್ಯಾ ಜಮಾತ್ಯೊ ಹಿಣೆಂಚ್ ಚಲವ್ನ್ ವರ್ಚ್ಯೊ. ತೆರ್ಸಾ ಥಾವ್ನ್ ಭಾಗೆವಂತ್ ವೊರಾಂ, ನೊವೆನಾ ಥಾವ್ನ್ ರೆತಿರೊ ಪರ್ಯಾಂತ್ ಕಿತೆಂಚ್ ತಿ ಚುಕಯ್ನಾ.
ಪಯ್ಲಿ ಬಾಯ್ಲೆನ್ ಎಕಾ ಮಯ್ನ್ಯಾಚೆಂ ಭುರ್ಗೆಂ ಸೊಡುನ್ ಸಂಸಾರಾತ್ ಅಧೇವ್ಸ್ ಮಾಗ್ತಾನಾ ತರ್ಯೀ ಗುಸ್ತ್ಯಾಂವಾಕ್ ಕಿತೆಂಚ್ ಚಿಂತ್ಲ್ಲೆಂನಾ. ಸಯ್ರಿಕ್ ಸೊಧುನ್ ಸೊಧುನ್ ಪುರೊ ಜಾಲ್ಲೆಂ ರೆಚೆಲ್ ಕಶೇಂಯ್ ಗೊಮ್ಟ್ಯಾಕ್ ಪಾಡ್ಲೆಂ. ಪಯ್ಲೆಂ ಪಯ್ಲೆಂ ಮಯ್ಪಾಸಾಚೊ ಸುಕೊ ಸಯ್ಲಾಪ್ ದೀಸ್ ಗೆಲ್ಲೆಪರಿಂ ಮಾಯಾಗ್ ಜಾವ್ನ್ ಆಯ್ಲೊ. ಪಯ್ಲೆಂ ಏಕ್, ಉಪ್ರಾಂತ್ ಪಾಟಾಪಾಟ್ ದೋನ್ ಭುರ್ಗಿಂ ಜಾಲ್ಲೆಂಚ್ ರೆಚೆಲ್ ಬಾಯೆನ್ ಸಿಲ್ವಿಕ್ ಲೆಖ್ಚಿ ನದರ್ ವೆಗ್ಳಿಚ್ ಜಾಲಿ.
ದೋನ್ ಬೆಡ್ರುಮಾಚೆಂ ಘರ್ ತೆಂ - ಭಾಡ್ಯಾಚೆಂ. ಘರ್ಚಿ ಜೋಡ್, ಘರ್ಚ್ಯಾ ಭಾಡ್ಯಾಕ್, ನೆಸ್ಪಾಕ್, ಭುರ್ಗ್ಯಾಂಚ್ಯಾ ಶಿಕ್ಪಾಕ್ ಮ್ಹಣೊನ್ ವರ್ಸಾಂ ಉಭ್ಲಿಂಚ್.
**********
ಆತಾಂ ರೆಚೆಲ್ ಬಾಯೆಚೊ ಮಾಲ್ಘಡೊ ಪೂತ್ ಅಮೆರಿಕಾಂತ್ ಇಜ್ನೆರಾಚೆಂ ಶಿಕಾಪ್ ಶಿಕೊನ್ ಆಸಾ. ಕಾಂಯ್ ಹ್ಯಾ ವರ್ಸಾಂತ್ ತೊ ಶಿಕಾಪ್ ಸಂಪವ್ನ್ ಕಾಮಾಕ್ ಲಾಗ್ಚ್ಯಾರ್ ಆಸಾ.
ದೊಗೀ ಧುವೊ ಆಸ್ಟ್ರೇಲಿಯಾಂತ್ ಶಿಕೊನ್ ಆಸಾತ್; ಎಕ್ಲೆಂ ಬಿಜ್ನೆಸ್ ಮ್ಯಾನೆಜ್ಮೆಂಟ್ ಅನಿ ದುಸ್ರೆಂ ಮೆಡಿಕಲ್ ಶಿಕ್ತಾ. ಸಿಲ್ವಿನ್ ಅಪ್ಲೆಂ ಕೊಲೆಜಿಚೆಂ ಶಿಕಾಪ್ ಸಂಪಯ್ತಚ್ ರೆಚೆಲ್ ಬಾಯೆಚ್ಯಾ ಖಂತಿಕ್ ಚಡಂವ್ಕ್ ಲಾಗ್ಲ್ಲೆಂ. ಕಾಂಯ್ ಹಾಚೆಂ ಕಾಜಾರ್ ಕರ್ನ್ ದಿಲೆಂ ತರ್ ಉಪ್ರಾಂತ್ ಕಾಂಯ್ ಇಲ್ಲೆಂ ಪುಂಜಾವ್ಯೆತ್ ಮ್ಹಳ್ಳಿಂ ಚಿಂತ್ನಾಂ ರೆಚೆಲಾಚಿಂ.
ಅಶೆಂ ದೋನ್ ತೀನ್ ಸಯ್ರಿಕೊ ಜರೂರ್ ಆಯಿಲ್ಲ್ಯೊ. ಪುಣ್ ಆಯಿಲ್ಲ್ಯಾ ಚೆಡ್ಯಾಂಕ್ ಆಟ್ನೆಟಾಚಿಂ ಧಾಕ್ಟಿಂ ಚೆಡ್ವಾಂಚ್ ಪಸಂದ್ ಜಾತಾಲಿಂ ಶಿವಾಯ್, ಸಾದ್ಯಾ ವೆಸಾರ್ ಕಾಮಾಚ್ಯಾ ಚೆಡ್ವಾಪರಿಂ ದಿಸ್ಚೆಂ ಸಿಲ್ವಿ ಕೊಣಾಕ್ಚ್ ಪಸಂದ್ ನಾತ್ಲ್ಲೆಂ.
ಅಶೆಂ ಮ್ಹಣೊನ್ ರೆಚೆಲ್ ಬಾಯೆನ್ ಅಪ್ಲ್ಯಾ ವಳ್ಕಿಚ್ಯಾ ಚಡ್ತಾವಾಂಕ್ ಸಾಂಗೊನ್ ದರವ್ಲಾಂ. ಮಾಗ್ಣ್ಯಾ ಜಮಾತಿಂನಿ ಸಯ್ತ್ ತಿಣೆ ಚಿಟಿ ಬರವ್ನ್ ಘಾಲ್ಯಾತ್. ಚೆಡ್ವಾಕ್ (ಗಾಡ್ವಾಕ್) ಏಕ್ ಸಯ್ರಿಕ್ ಧಾಡ್ ದೆವಾ ಮ್ಹಣೊನ್. ಹರ್ಯೆಕಾ ನೊವೆನಾ ವೆಳಾರ್, ಹರ್ಯೆಕಾ ರೆತಿರೆಂನಿ ತಿಚೆಂ ಪ್ರಾರ್ಥನ್ ಎಕ್ಚ್ - ಆಪ್ಲ್ಯಾ ಖಾಂದ್ಯಾಚೆರ್ ಆಸ್ಲ್ಲೊ ಖುರಿಸ್ ನಿವ್ರಾಂವ್ಕ್.
ಕಸಲಿಚ್ ಪ್ರತಿರೋದ್ ದಿಂವ್ಚೆಂ ಮನ್ ಸಿಲ್ವಿಚ್ಯಾ ಮತಿನ್ ಕೆದ್ನಾಂಗೀ ಸೊಡ್ಲ್ಲೆಂ. ಥೊಡೆ ಪಾವ್ಟಿಂ ಸಿಲ್ವಿಕ್ ಭಗ್ತಾಲೆಂ - ಅಪ್ಲ್ಯಾ ಮತಿಂತ್ ಅಪ್ಲೆಂ ಬರೆಂ ವಾಯ್ಟ್ ಚಿಂತ್ಚೆಂ ಸಯ್ತ್ ಗುನ್ಯಾಂವ್ಕಾರಿ ಮ್ಹಣೊನ್. ಸಾಂಗ್ಚೆಂ ತರ್ಯೀ ಕೊಣಾಲಾಗಿಂ ಸಾಂಗ್ಚೆಂ? ಕೊಲೆಜಿಕ್ ಗೆಲ್ಲೆಂ ಚೆಡುಂ ತೆಂ ತರ್ಯೀ, ಖಾಸ್ ಮ್ಹಣ್ಚೆತಸಲಿಂ ಕೊಣೀಂ ತಾಚೆಸವೆಂ ಸಳಾವಳೆನ್ ನಾಸ್ಲ್ಲಿಂ. ತರ್ನಾಟ್ಪಣಾರ್ ಥೊಡೆಂ ಚೊರಿಯೆನ್ ಥೊಡೆಂ ಲಿಪವ್ನ್ ಗುಪ್ತಿಂ ಮಝಾ ಭಗೊನ್ ಸಮಾಜೆಂತ್ ಪ್ರತಿಶ್ಟಿತ್ ಜಿಣಿ ಜಿಯೆಂವ್ಚಿ ಸವಯ್ ನಾತ್ಲ್ಲ್ಯಾಂಕ್ ಕೊಣ್ ಲಾಗಿಂ ಕರ್ತಿತ್?
**********
ಆತಾಂ ಘರಾಂತ್ ಆಸ್ಚಿಂ ತೆಗಾಂಚ್ - ಸಿಲ್ವಿಚಿ ಮೌಶಿ ಆನಿ ಪಪ್ಪಾ ಆನಿ ಸಿಲ್ವಿ. ದೆಕುನ್ ಭಿತರ್ ಪುಸುರ್ ಪುಸುರ್ ಉಲವ್ಣೆಂ ಜಾತಾನಾ ಸಯ್ತ್ ಭಾಯ್ರ್ ಸಿಲ್ವಿಕ್ ಸಮ್ಜತಾಲೆಂ ತೆಂ ಕೊಣಾವಿಶಿಂ ಉಲವ್ಣೆಂ ಜಾತಾ ಮ್ಹಳ್ಳೆಂ.
ಆಯ್ಲೆವಾರ್ಚ್ಯಾ ಥೊಡ್ಯಾ ದಿಸಾಂ ಥಾವ್ನ್ ರೆಚೆಲ್ ಬಾಯೆನ್ ಸಿಲ್ವಿಕ್ ಗರ್ಜೆಪುರ್ತೊ ಮಯ್ಪಾಸ್ ಧಾಖಂವ್ಕ್ ಸುರು ಕೆಲೊ. ನೆಸ್ಪಾಂತ್, ಚಾಲಿಂತ್, ಉಲವ್ಪಾಂತ್ ಕಶೆಂ ಉಲಯ್ಜಾಯ್, ಕಶೆಂ ಬಸಾಜಯ್ ಮ್ಹಳ್ಳಿ ತರ್ಭೆತ್ ದೀಂವ್ಕ್ ಸುರು ಕೆಲೆಂ. ಸಿಲ್ವಿಕ್ ಸಮ್ಜಾನಾತ್ಲ್ಲೆಂ ತರ್ಯೀ, ಮೌಶೆಚಿ ಹುಕುಮ್ ಮೊಡ್ಚೆಂ ಧಯ್ರ್ ನಾತ್ಲ್ಲ್ಯಾನ್ ಪಾಳುಂಕ್ ಪಡ್ಲೆಂ.
"ಚೆಡೊ ಗಾಂವಾಂತ್ ಭಾರಾವಿ ಶಿಕ್ಲಾ ಕಂಯ್. ಮ್ಹಜೊ ಘೊವ್ ಖಂಯ್ ಚಡ್ ಶಿಕ್ಲಾ? ದೆಕುನ್ ಆಮ್ಚೆಂ ಚೆಡುಂ ಕೊಲೆಜ್ ಶಿಕ್ಲ್ಯಾರ್ ಕಿತೆಂ ಜಾಲೆಂ? ತಾಚೆಪಾಸತ್ ದೆವಾನ್ ನಿರ್ಮಿಲ್ಲೊ ಚಲೊ ತರ್ ತೊಚ್ಚ್ ಸಯ್"
ಥೊಡ್ಯಾ ದಿಸಾಧಿಂ ರಾತ್ಚೆಂ ಫೊನಾರ್ ಉಲಂವ್ಚ್ಯಾ ರೆಚೆಲಾಚೊ ತಾಳೊ, ಕುಜ್ನಾಂತ್ ಆಯ್ದಾನಾಂ ಧುಂವ್ಚ್ಯಾ ಸಿಲ್ವಿನ್ ಆಯ್ಕತಚ್ ಕಳ್ಳೆಂ ಪರತ್ ಅಪ್ಣಾಕ್ ಪಳೆಂವ್ಕ್ ಕೊಣೀಂ ಯೆತೆಲಿಂ ಮ್ಹಣ್.
ರೆಚೆಲ್ ಅಪ್ರೂಪಾನ್ ಕಾಣ್ಯೊ ವಾಚ್ತಾಲೆಂ. ಟಿವಿ ಪಳೆತಾಲೆಂ. ಕೊಲೆಜಿಂತ್ ಆಸ್ತಾನಾ ತಾಚಿಂ ಸಾಂಗಾತಿಣ್ಯೊ ಸಯ್ತ್ ಮೊಗಾಚ್ಯೊ ಕಾಣ್ಯೊ ಸಾಂಗ್ತಾಲಿಂ. ಅಶೆಂ ಸಿಲ್ವಿಕ್ಯೀ ಭಿತರ್ಲೆ ಭಿತರ್ ಅಪ್ಣಾಕ್ಯೀ, ಅಪ್ಣಾಚೊ ಮೋಗ್ ಕರ್ಚೊ ಜಾಯ್ ಮ್ಹಳ್ಳಿ ಸುಪ್ತಿ ಆಶಾ ಆಸ್ಲಿ. ತರ್ಯೀ ಚಡ್ತಿಕ್ ಕಿತೆಂಚ್ ಚಿಂತುಂಕ್ ಸಯ್ತ್ ಸಿಲ್ವಿ ಕಾವ್ಜೆತಾಲೆಂ.
**********
"ಸಯ್ರ್ಯಾಂ ಮುಕಾರ್ ಕಿತೆಂ ಕರಿಜಾಯ್ ಮ್ಹಳ್ಳೆಂ ಉಡಾಸ್ ಆಸಾನೆ ಪುತಾ?"
ಸಕಾಳಿಂಚ್ಯಾ ಚಾಯೆಚೆಂ ಕೋಪ್ ಮೆಜಾರ್ ದವರ್ನ್ ರೆಚೆಲಾನ್ ಸಿಲ್ವಿಕ್ ಆಪ್ಲೊ ಸುಕೊ ಸಯ್ಲಾಪ್ ಧಾಖಯ್ಲೊ. ಗುಸ್ತ್ಯಾಂವ್ ಕಸೊಯ್ ಜಿವೆಂ ಮೊಡೆಂಚ್ - ಕಸಲಿಂಚ್ ಭಗ್ಣಾಂ ತಾಚ್ಯಾ ತೊಂಡಾರ್ ಹಾಡಿನಾತ್ಲ್ಲೊ. ಭಾಯ್ರ್ ವಚೊನ್ ಗರ್ಜೆಚೊ ಸಾಮಾನ್ ಹಾಡ್ಚ್ಯಾಕ್ ಭಾಯ್ರ್ ಗೆಲೊ.
ರೆಚೆಲ್ ಚಾ ಪಿಯೆವ್ನ್ ಭಾಯ್ಲ್ಯಾ ಸಾಲಾಂತ್ ಸರ್ಭಯಾರ್ ಕರ್ಚ್ಯಾರ್ ಪಡ್ಲ್ಲಿ. ಸಿಲ್ವಿಕ್ ಆಂಗ್ಭರ್ ನ್ಹೆಸೊಂಕ್ ಸಾಂಗೊನ್ ತಿ ಕುಜ್ನಾಕ್ ರಿಗೊನ್ ರಾಂದ್ಚ್ಯಾರ್ ಪಡ್ಲಿ ತರ್ ಸಿಲ್ವಿ ನ್ಹೆಸೊನ್, ಗಳ್ಯಾರ್ ಮೌಶೆನ್ ದಿಲ್ಲಿ ಚೇಯ್ನ್ ಘಲುನ್, ಎಕಾ ಹಾತಾಚೆರ್ ವೋಚ್ ತರ್ ಅನ್ಯೇಕಾ ಹಾತಾರ್ ಬ್ರೇಜ್ಲೆಟ್ ಘಾಲುನ್ ಎಕಾ ನೋಟ್ಪ್ಯಾಡಾಕ್ ಘೆವ್ನ್ ಆಪ್ಲ್ಯಾಚ್ ಸಂಸಾರಾಂತ್ ಕಿತೆಂಗೀ ಗಿಚ್ಚುಂಕ್ ಲಾಗ್ಲೆಂ.
ಭಾಯ್ರ್ ಸಾಲಾಂತ್ ಮಧುರ್ ಸಂಗೀತ್ ಚಾಲು ಆಸ್ಲ್ಲೆಂ.
ಘಡಿಯಾಳಾಚೆ ಖಾಂಟೆ ಅಪ್ಲಿಂ ಪಾವ್ಲಾಂ ಕಾಡುನ್ ಆಸ್ಲೆ.
ವೊರಾಂ ಕಾಂಯ್ ಸಾಡೆ ಭಾರಾ ಜಾತಾನಾ ಗುಸ್ತ್ಯಾಂವ್ ಆಯ್ಲೊ. ಹಾತಾಂನಿ ಬೊತ್ಲ್ಯೊ, ವಾಯ್ನ್, ಆನಿ ಹೆರ್ ಸಾಮಾನ್ ಘೆವ್ನ್ ವ್ಹರ್ನ್ ಕುಜ್ನಾಂತ್ ದವರ್ನ್ ಭಾಯ್ರ್ ಯೇವ್ನ್ ದಿಸಾಳ್ಯಾಚೆರ್ ನದರ್ ಚರಂವ್ಕ್ ಲಾಗ್ತಾನಾ ಬಾಗ್ಲಾಚೆಂ ಕೋಲ್ ಬೆಲ್ ಆವಾಜ್ಲೆಂ.
’ಸಯ್ರಿಂ ಆಯ್ಲಿಂ’ ಕುಜ್ನಾಂತ್ ಎದೊಳ್ಚ್ ರಾಂದ್ಚ್ಯಾರ್ ಪಡ್ಲ್ಲ್ಯಾ ರೆಚೆಲಾಚೆಂ ತೋಂಡ್ ಫುಲ್ಲೆಂ.
ಗುಸ್ತ್ಯಾಂವಾನ್ ಬಾಗಿಲ್ ಉಗ್ತೆಂ ಕೆಲೆಂ, ಯೆದೊಳ್ಚ್ ಕಳಿತ್ ಆಸ್ಚೆಪರಿಂ ಭಾಯ್ರ್ ಸಿಲಾಮ್, ತಶೆಂಚ್ ತಾಚೆಸವೆಂ ಏಕ್ ಜೊಡೆಂ, ಆನಿ ಏಕ್ ತರ್ನಾಟೊ ಆಸ್ಲಿಂ.
"ಭಿತರ್ ಯೆಯಾತ್..." ರೆಚೆಲಾನ್ ಸ್ವಾಧಿಕ್ ಹಾಸೊ ದೀವ್ನ್ ಸ್ವಾಗತ್ ದಿಲೊ.
ಸಯ್ರಿಂ ಯೇವ್ನ್ ಸೊಫಾಚೆರ್ ಬಸ್ಲಿಂ, ಮಧೆಂ ಚೆಡೊ, ದಾವ್ಯಾಕ್ ಚೆಡ್ಯಾಚಿ ಆಕಯ್ ಆನಿ ಉಜ್ವ್ಯಾಕ್ ಬಾಪ್ಪು, ಆನಿ ದೆಗೆಚ್ಯಾ ಕದೆಲಾಚೆರ್ ಸಿಲಾಮ್ ಬೊಸ್ಲೊ ತರ್ ಮುಖ್ಲ್ಯಾನ್ ಗುಸ್ತ್ಯಾಂವ್ ಬೊಸ್ಲೊ. ರೆಚೆಲ್ ಧುವೆಕ್ ಆಪಂವ್ಕ್ ಭಿತರ್ ಗೆಲಿ.
ಸಯ್ರಿಂ ಘರಾಂತ್ ಮಾಂಡುನ್ ದವರ್ಲ್ಲ್ಯಾ ಇಮಾಜೆಂಕ್ ಪಳೆಂವ್ಚ್ಯಾರ್ ಮಗ್ನ್ ಆಸ್ಲಿಂ. ಮರಿಯೆಚ್ಯೊ ಇಮಾಜ್ಯೊ, ಕೊಂತಾಂ, ಆಲ್ತಾರ್, ದಿವೆ, ರಾಮ್, ಕಣ್ಶ್ಯೊ, ವಾಂಜೆಲ್, ಕಾಂತಾರಾಂ ಬೂಕ್, ಮಾಗ್ಣ್ಯಾಚೆ ಬೂಕ್ ಯಥೇಷ್ಟ್ ಮಾಪಾನ್ ಆಸ್ಚೆ ಪಳೆಲ್ಲ್ಯಾ ಸಯ್ರ್ಯಾಂನಿ ಭಿತರ್ಲೆ ಭಿತರ್ ಥಿಂಪಿ ಗಿಳ್ಳಿ.
ಥೊಡ್ಯಾಚ್ ವೆಳಾನ್ ಸಿಲ್ವಿನ್ ಹಾತಿಂ ಥಂಡ್ ಘೆವ್ನ್ ಸಯ್ರ್ಯಾಂ ಸಮೊರ್ ಉಭೆಂ ಜಾಲೆಂ. ಮೌಶೆನ್ ಸಾಂಗೊನ್ ದಿಲ್ಲೆಪರಿಂಚ್ "ಗುಡ್ ಮೋರ್ನಿಂಗ್" ಮ್ಹಣೊಂಕ್ ವಿಸರ್ಲೆಂ ನಾ. ಪುಣ್ ಸಿಲ್ವಿಚ್ಯಾ ತೊಂಡಾರ್ ಕಸ್ಲಿಚ್ ಲಜ್ ವಾ ಭಿರಾಂತ್ ಝಳ್ಕಾನಾತ್ಲ್ಲಿ.
ಸಯ್ರ್ಯಾಂನಿ ಹಾತಾಂನಿ ಥಂಡಾಚೆ ಗ್ಲಾಸ್ ಘೆತೆಚ್ ಸಿಲ್ವಿಕ್ ಬೊಸೊಂಕ್ ಸಾಂಗೊನ್ ರೆಚೆಲ್ಬಾಯ್ ಯೇವ್ನ್ ಬಸ್ಲಿ.
ಸಿಲಾಮಾನ್ ಉಲವ್ಣೆಂ ಸುರು ಕೆಲೆಂಚ್, ಟ್ರಾಫಿಕಾವಿಶಿಂ, ಆಧ್ಲ್ಯಾ ಹಾಫ್ತ್ಯಾಂತ್ ಜಾಲ್ಲ್ಯಾ ರೋಡ್ ಎಕ್ಸಿಡೆಂಟಾವಿಶಿಂ, ಭಾರತಾಂತ್ ಬೋಂಭ್ ಬ್ಲಾಸ್ಟ್ ಜಾಲ್ಲೆವಿಶಿಂ, ಕ್ರಿಕೆಟ್ ಮ್ಯಾಚಾವಿಶಿಂ.
ಉಲಯ್ತಾಂ ಉಲಯ್ತಾಂ ಮಧೆಂ ಮಧೆಂ ರೆಚೆಲ್ ಬಾಯ್ ಸಿಲ್ವಿವಿಶಿಂ ಗರ್ಜೆಭಾಯ್ರ್ ಫುಗಾರುಂಕ್ ಮಾತ್ರ್ ವಿಸರ್ಲಿನಾ.
"ಆಮ್ಚೆಂ ಚೆಡುಂ ಹೆರಾಂ ಪರಿಂ ನ್ಹಯ್. ಭೋವ್ ಸಾದೆಂ. ಆಟ್-ನೇಟ್ ನಾ, ಇಶ್ಟಿಣ್ಯೊ ನಾಂತ್, ರಾಂದ್ಪಾಂತ್ ಹುಶ್ಯಾರ್, ಪಳೆಂವ್ಕ್ ಸೊಭಿತ್............."
ತಿಚ್ಯಾ ತೊಂಡಾಂತ್ ಉತ್ರಾಂಚಿಂ ಮೊತಿಯಾಂ ಗಳೊಂಕ್ ಲಾಗ್ಲಿಂ.
"ಪುಣ್ ಆಮ್ಚೊ ಕ್ಲೆವಿನ್ ಭಾರಾವಿ..." ಚೆಡ್ಯಾಚಿ ಆವಯ್ ಉಲಂವ್ಕ್ ಧರ್ತಾನಾಂಚ್ ರೆಚೆಲ್ಬಾಯೆನ್ ಮಧೆಂ ದಾಯ್ ಘಾಲಿ;
"ವ್ಹಯ್ ಸಿಲಾಮಾನ್ ಪುರಾ ಸಾಂಗ್ಲಾಂ ಆಮ್ಕಾಂ. ಭಾರಾವಿ ಜಾಲ್ಯಾರ್ ಕಿತೆಂ ಜಾಲೆಂ? ಅಶಿಕ್ಪಿ ನ್ಹಯ್ ಪಳೆ."
ಸಯ್ರಿಂ ಥೊಡೊ ವೇಳ್ ಉಲವ್ನ್ ಆಸ್ತಾನಾಂಚ್ ಸಿಲಾಮಾನ್ ಸಾಂಗ್ಲೆಂ "ಪಳೆಯಾ, ಆಮಿ ಘರ್ ಕಿತ್ಲೆಂ ವ್ಹಡ್ ಆಸಾ ಪಳೆವ್ಯಾಂ" ಮ್ಹಣೊನ್ ಭಿತರ್ ಗೆಲಿಂ. ಸಿಲ್ವಿಕ್ ಆನಿ ಚೆಡ್ಯಾಕ್ ಭಾಯ್ರ್ ಬಸವ್ನ್ ಉಲಂವ್ಕ್ ಆವ್ಕಾಸ್ ಕರ್ನ್ ದಿಲೊ.
ಕ್ಲೆವಿನ್ ಕಾಂಯ್ ದಾಟೊ ಮೊಟೊ ನ್ಹಯ್, ಹಳ್ತ್ ಜಿವಾಚೊ. ಮುದ್ಯಾಳೆ ಕೇಸ್ ಆಸೊನ್ ವಿಶೇಸ್ ನ್ಹಯ್ ತರ್ಯೀ ಆಕರ್ಶಿತ್ ವೆಕ್ತಿತ್ವಾಚೊ. ಇಲ್ಲೊ ಮಟ್ವೊ ಆಸೊನ್ ಸಾವ್ಳೊ ದಿಸ್ತಾಲೊ ದೆಖುನ್ ಭೋವ್ಶಾ ಸಿಲ್ವಿ ತಾಕಾ ಖಾಯ್ಸ್ ಜಾಲಾಂ ಮ್ಹಣ್ ತಾಚ್ಯಾ ತೊಂಡಾಚೊ ಛಾರೊ ಸಾಂಗ್ತಾಲೊ.
"ತುಂ ಖಂಚ್ಯಾ ಕೊಲೆಜಿಂತ್ ಶಿಕ್ಲ್ಲೆಂಯ್?" ಚೆಡ್ಯಾನ್ ಉಲವ್ಣ್ಯಾಕ್ ಬುನ್ಯಾದ್ ಘಾಲಿ.
"ಹಾಂವ್ ಇಗ್ನೋ ಥಾವ್ನ್ ಕರೆಸ್ಪಾಂಡೆನ್ಸಾರ್ ಬಿ.ಎ. ಶಿಕ್ಲಿಂ"
"ತುಕಾ ಕಸ್ಲೊ ನವ್ಸೊ ಜಾಯ್?"
"............??????"
ಸಿಲ್ವಿಕ್ ಕಿತೆಂಚ್ ಸಾಂಗೊಂಕ್ ಕಳ್ಳೆಂ ನಾ.
"ಕಿತೆಂ ಸಾಂಗೊಂಕ್ ಲಜ್ ದಿಸ್ತಾ?" ಚೆಡ್ಯಾನ್ ಸವಾಲ್ ಕೆಲೆಂ
"...................." ಪರತ್ ಸಿಲ್ವಿನ್ ಮೌನ್ ಪಾಂಗುರ್ಲೆಂ.
ಸಯ್ರಿಂ ಭಿತರ್ಲ್ಯಾ ಕುಡಾಂತ್ ಬಸೊನ್ ಗಪ್ಪೆ ಮಾರ್ತಾಲಿಂ ತರ್, ಭಾಯ್ರ್ ಸಿಲ್ವಿಕ್ ಅಪುಣ್ ಖಾಂಟ್ಯಾಂಚೆರ್ ಬಸ್ಲ್ಯಾಂಶೆಂ ಭಗ್ತಾಲೆಂ. ತಾಣೆಂ ಲಿಪವ್ನ್ ಹಾಡ್ಲ್ಲಿ ಏಕ್ ಚೀಟ್ ಭಾಯ್ರ್ ಕಾಡ್ಲಿ ಆನಿ ಲಿಪವ್ನ್ ಚೆಡ್ಯಾಚ್ಯಾ ಹಾತಿಂ ದಿಲಿ ಆನಿ "ಮಾಗಿರ್ ಹಿ ಚೀಟ್ ವಾಚ್" ಮ್ಹಣ್ ಪುಸ್ಪುಸ್ಲೆಂ.
ಕ್ಲೆವಿನಾಕ್ ಎಕೀ ಸಮ್ಜಾಲೆಂನಾ. ತಾಣೆಂ ತಿ ಚೀಟ್ ಅಪ್ಲ್ಯಾ ಕೊಟಾಚ್ಯಾ ಬೊಲ್ಸಾಂತ್ ಚೆಪುನ್ ಬೊಸ್ಲೊ.
ಥೊಡ್ಯಾ ವೆಳಾನ್ ಜೆವ್ಣಾಕ್ ತಯಾರಾಯ್ ಚಲ್ತಾಲಿ. ಸಗ್ಳಿಂ ಬಸೊನ್ ಜೆವ್ಲಿಂ. ಮಧೆಂ ಮಧೆಂ ಜೆವ್ಣಾಚೆರ್ ತಾರಿಫೊ ಆಯ್ಕತಾನಾ ರೆಚೆಲ್ ಬಾಯೆನ್ ಜವಾಬ್ ದಿಲಿ "ಅಪ್ಲ್ಯಾ ಧುವೆಕ್ ಸಕ್ಕಡ್ ರಾಂದುಂಕ್ ಕಳ್ತಾ. ಮಾಸ್, ಮಾಸ್ಳಿ, ಪೊಳಿ, ಖಾಣಾಂ - ಹರ್ಯೆಕ್ ರುಚಿಕ್ ರಾಂದಾಪ್ ಜಾಣಾ. ಆಯ್ಚೆಂ ರಾಂದಾಪ್ ಸಕ್ಕಡ್ ತಾಣೆಂಚ್ ರಾಂದ್ಲಾಂ."
ಉಲವ್ನ್ ಉಲವ್ನ್ ಸಯ್ರ್ಯಾಂಚೆಂ ಜೆವಾಣ್ ಜಾಲೆಂ. ಜೇವ್ನ್ ಥೊಡೊ ವೇಳ್ ಪರತ್ ಗಜಾಲಿ ಕರುನ್ ಬಸ್ಲಿಂ.
ಥೊಡ್ಯಾ ವೆಳಾನ್ ಸಿಲಾಮ್ ಉಲವ್ನ್ ಮ್ಹಣಾಲೊ. "ತರ್ ಯೆಂವ್ಚ್ಯಾ ಹಾಫ್ತ್ಯಾಂತ್ ಆಮಿ ನಿರ್ಣಯ್ ಘೆವ್ಯಾಂ - ಚೆಡ್ಯಾಕ್ ಚೆಡುಂ ಪಸಂದ್ ಜಾಲೆಂಗಿ? ಕೆದಾಳಾ ಮುದಿ ದವರ್ಚಿ ? ಕೆದಾಳಾ ಕಾಜಾರ್ ಮ್ಹಳ್ಳೆಂ ತೊ ಗಾಂವಾಕ್ ಫೋನ್ ಕರುನ್ ಆಪ್ಲ್ಯಾ ಆವಯ್ ಬಾಪಾಯ್ಲಾಗಿಂ ಉಲವ್ನ್ ಸಾಂಗ್ತಲೊ"
ಸಯ್ರಿಂ ಅಧೇವ್ಸ್ ಮಾಗೊನ್ ಗೆಲಿಂ.
**********
ಕ್ಲೆವಿನಾಚ್ಯಾ ಮತಿಭಿತರ್ ಅಥ್ವ್ಯಾಚ್ ರಿತಿಚಿಂ ಭಗ್ಣಾಂ ಯೆತಾಲಿಂ. ಆಮ್ಕಾಂ ಮುಖಾಮುಖಿ ಉಲಂವ್ಕ್ ಆವ್ಕಾಸ್ ಆಸ್ಲೊ ತರ್ಯೀ ಕಿತೆಂಚ್ ಉಲಯ್ನಾಸ್ತಾಂ ಆತಾಂ ಹಿ ಚೀಟ್ ದಿಲ್ಯಾ. ಮಿಸ್ತೆರ್ ಕಸ್ಲೊಗಾಯ್ ಮ್ಹಳ್ಳೆಂ ಸಮ್ಜೊಂಕ್ ಕ್ಲೆವಿನಾಕ್ ಆತುರಾಯ್ ಆಸ್ಲಿ.
"ಚೆಡುಂ ಕಶೆಂ ಲಾಗ್ಲೆಂ?" ಸಿಲಾಮಾನ್ ಸವಾಲ್ ಕರ್ತಾನಾ ಏಕ್ ಘಡಿ ತ್ಯಾ ಚಿಟಿವಿಶಿಂ ಸಾಮ್ಗ್ಯಾಂ ಮ್ಹಣ್ ಭಗ್ಲೆಂ ತರ್ಯೀ ಕ್ಲೆವಿನಾನ್ "ಬರೆಂ ಲಾಗ್ಲೆಂ" ಮಾತ್ರ್ ಮ್ಹಣಾಲೊ.
ಘರಾಕ್ ಪಾವ್ತಚ್ ಕ್ಲೆವಿನಾನ್ ಕೋಟ್ ಕಾಡ್ನ್ ಹ್ಯಾಂಗರಾರ್ ದವರ್ಲೊ ಆನಿ ಕೊಟಾಂತ್ ಆಸ್ಲ್ಲಿ ಚೀಟ್ ಸೊಡವ್ನ್ ವಾಚಿಲಾಗ್ಲೊ;
ಮೊಗಾಳ್.................
ತುಜೆಂ ನಾಂವ್ ಕಿತೆಂ ನೆಣಾಂ ದೆಕುನ್ ಕಶಿ ಸುರ್ವಾತ್ ಕರ್ಚಿ ಕಳಾನಾ, ಪುಣ್ ಮ್ಹಜ್ಯಾ ಜಿಣ್ಯೆಂತ್ ಮ್ಹಜೊ ಜಿಣ್ಯೆ ಸಾಂಗಾತಿ ಜಾವ್ನ್ ಯೆಂವ್ಚ್ಯಾಧಿಂ ತುಜೆಸಮೊರ್ ಮ್ಹಜೆಂ ಕಾಳಿಜ್ ಉಘಡ್ಯಾಂ ಮ್ಹಳ್ಳಿಂ ಚಿಂತ್ನಾಂ ಆಯ್ಲಿಂ. ಆನಿ ಹೊ ಆವ್ಕಾಸ್ ಮ್ಹಾಕಾ ತುವೆಂ ಮ್ಹಾಕಾ ’ಪಸಂದ್/ನಾಪಸಂದ್’ ಕರ್ಚ್ಯಾ ಪಯ್ಲೆಂ ಮೆಳ್ಚೊನಾ ದೆಕುನ್ ಚಿಟಿ ಮುಖಾಂತ್ರ್ ಕಳಯ್ತಾಂ.
ಮ್ಹಜೆಂ ನಾಂವ್ ತುಕಾ ಆತಾಂ ಕಳಿತ್ ಆಸ್ತೆಲೆಂ; ಸಿಲ್ವಿ
ಹಾಂವ್ ಜಲ್ಮೊನ್ ಎಕಾ ಮಯ್ನ್ಯಾಭಿತರ್ ಮ್ಹಜಿ ಆವಯ್ ಸರ್ಲಿ ಮ್ಹಳ್ಳೆಂ ತುಂ ಜಾಣಾಂ ನಾಂಯ್ ಕೊಣ್ಣಾ. ಹಾಂವ್ ಪಳೆಂವ್ಕ್ ಸೊಭಿತ್ ನಾ. ಮ್ಹಜ್ಯಾಂ ಸಗ್ಳ್ಯಾ ಆಂಗಾರ್ ಶಿಬಾಂ ಆಸಾತ್. ತ್ಯಾ ಭಾಯ್ರ್ ಮ್ಹಜ್ಯಾ ಮೌಶೆನ್ ಮ್ಹಜೆವಿಶಿಂ ಮೊಸ್ತ್ ತಾರಿಫೊ ಕರ್ತೆಲಿ ಮ್ಹಳ್ಳೆಂ ಹಾಂವ್ ಜಾಣಾಂ. ಹಾಂವ್ ರಾಂದುಂಕ್ ನೆಣಾಂ. ಕಾಂಯ್ ಚಾ ಕರುಂಕ್, ಪೇಜ್ ಕರುಂಕ್ ಆನಿ ಆಯ್ದಾಂ, ವಸ್ತ್ರಾಂ ನಿತಳ್ ಕರುಂಕ್ ಮಾತ್ರ್ ಜಾಣಾಂ. ಅನ್ಯೇಕ್ ಸಂಗತ್ - ಮ್ಹಜ್ಯಾ ಆಂಗಾರ್ ಆಸ್ಚೆಂ ಭಾಂಗಾರ್, ಗಳ್ಯಾರ್ ಆಸ್ಚಿ ಚೇಯ್ನ್, ಹಾತಾಂನಿ ಆಸ್ಚಿಂ ಕಾಂಗ್ಣಾಂ ಸರ್ವ್ ಮ್ಹಜಿಂ ನ್ಹಯ್. ದೆಕುನ್ ತುಂ ಹೆರಾಂಚೆಂ ಆಯ್ಕೊನ್ ಮ್ಹಜೆಲಾಗಿಂ ಕಾಜಾರ್ ಜಾಂವ್ಕ್ ಕಬೂಲ್ ಜಾಯ್ನಾಕಾ. ಬಗಾರ್ ಏಕ್ ಪಾವ್ಟಿಂ ಮಾತ್ರ್ ನ್ಹಯ್, ದೋನ್-ತೀನ್ ಪಾವ್ಟಿಂ ಚಿಂತುನ್ ಪಳೆ, ಉಪ್ರಾಂತ್ ನಿರ್ಣಯ್ ಘೆ"
ತುಜೆಥಂವ್ ವಿಶ್ವಾಸಿ,
ಸಿಲ್ವಿ
ಕ್ಲೆವಿನಾನ್ ಕಾಗಾದ್ ವಾಚುನ್ ಏಕ್ ಘಡಿ ಲಾಂಬ್ ಉಸ್ವಾಸ್ ಘೆತ್ಲೊ .
**********
ಸಯ್ರಿಕ್ ಪಳೆವ್ನ್ ಕಾಂಯ್ ಚ್ಯಾರ್ ದೀಸ್ ಜಾತಿತ್ ಕೊಣ್ಣಾ. ರೆಚೆಲ್ ಬಾಯ್ ಮಾತ್ರ್ ಸದಾಂಯ್ ಸಿಲಾಮಾಲಾಗಿಂ ಫೊನಾರ್ ಉಲವ್ನ್ ಆಸ್ಲಿ. ಅಜೂನ್ ಪರ್ಯಾಂತ್ ಸಿಲಾಮಾಕ್ ಚೆಡ್ಯಾಚಿ ನಖ್ಖಿ ಜವಾಬ್ ದೀಂವ್ಕ್ ನಾತ್ಲ್ಲಿ ಪಳೆವ್ನ್ "ಹಿ ತಿಸ್ರಿ ಸಯ್ರಿಕ್ ಸಯ್ತ್ ಚುಕ್ಲಿ ಜಾಯ್ಜಯ್. ಪನ್ವತಿ ಚೆಡುಂ ಕಂಚೆಂ" ಮ್ಹಣ್ ಪುರ್ಪುರ್ತಾಲಿ.
ಪುಣ್ ಸಿಲಾಮಾನ್ ಎಕಾ ಹಾಫ್ತ್ಯಾಂತ್ ಚೆಡ್ಯಾಚೊ ನಿರ್ಣಯ್ ಕಳಯ್ತಾಂ ಮ್ಹಳ್ಳೆಂ ದೆಖುನ್ ಸಿಲಾಮ್ ಚೆಡ್ಯಾಕ್ ಭೆಟ್ಲೊಚ್. ಚೆಡೊ ಕಿತೆಂಚ್ ಉಲಂವ್ಕ್ ಕಬೂಲ್ ಜಾಲೊನಾ, ಪುಣ್ ಏಕ್ ಚೀಟ್ ದಿವುನ್ ತಿ ಚೀಟ್ ವ್ಹರ್ನ್ ಸಿಲ್ವಿಕ್ ದೀಂವ್ಕ್ ಉಪ್ಕಾರ್ ಮಾಗ್ಲೊ ತಾಣೆ.
ಸಿಲಾಮ್ ಅಜ್ಯಾಪ್ಲೊ. ಕಾಂಯ್ ಧಾ-ಭಾರಾ ಸಯ್ರಿಕೊ ತಾಣೆ ಸೊಧ್ಲ್ಯಾತ್, ಪುಣ್ ಅಜೂನ್ ಪಾಸೊನ್ ತಾಣೆಂ ತಪ್ಪಾಲಾಚ್ಯಾ ಪೆದ್ಯಾಪರಿಂ ಚೆಡ್ಯಾಚಿ ಜಾಂವ್ ಚೆಡ್ವಾಚಿ ಜಾಂವ್ ಚೀಟ್ ಆಶಾರ್ ಪಾಶಾರ್ ಕರುಂಕ್ ನಾಂತ್. ತಾಕಾ ಹೆರ್ ನಿರ್ವೋಗ್ ನಾತ್ಲೊ ದೆಖುನ್ ತೊ ಸಾಂಜೆರ್ ಚೆಡ್ವಾಗೆರ್ ಪಾವ್ಲೊ. ರೆಚೆಲ್ ಬಾಯ್ ನೊವೆನಾಕ್ ಗೆಲ್ಲಿ ಆನಿ ಗುಸ್ತ್ಯಾಂವ್ ಆಫಿಸಾಕ್ ಯೇಂವ್ಕ್ ನಾತ್ಲೊ ದೆಕುನ್ ಚೆಡ್ಯಾನ್ ದಿಲ್ಲಿ ಚೀಟ್ ಚೆಡ್ವಾಕ್ ಪಾವಿತ್ ಕರುಂಕ್ ಸಿಲಾಮಾಕ್ಯೀ ಸಲೀಸ್ ಜಾಲೆಂ. ತೊ ಚೀಟ್ ದೀವ್ನ್ ಮಿಸ್ತೆರ್ ಸಮ್ಜಾನಾಸ್ತಾಂ ಅಪ್ಲ್ಯಾ ಘರಾ ಗೆಲೊ.
ಸಿಲ್ವಿಕ್ ಚೀಟ್ ಹಾತಿಂ ಧರ್ತಾಂ ಹಾತ್ ವಿಚಿತ್ರ್ ಭಗ್ಣಾಂನಿ ಕಾಂಪ್ತಾಲೆ. ಅಜೂನ್ ಪಾಸತ್ ತಾಕಾ ಕೊಣೆಂಚ್ ಚೀಟ್ ಬರಂವ್ಕ್ ನಾತ್ಲ್ಲಿ ದೆಕುನ್ ಜಾಯ್ಜಯ್.
ಸಿಲ್ವಿನ್ ಚೀಟ್ ಸೊಡಯ್ಲಿ;
"ಮೊಗಾಳ್ ಸಿಲ್ವಿ,
ಸತ್ ಸಾಂಗ್ತಾಂ ಹಾಂವ್ ತುಜಿ ಚೀಟ್ ಮ್ಹಜ್ಯಾ ಕಾಳ್ಜಾಕ್ ಆಪ್ಡುಂಕ್ ಸಕ್ಲಿ ಆನಿ ಮ್ಹಾಕಾ ಇತ್ಲೆಂಚ್ ಭಗ್ಲೆಂ;
ಜಿವಿತ್ ಆನಿ ಮರಣ್ ಮನ್ಶ್ಯಾಚ್ಯಾ ಹಾತಿಂ ಆಸ್ತೆಂ ತರ್ ದೇವ್ ಮ್ಹಳ್ಳ್ಯಾ ಸಬ್ಧಾಕ್ ಮತ್ಲಬ್ ಆಸ್ತೊನಾ.
ದುಡು ಯೆತಾ - ವೆತಾ, ಭಾಂಗಾರ್-ರುಪೆಂ ಕಸಲೆಂಚ್ ಶಾಶ್ವಿತ್ ನ್ಹಯ್. ಯೆತಾನಾ-ವೆತಾನಾ ಮನಿಸ್ ವಿಣ್ಗೊ ಆನಿ ರಿತೊ. ದೆಕುನ್ ಬರಿ ಜಿಣಿ ಜಿಯೆಂವ್ಕ್ ಹೆಂ ಸರ್ವ್ ಅನಿವಾರ್ಯ್ ಜಾಯ್ಜಯ್ ಮ್ಹಣ್ ನಾ.
ಕೊಣ್ ಮ್ಹಣ್ತಾ ತುಂ ಸೊಭಿತ್ ನಾಂಯ್ ಮ್ಹಣ್? ಕೊಣೆಂ ಸಾಂಗ್ಲೆಂ ತುಕಾ ಸೊಭಾಯ್ ನಾಂ ಮ್ಹಣ್? ತುಕಾ ಸೊಭಿತ್ ನಾಂಯ್ ಮ್ಹಣಾತ್ ತರ್ ತುಜೆಸಮೊರ್ ಆಸ್ಚೊ ಆರ್ಸೊ ಫಟ್ಕಿರೊ. ತುಜ್ಯಾ ಆಂಗಾರ್ ಶಿಬಾಂ ವಾ ಖತಾಂ ಆಸಾತ್ ಮ್ಹಣೊನ್ ಕಿತ್ಯಾಕ್ ಖಂತ್ ಕಾಡ್ತಾಯ್? ತುಜ್ಯಾ ಕಾಳ್ಜಾಚಿ ನಿತಳಾಯ್ ಮ್ಹಾಕಾ ಪಸಂದ್ ಜಾಲ್ಯಾ. ತುಕಾ ರಾಂದುಂಕ್ ಕಳಾನಾ ತರ್ ತುಂ ಕಿತ್ಯಾಕ್ ನಿರಾಸ್ತಾಯ್? ಆಮಿ ದೊಗಾಂಯ್ ಮೆಳೊನ್ ರಾಂದ್ಯಾಂ.
ಸತ್ ಸಾಂಗೊಂ ತರ್, ತುಜಿ ಚೀಟ್ ಏಕ್ ಪಾವ್ಟಿಂ ನ್ಹಯ್, ಪರತ್ ಪರತ್ ವಾಚ್ಲಿ ಆನಿ ಜಿತ್ಲೆ ಪಾವ್ಟಿಂ ವಾಚ್ಲಿಗೀ, ತಿತ್ಲೊಂ ಹಾಂವ್ ಸ್ಪಶ್ಟ್ ಜಾಲೊಂ - ಮ್ಹಾಕಾ ದೆವಾನ್ ನಿರ್ಮಿಲ್ಲೆಲಿ ಜಿಣ್ಯೆಸಾಂಗಾತಿಣ್ ತುಂಚ್.
ಹಾಚೆಶಿವಾಯ್ ತುಜೆ ಹೆರ್ ಇರಾದೆ ಕಾಂಯ್ ಆಸ್ತಿತ್ ತರ್ ಕಳಯ್. ನಾಂವೇ - ತುಂ ಮ್ಹಜಿ ಜಿಣ್ಯೆಸಾಂಗಾತಿಣ್ ಜಾಂವ್ನ್ ಘೆಂವ್ಕ್ ಹಾಂವ್ ಸಂತೊಸಾನ್ ಆಯ್ತೊಂ ಆಸಾಂ.
ತುಜೊ ಜಾಂವ್ಕ್ ಆಶೆಂವ್ಚೊ,
ಕ್ಲೆವಿನ್
ಚೀಟ್ ವಾಚುನ್ ಸಿಲ್ವಿನ್ ಏಕ್ ಘಡಿ ದೊಳೆ ಧಾಂಪ್ಲೆ. ಥಂಯ್ಚರ್ ತಾಕಾ ತಾಚೊ ಜಿಣ್ಯೆ ಸಾಂಗಾತಿ ಸ್ಪಶ್ಟ್ ದಿಸ್ತಾಲೊ.
**********
[ಹಿ ಕಾಣಿ ’ಮಿತ್ರ್’ ಪತ್ರಾಚೆರ್ ಪರ್ಗಟ್ ಜಾಲ್ಯಾ]
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
