ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾಝರ್ - 27. ವಾರೆಸ್ದಾರ್
ನಂದಿನಿ: ಹ್ಯಾ ಲಿಖ್ಣೆ ನಾಂವಾರ್ ಕೊಂಕ್ಣಿ ಸಾಹಿತ್ಯಾಂತ್ ಫಾಮಾದ್ ಜಾಲ್ಲಿ ಮಾನೆಸ್ತಿಣ್ ಸ್ಟೆಲ್ಲಾ ಡಿ’ಕೋಸ್ತಾ ಏಕ್ ಭಳ್ವಂತ್ ಕಾಣ್ಯೆಗಾರ್ನ್, ತಿಚಾ ಮಟ್ವ್ಯಾ ಕಾಣ್ಯಾಂಚೊ ಬೂಕ್ ’ಆಕಾಂತ್ ಆನಿ ಹೆರ್ ಕಥಾ’ ಪ್ರಗತಿ ಪ್ರಕಾಶನ್ಧ್ವಾರಿಂ ಪರ್ಗಟ್ಲಾ. ಸಾಹಿತ್ಯ್ ತಿಚಾ ಘರ್ಚಾ ಕೊನ್ಶಾ ಕೊನ್ಶಾಂನಿ ಅಸೊಂಕ್ ಸಾಧ್ಯ್ ಕಿತ್ಯಾಕ್, ತಿಚೊ ಪತಿ ಚಾ.ಫ್ರಾ.ದೆ’ಕೋಸ್ತಾ ತರ್ ತಿಚಿ ಧುವ್ ಸೋನಿಯಾ ಡಿ’ಕೋಸ್ತಾ ಸಯ್ತ್ ಏಕ್ ಕಾಣ್ಯೆಗಾರ್ನ್ ಮ್ಹಣ್ತಾನಾ ವಾಚ್ಪ್ಯಾನ್ ಅಂದಾಜ್ ಘಾಲ್ಯೆತಾ.
ನಂದಿನಿ
“ಆಬಾ, ಥೊಡ್ಯಾ ತೆಂಪಾಕ್ ಮಲ್ಲುಕ್ ತುಜೆ ಸರ್ಶಿನ್ ಸೊಡ್ತಾಂ, ತಾಚಿಂ ಪೊಕ್ರಿಪಣಾಂ ತೊ ಘರಾಚ್ ರಾವತ್ ತರ್ ಸುಟ್ಚಿಂ ನಾಂತ್. ತಾಕಾ ಬೂದ್ ಯೇಜಾಯ್ ತರ್ ತರ್ ಥೊಡೊ ತೇಂಪ್ ತಾಕಾ ಘರ್ಚೆಂ ಸುಖ್ ಮೆಳಾನಾಯೆ.’
ಆಬ್ ಉಲಂವ್ಚಾ ವೆಕ್ತಿಕ್ ಪಳೊಂಕ್ ಲಾಗ್ಲೊ. ಹೆಂ ಕೊಣ್ ಬಾಯ್? ಮಾಕಾ ಕಿತೆಂ ಲಾಗ್ತಾಂ? ಧುವ್ ಆಸ್ಚೆಂ ನಾ, ನಾತ್ ಆಸೊಂಕ್ ಪುರೊ, ಧುವೆಚೆಂ ಯಾ ಪುತಾಚೆಂ?.....ಮಾಗಿರ್ ಹೊ ಚೆರ್ಕೊ? ನಾಂವ್ ಕಿತೆಂ? ಮಲ್ಲು ಖಂಯ್. ಹ್ಯಾ ಚೆರ್ಕ್ಯಾಚಿ ಆವಯ್ ದಿಸ್ತಾ. ಹಾಕಾ ಕಿತ್ಯಾಕ್ ಹಾಚೊ ಪುತ್ ಜಡ್ ಜಾತಾ? ಆಬಾನ್ ಚೆರ್ಕ್ಯಾಕ್ ಪಳಯ್ಲೆಂ. ಸಾತ್ ಆಟ್ ವರ್ಸಾಂಚೊ ಪೋರ್! ಕಿತೆಂ ಕರ್ತಾ ಹೊ? ಕಿತೆಂ ಕರಿತ್?
ಆಬ್ ಚಿಂತುನ್ ಆಸ್ತಾನಾಂಚ್ ಮಲ್ಲುಚಿ ಆವಯ್ ಮ್ಹಣಾಲಿ, “ಆಬಾ, ಹಾಂವ್ ವೆಗಿಂಚ್ ಯೆತಾ, ಚೆರ್ಕ್ಯಾಕ್
ಆಪವ್ನ್ ವರುಂಕ್.’-ಆಬಾಚಿ ಒಪ್ಪಿಗಿ ತಿಕಾ ಜಾಯ್ ಆಸ್ಚೆ ಬರಿ ದಿಸಾನಾತ್ಲ್ಲಿ. ನಾಕಾ ಜಾಲ್ಲೆಂ ವಜೆಂ ನಿಸ್ರಾಂವ್ಚಾ ಅಮ್ಸರಾರ್ ಆಸ್ಲ್ಲೆ ಬರಿ ದಿಸ್ತಾಲಿ. ತಿ ಅಮ್ಸರಾನ್ ಗೆಲಿ. ಕಾರ್ ಸುಟ್ಲ್ಲೊ ಆವಾಜ್ ಜಾತಾನಾ ಆಬಾನ್ ಆಪ್ಲ್ಯಾ ಸೈರ್ಯಾಕ್ ಬರೆಂ ಕರ್ನ್ ಪಳಯ್ಲೆಂ. ಚಾರ್ಕುಟಾಬರಿ ದಿಸ್ಚಾ ಚೆರ್ಕ್ಯಾಕ್ ಪಳವ್ನ್ ತಾಕಾ ಏಕ್ ಥರ್ಶೆಂ ಜಾಲೆಂ......“ಜೆವ್ತಾಯ್ ರೆ?
ತಾಣೆಂ ವಿಚಾರ್ಲೆಂ. “ಜೆವಿನಾ’’ ಮ್ಹಣಾಲೊ ನಾತು ಖೆಂವ್ಚೊನ್. ತಾಚಾ ತೊಂಡಾರ್ ಗಾಂಟಿ ಆಸ್ಲ್ಲ್ಯೊ. ಮುಟಿ ಅರ್ನಾಲ್ಲ್ಯೊ. “ನಾಕಾರೆ, ಸೊಡ್.’ಮ್ಹಣಾಲೊ ಆಬ್. ತಾಣೆಂ ತೆಂಕ್ಡಿ ಕಾಣ್ಘೆವ್ನ್ ದೋನ್ ಆಂಬೆ ಜಡಯ್ಲೆ. ಥಂಂಚ್ ಫ಼ಾತ್ರಾರ್ ಬಸೊನ್ ಪಿಕ್ಯಾ ಆಂಬ್ಯಾಕ್ ಘಾಸ್ ಮಾರ್ನ್ � ಲಾಗ್ಲೊ. ಪರ್ಮಳಿಕ್ ಆಮ್ರಸ್ ಥೆಂಬೆ ಥೆಂಬೆ ಗಳೊನ್ ಮಾತಿಯೆಂತ್ ಜಿರ್ಲೊ. ನಾತು ಪಳೇತ್ ರಾವ್ಲೊ. ಆಬ್ ದುಸ್ರೊ ಆಂಬೊ ಖಾಂವ್ಕ್ ಲಾಗ್ಲೊ. ನಾತ್ವಾನ್ ಥಿಂಪಿ ಗಿಳ್ಳಿ. “ಆಂಬೊ ಜಾಯ್?’ನಾತ್ವಾನ್ ತಕ್ಲಿ ಹಾಳು.
“ತೆಂಕ್ಡೆನ್ ಕಾಡ್ನ್ ಖಾ. ಬಾರಿ ಬರೊ ಆಸಾ ಆಂಬೊ...’ಆಬಾನ್ ವೋಂಠ್ ಲೆವ್ಲೆ. ತೆಂಕ್ಡಿ ನಾತ್ವಾನ್ ಚಿಂತ್ಲ್ಲೆ ತಿತ್ಲಿ ಹಳು ನಾತ್ಲ್ಲಿ, ತಾಚಾಕೀ ಸುಮಾರ್ ವಾಂಟೆ ವ್ಹಡ್ ಆಸ್ಲ್ಲಿ. ತಿ ನೀಟ್ ಧರುಂಕ್ ತೊ ಉಡ್ಡಾತಾನಾ ಆಬ್ ಮ್ಹಣಾಲೊ, “ತುಜಾ ಪ್ರಾಯೆರ್ ಹಾಂವ್ ರುಕಾರ್ ಚಡೊನ್ ಆಂಬೆ ಖಾತಾಲೊಂ.’’
“ಯೆಬ್ಬೇ! ಹಾಂವ್ ಪೈಪಾಕ್ ಧರ್ನ್ ದುಸ್ರಿ ಮಾಳಯ್ ಕಿತ್ಯಾಕ್ ಸೊಡ್ಲ್ಯಾರ್ ಸಕ್ಕಡ್ ಮಾಳ್ಯೊ ಚಡ್ತಾಂ!’’
“ವ್ಹಯ್ಗೀ..? ತಶೆಂ ಜಾಲ್ಯಾರ್ ಬರೆಂಚ್ ಜಾಲೆಂ. ಥೊಡ್ಯಾಚ್
ತೇಂಪಾನ್ ಮಾಡಾಚೆ ನಾರ್ಲ್ ಪುರಾ ಕಾಡ್ಯೆತ್ ತುಕಾ!’ಆಬ್
ಮ್ಹಣಾಲೊ.
ನಾತ್ವಾಚಾ ತೊಂಡಾವಯ್ಲ್ಯೊ ಗಾಂಟಿ ಸುಟೊಂಕ್ ಲಾಗ್ಲ್ಯೊ. ತಾಣೆಂ ಮಾಡ್ ಪಳಯ್ಲೆ. “ಯೆಬ್ಬೆ !
ಹೆಂ ಕಾಲೆಂ? ದೋನ್ ತೀನ್ ಮಾಳ್ಯಾಂಚಿ ಉಬಾರಾಯ್ ! ತುಕಾ ರಾಗ್ ಯೆಂವ್ಚೊನಾ.? ಆಮ್ಗೆರ್ ಸಕ್ಡಾಂಕ್
ಹಾಂವ್ ಪೈಪಾವಯ್ಲ್ಯಾನ್ ಆಯ್ಲ್ಯಾರ್ ರಾಗ್ ಯೆತಾ. ಮಾಮ್ಮಿ ಮಾಕಾ ಮಾರ್ತಾ. ತಿಣೆಂ ಮಾರ್ಚಾಕ್ ಹಾಂವ್ ಭಿಯೆನಾ. ತಿಣೆಂ ಮಾರ್ಲ್ಯಾರ್ ಹಾಂವ್ ಜೆವಿನಾತ್ಲ್ಲೊಂ ಹಾಂವ್ ಜೆವಿನಾ ಜಾಲ್ಯಾರ್ ತಿ ಮಾಕಾ ಪರ್ತುನ್ ಮಾರ್ತಾಲಿ. ತುಂ ಮಾರ್ತಾಯ್ ಮಾಕಾ?’’ ನಾತ್ವಾನ್ ವಿಚಾರ್ಲೆಂ.
“ನಾ ರೆ, ಕಿತೆಂಯ್ ಕರ್, ಹಾಂವ್ ಮಾರಿನಾ. ಚಡ್, ಊಡ್, ಧಾಂವ್, ಪಡ್, ಜೇವ್, ಉಪಾಶಿಂ ರಾವ್, ಕಿತೆಂಯ್ ಕರ್. ಹಾಂವ್ ತುಕಾ ಮಾರಿನಾ’ಮಾಗಿರ್ ತುಮ್ಗೆರ್ ಮಾಕಾ ಏಕ್ ಕೂಡ್ ಆಸಾ?
“ಕುಡಾಂ ಜಾಯ್ತಿಂ ಆಸಾತ್ರೆ. ಮ್ಹಜಾ ಧಾ ಜಣಾಂ ಭುರ್ಗ್ಯಾಂಕ್ ಬಾಂದುಂಕ್ ಘಾಲ್ಲಿಂ, ಧಾ ಕುಡಾಂ ಆಸಾತ್. ಏಕ್ ತುಕಾ.
“ಹುಂ....’ಮ್ಹಣಾಲೊ ನಾತು ಹಟ್ಟೀ ತಾಳ್ಯಾನ್. “ಹಾಂವ್ ತೆಂ ನಿತಳ್ ಕರಿನಾ.’’
“ನಾಕಾ’ಮ್ಹಣಾಲೊ ಆಬ್ ಬಸ್ಲ್ಲೆ ಕಡ್ಚೊ ಉಟೊನ್.
“ಮಾಗಿರ್ ಹಾಂವ್ ಸಗ್ಳ್ಯಾ ಘರಾಂತ್ ನಾಚ್ತಾಂ, ಉಡ್ತಾಂ, ಬೋಬೊ ಘಾಲ್ತಾಂ....’’
ಆಬಾನ್ ಜಾಪ್ ದಿಲಿನಾ. ತಾಣೆಂ ವಚೊನ್ ಏಕ್ ಬುತಾಂವ್ ದಾಂಬ್ಲೊ. ತೀನ್ ವಾಟಾಂಚಾ ಪೈಪಾಂನಿ ಉದಕ್ ಉಸ್ಳೊನ್ ವ್ಹಾಳಾಲಾಗ್ಲೆಂ. ಚೆರ್ಕೊ ಉಟೊನ್ ತೀನಿ ಕಡೆನ್ ಧಾಂವಾಲಾಗ್ಲೊ. ಆಬಾನ್ ಏಕ್ ಪೈಪ್ ಧರುನ್ ತಾಕಾ ಉದಕ್ ಉಸ್ಳಾಯ್ಲೆಂ. ಚೆರ್ಕೊ ಕಿಂಕ್ರಾಟ್ಯೊ ಮಾರ್ನ್ ನಾಚಾಲಾಗ್ಲೊ.. ಆಬಾನ್ ತಾಕಾ ಕಿತೆಂಯ್ ಕಾಮ್
ಫರ್ಮಾಯ್ಲೆಂ ನಾ. ಇಲ್ಲ್ಯಾ ವೆಳಾನ್ ನಾತು ಆಬಾಲಾಗಿಂ ಯೇವ್ನ್ ವಿಚಾರಿಲಾಗ್ಲೊ, “ಹಾಂವೀ ಉದಕ್ ಘಾಲುಂ?"
“ಒಹೊ, ಪಳೆ ತ್ಯಾ ಕುಶಿನ್ ರಾಂದ್ವಯ್ ಕೆಲ್ಯಾ, ತೆಣೆಂ ಉದಕ್ ಸೊಡ್.’’
ನಾತು ಪಾಯ್ಪ್ ಉಕಲ್ನ್ ಉದಕ್ ಸೊಡಿಲಾಗ್ಲೊ. ಪುಣ್ ಥೊಡ್ಯಾಚ್ ವೆಳಾನ್ ತಾಚೆ ಥಂಯ್ ಆಸ್ಚೊ ಪೊಕ್ರಿ ಸಯ್ತಾನ್ ಜಾಗೊ ಜಾಲೊ. ತಾಣೆಂ ಆಬಾಕ್ ಪಳೆಲೆಂ. ಆಬ್ ತಾಕಾ ಪಾಟ್ ಕರ್ನ್ ಮಾಡಾಕ್ ಉದಕ್ ಸೊಡ್ನ್ ಆಸ್ಲ್ಲೊ. ನಾತ್ವಾನ್ ಆಬಾಚಾ ಪಾಟಿಕ್ ಉದ್ಕಾಚೊ ಪಾಯ್ಪ್ ಧರ್ಲೊ. ಜಾಪ್ ಜಾವ್ನ್ ಆಬಾನ್ ನಾತ್ವಾಕ್ ಭಿಜಯ್ಲೊ. ಏಕ್ ಧಾ ಮಿನುಟಾಂನಿ ಆಬ್ ಆನಿ ನಾತು ದೊಗೀ ಭಿಜೊನ್ ಮುದೊ ಜಾಲೆ. ಕೇಸ್ ತಕ್ಲೆಕ್ ಚಿಟ್ಕಾಲೆ. ಸಾಂಜೆಚೊ ಸುರ್ಯೊ ಬುಡ್ತಾನಾ ಆಪ್ಲೊ ಪ್ರಕಾಸ್ ಹಾಂಚಾ ತೊಂಡಾರ್ ಸೊಡ್ನ್ ಗೆಲೊ. ದೊಗೀ ಭಿತರ್ ಗೆಲೆ. “ಹಾಂವ್ ತುಕಾ ಕಿತೆಂ ಮ್ಹಣ್ ಆಪಂವ್?"
“ಆಬ್ ಮ್ಹಣ್. ಮಾಕಾ ಅನಿ ದೋನ್ ವರ್ಸಾಂನಿ ಶೆಂಬೊರ್ ವರ್ಸಾಂ ಜಾತಾತ್. ಹಾಂವ್ ಆತಾಂ
ಸಗ್ಳ್ಯಾ ಸಂಸಾರಾಕ್ ಆಬ್. ! ಪುಣ್ ತುಂ ಮಾಕಾ ಕೊಣ್ ಮ್ಹಳ್ಳೆಂ ಕಳೊಂಕ್ಚ್ ನಾ.’’
“ಹಾಂವ್ ವಾಗ್,’’ ಮ್ಹಣಾಲೊ ಚೆರ್ಕೊ ವಾಗಾಬರಿ ಘೊರೊಜ್ ಘಾಲ್ನ್. ಆಬಾನ್ ಪಾಟಿಂ ಘೊರೊಜ್ ಘಾಲಿ. ಥೊಡೊ ವೇಳ್ ಘರಾಂತ್ ವಾಗಾಂಚೊ, ಹಸ್ತಿಂಚೊ, ಪೆಟ್ಯಾಂಚೊ, ಮಾಜ್ರಾಂಚೊ, ಉಂದ್ರಾಂಚೊ ಇತ್ಯಾದಿ ಬೊಬೊ ಜೊರಾನ್ ಜಾಲ್ಯೊ. ಉಪ್ರಾಂತ್ ದೊಗೀ ಜಣ್ ಜೊರಾನ್ ಹಾಸಾಲಾಗ್ಲೆ.
ತ್ಯಾ ರಾತಿಂ ನಾತ್ವಾನ್ ಆಬಾಚಿ ಪಾಟ್ ಸೊಡ್ಲಿ ನಾ.. ತೊ ಆಬಾಕ್ಚ್ ಪಳವ್ನ್ ಆಸ್ಲ್ಲೊ. ಪಳೆತಾಂ,
ಪಳೆತಾಂ ದೆವಾಬಾಪಾನ್ ಆಬಾಕ್ ಆನಿ ನಾತ್ವಾಕ್ ಅಸಲ್ಯಾ ಎಕಾ ಬಾಂದಾಂತ್ ಬಾಂದುನ್ ಘಾಲೆಂ ಕಿ
ನಾತು ಸದಾಂಕಾಳ್ ತ್ಯಾ ಬಾಂದಾಂತ್ ಬಾಂದೊನ್ ಉರ್ಲೊ.
ಮಲ್ಲುನ್ ಉಗ್ಡಾಸಾಂಚಿ ಪೊಟ್ಲಿ ಬಾಂದ್ಲಿ. ಹಾತಾಂತ್ಲಿ ಫ಼ುಲಾಂಚಿ ರಾಸ್ ಬಾಗ್ವೊನ್ ಫ಼ೊಂಡಾರ್ ದವರ್ಲಿ.
ಹ್ಯಾಚ್ ಜಾಗ್ಯಾರ್ ತಾಂಚಿ ಪ್ಲು ಭೆಟ್ ಜಾಲ್ಲಿ. ತಾಚೆ ಆವಯ್ನ್ ತಾಕಾ ಹ್ಯಾ ಪ್ರಾಯ್ವಂತಾಚಾ ಹರ್ಧ್ಯಾರ್ ಘಾಲ್ಲೊ. ಆನಿ ಹ್ಯಾ ಮಹಾನ್ ವ್ಯಕ್ತಿನ್ ತಾಕಾ ಜಿಣಿ ದಿಲ್ಲಿ. ಮಲ್ಲುಕ್ ಅಜೂನ್ ಆಬಾಚಾ ಪ್ರಾಯೆಚೊ ಅಂದಾಜ್ ನಾ. ಆಬ್ ಕೆದಾಳಾಯ್, “ಅನಿ ದೋನ್ ವರ್ಸಾಂನಿ ಮಾಕಾ
ಶೆಂಬೊರ್ ವರ್ಸಾಂ ಜಾತಾತ್ ಮ್ಹಣ್ ಸಾಂಗ್ತಾಲೊ.
ಆಬಾಕ್ ಧಾ ಜಣಾಂ ಭುರ್ಗಿಂ, ಹರೆಕಾ ಭುರ್ಗ್ಯಾಕ್ ಎಕೇಕ್ ಕೂಡ್ ಬಾಂದ್ಲ್ಲೆಂ ಆಬಾನ್. ಆಬಾಚಿ ಭುರ್ಗಿಂ ಆಪ್ಣಾಕ್ ಕಿತೆಂ ಲೆಕ್ತಾತ್ ತೆಂ ಮಲ್ಲು ನೆಣಾಂ. ಕಾರಣ್ ಮಲ್ಲುಚಿ ಆವಯ್ ಆಪ್ಣಾಕ್ ಕಿತೆಂ ಲೆಕ್ತಾ ಮ್ಹಣ್ ಆಬ್ ನೆಣಾಂ. ತಾಚಿಂ ಭುರ್ಗಿಂ ಕಿತೆಂ ಜಾಲಿಂ? ಪುರಾ ಪಯ್ಸ್ ಪಾವ್ಲಿಂ. ಬುಧ್ವಂತ್ ಆಸ್ಲ್ಲಿಂ ಜಾಲ್ಲ್ಯಾನ್ ಹಳ್ಳೆಚಿ ಮಾತಿ ಬರಿ ಲಾಗ್ಲಿನಾ. ದೆಕುನ್ ಪಯ್ಸ್ ಪಾವ್ಲ್ಲಿಂ. ತರೀ ಆಬಾನ್ ಆಪ್ಲ್ಯಾ ಉತರ್ ಪ್ರಾಯೆರ್ ತಿ ಭುಂಯ್ ಪಾಚ್ವಿ ದವರ್ಲ್ಲಿ. ಗೊಟೊ ಭರೊನ್ಂಚ್ ಆಸ್ಲ್ಲೊ, ಪೀಕ್ ಜಾತೆಚ್ ಆಸ್ಲ್ಲಿ - ಫ಼ುಲಾಂ ಫ಼ುಲ್ತಾಲಿಂ ಆನಿ ಫ಼ಳಾಂ ಪಿಕ್ತಾಲಿಂ.
ನಾತು ಆಬಾ ಸಾಂಗಾತಾ ಇಗರ್ಜೆಕ್ ವೆತಾಲೊ. ಪಾದ್ರ್ಯಾಬಾನ್ ತಾಕಾ ಇಸ್ಕೊಲಾಕ್ ಯೇ ಮ್ಹಳ್ಳ್ಯಾಕ್ ತಾಣೆಂ ಆಬಾಕ್ ಪಳುಲ್ಲೆಂ. ಆಬಾನ್ ಜಾಯ್ ಜಾಲ್ಯಾರ್ ವಚ್ ಮ್ಹಳೆಂ ಆನಿ ತೊ ತ್ಯಾ ಹಳ್ಳೆಚಾ ಇಸ್ಕೊಲಾಕ್ ದಾಖಲ್ ಜಾಲ್ಲೊ. ಶಹರಾಂತ್ಲ್ಯಾ ಇಂಗ್ಲೆಜ್ ಇಸ್ಕೊಲಾಂನಿ ಉಬ್ಜಾಲ್ಲ್ಯಾ ಕಷ್ಟಾಂಚಿ ಹಾಂಗಾ ಸಾವ್ಳೀಯ್ ನಾತ್ಲ್ಲಿ. ಅಪ್ರೂಪ್ ಉಬ್ಗೊಣ್ ಯೆತಾನಾ ಘರಾ ರಾವ್ತಾಲೊ. ಆಬಾನ್ ಮಾರ್ಲ್ಲೆಂ ನಾ. ಇಸ್ಕೊಲಾಂತ್ ರಜೆ ಚೀಟ್ ವಿಚಾರ್ಲ್ಲಿನಾ. ಮಲ್ಲು ಆಬಾಗೆರ್ ಧಾದೊಸ್ ಆಸ್ಲ್ಲೊ ಆನಿ ಆಬ್? ಆಬ್ ಕೆದಾಳಾಯ್ ದಾಧೊಶಿ ! ಆಬಾಚಾ ಕುಡಿಚಾ ಆನಿ ಮತಿಚಾ ಭಲಾಯ್ಕೆಚೊ ಘುಟ್ ತೊ ನೆಣಾಂ. ಪುಣ್ ಆಬ್ ಕೆದಾಳಾಯ್ ದಾಧೊಶಿ ! ಕಾಮ್ ಕರೀತ್ ಆಸ್ತಾಲೊ, ಪದಾಂ ಮ್ಹಣಾತ್ ಆಸ್ತಾಲೊ - ಘರಾಂತ್ ಕೊಣ್ ನಾ ಕೊಣ್ ಯೆತೆಚ್ ಆಸ್ತಾಲೆಂ. ಮಲ್ಲು ಆಬಾಚಾ ಮೊಗಾರ್ ಪಡ್ಲ್ಲೊ. ಆಬಾನ್ ತಾಚೆಂಲಾಗಿಂ, “ತುಂ ಕೊಣ್? ಮಾಕಾ ಕಿತೆಂ ಲೆಕ್ತಾಯ್?’’ ಮ್ಹಣ್ ವಿಚಾರ್ಚೆಂ ಸೊಡ್ಲ್ಲೆಂ. ಕೊಣೀ ಆಬಾಲಾಗಿಂ
“ಹೊ ಕೊಣ್ ಚೆರ್ಕೊ? ಮ್ಹಣ್ ವಿಚಾರ್ಲ್ಯಾರ್ “ಹೊ ಮ್ಹಜೊ ನಾತು.’ ಮ್ಹಣ್ತಾಲೊ.
“ಧುವೆಚೊ ಯಾ ಪುತಾಚೊ?’’
“ನ್ಹಯ್, ನಾತಿಚೊ’’
“ಒಹ್ ! ಪೊಣ್ತುರ್!’’ ಮ್ಹಣೊನ್ ಸವಾಲ್ ಕೆಲ್ಲೊ ಅಜಾಪ್ ಪಾವ್ತಾಲೊ.
ಆಬಾಚಾ ಹಾತಾಂತ್ ಮಲ್ಲು ವೀಸ್ ವರ್ಸಾಂ ತರ್ಬೇತ್ ಜಾಲೊ. ಆಬಾಚಿ ಜಿಣಿ ಆನಿ ಕಾಮ್ ತಾಕಾ ಶಿಕಾಪ್ ಜಾಲೆಂ. ತೆಂ ತೊ ಕೊಣ್ಯ್ ಶಿಕ್ ಮ್ಹಣೊನ್ ಸಾಂಗಾನಾಸ್ತಾನಾ ಶಿಕ್ಲೊ. ಆಬಾನ್ ಏಕ್ ಪಾವ್ಟಿ ಮ್ಹಳ್ಳೆಂ, “ಪಳೆ ಹಾಂವ್ ಹಿ ಭುಂಯ್ ಪಾಚ್ವಿ ದವರ್ತಾಂ, ಗೊಟ್ಯಾಂತ್ ಜೀವ್ ಉರಯ್ತಾಂ. ಘರಾಂತ್ ಜಿವಾಳ್ ಸಾಂಭಾಳ್ತಾಂ. ಪಯ್ಶಾಂಚಾ ಯಾ ಆಸ್ತಿಚಾ ಆಶೆನ್ ನ್ಹಯ್. ಮ್ಹಜೊ ವಾರೆಸ್ದಾರ್ ಕೊಣ್ಯ್ ಜಾಂವ್ ತಾಕಾ ಸುಕೆಂ, ಜೀವ್ ನಾಸ್ಲ್ಲೆಂ ಸೊಡ್ನ್ ವಚೊಂಕ್ ಮಾಕಾ ಬರೆಂ ಲಾಗಾನಾ. ತ್ಯಾ ದೆಕುನ್ ಹಾಂವ್ ಕಾಮ್ ಕರ್ತಾಂ ; ಜಿವಾಳ್ ಸಾಂಬಾಳ್ತಾಂ.’’
ಆಬಾಕ್ ಆಪ್ಲಿ ರಾಸ್ ಪಡ್ಲ್ಲಿ ಆಸ್ತ್ಬದಿಕ್ ಕೊಣಾಕ್ ವಚಾತ್? ಕೊಣ್ ಆಸಾ ಆಪ್ಲೆಂ? ಕಿತೆಂ ಜಾಯ್ತ್ ಇತ್ಯಾದಿಚಿ ಖಂತ್ ನಾ. ಆಸ್ತಿ ಬದ್ಕಾಚೊ ಹರೇಕ್ ಕಣ್ ಆಪ್ಲ್ಯಾ ಧನಿಯಾಕ್ ವೊಳ್ಕಾತಾ ಆನಿ ತಾಕಾಚ್ ಪಾವ್ತಾ ಮ್ಹಳ್ಳಿ ತಾಚಿ ಥಿರ್ ಪಾತಿಯೆಣಿ ಜಾವ್ನಾಸ್ಲ್ಲಿ. ಆಪ್ಣೆಂ ಮೊರ್ತಾನಾ ಜಳೊನ್ ವೆಚೆಂ ಸುಕೆಂ ಕರಡ್ ಸೊಡಿನಾಯೆ ಮ್ಹಳ್ಳಿ ತಾಚಿ ಜಳ್ಚಿ ಆಶಾ ಜಾವ್ನ್ ಆಸ್ಲ್ಲಿ.
ಮಲ್ಲು ಆತಾಂ ತೀಸ್ ವರ್ಸಾಂಚೊ ತರ್ನಾಟೊ. ಹಿ ಭುಂಯ್, ಹಿ ಆಸ್ತ್, ಹಿಂ ರೂಕ್ ಝಡಾಂ ತಾಕಾ ಆಪ್ಲೊ ಮ್ಹಣ್ ವಳ್ಕಾಲ್ಯಾಂತ್. ತೊ ಆತಾಂ ಆಬಾಚಾ ಫ಼ೊಂಡಾಲಾಗಿಂ ಆಸ್ಚಾ ಫ಼ುಲಾಂ ಝಡಾಂಕ್ ಉದಕ್ ಘಾಲ್ತಾಲೊ. ಕಾಮಾಚೊ ಮಲ್ಲಣ್ಣ ಮೊಡ್ಲಾಂ ವೋಡ್ನ್ ಹಾಡ್ನ್ ರಾಸ್ ಘಾಲ್ತಾಲೊ. ತಾಚಾ ಹಾತಾ ಖಾಲ್ ಧಾ ಜಣಾಂ ಕಾಮ್ ಕರ್ತಾಲಿಂ. ಪಯ್ಸ್ ಘರಾಂತ್ ತಾಚೊ ಚೆರ್ಕೊ ನಿದೆಂತ್ಲೊ ಉಟೊನ್ ರಡ್ತಾಲೊ. ಮಲ್ಲು ಆತಾಂ ಘಟ್ ಮೂಟ್ ತರ್ನಾಟೊ. ಕೃಷೆಂತ್ ಉಂಚ್ಲೆಂ ಶಿಕಪ್ ಜೊಡ್ಲ್ಲೊ ಸಂಶೋಧಕ್ ; ಪರ್ತ್ಯಾನ್ ಪರ್ತ್ಯಾನ್ ಪಳಂವ್ಕ್ಲಾಂವ್ಚಾ ಆಕರ್ಷಕ್ ವ್ಯಕ್ತಿತ್ವಾಚೊ ಮನಿಸ್.
ಏಕ್ ಹಾತ್ ಕಪಾಲಾಕ್ ಲಾವ್ನ್ ಅನಿ ಏಕ್ ಹಾತ್ ಪೆಂಕ್ಟಾಕ್ ಮಾರ್ನ್ ಮಳ್ಬಾಕ್ ಪಳೇತ್ ಆಸ್ತಾನಾ ತಾಕಾ ಕಾರಾಚೊ ಆವಾಜ್ ಆಯ್ಕಾಲೊ....ಏಕ್ ಸ್ತ್ರೀ ಕಾರಾಂತ್ಲಿ ದೆಂವ್ತಾಲಿ, ಪ್ರಾಯ್ ೫೦ ಸಾಟಾಂಚಿ - ಗ್ರೇಸ್ತ್ ಬಾಯ್ಲ್. ಮಲ್ಲುಚಿ ಮತ್ ಪಾಟಿಂ ಪಾಟಿಂ ಧಾಂವ್ತಾನಾ ಆಪ್ಣಾಕ್ ಬಾವೀಸ್ ವರ್ಸಾಂ ಆದಿಂ ಸೊಡ್ನ್ ಗೆಲ್ಲಿ ಸ್ತ್ರೀ ಹಿಚ್ ಮ್ಹಣ್ಚೆ ಬರಿ ಭೊಗಾಲಾಗ್ಲೆಂ. ತಿ ಲಾಗಿಂ ಯೇವ್ನ್ “ಆಬ್’’ ಮ್ಹಣ್ತಾನಾ ತಾಣೆಂ ಫ಼ೊಂಡ್ ದಾಕಯ್ಲೊ. ತಿಕಾ ಕಾಂಯ್ ದುಕ್ಲೆಂ ತಶೆಂ ಮಲ್ಲುಕ್ ದಿಸ್ಲೆಂನಾ.
“ಆಬಾ ಸಾಂಗಾತಾ ಏಕ್ ಚೆರ್ಕೊ.......’’
ಮ್ಹಣ್ತಾಸ್ತಾನಾ ಮಲ್ಲಣ್ಣ “ಬಾಬಾ, ಆಜ್ ಹಾಂವ್ ಘರಾ ವೆಗಿಂ ವಚೊಂಗಿ?
ಮ್ಹಣಾಲೊ.
ತೊ ಲ್ಹಾನ್ ಥಾವ್ನ್ ತಾಂಗೆರ್ ಯೆತಾಲೊ. ಕೊಂಕಣಿ ಬರಿ ಉಲಯ್ತಾಲೊ.
“ಜಾಯ್ತ್ ಮಲ್ಲು ..’’ ಮ್ಹಣಾಲೊ ಮಲ್ಲು.
“ಮಲ್ಲು....’’ ತಿ ಸ್ತ್ರೀ ಮ್ಹಣಾಲಿ, “ ತೊ ಕೊಣ್?’’
“ತೊ ಲ್ಹಾನ್ ಥಾವ್ನ್ ಹಾಂಗಾ ಆಸಾ.’’
“ಲ್ಹಾನ್ ಥಾವ್ನ್ ಹಾಂಗಾ ಆಸಾ? ತಾಚಿ ಆವಯ್?’’
“ತೆಂ ಹಾಂವ್ ನೆಣಾಂ’’
“ಆಬ್ ?’’ ತಿ ವಿಚಾರಿಲಾಗ್ಲಿ.
“ಆಬ್ ಸರೊನ್ ದೋನ್ ವರ್ಸಾಂ ಜಾಲಿಂ’’
“ಪಿಡೇಸ್ತ್ ಜಾಲ್ಲೊ?’’
“ನಾ, ತೊ ಮಹಾನ್ ಆತ್ಮೊ ಅಖೇರಿಚಿ ಘಡಿ ಪರ್ಯಾಂತ್ ಬರ್ಯಾ ಭಲಾಯ್ಕೆಂತ್ ಆಸೊನ್ ಕಾಮ್ ಕರ್ನ್ ನಿದ್ಲ್ಲೊ ತೊ ನಿದೆಂತ್ಚ್ ದೇವಾಧೀನ್ ಜಾಲೊ......’’
“ಹೊ ಮಾಕಾ ಖಬರ್ಚ್ ನಾತ್ಲ್ಲಿ.’’
“ಆಬ್ ತುಕಾ ಕಿತೆಂ ಲೆಕ್ತಾ?’’
“ ಹಾಂವ್ ನಾತ್, ಆಬಾಚಾ ಡೆಲ್ಲಿ ಆಸ್ಚಾ ಪುತಾಚಿ ನಿಮಾಣಿ ಧುವ್. ಹಾಂವ್ ಕೆನಡಾ ಸೆಟಲ್ ಜಾಲ್ಯಾಂ. ಹೆಂ ಮ್ಹಜಿ ದೊಗಾಂಯ್ ಭುರ್ಗಿಂ ಕೆನಡಾಂತ್ಚ್ ಆಸಾತ್?’’
“ತುಕಾ ದೊಗಾಂಚ್ ಭುರ್ಗಿಂ?’’
“ತೆಂ.....ಹೆ..... ಮಾ...... ವ್ಹಯ್. . . ವ್ಹಯ್, ಮಾಕಾ ದೊಗಾಂಚ್ ಭುರ್ಗಿಂ. ಹೆಂ ತೊ ಮಲ್ಲು ಹಾಂಗಾ ಕಿತೆಂ ಕಾಮ್ ಕರ್ತಾ ಮ್ಹಳೆಂಯ್?’’
“ತೊ ಹಾಂಗಾ ಕುಲಿಚೆಂ ಕಾಮ್ ಕರ್ತಾ, ಆತಾಂ ತಾಚಾ ಘರಾ ಗೆಲೊ".
’’
ತಿಚೆಂ ತೊಂಡ್ ಕಾಳೆಂ ಜಾಲೆಂ. ತೆಂ ಪಳವ್ನ್ ಪಳೆನಾಸ್ ಲ್ಲೆಬರಿ ಕರ್ನ್ ತೊ ಮ್ಹಣಾಲೊ,“ಪಾಪ್ ಬರೊ ಮನಿಸ್ ತಿಕೆಶೆ ತಕ್ಲಿ ವಿರಾರಾಯೆಚೊ - ಆಬಾನ್ ತಾಕಾ ಮೊಗಾನ್ ಸಾಂಬಾಳ್ಳಾಂ. ಹಾಂವ್ ಕಿತ್ಯಾಕ್ ತಾಕಾ ಕಾಮಾಂತ್ಲೆಂ ಕಾಡುಂ? ಪಾಪ್ ಆಸಾ ಆಸೊಂದಿ....’’
ಮಲ್ಲುಕ್ ಆತಾಂ ತಿಚೆಂ ತೊಂಡ್ ಪಳಂವ್ಕ್ ಜಾಲೆಂನಾ. ತಿಚೆಂ ಥಂಯ್ ತಾಕಾ ರಾಗ್ ಉಬ್ಜೊಂಕ್ ನಾ.
ಸತ್ತ್ ಸಾಂಗ್ಚೆಂ ಜಾಲ್ಯಾರ್ ಕಸಲಿಂಚ್ ಭಾವನಾಂ ತಾಚೆ ಥಂಯ್ ಉದೆಲಿನಾಂತ್. ತಿಕಾ ಬೆಜಾರಾಯ್ ಭೊಗ್ತಾ ತರ್ ತೆಂ ತಿಚಾ ಕರ್ಣೆಚೆಂ ಫ಼ಳ್. ತ್ಯಾ ತಿಚಾ ಬೆಜಾರಾಯೆಕ್ ಆಪುಣ್ ಕಾರಣ್ ನ್ಹಯ್ ಮ್ಹಣ್ ಮಲ್ಲು ಖಂಡಿತ್ ಜಾಣಾಂ ಆಸ್ಲ್ಲೊ ಆನಿ ತೊ ತೆಂ ಥಿರ್ ಪಾತಿಯೆತಾಲೊ.
ಇಲ್ಲ್ಯಾ ವೆಳಾನ್ ಸನಿನ್ ಜಾವ್ನ್ ತಿ ಸ್ತ್ರೀ ವಿಚಾರಿಲಾಗ್ಲಿ, “ ಮಾಗಿರ್..... ಮಾಗಿರ್ ...ತುಂ ಕೊಣ್?’’
ತೊ ತಿಕಾ ಪಯ್ಲ್ಲೆ ಪಾವ್ಟಿ ಆಪ್ಲ್ಯೊ ಆಕರ್ಷಕ್ ಹಾಸೊ ದೀವ್ನ್ ಮ್ಹಣಾಲೊ, “ಹಾಂವ್, ಹಾಂವ್ ಹಾಂಗಾಚೊ ವಾರೆಸ್ದಾರ್!’’
ಕಥಾಝರ್
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
