ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾಝರ್ - 5. ದೆವಾನ್ ವಿಸ್ರಾಲ್ಲಿಂ ಭುರ್ಗಿಂ
ಕ್ಲೆರೆನ್ಸ್ ಪಿಂಟೊ ಕೈಕಂಬ ಕೊಂಕ್ಣಿ ಸಾಹಿತಿಕ್ ಸಂಸಾರಾಂತ್ ಮಟ್ವ್ಯಾ ಕಾಣ್ಯಾಂಕ್ ಫಾಮಾದ್. ಆಯ್ಲೆವಾರ್ ಸರಾಗ್ ಕವಿತಾಯ್ ಬರವ್ನ್ ಆಸ್ಚಾ ಕ್ಲೆರೆನ್ಸ್ ಪಿಂಟೊಚಾ ಕೊಂಕ್ಣಿ ಭಾಸೆಚಿ ಸೊಭಾಯ್ ಅಥ್ವಿಚ್. ಏಕ್ ವಿಚಾರ್ವಂತ್ ಸಾಹಿತಿ ಮಾತ್ರ್ ನ್ಹಯ್ ಆಸ್ತಾಂ, ಏಕ್ ಚಿಂತ್ಪಿ ಆನಿ ಕೊಂಕ್ಣಿ ಭಾಸೆಚೊ ಮೋಗ್ ಆಸ್ಚೊ ಕ್ಲೆರೆನ್ಸ್ ಕೈಕಂಬ ಏಕ್ ಸಂಘಟಕ್ಯ್ ಜಾವ್ನಾಸಾ. ಹಾಚಾ ಕಾಣ್ಯಾಂಕ್ ಗೊಂಯ್ಚಾ ಕೊಂಕ್ಣಿ ಭಾಶಾಮಂಡಳ್ ಥಾವ್ನ್ ಪ್ರಶಸ್ಥಿಯ್ ಲಾಭ್ಲ್ಯಾ.
[ಹಿ ಕಾಣಿ ದಿವೊ ದಾಯ್ಜ್ ವಿಶೇಸ್ ಅಂಕೊ 2005 ಹಾಂತುಂ ಪರ್ಗಟ್ಲ್ಯಾ]
ಕ್ಲೆರೆನ್ಸ್ ಕೈಕಂಬ
ವೊಣಿಚ್ಯಾ ಪೊಂತಾರ್ ಪಾವುಲ್ಲೊಚ್ಚ್ ಬಾಬುಲ್ ನಾಗ್ ತಕ್ಲಿ ಉಕಲ್ನ್ ಮುಕಾರ್ ಪಳಯ್ಲಾಗ್ಲೊ. ತೆಣೆಂ ಪಳಂವ್ಕ್ ತಾಕಾ ಕಠಿಣಾಯೆಚೆಂ ಭ್ಯೆಂ ದಿಸ್ತಾಲೆಂ ತರ್ಯ್ ತಾಣೆಂ ಧಯ್ರ್ ಆರಾವ್ನ್ ದೀಶ್ಟ್ ತೆಣೆಂ ವ್ಹೆಲಿ. ತಾಚ್ಯಾ ಆಂಗ್ಡಿ ಮುಕಾರ್ ಆನಿಂ ತೆಣೆಚ್ಯಾ ಸುತ್ತುರಾಕ್ ಆಕಾಸಾಕ್ ತೆಂಕೊನ್ ರಾಂವ್ಚಿ ಲೊಕಾಚಿ ಖೆಟ್ ಭರೊನ್ ಗೆಲ್ಲಿಚ್ಚ್ ದಿಸ್ಲಿ ಸೊಡ್ನ್ ಹೆರ್ ಕಿತೆಂಚ್ ತಾಕಾ ದಿಸ್ಲೆಂ ನಾ. ಖಾಂದ್ಯಾರ್ ಆಸ್ಲ್ಲ್ಯಾ ಕುಡ್ಕ್ಯಾ ಬೈರಾಸಾನ್ ಆಪ್ಲೆಂ ತೊಂಡ್ ತಾಣೆಂ ಪುಸ್ಲೆಂ ತರ್ಯ್ ಘಾಮಾಚೆ ಥೆಂಬೆ ರಾಸ್ ಪಡ್ಚೆ ರಾವ್ಲೆನಾಂತ್. ಹರ್ಧ್ಯಾಂತ್ಲೆಂ ಆಕ್ರಂದನ್ ಕಠಿಣ್ ಜಾವ್ನಾಸ್ಲ್ಲೆಂ...
ಫಾಂತ್ಯಾರ್ಚ್ಚ್ ತಿ ಗಜಾಲ್ ತಾಕಾ ಕಳ್ಲ್ಲಿ...
ಬಿಟ್ಟುನ್ಂಚ್ ತಿ ಖಬರ್ ತಾಕಾ ದಿಲ್ಲಿ...ಆಯ್ಕೊನ್ ತೊ ಭಿಯೆಲ್ಲೊ. ಆಪ್ಣೆಂ ತಾಂತುಂ ಮೆತೆರ್ ಜಾಂವ್ಕ್ ನಜೊ.... ಜಾಲೊಂ ತರ್ಯ್ ಹ್ಯಾ ಪ್ರಾಯೆರ್ ಪೊಲಿಸಾಂಚ್ಯಾ ತೊಂದ್ರ್ಯಾಕ್ ಬಲಿ ಜಾತಲೊಂ. ತ್ಯಾ ದೆಕುನ್೦ಚ್ಚ್ ಕಿತೆಂಚ್ಚ್ ಕಳಿತ್ ನಾತ್ಲ್ಲ್ಯಾ ಬರಿ ತೊ ಥಂಯ್ ಥಾವ್ನ್ ಆಪ್ಲ್ಯಾ ಸದಾಂಚ್ಯಾ ನಿತಳಾಯೆಚ್ಯಾ ಕಾಮಾ ಖಾತಿರ್ ಗೆಲ್ಲೊ.
ಸದಾಂಚ್ಯಾ ಬರಿ ಕುಡಿಚಿ ನಿತಳಾಯ್ ತಿರ್ಸುನ್, ಕಾಜುಚ್ಯಾ ರುಕಾಚೆಂ ಪಾನ್ ಉರಟಾಯೆನ್ ವೊಳುನ್ ದಾಂತ್ ಘಾಸುನ್, ಕಾಗೂರ್ ನ್ಹಂಯ್ತ್ ಬುಡ್ತಾನಾ ಆಂಗಾಂತ್ ಭರ್ಲ್ಲೊ ಭಿಯಾಚೊ ಉಜೊ ನಿವ್ಲ್ಲ್ಯಾ ಬರಿ ಜಾಲ್ಲೆಂ ತರ್ಯ್ ಮತಿಂತ್ಲಿಂ ಆಗ್ಟಿಂ ಚಡ್ ಆನಿಂ ಚಡ್ ಝಳೊನ್ ಯೆತಾಲಿಂ ತಸೆಂ ತಾಕಾ ಭಗ್ತಾಲೆಂ. ಸದಾಂಚೆಂ ವಸ್ತುರ್ ಉಂಬ್ಳುನ್, ಬರೆಂ ವಸ್ತುರ್ ನೆಸೊನ್ ತೊ ದಿವ್ಳಾಕ್ ಆಯಿಲ್ಲೊ. ದಿವ್ಳಾಂತ್ ದಿವೊ ಜಳವ್ನ್ ಕಪಾಲಾರ್ ಗಂಧಾಚೊ ತಿಳೊ ಲಾಯಿಲ್ಲೊ. ಭಟಾನ್ ಮ್ಹಳ್ಳ್ಯಾ ಥೊಡ್ಯಾ ದೈವಿಕ್ ಶ್ಲೋಕಾಂಕ್ ತಾಣೆಂ ತಾಳೊ ಮೆಳಯಿಲ್ಲೊ ತರ್ಯ್ ಆಜ್ ಕಸಲ್ಯಾಚ್ಚ್ ಭಕ್ತಿಚಿ ಆಶಾ ಆನಿಂ ಮಾಗ್ಣ್ಯಾಚಿ ಅಭಿಲಾಶಾ ನಾತ್ಲ್ಲಿ.. ತಾಕಾ ಫಕತ್ತ್ ಭ್ಯೆಂ ದಿಸ್ತಾಲೆಂ...
ವೊಣಿ ಥಾವ್ನ್ ತೆನ್ಕಾಕ್ ತಣ್ ಭರ್ಲ್ಲ್ಯಾ ವಾಟೆರ್ ಮದೆಂಚ್ಚ್ ಆಸ್ಲ್ಲ್ಯಾ ವಾಟೆಂತ್ಲ್ಯಾನ್ ಏಕ್ ಫರ್ಲಾಂಗ್ ಚಲ್ಲೊ ತರ್ ಕಾಗೂರ್ ನ್ಹಂಯ್ ಮೆಳ್ತಾ... ತ್ಯಾ ನ್ಹಂಯ್ತ್ ಪಾವ್ಸಾಂತ್ ತಸೆಂ ಗಿಮಾಂತ್ ಉದಾಕ್ ಉಣೆಂ ಜಾಲ್ಲೆಂ ಮ್ಹಣ್ ನಾ. ನ್ಹಂಯ್ಚ್ಯಾ ತಡಿರ್ ಆಸ್ಲ್ಲೆ ಮಾಡ್ ಉತ್ರೊನ್ ಚಿಕ್ಕೆ ಮುಕಾರ್ ಗೆಲೊ ತರ್ ಫಾತ್ರಾಚ್ಯಾ ಉಬಾರ್ ಜಾಗ್ಯಾರ್ ಹನುಮಾನಾಚೆಂ
ದೀವ್ಳ್... ದಿವ್ಳಾಚೊ ತೋರಿ ಪಂದ್ರಾಂ ಮಯ್ಲಾಂ ಪಯ್ಸ್ ಮ್ಹಣಾಸರ್ ದಿಸ್ತಾತ್. ವೊಣಿಂತ್ ಸಾಧಾರ್ನ್ ಮಧೆಂಚ್ಚ್ ತಾಚಿ ಅಂಗಡ್ ಆನಿಂ ಕಾಫಿಯೆ ದುಕಾನ್ ಸಾಂಗಾತಾಚ್ಚ್...
ಮಾಲ್ಘಡ್ಯಾಂ ಥಾವ್ನ್ ದೆಂವೊನ್ ಆಯಿಲ್ಲಿ ಅಂಗಡ್ ಆನಿಂ ಕಾಫಿಯೆ ದುಕಾನ್ ತೆಂ. ಮೊಡ್ಲಾನಿಂ ಮುಕಾರ್ ಆಡೊಸ್ ಆಸ್ಲ್ಲೊ ತರ್ ಮುಕ್ಲ್ಯಾನ್ ತಗಡಾಚಿಂ ಪತ್ರಿಂ ಬಸಯಿಲ್ಲಿಂ. ಘರಾಕ್ ಥೊದ್ಯಾ ವರ್ಸಾಂ ಪಯ್ಲೆಂ ನಳೆ ಘಾಲುನ್ ಚಿಕ್ಕೆ ಸೊಭಯಿಲ್ಲೆಂ. ಬಿರಾಮುಣ್ ಕುಳಿಯೆಚೊ ಜಾಲ್ಲ್ಯಾನ್ ಖಾಣಾ ಜೆವ್ಣಾಚ್ಯಾ ತಯರಾಯೆಂತ್ ತಾಚೊ ಉಕಲ್ಲೊಲೊ ಹಾತ್. ಬಾಬುಲ್ ನಾಗ್ ಜಲ್ಮಾಲ್ಲೊ ಹ್ಯಾಚ್ಚ್ ಆಂಗ್ದಿಚ್ಯಾ ಪಾಟ್ಲ್ಯಾ ಬಿಡಾರಾಂತ್ ಆನಿಂ ಆತಾಂಯ್ ತಾಣೆಂ ಜಿಯೆಂವ್ಚೆಂ ತ್ಯಾಚ್ಚ್ ಬಿಡಾರಾಂತ್...ತಾಚೆ ಭಾವ್ ಇಲ್ಲೆಂ ಇಲ್ಲೆಂ ಶಿಕೊನ್ ಮದರಾಸ್ ಕಾಮಾರ್ ಪಡೊನ್ ಥಂಯ್ಸರ್ಚ್ಚ್ ಕಾಜಾರ್ ಜಾವ್ನ್ ಬರ್ಯಾನ್ ಜಿಯೆತಾಲೆ ತರ್ ತಾಚ್ಯೊ ಭಯ್ಣಿಂ ಕಾಜಾರ್ ಜಾವ್ನ್, ಏಕ್ಲೆಂ ಕಣ್ಣೂರ್ ಆನಿಂ ಏಕ್ಲೆಂ ತಿರುಪತಿಂತ್
ಆಸ್ಲ್ಲೆಂ.
ಆನಿಂ ಬಾಬುಲ್ ನಾಗ್, ಯೆದೊಳೀ ಕಾಜಾರ್ ಜಾಯ್ನಾಸ್ತಾನಾ ಏಕ್ಸುರೊಚ್ಚ್ ಆಸ್ಲ್ಲೊ ತಿಚ್ಚ್ ಅಂಗಡ್ ಚಲವ್ನ್....ಆತಾಂ ಕಾಜಾರಾಚಿ ಪ್ರಾಯ್ ಉತ್ರೊನ್ ಮ್ಹಾತಾರ್ಪಣ್ ಲಾಗಿಂ ಜಾಲ್ಲ್ಯಾನ್ ಕಾಜಾರಾಚಿಂ ಚಿಂತ್ನಾಂ ಯಾ ವೊಡ್ಣಿ ನಾತ್ಲ್ಲಿ.
ಆನಿಂ ಆಜ್ ತಾಚ್ಯಾ ಕಾಫಿಯೆ ದುಕಾನಾ ಮುಕಾರ್ಚ್ಚ್ ತೆಂ ವಾದಾಳಾ ಸಾರ್ಕೆಂ ಘಡಿತ್ ಘಡೊನ್ ಗೆಲ್ಲೆಂ....ಸಕಾಳಿಂಚ್ಚ್ ಕಾಲಿಯಾ ಆನಿಂ ತಾಚ್ಯಾ ಬಾಯ್ಲೆಕ್, ಭರ್ಲ್ಲ್ಯಾ ಗುರ್ವಾರಿಕ್ ಲಕ್ಷ್ಮಿಕ್ ಕೋಣೆಂಗಿ ಮಾತ್ಯಾರ್ ಫಾತೊರ್ ಮಾರುನ್ ಜಿವೆಶಿಂ ಮಾರ್ಲ್ಲೆಂ ಆನಿಂ ತಾಂಚಿಂ ಮೊಡಿಂ ತಾಣೆಂ ದೆಖ್ಲ್ಲಿಂ...ಆನಿಂ ತಾಂಚೆಂ ತೆಂ ಲ್ಹಾನ್ ಚೆಡುಂ, ಬಿಟ್ಟು ಏಕ್ಸುರೆಂಚ್ಚ್ ಆಸ್ಲ್ಲೆಂ...
"ತಸೆಂ ಕೋಣೆಂ ಕೆಲೆಂ ಬಾಬುಲ್?"
ಪಾಟ್ಲ್ಯಾನ್ ಆಯಿಲ್ಲ್ಯಾ ದಿನ್ನುನ್ ವಿಚಾರ್ತಾನಾ ತಾಚೆಂ ಕಾಳಿಜ್ ಖೊಯ್ತ್ಯಾನ್ ಶಿಂದ್ಲ್ಲ್ಯಾ ಬರಿ ಜಾಲೆಂ.....
ಕಪಾಲಾವಯ್ಲೊ ಘಾಮ್ ತಾಣೆಂ ಪುಸ್ಲೊ....ದಿನ್ನು ಆಪ್ಣಾಕ್ ದುಭಾವಾನ್ ಪಳಯ್ತಾ ತಸೆಂ ತಾಕಾ ಭಗ್ಲೆಂ.. ತರ್ಯ್ ತೊ ಮ್ಹಣಾಲೊ - "ಕಿತೆಂ ಜಾಲೆಂ ಹಾಂಗಾಸರ್? ಹಾಂವ್ ಕಾಂಯಿಂಚ್ಚ್ ನೆಣಾ... ದಿನ್ನು....ಹಾಂವ್ ಫಾಂತ್ಯಾರ್ ಕಾಗೂರ್ ನ್ಹಂಯ್ಕ್ ವಚೊನ್, ದಿವ್ಳಾಕ್ ವಚೊನ್ ಆತಾಂ ಯೆತಾಂ...."
ಬಾಬುಲ್ ನಾಗ್ ಸತ್ಚ್ಚ್ ಫಟ್ ಮಾರ್ತಾಲೊ...ದಿನ್ನುಕ್ ತೆಂ ಕಳಿತ್ ಆಸ್ಲ್ಲೆಂ ಜಾಂವ್ಕ್ಯ್ ಪುರೊ. ಪುಣ್, ತಾಣೆಂ ಕಾಂಯ್ಚ್ಚ್ ದಾಕಯ್ಲೆಂನಾ..
"ತ್ಯಾ ದೊಂಬರಾಟಚ್ಯಾ ಘೊವಾ ಬಾಯ್ಲೆಕ್.. ತೆಂಯ್ ಗುರ್ವಾರಿ ಬಾಯ್ಲೆಕ್ ಕೋಣೆಂಗೀ ಜಿವೆಶಿಂ ಮಾರ್ಲಾಂ ಬಾಬುಲ್...."
ದಿನ್ನು ಪುಸ್ಪುಸ್ಲೊ....
ಬಾಬುಲ್ ನಾಗಾಚ್ಯಾ ಕಾನಾಂನಿಂ ಹಜಾರ್ ಕಾಳ್ಯೊ ಮುಯೊ ಭರೊನ್ ಗೆಲ್ಲ್ಯಾ ಬರಿ ಜಾಲೆಂ...ಕಾಳಿಜ್ ಪುತ್ತಾ ತಸೆಂ ಭಗ್ಲೆಂ..
"ಕಿತ್ಯಾಕ್...ಆನಿಂ ಕೋಣೆಂ??? ..."
ಬಾಬುಲ್ ನಾಗಾಚಿಂ ಉತ್ರಾಂ ಆಕೇರ್ ಜಾಂವ್ಚ್ಯಾ ಫುಡೆಂಚ್ಚ್ ಪೋಲಿಸ್ ಯೇವ್ನ್ ಥಂಯ್ಸರ್ ದೆಂವ್ಲೆ...
ತಾಣಿಂ ಮುಕಾರ್ ಉಲಂವ್ಚೆಂ ಧಯ್ರ್ ಘೆತ್ಲೆಂ ನಾ...
***********
ಸುಮಾರ್ ಧಾ ದೀಸಾಂ ಪಯ್ಲೆಂ ತಿಂ ಸರ್ವಾಂ ಆಯಿಲ್ಲಿಂ .. ಖಂಯ್ ಥಾವ್ನ್ ತೆಂ ತೊ ನೆಣಾ....ಬಾರಿಕ್ ಆನಿಂ ಕಾಳ್ಬಾಣ್ ಭರ್ಲ್ಲೊ ದಾದ್ಲೊ, ಕಾಲಿಯಾ...ಚಿಕ್ಕೆ ಗೊರಿ ಸೊಭಾಯೆಚಿ ಭರ್ಲ್ಲಿ ಗುರ್ವಾರ್ ಬಾಯ್ಲ್, ಲಕ್ಷ್ಮಿ ಆನಿಂ ತೆಂ ಲ್ಹಾನ್, ಕಾಂಯ್ ಧಾ ವೊರ್ಸಾಂಚೆಂ ಚೆಡುಂ, ಬಿಟ್ಟು....
ದೊಂಬರಾಟ ಖೆಳ್ಚಿಂ ಮ್ಹನ್ಶಾಂ ತಿಂ...
ಆಂಗ್ಡಿ ದೆಗೆನ್ಂಚ್ಚ್ ಆಸ್ಲ್ಲ್ಯಾ ಅಡ್ಚಣೆಚ್ಯಾ ಜಾಗ್ಯಾರ್ ತಾಣಿಂ ಗೊವೊಳ್ ಘಾಲ್ಲೊ...
ತಸೆಂ ಕರ್ಚ್ಯಾಕ್ ಬಾಬುಲ್ ನಾಗ್ ತಾಂಕಾ ’ನಾ’ ಮ್ಹಣಾಲೊ ನಾ. ತಸೆಂ ಮ್ಹಣಾನಾಸ್ತಾನಾ ರಾವೊಂಕ್ಯ್ ದೋನ್ ಕಾರಣಾಂ ಆಸ್ಲ್ಲಿಂ.
ದೊಂಬರಾಟಾಚಿಂ ಮನ್ಶಾಂನಿಂ ತಾಂಚೊ ಖೆಳ್ ತಾಚ್ಯಾ ಆಂಗ್ದಿ ಮುಕಾರ್ ದಾಕಯ್ಲೊ ತರ್ ಆಂಗ್ದಿಕ್ ಜಾಯ್ತೊ ವ್ಯಾರ್ ಜಾತಾ ಮ್ಹಣ್ ತೊ ಜಾಣಾ... ಸಾಂಜೆರ್ ದೊಂಬರಾಟ ಖೆಳ್ತಾನಾ, ಸಾಂತೆಕ್ ಆಯಿಲ್ಲೊ ಜಾಯ್ತೊ ಲೋಕ್ ಆನಿಂ ಇಸ್ಕಾಲಾಚೆ ಭುರ್ಗೆ ಏಕ್ದಂ ಭರ್ತಾತ್. ಹಾಂಚ್ಯಾ ವೊರ್ವಿಂ ಕಾಫಿಯೆ ದುಕಾನಾಕ್ ಆನಿಂ ಆಂಗ್ದಿಕ್ ವ್ಯಾರ್ ಜಾಯ್ತೊ ಜಾತಚ್ಚ್. ಹಿಂ ತಾಚಿಂ ಚಿಂತ್ನಾಂ ವ್ಯಾರಾಚಿಂ.
ದುಸ್ರೆಂ - ಲಕ್ಷ್ಮಿ ತಸಲೆಂ ಬಾಯ್ಲ್ ಆಯ್ಲೆಂ ತರ್ ತಾಚ್ಯಾ ಲಾಗಿಂ ಇಲ್ಲಿ ಸಳವಳ್ ಕರ್ಯೆತ್...ಆಪ್ಲ್ಯಾ ಆಂಕ್ವಾರಿ ದೊಳ್ಯಾಂಕ್ ಇಲ್ಲಿ ಥಂಡಾಯ್ ಮೆಳಾತ್..ನಾಣಿಯೆಕ್ ನಾಂವ್ಕ್ಗೀ ಯಾ ಕುಡಿಚ್ಯಾ ನಿತಳಾಯೆಕ್ ವೆತಾನಾ ಇಡ್ಯಾಂತ್ಲ್ಯಾನ್ ತಿಳುನ್ ದೊಳ್ಯಾಂಕ್ ಇಲ್ಲೊ ಶೆಕ್ ದಿವ್ಯೆತ್.. ಕಾಜಾರ್ ಜಾಯ್ನಾಸ್ತಾನಾ ಆಸ್ಲ್ಲ್ಯಾ ದಾದ್ಲ್ಯಾಕ್ ಮೆಳ್ಚೆಂ ತರ್ ತಿತ್ಲೆಂಚ್ಚ್ ನಂಯ್?
ಪಯ್ಲ್ಯಾ ದಿಸಾಚೊ ದೊಂಬರಾಟಚೊ ಖೆಳ್ ಪಳಂವ್ಕ್ ಲೊಕಾಚಿ ಖೆಟ್ ಭರೊನ್ ಗೆಲ್ಲಿ. ಸಾಂತೆಕ್ ಆಯಿಲ್ಲೊ ಲೋಕ್, ಇಸ್ಕಾಲಾಚೆ ಭುರ್ಗೆ ಥಂಯ್ಸರ್ಚ್ಚ್ ಭರೊನ್ ಗೆಲ್ಲೆ. ಬಾಬುಲ್ ನಾಗಾಕ್ ಆನಿಂ ಆನಿಂ ತಸೆಂ ದೊಂಬರಾಟಚ್ಯಾಂಕ್ ವ್ಯಾರ್ ಬರೊಚ್ಚ್ ಜಾಲ್ಲೊ. ಪುಣ್, ತೊ ಖೆಳ್ ಮಾತ್ ದೆಖೊನ್ ಬಾಬುಲ್ ನಾಗ್ ಆಪ್ಲ್ಯಾ ಕಾಳ್ಜಾಂತ್ಚ್ಚ್ ರಡ್ಲ್ಲೊ...
ತೆಂ ಲ್ಹಾನ್ ಚೆಡುಂ, ಬಿಟ್ಟುಚ್ಚ್ ತ್ಯಾ ದೊಂಬರಾಟಾಚಿ ಜಿವಿ ಬಾವ್ಲಿ....ಖೆಳಾಚಿ ಪುತ್ಲಿ.. ಕಾಲಿಯಾ ಆಪ್ಲ್ಯಾ ಧುವೆಚಿ ವೀದ್ವಾವ್ಳಿ ಕರುನ್ ಪಯ್ಶೆ ಜಮಯ್ತಾಲೊ...ಆನಿಂ ಆಪ್ಲೆಂ ಜೀವನ್ ಕಾಡ್ತಾಲೊ..
ಖೆಳಾ ಉಪ್ರಾಂತ್ ಖೆಳ್... ತ್ಯಾಚ್ಚ್ ನೆಣ್ತ್ಯಾಚೆರ್..... ತಾಚೆಂ ಕುಡಿಚೆ ಆಟೆವಿಟೆ....ತೆಂ ಪಳೆವ್ನ್ ಲೋಕ್ ಖುಶಿ, ಥೊದೆ ಭಿರ್ಮತೆನ್ ಆನಿಂ ಥೊಡೆ ಖುಶೆನ್ ಪಯ್ಶೆ ಉಡಯ್ತಾಲೆ.... ಕಾಲಿಯಾ ಪಯ್ಶೆ ಜಮಯ್ತಾಲೊ..
ಪಯ್ಲ್ಯೊ ಖೆಳ್ ಆರಂಭ್ ಜಾತಾನಾ, ಗೊಣಿಯೆಂತ್ ಭರುನ್ ಆಸ್ಲ್ಲ್ಯೊ ಆರ್ಸ್ಯಾಚೊ ಖೊಂಚಿ ಧರ್ಣಿಚೆರ್ ಕಾಲಿಯಾನ್ ಶಿಂಪ್ದಯ್ಲ್ಯೊ... ತ್ಯಾ ಖೊಂಚಿಚಿ ರಾಸ್ ಪಳೆಯ್ತಾನಾ ಕಾಂಯ್ ಸಾಧಾರ್ನ್ ಕಾಳಿಜ್ ಆಸ್ಲ್ಲ್ಯಾನ್ ಭಿಂಯೆಜಯ್.... ಕಾಲಿಯಾ ಕಠೋರಾಯೆನ್ ಬಿಟ್ಟುಚ್ಯಾ ಪಾಯಾಂಕ್ ಆನಿಂ ತಕ್ಲೆಕ್ ಆರಾವ್ನ್ ತ್ಯಾ ಖೊಂಚಿಚೆರ್ ಉಡಯ್ಲಾಗ್ಲೊ. ಉಪ್ರಾಂತ್, ತಾಕಾ ಉಟೊಂಕ್ ಸೊಡಿನಾಸ್ತಾನಾ ಅಪುಣ್ ತಾಚ್ಯಾ ಕುಡಿಚೆರ್ ಚಲೊನ್ ನಾಚೊಂಕ್ ಲಾಗ್ಲೊ.
ದುಸ್ರ್ಯಾ ಖೆಳಾಂತ್, ಕಾಲಿಯಾ ಆಪ್ಲ್ಯಾ ಏಕಾ ಹಾತಾನ್ ಬಿಟ್ಟುಚ್ಯಾ ತಕ್ಲೆಕ್ ಧರುನ್ ದುಸ್ರ್ಯಾ ಹಾತಾನ್ ತಾಚೊ ಪಾಂಯ್ ಬಾಗವ್ನ್ ತಾಚೊ ಆಖ್ಖೊ ಜೀವ್ ಏಕ್ ವೃತ್ತ್ ಕರುನ್ ಸರ್ವಾಂಕ್ ದಾಧೊಸ್ ಕರಿಲಾಗ್ಲೊ.......
ತಿಸ್ರ್ಯಾ ಖೆಳಾಂತ್, ಏಕಾ ಲ್ಹಾನ್ ಬೊಡಿಯೆಚೆರ್ ಬಿಟ್ಟುಕ್ ಆಕಾಸಾರ್ ಉಕಲ್ನ್, ಉಭರಾಯೆರ್ ಥಾವ್ನ್ಂಚ್ಚ್ ವಾರ್ಯಾರ್ ಉಡವ್ನ್, ಆಯಿಲ್ಲ್ಯಾ ಜಮ್ಯಾಂಕ್ ಆಜಾಪ್ ಕರಿಲಾಗ್ಲೊ...
ಲೋಕ್ ಹ್ಯಾ ತರ್ನ್ಯಾ ಲ್ಹಾನ್ ಭುರ್ಗ್ಯಾಚೆಂ ಧಯ್ರ್ ದೆಖೊನ್ ಆಜಾಪ್ ಪಾವ್ತಾಚ್ಚ್ ಆನಿ ತ್ಯಾಚ್ಚ್ ವರ್ವಿಂ ಕಾಲಿಯಾಕ್ ಪಯ್ಶೆ ಜಾಯ್ತೆ ಮೆಳ್ತಾಲೆಚ್ಚ್...
"ಕಿತ್ಯಾಕ್ ತ್ಯಾ ಲ್ಹಾನ್ ಭುರ್ಗ್ಯಾಕ್ ಅಸೆಂ ಕರ್ತಾಯ್...."
ಪಯ್ಲ್ಯಾ ರಾತಿಚೊ ಖೆಳ್ ಆಕೇರ್ ಜಾವ್ನ್ ಬಾಯ್ಲ್ಯಾನ್ ಬಸೊನ್ ಆಸ್ಲ್ಲ್ಯಾ ಕಾಲಿಯಾ ಲಾಗಿಂ ಬಾಬುಲ್ ನಾಗಾನ್ ವಿಚಾರ್ಲ್ಲೆಂ..
"ಬಿವ್ಕುರೆಂ ರಾಂಡುಲ್ ಭುರ್ಗೆಂ ಹಿಂ ನ್ಹಯ್ ಅಣ್ಣಾ ಹೆಂ..." ಕಾಲಿಯಾಚ್ಯಾ ತಕ್ಲೆರ್ ಸೊರ್ಯಾಚೊ ದೆಂವ್ಚಾರ್ ಯೆದೊಳ್ಚ್ಚ್ ಚಡೊನ್ ಗೆಲ್ಲೊ "ಮ್ಹಜ್ಯಾ ಪೊತಾಚಿ ಭುಕ್ ಥಾಂಬಂವ್ಕ್ ದೆವಾನ್ ದಿಲ್ಲಿಂ ಭುರ್ಗೆಂ..... ಹಾಚ್ಯಾ ವರ್ವಿಂ ಆಮ್ಚೆಂ ಪೋತ್ ಭರ್ತಾ...ಅಳೆ... ಹೆಂ ಪರತ್ ಗುರ್ವಾರ್.... ಚೆಡುಂ ಯಾ ಚೆಡೊ.... ದೋನ್ ವರ್ಸಾಂನಿಂಚ್ಚ್ ಜೀವ್ ಬಾಗಯ್ತಾಂ....ಪಯ್ಶೆ ದೊಡ್ಯಾನ್ ಜಾತೆಲೆ.... ಹ್ಯಾ ಜೀವಾಕ್ ರಾತಿಕ್ ಇಲ್ಲೊ ಸೊರೊ ಮೆಳ್ಳ್ಯಾರ್ ಜಾಲೆಂ... ಹೆರ್ ಕಿತೆಂ ಜಾಯ್... ಆಮಿಂ ಆಸ್ತ್ ಬದಿಕ್ ಕರಿನಾಂವ್...ಜೀವನ್ ಕಾಡ್ಚೆಂ.... ಭುರ್ಗ್ಯಾಕ್ ಚಡ್ ಕಶ್ಟಿಲೆಂ ತರ್ ಲೋಕ್ಯ್ ಚಡ್ ಪಯ್ಶೆ ದಿತಾ.... ಮ್ಹಜ್ಯಾ ಪೊತಾಕ್ಯ್ ಇಲ್ಲೊ ಸೊರೊ ಚಡ್ ಮೆಳ್ತಾ...." ಕಾಲಿಯಾಚ್ಯಾ ದೊಳ್ಯಾಂನಿ ಆಬ್ಲೆಸ್ ಆಸ್ಲ್ಲೊ. ತೊಂಡಾರ್ ವಿಕಾಳ್
ಹಾಸೊ..
"ನ್ಹಯ್... ಕಾಲಿಯಾ ... ಹ್ಯಾ ಭುರ್ಗ್ಯಾಕ್ ಭ್ಯೆಂ ದಿಸಾನಾ...? ಮ್ಹಾಕಾ ಪಳಯ್ತೆನಾಂಚ್ಚ್ ಭ್ಯೆಂ ದಿಸ್ತಾ ಹಾಬಾ..."
ಕಾಲಿಯಾ ಪರತ್ ಹಾಸ್ಲೊ..... ಕಠೋರಾಯೆಚೊ ಹಾಸೊ ತೊ.... ಹಳ್ದುವ್ಯಾ ದಾಂತಾಂ ಇಡ್ಯಾಂತ್ಲ್ಯಾನ್ ತೆದ್ನಾಂಚ್ಚ್ ಖೆಲ್ಲ್ಯಾ ಮಾಸ್ಳೆಚೊ ಕೊಪೊ ಉಗ್ತೊ ದಿಸ್ತಾಲೊ.... ತೊ ನಾಕ್ಷೆನ್ ಕಾಡ್ನ್ ಜಿಬೆರ್ ದವರ್ಲೊ ಆನಿಂ ಮುಕ್ಲ್ಯಾ ದಾಂತಾನಿಂ ಬಾರಿಕಾಯೆನ್ ಚಾಬಾಲಾಗ್ಲೊ.
"ಆಮಿಂ ದೆವಾನ್ ವಿಸ್ರಾಲ್ಲ್ಯಾ ಭುರ್ಗ್ಯಾಂಕ್ ಜಲ್ಮ್ ದಿಂವ್ಚೊ ಅಣ್ಣಾ...ದೆವಾನ್ ವಿಂಚ್ಲ್ಲ್ಯಾ ಭುರ್ಗ್ಯಾಂಕ್ ನ್ಹಯ್... ಜಲ್ಮಾತಾನಾಂಚ್ಚ್ ತಾಂಚೆಂ ಕಾಳಿಜ್ ಉಜ್ಯಾಂತ್ ಭಾಜ್ತಾಂವ್...ಭಿಂಯಾಕ್ ಲಾಸುನ್ ಕಾಡ್ತಾಂವ್.. ತಾಣಿಂ ಭಿಂಯೆಲ್ಯಾರ್, ತಾಂಕಾಚ್ಚ್ ಉಜ್ಯಾಂತ್ ಭಾಜುನ್ ಚಾರ್ ದೀಸ್ ಜೆಂವ್ಚೆಂ....ಹಾಚ್ಯಾಕಿ ವ್ಹಡ್ ದೊಗಾಂ ಚೆಡ್ವಾಂ ಆಸ್ಲ್ಲಿಂ....
ಎಕ್ಲೆಂ ಚಿಕ್ಕೆ ವ್ಹಡ್ ಜಾತಾನಾ, ದೊಂಬರಾಟ ಖೆಳೊಂಕ್ ಆಯ್ಕಾಲೆಂನಾ.... ಖೊಯ್ತ್ಯಾಚ್ಯಾ ಏಕಾಚ್ ಮಾರಾನ್ ಗೊಮ್ಟಿ ಕುಡ್ಕೆ ಕೆಲಿ ಆನಿಂ ಖಂಚಾಗಿ ಫೊಂಡಾಂತ್ ಪುರುನ್ ಸೊಡ್ಲೆಂ...ಆಜೂನ್ ಕೋಣಾಯ್ಕೀ ಕಳಿತ್ ನಾ.... ದುಸ್ರೆಂ, ಅನಿಕ್ಯ್ ಹರಾಮಿ... ಆಮ್ಕಾಂ ಸೊಡ್ನ್, ಖಂಚಾಗೀ ಮಿಂಡಾ ಸಾಂಗಾತಾ ಧಾವೊಂಕ್ ಉರ್ಡಾಲೆಂ... ಚೆನ್ನಪಟ್ಣಾಂತ್ ಆಸ್ತಾನಾ.... ಬಿಕ್ಣೆಶಿ ಖಂಚೆ... ಕಾಳಿ ಮಾತೆಕ್ ರಗ್ತಾಚಿ ಬಲಿ ದಿನಾಸ್ತಾನಾ ಕಿತ್ಲೊಚೊ ತೇಂಪ್ ಜಾಲ್ಲೊ.... ತಾಚೆಂ ರಗಾತ್ ದೀವ್ನ್ ತಿಕಾ ಖುಶ್ ಕೆಲೆಂ...ಹಾಕಾಯ್, ಉಜ್ಯಾನ್ ದೋನ್ ಪಾವ್ಟಿಂ ದಾಗುನ್ ದವರ್ಲಾಂ....ಆನಿಂ ಹೆಂ ಮ್ಹಜೆಂ ಬಾಯ್ಲ್ ಬಾಳಾಂ ಜಾಲ್ಯಾ ಉಪ್ರಾಂತ್ ಹಾಣೆಂಯ್ ನವ್ಯಾನ್ ಜಲ್ಮಾಲ್ಲ್ಯಾನ್ ತಸೆಂಚ್ಚ್ ಕೆಲೆಂ ತರ್... ತಾಕಾಯ್ ತಸೆಂಚ್ಚ್ ಕರ್ತಾಂ.....ದೆವಾನ್ ವಿಸ್ರಾಲ್ಲ್ಯಾ ಖೊಟ್ಯಾ ಜಾತಿಚೆ ಕಿಡೆ ಹೆ ಅಣ್ಣಾ... ಮಜುಬೂರಿ... ಕಿತೆಂ ಕರ್ಯೆತಾ.... ಆಮ್ಚೆಂ ಪೊಟ್ ಭರಾಜಯ್ ತರ್... ತಾಂಕಾ ತಸೆಂಚ್ಚ್ ಕರಿಜಯ್ ನ್ಹಯ್ಗೀ????
ಆಮ್ಚಿಂ ಭುರ್ಗಿಂ ಜಾಲ್ಯಾರ್ ಕಿತೆಂ.... ಕಾಳಿ ಮಾತೆಚೆಂ ದೆಣೆಂ ತೆಂ...ಆಮ್ಕಾಂ
ದುಬ್ಳ್ಯಾಂಕ್..." ಬಾಬುಲ್ ನಾಗಾಚ್ಯಾ ಪೊಟಾಂತ್ ಪೀಂತ್ ಕದ್ವಳ್ಳೆಂ.... ತೊ ಮುಕಾರ್ ಉಲಯ್ಲೊನಾ...
************
ದೊಂಬರಾಟಚೊ ಖೆಳ್ ಪಳೆಂವ್ಕ್ ಮನ್ಶಾಂ ಸದಾಂಚ್ಯಾ ಬರಿ ನಾತ್ಲ್ಲಿಂ.
ಲೋಕ್ ಪಳಯಿಲ್ಲೆಂಚ್ಚ್ ಪಳವ್ನ್ ಥಕ್ಲ್ಲೊ ಜಾವ್ಯೆತ್.
ಕಾಲಿಯಾ ಕಾಂಯ್ ಮುಖ್ಲ್ಯಾ ಗಾಂವಾಕ್ ವಚೊಂಕ್ ತಯರಾಯ್ ಕರುನ್
ಆಸ್ಲ್ಲೊ. ದೊನ್ಪಾರ್ ಜಾತಾನಾ ಬಿಟ್ಟು ದುಕಾನಾಕ್
ಆಯಿಲ್ಲೆಂ. ಬಿಟ್ಟುಚ್ಯಾ ಹಾತಿಂ ಚಾರ್ ರುವಿಯೊ ಆಸ್ಲ್ಲ್ಯೊ. ಕಿತ್ಲೆ ಪಯ್ಶೆ ಮ್ಹಣ್ ವಿಚಾರಿನಾಸ್ತಾನಾ ಬಾಬುಲ್ ನಾಗಾನ್ ತಾಚ್ಯಾ ಹಾತಿಂ ಬಟಾಟೆಚ್ಯಾ ಪೋಡಿಂಚಿಂ ಲ್ಹಾನ್ ಪೊಟ್ಲಿ ದವರ್ತಾನಾಂಚ್ಚ್ ಕಾಲಿಯಾ
ಉದೆಲ್ಲೊ.....
"ಚೊಟ್ಟೆಂ .. ಚೆಡಿ... ಹೆಂ..."
ಬಿಟ್ಟುಚ್ಯಾ ಕೇಸಾಂಕ್ ಧರುನ್ ತಾಣೆಂ ಚಾರ್ ಪಾವ್ಟಿಂ ಘುಂವ್ದಾಯಿಲ್ಲೆಂ...
"ಪಯ್ಶೆ ಚೋರ್ನ್ ಖಾಣಾಂ ಖಾತಾ....ರಾಂಡೆಚಿಂ ಆವ್ಲಾದ್....ಪೋರ್ ಇಲ್ಲೊ ದಂದೊ ಆಸ್ಲ್ಲೊ... ಕಾಲ್ ಥಾವ್ನ್ ಲೋಕ್ ಪಯ್ಶೆ ಉಡಂವ್ಕ್ಂಚ್ಚ್ ಆಯ್ಕಾನಾ.... ಹಾಂಕಾ ಹಾಂವೆಂ ಖಾಂವ್ಕ್ ದಿಂವ್ಚೆಂಗೀ ಯಾ ಮ್ಹಜ್ಯಾ ತಾಳ್ಯಾಚ್ಯಾ ತಾನೆಕ್ ಇಲ್ಲೊ ಸೊರೊ ಘೆಂವ್ಚೊ... ಮ್ಹಜೆ ಪಯ್ಶೆ ಚೋರ್ನ್ ಖಾಣಾಂ ಖಾತಾ.... ಬೆವಾರಿಸ್ ಚೆಡುಂ..."
ಬಿಟ್ಟು ಬಿಂಯೆಲ್ಲೆಂ.... ದುಕಿನ್ ರಡ್ಲ್ಲೆಂ... ಪುಣ್, ಕಿತೆಂ ಕರ್ತೆಲೆಂ... ಹಾತಾಂತ್ ಆಸ್ಲ್ಲಿ ’ಪೊಡಿಂಚಿ’ ಪೊಟ್ಲಿ ಧರ್ಣಿರ್ ಪಡ್ಲ್ಲಿ ಆನಿಂ ಧುಳಿಂತ್ ಪೋಡಿ ಪಡೊನ್ ಗೆಲ್ಲ್ಯೊ..
"ಕಾಲಿಯಾ...." ಬಾಬುಲ್ ನಾಗ್ ಹಾಳ್ವಾಯೆನ್ ಮ್ಹಣಾಲೊ..." ತುಜ್ಯಾಚ್ಚ್ ಭುರ್ಗ್ಯಾಕ್ ತುಂ ತಸೆಂ ಕರ್ತಾಯ್...ಪಾಪ್ ತಾಚ್ಯಾ ವೊರ್ವಿಂ ತುಂ ಜಿಯೆತಾಯ್ ನ್ಹಯ್ಗೀ...?? ತಾಂಚ್ಯಾ ಪೊಟಾಕ್ ದೀನಾಂಯ್ ತರ್ ತಿಂ ವಾಂಚ್ಚಿ ಕಸೆಂ???"
ಕಾಲಿಯಾ ಕಡ್ಕಡ್ಲೊ..
"ತಸೆಂ ಮ್ಹಣಾನಾಕಾ ಅಣ್ಣಾ...ಹೆಂ ಚೆಡುಂ ಕೊಣಾಚೆಂ ತೆಂ ಕೋಣ್ ಜಾಣಾ...ಪುಣ್, ಮ್ಹಜ್ಯಾ ಪೊಟಾಕ್ ಸೊರೊ ಪಡಾಜಯ್ ಜಾಲ್ಲೊ ಹ್ಯಾ ಪಯ್ಶಾಂನಿ ಆನಿಂ ತಾಚೊ ಹೆಂ ಖಾಣ್ ಖಾಯ್ತ್ ತರ್ ತಾಕಾ ಜಿವೆಶಿಂ ಮಾರ್ತಾಂ ಪಳೆ..."
ಬಾಬುಲ್ ನಾಗಾಕ್ ಮುಕಾರ್ ಕಿತೆಂಚ್ಚ್ ಉಲಂವ್ಚೆಂ ಧಯ್ರ್ ಮೆಳ್ಳೆಂ
ನಾ..
ತ್ಯಾ ದಿಸಾಚ್ಯಾ ದೊಂಬರಾತಾಂತ್ ಬಿಟ್ಟುಕ್ ತಾಣೆಂ ಉಬ್ಯಾ ರಾವ್ಲ್ಲ್ಯಾ ಕದೆ ಥಾವ್ನ್೦ಚ್ಚ್ ತ್ಯಾ ಆರ್ಸ್ಯಾಂಚ್ಯಾ ಖೊಂಚಿಚೆರ್ ಉಡಯಿಲ್ಲೆಂ... ತಾಚ್ಯಾ ಪೊಟಾಚೆರ್ ಜಾತಾ ತಿತ್ಲೆಂ ತೊ ಉಡ್ಲ್ಲೊ.. ಪುಣ್, ತೆಂ ತರ್ನೆಂ ಬಿಟ್ಟು ಕಾಳ್ಜಾಂತ್ ರಡ್ಲ್ಲೆಂ ಜಾವ್ಯೆತ್ ಪುಣ್, ದೊಳ್ಯಾಂನಿ ದುಖಾಂ ಆಯ್ಲಿಂ ನಾಂತ್..
************
ದೋನ್ ದೀಸಾಂ ಉಪ್ರಾಂತ್, ಸಕಾಳಿಂಚೆಂ ನ್ಹಾಣ್ ಆನಿಂ ದೀವ್ಳಾಚಿ ಭೆತ್ ಜಾವ್ನ್ ಖಾಣಾಚಿ ತಯರಾಯ್ ಕರ್ತಾನಾ, ಬಿಟ್ಟು ಕಾಫಿಯೆ ದುಕಾನಾಚ್ಯಾ ಬಾಂಕಾಚೆರ್ ಬಸೊನ್ ಆಸ್ಲ್ಲೆಂ ದೆಖ್ಲೆಂ ಬಾಬುಲ್
ನಾಗಾನ್..
ಬಾಬುಲ್ ನಾಗಾಕ್ ತಾಚಿ ಭಿರ್ಮತ್ ದಿಸ್ಲಿ.
"ಬಿಟ್ಟು ಕಿತೆಂ ಜಾಲೆಂ ಪುತಾ?" ತಾಚ್ಯಾ ಮಾತ್ಯಾರ್ ಹಾತ್ ದವರುನ್ ತಾಣೆಂ ವಿಚಾರ್ಲೆಂ.
ಬಿಟ್ಟುಚ್ಯಾ ದೊಳ್ಯಾಂನಿ ದುಖಾಂ ಆಸ್ಲ್ಲಿಂ. ವೊಂಟ್ ಕಾಂಪ್ತಾಲೆ. ಕಾಳ್ಜಾಂತ್ ಶಿರ್ಶಿರೆ ಉಗ್ತ್ಯಾನ್ ದಿಸ್ತಾಲೆ...
"ಅಮ್ಮಾಚ್ಯಾ ಪೊಟಾಂತ್ ಕಾಂಯ್ ನಾ.... ತಿಕಾ ಕಾಂಯ್ ತರ್ಯ್ ಖಾಂವ್ಕ್ ಆಬ್ಬುನ್ ದಿಂವ್ಕ್ ನಾ...ಕಾಲ್ ದಂದೊ ಜಾಂವ್ಕ್ ನಾ ಮ್ಹಣ್ ಆಬ್ಬು ರಾಗಾರ್ ಜಾಲಾ ..... ತಿ ತಕ್ಲಿ ಘುಂವೊನ್ ಪಡ್ಲ್ಯಾ..."
ಬಾಬುಲ್ ನಾಗಾಚ್ಯಾ ಪೊಟಾಂತ್ ಉಜೊ ಪೆಟ್ಲೊ. ಕಾಜಾರ್ ತೊ ಜಾಂವ್ಕ್ ನಾತ್ಲ್ಲೊ. ಏಕಾ ಸ್ತ್ರಿಯೆಚೆ ಕಶ್ಟ್ ತಾಕಾ ಕಳಿತ್ ನಾತ್ಲ್ಲೆ ತರ್ಯ್ ಭರ್ಲ್ಲ್ಯಾ ಗುರ್ವಾರಿಚ್ಯಾ ಪೊಟಾಕ್ ಕಾಂಯ್ಚ್ಚ್ ನಾ ಮ್ಹಣ್ತಾನಾ ತಾಚ್ಯಾ ಕಾಳ್ಜಾಕ್ ಹಜಾರ್ ಕುಡ್ಕೆ ಕೆಲ್ಲ್ಯಾಬರಿ ತೊ ಕಳ್ವಳ್ಳೊ.
ದುಕಾನಾಂತ್ ಕಾಂಯ್ ನಾತ್ಲ್ಲೆಂ, ರಾತಿಂ ಉರ್ಲ್ಲ್ಯಾ ಉಂಡ್ಯಾಚಿಂ ಚಾರ್ ಕಾಪಾಂ ಸೊಡ್ಲ್ಯಾರ್. ತಿಂಚ್ಚ್ ಕಾಗ್ದಾ ಕುಡ್ಕ್ಯಾಂತ್ ಘುಟ್ಲಾವ್ನ್, ಬಿಟ್ಟುಚ್ಯಾ ಹಾತಿಂ ಚೆಪುಂಕ್ ತೊ
ಉರ್ಡಾಲೊ. ಬಿಟ್ಟುನ್ ತಿಂ ಘೆತ್ಲಿಂ ನಾಂತ್.
"ಮಾಮು..." ತೆಂ ಆನಿಕ್ಯ್ ರಡ್ತಾಲೆಂ..." ಹಾಂವ್ ತುಜ್ಯಾ ಲಾಗಿಂ ಏಕ್ ಉಪ್ಕಾರ್ ವಿಚಾರುಂ? ಏಕ್ ಉಪ್ಕಾರ್....?"
"ಕಿತೆಂ ತೆಂ ವಿಚಾರ್?... ಸಾಂಗ್ ತುಂ....."
"ತುಂ ಕಾಜಾರ್ ಜಾಂವ್ಕ್ ನಾಂಯ್ಮೂ?
ಬಾಬುಲ್ ನಾಗಾನ್ ಉತ್ರಾಂ ಕಾಡ್ಲಿಂ ನಾಂತ್ ಬಗಾರ್ ತಕ್ಲಿ ಹಾಲಯ್ಲಿ - ’ನಾ’ ಮ್ಹಣ್ಚ್ಯಾ ಬರಿ.
"ತರ್ ತುಂ ಮ್ಹಜ್ಯಾ ಅಮ್ಮಿಲಾಗಿಂ ಕಾಜಾರ್ ಜಾತಾಯ್??"
ಬಾಬುಲ್ ನಾಗ್ ಏಕ್ ಘಡಿಭರ್ ಥಂಡ್ ಜಾಲೊ... ತಾಕಾ ಉಲಂವ್ಕ್ ಜಾಲೆಂಚ್ಚ್ ನಾ...ಜೀವನಾಂತ್ ಕೋಣೆಂಚ್ಚ್ ಯೆದೊಳ್ ವರೇಗ್ ವಿಚಾರಿನಾತ್ಲ್ಲೆಂ ಸವಾಲ್ ಹೆಂ.. ತಾಚ್ಯಾ ಕಾಳಿಜ್ ಕಾಂಪೊಂಕ್ ಲಾಗ್ಲೆಂ..ಜೀವ್ ಮಿರ್ಮಿರ್ಲೊ...
"ತುಂ ಕಿತೆಂ ಉಲಯ್ತಾಯ್ ಬಿಟ್ಟು.... ಹಾಂವ್ ತುಜ್ಯಾ ಅಮ್ಮಿಲಾಗಿಂ.... ಶ್ಶಿ... ತಸೆಂ ತುಂ ಕಿತ್ಯಾಕ್ ಮ್ಹಣ್ತಾಯ್..."
ಬಿಟ್ಟು ಪರತ್ ರಡ್ಲೆಂ...
"ಮ್ಹಜಿ ಅಮ್ಮಿ ಭಾರಿ ಬರಿ... ತಿಕಾ ಅಬ್ಬು ಕಠೀಣಾಯೆನ್ ಕಶ್ಟಿತಾ.. ಕಾಲ್ ರಾತಿಂ ಆಮ್ಕಾಂ ಜೆಂವ್ಕ್ ಸಯ್ತ್ ತಾಣೆಂ ದಿಲ್ಲೆಂ ನಾ...ತುಂ ಅಮ್ಮಿಲಾಗಿಂ ಕಾಜಾರ್ ಜಾತಾಯ್ ??
"ಬಿಟ್ಟು.... ತಸೆಂ ಜಾಯ್ನಾ ಬಿಟ್ಟು.... ಅಸೆಂ ಮ್ಹಳ್ಳೆಂ ತುಜೊ ಅಬ್ಬು ಆಯ್ಕಾತ್ ತರ್ ತುಕಾ ಜಿವೆಶಿಂ ಮಾರುಂಕ್ ಆಸಾ..."
ಥೊದ್ಯಾ ವೇಳಾಚೆಂ ಮೌನ್ಪಣ್ ಥಂಯ್ಸರ್ ಭರೊನ್
ರಾವ್ಲೆಂ...
ಬಿಟ್ಟು ಅಂಗಡ್ ಸಾಂಡುನ್ ವೆಚ್ಯಾ ಪಯ್ಲೆಂ ಘುಣ್ಗುಣೊನ್ ಮ್ಹಣಾಲೆಂ; "ತುಂ ಅಮ್ಮಿಲಾಗಿಂ ಕಾಜಾರ್ ಜಾಶಿ ತರ್ ಅಬ್ಬುಕ್ ಹಾಂವ್ ಜಿವೆಶಿಂ ಮಾರ್ತಾಂ..."
ಬಾಬುಲ್ ನಾಗ್ ಕಾಂಪ್ಲೊ... ತಸಲಿಂ ಉತ್ರಾಂ ತಸಲ್ಯಾ ಚೆಡ್ವಾ ಥಾವ್ನ್....ತೊ ರಾಗಾರ್ಯ್ ಜಾಲೊ ಆನಿಂ ಬಿಟ್ಟುಕ್ ತಾಣೆಂ ಆಂಗ್ದಿ ಥಾವ್ನ್ ಧಾಂವ್ಡಾವ್ನ್ ಸೊಡ್ಲೆಂ....
***************
ಆನಿಂ ದುಸ್ರ್ಯಾ ದಿಸಾಚ್ಚ್ ಕಾಲಿಯಾಕ್ ಆನಿಂ ಲಕ್ಷಿಕ್ ನಿದ್ಲ್ಲ್ಯಾ ಕಡೆಚ್ಚ್ ಕೋಣೆಂಗಿ ಜಿವೆಶಿಂ ಮಾರ್ಲ್ಲೆಂ. ತೆಂಯ್ ಬಾಬುಲ್ ನಾಗಾಚ್ಯಾ ಅಂಗ್ದಿ ಥಾವ್ನ್ ವೀಸ್ ಪಂಚ್ವೀಸ್ ಮೆಟಾಂ ಪಯ್ಸ್...
ಲೋಕ್ ಭರೊನ್ ಗೆಲ್ಲೊ. ಪೋಲಿಸಾಂಚಿ ತನ್ಕಿ ಜಾತಾಲಿ...
ಲೊಕಾಚ್ಯಾ ಖೆಟಿ ಮಧೆಂ ಆಸೊನ್ ಬಾಬುಲ್ ನಾಗ್ ಹೆಂ ಸರ್ವ್ ದೆಖ್ತಾಲೊ..
ತರ್ನೆಂ ಅಸ್ಕತ್ ಬಿಟ್ಟು ಪೋಲಿಸಾ ಸರ್ಶಿನ್ ದೆಗೆನ್ ಉಭೆಂ ಆಸ್ಲ್ಲೆಂ. ಕಾಲಿಯಾಚೊ ಮಾಂಡ್ಡೊ ಚೆಂಚೊನ್ ಗೆಲ್ಲೊ. ಲಕ್ಷ್ಮಿ ತಕ್ಲಿ ಪುಟ್ಲ್ಲಿ. ಉಭಾರ್ ಪೋಟ್ ತಸೆಂಚ್ಚ್ ಆಸ್ಲ್ಲೆಂ. ದೊಗಾಂಯ್ಚಿಂ ಮೊಡಿಂ ವ್ಯಾನಾಚೆರ್ ಘಾಲಿಂ. ಪೋಲಿಸಾಂ ಮಧ್ಲ್ಯಾ ಏಕ್ಲ್ಯಾನ್ ವ್ಹಡಾ ತಾಳ್ಯಾನ್ ವಿಚಾರ್ಲೆಂ - "ಹ್ಯಾ ಚೆಡ್ವಾಚೊ ವಾರೆಸ್ದಾರ್ ಕೋಣ್ಯ್ ಆಸಾತ್?"
ಲೋಕ್ ಥಂಡ್ ಆಸ್ಲ್ಲೊ... ಪರ್ದೆಶಿ ಚೆಡ್ವಾಚೊ ವಾರೆಸ್ದಾರ್ ಜಾಂವ್ಕ್ ಕೋಣ್ ತಯಾರ್? ಮೌನ್ಪಣ್ಂಚ್ಚ್ ಥಂಯ್ಸರ್ ಭರೊನ್ ಗೆಲ್ಲೆಂ...
ಬಾಬುಲ್ ನಾಗಾನ್ ಬಿಟ್ಟುಕ್ ಪಳಯ್ಲೆಂ... ತೆಂ ರಡಾನಾತ್ಲ್ಲೆಂ...ಕಾಲ್ಚ್ಯಾ ದೀಸಾ ತಾಚ್ಯಾ ಅಂಗ್ದಿ ಆಯಿಲ್ಲ್ಯಾ ವೆಳಿಂ ಆಸ್ಲೆಂ ಭ್ಯೆಂ ಆಜ್ ತಾಚ್ಯಾ ಥೈಂ ನಾತ್ಲ್ಲೆಂ....ಬಗಾರ್, ತಾಚ್ಯಾ ದೊಳ್ಯಾಂನಿ ಕಸಲೆಂಗೀ ಸಮಧಾನ್ ಆಸ್ಲ್ಲೆಂ... ತ್ಯಾ ಸಮಧಾನಾಚೆಂ ಕಾರಣ್ ಬಾಬುಲ್ ನಾಗ್ ಮಾತ್ ಜಾಣಾಸ್ಲ್ಲೊ..
"ಹ್ಯಾ ಚೆಡ್ವಾಕ್ ಆತಾಂ ರಾಂಡೆಚ್ಯಾ ಘರಾಂತ್ ವಿಕ್ತೆಲೆ... ಹೆ ಚೋರ್..." ದಿನ್ನು ಪಾಟ್ಲ್ಯಾನ್ ಉಭೊ ರಾವೊನ್ ಮ್ಹಣಾಲೊ.
ಬಾಬುಲ್ ನಾಗಚೆಂ ಕಾಳಿಜ್ ಕಾಂಪ್ಲೆಂ.
ಜೀವನಾಂತ್ ಯೆದೊಳ್ ಕರಿನಾತ್ಲ್ಲಿ ದಯಾಳ್ ಕರ್ನಿ ಕರುಂಕ್ ತಾಚೆಂ ಕಾಳಿಜ್ ಆಶೆತಾಲೆಂ.
ಪೋಲಿಸಾಂನಿ ಪರತ್ ಬೋಬ್ ಮಾರ್ಲಿ...." ಕೋಣಿಂಯ್ ನಾಂತ್ ತರ್... ಹಾಕಾ ಆಮಿಂ ವೊರ್ತೆಲ್ಯಾಂವ್....ಆನಿಂ..."
"ಹಾಂವ್ ಆಸಾಂ..." ಬಾಬುಲ್ ನಾಗ್ ಉಮಾಳೊನ್ ಮ್ಹಣಾಲೊ.
ತ್ಯಾಚ್ಚ್ ಘಡಿಯೆ, ಬಿಟ್ಟುಚೆ ದೊಳೆ ಬಾಬುಲ್ ನಾಗಾಚ್ಯಾ ದೊಳ್ಯಾಂಕ್ ಮೆಳ್ಳೆ....
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
