ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಮಟ್ವಿಕಾಣಿ: ತೊ ಏಕ್ ಮೌನ್ ಆವಾಜ್
ಕ್ಲೆರೆನ್ಸ್ ಪಿಂಟೊ, ಕೈಕಂಬ: ಕೊಂಕ್ಣಿ ಮಟ್ವ್ಯಾ ಕಾಣ್ಯಾಂಚಾ ಸಂಸಾರಾಂತ್ ಹೆಂ ನಾಂವ್ ಥಿರ್ ಆನಿ ಅಥ್ವೆಂಚ್. ಅಪುರ್ಭಾಯೆಚಿ ಕಥಾ, ವಿಭಿನ್ನ್ ರಿತಿನ್ ನಿರೂಪಣ್ ಕರ್ಚಾಂತ್ ಮಾತ್ರ್ ನ್ಹಂಯ್, ವಾಚ್ಪ್ಯಾಕ್ ತಿ ಕಾಣಿ ಸಂಪ್ತಾಪರ್ಯಾಂತ್ ಭಾಂದುನ್ ದವರ್ಚಿ ಕಲಾ ಆಸ್ಚಾ ಭೋವ್ ಥೊಡ್ಯಾಂ ಪಯ್ಕಿ ಉಟೊನ್ ದಿಸ್ಚೊ ಕಾಣ್ಯೆಗಾರ್ ಹೊ ಜಾವ್ನಾಸಾ. ಅಪುಟ್ ಕೊಂಕ್ಣಿ ಭಾಸ್ ಆನಿ ವಾಚ್ಪ್ಯಾಕ್ ವೆಗ್ಳ್ಯಾಚ್ ಸಂಸಾರಾಕ್ ವರುನ್ ವೆಚಿ ಹಾಚಾ ಕಾಣ್ಯಾಂಚಿ ವಿಶೇಷತಾ. ಹಾಚಾ ಮಟ್ವ್ಯಾ ಕಾಣ್ಯಾಂಚೊ ಬೂಕ್ ’ಸುಟ್ಕಾ’ ಪರ್ಗಟ್ ಜಾಲಾ ತರ್ಯ್ ಅಡೇಯ್ಶಾಂ ವಯ್ರ್ ಮಟ್ವ್ಯೊ ಕಾಣ್ಯೊ ಹಾಣೆಂ ಎದೊಳ್ಚ್ ಬರಯ್ಲ್ಯಾತ್. ವೆಬ್ಸಾಯ್ಟಾಂಚೆರ್ ಸುರ್ವಾತ್ ಕೆಲ್ಲೆಂ ಪಯ್ಲೆಂ ಮಟ್ವ್ಯಾ ಕಾಣ್ಯಾಂಚೆಂ ಅಂಕಣ್ ’ಕಥಾಮೃತ್’ ಹಾಣೆಂಚ್ ಸುರ್ವಾತ್ ಕೆಲ್ಲೆಂ ಜಾವ್ನಾಸಾ. [’ಸುಟ್ಕಾ’ ಬುಕಾಂತ್ ಪರ್ಗಟ್ ಜಾಲ್ಲಿ ಮಟ್ವಿ ಕಾಣಿ]
ಕಾಣ್ಯೊ: ದೆವಾನ್ ವಿಸರ್ಲೆಲಿಂ ಭುರ್ಗಿಂ, ಧುಳ್ ತಿ ಧುಳ್ಚ್ಚ್, ಯಜ್ನ್, ಏಕ್ ಕುಡ್ಕೊ ಪಿಜ಼್ಜಾ, ಖೊವ್ಳಾಂ, ಮರುಭುಂಯ್ಂತ್ಲೆಂ ವಾದಾಳ್, ಮರಿ ಘರಾ ಆಯ್ಲಿ, ತುಜೆಂ ಜಿಣೆಂ ಮ್ಹಜೆಂ ನ್ಹಯ್, ಸಾತ್ವ್ಯಾ ಸಾಕ್ರಾಮೆಂತಾಚೊ ಸಾಕ್ರಿಫಿಸ್.
ಕ್ಲೆರೆನ್ಸ್, ಕೈಕಂಬ
ವ್ಹಾಜಾನಿಂ ಬಾವೊನ್ ಗೆಲ್ಲೆ ಗುಲೊಬ್, ಝಡಾಂಚ್ಯಾ ಮುಳಾಂನಿ ಉಡವ್ನ್, ಪುಲ್ಲ್ಲೆ ತಾಂಬ್ಡೆ, ಧವೆ ಗುಲೊಬ್ ಹಾಂವೆಂ ಖುಂಟ್ಲೆ. ದೋನಿಂ ವ್ಹಾಜಾನಿಂ ತೆ ಬರೆ ಕರ್ನ್ ಮಾಂಡುನ್ ದವರ್ನ್, ಪಾರ್ಲರಾಚ್ಯಾ ಕುಶಿನ್ ಮೆಟಾಂ ಕಾಡ್ತಾನಾ ಸಿಸ್ಟರ್ ಗ್ರೇಸಿನ್ ಉಲೊ ಕೆಲ್ಲೆಂ ಆಯ್ಕೊನ್ ಘುಂವ್ಲಿಂ.
"ತುಕಾ ಮದರ್ ಸುಪೀರಿಯರ್ ಆತಾಂಚ್ಚ್ ಆಪಯ್ತಾ...". ಸರಾರಾಂ ಮೆಟಾಂ ಕಾಡುನ್ ಮ್ಹಜ್ಯಾ ಕುಸಿನ್ ಯೆಂವ್ಚ್ಯಾ ತಿಣೆ ಚಿಕ್ಕೆ ಕಠಿಣಾಯೆನ್ ಮ್ಹಳೆಂ.
ಹಾಂವ್ ಎಕಾ ಘಡಿಯೆಕ್ ಘಾಬ್ರೆವ್ನ್ ಗೆಲಿಂ. ಕಿತ್ಯಾಕ್ಗೀ ಹಾಂವ್ ನೆಣಾಂ, ಕಾಳ್ಜಾಂತ್ ಭ್ಯೆಂ ಭರೊನ್ ಗೆಲೆಂ.
"ಕಿತ್ಯಾಕ್ ಸಿಸ್ಟರ್ ಗ್ರೇಸಿ?" ಹಾವೆಂ ಕಾಂಪ್ಚ್ಯಾ ತಾಳ್ಯಾನ್ ವಿಚಾರ್ಲೆಂ.
"ತುವೆಂ ಕೆಲ್ಲ್ಯಾ ಕರ್ಮಾಕ್..." ಸಿಸ್ಟರ್ ಗ್ರೇಸಿ ಪರತ್ ಎಕ್ ಪಾವ್ಟಿಂ ಖೆಂವ್ಚಾಲಿ ಆನಿ ಮ್ಹಜ್ಯಾ ಹಾತಾಂನಿ ಆಸ್ಲ್ಲಿಂ ವ್ಹಾಜಾಂ ಭಳಾನ್ ವೊಡುನ್ ಘೆತ್ಲಿಂ. ತಸೆಂ ಕರ್ತಾನಾ, ಏಕ್ ವ್ಹಾಜ್ ನಿಸ್ರೊನ್ ಸಕಯ್ಲ್ ಪಡ್ಲೆಂ. ಮಾತ್ಯೆಚೆಂ ವ್ಹಾಜ್ ತೆಂ ನ್ಹಯ್ ಜಾಲ್ಲ್ಯಾನ್ ಪುಟ್ಲೆಂ ನಾ ಬಗಾರ್ ನಾಜೂಕಾಯೆನ್ ಮಾಂಡುನ್ ದವರ್ಲ್ಲೆ ತಾಂತ್ಲೆ ಗುಲೊಬ್ ಧರ್ಣಿಚೆರ್ ಫಾಸ್ಳೊನ್ ಪಡ್ಲೆ.
ಹಾಂವ್ ತಿಕಾಚ್ಚ್ ಪಳಂವ್ಕ್ ಪದ್ಲಿಂ. ಹಾಚ್ಯಾ ಆದಿಂ ಅಶೆಂ ತಿಣೆಂ ಕೆದಾಳಾಯ್ ಕೆಲ್ಲೆಂ ನಾ. ತರ್ ಆಜ್ ಕಿತ್ಯಾಕ್ ಅಸಲೊ ಮನೋಭಾವ್? ಅಮ್ಸೊರಾನ್ ತಿ ವ್ಹಾಜಾಂತ್ಲೆಂ ಗುಲೊಬ್ ಪರತ್ ಮಾಂಡುನ್ ದವರುಂಚೆಂ ಪ್ರೇತನ್ ಕರ್ತಾಲಿ. ಪುಣ್ ತ್ಯಾ ಫುಲಾಂ ಭರ್ಲ್ಲ್ಯಾ ವ್ಹಾಜಾಕ್ ಪರತ್ ಏಕ್ ಪಾವ್ಟಿಂ ತಿ ಸೊಭಾಯ್ ಆಯ್ಲಿ ನಾ.
ವ್ಹಾಜಾಂ ಹಾತಿಂ ಘೆವ್ನ್ ಸಿಸ್ಟರ್ ಗ್ರೇಸಿ ಪಾರ್ಲರಾ ಕುಸಿನ್ ಚಲ್ತಾನಾ ಮ್ಹಜೆಂ ಕಾಳಿಜ್ ದಾಟಾಯೆನ್ ಕಾಂಪೊಂಕ್ ಲಾಗ್ಲೆಂ. ಅಚಾನಕ್ ತೆಂಯೀ ಸಕಾಳಿಂ ಫುಡೆಂಚ್ಚ್ ಸುಪೀರಿಯರಾನ್ ಅಶೆಂ ಅಪಂವ್ಕ್ ದಾಡ್ಚೆಂ ಕಿತೆಂಯ್ ಚಡ್ ಉಣೆಂ ಜಾಲ್ಯಾರ್ ಮಾತ್ ಶಿವಾಯ್ ನಾ ತರ್ ಕೆದ್ನಾಂಯ್ ಆಪಂವ್ಕ್ ಧಾಡಿನಾ ಮ್ಹಣ್ಯೆತ್. ಕಿತ್ಯಾಕ್ ತಿಣೆ ಆಪಂವ್ಕ್ ಧಾಡ್ಲಾಂ? ಮತಿಂತ್ ಪರತ್ ಆನಿಂ ಪರತ್ ಸವಾಲಾಂ ಉದೆಲಿಂ. ಜವಾಬ್ ಸೊಧುಂಕ್ ಮತ್ ಉರ್ಡಾಲಿ ಪುಣ್ ಮ್ಹಾಕಾ ಬಿಲ್ಕುಲ್ ಸಾಧ್ಯ್ ಜಾಲೆಂ ನಾ.
ಭಿಯಾಚಿಂ ಸವ್ಕಾಸ್ ಮೆಟಾಂ ಕಾಡುನ್ ಹಾಂವ್ ಸುಪೀರಿಯರಾಚ್ಯಾ ಕುಡಾಲಾಗಿಂ ಪಾವ್ಲಿಂ. ಕುಡಾಚೆಂ ಬಾಗಿಲ್ ಉಗ್ತೆಂಚ್ಚ್ ಆಸ್ಲ್ಲೆಂ. ಹಾವೆಂ ಭಾಯ್ರ್ ಥಾವ್ನ್ಂಚ್ಚ್ ತಿಳುನ್ ಪಳಯ್ಲೆಂ. ತಿ ಕಿತೆಂಗೀ ಗುಂಡಾಯೆನ್ ಚಿಂತುನ್ ಬಸ್ಲ್ಲಿ.
ಹಾಂವ್ ಭಿತರ್ ಗೆಲಿಂ.
ಮ್ಹಜ್ಯಾ ಮೆಟಾಂಚ್ಯಾ ಆವಾಜಾಕ್ ತಿಣೆಂ ತಕ್ಲಿ ಉಕಲ್ಲಿ.
"ತುವೆಂ ಪಾತಾಕ್ ಆಧಾರ್ಲಾಂಯ್ ಸಿಸ್ಟರ್ ಲಿನೆಟ್... ಮನ್ಶಾಂಕ್ ಲಜೆಕ್ ಘಾಲ್ಚೆಂ ಕಠಿಣಾಯೆಚೆಂ ಪಾತಾಕ್...." ತಿಚೊ ತಾಳೊ ಘಡ್ಘಡ್ಯಾ ಭಾಶೆನ್ ಉಂಚಾಬಳಾಯೆನ್ ಭರೊನ್ ಕುಡಾಚ್ಯಾ ಚಾರ್ ವೊಣದಿಂಕ್ ಆಪ್ಟಾಲೊ.
ಮ್ಹಜಿ ಮತ್ ಶಿರ್ಶಿಲ್ಲಿ. ಕಾಳಿಜ್ ಭರಾನ್ ಆವಾಜೊಂಕ್ ಲಾಗ್ಲೆಂ. ಜೀವ್ ಕಾಂಪೊನ್ ಗೆಲೊ." ಹಾವೆಂ ಕಿತೆಂ ಕೆಲಾಂ......? ಹಾವೆಂ ಕಿತೆಂ ಕೆಲಾಂ ಮದರ್ ಸುಪೀರಿಯರ್....??" ಮ್ಹಜೊ ತಾಳೊ ಕಠಿಣಾಯೆನ್ ಕಾಂಪ್ತಾಲೊ.
"ತುವೆಂ ಕಿತೆಂ ಕೆಲಾಂಯ್ ಮ್ಹಣೊನ್ ಉಚಾರುನ್ ಹಿ ಮ್ಹಜಿ ಭಾಗೆವಂತ್ ಜೀಬ್ ಹಾಂವ್ ಪಾಡ್ ಕರಿನಾ..." ತಿಚೊ ತಾಳೊ ವ್ಯಂಗ್ಯ್ಪಣಾನ್ ಭರೊನ್ ಗೆಲ್ಲೊ. " ಸಾಂಗಾತಾಚ್ಚ್ ಉದಾಸಾಂತ್ ದವರ್ ಹ್ಯಾ ಕೊನ್ವೆಂಟಾಚಿ ಮರ್ಯಾದ್ ಧಾ ಜಣ್ ಚಲ್ಚ್ಯಾ ಧುಳಿಂತ್ ಭರ್ಸೊನ್, ನಿಸ್ಸಂತಾನ್ ಕರುಂಕ್ಯೀ ಹಾಂವ್ ಸೊಡಿಶಿಂನಾ.... ಆತಾಂ ಸಾಂಗ್ ತುಜ್ಯಾ ಪೊಟಾಚೊ ಆಕಾರ್ ಅಸೊ ಕಿತ್ಯಾಕ್ ಬದಲ್ಲಾ? ಸಕಾಳಿಂ ಉಟ್ತಾನಾಂಚ್ಚ್ ತುಕಾ ವೋಂಕ್ ಕಿತೆಂ? ಹರ್ಯೇಕ್ ದೀಸ್ ತುಂ ನಿಸ್ತೇಜ್ ಆಸ್ತಾಯ್ ಕಿತ್ಯಾಕ್...?"
ಹಾಂವ್ ಪರತ್ ಘಾಭ್ರೆಲಿಂ. ಪಾತ್ಲ್ಯಾ ಥೊಡ್ಯಾ ದೀಸಾಂನಿ ಮ್ಹಜ್ಯಾ ಥೈಂ ಬದ್ಲಾವಣ್ ಜಾಲ್ಲಿ ವ್ಹಯ್..!. ಮ್ಹಜ್ಯಾ ಪೊಟಾಚೊ ಆಕಾರ್ ಬದಲ್ಲ್ಲ್ಲೊಯೀ ವ್ಹಯ್! ಪೋಟ್ ಸುಜ್ಲ್ಲ್ಯಾಬರಿ ಜಾಲ್ಲೆಂಯ್ ವ್ಹಯ್.... ಥೊಡ್ಯಾ ದೀಸಾಂ ಥಾವ್ನ್ ಮ್ಹಾಕಾ ಕಟಿಣ್ ವೋಂಕ್ ಆಸ್ಲ್ಲಿಯ್ ವ್ಹಯ್... ಆನಿಂ ತ್ಯಾ ಶಿವಾಯ್, ಸ್ತ್ರಿಯೆಕ್ ಜಾಯ್ಜಯ್ ಆಸ್ಲ್ಲೆಂ ನೈಸರ್ಗಿಕ್ ಸಂಯ್ಭಾಚೆಂ ಮ್ಹಹಿನ್ಯಾಚೆಂ ಜಾಂವ್ಕ್ ನಾತ್ಲ್ಲೆಂಯ್ ವ್ಹಯ್... ಹೆಂ ಸರ್ವ್ ಕಿತ್ಯಾಕ್ ಮ್ಹಜಾ ಥೈಂ ಘಡ್ತಾ ತೆಂ ಮಾತ್ ಮ್ಹಾಕಾ ಕಳಿತ್ ನಾತ್ಲ್ಲೆಂ. ದಾಕ್ತೆರಾ ಸರ್ಸಿನ್ ಹಾಂವ್ ಗೆಲ್ಲಿಂ ನಾ. ತಸೆಂ ಮ್ಹಣ್ಚ್ಯಾಕೀ ದಾಕ್ತೆರಾ ಸರ್ಸಿನ್ ಕೋಣೆಂಯ್ ವೆಲ್ಲೆಂಯೀ ನಾ.
"ಮದರ್ ಸುಪೀರಿಯರ್...." ಮ್ಹಜೊ ತಾಳೊ ಕಾಂಪ್ತಾಲೊ ಆನಿಂ ದುಖಾನ್ ಭರೊನ್ ಯೆತಾಲೊ." ಹೆಂ ಸರ್ವ್ ಮ್ಹಜ್ಯಾ ಥೈಂ ಕಿತ್ಯಾಕ್ ಘಡ್ಲಾಂ ತೆಂ ಹಾಂವ್ ಭಿಲ್ಕುಲ್ ನೆಣಾಂ..... ಮ್ಹಜ್ಯಾ ಆಂತಸ್ಕರ್ನಾಚಿ ಸಾಕ್ಸ್ ಜಾವ್ನ್ ಹಾಂವ್ ಹೆಂ ಸಾಂಗ್ತಾಂ... ಹಾವೆಂ ಕಸಲೆಂಚ್ಚ್ ಪಾಪ್ ಆಧಾರುಂಕ್ ನಾ... ಮ್ಹಜೆರ್ ದುಭಾವ್ ಕರಿನಾಕಾತ್...."
ಮದರ್ ಸುಪೀರಿಯರ್ ಎಕ್ ಪಾವ್ಟಿಂ ಹಾಸ್ಲಿ. ತಿಚೊ ಕತಿಣಾಯೆಚೊ ವಿಕಾಳ್ ಹಾಸೊ ಮ್ಹಜಾ ಕಾಳ್ಜಾಕ್ ಪರತ್ ಎಕ್ ಪಾವ್ಟಿಂ ಭೆಸಾಂ ಕರಿಲಾಗ್ಲೊ." ದುಬಾವ್ ಹೊ ಭಿಲ್ಕುಲ್ ನ್ಹಂಯ್ ಲಿನೆಟ್...ಬಗಾರ್ ಘಡೊನ್ ಗೆಲ್ಲೆಂ ಕಸೆಂಗೀ ಮ್ಹಣ್ ಸಮ್ಜೊನ್ ಕಾಣ್ಘೆಂವ್ಚೆಂ ಪ್ರೇತನ್. ಹಾಂವ್ ತುಜಿ ವ್ಹಡಿಲ್ನ್ ಆನಿಂ ತುಜೆಂ ಥೈಂ ಕಿತೆಂ ತರೀ ಚಡುಣೆಂ ಜಾಲಾಂ ತೆಂ ಹಾಂವ್ ಜಾಣಾ.... ತುವೆಂ ಫಿರ್ಗಜೆಚ್ಯಾ ತರ್ನಾತ್ಯಾಂ ಸಾಂಗಾತಾ ತಿತ್ಲ್ಯಾ ಸಳಾವಳೆನ್ ಭರ್ಸೊಂಕ್ ನ್ಹಜೊ ಮ್ಹಣ್ ಕಿತ್ಲ್ಯಾ ಪಾವ್ಟಿಂ ತುಕಾ ಸಾಂಗ್ಲ್ಲೆಂ? ತುಂ ಮ್ಹಜೆಂ ಉತಾರ್ ಆಯ್ಕಾಲ್ಲೆಂಯ್? ಮನ್ಶಾಚಿ ಮನ್ ಘಟ್ ತರೀ ಕೂಡ್ ಅಸ್ಕತ್.... ಆಮ್ಕಾಂ ಮ್ಹಾತಾಅರ್ಯಾಂಕ್, ಆಮ್ಚಿ ಕಾಲೆತಿ ಸರ್ವ್ ಸುಕೊನ್ ಗೆಲ್ಲ್ಯಾಂಕ್ ಥೊಡ್ಯಾ ಪಾವ್ಟಿಂ ತಸಲಿ ತಾಳ್ಣಿ ಯೆತಾ ತರ್ ತುಜ್ಯಾ ತಸಲ್ಯಾ ತರ್ನ್ಯಾ ಚಲಿಯೆಕ್..."
"ಚಲ್ಯಾಂಲಾಗಿಂ ಉಲಯಿಲ್ಲ್ಯಾ ಫರಾ ಹಾವೆಂ ಮ್ಹಜೆಂ ಆಂಕ್ವಾರ್ಪಣ್ ಪಿಟೊ ಕರ್ನ್ ವಿಭಾಡ್ಲೆಂ ಮ್ಹಣ್ ತುಮಿಂ ಚಿಂತ್ಚೆಂಗೀ ಮದರ್?" ಮ್ಹಜ್ಯಾ ತಾಳ್ಯಾಂತ್ ತೀಕ್ಷ್ಣ್ಪಣ್ ಬಿಲ್ಕುಲ್ ನಾತ್ಲ್ಲೆಂ ಪುಣ್ ಮತಿಂತ್ ಆಸ್ಲ್ಲಿಂ ಚಿಂತ್ನಾಂ ತಿಕಾ ಸಾಂಗೊಂಕ್ ಹಾಂವ್ ಪಾಟಿಂ ಸರ್ಲಿಂ ನಾ.
"ಬಿಲ್ಕುಲ್ ನಾ" ತಿಚೊ ತಾಳೊ ಆನಿಕೀ ಚಡ್ ವ್ಯಂಗ್ಯ್ ಜಾವ್ನ್ ಮ್ಹಾಕಾ ಚಡ್ ಜಾವ್ನ್ ಖೊಂಕುಂಕ್ ಲಾಗ್ಲೊ." ಪುಣ್ ಉಡಾಸ್ ದವರ್ ತುಜಿ ಚಾಲ್ ಹಾವೆಂಚ್ಚ್ ನ್ಹಯ್ ಆಮ್ಚ್ಯಾ ಭಂವಾರಿಂಚ್ಯಾ ಲೊಕಾನ್ ದೆಖ್ಲ್ಯಾ. ಲೋಕ್ ಹಾಸ್ತಾ.... ಖೆಳ್ಕುಳಾಂ ಕರ್ತಾ.... ಅನಿಂ ಮ್ಹಜ್ಯಾ ಲಾಗಿಂ ತರ್ಕ್ ಕರಿನಾಕಾ.... ವ್ಹಾರೆಂ ಪುಂಕ್ಲ್ಯಾ ಶಿವಾಯ್ ಭುರ್ಗ್ಯಾಂನಿ ಖೆಳ್ಚೊ ತೊ ಪೊಸ್ಕಾಟೊ ಫುಗೊಂಕ್ ಸಕ್ತಾ?"
ಆಮ್ಚೆಂ ಸಂಭಾಷಣ್ ತಿತ್ಲ್ಯಾರ್ ರಾವ್ಲೆಂ.
ಹಾಂವ್ ತಿಚ್ಯಾ ಮುಕಾರ್ ರಡ್ಲಿಂ. ರಡ್ಣ್ಯಾನ್ ತರೀ ತಿ ಮ್ಹಜ್ಯಾ ಕಾಳ್ಜಾಂತ್ ಲಿಪೊನ್ ಆಸ್ಚ್ಯಾ ಸತಾಕ್ ತಿಕಾ ಅರ್ಥ್ ಕರುಂಕ್ ಜಾತೆಲೆಂ ಮ್ಹಣ್ ಹಾವೆಂ ಚಿಂತ್ಲೆಂ.
ಪುಣ್ ಮದರ್ ಸುಪೀರಿಯರಾಚ್ಯಾ ಕಾಳ್ಜಾಕ್ ಮ್ಹಜ್ಯಾ ರಡ್ಣ್ಯಾಚೆ ಕಳ್ವಳೆ ಕಡಂವ್ಕ್ ಬಿಲ್ಕುಲ್ ಸಕ್ಲೆನಾಂತ್.
ತಿಕಾ ಮ್ಹಜೆರ್ ಭರ್ವಾಸೊ ನಾತ್ಲ್ಲೊ? ಹಾಂವ್ ಫಿರ್ಗಜೆಚ್ಯಾ ತರ್ನಾಟ್ಯಾ, ಚೆಡ್ವಾಂ ಆನಿ ಚೆಡ್ಯಾಂ ಸವೆಂ ಭರ್ಸಲ್ಲ್ಯಾ ವೊರ್ವಿಂ ಕಿತೆಂ ಪಾತಕ್ ಘಡ್ತಾ? ಹಾವೆಂ ಕಿತೆಂಚ್ಚ್ ಪಾತಕ್ ಕರುಂಕ್ ನಾ ಮ್ಹಣ್ ಮ್ಹಾಕಾ ಕಳಿತ್ ಆಸ್ಲ್ಲೆಂ ತರ್ ಹಾಂಕಾ ಸರ್ವಾಂಕ್ ಹಾಂವೆ ಕಸೆಂ ಸಾಂಗ್ಚೆಂ? ಮ್ಹಜ್ಯಾ ಜೀವಾಚ್ಯಾ ಕಾಲೆತಿಚೆರ್ ಹಾಂವ್ ಜಾಣಾ, ಮ್ಹಜ್ಯಾ ಥೈಂ ಕಿತೆಂಚ್ಚ್ ನಾ ಮ್ಹಣ್.. ಪುಣ್ ಹಾಂಕಾ ಕಸೆಂ ಸಾಂಗ್ಚೆಂ?
ಮ್ಹಜೆಂ ಪೋಟ್ ಉಬಾರ್ ಜಾವ್ನ್ ವಯ್ರ್ ಯೆತಾ ತೆಂ ಖರೆಂ.. ಥೊಡ್ಯಾ ಪಾವ್ಟಿಂ ಕಠಿಣಾಯೆಚಿ ವೋಂಕ್ ಆಸ್ಲ್ಲಿ.... ಪುಣ್ ಕಸೆಂ.. ಹಾಂವ್ಂಚ್ಚ್ ನೆಣಾ ...
"ತುಜ್ಯಾ ಪಪ್ಪಾಕ್ ಹಾವೆಂ ಕಾಗಾತ್ ಬರಯ್ಲಾಂ .." ಥೊಡ್ಯಾ ವೇಳಾಚ್ಯಾ ಮೌನ್ಪಣಾ ಉಪ್ರಾಂತ್ ಮದರ್ ಸುಪಿರೀಯರ್ ಪರತ್ ಉಲಯ್ಲಿ." ವಿಷಯ್ ಸರ್ವ್ ಬರೊ ಕರ್ನ್ ತಿಳ್ಸಿಲಾ... ಆನಿ ತುಕಾ ಹಾಂಗಾ ಥಾವ್ನ್ ವೊರ್ನ್ ವಚೊಂಕ್ ಹಾವೆಂ ತಿಳ್ಸಿಲಾಂ.. ತುಕಾ ಹಾಂಗಾ ಥಾವ್ನ್ ಆಪವ್ನ್ ವೊರ್ನ್ ತುಜೆಂ ಪಾತಕ್ ನಿತಳ್ ತೊ ಕರ್ತಲೊ...."
ಹೆಂ ಸರ್ವ್ ಮ್ಹಜ್ಯಾ ಪಪ್ಪಾಕ್ ತಿಳ್ಸಿಲಾಂ...???. ತೊ ಕಿತ್ಲೊ ದೆದೆಸ್ಫಾರ್ ಜಾತಲೊಗೀ? ತಾಕಾ ಹಾವೆಂ ಕಿತ್ಲೆಂ ದುಕಯ್ಲೆಂ? ತೊ ಮ್ಹಜ್ಯಾ ವಿಶ್ಯಾಂತ್ ಕಿತೆಂ ಪೂರಾ ಚಿಂತ್ತಲೊ?
"ನಾ ಮದರ್ .." ಹಾಂವ್ ತಿಚ್ಯಾ ಪಾಂಯಾಕ್ ಪಡ್ಲಿಂ." ಮ್ಹಾಕಾ ಪಾಟಿಂ ಧಾಡಿನಾಕಾತ್. ಹಾಂವ್ ... ಪಾತ್ಕಿ ನ್ಹಯ್... ದಯಾ ಕರುನ್..."
"ಹುಂ ...." ತಿಣೆಂ ಮ್ಹಾಕಾ ತಿಚ್ಯಾ ಪಾಯಾಂನಿ ಖೊಟಾವ್ನ್ ಪಯ್ಸ್ ಕೆಲೆಂ ಆನಿ ತಿ ಉಭಿ ಜಾಲಿ." ತುಜೆಂ ಕುಟಾಮ್, ತುಜೆಂ ಹೆಂ ಖೊಟೆಪಣ್ ಆಯ್ಕೊಂಕ್ ಸಕ್ಚೆಂ ನಾ ಮ್ಹಣ್ ತುಂ ಜಾಣಾಂಯ್.. ತುಜ್ಯಾ ಪಾತ್ಕಾಚೆಂ ಪ್ರಾಜಿತ್ ತುಜ್ಯಾ ಕುಟ್ಮಾ ಸಾಂಗಾತಾ ಮೆಳೊನ್ ಕೆಲೆಂ ತರ್ ತುಕಾ ಬರೆಂ ಜಾತೆಲೆಂ. ತುಂ ಚಿಂತ್ತಾಯ್ ಆಸ್ತೆಲೆಂ ಹಾಂಗಾಸರ್, ಹ್ಯಾ ಕೊವೆಂತಾಂತ್ ಕಸೆಂಯ್ ಕಿತೆಂಯ್ ಕರ್ನ್ ಜಿಯೆವ್ಯೆತ್ ಮ್ಹಣ್ .. ಹಾಂವ್ ಆಸ್ತಾಂ ಮ್ಹಣಾಸರ್ ತಸೆಂ ಕಾಂಯಿಚ್ಚ್ ಜಾಂವ್ಕ್ ಹಾಂವ್ ಸೊಡಿಶಿನಾ...."
ತಿ ಕುಡಾ ಥಾವ್ನ್ ಭಾಯ್ರ್ ಗೆಲಿ. ಆನಿಂ ಹಾಂವ್ ಮ್ಹಜ್ಯಾ ಕುಡಾಕ್ ಧಾಂವ್ಲಿ.
ಉಶ್ಯಾ ಭಿತರ್ ತೊಂಡ್ ಲಿಪವ್ನ್ ಹಾಂವ್ ಗಳ್ಗಳ್ಯಾಂ ರಡ್ಲಿಂ." ಹಾಯ್ ದೆವಾ..." ಹ್ಯಾ ವೆಳಿಂ ದೇವ್ ಮಾತ್ರ್ ಮ್ಹಜೆಂ ಮಾಗ್ಣೆಂ ಆಯ್ಕೊಂಕ್ ಸಕ್ತಾ ಮ್ಹಣ್ ಮ್ಹಾಕಾ ಕಳಿತ್ ಆಸ್ಲ್ಲೆಂ." ಹಾವೆಂ ಕಿತೆಂ ವಾಯ್ಟ್ ಕೆಲಾಂ ಮ್ಹಣ್ ತುವೆಂ ಮ್ಹಾಕಾ ಹಿ ಶಿಕ್ಷಾ ದಿಂವ್ಚಿ? ಹಾವೆಂ ಕಾಂಯಿಂಚ್ಚ್ ಕರುಂಕ್ ನಾ ದೆವಾ... ಹಾವೆಂ ಕಾಂಯಿಂಚ್ಚ್ ವಾಯ್ಟ್ ಕರುಂಕ್ ನಾ...."
ಚಿಂತ್ನಾಂ ಗೊಪಾಂತ್ ಚಿಂತುನ್ ಚಿಂತುನ್, ದೊಳ್ಯಾಂನಿ ದುಖಾಂ ಗಳವ್ನ್, ರಾತ್ ಪಾಶಾರ್ ಕರ್ತಾನಾ, ಮ್ಹಜ್ಯಾ ಥೈಂ ಸಮಧಾನ್ ಭಿಲ್ಕುಲ್ ಆಯ್ಲೆಂ ನಾ. ತಿ ರಾತ್ ಆಖೇರ್ ಕರ್ತಾನಾ ಮ್ಹಜ್ಯಾ ಮತಿಂತ್ ಏಕ್ಚ್ಚ್ ಆಶಾ ಕಿರಣ್ ಉದೆಲೆಂ.
ತಿಂಚ್ಚ್ ಮ್ಹಜಿ ಮಾಯ್ - ಬಾಪ್....
ತಿಂ ಮ್ಹಜಿಂ ಚಿಂತ್ನಾಂ ಸಮ್ಜಾತೆಲಿಂ ಕೊಣ್ಣಾ.... ತಾಂಕಾ ಮ್ಹಜೆರ್ ಖಂಡಿತ್ ಜಾವ್ನ್ ಪಾತ್ಯೆಣಿ ಆಸ್ತೆಲಿ. ಹಾವೆಂ ಕರುಂಕ್ ನಾತ್ಲ್ಲ್ಯಾ ಪಾತ್ಕಾಚೆಂ ಭಗ್ಸಾಣೆಂ ತಾಣಿಂಚ್ಚ್ ಮ್ಹಾಕಾ ದೀಜಯ್ ಆನಿಂ ತಾಂಚ್ಯಾ ಆಸ್ರ್ಯಾಂತ್ ಹಾವೆಂ ಜಿಯೆಜಯ್. ಉಪ್ರಾಂತ್ಲ್ಯಾ ದೀಸಾಂನಿಂ ಹಾವೆಂ ಘರ್ಚ್ಯಾಂಚಿ ನಿರೀಕ್ಶಾ ಕೆಲಿ.
ಪಪ್ಪಾ ಹಾಂಗಾಸರ್ ಯೇಂವ್ಕ್ ಆತ್ ದೀಸ್ ಪಾತಿಂ ಜಾಲೆ ಆನಿಂ ತ್ಯಾ ಆಟ್ ದಿಸಾನಿಂ ಕೊನ್ವೆಂತಾಂತ್ ಹಾವೆಂ ತೆದೊಳ್ ಭೊಗಿನಾತ್ಲ್ಲೆ ಬಾಂದ್ಪಾಸ್ ಭೊಗ್ಲೆ.
ಮ್ಹಜ್ಯಾ ಲಾಗ್ಸಿಲಿ ಆನಿಂ ಮೊಗಾಚಿಂ ಸಿಸ್ಟರಾಂ ಸರ್ವಾಂ ಮ್ಹಜೆರ್ ರಾಗಾರ್ ಜಾಲಿಂ. ಮ್ಹಜ್ಯಾ ಸಾಂಗಾತಾ ಜೆವ್ಣಾಕ್ ಸಯ್ತ್ ಕೋಣ್ಂಚ್ಚ್ ಬಸಾನಾ ಜಾಲೆಂ. ಮ್ಹಜ್ಯಾ ಸವೆಂ ಕೋಣ್ಂಯ್ ಉಲಯ್ಲಿಂ ತರೀ ಸುಪೀರಿಯರ್ ಕಾಂಯ್ ಮ್ಹಣ್ತಾ ಕೊಣ್ಣಾ ಮ್ಹಣ್ ಹರ್ಯೇಕ್ಲಿಂ ಭಿಯೆತಾಲಿಂ. ತ್ಯಾ ಆಟ್ ದಿಸಾನಿಂ ಏಕ್ ದೀಸ್ ಸಯ್ತ್ ತಾಣಿಂ ಮ್ಹಾಕಾ ನಾಂವ್ಕ್ ದಿಲೆಂ ನಾ. ಉದಾಕ್ ಭರ್ನ್, ಉಜೊ ಕರ್ನ್, ನಾಂವ್ಕ್ ಗೆಲಿಂ ತರ್ ಸುಪಿರೀಯರಾಚ್ಯಾ ಹುಕ್ಮೆ ಪ್ರಕಾರ್ ನಾಣ್ಯೆಕ್ ಕೋಣ್ ನಾ ಕೋಣ್ ಯೇವ್ನ್ ಬೀಗ್ ಘಾಲ್ತಾಲೆಂ.
ಥೊಡ್ಯಾ ಪಾವ್ಟಿಂ ಮ್ಹಜ್ಯಾ ಕುಡಿಚ್ಯೊ ಗರ್ಜೊ ಕರುಂಕ್ ಸಯ್ತ್ ಮ್ಹಾಕಾ ತಾಣಿಂ ಆವ್ಕಾಸ್ ದಿಲ್ಲೊ ನಾ.
ಆನಿ ತೆದೊಳ್ ವರೇಗ್ ಮ್ಹಾಕಾ ಆತೀ ಮೊಗಾಚೊ ಜಾಲ್ಲೊ ಹೊ ಸಂಸಾರ್ ಆತಾಂ ಕಾಂಟಾಳ್ಯಾಚೊ ಜಾತಾಲೊ....
ಪಾತಕ್ ಹಾವೆಂ ಕರುಂಕ್ ನಾ ತೆಂ ಖಂಡಿತ್.. ಹಾಂವ್ ಜಾಣಾ.. ಮ್ಹಜೆಂ ಕಾಳಿಜ್ ಉಗ್ತ್ಯಾನ್ ತೆಂ ಉಚಾರ್ತಾ... ಮ್ಹಜ್ಯಾ ಮತಿಂತ್ ಬಿಲ್ಕುಲ್ ಖತ್ ನಾ...
ಪುಣ್ ಹೆಂ ಸರ್ವ್ ಹಾಂಕಾ ಕಸೆಂ ಸಾಂಗೊಂ???
ಹಾವೆಂ ಪಾತಕ್ ಕೆಲಾಂ ತರ್ ಹಿಂ ಮ್ಹಾಕಾ ಖಂಚಾಯ್ ದಾಕ್ತೆರಾ ಸರ್ಸಿನ್ ವರಿನಾಂತ್ ಕಿತ್ಯಾಕ್ ???
ಮನಿಸ್ ಜಾವ್ನ್ ಜಲ್ಮಾಲ್ಲ್ಯಾ ಹಾವೆಂ, ಪಾತಕ್ ಕೆಲೆಂ ತರೀ ಹಿ ಮ್ಹಜಿ ಕೂಡ್ ಮನ್ಶಾ ಜಲ್ಮಾಚಿ... ತಾಕಾಯ್ ಅಸ್ಕತ್ಕಾಯ್ ಆಸಾ.... ಪುಣ್ ಪಾತಕ್ ಕೆಲ್ಲ್ಯಾಕ್ ಆಸೆಂಚ್ಚ್ ಧಣ್ಸುಚೆಂ ????
ಆತ್ ದೀಸಾನಿಂ ಪಪ್ಪಾ ಕೊನ್ವೆಂಟಾಂಚ್ಯಾ ಬಾಗ್ಲಾರ್ ಉಬೊ ಜಾಲೊ. ತಾಕಾ ಪಳವ್ನ್ ಮ್ಹಜ್ಯಾ ಜೀವಾಂತ್ ಎಕಾ ರಿತಿಚಿ ಸಂತೊಸಾಚೆಂ ವ್ಹಾರೆಂ ವಾಳ್ಲ್ಲ್ಯಾಬರಿ ಜಾಲೆಂ.
ಮದರ್ ಸುಪೀರಿಯರಾನ್ ತಾಚ್ಯಾ ಲಾಗಿಂ ಪಯ್ಲೆಂ ಉಲಂವ್ಕ್ ಮ್ಹಾಕಾ ದಿಲೆಂ ನಾ. ತಿಚ್ಯಾ ಬರಾಬರ್ಚ್ಚ್ ಹಾಂವ್ ಪಪ್ಪಾ ಮುಕಾರ್ ಉಭಿಂ ಜಾಲಿಂ.
"ತುಮ್ಚ್ಯಾ ತಾಭೆಂತ್ ವೊಪ್ಸಿಲ್ಯಾ ಉಪ್ರಾಂತ್ ಚಿಕ್ಕೆ ಮುಟಿ ಭಿತರ್ ಅಂರ್ಧುನ್ ಧರುಂಕ್ ತುಮ್ಕಾಂ ಜಾಂವ್ಕ್ ನಾಂಗೀ ಸಿಸ್ಟರ್ ಸುಪೀರಿಯರ್?" ಪಪ್ಪಾನ್ ಸುರ್ವೆರ್ಚ್ಚ್ ದೂಕ್ ಭರ್ಲ್ಲ್ಯಾ ತಾಳ್ಯಾನ್ ಮ್ಹಜ್ಯಾ ಕುಸಿನ್ ಪಳಯ್ನಾಸ್ತಾನಾ ಸಯ್ತ್ ಉಲಯ್ತಾನಾ, ಮದರ್ ಸುಪೀರಿಯರಾನ್ ಮ್ಹಜ್ಯಾ ವಿಶ್ಯಾಂತ್ ಸರ್ವ್ ಕಾಗ್ದಾರ್ ತಿಳ್ಸಿಲಾಂ ಮ್ಹಣ್ ಕಳೊಂಕ್ ಮ್ಹಾಕಾ ವೇಳ್ ಗೆಲೊ ನಾ..
"ಅಳೆ ಬಾ...." ಮದರ್ ಸುಪೀರಿಯರ್ ಪಪ್ಪಾಲಾಗಿಂ ಜೀಬ್ ಆಡ್ ಘಾಲ್ನ್, ವೊಪ್ಪಾಸಾಲೆ ಉಲಂವ್ಕ್ ಲಾಗ್ಲಿ." ತುಜ್ಯಾ ಧುವೆಕ್ ಹಾವೆಂ ಕಿತ್ಲ್ಯಾ ಪಾವ್ಟಿಂ ಸಾಂಗ್ಲ್ಲೆಂ ಆಸಾ.. ತರ್ನ್ಯಾಟ್ಯಾ ಚೆಡ್ಯಾ ಸಾಂಗಾತಾ ಚಡ್ ಮೆತೆರ್ ಜಾಯ್ನಾಕಾ ಆನಿಂ ಭರ್ಸಾನಾಕಾ.... ಆಮ್ಕಾಂಯ್ ತರ್ನ್ಯಾಟ್ಯಾಂ ಸಂಗಿಂ ಉಲಯ್ಜಯ್ ಮ್ಹಣ್ ಆಶಾ ಆನಿಂ ಮನ್ ಆಸಾ... ಪುಣ್ ಆಮ್ಚ್ಯಾ ಭೆಸಾಚಿ ಜಾಗ್ರುತ್ಕಾಯ್ ಅಮಿಂ ಕರಿಜಯ್... ಮನ್ ಘಟ್ ಆಸ್ತಾ ಪುಣ್ ಕೂಡ್ ಆಲ್ಬಿ... ಕೆದಾಳಾಯ್ ನಿಸ್ರೊನ್ ಪಡೊಂಕ್ ಸಾಧ್ಯ್ ಆಸಾ...."
"ಪಪ್ಪಾ..." ಹಾಂವ್ ಮ್ಹಜ್ಯಾ ಮತಿಂತ್ಲಿ ಚಿಂತ್ನಾ ಉಗ್ತ್ಯಾನ್ ಸಾಂಗ್ಚ್ಯಾ ಖಾತಿರ್ ಉರ್ದಾಲಿಂ. ಪುಣ್ ಪಪ್ಪಾನ್ ಜಾಂವ್ ಮದರ್ ಸುಪೀರಿಯರಾನ್ ಜಾಂವ್ ಮ್ಹಾಕಾ ತೋಂಡ್ ಉಗ್ತೆಂ ಕರುಂಕ್ ಆವ್ಕಾಸ್ ದಿಲೊಚ್ಚ್ ನಾ. ತಿಣೆ ತಿಚೆಂ ಉಲವ್ಣೆಂಚ್ಚ್ ಮುಕಾರ್ಸುನ್ ವೆಲೆಂ. ಹಾವೆಂ ಚಿಂತುಂಕ್ ಸಯ್ತ್ ಕಷ್ಟ್ ಜಾಂವ್ಚೆ ಬದ್ಲಾಂ ಮ್ಹಜ್ಯಾ ವಯ್ರ್ ಥಾಪ್ಲೆ. ಹರ್ಯೇಕಾ ಉತ್ರಾಕ್ ಆಯ್ಕಾತಾನಾ ಪಪ್ಪಾಚೊ ರಾಗ್ ವಾಡೊನ್ಂಚ್ಚ್ ವೆತಾಲೊ. ಹಾಂವ್ ಮಾತ್ರ್ ಕಿತೆಂಚ್ಚ್ ಕರುಂಕ್ ಸಕಾನಾಸ್ತಾಂ ಎಕಾ ಬೊಂಬ್ಯಾ ಭಾಶೆನ್ ತಾಂಚ್ಯಾ ಮುಖಾರ್ ಉಭಿಂ ರಾವ್ಲಿಂ.
"ಮದರ್ ... ಹ್ಯಾ ನಾಲಿಸಾಯೆಚ್ಯಾ ಮ್ಹಜ್ಯಾ ಚೆಡ್ವಾಕ್ ಘರಾ ಕಶೆಂ ವೊರ್ಚೆಂ ಆನಿಂ ವೆಲೆಂ ತರ್ ಗಾಂವ್ಚೊ ಲೋಕ್ ಮ್ಹಾಕಾ ತೀನ್ ಕಾಸಾಂಚೆಂ ಮೋಲ್ ಸಯ್ತ್ ದಿಂವ್ಚೊ ನಾ.... ಆಸ್ಲ್ಲಿ ಇಲ್ಲಿ ಮರ್ಯಾದ್ ಹಾವೆಂ ವಿಕ್ಲ್ಲ್ಯಾಬರಿ ಜಾಯ್ತ್.... ತ್ಯಾ ಶಿವಾಯ್ ಹಾಚ್ಯಾ ಪಾಟ್ಲಿಂ ತೆಗಾಂ ಚೆಡ್ವಾಂಕ್ ಮುಕ್ಲೊ ಫುಡಾರ್ ಹಾವೆಂ ದೀಂವ್ಕ್ ಆಸಾ... ಹಾಕಾ ಘರಾ ವೆಲೆಂ ತರ್ ತಾಂಚಿ ಗತ್ ಸುಣ್ಯಾಚ್ಯಾಕೀ ಪಾಸ್ಟ್ ಜಾಂವ್ಕ್ ಆಸಾ..."
"ತರ್ ಆಮಿ ಕಿತೆಂ ಕರಿಜಯ್ ಮ್ಹಣ್ ತುವೆಂ ಮ್ಹಣ್ಚೆಂ ಬಾ....." ಮದರ್ ಸುಪೀರಿಯರ್ ಪರತ್ ಪಾತ್ಳಾವ್ನ್ ಉಲಯ್ಲಾಗ್ಲಿ." ತುಜ್ಯಾ ಧುವೆ ಖಾತಿರ್ ಆಮಿ ಹಾಂಗಾಸರ್ ಆಸ್ಪತ್ರ್ ಭಾಂದಿಜಯ್... ತಾಚೆಂ ಪಾಪ್ ಧುಂವ್ಕ್ ದಾಕ್ತೆರಾಕ್ ಹಾಂಗಾಸರ್ ಆಪವ್ನ್ ಹಾಡಿಜಯ್..... ಆನಿ ಹ್ಯಾ ಪವಿತ್ರ್ ಜಾಗ್ಯಾಕ್ ಭಷ್ಟ್ ಕರಿಜಾಯ್.... ತುಜೆಂ ಧುವ್ ಧಾ ಪಂದ್ರಾ ದೀಸಾಂ ಥಾವ್ನ್ ಖಳಾನಾಸ್ತಾನಾ ವೊಂಕ್ತಾ ... ತಾಕಾ ಹೆರಾಂ ಸಾಂಗಾತಾ ದವರುಂಕೀ ಆಮ್ಕಾಂ ಸಾಧ್ಯ್ ನಾ... ಆಯ್ಚ್ಯಾ ವೊರ್ನಿ ಚಡ್ತಿಕ್ ಏಕ್ ದೀಸ್ ಆಮಿ ತಾಕಾ ಹ್ಯಾ ಕೊನ್ವೆಂಟಾಂತ್ ರಾವಂವ್ಕ್ ದಿಂವ್ಚೆನಾಂವ್......"
"ಮದರ್ ..." ಪಪ್ಪಾ ದೀನ್ಪಣಿ ಮಾಗೊಂಕ್ ಲಾಗ್ಲೊ." ದೋನ್ ಯಾ ತೀನ್ ದೀಸ್... ತಾಚ್ಯಾ ವರ್ನಿ ಚಡ್ ದೀಸ್ ನಾಕಾತ್ ಮ್ಹಾಕಾ... ಹಾಂವ್ ಬೊಂಬಯ್ ಮ್ಹಜ್ಯಾ ಭಯ್ಣಿಂ ಲಾಗಿಂ ಉಲಯ್ತಾಂ ಆನಿಂ ಹಾಕಾ ಹಾಂಗಾ ಥಾವ್ನ್ ಶೀದಾ ಬೊಂಬಯ್ ಧಾಡುನ್ ಹಾಚೆಂ ಪಾತಾಕ್ ಧುವ್ನ್ ಕಾಡ್ಚಿ ವಿಲೆವಾರಿ ಕರ್ತಾಂ....."
"ಹಾಂ.. ತಸೆಂ ಕೆಲ್ಯಾರ್ ಬರೆಂ.... ಆನಿ ಏಕ್ ವಿಶಯ್ ತ್ಯಾ ಉಪ್ರಾಂತ್ ತಾಣೆ ಪಾಟಿಂ ಯೆಂವ್ಚೆಂ ನಾಕಾ... ಬೊಂಬಯ್ಚ್ಚ್ ಖಂಚ್ಯಾಯ್ ಚೆಡ್ಯಾಕ್ ಪಳೆವ್ನ್ ತಾಕಾ ಕಾಜಾರ್ ಕರ್ನ್ ದಿಂವ್ಚೆಂ ಬರೆಂ...."
ಮ್ಹಾಕಾ ತಿಂ ಉತ್ರಾಂ ಆಯ್ಕೊಂಕ್ ಜಾಲಿಂ ನಾಂತ್... ಕಟಿಣಾಯೆಚಿಂ ಉತ್ರಾಂ ತಿಂ... ಮ್ಹಜ್ಯಾ ಚಿಂತ್ನಾಂಕ್ ಫಾಶಿ ದಿಂವ್ಚಿಂ ತಿಂ ವಿದ್ರೂಪ್ ಉತ್ರಾಂ..... ಮ್ಹಜ್ಯಾ ಲಾಗಿಂ ಕೋಣ್ಂಚ್ಚ್ ಉಲಂವ್ಕ್ ಸಯ್ತ್ ಆಯ್ಕಾನಾ... ಮ್ಹಜಿಂ ಚಿಂತ್ನಾಂ ಕಸಲಿಂ... ಮ್ಹಜಿಂ ಭಗ್ಣಾಂ ಕಿತೆಂ... ಹಾವೆಂ ಪಾತಕ್ ಕೆಲಾಂ....? ಕೆಲಾಂ ತರ್ ದಾಕ್ತೆರಾಲಾಗಿಂ ಕಿತ್ಯಾಕ್ ಪರೀಕ್ಷಾ ಕರಿನಾಂತ್...? ಮ್ಹಜೊ ಜೀವ್ ಮ್ಹಾಕಾ ಸಾಂಗ್ತಾ ಹಾವೆಂ ಕಾಂಯ್ ಕರುಂಕ್ ನಾ... ತರ್ ಹಾಂಕಾಂ ಕಸೆಂ ಸಾಂಗ್ಚೆಂ??
ಪಪ್ಪಾ ಮ್ಹಜ್ಯಾ ಲಾಗಿಂ ಏಕ್ ಸಬ್ದ್ ಸಯ್ತ್ ಉಲಯ್ನಾಸ್ತಾನಾ ಚಲ್ತಚ್ಚ್ ರಾವ್ಲೊ. ಹಾವೆಂ ಚಿಂತ್ಲೆಂ - ಮ್ಹಜೊ ಬಾಪುಯ್ ಸಯ್ತ್ ಮ್ಹಾಕಾ ಅರ್ಥ್ ಕರಿನಾ? ಹಾಂವ್ ದೆದೆಸ್ಫೊರ್ ಜಾತಲಿಂ.
ಸಾಂಜೆಚೊ ರವಿ ದರ್ಯಾಂತ್ ಬುಡೊನ್ ವೆತಾಲೊ. ಭುಮಿಚೆರ್ ಸವ್ಕಾಸ್ ಕಾಳೊಕ್ ಪ್ರಸಾರೊಂಕ್ ಲಾಗ್ಲ್ಲೊ. ಪಪ್ಪಾ ಹಾಂಗಾಥಾವ್ನ್ ಗೆಲ್ಯಾ ಉಪ್ರಾಂತ್ ಹಾಂವ್ ಬಾಯ್ಲ್ಯಾ ಫುಲಾಂಚ್ಯಾ ತೊಟಾಂತ್ ತಸೆಂಚ್ಚ್ ಬಸ್ಲಿಂ. ಕಿತ್ಯಾಕ್ ಬಸ್ಲಾಂಯ್ ಮ್ಹಣ್ ಕೋಣೆಂಚ್ಚ್ ಮ್ಹಾಕಾ ವಿಚಾರ್ಲೆಂ ನಾ. ಸಕಾಳಿಂ ಥಾವ್ನ್ ಪೊಟಾಕ್ ಖಾಣ್ ನಾತ್ಲ್ಲೆಂ. ಅಸ್ಕತ್ಕಾಯೆನ್ ಜೀವ್ ಕಾಂಪ್ತಾಲೊ.
ಹಾಂವ್ ಉಭಿಂ ಜಾವ್ನ್ ಪಾರ್ಲರಾಕ್ ವೆಚ್ಯಾ ಖಾತಿರ್ ಮೆತಾಂ ಕಾಡಿಲಾಗ್ಲಿಂ. ಜೀವ್ ವಾರ್ಯಾರ್ ಧಲ್ಲ್ಲ್ಯಾಬರಿ ಜಾತಾಲೊ.
ಪಾರ್ಲರಾಭಿತರ್ ಸರ್ವಾಂ ತೇರ್ಸ್ ಕರ್ಚೊ ಮ್ಹಾಕಾ ಆಯ್ಕತಾಲೆಂ. ದಿಂಬಿಯಾಂನಿ ಪಡೊನ್ ಸರ್ವಾಂ ಮಾಗ್ತಾಲಿಂ. ಆಪ್ಣಾ ಖಾತಿರ್ ಆನಿಂ ಹ್ಯಾ ಸಂಸಾರಾ ಖಾತಿರ್... ಪುಣ್ ಮ್ಹಜ್ಯಾ ಖಾತಿರ್ ಕೋಣ್ಂಚ್ಚ್ ಮಾಗಾನಾತ್ಲ್ಲಿಂ ಮ್ಹಣ್ ಹಾಂವೆ ಜಾಣಾಸ್ಲ್ಲಿಂ.
ಬಾಂಯ್ಚೆಂ ಉಭಾರ್ ಕಾಟೆಂ ಮುಕಾರ್ ದಿಸ್ತಾನಾ, ಮ್ಹಜಿ ಚಾಲ್ ಹಾವೆಂ ರಾವಯ್ಲಿ.
ಪಾಟಿಂ ಪಾರ್ಲರಾ ಕುಸಿನ್ ಪಳಯ್ಲೆಂ. ಪಾರ್ಲರಾಂತ್ ಉಜ್ವಾಡ್ ಆಸ್ಲ್ಲೊ. ಪುಣ್ ತ್ಯಾ ಉಜ್ವಾಡಾಂತ್ಯೀ ಕಾಳೊಕ್ ಭರೊನ್ ಗೆಲ್ಲೊ ಮ್ಹಾಕಾ ದಿಸ್ಲೊ. ಕಟಿಣಾಯೆಚೊ ಕಾಳೊಕ್......
ತೇರ್ಸ್ ಆಖೇರ್ ಜಾವ್ನ್ ಯೆತಾಲೊ. ಕಂತಾರ್ ಸುರು ಜಾಲ್ಲೆಂ.
ಬಾಂಯ್ಚ್ಯಾ ಕಾಟ್ಯಾಚ್ಯಾ ದೊರ್ಯಾಚೆರ್ ಹಾತ್ ದವರ್ನ್ ಪಂದಾಕ್ ತಿಳ್ಳೆಂ. ಬಾಂಯ್ತ್ ಕಾಳೊಕ್ ದಾಟಾಯೆನ್ ಭರೊನ್ ಗೆಲ್ಲೊ. ಪುಣ್, ತ್ಯಾ ಕಾಳೊಕಾಂತ್ ಕಸಲೊಗಿ ಉಜ್ವಾಡ್ ಆಸ್ಲ್ಲೆಬರಿ ದಿಸ್ಲೊ. ಕಾಳೊಕಾಂತ್ ಕಾಜುಲೆ ಝಿಳ್ಮಿಳ್ತಾಲೆ. ತ್ಯಾ ಕಾಜುಲ್ಯಾಂಚ್ಯಾ ಉಜ್ವಾಡಾಂತ್ ಕೋಣ್ಂಗೀ ಮ್ಹಾಕಾ ಆಪಂವ್ಚ್ಯಾ ಬರಿ ಭಗ್ಲೆಂ.
ಹಾವೆಂ ವೇಳ್ ಕಾಡ್ಲೊ ನಾ. ವೇಳ್ ಕಾಡ್ಲೊ ತರ್ ಅಸಲೊ ಸಂದರ್ಭ್ ಪರತ್ ಮೆಳ್ಚೊ ನಾ.. ಖಿಣಾಚ್ಯಾ ವೆಳಾನ್ ಹಾವೆಂ ವಾರ್ಯಾರ್ ಉಡಿ ಮಾರ್ಲಿ ಆನಿಂ ವ್ಹಡಾ ಆವಾಜಾನ್ ಉದ್ಕಾಚ್ಯಾ ಗರ್ಭಾಂತ್ ಹಾಂವ್ ಲಿಪೊನ್ ಗೆಲಿಂ.
ಉಸ್ವಾಸ್ ಕಾಣ್ಘೆತಾನಾ, ವಾರ್ಯಾ ಬದ್ಲಾಕ್ ಉದಾಕ್ ಭರಾನ್ ಮ್ಹಜ್ಯಾ ಪೊಪ್ಸಾಂತ್ ರಿಗ್ಲೆಂ.
ಹರ್ಧ್ಯಾಂತ್ ಉಜೊ ಭರ್ಲ್ಲ್ಯಾ ಬರಿ ಜಾಲೊ. ಹಾಂವ್ ಕಠಿಣಾಯೆನ್ ಹುಳ್ವುಳ್ಳಿಂ.
ಜೀವ್ ಸಗ್ಳೊ ಕಾಂಪೊಂಕ್ ಲಾಗ್ಲೊ. ದೊಳೆ ರುಂದಾಲೆ. ತಾಂತ್ಲ್ಯಾನ್ ಕಿಠಾಳಾಂ ಭಾಯ್ರ್ ಉಬ್ಲ್ಲ್ಯಾಬರಿ ಜಾಲೆಂ.
ಉಪ್ರಾಂತ್ ಮ್ಹಜ್ಯಾ ಥೈಂ ಆಸ್ಲ್ಲಿ ಭೃಹದ್ ಸಕತ್ ಮ್ಹಾಕಾ ಸಾಂಡುನ್ ಉಭೊನ್ ವೆಚ್ಯಾ ಬರಿ ಜಾಲೆಂ.
ತೆಚ್ಚ್ ಅಂತಿಮ್ ಭಿರಾಂಕೂಳ್ ಕಷ್ಟ್.....!
ಅನಿ ಉಪ್ರಾಂತ್....?????!
****************
ದುಸ್ರ್ಯಾ ದೀಸಾ ಸಿಸ್ಟರ್ ಲಿನೆತಾಚಿ ಕೂಡ್ ಪಾರ್ಲರಾಚ್ಯಾ ಬಾಂಯ್ತ್ ಉಪ್ಯೆತಾಲಿ. ತಿ ವಯ್ರ್ ಕಾಡ್ತಾನಾ ಉದಾಕ್ ಪೊತಾಂತ್ ಭರೊನ್ ತಿಚೆಂ ಪೊಟ್ ಆನಿಕ್ಯೀ ಉಭಾರ್ ದಿಸ್ತಾಲೆಂ.
ಕೊನ್ವೆಂತಾಂತ್ಲ್ಯಾ ಸರ್ವ್ ಸಿಸ್ಟರಾಂನಿ ಮತಿಂತ್ಚ್ಚ್ ಚಿಂತ್ಲೆಂ - ಲಿನೆಟಾನ್ ಆಪ್ಣಾಸವೆಂ ಅನ್ಯೇಕಾ ಜೀವಾಕ್ಯೀ ಬಲಿ ಘೆತ್ಲೆಂ ಮ್ಹಣ್.
ಲಿನೆಟಾಚಿ ಕೂಡ್ ಆಸ್ಪತ್ರೆಕ್ ವೆಲಿ. ಪೋಸ್ಟ್ ಮಾರ್ಟಮ್ ಕರ್ನ್ ಜಾಲ್ಯಾ ಉಪ್ರಾಂತ್ ದಾಕ್ತೆರಾನ್ ಮದರ್ ಸುಪಿರೀಯರಾ ಲಾಗಿಂ ಆಪವ್ನ್ ಮ್ಹಳೆಂ - ತ್ಯಾ ಚಲಿಯೆಚ್ಯಾ ಗರ್ಭಾಂತ್ ಟ್ಯೂಮರ್ ಜಾಲ್ಲೆಂ.....
ದಾಕ್ತೆರಾಂಚಿ ಉತ್ರಾಂ ಆಯ್ಕೊನ್ ಮದರ್ ಸುಪಿರೀಯರಾ ಸವೆಂ ಸರ್ವಾಂಚ್ಯಾ ದೊಳ್ಯಾಂನಿ ದುಃಖಾಂ ಭರ್ಲಿಂ.
ಜೀವಾಂತ್ ಆಸ್ತಾನಾ ಲಿನೆಟಾನ್ ಕಿತ್ಲೊ ಆವಾಜ್ ಕೆಲ್ಲೊ??? ಕಿತ್ಲೆಂ ರಡ್ಲ್ಲೆಂ ತೆಂ ??? ದುಖಾಚ್ಯಾ ರುದಾನಾನ್ ಕಿತ್ಲೊ ಆವಾಜ್ ಕೆಲ್ಲೊ ತರ್ಯೀ ತೊ ಆವಾಜ್ ಕೋಣ್ಂಚ್ಚ್ ಆಯ್ಕಾನಾ ಜಾಲ್ಲೊ.
ಪುಣ್ ಆತಾಂ ತಾಚ್ಯಾ ನಿರ್ಜೀವ್ ಕುಡಿನ್ ಕರ್ಚೊ" ಮೌನ್ ಆವಾಜ್" ಸರ್ವಾಂಕ್ ಆಯ್ಕಾತಾಲೊ.... ಉಚಾಂಬಳ್ ದರ್ಯಾಂತ್ ಉಟ್ಲ್ಲ್ಯಾ ಭಿರಾಂಕೂಳ್ ತುಫಾನಾಚ್ಯಾ ಲ್ಹಾರಾಂ ಭಾಶೆನ್ ಆವಾಜ್ತಾಲೊ......
ತೊ ಆವಾಜ್ ತಾಂಕಾಂ ಕೊಣಾಯ್ಕಿ ಆಯ್ಕೊಂಕ್ ಜಾಲೆಂ ನಾ....
ಸರ್ವಾಂನಿ ಆಪಾಪ್ಲ್ಯಾ ಕಾನಾಂನಿ ಬೊಟಾಂ ಚೆಪ್ಲಿಂ ಆನಿ ತೊ ಆವಾಜ್ ಆಯ್ಕಾನಾಸ್ತಾನಾ ರಾವೊಂಕ್ ಪ್ರೇತನ್ ಕೆಲೆಂ...
ಪುಣ್ ತೊ ಆವಾಜ್ ಮಾತ್, ಆತಾಂ ತಾಂಚ್ಯಾ ಕಾಳ್ಜಾಂನಿ ರಿಗೊನ್ ಜಾಲ್ಲೊ....
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
