ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾಝರ್ - 34. ಎಕಾ ಬೊಕ್ಲಾಚಿ ಕಾಣಿ
ರೆಗಾಮ್ ತಾಕೊಡೆ: ಕೊಂಕ್ಣೆಂತ್ ಸಾಹಿತಿ ಆನಿ ಭಾಸೆಚೆ ಗಿನ್ಯಾನಿ ಆಸ್ಚೆ ಭೋವ್ ಥೊಡೆ, ತಾಂತ್ಲೊ ಎಕ್ಲೊ ಮಾ|ಬಾ|ರಿಚಾರ್ಡ್ ರೆಗೊ. ಪ್ರಸ್ತುತ್ ಸಾಂ|ಲುವಿಸ್ ಕೊಲೆಜಿಂತ್ ಪ್ರಾಧ್ಯಾಪಕ್ ಜಾವ್ನ್ ವಾವ್ರ್ ಕರ್ನ್ ಆಸ್ಚೊ ಹೊ ಏಕ್ ಪ್ರಭುದ್ದ್ ವಿಮರ್ಶಕ್, ಚಿಂತ್ಪಿ ತಶೆಂಚ್ ಅಪುರ್ಭಾಯೆಚೊ ಕಾಣ್ಯೆಗಾರ್. ಹಾಚ್ಯಾ ಕಾಣ್ಯಾಂನಿ ಆಸ್ಚಿ ಭಾಸ್ ಸಾದಿ ಆನಿ ಸಾಮಾಜಿಕ್ ಸಂಗ್ತ್ಯಾಂಕ್ ಅಪ್ಲ್ಯಾ ಕಾಣ್ಯಾಂನಿ ಗುಂತುನ್ ಕಾಣಿ ಬರಂವ್ಚಿ ಹಾಚಿ ತಾಂಕ್ ಕಿತ್ಲಿ ಮ್ಹಳ್ಳೆಂ ಹಿ ಕಾಣಿ ವಾಚ್ತಾಂ ತುಮ್ಕಾಂ ಗೊಮ್ತೆಲೆಂ.
ರೆಗಾಮ್ ತಾಕೊಡೆ
"ಮ್ಯಾಂ...ವ್" ಬೊಕುಲ್ ಮಾಳ್ಯಾರ್ ಥಾವ್ನ್ ಜೆವ್ಣಾಚ್ಯಾ ಮೆಜಾರ್ ’ದಾಡ್ಡ್...’ ಕರ್ನ್ ಉಡ್ಲೊ. ಘಟ್ಟ್ ಖಾವ್ನ್ ಮೊಟೊ ಜಾಲ್ಲೊ ಜಡ್ ಬೊಕುಲ್ ಫೊರ್ಸಾನ್ ಮೆಜಾರ್ ಉಡ್ಲೆಲ್ಯಾ ಮಾರಾಕ್, ಮೇಜ್ ಹಾಲ್ಲೆಂ ಆನಿ ಮೆಜಾಚೆರ್ ದವರ್ಲೆಲೊ ಚ್ಯಾಯೆಚೊ ತಾಂಬ್ಲೆರ್ ಆಡ್ ಪಡ್ಲೊ, ಆನಿ ಕಾಪಿ ಮೆಜಾಚೆರ್ ಉಸಳ್ಳಿ; ಕುಡಾಂತ್ ಸಗ್ಳಿ ಖಾತಡ್!
"ಯೇ ಬೊಕ್ಲಾ..., ತುಕಾ ವಾಗ್ ವ್ಹರುಂಕ್..." ಸಿರ್ಲಾ ದಾಟ್ಟು ಎಕಾ ಥರಾಚ್ಯೆ ಮಜೆನ್ ಉದ್ಗಾರ್ಲೊ. ತಾಕಾ ಆಮ್ಚೊ ಬೊಕುಲ್ ಮ್ಹಳ್ಯಾರ್ ಜೀವ್; ತಾಚೊ ಮಸ್ತು ಮೋಗ್ ಕರ್ತಾ, ತೊ.
"ಕಿತೆಂ! ಆತಾಂ ತಾಕಾ ವಾಗ್ ವ್ಹರುಂ ಮ್ಹಣ್ತಾಯ್! ಸಗ್ಳೊ ದೀಸ್ ತಾಚೊ ಕೊಂಡಾಟೊ ಕರ್ ಆನಿ ಆತಾಂ ಶಿರಾಪ್ ಘಾಲ್. ತುಮ್ಕಾಂ ಕಾಮ್ ನಾತ್ಲ್ಲ್ಯಾಂಕ್, ಹೆಂ ಕಿತೆಂ ಕೆಲ್ಯಾರ್ಯೀ ಚಲ್ತಾ. ಕಿತ್ಲೆ ಪಾವ್ಟಿಂ ಸಾಂಗ್ಲೆಂ, ತ್ಯಾ ಬೊಕ್ಲಾಚ್ಯೊ ಪಿಚ್ಚ್ಯೊ ಕಾಡ್, ನ್ಹಯ್ ತರ್ ತಾಕಾ ತ್ಯಾ ವ್ಹಾಳಾಕ್ ಮುಣೀ ವ್ಹರ್ನ್ ಘಾಲ್ ಮ್ಹಣ್! ಮ್ಹಾಕಾ ಕೋಣ್ ಕೇರ್ ಕರ್ತಾ? ಆವಯ್ ಮ್ಹಳ್ಯಾರ್ ಕೊಯ್ರಾ ಪಾಸ್ಟ್ ಜಾಲ್ಯಾ, ಆಮ್ಗೆರ್," ಮಾಂಯ್ ರಾಗಾನ್ ಆನಿ ದುಕಾನ್ ಪುರ್ಪುರ್ಲಿ.
ವ್ಹಯ್, ಆರಾಯಿಲ್ಲೆಂತ್ ಆರಾವ್ನ್, ನೆರಾಯಿಲ್ಲೆಂತ್ ನೆರವ್ನ್, ಮಾಂಯ್ಕ್ಯೀ ಪುರೊ ಜಾಲಾಂ’ಸ್ತೆಲೆಂ. ಕಿತ್ಲೆಂ ಸಾಂಗ್ತೆಲಿ? ತಿಣೆಂ ಸಾಂಗ್ಲ್ಲೆಂ ಆಯ್ಕೊನ್ ಘರಾ ಪಾಟ್ಲೊ ಫಾತರ್ ತರ್ಯೀ ಉದಕ್ ಜಾತೊ, ಪುಣ್ ಮ್ಹಜೊ ದಾಟ್ಟು ಆಯ್ಕೊಂವ್ಚೊ ಮನಿಸ್ ನ್ಹಯ್.
*** *** *** *** ***
ಆಮ್ಚೆಂ ಏಕ್ ಧಾಕ್ಟೆಂ ಕುಟಮ್. ’ಚೊಕ್ಕ ಕುಟುಂಬ’ ನ್ಹಂಯ್ ತರ್ಯೀ ’ಚಿಕ್ಕ ಕುಟುಂಬ’, ಖಂಡಿತ್. ಬಾಬ್ ಜೊಡಿಕ್ ಲಾಗೊನ್ ಚಿಕ್ಮಂಗ್ಳುರ್ ಬೊಟ್ಲೆರಾಚೆಂ ಕಾಮ್ ಕರ್ತಾ; ತೀನ್-ಚ್ಯಾರ್ ಮಹಿನ್ಯಾಂಕ್ ಏ’ಪ್ಟಿಂ ಘರಾ ಯೆತಾ. ಘರಾ ಆಮ್ಚೆಂತ್ ರಾಜ್: ಮ್ಹಜಿ ಮಾಂಯ್ ಎಸ್ತುಬಾಯ್ (ತಶೆಂ ಲೋಕ್ ತಿಕಾ ಆಪಯ್ತಾ), ಭಾವ್ ಸಿರ್ಲಾ ದಾಟ್ಟು ಆನಿ ಹಾಂವ್ ಆಲ್ಬೆಟ್. ಸಿರ್ಲಾ ದಾಟ್ಟು ಮ್ಹಜ್ಯಾಕ್ಯೀ ಸುಮಾರ್ ವರ್ಸಾಂಕ್ -ಉಣ್ಯಾರ್ ಚ್ಯಾರ್-ಪಾಂಚ್ ವರ್ಸಾಂಕ್ ತರ್ಯೀ- ವ್ಹಡ್ ಜಾಲ್ಲ್ಯಾನ್ ಹಾಂವೆ ತಾಕಾ ’ದಾಟ್ಟು’ ಮ್ಹಣ್ ಆಪಂವ್ಚೆಂ. ಗಾಂವ್ಚೊ ಲೋಕ್ ತಾಕಾ -ಆಯ್ಲೆವಾರ್- ಪೋಲಿ ಸಿರ್ಲಾ ಮ್ಹಣ್ ಆಪಯ್ತಾ. ತೆಂ ಪೂರಾ ಕಾಲೆಂ - ಕಿತೆಂ ಮ್ಹಣ್ ಕೊಣಾ’ಡೆ ವಿಚಾರ್ಚೆಂ? ವಿಚಾರ್ಲ್ಯಾರ್ಯೀ ತೆ ಹಾಸ್ತಾತ್.
ಹಾಂವ್ -ಆಲ್ಬೆಟ್- ಆತಾಂ ಆಟ್ವೆಂತ್ ಶಿಕ್ತಾಂ; ತಾಕೊಡೆ ಆದರ್ಶ್ ಹಾಯ್ಸ್ಕುಲಾಂತ್. ಸಿರ್ಲಾ ದಾಟ್ಟುಯ್ ಪಯ್ಲೆಂ ಶಿಕ್ತಾಲೊ. ಎಲಿಮೆಂಟ್ರಿಂತ್ ಶಿಕ್ತಾನಾ ತೊ ಮಸ್ತು ಹುಶ್ಯಾರ್ ಆಸ್ಲ್ಲೊ ಖಂಯ್; ಕ್ಲಾಶಿಂತ್ ಕೆದಾಳಾಯ್ ಫಸ್ಟ್ ಯೆತಾಲೊ ಖಂಯ್; ತೊ ಮ್ಹಳ್ಯಾರ್ ಐದನೆ ಮದರಿಕ್ ಜೀವ್; ಪಯ್ಲೆಂ, ತೊ ತಿಚ್ಯೆ ದೊತೊರ್ನೆಚ್ಯೆ ಕ್ಲಾಶಿಂತ್ ಆಸ್ಲ್ಲೊ; ಮಸ್ತ್ ಹುಶ್ಯಾರ್ ಮ್ಹಣ್ ದಿಸ್ತಾ; ದೆಕುನ್ ತೊ ತಿಕಾ ಮೊಗಾಚೊ. ತಿ ತಾಕಾ ತವಳ್ ತವಳ್ ಸನ್ನಾಂ, ಕೆಳಿಂ, ಘರೆ ಇತ್ಯಾದಿ ಲಿಪೊನ್ ಲಿಪೊನ್ ಆಣ್ಣ್ ದಿತಾಲಿ ಖಂಯ್. ತೊ ಮಾತ್ ವ್ಹಡ್ಲೊ ಕುಂಯ್ಕಾ: ದಿಲ್ಲೆಂ ಪೂರಾ ’ಗುಳುಮ್’ ಕರ್ನ್, ಘರಾ ಯೇವ್ನ್ ಮ್ಹಾಕಾ ಗೆಜೆಟ್ ವಾಚ್ತಾಲೊ, ಪುಣ್ ಮ್ಹಾಕಾ ಮ್ಹಣ್ ಕಾಂಯ್ಚ್ ಆಣ್ನಾತ್ಲ್ಲೊ.
ಮಾಗಿರ್ ತೊ ವ್ಹಡ್ಲ್ಯೆ ಕ್ಲಾಶಿಂಕ್ ಗೆಲ್ಯಾ ಉಪ್ರಾಂತ್ಯೀ, ಐದನೆ ಮದರಿಚೊ ಮೋಗ್ ಕಾಂಯ್ ಉಣೊ ಜಾಂವ್ಕ್ ನಾತ್ಲ್ಲೊ, ಬದ್ಲಾಕ್ ತಿಚ್ಯಾ ಮಾರಿಫಾತ್, ಸಿರ್ಲಾ ದಾಟ್ಟುಕ್ ಆರನೇ ಆನಿ ಏಳನೇ ಸಿಸ್ಟರಿಂನಿ ಪೊಸ್ಕ್ಯಾಂ ಪರಿಂ ಕರ್ನ್ ಘೆತ್ಲ್ಲೊ ಮ್ಹಣ್ ದಿಸ್ತಾ. ತಿಂ ತಾಚೊ ಚಡ್ ಆನಿ ಚಡ್ ಕೊಂಡಾಟೊ ಕರ್ತಾಲಿಂ. ಶಿಕ್ಪಾಂತ್ ಹುಶ್ಯಾರ್; ತಶೆಂಚ್ ದೊತೊರ್ನೆಂತ್ಯೀ ಮುಕಾರ್. ತಾಣೆ ಏಕ್ ಬರೊ ಪಾದ್ರ್ಯಾಬ್ ಜಾಯ್ಜೆ ಮ್ಹಣ್ ಸಿಸ್ಟರಾಂ ತಾಕಾ ಕೆದಾಳಾಯ್ ಸಾಂಗ್ತಾಲಿಂ. ತಿತ್ಲೆಂ ಮಾತ್ ನ್ಹಯ್, ಮಾಂಯ್ ಇಗರ್ಜೆಕ್ ಗೆಲ್ಲ್ಯಾ ವೆಳಾರ್ ಸಿಸ್ಟರಾಂ ಮಾಂಯ್ಕ್ ಮೆಳ್ತಾಲಿಂ ಆನಿ ಮ್ಹಣ್ತಾಲಿಂಕೀ, ’ತುಜೊ ಪೂತ್ ಬರೊ ಪಾದ್ರಿ ಜಾತಲೊ; ತುಜ್ಯಾ ಪುತಾಕ್ ಆಲ್ತಾರಿಚೊ ಮಾನ್ ಫಾವೊ ಜಾತಲೊ, ತುಕಾ ತಾಚ್ಯಾಕ್ಯೀ ವರ್ತೆಂ ಭಾಗ್ ಕಿತೆಂ ಜಾಯ್?’ ಮಾಂಯ್ಕ್ ಮಸ್ತು ಖುಶಿ ಜಾತಾಲಿ. ತಿ ಘರಾ ಯೇವ್ನ್ ಮ್ಹಾಕಾಯ್ ತೆಂ ಸಾಂಗ್ತಾಲಿ.
ತೆದಾಳಾ, ಮಾಂಯ್ಕ್ಯೀ ಸಿರ್ಲಾ ದಾಟ್ಟು ಮ್ಹಳ್ಯಾರ್ ಜಾಲೆಂ! ಕೆದಾಳಾರೀ ತಿ ಮ್ಹಾಕಾ ಆನಿ ತಾಕಾ ಸರಿ ಕರ್ನ್ ಉಲಯ್ತಾಲಿ: ’ಪಳೆ, ತುಜೊ ದಾಟ್ಟು ಕಶೆಂ ಶಿಕ್ತಾ! ಕ್ಲಾಶಿಂತ್ ಕೆದಾಳಾಯ್ ತೊ ಫಸ್ಟ್! ಇಗರ್ಜೆಂತ್ ಅಲ್ತಾರ್ ಭುರ್ಗೊ ಜಾವ್ನ್ ಕಶೆಂ ಕಾಮ್ ಕರ್ತಾ ಪಳೆಲಾಂಯ್ಮೂ? ತುಂ ಕಿತೆಂ ಕರ್ತಾಯ್ - ಪಾಸ್ ಮಾತ್ ಜಾತಾಯ್ - ಏಕ್ ಗ್ರೇಡ್ಯೀ ತುಕಾ ಮೆಳಾನಾ’ ಮ್ಹಣ್ ಮ್ಹಾಕಾ ಚಿಡಾಂವ್ಚೆಂ ಆಸ್ಲೆಂ, ಮ್ಹಜ್ಯೆ ಮಾಂಯ್ನ್.
ತ್ಯಾ ವಿಶಿಂ ಹಾಂವ್ ಕಿತೆಂ ಮ್ಹಣುಂ? ಹಾಂವ್ ದಾಟ್ಟು ತಿತ್ಲೊಂ ಹುಶ್ಯಾರ್ ನ್ಹಯ್; ದಾಟ್ಟುಕ್ ಬರೀ ತಕ್ಲಿ ಆಸ್ಲಿ. ಹಾಂವೆ ಕ್ಲಾಶಿಂತ್ ಫಸ್ಟ್ ಯೇಂವ್ಕ್, ಮ್ಹಾಕಾ ತಿಂ ಚೆಡ್ವಾಂ ಸೊಡಿನಾತ್ಲ್ಲಿಂ - ತೆಂ ಲಿಲ್ಲಿ, ಐಡಾ, ಮೊಂತಿ, ಟ್ರೀಜಾ, ಮೇಬಲ್,... ಧಾ-ಬಾರಾ ಚೆಡ್ವಾಂ; ಆನಿ ತಿಂ ಚೆಡ್ವಾಂ ಪಾವಾನಾಂತ್ ಮ್ಹಳ್ಳ್ಯಾಕ್ ಸಾತಾ’ಟ್ ಜಣ್ ಚೆಡೆ! ಹಾಂವ್ ಸುಮಾರ್ ಅರ್ದ್ಯೆ ವಾಟೆರ್ ಪಾಟಿಂ!
ಸಿರ್ಲಾ ದಾಟ್ಟು ಸಾತ್ವೆಂತ್ ಆಸ್ತಾನಾ, ತಾಚೆರ್ ಥೊಡಿಂ ಕಂಪ್ಲೆಂಟಾಂ ಯೇಂವ್ಕ್ ಸುರು ಜಾಲಿಂ. ತೊ, ಮುಕ್ಲ್ಯಾ ಬಾಂಕಾಚೆರ್ ಬಸ್ಲ್ಲ್ಯಾ ಚೆಡ್ವಾಂಚ್ಯೊ ಪಾಂತ್ಯೊ ವೊಡ್ತಾಲೊ ಖಂಯ್! ಹೆಕ್...! ಮ್ಹಾಕಾ ಹಾಸೊ ತಡ್ವಲ್ಯೊ ನಾಂತ್! ಚೆಡ್ವಾಂಚ್ಯೊ ಪಾಂತ್ಯೊ!? ತೆಂಯ್, ಸಿರ್ಲಾ ದಾಟ್ಟುನ್ ವೊಡ್ಚ್ಯೊ? ಶ್ಯೀ... ಎಕೆಣೆ ಮ್ಹಜ್ಯಾನ್ ಪಾತ್ಯೆಂವ್ಕ್ ಜಾಯ್ನಾ; ಆನ್ಯೇಕೆ’ಣೆ ಮ್ಹಾಕಾ ಹಾಸೊಂಕ್ ಯೆತಾ.
ತಾಕಾ ಕಾರಣ್ಯೀ ಆಸಾ: ಚೆಡೆ ಆನಿ ಚೆಡ್ವಾಂನಿಂ ಕಶೆಂ ಉಲಂವ್ಚೆಂ? ಚೆಡ್ವಾಂ ದುಸ್ರಿಂಚ್ ನ್ಹಯ್ಗೀ? ತಾಂಚ್ಯೆಕಡೆ ಉಲಂವ್ಚೆಂ ಸೊಡ್, ತಾಂಚ್ಯೊ ಪಾಂತ್ಯೊ ಆಪ್ಡುಂಕ್ ಸಯ್ತ್ ಕಶೆಂ ಮನ್ ಯೆತಾಗೀ? ಶ್ಯೀ... ತೆಂಯ್, ಪಾದ್ರ್ಯಾಬ್ ಜಾಂವ್ಚೆ ತಸಲ್ಯಾ ಮನ್ಶ್ಯಾನ್ - ಸಿರ್ಲಾ ದಾಟ್ಟುನ್!
ಹಾಂವ್ ಆಜೂನ್ ಚೆಡ್ವಾಂಲಾಗಿಂ ಉಲಯ್ತ್ ನಾ; ತಾಂಕಾಂ ಪಳಂವ್ಕ್ ಸಯ್ತ್ ಪಳಯ್ನಾ. ತಾಂಕಾಂ ಪಳಯ್ತಾನಾ ಮ್ಹಕಾ ಏಕ್ ಥರ್ ಜಾತಾ, ಕುಚುಲ್ಯೊ ಕೆಲ್ಲೆಪರಿಂ ಜಾತಾ. ಪಯ್ಲೆಂ ಪಯ್ಲೆಂ ಆಮಿ ಝಗ್ಡೆಂ ಕರ್ಚೆಂ ಆಸ್ಲ್ಲೆಂ. ಸುಮಾರ್ ಪಾವ್ಟಿಂ ಮಾರ್ನ್ ಸಯ್ತ್ ಪಡ್ಲ್ಲೆಂ ಆಸಾ; ತ್ಯಾ ಕಾತಿರ್, ಸುಮಾರ್ ಪಾವ್ಟಿಂ, ಮ್ಹಾಕಾ ಸಿಸ್ಟರಿನ್ ಸರ್ಸರಿತ್ ಮಾರ್ಲಾಂ. ’ತುಜ್ಯಾ ಬರಿ ಆಸ್ತಾನಾ, ತುಜೊ ಭಾವ್ ಕಿತ್ಲೊ ಬರೊ ಆಸ್ಲ್ಲೊ ಗೊತ್ತಾಗೀ? ಶೆಗುಣಾಂಚೊ ಭುರ್ಗೊ; ತುಕಾ ಕಿತೆಂ ಭುತ್ ಲಾಗ್ಲಾ?’ ಅಶೆಂ ಯೆಟ್ಟಾ’ಲಿಂ.
ಆತಾ’ತಾಂ ಹಾಂವ್ ಚೆಡ್ವಾಂಲಾಗಿಂ ಝಗಡ್ನಾತ್ಲ್ಲೊಂ; ಪುಣ್ ತಾಂಕಾಂ ಪಳೆತಾನಾ ಮ್ಹಾಕಾ ಮಸ್ತು ಲಜ್ ದಿಸ್ತಾ. ದೆಕುನ್ ತಾಂಚೆಲಾಗಿಂ ಉಲಂವ್ಚೆಂತ್ ನಾ. ತಶೆಂ ಆಸ್ತಾನಾ, ಸಿರ್ಲಾ ದಾಟ್ಟುನ್ ಚೆಡ್ವಾಂಚ್ಯೊ ಪಾಂತ್ಯೊ ವೊಡ್ಚೆಂ ಮ್ಹಜ್ಯಾನ್ ಚಿಂತುಂಕ್ ಸಯ್ತ್ ಜಾಯ್ನಾ! ತಶೆಂ ಕರುಂಕ್ ತಾಕಾ ಕಶೆಂ ಪುಟ್ವತಾಗೀ!
ಸಿರ್ಲಾ ದಾಟ್ಟುಚಿ ಸಾತ್ವಿ ಜಾಲ್ಯಾ ಉಪ್ರಾಂತ್, ತಾಕಾ ಶಿಕ್ಪಾಂತ್ ಇಂಟ್ರೆಸ್ಟ್ ನಾ ಜಾಲೆಂ ಮ್ಹಣ್ ದಿಸ್ತಾ; ಆಪುಣ್ ಇಸ್ಕೊಲಾಕ್ ವಚನಾ ಮ್ಹಣ್ ತಾಣೆ ಹಟ್ ಧರ್ಲೆಂ. ಪುಣ್ ಬಾಬಾಕ್ ಹೆಂ ಕಳಿತ್ ಜಾತಚ್, ತಾಣೆ ಏಕ್ ಉತ್ರೆಚೆಂ ಆಡಾರ್ ಘೆವ್ನ್ ಸಿರ್ಲಾ ದಾಟ್ಟುಕ್ ಸರ್ಸರಿತ್ ಹುನ್ ಕೆಲ್ಲೆಂ. ಸಿರ್ಲಾ ದಾಟ್ಟು ಚ್ಯಾಡ್ಡೆಂತ್ ಮುತ್ಲ್ಲೊತ್ ಮುತ್ಲ್ಲೊ! ಮ್ಹಾಕಾ ಮಾತ್ ಸಿರ್ಲಾ ದಾಟ್ಟುಚಿ ಬಿರ್ಮತ್ ದಿಸ್ಲ್ಲಿ: ಇಸ್ಕೊಲಾಕ್ ವೆಚೆಂ ತಿತ್ಲೆಂಯ್ ಗರ್ಜೆಚೆಂಗೀ? ಮನ್ ನಾತ್ಲ್ಯಾರ್ ಇಸ್ಕೊಲಾಕ್ ವಚೊನ್ ಕಿತೆಂ ಫಾಯ್ದೊ? ಮ್ಹಾಕಾ ಎಕ್ಯೀ ಕಳನಾ... ತೆದಾಳಾ ಹಾಂವ್ ಬೋವ್ಶ್ಯಾ ದುಸ್ರೆಂತ್ಗೀ ಯಾ ತಿಸ್ರೆಂತ್ಗೀ, ಮ್ಹಾಕಾ ಸಮಾ ಉಡಾಸ್ ನಾ...
ಮಾರಾಂಚ್ಯಾ ಭಿಂಯಾಕ್ ಲಾಗೊನ್, ಸಿರ್ಲಾ ದಾಟ್ಟು ಇಸ್ಕೊಲಾಕ್ ಗೆಲೊ, ಮ್ಹಳಾರ್ ಘರಾ ಥಾವ್ನ್ ಇಸ್ಕೊಲಾಕ್ ಮ್ಹಣ್ ಭಾಯ್ರ್ ಸರೊನ್ ಗೆಲೊ. ಪುಣ್ ತೊ ಇಸ್ಕೊಲಾಕ್ ವಚೊನ್ ಪಾವ್ಲ್ಲೆ ದೀಸ್ ಭಾರೀ ಉಣೆ. ಬೊಲ್ಲೆರ್ ಆಮ್ಚ್ಯಾ ಘರಾ ಥಾವ್ನ್ ಹಾಯ್ಸ್ಕುಲಾಕ್ ಚಲೊನ್ ವಚಜೆ; ಸುಮಾರ್ ದೇಡ್ - ದೋನ್ ಮಯ್ಲಾಂಚಿ ವಾಟ್ ಜಾಯ್ತ್ ಕೊಣ್ಣಾ. ಸಿಮಾಲ್ಕ್ಯಾಂತ್ ಸುಮಾರ್ ಗಣ್ಣ್-ಶೆಂ ರಾನ್ ಆಸ್ಲ್ಲೆಂ. ತೊ ಥಂಯ್ ವಚೊನ್ ಬಸ್ತಾಲೊ; ಘರಾ ಥಾವ್ನ್ ವ್ಹೆಲ್ಲಿ ಭುತಿ, ದನ್ಫಾರಾಂ ಭುಕ್ ಲಾಗ್ತಾನಾ ಯಾ ಆನಿ ಕೆದಾಳಾ ತರ್ಯೀ ತೊ ’ಆಮೆನ್’ ಕರ್ತಾಲೊ ಮ್ಹಣ್ ದಿಸ್ತಾ. ಸಾಂಜೆರ್ ಇಸ್ಕೊಲಾಚಿಂ ಭುರ್ಗಿಂ ಇಸ್ಕೊಲಾ ಥಾವ್ನ್ ಪಾಟಿಂ ಘರಾ ಯೆತಾನಾ, ತಾಂಚ್ಯಾ ಪಾಟ್ಲ್ಯಾನ್ ಯೇವ್ನ್, ತೊಯ್ ಘರ್ ಭಿತರ್ ಸರ್ತಾಲೊ.
ಘರಾ ಯೇವ್ನ್ ಸದಾಂಚ್ಯೆ ಪರಿಂ -ಕಾಂಯ್ತ್ ವಿಶೇಸ್ ಘಡೊಂಕ್ ನಾತ್ಲ್ಲೆ ಪರಿಂ- ಚಲ್ತಾಲೊ. ಹೆಂ ಚಡ್ ತೇಂಪ್ ಚಲ್ಲೆಂನಾ. ಇಸ್ಕೊಲಾ ಥಾವ್ನ್ ಸಿಸ್ಟರಿಂಚಿಂ ಕಂಪ್ಲೆಂಟಾಂ ಯೇಂವ್ಕ್ ಸುರು ಜಾಲಿಂ - ಇಸ್ಕೊಲಾಂತ್ ಸಿರ್ಲಾ ದಾಟ್ಟುಚಿ ಹಾಜಿರಿ ಉಣಿ ಆಸ್ಲಿ ಖಂಯ್. ದೆಕುನ್, ಮಾಂಯ್ನ್ ತವಳ್ ತವಳ್ ಇಸ್ಕೊಲಾಕ್ ವಚೊನ್ ಟಿಚೆರಾಂಕ್-ಮಾಸ್ಟರಾಂಕ್ ಮೆಳ್ಚೆಂ ಪಡ್ಲೆಂ.
ಖಂಚ್ಯಾ ದಿಸಾ ಮಾಂಯ್ ಇಸ್ಕೊಲಾಕ್ ವೆತಾಗೀ, ತ್ಯಾ ದೀಸ್ ಸಿರ್ಲಾ ದಾಟ್ಟುಕ್ ಘರಾ ಚಿಂಚೆಚ್ಯಾ ಆಡಾರಾಚಿ ಪುಜಾ. ಪುಣ್ ಎಕ್ ದೀಸ್ಯೀ ಆಪ್ಣೆ ಇಸ್ಕೊಲ್ ಚುಕೊನ್ ಘೆತ್ಲಾಂ ಮ್ಹಣ್ ಸಿರ್ಲಾ ದಾಟ್ಟುನ್ ಒಪ್ವೊನ್ ಘೆತ್ಲ್ಲೆಂ ನಾ. ’ಜಾಯ್ ಜಾಲ್ಯಾರ್, ಸೆಜಾರ್ಚ್ಯಾ ಶಿಂತಿಲಾಗಿಂ ವಿಚಾರ್’ ಮ್ಹಣ್ ದಾಟ್ಟುನ್ಂತ್ ಸಾಂಗ್ಚೆಂ ಆಸ್ಲೆಂ.
ಶಿಂತಿ ಕಾಂಯ್ ಉಣ್ಯಾಚೊ ಘೊಡೊ ನ್ಹಯ್! ತೆಂಯ್ ತಾಕೊಡೆಚ್ಯಾ ಆದರ್ಶ್ ಹಾಯ್ಸ್ಕುಲಾಕ್ತ್ ವೆತಾಲೆಂ. ಪುಣ್ ದಾಟ್ಟುಚ್ಯಾಕ್ಯೀ ಏಕ್ ವರ್ಸ್ ಧಾಕ್ಟೆಂಗೀ, ಕಾಲೆಂಗೀ. ಮಾಂಯ್ನ್ ವಿಚಾರ್ತಾನಾ, ’ಸುಮಾರ್ ಪಾವ್ಟಿಂ ತಾಕಾ ಹಾಂವೆ ಇಸ್ಕೊಲಾಂತ್ ಪೊಳೆಲಾ,’ ಮ್ಹಣ್ ತಾಣೆ ಸಾಂಗ್ಲ್ಲೆಂ ಖಂಯ್. ಮಾಂಯ್ ಕಿತೆಂ ಕರ್ತೆಲಿ?
ದಾಟ್ಟುನ್ ಅಶೆಂತ್ ಕರ್ನ್, ನಿಮಾಣೆ ಆಟ್ವೆಂತ್ ಲಾಟ್ ಘಾಲಿ; ತಶೆಂ ತ್ಯಾ ಉಪ್ರಾಂತ್ ತಾಣೆ ಘರಾತ್ ಬಸಜೆ ಪಡ್ಲೆಂ. ಹಾಂವ್ ಇಸ್ಕೊಲಾಕ್ ವೆತಾನಾ, ಘರಾ ತೊ ಆನಿ ಮಾಂಯ್ ದೊಗಾಂತ್. ಮಾಂಯ್ ಪ್ರೈಮ್ ಮಿನಿಸ್ಟರ್, ದಾಟ್ಟು ಹೋಮ್ ಮಿನಿಸ್ಟರ್ ಮ್ಹಣ್ ಲೊಕಾನ್ ತಮಾಶೆ ಕರ್ಚೆ ಆಸ್ಲೆ! ತಶೆಂ ಮ್ಹಳ್ಯಾರ್ ಕಾಲೆಂಗೀ! ತೆದಾಳಾ ಮ್ಹಾಕಾ ಕಳ್ನಾತ್ಲ್ಲೆಂ; ಆತಾಂ ಇಲೆಂ’ಲೆಂ ಮಾಂಡ್ಡ್ಯಾಕ್ ರಿಗ್ತಾ.
ಪುಣ್ ಹಾಂವ್ ಮಾತ್ ಶಿಕ್ಪಾಂತ್ ಆಸಕ್ತ್ ದಾಕಯ್ತಾಲೊಂ ಜಾಲ್ಲ್ಯಾನ್, ಶಿಕೊನ್ ಮುಕಾರ್ ಪಾವ್ಲೊಂ.
ದಾಟ್ಟು ಘರಾಯ್ ಚಡಿತ್ ಕಾಂಯ್ ಕಾಮ್ ಕರಿನಾತ್ಲ್ಲೊ - ಕಾಂಯ್ ಮಾಂಯ್ನ್ ಸಾಂಗ್ಲ್ಯಾರ್ ಆನಿ ತಾಕಾ ಮನ್ ಜಾಲ್ಯಾರ್ ಕಿತೆಂ ತರ್ಯೀ ಕರ್ತಾಲೊ, ಶಿವಯ್, ಆಪ್ ಖುಶೆನ್ ತಾಣೆ ಹಿಶಿಲಿ ಕಾಡಿ ಕಾಡ್ನ್ ತಿಶಿನ್ ದವರ್ಲ್ಲಿ ಮ್ಹಣ್ ನಾ.
ಹಾಂವ್ ಲ್ಹಾನ್ ಆಸ್ತಾನಾ, ದಾಟ್ಟುಕ್ ಸೆಜಾರ್ಯಾಂ ಪೂರಾ ’ತಕ್ಲೆನ್ ಹಿಟ್ಲರ್’ ಮ್ಹಣ್ತಾಲಿಂ. ತೆದಾಳಾ ತಾಕಾ ಕಾಮಾಂತ್ಯೀ ಮಸ್ತು ಇಂಟ್ರೆಸ್ಟ್. ತೊ ಖಂಚ್ಯಾಯ್ ಕಾಮಾಕ್ ಲಾಗತ್ ತರ್, ’ಹೊ ಕಿತೆಂ ಗಾಂವ್ತ್ ಆರಾಯ್ತಾ, ಹಾಬಾ!’ ಮ್ಹಣ್ ಲೋಕ್ ತಾಚಿ ಹೊಗ್ಳಿಕ್ ಉಚಾರ್ತಾಲೊ.
ಪುಣ್ ವರ್ಸಾಂ ಗೆಲ್ಲ್ಯೆಬರಿ, ರಾಯಾಚೊ ಘೊಡೊ ಗಾಡಾಂವ್ ಜಾಲೆಂ, ಮ್ಹಣ್ ಮಾಂಯ್ನ್ ಪುರ್ಪುರೊಂಕ್ ಸುರು ಕೆಲೆಂ. ಸಗ್ಳೊ ದೀಸ್ ತ್ಯಾ ಶಿಂತಿಲಾಗಿಂ ಪಟ್ಟಾಂಗಾಂ ಮಾರ್ನ್ ಬಸ್ತಾಲೊ; ತೆಂ ಆಮ್ಗೆರ್ ಘರಾ ಯೇವ್ನ್ ಬಸತ್ ತರ್, ದೊಗಾಂಯ್ ಕಾಲೆಂ ಉಲಯ್ತಾತ್ ಆನಿ ಕಾಲೆಂ ಉಲಯ್ನಾಂತ್ ಮ್ಹಣ್ ಸಾಂಗೊಕ್ ಕಶ್ಟ್.
"ಮಲ್ಲ ಶೆಟಿಚಿ ಆಸ್ತ್ ಮೊಲಾಯ್ತಾತ್ಗೀ, ಕಿತೆಂ?" ಮ್ಹಣ್ ತಾಂಕಾಂ ವೆಳಾಚಿ ಪರ್ವಾ ಕರುನ್, ಮಾಂಯ್ನ್ ಜಾಗಂವ್ಚೆಂ ಆಸ್ಲ್ಲೆಂ. ಶಿಂತಿ ಮಾತ್ ಲಜೆನ್ಗೀ ಯಾ ರಾಗಾನ್ಗೀ, ಉಟೊನ್ ತಾಚ್ಯಾ ಘರಾ ವೆತಾಲೆಂ; ಪುಣ್ ದುಸ್ರ್ಯಾ ದಿಸಾ ತೆಂ ಪರ್ತುನ್ ಆಮ್ಗೆರ್ ಹಾಜರ್!
ಹೆಂ ಅಶೆಂತ್ ಚಲೊನ್ ವೆತಾನಾ, ಮಾಂಯ್ಕ್ ಸೊಸುಂಕ್ ಜಾಲೆಂನಾ, ಮ್ಹಣ್ ದಿಸ್ತಾ. ಮಾಗಿರ್ ಮಾಗಿರ್ ಮಾಂಯ್ನ್ ಶಿಂತಿಕ್ ಗುಜು ಕರುಂಕ್ ಸುರು ಕೆಲೆಂ. "ಪ್ರಾಯೆಕ್ ಪಾವ್ಲ್ಲೆಂ ಚೆಡುಂ ತುಂ, ಹಾಂಗಾ ಯೇವ್ನ್ ಸಗ್ಳೊ ದೀಸ್ ಕಿಡ್ಕಿಡ್ತಾಯ್ಮೂಗೋ?’ ಮ್ಹಣ್ ಕೆಂಡುಂಕ್ ಸುರು ಕೆಲೆಂ.
ಹಾಕಾ ಪೂರಾ ದಾಟ್ಟುನ್ಯೀ ಕೇರ್ಲೆಸ್ಸ್ ಕರ್ತ್ನ್, ಶಿಂತಿಕ್ತ್ ಸಪೋಟ್ ಕರ್ತಾನಾ, ಮಾಂಯ್ನ್ ಸಿರ್ಲಾ ದಾಟ್ಟುಕ್ಯೀ "ತುಂ ಚೆಡ್ವಾಂಚೊ ಪಿಸೊ," "ಬಾಯ್ಲಾಂಡೊ," "ಪೊಣ್ಣು ಮಾರ್ಲಾ," ಅಶೆಂ ಮ್ಹಣ್ ದಾಟ್ಟುಕ್ ಗಾಳಿ ದೀಂವ್ಕ್ ಸುರು ಕೆಲ್ಯೊ. ಪುಣ್ ದಾಟ್ಟುಕ್ ಹೆಂ ಪೂರಾ ಖಂಯ್ ನಟ್ವತಾ?
ಶಿಂತಿ ಘರಾ ಯೇತ್ ತರ್, ದಾಟ್ಟು ಸಂಸಾರ್ತ್ ವಿಸರ್ತಾ, ಆನಿ ಕಾಂಯ್ ಕಾಮ್ ಕರಿನಾ; ಪೂರಾ ಕಾಮಾಚೊ ಭೊರ್ ಮಾಂಯ್ಚೆರ್ ಪಡ್ತಾ ದೆಕುನ್, ಶಿಂತಿನ್ ಆಮ್ಗೆರ್ ಯೇಂವ್ಕ್ ಮಾಂಯ್ನ್, ತಾಕಾ ಆಡ್ವಾರ್ಲ್ಲೆಂ. "ಹಾಂಗಾ ಪಾಯ್ ದವರ್ಶಿ ತರ್, ಖಬಡ್ದಾರ್!" ಮಾಂಯ್ನ್ ಧಮ್ಕಿ ದಿಲ್ಲಿ.
ಸಿರ್ಲಾ ದಾಟ್ಟು ಹ್ಯಾವರ್ವಿಂ ಉಚಾಂಬಳ್ ಜಾಲ್ಲೊ. ಶಿಂತಿನ್ ಆಮ್ಗೆರ್ ಯೆಂವ್ಚೆಂ ಉಣೆ ಕೆಲೆಂ; ಮಾಂಯ್ ಘರಾ ಆಸ್ಲ್ಲ್ಯಾ ವೆಳಾರ್ ತೆಂ ಘರಾ ಪಾಯ್ತ್ ದವರ್ನಾತ್ಲ್ಲೆಂ. ಸಿರ್ಲಾ ದಾಟ್ಟುಕ್ ಹೆಂ ಸೊಸ್ಲೆಂನಾ ಮ್ಹಣ್ ದಿಸ್ತಾ. ತೊ ಉಟ್ಲ್ಲ್ಯಾ ಬಸ್ಲ್ಲ್ಯಾಕ್ ಜಳ್ತಾಲೊ, ಮಾಂಯ್ಕ್ ಗಾಳಿ ಸೊಂವ್ತಾಲೊ. ಘರ್ಚೆಂ ಕಾಂಯ್ತ್ ಕಾಮ್ ಕರಿನಾಸ್ತಾನಾ ಬೆಕಾರ್ ಪ್ರತಿಭಟನ್ ಕರುಂಕ್ ಸುರು ಕೆಲೆಂ.
ತವಳ್ ತವಳ್ ತೊ ಶಿಂತಿಗೆರ್ ವಚೊನ್ ಬಸ್ತಾಲೊ. ಪುಣ್ ದಾಟ್ಟುನ್ ತಾಂಗೆರ್ ವೆಚ್ಯಾಕೀ ತಾಂಚಿ ಆಡ್ಕಳ್ ಆಸ್ಲ್ಲಿ ಮ್ಹಣ್ ದಿಸ್ತಾ. ಶಿಂತಿಚೊ ಭಾವ್ ಬೊನಾನ್ ದಾಟ್ಟುಕ್, "ಮ್ಹಜ್ಯಾ ಭಯ್ಣಿಚ್ಯಾ ಪಾಟ್ಲ್ಯಾನ್ ಲಾಗ್ಶಿ ತರ್, ತುಜ್ಯೊ ದೊಂಕ್ಳ್ಯೊ ಮೋಣ್ಣ್ ಘಾಲ್ತಾಂ," ಮ್ಹಣ್ ಖಡಕ್ಕ್ ತಾಕಿದ್ ದಿಲ್ಲಿ.
ಹ್ಯಾ ಸರ್ವ್ ವೊದ್ದು ವೊರಾಂಟಾ ಮದೆಂ ಆಮ್ಚ್ಯಾ ಘರ್ಚೆಂ ಕಾಮ್ ಜಾಲೆಂತ್ ನಾ. ಮಾಂಯ್ನ್ ಸಾಂಗ್ಲ್ಲೆಬರಿತ್, ಆನಿ ದಾಟ್ಟುನ್ ಕಾಮ್ ಕೆಲ್ಲೆಬರಿತ್!
"ಹಾಕಾ ಏಕ್ ಗೊರ್ವಾಂಕ್ ದೇರಾಯಿಲ್ಲೆಬರಿ ಕಿತ್ಲೆಂ ದೇರಾಂವ್ಚೆಂ! ಎಕಾ ಕಾಸಾ ಕಾಡಿಯೆಚೆಂ ಕಾಮ್ ಕರಿನಾ. ಇಸ್ಕೊಲಾಕ್ ವಚೊನ್ ಮೋರ್ ಮ್ಹಳ್ಯಾರ್, ತೆಂಯ್ ವಚನಾ!" ಮ್ಹಣ್ ಮಾಂಯ್ ಸದಾಂ ಪುರ್ಪುರ್ತಾಲಿ; ತಿಕಾ ತೆಂ ಸವಯೆರ್ ಪಡ್ಲ್ಲೆಂ. ದಾಟ್ಟುನ್ ’ಡೋಂಟ್ ಕೇರ್’ ಕರ್ಚೆಂ ಆಸ್ಲೆಂ. ಹೆಂ ಸರ್ವ್ ತಾಕಾ ರೆಡ್ಯಾಚ್ಯೆ ಪಾಟಿರ್ ಪಾವ್ಸ್ ಪಡ್ಲ್ಲೆಪರಿಂ ಮ್ಹಣ್ ದಿಸ್ತಾ. ಸಿರ್ಲಾ ದಾಟ್ಟು ವೇಳ್ ದುಸ್ರ್ಯೆತ್ ರಿತಿನ್ ಖರ್ಚಿತಾಲೊ - ತೊ ಆಮ್ಚ್ಯಾ ಬೊಕ್ಲಾ’ಡೆ ಖೆಳ್ತಾಲೊ!
ಆಮ್ಗೆರ್ ಘರಾ ಏಕ್ ಬೊಕುಲ್ ಆಸ್ಲೊ. ತಾಕಾ ಬೊಸ್ತು ಮ್ಹಣ್ ನಾಂವ್. ಆಮ್ಗೆರ್, ಬೊಕುಲ್ ಮ್ಹಳಾರ್ ಸಕ್ಡಾಂಕ್ ಮಸ್ತು ಮೋಗ್; ವಿಶೇಸ್ ಜಾವ್ನ್ ಸಿರ್ಲಾ ದಾಟ್ಟುಕ್, ಬೊಸ್ತು ಮ್ಹಳ್ಯಾರ್ ಜೀವ್ತ್! ಪಳೆಂವ್ಕ್ಯೀ ತೊ ಬರೊ - ಹಳ್ದಿ ರಂಗಾಚೊ ಜಾವ್ನ್, ತಾಚೆಂ ನಾಕ್ ಪಳೆಂವ್ಕ್ ನಿತಳ್ ಪಿಕ್ಯಾ ತೆಂಡ್ಲ್ಯಾ ಭಾಶೆನ್ ಆಸ್ಲೆಂ. ತೆಂ ಪಳೆಂವ್ಕ್ ಆಮ್ಕಾಂ ಭಾರೀ ಖುಶಿ. ತ್ಯಾ ತೆಕಿದ್ ತಾಕಾ ತೆಂ ಏಕ್ ನಾಂವ್: ಬೊಸ್ತು!
ಸಿರ್ಲಾ ದಾಟ್ಟು ಬೊಸ್ತುಕ್ ಕಾಣ್ಘೆವ್ನ್ ಬಸತ್ ತರ್, ತಾಕಾ ಉಟಯ್ತಲೊ ಕೋಣ್ಂತ್ ನಾ!
"ಹೊ ಎಕಾ ಬೊಕ್ಲಾಕ್ ಕಾಣ್ಘೆವ್ನ್ ಕಿತೆಂ ಗುಮ್ಮಡ ಜಾಲಾ ಸಾಯ್ಬಾ! ಸಿರ್ಲಾ, ತುಕಾ ಏಕ್ ಕಾಮ್ ಕರುಂಕ್ಯೀ ಜಾಯ್ನಾ ಪುತಾ?" ಮಾಂಯ್ನ್ ವಿಚಾರ್ಲ್ಯಾರ್, ದಾಟ್ಟು ಉಲ್ಟ್ಯೊತ್ ಜಾಪಿ ದಿತಾಲೊ,
"ಜಾಯ್ ಜಾಲ್ಯಾರ್ ಕರ್. ಕೆದಾಳಾಯ್ ದಿತಾಯ್ ನ್ಯೇ, ಶಿರಾಪ್? ಕೊಣಾಕ್ ಮಾರ್ ಆಯ್ಲ್ಯಾ ಪೊಳ್ಯಾಂ, ಆತಾಂ!" ದಾಟ್ಟು, ಮಾಂಯ್ಕ್ ಎಕಾ ಥರಾಚೆಂ ಸವಾಲ್ ಘಾಲ್ತಾಲೊ.
ತಾಚ್ಯೆಯಿತ್ಲ್ಯಾಕ್ ವೇಳ್ ಪಾಡ್ ಕರ್ಚ್ಯಾ ದಾಟ್ಟುಚ್ಯೆ ಮತಿಂತ್ ಕಾಲೆಂ ಶಿಜ್ತಾಲೆಂಗೀ, ದೇವ್ ಜಾಣಾ! ಘಡ್ಯೆನ್ ತೊ ಉಚಾಂಬಳ್ ಜಾತಾಲೊ; ಘಡ್ಯೆನ್ ಮಾಂಯ್ಕ್ ಗಾಳಿ-ಶಿರಾಪ್ ದಿತಾಲೊ; ಘಡ್ಯೆನ್ ಬೊಕ್ಲಾಕ್ ಘೆವ್ನ್ ಖೆಳ್ತಾಲೊ; ಘಡ್ಯೆನ್ ಮಾಯಾಗ್ ಜಾತಾಲೊ.
*** *** ***
ಏಕ್ ದೀಸ್, ಸಿರ್ಲಾ ದಾಟ್ಟು ಬೊಕ್ಲಾಕ್ ಘೆವ್ನ್ ತಾಚಿ ಶಿಮ್ಟಿ ಪೊಶೆತಾಲೊ, ಬೊಕ್ಲಾಚೆಂ ನಾಕ್ ಚಿಡ್ಡಿತಾಲೊ, ಬೊಕ್ಲಾಕ್ ಉಮೆ ದಿತಾಲೊ. ಘರಾ ತೊಟಾಚ್ಯಾ ಕಾಮಾಕ್ ಸೆಜಾರ್ಚೊ ರಾಮ ಪೂಜಾರಿ ಆಯಿಲ್ಲೊ; ಆಮಿ ಪಂಪು ಚ್ಯಾಲು ಕರ್ನ್ ವಾಲಿಕ್ ಉದಕ್ ಶಿಂಪುಂಕ್ ಸುರು ಕೆಲ್ಲೆಂ. ಮಾಂಯ್ಯೀ ಕೊಂರ್ಗೆಂ ಘೆವ್ನ್ ವಾಲಿಕ್ ಗೆಲ್ಲಿ; ತಿ ವಚೊನ್ ಥೊಡ್ಯಾ ವೆಳಾನ್ ಹಾಂವ್ಯೀ ವಾಲಿಕ್ ದೆಂವ್ಲೊಂ; ಮಾಂಯ್ಕ್ ಆನಿ ಕಾಮಾಚ್ಯಾಕ್ ಎಕೆಕ್ಲ್ಯಾಚೆರ್ತ್ ಅಸಲೆಂ ಭರಾಚೆಂ ಕಾಮ್ ಸೊಡ್ಚೆಂ ನ್ಹಯ್ ಮ್ಹಳ್ಳ್ಯಾ ಉದ್ದೆಸಾನ್. ಉದಕ್ ಭರೊನ್ ಪಾಡ್ ಜಾಂವ್ಕ್ ಲಾಗ್ಲೆಂ; ರಾಮ ಪೂಜಾರಿ, ಮಾಂಯ್ ಆನಿ ಮ್ಹಾಕಾ -ತೆಗಾಂಕ್- ಹೆಂ ಆಟಾಪುಂಕ್ ಜಾಲೆಂನಾ.
"ಸಿರ್ಲಾ, ಏ ಸಿರ್ಲಾ," ಮಾಂಯ್ನ್ ಉಲೊ ಮಾರ್ಲೊ.
ಪುಣ್ ದಾಟ್ಟುಚಿ ಜಾಪ್ ನಾ.
"ಏ ಸಿರ್ಲಾ... ಖಂಯ್ ಮೆಲಾಯ್ರೇ? ತುಜ್ಯಾ ಕಾನಾಕ್ ಕೊಣೆ ಸಿಸೆಂ ಘಾಲಾಂಗಾಯ್?..." ಮಾಂಯ್ಚಿ ಸೊಸ್ಣಿಕಾಯ್ ಉಣಿ ಜಾವ್ನ್ಂತ್ ಯೆತಾಲಿ ಮ್ಹಣ್ ಮ್ಹಾಕಾ ಕಳ್ಳೆಂ. ಮ್ಹಜ್ಯಾ ಹರ್ದ್ಯಾಂತ್ ಎಕಾ ಥರಾಚೆ ದಡ್ದಡೆ ಸುರು ಜಾಲೆ.
"ಖಂಯ್ ಗೆಲಾರೇ, ತೊ?" ಮಾಂಯ್ನ್ ಮ್ಹಜ್ಯೆಲಾಗಿಂ ವಿಚಾರ್ಲೆಂ.
"ಘರಾ ಆಸ್ಲ್ಲೊ, ಮಾಂಯ್," ಹಾಂವೆ ಮಾಂಯ್ಕ್ ಸಾಂಗ್ಲೆಂ.
"ಘರಾ ಕಿತೆಂ, ಬಾಯ್ಲ್ ಬಾಳಾಂತ್ ಜಾಲಾಂಗಿ? ಕಿತೆಂ ಕರ್ತಾರೇ, ತೊ?" ಮಾಂಯ್ನ್ ಮ್ಹಾಕಾ ಧೆಂಕ್ಣೊ ಘಾಲೊ. ಮ್ಹಾಕಾ ಭ್ಯೆಂತ್ ದಿಸ್ಲೆಂ.
"ಬೊಕ್ಲಾಲಾಗಿಂ ಖೆಳ್ತಾ, ಮಾಂಯ್," ಹಾಂವೆ ಮ್ಹಜ್ಯಾ ದೊಳ್ಯಾಂನಿ ದೆಕ್ಲ್ಲೆಂ ಸಾಂಗ್ಲೆಂ.
"ಬೊಕ್ಲಾ’ಡೆ ಖೆಳ್ತಾಗಿ, ತೀನ್ ಕಾಸಾಂಚೊ ಖಂಚೊ! ಶಿಕಯ್ತಾಂ ತಾಕಾ, ಬೂದ್!" ಮಾಂಯ್ ರಾಗಾನ್ ಉದಕ್ ಉಸ್ಪೊಂವ್ಚೆಂ ಕೊಂರ್ಗೆಂ ಥಂಯ್ಚ್ ಉಡವ್ನ್ ಸಟ್-ಸಟ್ ಕರ್ನ್ ಘರಾ ತಿಶಿಂ ಧಾಂವ್ಲಿ. ತಳ್ಮಳ್ಯಾಂನಿ, ಹಾಂವ್ಯೀ ತಿಚ್ಯಾ ಪಾಟ್ಲ್ಯಾನ್ಂತ್ ಗೆಲೊಂ.
ಹಾಂವೆ ಸಾಂಗ್ಲ್ಲೆಂ ಸಮಾ: ಘರಾ ಪಾವ್ತಾನಾ, ಸಿರ್ಲಾ ದಾಟ್ಟು ಬೊಕ್ಲಾಕ್ ಉಸ್ಕ್ಯಾರ್ ಬಸವ್ನ್ ಖೆಳಯ್ತಾಲೊ! ಬೊಸ್ತು ಸಿರ್ಲಾ ದಾಟ್ಟುಚ್ಯಾ ಉಸ್ಕ್ಯಾರ್ ರಾಯ್ ಕುಂವರಾಬರಿ ಬಸೊನ್ ಮಜಾ ಕರ್ತಾಲೊ.
ಮಾಂಯ್ನ್ ಫೊರ್ಸಾನ್, ಬೊಕ್ಲಾಕ್ ದಾಟ್ಟುಚ್ಯಾ ಉಸ್ಕ್ಯಾರ್ ಥಾವ್ನ್ ವೋಡ್ನ್ ಕಾಡ್ಲೊ. ಬೊಕ್ಲಾನ್ ಮಾಂಯ್ಕ್ ಜ್ಯೊರಾನ್ ಏಕ್ ದಾವ್ಲಿ ಮಾರ್ಲಿ.
"ಮೆಲೊರೇ, ಮ್ಹಾರಾಚೊ ಪೂತ್!" ಮಾಂಯ್ನ್ ಬೊಬಾಟುನ್, ಬೊಕ್ಲಾಕ್ ಥಂಯ್ಚ್ ಧರ್ಣಿಕ್ ಮಾರ್ಲೊ. ಬೊಕುಲ್ ಹಗ್ಯಾನ್ ಮ್ಹಳ್ಳೆಬರಿ ಸೊಂಡಿ ಧರ್ಣಿಕ್ ಪುಸುನ್ ಧಾಂವ್ಲೊ.
"ತುಕಾ ಕಿತೆಂ ಸುರು ಜಾಲಾಂ, ಆಜ್? ಕಿತೆಂ ಪಮ್ಮದ ಆಂಗಾರ್ ಆಯ್ಲಾಗಿ?" ಸಿರ್ಲಾ ದಾಟ್ಟು ಖೆಂವ್ಚಲೊ.
"ಕಿತೆಂ ಮ್ಹಳೆಂಯ್, ತೀನ್ ಕಾಸಾಂಚ್ಯಾ? ಕೊಣಾಕ್ ತುಜ್ಯಾ ಆಳಾಕ್ ಘೊಂಕ್ತಾಯ್ಗೀ?" ಮಾಂಯ್ ಹಾತ್ ಉಬ್ರಾವ್ನ್ಂತ್ ದಾಟ್ಟು ಸರ್ಶಿಂ ಗೆಲಿ; ಭಿಂಯಾನ್ ಮ್ಹಜಿ ಚ್ಯಾಡ್ಡಿ ಥಂಡ್ ಜಾಲಿ. ಆತಾಂ ಕಿತೆಂ ಜಾತಾ ಕೊಣ್ಣಾ! ಆಯ್ಲೆವಾರ್, ಮಾಂಯ್ಕ್ ಆನಿ ಸಿರ್ಲಾ ದಾಟ್ಟುಕ್ ತವಳ್ ತವಳ್ ಲಾಗೊನ್ ಯೆತಾ.
"ಕಿತೆಂ, ಮಾರ್ತಾಯ್ಗೀ? ಮಾರ್, ಪೊಳ್ಯಾಂ! ... " ದಾಟ್ಟು ಹಂಕಾರಾನ್ಗೀ ಮ್ಹಳ್ಳ್ಯೆಬರಿ, ಹರ್ದೆಂ ವೊಪಾವ್ನ್ ಮಾಂಯ್ಕ್ ಮುಕಾರ್ ಗೆಲೊ.
’ಜೆಜು ಮ್ಹಜ್ಯಾ!’ ಹಾಂವ್ ಗುಪ್ತಿಂ ಆಕ್ಲಾಸ್ಲೊಂ. ಆತಾಂ ಕಿತೆಂ ಜಾತಾಗಾಯ್? ಸಿರ್ಲಾ ದಾಟ್ಟು ಕಾಂಯ್ ಮಾಂಯ್ಚ್ಯಾ ಆಂಗಾರ್ ಹಾತ್ ಮುಣೀ ಘಾಲಿತ್ ತರ್...?
ಂವೆ ಹಿಶಿಂ-ತಿಶಿಂ ಪಳೆತಾನಾ ಬೊಕುಲ್, ಘರಾ ದೆಗೆಚ್ಯಾ ದೊರ್ಯಾಚೆರ್, ಮುಕ್ಲೆ ಪಾಂಯ್ ನೀಟ್ ದವರುನ್ ಬಸ್ಲ್ಲೊ ದಿಸ್ಲೊ.
’ಮ್ಯಾಂ......ವ್...’ ಬೊಕ್ಲಾನ್ ಹೆಡಾಯ್ಲೆಂ’ಶೆಂ ದಿಸ್ಲೆಂ, ಮಾಂಯ್ಕ್. ತ್ಯಾ ಉಪ್ರಾಂತ್ ತಾಣೆ ಕಾಡ್ಲಲಿ ಲಾಂಬ್ ಜಾಂಬಾಯ್ ಪಳೆವ್ನ್ ಮಾಂಯ್ಕ್ ತಳ್ಮಡಾಕ್ ಚಡ್ಲೊ ಮ್ಹಣ್ ದಿಸ್ತಾ.
ಮಾಂಯ್ನ್ ರಾಗಾನ್, ಏಕ್ ವ್ಹಡ್ಲೆಂ ಜಯ್ತ್ ಬಯ್ತಾಡ್ ಘೆವ್ನ್, ಪಾಟಿಂ ಮುಕಾರ್ ಪಳೆನಾಸ್ತಾನಾ ಬೊಕ್ಲಾಕ್ ಉಡಯ್ಲೆಂತ್. ಆಮ್ಚ್ಯಾ ಹುಶ್ಯಾರ್ ಬೊಸ್ತುಕ್, ಹೆಂ ಪೂರಾ ಸದಾಂಚೆಂ; ಯಾ ತೊ ಮಾಂಯ್ಚ್ಯಾಕ್ಯೀ ಹುಶ್ಯಾರ್ ಮ್ಹಣ್ ದಿಸ್ತಾ. ತೊ ’ಮ್ಯಾಂ...ವ್’ ಮ್ಹಣ್ ಲಾಂಬಾಯೆನ್ ಹಾಸೊನ್ ಚಲ್ತೆಚ್ ರಾವ್ಲೊ! ಬಯ್ತಾಡ್, ಥಂಯ್ತ್ ದೆಗೆನ್ ಚರೊನ್ ಆಸ್ಲ್ಲ್ಯಾ ವಾಸ್ರಾಕ್ ಲಾಗೊನ್, ವಾಸ್ರುಂ ಭಿಂಯಾನ್ ಧಾಂವ್ಲೆಂ.
ಸೆಜಾರ್ಚ್ಯಾ ಘರ್ಚೆಂ ಶಿಂತಿ, ಜನೆಲಾ ಥಾವ್ನ್ ಹೆಂ ಸರ್ವ್ ಪಳೆವ್ನ್ ಹಾಸೊನ್ ಆಸ್ಲ್ಲೆಂ. ತಾಚಿ ಚರಬ್ಗೀ, ಮ್ಹಣ್ತಾಂ! ತಾಚ್ಯಾ ಜನೆಲಾಚೆರ್, ಸದಾಂಚ್ಯೆಬರಿ, ತಾಚ್ಯಾ ಮೊಗಾಚೆಂ ’ಬಿಲ್ಲು’ ಬಸೊನ್, ಆಪ್ಲೆಂ ತೋಂಡ್ ಧುತಾಲೆಂ.
ಮಾಂಯ್ ಕಿತೆಂಗೀ ಪೂರಾ ಗಾಳಿ ದೀವ್ನ್, ಪಾಟಿಂ ವಾಲಿಕ್ ಗೆಲಿ. ಮ್ಹಾಕಾ ಕಾಲೆಂ ಕರ್ಚೆಂ ಮ್ಹಣ್ ಕಳ್ಳೆಂನಾ; ಹಾಂವ್ಯೀ ಮಾಂಯ್ ಪಾಟ್ಲ್ಯಾನ್ಂತ್ ಗೆಲೊಂ.
*** *** ***
ಮ್ಹಜ್ಯೆ ಮತಿಂತ್ ಏಕ್ ಸವಾಲ್ ಘಡ್ಯೆ ಘಡ್ಯೆ ಧೊಸ್ತಾ. ಪುಣ್ ಕೊಣಾಲಾಗಿಂ ವಿಚಾರ್ಚೆಂ? ಮಾಂಯ್ಲಾಗಿಂ ವಿಚಾರ್ಲ್ಯಾರ್, ತಿ ಪಿಸಾಂತೂರ್ ಜಾತಾ; ಮಾಗಿರ್ ತಿಚೆ ಗಾಳಿ-ಸೊವೆ ಆಯ್ಕೊಂಕ್ ಸಿರ್ಲಾ ದಾಟ್ಟು ಆಸಾನಾ; ದೆಕುನ್, ಹಾಂವೆಂತ್ ಆಯ್ಕಜೆ. ಕಾನ್ ಕೆಪ್ಪ ಜಾತಾತ್.
ಶಿಂತಿಲಾಗಿಂ ವಿಚಾರ್ಚೆಂಗೀ? ತೆಂ ಮಸ್ತು ಶಿಕ್ಲಾಂ; ದಾಟ್ಟುನ್ ಇಸ್ಕೊಲ್ ರಾವಂವ್ಚ್ಯಾ ಪಯ್ಲೆಂ ತೆಂ ತಾಚೆಂ ಕ್ಲಾಸ್ಮೆಂಟ್ಗೀ ಯಾ ಏಕ್ ವರ್ಸ್ ಜೂನಿಯರ್ಗೀ ತಶೆಂ ಕಿತೆಂಗೀ ಆಸ್ಲ್ಲೆಂ. ದಾಟ್ಟು ಕಿತ್ಯಾಕ್ ಅಶೆಂ ಪೂರಾ ಕರ್ತಾ ಮ್ಹಣ್ ತಾಕಾ ಕಳ್ತಾ ಕೊಣ್ಣಾ. ದಾಟ್ಟುಲಾಗಿಂ ತೆಂ ಬರೆಂ ಕರ್ನ್ ಉಲಯ್ತಾ. ಪುಣ್ ತೆಂ ವ್ಹಡ್ಲೆಂ ಚೂಡ್ ಕೊತ್ರು. ’ಮ್ಹಜ್ಯಾ ಪುತಾಕ್ ಭುಲಯ್ಲಾಂ, ತ್ಯೆ ಚೆಡಿಯೆನ್,’ ಮ್ಹಣ್ ಮಾಂಯ್ಯೀ ತಾಕಾ ಮಸ್ತು ಶಿರಾಪ್ ದಿತಾಲಿ. ಪಾಟ್ಲ್ಯಾ ಥೊಡ್ಯಾ ವರ್ಸಾಂನಿ ಮಾಂಯ್ ಆನಿ ಶಿಂತಿ ಉಲಯ್ನಾತ್ಲಿಂ. ಮಾಂಯ್ ಮಾತ್ ನ್ಹಯ್, ಸಕ್ಕಡ್ಯೀ ತಾಕಾ ಚೂಡ್ ಕೊತ್ರುತ್ ಮ್ಹಣ್ತಾತ್, ಹಾಂವ್ಯೀ ತಾಕಾ ತಸೆಂತ್ ಆಪಯ್ತಾಂ.
ಸೆಜಾರ್ಚ್ಯಾ ಹೆರಾಂಕಡೆ ದಾಟ್ಟು ಕಿತ್ಯಾಕ್ ಅಶೆಂ ಕರ್ತಾ ಮ್ಹಣ್ ವಿಚಾರುಂಕ್ ಮ್ಹಾಕಾ ಮನ್ ಆಸಾ; ಪುಣ್ ತಿಂ ಪೂರಾ ಕಿತೆಂ ಚಿಂತಿತ್? ಮಾಗಿರ್ ತಮಾಶೆ ಕರ್ಚಿಂ ನಾಂತ್ಗಿ? ಸುಮಾರ್’ಪ್ಟಿಂ ತಿಂ, ಮಾಂಯ್ನ್ ಉಲಯಿಲ್ಲೆಬರಿ ಉಲವ್ನ್, ಮಾಂಯ್ಕ್ ಹೆಡಾಯ್ತಾಲಿಂ. ಬೆಶ್ಟೆಂತ್ ಕಿತ್ಯಾ ತಾಣಿಂ ಉಲಂವ್ಕ್ ಏಕ್ ನೀಬ್ ಕರ್ನ್ ದೀಜೆ? ನಾಕಾ, ಮೊರ್ನಾ...
ಹಾಂವ್ ತೊಟಾ ಥಾವ್ನ್ ಘರಾ ಪಾಟಿಂ ಯೆತಾನಾ, ದಾಟ್ಟು ಪರ್ತುನ್ ಮಾಜರ್ ಕಾಣ್ಘೆವ್ನ್ ಬಸ್ಲ್ಲೊ; ಶಿಂತಿಗೆಲೆಂ ಬಿಲ್ಲು! ಮಾಂಯ್ಚ್ಯಾ ಭಿಂಯಾನ್ ಧಾಂವ್ಲ್ಲೊ ಬೊಕುಲ್ ಖಂಯ್ ಗೆಲ್ಲೊಗೀ, ಕಿತೆಂಗೀ? ಆನಿಕ್ಯೀ ಯೇಂವ್ಕ್ ನಾತ್ಲ್ಲೊ, ಮ್ಹಣ್ ದಿಸ್ತಾ. ಸಿರ್ಲಾ ದಾಟ್ಟುಚ್ಯಾ ಉಸ್ಕ್ಯಾರ್ ಬಿಲ್ಲು ಖೆಳ್ತಾಲೆಂ. ದಾಟ್ಟುನ್ ತಾಕಾ ಉದಾರೆಂ ಘಾಲ್ನ್, ತೊ ತಾಚ್ಯಾ ಪೊಟಾಕ್ ಕುಚುಲ್ಯೊ ಕರ್ತಾಲೊ. ಮಾಜ್ರಾಂಕ್ ತಶೆಂ ಕುಚುಲ್ಯೊ ಕೆಲ್ಯಾರ್ ಮಸ್ತು ಬರೆಂ ಲಾಗ್ತಾ ಮ್ಹಣ್ ದಿಸ್ತಾ; ಆಮ್ಚೊ ಬೊಸ್ತುಯ್ ತಸೊಚ್ - ಕುಚುಲ್ಯೊ ಕೆಲ್ಯಾರ್, ತಾಕಾ, ಖಂಯ್ ನಾತ್ಲ್ಲೊ ಸಂತೊಸ್; ಖುಶ್ಯೆನ್, ತೋಂಡ್ ಉಗ್ತೆಂ ಕರ್ನ್, ಚ್ಯಾರ್ಯೀ ಪಾಂಯಾಂನಿ ಮ್ಹಜೆ ಹಾತ್, ಮೊಗಾನ್, ಪುಣ್ ಮ್ಹಾಕಾ ದುಕನಾತ್ಲ್ಯಾಬರಿ ಫಾಪ್ಸಿತಾಲೊ; ಶಿಮ್ಟೆನ್ ಮಾರ್ತಾಲೊ; ತೊಂಡಾನ್ ಫಟ್ಕಿರ್ಯಾಂತ್ ಚಾಬ್ತಾಲೊ. ಹೆಂ ಬಿಲ್ಲುಯ್ ತಶೆಂತ್. ಪಿಶೆಂ ಖಂಚೆಂ...
*** *** ***
"ಅಳೆರೇ, ತಿ ಏಕ್ ಶಿದಿ (ಉದ್ಕಾಚೊ ಲ್ಹಾನ್ ಕೊಳ್ಸೊ) ನ್ಹಯ್ ತರ್ ಲ್ಹಾನ್ ತೊಂಡಾಚಿ ಏಕ್ ಮೊಡ್ಕಿ ಆಣ್ಣ್ಯೇರೆ," ಮ್ಹಾಂಯ್ ಮ್ಹಣಾಲಿ, ದುಸ್ರ್ಯಾ ದಿಸಾ.
’ಹಾಂ, ಬೊಕ್ಲಾ, ತುಜಿ ಕಡಿ ಜಾತಾ, ಆಜ್,’ ಮ್ಹಳೆಂ ಹಾಂವೆ ಬೊಸ್ತುಕ್, ತಾಕಾ ಆಜ್ ಮೆಳೊಂಕ್ ಆಸ್ಚಿ ಶಿಕ್ಶಾ ಚಿಂತುನ್.
"ಕಾಲ್ಯಾಕ್, ಮಾಂಯ್?" ಹಾಂವೆ ಗೊತ್ತಾಸೊನ್ಯೀ ಸವಾಲ್ ಕೆಲೆಂ.
"ತ್ಯಾ ಬೊಕ್ಲಾಚ್ಯೊ ಪಿಚ್ಚ್ಯೊ ಕಾಡಿಜೆ; ಬಾರೀ ರಾಪಾ’ಟ್ಟಾ!"
"ಮ್ಹಳ್ಯಾರ್?" ಹೆಂ ’ರಾಪಾಟ್ಚೆಂ’ ಮ್ಹಳ್ಯಾರ್ ಕಾಲೆಂ ಮ್ಹಣ್ ಮ್ಹಾಕಾ ಗೊತ್ತುನಾತ್ಲ್ಲೆಂ; ’ರಾಪಾಟ್ಚೆಂ’ ಮ್ಹಳ್ಯಾರ್ ’ಜ್ಯೋರ್ ಆಸ್ಚೆಂ’ ಮ್ಹಣ್ ಹಾಂವೆ ಎದೊಳ್ಸರ್ ಚಿಂತ್ಲ್ಲೆಂ. ಪುಣ್ ಹಾಂಗಾ ಬೊಕ್ಲಾನ್ ಜ್ಯೋರ್ ಆಸೊಂಕ್, ಸಿರ್ಲಾ ದಾಟ್ಟುಚಿ ಚೂಕ್ ನ್ಹಯ್ಗೀ? ಬೊಕುಲ್ ಜ್ಯೋರ್ ಮ್ಹಣ್ ಕಿತ್ಯಾಕ್ ಮ್ಹಣಿಜೆ?
"ಬೊಕ್ಲಾ’ಡೆ ಖೆಳ್ಚೆಂ ದಾಟ್ಟುನ್; ಬೊಕುಲ್ತ್ ಜಾಯ್ ಜಾಯ್ ಮ್ಹಣ್ ತಾಚೊ ವೇಳ್ ಪಾಡ್ ಕರಿನಾ, ನ್ಯೇ, ಮಾಂಯ್?" ಹಾಂವೆ ಮ್ಹಾಕಾ ಸುಸ್ತಾಲ್ಲೆಂ ಸಾಂಗ್ಲೆಂ.
"ತುಕಾ ಬಿತ್ತಾಕ್ ಕಾಲೆಂ ಸಮ್ಜತಾರೇ? ದಾಟ್ಟು’ಅಡೆ ಖೆಳ್ತಾ ಮಾತ್ ನ್ಹಯ್, ತ್ಯಾ ತಾಂಚ್ಯಾ ಮಾಜ್ರಾ’ಡೆಯ್ ಬಾರೀ ಗಾಡ ಘಾಲ್ತಾ. ಹಾಂಗಾ ಆಮ್ಚ್ಯಾ ಘರ್ಚೆಂ ಶಿತ್ ಸುಶೆಗಾತ್ ಆಂಬು’ಟ್ಟಾ, ಆನಿ ತ್ಯಾ ಮಾಜ್ರಾ’ಡೆ ವಚೊನ್ ಘಾಡಾಮೊಡಿ ಘಾಲ್ತಾ... ತಾಕಾ ಶಿಕಯ್ತಾಂ ಬೂದ್..."
"ಓ, ’ರಾಪಾಟ’ ಮ್ಹಳ್ಯಾರ್ ತೇಂಗೀ?" ಮ್ಹಾಕಾ ಆತಾಂ ಕಳ್ಳೆಂ. ವ್ಹಯ್, ಆಮ್ಚೊ ಬೊಕುಲ್ ಬೊಸ್ತು, ಘಡ್ಯೆ ಘಡ್ಯೆ, ಶಿಂತಿಗೆಲ್ಯಾ ಬಿಲ್ಲುಚಿ ಪಾಟ್ ಧರ್ನ್ ವೆತಾಲೊ; ಹ್ಯಾ ಬೊಸ್ತು ವರ್ವಿಂ, ತ್ಯಾ ಬಿಲ್ಲುಕ್ ಪಿಲಾಂ ಕಾಡ್ಚೆಂ ಮಾತ್ ಏಕ್ತ್ ಕಾಮ್! ಶಿಂತಿಚ್ಯಾ ಪಪ್ಪಾ-ಮಾಮ್ಮಿನ್ ಕಿತ್ಲೆಂ ಮಾರ್ನ್ ಧಾಂವ್ಡಾಯ್ಲ್ಯಾರ್ಯೀ, ಬೊಸ್ತು ತಾಂಚ್ಯಾಕ್ಯೀ ಚಡಿತ್ ಹುಶ್ಯಾರ್ ಆಸ್ಲೊ. ಅಮ್ಗೆರ್ ಘರಾ ನಾತ್ಲ್ಯಾರ್, ತೊ ಬಿಲ್ಲುಚಿ ಪಾಟ್ ಧರ್ನ್ ವಚೊನ್, ತಾಕಾ ರೊವಾಣೆಕ್ ಬಸ್ತಾಲೊ!
ಆಮಿ ಕಾಂಯ್ ಬೊಸ್ತುಕ್ ದಾರ್ ಘಾಲ್ನ್, ಘರಾ ಭಿತರ್ತ್ ದವರ್ಲಲೆಂ ಕಿತ್ಲೆಂ ಜಾಯ್ತ್? ತೊ ಬಿಲ್ಲುಕ್ ಊಬ್ ದೀಂವ್ಕ್ ಗೆಲ್ಲ್ಯಾ ದೀಸ್, ಮಾಂಯ್ನ್ ತಾಕಾ ಸುಶೆಗಾತ್ ಮಾರ್ಚೆಂ ಆಸ್ಲೆಂ; ತಾಚೆಂ ಸೊಬಿತ್ ನಾಕ್ ಧರ್ನ್ ರಾಂದ್ಣಿಚ್ಯಾ ಖುರಾಕ್ ಜ್ಯೊರಾನ್ ಘಶ್ಟುಂಚೆಂ ಆಸ್ಲೆಂ, ತಶೆಂ ತರೀ ತಾಕಾ ಘರ್ಚೆಂ ಮೂರ್ಗ್ ಲಾಗೊಂದಿ ಮ್ಹಣ್. ನಂಯ್ತ್ಲ್ಯಾ ಫಾತ್ರಾಕ್ ಮ್ಹಣೀ ತಾಚೆಂ ನಾಕ್ ಝರಯಿಲ್ಲೆಂ ತರ್, ಫಾತೊರ್ ಕರ್ಗೊನ್ ವೆತೊ ಕೊಣ್ಣಾ; ಪುಣ್ ಆಮ್ಚ್ಯಾ ಬೊಸ್ತುಕ್ ಬೂದ್ ಯೆಂವ್ಚಿ ಕೆದಾಳಾ?
ಮಾಂಯ್ಚಿ ಆತಾಂಚಿ ಆಜ್ನಾ ಆಯ್ಕೊನ್ ಆತಾಂ ಮಾಂಯ್ನ್ ಬೊಸ್ತುಕ್ ಬೂದ್ ಶಿಕಂವ್ಕ್ ನಿಚೆವ್ ಕೆಲಾ ಮ್ಹಣ್ ಮ್ಹಾಕಾ ಕಳ್ಳೆಂ. ಪುಣ್ ತೆಂ ತಿತ್ಲೆಂ ಬರೆಂ ನ್ಹಯ್, ನ್ಯೇ?
"ಕಾಲ್ಯಾಕ್ ಮಾಂಯ್, ತಾಕಾ ಬೆಶ್ಟೆಂಚ್ ದುಕಂವ್ಚೆಂ? ತಾಕಾ ಹೆರ್ ಕಶೆಂ ತರೀ ದುಸ್ರ್ಯೆ ರಿತಿರ್ ಬೂದ್ ಶಿಕಂವ್ಕ್ ನಜೊಗೀ?" ಮ್ಹಾಕಾ ಬೊಕ್ಲಾಚಿ ಬಿರ್ಮತ್ ದಿಸ್ಲಿ.
"ಆನಿ ತಾಕಾ ಬೂದ್ ಯೆಂವ್ಚಿ ಏಕ್ತ್ತ್’ಪ್ಟಿಂ. ’ಬೂದ್ ಯೆತಾ ಯೆತಾ’ ಮ್ಹಣ್ ರಾವ್ಲ್ಯಾರ್ ಆಮ್ಕಾಂ ಶಿತಾಕ್ ಖಾರ್, ಧರ್ಣಿಕ್ ಭಾರ್," ಮಾಂಯ್ಕ್ ಬೊಕ್ಲಾಚೆರ್ ಬಿರ್ಮತ್ ಯೇಂವ್ಕ್ ಸಾದ್ಯ್ ನಾತ್ಲಿ; ತಿಚೊ ನಿಚೆವ್ ಮ್ಹಳ್ಯಾರ್ ನಿಚೆವ್.
ಪುಣ್ ’ರಾಪಾಟಾಕ್’ ಪಿಚ್ಚ್ಯೊ ಕಾಡ್ಚ್ಯೊ ಹಾಂವೆ ಖಂಯ್ಯೀ ಆಯ್ಕೊಂಕ್ ನಾತ್ಲ್ಲೆಂ. ಮಾಂಯ್ಕ್ ಖಂಡಿತ್ ಚಡಿತ್ ಗೊತ್ತಾಸ್ತೆಲೆಂ.
ಆಮಿ ಚಡಾವತ್ -ಮ್ಹಾಕಾ ಉಡಾಸ್ ಆಸ್ಲ್ಲೆ ಪರ್ಮಾಣೆ- ಮಾಜ್ರಾಂಕ್ ಮಾತ್ ಪೊಸ್ಚೆಂ; ಬೊಕ್ಲಾಂಕ್ ಪೊಸಿನಾತ್ಲ್ಲ್ಯಾಂವ್. ಹೆಂ ಪಯಿಲ್ಲೆ’ಪ್ಟಿಂ ಬೊಕ್ಲಾಕ್ ಪೊಸ್ಚೆಂ. ಪುಣ್ ಬೊಕ್ಲಾಕ್ ಏ’ಪ್ಟಿಂ ಪೊಸುನ್ಯಿ ಕಹಲಿ ಗತ್ ಜಾಲಿಗಾಯ್?
ಹೆರಾಂಗೆರ್ ಬೊಕ್ಲಾಂಕ್ ಪೊಸ್ತಾಲೆ. ಆದ್ಲೆ’ಪ್ಟಿಂ ವಿಲ್ಲಿ ಸಾಂಗ್ತಾಲೊ ತಾಣಿಂ ತಾಂಚ್ಯಾ ಬೊಕ್ಲಾಚ್ಯೊ ಪಿಚ್ಚ್ಯೊ ಕಾಡ್ಲ್ಲ್ಯೊ ಮ್ಹಣ್. ಪಿಚ್ಚ್ಯೊ ಕಾಡ್ಲ್ಯಾರ್ ಬೊಕುಲ್ ಗುಡ್ಯಾಕ್ ಚಡನಾಂತ್ ಖಂಯ್. ನ್ಹಯ್ ತರ್, ಬೊಬಾಟುನ್ ಬೊಬಾಟುನ್ ರಾನಾಕ್ ವೆತಾತ್. ಮಾಗಿರ್ ಆಮಿ ದುಸ್ರ್ಯಾ ಮಾಜ್ರಾಕ್ ಹಾಡಿಜೆ; ಮ್ಹಜ್ಯಾ ಸುಮಾರ್ ಇಶ್ಟಾಂಗೆರ್ ಹಿತ್ ಗತ್ ಜಾತಾಲಿ. ಮಾಜ್ರಾಂ ತರ್, ಘರಾತ್ ರಾವ್ತಾತ್. ಬೊಕುಲ್ ವ್ಹಡ್ ಜಾತಾನಾ ಥೊಡ್ಯಾತ್ ಮಹಿನ್ಯಾಂನಿ ಗುಡ್ಯಾಕ್ ಚಡ್ತಾತ್; ಮಾಗಿರ್ ತಾಂಕಾಂ ಶಿತ್ ಖೆಲ್ಲ್ಯಾ ಘರ್ಚೊ ಉಡಾಸ್ತ್ತ್ ನಾ!
ಪುಣ್ ಹಾಂವೆ ಚಿಂತ್ಲ್ಲೆಂ ನಾಂಕೀ, ಬೊಕ್ಲಾಚ್ಯೊ ಪಿಚ್ಚ್ಯೊ ಕಾಡ್ಲ್ಯಾರ್ ತೊ ಮಾಜ್ರಾ ಪಾಟ್ಲ್ಯಾನ್ ವೆಚೆಂ ರಾವಯ್ತ್ ಮ್ಹಣ್. ಮ್ಹಜ್ಯೆ ಪರ್ಮಾಣೆ ಬೊಕ್ಲಾಚ್ಯೊ ಪಿಚ್ಚ್ಯೊ ಕಾಡ್ಚ್ಯೊ ಬೊಕ್ಲಾನ್ ಗುಡ್ಯಾಕ್ ಚಡನಾತ್ಲ್ಯಾಬರಿ. (ಆನಿ ತೆ ಗುಡ್ಯಾಕ್ ಕಾಲ್ಯಾಕ್ ಚಡ್ತಾತ್ ಮ್ಹಣ್ ಹಾಂವೆ ಆಟಾಪಿಲ್ಲೆಂ ನಾ. ಪುಣ್ ಗುಡ್ಯಾಕ್ ಗೆಲ್ಯಾ ಉಪ್ರಾಂತ್ ತೆ ಬೊಕುಲ್ ಆಸ್ಲ್ಲೆ ವಾಗ್ ಜಾತಾತ್ ಮ್ಹಣ್ ಹಾಂವೆ ಆನಿ ವಿಲ್ಲಿನ್ ನಿರ್ದಾರ್ ಕೆಲ್ಲೊ.)
"ಮಾಂಯ್, ಬೊಕ್ಲಾಚ್ಯೊ ಪಿಚ್ಚ್ಯೊ ಕಾಡ್ಚ್ಯೊ: ಬೊಕುಲ್ ಗುಡ್ಯಾಕ್ ಚಡನಾತ್ಲ್ಯಾಬರಿ, ನ್ಯೇ? ತರ್, ತಾಣೆ ಆಮ್ಗೆರ್ತ್ ಆಸೊನ್ ತ್ಯಾ ಶಿಂತಿಗೆಲ್ಯಾ ಮಾಜ್ರಾಲಾಗಿಂ ರಾಪಟ್ಚ್ಯಾಕ್ ಆನಿ ತಾಚ್ಯೊ ಪಿಚ್ಚ್ಯೊ ಕಾಡ್ಚ್ಯಾಕ್ ಕಿತೆಂ ಸಂಬಂದ್?"
"ತೆಂ ಮ್ಹಾಕಾ ಕಿತೆಂ ಗೊತ್ತು? ತುಂ ಚಡ್ ಜಿಂಗ್ರಿ ಪಿಸಾಂವ್ ಉಲಯ್ನಾಕಾ, ಹಾಂ," ಮಾಂಯ್ನ್ ಕಶೆಂಗೀ ಚುಕೊನ್ ಕಾಣ್ಘೆಲೆಂ ಮ್ಹಣ್ ಮ್ಹಾಕಾ ಭಗ್ಲೆಂ.
"ಮಾಗಿರ್..."
"ಮಾಗಿರ್ ನ್ಹಯ್, ಆತಾಂ ಥಂಡ್ ಬಸ್; ತುಕಾ ಸಾಂಗ್ಲ್ಲೆಂ ಕಾಮ್ ಕರ್. ಚಲ್, ಬರಿ ಏಕ್ ಮೊಡ್ಕಿ ಆಣ್ನ್ಯೇ," ಮಾಂಯ್ನ್ ಫರ್ಮಾಯ್ಲೆಂ.
ಹಾಂವೆ ಘರಾ ಭಂವ್ತಿಂ ಭಂವೊನ್, ಲ್ಹಾನ್ ಕಾಂಟಾಚಿ ಏಕ್ ಪರ್ನಿ ಮೊಡ್ಕಿ ಹಾಡ್ಲಿ. ಜನೆಲಾ ಥಾವ್ನ್ ತೀಳ್ನ್ಂತ್ ಆಸ್ಲ್ಲ್ಯಾ ಶಿಂತಿನ್, "ಕಾಲ್ಯಾಕ್ರೇ, ತೆಂ?" ಮ್ಹಣ್ ಶೇಲ್ಯಾಂನಿ, ನಾಕಾಂತ್ಲ್ಯಾನ್ ವಿಚಾರ್ಲೆಂ.
"ಬೊಕ್ಲಾಚ್ಯೊ ಪಿಚ್ಚ್ಯೊ ಕಾಡುಂಕ್ ಆಸಾತ್," ಹಾಂವೆ ಬೆಜಾರಾಯೆನ್ ಸಾಂಗ್ಲೆಂ.
"ಕಾಲ್ಯಾಕ್, ತುಮ್ಚೊ ಬೊಕುಲ್ ಗುಡ್ಯಾಕ್ ಚಟ್ಟಾಗೀ?" ತಾಣೆ ದೊಳೊ ಮೊಡ್ಲೊ.
"ನಾ ಸಾಯ್ಬಿಣಿ; ತೊ ತುಮ್ಚ್ಯಾ ಬಿಲ್ಲು ಪಾಟ್ಲ್ಯಾನ್ ಲಾಗ್ಲಾ ಮ್ಹಣ್ ಮಾಂಯ್ಕ್ ರಾಗ್ ಆಯ್ಲಾ; ಕಿತೆಂ ಕೆಲ್ಯಾರೀ ತೊ ಆಯ್ಕನಾ’ಹಿಂ. ದೆಕುನ್ ಬೆಶ್ಟೆಂತ್, ಮಾಂಯ್ ತಾಚ್ಯೊ ಪಿಚ್ಚ್ಯೊ ಕಾಡಿಜೆ ಮ್ಹಣ್ ಹಟಾಕ್ ಲಾಗ್ಲ್ಯಾ."
"ಆನಿ ಎಕದಾವೆಳಾ, ಪಿಚ್ಚ್ಯೊ ಕಾಡ್ಲ್ಯಾ ಉಪ್ರಾಂತೀ ತೊ ಆಮ್ಚ್ಯಾ ಬಿಲ್ಲು ಪಾಟ್ಲ್ಯಾನ್ಂತ್ ಆಸತ್ ತರ್?" ಶಿಂತಿನ್ ಪರ್ತುನ್ ದೊಳೊ ಮೊಡುನ್ ಮ್ಹಾಕಾ ವಿಚಾರ್ತಾನಾ, ಮ್ಹಾಕಾ ಏಕ್ ನಮೂನ್ ಜಾಲೆಂ. ತೆಂ ಶಿಂತಿ ವ್ಹಡ್ಲೆಂ ಚೂಡ್ಕೊತ್ರು.
ವ್ಹಯ್, ತಾಣೆ ಸಾಂಗ್ಚೆಂಯ್ ಸಮಾ. ಮಾಂಯ್ ಮೊಡ್ಕೆಚಿತ್ ವಾಟ್ ಪಳೆವ್ನ್ ಆಸಾ ಮ್ಹಣ್ ಉಡಾಸ್ ಯೇವ್ನ್, ಮೊಡ್ಕಿ ಘೆವ್ನ್ ಧಾಂವೊನ್ ಧಾಂವೊನ್ ಮಾಂಯ್ಸರ್ಶಿಂ ಆಯ್ಲೊಂ.
"ಮಾಂಯ್. ಮ್ಹಾಕಾ ಏಕ್ ಡಾವ್ಟ್ ಆಸಾ."
"ಆತಾಂ ಕಿತೆಂ ವ್ಹಡ್ಲೆಂ ಪುರಾಣ್ ಘೆವ್ನ್ ಆಯ್ಲಾಯ್?" ಮಾಂಯ್ನ್ ಸವಾಲ್ ಕೆಲೆಂ.
"ಬೊಸ್ತುಕ್ ಶಿಂತಿಗೆಲ್ಯಾ ಮಾಜ್ರಾಚೆರ್ ದೊಳೊ ಮ್ಹಣ್, ಆತಾಂ ತುಂ, ತಾಚ್ಯೊ ಪಿಚ್ಚ್ಯೊ ಕಾಡ್ತಾಯ್ಮೂ?"
"ವ್ಹಯ್, ತಾಂತುಂ ತುಕಾ ಕಿತೆಂ ಲುಕ್ಸಾಣ್ ಜಾಲೆಂ?" ಮಾಂಯ್ನ್ ಹಳ್ತಾಚೊ ಏಕ್ ಧೆಂಕ್ಣೊ ಘಾಲೊ.
"ಪುಣ್ ಬೊಕ್ಲಾಚ್ಯೆ ಪಿಚ್ಚ್ಯೆಕ್ ಆನಿ ತಾಚ್ಯೆ ಆಶೆಕ್ ಕಿತೆಂ ಸಂಬಂದ್?" ಮಾಂಯ್ಚೆಂ ರಾಗೀಶ್ಟ್ ತೋಂಡ್ ಪಳೆವ್ನ್ ಮ್ಹಾಕಾ ಹೆಂ ವೊರೆಸಾಂವ್, ಆಮ್ಸರಾ’ಮ್ಸರಾನ್ ಏ’ಪ್ಟಿಂ ಮುಗ್ದಿಯಾಂ ಮ್ಹಣ್ ಭಗ್ಲೆಂ...
"... ಬೊಕ್ಲಾಚ್ಯೊ ಪಿಚ್ಚ್ಯೊ ಕಾಡ್ಲ್ಯಾರ್ ತೊ ಆನಿ ಮುಕಾರ್ ತ್ಯಾ ಮಾಜ್ರಾ ಪಾಟ್ಲ್ಯಾನ್ ವಚನಾ ಮ್ಹಣ್ ಕಿತೆಂ ಗ್ಯಾರಂಟಿ? ತಾಚ್ಯೊ ಆಶಾ ಆಸ್ಚ್ಯೊ ಖಂಯ್?"
"ವೊಗೆತ್ತ್ ಬಸ್ಲೊಯ್ಗೀ ನಾ? ವೆಗಿಂ ತ್ಯಾ ಬೊಕ್ಲಾಕ್ ಆಣ್ಣ್, ಪಾಟ್ಲ್ಯಾ ಪಾಂಯಾಂಕ್ ಧರ್ನ್, ತಾಚಿ ಸೊಂಡಿ ಮುಕ್ಲ್ಯಾ ಪಾಂಯಾಂ ಸಮೇತ್ ಮೊಡ್ಕ್ಯೆಂತ್ ಘಾಲ್; ತಾಚ್ಯಾ ಪೆಂಕ್ಟಾ ಪಾಟ್ಲ್ಯಾನ್ ಮಾತ್ ಮೊಡ್ಕ್ಯೆ ಭಾಯ್ರ್ ಆಸೊಂದಿ."
ಹಾಂವೆ ನಾತ್ಲ್ಲ್ಯಾ ಮನಾನ್, ಪುಣ್ ದರ್ವಡಾನ್ ಮ್ಹಳ್ಳೆಬರಿ, ಮಾಂಯ್ನ್ ಸಾಂಗ್ಲ್ಲೆಬರಿತ್ ಕೆಲೆಂ. ಬೊಕುಲ್ ರಡೊಂಕ್ ಲಾಗ್ಲೊ. ’ಮ್ಯಾಂ...ವ್...’
*** *** ***
"ಮ್ಯಾಂ...ವ್"
ಖಂಚೆಂ ಮಾಜರ್ಗಾಯ್ ತೆಂ? ಆಮ್ಚೊ ಬೊಸ್ತು ಬಿಲ್ಕುಲ್ ನ್ಹಯ್; ಹಾಂ! ಬೋವ್ಶಾ ಶಿಂತಿಗೆಲೆಂ ಬಿಲ್ಲು! ತ್ಯೆ ಕುಶಿ ಥಾವ್ನ್ ಬಿಲ್ಲುಚೊ ತಾಳೊ ಆಯ್ಕೊನ್ ಮ್ಹಜೆ ಕಾನ್ ಚುರುಕ್ ಜಾಲೆ. ರಾಂದ್ಚ್ಯಾ ಕುಡಾಂತ್ ಪೆಜೆಚ್ಯೆ ಮೊಡ್ಕ್ಯೆ ಸಾಮ್ಖಾರ್ ಬಸ್ಲ್ಲೊಂ ಹಾಂವ್, ಭಾಯ್ರ್ ಸೊಪ್ಯಾಕ್ ಆಯ್ಲೊಂ. ಮಾಂಯ್ ಭಾಯ್ರ್ ಝಾಲಾಂತ್ ಬಸೊನ್, ವ್ಹೊಡ್ಪಾಂ ಕರುಂಕ್, ಮೊಡ್ಲಾಂಚಿ ತಟ್ಟಿ ವೊಳ್ತಾಲಿ.
ತಿತ್ಲ್ಯಾರ್ ಮಾಳ್ಯಾರ್ ಥಾವ್ನ್ ಆಮ್ಚೊ ಬೊಸ್ತು ’ದಾ....ಡ್ಡ್’ ಕರುನ್ ಸಕಯ್ಲ್ ಉಡೊನ್ ಭಾಯ್ರ್ ಧಾಂವೊನ್ ಆಯ್ಲೊ! ಭಿತರ್ಲ್ಯಾ ಕುಡಾ ಥಾವ್ನ್ ಸೊಪ್ಯಾಕ್ ಉಡೊನ್ ಯೆತಾನಾ, ತೊ ಮಾಂಯ್ಚ್ಯಾ ದೊಳ್ಯಾಂಕ್ಯೀ ಸಾಂಪ್ಡಾಲೊ, ಮ್ಹಣ್ ದಿಸ್ತಾ. ’ಮಾಂ...ವ್’, ಮ್ಹಣ್ ಸದಾಂಚೆಬರಿ ತಾಣೆ ಲಾಂಬ್ ಜಾಪ್ ದಿಲಿ.
"ಆಸಾಯ್ಗೀ ಬೊಕ್ಲಾ, ಜಿವಂತ್ ಆಸಾಯ್ಗೀ? ಖಂಯ್ ಮೆಲ್ಲೊಯ್ ಇತ್ಲೆ ದೀಸ್? ಆತಾಂ ತುಜೊ ಮಾಂವ್ ಸೊದುನ್ ಆಯ್ಲೊಯ್ಗೀ?" ಮಾಂಯ್ನ್ ತಾಕಾ ವ್ಹಡ್ ಶೆರ್ಮಾಂವ್ತ್ ದಿಲೊ.
ಪೋರ್ ಪಿಚ್ಚ್ಯೊ ಕಾಡ್ಲ್ಯಾ ಉಪ್ರಾಂತ್, ಆಮ್ಚ್ಯಾ ಬೊಕ್ಲಾನ್ ’ಮೌನ ಮುಶ್ಕರ’ ಸುರು ಕೆಲ್ಲೆಂಗೀ ಮ್ಹಣ್. ತೊ ಮಾಳ್ಯಾರ್ ಥಾವ್ನ್ ಸಕಯ್ಲ್ ಯೇಂವ್ಕ್ತ್ ನಾತ್ಲ್ಲೊ. ಮ್ಹಾಕಾ ಮುಣೀ, ತೊ ಖಂಯ್ ಆಸಾ ಮ್ಹಣ್ ಖಬರ್ ಆಸ್ಲ್ಲಿ; ಪುಣ್ ಮಾಂಯ್ಕ್ ತೆಂಯ್ ಗೊತ್ತುನಾತ್ಲ್ಲೆಂ!
ಹಾಂವ್ ಮಾಂಯ್ಚೆ ಪುರ್ಪುರೆ ಆಯ್ಕೊನ್, ಭಾಯ್ರ್ ಯೇವ್ನ್, ಬೊಕ್ಲಾಕ್ ಪಳಯಿತ್ತ್ ರಾವ್ಲೊಂ. ಬೊಕುಲ್, ತಾಚಿ ಶಿಮ್ಟಿ ಘುಂವ್ಡಾಯಿತ್ತ್, ಎಕ್ಯೆತ್ ಉಡ್ಕ್ಯೆನ್ ಮ್ಹಳ್ಳೆಬರಿ ಝಾಲಾಕ್ ಉಡ್ಲೊ ಆನಿ ಥಂಯ್ ಥಾವ್ನ್, ಪರ್ತುನ್ ’ಮ್ಯಾಂ...ವ್’ ಮ್ಹಣ್, ಶಿಂತಿಗೆಲ್ಯಾ ಆಂಗ್ಣಾಂತ್ ಉಬೆಂ ಕೆಲ್ಲ್ಯಾ ಭಾತೆಣಾಚ್ಯಾ ಕುಡ್ಯಾ ಪಾಟ್ಲ್ಯಾನ್ ನಪಂಯ್ಚ್ ಜಾಲೊ!
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
