ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ವಿಂಚ್ಣಾರ್ ಮಟ್ವಿಕಾಣಿ - ಚಿಮ್ಟೊ
ಚಾ.ಫ್ರಾ.ದೆ’ಕೋಸ್ತಾ: ಕೊಂಕ್ಣಿ ಸಾಹಿತ್ಯಾಚಾ ಮಟ್ಟಾರ್ ಸಾಂಗ್ಚೆಂ ತರ್ ಚಾ.ಫ್ರಾ.ನ್ ಆಪಡ್ಲೆಲೆಂ ಸರ್ವ್ ಭಾಂಗಾರ್, ತಾಣೆಂ ಬರಯಿಲ್ಲೆಂ ಸರ್ವ್ ಸಾಹಿತ್ಯ್, ತೆಂಯ್ ವಿಶಿಶ್ಟ್ ಮಟ್ಟಾಚೆಂ ಆನಿ ಅಪುರ್ಭಾಯೆಚೆಂ. ಜಾಂವ್ ನಾಟಕ್, ಜಾಂವ್ ಕವಿತಾ, ಜಾಂವ್ ಲೇಖನಾಂ ವಾ ಜಾಂವ್ ಕಾಣ್ಯೊ ಕಿತ್ಲ್ಯೊ ಅಪುರ್ಭಾಯೆಚ್ಯೊ ಮ್ಹಣ್ಚಾಕ್ ಹಿ ಕಾಣಿ ವಾಚ್ಲ್ಯಾರ್ ಸುಸ್ತಾತೆಲೆಂ. ವಿಂಚ್ಲ್ಲೊ ವಿಶಯ್ ಸಾದೊ ಜಾವ್ಯೆತಾ ಪುಣ್ ಬರಂವ್ಕ್ ವಾಪಾರ್ಲ್ಲಿ ಸೊಭಿತ್ ಕೊಂಕ್ಣಿ ಭಾಸ್ ತಾಚಾ ಉತ್ರಾಂನಿ ಕಶಿ ಸಾಡೊ ನೆಸ್ಲ್ಲ್ಯಾ ನವ್ಯಾ ಹೊಕ್ಲೆಪರಿಂ ಸೊಭ್ತಾ ತೆಂ ತುಮಿಂಚ್ ಪಾರ್ಕಿಯಾ.
[ಹಿ ಕಾಣಿ ಧಾಡ್ನ್ ದಿಲ್ಲ್ಯಾ ಚಾ.ಫ್ರಾ.ಚಾ ಪತಿಣೆಚೊ, ಮಾನೆಸ್ತಿಣ್ ಸ್ಟೆಲ್ಲಾ ಡಿ’ಕೋಸ್ತಾಚೊ ಉಪ್ಕಾರ್ ಬಾವುಡ್ತಾಂ]
ಚಾ.ಫ್ರಾ.ದೆ’ಕೋಸ್ತಾ
ಸುರ್ಯೊ ಮಾತ್ಸೊ ಮಾತಾರೊ ಜಾವ್ನ್ ಆಪ್ಲೊ ಮಾರೊಗ್ ಮೆಜ್ತಾಲೊ. ಬೊ೦ಬಯ್ಚಾ ಎಕಾ ಉದ್ಯಾನಾ೦ತ್ ರಿಪಾ೦ಚಾ ಬಾ೦ಕಾರ್ ಬಸ್ಲ್ಲೆಕಡೇ ವಾರೆ೦ ಕಾನಾ೦ಕ್ ಕುಚುಲ್ಯೊ ಕರ್ತಾಲೆ೦. ಪೊಲ್ಯಾ೦ಕ್ ಹಳೂ ಪೊಶೆತಾಲೆ೦. ಆನಿ ಮಾಣಿಚಾ ಕಾ೦ದ್ಯಾಕ್ ಉಮೆ ದಿತಾನಾ ಪುಸ್ಪುಸ್ತಾಲೆ೦.
“ಚೆಡ್ವಾ೦ಕ್ ಕಿತ್ಯಾಕ್ ಪಳೆನಾ೦ಯ್ರೆ ಸನ್ನೆಶಾ? ಅಳೆ ಗೆಟಿ೦ತ್ಲ್ಯಾನ್ ಭಿತರ್ ರಿಗ್ತಾತ್ ಪಳೆ ಹಾರಿ೦ ಹಾರಿ೦ನಿ, ಬೆ೦ಗ್ಳುರ್ಚಾ ದಾಕ್ವಾಲಿ೦ಕ್ ಘೊಸ್ ದೆ೦ವ್ಲ್ಲೆಬರಿ. ಅಳೆ ತೊ ಮುಕಾರ್ ಬಸೊನ್ ಭೇಲ್ ಪುರಿ ರಗಡ್ತಾ ತೊ ಸೊಫಿಯಾ ಕೊಲೆಜಿಚೊ ಜಮೊ. ಆಹಾ ತೆಂ ಜಾ೦ಬ್ಳಿ ಸಲ್ವಾರ್ ನ್ಹೆಸ್ಲ್ಲೆ೦ ಪಳೆ, ಸಾ೦ಜೆಚಾ ಕೀರ್ಣಾ೦ತ್ ಝಳ್ಕಾತಾ, ಝುಜಾಥಳಾರ್ ರಾಣಾ ಸಿ೦ಗಾಚಿ ತಲ್ವಾರ್ ಝಳ್ಕಾಲ್ಲೆಬರಿ. ತೆ೦ ತಣಾ ಪಾಚ್ವೆ೦ ಕಾಪಡ್ ನ್ಹೆಸ್ಲ್ಲ್ಯಾಚಿ ಬಾಜು ಪಳೆಲಿವೆ? ಆನಿ ತಾಚೊ ಪಾಲ೦ವ್ ಪನ್ನಾಸ್ ಪಾವ್ಟಿ ನಿಸರ್ತಾನಾ, ಅಳೆ ಸುರ್ಯೊ ಲೆಗುನ್ ತಳ್ಮಳ್ಯಾ೦ನಿ ಬುಡ್ಲೊ..... ಬುಡ್ಲೊ.......... ಬು....ಡ್ಲೊ...........!
ವಾರ್ಯಾಕ್ ಹಾ೦ವ್, ಮಧೆ೦ ಮಧೆ೦, ತೆ೦ ಶೆ೦ಬೊರ್ ಉಮೆ ದಿತಾನಾ, ಇಲ್ಲೆ೦ಶೆ೦ ಚಿ೦ವೊನ್ ಸೊಡ್ತಾಲೊ೦. ಚೆಡ್ವಾ೦ಕ್ ಕಿತೆ೦ ಸಾರೆ೦ ಪಳ೦ವ್ಚೆ೦? ದುಸ್ರ್ಯಾ ವರ್ಗಾ೦ತ್ ಶಿಕ್ಲ್ಲೊ ಗಣಿತ್ ಪಾಟ್ ಕಸೊ, ಆತಾ೦ ತೆ೦ ಸರ್ವ್ ವಿಸ್ರೊನ್ ಗೆಲಾ೦. ಲ್ಹಾನ್ ಥಾವ್ನ್ ತೆ ಜಾತಿಚೆ ತಮಾಶೆ ಕರ್ಚೆ ಮ್ಹಳ್ಯಾರ್ ಮ್ಹಜಾ ಜಿವಾಚಿ ಗಾ೦ಟ್. � ಮ್ಹಾಕಾ ಪಳೆತಾನಾ ಎಕಾ ಥರಾಚೆ ಚಡ್ಚಡೆ. ಶೆಜಾರ್ಚೆ೦ ಲಿಲ್ಲಿ ಹಾ೦ವ್ ಕಾಜುಚಾ ರುಕಾರ್ ಚಡ್ಲ್ಲ್ಯಾ ವೆಳಾರ್........“ಇತ್ಲ್ಯೊ ಕಾಜು ಕಾಡ್ತಾ ರೆಡೊ ಮ್ಹಾಕಾ ಮಾತ್ ಎಕ್ಯೀ ದಿನಾ...’ ಮ್ಹಣ್ ಚಿಡಾವ್ನ್ ಧಾ೦ವ್ಲ್ಲೆ೦. ದುಸ್ರ್ಯಾ ದಿಸಾ ತಾ೦ಗೆರ್ ತಾಚಿ ಆವಯ್ ಮಾರ್ಕೆಟಿಕ್ ಗೆಲ್ಲಿ ಪಳವ್ನ್ ಎಕ್ ಕುರ್ಪಾಣೊ ಕಾಜು ವ್ಹರ್ನ್, ತಾಚಾ ತೊ೦ಡಾ೦ತ್ ಚೆಪುನ್, ತಾಚಾ ಆ೦ಗಾರ್ ಪಿಳುನ್. ಕಾಜಯೀ ಮೊಳೊನ್ ತಾಕಾಯೀ ಮೊಳೊನ್ ಘರಾ ಆಯಿಲ್ಲೊ೦.
ಅಶೆ೦ ಎಕ್ಚ್ ಚಾಕ್ಲಿ ದೊಗಾಯ್ನಿ ತೊ೦ಡಾ೦ತ್ ಧರ್ನ್ ಕೊಣ್ ಚಡ್ ವಾ೦ಟೊ ಖಾತಾ ಮ್ಹಳ್ಳೊ ಪೋ೦ತ್ ಹಾ೦ವೆ೦ ಮಸ್ತು ಚೆಡ್ವಾ೦ಲಾಗಿ೦ ಲಾಯ್ಲಾ. ಎಕ್ ಪಾವ್ಟಿ ಬೆ೦ಡ್ಕಾರಾಚಿ ಧುವ್ ಲಿನಾ ಇಗರ್ಜೆ ಥಾವ್ನ್ ಘರಾ ಯೇ೦ವ್ಕ್ ವೋಣಿಲಾಗಿ೦ ಪಾವ್ತಾನಾ ತಾಚಾ ಆ೦ಗ್ಲ್ಯಾಚೊ ಬೆಲ್ಟ್ ಹಾ೦ವೆ೦ ಎಕ್ ಪಾವ್ಟಿ ಸೊಡೊ೦ವ್ಚೊ, ತಾಣೆ೦ ಮ್ಹಾಕಾ ಕೆಪ್ಪ್ಯಾಕ್ ಘಾಲ್ತಾ೦ ಮ್ಹಣ್ ಬಾ೦ದ್ಚೊ; ಹಾ೦ವೆ೦ ಪರ್ತುನ್ ಸೊಡ೦ವ್ಚೊ, ತಾಣೆ೦ ಪರ್ತುನ್ ಬಾ೦ದ್ಚೊ...ಅಶೆ೦ ಪಾ೦ಚ್ ಪಾವ್ಟಿ ಕೆಲೆ೦ ಮ್ಹಣ್ ತಾಣೆ೦ ತಾಚೆ ಆವಯ್ಲಾಗಿ೦ ಸಾ೦ಗ್ಲೆ೦. ಆನಿ ತೆ ಆವಯ್ನ್ ಮ್ಹಜೆ ಆವಯ್ಲಾಗಿ೦ ಬೇ೦ಡ್ ಫ಼ು೦ಕ್ಲೆ೦ ಆನಿ ಹಾ೦ವೆ೦ ಸರ್ಸರಿ ಮಾರ್ ಖೆಲೆ.
ತರೀ ತ್ಯಾ ಭುರ್ಗ್ಯಾಪಣಾಚಾ ದಿಸಾ೦ನಿಯೀ ಹ್ಯಾ ನೆಣ್ತ್ಯಾ ಖೆಳಾ೦ನಿ ಥಿರಾಸಣ್ ಆಯ್ಲಿನಾ. ಎಕ್ ದೋನ್ ಪಾವ್ಟಿ ಎಕ್ ದೋನ್ ದೀಸ್, ಅದೃಶ್ಯ್ ಎಕ್ ಘಡಿ ಹೊ ಖೆಳ್- ಆನಿ ಮಾಗಿರ್ ಶೂನ್ಯ್. ಮ್ಹಾಕಾ ಸಾಂಡ್ಲ್ಲೆಬರಿ ಭೊಗ್ಚೆ೦ ಗು೦ಡಿಯೆ೦ತ್ ಲೊಟ್ಲ್ಲೆಬರಿ ಭೊಗ್ಚೆ೦.
ಮ್ಹಜಾ ವಯ್ಲ್ಯಾ ವೋ೦ಟಾಕ್ ಕಾಳ್ಬಾಣ್ ಯೆತಾನಾ ಮ್ಹಜಾ ಆ೦ಗಾ೦ತ್ಲೆ ತೆ ಖೆಳ್ ಖ೦ಯ್ ಮಾಯಾಗ್ ಜಾಲೆ ತೆ ಹಿ ವ್ಹಾವ೦ವ್ಚಿ ಭು೦ಯ್ ಆನಿ ತಿಕಾ ರಚ್ಲ್ಲೊ ಸೊಮಿ ಮಾತ್ ಜಾಣಾ೦ತ್. ಹಾ೦ವ್ ದೋರ್ ವೊಡ್ಲ್ಲ್ಯಾ ಕಾ೦ಡಿಯೆಬರಿ ಶೆಳ್ಮಡೊ೦. ತೆಣೆ೦ ಚೆಡು೦ ಯೆ೦ವ್ಚೆ೦ ದಿಸಾತ್ ಜಾಲ್ಯಾರ್ ಮ್ಹಜಾ ಇಜಾರಾಚಾ ಬೊಲ್ಸಾ೦ತ್ ಕೊಟಾರ್ಲಿ ಚರ್ತಾ. ಲಾಗಿ೦ ಯೆತಾನಾ ತೆ೦ ವೊಳ್ಕಿಚೆ೦ ಪುಣೀ ಜಾಯ್ತ್ ಜಾಲ್ಯಾರ್ ತಿ ಕೊಟಾರ್ಲಿ ವಾಗೊಣಿ ಜಾತಾ. ಹಾ೦ವೆ೦ ವ್ಹಡ್ಲ್ಯಾ ಪೊಟಾಚಾ ಹಲ್ವಾಗಾರಾನ್ ಹಾಸ್ಲ್ಲೆಬರಿ ಹಾಸ್ಚೆ೦. ತರಿ ಉಲ೦ವ್ಕ್ ಜಿಬ್ ಸುಟಾನಾ. ತೆ೦ ಜಾವ್ನ್ ಉಲಯ್ಲೆ೦ ಜಾಲ್ಯಾರ್ ಬೊಲ್ಸಾ೦ತ್ಲಿ ವಾಗೊಣಿ ದಿವೊಡ್ ಜಾವ್ನ್ ಬದಲ್ತಾಲಿ. ಹಾ೦ವೆ೦ ಕಶಿ ಪುಣಿ ಮ್ಹಜಿ ಹುಶಾರಾಯ್ ದಾಕಂವ್ಕ್ ತುಕ್ಲಾವ್ಣೆಚಿಚ್ ಜಾಪ್ ದಿ೦ವ್ಚಿ ಆನಿ ಜಾತಾ ತಿತ್ಲೆ ವೆಗಿ೦ ನಿಕಳ್ಚೆ೦.
ವಾರೆ೦ ಪರ್ತುನ್ ಧೊಸ್ತಾಲೆ೦. ‘ಹೆ, ವೈರಾಗ್ಯಾ, ತೆ೦ ಮುಕಾರ್ ಕೆ೦ಳ್ಬ್ಯಾ ಫುಲಾ೦ಚಾ ಮುಳಾ೦ತ್ ಧೊವೆ೦ ಮಿನಿ ಘಾಲ್ನ್ ಬಸ್ಲಾ೦ ಪಳೆರೆ, ತೆ೦ ಕೊಲೆಜಿಚೆ ಟೆನಿಸ್ ಚಾ೦ಪಿಯನ್. ಪಾಯ್ ಪಳೆ ದೀಷ್ಟ್ ಮಾರ್ತಾನಾ ಉ೦ಡಾಚೆರ್ ಫ಼ೊಡ್ ಯೆತಾತ್.
ಮೆಲಿ೦ ತಿ೦ ಚೆಡ್ವಾ೦, ಹಾ೦ಗಾಚಿ೦ ಥ೦ಯ್ಚಿ ಆದ್ಲಿ೦ ಆನಿ ಆತಾ೦ಚಿ೦ ಎಕ್ಚ್. ಹಾ೦ವ್ ಆಟ್ ವರ್ಸಾ೦ಚೊ ಆಸ್ತಾನಾ ಶೆಜಾರ್ಚೆ೦ ಆವ್ರಿತ್ ಮಾಡಾರ್ ಚಡ್ತಾಲೆ೦. ಹಾಣೆ೦ ಟೆನಿಸ್ ಖೆಳ್ಚೆ೦ ಕಿತೆ೦?
ಪ೦ಚ್ವೀಸ್ ವರ್ಸಾ೦ ಆದಿ೦ ಹಾ೦ವ್ ವೀಸ್ ವರ್ಸಾ೦ಚೆ೦ ಪೀಲ್. ಮಿಸಾಕ್ ಯೆತಾನಾ ರಾವ್ ಲಾಗ್ಲ್ಲ್ಯಾಬರಿ ಚೆಡ್ವಾ೦ಕ್ಚ್ ಪಳ೦ವ್ಚೆ೦. ತೆದಾಳಾ ಕಾಪ್ಡಾ೦ ಉಣಿ೦. ಪುಣ್ ಎಕಮೆಕಾ ಉಲ೦ವ್ಚೆ ಸೊಡ್, ದೀಷ್ಟ್ ಲಾಯ್ಲ್ಯಾರಿ ಥಾಪ್ಡಾ೦ ಚಡ್. ಆ೦ಗ್ಲಿ೦ ಥರಾವಳ್ ಟಾಫೆಟಾ೦ಚಿ೦, ಸಿಲ್ಕಾ೦ಚಿ೦, ರಸ್ಮಾಚಿ ವಾಯ್ಲಾಚಿ೦, ಒರ್ಗೆ೦ಡಿಚಿ೦, ಆನಿ ಸುತಿ. ಬಕ್ರಮ್ ಆನಿಕಿ ಘಾಟ್ ದೆ೦ವೊನ್ ಯೇ೦ವ್ಕ್ ನಾತ್ಲ್ಲೊ. ತರಿ ಪಾಂಯ್ ದಿಸ್ತಾಲೆ ಧೊ೦ಪ್ರಾ೦ ಸಕ್ಲಾ ಆನಿ ಹಾ೦ವ್ ಬೊಕ್ಲಾಬರಿ ಹು೦ಕಾರ್ತಾಲೊ೦. ತ್ಯಾ ಪಾಂಯಾಚಾ ತೆಮೆಟೆ ಥಾವ್ನ್ ದೀಷ್ಟ್ ವಯ್ರ್ ವೆತಾಲಿ ಎಕ್ಸ್ರೇ ಕಿರ್ಣಾಬರಿ ಬೋವ್ ಸುಕ್ಷಿಮಾಯೆನ್ ತಪಾಸುನ್.
ಹೆ ಎಕ್ಸುರೆ ಅವಸ್ತೆಕ್ ಕಿತೆ೦ ಮ್ಹಣ್ತಾತ್ಗಾಯ್ ಲೊಕ್? ನಾಪಾಸ್. ಲಂಯ್ಗಿಕ್ ಲೆ೦ವ್ಟೊ ಮ್ಹಣ್ ಚಿಂತಾತ್ ಆಸೊ೦ಕಿ ಪುರೊ. ಚಿಂತಿನಾ೦ತ್, ಹಾ೦ವ್ ಹಾ೦ಗಾ ಮು೦ಬಯ್, ಎಕಾ ಉದ್ಯಾವನಾ೦ತ್ ಸಾ೦ಜೆಚೆ೦ ವಾರೆ೦ ಖಾತಾ೦ ಆನಿ ಮುಕರ್ ಬಸ್ಲ್ಲ್ಯಾ ನಾರಿ ಜನಾ೦ಗಾಕ್ ದಿಷ್ಟ್ ಸೈತ್ ಲಾಯ್ನಾ೦. ಮತಿ೦ತ್ ಹಜಾರ್ ವಾದಾಳಾ೦ ಉಟ್ಲ್ಯಾರೀ ಹಾ೦ವ್ ನರ್ ಚಲಿಯೆಲಾಗಿ೦ ಉಲಯ್ ನಾತ್ಲ್ಲೊ೦, ತೆ೦ ಚಿ೦ತಾಪ್ ಯೆತನಾ೦ಚ್ ಭಿಯಾನ್ ಥರ್ಥರ್ತಾಲೊ೦, ಕೂಡ್ ಕಾಣ್ಸಿರ್ತಾಲಿ. ಕಿತ್ಯಾಕ್ ಖ೦ಯ್ಚೆಯ್ ಥಿರ್ ಜಾಯ್ನಾ೦. ದೋನ್೦ಚ್ ದೀಸ್ ಮಾಗಿರ್ ಪಿಸೊಳ್ಯಾಚೆ ಉಜ್ಯಾಚಾ ಜಿಬೆಲಾಗಿ೦ ಖೆಳ್ ಆನಿ ಮಾಗಿರ್ ಸು೦ಯ್ಕ್.
ಪುಣ್ ಎಕ್ ಅಪ್ಲಾ ತಸಲಿ ಲಾಲ್ ಗುಲೊಬಿ ಚಲಿ ಮ್ಹಜಾ ಅ೦ತಸ್ಕರ್ಣಾ೦ತ್ ಅಶಿ ಚರ್ಲಿ, ಅಶಿ ಭರ್ಲಿ ಸೊಡಾ೦ತ್ ಗ್ಯಾಸ್ ಭರ್ಲ್ಲೆಬರಿ, ಗೊಡ್ ಗಾಲ್, ದುರ್ಸು ದೊಳೆ, ನೀಳ್ ನಾಕ್, ತಾ೦ಬ್ಶೆ೦ ತೊ೦ಡ್, ಚೆಡು೦ ಸಾಳ್ಕಾ೦ಚಾ ಘೊಸಾಬರಿ.
ಮಾದ್ರಿ೦ಗೆರ್ ಇಸ್ಕೊಲಾಕ್ ವೆತಾನಾ ಎಕ್ ದೋನ್ ಪಾವ್ಟಿ ಹಾ೦ವೆ೦ ತಾಕಾ ಪಳುಲ್ಲೆ೦. ಪಾಕಾ೦ ಉಸುಲ್ಲ್ಯಾ ಮೊರಾಚಿ ತಾಚಿ ಚಾಲ್. ಚೆಡು೦ ಯೆದೆಶೇ೦ ಮ್ಹಜಾ ದೊಳ್ಯಾ೦ಕ್ ಮಾತ್ ಸೊಭಾಯೆಚಿ ರಾಸ್ ಹಾಡಾಮಾಸಾನ್ ಗುಟ್ಲಾಲ್ಯಾಶಿ ದಿಸ್ತಾಲೆ೦.
ಮ್ಹಜೆ ಆಮ್ಚ ಭೈಣ್ ತಾಚಿ ಒಕಲ್. ಮಾವ್ಶೆಚೆ ಧುವೆಚೆ೦ ಕಾಜಾರ್ ಉಟ್ಲೆ೦ ಆನಿ ತಾ೦ಚೆ ಘರ್ ಲ್ಹಾನ್ ಜಾಲ್ಲ್ಯಾನ್ ಧನಿಯಾ೦ಗೆರ್ಚ್ ಮಾಟೊವ್ ಘಾಲ್ಲೊ. ಆಮ್ಕಾ೦ ತೀನ್ ದೀಸ್ ತಾ೦ಗೆರ್ ರಾವೊ೦ಕ್ ಆಸ್ಲ್ಲೆ೦. ತ್ಯಾ ಚೆಡ್ವಾಚೆ೦ ನಾ೦ವ್ ಕಾ೦ಯ್ ಹಾ೦ವ್ ನ್ಹೆಣಾ೦ ಆಸ್ಲ್ಲೊ೦ ಪುಣ್ ತಾಕಾ ಥ೦ಯ್ ಪಳೆಲ್ಲ್ಯಾ ಕ್ಷಣಾ ಹಾ೦ವ್ ಶಿರಿ೦ ಚುಕ್ಲೊ. ತೆ೦ ಹಾಸ್ಲೆ೦: ಆಸ್ಲ್ಲೆ೦ ಧೈರ್ ಪೂರಾಯೀ ಎಕ್ವಟಾವ್ನ್ ಹಾ೦ವೀ ಹಾಸ್ಲೊ೦.
ಮಧೆ೦ ತೆ೦ ಉಲಯ್ಲೆ೦. ಹಾ೦ವೆ೦ ಉದಕ್ ವಿಚಾರ್ಲೆ೦. ಉದಕ್ ಘೆತಾನಾ ಹಾತ್ ಕಾ೦ಪೊನ್ ಆ೦ಗಾರ್ ಶಿ೦ಪ್ಲೆ೦. ತಾಣೆ೦ ಸೊರಿ ಮ್ಹಣೊನ್ ಪುಸ್ಲೆ೦. ಮ್ಹಜೆ೦ ಶೆ೦ಕಾರೆ೦ ಇಲ್ಲೆ೦ ಫುಲ್ಲೆ೦.
“ತುಜೆ೦ ನಾ೦ವ್?’’ಪಿ೦ರ್ಗಾಲೊ೦
“ರೊಜಿ’ಸುಡಾಳ್ ಮ್ಹಣಾಲೆ೦ ತೆ೦. “ಆನಿ ತುಜೆ೦?’’
ಸಾ೦ಗ್ತಾನಾ ಹಾ೦ವ್ ಪಯ್ಲೆ ಪಾವ್ಟಿ ಸುಡಾಳ್ ಹಾಸ್ಲೊ೦.
ತ್ಯಾ ಉಪ್ರಾ೦ತ್ ತೆಣೆ೦ ಯೆತಾನಾ ಆನಿ ಹೆಣೆ೦ ಯೆತಾನಾ, ತೆ೦ ಕರ್ತಾನಾ ಆನಿ ಹೆ೦ ಕರ್ತಾನಾ, ಹಾ೦ವೆ೦ ತಾಕಾ ಪಳ೦ವ್ಚೆ ಆನಿ ತಾಣೆ೦ ಮ್ಹಾಕಾ. ರೊಸಾಚೆ ಸಾ೦ಜೆ ಭಿತರ್ ತಾಚಾ ಪಾಯಾ೦ಚೆ ನಾಕ್ಷೆ ಥಾವ್ನ್ ತಳ್ಮಟ್ಯಾಚಾ ಕೆಸಾ೦ ಪರ್ಯಾ೦ತ್ ವಿಶ್ವಾನ್ ವಿಸ್ವೊ ಮ್ಹಜೆ ಎಕ್ಸ್ರೇ ದಿಶ್ಟಿನ್ ಹಾ೦ವೆ೦ ಭೆತುನ್ ಜಾಲ್ಲೊ. ಸೊಭಾಯೆಚಿ ಪರಮಾವಧಿ. ಹಾಸ್ಚೆ೦, ತುಕ್ಲಾ೦ವ್ಚೆ೦, ಆನಿ ಉಲ೦ವ್ಕ್ ಸ೦ದಿ ಸೊದ್ಚಿ, ಇಲ್ಲೆ೦ ಕೊಚಾ೦ವ್ಚೆ೦. ಹೆ೦ ಘಡ್ತಚ್ ಆಸ್ತಾನಾ ಹಾ೦ವ್ ಮೊಗಾರ್ ಪಡ್ಲಾ೦ ಉ೦ದಿರ್ಲಿ ಖಿರಿ೦ತ್ ಪಡ್ಲ್ಲೆಬರಿ ಮ್ಹಣ್ ಭೊಗ್ಲೆ೦ ಮ್ಹಾಕಾ. ಪುಣ್ ರೊಜಿಕ್ ಕಶೆ೦ ಭೊಗ್ತಾ ಮ್ಹಣ್ ಮ್ಹಾಕಾ ಕಶೆ೦ ಕಳ್ಚೆ೦? ಚೆಡ್ವಾ ಪಯ್ಲೆ೦ಚೆ ದೋನ್ ದೀಸ್ ಮ್ಹಜೆಲಾಗಿ೦ ತಶೆ೦ಚ್ ವಾಗ್ತಾತ್. ತೆ ಚಾಲಿಕ್ ಥಿರಾಸಣ್ ಆಸಾಗಿ ನಾ ಮ್ಹಣ್ ಕಶೆ೦ ಪಾರ್ಕು೦ಚೆ?
ಹಾ೦ವ್ ಸ೦ಧಿ ಸೊಧ್ತಾಲೊ.
ವಾರೆ೦ ಪರ್ತುನ್ ಸುಂಯ್ಪಿಲಾಗ್ಲೆ೦.
“ಅಳೆರೆ ರುಶಿ ಥ೦ಯ್ ಪಳೆ ತಣಾರ್ ಎಕ್ಲೆ೦ ಗುಲೊಬಿ ನ್ಹೆಸೊನ್ ಬಸ್ಲಾ೦. ಪ್ರಾಯ್ ಚಾಳೀಸ್ ಜಾತಿತ್ ತರಿ ಪ೦ಚ್ವೀಸ್ ದಿಸ್ತಾ. ತುಕಾ ದೊಳೆ ದಿಸ್ತಾತ್ಗಿ ನಾ?
ವಾರ್ಯಾಕ್ ಇಲ್ಲಿಶಿ ಮರ್ಯಾದ್ ದೀವ್ನ್ ಹಾ೦ವೆ೦ ತವ್ಶಿನ್ ಪಳೆಲೆ೦ ಆನಿ ಮಾಗಿರ್ ದೊಳೆ ಘಶ್ಟಿಲೆ ಕೋಯ್ರ್ ಪಡ್ಲ್ಲೆ ಬರಿ. ಚಲಿಯಾ೦ಚೆ ಜಾತಿಚೆರ್ಚ್ ವೈರಾಗ್ಯಾಚಿ ಸಾಯ್ ಮಜೆ ಮತಿರ್ ಮಾ೦ಡಾಶೆ೦ ಕೆಲ್ಲೆ೦ ರೊಜಿ ತಣಾರ್ ಬಸ್ಲಾ೦. ಶೆಳೆ೦ ಉದಕ್ ವೊತ್ಲ್ಲೆಬರಿ ಜಾಲೆ೦ ಮ್ಹಾಕಾ. ಹಾ೦ಗಾ ಥಾವ್ನ್ ಧಾ೦ವೊ೦? ಧಾ೦ವ್ಚೆ ಕಿತ್ಯಾಕ್, ಹಾ೦ವೆ೦ ತಾಚಿ ಗಾ೦ಟ್ ಖೆಲ್ಯಾ? ವಚೊನ್ ಮೆಳೊ೦? ಮೆಳ್ಚೆ೦ ಕಿತ್ಯಾಕ್? ಮ್ಹಜಾ ಸ೦ತಾನಾ೦ತ್ಲೆ೦ ತೆ೦?
ತರಿ ಆತಾ೦ ಹೆ ಚಾಳೀಸ್ ಆನಿ ಪಾ೦ಚ್ವೆ ಪ್ರಾಯೆರ್ ಕುಡಿನ್ ಆನಿ ಜೊಡಿನ್ ವಾಡ್ಲ್ಲ್ಯಾ ವೆಳಿ೦ ಎಕಾ ವೊಳ್ಕಿಚೆ ಸ್ತ್ರೀಯೆಕ್ ಮೆಳ್ಲ್ಲ್ಯಾ೦ತ್ ಕಿತೆ೦? ಬೊ೦ಬಯ್ಚೆ೦ ಶಹರ್ ಹೆ೦ ಕೊಡಿಯಾಳ್ಚೆ೦ ನಾಡ್ ನ್ಹಯ್. ಹಾ೦ವ್ ಬೆಸಾ೦ವಾಚಾ ನೊವ್ರ್ಯಾಬರಿ ರೊಜಿಮುಕಾರ್ ಉಬೊ ಜಾಲೊ೦. ಆನಿ ತೆ೦ ಶೆರ್ಮೆಲ್ಲೆ೦ ಮ್ಹಾಕಾ ಕಳ್ಳೆ೦.
“ಒಳಕ್ ಕಳ್ಳಿ?’’
“ಕಳಾನಾಸ್ತಾನಾ ಕಿತೆ೦ ತುಜಿ ಜಡಾಯ್ ಮಾತ್ ಇಲ್ಲಿಶಿ ವಾಡ್ಲ್ಯಾ. ನಾತ್ಲ್ಯಾರ್ ಕಾ೦ಯ್ ಬದ್ಲೊಂಕ್ ನಾ೦ಯ್. ತುಕಾ ಮ್ಹಜಿ ಒಳಕ್ ಕಶಿ ಕಳ್ಳಿಗಿ ಮ್ಹಣ್?’’
“ಒಹ್, ತು೦ ಆನಿಕಿ ತಶೇ೦ಚ್ ಆಸಾಯ್.’’
“ವ್ಹಯ್ಗಿ?’’ ತೆ೦ ಆತಾ೦ ಮಾತ್ಶೆ೦ ಸುಡಾಳ್ ಹಾಸ್ಲೆ೦.
ಆಮಿ ಉಲಯ್ಲ್ಯಾ೦ವ್, ಹಾ೦ವ್ ಚಡಿತ್ ಉಲಯ್ಲೊ. ಸರ್ವ್ ಗಜಾಲಿ೦ಚಿ ಆರ್ತಾವ್ಣಿ ಪರ್ತಾವ್ಣಿ ಜಾಲ್ಯಾ ಉಪ್ರಾ೦ತ್ “ ಮ್ಹಾಕಾ ಭುರ್ಗಿ೦ ಕಿತ್ಲಿ೦?’ಮ್ಹಣ್ ವಿಚಾರ್ತಾನಾ ಹಾ೦ವ್ ಭಾತ್ ಖಾವ್ನ್ ಉಟ್ಲ್ಲ್ಯಾ ಕೊ೦ಬ್ಲ್ಯಾಬರಿ ಹಾಸ್ಲೊ೦. ಹಾ೦ವ್ ಕಾಜಾರ್ ಜಾ೦ವ್ಕ್ ನಾ ಮ್ಹಣ್ ಸಾ೦ಗ್ಲೆ೦.
“ ಹಾ೦ವ್ ಬಾಪಯ್ಬರಿ ದಿಸ್ತಾ೦ ತುಕಾ?
ಹಾಕಾ ತೆ೦ ತೊ೦ಡಾನ್ ಹಾಸೊನ್ ದೊಳೆ ಲಿಪಯ್ತಾನಾ ತಾಚಾ ಕಾಳ್ಜಾಚೊ ಕಾ೦ದೊ ಖರ್ಡುನ್೦ಚ್ ಕಾಡ್ಯಾ೦, ಆನ್ನ್ ಸುಯೋಗ್ ಲಾಬ್ಲಾ ಮ್ಹಣ್ ಸುರು ಕೆಲೆ೦. ಲ್ಹಾನ್ ಪಣಾ ಥಾವ್ನ್ ನೆರಾಯ್ಲೆ೦. ಮ್ಹಾಕಾ ಶಿರಾ೦ಚಿ೦ ಪೊತಾ೦ಚ್ ಹುಲ್ಪಾಯ್ಜೆ ಆಸ್ಲ್ಲಿ೦. ರೊಸಾಚಾ ದಿಸಾ ಪರ್ಯಾ೦ತ್ ಪಾವ್ಲೊ೦. ಇತ್ಲೆ೦ ಸಗ್ಳೆ೦ ಸಾ೦ಗ್ತಾನಾ ಮಧೆ೦ ಮಧೆ೦ ತಾಚೆ ದೊಳೆ ಪಳಯ್ತಾಲೊ೦. ಆನಿ ತೆ೦ ಆಪ್ಲೆ ದೊಳೆ ಮ್ಹಜಾ ದೊಳ್ಯಾ೦ ಥಾವ್ನ್ ಚುಕಯ್ತಾಲೆ೦ ಮ್ಹಣ್ ಫುಗ್ತಾಲೊ೦. ಮಾಗಿರ್ ತಾಕಾ ಲೆಕಿನಾಸ್ತಾನಾ, ಪಳೆನಾಸ್ತಾನಾ, ಶೀದಾ ಸಾ೦ಗತ್ ಗೆಲೊ೦.
‘ಹೆ ಚಲಿಯೆನ್ ಮ್ಹಾಕಾ ಸದಾ೦ ಆ೦ಕ್ವಾರ್ ರಾವಯ್ಲೊ. ಆಯ್ಕ್ ತಿ ಕಾಣಿ, ತ್ಯಾ ಚೆಡ್ವಾಚಿ ಸೊಭಾಯ್ ಹಾ೦ವೆ೦ ತಾಕಾ ಸಾ೦ಗೊನ್ ಜಾಲಿ. ತಾಚೊ ವಿಶ್ವ್ಯಾನ್ ವಿಸ್ವೊ ವರ್ಣುನ್ ತಿರ್ಸಿಲೊ.
‘ಕಾಜಾರಾಚಾ ಫ಼ಾ೦ತ್ಯಾರ್ ತೆ೦ ಎಕಾ ಕುಡಾ೦ತ್ ವಸ್ತುರ್ ಬದಲ್ತಾನಾ ಹಾ೦ವ್ ಪಾಟ್ಲ್ಯಾನ್೦ಚ್. ಹಾ೦ವ್ ತ್ಯಾ ಸಗ್ಳ್ಯಾ ದಿಸಾ೦ನಿ ಪಿಶ್ಯಾ ಪೆಟ್ಯಾಬರಿಚ್. ತೆದಾಳಾ ತೆ೦ ವಯ್ಲೊ ಬ್ಲಾವ್ಜ್ ನಿಕ್ಳಾ೦ವ್ಕ್ ಪ್ರಯತ್ನ್ ಕರ್ತಾ ಮಾತ್. ತೆದಾಳಾಚ್ ತಾಣೆ೦ ಮ್ಹಾಕಾ ಪಳೆಲೆ೦. ‘ಹೇಯ್, ಭಾಯ್ರ್ ವಚ್’ ಮ್ಹಣ್ ಹಾ೦ಕ್ರೆಲೆ೦. ಹಾ೦ವ್ ಭಾಯ್ರ್ ಗೆಲೊ೦ ಹಾ೦ವೆ೦ ತಾಚಾ ಪೊಟಾಚಿ ತೀನ್ ಇ೦ಚಾ೦ಚಿ ಪುಣಿ ಶಿರ್ ಪಳೆಲ್ಲಿ. ಜಾಮಯ್ಕಾ ಪೊಪಾಯೆಚಾ ಕಾತರ್ಲೆಲೆ ಶಿರೆಬರಿ. ತಾಚೆ ತಿತ್ಲೊ ಸೊಭಿತ್ ಜಾಗೊ ಹ್ಯಾ ಚೆಡ್ವಾ೦ ಮಧೆ೦ ದುಸ್ರೊ ನಾ.
ಹಾ೦ವ್ ದಮ್ಮ್ ಕಾಣ್ಘೆ೦ವ್ಕ್ ಮಾತ್ ಇಲ್ಲೊಸೊ೦ ರಾವ್ಲೊ೦. ತರಿ ತಾಕಾ ಪಳೆನಾಸ್ತಾನಾ ಶೆ೦ಕಾರೆ ಫುಲವ್ನ್ ಉಲಯಿತ್ ಸುಟ್ಲೊ೦.
‘ಹಾ೦ವ್ ತಾಚಾ ಮೊಗಾರ್ ಪಡ್ಲ್ಲೊ೦ ಮೇಲಾ೦ತ್ ಬುಡ್ಲ್ಲ್ಯಾ ದೊಶಿಚಾ ಕುಡ್ಕ್ಯಾಬರಿ. ಕಶೆ೦ ಸಾ೦ಗೊ೦, ಕೆದಾಳಾ ಸಾ೦ಗೊ೦, ಮ್ಹಳ್ಳೆ೦ ಚಿ೦ತಪ್ ಯೆತಾನಾ೦ಚ್ ಹರ್ಧ್ಯಾ೦ತ್ ರಯ್ಲ್ ಇ೦ಜಿನ್ ಚಾಲು ಜಾತಾಲೆ೦. ಕಾಜಾರಾಚೆ ರಾತಿ೦, ಜೆವ್ಣಾ ಆದಿ೦ ಮಾಟ್ವಾ೦ತ್ ಗೊವ್ಜಿ ಜಾತಾಲಿ, ಪದಾ೦ ಜಾತಾಲಿ೦, ಪಯ್ಶಿಲಿ೦ ಸಯ್ರಿ೦ ಆನಿ ಶೆಜಾರ್ಚಿ೦ ಒತ್ತಾಯೆನ್ ರಾವ್ಲ್ಲಿ೦. ಹಾ೦ವ್ ಸೊಪ್ಯಾರ್ ಗ್ರಾದಿ ಮುಳಾ೦ತ್ ದವರ್ಲ್ಲ್ಯಾ ವಕೀಲ್ ಬಾ೦ಕಾರ್ ಬಸ್ಲ್ಲೊ೦. ಕೊಣೆ೦ಗಿ ಪಾನ್ ಫ಼ೊಡಿಚೆ೦ ತಬಕ್ ವಿಚಾರ್ಲೆ೦ ಆನಿ ರೊಜಿಕ್ ಬಾ೦ಗ್ ದಿಲೆ. ರೊಜಿ ಕುಶಿಚಾ ದಾರಾ೦ತ್ಲ್ಯಾನ್ ಯೇವ್ನ್ ವಕೀಲ್ ಬಾ೦ಕಾ ವಯ್ಲ್ಯಾನ್, ಸೊದುನ್ ಯೇವ್ನ್ ಮ್ಹಳ್ಳೆಬರಿ ತಬಕ್ ದೀವ್ನ್, ವಯ್ಲ್ಯಾನ್ ಕಿತ್ಯಾ ತರಿ ವಿಶಾ೦ತ್ಲೆ೦ ಉಲೊವ್ಣೆ೦ ಕರ್ತಾನಾ ಥೊಡೆಶ್ಯೊ ಮೊಲಾಧಿಕ್ ಘಡಿಯೊ ಆಸ್ಲ್ಲ್ಯೊ. ಇಲ್ಲಿಶಿ ಕೊ೦ಕ್ಲಿ ಕಾಡ್ನ್ ಮೊಳ್ಬಾಕ್ ಪಳೆವ್ನ್೦ಚ್ ಉಲಯ್ಲೊ೦ ಹಾ೦ವ್.
‘ಕೊಣಾಕ್ ಕಳಾನಾತ್ಲ್ಲೆಬರಿ ಧೊ೦ಪ್ರಾ ವಯ್ಲ್ಯಾನ್ ಹಾತ್ ಚರವ್ನ್, ತೆ೦ ಮ್ಹಾಕಾ ಘಷ್ಟೊನ್ ಆಸ್ತಾನಾ೦ಚ್ ಹಾ೦ವೆ೦ ತಾಚಾ ಮಾಸಾಳ್ ಪಾಯಾ೦ಕ್ ಬೋವ್ ನಾಜೂಕ್ ಥರಾನ್ ಮ್ಹಜಾ ಮೆ೦ದ್ವಾ೦ತ್ಲೆ೦ ಮೊಗಾಳ್ ಹಿಶಾರೆ ಹಾತಾಚಾ ಬೊಟಾ೦ನಿ ಪಾಶಾರ್ ಕರ್ನ್, ತಾಚಾ ಮಾಸಾ೦ ಥಾವ್ನ್ ಶಿರಾ೦ಕ್, ಆನಿ ಶಿರಾ೦ ಥಾವ್ನ್ ಶೀದಾ ಕಾಳ್ಜಾಕ್ ಇ೦ಜೆಕ್ಶನ್ ದಿಲ್ಲ್ಯಾಬರಿ ಎಕ್ ಚಿಮ್ಟೊ ಕಾಡ್ಲೊ. ‘ಹಾ೦ವ್ ತುಜೊ ಮೋಗ್ ಕರ್ತಾ೦, ತು೦ ಮ್ಹಜೆಲಾಗಿ೦ ಕಾಜಾರ್ ಜಾ’ ಮ್ಹಣ್ ಪಾಚರ್ತಾಲೊ ತೊ ಚಿಮ್ಟೊ.
ಮ್ಹಜೆ೦ ತೊ೦ಡ್ ಆತಾ೦ ಇಲ್ಲೆಶೆ೦ ಧೊವ್ಶೆಲೆ೦. ಪುಣ್ ದೀಸ್ ಕಾಳ್ಶೆಲ್ಲೊ ದೆಕುನ್ ಧಯ್ರೆಲೊ೦. ತೆ ಘಡಿಯೆ ಥಾವ್ನ್ ತೆ೦ ಮ್ಹಜೆಲಾಗಿ೦ ಉಲಯ್ಲೆ೦ನಾ. ಹಾ೦ವ್ ವಳ್ವಳ್ಳೊ೦. ತೆ೦ ಮ್ಹಾಕಾ ಚುಕವ್ನ್ ಕಾಣ್ಘೆಲಾಗ್ಲೆ೦. ಹಾ೦ವ್ ತ್ಯಾ ಘರಾ ಥಾವ್ನ್ ಭಾಯ್ರ್ ಸರ್ತಾನಾ ತೆ೦ ಜಾಯ್ ಜಾಯ್ ಮ್ಹಣ್ ಶೆಜಾರಾ ವಚೊನ್ ರಾವ್ಲೆ೦ ಮಾಗಿರ್ ತೊ೦ಡ್ ಗಳೊವ್ನ್ ಮ್ಹಜೆ ಇತ್ಲ್ಯಾಕ್ ಮ್ಹಳ್ಳ್ಯಾಬರಿ ಹಾ೦ವೆ೦ ಕಾಬಾರ್ ಕೆಲೆ೦.
‘ತೆ೦ ಮ್ಹಾಕಾ ಪರ್ತುನ್ ಮ್ಹಳ್ಳೆ೦ನಾ. ಹಾ೦ವೆ೦ ಎಕಾಚ್ ಚಲಿಯೆಚೊ ಮೋಗ್ ಕೆಲ್ಲೊ. ದುಸ್ರ್ಯಾಕ್ ಪರ್ತುನ್ ಪಳೆಲ್ಲೆ೦ನಾ.’ಲೋವ್ ತಾಕಾ ಪಳೆಲೆ೦ ಹಾ೦ವೆ೦. ಮಾಜ್ವೊನ್ ಯೆ೦ವ್ಚಾ ಉಜ್ವಾಡಾ೦ತ್ � ಕಳ್ವಳ್ಯಾ೦ನಿ ಭರ್ಲ್ಲೆ೦ ದಿಸ್ಲೆ೦ ಮ್ಹಾಕಾ.
“ಹರಾಮಿ ತು೦’ಸಟ್ಟ್ ಕರ್ನ್ ಮ್ಹಣಾಲೆ೦ ತೆ೦. “ತು೦ ಉಲಯ್ಲೊಯ್ ಮ್ಹಣ್ ಹಾ೦ವೀ೦ ಸಾ೦ಗ್ತಾ. ಹಾ೦ವ್ ತುಜೊ ಮೋಗ್ ಕರ್ತಾ೦ ಮ್ಹಣ್ ಕೊಣಿ ತಸಲೊ ಹುನ್ವೊನಿ ಚಿಮ್ಟೊ ಕಾಡ್ತಾ? ತೀನ್ ದೀಸ್ ಮ್ಹಾಕಾ ತುಜಾ ಘಾತ್ಕಿ ಚಿಮ್ಟ್ಯಾಚೊ ಹುಲೊಪ್ ಗೆಲೊನಾ. ಹಾ೦ವ್ ಆಶೆವ್ನ್ ತುಜೆ ಸರ್ಶಿ೦ ಯೇವ್ನ್ ಬಾಗ್ವಾಲ್ಲಿ೦. ನಾತ್ಲ್ಯಾರ್ ಮ್ಹಾಕಾ ಕಿತೆ೦ ಮೆಟಾ೦ ದೆ೦ವೊನ್ ಸಕ್ಲಾ ವಚೊ ನಜೊ ಆಸ್ಲ್ಲೆ೦? ಮ್ಹಜೊ ಕಾನ್ ತುಜಾ ಎಕಾ ಉತ್ರಾಕ್ ಖತ್ಕತೊ ತಾನೆವ್ನ್ ತುಜಾ ವೊ೦ಟಾ೦ಲಾಗಿ೦ ಹಾಡ್ನ್ ದವರ್ಲೊ. ಆನಿ ಭೆಷ್ಟೆ೦ಚ್ ತುಕಾ ವೇಳ್ ಆನಿ ಧೈರ್ ಮೆಳ್ಚಾ ಖಾತಿರ್ ಸಕಯ್ಲ್ಯಾ೦ಲಾಗಿ೦ ಉಲವ್ನ್ ರಾವ್ಲಿ೦. ತು೦ವೆ೦ ತಿತ್ಲ್ಯಾಭಿತರ್ ಕಾಡ್ಲ್ಲ್ಯಾ ಚಿಮ್ಟ್ಯಾನ್ ಮ್ಹಜಾ ಕಾನಾ೦ತ್ಲ್ಯಾನ್ ಕಾಜುಲೆ ದಾ೦ವ್ಲೆ.
ಲಜೆ ಖಾತಿರ್ ಹಾ೦ವೆ೦ ಬೋಬ್ ಮಾರ್ಲಿನಾ. ಭಿತರ್ ಆರ್ಶ್ಯಾ೦ತ್ ಪಳೆತಾನಾ ರಗತ್ ಕಿ೦ಡೆಲಾ೦. ತಿರಾಸ್ಕಾರಾನ್ ಪಯ್ಸ್ ಕರು೦ಕ್ ಅಸಲ್ಯೊ ವಾಟೊ ನ್ಹಂಯ್ಗಿ ಮ್ಹಣ್ ರಾತ್ ಭರ್ ರಡ್ಲಿ೦.’ತಾಣೆ೦ ರಾವಯ್ಲೆ೦. ಆಮ್ಕಾ೦ ದೊಗಾ೦ಯ್ಕೀ ಥೊಡೊ ವೇಳ್ ಎಕಾಮೆಕಾ ಪಳೆ೦ವ್ಕ್ಯೀ ಜಾ೦ವ್ಕ್ ನಾ ಮಾಗಿರ್ ಹಾ೦ವೆ೦ಚ್ ಮೊನೆಪಣ್ ಭೆತ್ಲೆ೦.
“ತೆ೦ ಮೊರೊ೦ ರೊಜಿ ತು೦ ಆತಾ೦ ಕಿತೆ೦ ಕರ್ತಾಯ್?’’
“ಶಿಕಯ್ತಾ೦’’
“ಖ೦ಯ್?
“ಹಾ೦ಗಾಚ್ ಎಕಾ ಹಾಯ್ ಸ್ಕೂಲಾ೦ತ್.’’
“ರಾವ್ತಾಯ್ ಖ೦ಯ್?’’
“ಹೊಸ್ಟೆಲಾ೦ತ್.’’
“ಮ್ಹಾಕಾ ಸಮ್ಜಾನಾ’ಗುಣ್ಗುಣ್ಲೊ೦ ಹಾ೦ವ್. ತೆ೦ ಹಾಸ್ಲೆ೦ ಆನಿ ಸಾ೦ಗಾಲಾಗ್ಲೆ೦.
“ಹಾ೦ವ್ ಕಾಜಾರ್ ಜಾವ್ನಾ. ತುಜಾ ಚಿಮ್ಟ್ಯಾ ಉಪ್ರಾ೦ತ್ ಮ್ಹಾಕಾ ಜಿಣಿಯೆಚೊ ತಾತ್ಸಾರ್ ದಿಸೊ೦ಕ್ ಲಾಗ್ಲೊ. ಎಕ್ಸುರೊ ಥರ್ ಆ೦ಗಾರ್ ಆಯ್ಲೊ ಆನಿ ಹಾ೦ವೆ೦ ಕೊಲೆಜ್ ಕೆಲಿ. ಬಿ.ಎಡ್. ಮುಗ್ದಿಲೆ೦ ಆನಿ ಟೀಚರ್ ಜಾಲಿ೦. ಮಾ೦ಯ್ ಸರ್ತಚ್ ಮ್ಹಜೆ ಬಾವ್ಜೆಲಾಗಿ೦ ಮ್ಹಾಕಾ ವರ್ಗಾಲೆ೦ ನಾ. ದೆಕುನ್ ಗಾ೦ವ್ ಸೊಡ್ನ್ ಹಾ೦ಗಾ ಯೇವ್ನ್ ವರ್ಸಾ೦ ಪಾ೦ಚ್ ಜಾಲಿ೦.
ಮ್ಹಾಕಾ ವೊಡ್ಲ್ಯಾರಿ ಜೀಬ್ ಭಾಯ್ರ್ ಯೇನಾತ್ಲ್ಲಿ. ದಿವೆ ಪೆಟ್ಲ್ಲೆ. ಭಾಯ್ಲೊ ಗುಜ್ಗುಜೊ ಆಮ್ಚಾ ಕಾನಾ೦ಕ್ಚ್ ವಚಾನಾತ್ಲ್ಲೊ. ಸುಮಾರ್ ವೆಳಾನ್ ತೆ೦ಚ್ ಮ್ಹಣಾಲೆ೦. “ಆತಾ೦ಯೀ ತುಕಾ ಕಾ೦ಯ್ ಉಲ೦ವ್ಚೆ ಆಸ್ಲ್ಯಾರ್ ಭ್ಯೆ೦ ದಿಸ್ತಾಗಿ?
ವಾರ್ಯಾ೦ತ್ಲೆ ಪಾರ್ವೆ ಉಡೊನ್ ಗೆಲ್ಲೆಬರಿ ಮ್ಹಜಾ ತೊ೦ಡಾ೦ತ್ಲ್ಯಾನ್ ಸುಟ್ಲ್ಲ್ಯೊ ಹಾಸೊ ಮರ್ಯಾದಿ ಖಾತಿರ್ ದಾ೦ಬ್ಲ್ಯೊ.
“ಚಿಮ್ಟೊ ಕಾಡು೦ಗಿ? ತೆ೦ಯೀ ವೊಮ್ತೆ೦ ಪಡೊನ್ ಹಾಸ್ಲೆ೦.
ತ್ಯಾ ಉಪ್ರಾ೦ತ್ ಥೊಡ್ಯಾಚ್ ದಿಸಾ೦ನಿ ಆಮಿ ಪರ್ತುನ್ ಪರ್ತುನ್ ಮೆಳೊನ್ ಆಮ್ಚೆ೦ ಕಾಜಾರ್ ಠರಾಯ್ಲೆ೦. ಪ೦ಚ್ವೀಸ್ ವರ್ಸಾ೦ಚೆ೦ ಸಾ೦ಡ್ಲ್ಲೆ ತರ್ನಾಟ್ಪಣ್ ವೆಗಿ೦ ವಿಸ್ರೊನ್ ಗೆಲೆ೦ ತರಿ ಚಿಮ್ಟೊ ವಿಸರ್ಲೊ ನಾ.
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
