ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಹಫ್ತ್ಯಾಚಿ ಕಥಾ: ನಿರ್ಧಾರ್
ಎಚ್.ಜೆ.ಗೋವಿಯಸ್: ಕೊಂಕ್ಣಿ ಸಾಹಿತ್ಯಾಂತ್ ಏಕ್ ಭಳ್ವಂತ್ ಕಾಣ್ಯೆಗಾರ್, ಅಪುರ್ಭಾಯೆಚ್ಯೊ ಮಟ್ವ್ಯೊ ಕಾಣ್ಯೊ, ಸಾಂಕಳ್ ಕಾಣ್ಯೊ ತಶೆಂಚ್ ಕಾದಂಬರಿ ಹಾಣೆ ಬರಯ್ಲ್ಯಾತ್. ವಾಚ್ಪ್ಯಾಂಕ್ ಭರ್ಪೂರ್ ಮನರಂಜನ್ ದಿಂವ್ಚ್ಯಾಂತ್ ಹಾಚ್ಯೊ ಕಾಣ್ಯೊ ಸಲ್ವಾನಾಂತ್. ಹಾಚ್ಯಾ ಕಾಣ್ಯಾಂನಿ ವಾಪಾರ್ಚಿ ಭಾಸ್ ಸಾದಿ, ಆನಿ ವಿಶಯ್ ಸಾಮಾಜಿಕ್ ಮನರಂಜನ್ ದೆಕುನ್ ಚಡಿತ್ ಲೋಕ್ ಹಾಚ್ಯೊ ಕಾಣ್ಯೊ ಖಾಯ್ಸ್ ಕರ್ತಾ. ’ಯೆತಾಂ ತುಜಿ ವಾಟ್ ಧರುನ್’, ’ಕಾಳೊಕಾಂತ್ಲೆ ದೊಳೆ’, ’ಹಾಂವ್ ತುಕಾ ನಾಸ್ ಕರ್ತೆಲಿಂ’, ’ಭುಂಯಾರಾಂತ್ಲೊ ಘುಟ್’ ಹಾಚ್ಯಾ ಲೊಕಾಮೊಗಾಳ್ ಕಾದಂಬರೆ ಪಯ್ಕಿಂತ್ಲ್ಯೊ ಥೊಡ್ಯೊ.
ಹೆರ್ ಕಾಣ್ಯೊ: ಹಾಂವ್ ತುಜಿಂ ಜಾಂವ್ಕ್ ಆಶೆತಾಂ, ಮ್ಹಜ್ಯೆ ಆವಯ್ ಖಾತಿರ್, ಕಾಳಿಜ್
ಎಚ್.ಜೆ.ಗೋವಿಯಸ್
“ಹಾಯ್ ಸ್ವೀಟಿ......." ಎಕ್ಲೊ ಸಿಂಡ್ರೆಲ್ಲಾಚಾ ಬುಜಾಕ್ ಆಪ್ಟೊನ್ ಗೆಲೊ. ಸಿಂಡ್ರೆಲ್ಲಾ ಪ್ರತಿಕ್ರಿಯಾ ದಾಖಯ್ನಾಸ್ತಾ ಮೌನ್ಪಣಿ ತ್ಯೆ ಬಾರಿಕ್ ವೊಣಿಂತ್ಲ್ಯಾನ್ ಪಾಶಾರ್ಲೆಂ. ತರ್ನಾಟ್ಯಾ ಮೊವಾಲ್ಯಾಂಚ್ಯೊ, ತಸಲ್ಯೊ ಛೆಷ್ಟಾಯೊ ತಾಕಾ ಸದಾಂಚ್ಯೊ ಜಾಲ್ಲ್ಯೊ.
ಗರಿಬಾಂನಿ ರಾಂವ್ಚಿಂ ಝೊಪ್ಡಿಂ ಆನಿ ಚಾಲಿಂತ್ಲಿಂ ಘರಾಂ ತ್ಯಾ ವಾಟಾರಾಂತ್ ವಿಸ್ತಾರ್ಲ್ಲಿಂ. ಸಿಂಡ್ರೆಲಾಯ್ ಥಂಯ್ಚ್ಯಾ ಎಕ್ಯೆ ಚಾಲಿಂತ್ ರಾಂವ್ಚೆಂ 18 ವರ್ಸಾಂ ಪ್ರಾಯ್ ಭರ್ಲ್ಲೆಂ, ಕುಡಿವಿಶ್ವಾನಿ ಫುಲ್ಲ್ಲೆಂ ಸೊಭಿತ್ ತರ್ನಾಟೆಂ ಚೆಡುಂ ಜಾವ್ನಾಸ್ಲ್ಲೆಂ. ಶಿವಾಯ್ ಬಿ.ಕೊಮ್ ಪಯ್ಲೆಂ ವರಸ್ ಕರುನ್ ಆಸ್ಲ್ಲೆಂ. ಪಾಟ್ಲ್ಯಾ 10 ಮಹಿನ್ಯಾ ಥಾವ್ನ್ ತೆಂ ಆಪ್ಲ್ಯಾ ಆವಯ್ ಬಾಪಾಯ್ ಸಂಗಿಂ ಬೊಂಬೈಂತ್ ಸಾಯಾನಾಂತ್ಲ್ಯಾ ಗನೆಶ್- ಪಾಡಾಂತ್ಲ್ಯಾ ವಾಟರಾಂತ್ ಎಕಾ ಕುಡಾಚಾ ಚಾಲಿಂತ್ ಜಿಯೆವ್ನ್ ಆಸ್ಲ್ಲೆಂ.
ಕೊಣಾಯ್ ಕಡೆನ್ ಉಲಂವ್ಕ್ ತೆಂ ವಚಾನಾತ್ಲ್ಲೆಂ ವ ಕೊಣಾಯ್ಚಿ ದೊಸ್ತಿ ತಾಕಾ ನಾತ್ಲ್ಲಿ. ತಾಕಾ ಪಳಯ್ತಾನಾ ತೆಂ ಮಾನಸಿಕ್ ಪಿಡೆಂತ್ ಕಳ್ವಳೊನ್ ಆಸಾ ಮ್ಹಣ್ ಪಾರ್ಕಿಯೆತೆಂ. ಥೊಡೆ ಪಾವ್ಟಿಂ ಆಪ್ಣಾಯಿತ್ಲ್ಯಾಕ್ ರಡ್ತಾಲೆಂ, ಪುಣ್ ಕಸಲೆಂಚ್ ಕಾರಣ್ ತೆಂ ಕೊಣಾಯ್ ಕಡೆನ್ ಸಾಂಗಾನಾತ್ಲ್ಲೆಂ. ತಾಚಿ ಆವಯ್ ಶಾರೊನ್ ಆಪ್ಲ್ಯಾ ದುವೆಚಾ ಖಂತಿಚೆಂ ಕಾರಣ್ ಬರ್ಯಾನ್ ಜಾಣಾಸ್ಲ್ಲಿ, ಶಿವಾಯ್ ತಿಯಿ ತಸಲ್ಯಾಚ್ ಖಂತಿನ್ ಖರ್ಗಾತಾಲಿ. ತರಿ ತಿಣೆ ಜಾಲ್ಯಾರಿ ಆಪ್ಲ್ಯೆ ಖಂತಿಕ್ ಆಪ್ಲ್ಯಾ ಪಾಲ್ವಾ ಪಾಟ್ಲ್ಯಾನ್ ಲಿಪಯಿಲ್ಲೆಂ; ಆನಿ ಕೆದ್ನಾಂಚ್ ಆಪ್ಲ್ಯಾ ಘೊವಾ ಮುಖಾರ್ ಆಪ್ಲೆ ಎಕ್ಸುರ್ಪಣಾಂತ್ ರಡೊನ್ ಬಿಜೊನ್ ಆಸ್ಚೆ ದೊಳೆ ಪ್ರದರ್ಶಿತ್ ಕರುಂಕ್ ನಾತ್ಲ್ಲಿ.
ಘೊವ್ ಬ್ರೆಂಡನ್ ದಾದರ್ ಎಕಾ ಆಫಿಸಾಂತ್ ಎಕಾಂವ್ಟೆಂಟಾಚಾ ಕಾಮಾರ್ ಆಸ್ಲ್ಲೊ. ಘರಾ ಪಾವ್ತಾನಾ ರಾತ್ ಜಾತಾಲಿ, ಬಸ್ಸಾರ್ ಆನಿ ಟ್ರೈನಿರ್ ಪ್ರಯಾಣ್ ಕರುನ್. ಶಾರೊನ್ ಘೊವಾಕ್ ರಾಕೊನ್ ಆಸ್ತಾಲಿ, ಆನಿ ತೊ ಆಯಿಲ್ಲೊಚ್ ತಾಕಾ ಹುನ್ ಕರುನ್ ದವರ್ಲ್ಲೆಂ ಹಾಂಡಿಯೆಂತ್ಲೆಂ ಉದಾಕ್ ನಾಣ್ಯೆಂತ್ಲ್ಯಾ ಬಾಲ್ದೆಂತ್ ವತುನ್ ತುವಾಲೊ ದೀವ್ನ್ ಧಾಡ್ತಾಲಿ. ಹೆಂ ತಿಚೆಂ ಕಾಮ್ ಸಂದಾಂಚೆಂ. ತ್ಯಾ ದೀಸ್ಯಿ ತಶೆಂಚ್ ತಿಣೆ ಖತ್ಕತ್ಯಾ ಹಾಂಡಿಯೆಕ್ ಉಕ್ಲೊನ್ ನಾಣ್ಯೆಕುಶಿಕ್ ಮೆಟಾಂ ಕಾಡ್ತಾನಾ ದಾಂಟುನ್ ಪಡೊನ್, ಹಾತಾಂತ್ಲಿ ಹಾಂಡಿ ತಿಚಾ ಪಾಂಯಾರ್ ಪಡೊನ್ ಪಾಂಯ್ ಹುಲ್ಪಾಲ್ಲೊ! ಹೆಂ ಪಳಯಿಲ್ಲೊ ಬ್ರೆಂಡನ್ ಧಾಂವೊನ್ ಯೇವ್ನ್ ಬಾಯ್ಲೆಕ್ ಉಕ್ಲೊನ್ ಹಾಡಿಲಾಗ್ಲೊ. ಹೆಣೆ ಸಿಂಡ್ರೆಲ್ಲಾಯ್ ದಾಂವೊನ್ ಆಯ್ಲೆಂ.
“ಬೆಬಿ ವೆಗ್ಗಿಂ ಬರ್ನಲ್ ವ ಕಿತೆಂಯ್ ಪುಸೊಂಕ್ ಹಾಡ್ ಪುತಾ....." ಬ್ರೆಂಡನಾನ್ ದುವೆಕ್ ಸಾಂಗ್ಲೆಂ.
“ಘರಾಂತ್ ಕಾಂಯ್ನಾ, ಭಾಯ್ರ್ ಥಾವ್ನ್ಂಚ್ ಹಾಡುಂಕ್ ಜಾಯ್ ಮಾ....." ತ್ಯಾ ದುಕಿಚಾ ವ್ಹಳ್ವಳ್ಯಾ ಮಧೆಂ ಶಾರೊನ್ಂಚ್ ಸಾಂಗಾಲಾಗ್ಲಿ.
“ಹಾಂವ್ ಹಾಡುನ್ ಯೆತಾಂ....., ಬೆಬಿ ತುಂ ಮಾಮ್ಮಿಸಂಗಿಂ ರಾವ್....." ಬ್ರೆಂಡನ್ ಆಂಗಾರ್ ಆಸ್ಲ್ಲ್ಯಾ ವಸ್ತುರಾರ್ಚ್ ವ್ಹಕಾತ್ ಹಾಡುಂಕ್ ಧಾಂವ್ಲೊ.
****************
“ಹಲ್ಲೊ ಆಂಕಲ್......" ಬ್ರೆಂಡನ್ ಕಾಮಾ ಥಾವ್ನ್ ಸುಟೊನ್ ರೆಲ್ವೆ ಸ್ಟೇಶನಾಕ್ ವೆಚೆ ಖಾತಿರ್ ಬಸ್ಸ್ ಸ್ಟ್ಯಾಂಡಾರ್ ಉಭೊ ಆಸ್ಲ್ಲೊ ಪಳವ್ನ್ ಎಕ್ಯೆ ತರ್ನಾಟ್ಯೆ ಚಲಿಯೆನ್ ತಾಕಾ ಕುಟ್ಟಿಲ್ಲೆಂ.
“ಹೊ ಸಿಮ್ರನ್, ಕಶೆಂ ಆಸಾಯ್......?"
“ಹಾಂವ್ ಬರಿಂ ಆಸಾಂ ಆಂಕಲ್. ಹಾಂವ್ ಹಾಂಗಾಚ್ ವೊ ತ್ಯಾ ಮುಖ್ಲ್ಯಾ ಬ್ಲ್ಯು-ಲಾಯ್ನ್ ಎಪಾರ್ಟ್ಮೆಂಟ್ಸಾಂತ್ ರಾವ್ತಾಂ......."
ಸಿಮ್ರನಾನ್ ಮುಖ್ಲ್ಯಾನ್ ದಿಸ್ಚ್ಯಾ ಜೈತಾಚಾ ಚಾರ್ ನವ್ಯಾ ಬಿಲ್ಡಿಂಗಾಂಚಾ ಸೊಸಾಯ್ಟಿಕ್ ದಾಖವ್ನ್ ಸಾಂಗ್ಲೆಂ, “ತುಂ ಕಿತೆಂ ಬಸ್ಸ್ ಸ್ಟ್ಯಾಂಡರ್....., ತುಜೆಂ ಕಾರ್ ಖಂಯ್ ಆಸಾ....?"
“ಕಾರ್ ಗ್ಯಾರೆಜಿಂತ್ ಆಸಾ ಸಿಮ್ರನ್, ದೆಕುನ್ ಬಸ್ಸಾಕ್ ರಾಕ್ತಾಂ......."
“ಸಿಂಡ್ರೆಲ್ಲಾ ಕಶೆಂ ಆಸಾ.....? ಆದ್ಲ್ಯಾ ಹಪ್ತ್ಯಾ ತಾಚೊ ಬರ್ಥ್ಡೇ ಆಸ್ಲ್ಲೊನೆ? ತಾಕಾ ವಿಶ್ಯ್ ಕರುಂಕ್ ಚಾರ್ ಬಂಗ್ಲಾ ತುಮ್ಚ್ಯಾ ಘರಾ ಗೆಲ್ಲಿಂ. ಪುಣ್ ಥಂಯ್ಚರ್ ಕೊಣ್ ದುಸ್ರಿಂ ರಾವ್ತಾತ್. ಹಾಂವ್ ಕಾಂಯ್ ವಾಟ್ ಚುಕೊನ್ ಥಂಯ್ ಪಾವ್ಲಿಂಗಾಯ್ ಮ್ಹಣ್ ಕಾಲುಬುಲಿ ಜಾತಾನಾ, ತೊ ಮನಿಸ್ ಮ್ಹಣಾಲೊ ಪಯ್ಲೆಂ ರಾವೊನ್ ಆಸ್ಲ್ಲ್ಯಾಂಕ್ ವಳ್ಕಾನಾ, ಶಿವಾಯ್ ಆತಾಂ ಖಂಯ್ಚರ್ ರಾವ್ತಾತ್ ಮ್ಹಳ್ಳೆಂಯಿ ಕಳಿತ್ ನಾ ಮ್ಹಣ್. ಸಿಂಡ್ರೆಲ್ಲಾನ್ ಕಾಲೆಜ್ಯಿ ಬದ್ಲಿ ಕೆಲ್ಯಾ..... ಆನಿ ಏಕ್ ಫೊನ್ ಸೈತ್ ಮ್ಹಾಕಾ ಕರುಂಕ್ನಾ. ಆತಾಂ ತುಮಿ ಖಂಯ್ ರಾವ್ತಾತ್ ಆಂಕಲ್.....?" ಎಕಾ ದಮ್ಮಾನ್ ಸಿಮ್ರನಾನ್ ಸಾಂಗೊಂಕ್ ಆಸ್ಚೆಂ ಸಾಂಗೊನ್ ಸೊಡ್ಲೆಂ.
“ಆಮಿ ಆತಾಂ ದುಸ್ರೆ ಕಡೆನ್ ರಾವ್ತಾಂವ್........."
“ಮ್ಹಾಕಾ ಎಡ್ರೆಸ್ ದೀ ಆಂಕಲ್, ಹಾಂವ್ ಫಾಲ್ಯಾಂಚ್ ತುಮ್ಗೆರ್ ಯೆತಾಂ. ಮ್ಹಾಕಾ ಸಿಂಡ್ರೆಲ್ಲಾಕ್ಯಿ ಮೆಳೊಂಕ್ ಆಸ್ಲ್ಲೆಂ....." ಬ್ರೆಂಡನಾನ್ ಪುರ್ತಿ ಜಾಪ್ ದಿಂವ್ಚ್ಯಾ ಆದಿಂಚ್ ಸಿಮ್ರನ್ ಅಮ್ಸೊರ್ಲೆಂ.
“ಹಾಂ....., ಮ್ಹಜೆಂ ಬಸ್ಸ್ ಆಯ್ಲೆಂ, ಹಾಂವ್ ಎಡ್ರೆಸ್ ತುಕಾ ಆನ್ಯೆಕ್ ಪಾವ್ಟಿಂ ದಿತಾಂ ಸಿಮ್ರನ್......" ಆಯಿಲ್ಯಾ ಖಂಚ್ಯಾಗಿ ಬಸ್ಸಾರ್ ಬ್ರೆಂಡನ್ ಆಮ್ಸೊರಾನ್ ಚಡ್ಲೊ.
ಸಿಮ್ರನ್ ಸ್ತಬ್ದ್ ಜಾಲೆಂ! ತಾಕಾ ಬ್ರೆಂಡನಾನ್ ತಶೆಂ ಕೆಲ್ಲೆಂ ಪಳವ್ನ್ ಬೆಜಾರಾಯೆಸಂಗಿಂ ವಿಚಿತ್ರ್ಯಿ ದಿಸ್ಲೆಂ. ಕಿತ್ಯಾಕ್ ಬ್ರೆಂಡನ್ ಸಿಮ್ರನಾಕ್ ದುವೆಪರಿಂಚ್ ಲೆಕ್ತಾಲೊ ಆನಿ ಕೆದಾಳಾಯ್ ಸಿಮ್ರನ್ ಸಿಂಡ್ರೆಲ್ಲಾಕ್ ಮೆಳುಂಕ್ ಆಯಿಲ್ಯಾ ತವಳ್, ತೊ ತಾಂಚೆಸಂಗಿಂ ಬಸೊನ್ ಬರೊ ವೇಳ್ ಪಾಶಾರ್ತಾಲೊ. ತರ್ ಆಜ್ ಸುಮಾರ್ ತೆಂಪಾ ಉಪ್ರಾಂತ್ ಮೆಳ್ತಾನಾ, ಬ್ರೆಂಡನಾನ್ ಬಸ್ಸಾಚಾ ನಿಬಾನ್ ಧಾಂವ್ಚೆಂ, ಸಿಮ್ರನಾಕ್ ಮಿಸ್ತೆರ್ ದಿಸ್ಚ್ಯಾಂತ್ ನವಾಲ್ ನಾತ್ಲ್ಲೆಂ.
ವ್ಹಯ್ ಬ್ರೆಂಡನಾಕ್ ಆಪ್ಲ್ಯಾ ಘರ್ಚೊ ಎಡ್ರೆಸ್ ದೀಂವ್ಕ್ ನಾಕಾ ಆಸ್ಲ್ಲೆಂ. ಶಿವಾಯ್ ಆಪ್ಲಿ ಆತಾಂಚಿ ಪರಿಸ್ಥಿತಿ ಕೊಣೆಂಯಿ ಜಾಣಾಂ ಜಾಂವ್ಚೆಂಯಿ ನಾಕಾ ಆಸ್ಲ್ಲೆಂ. ದೆಕುನ್ ಸಿಮ್ರನಾ ಥಾವ್ನ್ ಚುಕಾರಿ ಮಾರುಂಕ್
ಖಂಚ್ಯಾಗೀ ಆಯಿಲ್ಲ್ಯಾ ಬಸ್ಸಾರ್ ಚಡ್ಲ್ಲೊ. ಪುಣ್ ತೆಂ ಬಸ್ಸ್ ತಾಣೆ ರಾಕ್ಚೆಂ
ನ್ಹಯ್ ಜಾವ್ನಾಸೊನ್, ಮುಖ್ಲ್ಯಾ ಬಸ್ಸ್ ಸ್ಟೊಪಾರ್ ದೆಂವೊನ್, ಬ್ರೆಂಡನ್ ತಾಕಾ ಜಾಯ್ ಆಸ್ಲ್ಲ್ಯಾ ಬಸ್ಸಾಚಿ ವಾಟ್ ಪಳವ್ನ್ ರಾವ್ಲೊ.
ಆಜ್ ಅಚಾನಕ್ ಸುಮಾರ್ ತೆಂಪಾ ಉಪ್ರಾಂತ್ ಸಿಮ್ರನಾಕ್ ಪಳವ್ನ್ ತಾಚೆಂ ಕಾಳಿಜ್ ಜಡ್ಶೆಂ ಜಾಲ್ಲೆಂ. ತಾಣೆ ಕೆಲ್ಲಿ ಚೂಕ್, ತಾಚಾ ಬಾಯ್ಲೆ ಭುರ್ಗ್ಯಾಕ್ ಕಷ್ಟುಂಕ್ ಲಾಗ್ಲ್ಲಿ. ತಾಚಾ ಪಿಶ್ಯಾಪಣಾನ್ ಆದಾರ್ಲ್ಲ್ಯೆ ಚುಕಿಕ್ ಪಶ್ಚಾತಾಪಾಚೆಂ ಪ್ರಾಜಿತ್ಯಿ ನಾತ್ಲ್ಲೆಂ.
‘ಕಿತ್ಯಾಕ್ ದೆವಾ ಹಾಂವೆಂ ತಶೆಂ ಕೆಲೆಂ?’ ತೊ ಭರ್ಲ್ಲ್ಯಾ ಕಾಳ್ಜಾನ್ ದೆವಾಕ್ ಹಾಕ್ ಮಾರಿಲಾಗ್ಲೊ. ‘ಮ್ಹಜ್ಯಾ ಮೊಗಾಚೆ ಎಕ್ಲ್ಯೆಚ್ ದುವೆ ಖಾತಿರ್ ಕಿತೆಂ ಪೂರಾ ಸ್ವಪ್ಣಾಂ ಹಾಂವೆಂ ಪಳಂವ್ಕ್ ನಾಂತ್?
ತಾಕಾ ಖಂಚಾಂತ್ಚ್ ಉಣೆ ಕರಿನಾಸ್ತಾಂ, ವಿಚಾರ್ಲ್ಲೆಂ ದೀವ್ನ್, ಸದಾಂಚ್ ಸುಖಾನ್ ದವರ್ಲ್ಲೆಂ ಹಾಂವೆಂ. ಆನಿ ಆತಾಂ, ತಾಣೆ ಶಿಕ್ಚ್ಯಾ ಕಾಲೆಜಿಚಿ ಫಿಸ್ ಚಡ್ ಜಾತಾ ಮ್ಹಣ್ ತಾಚಿ ಕಾಲೆಜ್ ಸೈತ್ ಬದ್ಲಿ ಕೆಲಿ. ತರಿ ಬಿರ್ಮೊತ್ ತಾಣೆ ಕಾಂಯ್ ಮ್ಹಣೊಂಕ್ನಾ. ಪುಣ್ ಲಿಪನ್ ರಡ್ಚೆಂ ಹಾಂವೆಂ ಪಳಯ್ಲಾಂ. ಆನಿ ಶಾರೊನ್? ವ್ಹಯ್ ತಸಲಿ ಸ್ತ್ರೀ ದೇವ್ ಬೋವ್ಚ್ ಥೊಡ್ಯಾ ಪೂನ್ ಜೊಡ್ಲ್ಲ್ಯಾಂಕ್ ಫಾವೊ ಕರ್ತಾ...’ ಬ್ರೆಂಡನ್ ಆಪ್ಣಾಯಿತ್ಲ್ಯಾಕ್ ಉಲಂವ್ಕ್ ಲಾಗ್ಲ್ಲೊ.
ಶಾರೊನ್ ಆನಿ ಬ್ರೆಂಡನ್ ತರ್ನಟ್ಪಣಾಚಿಂ ಮೋಗ್ ಕರ್ನಾರಾಂ ಜಾವ್ನಾಸ್ಲ್ಲಿಂ. ಶಾರೊನಾಚಿ ಮೊವಾಳಾಯ್, ಗೂಣ್ ಆನಿ ಖಾಲ್ತೆಂಪಣ್ಂಚ್ ಬ್ರೆಂಡನಾಕ್ ತಾಚೆ ಥಂಯ್ ಆಕರ್ಶಿತ್ ಕರುನ್, ತಿಂ ಕಾಜಾರ್ ಜಾಂವ್ಕ್ ಸಕ್ಲ್ಲಿಂ. ಶಾರೊನ್ ಶಿಕಾಪ್ ಜಾಲ್ಲೆಂಚ್ ಬ್ರೆಂಡನಾಸಂಗಿಂ ಕಾಜಾರ್ ಜಾಲ್ಲಿ. ಬ್ರೆಂಡನ್ ಶಾರೊನಾ ಪ್ರಾಸ್ ದೋನ್ ವರ್ಸಾಂ ಸಿನಿಯೆರ್ ಜಾಲ್ಯಾನ್ ಬಿ.ಕೊಮ್ ಜಾಲ್ಲೆಂಚ್ ಕಾಮಾಕ್ ಲಾಗ್ಲ್ಲೊ.
ಶಾರೊನಾಕ್ ಬ್ರೆಂಡನಾನ್ ಬಾರಿ ಮೊಗಾನ್ ಆನಿ ಸುಖಾನ್ ದವರ್ಲ್ಲೆಂ. ಕೆದಳಾಚ್ ತಾಳೊ ಸೈತ್ ಉಭಾರುನ್ ತೊ ತಿಚೆ ಕಡೆನ್ ಉಲೈಲ್ಲೊನಾ. ಆಪ್ಲ್ಯಾ ಆವಯ್ ಬಾಪಾಯ್ಕ್ ತೊ ಎಕ್ಲೊಚ್ ಆನಿ ತಾಚಿ ಆವಯ್ ತೊ 12 ವರ್ಸಾಂಚೊ ಆಸ್ತಾನಾಂಚ್ ಸರ್ಲ್ಲಿ. ಬಾಪಯ್ ಬರ್ಯಾ ಕಾಮಾರ್ ಆಸ್ಲ್ಲೊ. ತಾಣೆ, 1983-ಂತ್ ಆಂದೆರಿ ಚಾರ್ ಬಂಗ್ಲಾ ಮ್ಹಳ್ಳ್ಯಾ ಜಾಗ್ಯಾರ್ ನವೆಂ ಬಾಂದಾಪ್ ಜಾಂವ್ಚ್ಯಾ ಇಂದ್ರಾ ದರ್ಶನ್ ಮ್ಹಳ್ಳ್ಯಾ ಬಿಲ್ಡಿಂಗಾಂತ್ ಕಂತಾಲೆಖಾರ್ ಪಯ್ಶೆ ಭರುನ್, ೬೫ ಹಜಾರಾಂಕ್ ದೋನ್ ಬೆಡ್ ರೂಮ್, ಹೊಲ್ ಕಿಚ್ಚನ್ ಆಸ್ಚೆಂ ಫ್ಲ್ಯಾಟ್ ಅಮಾನತ್ ಕೆಲ್ಲೆಂ, ಜೆಂ ತಾಕಾ 1986-ಂತ್ ತಯಾರ್ ಜಾತಾನಾ ಮೆಳ್ಲ್ಲೆಂ.
ಬ್ರೆಂಡನ್ ಕಾಜಾರ್ ಜಾವ್ನ್ ಶಾರೊನಾಸಂಗಿಂ ತ್ಯಾ ಫ್ಲ್ಯಾಟಾಂತ್ ಸುಖಾನ್ ಜಿಯೆವ್ನ್ ಆಸ್ಲ್ಲೊ ಆನಿ ತ್ಯಾಚ್ ಘರಾಂತ್ ತಾಂಕಾಂ ಸಿಂಡ್ರೆಲ್ಲಾ ಜಲ್ಮಾಲ್ಲೆಂ. ಸಿಂಡ್ರೆಲ್ಲಾ 14 ವರ್ಸಾಂಚೆ ಜಾತಾನಾ ತಾಚೊ ಆಜೊ ಬ್ರೆಂಡನಾಚೊ ಬಾಪಯ್ಯಿ ಸರ್ಲ್ಲೊ. ಮರ್ತಾನಾ ಬ್ಯಾಂಕಾಂತ್ ಬಾಪಾಯ್ಚ್ಯಾ ಖಾತ್ಯಾಂತ್ ಆಸ್ಲ್ಲೆ ರುಪಯ್ 3.5 ಲಾಕ್ ಬ್ರೆಂಡನಾಚಾ ನಾಂವಾರ್ ತಬ್ದಿಲ್ ಜಾಲ್ಲೆ. ಬ್ರೆಂಡನ್ ಆಪ್ಣಾಕ್ ಮೆಳ್ಚ್ಯಾ ಸಾಂಬಾಳಾಂತ್ ಬರ್ಯಾನ್ ದೀಸ್ ಕಾಡ್ತಾಲೊ. ಆಪ್ಲ್ಯಾಂಚೆ ಜನ್ಮಾ ದಿವಸ್ ಹರ್ಯೆಕಾ ವರ್ಸಾ ಗಡ್ಗೆನ್ ಕರ್ತಾಲೊ. ಇಷ್ಟಾ ಮಂತ್ರಾಂಕ್ ಆಪವ್ನ್ ದಾದೊಶಿ ಕರ್ತಾಲೊ. ಹೆರಾಂಚಾ ಬರ್ಯಾ ವಾಯ್ಟಾಕ್ ಹಾಜಿರ್ ಜಾವ್ನ್ ಸೊಂತೊಸಾನ್ ಆಸ್ಲ್ಲೊ.
ತರಿಪುಣ್ ತಾಕಾ, ಆಪ್ಣೆ ಏಕ್ ಕೊರೊಡ್ಪತಿ ಜಾಯ್ಜಯ್ ಆನಿ, ಆಪ್ಲ್ಯೆ ಬಾಯ್ಲೆ ಬುರ್ಗ್ಯಾಕ್ ಸಂಸಾರಾಂತ್ಲೆಂ ಸರ್ವ್ ಸುಖ್ ದೀಂವ್ಕ್ ಜಾಯ್ ಮ್ಹಳ್ಲೆಂ ಬಗಾಪ್ ಸದಾಂಯ್ ದೊಸ್ತಾಲೆಂ. ಪುಣ್ ತಾಣೆ ಕೊರೊಡ್ಪತಿ ಹ್ಯಾ ಜಲ್ಮಾಂತ್ ಜಾಂವ್ಕ್ ಬಹುಷಾ ಸಾಧ್ಯ್ ನಾತ್ಲ್ಲೆಂ. ಬಾಪಾಯ್ನ್ ಕರ್ನ್ ದವರ್ಲ್ಲೆಂ ತೆಂ ಫ್ಲ್ಯಾಟ್, ತಾಚೆ ಮೆಳ್ಲ್ಲೆ ಸಾಡೆತೀನ್ ಲಾಕ್, ಕಾರ್ ಆನಿ ತಾಕಾ ಮೆಳ್ಚ್ಯಾ ಮಹಿನ್ಯಾಕ್ 14 ಹಜಾರಾಂತ್ ತಾಣೆ ದೆವಾಕ್ ಅರ್ಗಾಂ ದೀವ್ನ್ ಬರ್ಯಾನ್ ದೀಸ್ ಕಾಡುಂಕ್ ಜಾತಾಲೆಂ, ತರಿ ಬೆಷ್ಟೆಂಚ್ ಆನಿಕಿ ಗ್ರೇಸ್ತ್ ಆಸೊಂಕ್ ಜಾಯ್ ಮ್ಹಳ್ಳ್ಯಾ ಚಿಂತ್ಪಾನ್ ತೊ ಆಸ್ಲ್ಲೊ.
2005-ಂತ್ ಆಗೊಸ್ತ್ ಮಹಿನ್ಯಾಚಿ ಪಯ್ಲಿ ತಾರಿಕ್. ಸಾಂಬಾಳ್ ಮೆಳ್ಲ್ಲೊ ಬ್ರೆಂಡನ್ ಆಪ್ಲ್ಯಾ ಕಾರಾರ್ ಹರ್ಶೆಂಚೆ ಪರಿಂ ಬಾಯ್ಲೆ ಬುರ್ಗ್ಯಾಕ್ ಕಾಂಯ್ ತರಿ ಹಾಂಡುಂಕ್ ಯಾ ಮ್ಹಣ್ ಬೆಂಡ್ರಾ ಪಾವ್ಲ್ಲೊ. ಸಿಗ್ನಾಲಾರ್ ತಾಕಾ ಏಕ್ ಕೊಡ್ಕಾರ್ ದಿಸ್ಲೊ. ತಾಚಿ ಬಿರ್ಮೊತ್ ಪಾವುನ್ ಬೊಲ್ಸಾಂತ್ ಹಾತ್ ಘಾಲುನ್ ಹಾತಾಕ್ ಮೆಳ್ಲ್ಲೊ ಏಕ್ ನೋಟ್ ಕಾಡುನ್ ಬಿಕಾರ್ಯಾಚಾ ಡಬ್ಬ್ಯಾಂತ್ ಘಾಲೊ. ಘ್ಹಾಲ್ಯಾ ಉಪ್ರಾಂತ್ಚ್ ತಾಕಾ ಕಳ್ಳೆಂ ತೊ 500 ರುಪ್ಯಾಂಚೊ ನೋಟ್ ಆಸ್ಲ್ಲೊ ಮ್ಹಣ್. ಘಡ್ಯೆಕ್ ಬ್ರೆಂಡನಾಕ್ ಚಿಕ್ಕೆ ಬೆಜಾರ್ ಜಾಲೆಂ 500 ರುಪಯ್ ಗೆಲೆ ಮ್ಹಣ್; ತರೀ ಆಪ್ಣಾಕ್ ತಾಣೆ ತಕ್ಷಣಾ ಸಮಾಧಾನ್ ಕೆಲೆಂ. ಬಹುಷಾ ತೊ ನೋಟ್ ತ್ಯಾ ಕೊಡ್ಕಾರಾಚಾ ನಶಿಭಾಂತ್ ಆಸ್ಲ್ಲೊ ಜಾಯ್ಜಯ್. ಆಸೊಂದಿ ಮ್ಹಣಾಲೊ ತೊ ಆಪ್ಣಾಯಿತ್ಲ್ಯಾಕ್.
ನೋಟ್ ಪಳವ್ನ್ ಖುಶಿ ಜಾಲ್ಲೊ ಬಿಕಾರಿ ದೊನ್ಯಿ ಹಾತ್ ಡಬ್ಬ್ಯಾಸಂಗಿಂ ಜೊಡುನ್ ಮ್ಹಣಾಲೊ, “ದನ್ಯಾ ತುಜೆಪರಿಂ ದಾನಿ ಹಾಂವೆಂ ಮ್ಹಜ್ಯಾ ಹ್ಯಾ ಸಗ್ಳ್ಯಾ ಬಿಕ್ ಮಾಗ್ಲ್ಲ್ಯಾ ಜಿಣ್ಯೆಂತ್ ಪಳಂವ್ಕ್ನಾ. ತುಕಾ ದೇವ್ ಮಸ್ತು ಆನಿ ಮಸ್ತು ದಿತಲೊ. ವೆಗ್ಗಿಂಚ್ ತುಂ ಸಂಸಾರಾಂತ್ಲೊ ಸಕ್ಡಾಂ ಪ್ರಾಸ್ ಗ್ರೇಸ್ತ್ ಮನಿಸ್ ಜಾಂವ್ಕ್ ಪಾವ್ತೊಲೊಯ್......”
ತಿತ್ಲ್ಯಾರ್ ಸಿಗ್ನಲ್ ಚಾಲು ಜಾಲೆಂ ಆನಿ ಬ್ರೆಂಡನ್ ಕಾರ್ ವರುನ್ ಮುಖಾರ್ ಗೆಲೊ. ಬಾಯ್ಲೆ ಬುರ್ಗ್ಯಾಕ್ ಜಾಯ್ ಜಾಲ್ಲೆಂ ಘೆವ್ನ್, ತೊ ಕಾರಾಥ್ಂಯ್ ಮೆಟಾಂ ಕಾಡ್ತಾನಾ, ತಾಚಿ ದೀಷ್ಟ್ ಎಕಾ ಹಾತ್ ವಾಚ್ತೆಲ್ಯಾ ಜೊತಿಶಾಚೆರ್ ಗೆಲಿ, ಜೊ ರಸ್ತ್ಯಾಚಾ ಕುಶಿಕ್ ಏಕ್ ಚಾದ್ದರ್ ಹಾಂತ್ಳುನ್ ಬಸೊನ್ ಥೊಡ್ಯಾಂಚೆ ಹಾತ್ ವಾಚ್ತಾಲೊ. ಬ್ರೆಂಡನಾಕ್ ಆಪ್ಲೊಯಿ ಹಾತ್ ದಾಖಂವ್ಯಾ ಮ್ಹಣ್ ಭಗ್ಲೆಂ, ಆಪುಣ್ ಹ್ಯಾ ಜಲ್ಮಾಂತ್ ಅಸೊಚ್ ಉರ್ತಾಂ ವ ಗ್ರೇಸ್ತ್ ಜಾತಾಂ ತೆಂ ಜಾಣಾಂ ಜಾಂವ್ಯಾ ಮ್ಹಣ್.
ಬ್ರೆಂಡನಾಚೊ ಹಾತ್ ಪಳವ್ನ್, ಜೊತಿಷಾನ್ ಮ್ಹಳ್ಳೆಂ ಪಯಿಲ್ಲೆಂ ಉತಾರ್, “ತುಂ ಎಕಾಚ್ ಮಹಿನ್ಯಾ ಭಿತರ್ ಕೊರೊಡ್ ಪತಿ ಜಾಂವ್ಚ್ಯಾರ್ ಆಸಾಯ್. ತುಜ್ಯಾ ಹಾತಾಂತ್ ಆಸ್ಚಿ ಗ್ರೇಸ್ತ್ಕಾಯೆಚಿ ರೇಕಾ ಹಾಂವೆಂ ಎದೊಳ್ ಖಂಚಾಯ್ ಮನ್ಶ್ಯಾಚಾ ಹಾಂತಾಂತ್ ಪಳಂವ್ಕ್ನಾ. ತುಕಾ ಏಕ್ ಬರಿ ಮೋಗ್ ಕರ್ಚಿ ಬಾಯ್ಲ್ ಆಸಾ ಆನಿ ಏಕ್ ಸೊಬಿತ್ ತರ್ನಾಟೆಂ ಚೆಡುಂ ಭುರ್ಗೆಂ ಆಸಾ. ತಾಂಚೆ ನಶಿಬ್ ಬಾಂಗಾರಾಚೆಂ ಶಿತ್ ಜೆಂವ್ಚೆಂ ಜಾತೆಲೆಂ. ಶಿವಾಯ್ ತುಂ ಏಕ್ ವ್ಹಡ್ಲೊ ದಾನಿಯಿ ಜಾವ್ನಾಸಾಯ್ ಆನಿ ತುಂವೆಂ ಕೆಲ್ಲೆಂ ದಾನ್ ದೆವಾಕ್ ಮೆಚ್ವಾಲಾಂ. ತೊ ತುಕಾ ವೆಗ್ಗಿಂಚ್ ಮೊಳ್ಬಾಕ್ ತೆಂಕ್ಚ್ಯಾ ಗ್ರೇಸ್ತ್ ಕಾಯೆಂತ್ ತುಕ್ತೊಲೊ......"”
ಅಯ್ಕೊನ್ ಬ್ರೆಂಡನಾಕ್ ಜಾಲ್ಲೊ ಸಂತೊಸ್ ಇತ್ಲೊ ಆನಿ ತಿತ್ಲೊ ನ್ಹಯ್. “ಬಾಬಾ ಮಸ್ತು ಸಂತೊಸ್ ಜಾಲೊ ತುಂವೆಂ ಸಾಂಗ್ಲ್ಲೆಂ ಆಯ್ಕೊನ್. ಜರ್ತರ್ ಹಾಂವ್ ತಿತ್ಲೊ ಗ್ರೇಸ್ತ್ ಜಾಯ್ನ್ ತರ್, ತುಕಾಯಿ ಹಾಂವ್ ಬಾಂಗಾರಾನ್ ತುಕ್ತೊಲೊಂ.... ಆನಿ ಕಿತೆಂ ಬರೆಂ ಆಸಾ ಮ್ಹಜ್ಯಾ ಹಾತಿಂ ಹಾಂವ್ ಕೆದಾಳಾ ತಿತ್ಲೊ ಗ್ರೇಸ್ತ್ ಜಾಂವ್ಕ್ ಸಕಾನ್....?"
“ಹರ್ಯೆಕಾಕ್ ವೇಳ್ ಆಸಾ ಮನ್ಶ್ಯಾ, ನವಿ ಗ್ರೇಸ್ತ್ಕಾಯ್ ಯೇಜಯ್ ತರ್ ಪರ್ನಿ ಗ್ರೇಸ್ತ್ಕಾಯ್ ಪಯ್ಲಿ ವಚುಂಕ್ ಜಾಯ್......"
“ಮ್ಹಳ್ಯಾರ್......?"
“ತುಜೆಂ ಲಾಗ್ಗಿಂ ಆಸ್ಚೆಂ ಪಯ್ಲೆಂ ದಾನ್ ಕರ್....."
“ಮ್ಹಜೆಲಾಗ್ಗಿಂ ಕಾಂಯ್ನಾ ಬಾಬಾ, ಆಸ್ಚೆಂ ಏಕ್ ಕಾಮ್ ತಿತ್ಲೆಂಚ್. ತೆಂ ಕೊಣಾಕ್ ದಾನ್ ಕರ್ಚೆಂ?"
“ಪುಣ್ ತುಜ್ಯಾ ಹಾತಾರ್ ಸಾಫ್ ದಿಸ್ತಾ, ತುಂ ಏಕ್ ಬರೊ ಗ್ರೇಸ್ತ್ ಲಕ್ಪತಿ ಮ್ಹಣ್....."
“ಲಕ್ಪತಿ, ಹಾಂವ್......?" ಬ್ರೆಂಡನ್ ಹಾಸ್ಲೊ.
“ಹ್ಯಾ ವಗ್ತಾ ತುಂ ಸುಮಾರ್ ತೀಸ್ ಲಾಕಾಂ ವಯ್ರ್ ಪಯ್ಶೆ ಆಸ್ಚೊ ಗ್ರೇಸ್ತ್ ಮನಿಸ್, ತೆಂ ಸಗ್ಳೆಂ ಫಾಲ್ಯಾಂ ತುಕಾ ಘರಾ ಭಾಯ್ರ್ ದಿಸ್ಚ್ಯಾ ಪಯಿಲ್ಲ್ಯಾ ಮನ್ಶ್ಯಾಕ್ ದಾನ್ ಕರ್. ಆನಿ ಏಕ್ ಸಾದೊ ಗರಿಬ್ ಮನಿಸ್ ಜಾ. ತೆದ್ನಾಂಚ್ ತುಜ್ಯಾ ಹಾತಾಂತ್ಲಿಂ ಹಿ ಗ್ರೇಸ್ತ್ ಕಾಯ್ ಆಟಾಪ್ಲ್ಲಿ ರೇಕಾ ತುಜೆರ್ ದಯಾಳ್ ಜಾತೆಲಿ. ಕಿತ್ಯಾಕ್ ತುಜ್ಯಾ ಹ್ಯಾ ರೇಕಾ ಪ್ರಕಾರ್ ತುಂವೆಂ ಗರಿಬ್ ಜಾವ್ನ್ ಉರೊಂಕ್ ಸಾಧ್ಯ್ಚ್ ನಾ....."
‘ಹಾಕಾ ಪಿಶೆಂ ಲಾಗ್ಲಾಂ...’ ಮತಿಂತ್ಚ್ ಮ್ಹಣೊನ್ ಜೊತಿಷಾಕ್ ಥೊಡೆ ಪಯ್ಶೆ ದೀವ್ನ್ ಬ್ರೆಂಡನ್ ಥಂಯ್ ಥಾವ್ನ್ ಚಲ್ತೆ ರಾವ್ಲೊ. ‘ಹೆ ಸಗ್ಳೆ ಜೊತಿಷ್ ಪಿಶೆ ಜಾವ್ನಾಸಾತ್. ಹಾಂವ್ ಲಕ್ಪತಿ ಖಂಯ್, ಹಾಂವ್ 30 ಲಾಕಾಂ ಪ್ರಾಸ್ ಚಡ್ ಸಂಪತ್ತಿ ಆಸ್ಲ್ಲೊ ಮನಿಸ್ ಖಂಯ್. ಆಸ್ಲ್ಲೆಂ ದಾನ್ ಕರುನ್ ನವ್ಯಾ ಧನಾಕ್ ರಾಕೊಂಕ್ ಜಾಯ್ ಖಂಯ್. ಹಾತಾರ್ ಆಸ್ಚ್ಯಾ ಥೊಡ್ಯಾ ಸತಾಂಕ್ ಹೆ ವಾಚುಂಕ್ ಸಕ್ಲ್ಲೆಂಚ್, ದೆವಾಚೊ ಸ್ಥಾನ್ ಘೆವ್ನ್ ಕಿತೆಂಯಿ ಥೊಂಡಾಕ್ ಆಯಿಲ್ಲೆಂ ಸಾಂಗೊನ್ ಲೊಕಾಕ್ ಮಾಂಕೊಡ್ ಕರುನ್ ಪಯ್ಶೆ ಜೊಡ್ತಾತ್.....’ ಆಪ್ಣಾಯಿತ್ಲ್ಯಾಕ್ ಪುರ್ಪುರುನ್ ಬ್ರೆಂಡನ್ ಘರ್ಚ್ಯೆ ವಾಟೆರ್ ಆಸ್ಲ್ಲೊ.
ಎಕಾಸ್ಫಾರಾ ತಾಕಾ ಮಾಂಡ್ಯಾಕ್ ತೊಣ್ಕ್ಯಾನ್ ಬಡಯ್ಲೆಪರಿಂ ತೊ ಉಡೊನ್ ಪಡ್ಲೊ. ತಾಕಾ ಉಗ್ಡಾಸ್ ಆಯ್ಲೊ. ಜಾಂವ್ಕ್ ತೊ 30 ಲಾಕಾಂ ಪ್ರಾಸ್ ಚಡ್ ಪಯ್ಶೆ ಆಸ್ಲ್ಲೊ ಮನಿಸ್. ವ್ಹಯ್ ತಾಚೆಂ ದೋನ್ ಕುಡಾಂ, ಹೊಲ್ ಕಿಚ್ಚನ್ ಆಸ್ಚೆಂ ಜೈತಾಚೆಂ ಫ್ಲ್ಯಾಟ್ ಚಾರ್ ಬಂಗ್ಲಾ ವಾಟಾರಾಂತ್ ಆಜ್ 28 ಲಾಕಾಂಚಾ ಮೊಲಾಚೆಂ ಜಾಲಾಂ ತೆಂ ತಾಕಾ ಉಗ್ಡಾಸ್ ಜಾಲೆಂ. ಪಾಟ್ಲ್ಯಾಚ್ ದಿಸಾಂನಿ, ತಾಂಚೆ ಕುಶಿಚೆಂ ತಸಲೆಂಚ್ ಪ್ಲ್ಯಾಟ್ 28 ಲಾಕಾಂಕ್ ವಿಕೊನ್ ಗೆಲ್ಲೆಂ. ತಾಚಾ ಬ್ಯಾಂಕಾಂತ್ ಬಾಪಾಯ್ಚೆ ಸಾಡೆತಿನ್ ಲಾಕ್ ಆಸ್ಲ್ಲೆ ತೆ ತಾಣೆ ಹಾತ್ ಲಾಂವ್ಕ್ ನಾತ್ಲ್ಲೆ. ವಯ್ಲ್ಯಾನ್ ಬರೆಂಶೆಂ ಕಾರ್ಯಿ ತಾಕಾ ಆಸ್ಲ್ಲೆಂ. ಚಿಂತಾಂ ಚಿಂತಾಂ ಬ್ರೆಂಡನ್ ಸಗ್ಳೊಚ್ ಥಂಡ್ ಜಾಲೊ.
‘ತರ್ ಕಿತೆಂ ಹೆಂ ಸಗ್ಳೆಂ ಹಾಂವೆಂ ದಾನ್ ಕರುನ್ಂಚ್ ಮ್ಹಜ್ಯಾ ರಾಕೊನ್ ಆಸ್ಚ್ಯಾ ವಿಪ್ರಿತ್ ಗ್ರೇಸ್ತ್ ಕಾಯೆಕ್ ಲಾಗಿಂ ಕರ್ಯೆತ್ ಮ್ಹಳ್ಳೆಂ ಸತ್ ಗಾಯ್? ತ್ಯಾ ಜೊತಿಷಾನ್ ಸಾಂಗ್ಲ್ಲೆಂ ಮ್ಹಜೆ ವಿಶಿಂ ಸಕ್ಕಡ್ಯಿ ಸತ್ ಜಾವ್ನಾಸ್ಲ್ಲೆಂ. ತರ್ ಹೆಂಯಿ ಸತ್ ಜಾಯ್ತ್ ಗಾಯ್? ತ್ಯಾ ಕೊಡ್ಕರಾನ್ ಸೈತ್ ಮ್ಹಾಕಾ ಬರೆಂ ಮಾಗ್ಲಾಂ. ದೇವ್ ಮ್ಹಾಕಾ ಚಡ್ ಆನಿ ಚಡ್ ಧನ್ ದಿತಲೊ ಆನಿ ಹಾಂವ್ ವೆಗಿಂಚ್ ಸಂಸಾರಾಂತ್ಲೊ ಸಕ್ಡಾಂ ಪ್ರಾಸ್ ಗ್ರೇಸ್ತ್ ಮನಿಸ್ ಜಾಂವ್ಕ್ ಪಾವ್ತಲೊಂ ಮ್ಹಣ್. ಹೆಂ ಸಗ್ಳೆಂ ಆಯ್ಚ್ಯಾ ಪಯ್ಲ್ಯಾ ತಾರಿಕೆರ್ಚ್ ಮ್ಹಾಕಾ ಸಾಂಬಾಳ್ ಮೆಳ್ಲ್ಲ್ಯಾ ದೀಸ್ಚ್ ಆಯ್ಕೊಂಕ್ ಮೆಳಾಜಾಯ್ ತರ್ ಹಾಂತುಂ ಕಾಂಯ್ ತರಿ ನವೆಂಸಾಂವ್, ಮ್ಹಜೆಂ ಬರೆಂಪಣ್, ಮ್ಹಜೆಂ ಗ್ರೇಸ್ತ್ ಜಾಂವ್ಕ್ ನಿಯಾಳುನ್ ಆಸ್ಲ್ಲೆಂ ಸ್ವಪಾಣ್ ಖರೆಂ ಜಾಂವ್ಚೆಂ ಲಕ್ಷಣ್ ಖಂಡಿತ್ ಆಸಾ.....’
‘ವ್ಹಯ್ ದೇವ್ ದಿತಾನಾ ದೆಂವ್ಚಾರ್ ನಾಡ್ತಾ ಮ್ಹಣ್ತಾತ್. ಮ್ಹಾಕಾ ದೇವ್ ದೀಂವ್ಕ್ ಚಿಂತಾ ತರ್, ಹಾಂವೆಂ ತೆಂ ಆಪ್ಣಾಂವ್ಕ್ ಜಾಯಿಚ್. ಆನಿ ತೆಂ ಆಪ್ಣಾಂವ್ಕ್ ಹಾಂವೆಂ ಪಯ್ಲೆಂ ವರ್ತೆಂ ದಾನ್ ಕರುಂಕ್ ಆಸಾ, ಬರಿ ಕರ್ನಿ ಜಾವ್ನ್ ಮ್ಹಜ್ಯಾ ತ್ಯಾ ವಿಪ್ರೀತ್ ಗ್ರೇಸ್ತ್ ಕಾಯೆಕ್ ಮುಖಾರ್ ಯೆಂವ್ಚಿ ವಾಟ್ ಜಾವ್ನ್’ ಚಿಂತಾಂ ಚಿಂತಾ ಬ್ರೆಂಡನ್ ಘರಾ ಪಾವ್ಲೊ.
ಆಜ್ ತೊ ಮಸ್ತು ಖುಶಿ ಆಸ್ಲ್ಲೊ. ಮುಖಾರ್ ಮೆಳ್ಲ್ಲ್ಯಾ ಶಾರೊನಾಕ್ ಪಟ್ಲುನ್ ಧರುನ್ ಉಮ್ಹೊ ದಿಲೊ. “ತುಕಾ ವೆಗ್ಗಿಂಚ್ ರಾವ್ಳೆರಾಕ್ ವರ್ತಾಂ ಮಾ.....” ಬಾಯ್ಲೆಚಾ ಕಾನಾಂತ್ ಪುಸ್ಪುಸೊನ್ ಹಾಡ್ಲ್ಲಿ ಪ್ಯಾಕೆಟ್ ದಿತಾನಾ, ಸಿಂಡ್ರೆಲ್ಲಾಯಿ ಧಾಂವೊನ್ ಆಯ್ಲೆಂ. ತಾಕಾಯಿ ಪಟ್ಲುನ್ ಧರುನ್ ಕೀಸ್ ದೀವ್ನ್ “ತುಂ ವೆಗ್ಗಿಂಚ್ ರಾಂಯ್ ಕುವರ್ನಿಪರಿಂ ಸೊಭ್ತಲೆಂಯ್ ಹ್ಯಾ ಗಾಂವಾಂತ್ ಬೆಬಿ....." ಸಾಂಗೊನ್ ಆಪ್ಣೆ ತಾಚೆ ಖಾತಿರ್ಯಿ ಹಾಡ್ಲ್ಲಿ ಪ್ಯಾಕೆಟ್ ದಿಲಿ.
“ಆತಾಂ ಜಾಲ್ಯಾರಿ ಮ್ಹಾಕಾ ಕಿತೆಂ ಉಣೆ ಆಸಾ ಡ್ಯಾಡ್? ಹಾಚೆ ವರ್ತೆಂ ಆನಿ ಕಿತೆಂ ಜಾಯ್ ಡ್ಯಾಡ್.....?" ಸಿಂಡ್ರೆಲ್ಲಾನ್ ಮೊಗಾನ್ ಆಪ್ಲ್ಯಾ ಬಾವ್ಳ್ಯಾಂಚೊ ಹಾರ್ ಬಾಪಾಯ್ಚ್ಯಾ ಗಳ್ಯಾಕ್ ಘಾಲುನ್ ತಾಚಾ ಗಾಲಾಚೊ ಉಮ್ಹೊ ಘೆವ್ನ್ ಮ್ಹಳೆಂ.
ಆಪ್ಣೆಂ ಕರುಂಕ್ ಚಿಂತ್ಲ್ಲೆಂ ಕಾಮ್ ಬ್ರೆಂಡನಾನ್ ಬಾಯ್ಲೆ ಬುರ್ಗ್ಯಾಕ್ ಸಾಂಗೊಂಕ್ನಾ. ತಾಂಕಾ ಗ್ರೇಸ್ತ್ ಜಾವ್ನ್ಂಚ್ ಖರಿ ಗಜಾಲ್ ಸಾಂಗ್ತೊಲೊಂ ಮ್ಹಣ್ ತಾಣೆ ಘುಟ್ ಸಾಂಬಾಳ್ಳೊ. ತಶೆಂ ತ್ಯೆ ರಾತಿಂ ಜೆವಾಣ್ ಜಾವ್ನ್ ತಿಂ ಸಗ್ಳಿಂ ಸಂತೊಸಾನ್ ನಿದೊಂಕ್ ಗೆಲಿಂ.
ಸಕಾಳಿಂ ಬ್ರೆಂಡನ್ ವೆಗ್ಗಿಂ ಉಟ್ಲೊ ಆನಿ ಆಪ್ಣಾಕ್ ಕೊಣ್ ಪಯ್ಲೆಂ ಮುಖಾರ್ ದಿಸೊಂಕ್ ಪುರೊ ಮ್ಹಣ್ ದಾರ್ ಉಘಡುಂಕ್ ವೆತಾನಾ, ಮುಖಾರ್ಚ್ ತಾಕಾ ಸಾಕಾಳಿಂಚೆಂ ದಿಸಾಳೆಂ ದಾರಾರ್ ಉಡವ್ನ್ ವೆಚೊ ದಿಸ್ಲೊ.
‘ತರ್ ಹೊ ಜಾತಲೊಗಿ ಮ್ಹಜ್ಯಾ ಆತಾಂ ಆಸ್ಲ್ಲ್ಯಾ ಧನಾಚೊ ಹಖ್ಖ್ದಾರ್?’ ಆಪ್ಣಾಯಿತ್ಲ್ಯಾಕ್ ಉಲವ್ನ್, ಬ್ರೆಂಡನಾನ್ ತ್ಯಾ ಪೆಪರ್ವಾಲ್ಯಾಕ್ ಉಲೊ ದಿಲೊ.
“ಬೊಲೊ ಸಾಬ್...." ಪೆಪರ್ವಾಲೊ ಮ್ಹಣಾಲೊ.
“ಆಯ್ಕ್...., ತುಜೆಂ ಕಾಮ್ ಕರುನ್ ತುಂ ವೆಗ್ಗಿಂಚ್ ಮ್ಹಾಕಾ ಮೇಳ್. ಹಾಂವ್ ತುಕಾ ಆಜ್ ಮ್ಹಜೆ ಲಾಗ್ಗಿಂ ಆಸ್ಲ್ಲೆಂ ಸಕ್ಕಡ್ ದಿಂವ್ಕ್ ಚಿಂತಾಂ....."
ಪೆಪರ್ವಾಲೊ ಬ್ರೆಂಡನಾಕ್ ವಯ್ರ್ ಸಕೈಲ್ ಪಳಂವ್ಕ್ ಪಡ್ಲೊ. ಭೋವ್ಶಾ ಚಿಂತುನ್ ರಾತಿಂ ಪಿಯೆಲ್ಲೆಂ ಪಿರ್ವೊಂಕ್ನಾ ವ ತಕ್ಲೆಂತ್ ಅಸ್ಕತ್ ಜಾಲಾ ಮ್ಹಣ್.
“ತಶೆಂ ದುಭಾವೊನ್ ಪಳಂವ್ಚಿ ಗರ್ಜ್ನಾ......, ಹಾಂವ್ ಸತ್ಚ್ ಸಾಂಗ್ತಾಂ, ಮ್ಹಾಕಾ 9 ವೊರಾಂ ಭಿತರ್ ಮೇಳ್ ಹಾಂವ್ ತುಕಾ ಸಗ್ಳೆಂ ಸಮ್ಜಾಯ್ತಾಂ....." ಮ್ಹಣೊನ್ ಬ್ರೆಂಡನ್ ಪೆಪರ್ ಘೆವ್ನ್ ಭಿತರ್ ಗೆಲೊ.
ನೋವ್ ವೊರಾರ್ ದಾರಾರ್ ಹಾಜಿರ್ ಜಾಲ್ಲ್ಯಾ ತ್ಯಾ ಪೆಪರ್ವಾಲ್ಯಾಕ್ ಸಾಂಗಾತಾ ಘೆವ್ನ್ ಬ್ರೆಂಡನ್ ಘರಾ ಥಾವ್ನ್ ಭಾಯ್ರ್ ಪಡ್ಲೊ. ತಾಚೆಲಾಗ್ಗಿಂ ಬ್ರಿಫ್ಕೆಸಿಂತ್ ಘರಾಚಿಂ ದಸ್ತಾವೆಜಾಂ, ಬ್ಯಾಂಕಾಚೊ ಚೆಕ್ಕ್ ಬೂಕ್ ಕಾರಾಚಿ ಪೆಪರಾಂ ಸಗ್ಳಿಂ ಆಸ್ಲ್ಲಿಂ.
ಸಗ್ಳೆಂ ತ್ಯಾ ಮನ್ಶ್ಯಾಚಾ ನಾಂವಾರ್ ಕರುನ್ ಕೊಣಾಯ್ಕಿ ತಾಣೆ ಧಾನ್ ಕೆಲ್ಲಿ ಗಜಾಲ್ ಸಾಂಗೊಂಕ್ ನಜೊ ಮ್ಹಣ್ ಬಾಸ್ ಘೆವ್ನ್, ಬ್ರೆಂಡನ್ ಆಪ್ಲ್ಯಾ ಆಫಿಸಾಕ್ ಗೆಲೊ. ಆಫಿಸಾಂತ್ ತಾಣೆ ಆಪ್ಣಾಕ್ ಸದ್ದ್ಯಾಕ್ ರಾವೊಂಕ್ ಏಕ್ ಠಿಕಾಣೊ ಜಾಯ್ ಮ್ಹಳ್ಳೆಂ ಚಿಂತುನ್ ೫೦ ಹಜಾರಾ ರುಪ್ಯಾಂಕ್ ಲೋನ್ ಆಪಿಲ್ ಕೆಲೊ. ತ್ಯಾ ಪಯ್ಶ್ಯಾನಿಂ ತಾಣೆ ತಾಂಚಾ ಕಂಪೆನಿಚಾ ಗುದಾವಾಂನಿ ಕಾಮ್ ಕರ್ತೆಲ್ಯಾಂ ಕುಲಿಂಕ್ ವಿಚಾರುನ್ ಲಾನ್ಶೆಂ ಘರ್ ಸೊದುನ್ ಕಾಡ್ಲೆಂ.
ಜೊತಿಷಾನ್ ಸಾಂಗ್ಲ್ಲ್ಯಾ ಪ್ರಕಾರ್ ತಾಣೆ ಏಕ್ ಮಹಿನೊ ರಾಕೊಂಕ್ ಆಸ್ಲ್ಲೆಂ ತಾಚಾ ನಶಿಬಾಂತ್ ಆಸ್ಲ್ಲ್ಯಾ ತ್ಯಾ ವಿಪ್ರೀತ್ ಗ್ರೇಸ್ತ್ ಕಾಯೆಕ್ ಆಪ್ಣಾಂವ್ಕ್, ಆಪ್ಲೆಂ ಸರ್ವ್ ದಾನ್ ಕರುನ್.
ಸಾಯಾನಾಂತ್ ಗನೆಶ್ಪಾಡಾ ಮ್ಹಳ್ಳೆಕಡೆನ್ ಆಸ್ಚ್ಯಾ ತ್ಯಾ ಗರಿಬ್ ಆನಿ ಪೊಲಿನಿ ರಾಂವ್ಚ್ಯಾ ವಾಟಾರಾಂತ್ ಪಗ್ಡಿ ದೀವ್ನ್ ತ್ಯಾ ಲಾನ್ಶ್ಯಾ ಎಕಾ ಕುಡಾಚಾ ಚಾಲಿಂತ್ಲ್ಯಾ ಘರಾಕ್ ಬ್ರೆಂಡನಾನ್ ವಹಿತ್ಸುನ್ ಘೆತ್ಲೆಂ. ಮಸ್ತು ಸುಖ್ ಜೊಡುಂಕ್ ಇಲ್ಲೆ ಕಷ್ಟ್ ಕಾಡುಂಕ್ ಪಡ್ತಾತ್ಚ್. ಫಾಲ್ಯಾಂಚಾ ತ್ಯಾ ಆಪರ್ಮೀತ್ ಸುಖಾಕ್ ವಾಟ್ ಜಾವ್ನ್ ಕಾಂಟ್ಯಾ ಕುಂಟ್ಯೆಂಚಿ ಥೊಡ್ಯಾಚ್ ದಿಸಾಂಚಿ ವಾಟ್ ಮ್ಹಣ್ ಚಿಂತುನ್, ಬ್ರೆಂಡನಾನ್ ಕಸಲಿಯಿ ಲಜ್, ದಾಕ್ಷೆಣ್ ವ ಲ್ಹಾನ್ಪಣಾಚಿ ಪರ್ವಾ ಕರಿನಾಸ್ತಾಂ ಥಂಯ್ಸರ್ ಯೇವ್ನ್ ರಾವೊಂಕ್ ನಿಶ್ಚಯ್ ಕೆಲೊ.
“ಆಮಿ ಹೆಂ ಘರ್ ಸೊಡುನ್ ಖಂಯ್ ವೆತಾಂವ್ಮಾ....?" ಶಾರೊನಾನ್ ವಿಚಾರ್ಲ್ಲೆಂ. ಘಡಿಬರ್ ಬ್ರೆಂಡನ್ ಶಾರೊನಾಕ್ ಪಳಯ್ಲಾಗ್ಲೊ. ಕಿತೆಂ ಜಾಪ್ ದಿಂವ್ಚಿ ತೆಂ ಸಮ್ಜಾನಾಸ್ತಾಂ.
“ದೋನ್ ದಿಸಾಂ ಆದಿಂ...., ಪೊರ್ಚ್ಯಾಚ್ ರಾತ್ಚ್ಯಾ ಎಕಾ ತಾರಿಕೆರ್ ತುಂವೆಂ ಮ್ಹಾಕಾ ಪೊಟ್ಲುನ್ ಧರುನ್ ವೆಗ್ಗಿಂಚ್ ತುಕಾ ರಾವ್ಳೆರಾಕ್ ವರ್ತಾಂಮಾ ಮ್ಹಣ್ ಸಾಂಗ್ಲ್ಲೆಂಯ್. ತರ್ ಕಿತೆಂ ತುಂವೆಂ ತೆಂ ರಾವ್ಳೆರ್ ಪಯ್ಲೆಂಚ್ ತಯಾರ್ ಕರುನ್ ಜಾಲ್ಲೆಂಯ್? ಮ್ಹಾಕಾ ವ ಸಿಂಡ್ರೆಲ್ಲಾಕ್ ಏಕ್ಯಿ ಉತಾರ್ ಸಾಂಗಾನಾಸ್ತಾಂ ಸಾರ್ಪ್ರಾಯ್ಸ್ ದೀಂವ್ಕ್ ಚಿಂತಾಲೊಯ್....?"
ಬ್ರೆಂಡನಾಕ್ ತೆಂ ಆಯ್ಕೊನ್ ಕಲ್ಲ್ಶೆಂ ಜಾಲೆಂ ಜಾಯ್ಜಯ್. ತೊ ಲ್ಹಾನ್ ಭುರ್ಗ್ಯಾನ್ ಆಪ್ಲ್ಯಾ ಆವಯ್ಕ್ ಪಳಂವ್ಚ್ಯಾಪರಿಂ ಶಾರೊನಾಕ್ ಪಳಂವ್ಕ್ ಪಡ್ಲೊ.
“ಕಿತೆಂ ಚಿಂತುಂಕ್ ಪಡ್ಲೊಯ್ ಮಾ......? ತುಂವೆಂ ಮ್ಹಾಕಾ ರಾವ್ಳೆರಾಕ್ ವ ಜೊಪ್ಡ್ಯಾಕ್ ಆಪವ್ನ್ ವೆಲ್ಯಾರಿ ಹಾಂವ್ ಖುಶೆನ್ ಯೆತೆಲಿಂ. ಮ್ಹಾಕಾ ಫಕತ್ತ್ ಮೊರ್ತಾಂ ಪರ್ಯಾಂತ್ ತುಜೆ ಸಂಗಿಂಚ್ ರಾಂವೊಂಕ್ ಜಾಯ್. ಆನಿ ತುಜೆಸಂಗಿಂ ರಾಂವ್ಚೆಂ ಸುಖ್ ಸಂಸಾರಾಂತ್ಲ್ಯಾ ಖಂಚಾಯ್ ಗ್ರೇಸ್ತ್ಕಾಯೆ ಪ್ರಾಸ್ ಚಡ್ ಮೊಗಾಚೆಂ ಜಾವ್ನಾಸಾ......"
ಶಾರೊನಾನ್ ಸಾಂಗ್ಲ್ಲೆಂ ಆಯ್ಕೊನ್ ಬ್ರೆಂಡನ್ ಥಂಡ್ಗಾರ್ ಜಾಲೊ. ಆಸ್ಲ್ಲ್ಯಾ ಘರಾಂತ್ ಆನಿ ಮೆಳ್ಚ್ಯಾ ಸುಖಾಂತ್ ತಾಚಿ ಬಾಯ್ಲ್ ಜಾಂವ್ ವ ದುವ್ ಸೊಂತೊಸಾನ್ ಆಸ್ಲ್ಲಿಂ. ತರ್ ಕಿತೆಂ ತಾಕಾಚ್ ಜಾಯ್ ಆಸ್ಲ್ಲಿಗಿ ವಿಪ್ರೀತ್ ಗ್ರೇಸ್ತ್ಕಾಯ್? ತೊ ಜಾಪ್ ಕಾಡಿನಾಸ್ತಾಂ ಚಿಂತಿಲಾಗ್ಲೊ, ‘ಚಡ್ ಆಶೆಕ್ ಲಬ್ದಾಲ್ಲೆ ನಿರಾಶೆಕ್ ಕಾರಣ್ ಜಾತಾತ್ ಮ್ಹಣ್ ಆಯ್ಕಾಲ್ಲೆಂ ಹಾಂವೆಂ. ಮ್ಹಾಕಾ ಪುಣ್ಯಿ ತಶೆಂ ಜಾಂವ್ಚೆಂನಾ ಮೂ?’ ತೊ ದೆದಸ್ಫರ್ ಜಾಲ್ಲೊ. ‘ತರೀ ವ್ಹಡ್ ನಾ, ಇಲ್ಲೆಶೆ ದೀಸ್, ಉಪ್ರಾಂತ್ ಸಗ್ಳೆಂ ಸಾರ್ಕೆಂ ಜಾತಲೆಂ’ ಆಪ್ಣಾಕ್ ಸಮಾಧಾನ್ ಕರಿಲಾಗ್ಲೊ. ಆತಾಂ ಘರ್ ಪಯ್ಶ್ಯೆ ಆನಿ ಕಾರ್ ಸಗ್ಳೆಂ ದಾನ್ ಕರುನ್ ಜಾಲಾಂ ಆಸ್ತಾಂ, ಕಾಂಯ್ ಕರುಂಕ್ಯಿ ಸಾಧ್ಯ್ ನಾತ್ಲ್ಲೆಂ ವ ಚುರ್ಚುರೊಂಕ್ಯಿ ಆವ್ಕಾಸ್ ನಾತ್ಲ್ಲೊ.
ಚಾರ್ ಬಂಗ್ಲಾ ಆಸ್ಚ್ಯಾ ತ್ಯಾ ಜೈತಾಚಾ ಫ್ಲ್ಯಾಟಾಥಾವ್ನ್ ತೊ ಆಪ್ಲ್ಯಾ ಮೊಗಾಚಾ ಬಾಯ್ಲೆ ಬುರ್ಗ್ಯಾಕ್ ಘೆವ್ನ್ ರಾವ್ಳೆರಾಚಾ ಆಶೆನ್ ಬಿಕಾರಿ ಜಾಲೊಂ ಮ್ಹಳ್ಳೆಪರಿಂ, ಸಾಯಾನಾಂತ್ಲ್ಯಾ ಗರಿಬ್ ವಾಟಾರಾಕ್ ಪಾವ್ಲ್ಲೊ. ತರೀಪುಣ್ ಶಾರೊನಾನ್ ಜಾಂವ್ ವ ಸಿಂಡ್ರೆಲ್ಲಾನ್ ಹೆಂ ಕಿತ್ಯಾಕ್ ಜಾಲೆಂ ಮ್ಹಳ್ಳೆಂ ತಾಚೆ ಕಡೆನ್ ವಿಚಾರುಂಕ್ ನಾತ್ಲ್ಲೆಂ. ಪುಣ್ ತಿಂ ದೊಗಾಂಯಿ ಎಕಾಮೆಕಾಚೆ ದೊಳೆ ಚುಕವ್ನ್ ರಡ್ಚೆಂ ಆನಿ ಕಳ್ವಳ್ಚೆಂ ಜಾಯ್ತೆ ಪಾವ್ಟಿಂ ಬ್ರೆಂಡನಾನ್ ಪಳಯಿಲ್ಲೆಂ.
ಬ್ರೆಂಡನ್ಯಿ ಆಪ್ಣಾಯಿತ್ಲ್ಯಾಕ್ ಖರ್ಗಾತಾಲೊ ಆನಿ ಆಪ್ಣಾಕ್ ಶಿರಾಪ್ತಾಲೊ. ತರಿ, ಆಪ್ಣೆ ಕಿತ್ಯಾಕ್ ತೆಂ ಸುಖಾಚೆಂ ಘರ್ ಸೊಡುನ್ ಹ್ಯಾ ವಾಟರಾಂತ್ ವಸ್ತಿ ಕೆಲ್ಯಾ ಮ್ಹಣ್ ಸಾಂಗೊಂಕ್ ಸಕಾನಾತ್ಲ್ಲೊ.
ಪಳಯ್ತಾಂ ಪಳಯ್ತಾಂ, ಮಹಿನೆ ದಾ ಪಾಶಾರ್ಲ್ಲೆ. ಪುಣ್ ತಾಣೆ ಆಶೆಲ್ಲಿ ತಿ ವಿಪ್ರೀತ್ ಗ್ರೇಸ್ತ್ ಕಾಯ್ ತಾಕಾ ಸೊಧುನ್ ಯೇಂವ್ಕ್ ನಾತ್ಲ್ಲಿ.
ಬ್ರೆಂಡನಾ ಥಾವ್ನ್ ಧನ್ ಲಾಬ್ಲ್ಲೊ ಪೆಪರ್ವಾಲೊ, ತೆಂ ಘರ್, ಕಾರ್ ಆನ್ಯೆಕ್ಲ್ಯಾಕ್ ವಿಕುನ್ ಆಪ್ಲ್ಯಾ
ಗಾಂವಾಕ್ ವಚುನ್ ಬರೊಸೊ ವ್ಯಾಪಾರ್ ಸುರುಕರುನ್ ಸುಖಾನ್ ಜಿಯೆಂವ್ಕ್ ಲಾಗ್ಲ್ಲೊ.
ಆಜ್ ತಾಕಾ ಸಿಮ್ರನ್ ಮೆಳ್ಲ್ಲ್ಯಾ ಉಪ್ರಾಂತ್ ಸರ್ವ್ ನಿಯಾಳ್ ಆಯಿಲ್ಲೊ. ತೊ ತಾಚಾ ಠಿಕಾಣ್ಯಾಕ್ ಪಾವ್ಲ್ಲೊ. ರಾತಿಚಿಂ ವೊರಾಂ ಆಟ್ ಉತ್ರಾಲ್ಲಿಂ. ಗನೆಶ್ಪಾಡಾಚಾ ತ್ಯಾ ಗಲ್ಲೆಂತ್ಲ್ಯಾನ್ ಪಾಶಾರ್ತಾನಾ ಚಿಕ್ಕೆ ಮುಖ್ಲ್ಯಾನ್ ತಾಚಿ ದುವ್ ಸಿಂಡ್ರೆಲಾ ಚಲುನ್ ವೆಚಿ ದಿಷ್ಟಿಕ್ ಪಡ್ಲಿ. ತಾಚೆಂ ಕಾಳಿಜ್ ಉಮಾಳ್ಳೆಂ.
“ಥೊಡ್ಯಾಚ್ ತೆಂಪಾಆದಿಂ ಬರ್ಯಾ ಗ್ರೇಸ್ತ್ ಸೊಸಾಯ್ಟಿಂತ್ ರಾವೊನ್ ಹಾಸೊನ್ ಖೆಳೊನ್ ಆಸ್ಲ್ಲ್ಯಾ ಆಪ್ಲ್ಯಾ ತರ್ನಾಟ್ಯೆ ದುವೆಚಿ ಆಜ್ ಗತ್ ಕಿತೆಂ ಜಾಲಿ ದೆವಾ? ಆನಿಕಿ ಬರ್ಯಾ ಜಿಣಿಯೆಕ್ ಆಶೆವ್ನ್, ರಾವ್ಳೆರಾಂತ್ ಹಾಂಕಾಂ ಪಾವಯ್ತಾಂ ಮ್ಹಣ್ ಚಿಂತುಂನ್ ಖಂಯ್ ಹಾಡುನ್ ಪಾಯ್ಲೆಂ ದೆವಾ?" ಬ್ರೆಂಡನ್ ಆಪ್ಣಾಯಿತ್ಲ್ಯಾಕ್ ಬಡ್ಬಡ್ಲೊ.
“ಹಾಯ್ ಡಾರ್ಲಿಂಗ್......." ಎಕಾ ತರ್ನಾಟ್ಯಾ ಮೊವಾಲ್ಯಾನ್ ಸಿಂಡ್ರೆಲ್ಲಾಕ್ ಆಡಾಯ್ಲೆಂ. ಸಿಂಡ್ರೆಲ್ಲಾ ತಕ್ಲಿ ಪಂದಾ ಘಾಲುನ್ ತ್ಯಾ ಮೊವಾಲ್ಯಾಕ್ ಪರ್ವಾ ಕರಿನಾಸ್ತಾಂ ಫುಡೆಂ ಚಮ್ಕಾಲೆಂ. “ಆಯ್ಕ್, ಡಾರ್ಲಿಂಗ್, ಕಿತೆಂ ಆಮ್ಸೊರ್....." ತ್ಯಾ ಮೊವಾಲ್ಯಾನ್ ಸಿಂಡ್ರೆಲ್ಲಾಕ್ ಆರಾಯ್ಲೆಂ.
ಬ್ರೆಂಡನಾಚೆಂ ರಗಾತ್ ಸಳ್ಸಳ್ಳೆಂ! ತೊ ತ್ಯಾ ಮೊವಾಲ್ಯಾಕ್ ಮಾರುನ್ ಉಡೈತಾಂ ಮ್ಹಣ್ ಮುಖಾರ್ ವೆತಾನಾ, ಸಿಂಡ್ರೆಲ್ಲಾ ತ್ಯಾ ಮೊವಾಲ್ಯಾಚಾ ಕೈದಾಳಾಂತ್ಲೆಂ ಸುಟ್ಚೆಂ ಪ್ರಯಾತ್ನ್ ಕರ್ತಾನಾ, ತ್ಯಾ ಮೊವಾಲ್ಯಾನ್ ಸಿಂಡ್ರೆಲಾಚಾ ಹರ್ದ್ಯಾರ್ ಹಾತ್ ಘಾಲುನ್ ಟಿ-ಶರ್ಟ್ ಪಿಂಜುನ್ ಜಾಲ್ಲೆಂ. ಆಪ್ಲೆಂ ಉಗ್ತೆಂ ಪಡ್ಲ್ಲೆಂ ಹರ್ದೆಂ, ಮಾನ್ ರಾಕೊಂಕ್ ದೊನ್ಯಿ ಹಾತಾನಿ ಲಿಪವ್ನ್ ತೆಂ ದಾಂವೊಂಕ್ ಪಳಯ್ತಾನಾ, ಪಾಟ್ಲ್ಯಾನ್ ಬ್ರೆಂಡನ್ ಪಾವುನ್ ಜಾಲ್ಲೊ!!
ಮೊವಾಲ್ಯಾಚಾ ಕೊಲ್ಲಾರಾಕ್ ಆರಾವ್ನ್ ತಾಚಾ ಹಾತಾಂತ್ಲೆಂ ಆಪ್ಲ್ಯೆ ದುವೆಕ್ ಸೊಡವ್ನ್, ಏಕ್ ಗಾಳ್ ಸೊವುನ್ ಬ್ರೆಂಡನಾನ್ ಮಾರ್ಲ್ಲ್ಯೆ ಮುಟಿಕ್ ತ್ಯಾ ಮೊವಲ್ಯಾಚೆಂ ಮುಸ್ಕರ್ ಫುಟೊನ್ ತೊ ಮುಖಾರ್ ಉಸಾಳ್ಳೊ!!!
“ಡ್ಯಾಡ್......" ಸಿಂಡ್ರೆಲ್ಲಾ ಬಾಪಾಯ್ಚ್ಯಾ ವೆಂಗೆಂತ್ ಲಿಪೊನ್ ರಡಾಲಾಗ್ಲೆಂ. “ಹೆಂ ಸದಾಂಯ್ ಜಾತಾ ಡ್ಯಾಡ್, ಸದಾಂಯ್....." ತೆಂ ಉಸ್ಕೆವ್ನ್ ಸಾಂಗಾಲಾಗ್ಲೆಂ. “ಹೆಂ ವಾಟರ್ಚ್ ಅಸಲ್ಯಾಂಚೆಂ ಡ್ಯಾಡ್....."
ಸಿಂಡ್ರೆಲ್ಲಾನ್ ಪಯಿಲ್ಲೆಪಾವ್ಟಿಂ ಬಾಪಾಯ್ಕ್, ತಾಣೆ ಹಾಂಕಾಂ ಹಾಡುನ್ ಘಾಲ್ಲ್ಯಾ ಹ್ಯಾ ಗಲಿಜ್ ವಾಟಾರಾಕ್ ದುರ್ಸುನ್ ಸಾಂಗ್ಲ್ಲೆಂ ಆಯ್ಕೊನ್, ಬ್ರೆಂಡನಾಕ್ ಜಿವೊಚ್ ಪುರೊನ್ ಗೆಲ್ಲೆಪರಿಂ ಭಗ್ಲೆಂ ಜಾಯ್ಜಯ್. ತೊ ಉತ್ರಾಂ ನಾಸ್ತಾಂ ದುವೆಚಾ ಮಾತ್ಯಾರ್ ಹಾತ್ ಪೊಶೆಂವ್ಕ್ ಲಾಗ್ಲೊ.
“ಹೆ ಆಂಕಲ್, ಹ್ಯಾ ವಾಟರಾಂತ್ ಬರ್ಯಾನ್ ರಾವೊಂಕ್ ಜಾಯ್ತರ್, ಆಪ್ಲಿ ಪ್ರಾಯ್ ಪಳವ್ನ್ ಜಿಯೆ. ದುಸ್ರ್ಯೆಪಾವ್ಟಿಂ ಮ್ಹಜ್ಯಾ ಆಂಗಾರ್ ಹಾತ್ ಘಾಲ್ಶಿ ತರ್, ತುಜ್ಯಾ ದುವೆಚೊ ಹಾಂಗಾಚ್ ಬಲಾತ್ಕಾರ್ ಕರುಂಕ್ ಆಸಾಂ....." ತೊ ಮೊವಾಲಿ ಉಟೊನ್ ಆಪ್ಲೆಂ ರಗ್ತಾನ್ ಬಿಜ್ಲ್ಲೆಂ ಮುಸ್ಕಾರ್ ಪುಸುನ್ ಮ್ಹಣಾಲೊ.
“ಕಿತೆಂ ಮ್ಹಣಾಂಯ್......?” ಬ್ರೆಂಡನ್ ಸಿಂಡ್ರೆಲ್ಲಾಕ್ ಸೊಡುನ್ ತ್ಯಾ ಮೊವಾಲ್ಯಾಕ್ ಕಾಭಾರ್ಚ್ ಕಾಡ್ತಾಂ ಮ್ಹಳ್ಳ್ಯಾ ರಾಗಾನ್ ಮುಖಾರ್ ವೆತಾನಾ, ಸಿಂಡ್ರೆಲ್ಲಾ ರಡುನ್ ಬಾಪಾಯ್ಕ್ ಆಡಾಯ್ ಲಾಗ್ಲೆಂ. ಹ್ಯಾ ವಗ್ತಾ ಪಯ್ಲೆಂ ಟಿ-ಶರ್ಟ್ ಪಿಂಜ್ಲ್ಲ್ಯಾ ದುವೆಕ್ ಘರಾ ಪಾವಂವ್ಚೆಂ ಚಡ್ ಗರ್ಜೆಚೆಂ ದಿಸ್ಲೆಂ ಬ್ರೆಂಡನಾಕ್. ದೆಕುನ್ ತೊ, ತ್ಯಾ ಮೊವಾಲ್ಯಾಕ್, “ತುಕಾ ದಾಖೈತಾಂ, ಖಂಚಾಯ್ಕಿ ಹಾಕಾ ಘರಾ ಸೊಡುನ್ ಯೆತಾಂ. ಹಾಲಾನಾಕಾ ಹಾಂಗಾ ಥಾವ್ನ್....." ಮ್ಹಣೊನ್ ಸಿಂಡ್ರೆಲ್ಲಾಕ್ ಅರಾವ್ನ್ ಘೆವ್ನ್ ಫುಡೆಂ ಚಮ್ಕಾಲೊ.
“ಡ್ಯಾಡ್, ತುಂವೆಂ ಕಾಂಯ್ ಕರುಂಕ್ ಜಾಯ್ನಾಂ ತ್ಯಾ ಮೊವಾಲ್ಯಾಂಕ್, ತಾಂಚೆಂ ಗ್ಯಾಂಗ್ ವ್ಹಡ್ಲೆಂ ಆಸಾ. ಮ್ಹಾಕಾ ಆಜ್ಚ್ ನ್ಹಯ್, ಸದಾಂಯ್ ತೆ ಸತಾಯ್ತಾತ್......" ಚಲ್ತಾಂ ಚಲ್ತಾಂ, ಸಿಂಡ್ರೆಲ್ಲಾಪಿಂರ್ಗಾಲ್ಲ್ಯಾ ತಾಳ್ಯಾನ್ ಬಾಪಾಯ್ಚ್ಯಾ ಹರ್ದ್ಯಾರ್ ತಕ್ಲಿ ದವರುನ್ ಸಾಂಗಾಲಾಗ್ಲೆಂ.
“ಹಾಂವ್ ತಾಂಚಾ ತೊಂಡಾಕ್ ಲಾಗಾನಾಶೆಂ ಜಾಪ್ ದೀನಾಸ್ತಾಂ ವಗೆಚ್ ರಾವುನ್ ಚಲ್ತೆವೆತಾಂ. ಆಸಲ್ಯಾ ವಾಟರಾಂತ್ ಆಮಿ ಆನಿ ಕಿತೆಂ ಆಶ್ಯೆತ್ ಡ್ಯಾಡ್? ಆಮ್ಕಾಂ ಕಾಂಯ್ ಮರ್ಯಾದ್ವಂತ್, ವ ಶಿಕ್ಪಿ ಮನಿಸ್ ಹೆಣೆ ವಸ್ತಿ ಕರುನ್ ಆಸ್ಚೆ ಮೆಳ್ಚೆನಾಂತ್, ಜೆ ಸ್ತ್ರೀಯೆಂಕ್ ಮರ್ಯಾಧ್ ದೀವ್ನ್ ಜಿಯೆಂವ್ಚೆ. ಮಾಮ್ಮಿಕ್ ಸೈತ್ ಥೊಡೆ ಪಾವ್ಟಿಂ ಸೊರೊ ಪಿಯೆವ್ನ್ ಯೆಂವ್ಚ್ಯಾ ಮನ್ಶ್ಯಾನಿ ಹಾತ್ ಧರುನ್ ವಡ್ಲಾಂ, ತಿ ಕಾಂಯ್ ಹಾಡುಂಕ್ ದುಕಾನಾಂಕ್ ವೆತಾನಾ. ಆಮಿ ತುಕಾ ಹೆಂ ಸಾಂಗೊಂಕ್ನಾ, ಕಿತ್ಯಾಕ್ ತುಂ ತೆಂ ಸೊಸುಂಕ್ ಸಕ್ಚೊನಾಂಯ್ ಮ್ಹಣ್ ಆಮಿ ಜಾಣಾಸ್ಲ್ಯಾಂವ್. ಆಜ್ ಕಿತೆಂಗಿ ತುಜ್ಯಾ ದೊಳ್ಯಾಂಕ್ ಪಳಂವ್ಕ್ ಮೆಳ್ಳೆಂ......"
ಸಿಂಡ್ರೆಲ್ಲಾನ್ ಸಾಂಗ್ಲ್ಲೆಂ ಆಯ್ಕೊನ್ ಬ್ರೆಂಡನ್ ಸಗ್ಳೊಚ್ ದೆದೆಸ್ಫರ್ ಜಾಲೊ. ಶಾರೊನಾಕ್ಯಿ ಅಸಲೆ ಉಪಾದ್ರ್ ಹಾಂಗಾಚಾ ದಾದ್ಲ್ಯಾಂನಿ ದಿಲ್ಯಾತ್ ತೆಂ ಆಯ್ಕೊನ್ ತೊ ತ್ಯಾಚ್ ಘಡ್ಯೆ ಮರೊನ್ ಗೆಲ್ಲೊ. ತಾಚೆಂ ಕಾಳಿಜ್ ವ್ಹಡ್ಲ್ಯಾನ್ ಧಡ್ದೊಂಕ್ ಲಾಗ್ಲ್ಲೆಂ, ಜೆಂ ಸಿಂಡ್ರೆಲ್ಲಾಕ್ ಸಾರ್ಕೆಂ ಆಯ್ಕಾತಾಲೆಂ. ಜಾಪ್ ದೀನಾಸ್ತಾಂ ಬ್ರೆಂಡನಾನ್ ದುವೆಕ್ ಘರಾ ಬಾಗ್ಲಾರ್ ಸೊಡ್ಲೆಂ.
ಮುಖಾರ್ಚ್ ಶಾರೊನ್ ರಾಕೊನ್ ಆಸ್ಲ್ಲಿ. ಸಿಂಡ್ರೆಲ್ಲಾಚಿ ಅವಸ್ತಾ ಪಳವ್ನ್ ಘಭಾರ್ಲಿ!
“ಕಿತೆಂ ಜಾಲೆಂ.... ಕಿತೆಂ ಜಾಲೆಂ ಮ್ಹಜ್ಯಾ ಬಾಳಾಕ್.....?" ತಿ ರಡಾಲಾಗ್ಲಿ.
“ಕಾಂಯ್ ಜಾಂವ್ಕ್ನಾಮಾ. ಬೆಬಿಕ್ ಸಾಂಬಾಳ್ ಹಾಂವ್ ಆತ್ತಾಂ ಯೆತಾಂ....." ಉತ್ರಾಂ ಬರಾಬರ್ ಬ್ರೆಂಡನ್ ಥಂಯ್ ಥಾವ್ನ್ ವೆಗಾನ್ ಚಲ್ಲೊ.
“ಖಂಯ್ಚರ್ ವೆತಾಯ್ ಡ್ಯಾಡ್......?" ಸಿಂಡ್ರೆಲ್ಲಾ ಬೊಬಾಟ್ಲೆಂ, “ಮಾಮ್ಮಿ ಡಾಡಾಕ್ ಆಡಯ್ ತೊ ತ್ಯಾ ಮೊವಾಲ್ಯಾಕ್ ಮಾರುಂಕ್ ವೆತಾ....."
“ರಾವ್ ಮಾ.....ಉಪ್ಕಾರ್ ಕರುನ್ ರಾವ್ ಮಾ......" ಶಾರೊನ್ ಪಾಟ್ಲ್ಯಾನ್ ಧಾಂವೊನ್ ಗೆಲಿ. ಪುಣ್ ಬ್ರೆಂಡನ್ ವಚುನ್ ಜಾಲ್ಲೊ.
ಅಸಹಾಯೆಕ್ ಶಾರೊನ್ ಥರ್ಥರೊನ್ ಘರಾ ಪಾಟಿಂ ಆಯ್ಲಿ. ಸಿಂಡ್ರೆಲ್ಲಾನ್ ತಿಕಾ ಗಜಾಲ್ ಸಾಂಗ್ಲಿ.
ತೆಣೆ ಗೆಲ್ಲೊ ಬ್ರೆಂಡನ್ ತ್ಯಾ ಮೊವಾಲ್ಯಾಕ್ ಸೊಧಿಲಾಗ್ಲೊ. ಪುಣ್ ತೊ ತಾಕಾ ಥಂಯ್ಚರ್ ದಿಸ್ಲೊನಾ.
ಸರಾಂ ಸರಾಂ ಮೆಟಾಂ ಕಾಡುನ್ ಬ್ರೆಂಡನ್ ತ್ಯೆ ಗಲ್ಲೆಂತ್ಲ್ಯಾನ್ ಮೊವಾಲ್ಯಾಕ್ ಸೊಧುಂಕ್ ಪಡ್ಲೊ. ತೆದ್ನಾಂ ತೊ ಮೊವಾಲಿ ಸುಮಾರ್ ಮುಖಾರ್ ಪಾವ್ಲ್ಲೊ ದಿಷ್ಟಿಕ್ ಪಡ್ಲೊ. ತಾಚೊ ಪಾಟ್ಲವ್ ಕರ್ತಾನಾ, ತೊ ಎಕಾ ಕಾಳ್ಕ್ಯಾ ವೊಣಿಂತ್ ರಿಗ್ಲೊ. ಫಟಾಫಟ್ ಪಾಟ್ಲ್ಯಾನ್ ಪಾವ್ಲ್ಲೊ ಬ್ರೆಂಡನ್ ತ್ಯಾ ಮೊವಾಲ್ಯಾಚಾ ಕೊಲ್ಲರಾಕ್ ಆರವ್ನ್ ಧರುನ್, ವಿಚಾರಿಲಾಗ್ಲೊ- “ತುಕಾ ಹಾಂವೆಂ, ಆತ್ತಾಂ ಯೆತಾಂ ಹಾಲಾನಾಕಾ ಥಂಯ್ ಥಾವ್ನ್ ಮ್ಹಣ್ ಸಾಂಗ್ಲ್ಲೆಂ ನ್ಹಯ್ವೆ.....?
“ಆಳೆ ಮ್ಹಾಕಾ ಸೊಡ್, ನಾ ತರ್ ತುಜೆಂ ಮೊಡೆಂ ಹಾಂಗಾಚ್ ನಿದಾಯ್ತಾಂ....." ಮೊವಾಲಿ ಬ್ರೆಂಡನಾಚಾ ಹಾತಾಂತ್ ಹುಳ್ವುಳ್ಳೊ.
“ಮ್ಹಜೆಂ ಮೊಡೆಂ ನಿದಾಯ್ತಾಯ್.....?” ಬ್ರೆಂಡನಾನ್ ತಾಕಾ ಸೊಡ್ಲೆಂ. “ನಿದಾವ್ನ್ ದಾಖೈ, ಆಜ್ ಫೆಸ್ಲಾ ಕರ್ಯಾಂ ಕೊಣ್ ಕೊಣಾಚೆಂ ಮೊಡೆಂ ನಿದಾಯ್ತಾ ತೆಂ...."
ತ್ಯಾಚ್ಫರಾ, ಮೊವಾಲ್ಯಾನ್ ಬ್ರೆಂಡನಾಚಾ ಖಾಡ್ಕ್ಯೆಪಂದಾ ಮಾರ್ಲ್ಲಿ ಮೂಟ್ ಬ್ರೆಂಡನ್ ಚುಕಂವ್ಕ್ ಸಕ್ಲೊನಾ. ಎಕಾ ಘಡ್ಯೆಕ್ ತಾಚೆಂ ಸಮಾತೋಲನ್ ಚುಕ್ತಾನಾ, ಮೊವಾಲ್ಯಾನ್ ಬ್ರೆಂಡನಾಚ್ಯಾ ಗೊಮ್ಟ್ಯಾಕ್ ಧರುನ್ ಪಾಟಿಂ ಬಾಗಾಂವ್ಚೆ ಪ್ರಯಾತ್ನ್ ಕೆಲೆಂ. ಪುಣ್ ಬ್ರೆಂಡನಾಚಾ ಶಿರಾಂ ಶಿರಾಂನಿ ಖತ್ಖತ್ಚೆಂ ರಾಗಾಚೆಂ ತ್ರಾಣ್, ಆಜ್ ಕೆದ್ಯಾ ವ್ಹಡ್ ತ್ರಾಣಿ ಮನ್ಶ್ಯಾಕ್ಯಿ ಧರ್ಣಿಕ್ ಆಪ್ಟುಂಕ್ ಸಕ್ಚೆ ತಸಲೆಂ ಜಾವ್ನಾಸ್ಲ್ಲೆಂ. ತಾಣೆ ಮೊವಾಲ್ಯಾಚೊ, ಆಪ್ಲ್ಯಾ ಗೊಮ್ಟ್ಯಾಕ್ ಧರ್ಲ್ಲೊ ಹಾತ್ ಎಕಾಚ್ ದಮ್ಮಾನ್ ಸುಟವ್ನ್, ದೊಂಪ್ರಾಚಿ ಖೊಟ್ ಮುಖ್ಲ್ಯಾಚಾ ಜಾಂಗ್ಯಾಂ ಮಧೆಂ ಬಸಯ್ಲಿ.
ದೂಕ್ ಸೊಸುಂಕ್ ಜಾಯ್ನಾಸ್ತಾಂ ಮೊವಾಲಿ ಬಾಗ್ವಾತಾನಾ, ತಾಚ್ಯಾ ಕೆಸಾಂಕ್ ಧರುನ್ ಗೊಮ್ಟಿ ವೊಳಾಯ್ಲಿ.
“ಮ್ಹಜ್ಯಾ ದುವೆಚೊ ಬಲಾತ್ಕಾರ್ ತುಂ ರಸ್ತ್ಯಾರ್ಚ್ ಕರ್ತಾಯ್
ನ್ಹಯ್ಗಿ....?" ಧರುನ್ ಆಸ್ಲ್ಲಿ ಗೊಮ್ಟಿ ಬಳ್ ಘಾಲುನ್ ಪಾಟಿಂ ಬಾಗ್ವಾಯ್ಲಿ. ತೊ ಸೊಸುಂಕ್ ಜಾಯ್ನಾಸ್ತಾಂ ಜಿವಾಚೆಂ ಬಿಕ್ ಮಾಗ್ಚೆಪರಿಂ ಬ್ರೆಂಡನಾಚಾ ಹಾತಿಂ ಧಡ್ಬಡ್ಲೊ. “ತುಮ್ಕಾಂ, ಪಾಪ್ ಅಬಲ್ ಸ್ತ್ರೀ, ಚಲಿಯೆಂಕ್ ರಾತ್ಚ್ಯಾ ವೆಳಾ ಎಕ್ಸುರೆಂ ಪಳಯ್ಲ್ಯಾ ತವೊಳ್ ಗರ್ಮಿ ಬಾರಿ ಚಡ್ತಾ ನ್ಹಹಿಂಗಿ......?" ಪರಾತ್ ಬ್ರೆಂಡನಾಚಿ ಬಳಾದೀಣ್ ಖೊಟ್
ಮೊವಾಲ್ಯಾಚಾ ಪೊಟಾರ್ ಬಸ್ಲಿ!
“ಹಾಂವ್ ಮೆಲೊಂ....." ಮೊವಾಲಿ ಬೊಬಾಟ್ಲೊ. ಪುಣ್ ತಾಚೊ ತಾಳೊ ಕೊಣಾಯ್ಕಿ ಆಯ್ಕೊಂವ್ಚ್ಯಾಪರಿಂ ನಾತ್ಲ್ಲೊ. ಕಿತ್ಯಾಕ್ ತಿ ಕಾಳೊಕಿ ಬಾರೀಕ್ ವೊಣ್ ಲಾಂಬಾಯೆಕ್ ಆಸೊನ್ ತ್ಯಾ ಕುಶಿಚಿಂ ಘರಾಂ ಸುಮಾರ್ ಪಯ್ಸ್ ಆಸ್ಲ್ಲಿಂ. ಶಿವಾಯ್ ಪುನ್ಯಾನ್ ತ್ಯಾ ರಾತ್ಚ್ಯಾ ವೆಳಾ ತೆಣೆ ಹೆರ್ ಕೊಣ್ಯಿ ಪಾಶಾರ್ ಜಾಂವ್ಕ್ನಾ. ಬ್ರೆಂಡನಾಚೊ ರಾಗ್ ನಿವೊಂಕ್ನಾ ತಾಚ್ಯೆ ಬೊಬೆಕ್. ತಾಕಾ ಧರುನ್ ಉಭೊ ಕೆಲೊ.
“ಚಲ್ ಝುಜ್ ಮ್ಹಜೆಸಂಗಿಂ....., ತುಕಾಯಿ ಚಾನ್ಸ್ ದಿತಾಂ. ಸಾದ್ಯ್ ತರ್ ಮಾರುನ್ ಉಡೈ ಮ್ಹಾಕಾ. ನಾತರ್ ಆಜ್ ಹಾಂವ್ ತುಕಾ ಕಾಭಾರ್ ಕಾಡ್ತಾಂ ತೆಂ ಖಂಡಿತ್......." ಬ್ರೆಂಡನ್ ಆಪ್ಲ್ಯಾ ಪಾಂಯಾಂಕ್ ದಲವ್ನ್, ದೊನ್ಯಿ ಹಾತಾಚ್ಯೊ ಮುಟಿ ಅಂರ್ದುನ್ ಧರುನ್ ಬೊಕ್ಸರಾನ್ ಝುಜ್ಚ್ಯಾ ರಿತಿರ್ ಪ್ರದರ್ಶಿತ್ ಜಾಲೊ. ಅಸ್ಕತ್ ಮನಿಸ್ ಮೆಳ್ಳ್ಯಾರ್ ಮಾತ್ರ್ ತುಮ್ಚೆಂ ಬಳ್ ಚಲ್ತಾ ನ್ಹಯ್ಗಿ....? ಚಲ್ ಉಬ್ರಾಯ್ ಹಾತ್ ಆನಿ ಬಚಾವ್ ಕರ್ ಆಪ್ಣಾಕ್ ಮ್ಹಜೆ ಥಾವ್ನ್, ನಾತರ್ ಫಾಲ್ಯಾಂ ತುಜೆಂ ಮೊಡೆಂ ಮುನ್ಸಿಪಾಲಿಟಿಚೆ ಯೇವ್ನ್ ವರ್ತೆಲೆ ಹಾಂಗಾಥಾವ್ನ್...... ಬ್ರೆಂಡನ್ ಬೊಬಾಟ್ಲೊ.
ಮೊವಾಲ್ಯಾಕ್ ಕಳ್ಳೆಂ ಆಪ್ಣಾಕ್ ಹಾಚೆ ಥಾವ್ನ್ ಬಚಾವಿ ನಾ ಮ್ಹಣ್. ಆಪ್ಲ್ಯಾ ಜಿವಾಕ್ ವಾಂಚಂವ್ಕ್ ತೊ ಲಕೊನ್ ಲಕೊನ್ ಫುಡೆಂ ಆಯ್ಲೊ ಮುಟಿ ವಯ್ರ್ ಕರುನ್.
“ವಾರ್ ಕರ್, ವಾರ್....." ಬ್ರೆಂಡನಾಚಿ ಮೂಟ್ ಪರಾತ್ ಬಸ್ಲಿ ಮೊವಾಲ್ಯಾಚಾ ಕಾನ್ಪಟ್ಯಾರ್.
ಮೊವಾಲ್ಯಾಕ್ ಚಾರ್ ಸಂಸಾರ್ ದಿಸ್ಲೆ ಜಾಯ್ಜಯ್. ತೊ ಪಾಟಿಂ ಲಕ್ಲೊ. ಪುಣ್ ತಕ್ಷಣಾ ಆಪ್ಣಾಕ್ ಸಾಂಬಾಳುನ್ ಆಪ್ಲಿ ಬಳಾದಿಕ್ ಖೊಟ್ ತಾಣೆ ಮಾರ್ಲಿ. ಬ್ರೆಂಡನ್ ತ್ಯಾ ಮಾರಾಕ್ ಪಾಟಿಂ ಉಸಾಳ್ಳೊ. ಉರ್ಭಾ ಮೆಳ್ಲ್ಲೊ ಮೊವಾಲಿ ಉಡ್ಲೊ ಬ್ರೆಂಡನಾಚೆರ್. ಆನಿ ಆಪ್ಲೆಂ ಸರ್ವ್ ಬಳ್ ಘಾಲುನ್ ಬ್ರೆಂಡನಾಕ್ ಪಿಳಿಲಾಗ್ಲೊ.
ಬ್ರೆಂಡನ್ ಬಳ್ ಎಕ್ಟಾಂಯ್ ಕರುನ್ ಪಾಂಯ್ ಝಡ್ಪುನ್ ಮರ್ಲ್ಲ್ಯಾ ಎಕಾಚ್ ಜಟ್ಕ್ಯಾನ್ ಮೊವಾಲಿ ದೋನ್ ಫುಟಿಂ ವಯ್ರ್ ಉಸಾಳ್ಳೊ. ತ್ಯಾಚ್ಫಾರಾ ವಾಗ್ ಉಭೊ ಜಾಲ್ಲೆಪರಿಂ ಬ್ರೆಂಡನ್ ಉಭೊ ಜಾಲೊ. ಶಿರಾಂ ಶಿರಾಂನಿ ರಾಗಾಚೊ ಜೋಶ್ ಆಯಿಲ್ಯಾ ಬ್ರೆಂಡನಾಕ್ ಹಿ ಮಾರಾಮರಿ ಲಾಂಬಂವ್ಕ್ ಮನ್ ಜಾಲೆಂನಾ.
ಉಸಾಳ್ಲ್ಲ್ಯಾ ಮಾರಾಚಾ ದುಕಿಚಾ ಪಿಂರ್ಗವ್ಣೆಂತ್ ಪರಾತ್ ಲಕೊನ್ ಉಬೊ ಜಾಲ್ಲ್ಯಾ ಮೊವಾಲ್ಯಾಚಾ ಮುಸ್ಕಾರಾಚೆರ್, ಪಡ್ಲಿ ಮಾರೆಕಾರ್ ಆನ್ಯೆಕ್ ಖೊಟ್!! ಮೊವಾಲಿ ಮುಸ್ಕಾರ್ ಫುಟೊನ್ ವೊಣೊದಿಕ್ ಆಪ್ಟಾತಾನಾ, ವಾಂಚುನ್ ಉರ್ಲ್ಯಾರ್ ಬಿಕ್ ಮಾಗೊನ್ ಖಾತಾಂ ಮ್ಹಣ್ ಚಿಂತುನ್ ಧಾವೊಂಕ್ಲಾಗ್ಲೊ. ಪುಣ್ ಕೂಡ್ಲೆಚ್ ಬ್ರೆಂಡನಾನ್ ಪಾಟ್ಲ್ಯಾನ್ ಧಾಂವೊನ್ ತಾಚಾ ಶರ್ಟಾಕ್ ಧರುನ್ ವಮ್ತೊ ಘಾಲೊ!
“ಖಂಯ್ ಧಾಂವ್ತಾಯ್ ಬಿವ್ಕುರ್ಯಾ......? ಮ್ಹಜೆಂ ಮೊಡೆಂ ನಿದಾಯ್ತಾಂ ಮ್ಹಣೊನ್.....?" ಉತ್ರಾಂಸಂಗಿಂ ಬ್ರೆಂಡನಾನ್ ಮೊವಾಲ್ಯಾಚಾ ಪೆಂಕ್ಡಾಕ್ ಬಾಂದ್ಲ್ಲ್ಯಾ ಬೆಲ್ಟಾಭಿತರ್ ಹಾತ್ ಶಿರ್ಕಾವ್ನ್, ದುಸ್ರ್ಯಾ ಹಾತಾನ್ ಗೊಮ್ಟೆಕ್ ಧರುನ್ ವಯ್ರ್ ಉಕೊಲ್ಲೆಂ ಆನಿ ಧರ್ಣಿಕ್ ಆಪ್ಟಿಲೆಂ. ತಶೆಂಚ್ ಪರಾತ್ ದೊನ್ಯಿ ಹಾತಾಂನಿ ಉಕ್ಲುನ್, ಮುಕ್ಲ್ಯಾಚಾ ಪಾಟಿಖಣ್ಯಾಕ್ ಸರ್ವ್ ಬಳ್ ಘಾಲುನ್ ಆಪ್ಲ್ಯಾ ದೊಂಪ್ರಾ ಗಾಂಟಿರ್, ಧಾಡಾಯ್ತಾನಾ ತ್ಯೆ ವೊಣಿ ಭಿತರ್ ಏಕ್ ಭೀಕರ್ ಕಿಂಕ್ರಾಟ್ ಸಾದ್ಲಿ!!!
ತಾಚೆರ್ ಥುಕುನ್ ಬ್ರೆಂಡನ್ ಥಂಯ್ ಥಾವ್ನ್ ಮಯಾಗ್ ಜಾಲೊ!!!
ಘರಾ ಪಾವ್ಲ್ಲ್ಯಾ ಬ್ರೆಂಡನಾಕ್ ಪಳವ್ನ್, ಶಾರೊನ್ ರಡೊನ್ ಧಾಂವುನ್ ಯೇವ್ನ್ ಪಟ್ಲುನ್ ಧರಿಲಾಗ್ಲಿ. ಹೆಣೆ ಸಿಂಡ್ರೆಲ್ಲಾಯಿ ಯೇವ್ನ್ ವೆಂಗ್ಲೆಂ ಬಾಪಾಯ್ಕ್. ಥೊಡೊಸೊ ವೇಳ್ ದೊಗಾಂಯ್ಕಿ ಆರಾವ್ನ್ ಬ್ರೆಂಡನ್ ಆಪ್ಲಿ ಮತ್ ಹಾಳು ಜಾತಾಸರ್ ರಡಾಲಾಗ್ಲೊ.
ಉಪ್ರಾಂತ್ ಸವ್ಕಾಸ್ ವಿಂಗಡ್ ಜಾವ್ನ್ ನಾಂವ್ಕ್ ಗೆಲೊ. ಥೊಡ್ಯಾಚ್ ವೆಳಾನ್ ಭಾಯ್ರ್ ಆಯಿಲ್ಲ್ಯಾ ತಾಣೆ ಏಕ್ ನಿರ್ಧಾರ್ ಕರುನ್ ಜಾಲ್ಲೊ! ಸದಾಂಚೆಪರಿಂ ಮಾಗ್ಣೆಂ ಕರುನ್ ತೆಗಾಂಯ್ ಮಾಂದ್ರಿ ಸಡವ್ನ್ ಜೆಂವ್ಕ್ ಬಸ್ಲಿಂ.
“ಹಾಂವೆಂ ತುಮ್ಕಾಂ ಕಷ್ಟಾಂ ಶಿವಾಯ್ ಕಾಂಯ್ಚ್ ದೀಂವ್ಕ್ ನಾ......" ಬ್ರೆಂಡನ್ ಜೆವಾಣ್ ಸುರು ಕರ್ಚೆ ಆದಿಂ ಶಾರೊನಾಕ್ ಆನಿ ದುವೆಕ್ ಪಳವ್ನ್ ಉಲೈಲಾಗ್ಲೊ. ದೊಗಾಂಯ್ ತಾಕಾ ಪಳಂವ್ಕ್ ಪಡ್ಲಿಂ. “ಇತ್ಲಿ ಬರಿ ಜಿಣಿ ಆಮಿ ಜಿಯೆವ್ನ್ ಆಸ್ಲ್ಲ್ಯಾಂವ್ ಆನಿ ಹಾಂವ್ ಆಶೆಲ್ಲೊಂ ವಿಪ್ರೀತ್ ಗ್ರೇಸ್ತ್ ಕಾಯೆಕ್. ದೆವಾನ್ ಆಮ್ಕಾಂ ಜಾಯ್ ಪುರ್ತೆಂ ದಿಲ್ಲೆಂ ಆಸ್ತಾನಾ, ತಾಕಾ ಅರ್ಗಾಂ ದೀವ್ನ್ ಸಂತೊಸಾನ್ ಆಸ್ಚ್ಯಾ ಬದ್ಲಾಕ್ ಹಾಂವ್ ಆಬ್ಲೆಶಿಂ ಜಾಲ್ಲೊಂ. ಜೊತಿಷಾಚಾ ಬೊಲ್ಮ್ಯಾಕ್ ಪಾತ್ಯೆವ್ನ್ ದೆವಾಕ್ ಆಕ್ಮಾನ್ ಕರುನ್, ಮ್ಹಜೆಂ ನಶಿಬ್ ಪಾರ್ಕುಂಕ್, ಮ್ಹಜ್ಯಾ ಹಾತಾಚಾ ನಕ್ಷಾರ್ ಲಿಪೊನ್ ಆಸ್ಲ್ಲಿ ಆಪಾರ್ ಸಂಪತ್ತಿ ಆಪ್ಣಾವ್ನ್, ಬೆಬಿಕ್ ಆನಿ ತುಕಾ ರಾವ್ಳೆರಾಂತ್ ಚಡ್ ಸುಖಾಚೆಂ ಜೀವನ್ ಲಾಭಯ್ತಲೊ ಮ್ಹಳ್ಳೆಂ ಚಿಂತುನ್, ಆಸ್ಲ್ಲೆಂ ದಾನ್ ಕರುನ್, ಆಪ್ಲ್ಯಾಚ್ ಹಾತಾಂನಿಂ ಆಪ್ಲ್ಯೊ ಸರ್ವ್ ಖುಶಿಯೊ ಆನಿ ಸಂತೊಸ್ ಹುಲ್ಪಾವ್ನ್, ಮ್ಹಜಾ ಪಪ್ಪಾನ್ ಕರ್ನ್ ದವರ್ಲ್ಲೆಂ ಅಪುರ್ಬಾಯೆಚೆಂ ಘರ್, ಕಾರ್ ಸಗ್ಳೆಂ ತ್ಯಾಗ್ಸುನ್ ತುಮ್ಕಾಂ ಹ್ಯಾ ಯೆಮ್ಕೊಂಡಾತ್ ಹಾಡುನ್, ಸರ್ಗಾಚಿ ವಾಟ್....., ತ್ಯಾ ಸಾಧ್ಯ್ ನಾತ್ಲ್ಲ್ಯಾ ಆಪಾರ್ ಗ್ರೇಸ್ತ್ ಕಾಯೆಕ್ ರಾಕೊನ್ ರಾವ್ಲೊಂ ಹಾಂವ್......"
“ಪುಣ್ ತುಮಿ ಕೆದಳಾಚ್ ಅಶೆಂ ಹಾಂವೆಂ ಕಿತ್ಯಾಕ್ ಕೆಲೆಂ.....? ಆಸ್ಲ್ಲೆಂ ಆಪುರ್ಬಾಯೆಚೆಂ ಘರ್ ಸೊಡುನ್ ಹ್ಯಾ ಗಲಿಜಾಯೆಂತ್ ಕಿತ್ಯಾಕ್ ಹಾಡ್ಲೆಂ.....? ಬೆಬಿಚಿ ಕಾಲೆಜ್ ಕಿತ್ಯಾಕ್ ಬದ್ಲಿಲಿ.....? ಚಡ್ ಸುಖ್ ದಿತಾಂ ಮ್ಹಣ್ ಬಾಸಾವ್ನ್, ಖಂಚಾ ಪಾತ್ಕಾಚೆಂ ಪ್ರಾಜಿತ್ ಜಾವ್ನ್ ಹ್ಯಾ ಜೊಪ್ಡಾಂತ್ ಹಾಡುನ್ ಕಷ್ಟಿಲೆಂ.....?, ಹೆಂ ಕಸಲೆಂಚ್ ತುಮಿ ವಿಚಾರುಂಕ್ನಾ ಆನಿ ಹಾಂವೆಂ ಜಾವ್ನ್ಯಿ ಸಾಂಗೊಂಕ್ನಾ. ರಾಕೊನ್ ರಾವ್ಲೊಂ ವ್ಹಡಾ ಪಾತ್ಯೆಣೆನ್ ಆನಿ ಪಿಶ್ಯಾಬುದಿಚೆ ಆಶೆನ್ ತ್ಯಾ ಪಟ್ಕಿರ್ಯಾ ಜೊತಿಷ್ಯಾಚಾ ಬೊಲ್ಮ್ಯಾಕ್ ಸತಾ ರುಪಾರ್ ಪಳಂವ್ಕ್......."
“ಆನಿ ಸಾಧ್ಯ್ನಾ, ಹಾಂವ್ ಸಲ್ವಾಲಾಂ. ಆಜ್ ಬೆಬಿ ಥಾವ್ನ್ ತುಮಿ ಭಗೊನ್ ಆಸ್ಲ್ಲಿ ನಾಲಿಸಾಯ್ ಆಯ್ಕೊನ್ ಆನಿ ತ್ಯಾ ಮೊವಾಲ್ಯಾನ್ ಮ್ಹಜ್ಯಾ ಫುಲಾ ಸಾರ್ಕ್ಯಾ ಬೆಬಿಚೆರ್ ಕೆಲ್ಲೊ ಅತ್ತ್ಯಾಚಾರ್ ಪಳವ್ನ್ ಹಾಂವ್ ತುಟ್ಲೊಂ. ಆನಿ ಜಿವಾಪ್ರಾಸ್ ಮೊಗಾಚಾ ತುಜೆರ್ಯಿ, ತುಂವೆಂ ಭಾಯ್ರ್ ವೆತಾನಾ ತಾಣಿ ದಿಂವ್ಚೆ ಉಪಾದ್ರ್ ಆಯ್ಕೊನ್, ಹಾಂವ್ ಎಕಾ ನಿರ್ಧಾರಾ ಪಾವ್ಲಾಂ....." ಉತ್ರಾಂ ಸಂಗಿಂ ಬ್ರೆಂಡನಾನ್ ತ್ಯಾ ಮೊವಲ್ಯಾಕ್ ಮಾರುನ್ ಆಯ್ಲ್ಯಾ ಉಪ್ರಾಂತ್ ಆಂಗ್ಡಿಕ್ ವಚೊನ್ ಹಾಡ್ಲ್ಲಿ ವಿಕಾಚಿ ಸಿಸ್ಲಿ ಬೊಲ್ಸಾಂತ್ಲಿ ಕಾಡುನ್ ಮುಖಾರ್ ದವರ್ಲಿ.
ಸಿಂಡ್ರೆಲ್ಲಾ ಆನಿ ಶಾರೊನ್ ಎಕಾಮೆಕಾಚಾ ತೊಂಡಾಕ್ ಪಳಂವ್ಕ್ ಪಡ್ಲಿಂ. ತಾಂಕಾಂ ಸಮ್ಜಾಲ್ಲೊ ಬ್ರೆಂಡನಾನ್ ಕೆಲ್ಲೊ ನಿರ್ಧಾರ್!!! ತಾಂಚಾ ತೊಂಡಾರ್ ಕಸಲ್ಲಿಚ್ ಬಿರಾಂತ್ ವ ಬ್ರೆಂಡನಾಚೆರ್ ದುರ್ಸೊಣೆ ನಾತ್ಲ್ಲೆಂ.
ಶಾರೊನಾನ್ ಸಿಂಡ್ರೆಲ್ಲಾಕ್ ಪಳವ್ನ್ ದೀಷ್ಟ್ ಪಂದಾ ವೆಲಿ. ದುಸ್ರ್ಯಾ ಘಡ್ಯೆ ಸಿಂಡ್ರೆಲ್ಲಾ ಉಟೊನ್ ದಾರಾಚಿ ಖಿಳ್ ಘಾಲುನ್ ಆಯ್ಲೆಂ.
ಬ್ರೆಂಡನಾನ್ ವಿಕಾಚಿ ಸಿಸ್ಲಿ ಉಘಡ್ಲಿ. ಶಾರೊನಾನ್ ತಿ ಘೆವ್ನ್ ರಾಂದ್ಲ್ಲ್ಯಾ ಜೆವ್ಣಾಚಾ ಹಾಂಡಿಯೆಕ್ ಬರ್ಶಿಲಿ. ತೆಗಾಂಯ್ ಎಕಮೆಕಾಕ್ ಥೊಡೊ ವೇಳ್ ಪಳಂವ್ಕ್ ಪಡ್ಲಿಂ. ತೆಗಾಂಯ್ಚ್ಯಾ ತೊಂಡಾರ್ ತ್ಯಾ ಕಷ್ಟಾಂ ಥಾವ್ನ್ ಮುಖ್ತಿ ಮೆಳ್ಚೊ ಹಾಸೊ ಉದೆವ್ನ್ ಮಾಯಾಗ್ ಜಾಲೊ.
ಶಾರೊನಾನ್ ಹಾಂಡಿಯೆಂತ್ಲಿ ಉಂಡಿ ಕಾಡುನ್ ಬ್ರೆಂಡನಾಚಾ ತೊಂಡಾಕ್ ದಿಲಿ, ಬ್ರೆಂಡನಾನ್ ತಿ ಸಂತೊಸಾನ್ ಖೆಲಿ. ತಶೆಂಚ್ ಬ್ರೆಂಡನಾನ್ಯಿ ಏಕ್ ಉಂಡಿ ಕಾಡುನ್ ಶಾರೊನಾಚಾ ತೊಂಡಾಕ್ ದಿಲಿ. ಶಾರೊನಾನ್ ಬ್ರೆಂಡನಾಚಾ ದೊಳ್ಯಾಂನಿ ಪಳವ್ನ್ ತಿ ಉಂಡಿ ಗಿಳ್ಳಿ. ಆತಾಂ ದೊಗಾಯ್ನಿ ಮೆಳುನ್ ಸಿಂಡ್ರೆಲ್ಲಾಚಾ ತೊಂಡಾಕ್ ದಿಲಿ.......
ಸಿಂಡ್ರೆಲ್ಲಾನ್ ಆಪ್ಲ್ಯಾ ದೊನ್ಯಿ ಹಾತಾಂನಿ ಬಾಪಾಯ್ಚೊ ಆನಿ ಆವಯ್ಚೊ ಹಾತ್ ಉಕ್ಲೊನ್ ಉಮ್ಹೊ ಘೆತ್ಲೊ. ದುಸ್ರ್ಯಾ ಘಡ್ಯೆ ತಾಣಿ ಮುಖಾರ್ ಹಾಡ್ಲ್ಲೆ ಹಾತ್ ಧರುನ್ ಆಪ್ಲ್ಯಾ ತೊಂಡಾಲಾಗಿಂ ವರುನ್ ತ್ಯಾ ಹಾತಾಂನಿ ಆಸ್ಲ್ಲೆಂ ಖೆಲೆಂ.......
ಆತಾಂ ತೆಗಾಂಯ್ನಿ ಎಕಾಮೆಕಾ ವೆಡ್ಕೊಳ್ ಮಾರ್ಲೊ.............!!!!!!!!!!!!
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
