ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾಝರ್ - 17. ಆನ್ವೇಷಣ್
ಕೊಂಕ್ಣಿ ಸಾಹಿತ್ಯಾಂತ್ ಅಪ್ರೂಪಾಯೆನ್ ತರ್ಯ್ ಅಪುರ್ಭಾಯೆಚ್ಯೊ ಕಥಾವಸ್ತುಂಕ್ ವಿಂಚುನ್ ಕಾಣ್ಯೊ ಬರಂವ್ಚಾಂತ್ ಕೆವಿನ್ ಡಿ’ಮೆಲ್ಲೊ ಎಕ್ಲೊ ಮ್ಹಳ್ಳೆಂ ಸಗ್ಳಿಂ ಜಾಣಾಂತ್. ಎದೊಳ್ಚ್ ಪನ್ನಾಸಾಂ ವಯ್ರ್ ಮಟ್ವ್ಯೊ ಕಾಣ್ಯೊ ತಾಣೆಂ ಬರಯ್ಲ್ಯಾತ್ ತರ್ಯ್ ಕೊಂಕ್ಣೆಂತ್ ತಾಚಾ ಕಾಣ್ಯಾಂಚೊ ಪ್ರಕಾರ್ಚ್ ವೆಗ್ಳೊ. ಹಾಚಾ ಕಾಣ್ಯಾಂಚಿ ವಿಶೇಷತಾ ಮ್ಹಳ್ಯಾರ್ ಹಾಚಿ ಕಾಣಿ ವಾಚ್ಲ್ಲೊ ವಾಚ್ಪಿ ಲಾಂಬ್ ಕಾಳ್ ಪರ್ಯಾಂತ್ ತಿ ಉಡಾಸಾಕ್ ದವ್ರುಂಕ್ ಸಕ್ತಾ. ಹಿಚ್ ಕಾಣ್ಯೆಗಾರಾಚಿ ಶ್ಯಾಥಿ ನ್ಹಯ್ಗಿ?
[ದಾಯ್ಜ್ ಸಾಹಿತಿಕ್ ಸ್ಪರ್ಧೊ - 2005 ಹಾಂತುಂ ತಿಸ್ರೆಂ ಇನಾಮ್ (2,000 ರುಪಯ್) ಅಪ್ಣಾಯಿಲ್ಲಿ ಕಾಣಿ]
ಕೆವಿನ್ ಡಿ’ಮೆಲ್ಲೊ
ತೊ ತ್ಯಾ ದೈತ್ಯಾಕಾರಾಚ್ಯಾ ಭೂತ್ ಬಂಗ್ಲ್ಯಾಪರಿಂ ದಿಸ್ಚ್ಯಾ ಘರ್ಚಾ ಅಂಗ್ಣಾಂತ್ ಪಾವ್ತಾನಾಂ ಧರ್ಣಿರ್ ಎದೊಳ್ಚ್ಚ್ ಕಾಳೊಕ್ ದಾಟವ್ನ್ ಆಯಿಲ್ಲೊ. ಬಸ್ಸ್ ನಿಲ್ದಾಣ್ ಮ್ಹಣ್ ವೊಲಾಯಿಲ್ಲ್ಯಾ ಬ್ರಹತ್ ಗೋಳಿರುಕಾಚ್ಯಾ ಕಾಟ್ಯಾಕ್ ಧುಳಿಚಿಂ ಮೊಡಾಂ ಉಭಾಯಿತ್ತ್ ಭಂವಾಡೊ ಕಾಡ್ನ್ ರಾವ್ಲ್ಲ್ಯಾ ಬಸ್ಸಾ ಥಾವ್ನ್ ತಾಣೆಂ ಸರಿಸುಮಾರ್ ಪಂದ್ರಾ ವರ್ಸಾಂ ಉಪ್ರಾಂತ್ ಪಾಂಯ್ ತೆಂಕೊನ್, ಥೈಂಚ್ ನಿಶ್ಚಲ್ ಉಭೊ ರಾವೊನ್ ಥೊಡ್ಯೊ ಘಡಿಯೊ ಪಾಶಾರ್ ಕೆಲ್ಯೊ. ಉಪ್ರಾಂತ್, ಹೆಣೆಂ ತೆಣೆಂ ಜಮ್ಲ್ಲೊ ಹಳ್ಳೆಚೊ ಲೋಕ್ ಹಾಕಾಚ್ ವಿಚಿತ್ರ್ ನದ್ರೆಂತ್ ಪಳೆಲಾಗ್ಲೊ ತರೀ ಗುಮಾನ್ ದೀನಾಸ್ತಾಂ ದುಸ್ರೆಂ ಕ್ಷಣಾನ್ ತಾಣೆಂ ಮುಖಾರ್ ಪಾವ್ಲಾಂ ಕಾಡ್ಲ್ಲಿಂ.
.....ಆತಾಂ, ಅರ್ಧೆಂ ವೊರ್ಭರ್ ಅಶೀರ್ ರಾನ್ವಾಟ್ಯಾ ಪಾಂಯ್ ವಾಟೆನ್ ಚಲಾತ್ತ್, ಸಾರ್ಕ್ಯಾ ವಾಟೆ ವಿಶಿಂ ಥೊಡೊ ಗೊಂದೊಳ್ ಜಾಲ್ಯಾರೀ ಅಖ್ರೇಕ್ ಆಪ್ಲ್ಯಾ ಗಮ್ಯ್ಸ್ಥಾನಾಕ್ ಎದೊಳ್ಚ್ ತೊ ಪಾವ್ಲ್ಲೊ.
ಅಬ್ಳೆ, ತೊ ಆತಾಂ ತ್ಯಾ ದೈತ್ಯಾಕಾರಾಚ್ಯಾ ಘರ್ಚ್ಯಾ ಆಂಗ್ಣಾಂತ್ ಉಬ್ಬೊ ಆಸ್ಲ್ಲೊ. ಶೀತಳ್ ವಾರ್ಯಾಚೊ ನೀಳ್ ಶ್ವಾಸ್ ಸೆವ್ಲ್ಲ್ಯಾ ತಾಕಾ ದಶಕಾಂ ಥಾವ್ನ್ ಅರ್ದಾಂಲ್ಲೊ ಭಂವಾರಿಚ್ಯೊ ಸಾಂಕ್ಳಿ ಸುಟೊಂಕ್ ಲಾಗ್ಲ್ಲೊ ಅವ್ಯಕ್ತ್, ಅನಾಮಧೇಯ್ ಭಾವ್ ಉಬ್ಜಾತಾ ಉಬ್ಜಾತಾನಾ ಬಾಂಧುನ್ ಘಾಲ್ಲೆ ರಾಕ್ಸಾ ಖಾಸ್ತಾಚೆ ಪೆಟೆ ಘೊಂಕಿಲಾಗ್ಲೆ.
ಧಾಂಪ್ಲ್ಲೆಂ ಕಾಳ್ಯಾರಂಗಾಚೆಂ ಬ್ರಹದ್ ಆಕಾರಾಚೆಂ ಮುಖ್ಲೆಂ ದಾರ್. ಚೊವ್ಕೆಚ್ಯಾ ದಾರಾ ಥಾವ್ನ್ ಭಾಯ್ರ್ ತಿಳ್ಚೊ ನಿಶ್ಚಲ್ ಮಂದ್ ಉಜ್ವಾಡ್......ಆತಾಂ ಪೆಟೆ ತಾರಕ್ ಸ್ವರಾನ್ ಬೊಬಾಟ್ತಾನಾಂ ಚೊವ್ಕೆ ಥಾವ್ನ್ ಅನ್ಯೇಕ್ ಉಜ್ವಾಡ್ ಚಮ್ಕೊಂಕ್ ಲಾಗ್ಲೊ. ಹೊ ಆತಾಂ ಫುಡೆಂ ಸರೊನ್ ಬಾಗ್ಲಾ ಮುಖಾರ್ ಉಭೊ ಜಾಲೊ.
’ಕೋಣ್ ಥಂಯ್ಸರ್?" ಬಿತರ್ ಥಾವ್ನ್ ದಾದ್ಲ್ಯಾಚೊ ತಾಳೊ.
ತ್ಯಾ ತಾಳ್ಯಾಕ್ ಹೊ ವಳ್ಕಾಲೊ. ದಶಕಾಂ ಉತ್ರಾಲ್ಯಾರೀ ಪರಿಚಿತ್ ತಾಳೊ.
’ಯಯಾತಿ.......ಯತೀ ಮಾಮಾ ಹಾಂವ್’ ಕ್ಷೀಣ್ ಸ್ವರಾನ್.
"ಹಾಂವ್ ಮ್ಹಳ್ಯಾರ್ ಕೋಣ್?"
"ಹಾಂವ್ ಅಶ್ವತ್ಥಾಮ. ತುಜೊ ಭಾಚೊ" ತ್ವರಿತ್ ಜಾಪ್ ದಿತಾಸ್ತಾನಾಂ ಪಾಯ್ಜಣಾಂ ಆನಿಂ ಕಾಂಕ್ಣಾಂಚೊ ಅವಾಜ್ ಕಾನಾಂಕ್ ಆಪ್ಟೊನ್ ಕ್ಷೀಣ್ ಜಾಯಿತ್ತ್ ಆಯಿಲ್ಲೆಂ ಹಾಚ್ಯಾ ಗಮನಾಕ್ ವಚನಾಸ್ತಾಂ ರಾವ್ಲೆಂ ನಾಂ. ಥೊಡ್ಯಾ ಘಳಾಯೆ ಉಪ್ರಾಂತ್ ದಾರ್ ಉಗ್ತೆಂ ಜಾಲೆಂ ಆನಿಂ ಲಾಂಪ್ಯಾಂವ್ ಘೆವ್ನ್ ಯಯಾತಿ ಮಾಮಾಚೆ ಜಯ್ತ್ ಗಾತ್ರಾಚಿ ಕೂಡ್ ದಾರಾರ್ ಉಬಿ ಜಾಲ್ಲಿ.
"ಅಶ್ವ, ಅಶ್ವತ್ಥಾಮ! ಮ್ಹಜ್ಯಾ ಭಾಚ್ಯಾ! ಏ......ಭಿತರ್ ಏ.... ತುಂ ಯೆತೊಲೊಯ್ ಮ್ಹಣ್ ಹಾಂವ್ ಸ್ವಷ್ಟ್ ಜಾಣಾಂ ಆಸ್ಲ್ಲೊಂ" ಯತೀ ಮಾಮಾನ್ ಗಂಭೀರ್ ತಾಳ್ಯಾನ್ ಮ್ಹಳೆಂ.
"ಹೂಂ ಯತೀ ಮಾಮಾ, ಹಾಂವೆ ಯೇಜಾಯಿಚ್ಚ್ ಆಸ್ಲ್ಲೆಂ. ವಿಂಚವ್ಣಿಂ ನಾತ್ಲ್ಲಿಚ್ ಮ್ಹಳ್ಯಾರ್ ಚಡ್ ಸಮಂಜಸ್" ಕ್ಷೀಣ್ ಹಾಸೊ ಹಾಸ್ಲೊ ಹೊ ಭಿತರ್ ಸರೊನ್.
ಶತಮಾನಾಂ ತಿತ್ಲೆಂ ಪುರಾತನ್ ದಿಸ್ಚ್ಯಾ ಹ್ಯಾ ಘರಾ ಭಿತರ್ ಎಕೊಡಿ ದೀಷ್ಟ್ ಲಾಯ್ಲಿ. ವ್ಹಯ್, ವರ್ಸಾಂ ಗೆಲ್ಯಾರೀ ಸರ್ವ್ ಪರಿಚಿತ್. ವಿಶಾಲ್ ಚೊವ್ಕಿ. ಜಯ್ತ್ ಗಾತ್ರಾಚೆ ರುಕಾಚೆ ಕುಂದೆ. ಪರ್ನಿಂ ಕದೆಲಾಂ, ಬಾಂಕ್ ವಯ್ರ್ ಧಾಂಪಣ್. ಆಡಿಂ ಭಾಂದುನ್ ಉಮ್ಕಾಳಾಯಿಲ್ಲಿಂ ಮೊಗಿಂ, ಕುವಾಳೆ, ದುದ್ಯಾಂ, ತೊವ್ಶಿಂ. ಬ್ರಹತ್ ದೋನ್ ಭಾತಾಚಿಂ ತುಪಿಂ. ಝರಾಯಿಲ್ಲ್ಯಾ ಧರ್ಣಿಕ್ ಶೆಣಾಚೊ ಲೇಪ್. ಕಸ್ಲೊಗೀ ಪರಿಚಿತ್ ವಿಚಿತ್ರ್ ಫರ್ಮಳ್ (ಘಾಣ್?). ಪುರಾತನ್ ಮ್ಯೂಸಿಯಾಮಾಕ್ ರಿಗಲ್ಲೊ ಅನ್ಭೋಗ್.
"ಏ ಬಸ್. ತ್ಯಾ ಕಳ್ಬೆಂಚೆರ್ ಬಸ್" ಚೊವ್ಕೆ ಮದ್ಗಾತ್ ಆಸ್ಚ್ಯಾ ಇಜಿಚೆರಾಚೆರ್ ಬಸೊನ್ ಹಾಕಾ ಬಸ್ಕಾಂ ದಾಕಯ್ಲಾಗ್ಲೊ ಯತೀ ಮಾಮಾ.
ಹೊ ಕಳ್ಬೆಂಚೆರ್ ಬಸ್ಲೊ.
"ತಿ ಕಳಂಬ್ ತುಜ್ಯಾ ಆಜ್ಯಾಚೆಂ ಸಿಂಹಾಸನ್ ಜಾವ್ನಾಸ್ಲ್ಲೆಂ" ಯತೀ ಮಾಮಾ ಹಾಸ್ಲೊ.
"ಹಾಂವ್ ವಿಸ್ರೊಕ್ ನಾಂ" ಜಾಪ್ ದಿಲಿ ತಾಣೆಂ ನಿರ್ವಿಘ್ನ್ ತಾಳ್ಯಾನ್.
"ಅಖ್ರೇಕ್ ತರೀ ತುಂ ಆಯ್ಲೊಯ್ ಅಶ್ವತ್ಥಾಮಾ"
"ಸಂಪೂರ್ಣ್ ನಾಗ್ಡೊ, ದೆದೆಸ್ಪೊರ್, ರಿತೊ ಜಾತಾನಾಂ ಯತೀ ಮಾಮಾ........"
"......ಬಾಂದ್ಪಾಸಾಂತ್ಲೆಂ, ಬಂಧಡೆಂತ್ಲೆ ಸುಟೊಂಕ್ ಆಶೆಲೊಯ್. ಜೀವ್ಘಾತ್ ಕರ್ನ್ ಘೆವ್ನ್ ಪಲಾಯನ್ ಕರುಂಕ್ ಯೆವ್ಜಿಲೆಂಯ್"
"ವ್ಹಯ್.........ಮಾಮಾ.......ಪೂಣ್ .........." ತಾಣೆಂ ಅರ್ಧ್ಯಾರ್ ರಾವಯ್ಲೆಂ.
ಮಹಿನ್ಯಾ ಆದಿಂ ವರ್ಸಾಂಗಟ್ಲ್ಯಾನ್ ಉಗ್ಡಾಸಾಕ್ ಯೇನಾತ್ಲ್ಲೊ ಆಪ್ಲೊ ಮಾವ್ಳೊ ಧುತ್ತ್ ಕರ್ನ್ ಸ್ಮ್ರತಿಪಟಲಾರ್ ಉದೆತಾನಾಂ ತೊ ಆಜಾಪ್ಲ್ಲೊ. ಕಸ್ಲೊಗೀ ಅವ್ಯಕ್ತ್ ಭರ್ವಸೊ ಮತಿಕೊನ್ಶಾರ್ ಉದೆತಾನಾಂ ತಾಣೆಂ ಗಳಾಯ್ ಕರಿನಾಸ್ತಾಂ ಪತ್ರ್ ಲಿಖ್ಲ್ಲೆಂ.
"ಮೊಗಾಚ್ಯಾ ಯತೀ ಮಾಮಾ,
ಕಿತ್ಲೆಶೆಗೀ ವರ್ಸಾಂ ಸಂಪ್ಲಿಂ ಆಮಿಂ ಎಕಾಮೆಕಾ ಆಜ್ನಾತ್ ರಾವೊನ್. ಹ್ಯಾ ಆವ್ದೆಂತ್ ಶ್ರೇಷ್ಠತೆಚೆಂ ಅನ್ವೇಷಣ್ ಕರಿತ್ತ್ ವಿವಿಧ್ ಗಾಂವ್, ದೇಶ್, ಲೋಕ್, ಸಂಬಂಧ್, ಕ್ಶೇತ್ರಾಂ, ಆಯಾಮಾಂ, ಆಸಕ್ತೆನಿಂ ಹಾಂವ್ ವ್ಯಸ್ತ್ ಆಸ್ಲ್ಲೊಂ. ಜಿಣ್ಯೆಚೊ ಉದ್ದೇಶ್ ಕಸ್ಲೊ?, ಜೀವನೋತ್ಸಾಹಾಚೆಂ ಅದಮ್ಯ್ ಚೈತನ್ಯಾಚೆಂ ಮೂಳ್ ಕಸ್ಲೆಂ? ಪರಿಶುಧತಾ, ಶೇಷ್ಠತಾ ಖಂಚಿ? - ಹ್ಯಾ ಸೊದ್ನೆಂತ್ ಮಗ್ನ್ ಜಾಲ್ಲೊ? ಪೂಣ್ ಮಾಮಾ, ಪರಿಣಾಮ್, ಫಲಿತಾಂಶ್ ವಿವರೂಂ? ಹೊ ಸ್ವಾಸ್ ಮ್ಹಾಕಾ ಉಬ್ದೆಸ್ ಕರುನ್ ಆಸಾ. ಹ್ಯಾ ಬಾಂದ್ಪಾಸಾಂತ್ಲೆ, ಹ್ಯಾ ಬಂದಡೆಂತ್ಲೆಂ, ಹ್ಯಾ ಶುಶ್ಕತೆ ಥಾವ್ನ್, ಹ್ಯಾ ವೈರುಧ್ಯ್, ಹ್ಯಾ ದ್ವಂದ್ವಾ ಥಾವ್ನ್ ಶಾಶ್ವತ್ ರಿತಿನ್ ಸುಟೊಂಕ್ ಆಶೆತಾಂ. ಪುಣ್...... ಜಿಣ್ಯೆಚೆಂ ಅಂತ್ಯ್ ಕರ್ಚಾ ಪಯ್ಲೆಂ ಹಾಂವ್ ಮ್ಹಾಕಾಚ್ಚ್ ಏಕ್ ಅಖ್ರೇಚೊ ಅವ್ಕಾಸ್ ದೀವ್ನ್ ಆಸಾ. ಮಾಮಾ, ಏಕ್ ಪಾವ್ಟಿಂ ತುಕಾ ಬೆಟ್ಯಾಂ ಮ್ಹಣ್ ಭಗ್ತಾ. ಹಳ್ಳೆಕ್ ಯೇಂವ್? ಜಾಪ್ ಬರಯ್.
ಅಶ್ವತ್ಥಾಮಾ"
ತುರಂತ್ ಜಾಪ್ ಪಾಟಿಂ ಆಯಿಲ್ಲಿ
"ಮ್ಹಜ್ಯಾ ಮೊಗಾಚ್ಯಾ ಭಾಚ್ಯಾ,...... ದರ್ವಡ್ನಾಕಾ. ಪಿಶ್ಯಾ ಚೆಡ್ಯಾ, ತುರಂತ್ ಹಳ್ಳೆಕ್ ಪಾಟಿಂ ಯೇ. ಜಿಣ್ಯೆಚೊ ಅತ್ಯಂತ್ ರೋಚಕ್ ಘುಟ್ ಹಾಂವ್ ತುಕಾ ದಾಕಯ್ತಲೊಂ. ಮ್ಹಜೆರ್ ತುಕಾ ಭರ್ವಸೊ ಆಸಾ ಮ್ಹಣ್ ಪಾತ್ಯೆತಾಂ. ತುಜ್ಯಾ ಅನ್ವೇಷಣಾಕ್ ಏಕ್ ಪೂರ್ಣ್ ವಿರಾಮ್ ಜರೂರ್ ಮೆಳಾತ್. ಜರೂರ್ ಯೇವ್ನ್ ಸೊಡ್. ಬಾ...............ಬಾರೋ ಅಶ್ವತ್ಥಾಮನೇ.....ಬಾ......."
ಅಬ್ಳೆ, ತೊ ಪಾಟಿಂ ಆಯಿಲ್ಲೊ.
"ಬಾಣಾಂತ್ ತಾಪಯಿಲ್ಲೆಂ ಉದಾಕ್ ಆಸಾ. ನ್ಹಾವ್ನ್ ಜೇವ್ನ್ ಉಪ್ರಾಂತ್ ಉಲವ್ಯಾಂ" ಯತೀ ಮಾಮಾನ್ ಸಾಂಗ್ತಾನಾಂ ಹಣೆಂ ತಕ್ಲಿ ಹಾಲಯ್ಲಿ. ಕಿತೆಂಗೀ ಸಾಂಗೊಂಕ್ ಹೊ ಪ್ರಯತ್ನ್ ಕರಿಲಾಗ್ಲೊ ತರೀ ಉತ್ರಾಂ ಸುಟ್ಲಿನಾಂತ್.
"ಶಿಸ್ಲೆಂತ್ ಕಾಂಯ್ ಇಲ್ಲೆಂ ಉರ್ಲಾಂ ತರ್ ಹಾಂಗಾಚ್ಚ್ ಮುಗ್ದೊನ್ ಸೊಡ್ "ಯತೀ ಮಾಮಾ ಹಾಸ್ಲೊ. ಕ್ಷಣಾನ್ ಬೊಲ್ಸಾಂತ್ ಆಸ್ಲ್ಲ್ಯಾ ಕ್ವಾಟಾರಾಚಿ ಗುಡ್ದಿ ಪಿಂಟಾವ್ನ್ ಉರ್ಲ್ಲೆಂ ಅರ್ಧೆಂ ಅಮಾಲ್ ಗಟಗಟ ಕರ್ನ್ ತಾಳ್ಯಾಕ್ ದೆಂವವ್ನ್ ಬ್ಯಾಗ್ ಹಾತಿಂ ಘೆವ್ನ್ ತೊ ಉಟ್ಲೊ.
******************
ಭಾಯ್ರ್ ಅಂಗ್ಣಾತ್ ದೂದಾ ರಂಗಾಚೆಂ ಚಾಂದ್ನೆಂ. ಮೊಳ್ಬಾರ್ ಅಸಂಖ್ಯಾತ್ ನೆಕೆತ್ರಾಂ. ಭಂವ್ತಿಂ ನೀರವ್ ವಾತಾವರಣ್. ಅಂಗ್ಣಾಚ್ಯಾ ಕೊನ್ಶಾರ್ ಬಾಂದ್ಲ್ಲ್ಯಾ ವಿಶಾಲ್ ಚಿಟ್ಟ್ಯಾರ್ ಆರಾಮಾಯೆರ್ ಬಸೊನ್ ಯತೀ ಮಾಮಾನ್ಂಚ್ ಸುರ್ವಾತ್ ಕೆಲಿ.
"ತುಂ ಕಸೊ ಆಸಾಯ್, ಕಿತೆಂ ಕರ್ನ್ ಆಸ್ಲ್ಲೊಯ್, ಆತಾಂ ಕಿತೆಂ ಕರ್ನ್ ಆಸಾಯ್........ ಅಸಲಿಂ ಶಿಷ್ಠಾಚಾರಾಚಿಂ ಸವಾಲಾಂ ಹಾಂವ್ ತುಕಾ ವಿಚಾರಿನಾ ಯಾ ತುವೆಂ ಮ್ಹಜ್ಯಾ ಕಡೆನ್ ವಿಸಾರಿಜಾಯ್ ಮ್ಹಣ್ ಹಾಂವ್ ನಿರೀಕ್ಶಾ ಕರಿನಾ. ಶ್ಹೆರಾಚೆಂ ಯಾಂತ್ರಿಕ್ ಜೀವನ್ ಆನಿಂ ಮಲ್ನಾಡಾಚೆ ನೈಜ್ ಜೀವನ್, ಪ್ರಕ್ರತೆಚೆಂ ಸಾನಿಧ್ಯ್, ಪ್ರಶಾಂತ್ ಪರಿಸರ್.................. ಆಸಲ್ಯಾ ಸಭಾರ್ ಪರ್ನ್ಯಾ ಥೀಮಾಂ( ಣheme) ವಿಶಿಂ ಬೆಳ್ಶೆಲ್ಲೆಂ ಸಂಭಾಷಣ್ ಆಮ್ಚೆಂ ಮಧೆಂ ನಾಕಾ ಮ್ಹಣ್ ಮ್ಹಾಕಾ ಬೊಗ್ತಾ"
"ಯತೀ ಮಾಮಾ, ಶೀದಾ ವಿಷಯಾಕ್ ಯೆಂವ್ಚಾ ಫುಡೆಂ - ಏಕ್ ಸಂಗತ್ ಸ್ವಷ್ಟ್ ಕರ್ತಾಂಕಿ - ಹಾಂವ್ ಕಸ್ಲಾಯಿ ಭ್ರಾಂತೆಕ್ ವಳಗ್ ಜಾಂವ್ಕ್ ನಾಂ. ಹಿಪೊಕ್ರೆಸಿ ಯಾ ವಿಚಿತ್ರ್ ಫೆಂಟಸಿ ಮ್ಹಣ್ ದಯಾಕರ್ನ್ ವೊಲಾಯ್ನಾಕಾ. ಭಾವನಾತ್ಮಕ್ ಅಸಮತೋಲನ್ ಮ್ಹಣ್ ತುಕಾ ಪಯ್ಲ್ಯಾ ನದ್ರೆಕ್ ದಿಸ್ಲ್ಯಾರೀ .........ತೆಂ ಖಂಚೆಯ್ ನ್ಹಂಯ್"
"ಸಮಾ ಮುಖಾರ್ಸಿ"
"ಲಾಖೊಂ ಲೊಕಾ ಸಾಂಗಾಂತಾ ಜಿಯೆತ್ತ್, ಜಿಣ್ಯೆಚ್ಯಾ ವಿವಿಧ್ ಆಯಾಮಾಂಚೆಂ ಅನ್ವೇಷಣ್ ಹಾಂವೆ ಕೆಲೆಂ. ಸೊಧ್ನಾಂ ಕೆಲಿಂ., ಶ್ರೇಷ್ಠತೆಚ್ಯಾ ಸೊಧ್ನೆಂತ್ ವಿಫಲ್ ಜಾಲೊಂ. ಅಸ್ಥಿತ್ವಾಚ್ಯಾ ಉದ್ದೇಶಾಚೆಂ ಖರೆಂ ವ್ಯಾಖ್ಯಾನ್ ಕಸ್ಲೆಂಗಾಯ್? ನಾ.................. ಮೆಳ್ಳೆಂ ನಾಂ. ಫಕತ್ತ್ ಶೂನ್ಯ್, ಕೇವಲ್ ನಿರಾಶಾ. ಹೆಂ ಶೂನ್ಯ್, ಹಿ ನಿರಾಶಾ ಮ್ಹಾಕಾ ಗ್ರಾಸಿತೆಚ್ ಆಸಾ"
"ಭಾಚ್ಯಾ .............ಪಯ್ಶೆ, ಆಸ್ತ್, ಸೆಕ್ಸ್, ಘನತಾ, ಗೌರವ್, ಅಂತಸ್ತ್, ಸ್ವಪ್ರತಿಷ್ಟಾ, ಕುಟಾಮ್, ದೇವ್, ಭಲಾಯ್ಕಿ, ಭವಿಷ್ಯಾಚಿ ಭದ್ರತಾ, ಧರ್ಮ್ ಅಸ್ಲ್ಯಾ ಭ್ರಾಂತೆಕ್ ವಳಗ್ ಜಾವ್ನ್ ತ್ಯಾಚ್ಚ್ ಭ್ರಾಮಕ್ ವೃತ್ತಾಂತ್ ಘುಂವಾತ್ತ್ ತಾಂತುಚ್ ಬಂಧಿ ಜಾಲ್ಲ್ಯಾ ಹ್ಯಾ ಲೋಕಾ ಥಾವ್ನ್, ಸಮಾಜೆಥಾವ್ನ್, ಸಂಸಾರಾ ಥಾವ್ನ್ ತುಕಾ ಮೆಳ್ಚಿ ನಿರಾಶಾ ಮಾತ್ರ್. ಸಂಪಾದನ್ ಕರ್ಚೆಂ ಶೂನ್ಯ್ ಮಾತ್ರ್!"
"ವ್ಹಯ್, ಇನ್ಕಾರ್ ಕರಿನಾಂಕಿ ತ್ಯಾ ಲೊಕಾ ಜಮ್ಯಾಂತ್ ಹಾಂವ್ಯೀ ಎಕ್ಲೊಂ ಜಾವ್ನ್ ಆಸ್ಲ್ಲೊಂ"
"ಆರಂಬರ್ ಪಯ್ಶ್ಯಾಂಚ್ಯಾ ವೃತ್ತಾ ಭಿತರ್ ಘುಂವ್ಲೊಯ್ಮೂ?"
"ಹೂಂ................. ಲ್ಹಾನ್ಶೆಂ ಕಾಮ್ ಕರ್ನ್ ಆಸ್ಲ್ಲೊಂ. ಅಗರ್ಭ್ ಗ್ರೇಸ್ತ್ ಜಾಂವ್ಚೆಂ ಕಶೆಂ ಮ್ಹಳ್ಳೆಂ ಚಿಂತಾಪ್ ಸೊಡ್ಳ್ಯಾರ್ ಹೆರ್ ಕಿತೆಂಚ್ಚ್ ಮ್ಹಜ್ಯಾ ಜಿಣ್ಯೆಂತ್ ಅಪ್ರಸ್ತುತ್ ಜಾವ್ನ್ಸ್ಲ್ಲೆಂ. ವ್ಯಾಪಾರ್ ವರ್ತುಲಾಂತ್ ಘುಸ್ಲೊ. ಸಬಾರ್ ಶೊರ್ಟ್ಕಟ್ ವಾಟಿ ಧರ್ಲ್ಯೊ. ಶೇರ್ ಮಾರ್ಕೆಟ್, ರಿಯಲ್ ಎಸ್ಟೇಟ್............. ಫುಡೆಂ"
"ಭಾಚ್ಯಾ, ಫುಡೆಂ ಕಿತೆಂ ಜಾಲೆಂ ಮ್ಹಣ್ ಹಾಂವ್ ಸಾಂಗೊಂ? ಆಯ್ಕ್, ದರಬಸ್ತ್ ಪಯ್ಶೆ ಜಮಾಯ್ಲೆಯ್. ಮುಖ್ಲೊ ಗಾಂಚ್ ಜಾವ್ನಾಸಾ ಮೋಗ್ ಆನಿಂ ಸೆಕ್ಸ್. ಕಿತ್ಲೆಶ್ಯೊ ಚಲಿಯೊ, ಸ್ತ್ರೀಯೊ ತುಜ್ಯಾ ಜಿಣ್ಯೆಂತ್ ಆಯ್ಲ್ಯೊ, ಗೆಲ್ಯೊ. ಪುಣ್ ನಿರೀಕ್ಷೆಚ್ಯಾ ಮಟ್ಟಾಕ್ ಆಯ್ಲ್ಯೊನಾಂತ್"
"ನಿಸ್ಕಳ್ ಮೊಗಾಂತ್ ಜೀವನೋತ್ಸಾವಾಚೆಂ ಉಗಮ್ ಜಾತೆಲೆಂ ಮ್ಹಣ್ ಚಿಂತ್ಲೆಂ. ಪುಣ್ ಜಾಲೆಂ ನಾಂ. ಸಂಭೋಗಾಂತ್, ಸ್ಖಲನಾಂತ್ ಚೈತನ್ಯಾಚಿ ಕ್ಷಣಿಕ್ ಝಳಕ್ ಮಾತ್ರ್ ದಿಸ್ಲಿ. ಸ್ತ್ರೀಯೆಚ್ಯಾ ಕುಡಿಚ್ಯಾ ಸಾಂದಿಮುಲ್ಯಾಂನಿಂ ಅಸ್ಥಿತ್ವಾಚೆಂ ಲವ್ಲೇಶ್ ನಾತ್ಲ್ಲೆಂ!"
"ಸ್ತ್ರೀ ಸರ್ವ್ ಸಂಗ್ತೆಂಚೆಂ ಮೂಳ್ ಮ್ಹಣ್ ಕಿತ್ಲೆಶ್ಯಾಗಿ ಖ್ಯಾತ್ ನಾಮಾಂಕಿತಾನಿಂ ಪ್ರತಿಪಾದನ್ ಕೆಲಾಂ.................ಆಸೊಂ...................... ಬಹುಶಃ ರಾಣಿ ಮುಖರ್ಜಿ ತಸಲ್ಯಾ ಲಕ್ಷಣ್ಭರಿತ್ ಮುಖಮಳಾಚೆಂ, ಐಶ್ವರ್ಯಾ ತಸಲೆಂ ಪರಿಪೂರ್ಣ್ ಸೊಭಾಯೆಚೆಂ, ಲಾರಾದತ್ತಾ ತಸ್ಲೆಂ ಸೆಕ್ಸ್ ಅಫೀಲ್ ಆಸ್ಚೆಂ, ಮಲ್ಲಿಕಾ ಶೆರಾವತಾ ತಸ್ಲೆಂ ವಷ್ಟ್ಪುಷ್ಟ್ ಸ್ಠನಾಂ, ಜಾಂಗೊ ಆಸ್ಚೆಂ, ತಬೂ ತಸ್ಲೆಂ ಸರಳ್, ನೈಸರ್ಗಿಕ್ ಆಕರ್ಷಣ್ ಆಸ್ಚೆಂ, ಮರಿಯಾ ಶರಪೋವಾ ತಸ್ಲೆಂ ದೊಡ್ತ್ಯಾ ಪ್ರತಿಭೆಚೆಂ.................ಮಾಫ್ ಕರ್.................ಪಟ್ಟಿ ಲಾಂಬಾತ್ತ್ ವೆತಾ....................ವಿಸ್ರಾಲೊಂ...................ಆವಯ್ ಪಾತ್ರಾಚ್ಯಾ ಮೌಸಮೀ ಚಟರ್ಜಿ ತಸ್ಲೆಂ ಉಸ್ಕೆಂ ಆಸ್ಚೆಂ ....ಚೆಡುಂ ತುಕಾ ಭೆಟ್ಲೆಂ ನಾಂ ಕೊಣ್ಣಾಂ" ಯತೀ ಮಾಮಾ ಅಮೃಕೊ ಹಾಸ್ಲೊ.
"ಖರೆಂ ಸಾಂಗ್ಚೆಂ ತರ್ ಮಾಮಾ, ಥೊಡ್ಯಾಂ ಕಡೆನ್ ಸೊಭಾಯ್ ಆಸ್ಲ್ಲಿ. ಪೂಣ್ ತ್ಯಾ ಸೊಭಾಯೆ ಪಾಟ್ಲ್ಯಾನ್ ಕುಸ್ಡೆಂ ಮನ್ ಆಸ್ಲ್ಲೆಂ. ಆನಿಂ ಥೊಡಾ ಕಡೆನ್ ಸರ್ವ್ ಆಸ್ಲ್ಲೆಂ ಪೂಣ್ ಉಸ್ಕೆಂ ನಾತ್ಲ್ಲೆಂ. ಮೋಗ್, ಪ್ರೇಮ್ ಮ್ಹಳ್ಳೆಂ ಸಬ್ದ್ ಮೌಲ್ಯ್ ಹೊಗ್ಡಾವ್ನ್ ಘೆವ್ನ್ ವ್ಯಭಿಚಾರಾಚ್ಯಾ ವ್ಯತಿರಿಕ್ತೆಚೆಂ ಸೂತ್ರ್ ಜಾತಾನಾಂ ಹಾಂವ್ ನಿರಾಸ್ಲೊಂ. ದರಬಸ್ತ್ ಪಯ್ಶೆ ಆಸ್ಲ್ಲೆ. ಪೂಣ್ ಹಾಂವೆ ಮೊಲಾಯಿಲ್ಲೆಂ ಫಕತ್ತ್ ಡಂಬಾಚಾರ್, ಸಿನಿಕತಾ, ಅವ್ಯಕ್ತ್ ಭ್ಯೆಂ - ಭೋವ್ಶಾ ಮೊರ್ನಾಚೆಂ ಯಾ ಅಜ್ನಾತ್ ವಲಯಾಚೆಂ!. ದೆಕುನ್ ಸರ್ವ್ ದುಡು ಹಾಂವೆಂ ಹೊಗ್ಡಾಯ್ಲೊ. ಕಸೊ ಜಾಣಾಂಯ್? ಪಿಯೊವ್ಣೆಂ, ಜುಗಾರ್, ಬೆಟ್ಟಿಂಗ್, ಘೊಡ್ಯಾ ಶಿಮ್ಟಿ. ಸರ್ವ್ ದಿವಾಳಿ ಜಾಲೆಂ. ದುಡ್ವಾಚ್ಯಾ ಬಂಧಡೆಂತ್ಲೆಂ ಸುಟ್ಲೊ ಮ್ಹಣ್ ಚಿಂತಾ ಚಿಂತಾನಾಂ ಅನ್ವೇಷಣಾಚೊ ವೆಗ್ಳೊಚ್ಚ್ ಸಂಸಾರ್ ದಿಸಲಾಗ್ಲೊ.........."
"ಭಾಚ್ಯಾ, ಜನಮ್ - ಮರಣ್, ಪಾಪ್ - ಪುಣ್ಯ್, ದೇವ್ - ಧರ್ಮ್, ಸರ್ಗ್ ಯಮ್ಕೊಂಡ್ ತತ್ವ್ಶಾಸ್ತ್ರ್ - ಅಧ್ಯಾತ್ಮ್ ವ್ಹಯ್ಮೂ? ತುಂ ಜಟಾಧಾರಿ ಜಾಲೊಯ್"
"ಹೂಂ ಮಾಮಾ, ಹಾಂವ್ ಜಟಾಧಾರಿ ಜಾಲೊಂ. ಕನ್ಯಾಕುಮಾರಿ ಥಾವ್ನ್ ಹಿಮಾಲಯ್ ಪರ್ಯಾಂತ್ ಅನಾಥಾಪರಿಂ, ಹಿಂದೆಂತ್ ಸಾಂಗ್ಚೆಂ ತರ್ ’ಬಟಕ್ತಿ ಆತ್ಮಾ" ಭಾಶೆನ್ ಭಂವ್ಲೊಂ. ಕಾಂಚಿ, ಮಧುರೈ, ಕಾಶಿ, ಪುರಿ............. ವಚಾನಾತ್ಲ್ಲೆ ಜಾಗೆ ನಾಂತ್. ಪಳೆನಾತ್ಲ್ಲೆಂ ದೀವ್ಳ್ ನಾಂ"
"ಪುಣ್ ದೇವ್ ಮೆಳ್ಳೊ ನಾ!. ಆಪ್ಣಾಕ್ಚ್ ಆಸ್ತಿಕ್ ಮ್ಹಣ್ ವೊಲಾವ್ನ್, ದೇವ್ ಧರ್ಮ್ - ಅಧ್ಯಾತ್ಮಾಚೆಂ ಲೇಬಲ್ ಲಾಗವ್ನ್ ಘೇವ್ನ್ ತುಂವೆ ಜೊಡ್ಲೆಂಯ್ ತರಿ ಕಿತೆಂ....?
"ಫಕತ್ತ್ ಪೊಳ್ಕುರ್ಪಣ್; ಕಸಲ್ಯಾಕ್ಗಿ ಭಿಂಯೆವ್ನ್, ವಾಸ್ತವ್ ಸ್ವೀಕಾರ್ ಕರುಂಕ್ ತಯಾರ್ನಾಸ್ತಾಂ ಪಲಾಯನ್ ಕರ್ತೆಚ್ಚ್ ಆಸಾ ಮ್ಹಣ್ ಭಾಸ್ ಜಾತಾನಾ......."
"ಸ್ವಘೋಷಿತ್ ಯಾ ಲೋಕಾನ್ಂಚ್ ಪಾಟಾರ್ ಬಸಯಿಲ್ಲ್ಯಾ ದೇವ್ ಮಾನವಾಂ ಪಾಟ್ಲ್ಯಾನ್ ಧಾಂವ್ಲೊಯ್"
"ಸಾರ್ಕೆಂ. ಸತ್ಯಸಾಯಿ, ಅಮ್ರತಾನಂದಮಯೀ, ಕಲ್ಕಿ, ಮಠಾಧಿಪತಿ, ಜೋತಿಷಿ.............ಪುಣ್ ನಾ..................... ಮಾಮಾ, ಮೂಳ್ಭೂತ್ ಜಾವ್ನ್ ಹಾಂವ್ ಶುದ್ಧ್ ನಾಸ್ತಿಕ್! ಅಜೂನ್ಯೀ"
"ಹಾಂವ್ ಜಾಣಾಂ. ಪುಣ್ ತುಜ್ಯಾ ತಸಲೆ ಸೋ ಕಾಲ್ಡ್ ಇಂಟೆಲೆಕ್ಚುವಲ್ಸ್ - ಅಂತರ್ಜ್ನಾನಿಯೀ ದ್ವಂದ್ವಕ್ ವಳಗ್ ಜಾತಾತ್ ಪಳೆ"
"ಖರೆಂ ಮಾಮಾ, ಫುಡೆಂ ಸಾಹಿತ್ಯ್, ತತ್ವ್ಶಾಸ್ತ್ರ್ಚ್ಯಾ ಗುಂಡಾಯೆಕ್ ದೆಂವ್ಲೊಂ. ಕಾಮೂ, ಕಾಫ್ಕಾ, ಸಾತ್ರೆ, ವಿವೇಕಾನಂದ, ಜಿಡ್ಡುಕ್ರಷ್ಣ ಮೂರ್ತಿ ...........ನಾಂ.............. ಜೀವನೋತ್ಸಾಹಚಿ ಮುಳಾವಿ ಝರ್ ಥಂಯ್ಚರ್ಯಿ ಝಳ್ಕಲಿನಾ"
"ಭಾಚ್ಯಾ, ಸಾಹಿತ್ಯ್ - ತತ್ವ್ಶಾಸ್ತ್ರಚ್ಯಾ ಜಿಣ್ಯೆಕ್ಯೀ ವಾಸ್ತವ್ ಜಿಣ್ಯೆಕ್ಯಿ ಫರಕ್ ಆಸಾ. ಮಧ್ಗಾತ್ ವಿಸ್ತಾರಾಯೆಚೊ ಕಂದಕ್ ಆಸಾ. ಹ್ಯಾ ದೊನಾಂ ಮಧ್ಲೊ ಅಂತರ್ ಸಮ್ಜೊನ್ ಘೆಂವ್ಚೆಂ ಭೋವ್ ಗರ್ಜೆಚೆಂ. ತೆಂ ಸೊಡ್ನ್ ದೊನಾಯ್ಕ್ಯೀ ಏಕ್ ಕರುಂಕ್ ಗೆಲ್ಯಾರ್ ಯಾ ದೊನೀ ಏಕ್ಚ್ಚ್ ಮ್ಹಣ್ ಚಿಂತ್ಲ್ಯಾರ್ ತೆಂ ಖಂಡಿತ್ ಜಾವ್ನ್ ಜಿಣ್ಯೆಚೆಂ ವ್ಹಡ್ಲೆಂ ದುರಂತ್!"
"ವ್ಹಯ್ ಮಾಮಾ, ನಿರಾಶಾಚಿ ಮೊಡಾಂ ಸಂಪೂರ್ಣ್ ಆವೃತ್ತ್ ಜಾತಾನಾ ದುರಂತಾಚಿ ಅಂತಿಮ್ ಕ್ಷಣಾ ಮಾತ್ರ್ ಬಾಕಿ ಉರ್ಲ್ಲಿಂ. ಕುಪಾಂ ಮಧ್ಲ್ಯಾ ರುಪ್ಯಾಳ್ಯಾ ದೆಗೆಪರಿ ತುಜೊ ಉಗ್ಡಾಸ್ ಆಯ್ಲೊ. ಹಾಂವ್ ನೆಣಾಂಕಿ ಖಂಚ್ಯಾ ಭರ್ವಶ್ಯಾನ್ ಆಯ್ಲಾಂ ತೆಂ. ಪೂಣ್ ಆಯ್ಲಾಂ. ತುಕಾ ಕಿತೆಂ ತರೀ ಮೆಳ್ಳಾಂ ತೆಂ ಜರೂರ್"
"ಸೊಡ್ ಸರ್ವ್. ಮೆಳ್ಳಾಂ ವ್ಹಯ್. ಮ್ಹಜ್ಯಾ ಮಟ್ಟಾಕ್ ತೆಂ ಆಖಂಡ್ ಸತ್, ಅಖಂಡ್ ವಾಸ್ತವ್ ಜಾವ್ನಾಸಾ. ಫುಣ್ ತೆಂ ಸಾರ್ವತ್ರಿಕ್ ಜಾಯ್ಜಯ್ ಮ್ಹಣ್ ಕಾಂಯ್ ನಾಂ. ಆಮಿಂ ಎದೊಳ್ ವರೆಗ್ ಚರ್ಚಾ ಕೆಲ್ಲ್ಯಾ ವಿವಿಧ್ ಆಯಾಂಮಾಚಾಕಿ ಉಂಚ್ಲೆಂ ಕಿತೆಂಗೀ ಆಸಾ ತೆಂ ಖರೊಖರ್ ಸತ್"
"ಮ್ಹಾಕಾ ಸ್ವಷ್ಟ್ ಜಾಲಾಂಕಿ ನವಿ ವಾಟ್, ನವೊ ಆವಿಷ್ಕಾರ್ ತುಂವೆ ಕೆಲಾಯ್. ನವೊ ತತ್ವ್ ನವೊ ಅರ್ಥ್, ನವೆಂ ಆಯಾಮ್. ನವೆಂ ಅನ್ವೇಷಣ್................... ತರ್ ಸಾಂಗ್ ಮ್ಹಾಕಾ"
ಯತೀ ಮಾಮಾನ್ ಭುಜಾಂ ಹಾಲಯ್ಲಿಂ. ನಾ ಮ್ಹಣ್ಚಾ ಜಿನ್ಸಿಂ ತಕ್ಲಿ ಹಾಲಯ್ಲಿ. ಪ್ರಶಾಂತ್ ಹಾಸೊ ಹಾಸ್ಲೊ ತೊ.
"ನಾಂ................... ಕಸಲೆಂಚ್ ನವೆಂಸಾಂವ್ ನಾ. ಶತಮಾನಾಂ ಥಾವ್ನ್, ಸ್ವಷ್ಟ್ ಸಾಂಗ್ಚೆಂ ತರ್ ಮನ್ಶಾಜೀವಿಚ್ಯಾ ಉಗಮಾ ಥಾವ್ನ್ ಆಸ್ಲ್ಲೆಂ ತೆಂ, ಫಕತ್ತ್ ಹಾಂವೆ ಮ್ಹಜ್ಯಾ ಜಿಣ್ಯೆಂತ್ ಐಡೆಂಟಿಫೈ ಕರ್ನ್ ಕಾರ್ಯಾಕ್ ಹಾಡ್ಲಾಂ. ಮ್ಹಜ್ಯಾ ಮಟ್ಟಾಕ್ ತಿ ಜಾವ್ನಾಸಾ ಅಧಮ್ಯ್ ಜೀವನೋತ್ಸಾಹಾಚಿ ಝರ್. ತೆಂ ಜಾವ್ನಾಸಾ ಮೂಳ್! ತೆಂ ಜಾವ್ನಾಸಾ ಉಗಮ್. ರೂಪ್ ರೂಪ್ ದೊಳ್ಯಾಂ ಮುಖಾರ್ ಆಸ್ಲ್ಯಾರೀ - ಕಿತೆಂಗೀ ಸೊಧ್ನಾಂ ಕರ್ಚಿ, ವಾಸ್ತವ್ ಜಾವ್ನ್ ನಾತ್ಲ್ಲ್ಯಾ ಖಂಚಾಗೀ ವಿಶ್ಯಾಂತ್ ಅನ್ವೇಷಣ್ ಕರ್ಚೆಂ ಆಮ್ಚೆಂ ಸರ್ವಾಂಚೆಂ ಪಿಶೆಪಣ್. ಮೂರ್ಖತೆಚಿ ಪರಮಾವಧಿ..........."
"ತರ್ ಸಾಂಗ್ ಮಾಮಾ............. ದೆಕುನ್ಚ್ ತಿತ್ಲ್ಯಾ ಪಯ್ಸ್ ಥಾವ್ನ್ ತುಕಾ ಪಾತ್ಯೆವ್ನ್ ಆಯ್ಲಾಂ"
"ಮಾಫ್ ಕರ್ ಭಾಚ್ಯಾ, ಹಾಂವ್ ತಾಚೆಂ ವ್ಯಾಖ್ಯಾನ್ ದೀಂವ್ಕ್ ಸಕನಾ. ಪುಣ್ ದಾಕಂವ್ಕ್ ಸಕ್ತಾಂ................. ಹೊ.................. ಎದೊಳ್ಚ್ಚ್ ಮಧ್ಯಾನ್ ಜಾಯಿತ್ತ್ ಆಯ್ಲಿ. ಚಲ್ ಊಠ್. ವರ್ಸಾಂಗಟ್ಲ್ಯಾನ್ ರಾಕ್ಲಾಯ್. ಫಾಲ್ಯಾಂ ಸಕಾಳ್ ಪರ್ಯಾಂತ್ ರಾಕೊಂಕ್ ಸಕ್ತಾಲೊಯ್" ಯತೀ ಮಾಮಾ ಉಠ್ಲೊ.
ದೊಗಿ ಘರಾ ಬಿತರ್ ಆಯ್ಲೆ. ಯತೀ ಮಾಮಾನ್ ದಾಕಯಿಲ್ಲ್ಯಾ ಕೂಡಾಚೆರ್ ನದರ್ ಭಂವ್ಡಾಯ್ಲಿ ತಾಣೆಂ. ಲಾಂಪ್ಯಾಂವಾಚ್ಯಾ ಮಂದ್ ಉಜ್ವಾಡಾಂತ್ ಧರ್ಣಿರ್ ಸೊಡಯಿಲ್ಲಿ ಮಾಂದ್ರಿ, ವೋಲ್, ಉಶೆ, ಚೆಂಬಾಂತ್ ಉದಾಕ್. "ಸುಶೆಗ್ ಘೆ. ಸಕಾಳಿಂ ಮೆಳ್ಯಾಂ. ಹಾಂವ್ ಮಾಳ್ಯೆ ವಲೆ ಕೂಡಾಂತ್ ಆಸ್ತಾಂ. ಗರ್ಜ್ ಪಡ್ಲ್ಯಾರ್ ಆಪಯ್" ಯತೀ ಮಾಮಾ ಪಾಟಿಂ ಘುಂವ್ಲೊಂ.
"ಮಾಮಾ, ಏಕ್ ಸಂಗತ್ ವಿಸಾರುಂ?"
"ವಿಸಾರ್"
"ತುಂ ಅಜೂನ್ ಅಂಕ್ವಾರ್ಚ್ ಉರ್ಲಾಯ್ ಮ್ಹಣ್ ಚಿಂತ್ಲ್ಲೆಂ."
"ಸಾರ್ಕೆಂ. ತುಕಾ ಮಾಮಿ ಆಸ್ಲ್ಲಿ ತರ್ ಎದೊಳ್ಚ್ಚ್ ದಾಕಯ್ತೊಂ"
"ಪೂಣ್ ................. ಹ್ಯಾ ಘರಾಂತ್ ಜಾಯೆಚ್ಯಾ ಫುಲಾಂಚಿ ಫರ್ಮಳ್ ಯೆತೇ ಆಸಾ. ಪಯ್ಸ್ ಖಂಯ್ಸ್ರ್ಗಿ ಪಾಯ್ಜಾಣಾಂಚೊ, ಕಾಂಕ್ಣಾಂಚೊಂ ಆವಾಜ್ ಆಯ್ಕಾತೆ ಆಸಾ"
"ಆತಾಂ ಯತೀ ಮಾಮಾ ಅಮೃಕೊ ಹಾಸ್ಲೊ.
"ತುಜಿ ಸೂಕ್ಷ್ಮ್ಗ್ರಹಣ್ ಸಕತ್ ಮೆಚ್ವಾಜಾಯಿಚ್ಚ್.........ಆಸೊ........ಫಾಲ್ಯಾಂ ತುಂಚ್ ತಿಕಾ ಖುದ್ಧ್ ಬೆಟ್ತೆಲೊಯ್"
**************************
ಎಕಾಚ್ಛಾಣೆಂ ಜಾಗ್ ಜಾಲಿ ತಾಕಾ. ಅಪುಣ್ ಶಂಕರಾಚ್ಯಾ ಎಕಾ ಕೊನ್ಶಾಕ್ ಆಸ್ಚ್ಯಾ ಆಪ್ಲ್ಯಾ ಕುಡಾಂತ್ ನಾ ಮ್ಹಣ್ ಕಳಿತ್ ಜಾಂವ್ಕ್ ತಾಕಾ ಥೊಡಿಂ ಕ್ಷಣಾಂ ಲಾಗ್ಲಿಂ. ಸವ್ಕಾಸ್ ದೊಳೆ ಉಘಡ್ನ್ ಉಟೊನ್ ಬಸ್ಲೊಂ. ಜನೆಲಾ ಥಾವ್ನ್ ಅಸ್ವಷ್ಟ್ ಉಜ್ವಾಡ್. ವೊರಾಂ ಪಳೆಲಾಗ್ಲೊಂ. ಸಾಡೆ ಪಾಂಚ್. ಕೂಡಾ ಥಾವ್ನ್ ಭಾಯ್ರ್ ಆಯ್ಲೊ. ಜಾಗ್ಮಾಗ್ ನಾ. ಮಾಳ್ಯೆಚ್ಯಾ ನಿಸ್ಣಿರ್ ಉಜ್ವಾಡ್ ಪಡ್ಲ್ಲೊ. ಸವ್ಕಾಸ್ ನಿಸಣ್ ಚಡೊನ್ ಮಾಳ್ಯೆರ್ ಆಯ್ಲೊ. ಮಾಳ್ಯೆರ್ ಆಸ್ಚೆಂ ಕೂಡಾಚೆಂ ದಾರ್ ದಾಂಪುನ್ ಆಸ್ಲ್ಲೆಂ. ಪುಣ್ ಜನೆಲಾಚಿ ವಯ್ಲಿ ಕೂಸ್ ಉಗ್ತಿ ಆಸ್ಲ್ಲಿ. ಲಾಗಿಂ ಯೇವ್ನ್ ಬಿತರ್ ತಿಳಿಲಾಗ್ಲೊ. ವಿಶಾಲ್ ಕೂಡ್, ವಾಚನಾಲಯಪರಿಂ ದಿಸ್ತಾಲೆಂ. ಭಂವ್ತಣಿಂ ಬೂಕಾಚಿಂ ಶೆಲ್ಪಾಂ. ಪುಸ್ತಕ್ ಭಂಡಾರ್. ಮಧ್ಗಾತ್ ವಿಶಾಲ್ ಮೇಜ್. ತಾಚೆರ್ ಟಿ.ವಿ., ಕಂಪ್ಯೂಟರ್, ಸ್ಟೀರಿಯೊ, ಡಿ.ವಿ.ಡಿ., ಆಡಿಯೊ ಕ್ಯಾಸೆಟ್ಸ್, ಕ್ಯಾಮೆರಾ, ವಿಡಿಯೊ ಕ್ಯಾಮೆರಾ!. ಅನ್ಯೇಕಾ ಕುಶಿನ್ ಶೋಕೇಜಿಂತ್ ಸಜಯಿಲ್ಲೆಂ ವಿವಿಧ್ ಬ್ರಾಂಡಾಚೆ ಸೊರ್ಯಾಚೆ ಬಾಟ್ಲ್ಯೊ. ಸರ್ವ್ ಆಧುನಿಕ್ ರಿತಿನ್ ಸಜಯಿಲ್ಲೆಂ!. ಥಂಯ್ ಥಂಯ್ಸರ್ ಶಿಂಪ್ಡಾಲ್ಲಿಂ ದಿಸಾಳಿಂ, ನೆಮಾಳಿಂ, ಪತ್ರಾಂ. ಆನಿಂ ತ್ಯಾ ಸಜವ್ಣೆಂ ಮದ್ಗಾತ್ ಧರ್ಣಿರ್ ಸಾಣ್ಯಾಚ್ಯಾ ಪರ್ನ್ಯಾ ಗೊಣ್ಯೆಚೆರ್ ದಿಂಬ್ಯೆರ್ ಯತೀ ಮಾಮಾ!. ತಾಂಬ್ಡಿ ಖಾಚ್ ಗಾಲ್ಲಿ ವೇಸ್ಟಿ, ಜನಿವಾರ್, ಆಂಗಾರ್ ವಿಭೂತಿ...............ಪಕ್ಕಾ ದಿವ್ಳಾಚೊ ಪೂಜಾರಿ, ಬ್ರಾಹ್ಮಣ್. ಮಣ ಮಣ ಪುಸ್ಪುಸೊಲ್ಲೊ ಆವಾಜ್............ ಭೋವ್ಶಾ ಮಂತ್ರಾಂ ಜಾಯ್ಜಾಯ್. ಹೆಂ ದೃಶ್ಯ್ ಪಳೆವ್ನ್ ತ್ಯಾ ಫಾಂತ್ಯಾಚ್ಯಾ ಪ್ರಶಾಂತತೆಂತ್ಯಿ ಕ್ರೋಧಾಸವೆಂ ಅಸಹ್ಯಚೆಂ ಭಾವನ್ ಮಾಂಡೊನ್ ಯೆತಾನಾ ಹಾಣೆಂ ಮುಟಿ ಅಂರ್ಧಿಲ್ಯೊ.
"ಭಾಚ್ಯಾ ಬಿತರ್ ಯೇ" ಪಾಟಿಂ ಘುಂವಾನಾಸ್ತಾನಾ ಯತೀ ಮಾಮಾನ್ ಸಾಂಗ್ಲೆಂ. ಹೊ ದಾರ್ ಲೊಟುನ್ ಬಿತರ್ ಆಯ್ಲೊ.
"ಯತಿ ಮಾಮಾ, ಹಿ ಕಸ್ಲಿ ಅತಿರೇಕಾಚಿ ಪಾಂಗ್ರೊಣಿ!? ರಾಗಿಷ್ಠ್ ತಾಳ್ಯಾನ್ ವಿಸಾರ್ಲೆಂ ಹಾಣೆಂ.
"ಮುಖಾರ್ ಫ್ಲಾಸ್ಕಾಂತ್ ಕಾಫಿ ಆಸಾ. ದೋನ್ ಕಪ್ಪಾಂಕ್ ವೋತ್. ಏಕ್ ಕಪ್ ಹೆವ್ಶಿನ್ ದೀ" ಯತೀ ಮಾಮಾ ಉಬೊ ಜಾಲೊ.
"ಭೋವ್ಶಾ ಮಾಮಾ, ಹಾಂವ್ ಜೊಕ್ತ್ಯಾ ವ್ಯಕ್ತಿ ಸರ್ಶಿಂ, ಜೊಕ್ತ್ಯಾ - ಸೂಕ್ತ್ ಜಾಗ್ಯಾಕ್ ಯೇಂವ್ಕ್ ನಾ ಮ್ಹಣ್ ಭೊಗ್ತಾ!. ಸೈಕೊಪೆತಾಪರಿ ಮ್ಹಾಕಾ ತುಂ ಭಾಸ್ ಜಾತಾಯ್" ಗಂಭೀರಾಯೆನ್ ಮ್ಹಣಾಲೊ ತೊ.
"ಭಾಚ್ಯಾ, ಸ್ವಗತ್ ಉಲೊಂವ್ಚೆಂ ಮಂತ್ರಾಂ ನ್ಹಂಯ್. ನಾಣ್ಯಾಚ್ಯಾ ಗೊಣ್ಯೆಕ್ ದಿಂಬಿ ಘಾಲ್ಚೆಂ ಧ್ಯಾನ್ ನ್ಹಂಯ್. ತಾಂಬ್ಡಿಂ ವೇಸ್ಟಿ - ವಿಭೂತಿ ದೆವಾಸ್ಪಣ್ ನ್ಹಂಯ್. ಹಾಂಗಾಸರ್ ಸಜಯಿಲ್ಲೆ ಆಧುನಿಕ್ ವಸ್ತು ಸೈಕೊಪೆತಾಚಿಂ ಪರಿಕರಾಂ ನ್ಹಂಯ್!. ಅಶ್ವತ್ಥಾಮಾ, ಹೊ ದೀಸ್ ಸವಲಾಂಚೊಂ ನ್ಹಂಯ್ ಬಗಾರ್ ಜಾಪಿಚೊಂ ದೀಸ್. ತುಜ್ಯಾ ಸೊಧ್ನೆಕ್, ಅನ್ವೇಷಣಾಕ್ ಪೂರ್ಣ್ ವಿರಾಮ್. ಆಜ್ ತರೀ ಗೋಚರ್ ಜಾಯ್ತ್ ಮ್ಹಣ್ ಮ್ಹಜಿ ಪಾತ್ಯೆಣಿ" ಯತೀ ಮಾಮಾನ್ ಸಾಂಗೊನ್ ಉಪ್ರಾಂತ್ ಕೂಡಾಚ್ಯಾ ಮುಲ್ಯಾರ್ ಕಿತೆಂಗಿ ಸೊಧಿಲಾಗ್ಲೊ. ಹೊ ಫ್ಲಾಸ್ಕಾಂತ್ಲಿಂ ಕಾಫಿ ಕಪ್ಪಾಕ್ ವೊತುನ್, ಜನೆಲಾ ಕುಶಿಂ ಯೇವ್ನ್ ಭಾಯ್ರ್ ತಿಳಿಲಾಗ್ಲೊ................. ಭಾಯ್ರ್ ಆತಾಂ ಸ್ವಷ್ಟ್ ಉಜ್ವಾಡ್ಲ್ಲೆಂ. ಪೂರ್ವ್ ದಿಕ್ಕಾರ್ ತಾಂಬ್ಡೆಂ ಜಾಲ್ಲೆಂ ಮೊಳಾಬ್. ಪಾಚ್ವೆ ದೊಂಗೊರ್, ಧುಂವ್ರಿ, ಶೀತಳ್ ವಾರೆಂ, ಶಾಂಭವೀಸ್ ವಾಳ್ಚೊ ನಿನಾದ್. ’ಅಬ್ಬೀ’ ಜಲಪಾತಾಚೊ ಅವಾಜ್, ದೀಷ್ಟ್ ವೆತಾ ತಿತ್ಲ್ಯಾ ವಿಸ್ತಾರಾಯೆಚೆಂ ಮಾಡ್ ಮಾಡಿಯಾಚೆಂ ತೋಟ್.
ತೆವ್ಶಿಲ್ಯಾ ಜನೆಲಾ ಸರ್ಶಿಂ ಆತಾಂ ಯತೀ ಮಾಮಾ ಕಸಲ್ಯಾಗಿ ತಯಾರಾಯೆರ್ ಮಗ್ನ್ ಜಾಲ್ಲೊ. ತೀನ್ ಬೊಡಿಯಾಚೆಂ ಕ್ಯಾಮೆರಾ ಸ್ಟಾಂಡ್. ತಾಚೆ ವಯ್ರ್ ಕ್ಯಾಮೆರಾ ಬದ್ಲಾಕ್ ಪಿರ್ಲುಕೆಪರಿಂ ಆಸ್ಚೆಂ ಕಸಲೆಂಗಿ ಪರಿಕರ್. ತೆಂ ಪರಿಕರ್ ಜನೆಲಾ ಭಾಯ್ರ್ ದವರ್ನ್ ಕಿತೆಂಗೀ ತ್ಯಾ ಪರಿಕರಾಂತ್ ಪಳಯ್ಲಾಗ್ಲೊ.
"ಭಾಚ್ಯಾ, ಖಗೋಳ್ ವಿಜ್ನಾನಿಪರಿಂ ಹೊ ಕಿತೆಂ ಪಳೇವ್ನ್ ಆಸಾ ಮ್ಹಳ್ಳೊ ಕುತೂಹಲ್ ತುಕಾ ಜರೂರ್ ಆಸ್ತಲೊ. ಯೇ, ಖುಧ್ಧ್ ಪಳೆ. ಹಿ ಪಿರ್ಲುಕ್ ನ್ಹಂಯ್. ಬೋವ್ ಸಕ್ತೆಯುಕ್ತ್ ದೂರದರ್ಶಕ್"
..................ಆತಾಂ ಹೊ ಲಾಗಿಂ ಯೇವ್ನ್ ಪಿರ್ಲುಕೆಂತ್ ಪಳೆಲಾಗ್ಲೊ. ಅಪೂರ್ವ್ ದೃಶ್ಯ್. ’ಅಬ್ಬೀ’ ಜಲಪಾತ್. ವಯ್ರ್ ಉಭಾರಾಯೆ ಥಾವ್ನ್ ಪಡ್ಚೊ ಉದ್ಕಾಚೊ ಕ್ಷೀರ್ ಸಾಗರ್. ಪಾತಾಳ್ ಧುಂವ್ರಿಂ, ಪಾಚ್ವೆಂ ತಣ್, ರೂಕಾ ಝುಡಾಂ, ಕಾಳೆ ಕಾಳೆ ಜಯ್ತ್ ಶಿಳಾ................. ಮುಖ್ಲಿಂ ಪಾಂಚ್ ಮಿನುಟಾಂ ಸ್ತಬ್ದ್ ಜಾವ್ನ್ ಪಳೆವ್ನ್ ಅಖ್ರೇಕ್ ಪ್ರಶ್ನಾರ್ಥಕ್ ದ್ರಷ್ಟೆನ್ ಯತೀ ಮಾಮಾಕ್ಚ್ಚ್ ಪಳೆಲಾಗ್ಲೊ. ಯತೀ ಮಾಮಾಚ್ ಉಲಯ್ಲಾಗ್ಲೊ.
"ನೀಳ್ಕೇಸ್ರಾಸ್, ವೈಭವ್ಪೂರ್ಣ್ ವಕ್ಷ್ಸ್ಥಾನ್ ಆನಿಂ ತಿಂ ಶಿಖರಾಂ, ಕಾಂತಯಿಲ್ಲೆ ನಿತಂಬ್, ಪೆಂಕಾಡ್ ಆನಿಂ ಪಾಟ್. ಮೋಹಕ್ ಉದರ್ ಆನಿಂ ಬೊಂಬ್ಲಿ, ಅತ್ಯಂತ್ ಸ್ಥಿಗ್ನ್ ಮುಖಮಳ್.............. ಸೊಡ್ ವರ್ಣನ್ ನಾಕಾ................ ಅತ್ಯಂತ್ ಆಹ್ಲಾದ್ಕರ್ ಖನಿ"
"ವೊಪ್ತಾಂ ಮಾಮಾ, ಸೌಂದರ್ಮಚೆಂ ಅಪೂರ್ವ್ ಭಂಡಾರ್ಚ್ ಸಯ್. ಕೋಣ್ ತೆಂ?"
"ಜಾಯೆ ಫುಲಾಂಚ್ಯೊ ಫರ್ಮಳ್, ಕಾಂಕ್ಣಾಂ - ಪಾಯ್ಜಾಣಾಚ್ಯಾ ಆವಾಜಾಚೆಂ ಚೆಡುಂ"
"ಸಮ್ಜಾಲೆಂ ಪುಣ್ ಹೆಂ ಜಾವ್ನಾಸಾ ಉಗಮ್. ತಿಂ ಜಾವ್ನಾಸಾ ಝರ್ ಹೆಂ ಜಾವ್ನಾಸಾ ಮೂಳ್ ಮ್ಹಣ್ ಮಾತ್ರ್ ಸಾಂಗಾನಾಕಾ. ಕಿತ್ಯಾಕ್ ಜಾಣಾಂಯ್? ಸ್ಖಲನ್ ಜಾಲ್ಲೆ ದುಸ್ರೆ ಘಡ್ಯೆ ಸರ್ವ್ ಸೊಭಾಯ್ ಗೌಣ್ ಜಾತಾ. ನಿರ್ವಾಣ್ ಜಾಲ್ಲೆಪರಿಂ ಭೊಗ್ತಾ. ಶ್ರೇಷ್ಟತೆಚ್ಯಾ ಜಾಗ್ಯಾರ್, ಶುದ್ಧತಾ - ಪರ್ಮಳಾಚ್ಯಾ ಜಾಗ್ಯಾರ್, ಕ್ಷುದ್ರ್ ದುರ್ನಾತೆಚೆಂ ಊಹನ್ ಸಮಂಜಸ್ ನ್ಹಂಯ್ ತರೀ ಅನಿವಾರ್ಯ್ ಜಾತಾ!"
"ಜಾಂವ್ಕ್ ಪುರೊ. ಏಕ್ ಮುಗ್ದ್, ಪರಿಶುದ್ಧ್ ಮನ್ ತಿಚೆಂ ಥಂಯ್ ಆಸಾ. ವಿರಾಮ್ ಸೊದ್ತೆಲ್ಯಾಂಕ್ ಭೋವ್ ವಾತ್ಸಲ್ಯ್ಭರಿತ್ ಉಸ್ಕೆಂ ಆಸಾ ಮ್ಹಣ್ ತುಕಾ ದಾಕಂವ್ಚೊ ಜಾವ್ನಾಸಾ ಮ್ಹಜೊ ಉದ್ದೇಶ್"
"ಸಂಬಂಧ್ ಕಸ್ಲೊ ಮ್ಹಣ್ ವಿಚಾರುಂ ಮಾಮಾ?"
"ಬಾಯ್ಲ್ ನ್ಹಂಯ್, ದವರ್ನ್ ಘೆತ್ಲ್ಲೆಂ ನ್ಹಂಯ್, ಧುವ್ - ನಾತ್ ನ್ಹಂಯ್. ಸಾಮಾಜಿಕ್ ಸಂಬಂಧ್ ಪೊಸ್ಕಿ ಧುವ್. ಪುಣ್ ಮ್ಹಜ್ಯಾ ಮಟ್ಟಾಕ್ ಪ್ಲೊರೆನ್ಸ್ ನೈಟಿಂಗೇಲ್, ತುಜ್ಯಾ ಆವಯ್ ತಸಲೆಂ ವ್ಹಡ್ಲೆಂ ಭಯ್ಣ್. ತುಜ್ಯಾ ಆಜಿಯೆ ತಸಲಿ ಆವಯ್!" ಯತೀ ಮಾಮಾ ಅಮೃಕೊ ಹಾಸ್ಲೊ.
"ತುಜ್ಯಾ ಭಾವನಾಂಕ್ ಹಾಂವ್ ಗೌರವ್ ದಿತಾಂ ಮಾಮಾ"
"ಸೊಡ್...............ಆಸೊಂ, ಸ್ತ್ರೀಯೆ ಥಂಯ್, ಸಂಬೋಗ್ - ಸ್ಖಲನ್ ಕ್ರಿಯೆ ಥಂಯ್ ಚೈತನ್ಯಚೆಂ ಉಗಮ್, ಶ್ರೇಷ್ಟತೆಚ್ಯಾ ತುದ್ಯೆಚೆಂ ವ್ಯಾಖ್ಯಾನ್ ಸೊಧ್ಲ್ಲೆಂ, ಪ್ರತಿವಾದನ್ ಕೆಲ್ಲೆ ಕಿತ್ಲೆಶೆಗಿ ಮಾಹಾನುಭವ್ ಆಯ್ಲ್ಯಾತ್ ಗೆಲ್ಯಾತ್................ ಪೂಣ್ ವ್ಯಾಖ್ಯಾನ್ ತೆಂ ನ್ಹಂಯ್. ಅಂಶಿಕ್ ಜಾವ್ನಾಸೊಂಕ್ಯಿ ಪುರೊ. ಪೂಣ್ ಹಾಂವ್ ನೆಣಾಂ; ಹಾಚ್ಯಾಕಿ ಮಹತ್ತರ್ ಹೆರ್ ಕಿತೆಂಗಿ ಆಸಾ. ಯಾ, ಭಾಯ್ರ್ ಯಾ. ದಾಕಯ್ತಾಂ ಮಾತ್ರ್. ಒಳ್ಕೊಂಚೆಂ ತುಜ್ಯಾ ಗ್ರಹಣ್ ಸಕ್ತೆಕ್ ಸೊಡ್ಲ್ಲೆಂ"
�
ತೆ ತೋಟಾ ಮದ್ಗಾತ್ಚ್ಯಾ ಪಾಂಯ್ ವಾಟೆನ್ ಚಲ್ತಾಲೆ. ಯತೀ ಮಾಮಾ ಮುಖ್ಲ್ಯಾನ್ ತರ್ ಹೊ ಪಾಟ್ಲ್ಯಾನ್. ಎಕಾ ಕುಶಿಂ ಮಾಡಿಯಾಚೆಂ ತರ್ ಅನ್ಯೇಕಾ ಕುಶಿಂ ಮಾಡಾಂಚೆಂ ತೋಟ್, ಕೆಂಳ್ಬೆ, ಫಳ್ ವಸ್ತುಂಚೆಂ ಬೃಹತ್ ತೋಟ್ ಮಾಗಿರ್ ಏಕ್ ಕುಶಿನ್..
"ಪಂದ್ರಾ ವರ್ಸಾಂ ಪಯ್ಲೆಂ ಹೊ ಜಾಗೊ ಆಸೊ ನಾತ್ಲ್ಲೊ ಮ್ಹಣ್ ತುಂ ಜಾಣಾಂಯ್"
ಯತೀ ಮಾಮಾನ್ ಸಾಂಗ್ಲೆಂ.
"ಹೂಂ............ಸರ್ವ್ ಪಾಡ್ ಪಡೀಲ್ ಪಡ್ಲ್ಲೆಂ" ಆಜ್ಯಾಚ್ಯಾ ಘರಾ ತೆದ್ನಾಂ ತೆದ್ನಾಂ ಆಯಿಲ್ಲೆಂ ಸ್ವಷ್ಟ್ ಉಗ್ಡಾಸ್ ಸ್ಮ್ರತಿ ಪಟಲಾರ್ ಉದೆಲೊ ತಾಕಾ.
"ತುಜ್ಯಾ ಅಜ್ಯಾಕ್, ಮ್ಹಜ್ಯಾ ಬಾಪಾಯ್ಕ್ ವೀಸ್ ಎಕ್ರೊ ಜಾಗೊ ಆಸ್ಲ್ಲೊ. ಉದ್ಕಾ ಸವ್ಲತಾಯ್ ಆಸ್ಲ್ಲಿ ತರೀ ತಾಣೆಂ ಮಾತ್ಯೆಂತ್ ಹಾತ್ ಮೆಳೈಲೆನಾಂತ್. ಫಕತ್ತ್ ಪುಜಾ, ಮಂತ್ರಾಂ, ಹೋಮ ಕರಿತ್ತ್ ಪುರೋಹಿತ್ ವೃತ್ತೆಚ್ಯಾ ಆಲ್ಪ್ ಆದಾಯಾಂತ್, ಉರ್ಲ್ಲ್ಯಾ ತಾಂದ್ಳಾಂತ್, ವೊಳಿಂ ನಾರ್ಲ್, ತೂಪ್, ಬೈರಾಸ್, ಪೊವ್, ಲಾಯೊ, ಕರ್ಪೂರಾಂತ್ಚ್ ತೃಪ್ತ್ ಆಸ್ಲ್ಲೊ"
ಯತೀ ಮಾಮಾಚ್ಯಾ ತಾಳ್ಯಾಂತ್ ವ್ಯಂಗ್ಯ್ ಆಸ್ಲ್ಲೆ. ಯಾ ನಾಂ ತೆಂ ಹಾಕಾ ಸುಸ್ತಾಲೆಂ ನಾಂ.
"ಯೆದೆಂ ವ್ಹಡ್, ಬ್ರಹತ್ ತೋಟ್ ಹಾಂವೆಂ ಎದೊಳ್ ದೆಖೊಕ್ನಾಂ" ಹಾಚ್ಯಾ ತಾಳ್ಯಾಂತ್ ಮೆಚ್ವಣಿಂ ಆಸ್ಲ್ಲಿ.
"ಭಾಚ್ಯಾ, ಹೆಂ ಮಾತ್ರ್ ನ್ಹಂಯ್. ಪಳೆ ಪಾಗೊರಾ ಭಾಶೆನ್ ನಿದ್ಲ್ಲೆಂ ಭಂವ್ತಣಿಚೆಂ ಗುಡೆ ತೆ ರೂಕ್ ನ್ಹಂಯ್ ರಬ್ಬರ್ ತೋಟ್. ಪಾಯ್ಶಿಂ ಎಕ್ರೆ ಕ್ರಷಿ ಸಾಮ್ರಾಜ್ಯ್ ಹಾಂವೆಂ ಆಜ್ ಭಾಂದುನ್ ಹಾಡ್ಲಾಂ..." ನಿರ್ಲಿಪ್ತ್ ತಾಳೊ ಶಿವಾಯ್ ತಾಂತು ಅಭಿನಾಮ್ ಜಾಂವ್ದಿ. ವ್ಹಡ್ಪಣ್ ಜಾಂವ್ದಿ ನಾತ್ಲ್ಲೆಂ.
"ತರ್ ವ್ಹಡ್ ಜಮೀನ್ದಾರ್ ತುಂ. ಲಾಕಾಗಟ್ಲ್ಯಾನ್ ಪಯ್ಶೆ ವಾಳ್ತಾತ್ ತರ್ ತುಜೆ ಕಡೆನ್" ಹೊ ಹಾಸ್ಲೊ.
"ಮನ್ಶಾಕ್ ಉದ್ದೇಶ್, ಧ್ಯೇಯ್ ಜಾಯ್ ಜಾಯ್. ಹಠ್ - ಸಾಧನ್ ಕರ್ನ್ ಜಯ್ತ್ ಆಪ್ಣಾವ್ನ್ ಜಿಣಿಂ ರುತಾಂ ಕರಿಜಾಯ್ - ಆಸಲೆ ಭೋವ್ ಪುರಾತನ್ ಡೈಲಾಗ್ ಮಾರ್ನ್ ಹಾಂವ್ ತುಕಾ ಬೋರ್ ಕರಿನಾ. ಜಮೀನ್ದಾರ್ ವ್ಹಯ್. ಪಯ್ಶೆ ವಾಳ್ತಾತ್ಯೀ ಸಾರ್ಕೆಂ. ಪುಣ್ ತಾಚೆ ಹಕ್ಕ್ದಾರ್ ಬೊಲ್ತೆಚ್ ಆಸಾತ್. ಕೇವಲ್ ಏಕ್ ಹಿಸ್ಸೊ ಅರ್ಥಾತ್ ಪರ್ಸೆಂಟ್ ಮಾತ್ರ್ ಮ್ಹಜೊ. ಮ್ಹಾಕಾಯ್ ಖಾಯ್ಜೆ, ಜೆವಿಜಾಯ್ ಪಳೆ."
"ಹೆ ಕಸ್ಲೆ ಹುಮಿಣ್ಯೊ ಮಾಮ? ಹಾಂವ್ ಸಮ್ಜಲ್ನಾಂ!"
"ಭೋವ್ ಸಿಂಪಲ್? ಚಲ್ಯಾಂ. ತುಂಚ್ ದೆಖ್ತೆಲೊಯ್"
................ಮುಖ್ಲಿ ವಾಟ್ ತೆ ಮೌನತೆನ್ ಚಲಲಾಗ್ಲೆ. ಫುಡ್ಲ್ಯಾ ಪಾಂಚ್ ಮಿನುಟಾಂನಿ ತೆ ಉಭಾರ್ ಗುಡ್ಯಾಚ್ಯಾ ಮುಳಾಕ್ ಪಾವ್ಲೆ. ಗುಡಾಕ್ ಚಡೊಂಕ್ ಮೆಟಾಂ ಆಸ್ಲ್ಲಿಂ. ಮೆಟಾಂ ಚಡೊನ್ ವಯ್ರ್ ಪಾವ್ತಚ್ಚ್ ಹಾಣೆಂ ಭಂವ್ತಣಿಂ ದೀಷ್ಟ್ ಲಾಯ್ಲಿ. ನವೀಕ್ರತ್ ಜಾಲ್ಲೆಂ ದೀವ್ಳ್! ಪಂದ್ರಾ, ವೀಸ್ ವರ್ಸಾಂ ಪಯ್ಲೆಂ ಆಶೆಂ ನಾತ್ಲ್ಲೆಂ. ಬೋವ್ ಪುರಾತನ್ ಜಾವ್ನಾಸ್ಲ್ಲೆಂ. ಪೂಣ್ ಆತಾಂ ಜೀರ್ಣೋದ್ದಾರ್ ಜಾವ್ನ್ ದಿವ್ಳಾಚೆ ರೂಪ್ರೇಶಾಚ್ ಬದ್ಲಾಲ್ಲಿ.
ಪೆಂಕ್ಟಾಂತ್ ಆಸ್ಲ್ಲ್ಯ್ ಚಾವಿಯೆ ಥಾವ್ನ್ ಮುಖ್ಯದ್ವಾರ್ ಉಗ್ತೆಂ ಕೆಲೆಂ. ಯತೀ ಮಾಮಾನ್.
"ಬಿತರ್ ಯೇನಾಯ್?" ಯತೀ ಮಾಮಾ ಹಾಕಾಚ್ ಪಳೆಯ್ಲಾಗ್ಲೊ.
"ನಾಂ....... ಪುಣ್ ಆಡಳಿತ್ ಮೊಕ್ತೇಸರಾನೊಂ, ಪುರೋಹಿತಾನೊಂ, ಘಾಂಟಿಂಚೊ ಆವಾಜ್ ವಾಜೊಂದಿ. ಮಂತ್ರಾಂಚೊ ತಾರಕ್ ಉಚ್ಚಾರ್ ಗಾಜೊಂದಿ. ಸಮಸ್ತ್ ಮನ್ಶಾಕುಳ್ ತುಮ್ಚ್ಯಾ ಏಜನ್ಸಿ - ಮಧ್ಯಸ್ತಿಕೆ ಮುಖಾಂತ್ರ್ ಕೃತಾರ್ಥ್ ಜಾಂವ್ದಿಂ. ಮಾಮಾ, ತುಂಮಿಂ ಆನಿಂ ತುಂಮ್ಚೊ ದೇವ್ಯಿ ವ್ಹಡ್ಲೆ ಸಿನಿಕ್ಸ್, ಹಿಪೊಕ್ರೇಟ್ಸ್, ಸ್ವಷ್ಟ್ ಸಾಂಗ್ಚೆಂ ತರ್ ಭ್ರಷ್ಟಾಚಾರಿ. ಆಮಾಯಕ್ ಮನ್ಶಾಂಚ್ಯಾ ಭಗ್ಣಾಂಚೊ ಫಾಯ್ದೊ ಉಟವ್ನ್ ಬ್ಲ್ಯಾಕ್ಮೇಲ್ ಕರ್ತಾತ್"
ಹಾಚ್ಯಾ ವ್ಯಂಗ್ಯ್ ಉತ್ರಾಂಕ್ ಥೊಡ್ಯಾ ಘಳಾಯೆ ಉಪ್ರಾಂತ್ ಯತೀಮಾಮಾನ್ ಜಾಪ್ ದಿಲಿ
"ಅಶ್ವತ್ಥಾಮಾ, ಮೂಳ್ಭೂತ್ ಜಾವ್ನ್ ಹರ್ಯೇಕಾ ಮನ್ಶಾಕ್ ದೇವಾ ವಿಶಿಂ ’ಗೊಡ್ ಐಡಿಯಾ’ ಆಸ್ಚೆಂ ನೆಗಾರ್ ಕರುಂಕ್ ಜಾಯ್ನಾ ತರೀ ಹಾಂವ್ಯಿ ನಾಸ್ತಿಕ್ಚ್ ಸಯ್ ಫಾತ್ರಾ ಮೂರ್ತೆಕ್ ಆರಾಧನ್ ಕರ್ಚೆಂ ಮೂರ್ಖ್ಪಣ್ ಮ್ಹಜೆಂ ಥಂಯ್ ನಾಂ. ಪುಣ್ ದೇವ್ ನಾಂಚ್ ಮ್ಹಣ್ ಪ್ರತಿಪಾದನ್ ಕರುಂಕ್ ತಶೆಂಚ್ ಹೆರಾಂಚಿಂ ಭಾವನಾಂ ದುಖೊಂವ್ಚೆಂ ಹಕ್ಕ್ಯಿ ಮ್ಹಾಕಾ ಕೊಣೆಂಯ್ ದೀಂವ್ಕ್ ನಾಂ. ಪೂಣ್ ಫಾತರ್ಯಿ ಮೌನ್ರೀತಿನ್ ಉಲೈತಾತ್ ತೆಂ ದಿಟ್!..........ಸೊಡ್, ಚರ್ಚೆಕ್ ಆಲ್ಪ್ವಿರಾಮ್ ದಿವ್ಯಾಂ. ಕೋಣ್ಗಿ ಯೇವ್ನ್ ಆಸಾ"
ಪಾಟ್ಲ್ಯಾನ್ ಥಾವ್ನ್ ಪಾಯ್ಜಾಣಾಂಚೊ ಆವಾಜ್ ಜಾಲೊ. ಹಾಣೆಂ ಗೊಮ್ಟಿ ಘುಂವ್ಡಾವ್ನ್ ಪಾಟಿಂ ಪಳೆಯ್ಲೆಂ.
ತರ್ನಾಟಿ ಚಲಿ ಆಂಗ್ಭರ್ನ್ ಕಾಪಾಡ್ ಪಾಂಗ್ರೊನ್, ಮಾತೆಂಭರ್ ಫುಲಾಂ ಮಾಳುನ್, ಹಾತಾಂನಿಂ ಹರ್ವಾಣ್ಭರ್ ಫುಲಾಂ ಘೆವ್ನ್ ಉಬೆಂ ಆಸ್ಲ್ಲೆಂ. ವ್ಹಯ್....... ತೆಂಚ್ ತೆಂ.............. ಜಲ್ಪಾತಾಚೆಂ ಜಲಕನ್ಯೆ. ದೃಷ್ಟ್ಯೊ ಏಕ್ ಜಾಲ್ಯೊ. ತಿಣೆಂ ದೀಷ್ಟ್ ಧರ್ಣಿಕ್ ಲಾಯ್ಲಿ. ಅಪೂರ್ವ್ ಸೊಭಾಯ್. ಆಕರ್ಷಕ್ ಆಂಗ್ಸೌಷ್ಠವಾ ಸವೆಂ ಮುಗ್ದ್, ಸ್ನಿಗ್ದ್ ಸೌಂದರ್ಯ್.
"ಧುವೇ, ಫುಲಾಂ ಹೆವ್ಶಿನ್ ಹಾಡ್" ಗರ್ಭ್ ಗುಡ್ಯೆಚೆಂ ಬಾಗಿಲ್ ಉಗ್ತೆಂ ಕರಿತ್ತ್ ಯತೀ ಮಾಮಾನ್ ಆಪಯ್ತಾನಾ ಚಲಿ ಕ್ಷಣಾನ್ ಭಿತರ್ ಗೆಲಿ.
ಹೊ ಕಿತೆಂಗೀ ಚಿಂತುನ್ ಅಖ್ರೇಕ್ ಭಿತರ್ ಸರೊನ್ ಪಯ್ಸ್ ಉಭೊ ಜಾಲೊ. ಚಲಿ ಘಾಂಟ್ ಮಾರಿಲಾಗ್ಲೆಂ ತರ್ ಯತೀ ಮಾಮಾನ್ ದಿವೊ ಪೆಟವ್ನ್ ಮೂರ್ತೆಕ್ ಫುಲಾಂ ಆರ್ಪಿಲಿಂ......
ಧಾ ಮಿನುಟಾಂ ನಂತರ್ ಮೀಟಾಖಾಂಬ್ಯಾಪರಿಂ ಹಾತ್ ಬಾಂಧುನ್ ಉಬೊ ರಾವ್ಲ್ಲ್ಯಾ ಹಾಕಾ ಉತ್ರೊನ್ ಚಲಿ ಚಲ್ತೆಚ್ಚ್ ರಾವ್ಲಿ. ಮುಖ್ಲ್ಯಾ ಆವ್ದೆಂತ್ ಗರ್ಭ್ಗುಡ್ಯೆಚೆಂ ದಾರ್ ದಾಂಪುನ್ ಯತೀಮಾಮಾ ಹಾಚೆ ಸರ್ಶಿಂ ಆಯ್ಲೆ.
"ಚಲ್ ಯಾ. ಹರ್ಯೇಕಾ ಆಯ್ತಾರಾ ಹಾಂಗಾಸರ್ ಯೆಂವ್ಚೆಂ ಜಿಣ್ಯೆಚೊ ಏಕ್ ಭಾಗ್ಚ್ಚ್ ಜಾವ್ನ್ ಗೆಲಾ"
ಹಾಣೆಂ ಜಾಪ್ ದಿಲಿ ನಾಂ.
ಗುಡ್ಯಾಚಿಂ ಮೆಟಾಂ ವೆಚೆಂ ತರ್, ವೀಸ್ ವರ್ಸಾಂ ಪಯ್ಲೆಂ, ತುಜೊ ಆಜೊ ಮೆಲ್ಲ್ಯಾ ಉಪ್ರಾಂತ್ ಶಹರಾ ಥಾವ್ನ್ ಎಕ್ಸುರೊಂಚ್ ಹ್ಯಾ ಸಂಪೂರ್ಣ್ ಜೀರ್ಣ್ ಜಾಲ್ಲ್ಯಾ ದಿವ್ಳಾಕ್ ಆಯಿಲ್ಲೊಂ ಕಿತೆಂಗಿ ಸೊಧಿತ್ತ್....."
"ಆನಿಂ ವಂಶ್ ಪಾರಂಪರ್ಯ್ ಜಾವ್ನ್ ಆರಾಧನ್ ಕರ್ನ್ ಆಯಿಲ್ಲ್ಯಾ ಹ್ಯಾ ಫಾತ್ರಾ ದೆವಾಚ್ಯಾ ಸನ್ನಿಧೆಂತ್ ತುಕಾ ಜ್ನಾನೋದಯ್ ಜಾಲೆಂ ಮ್ಹಣ್ ಸಾಂಗ್ಚಿಂ ಗರ್ಜ್ ನಾಂ ಮಾಮಾ!" ಹೊ ಚಿಡ್ಲೊ.
"ಜ್ನಾನೋದಯ್ ಜಾಂವ್ಕ್ ಹಾಂವ್ ಬುದ್ದ ನ್ಹಂಯ್. ಪೂಣ್ ಏಕ್ ಆರಂಭ್ ಮೆಳ್ಳೆಂ ತೆಂ ಖರೆಂ. ಆತಾಂ ತುಂ ಆಸ್ಚ್ಯಾ ಮನೋಸ್ಥಿತೆಂತ್ ಹಾಂವ್ಯಿ ಆಸ್ಲ್ಲೊಂ. ಕಸಲೆಂಗಿ ಚೈತನ್ಯ್ ಆವೃತ್ತ್ ಜಾತಾನಾಂ ಹಾಂವ್ ಕಾರ್ಯ್ರೂಪಾಕ್ ದೆಂವ್ಲೊ. ಹಜಾರ್ ಪೊಕೊಳ್ ಆದರ್ಶಾಂ ಮತಿಂತ್ ದವ್ರುನ್ ತಿಂ ಅನುಷ್ಠಾನಾಕ್ ಹಾಡುಂಕ್ ಅಸಾಧ್ಯ್ ಜಾವ್ನ್, ಹಿನಾಯ್ ದುರಂತ್ ಆಪ್ಣಾಂಚ್ಯಾಕಿ ಖಂಚಾಯ್ ಆದರ್ಶ್ ತತ್ವಾಂಕ್ ಉಮ್ಕೊಳ್ನಾಸ್ತಾನಾಂ ವ್ಯಾವಹಾರಿಕ್ ಸಂಸಾರಾಂತ್ ಮ್ಹಜೆಂ ಅಸ್ಥಿತ್ವ್ ಆಸಾ ಕರ್ಚೆಂ ಶಾಣೆಂಪಣ್ ಮ್ಹಾಕಾ ಆಯ್ಲೆಂ!. ಭಾವುಕತೆಚಿ, ಭ್ರಮೆಚಿ ಪರಿಧಿ ಉತ್ರೊನ್ ವಾಸ್ತವಚ್ಯಾ ಚೌಕಟ್ಟಾ ಭಿತರ್ ಆಯ್ಲೆಂ"
"ಕಸಲೊ ವಾಸ್ತವ್ ತೊ?" ಕುತೂಹಲ್ಭರಿತ್ ತಾಳ್ಯಾನ್ ವಿಸಾರ್ಲೆಂ ಹಾಣೆಂ.
"ಸಾಂಗ್ತಾಂ. ಪೂಣ್ ತಾಚ್ಯಾಕಿ ಪಯ್ಲೆಂ ಹಾಂವ್ ದ್ವಂದ್ವಂತ್ವ್, ಅಸಂತುಷ್ಟಾಯೆನ್, ಅತ್ರಪ್ತೆನ್ ನಿರಾಸ್ಪಣಾಂತ್ ಆಸ್ಲ್ಲೊ ಕಿತ್ಯಾಕ್ ಜಾಣಾಂಯ್?......... ಆಯ್ಕ್.......... ತುಜೆಪರಿಂಚ್ ಜಿಣ್ಯೆಚೆಂ ವಿಶ್ಲೇಷಣ್ ಕರಿತ್ತ್, ಹಾಂವ್ ಕೋಣ್? ಜಿಣ್ಯೆಚೊ ಉದ್ದೇಶ್ ಕಸ್ಲೊ? ಝರ್ ಖಂಚಿ? ಉಗಮ್ ಖಂಯ್ಚರ್? ಜೀವನೋತ್ಸಾಹಾಚೆಂ ಮೂಳ್ ಖಂಚೆ?........... ಆಶೆಂ ಸಂಪಾದನ್ ಕೆಲ್ಲೆಂ ಫಕತ್ತ್ ಶೂನ್ಯ್ ಮಾತ್ರ್!.... ತರ್ ಆತಾಂ ಆಯ್ಕ್.... ಪಯ್ಲೆಂ ವಿಶ್ಲೇಷಣ್ ಕರ್ಚೆಂ ಬಂದ್ ಕರ್. ಜಿಣ್ಯೆಕ್ ಅಸಲೆಂಚ್ ಮ್ಹಣ್ ಉದ್ದೇಶ್, ದಿಶಾ ಶೆವೊಟ್ ಮ್ಹಳ್ಳೆನಾಂತ್. ತೆ ಖುದ್ಧ್ ಆಮಿಂ ರಚನ್ ಕರಿಜಾಯ್. ಜಿಣಿ ಸೊಧ್ನಾಂ ಯಾ ಅನ್ವೇಷಣ್ ನ್ಹಂಯ್. ಬಗಾರ್ ಸ್ವರಚನಾತ್ಮಕತೆಚಿ ಕ್ರಿಯಾ!"
"ಸಮ್ಜತೇ ಆಸಾಂ ಮಾಮಾ, ಅಖ್ರೇಕ್ ತರಿ ತುಜೊ ಸ್ವರಚಿತ್ ಉದ್ದೇಶ್, ಜೀವನೋತ್ಸಾಹ್ ಕಲ್ಸೊ? ವಾಸ್ತವ್ ಕಸ್ಲೊ?"
"ಭಾಚ್ಯಾ ಹಾಂವೆ ದೆಖ್ಲ್ಲೊ ಯಾ ಆಪ್ಣಾಯಿಲ್ಲೊ ವಾಸ್ತವ್ ಜಾವ್ನಸಾ ಭುಕ್!. ರಚಿತ್ ಕೆಲ್ಲೊ ಉದ್ದೇಶ್ ಜಾವ್ನಾಸಾ ತಿ ಭುಕ್ ಥಾಂಬಂವ್ಕ್ ಕೆಲ್ಲೆಂ ಕಿಂಚಿತ್ತ್ ಪ್ರಾಮಾಣಿಕ್ ಪ್ರಯತ್ನ್. ಆಜ್ ಮ್ಹಜೆ ಕಡೆನ್ ಕಸಲೆಚ್ ಪೂರ್ವಾಗ್ರಹ್ ನಾಂತ್. ಅನಿಶ್ಚಿತಾತಾ ನಾಂ. ಅಸ್ವಸ್ಥ್ ಚಿಂತ್ನಾಂ ನಾಂತ್. ದ್ವಂದ್ವ್ ನಾ. ಕಿತ್ಯಾಕ್ ಜಾಣಾಂಯ್? ತಿ ಭುಕ್ ಆನಿಂ ತಿ ಭುಕ್’ ಥಾಂಬವ್ಣೆಚಿ ಕ್ರಿಯಾ ಜಾವ್ನಾಸಾ ಹಿಮಾ ತಿತ್ಲಿ ಶುಭ್ರ್! ದೊವಾ ತಿತ್ಲಿ ಅಪುಟ್! ಬ್ರಹ್ಮಾಂಡಾಚ್ಯಾಕಿ ವಿಸ್ತಾರ್! ಪ್ರಕ್ರತೆಚ್ಯಾಕಿ ಶ್ರೇಷ್ಟ್!"
"ಮಾಮಾ, ಹಾಂವ್ ಸಮ್ಜಾಲ್ನಾಂ. ಕಸಲಿ ಭುಕ್ ಆನಿಂ ಕಸಲಿ ಕ್ರಿಯಾ?"
"ಚಲ್ ಯಾ. ತುಂಚ್ ಖುದ್ಧ್ ಪಳೆಯ್ತಲೊಯ್"
*************************
ಆತಾಂ ತೆ ವಿಸ್ತಾರ್, ಭವ್ಯ್ ತೊಟಾಚ್ಯಾ ಪಶ್ಚಿಮ್ ದಿಕ್ಕಾರ್ ಚಲಾಲಾಗ್ಲೆ. ಚಲಾತ್ತ್ ತೋಟಾಚ್ಯಾ ಪೊಂತಾಂಕ್ ಪಾವ್ತಾನಾಂ ಲ್ಹಾನ್ ಲ್ಹಾನ್ ಗುಡ್ಸುಲಾಂ ದಿಸ್ಲಿಂ. ಸಾಟ್, ಸತ್ತರ್, ಶೆಂಭೊರ್ ಮ್ಹಣಾಸರ್ ಪಾಕ್ಯಾಂನಿ ಧುಂವೊರ್. ಥಂಯ್ ಥಂಯ್ ಸರ್ ಮಾತ್ಯೆಂತ್ ಖೆಳ್ಚೆ ಭುರ್ಗಿಂ. ಸಕಾಳಿಂಚ್ಯಾ ಕಾಮಾಂತ್ ಮಗ್ನ್ ಜಾವ್ನ್ ಭಾಯ್ರ್ ಬಿತರ್ ವೆಚ್ಯೊ ಸ್ತ್ರೀಯೊ. ಹಾಂಗಾ ಥಂಯ್ ಉಕುಟೆಂ ಬಸೊನ್ ಬಿಡ್ಯೆಚೆ ಧುಂವೊರ್ ಸೊಡ್ಚೆ ದಾದ್ಲೆ.
"ಆಯ್ಯ ಆಯ್ಲ್ಯಾತ್ ಆಯ್ಯ ಆಯ್ಲ್ಯಾತ್" ಕೊಣೆಂಗಿ ಬೊಬಾಟ್ ಘಾಲಿ. ಫುಡ್ಲ್ಯಾ ಪಾಂಚ್ ಮಿನುಟಾಂನಿ ಕೇರಿಚ್ಯಾ ಮುಖ್ಲ್ಯಾ ಸಮತಟ್ಟ್ ಸುವಾತೆರ್ ಹರ್ಯೇಕಾ ಗುಡ್ಸುಲಾ ಥಾವ್ನ್ ಜಣ್ ಎಕ್ಟಾಯ್ ಜಾವ್ನ್ ಧರ್ಣಿರ್ ಉಕುಟೆಂ ಬಸೊನ್ ಹಾಂಕಾಂಚ್ ಪಳೆಲಾಗ್ಲೊ.
"ಹೊ ಕಸಲೊ ಲೊಕಾ ಜಮೊ ಮಾಮಾ?" ಹಾಣೆಂ ಕುತೂಹಲಾನ್ ವಿಸಾರ್ಲೆಂ.
"ಮ್ಹಜೆಂ ಜನಾಂಗ್ ಮ್ಹಣ್ ಯಾ ಮ್ಹಜಿ ಪರ್ಜಾ" ಯತೀ ಮಾಮಾ ಮಂದ್ ಹಾಸೊ ಹಾಸ್ಲೊ. "ಆಶ್ವತ್ಥಾಮಾ, ಅಬ್ಳೆ ಜ್ನಾನ್ ಆಟಾಂಪ್ಚೆಂ ಪುಸ್ತಕ್ ಭಂಡಾರ್ ತುಂವೆಂ ದೆಖ್ಲೆಂಯ್, ತಾರ್ಕಿಕ್ ತಶೆಂಚ್ ಬುದ್ದಿ ಜೀವಿಂಚೊಂ ಸಂವಾದ್ ಆಮಿಂ ಕೆಲೊ. ಮೋಗ್, ಸೆಕ್ಸ್, ಸ್ಖಲನ್, ಸೌಂದರ್ಯ್ಚ್ ಶ್ರೇಷ್ಟ್ ಮ್ಹಣ್ ಪಾತ್ಯೆತಾ ಸಾರ್ಕಿ ಅತ್ಯಂತ್ ಮೋಹಕ್ ಸೊಭಾಯೆಚೆ ಖನಿ ದೆಖ್ಲಿಯ್. ಕೊರೊಡೊಂ ಮೊಲಾಚೆ ಸಮ್ರದ್ಧ್ ಆಸ್ತ್ ಪಳೆಯ್ಲಿಯ್. ಕಸಲೊಚ್ ವಿರೋಧ್ ಕರಿನಾಸ್ತಾ ವಿಧೇಯ್ ಜಾವ್ನ್ ಭ್ಯೆಂ - ಭಕ್ತೆನ್ ಆರಾಧನ್ ಕರ್ಚ್ಯಾ ನಿರ್ಜೀವ್ ಫಾತ್ರಾ ಮೂರ್ತೆಚಿ ಅವ್ಯಕ್ತ್, ಅಗಾಧ್ ಸಕತ್ ತುಂ ಒಪ್ವಾಲೊಯ್. ಅಸಲೆ ಅನಿಕಿ ಸಭಾರ್ ಶ್ರೇಷ್ಟ್ ಸಂಗ್ತ್ಯೊ ಆಸಾತ್. ಆಸ್ತಿತ್. ಪೂಣ್ ಸರ್ವ್ಕಾಲಿಕ್ ಶ್ರೇಷ್ಟತಾ ಜಿಣ್ಯೆ ಝರ್, ಜೀವನೋತ್ಸಹಾಚೆಂ ಉಗಮ್, ಚೈತನ್ಯ್ ಹ್ಯಾ ಜಮ್ಯಾ ಥಂಯ್ ಆಸಾ"
"ಸರ್ವ್ ಕಾಲಿಕ್ ಶ್ರೇಷ್ಟತಾ? ನಾ ಮಾಮಾ, ಮ್ಹಾಕಾ ದಿಸಾನಾ? ತುಂ ಕಿತೆಂ ಉಲೊವ್ನ್ ಆಸಾಯ್ ತೆಂಯ್ ಮ್ಹಜ್ಯಾ ಗ್ರಹಣಾಕ್ ಯೇನಾ" ಹಾಣೆಂ ಭುಜಾಂ ಹಾಲಯ್ಲಿಂ.
"ಭಾಚ್ಯಾ, ದಿಸ್ತಾ ತುಕಾ ಪುಣ್ ವಳ್ಕಾಲೊನಾಂಯ್? ಆಪಾರ್ ಗೃಹಣ್ ಸಕತ್ ತುಕಾ ಆಸಾ ತರೀ ಗ್ರಹಿತ್ ಕರುಂಕ್ ನಾಂಯ್. ಪಳೆ ಥಂಯ್ ಸರ್, ಕಿರ್ಮೆಂ ದೆವಾಯಿತ್ತ್ ಚಿಕ್ಲಾನ್ ಬುಡುಲ್ಲಿಂ ಭುರ್ಗಿಂ ಆನಿಂ ತಾಂಚಿ ತೊಂದಿ ಪೊಟಾಂ, ಪಳೆ ಥಂಯ್ಚರ್ ತರ್ನ್ಯೊ ಚಲಿಯೊ - ಸ್ತ್ರೀಯೊ. ಪಳೆ ತಾಂಚೆ ಕರ್ಪಾಲ್ಲೆ ಪೊಲೆ, ಚಿವ್ಳಾಲ್ಲೆ ಕಾತಿ, ಉಮ್ಕಾಳ್ಚೆಂ, ಚಿಂರ್ಟಾಂಲ್ಲಿ ಸ್ಥನಾಂ, ಝಂಟಾಂನಿ ಭರ್ಲ್ಲೆ ಕೇಸ್. ಪಳೆ ಥಂಯ್ಚರ್ ಕಿಡ್ಯಾರೆ ದಾಂತ್, ವಾಡ್ಲ್ಲಿ ಖಾಡ್ ಮಿಶಿ ಪಳೆ ಥಂಯ್ಸರ್ ದಾದ್ಲ್ಯಾಂಚೆಂ ಪೊಂಡಾಕ್ ಗೆಲ್ಲೆ ದೊಳೆ, ಝರ್ಕಟ್ಲ್ಲೆ ಹಾತ್ - ಪಾಂಯ್, ಚಪ್ಪಟ್ ಜಾಲ್ಲಿಂ ಪೊಟಾಂ. ಅಸ್ಥಿಪಂಜರಾಂ. ಪಳೆ ಥಂಯ್ಚರ್ ಮುಂಡಾಸ್, ಪಾಲೊವಾನಿಂ ಗುಟ್ಲಾಲ್ಲೆ ಅಜ್ನಾನಾನ್ ಭರ್ಲ್ಲ್ಯೊ ತಕ್ಲ್ಯೊ. ಒಟ್ಟಾರೆ ಸಾಂಗ್ಚೆಂ ತರ್ ಸ್ವಾಸ್ ಸೆಂವ್ಚಿ ಜೀವಂತ್ ಮೊಡಿಂ!....... ಆಯ್ಕ್.......... ಹೆಂ ಸರ್ವ್ ಶ್ರೇಷ್ಟ್ ವಾಸ್ತವ್ ಜಾವ್ನಾಸಾ. ಅಪುಟ್ ಜಾವ್ನಾಸಾ. ತ್ಯಾ ಪೊಂಡಾಕ್ ಗೆಲ್ಲ್ಯಾ ದೊಳ್ಯಾಂನಿಂ ಆಸ್ಚ್ಯಾ ಪೊಟಾ ಭುಕೆಚೆ ವೋಡಿ ಆನಿಂ ದೈನ್ಯತಾ ಜಾವ್ನಾಸಾ ಸರ್ವ್ಕಾಲಿಕ್ ಶ್ರೇಷ್ಟತಾ. ತ್ಯಾ ಭುಕ್ ಥಾಂಬವ್ಣೆಕ್ ಕರ್ಚಿ ವಿವಿಧ್ ಪ್ರಯತ್ನಾಂ, ವಿವಿಧ್ ಝುಜಾಂ ಜಾವ್ನಾಸಾತ್. ಸರ್ವ್ ಚೈತನ್ಯಚೆ, ಜೀವನೋತ್ಸಾಹಾಚೆಂ ಮೂಳ್!"
"ಮಾಮಾ.............ಹಾಂ.........ವಳ್ಕತೆ ಆಸಾಂ. ದಯಕರ್ನ್ ಮುಖಾರ್ಸಿ."
"ಭಾಚ್ಯಾ, ಕಠಿಣ್ ದುಬ್ಳಿಕಾಯೆನ್ ವಳ್ವಳಾತ್, ಭುಕ್ ಥಾಂಬಂವ್ಚ್ಯಾಕ್ ಏಕ್ ಮೂಟ್ ಶಿತ್ ಜೊಡುಂಕ್ ಘೋರ್ ಝುಜ್ ಕರ್ಚ್ಯಾ ಹ್ಯಾ ಜಮ್ಯಾ ಹುಜ್ರಿಂ ಸರ್ವ್ ಗೌಣ್. ಅಪ್ರಸ್ತುತ್!...... ಮನ್ಶಾನ್ ಜಿಯೆಂವ್ಚ್ಯಾ ಖಾತಿರ್ ಖಾಂವ್ಚೆಂ, ಖಾಂವ್ಚ್ಯಾ ಖಾತಿರ್ ಜಿಯೆಂವ್ಚೆಂ ನ್ಹಂಯ್ ಮ್ಹಣ್ ಭೋದನ್ ಕರ್ಚ್ಯಾ ಮ್ಹಜ್ಯಾ ತಸ್ಲ್ಯಾ ಹಿಪೋಕ್ರೇಟಾಂಕ್, ಸ್ವಘೋಷಿತ್ ಭೋದಕಾಂಕ್, ದೆವಾಚ್ಯಾ ಅಧಿಕ್ರತ್ ಎಜೆಂಟಾಕ್ ವಾಸ್ತವಾಚೊ ಪರಿಜ್ನಾನ್ ನಾಂ. ಪಳೆ, ಹೊ ವಿಪರ್ಯಾಸ್ - ಹ್ಯಾ ಜಮ್ಯಾಕ್ ಜಿಯೆಂವ್ಚ್ಯಾ ಖಾತಿರ್ಚ್ ಖಾಣ್ ನಾಂ. ಸೊಧ್ನಾಂ, ಅನ್ವೇಷಣ್, ದೇವ್, ಆಧ್ಯಾತ್ಮಿಕತಾ, ಸಾಹಿತ್ಯ್, ತತ್ವ್ಶಾಸ್ತ್ರ್, ಸೆಕ್ಸ್, ಥಿಯೊಲೊಜಿ ಹೆಂ ಪೂರಾ ಹ್ಯಾ ಭುಕೆ ಮುಖಾರ್ ನಗಣ್ಯ್ರೇ ಭಾಚ್ಯಾ. ಮ್ಹಾಕಾ ತುಂ ಸಮಾಜ್ ಸೇವಕ್ ಮ್ಹಣ್ ಯಾ ತಥಾಕತಿತ್ ಮನವೀಯಾತೆಚೊ ಬ್ರಾಂಡ್ ಅಂಭಾಸಿಡರ್ ಮ್ಹಣ್ ಆಪಯ್. ಮ್ಹಾಕಾ ಪರ್ವಾನಾಂ. ಮ್ಹಾಕಾ ತೆಂ ಘರ್ಜೆಚೆಂ ನ್ಹಂಯ್. ಹುಲ್ಪಾಲ್ಲೆಂ ಪೋಟ್ ಥಂಡ್ ಜಾತಾನಾಂ ಹ್ಯಾ ಜೊಡಿ ಜೊಡಿ ದೊಳ್ಯಾಂನಿಂ ಉದೆಂವ್ಚಿ ತ್ರಪ್ತಿ, ಸುಶೆಗ್, ಉಲ್ಲಾಸ್, ಕ್ರತಜ್ಞತಾ ಭಾವ್ ಮಾತ್ರ್ ಮ್ಹಾಕಾ ಅತ್ಯಮೂಲ್ಯ್. ಸರ್ವಾಂಚೆಂ ವ್ಯಾಖ್ಯಾನ್ ಹೆಂಚ್! "ಯತೀ ಮಾಮಾನ್ ಉತ್ರಾಂ ಸಂಪೈಲಿ. ಆನಿಂ ಹಾಚ್ಯಾ ಪ್ರತಿಕ್ರಿಯೆಕ್ ರಾಕನಾಸ್ತಾನಾಂ ತ್ಯಾ ಜಮ್ಯಾ ಮಧೆಂ ಘುಸೊನ್ ಸಂವಾದ್ ಚಲೈಲಾಗ್ಲೊ. ಫುಡ್ಲೆಂ ಅರ್ಧೆಂ ವೋರ್ ಹೊ ತದೇಕತೆನ್ ಥಂಯ್ಸರ್ ಜಾಂವ್ಚ್ಯಾ ಕ್ರಿಯಾ - ಪ್ರತಿಕಿಯೆಚೆಂ ಗ್ರಹಣ್ ಕರಿಲಾಗ್ಲೊ.
****************
ತ್ಯಾ ರಾತಿಂ ಮೆಜಾರ್ ಮಾಂಡುನ್ ದವ್ರಿಲ್ಲೆಂ ಜೆವಾಣ್ ಜೇವ್ನ್ ಸಂಪ್ತಚ್ಚ್ ತೆಂ ಪರತ್ ಆಂಗ್ಣಾಂತ್ ಚಿಟ್ಟ್ಯಾರ್ ಮುಖಾಮುಖಿ ಬಸ್ಲೆ.
"ಅಶ್ವತ್ಥಾಮಾ, ಶಿಷ್ಟ್ ಸಂಸಾರಾಂತ್ ಜಲ್ಮೊಂವ್ಚೆಂ ಸರ್ವ್ ಪೊಕ್ಳೆಪಣ್. ಸತ್ವ್ಹೀನ್ ಪದಾಡಂಬರ್. ಭಾವುಕತಾ ನ್ಹಂಯ್. ಬಗಾರ್ ಭಾವನಾತ್ಮಕ್ ಅಸಮತೋಲನ್. ಪೂರ್ವಾ ಗ್ರಹಾಂ. ಭುಕ್ ಥಾಂಬವ್ನ್ ವಾಂಚೊನ್ ಉರೊಂಕ್ ನಿರಂತರ್ ಝುಜ್ ಕರಿತ್ತ್, ಅಖ್ರೇಕ್ ಸಲ್ವೊನ್ ತ್ಯಾ ಭುಕೆ ವರ್ವಿಂಚ್, ಹೀನಾಯ್ ಮರಣ್ ಆಪ್ಣಾಂವ್ಚೆಂ ಕಿತ್ಲೆಶೆಗಿ ಜೀವ್ ಹ್ಯಾ ಪ್ರಥ್ವೆರ್ ಆಜ್ ಆಸಾತ್. ಸರ್ವ್ ಪರಿಧೆಂ ಥಾವ್ನ್, ಸರ್ವ್ ಚೌಕಟ್ಟಾಂ ಥಾವ್ನ್ ಭಾಯ್ರ್ ಯೇವ್ನ್ ಆಜ್ ತಸ್ಲೆ ಥೊಡೆ ಜೀವ್ ಉರಂವ್ಕ್ ಪ್ರಯತ್ನ್ ಕರ್ತೇ ಆಸಾ. ಹೆಂಚ್ ಹಾಂವೆಂ ಮ್ಹಜ್ಯಾ ಜಿಣ್ಯೆಕ್ ದಿಂವ್ಚೆಂ ವ್ಯಾಖ್ಯಾನ್"
"ಮಾಮಾ, ಹಾಂವ್ ಕುಡ್ಡೊಂ ನ್ಹಂಯ್. ಹಾಂವೆ ದೆಖ್ಲೆಂ. ಥೊಡೆಂ ತರಿ ಭೊಗ್ಲೆಂ. ತರ್ ತುಂವೆಂ ಮ್ಹಾಕಾ ದಿಂವ್ಚಿ ಸಲಹಾ ಕಸ್ಲಿ?"
"ಸಲಹಾ? ನಾ...... ಸವಲಾಂ ಆನಿಂ ಜಾಪಿ ಸರ್ವ್ ತುಜೆ ಕಡೆನ್ಂಚ್ ಆಸ್ಲ್ಲ್ಯಾನ್ ತುಕಾ ಸಲಹಾ ದಿಂವ್ಚೆಂ ಮೂರ್ಖ್ಪಣ್ ಹಾಂವ್ ಅಧಾರಿನಾ" ಯತೀ ಮಾಮಾ ಅಮೃಕೊ ಹಾಸ್ಲೊ.
"ಮಾಮಾ, ದಯಾಕರ್ನ್ ನಿಸ್ರೊನ್ ಘೆನಾಕಾ. ಸಲಹಾ ನ್ಹಂಯ್ ತರೀ ಅಬಿಪ್ರಾಯ್ ದೀಂವ್ಕ್ ಸಕ್ತಾಯ್?"
"ಅಬಿಪ್ರಾಯ್?......... ಖಂಡಿತ್ ದಿತಾಂ. ಸರ್ವ್ ಪರಿಧೆಂ ಥಾವ್ನ್ ಭಾಯ್ರ್ ಯೇವ್ನ್ ದೈಹಿಕ್ ಶ್ರಮ್ ಕರ್ನ್ ತುಜಿ ಕೂಲ್ ತುಂವೆಂ ಮ್ಹಜಿ ಕೂಲ್ ಹಾಂವೆಂ ಜೊಡಿಜಾಯ್. ಕಾತಿಚ್ಯಾ ಅಗೋಚರ್ ಸೂಕ್ಷ್ಮ್ ರಂಧ್ರಾನಿಂ ಪುಟ್ಚೊ ಘಾಮ್ ಅಭಿಮಾನಾನ್ ಪುಸುನ್ ಹಾತ್ಭರ್ ಕಾಮ್ ಕರ್ನ್ ಪೋಟ್ಭರ್ ಖಾಯ್ಜೆ."
"ಧನ್ಯವಾದ್. ಮಾಮಾ, ನಿರಾಕರ್ಸಿನಾಕಾ ಯಾ ದಾಕ್ಶೆನಾಕಾ. ನೇರ್ ಜಾವ್ನ್ ಫೈಸಲ್ ದೀವ್ನ್ ಸೊಡ್" ವತ್ತಾಯೆಚ್ಯಾ ತಾಳ್ಯಾನ್ ಮ್ಹಣಾಲೊ ಹೊ.
ಥೊಡೊ ವೇಳ್ ಮೌನ್ ರಾವೊನ್ ಯತೀ ಮಾಮಾನ್ ಗಂಭೀರ್ ತಳ್ಯಾನ್ ಮ್ಹಳೆಂ.
"ಭಾಚ್ಯಾ, ಸುಟ್ಯೆಚೊ ಹೊ ಆಯ್ತಾರಾಚೊ ದೀಸ್ ಸಂಪೊನ್ ಆಯ್ಲೊ. ಫಾಲ್ಯಾಂ ಉಜ್ವಾಡ್ಲ್ಲೆಂಚ್ ತಿಂ ಭುಕೆಲ್ಲಿಂ ಪೊಟಾಂ ಆಪ್ಲಿ ಕೂಲ್ ಗಳ್ಸುಂಕ್ ಹ್ಯಾ ವಿಸ್ತಾರ್ ತೋಟಾಂತ್ ಥಂಯ್ ಥಂಯ್ಚರ್ ಪಾಸಾಳ್ನ್ ಶ್ರಮಾಕ್ ಲಾಗ್ತಾತ್. ಹಾಂವ್ ಹ್ಯಾ ತೋಟಾಚೊ ಅಧಿಕಾರಿ, ಹಕ್ಕ್ದಾರ್ ವ್ಹಯ್ ತರೀ ಮ್ಹಜಿ ಕೂಲ್ ಶ್ರಮಾವಿಣೆಂ ಪುಕ್ಕಟ್ ಜಾವ್ನ್ ಗಳ್ಸುಂಚ್ಯಾ ಅಧಿಕಾರಾ ಥಾವ್ನ್ ಹಾಂವೆಂ ಮ್ಹಾಕಾಚ್ ವಂಚಿತ್ ಕೆಲಾಂ. ತಣಾ ವಾಟ್ ಅರ್ಥಾತ್ ಗ್ರಾಸ್ರೂಟ್ ಮಟ್ಟಾರ್ ಆಸೊನ್ ವಾಸ್ತವಾಂತ್ ಜಿಯೆಜಾಯ್ ಜಾಲ್ಯಾರ್ ಹೆಂ ಮ್ಹಾಕಾ ಅನಿವಾರ್ಯ್. ಹಾಂವೆಂಯ್ ಫಾಲ್ಯಾಂಚ್ಯಾ ದಿಸಾ ಮ್ಹಜಿ ಕೂಲ್ ಗಳ್ಸುಂಕ್ ಆಸಾ. ಪರತ್ ತುಕಾ ಸ್ವಶ್ಟ್ ಕರ್ತಾಂಕಿ ಹಾಂವ್ ಕಸಲ್ಯಾಯ್ ಆದರ್ಶಾಂಚ್ಯಾ ಚೌಕಟ್ಟಾಕ್ ವಳಗ್ ಜಾಂವ್ಕ್ ನಾಂ ಯಾ ತುಕಾ ವಳಗ್ ಜಾಂವ್ಕ್ ಸಾಂಗಾನಾಂ. ಮೂಳ್ಭೂತ್ ಸೌಕರ್ಯಾಚೆ ಆಮಿಂ ಸರ್ವ್ ಹಕ್ಕ್ದಾರ್..................... ಆಶ್ವತ್ಥಾಮ, ಖುಶಿ ಆಸ್ಲ್ಯಾರ್ ಫಾಲ್ಯಾಂ ಮ್ಹಜೆ ಸಾಂಗಾತಾ ಖೊರೆಂ ಪಿಕ್ಕಾಸ್ ಘೆವ್ನ್ ಶ್ರಮ್ ಕರ್. ಖುಶಿ ನಾಂ ತರ್ ಬ್ಯಾಗ್ ಪಾಟಿರ್ ಘಾಲ್ನ್ ಪರತ್ ತುಜ್ಯಾ ಸಂಸಾರಾಕ್ ಪಾಟಿಂ ವಚ್. ನಿರ್ಧಾರ್ ತುಕಾ ಸೊಡ್ಲ್ಲೊ!"
ಉಪಸಂಹಾರ್
ಎಕಾಚ್ಛಾಣೆಂ ಜಾಗ್ ಜಾಲಿ ತಾಕಾ. ಘಡ್ಬಡೊನ್ ಉಟ್ಲೊ ತೊ. ಉಜ್ವಾಡೊನ್ ಯೆತಾಲೆಂ ಮಾತ್ರ್. ಶೀದಾ ಮಾಳ್ಯೆಚಿಂ ಮೆಟಾಂ ಚಡೋನ್ ಯತೀ ಮಾಮಾಚ್ಯಾ ಕುಡಾ ಸರ್ಶಿಂ ಆಯ್ಲೊ. ಯತೀ ಮಾಮಾಚಿ ಝಳಕ್ ನಾತ್ಲ್ಲಿ. ಮಾಳಯ್ ದೆಂವೊನ್ ಸಕ್ಲಾ ಆಯ್ಲೊ. ಕುಜ್ನಾಂತ್ ಆಯ್ದಾನಾಂಚೊ ಆವಾಜ್. ಸವ್ಕಾಸಾಯೆನ್ ಕುಜ್ನಾಚಾ ಬಾಗ್ಲಾ ಸರ್ಶಿಂ ಉಬೊ ಜಾಲೊ. ಚಲಿ ಉಜೊ ಫುಂಕುನ್ ಆಸ್ಲ್ಲ್ಯಾನ್ ಪಾಟ್ ಮಾತ್ರ್ ದಿಸ್ತಾಲಿ. ಹಾಣೆಂ ಕೊಂಕ್ಲಿ ಕಾಡ್ತಾನಾ ಚಲಿ ಕ್ಷಣಾನ್ ಪಾಟಿಂ ಘುಂವೊನ್ ಪ್ರಶ್ನಾರ್ಥಾಕ್ ದೃಷ್ಟೆನ್ ಹಾಕಾಚ್ ಪಳೆಯ್ಲಾಗ್ಲಿ. ಹೊ ಲೋವ್ ಮ್ಹಣಾಲೊ;
"ಉಸ್ಕೆಂ ಆಸ್ಚ್ಯಾ ಚೆಡ್ವಾ....."
"ಉ..... ಉಸ್ಕೆಂ?" ಚಲ್ಯೆನ್ ದೊಳೆ ಸಂಕುಚಿತ್ ಕೆಲೆ.
"ತುಕಾ ಸಮ್ಜಂವ್ಚೆಂ ನಾಂ....."ಆಸೊಂ, ನಾಂವ್ ವಿಸಾರುಂ?
"........."
"ಭೂಮಿಕಾ? ಮಿಥಿಲಾ? ಫಾಲ್ಗುಣಿ?, ಶ್ರಾವಣಿ? ಶಾಂಭವಿ? ರತಿ?..
....ಆರುಂಧತಿ?............... " ಹೊ ವಿಸಾರಿತ್ತ್ ಗೆಲೊ.
"ತಿಂ ಪುರಾ ತುಜ್ಯಾ ಇಷ್ಟಣೆಚೆಂ ನಾಂವಾಂ ಜಾಯ್ಜೆ. ಮ್ಹಜೆಂ ನಾಂವ್ ಅದಿತಿ" ಚಲಿ ಪೆಂಕ್ಟಾರ್ ಹಾತ್ ದವರ್ನ್ ಉಸ್ಮೊಡ್ಲಿ.
"ವ್ಹಾಹ್! ಯಯಾತೀಚಿ ಧುವ್ ಅದಿತಿ......ಮಾಟೊವ್ ಸಜೊಂದಿ. ವಾಜಾಂತ್ರಾಂ ವಾಜೊಂದಿತ್. ತೆದ್ನಾಂ ಅದಿತಿ ನ್ಹಂಯ್ ಫಕತ್ತ್ ದಿತಿ ಮ್ಹಣ್ ಆಪವ್ಯಾಂ. ಆತಾಂ ಮಾತ್ರ್ ಉಸ್ಕೆಂ ಆಸ್ಚೆಂ ಚೆಡುಂ ತುಂ!"
ಆತಾಂ ಚಲಿ ಲಜ್ಲಿ.
"ಯತೀ ಮಾಮಾ ಖಂಯ್ಚರ್ಯಿ ದಿಸಾನಾಂ?"
"ಭಾಯ್ರ್ ಅಂಗ್ಣಾಂತ್ ಬಸ್ಲಾ"
"ಏಕ್ ಕಫ್ ಮೆಳಾತ್?"
" ಕಪ್ಪಾಂತ್ ಮೆಳ್ಚಿನಾಂ ಬಗಾರ್ ಲೊಟ್ಯಾಂತ್ ಟೀ ಕಾಫಿ. ತೀಯ್ ಗೊಡಾಚಿ ಕಾಳಿ ಕಾಫಿ"
ಚೆಡುಂ ಪುಟ್ಪುಟೊನ್ ಉಜೊ ಫುಂಕಿಲಾಗ್ಲೆಂ.
" ಬ್ಲ್ಯಾಕ್ ಕಾಫಿ?.......... ತೊಂದ್ರೆ ನಾಂತ್ ದೀವ್ನ್ ಸೊಡ್"
"ಶಿಜೊನ್ ಆಸಾ. ಪಾಂಚ್ ಮಿನುಟಾಂ ರಾಕಾಜಾಯ್".
"ಹಾಂವ್ ಅಂಗ್ಣಾಂತ್ ತುಕಾ.... ಸೊರ್ರಿ.... ತುಜ್ಯಾ ಕಾಫ್ಯೆಕ್ ರಾಕ್ತಾಂ" ಹೊ ಆಮೃಕೊ ಹಾಸೊನ್ ಶೀದಾ ಭಾಯ್ರ್ ಆಯ್ಲೊ. ಶೀತಳ್ ಥಂಡ್ ವಾರೆಂ ಆಂಗಾಕ್ ಆದಾಳ್ಳೆಂ. ದಟ್ಟ್ ಧುಂವ್ರಿ. ಆಂಗ್ಣಾಚ್ಯಾ ಕೊನ್ಶಾರ್ ಅಸ್ವಷ್ಟ್ ಜಾವ್ನ್ ಮನ್ಶಾ ಆಕೃತಿ ದಿಸ್ತಾನಾಂ ಲಾಗಿಂ ಗೆಲೊ. ಮಾತ್ಯಾರ್ ಮುಂಡಾಸ್, ಪೆಂಕ್ಟಾರ್ ಬೈರಾಸ್. ಹಾತಾಂತ್ ಖೊರೆಂ ಪಿಕ್ಕಾಸ್ ಘೆವ್ನ್, ಉಕುಟೆಂ ಬಸೊನ್ ಯತೀ ಮಾಮಾ ಬಾಗ್ಲಾಕ್ಚ್ ಪಳಯ್ತಾಲೊ.
"ಕಾಫ್ಯೆಕ್ ರಾಕೊನ್ ಆಸಾ" ಯತೀ ಮಾಮಾನ್ ಬಾಗ್ಲಾ ಕುಶಿಂ ಬೋಟ್ ಜೊಕಿತ್ತ್ ಮ್ಹಳೆಂ.
"ಮಾಮಾ, ಮ್ಹಜೆಂ ಖೊರೆಂ ಪಿಕ್ಕಾಸ್ ಖಂಯ್ಚರ್ ಆಸಾ?" ಹೊಯೀ ಮಾವ್ಳ್ಯಾಚ್ಯಾ ಲಾಗಿಂಚ್ ಉಕುಟೆಂ ಬಸ್ಲೊ.
ಯತೀ ಮಾಮಾನ್ ಹಾಚ್ಯಾ ಭುಜಾರ್ ಹಾತ್ ದವರ್ಲೊ.
"ಭಾಚ್ಯಾ, ತುಂ ಮ್ಹಾಕಾ ಸಾಂಡುನ್ ವೆಚೊನಾಂಯ್ ಮ್ಹಣ್ ಖೂಬ್ ಪಾತ್ಯೆಣಿ ಆಸ್ಲ್ಲಿ. ತುಂವೆಂ ಮ್ಹಾಕಾ ನಿರಾಶಿ ಕೆಲೆಂ ನಾಂಯ್. ಹಾಂವ್ಯಿ ಕಿತ್ಲೊ ಸ್ವಾರ್ಥಿ ಪಳೆ. ಮ್ಹಜ್ಯಾ ನಂತರ್...." ಯತೀ ಮಾಮಾಚೊ ತಾಳೊ ನಿಜಾಯ್ಕಿ ಗದ್ಗದಿತ್ ಜಾಲೊ. ಅಶ್ವತ್ಥಾಮಾನ್ ಮಾವ್ಳ್ಯಾಚೊ ಹಾತ್ ಧರ್ಲೊ.
"ಯತೀ ಮಾಮಾ, ಮ್ಹಾಕಾ ಲಜೆರ್ ಘಾಲಿನಾಕಾ......ಶ್! ದೊಗಿ ಭರ್ಮ್ ಸಾಂಬಾಳ್ಯಾಂ. ನ್ಹಂಯ್ ತರ್ ಆಮ್ಚಿಂ ಖೆಳ್ಕುಳಾ ಜಾತೆಲಿಂ. ಪಳೆ ಥಂಯ್ಚರ್, ಉಸ್ಕೆಂ ಆಸ್ಚೆಂ ಚೆಡುಂ ಕಾಫಿ ಹಾಡ್ನ್ ಯೆತೆ ಆಸಾ!"
ದೊಗೀ ಸಮ್ಜಾಲ್ಲ್ಯಾಪರಿಂ ತಕ್ಲಿ ಹಾಲವ್ನ್ ಎಕಾಮೆಕಾ ಪಳೆವ್ನ್ ಹಾಸ್ಲೆ.
ಕಥಾಝರ್
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
