ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾಝರ್ - 43. ಉಜೊ
ಅನಿಲ್ ಪೆರ್ನಾಲ್: ಕೊಂಕ್ಣೆಂತ್ ಹಾಣೆಂ ಏಕ್ ಕವಿ ಜಾವ್ನ್ ಅಪ್ಲೆಂ ಸಾಹಿತಿಕ್ ಅಸ್ತಿತ್ವ್ ರುತಾಂ ಕೆಲಾಂ ತರ್ಯೀ ಹಾಚಿ ಸಾಹಿತಿಕ್ ಸುರ್ವಾತ್ ಜಾಲ್ಲಿ ಕಾಣ್ಯೆಗಾರ್ ಜಾವ್ನ್. ಅಜೀಕ್ ಸೊಳಾ - ಸತ್ರಾ ವರ್ಸಾಧಿಂ ಹಾಚಿ ಫುಡ್ಲದ್ ಕಾಣಿ ’ಕಾಣಿಕ್’ ಪತ್ರಾಚೆರ್ ಪರ್ಗಟ್ ಕೆಲ್ಲೊ ಮ್ಹಜೊ ಉಡಾಸ್. ಪುಣ್ ವೆಳಾಕಾಳಾಚಾ ತಶೆಂಚ್ ಚಿಂತ್ಪಾಚಾ ಬದ್ಲಾವಣೆನ್ ಜಾವ್ಯೆತ್, ಹಾಣೆಂ ಕಾಣ್ಯೊ ಬರಂವ್ಚ್ಯೊ ಮೊಸ್ತ್ ಉಣ್ಯೊ ಕೆಲ್ಯಾತ್ ತರ್ಯೀ, ಮನ್ ಕೆಲ್ಯಾರ್ ಹಾಚ್ಯಾನ್ ಬರ್ಯೊ ಕಾಣ್ಯೊ ಬರಂವ್ಕ್ ಸಾಧ್ಯ್ ಆಸಾತ್ ಮ್ಹಣ್ಚಾಂತ್ ದುಭಾವ್ ನಾ. ಫುಡೆಂ ತರ್ಯೀ ಮಟ್ವ್ಯೊ ಕಾಣ್ಯೊಯೀ ಬರಂವ್ಕ್ ಸಕೊಂದಿ ಮ್ಹಳ್ಳೆಂ ಮ್ಹಜೆಂ ಮಾಗ್ಣೆಂ.
ಅನಿಲ್ ಪೆರ್ನಾಲ್
"ನಿಶಾ, ಪ್ಲೀಜ್ ನಿಶಾ, ಹೆಂ ಅಖ್ರೇಚೆ ಪಾವ್ಟಿಂ ತುಜೆಕಡೆನ್ ಮೊಗಾಚಿ ಭಿಕ್ ಮಾಗ್ತಾಂ. ದಯಾಕರುನ್ ಹಾಕಾ ಸಯ್ ಘಾಲ್. ತುಜ್ಯಾವಿಣೆಂ ಜಿವಿತ್ ಮ್ಹಜೆಂ ಅಧುರೆಂ ಜಾತೆಲೆಂ ನಿಶಾ" ಸರಸರ ಕಾಲೇಜಿಚಿಂ ಮೆಟಾಂ ಚಡ್ಚಾ ನಿಶಾ ಕಡೆನ್ ಎಡ್ವಿನ್ ಕಳ್ವಳ್ಯಾನಿಂ ವಿಚಾರ್ತಾಲೊ.
"ಪಳೆ ಎಡ್ವಿನ್, ತುಕಾಯೀ ಹೆಂ ಮ್ಹಜೆಂ ಲಾಸ್ಟ್ ವಾರ್ನಿಂಗ್ ಜಾವ್ನಾಸಾ. ಅನಿಂ ಮುಕಾರ್ಯೀ ‘ಮೋಗ್-ಮೋಗ್’ ಮ್ಹಣೊನ್ ಪಾಂಕ್ ಚಿಡ್ಕಾಲ್ಲ್ಯಾಪರಿಂ ಮ್ಹಜ್ಯಾ ಪಾಟಿಕ್ ಲಾಗ್ಶಿ ತರ್ ಹಾಂವ್ ಪ್ರಿನ್ಸಿಪಾಲಾ ಕಡೆನ್ ದೂರ್ ದಿತೆಲಿಂ."
"ಮ್ಹಕಾ ಸಮ್ಜೊಂಚೆಂ ಪ್ರಯತ್ನ್ ಕರ್ ನಿಶಾ, ದಯಾಕರ್ನ್ ಮ್ಹಕಾ ಅಪಾರ್ಥ್ ಕರಿನಾಕಾ. ಖಂಚಾಂತ್ ತುಕಾ ಮ್ಹಜೆ ಥಂಯ್ ಉಣೆಂಪಣ್ ದಿಸ್ತಾ ಸಾಂಗ್ ನಿಶಾ. ಗ್ರೇಸ್ತ್ಕಾಯೆನ್, ಸೊಭಾಯೆನ್, ಆಮಿಂ ಸಮಾಸಮ್ ಆಸಾಂವ್. ದಯಾಕರ್ನ್ ಮ್ಹಜ್ಯಾ ಥಂಯ್ ಕಿರ್ಲಾಲ್ಲ್ಯಾ ಅಶೆಕ್ ಹುಮ್ಟಿನಾಕಾ ನಿಶಾ."
"ಎಡ್ವಿನ್ ತುಂ ಕಿತೆಂಯೀಂ ಕರ್ ತೆಂ ಮ್ಹಕಾ ಕಾಂಯ್ ಪಡೊನ್ ವಚೊಂಕ್ ನಾಂ. ಹಾಂವ್ ಮ್ಹಜ್ಯಾ ಶಿಕ್ಪಾ ಮಧೆಂ ಮೊಗಾಕ್ ಭರ್ಸುಂಕ್ ಬಿಲ್ಕುಲ್ ಆಶೆನಾ. ಭೆಷ್ಟೊಚ್ಚ್ ಮ್ಹಜೊ ವೇಳ್ ವಿಭಾಡ್ನಾಕಾ. ವಾಟ್ ಸೊಡ್ ಮುಖಾರ್ ವಚೊಂಕ್."
"ನಾಂ ನಿಶಾ, ತುಂವೆಂ ಮ್ಹಕಾ ನಿರಾಧಾರಿ ಕರುನ್ ವೆಚೆಂ ಸಾಧ್ಯ್ ನಾಂ." ಎಡ್ವಿನಾನ್ ಆವೇಶಾನ್ ನಿಶಾಚೊ ಉಜ್ವೊ ಹಾತ್ ಧರ್ಲ್ಲೊ. ಅನಿಂ ತೆದ್ನಾಂಚ್ಚ್ ಕಿತೆಂಚ್ಚ್ ಚಿಂತ್ಚ್ಯಾ ಫುಡೆಂ ನಿಶಾಚಾ ದಾವ್ಯಾ ಹಾತಾನ್ ಎಡ್ವಿನಾಚಾ ಉಜ್ವ್ಯಾ ಪೊಲ್ಯಾಚೊ ಉಮೊ ಘೆವುನ್ಯೀ ಜಾಲ್ಲೊ.
ಹೆಂ ಅವ್ಮನಾಚೆಂ ವೊಜೆಂ ಘೆವುನ್ ತ್ಯಾ ದೀಸ್ ದೆಂವ್ಲ್ಲೊ ತೊ ಕೊಲೆಜಿಚಿಂ ಮೆಟಾಂ ಪರ್ತ್ಯಾನ್ ಚಡ್ಲೊ ನಾಂ. ಪೂಣ್ ತಾಚ್ಯಾ ಮತಿಂತ್ ಖಂಚ್ಲ್ಲ್ಯಾ ನಿಶಾಚೆಂ ರುಪ್ಣೆಂ ಕಾಡಿಜಾಯ್ ತರ್ ಭರ್ತಿ ವರಸ್ ಲಾಗ್ಲ್ಲೆಂ. ಅತಾಂ ತಾಣೆಂ ಕಂಪ್ಯೂಟರ್ ಸಾಯನ್ಸಾಂತ್ ಡಿಪ್ಲೋಮಾ ಕರ್ಚ್ಯಾಕ್ ಚಿಂತ್ಲ್ಲೆಂ. ಬಾಪುಯ್ ತಾಚೊ ಗಲ್ಪಾಂತ್ ಬರ್ಯಾ ವಾವ್ರಾರ್ ಆಸ್ಲ್ಲ್ಯಾನ್ ದುಡ್ವಾಕ್ ಕಾಂಯ್ ಬರ್ಗಾಲ್ ನಾತ್ಲ್ಲೊ.
ವರ್ಸಾಂ ಧಾಂವ್ತಾನಾ ಎಡ್ವಿನ್ ಕಂಪ್ಯೂಟರಾಂತ್ ದಿಪ್ಲೊಮಾ ಜೊಡ್ಚಾಂತ್ ಯಶಸ್ವಿ ಜಾಲ್ಲೊ, ಸಾಂಗಾತಾಚ್ಚ್ ಆಶಾಚ್ಯಾ ಮೊಗಾಂತ್ಯೀ. ವ್ಹಯ್ ಆಶಾ ತಾಚೆಂಚ್ಚ್ ಬ್ಯಾಚ್ಮೇಟ್ ಜಾವ್ನಾಸ್ಲೆಂ. ಪಳೆಂವ್ಕ್ ಸಾಧಾರ್ಣ್ ನಿಶಾಬರಿಂಚ್ಚ್ ದಿಸ್ತಾಲೆಂ. ಕಿತ್ಯಾಕ್ ಮ್ಹಳ್ಯಾರ್ ನಿಶಾಚೆಂಚ್ಚ್ ತೆಂ ದಾಕ್ಟೆಂ ಭಯ್ಣ್ ಜಾವ್ನಾಸ್ಲೆಂ. ಹೆಂ ಎಡ್ವಿನ್ಯೀ ಜಾಣಾಸ್ಲೊ. ಅಶೆಂ ಅತಾಂ ನಿಶಾ ಥಾವ್ನ್ ರಿತೊ ಜಾಲ್ಲ್ಯಾ ಎಡ್ವಿನಾಚ್ಯಾ ಕಾಳ್ಜಾ-ಪಡ್ದ್ಯಾರ್ ಆತಾಂ ಆಶಾಚೆಂ ರುಪ್ಣೆಂ ಉದೆಲ್ಲೆಂ.
ದೊನ್ಯೀ ಕುಟ್ಮಾಂ ಗ್ರೇಸ್ತ್ಕಾಯೆನ್ ಭರೊನ್ ವೊಮ್ತಾತೆಲ್ಯಾನ್ ಅಂತಸ್ತಾಚೊ ದೊರೊ ಕಾಂಯ್ ಹಾಂಚ್ಯಾ ಮೊಗಾ ಮಧೆಂ ಯೇಂವ್ಕ್ ನಾಂ. ಶಿಕಾಪ್ ಜಾಲ್ಲೆಂಚ್ಚ್ ಎಡ್ವಿನಾಚಾ ಬಾಪಾಯ್ನ್ ಪುತಾಚೆಂ ಕಾಜಾರ್ ಗದ್ದಾಳಾಯೆನ್ ಕೆಲ್ಲೆಂ, ಅಪ್ಲ್ಯಾಚ್ಚ್ ಖರ್ಚಾರ್. ಎಕ್ಲೊಚ್ಚ್ ಪೂತ್ ಜಾಲ್ಲ್ಯಾನ್ಗೀ ವ ವೆಗಿಂಚ್ಚ್ ಸುನೆಕ್ ಪಳೆಂವ್ಕ್ ಅನಿಂ ನಾತ್ವಾಕ್ ಖೆಳಂವ್ಚ್ಯಾ ಆಶೆನ್ಗೀ ಕೋಣ್ ಜಾಣಾ!?
ಚೆಡ್ವಾಗೆಲ್ಲಿಂ ಬ್ರಾಗ್ಸ್ ಜೊಡಿಂ ಆತಾಂ ಖುಶಿ ಜಾಲ್ಲಿಂ. ತಾಂಚಿಯೀ ಖಂತ್ ಹಾಳು ಜಾಲ್ಲಿ. ತಾಂಚಿಂ ಮೊಗಾಚಿಂ ದೋನ್ ಫಳಾಂ ನಿಶಾ ಅನಿಂ ಆಶಾ. ನಿಶಾಚೆಂ ಕಾಜಾರ್ ಜಾವುನ್ ದೇಡ್ ವರಸ್ ಜಾಲ್ಲೆಂ ಅನಿಂ ತೆಂ ಅಪ್ಲ್ಯಾ ನವ್ರ್ಯಾ ಸಂಗಿಂ ಉಂಚ್ಲ್ಯಾ ಶಿಕ್ಪಾಖಾತಿರ್ ಆತಾಂ ಲಂಡನ್ ಪಾವ್ಲ್ಲೆಂ. ಆಶಾಚಾ ಕಾಜಾರಾ ವೆಳಾರ್ ತಾಕಾ ಥಂಯ್ಸರ್ ಪರೀಕ್ಶಾ ಆಸ್ಲ್ಲ್ಯಾನ್ ತೆಂ ಹಾಜರ್ ಜಾಂವ್ಕ್ ನಾತ್ಲೆಂ.
ಎಡ್ವಿನಾಚೆಂ ಅನಿಂ ಆಶಾಚೆಂ ಕಾಜಾರ್ ಜಾವುನ್ ಮಹಿನೊ ಜಾತಾನಾ ದೊಗಾಂಯ್ ಪುಡಾರ್ ಭಾಂಧ್ಚ್ಯಾಕ್ ಕಾಮಾಚ್ಯಾ ಸೊಧ್ನೆರ್ ಬೊಂಬಯ್ ಪಾವುಲ್ಲಿಂ. ಕಾಮ್ ಕರಿಜಾಯ್ ಮ್ಹಣೊನ್ ತಾಂಕಾಂ ಕಾಂಯ್ ಗರ್ಜ್ ನಾತ್ಲ್ಲಿ. ಬಾಪಾಯ್ನ್ ಕರ್ನ್ ದವ್ರಿಲ್ಲೆಂಚ್ಚ್ ಪುರೊ ಆಸ್ಲ್ಲೆಂ ಪಿಳ್ಗೆ ಮ್ಹಣಾಸರ್. ಪುಣ್ ವಗೋ ಬಸ್ಚ್ಯಾಕೀ ಹಾಂಕಾಂ ಜಾಲೆಂನಾಂ. ಶಿಕ್ಲ್ಲ್ಯಾಕ್ ಕಾಮ್ ಕರಿನಾತ್ಲ್ಯಾರ್ ಶಿಕೊನ್ ಕಿತೆಂ ಫಾಯ್ದೊ!?. ಎಡ್ವಿನಾನ್ ಥಂಯ್ಸರ್ ಥೊಡೆ ಪಯ್ಸೆ ವಿನಿಯೋಗ್ ಕರುನ್ ಸ್ವ-ಉದ್ಯಮ್ ಸುರು ಕೆಲ್ಲೆಂ ಅನಿಂ ಆಶಾಯೀ ತಾಕಾ ತಾಚಾ ದಫ್ತರಾಂತ್ ಸಾಂಗಾತ್ ದಿತಾಲೆಂ. ಅಶೆಂ ಸರ್ವ್ ಆತಾಂ ಶಾಂತತೆಚಾ ಸಾಗೊರಾಂತ್ ಭಿರಾಂತಿಚ್ಯಾ ಲ್ಹಾರಾಂವಿಣೆಂ ಜಿವಿತಾ ತಾರುಂ ಚಮ್ಕೊನ್ ಅಸ್ಲೆಂ.
ಹಿ ಪೂರಾ ಜಾಲ್ಲಿ ಕಥಾ.
ಆತಾಂ ಬ್ರಾಗ್ಸ್ ಜೊಡ್ಯಾಕ್ ಆಯ್ಚೊ ದೀಸ್ ವರ್ತೊ ಖುಶೆಚೊ ಜಾವ್ನಾಸ್ಲೊ. ಆಜ್ ಲಂಡನ್ ಥಾವ್ನ್ ವ್ಹಡ್ಲಿ ಧುವ್ ಅನಿಂ ಮಾಲ್ಘಡೊ ಜಾಂವಂಯ್ ತಶೆಂಚ್ಚ್ ಬೊಂಬಯ್ ಥಾವ್ನ್ ಆಶಾ ಅನಿಂ ಎಡ್ವಿನ್ಯೀ ಯೆಂವ್ಚ್ಯಾರ್ ಆಸ್ಲ್ಲಿಂ. ಲಂಡನ್ ಥಾವ್ನ್ ತಿಂ ಯೆಂವ್ಚ್ಯಾ ಸಂಧರ್ಭಾರ್ ಎಡ್ವಿನಾಕ್ ಅನಿಂ ಆಶಾಕ್ ಗಾಂವಾಕ್ ಯೆಂವ್ಚ್ಯಾಕ್ ಬ್ರಾಗ್ಸ್ ಜೊಡ್ಯಾಕ್ ಆಪಯಿಲ್ಲೆಂ. ಎಡ್ವಿನಾಕ್ ತಾಂಚ್ಯಾ ಸಾಂಗಾತಾ ಮೆಳೊಂಕ್ ಮನ್ ನಾತ್ಲೆಂ ತರ್ಯೀ ಆಶಾಚೆ ವತ್ತಾಯೆಕ್ ಲಾಗೊನ್ ತೊಯೀ ಗಾಂವಾಕ್ ಭಾಯ್ರ್ ಸರ್ಲ್ಲೊ.
ಅಪ್ಲೆಂ ಧವ್ಯಾ ರಂಗಾಚೆಂ ಸೊಭಿತ್ ‘ಮಾರುತಿ ಎಸ್ಟೀಮ್’ ಕಾರ್ ಮಾಂವಾಂಚ್ಯಾ ಜಯ್ತ್ ಬಂಗ್ಲ್ಯಾ ಮುಖ್ಲ್ಯಾ ಶೆಡ್ಡಾಂತ್ ಥಾಂಬಯ್ಲೆಂ ಎಡ್ವಿನಾನ್. ಮಾಂವಾಂಚ್ಯಾ ‘ಮಾರುತಿ ಸುಜುಕಿ’ ಕಾರಾ ಸವೆಂ ಅನ್ಯೇಕ್ ‘ಮಾರುತಿ ಝೆನ್’ ಕಾರ್ಯೀ ಉಭೆಂ ಆಸ್ಲ್ಲ್ಯಾನ್ ನಿಶಾ ಅನಿಂ ಎದೊಳ್ಚ್ಚ್ ಪಾವ್ಲ್ಯಾಂತ್ ತೆಂ ಎಡ್ವಿನಾಚಾ ಮತಿಂತ್ ಗೆಲ್ಲೆಂ. ಪಾಂಯ್ ಧರ್ಣಿಕ್ ತೆಂಕುನ್ ಪುರಾಸಣೆಚಿ ಆಂಗ್ ವೋಳ್ ಕಾಡುನ್ ನೀಟ್ ಜಾಲ್ಲಿಂ ಎಡ್ವಿನ್ ಅನಿಂ ಆಶಾ ಘರ್ಚಾ ದಾರಾ ಕುಶಿನ್ ಮೆಟಾಂ ಕಾಡುಂಕ್ ಲಾಗ್ಲಿಂ. ತಿತ್ಲ್ಯಾರ್ ಹಾಂಕಾಂ ಸ್ವಾಗತ್ ಕರ್ಚ್ಯಾಕ್ ಮಾಂವ್ ಅನಿಂ ಮಾಂಯ್ , ಸಂಗಿಂ ನಿಶಾ ಅನಿಂ ಟೊನಿ ಬಾಗ್ಲಾರ್ ಉಭಿಂ ಜಾಲ್ಲಿಂ. ಎಡ್ವಿನಾಚೆ ದೊಳೆ ಏಕ್ ಘಡಿ ನಿಶಾಚಾ ದೊಳ್ಯಾಂಕ್ ಮೆಳ್ಳೆ. ಪುಣ್ ಘಡಿಯೆನ್ ನಿಶಾನ್ ಅಪ್ಲಿ ನದರ್ ಘುಂವ್ಡಾಯ್ಲಿ. ನಿಶಾಕ್ ದೆಖ್ತಾನಾ ತಾಕಾ ಖಂಯ್ ನಾತ್ಲೊ ರಾಗ್ ಯೆತಾಲೊ. ನಾಕಾ- ನಾಕಾ ಮ್ಹಳ್ಯಾರೀ ತ್ಯಾ ಅವ್ಮರ್ಯಾದೆಚ್ಯಾ ಥಾಪ್ಡಾಚೊ ಉಗ್ಡಾಸ್ ಯೆತಾಲೊ. ಅನಿ ಹಾಚೆ ದೊಳೆ ತೆದ್ನಾಂ ರಾಗಾನ್ ಉಜೊ ವೊಂಕ್ತಾಲೆ. ಹೊ ಹಾಂಚ್ಯಾ ಮಧ್ಲೊ ವಿಷಯ್ ದೊಗಾಂಯ್ನಿಂ ಲಿಪಯಿಲ್ಲೊ ಜಾಲ್ಲ್ಯಾನ್ ಹೆರ್ ಕೊಣಾಯ್ಕಿ ಕಿತೆಂಚ್ಚ್ ಕಳೊಂಕ್ ನಾಂ.
ಕಾಜಾರ್ ಜಾಲ್ಲ್ಯಾ ನಂತರ್ ದೊನೀ ಜೊಡ್ಯಾನಿಂ ಪಯ್ಲ್ಯೆ ಪಾವ್ಟಿಂ ಸಾಂಗಾತಾ ಮೆಳ್ಚೆಂ ಜಾಲ್ಲ್ಯಾನ್ ಎಕಾಮೆಕಾ ಅಭಿನಂದನ್ ಪಾಟವ್ನ್ ಉಲೊಣ್ಯಾಕ್ ಸುರ್ವಾತ್ ಘಾಲ್ಲಿ. ನಿಶಾನ್ ಜಾಂವ್ ಎಡ್ವಿನಾನ್ ಜಾಂವ್ ಭಾಹ್ಯ್ ನದ್ರೆಕ್ ಕಿತೆಂಚ್ಚ್ ಮನಸ್ತಾಪ್ ದಾಕಯ್ಲೊ ನಾಂ.
ಪುರಾಸಣೆನ್ ಥಕ್ಲ್ಲೊ ರವಿರಾಯ್ ದರ್ಯಾಂತ್ ವಿಶೆವ್ ಘೆವ್ನ್ ದುಸ್ರ್ಯಾ ದಿಸಾ ಪರತ್ ಕಾಂಟ್ಯಾ- ಖುಂಟ್ಯಾ ಝಡಾಂ ಮಧೆಂ ,ಉಭಾರ್ ದೊಂಗ್ರಾ ಇಡ್ಯಾಂತ್ ಸುಕ್ಣ್ಯಾಂಚಾ ಚಿಲಿ-ಪಿಲಿ ಆವಾಜಾ ಸಂಗಿಂ ಪ್ರಫುಲ್ಲತೆನ್ ಉದೆವ್ನ್ ಆಯಿಲ್ಲೊ.
ಎಡ್ವಿನಾಚಿ ತಕ್ಲಿ ಆಜ್ ಸಕಾಳಿಂಚ್ಚ್ ವಿಶೇಸ್ ಫಡ್ತಾಲಿ ಜಾಲ್ಲ್ಯಾನ್ ಏಕ್ ಮಾತ್ರೆಂ ಘೆವುನ್ ತೊ ಥಂಯ್ಚ್ ಪರತ್ ನಿದ್ಲ್ಲೊ. ತಶೆಂ ನಿದ್ಲ್ಲ್ಯಾ ತಾಕಾ ವರಾಂ ಇಕ್ರಾ ವಾಜ್ತಾನಾಂ ಜಾಗ್ ಜಾಲ್ಲಿ. ಖಾಟಿಯೆ ಥಾವ್ನ್ ಸಕಯ್ಲ್ ದೆಂವೊನ್ ಹೊಲಾಕುಶಿನ್ ಮೆಟಾಂ ಕಾಡ್ತಾನಾ ಮುಖಾರ್ ಮೆಳ್ಲ್ಲ್ಯಾ ಸಾಸುಮಾಂಯ್ನ್ ಉಲೊಣ್ಯಾಕ್ ಬುನ್ಯಾದ್ ಘಾಲಿ "ಉಟ್ಲೊಯ್ಗೀ ಬಾ ನಿಶಾ ಅನಿಂ ಟೊನಿ ಕರುನ್ ಅತ್ತಾಂ ಶೊಪಿಂಗಾಕ್ ಗೆಲಿಂ."
"ಅನಿಂ----- ಆಶಾ!!?" ಘಾಬ್ರೆವ್ನ್ ವಿಚಾರ್ಲೆಂ ಎಡ್ವಿನಾನ್.
"ತುಕಾ ತೊಂದ್ರೆ ದಿಂವ್ಚೆ ನಾಕಾತ್ ಮ್ಹಣೊನ್ ಅನಿಂ ತಾಣಿಂ ಸಾಂಗಾತ್ ದೀಂವ್ಕ್ ವತ್ತಾಯ್ ಕೆಲ್ಲ್ಯಾನ್ ತೆಂಯೀಂ ತಾಂಚಾ ಸಾಂಗಾತಾ ಗೆಲಾಂ."
ಅನಿಂ ಮುಖ್ಲೆಂ ತಾಚ್ಯಾನ್ ಚಿಂತುಂಕ್ ಜಾಲೆಂನಾಂ. ತೊ ಘಡಿಭರ್ ಸ್ತಭ್ಧ್ ಜಾಲೊ. ಫ್ಯಾನ್ ಘುಂವ್ತಾಲೆಂ ತರೀ ತೊ ಘಾಮೆಲೊ.
"ನೊ!" ಎಕ್ಚ್ಚ್ಫಾರಾ ಖಿಳಂಚ್ಲೊ ಎಡ್ವಿನ್. ಸಾಸು ಹೆರ್ ವಾವ್ರಾರ್ ಪಡ್ಲ್ಲ್ಯಾನ್ ಹಾಚಿ ಪ್ರತಿಕ್ರಿಯಾ ವಾ ಹಾವ್-ಭಾವ್ ತಿಚಾ ಗಮನಾಕ್ ಗೆಲೆನಾಂತ್.
ವ್ಹಯ್ ತಾಣೆಂ ಇತ್ಲೆಂ ಘಾಬ್ರೆಂವ್ಕ್ಯೀ ಕಾರಾಣ್ ಆಸ್ಲ್ಲೆಂ. ಕಾಲ್ ತಿಂ ಬೊಂಬಯ್ ಥಾವ್ನ್ ಆಯಿಲ್ಲ್ಯಾ ತೆದ್ನಾಂ ನಿರಂತರ್ ಧಾಂವ್ಣೆ ವರ್ವಿಂ ಕಾರಾಚೆಂ ಕಂಡೀಶನ್ ಚಿಕ್ಕೆಂ ಭಿಗಡ್ಲ್ಲೆಂ. ದೆಕುನ್ ಯೇವ್ನ್ ಇಲ್ಲಿಶಿ ಪುರಾಸಣ್ ಕಾಡುನ್ ಸಾಂಜೆ ವೆಳಾರ್ ಮೆಕ್ಯಾನಿಕಾಕ್ ಆಪವ್ನ್ ಹಾಡಿಲ್ಲೊ.
ಘರ್ಚಿಂ ಸರ್ವಾಂ ವಾಕಿಂಗಾಕ್ ಭಾಯ್ರ್ ಸರ್ಲ್ಲಿಂ ಅನಿಂ ಎಡ್ವಿನ್ ಕಾರ್ ಸಮಾ ಕರ್ಚಾ ನಿಬಾನ್ ಘರಾ ಉರ್ಲ್ಲೊ.
ತಿತ್ಲೆಂಚ್ಚ್! ಎದ್ದೊಳ್ ಸಾಫ್ ಅಸ್ಲಿ ತಾಚಿ ಮತ್ ಘಾತ್ಕಿ ಚಿಂತ್ನಾಂನಿಂ ಭರೊಂಕ್ ಲಾಗ್ಲಿ. ನಿಶಾಚೆಂ ಹಾಸ್ತೆಂ ಮುಖಮಳ್ ಪಳೆಂವ್ಕ್ ತಾಕಾ‘ತಾಂ ನಾಕಾಸ್ಲೆಂ. ತಾಣೆಂ ಕಶ್ಟಾಜಾಯ್, ಮಾನಸಿಕ್ ಥರಾನ್ ಧಗ್ಧಾಜಾಯ್ ಅನಿಂ ಹಾಂವ್ ತೆದ್ನಾಂ ಮಾನಸಿಕ್ ಥರಾನ್ ಕಿತ್ಲೊಂ ಕಳ್ವಳ್ಲ್ಲೊಂ ತೆಂ ತಾಕಾ ಕಳಾಜಾಯ್! ವ್ಹಯ್ ಎಕ್ಚ್ಚ್ ತಾಣೆಂ ವಿಧವ್ ಜಾಯ್ಜಾಯ್, ನಾಂ ತರ್ ಸಾಸ್ಣಾಚಿ ವಾಟ್ ಧರಿಜಾಯ್!
ಮೆಕ್ಯಾನಿಕಾಕ್ ಸಾಂಗೊನ್ ತಾಣೆಂ ನಿಶಾಚ್ಯಾ ಕಾರಾಚಿ ಬ್ರೇಕ್ ಚುಕಯಿಲ್ಲಿ.
ಪುಣ್ ತಾಚಿ ಅಂದಾಜ್ ಆತಾಂ ಫಟ್ ಜಾಲ್ಲಿ. ಅಚಾನಕ್ ಹಾಚಿ ತಕ್ಲಿ ಫಡಾಫಡ್ ಆಶಾಕ್ಯೀ ತ್ಯಾಚ್ಚ್ ಕಾರಾರ್ ವ್ಹರುಂಕ್ ಸಕ್ಲ್ಲಿ. ಅನಿ ಆತಾಂ ಪರಿಣಾಮ್ ಅನಾಹುತ್ ತೆಂ ತೊ ಬರ್ಯಾನ್ ಜಾಣಾಸ್ಲೊ.
ತಿತ್ಲ್ಯಾರ್ ಸಕಯ್ಲೆಂ ಫೋನ್ ರುದಾನ್ ಕರುಂಕ್ ಲಾಗ್ಲೆಂ. ದೋನ್ಂಚ್ಚ್ ಬಾಕ್ಕಾರಾನಿಂ ಜೀವ್ ಸಗ್ಳೊ ಹಾತಿಂ ಘೆವ್ನ್ ಎಡ್ವಿನ್ ಫೋನ್ ಉಕಲ್ಚ್ಯಾಕ್ ಧಾಂವ್ಲ್ಲೊ.
"ಹಲೋ, ಬ್ರಾಗ್ಸ್ ಹೌಜ್ಗೀ?" ತೆವ್ಶಿಲ್ಯಾನ್ ತಾಳೊ ಅಯ್ಕಾಲೊ.
"ಹಲೋ, ವ್ಹಯ್ ಖಬಾರ್ ಕಿತೆಂ?" ಎಡ್ವಿನಾನ್ ಹಳ್ತ್ ತಾಳ್ಯಾನ್ ಪೂಣ್ ದರ್ವಡ್ಯಾನ್ ವಿಚಾರ್ಲೆಂ.
"ತುಮ್ಚೆಂ ಕಾರ್ ಹಾಂಗಾ ವಾಟೆರ್ ಎಕ್ಸಿಡೆಂಟ್ ಜಾಲಾಂ. ಚಡ್ ಕಾಂಯ್ ಅನಾಹುತ್ ಘಡೊಂಕ್ ನಾಂ,................."ಮ್ಹಣ್ತಾನಾ ಮಾತ್ರ್ ಎಡ್ವಿನಾಚಾ ಮತಿಕ್ ಚಿಕ್ಕೆಶೆಂ ಸಮಾಧಾನ್ ಜಾಲೆಂ.
"ಮುಖ್ಲ್ಯಾನ್ ಯೆಂವ್ಚ್ಯಾ ಟ್ರಕ್ಕಾಕ್ ಅಪ್ಟೊಂಚೆಂ ಚುಕಂವ್ಚ್ಯಾಕ್ ಪ್ರಯತ್ನ್ ಕರ್ತಾನಾ ಕಾರ್ ರಸ್ತ್ಯಾ ಕುಶಿಚ್ಯಾ ರುಕಾಕ್ ಅಪ್ಟಾಲೆಂ ಅನಿಂ ತಾಂತುನ್ ಆಸ್ಲ್ಲಿಂ ತೆಗಾಂಯಿಂ ತೀವ್ರ್ ಘಾಯೆಲ್ಯಾಂತ್ ಅನಿಂ ತಾಂಕಾಂ ಅಸ್ಪತ್ರೆಕ್ ಸಾಗ್ಶಿಲಾಂ. ಅಪಾಯಾ ಥಾವ್ನ್ ಭಾಯ್ರ್ ಆಸಾತ್ ಮ್ಹಣೊನ್ ದಾಕ್ತೆರಾನ್ ಕಳಯ್ಲಾಂ. ತರ್ನಾಟ್ಯಾಚಾ ಬೊಲ್ಸಾಂತ್ ತುಮ್ಚೊ ಫೋನ್ ನಂಬರ್ ಮೆಳ್ಲ್ಲ್ಯಾನ್ ಖಬಾರ್ ಕಳಯ್ಲಿ".
ಎಡ್ವಿನಾನ್ ಮತಿಂತ್ಚ್ಚ್ ದೆವಾಚೊ ಉಪ್ಕಾರ್ ಭಾವುಡ್ಲೊ. ಎಕಾ ಘಡಿಯೆಚಾ ಘಾತ್ಕಿ ಚಿಂತ್ನಾನ್ ಕಿತೆಂ ಸರ್ವ್ ಜಾತಾ‘ಸ್ಲೆಂ!? ತೊ ಅಸ್ಪತ್ರೆ ಕುಶಿಂ ಧಾಂವ್ ಮಾರಿಲಾಗ್ಲೊ.
ಥಂಯ್ ಆಶಾಚಾ ಖಾಟಿಯೆರ್ ಬಸೊನ್ ತೆಗಾಂಯ್ಕಿ ಪಳೆವ್ನ್ ಗಳ್ಗಳ್ಯಾಂ ರಡ್ಲೊ.......... ಪಶ್ಚಾತ್ತಾಪಾಚಿಂ ಖುಣಾಂ ಜಾವ್ನ್!!.
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
