ಕವಿತಾकविताPoem

ಅಜ್ಯಾಪಾಂ

ಕವಿತಾಝರ್ - 22

ಕವಿತಾಝರ್ - 22

ಅಜ್ಯಾಪಾಂ

ಅಚರ್‍ಯಾಂಚೊ ಪಾವ್ಸ್

ಬೆಸಾಂವಾಂಚೆ ಫೆಸ್ತ್

ಸಗ್ಳ್ಯಾನ್‌ಯ್ ಸ್ಪಿರಿತ್

ಕುಂಬು ಹಾಡಾಂ ಜಾಲಿಂ ಘಟ್

ಉಭಾರ್‍ತಾನಾ ತಾಣೆ ಹಾತ್

ಶೆವ್ಟಾಲೆ ಪಿಡೇಸ್ತ್?

ಕಸ್ಲೆಂ ಹೆಂ ಅಮಾಲ್?

ಮೆಂದ್ವಾ ಟ್ಯೂಮರ್ ನಪಂಂಯ್ಚ್

ಕೆನ್ಸರ್ ಗೆಲೆಂ ಖಂಯ್ಸರ್?

ಕಿಡ್ನೆಂಕ್‌ಯ್ ಮೆಳ್ಳೆಂ ಬಳ್

ಉದಾಕ್ ಜಾಲಿ ಚರಾಬ್

ಘಾತ್ ಕೆಲೊನಾ ಫಟಂವ್ಚಾ ಕಾಳ್ಜಾನ್

ಪೆಂಕ್ಟಾ ದೂಕ್ ಗಳೊನ್ ಗೆಲಿ

ಪೆಂಕ್ಟಾ ಸಕಯ್ಲ್ ಖೊರೊಜ್ ಜಿರೊನ್ ಗೆಲಿ

ಚಡ್ಲೆಂ ವೀರ್‍ಯ್ ಭರ್‍ಲೊ ಗರ್ಬ್

ಕುರ್‍ಡ್ಯಾಕ್‌ಯ್ ದಿಸ್ಲೆಂ ಕಾಳೆಂ

ಕೆಪ್ಪ್ಯಾನ್ ಆಯ್ಕಾತಾ ಮ್ಹಳೆಂ

ಬೆಬ್ದೊ ಜಾಲೊ ನೀಟ್

ಗೆಲ್ಯೊ ಪೆಲ್ಯಾನ್ ಶಿರಾಪ್ ಗಾಳಿ

ಮಹಿಮಾ ಹೊಗ್ಳ್ಯಾಪ್ ಹಾಂಗಾ ಖಾಲಿ

ದೀಕ್ ದೂದ್ ಜಾಲೆಂ

ವೀಕ್ ಅಮೃತ್ ಜಾಲೆಂ

ದೂಕ್ ಘಡ್ಯೆಕ್ ಪೊಳ್ಳೆಂ

ಪುಂಜಯ್ಲೆಂ ಧಿರ್‍ವೆಂ

ಪ್ರೈಜ್ ದಿ ಲೊರ್ಡ್!

ಅಪ್ರಾಧಿ ಕೊಣ್?

ಪ್ರವಾದಿ ಕೊಣ್?

ಬೆನ್ನಿ ಹಿನ್ನಾನ್ ಸಗ್ಳೆಂ ಬದ್ಲಿಲೆಂ

ದೆವಾಕ್‌ಚ್ ಬದ್ಲಿಲೆಂ

ಅಜ್ಯಾಪಾಂನಿ.

ಹಾಂವ್ ಪಿಡೇಸ್ತ್ ನ್ಹಯ್?

ಮ್ಹಣಾ ಮಾಕಾ ಕೊಡ್ಕಾರ್

ನಿರ್ಭಾಗಿ ಪಾತ್ಕಿ!

ಭಾಯ್ರ್‌ಚ್ ಉರ್‍ಲಾಂ ಅಜ್ಯಾಪಾಂನಿ

ಪರತ್ ಉಗ್ತೆ ಪಡ್ಲ್ಯಾತ್ ಘಾಯ್

ಭಂವ್ತಾತ್ ಮೂಸ್

ಪವಿತ್ರ್ ಅತ್ಮೊಯ್ ಉಭಾನಾ ಹೆಣೆಂ

ರಾಕೊನ್ ಆಸಾಂ

ಅಜ್ಯಾಪಾಂ ನೆಣಾಸ್‌ಲ್ಲ್ಯಾ

ಕಾಮ್ ನಾತ್‌ಲ್ಲ್ಯಾ

ಹ್ಯಾ ವಾಟೆನ್

ಹ್ಯಾಚ್ ವ್ಹಾಟೆನ್ ಸೊಧುನ್ ಯೇಂವ್ಚಾ

ಮಾಯಾಮೊಗಾಚಾ ಭಯ್ಣಿಂಕ್!

ಉಭಾರ್‍ತಾಂ ಕಾಂಪ್ಚೊ ಹಾತ್....

ವ್ಹಾಟ್ ಕೆದಿಂಚ್ ಚುಕಾನಾ ಜಾಂವ್ ತಾಂಚಿಯ್

ಮೊಗಾಸೆವೆಕ್ ಹಲ್ಕುಂಚಾ

ಹ್ಯಾ ಭಿರಾಂಕುಳ್ ಅಜ್ಯಾಪಾಂನಿ.

$Placeholder: the original page gave this picture no description, and none has been written yet. It came from daaiz\daaiz\kavitha\kj\kj22.asp.$

ಆಂಡ್ರು ಎಲ್. ಡಿ’ಕುನ್ಹಾ

Comments

No comments yet. Be the first to say what you thought of it.

Leave a comment

Write in Kannada, Nagari or Romi, whichever you like. He reads every comment before it appears here, so yours will not show straight away. Your name is printed above it.

Your name

Your comment

0 of 2,000 characters

Only your name and your comment are kept - no email address. They stay on the site until he removes them; to have yours taken down, write to him through the contact form and say which one. Privacy.

Author

ಆಂಡ್ರ್ಯೂ ಎಲ್. ಡಿಕುನ್ಹಾ

1984 (ಪಾಟ್ಲ್ಯಾ 42 ವರ್ಸಾಂ) ಥಾವ್ನ್ ಕೊಂಕ್ಣೆಂತ್ ಸಾಹಿತ್ಯ್ ರಚುನ್ ಆಸ್ಚೊ ಆಂಡ್ರ್ಯೂ ಎಲ್. ಡಿಕುನ್ಹಾ ಏಕ್ ಲೊಕಾಮೊಗಾಳ್ ಕವಿ. ಗಾಂವಾನ್ ಗುರ್ಪುರ್ ಕಿನ್ನಿಕಂಬ್ಳಾಚೊ ತೊ ಅತಾಂ ಇಜಯ್ ವಸ್ತಿ ಕರ್ನ್ ಆಸಾ. ದೆವಾಧೀನ್ ಡೆನಿಸ್ ಆನಿ ಮೇರಿ ಡಿಕುನ್ಹಾ ಹಾಂಚ್ಯಾ ಸಾತ್ ಭುರ್ಗ್ಯಾಂ ಪಯ್ಕಿ ತೊ ನಿಮಾಣೊ. ತಾಣೆಂ 1000 ವಯ್ರ್ ಕವಿತಾಂ, 150 ಕ್ ಮಿಕ್ವೊನ್ ಲೇಖನಾಂ ಆನಿ 30 ಮಟ್ವ್ಯೊ ಕಾಣಿಯೊ ಬರಯ್ಲ್ಯಾತ್. ’ವ್ಹಳೂ ವ್ಹಳೂ ವ್ಹಾಳ್ ವ್ಹಾಳ್ಯಾ’ (2004 - ಆಶಾವಾದಿ ಪ್ರಕಾಶನ್), ’ಅಂಜುರಾಚೆಂ ಪಾನ್’ (2013 - ಕವಿತಾ ಟ್ರಸ್ಟ್) ಆನಿ ’ಆಯೆರಾಚೊ ಬೂಕ್’ (2014 - ಕರ್ನಾಟಕ ಕೊಂಕಣಿ ಸಾಹಿತ್ಯ್ ಅಕಾಡೆಮಿ) ತಾಚೆ ಪ್ರಕಟಿತ್ ಕವಿತಾ ಪುಂಜೆ. ತಾಚ್ಯಾ "ಅಂಜುರಾಚೆಂ ಪಾನ್" ಪುಸ್ತಕಾಕ್ ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿ ಪ್ರಶಸ್ತಿ, AIKWO (ಅಖಿಲ್ ಭಾರತ್ ಕೊಂಕಣಿ ಬರೊವ್ಪ್ಯಾಂಚೊ ಎಕ್ತಾರ್ ಪುರಸ್ಕಾರ್), ವಿಮಲಾ ವಿ. ಪೈ ವಿಶ್ವ್ ಕೊಂಕಣಿ ಕವಿತಾ ಪುರಸ್ಕಾರ್ ಆನಿ ಡಾ. ಟಿ. ಎಮ್. ಎ. ಪೈ ಪುಸ್ತಕ್ ಪುರಸ್ಕಾರ್ ತಾಕಾ ಲಾಬ್ಲ್ಯಾತ್. ಆಯ್ಲೆವಾರ್ ತಾಚ್ಯಾ "ಉಜ್ವಾಡಾಚ್ಯೆ ವೆಂಗೆಂತ್" ಕವಿತಾ ಪುಸ್ತಕಾಕ್ ಕರ್ನಾಟಕ ಕೊಂಕಣಿ ಸಾಹಿತ್ ಪ್ರಶಸ್ತಿ ಲಾಬ್ಲ್ಯಾ. 2023 ವರ್ಸಾಚಿ ರಾಜ್ಯ್ ಮಟ್ಟಾಚಿ “ಸಂದೇಶ ಕೊಂಕ್ಣಿ ಸಾಹಿತ್ಯ್ ಪ್ರಶಸ್ತಿ” ತಾಕಾ ಲಾಬ್ಲ್ಯಾ.

ಮಂಗ್ಳುರ್ ಆಕಾಶ್‍ವಾಣಿ ಥಾವ್ನ್ ಸುಮಾರ್ 40 ಕೊಂಕ್ಣಿ ಕಾರ್‍ಯಕ್ರಮಾಂ ತಾಣೆಂ ಸಾದರ್ ಕೆಲ್ಯಾಂತ್. ಸುಮಾರ್ 38 ವರ್ಸಾಂ ಆದಿಂ ರಾಕ್ಣೊ ಪತ್ರಾರ್ ‘ಆಂದ್ರು ಮಾಮ್’ ಲಿಖ್ಣೆ ನಾಂವಾನ್ ಭುರ್ಗ್ಯಾಂಚೊ ಸಂಸಾರ್ ವಿಭಾಗ್ ತಾಣೆಂ ಚಲವ್ನ್ ವ್ಹೆಲಾ. ಆಮ್ಚೊ ಯುವಕ್ ಪತ್ರಾರ್ ನಿರ್ವಾಹಕ್ ಸಂಪಾದಕ್ ಜಾವ್ನ್ ವಾವ್ರ್ ದಿಲಾ. "ಇಜಯ್ಚೊ ಕಳೊ" ಪತ್ರಾಚೊ ಸಂಪಾದಕ್ ಜಾವ್ನ್ ವಾವುರ್‍ಲಾ. ದಾಯ್ಜಿ ದುಬಾಯ್ ಬರವ್ಪ್ಯಾಂಚ್ಯಾ ಎಕ್ತಾರಾಚೊ ಸಂಪಾದಕ್ ಜಾವ್ನ್ ವಾವ್ರ್ ದಿಲಾ. ಮಾಯ್‍ಭಾಸ್.ಕೊಮ್ ಜಾಳಿ ಜಾಗ್ಯಾರ್, ರಾಕ್ಣೊ, ದಿರ್ವೆಂ, ಉಜ್ವಾಡ್ ಪತ್ರಾಂನಿ ಕವಿತಾ ಅಂಕಣ್ ತಾಣೆಂ ಚಲಯ್ಲಾಂ. ರಾಕ್ಣ್ಯಾರ್ ತಾಚೊ "ಕಾಸ್ ಸಂಸಾರ್" ಅಂಕಣ್, ನಮಾನ್ ಜೆಜು ಬಾಳೊಕ್ ಪತ್ರಾರ್ "ಖಾಸ್ ಸಂಸಾರ್" ಅಂಕಣ್ ಅನಿ ಆಮ್ಚೊ ಸಂದೇಶ್ ಪತ್ರಾರ್ ಸಕಾಳಿಕ್ ಲೇಖನಾಂ ಸರಾಗ್ ಪ್ರಕಟ್ ಜಾವ್ನ್ ಆಸಾತ್. ತಾಣೆಂ ಆಟ್ ಪುಸ್ತಕಾಂಕ್ ಪ್ರಸ್ತಾವನ್ ಬರಯ್ಲಾಂ. ವೆವೆಗ್ಳ್ಯಾ ಕೊಂಕ್ಣಿ ಕವಿತಾ ಸ್ಪರ್ದ್ಯಾಂಚೊ, ಕೊಂಕ್ಣಿ ಕವಿತಾ ಸಾದರ್ ಸರ್ತೆಂಚೊ ತಶೆಂಚ್ ಕರ್ನಾಟಕ ಕೊಂಕ್ಣಿ ಸಾಹಿತ್ಯ್ ಅಕಾಡೆಮಿಚ್ಯಾ ಪುಸ್ತಕ್ ಪ್ರಶಸ್ತೆಚೊ ವರಯ್ಣಾರ್ ಜಾವ್ನ್ ವಾವ್ರ್ ದಿಲಾ. ಗಾಂವಾಂತ್ ಆನಿ ಪರ್ಗಾಂವಾಂತ್ ಸಬಾರ್ ಕವಿತಾಗೋಶ್ಟಿ ತಾಣೆಂ ಚಲವ್ನ್ ವೆಲ್ಯಾತ್. ಕವಿತಾಂ ವಿಶಿಂ ಸಬಾರ್ ಪ್ರಬಂಧ್ ಮಂಡನ್ ಕೆಲ್ಯಾತ್ ಆನಿ ಉಪನ್ಯಾಸ್ ದಿಲ್ಯಾತ್. “ಕವಿತಾ ಟ್ರಸ್ಟ್” ಚೊ ತೊ ಟ್ರಸ್ಟಿ ಜಾವ್ನ್ ಆಸಾ. ಕವಿತಾ.ಕೊಮ್ ಜಾಳಿ ಜಾಗ್ಯಾರ್ ಸಂಪಾದಕೀಯಾಂ ತೊ ಬರಯ್ತಾ.

All 15 pages by this writer