ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾಝರ್ - 3. ಬಂಗ್ಲ್ಯಾಂತ್ಲಿ ಚಲಿ
ಜೆ.ಬಿ.ಮೊರಾಯಸ್ ಕೊಂಕ್ಣಿ ಸಾಹಿತಿಕ್ ಸಂಸಾರಾಂತ್ ಮಾಲ್ಘಡೊ ಸಾಹಿತಿ, ’ಭಿತರ್ಲೆಂ ತುಫಾನ್’ ಕವಿತಾಜಮ್ಯಾಖಾತಿರ್ ಕೇಂದ್ರ್ ಸಾಹಿತ್ಯ್ ಅಕಾಡೆಮಿಚಿ ಪ್ರಶಸ್ಥಿ ಜಿಕ್ಪಿ. ಹಾಚಾ ಸಭಾರ್ ಬರ್ಪಾಂಕ್ ಇನಾಮಾಂ ಲಾಭ್ಲ್ಯಾಂತ್. ಕೊಂಕ್ಣಿ ಮಾಯೆಚೊ ವಿಶೇಷ್ ರಿತಿನ್ ಮೋಗ್ ಕೆಲ್ಲ್ಯಾ/ಕರ್ಚಾ ಭೋವ್ ಥೊಡ್ಯಾ ಮಹಾನ್ ಸಾಹಿತಿಂ ಪಯ್ಕಿಂ ಹೊಯ್ ಎಕ್ಲೊ ಮ್ಹಣೊಂಕ್ ಮ್ಹಾಕಾ ಭೊವ್ ಸಂತೊಸ್ ಭೊಗ್ತಾ.
(ಹ್ಯಾ ಕಾಣ್ಯೆಕ್ ದಾಯ್ಜ್ ಸಾಹಿತಿಕ್ ಸ್ಪರ್ಧೊ 2004 ಂತ್ ತಿಸ್ರೆಂ (ರು. 2000) ಇನಾಮ್ ಲಾಭ್ಲಾಂ)
ಜೆ.ಬಿ.ಮೊರಾಯಸ್
ಬಂಗ್ಲ್ಯಾಂತ್ಲಿ ಚಲಿ ಬೆಂಗ್ಳೂರ್ಥಾವ್ನ್ ಮುಂಬಯ್ ವರ್ಗಾವಣ್ ಜಾಲ್ಲ್ಯಾ ಪ್ರದೀಪಾಕ್ ಸುರ್ವಿಲೆ ಥೊಡೆ ದೀಸ್ ಇಲ್ಲೆಶೆ ಕಷ್ಟಾಂಚೆ ಜಾಲೆ. ಪಾಂಚ್ ವರ್ಸಾಂ ಬೆಂಗ್ಳುರಾಂತ್ ಆಪ್ಲ್ಯಾ ಘರಾ ಲಾಗಿಂಚ್ ಆಸ್ಲ್ಲ್ಯಾ ಪ್ರೊಗ್ರೆಸ್ಸಿವ್ ಬೆಂಕಾಂತ್’ ಎಸಿಸ್ಟೆಂಟ್ ಮ್ಯಾನೆಜರ್’ ಜಾವ್ನಾಸ್ಲ್ಲ್ಯಾ ತಾಕಾ ಬೆಂಕಾನ್ ’ಮ್ಯಾನೆಜರ್’ ಮ್ಹಣ್ ಭಡ್ತಿ ದೀವ್ನ್ ಮುಂಬಯ್ ಧಾಡ್ಲ್ಲ್ಯಾ ವೆಳಾರ್ ವ್ಹಡ್ ಸಂತೊಸ್ ಜಾಲ್ಲೊ ಖರೆಂ. ಬೆಂಗ್ಳುರ್ಚ್ಯಾ ಉಪನಗರಾಂತ್ ಬೆಂಕಾಚ್ಯಾ ಲ್ಹಾನ್ ಬ್ರಾಂಚ್ಯಾಂತ್ ವ್ಹಡ್ಲೊ ಆಫಿಸರ್ ತಾಕಾ ಮುಂಬಯ್ ಅಂಧೆರಿಚ್ಯಾ ವ್ಹಡ್ಲ್ಯಾ ಬ್ರಾಂಚ್ಯಾಂತ್ ಹಾಡ್ನ್ ಘಾಲ್ಲೊ.
ಬೆಂಕಿಂಗಾ ವಿಶಾಂತ್ಲಿ ಆಪ್ಲಿ ವಿಶೇಸ್ ಜಾಣ್ವಾಯ್, ಆಪ್ಲ್ಯಾ ಲಾಂಬ್ ದೀಗ್ ಗೊರ್ಯಾ ಜಿವಾಚೆಂ ವ್ಯಕ್ತಿತ್ವ್ ಸಗ್ಳ್ಯಾಂ ಮುಖಾರ್ ಪ್ರದರ್ಶನ್ ಕರ್ನ್ ತಾಂಚಿ ಶಾಭಾಸ್ಕಿ ಜೊಡ್ಟಲೊಂ ತಶೆಂಚ್ ತಾಂಚ್ಯಾ ಕಾಳ್ಜಾಂತ್ ಮೊಸ್ರಾಚೆಂ ಬಿಂ ವೊಂಪ್ತೊಲೊಂ ಮ್ಹಳ್ಳೊ ಪೊಕ್ಳೊ ಅಹಂಭಾವ್ಯಿ ದವರ್ನ್ ತೊ ಮುಂಬಯ್ ಆಯಿಲ್ಲೊ ಮ್ಹಳ್ಯಾರ್ ಚೂಕ್ ಜಾಯ್ಶಿನಾ. ಪುಣ್ ಕಿತ್ಲೆಂ ಮ್ಹಳ್ಯಾರೀ ಲ್ಹಾನ್ ತಳ್ಯಾಂತ್ಲಿ ವ್ಹಡ್ಲಿ ಮಾಸ್ಳಿ ಆತಾಂ ದರ್ಯಾಂತ್ಲಿ ಲ್ಹಾನ್ ಕೊರು ಜಾಲಿ ಮ್ಹಳ್ಳೊ ಭಾಸ್ ಜಾಂವ್ಕ್ ಪ್ರದೀಪಾಕ್ ಚಡ್ ವೇಳ್ ಲಾಗೊಂಕ್ನಾ. ಪುಣ್ ತೊ ಹೆಂ ಸ್ವೀಕಾರ್ ಕರುಂಕ್ ತಯಾರ್ ನಾತ್ಲ್ಲೊ.
ಆಪುಣ್ ವ್ಹಡ್ಲ್ಯಾ ದರ್ಯಾಂತೀ ವ್ಹಡ್ಲೊ ತಿಮಾಸೊ ಜಾವ್ನ್ ಸಗ್ಳ್ಯಾಂಕ್ ವಿಜ್ಮಿತ್ ಕರ್ತಲೊಂ ಮ್ಹಳ್ಳೊ ಆಹಂಬಾವ್ ತಾಚ್ಯಾ ಕಾಳ್ಜಾಂತ್ ರಿಗ್ಲ್ಲೊ. ಆಪ್ಲ್ಯಾ ನವ್ಯಾ ಹುದ್ದ್ಯಾಂತ್ ಬುನ್ಯಾದ್ ಘಟ್ ಕರುಂಕ್ ತಾಕಾ ಏಕ್ ಮ್ಹಯ್ನೊ ಲಾಗ್ಲೊ. ದಫ್ತರಾಂತ್ ತಾಚ್ಯಾ ಹಾತಾಖಾಲ್ 30 ಜಣ್ ಆಸ್ಲ್ಲೆ. ತಾಚೆ ವಯ್ರ್ ಏಕ್ ’ಎಸಿಸ್ಟೆಂಟ್ ಜನರಲ್ ಮ್ಯಾನೆಜರ್’ , ಏಕ್ ’ಡೆಪ್ಯೂಟಿ ಜನರಲ್ ಮ್ಯಾನೆಜರ್’ ಆನಿ ಶಿಖರಾಚೆರ್ ’ಜನರಲ್ ಮ್ಯಾನೆಜರ್’ ಆಶೆಂ ತೇಗ್ ಜಣ್ ಆಸ್ಲ್ಲೆ. ತಾಚೊ ಸೀದಾ ಬೊಸ್ ಜಾವ್ನಾಸ್ಲ್ಲೊ ’ಎಸಿಸ್ಟೆಂಟ್ ಜನರಲ್ ಮ್ಯಾನೆಜರ್’. ಸಭಾರ್ ದೀಸ್ ಬೊಸಾಲಾಗಿಂ ಆನಿ ಆಪ್ಲ್ಯಾ ಸಕಯ್ಲ್ಯಾ ಆಧಿಕಾರಿಂಲಾಗಿಂ ಬಸ್ಕಾ ಘೆವ್ನ್ ಅಂಧೆರಿಚ್ಯಾ ಹ್ಯಾ ಬ್ರಾಂಚ್ಯಾಚಿ ಸ್ಥಿತಿಗತಿ ಸಮ್ಚೊನ್ ಘೆಂವ್ಚ್ಯಾಂತ್ ತಾಣೆ ಖರ್ಚಿಲಿ.
ಪೂರ್ವ್ ಅಂಧೆರಿಂತ್ ಜೆಬಿನಗರ್ ಮ್ಹಳ್ಳೆಕಡೆ ಪ್ರೊಗ್ರೆಸ್ಸಿವ್ ಬೆಂಕಾಚೊ ಶಾಖೊ ಆಸ್ಲ್ಲೊ. ತಾಚ್ಯಾ ಆಸ್ಪಾಸ್ ಭಾಡ್ಯಾಕ್ ಘರ್ ಮೆಳ್ಟಾಗಿ ಮ್ಹಣ್ ಪ್ರದೀಪಾನ್ ಸೊದ್ನಾಂ ಕೆಲಿಂ. ಪುಣ್ ತ್ಯಾ ವಠಾರಾಂತ್ ಫಾವೊತೆಂ ಘರ್ ತಾಕಾ ಮೆಳ್ಳೆಂನಾ. ಘರಾಚೆಂ ಡಿಪೊಜಿಟ್ ಆನಿ ಭಾಡೆಂ ದೀಂವ್ಕ್ ಬೆಂಕ್ ತಯಾರ್ ಆಸ್ಲ್ಲೆಂ ತರಿ ಘರ್ ಸೊಧುನ್ ಕಾಡ್ಚಿ ಜವಾಬ್ದಾರಿ ಪ್ರದೀಪಾಚಿ ಜಾವ್ನಾಸ್ಲ್ಲಿ. ಆಖ್ರೆಕ್ ತಾಕಾ ಪಶ್ಚಿಮ್ ಅಂಧೇರಿ ಆಸ್ಚ್ಯಾ ಲೋಖಂಡ್ವಾಲಾ ಕೊಂಪ್ಲೆಕ್ಸಾಂತ್ ದೋನ್ ಬೆಡ್ರುಮಾಂಚೆಂ ಏಕ್ ಪ್ಲೆಟ್ ಭಾಡ್ಯಾಕ್ ಮೆಳ್ಳೆಂ. ಕಂಪೆನಿನ್ ತಾಕಾ ಎದೊಳ್ ಕಾರ್ ದೀಂವ್ಕ್ನಾತ್ಲ್ಲೆಂ ಪುಣ್ ಸದಾಂ ಟೆಕ್ಸೆರ್ ಯೇವ್ನ್ ವ್ಹಚೊಂಕ್ ಪರ್ವಣ್ಗಿ ದಿಲ್ಲಿ.
ಬೆಂಕಾಂತ್ ಕಾಮ್ ಕರ್ಚ್ಯಾ ಚಡಾವತ್ ಸಗ್ಳ್ಯಾಂಚಿ ತಾಕಾ ವಳಕ್ ಜಾಲ್ಲಿ. ತಾಂತುಂ ಎಕ್ಲೊ ತರ್ನಾಟ್ ಸಂಜೀವ್ ಮ್ಹಳ್ಳೊ. ತೊ ಮಂಗ್ಳುರ್ಚೊ ಜಾವ್ನಾಸೊನ್ ಬೆಂಕಾಂತ್ ಎಟೆಂಡರಾಚೆಂ ಕಾಮ್ ಕರ್ತಾಲೊ. ಮೆಟ್ರಿಕ್ ಜಾವ್ನ್ ಮುಂಬಯ್ ಆಯಿಲ್ಲೊ. ಇಲ್ಲಿ ವಶಿಲಾಯ್ ಚಲವ್ನ್ ಬೆಂಕಾಂತ್ ಕಾಮ್ ಮೆಳ್ಲ್ಲೆಂ. ತೊ ಆನಿ ತಾಚಿ ಆವಯ್ ಪಶ್ಚಿಮ್ ಅಂಧೇರಿಂತ್ ಎಕಾ ಲ್ಹಾನ್ ಕುಡಾಂತ್ ರಾವ್ತಾಲಿಂ. ಸಂಜೀವ್ ಜಿವಾನ್ ಧಡಂಗ್, ಇಲ್ಲೊ ಲಜಿಷ್ಟ್, ಪುಣ್ ತೊಂಡಾರ್ ಅಮೃಕ್ಯೊ ಹಾಸೊ ಚುಕಾನಾತ್ಲ್ಲ್ಯೊ. ತೆ ದೋಗೀ ಮುಳಾವೆ ಜಾವ್ನ್ ಕಿನ್ನಿಗೊಳಿಚೆ ಮ್ಹಣ್ ಕಳ್ಟಚ್ ಆನಿಕೀ ಚಡ್ ಲಾಗಿಂ ಅಯ್ಲೆ.
ಪ್ರದೀಪಾನ್ ಭಾರೀ ಚಲಾಕಿ ವಾಪ್ರುನ್ ಸಂಜೀವಾಕ್ ದುಭಾವ್ ಜಾಯ್ನಾಶೆಂ ತಾಚ್ಯಾ ತೊಂಡಾಂತ್ಥಾವ್ನ್ ಬೆಂಕಾಂತ್ಲೆ ಫಲಾಣೆ ಮನಿಸ್ ಕಶೆ, ತಾಂಚಿ ಸರ್ವಿಸ್ ಕಿತ್ಲಿ, ಆಪುಣ್ ಬೆಂಕಾಕ್ ಯೆಂವ್ಚೆ ಪಯ್ಲೆಂ ಬೆಂಕಾಂತ್ ಕಿತೆಂ ವಿಶೇಸ್ ಘಡ್ಲೆಂ ಇತ್ಯಾದಿ ಸೊಧುನ್ ಕಾಡ್ಲೆಂ. ಪ್ರತ್ಯುಪ್ಕಾರ್ ಜಾವ್ನ್, ಪ್ರದೀಪ್ ತವಳ್ ತವಳ್ ಸಂಜೀವಾಕ್ ದೊನ್ಪಾರಾಂ ಜೆವ್ಣಾಕ್ ಭಾಯ್ರ್ ಹೊಟೆಲಾಕ್ ವ್ಹರೊಂಕ್ ಲಾಗ್ಲೊ. ಸಕಾಳಿಂ ವ್ಹೆಲ್ಲೊ ಡಬ್ಬೊ ಸಾಂಜೆರ್ ತಸೊಚ್ ಪಾಟಿಂ ಹಾಡ್ಚೆಂ ಪಳೆವ್ನ್ ಮ್ಹಾತಾರಿ ಆವಯ್ ಸಂಜೀವಾಕ್ ಪುರ್ಪುರೊಂಕ್ ಲಾಗ್ಲಿ.
ಸಾಂಜೆರ್ ಏಕ್ ದೀಸ್ ಚಿಂತಿನಾತ್ಲ್ಯಾಬರಿ ಬೆಂಗ್ಳೂರ್ಥಾವ್ನ್ ರೋಶ್ನಿಚೆಂ ಫೋನ್ ಆಯ್ಲೆಂ. ಪ್ರದೀಪ್ ಮುಂಬಯ್ ಆಯಿಲ್ಲ್ಯಾ ಸುರ್ವೆರ್ ಏಕ್ ಪಾವ್ಟಿ ರೋಶ್ನಿಕಡೆ ಫೊನಾರ್ ಉಲಯಿಲ್ಲೊ. ತಾಚ್ಯೆ ಉಪ್ರಾಂತ್ ಕಾಮಾಚ್ಯಾ ಜವಾಬ್ದಾರೆಂತ್ ಆನಿ ಘರಾಚ್ಯಾ ಸೊಧ್ನೆಂತ್ ತೊ ರೋಶ್ನಿಕ್ ವಿಸ್ರೊನ್ ಆಯಿಲ್ಲೊ. ಪುಣ್ ಆತಾಂ ತಾಚೆಂ ಫೋನ್ ಆಯ್ಲೆಂ ಆನಿ ಬೆಂಗ್ಳುರ್ಚೆ ತೆ ಹುನೊನಿ ದೀಸ್ ಮತಿ ಪಡ್ದ್ಯಾರ್ ಯೇವ್ನ್ ತಾಚ್ಯಾ ಆಂಗಾಂತ್ ಊಬ್ ಚರ್ಲಿ. ಧರ್ಣಿಕ್ ಕಾಳೊಕ್ ಪಡೊನ್ ಯೆತಾನಾ, ಎಕಾಮೆಕಾಚ್ಯಾ ಪೆಂಕ್ಟಾಕ್ ವೆಡ್ಕೊಳ್ ಘಾಲ್ನ್ ಲಾಲ್ಬಾಗ್ ಪಾರ್ಕಾಂತ್ ಸವ್ಕಾಸ್ ಚಲ್ತಾನಾ, ದಿಸಾ ಸಪ್ಣಾಂ ತಿಂ ನಿಯಾಳ್ಟಾಲಿಂ. ಕೊಲೆಜಿಂತ್ ಥಾವ್ನ್ ತಿಂ ಸಾಂಗಾತಾ ವ್ಹಾಡ್ಲ್ಲಿಂ. ಬ್ಯಾಡ್ಮಿಂಟನಾಂತ್ ತಿಂ ಮಿಕ್ಸ್ಡ್ ಡಬ್ಬ್ಲ್ಸ್ ಜೊಡಿ. ಆತಾಂಯ್ ಡಬ್ಬ್ಲ್ಸ್ ಖೆಳ್ಟಾತ್. ರಾಜ್ಯ್ ಮಟ್ಟಾಚಿಂ ಸಬಾರ್ ಟೂರ್ನಮೆಂಟಾಂ ತಿಂ ಜಿಕ್ಲ್ಯಾಂತ್. ಯೋಗಾನ್ಯೋಗ್ ವ ತಾಂಚ್ಯಾ ನಶಿಬಾನ್ ಮ್ಹಳ್ಳೆಬರಿ, ತಿಂ ಪ್ರೊಗ್ರೆಸ್ಸಿವ್ ಬೆಂಕಾಂತ್ ಕಾಮಾಕ್ ಲಾಗ್ಲಿಂ. ತಿಂ ಮೊಗಾರ್ ಪಡ್ಲಿಂ ಮ್ಹಣೊಂಕ್ ಜಾಯ್ನಾ ಪುಣ್ ಕ್ರಮೇಣ್ ತಾಂಚೆಂ ಮಧೆಂ ಮೋಗ್ ಕಿರ್ಲಾಲೊ ಆನಿ ವೆಗಾನ್ ವ್ಹಾಡೊಂಕ್ ಲಾಗ್ಲೊ.
ಪ್ರದೀಪ್ ಮುಂಬಯ್ ಪಾಂವ್ಚ್ಯಾ ದಿಸಾಂನಿ ಬೆಂಗ್ಳುರ್ಚ್ಯಾ ಡಿಸ್ಕೊ ಕ್ಲಬ್ಬಾಂನಿ ಆನಿ ಶೊಪ್ಪಿಂಗ್ ಸೆಂಟರಾಂನಿ ತಾಚಿ ಆನಿ ರೋಶ್ನಿಚಿ ಭೊಂವ್ಡಿ-ಗುಂವ್ಡಿ ಮ್ಹಳ್ಳೆಬರಿ ಜಾಲ್ಲಿ ಆನಿ ತಾಂಚಿಂ ದೊಗಾಂಯ್ಚಿಂ ತೊಂಡಾಂ ಸಗ್ಳ್ಯಾಂಕ್ ವಳ್ಕಿಚಿಂ ಜಾಲಿಂ. ಬೆಂಗ್ಳುರ್ಚ್ಯಾ ಹ್ಯಾ ಸೊಸಾಯ್ಟಿಂತ್ ತಿಂ ಲೊಕಾಮೊಗಾಳ್ ಜಾಲಿಂ. ತಾಂಚೆಂ ದೊಗಾಂಯ್ಚೆಂ ’ಫ್ರೆಂಡ್ಸ್ ಸರ್ಕ್ಲ್’ ಇತ್ಲೆಂ ವ್ಹಾಡ್ಲ್ಲೆಂ ಕಿ ತಾಂಚೆಂ ಆಜ್ಚ್ ಕಾಜಾರ್ ಜಾಲ್ಲೆಂ ತರ್ ಸಾಧಾರಣ್ ಏಕ್ ಹಜಾರ್ ಲೊಕಾಚೆಂ ಸಾಲ್ ಖಂಡಿತ್ ಪಾವ್ತೆಂನಾ.
"ಬೊಂಬಯ್ ವ್ಹಚೊನ್ ಪಂದ್ರಾ ದಿಸಾಂಭಿತರ್ ಮ್ಹಾಕಾ ವಿಸರ್ಲೊಯ್ ಪ್ರದೀಪ್?"
ಮ್ಹಣಾಲೆಂ ರೋಶ್ನಿ ಮಾತ್ಸ್ಯಾ ರಾಗಿಷ್ಟ್ ತಾಳ್ಯಾನ್.
"ತೆಂ ಕಶೆಂ ಸಾಧ್ಯ್ ರೋಶ್ನಿ ಡಾರ್ಲಿಂಗ್? ಹಾಂವ್ ಜಾಗೊ ಆಸ್ಚ್ಯಾ ಹರ್ಯೆಕಾ ಘಡಿಯೆ ತುಜೊ ಉಡಾಸ್ ಮ್ಹಾಕಾ ಧೊಸ್ತಾ. ಆನಿ ನಿದೆಂತ್ ಸಪ್ಣಾಂ ತುಜಿಂಚ್"
ಪ್ರದೀಪಾನ್ ತಾಕಾ ಬೊಳಾಯ್ಲೆಂ.
"ಬೆಂಗ್ಳುರ್ ಆಸ್ತಾನಾ ಆಮಿ ಸಾಂಗಾತಾ ಕಾಮ್ ಕರ್ತಾಲ್ಯಾಂವ್, ಸಾಗಾತಾ ಭಂವ್ತಾಲ್ಯಾಂವ್,. ಭವಿಶ್ಯಾಚೆಂ ಪ್ಲಾನ್ ಮಾಂಡುನ್ ಹಾಡ್ಟಾಲ್ಯಾಂವ್".
"ಡಾರ್ಲಿಂಗ್! ಮ್ಹಜ್ಯಾ ಜಿಬೆರ್ ಆಸ್ಲ್ಲೆಂ ತುಂವೆಂ ಸಾಂಗೊನ್ ಸೊಡ್ಲೆಂಯ್!"
"ಮ್ಹಳ್ಯಾರ್?"
"ಹಾಂವ್ಯೀ ಭವಿಶ್ಯಾಚೆಂ ಪ್ಲಾನ್ ಕರ್ನ್ ಆಸಾಂ."
"ಕಸಲೆಂ ಪ್ಲಾನ್ ತೆಂ? ಜನರಲ್ ಮ್ಯಾನೆಜರ್ ಜಾಂವ್ಚೆಂ? ತುಂ ಕೆದಾಳಾಯ್ ಸಾಂಗ್ತಾಲೊಯ್ ವ್ಹಡ್ಲ್ಯಾ ದರ್ಯಾಂತ್ ವ್ಹಡ್ಲೊ ಮಾಸೊ ಜಾತಲೊಂ ಮ್ಹಣ್. ತೆಂಚ್ಮೂ ಪ್ಲಾನ್ ತುಜೆಂ, ಪ್ರದೀಪ್? ತ್ಯಾ ಪ್ಲಾನಾಂತ್ ಮ್ಹಾಕಾ ಕಾಂಯ್ ಜಾಗೊ ಆಸಾ?"
"ತುಂ ಮ್ಹಕಾ ಪುರ್ತೆಂ ಚೂಕ್ ಸಮ್ಜಲಾಂಯ್ ರೋಶ್ನಿ ಡಾರ್ಲಿಂಗ್, ಮ್ಹಜ್ಯಾ ಜಿಣ್ಯೆಂತ್ ತುಜೆ ಶಿವಾಯ್ ಕೋಣ್ ಆಸಾ? ಹಾಂವೆಂ ತುಜೆ ವಿಶ್ಯಾಂತ್ ಕೆಲ್ಲೆಂ ಪ್ಲಾನ್ ಸಗ್ಳೆಂ ತುಕಾ ಸಾಂಗಾನ್ ಜಾಲ್ಯಾರ್ ತುಂ ಸಂತೊಸಾನ್ ನಾಚ್ತೆಲೆಂಯ್. ಹಾಂವ್ ಹಾಂಗಾ ತುಜೆವಿಣೆ ಎಕ್ಸುರೊ ರಾವನ್ ಮ್ಹಣ್ ಚಿಂತಾಯ್? ಸದ್ದ್ಯಾಕ್ ಹಾಂವೆಂ ಹಾಂಗಾ ರಾವೊಂಕ್ ದೋನ್ ಬೆಡ್ರುಮಾಂಚೆಂ ಏಕ್ ಘರ್ ಸೊಧುನ್ ಕಾಡ್ಲಾಂ. ಫಾಲ್ಯಾಂ-ಪೊರ್ವಾಂ ಮ್ಹಾಕಾ ಕಂಪೆನಿಚೆಂ ಕಾರ್ ಮೆಳ್ಚೆಂ ಆಸಾ. ತುಕಾ ಹಾಂಗಾ ಟ್ರಾನ್ಸ್ಫರ್ ಕರ್ಚ್ಯೆ ವಿಶಾಂತ್ ಹಾಂವ್ ವೆಗಿಂಚ್ ಉಲಂವ್ಚೊಂ ಆಸಾಂ. ಖಂಚ್ಯಾಕೀ ಹಾಂವೆಂ ಹಾಂಗಾ ಸೆಟ್ಲ್ ಜಾಯ್ಚೆ ನ್ಹಂಯ್ಗಿ ಡಾರ್ಲಿಂಗ್? ಮಾಗಿರ್ ಆಮ್ಚೊ ವ್ಹಡ್ಲೊ ದೀಸ್ ಫಿಕ್ಸ್ ಕರ್ಚೊ." ಆಶೆಂ ಪ್ರದೀಪಾನ್ ರೋಶ್ನಿಕ್ ಸಮಾಧಾನ್ ಕೆಲೆಂ.
ಹೊ ತಾಣೆ ಉಲಯಿಲ್ಲೊ ಸುಕೊ ಸೈಲಾಪ್ ಖಂಡಿತ್ ನ್ಹಂಯ್. ಕಿತ್ಯಾಕ್, ಹಿ ಮಾಂಡಾವಳ್ ತಾಚ್ಯಾ ಮತಿಂತ್ ಸುಮಾರ್ ದೀಸ್ ಥಾವ್ನ್ ಘುಂವ್ತಾಲಿ. ಪುಣ್ ಥೊಡ್ಯಾಚ್ ದಿಸಾಂನಿ ರೋಶ್ನಿಚೊ ಉಡಾಸ್ ಉಣೊ ಜಾಂವ್ಕ್ ಪ್ರದೀಪಾಚ್ಯಾ ಜಿಣ್ಯೆಂತ್ ಏಕ್ ನವಿಚ್ ವ್ಯಕ್ತಿ ಆಯ್ಲಿ ಮ್ಹಣ್ಯೆತ್. ಜಿಣ್ಯೆಂತ್ ಆಯ್ಲಿ ಮ್ಹಣ್ಚ್ಯಾಕೀ ತಾಚ್ಯಾ ದೊಳ್ಯಾಂ ಮುಖಾರ್ ತಿ ಸದಾಂ ಆಯ್ಲಿ ಮ್ಹಣ್ಚೆಂ ಚಡ್ ಸಹಜ್ ದಿಸ್ತಾ. ಪ್ರೊಗ್ರೆಸ್ಸಿವ್ ಬೆಂಕ್ ಸದಾಂ ಸಕಾಳಿಂ ಪಾವ್ಣೆ ನೋವ್ ವರಾರ್ ಉಗ್ತೆಂ ಜಾತಾಲೆಂ. ಪ್ರದೀಪ್ ಪಂದ್ರಾ ಮಿನುಟಾ ಪಯ್ಲೆಂ ಪಾವ್ತಾಲೊ. ಆತಾಂ ತಾಕಾ ಬೆಂಕಾಚೆಂ ಸ್ಯಾಂಟ್ರೊ ಕಾರ್ ಮೆಳ್ಲ್ಲೆಂ.
ಘರಾಥಾವ್ನ್ ಆಟ್ ವೊರಾರ್ ಭಾಯ್ರ್ ಸರೊನ್ ಸಾಡೆ ಆಟ್ ವೊರಾರ್ ತೊ ಆಫಿಸಾಕ್ ಪಾವ್ತಾಲೊ. ಆಂಧೆರಿ ಸ್ಟೇಶನ್ ಉತ್ರೊನ್ ಚಕಾಲಾಚ್ಯಾ ವಾಟೆನ್ ಜೆಬಿ ನಗರ್ ವ್ಹೆತಾನಾ ಎಕಾ ಬಸ್ ಸ್ಟೊಪಾಚ್ಯಾ ಪಾಟ್ಲ್ಯಾನ್ ಏಕ್ ಪರ್ನೊ ಬಂಗ್ಲೊ ದಿಸ್ತಾಲೊ. ತ್ಯಾ ವಠಾರಾಂತ್ ದೋನ್ ತೀನ್ ರಸ್ತೆ ಸಾಂಗಾತಾ ಮೆಳ್ಟಾಲೆ ಜಾಲ್ಲ್ಯಾನ್ ವಾಹಾನಾಂಚಿ ಗಡ್ದಿ ಚಡ್ ಆಸ್ತಾಲಿ. ಸಿಗ್ನಲಾಲಾಗಿಂ ಪಾವ್ತಾನಾ ವಾಹನಾಂ ನಿಧಾನ್ ಜಾತಾಲಿಂ ಆನಿ ಚಡಾವತ್ ಹರ್ಯೆಕಾ ವಾಹನಾಕ್ ಆರ್ಧೆಂ ಮಿನುಟ್ ತರಿ ಥಂಯ್ ರಾವೊಂಕ್ ಪಡ್ಟಾಲೆಂ - ಪಾಚ್ವೆಂ ಸಿಗ್ನಲ್ ಯೆತಾ ಪರ್ಯಾಂತ್.
ಆಶೆಂ ಪ್ರದೀಪ್ ಸದಾಂಯ್ ತ್ಯಾ ವಾಟೆನ್ ವ್ಹೆತಾನಾ ತ್ಯಾ ಪರ್ನ್ಯಾ ಬಂಗ್ಲ್ಯಾಚೆರ್ ತಾಚಿ ದೀಷ್ಟ್ ವ್ಹೆತಾಲಿ. ಎಕಾ ಮಾಳಿಯೆಚೊ ವ್ಹಡ್ಲೊ ಬಂಗ್ಲೊ ತೊ ಜಾವ್ನಾಸೊನ್ ಉಣ್ಯಾರ್ ಉಣೆ ಸಾತ್-ಆಟ್ ಕುಡಾಂ ತರಿ ತಾಂತುಂ ಆಸ್ಲ್ಲಿಂ. ಬಂಗ್ಲ್ಯಾಚ್ಯಾ ಧರ್ಣಿಚ್ಯಾ ಹಂತಾರ್ ಮಧೆಂಚ್ ಏಕ್ ಉಗ್ತೆಂ ಬೊಲ್ಕಾಂವ್ ಆಸ್ಲ್ಲೆಂ - ಸುಮಾರ್ ಪಂದ್ರಾ ಫುಟಿ ಲಾಂಬ್. ಪುಣ್ ಆತಾಂ ಲಗ್ಭಗ್ ತೀನ್ ಮ್ಹಯ್ನ್ಯಾಂಥಾವ್ನ್ ತೊ ತ್ಯಾ ಬಂಗ್ಲ್ಯಾಚೆರ್ ದೀಷ್ಟ್ ಜೊಕ್ತಾಲೊ ತರಿ ತಾಂತುಂ ಮನ್ಶಾಚಿ ಜಾಗ್-ಮಾಗ್ ತಾಕಾ ದಿಸೊಂಕ್ನಾ. ಹೊ ಕಾಂಯ್ ’ಭೂತ್ ಬಂಗ್ಲಾ" ಮ್ಹಣ್ ಸೊಡ್ನ್ ಸೊಡ್ಲಾಗಾಯ್ ಮ್ಹಳ್ಳೊ ದುಬಾವ್ ತಾಕಾ ಉಟ್ಲೊ.
ಪುಣ್ ತಸಲ್ಯಾ ದುಬಾವಾಕ್ ಇಡೆಂ ದಿಂವ್ಚೆ ತಸಲೆಂ ಕಾಂಯ್ ತಾಕಾ ಝಳ್ಕಾಲೆಂನಾ. ತರಿ ಬಂಗ್ಲ್ಯಾಕಡೆ ಕಾರ್ ಪಾವ್ತಾನಾ ತಾಚಿ ದೀಷ್ಟ್ ಅಯಸ್ಕಾಂತಾ ಬರಿ ತ್ಯಾ ಬಂಗ್ಲ್ಯಾಚೆರ್ ವೊಡ್ಟಾಲಿ ಆನಿ ಅರ್ದ್ಯಾ ಮಿನುಟಾಕ್ ತರಿ ತಾಚೆರ್ ಖಂಚೊನ್ ರಾವ್ತಾಲಿ. ತ್ಯಾ ಎಕಾ ದಿಸಾ ಪ್ರದೀಪ್ ಕಿತೆಂಗಿ ಗಾಢ್ ಚಿಂತ್ನಾಂನಿ ಭರೊನ್ ಯಾಂತ್ರಿಕ್ ಥರಾನ್ ಕಾರ್ ಚಲವ್ನ್ ಆಸ್ತಾನಾ ಬಂಗ್ಲ್ಯಾ ಮುಖಾರ್ ಆಸ್ಲ್ಲ್ಯಾ ಸಿಗ್ನಲಾಕಡೆ ಪಾವ್ಲ್ಲೆಂಚ್ ತಾಕಾ ಕಳೊಂಕ್ನಾ.
ಹರ್ಶೆಂಚ್ಯಾ ಬರಿ ತಾಚ್ಯಾ ಮುಖ್ಲ್ಯಾನ್ ವಾಹನಾಂ ರಾವ್ಲ್ಲ್ಯಾನ್ ತಾಕಾಯ್ ಕಾರ್ ರಾವಯ್ಜಾಯ್ ಪಡ್ಲೆಂ ಆನಿ ಎಕಾಚ್ಫಾರಾ ತಾಚಿ ದೀಷ್ಟ್ ತ್ಯಾ ಬಂಗ್ಲ್ಯಾಚೆರ್ ಗೆಲಿ ಆನಿ ತೊ ಥಟಾಕ್ಕ್ ಜಾಲೊ. ತಾಚ್ಯಾ ಆಂಗಾಂತ್ ವೀಜ್ ಚರ್ಲಿ, ಹರ್ದ್ಯಾಂತ್ ಭಾತ್ ಖಾಂಡ್ಲ್ಲ್ಯಾಬರಿ ಧಡ್ಧೊಡೊಂಕ್ ಲಾಗ್ಲೆಂ. ಜಿಣ್ಯೆಂತ್ ಎದೊಳ್ ಭೊಗಾನಾತ್ಲ್ಯಾ ಅವ್ಯಕ್ತ್ ಭೊಗ್ಣಾಂನಿ ತಾಕಾ ರೆಂವೊಡ್ಲೊ. ಬಂಗ್ಲ್ಯಾಚ್ಯಾ ಮಧ್ಲ್ಯಾ ಬೊಲ್ಕಾಂವಾಂತ್ ’ತೆಂ’ ಬಸೊನ್ ಆಸ್ಲ್ಲೆಂ. ಆಪ್ಲೆ ದೋನೀ ಮುಂಗಾಯೊ ಬೊಲ್ಕಾಂವಾಚ್ಯಾ ದಂಡ್ಯಾರ್ ತೆಂಕುನ್ ಖಾಡ್ಕೆಕ್ ಹಾತ್ ಧರ್ನ್ ಶೂನ್ಯ್ ದಿಷ್ಟಿನ್ ’ತೆಂ’ ಮುಖಾರ್ ಪಳೆವ್ನ್ ಬಸ್ಲ್ಲೆಂ. ತಾಚೆ ಲಾಂಬ್, ನಾಜೂಕ್, ತೆಲ್ತೆ ಕೇಸ್ ಪಾಟಿರ್ ಗಳ್ಳ್ಯಾತ್, ತಾಚ್ಯಾ ಗುಲೊಬಿ ವರ್ಣಾಚ್ಯಾ ಗಾಲಾಂಕ್ ಪ್ರತ್ಯುತ್ತರ್ ದಿತಾತ್ ತಾಚೆ ಮಾಜ್ರಾ ದೊಳೆ. ತ್ಯಾ ದೊಳ್ಯಾಂಕ್ ಉಜಳ್ಚ್ಯಾ ತಾಜ್ಮಹಲಾಕ್ ಪೊಂತ್ ಮಾರ್ತಾ. ಲಿಪ್ಸ್ಟಿಕ್ ಲಾಗಯ್ನಾತ್ಲ್ಲೆ ತಾಚೆ ಸಹಜ್ ತಾಂಬ್ಡೆ ವೋಂಟ್ ಚಾಳಯ್ತಾತ್. ತಾಚ್ಯಾ ಆಂಗಾವಯ್ಲೆಂ ಕಾಳ್ಯಾ ರಂಗಾಚೆಂ ಸಲ್ವಾರ್ ಕಮೀಜ್ ತಾಚ್ಯಾ ಗೊರ್ಯಾ ತೊಂಡಾಚೊ ಪರ್ಜಳ್ ಆನಿಕೀ ವ್ಹಾಡಯ್ತಾ.
ಹ್ಯಾ ಇಮಾಜೆಬರಿ ಬಸ್ಲ್ಲ್ಯಾ ಚಲಿಯೆಚೆರ್ ಮಂತ್ರಮುಗ್ಧ್ ಜಾಲ್ಲ್ಯಾ ಪ್ರದೀಪಾನ್ ಆಸ್ಡ್ಯೊ ಫಾಪ್ಡಿನಾಸ್ತಾಂ ಆಪ್ಲಿ ದೀಷ್ಟ್ ರೊಂಬಯ್ಲ್ಯಾ. ಸಿಗ್ನಲ್ ತಾಂಬ್ಡೆಂ ಆಸ್ಲ್ಲೆಂ ಪಾಚ್ವೆಂ ಜಾಲ್ಲೆಂ ಜಾಂವ್, ತಾಚ್ಯಾ ಮುಖ್ಲಿಂ ವಾಹನಾ ಚಲೊಂಕ್ ಲಾಗ್ಲ್ಲಿಂ ಜಾಂವ್, ತಾಚ್ಯಾ ಗುಮಾನಾಕ್ ವ್ಹಚಾನಾ. ತಾಚೆಂ ಪುರ್ತೆಂ ಧ್ಯಾನ್ ಆನಿ ಮನ್ ತ್ಯಾ ಜೀವಂತ್ ಮೂರ್ತಿಚೆರ್ ಖಂಚ್ಲಾಂ. ಪಾಟ್ಲ್ಯಾನ್ ಆಸ್ಲ್ಲ್ಯಾ ಕಾರಾನ್ ರಾಗಾನ್ ವ್ಹಾಜಯಿಲ್ಲೆಂ ಹೊರ್ನ್ ಕಾನಾಕ್ ಆಪ್ಟಾತಾನಾ ಮಾತ್ರ್ ತಾಕಾ ಜಾಗ್. ಪುಣ್ ತ್ಯಾ ದಿಸಾ ಆಫಿಸಾಂತ್ ಪ್ರದೀಪಾಚಿ ಆವಸ್ಥಾ ಭೋವ್ ಬಿರ್ಮತೆಚಿ. ತಾಚ್ಯಾ ದೊಳ್ಯಾಂ ಮುಖಾರ್ ’ತಾಚೆಂ’ ಖಾಡ್ಕೆರ್ ಹಾತ್ ದವರ್ನ್ ಬಸ್ಲ್ಲೆಂ ರೂಪ್ಚ್ ಖೆಳ್ಟಾ ಶಿವಾಯ್ ಕಾಗ್ದಾರ್ ಲೆಖ್ಣಿ ಚಲಾನಾ, ಫೋನ್ ವ್ಹಾಜ್ಲ್ಲೆಂ ಆಯ್ಕಾನಾ, ಬೊಸ್ ಮುಖಾರ್ ಉಬೊ ರಾವ್ಲ್ಲೊಯೀ ದಿಸಾನಾ.
"ಕಿತೆಂ ಪ್ರದೀಪ್, ಹ್ಯಾ ಸಂಸಾರಾಂತ್ ಆಸ್ಲ್ಲೆಬರಿ ದಿಸಾನಾಂಯ್?" ಬೊಸಾನ್ ಜಾಗಯ್ಲೆಂ. ಪ್ರದೀಪ್ ಸಪ್ಣಾಂತ್ಲೊ ಜಾಗೆಲ್ಲ್ಯಾಬರಿ ಕಾಲುಬುಲೊ ಜಾವ್ನ್ ಉಟೊನ್ ಉಬೊ ರಾವ್ಲೊ.
"ಸೋರ್ರಿ ಸರ್..... ಕಾಂಯ್ ನಾ ಸರ್." ತೊ ಗಾಗೆಲೊ.
"ಕಾಂಯ್ ಕಾರಣ್ ನಾಸ್ತಾನಾ ತುಂ ಆಸೊ ಚಿಂತ್ನಾರಾಜಾಂತ್ ಬುಡೊನ್ ಆಸಾಯ್? ಭಲಾಯ್ಕಿ ಬರಿ ಆಸಾಮೂ?"
ಬೊಸಾಕ್ ಕಿತೆಂ ಸಾಂಗ್ಚೆಂ ಮ್ಹಣ್ ಇರಾರ್ ಜಾಲ್ಲ್ಯಾ ಪ್ರದೀಪಾಕ್ ತಾಣೆಂಚ್ ಏಕ್ ನೀಬ್ ತಯಾರ್ ಕರ್ನ್ ದಿಲ್ಲ್ಯೆಬರಿ ಜಾಲೆಂ. "ಮಾಂಯ್ಚಿ ಕಾಲ್ ಚೀಟ್ ಆಯ್ಲ್ಯಾ ಸರ್. ತೀನ್ ದಿಸಾಂ ಆದಿಂ ಮೊರ್ಯೆಂತ್ ನ್ಹಾತಾನಾ ನಿಸ್ರೊನ್ ಪಡೊನ್ ಧೊಂಪ್ರಾ ಗಾಂಟಿಕ್ ಮಾರ್ ಜಾಲಾ ಖಂಯ್. ನಿದೊನ್ಂಚ್ ಆಸಾ ಖಂಯ್." "ಘರಾ ದುಸ್ರಿಂ ಕೊಣೀ ನಾಂತ್? ಕೋಣ್ ತಿಚಿ ಚಾಕ್ರಿ ಕರ್ತಾ?’
"ಘರಾಂತ್ ದುಸ್ರಿಂ ಕೊಣೀ ನಾಂತ್ ಸರ್. ಪುಣ್ ತಿಚಿ ಸೆಜಾರ್ಚಿ ಎಲಿಜಾಮಿ ಸದಾಂಯ್ ಯೇವ್ನ್ ರಾಂದುನ್ ತಿಕಾ ಜೇಂವ್ಕ್ ದೀವ್ನ್ ವ್ಹೆತಾ ಖಂಯ್".
"ಪಳೆ, ಸಂಸರಾಂತ್ ಬರಿಂ ಸಾಮಾರಿತಾಂಯೀ ಆಸಾತ್. ತುಕಾ ಆವಯ್ಕ್ ಪಳೆಜಾಯ್ ಮ್ಹಣ್ ದಿಸ್ತಾ ಜಾಲ್ಯಾರ್ ಆಜ್ಚ್ ಎಕಾ ಹಾಫ್ತ್ಯಾಖಾತಿರ್ ಗಾಂವಾಕ್ ವ್ಹಚೊನ್ ಯೇ. ಏಕ್ ಎಪ್ಲಿಕೀಶನ್ ಬರವ್ನ್ ದೀ." ’ಆತಾಂ ಸಾಂಪಡ್ಲೊಂ’, ಚಿಂತ್ಲೆಂ ಪ್ರದೀಪಾನ್. ಏಕ್ ಫಟ್ ಮಾರುಂಕ್ ಗೆಲ್ಯಾರ್ ಹಜಾರ್ ಫಟಿ ಮಾರಿಜೆ ಪಡ್ಟಾತ್.
"ನಾ ಸರ್. ತಶೆಂ ಕಾಂಯ್ ಸೀರಿಯಾಸ್ ನಾ. ಚಾರ್-ಪಾಂಚ್ ದಿಸಾಂನಿ ಬರಿ ಜಾತೆಲಿಂ ಮ್ಹಣ್ ಬರಯ್ಲಾಂ. ವ್ಹೆಚೆಂ ಗರ್ಜ್ ಪಡ್ಲ್ಯಾರ್ ಖಂಡಿತ್ ಸಾಂಗ್ತಾಂ ಸರ್." ’ಹೊ ಕಿತ್ಯಾಕ್ ಮ್ಹಜ್ಯಾ ಪಾಟಿಕ್ ಲಾಗ್ಲಾಗಾಯ್’ ಮತಿಂತ್ಚ್ ಪುರ್ಪುರ್ಲೊ ತೊ. ಬಂಗ್ಲ್ಯಾಂತ್ಲ್ಯಾ ತ್ಯಾ ಆಂಜಾಳ್ ಚಲಿಯೆಚೆರ್ ದಿಸಾಂತ್ ಏಕ್ ಪಾವ್ಟಿ ದೀಷ್ಟ್ ಘಾಲ್ಚೊ ಆವ್ಕಾಸ್ ತಿತ್ಲ್ಯಾ ಸುಲಭಾಯೆನ್ ಕಸೊ ಸೊಡಿನ್?
"ತಶೆಂ ಜಾಲ್ಯಾರ್ ತಶೆಂ. ಮ್ಹಜಿ ಕಿತೆಂಯ್ ಕುಮಕ್ ಜಾಯ್ ಪಡ್ಲ್ಯಾರ್ ಸಾಂಗೊಂಕ್ ದಾಕ್ಷೆನಾಕಾ."
’ಥ್ಯಾಂಕ್ ಯು ಸರ್. ಥ್ಯಾಂಕ್ ಯು ವೆರಿ ಮಚ್".
****************************
ದುಸ್ರ್ಯೆ ದಿಸಾ, ತಿಸ್ರೆ ದಿಸಾ, ಚೊವ್ತೆ ದಿಸಾ ಆನಿ ಮುಖ್ಲ್ಯಾ ಪಂದ್ರಾ ದಿಸಾಂನಿ ತೆಂಚ್ ಕಾಳಿಜ್ ಧಡ್ಧಡಾಂವ್ಚೆಂ ದೃಶ್ಯ್. ಕಷ್ಟಾಂನಿ ತಾಣೆ ಕಾಮಾಚೆರ್ ಧ್ಯಾನ್ ದಿಲೆಂ. ಸದಾಂ, ’ತೆಂ’ ತ್ಯಾಚ್ ವೆಳಾರ್, ತ್ಯಾಚ್ ಜಾಗ್ಯಾರ್, ತ್ಯಾಚ್ ಭಂಗಿರ್ ಆಸ್ತಾಲೆಂ - ಶೂನ್ಯ್ ದಿಷ್ಟಿನ್ . ತಾಚ್ಯಾ ದೊಳ್ಯಾಂ ಮುಖಾರ್ ಕಿತೆಂ ಚಲ್ತಾಲೆಂ ತಾಕಾ ಪರ್ವಾ ನಾತ್ಲ್ಲಿ. ’ಹಾಚ್ಯಾ ದೊಳ್ಯಾಂತ್ ದೀಷ್ಟ್ ನಾಂಗಾಯ್?’ ಮ್ಹಳ್ಳೊ ದುಭಾವ್ ಪ್ರದೀಪಾಕ್ ಯೇಂವ್ಕ್ ಲಾಗ್ಲೊ. ಪುಣ್ ವೆಗಿಂಚ್ ತೊ ದುಭಾವ್ ನಪಂಯ್ಚ್ ಜಾಂವ್ಚೊ ದೀಸ್ಯೀ ಆಯ್ಲೊ.
ತ್ಯಾ ದಿಸಾಯೀ ಪ್ರದೀಪ್ ಸದಾಂಚ್ಯಾ ಆತ್ರೆಗಾನ್ ಸಿಗ್ನಲಾಕಡೆ ಕಾರ್ ರಾವೊನ್ ಬಂಗ್ಲ್ಯಾಚೆರ್ ದೀಷ್ಟ್ ಘಾಲ್ತಾನಾ ತ್ಯಾ ಚಲಿಯೆನ್ ಮಾತ್ಶೆಂ ತಾಚೆ ಕುಶಿನ್ ತಕ್ಲಿ ಗುಂವ್ಡಾಯಿಲ್ಲೆ ಬರಿ ಆನಿ ಖಿಣ್ಭರ್ ವೊಂಟಾಂರ್ ಅಮೃಕೊ ಹಾಸೊ ಹಾಡ್ಲೆಲ್ಯಾಬರಿ ತಾಕಾ ಭೊಗ್ಲೆಂ. ತರ್ ಆಪ್ಣೆಂ ದುಭಾವ್ಲೆಲ್ಯಾ ಪ್ರಕಾರ್ ’ತೆಂ’ ಕುಡ್ಡೆಂ ನ್ಹಯ್. ತಿತ್ಲೆಂಚ್ ಕಿತ್ಯಾಕ್, ಸಂಸಾರಾಂತ್ಲ್ಯಾ ಸಗ್ಳ್ಯಾ ಸೊಭಿತ್, ಸುಂದರ್ ಆನಿ ಗ್ರೇಸ್ತ್ ತರ್ನಾಟ್ಯಾಂಕ್ ಕುಶಿಕ್ ದವರ್ನ್ ತಾಣೆ ಆಪ್ಣಾಕ್ ವಿಂಚ್ಲಾ ಮ್ಹಳ್ಳಿಂ ಭಗ್ಣಾಂಯೀ ಯೇವ್ನ್ ತೊ ಫುಗ್ಲೊ.
ಉಪ್ರಾಂತ್ಲೊ ಏಕ್ ಹಫ್ತೊಭರ್ ’ತೆಂ’ ಆಪ್ಣಾಕ್ಚ್ ರಾಕೊನ್ ಆಸ್ಲ್ಲೆಂ ಮ್ಹಳ್ಳೆಬರಿ ಪ್ರದೀಪಾಕ್ ಪಳೆಲ್ಲ್ಯಾಕ್ಷಣಾಂ ತಾಚ್ಯಾ ತೊಂಡಾರ್ ಅಮೃಕೊ ಹಾಸೊ ಫಾಂಕ್ತಾಲ್ಯೊ. ಆತಾಂ ಆಪ್ಲೆಂ ಜಯ್ತ್ ಕೊಣಾಕಡೆ ತರಿ ಸಾಂಗೊನ್ ಶಾಭಾಸ್ಕಿ ಜೊಡಿಜಾಯ್ ಮ್ಹಣ್ ಪ್ರದೀಪಾಕ್ ಭೊಗ್ಲ್ಲೆಂ ಸಹಜ್ಚ್. ಕೊಣಾಕಡೆ ಸಾಂಗ್ಚೆಂ? ಹಾಂ, ಸಂಜೀವ್ ಆಸಾ ನ್ಹಂಯ್? ಆಫಿಸಾಕ್ ಆಯಿಲ್ಲೊಚ್ ಪ್ರದೀಪಾನ್ ಸಂಜೀವಾಕ್ ಸೊಧ್ಲೆಂ. ಖಂಯೀಂ ದಿಸ್ಲೊನಾ. ಹೆಣೆ ತೆಣೆ ವಿಚಾರ್ತಾನಾ ತೊ ಹ್ಯಾ ದಿಸಾಂನಿ ಆಫಿಸಾಕ್ ವೇಳ್ ಕರ್ನ್ ಯೆತಾ ಮ್ಹಣ್ ಕಳ್ಳೆಂ. ಪ್ರದೀಪಾಕ್ ರಾಗ್ಯೀ ಆಯ್ಲೊ, ಕುತೂಹಲ್ಯೀ ಉಬ್ಜಾಲೆಂ. ತೊ ಯೆತಚ್ ಆಪ್ಣಾಸರ್ಶಿಂ ಧಾಡಿಜಾಯ್ ಮ್ಹಣ್ ಫರ್ಮಾವ್ನ್ ಆಪ್ಲ್ಯಾ ಕಾಮಾಕ್ ಲಾಗ್ಲೊ. ಪುಣ್ ಕಾಮಾಂತ್ ತಾಚೆಂ ಧ್ಯಾನ್ ಬಸ್ಲೆಂನಾ.
"ನಮಸ್ಕಾರ್. ಮ್ಹಾಕಾ ತುಮಿ ಆಪಯ್ಲೆಂ ಸರ್?" ಸಂಜೀವಾನ್ ಪ್ರದೀಪಾಚ್ಯಾ ಕೆಬಿನಾಕ್ ರಿಗೊನ್ ವಂದನ್ ಕೆಲೆಂ. "ಕಿತೆಂ ಆಯ್ಕಾತಾಂ ಹಾಂವ್ ಸಂಜೀವ್? ತುಂ ಆಜ್ಕಾವ್ ಕಾಮಾಕ್ ವೆಳಾರ್ ಯೇನಾಂಯ್ ಖಂಯ್?"
"ದೋನ್ಚ್ ದಿಸಾಂಥಾವ್ನ್ ಸರ್. ಮ್ಹಜ್ಯಾ ಸುಪರ್ವಾಯ್ಜಾರಾಚಿ ಪರ್ವಾಣ್ಗಿ ಘೆತ್ಲ್ಲಿ ಸರ್".
"ತಾಣೆ ಮ್ಹಾಕಾ ಕಿತ್ಯಾಕ್ ಸಾಂಗೊಂಕ್ ನಾ?"
"........................."
"ಬರೆಂ, ಕಿತೆಂ ಜಾಲೆಂ ಸಾಂಗ್"
"ದೋನ್ ದೀಸ್ಥಾವ್ನ್ ಮಾಂಯ್ ತಾಪಾನ್ ನಿದ್ಲ್ಯಾಸರ್. ತೆಂ ಜಾಲ್ಲ್ಯಾನ್ ದೀಪುಗೆರ್ ಹಾಂವೆಂಚ್ ವ್ಹಚಾಜಾಯ್ ಪಡ್ಲೆಂ."
"ದೀಪು? ಕೋಣ್ ದೀಪು?" ’ತಿ ಕಾಣಿ ಲಾಂಬ್ ಆಸಾ ಸರ್". ’ವ್ಹಯ್ಗೀ? ತರ್ ಆತಾಂ ಸದ್ದ್ಯಾಕ್ ತಿ ರಾವಯ್. ದೊನ್ಫಾರಾಂ ಶೆಟ್ಟಿಚ್ಯಾ ಹೊಟೆಲಾಂತ್ ಜೆವ್ತಾನಾ ಸವಿಸ್ತಾರ್ ಮ್ಹಾಕಾ ಸಾಂಗ್." ಮ್ಹಣೊನ್ ಪ್ರದೀಪ್ ಚಲ್ಲೊ.
ಜೆವ್ಣಾಚ್ಯಾ ವೆಳಾರ್ ದೊಗೀ ಶೆಟ್ಟಿಚ್ಯಾ ಹೊಟೆಲಾಕ್ ಗೆಲೆ. ಪ್ರದೀಪಾನ್ ದೋನ್ ಇಡ್ಲಿ ಚಿಕನ್ ಒರ್ಡರ್ ಕೆಲಿಂ.
"ಸುರು ಕರ್ ಪಳೆಯಾಂ ಆತಾಂ ತುಜಿ ಲಾಂಬ್ ಕಾಣಿ." ಮ್ಹಣಾಲೊ ಪ್ರದೀಪ್. "ಬರೆಂ ಸರ್. ತುಮಿ ಬೊಂಬಯ್ ಯೆಂವ್ಚ್ಯಾ ಎಕಾ ಮ್ಹಯ್ನ್ಯಾ ಪಯ್ಲೆಂ ಹಾಂಗಾಸರ್ ಏಕ್ ವ್ಹಡ್ಲೆಂ ಘಡಿತ್ ಘಡ್ಲ್ಲೆಂ."
"ಘಡಿತ್? ಕಸಲೆಂ ತೆಂ?" "ಸಗ್ಳ್ಯಾ ವಾರ್ತಾಪತ್ರಾಂನಿ ತಿ ಖಬಾರ್ ಆಯಿಲ್ಲಿ. ಧಾಂವ್ಚ್ಯಾ ಲೊಕಲ್ ಟ್ರೆಯ್ನಿರ್ ಥಾವ್ನ್ ಎಕಾ ಚಲಿಯೆಕ್ ಭಾಯ್ರ್ ಲೊಟುನ್ ಘಾಲ್ಲೆಂ."
"ಹಾಂ! ವ್ಹಯ್ ವ್ಹಯ್..... ಉಡಾಸ್ ಆಯ್ಲೊ. ತ್ಯಾ ಚಲಿಯೆಚೆಂ ನಾಂವ್ಯೀ ಮ್ಹಾಕಾ ಉಡಾಸ್ ಆಸಾ. ದೀಪ್ತಿ.....ದೀಪ್ತಿ... ನ್ಹಂಯ್ .... ದೀಪಿಕಾ! ವ್ಹಯ್ಮೂ? ಬೆಂಗ್ಳೂರ್ ಹಾಂವೆಂ ವಾಚ್ಲ್ಲೆಂ. ಕಿತ್ಲೆ ಮ್ಹಯ್ನೆ ಜಾಲೆ? ಸ ಮ್ಹಯ್ನೆ? ಥರಿ ಮ್ಹಜೊ ಉಡಾಸ್ ಪಳೆ!" ’ವ್ಹಯ್, ಬರೋ ತುಮ್ಚೊ ಉಡಾಸ್. ದೀಪಿಕಾ ತಾಚೆಂ ನಾಂವ್. ದೀಪು ಮ್ಹಳ್ಯಾರೀ ತೆಂಚ್" ಮ್ಹಣಾಲೊ ತೊ.
"ತೆಂ ದುರಂತ್ ಘಡ್ಲ್ಲ್ಯಾ ದಿಸಾ ದೀಪಿಕಾನ್ ಅಂಧೇರಿಥಾವ್ನ್ ಚರ್ಚ್ಗೇಟ್ ವ್ಹೆಚಿ ಟ್ರೇಯ್ನ್ ಧರ್ಲಿ. ಫಸ್ಟ್ ಕ್ಲಾಸ್ ಡಬ್ಬೊ ತೊ.
ದೊನ್ಫಾರಾಂಚಿಂ ಬಾರಾ ವೊರಾಂ ಜಾತಿತ್. ತ್ಯಾ ಟ್ರೆಯ್ನಿರ್ ಗಡ್ದಿ ಆಸ್ಲ್ಲಿ. ಸಿದ್ಧಾರ್ಥ್ ಕೊಲೆಜಿಂತ್ ಎಮ್.ಕೊಮ್. ಶಿಕ್ಚ್ಯಾ ತಾಕಾ ತ್ಯಾ ದಿಸಾ ದೇಡ್ ವೊರಾರ್ ಆಂತಿಮ್ ಪರೀಕ್ಷೆಚೆಂ ಏಕ್ ಪೇಪರ್ ಆಸ್ಲ್ಲೆಂ. ಶಿಕ್ಪಾಂತ್ ತೆಂ ಭೋವ್ ಹುಶಾರ್ ಆಸ್ಲ್ಲೆಂ ಆನಿ ಕ್ಲಾಸಿಂತ್ ಪ್ರಥಮ್ ಯೆತಾಲೆಂ ತರಿ ಪರೀಕ್ಷೆಚೊ ಥೊಡೊ ತರಿ ತನಾವ್ ತಾಚ್ಯಾ ಕಾಳ್ಜಾಂತ್ ಭರ್ಲ್ಲೊ ಮ್ಹಳ್ಯಾರ್ ಚೂಕ್ ಜಾಯ್ಶಿನಾ. ಆನಿ ತ್ಯಾ ದಿಸಾ ಗಾಡಿ ಧಾ ಮಿನುಟಾಂ ವೇಳ್ ಕರ್ನ್ ಸುಟ್ಲ್ಲ್ಯಾನ್ ಫಸ್ಟ್ ಕ್ಲಾಸಿಂತ್ಯೀ ಗಡ್ದಿ ಆಸ್ಲ್ಲಿ. ಸ್ಟೇಶನಾಂತ್ ದೀಪಿಕಾಕ್ ಆಪ್ಲ್ಯಾ ಸಾಂಗಾತಾ ಪರೀಕ್ಷೆಕ್ ಬಸ್ಚಿಂ ವಳ್ಕಿಚಿಂ ಸಬಾರ್ ಚೆಡ್ವಾಂ ಮೆಳ್ಳಿ. ತಿಂ ಸಗ್ಳಿಂ ಸಾಂಗಾತಾ ಗಾಡಿಯೆರ್ ಚಡ್ಲಿಂ."
"ವ್ಹಯ್, ಹೆಂ ಸಗ್ಳೆಂ ವಾಚ್ಲ್ಲೊ ಉಡಾಸ್ ಆಸಾ. ಮುಖಾರ್ ಕಿತೆಂ ಜಾಲೆಂ? ಮಟ್ವ್ಯಾನ್ ಸಾಂಗ್." ಗಾಡಿಯೆ ಭಿತರ್ ಗಡ್ದಿ ಆಸ್ಲ್ಲ್ಯಾನ್ ದೀಪಿಕಾ ಆಪ್ಲ್ಯಾ ಇಷ್ಟಿಣ್ಯಾಂ ಸಾಂಗಾತಾ ಬಾಗ್ಲಾ ದೆಗೆರ್ಚ್ ರಾವ್ಲೆಂ. ಗಾಡಿ ಸುಟ್ಟಾ ಸುಟ್ಟಾನಾ ಖಾಂದ್ಯಾರ್ ಏಯ್ ಥಯ್ಲಿ ಆನಿ ಹಾತಾಂತ್ ಥೊಡಿಂ ಬೊಲ್ಪೆನ್ನಾಂ ಘೆವ್ನ್ ಏಕ್ ಆಟ್ರಾ-ವೀಸ್ ವರ್ಸಾಂಚೊ ತರ್ನಾಟೊ ಡಬ್ಬ್ಯಾಭಿತರ್ ರಿಗ್ಲೊ.
ದಾರಾದೆಗೆರ್ ಆಸ್ಲ್ಲ್ಯಾ ಸಗ್ಳ್ಯಾ ಚೆಡ್ವಾಂನಿ ತಾಕಾ "ಮತ್ ಚಢೊ! ಯೆ ಲೇಡೀಸ್ ದಿಬ್ಬಾ ಹೈ, ಉತರೊ! ಉತರೊ!" ಮ್ಹಣ್ ಬೊಬಾಟ್ ಘಾಲುಂಕ್ ಸುರು ಕೆಲಿ. ತಾಂಚ್ಯಾ ಬೊಬೆಕ್ ಕಾಂಯ್ಚ್ ಗುಮಾನ್ ಕರಿನಾಸ್ತಾಂ ಚೆಡೊ ದಾರಾಮಧೆಂ ಆಸ್ಚೊ ಸ್ಟಿಲಾಚೊ ಖಾಂಬೊ ಧರ್ನ್ ರಾವ್ಲೊ. ಗಾಡಿ ಸುಟ್ಲ್ಯಾ ಉರ್ಪ್ರಾಂತ್ ಲೋವ್ ಲೋವ್ ಭಿತರ್ ರಿಗೊಂಕ್ ಪ್ರಯತನ್ ಕರಿಲಾಗ್ಲೊ. ಆಶೆಂ ಕರ್ತಾನಾ ಮುಖಾರ್ ಆಸ್ಲ್ಲ್ಯಾ ಚೆಡ್ವಾಂನಿ ತಾಕಾ ವಾಟ್ ದಿಲಿನಾ ಆನಿ ಬೊಬಾಟ್ ಘಾಲುಂಕ್ ಸುರು ಕೆಲಿ. ಚೆಡ್ಯಾನ್ಯೀ ತಾಂಕಾಂ ಗಾಳಿ ಸೊವೊಂಕ್ ಸುರು ಕೆಲೆಂ ಆನಿ ಉದ್ದೇಶ್ಪೂರ್ವಕಿಂ ತಾಂಚ್ಯಾ ಆಂಗಾಕ್ ಗಸ್ಟೊನ್ ಭಿತರ್ ಸರೊಂಕ್ ಲಗ್ಲೊ.
ಮುಖಾರ್ ಆಸ್ಲ್ಲ್ಯಾ ದೀಪಿಕಾಚ್ಯಾ ಹರ್ದ್ಯಾರ್ ತಾಣೆ ಹಾತ್ ಬೊಂವ್ಡಾಯ್ಲೊ. ದೀಪಿಕಾನ್ ವ್ಹಡ್ಲ್ಯಾನ್ ಬೊಬಾಟ್ ಘಾಲಿ ಆನಿ ಖಾಂದಾರ್ ಆಸ್ಲ್ಲ್ಯಾ ಹೆಂಡ್ಬೆಗಾನ್ ಚೆಡ್ಯಾಚ್ಯಾ ತಕ್ಲೆಕ್ ಮಾರ್ಲೆಂ ಆನಿ ತಾಕಾ ದಾರಾ ಕುಶಿನ್ ಲೊಟುಂಕ್ ಸುರು ಕೆಲೆಂ. "ದೀಪಿಕಾಚ್ಯಾ ದುರದ್ರಷ್ಟಾನ್ ತ್ಯಾ ದಿಸಾ ಬಾಯ್ಲಾಂಚ್ಯಾ ಡಬ್ಬ್ಯಾಂತ್ ಪಾರೊ ನಾತ್ಲ್ಲೊ. ಥೆಂ ಜಾಲ್ಲ್ಯಾನ್ ಚೆಡ್ಯಾಕ್ ಡಬ್ಬ್ಯಾ ಭಿತರ್ ರಿಗ್ಚೆಂ ಧಯ್ರ್ ಆಯ್ಲೆಂ. ದೀಪಿಕಾನ್ ತಾಕಾ ಲೊಟುಂಕ್ ಸುರು ಕರ್ತಾನಾ ಚೆಡ್ಯಾನ್ ಆಪ್ಲ್ಯಾ ಹಾತಾಂತ್ಲಿಂ ಬೊಲ್ಪೆನ್ನಾಂ ಸಕಯ್ಲ್ ಘಾಲಿಂ ಆನಿ ಜಾದು ಕೆಲ್ಲ್ಯಾಬರಿ ಖಿಣಾ ಭಿತರ್ ತಾಚ್ಯಾ ಉಜ್ವ್ಯಾ ಹಾತಾಂತ್ ಉಸಲ್ಲಿ, ಝಳ್ಜಳ್ಚಿ ರಾಮ್ಪುರಿ ಸುರಿ ಆಯ್ಲಿ ಆನಿ ದಾವ್ಯಾ ಹಾತಾನ್ ತಾಣೆ ದೀಪಿಕಾಚೊ ಉಜ್ವೊ ಹಾತ್ ಧರ್ಲೊ.
ಎದೊಳ್ ಬೊಬಾಟ್ ಮರ್ನ್ ಆಸ್ಲ್ಲ್ಯಾ ಚೆಡ್ವಾಂಚೊ ತಾಳೊ ಎಕಾಚ್ಫಾರಾ ಬಂದ್ ಜಾಲೊ ಆನಿ ಆರ್ ಮಾರ್ಲ್ಲ್ಯೆಬರಿ ತಿಂ ಹಾಲಾನಾಂ ಜಾಲಿಂ. ಸರ್ಪಾನ್ ಜಿಡೆಂ ಉಕಲ್ಲಲ್ಲ್ಯಾ ಬರಿ ತಿ ಝಳ್ಜಳ್ಚಿ ಸುರಿ ತಾಣೆ ಸಗ್ಳ್ಯಾಂಕ್ ದಿಸ್ಚ್ಯೆಬರಿ ಉಕಲ್ನ್ ಧರ್ಲಿ ಆನಿ ದಾವ್ಯಾ ಹಾತಾನ್ ದೀಪಿಕಾಕ್ ವೋಡ್ನ್ ಝಗ್ಲಾಣ್ಯಾ ವೆಗಾನ್ ತಾಕಾ ದಾರಾಭಾಯ್ರ್ ಲೊಟುನ್ ಘಾಲೆಂ.
ದೀಪಿಕಾಚಿ ಆಕ್ಲಾಸಾಚಿ ಬೊಬ್ ಹೆರಾಂಚ್ಯಾ "ಮೈ ಗೊಡ್!", "ಹೇ ಭಗ್ವಾನ್!", ಸುಸ್ಕಾರಾಕ್ ಚೀರ್ನ್ ಸಗ್ಳ್ಯಾಂಚ್ಯಾ ಕಾನಾಂಕ್ ಝಗ್ಲಾಣೆ ಮಾರ್ಲ್ಲ್ಯೆಬರಿ ಆಪ್ಟಾಲಿ. ಟ್ರೇಯ್ನ್ ವಿಲೆಪಾರ್ಲೆ ಸ್ಟೇಶನಾಕ್ ಲಾಗಿಂ ಪಾವ್ಲ್ಲಿ ಜಾಲ್ಲ್ಯಾನ್ ನಿಧಾನ್ ಜಾಲ್ಲಿ. ಚೆಡ್ಯಾನ್ ಪರ್ತ್ಯಾನ್ ಏಕ್ ಪಾವ್ಟಿ ಸುರಿ ಉಕಲ್ನ್ ಧರ್ನ್ ಭೆಷ್ಟಾಂವ್ಚ್ಯಾ ತಾಳ್ಯಾನ್ ಮ್ಹಳೆಂ,
"ಖಬಡ್ದಾರ್ ಕೊಣೀ ಹಾಲ್ಶಾತ್ ವ ಏಕ್ ಮೆಟ್ ಪಾಟಿಂ ಮುಖಾರ್ ದವರ್ಶಾತ್ ಜಾಲ್ಯಾರ್! ಜಿವಾಚಿ ಆಶಾ ಆಸಾ ಜಾಲ್ಯಾರ್ ಆಸ್ಲ್ಲೆಕಡೆಚ್ ಹಾಲಾನಾಸ್ತಾಂ ರಾವಾ!"
ಅಶೆಂ ತಾಣೆ ಮ್ಹಣ್ಟಾನಾ ಭಂವ್ತಿಂ ಆಸ್ಲ್ಲ್ಯಾ ಬಾಯ್ಲಾಂಚ್ಯಾ ಕಾಳ್ಜಾಂನಿ ಕುಲ್ಕುಲೊ ಉಬ್ಜಾಲೊ ಮ್ಹಣ್ಯೆತ್. ಇತ್ಲೆಂ ಸಾಂಗೊನ್ ತೊ ಸೈತಾನ್ ಚೆಡೊ ಗಾಡಿಯೆರ್ ಥಾವ್ನ್ ಉಡ್ಲೊ ಆನಿ ಘಡ್ಯೆಭಿತರ್ ಪಾಂಚ್-ಸ ಪಾಟೆ ಉತ್ರೊನ್ ದೊಳ್ಯಾಂ ಆಡ್ ಜಾಲೊ ಸರ್."
"ಮ್ಹಣ್ಟಚ್ ತಾಕಾ ಧರ್ಲೊನಾ?" ವಿಲೆಪಾರ್ಲೆ ಸ್ಟೇಶನಾಚ್ಯಾಕೀ ದೊನ್ಶಿಂ ಮೀಟರ್ ಆರೊ ತೊ ಉಡ್ಲೊ ಜಾಲ್ಲ್ಯಾನ್ ಕಾಂಯ್ ಕರುಂಕ್ ಜಾಲೆಂನಾ ಸರ್."
"ಸಂಜೀವ್, ತುಂ ಹೆಂ ಸಗ್ಳೆಂ ಸಾಂಗ್ತಾನಾ ಥಂಯ್ಚ್ ಆಸೊನ್ ಸಗ್ಳೆಂ ಪಳೆತಲೊಯ್ ಮ್ಹಳ್ಳೆಬರಿ ದಿಸ್ತಾ. ಸಾಂಗ್, ಇತ್ಲಿ ಸಗ್ಳಿ ತಪ್ಶಿಲ್ ತುಕಾ ಖಂಯ್ಸರ್ ಮೆಳ್ಳಿ?"
"ದೀಪಿಕಾಚ್ಯಾ ತೊಂಡಾಂತ್ ಥಾವ್ನ್"
"ಅಚ್ಫಾ! ತಶೆಂ ತರ್! ದೀಪಿಕಾಕ್ ತ್ಯಾ ಚೆಡ್ಯಾನ್ ಪಾಟ್ಯಾಂಚೆರ್ ಲೊಟುನ್ ಘಾಲ್ತಾನಾ ತೂಂಯೀ ದೀಪಿಕಾ ಸಾಂಗಾತಾ ಸಕಯ್ಲ್ ಉಡುಲ್ಲೊಯ್ ಕಿತೆಂ? ತ್ಯಾ ವಿಷಾಂತ್ ವಾರ್ತಾಪತ್ರಾಂನಿ ಕಾಂಯ್ ಯೇಂವ್ಕ್ನಾಂಮೂ?" ’ಕಾಳಿಜ್ ನಾತ್ಲ್ಲೊ ಮನಿಸ್ ಹೊ. ನಾ ತರ್, ಎಕಾ ಅಸಹಾಯಕ್ ಚಲಿಯೆಚಿ ಆಸಲಿ ದಾರುಣ್ ಪರಿಸ್ಥಿತಿ ಸಾಂಗ್ತಾನಾಂಯ್ ಆಶೆಂ ಖೆಂಡುನ್ ಉಲಯ್ತಾ?" ಚಿಂತ್ಲೆಂ ಸಂಜೀವಾನ್. ತರೀ ಆಪ್ಲಿಂ ಭೊಗ್ಣಾಂ ಲಿಪವ್ನ್ ತೊ ಮ್ಹಣಾಲ್,
"ಕಶೆಂ ಯೆಂವ್ಚೆಂ ಸರ್? ಹಾಂವ್ ತ್ಯಾ ಟ್ರೆಯ್ನಿರ್ ನಾತ್ಲ್ಲೊಂ. ಪುಣ್ ತೆಂ ಆಸ್ಪತ್ರೆಂತ್ ದೋನ್ ಮ್ಹಯ್ನೆ ಆಸ್ತಾನಾ ತಾಕಾ ಸದ್ಧಾಂ ಹಾಂವ್ ಭೆಟೊಂಕ್ ವ್ಹೆತಾಲೊಂ. ತುಮಿ ವಾಚ್ಲಾಂ ಆಸ್ತಲೆಂ ದೀಪಿಕಾ ಸಕಯ್ಲ್ ಪಡ್ಲ್ಲೆಂಚ್ ತಾಚೆ ಪಾಯ್ ಸೀದಾ ಪಾಟ್ಯಾಂವಯ್ರ್ ಪಡ್ಲೆ ಆನಿ ತ್ಯಾಚ್ ಟ್ರೆಯ್ನಿಚ್ಯಾ ರೊದಾಂನಿ ತಾಚೆ ಸೊಬಿತ್ ಪಾಯ್ ಗ್ರಾಸಿಲೆ. ಧೊಂಪ್ರಾಂವಯ್ರ್ ಜಾಂಗೆರ್! ಕುಡಿಚ್ಯಾ ವಳ್ವಳ್ಯಾಂಪ್ರಾಸ್ ಚಡ್ ತಾಚೆ ಮಾನಸಿಕ್ ಕಳ್ವಳೆ ಸೊಸುಂಕ್ ನಜೊ ತಸಲೆ!"
"ತುಂ ಆಸ್ಪತ್ರೆಂತ್ ತಾಕಾ ಸದಾಂ ಭೆಟೊಂಕ್ ವ್ಹೆತಾಲೊಯ್ ಮ್ಹಣಾಲೊಯ್. ದುಬ್ಳ್ಯಾ ಚಾಲಿಂತ್ ರಾಂವ್ಚ್ಯಾ ತುಕಾ ಗ್ರೇಸ್ತ್ ಕುಟ್ಮಾಚೊ ಕಿತೆಂ ಸಂಬಂಧ್ರೆ ಸಂಜೀವ್? ತುಂ ಕಿತೆಂ ತಾಚೊ ದಾಯ್ಜಿಯೆರೆ?"
"ತಶೆಂ ಕಾಂಯ್ ನಾ ಸರ್. ಹಾಂವ್ ಆನಿ ಮ್ಹಜಿ ಆವಯ್ ದೀಪಿಕಾಚ್ಯಾ ಕುಟ್ಮಾಕ್ ಸಭಾರ್ ವರ್ಸಾಂಥಾವ್ನ್ ವಳ್ಕಾತಾಂವ್. ಧಾ ವರ್ಸಾಂ ಆದಿಂ ಮಾಂಯ್ ತಾಂಗೆರ್ ಘರ್ಕಾಮಾಕ್ ರಾವ್ಲ್ಲಿ. ಆತಾಂಯ್ ತಾಂಗೆರ್ ಸಕಾಳಿಂ ಆನಿ ಸಾಂಜೆರ್ ಕಾಮಾಕ್ ವ್ಹೆತಾ. ಸುರ್ವೆರ್ ತಿ ಕಾಮಾಕ್ ಮ್ಹಾಕಾಯೀ ತಾಂಗೆರ್ ಆಪವ್ನ್ ವ್ಹರ್ತಾಲಿ. ತೆದಾಳಾ ದೀಪಿಕಾಕ್ ಆಟ್ ಯಾ ನೋವ್ ವರ್ಸಾಂ ಪ್ರಾಯ್ ಸರ್. ಚೊವ್ತೆಂ ಕ್ಲಾಸಿಂತ್ ಶಿಕ್ತಾಲೆಂ. ವ್ಹಡ್ಲಿಂ ಪಯ್ಶಾವಾಲಿಂ ತಿಂ. ನಾಂವಾಡ್ಧಿಕ್ ’ಬಿಲ್ಲಿಮೋರಿಯಾ’ ಕುಟಾಮ್. ಪುಣ್ ಪಯ್ಶಾನಿಂಚ್ ಸಂಸಾರಾಂತ್ಲೆ ಸಗ್ಳೆ ಕಷ್ಟ್ ಪರ್ಯಾರ್ ಕರುಂಕ್ ಜಾಲ್ಲೆ ಜಾಲ್ಯಾರ್ ತಾಚೆ ಪಾಯ್ ಗಡ್ಸುಂಕ್ ಜಾತೆ. ಗ್ರೇಸ್ತ್ ಮನ್ಶಾಂಕ್ ಪಿಡಾಯೀ ಆಸ್ತಿನಾ, ಮರಣ್ಯೀ ಆಸ್ತೆಂನಾ ಕೊಣ್ಣಾ."
ಆತಾಂ ಹಿ ಕಾಣಿ ಚಡ್ ಲಾಂಬ್ ಜಾಲಿ ಮ್ಹಣ್ ಭೊಗ್ಲೆಂ ಪ್ರದೀಪಾಕ್. ತಾಚೆಸಾಂಗಾತಾ ತಾಚೆಂ ಕುತೂಹಾಲ್ಯೀ ವ್ಹಾಡ್ಲೆಂ ಮ್ಹಣ್ಯೆತ್. "ತುಜೆಂ ’ರಾಮಾಯಣ’ ಆಯ್ಕಾತಾನಾ ವೇಳ್ ಗೆಳ್ಳೊಚ್ ಕಳ್ಳೊನಾ. ಮುಖ್ಯ ವಿಷಯ್ಚ್ ವಿಚಾರುಂಕ್ ವಿಸರ್ಲೊಂ. ತುಂ ದೋನ್ ದೀಸ್ ಥಾವ್ನ್ ಆಫಿಸಾಕ್ ಲೇಟ್ ಕಿತ್ಯಾಕ್ ಯೆತಾಯ್?"
"ತೆಂಚ್ ಹಾಂವೆಂ ವ್ಹಡೊಲ್ ಸಾಂಗ್ಲೆಂ ಸರ್. ತೀನ್ ದೀಸ್ ಥಾವ್ನ್ ಮಾಂಯ್ ತಾಪಾನ್ ನಿದ್ಲ್ಯಾ. ತಶೆಂ ಜಾಲ್ಲ್ಯಾನ್ ಮಾಂಯ್ಚ್ಯಾ ಜಾಗ್ಯಾರ್ ದೀಪುಗೆರ್ ಮ್ಹಾಕಾ ವ್ಹಚಾಜೆ ಪಡ್ಲೆಂ. ಸಕಾಳಿಂ ವೆಗ್ಗಿಂ ವ್ಹಚೊನ್ ಥಂಯ್ಚೆಂ ಕಾಮ್ ಕರ್ನ್ ಸಾಡೆ-ನೋವ್ ವೊರಾರ್ ಹಾಂವ್ ಆಫಿಸಾಕ್ ಪಾವ್ತಾಲೊಂ."
ಹೆಂ ಕಿತೆಂ! ಮ್ಹಜ್ಯಾ ಆವಯ್ಕ್ ತೀನ್ ದೀಸ್ ಥಾವ್ನ್ ತಾಪ್ ಯೆತಾ ಮ್ಹಣ್ ಹಾಂವೆಂ ಮ್ಹಜ್ಯಾ ಬೊಸಾಕ್ ನೀಬ್ ಸಾಂಗ್ಲೆಂ. ಹೊ ಆತಾಂ ಆಪ್ಲಿ ಆವಯ್ ತೀನ್ ದೀಸ್ ಥಾವ್ನ್ ತಾಪಾನ್ ನಿದ್ಲ್ಯಾ ಮ್ಹಣ್ಟಾ. ಹೊ ಸತ್ ಸಾಂಗ್ತಾಗಿ ಯಾ ಹಾಚೆ ಹೆರ್ ಕಿತೆಂಯ್ ಲಫ್ಡೆ ಆಸಾತ್? ’ಚೊರಾಕ್ ಧರುಂಕ್ ಚೋರ್ಚ್ ಬರೊ’ ಆಶಿ ಜಾಲಿ ಪ್ರದೀಪಾಚಿ ಮನೋಗತ್. ಹ್ಯಾಚ್ ಅಯಿನ್ನ್ ವೆಳಾರ್ ಚಿಂತಿನಾತ್ಲೆಬರಿ ಸಂಜೀವಾನ್ ಏಕ್ ಸವಾಲಾಚೊ ಫಾರ್ ಮಾರ್ಲೊ.
"ದೀಪಿಕಾಲಾಗಿಂ ತುಮಿ ಕಾಜಾರ್ ಜಾಂವ್ಕ್ ತಯಾರ್ ಆಸಾತ್ ಸರ್? ಆಶೆಂ ಎಕಾಚ್ಫಾರಾ ವಿಚಾರ್ಲೆಂ ಮ್ಹಣ್ ರಾಗಾರ್ ಜಾಯ್ನಾಕಾತ್. ತಾಚೊ ಸಂಸಾರ್ ಎಕಾಚ್ಫಾರಾ ಕೊಸಾಳ್ಳೊ. ತಾಚಿಂ ಸಪ್ಣಾಂ ಸಗ್ಳಿಂ ಚುರಾನ್ ಚೂರ್ ಜಾಲಿಂ. ಆತಾಂ ತೆಂ ಎಕಾ ಸಮ್ಚಣೆದಾರ್ ದಾದ್ಲ್ಯಾಕಡೆ ಲಗ್ನಾ-ಬಾಂಧಾಂತ್ ಎಕ್ವಟೊನ್ ಪಾಟ್ಲೆಂ ಸಗ್ಳೆಂ ವಿಸ್ರೊನ್ ಏಕ್ ಶಾಂತಿಭರಿತ್ ಜೀಣ್ ಸಾರುಂಕ್ ಆಶೆತಾ. ದೀಪಿಕಾ ಕಿತ್ಲೆಂ ಸೊಬಿತ್ಗಿ ತಿತ್ಲೆಂಚ್ ಗುಣಾಂನಿ ಆಂಜ್ಯಾಳ್.
ತಾಚೆಂ ಕುಟಾಮ್ ಮ್ಹಳ್ಯಾರ್ ಫಕತ್ ತಾಚಿ ಆವಯ್. ಹ್ಯಾ ತಾಲೆಂತ್ವಂತ್ ಧುವೆಚೆರ್ ತಿಣೆ ಆಪ್ಲೊ ಪುರ್ತೊ ಭರ್ವಸೊ ಮಾಂಡುನ್ ಹಾಡ್ಲ್ಲೊ. ತೆಂ ಭರ್ವಾಶ್ಯಾಚೆಂ ಕೊಟೆಂ ಆತಾಂ ವಾರ್ಯಾ-ಗೋಪುರ್ ಜಾಲೆಂ ಸರ್. ದುಡು ತಾಂಚೆಲಾಗಿಂ ಜಾಯ್ತೊ ಆಸಾ, ವ್ಹಡ್ಲೆಂ ಘರ್ ಆಸಾ, ಕಾರ್ ಆಸಾ. ತಾಂಕಾಂ ಜಾಯ್ ಆತಾಂ ಏಕ್ ಆದರ್ಶ್ವಾದಿ ತರ್ನಾಟೊ ಜೊ ಹ್ಯಾ ಕುಟ್ಮಾಕ್ ಉದ್ಧಾರ್ ಕರ್ಚೊ. ತುಮಿ ತಯಾರ್ ಆಸಾತ್ ಸರ್?"
ಪ್ರದೀಪಾಕ್ ರಾಗ್ ಮಸ್ತಕಾರ್ ಚಡ್ಲೊ. ’ಹೊ ಹಲ್ಕಟ್ ಪೆದೊ ಮ್ಹಾಕಾ ಪಾಯ್ ನಾತ್ಲ್ಲ್ಯಾ ಚಲಿಯೆಚಿ ಸಯ್ರಿಕ್ ಕರುಂಕ್ ಭಾಯ್ರ್ ಸರ್ಲಾ! ಕಿತೆಂ ಚಿಂತಾ ಹೊ? ’ಗಾಂವ್ವಾಲೊ’ ಮ್ಹಣ್ ಹಾಕಾ ಹಾವೆಂ ದಿಲ್ಲಿ ಸಳ್ಗಿ ಚಡ್ ಜಾಲಿ. ’ ಆಶೆಂ ತೊ ಚಿಂತಾನಾ ರಾಗ್ ಪ್ರದರ್ಶನ್ ಕರುಂಕ್ ಹೊ ಜಾಗೊ ಆನಿ ಹೊ ಸಂದರ್ಭ್ ಸಾರ್ಕೊ ನ್ಹಂಯ್ ಮ್ಹಣ್ಯೀ ತಾಕಾ ಭೊಗ್ಲೆಂ. ಕಷ್ಟಾಂನಿ ಆಪ್ಲೊ ರಾಗ್ ದಾಂಬುನ್ ಧರ್ನ್ ಆತುರಾಯೆನ್ ಆಪ್ಲ್ಯಾ ಜಾಪಿಕ್ ರಾಕೊನ್ ಆಸ್ಚ್ಯಾ ಸಂಜೀವಾಕ್ ಪಳೆವ್ನ್ ತೊ
"ಹೊ! ಹೊ! ಹೊ!" ಕರ್ನ್ ವ್ಹಡ್ಲ್ಯಾನ್ ಹಸ್ಲೊ.
’ತೆಂ ಪಾಯ್ ನಾತ್ಲ್ಲೆಂ ಥೊಂಟೆಂ ಚೆಡುಂ ಮ್ಹಾಕಾ ಗಾಂಟಾಂವ್ಕ್ ಪಳೆತಾಯ್ ಸಂಜೀವ್? ವ್ಹಾ! ವ್ಹಾ! ವ್ಹಾ! ಭಾರಿ ಹುಶಾರ್ ತುಂ! ಆನಿ ದುಸ್ರೊ ಕೊಣೀ ಮೆಳ್ಳೊನಾ ತುಕಾ?"
"ದೀಪುಕ್ ಹಾಂವ್ ಧಾ ವರ್ಸಾಂಥಾವ್ನ್ ವಳ್ಕಾತಾಂ ಸರ್. ಭಾಂಗಾರಾ ಸಾರ್ಕೆಂ ಚೆಡುಂ ತೆಂ. ಆನಿ ತಾಕಾ ಥೊಡ್ಯಾಚ್ ದಿಸಾಂನಿ ’ ಆರ್ಟಿಫಿಶಲ್’ ಪಾಯ್ ದವರ್ಚೆ ಆಸಾತ್. ಅತ್ಯಾಧುನಿಕ್ ತಕ್ನಿಕ್ ವಾಪರ್ನ್ ತಯಾರ್ ಕೆಲ್ಲೆ. ತೆ ಘಾಲ್ಯಾ ಉಪ್ರಾಂತ್ ದೀಪ್ ಧಾವೊಂಕ್ ಸೈತ್ ಸಕ್ತಲೆಂ ಮ್ಹಣ್ಟಾ ದಾಕ್ತೆರ್. ಪ್ಲೀಜ್ ಸರ್, ಹೆಂ ಏಕ್ ಮಹಾನ್ ಕಾರ್ಯೆಂ ಕರ್ನ್ ದೆವಾಚೆಂ ಬೆಸಾಂವ್ ಆನಿ ಆಮ್ಚೆ ಸಗ್ಳ್ಯಾಂಚಿ ಕೃತಜ್ನತಾ ಜೊಡ್ಯಾ ಸರ್."
"ಹ್ಯಾ ಥೊಂಟ್ಯಾ ಚೆಡ್ವಾಚಿ ಸಯ್ರಿಕ್ ಕರ್ಚ್ಯಾಂತ್ ಇತ್ಲಿ ಕಿತೆಂ ಉರ್ಭಾ ತುಕಾ?"
"ಕಿತೆಂ ಕರ್ಚೆಂ ಸರ್. ದೀಪುಚಿ ಆವಯ್ ಮ್ಹಜೆಲಾಗಿಂ ಸದಾಂ ಸಾಂಗೊನ್ ರಡ್ಟಾ. ’ಆಪುಣ್ ಜೀವಂತ್ ಆಸ್ತಾಂ ಪರ್ಯಾಂತ್ ತಾಕಾ ಸಾಂಬಾಳಿನ್. ಆಪುಣ್ ಫಾಲ್ಯಾಂ ಮೆಲಿಂ ಜಾಲ್ಯಾರ್?’ ತಿಚೆಂ ದೂಕ್ ಮ್ಹಜ್ಯಾನ್ ತಡ್ವುಂಕ್ ಜಾಯ್ನಾ ಸರ್."
"ಸಂಜೀವ್, ತುಂ ಆಸೊ ಮ್ಹಜ್ಯಾ ಪಾಟಿಕ್ ಲಾಗ್ಚ್ಯಾ ಬದ್ಲಾಕ್ ತುಂಚ್ ಕಿತ್ಯಾಕ್ ತಾಚೆಲಾಗಿಂ ಕಾಜಾರ್ ಜಾಯ್ನಾಂಯ್? ದೀಪಿಕಾ ಮಾತ್ರ್ ನ್ಹಂಯ್, ತಾಂಚಿ ಸಗ್ಳಿ ಆಸ್ತ್ ಬದಿಕ್ ತುಜಿ ಜಾತೆಲಿ." ಆಶೆಂ ತಾಣೆ ತೊಂಡಾನ್ ಸಾಂಗ್ಲೆಂ ಜಾಲ್ಯಾರೀ ತಾಚ್ಯಾ ಮನಾಂತ್ ನಾತ್ಲ್ಲೆಂ. ತೆಂ ಲಕ್ಪತಿ ಚೆಡುಂ, ಥೊಂಟೆಂ ಜಾಲ್ಯಾರೀ ಹ್ಯಾ ಬೆಂಕಾಚ್ಯಾ ಪೆದ್ಯಾಲಾಗಿಂ ಕಾಜಾರ್ ಜಾತಲೆಂ. ಛೆಕ್ಕ್. ಸಂಜೀವಾನ್ ಜಾಪ್ ದಿಲಿನಾ. ತೊ ಪ್ರದೀಪಾನ್ ಕೆಲ್ಲೊ ಏಕ್ ವಿನೋದ್ ಮ್ಹಳ್ಳೆಬರಿ ಹಾಸ್ಲೊ ಮಾತ್ರ್. ದೋಗೀ ಜೇವ್ನ್ ಉಟ್ಲೆ ಆನಿ ಆಫಿಸಾಕ್ ಆಯ್ಲೆ.
�
ಪ್ರದೀಪಾಚ್ಯಾ ಕಾಳ್ಜಾಂತ್ ಆನಿ ಮನಾಂತ್ ’ಬಂಗ್ಲ್ಯಾಂತ್ಲಿ ಚಲಿ’ ಭರೊನ್ ಗೆಲ್ಲಿ. ತಿ ಖಂಡಿತ್ ಆಪ್ಲ್ಯಾ ಮೊಗಾರ್ ಪಡ್ಲ್ಯಾ. ತಿಚೆಲಾಗಿಂ ಕಾಜಾರ್ ಜಾಲ್ಯಾರ್ ತಾಂಚೊ ಬಂಗ್ಲೊ, ಪಯ್ಶೆ ಮಾತ್ರ್ ನ್ಹಂಯ್, ತ್ಯಾ ’ಬಿವ್ಟಿ ಕ್ವೀನಾಚೊ ನೊವ್ರೊ’ ಮ್ಹಣ್ ಮ್ಹಾಕಾಯೀ ನಾಂವ್ ಮೆಳ್ಟೆಲೆಂ. ಹ್ಯಾ ಥೊಂಟ್ಯಾಕಡೆ ಕಾಜಾರ್ ಜಾಲ್ಯಾರ್ ಜೀಣ್ಭರ್ ಹಾಂವೆಂ ತಾಚಿಚ್ ಚಾಕ್ರಿ ಕರ್ನ್ ರಾವಾಜೆ ಪಡ್ಟಲೆಂ. ಬಂಗ್ಲ್ಯಾಂತ್ಲ್ಯಾ ಚಲಿಯೆ ವಿಷಾಂತ್ ಚಿಂತಾನಾ ತೊ ಸಂಪೂರ್ಣ್ ಬದಲ್ತಾಲೊ.
ಸದಾಂ ಹಾಂವ್ ಕಾರಾರ್ ಪಾಶಾರ್ ಜಾಂವ್ಚೆಂ ಪಳೆಂವ್ಕ್ ರಾಕೊನ್ ರಾವ್ತಾ. ಹಾಂವ್ ಸಿಗ್ನಲಾಕಡೆ ರಾವ್ತಾನಾ ಮ್ಹಾಕಾ ಪಳೆವ್ನ್ ಅಮೃಕೆಂ ಹಾಸ್ತಾ. ದುಸ್ರ್ಯಾಕೊಣಾಯ್ಕಿ ದೊಳೆ ಉಕ್ಲುನ್ ಪಳೆನಾ. ಆತಾಂ ಆನಿ ಹಾಂವೆಂ ವೊಗೆ ರಾಂವ್ಚೆಂ ಸಾರ್ಕೆಂ ನ್ಹಂಯ್. ಕೊಣೀ ಎಕ್ ಕೊರೊಡ್ಪತಿ ತಾಚ್ಯಾ ಅವಯ್ ಬಾಪಯ್ಕ್ ಭುಲೊವ್ನ್ ತಾಚೆರ್ ಝೊಂಪಯ್ ಮಾರುಂಕ್ ಆಸಾ. ತಶೆಂ ಜಾಂವ್ಚೆ ಪಯ್ಲೆಂ ಹಾಂವೆಂ ಏಕ್ಶನ್ ಕಾಣ್ಘೆಜಾಯಿಚ್.
ಗೆಲೆತ್ಯಾ ಎಕಾ ಮ್ಹಯ್ನ್ಯಾಥಾವ್ನ್ ರೋಶ್ನಿಕ್ ತೊ ಪುರ್ತೊ ವಿಸ್ರಾಲ್ಲೊ. ರೋಶ್ನಿನ್ಯೀ ಪ್ರದೀಪಾಚಿ ಆಶಾ ಸೊಡ್ಲ್ಲಿ ಜಾಯ್ಜೆ. ಆತಾಂ ತಾಚಿಂ ಫೊನಾಂ ಬಂದ್ ಜಾಲ್ಲಿಂ. ಫೊನಾಂ ಪುರ್ತಿಂ ಬಂದ್ ಜಾಂವ್ಕ್ನಾಂತ್. ನಿಮಾಣೆ ಏಕ್ ಬಾಕಿ ಆಸ್ಲ್ಲೆಂ. ಘರಾ ಪಾವೊನ್ ಚಾವಿಯೆನ್ ದಾರ್ ಉಗ್ತೆಂ ಕರುಂಕೀ ಫೊನಾಚೆಂ ಬೆಲ್ಲ್ ವ್ಹಾಜೊಂಕೀ ಸಮಾ ಜಾಲೆಂ.
"ಹಲ್ಲೊ. ಕೋಣ್ ಉಲಯ್ತಾ?" ಕೋಣ್ ಉಲಯ್ತಾ ಮ್ಹಳ್ಳೆಂ ಕಳೊನೀ ತಾಣೆಂ ತಶೆಂ ವಿಚಾರ್ಲೆಂ.
”ಮ್ಹಜ್ಯಾ ತಾಳ್ಯಾಚಿ ವಳಕ್ ಕಳ್ಳಿನಾ ಪ್ರದೀಪ್? ಪಂದ್ರಾ ವರ್ಸಾಂಥಾವ್ನ್ ವಳ್ಕಿಚೊ ಜಾಲ್ಲೊ ತಾಳೊ ಪುರ್ತೊ ವಿಸರ್ಲೊಯ್?"
"ರೊಂಗ್ ನಂಬರ್!" ಪ್ರದೀಪಾನ್ ಫೋನ್ ಸಕಯ್ಲ್ ದವರ್ಲೆಂ. ತಾಚಿ ತಕ್ಲಿ ಘುಂವೊಂಕ್ ಲಾಗ್ಲ್ಲಿ. ದೋನ್ ಮಿನುಟಾಂನಿ ಫೋನ್ ಪರ್ತ್ಯಾನ್ ವ್ಹಾಜೊಂಕ್ ಲಾಗ್ಲೆಂ. ಪ್ರದೀಪ್ ಮಂತ್ರಮುಗ್ದ್ ಜಾವ್ನ್ ಫೊನಾಕ್ ಪಳೆಂವ್ಕ್ ಪಡ್ಲೊ. ತೆಂ ಫೋನ್ ನ್ಹಂಯ್ ಜಿಡೆಂ ಸೊಡಯಿಲ್ಲೊ ಸೊರೊಪ್ ಜಶೆಂ ತಾಕಾ ದಿಸ್ಲೆಂ. ತೆಂ ಆಪ್ಡೊಂಕ್ ತಾಕಾ ಭ್ಯೆಂ ದಿಸ್ಲೆಂ. ಫೋನ್ ಅನಂತ್ಕಾಳಾ ಪರ್ಯಾಂತ್ ವ್ಹಾಜೊನ್ ಗೆಲೆಂ. ಆನಿ ಎಕಾಚ್ಫಾರಾ ರಾವ್ಲೆಂ. ಪ್ರದೀಪಾನ್ ಸಮಾಧಾನೆಚೊ ಉಸ್ವಾಸ್ ಸೊಡ್ಲೊ. ದೆವಾಕ್ ತಾಣೆ ಅರ್ಗಾಂ ದಿಲಿಂ. ಅರ್ಧ್ಯಾ ವೊರಾನ್ ಫೋನ್ ಪರ್ತೆಂ ವ್ಹಾಜೊಂಕ್ ಲಾಗ್ಲೆಂ. ಹೆಂ ಆತಾಂ ರೋಶ್ನಿಚೆಂ ಆಸ್ಚೆಂನಾ ಮ್ಹಣ್ ಚಿಂತುನ್ ಉಕಲ್ಲೆಂ. ಆವಯ್ಚೊ ತಾಳೊ.
"ಪುತಾ, ಬರೆಂ ಕರ್ನ್ ಆಯ್ಕ್. ಫಾಲ್ಯಾಂ ಆಯ್ತಾರ್. ಫಾಲ್ಯಾಂ ಆಮಿ, ಮ್ಹಳ್ಯಾರ್ ಹಾಂವ್ ಆನಿ ರೋಶ್ನಿ, ಉದ್ಯಾನ್ ಎಕ್ಸ್ಪ್ರೆಸ್ಸಾರ್ ಬೊಂಬಯ್ ಭಾಯ್ರ್ ಸರ್ತಾಂವ್. ಸೊಮಾರಾ ಸಕಾಳಿಂ ದಾದರ್ ಪಾವ್ತಾಂವ್. ಥಂಯ್ಥಾವ್ನ್ ಸೀದಾ ಅಂಧೆರಿ ಆಸ್ಚ್ಯಾ ತುಜ್ಯಾ ಆಫಿಸಾಕ್ ಯೇವ್ನ್ ತುಕಾ ಮೆಳ್ಟಾಂವ್. ದೆಕುನ್ ಆಮ್ಕಾಂ ಮುಖಾರ್ ಕಾಣ್ಘೆಂವ್ಕ್ ದಾದರ್ ಯೆಂವ್ಚಿ ಗರ್ಜ್ ನಾ."
ಇತ್ಲೆಂಚ್ ಮ್ಹಣೊನ್ ಫೋನ್ ಬಂದ್ ಜಾಲೆಂ. ಪ್ರದೀಪಾಚೆ ಹರ್ದ್ಯಾಂತ್ಲೆ ಧಡ್ಧಡೆ ಎಕಾಚ್ಪಾರಾ ರಾವ್ಲೆ ಯಾ ಚಡ್ ಜಾಲೆ ಸಾಂಗೊಂಕ್ ಕಷ್ಟ್. ಸುಮಾರ್ ಧಾ ಮಿನುಟಾಂಭರ್ ತೊ ಮೊಡ್ಯಾಬರಿ ಪಡೊನ್ ಆಸ್ಲೊ. ತಾಚಿ ಮತ್ ಪುರ್ತಿ ಖಾಲಿ ಜಾಲ್ಲಿ. ಕ್ರಮೇಣ್ ತೊ ಜಿವಾಳ್ ಜಾವ್ನ್ ಆಯ್ಲೊ. ಸೊಮಾರಾ ದೀಸ್ ಆವಯ್ಕ್ ಆನಿ ರೋಶ್ನಿಕ್ ಕಶೆಂ ಫುಡ್ ಕರ್ಚೆಂ? ತಿಂ ಸಗ್ಳಿ ತಯಾರಿ ಕರ್ನ್ ಯೆತೆಲಿಂ.
ಭುಕೆಲ್ಲ್ಯಾ ಶಿಂವಾಮುಖಾರ್ ಥರ್ಥರ್ಚೆಂ ಚಿತಾಳ್ ಹಾಂವ್ ಜಾತಾಲೊಂ. ಏಕ್ಚ್ ವಾಟ್ ಆಸಾ ಆನಿ ತಿ ಪಾಟಿಂ ಘಾಲುಂಕ್ ಜಾಯ್ನಾ. ವೇಳ್ ಕರಿನಾಸ್ತಾಂ ಬಂಗ್ಲ್ಯಾಂತ್ಲ್ಯಾ ಚಲಿಯೆಕ್ ಆನಿ ತಾಚ್ಯಾ ಕುಟ್ಮಾಕ್ ವ್ಹಚೊನ್ ಮೆಳ್ಟಾಂ ಆನಿ ಮ್ಹಜ್ಯಾ ಮತಿಂತ್ಲೆಂ ಕಳಯ್ತಾಂ. ತೆಂ ಖಂಡಿತ್ ಜಾಯ್ತ್ ಮ್ಹಣ್ಟೆಲೆಂ. ರೋಶ್ನಿ ಯೆಂವ್ಚೆ ಪಯ್ಲೆಂ ಹೆಂ ಫೊಂತಾಕ್ ಪಾಯ್ಲೆಂ ಜಾಲ್ಯಾರ್ ತಾಚೆಲಾಗಿಂ ಝುಜೊಂಕ್ ಮ್ಹಾಕಾ ಏಕ್ ಲ್ಹಾನ್ ಹಾತೆರ್ ತರಿ ಮೆಳಾತ್.
ಆತಾಂ ತಾಚ್ಯಾ ಆಂಗಾಂತ್ ಇಲ್ಲೊ ಜೀವ್ ಭರ್ಲೊ. ಕಳಾವ್ ಕರಿನಾಸ್ತಾಂ ಕಾರಾರ್ ಬಸೊನ್ ಬಂಗ್ಲ್ಯಾ ತೆವ್ಶಿನ್ ಕಾರ್ ಘುಂವ್ಡಾಯ್ಲೆಂ. ಬಂಗ್ಲ್ಯಾ ಮುಖಾರ್ ಪಾವ್ತಾನಾ ಗೊಮ್ಟಿ ಲಾಂಬ್ ಕಾಡ್ನ್ ಬೊಲ್ಕಾಂವಾಂತ್ ದೀಷ್ಟ್ ಘಾಲಿ. ಕೊಣ್ಯೀ ದಿಸ್ಲೆಂನಾ. ದಾರಾಂ ಜನೆಲಾಂ ಸಗ್ಳಿಂ ಬಂದ್ ದಿಸ್ಲಿಂ. ಖಂಯ್ ತರಿ ಭೊಂವೊಂಕ್ ಗೆಲ್ಯಾಂತ್, ಯೆತೆಲಿಂ. ತೆದೊಳ್ ಪರ್ಯಾಂತ್ ಲಾಗ್ಶಿಲ್ಯಾ ಪಾರ್ಕಾಕ್ ವ್ಹಚೊನ್ ವೇಳ್ ಪಾಶಾರ್ ಕರ್ಚೊ.
ಹ್ಯಾ ಅಪಾಯಾಂತ್ಲೆಂ ಸುಟೊಂಕ್ ವಾಟ್ ಸೊಧ್ಚಿ, ಆಶೆಂ ಚಿಂತುನ್ ತಾಣೆ ಕಾರ್ ಪಾರ್ಕಾಕುಶಿನ್ ಘುಂವ್ಡಾಯ್ಲೆಂ. ಪಾರ್ಕಾಲಾಗಿಂ ಪಾವೊನ್ ತಾಣೆ ಕಾರ್ ಪಾರ್ಕ್ ಕೆಲೆಂ ಆನಿ ಪಾರ್ಕಾಭಿತರ್ ವ್ಹಚೊನ್ ವೇಳ್ ಪಾಶಾರ್ ಕರ್ಚ್ಯಾಖಾತಿರ್ ಭಂವ್ಡಿ ಮಾರುಂಕ್ ಸುರು ಕೆಲಿ. ವೊರಾಂ ಚಾರ್ ಜಾಲ್ಲಿಂ ಮಾತ್ರ್. ಪಾರ್ಕಾಂತ್ ಭಂವ್ಡಿ ಮಾರ್ಚೆ ಚಡ್ ನಾತ್ಲ್ಲೆ. ಥೊಡಿಂ ತರ್ನಾಟಿಂ ಜೊಡಿಂ ಥಂಯ್ ಹಾಂಗಾ ಕೊನ್ಶಾಂನಿ ಬಸೊನ್ ಎಕಾಮೆಕಾಥಂಯ್ ತಲ್ಲೀನ್ ಜಾಲ್ಲಿಂ. ಮುಖ್ಲ್ಯಾನ್ ಚಿಕ್ಕೆ ಪಯ್ಸ್ ಎಕ್ಲೊ ತರ್ನಾಟೊ ಏಕ್ ವ್ಹೀಲ್ಚೆಯರ್ ಲೊಟುನ್ ವ್ಹರ್ತಾಲೊ. ತೊ ಪಾಟ್ ಕರ್ನ್ ಆಸ್ಲ್ಲೊ ಜಾಲ್ಲ್ಯಾನ್ ಪಯ್ಸ್ ಥಾವ್ನ್ ಪ್ರದೀಪಾಕ್ ತಾಚಿ ವಳಕ್ ಮೆಳ್ಳಿನಾ. ವ್ಹೀಲ್ ಚೆಯರಾಂತ್ ಏಕ್ ತರ್ನಾಟಿ ಬಾಯ್ಲ್ ಬಸ್ಲ್ಲಿ.
ತಾಣೆ ಆಂದಾಜ್ ಕೆಲಿ - ಸಂಜೀವ್ ಆನಿ ದೀಪಿಕಾ!
"ಸಂಜೀವ್!"
ಪಾಟ್ಲ್ಯಾನ್ ವೇಗಾನ್ ಯೆಂವ್ಚ್ಯಾ ಪ್ರದೀಪಾಚೊ ತಾಳೊ ಆಯ್ಕೊನ್ ಸಂಜೀವಾನ್ ಎಕಾಚ್ಫಾರಾ ತಕ್ಲಿ ಘುಂವ್ಡಾಯ್ಲಿ. ತಾಕಾ ಅಜ್ಯಾಪ್ ಜಾಲೆಂ.
"ಸರ್, ತುಮಿ ಹಾಂಗಾ! ಪುಣ್ ತುಮಿ ಹಾಂಗಾ ಮೆಳ್ಲ್ಲೆಂ ಬರೆಂಚ್ ಜಾಲೆಂ. ಹಾಂವೆಂ ತುಮ್ಕಾಂ ಸಾಂಗ್ಲ್ಲೆಂ ದೀಪು ಹೆಂಚ್. ಆಮ್ಕಾಂ ’ಕೊಂಗ್ರಾಚುಲೇಶನ್’ ಕರಾ ಸರ್. ದೀಪು ಆನಿ ಹಾಂವ್ ಫಾಲ್ಯಾಂ ’ಕೋರ್ಟ್ ಮ್ಯಾರೆಜ್’ ಕರ್ತಾಂವ್." ಹೆಂ ಸೂಚನ್ ಆಪ್ಣೆಂಚ್ ದಿಲ್ಲೆಂ. ಪುಣ್ ಸಂಜೀವಾಲಾಗಿಂ ದೀಪಿಕಾ ಕಾಜಾರ್ ಜಾಯ್ತ್ ಮ್ಹಣ್ ಮಾತ್ರ್ ತಾಣೆ ಸಪ್ಣಾಂತ್ಯೀ ಚಿಂತುಂಕ್ ನಾ.
"ಕೊಂಗ್ರಾಚುಲೇಶನ್ಸ್ ಸಂಜೀವ್ ಆನಿ ದೀಪಿಕಾ! ದೇವ್ ತುಮ್ಚೆರ್ ಧಾರಾಳ್ ಆಶಿರ್ವಾದಾಂ ಘಾಲುಂದಿ."
ಆಪ್ಲಿ ಸ್ಥಿತಿ ಚಿಂತುನ್ ತಾಚೊ ತಾಳೊ ಆಂರ್ದಾಲೊ. ಎದೊಳ್ ಪರ್ಯಾಂತ್ ವ್ಹೀಲ್ಚೇರಾರ್ ಬಸೊನ್ ಪಾಟ್ ಕರ್ನ್ ಆಸ್ಲ್ಲ್ಯಾ ದೀಪಿಕಾನ್ ಆತಾಂ ಸವ್ಕಾಸ್ ತಕ್ಲಿ ಪಾಟಿಂ ಘುಂವ್ಡಾಯ್ಲಿ. ತಾಚ್ಯಾ ಸೊಭಿತ್ ತೊಂಡಾರ್ ಸ್ವಾದಿಕ್ ಅಮೃಕ್ಯೊ ಹಾಸೊ ಪರ್ಜಳ್ಟಾಲ್ಯೊ. ತಾಚೆ ಲಾಂಬ್ ತೆಲ್ತೆ ಕೆಸ್ ತಾಚೆ ಕಾನ್ ಲಿಪವ್ನ್, ಗಾಲಾಂ ವಯ್ಲ್ಯಾನ್ ವ್ಹಾಳೊನ್, ಹರ್ಧ್ಯಾರ್ ಖೆಳೊನ್ ಪೆಂಕ್ಟಾ ಪರ್ಯಾಂತ್ ಲಾಂಬ್ಲ್ಲೆ. ತಾಚೆ ಮೊವಾಳ್ ಗೊರೆ ಹಾತ್ ಉಸ್ಕ್ಯಾರ್ ವಿಶೆವ್ ಘೆತಾಲೆ. ಪ್ರದೀಪ್ ತೊಂಡ್ ಉಗ್ತೆಂ ಧರ್ನ್ ಪಳೆಂವ್ಕ್ಚ್ ಪಡ್ಲೊ. ವಿಜ್ಮಿತ್ಕಾಯ್ ಶಿವಾಯ್ ತಾಚ್ಯಾ ತೊಂಡಾರ್ ಹೆರ್ ಕಸಲೊಯ್ ಛಾರೊ ಝಳ್ಕಾಲೊನಾ.
"ಮೀಟ್ ಮೈ ಫ್ಯೂಚರ್ ವೈಫ್ ದೀಪಿಕಾ"
ಮ್ಹಣೊನ್ ಸಂಜೀವಾನ್ ಹಾಸೊನ್ ಸಾಂಗ್ತಾನಾಂಯ್ ತಾಚ್ಯಾ ತೊಂಡಾಂತ್ಲ್ಯಾನ್ ಉತ್ರಾಂ ಆಯ್ಲಿಂನಾಂತ್. ’ತುಮಿ ಸದಾಂ ತಾಚೆ ಮುಖ್ಲ್ಯಾನ್ ಪಾಶಾರ್ ಜಾತಾನಾ ತುಮ್ಕಾಂ ಪಳೆವ್ನ್ ತೆಂ ಅಮೃಕೆಂ ಹಾಸ್ತಾಲೆಂ ಜಾಣಾಂತ್? ತುಮ್ಚ್ಯಾ ಕಾರಾಚೊ ನಂಬರ್ ಆನಿ ರಂಗ್ ಹಾಂವೆಂಚ್ ತಾಕಾ ಸಾಂಗೊನ್ ಆಮ್ಕ್ಯಾ ವೆಳಾರ್ ತೊ ತುಜ್ಯಾ ಘರಾ ಮುಖ್ಲ್ಯಾನ್ ಪಾಶಾರ್ ಜಾತೊಲೊ ಮ್ಹಣ್ಯೀ ಸಾಂಗ್ಲ್ಲೆಂ.
ಹಾಂವೆಂ ಕಾಂಯ್ ಚೂಕ್ ಕರುಂಕ್ ನಾಮೂ ಸರ್?" ಪ್ರದೀಪಾನ್ ಉಲಂವ್ಕ್ ಪ್ರಯತನ್ ಕೆಲೆಂ. ಪುಣ್ ಉತ್ರಾಂ ಸುಟ್ಲಿಂನಾಂತ್.
ತಿಚ್ ಜಾವ್ನಾಸ್ಲ್ಲಿ ’ಬಂಗ್ಲ್ಯಾಂತ್ಲಿ ಚಲಿ!’
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
