ಕವಿತಾकविताPoem
ಕಿಶೂ,
This poem is available in its original Kannada only.
ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕವಿತಾಪಾಠ್ ಮ್ಹಳ್ಯಾರ್ ಕಿತೆಂ ಮ್ಹಳ್ಳ್ಯಾಚಾ ಸವಿಸ್ತಾರ್ ವಿವರಾಂಕ್ ಹ್ಯಾ ಪಾನಾಕ್ ಭೆಟ್ ದಿಯಾ
ಕಿಶೂ, ಬಾರ್ಕೂರ್:
’ಕಿಶೂ’ ಲಿಖ್ಣೆನಾಂವಾರ್ ಕೊಂಕ್ಣಿ ಸಾಹಿತ್ಯಾಂತ್ ಫಾಮಾದ್ ಜಾಲ್ಲೊ ಬಾರ್ಕುರ್ಚೊ ಕಿಶೋರ್ ಗೊನ್ಸಾಲ್ವಿಸ್, ಏಕ್ ಕಾಣ್ಯೆಗಾರ್, ಕವಿ, ಲೇಖಕ್, ಚಿಂತ್ಪಿ ತಶೆಂಚ್ ದಯಾಳ್ ಕಾಳ್ಜಾಚೊ ಚಿಂತ್ಪಿ. ಕೊಂಕ್ಣಿ ಭಾಸೆಚೊ, ಕೊಂಕ್ಣಿ ಮನ್ಶಾಂಚೊ ಭರ್ಪೂರ್ ಹುಸ್ಕೊ/ಮೋಗ್ ಕಾಳ್ಜಾಂತ್ ಆಸ್ಚೊ ಹೊ ಪರ್ದ್ಯಾಮುಖಾರ್ ಆಸ್ಚೊ ಭೋವ್ ಉಣೆಂ.
[ಹೆಂ ದರ್ಯಾಕ್ ಉದಾಕ್ ಬುಕಾಚೆಂ ಏಕ್ ಪ್ರಸ್ತಾವನ್ ಜಾವ್ನಾಸಾ]
ಕಿಶೂ, ಬಾರ್ಕುರ್
ದರ್ಯಾಕ್ ಕೊಣೆ೦ಯ್ ಉದಾಕ್ ದೀವ್ನ್ ಆಟಾಪಿಲ್ಲೆ೦ ಆಸಾ? ಯಾ ದರ್ಯಾಥಾವ್ನ್ ಕೊಣೆ೦ಯ್ ಉದಾಕ್ ಉಸ್ಣೆ೦ ವೆಲ್ಲೆ೦ ಆಸಾ? ಮ್ಹಜ್ಯಾ ತುಜ್ಯಾ ಸಾದ್ಯಾ ಸೊ೦ಪ್ಯಾ ಸ೦ಸಾರಾ೦ತ್ ಹಿ೦ ದೋನ್ಯ್ ಸವಲಾ೦ ಬಾಳ್ಬುದಿಚಿ೦ ಕಶಿ೦ ದಿಸೊ೦ಕ್ ಪುರೊ. ಪೂಣ್ ಕವಿ ಆನಿ ಕವಿತಾ೦ಚೊ ಸ೦ಸಾರ್ಚ್ ಬೊಲ್ತೊ. ಥ೦ಯ್ಸರ್ ದರ್ಯಾಕ್ ಉದಾಕ್ ದಿವ್ಯೆತಾ. ಅ೦ತ್ರಾಳಾ೦ತ್ಲಿ೦ ನಕ್ತಿರಾ೦ ಮೆಜ್ಯೆತಾ. ಚ೦ದ್ರಾಕ್ ಹುಮ್ಟುನ್ ಸ೦ಸಾರಾಕ್ ಹಾಡ್ಯೆತಾ. ದೆಳಿ೦ ಲಾವುನ್ ಸರ್ಗಾಕ್ ಚಡ್ಯೆತಾ. ಜಾಯ್ನಾ೦, ನಾ೦ ಮ್ಹಳ್ಳೆ೦ ಉತಾರ್ಚ್ ನಾ೦. ಕವಿಚೊ ಖೆಳ್ ಉತ್ರಾ೦ಚೊ. ತಾಚಿ ಭಾಸ್ ಕಾಳ್ಜಾಚಿ. ದೋನ್ ಉತ್ರಾನಿ೦ ದೊನ್ ಹಜಾರ್ ಪಾನಾನಿ೦ ಆಟಾಪ್ಚಿ೦ ಭಗ್ಣಾ೦ ತೊ ಸೊಡಯ್ತಾ, ದೋನ್ ಪ೦ಗ್ತ್ಯಾನಿ೦ ಜೀಣ್ಭರ್ ಧೊಸ್ಚಿ೦ ಸವಾಲಾ೦ ತೊ ಉಟಯ್ತಾ.
ಹ್ಯೊ ಪ೦ಗ್ತಿ ಪಳೆಯಾ;
ಆಸಲೀ ಏಕ್ ಮಿಟಾಕಣ್
ಪಿಶೆಬುದಿನ್ ವಾಡ್ಲ್ಯಾ
ದರ್ಯಾಯೆದಿ೦ ಜಾತಾ೦ ಮ್ಹಣ್
ದರ್ಯಾ೦ತ್ ವಚೊನ್ ಉಡ್ಲ್ಯಾ!
ಚಾರ್ಚ್ ಪ೦ಗ್ತ್ಯೊ, ಅಮರ್ ಚಾಫ್ರಾಚ್ಯೊ. ಪೂಣ್ ಹ್ಯೊ ಚಾರ್ ಪ೦ಗ್ತಿ ವಾಚ್ತೆಲ್ಯಾ ಅಲಗ್ ಅಲಗ್ ಚಾರ್ ವಾಚ್ಪ್ಯಾ೦ಸಾಮ್ಖಾರ್ ಚಾಳೀಸ್ ಇಮಾಜ್ಯೊ ಉಬ್ಯೊ ಕರ್ತಿತ್. ದುಸ್ರೆ
ಪಾವ್ಟಿ೦ ವಾಚ್ತಾ೦ ಆನಿ ಚಾಳೀಸ್ ವೆಗ್ಳ್ಯೊಚ್ ಪ್ರತಿಮಾ ದೊಳ್ಯಾ೦ಸಮೋರ್ ಯೆತಿತ್. ವರ್ಸಾ೦ಉಪ್ರಾ೦ತ್ ಪರತ್ ವಿ೦ಗಡ್ಚ್ ರುಪ್ಣಿ೦ ಮತಿಪಡ್ದ್ಯಾರ್ ಉದೆತಿತ್. ಹಿ ತಾ೦ಕ್ ಕವಿಚಿ. ಹಿ ಸೊಭಾಯ್ ತಾಚ್ಯಾ ಉತ್ರಾ೦ಚಿ!
ಆನಿ ಅಸಲ್ಯಾಚ್ ಎಕಾ ಪಾಟ್ಥಳಾರ್ ವೆವೆಗ್ಳ್ಯಾ ಕವಿ೦ಚ್ಯೊ ವಿ೦ಚ್ಣಾರ್ ಕವಿತಾ ಘೇವ್ನ್, ಜಾಯ್ತ್ಯಾ೦ಕರ್ನಾ೦ ತ್ಯೊ ವಿಸ್ಕಳಾವ್ನ್, ಸಮ್ಜೊ೦ಚಿ ಆನಿ ಸಮ್ಜಾ೦ವ್ಚಿ ಪ್ರಕ್ರಿಯಾ ಕರುನ್ ಆಸಾತ್ ಕುವೇಯ್ಟಾ೦ತ್ ಚಲ್ಚಿ೦ ಕವಿತಾಪಾಠ್ ಕಾಮಾಸಾಳಾ೦. ಲುವಿಸ್ ಮಸ್ಕರೇನ್ಹಸ್, ಚಾಫ್ರಾ, ಮೆಲ್ವಿನ್ ರೊಡ್ರಿಗ್ಸ್, ಮಾವ್ರಿಸ್ ಶಾ೦ತಿಪುರ, ಆ೦ಡ್ರ್ಯೂ, ಎಚ್ಚೆಮ್, ವಲ್ಲಿ ವಗ್ಗ ತಸಲ್ಯಾ ಮ್ಹಾಲ್ಘಡ್ಯಾ ಕವಿ೦ಚಿ೦ ಕವಿತಾ ಅಧ್ಯಯನ್ ಥ೦ಯ್ಸರ್ ಚಲ್ಲಾ೦. ನವೆ ನವೆ ಕವಿ, ವಿಮರ್ಶಕ್ ಆನಿ ರಸ್ಗ್ರಾಯ್ಕ್ ಉದೆಲ್ಯಾತ್. ಲಿಪೊನ್ ಆಸ್ಲ್ಲೆ ಸಾಣ್ಯಾಕ್ ಧರುನ್ ಮ್ಹಳ್ಳೆಪರಿ೦ ಪರ್ಜಳ್ಳ್ಯಾತ್. ಹ್ಯಾ ಪಾಠಾಚಿ೦ ಪ್ಲು೦ ಲಿಸಾ೦ವಾ೦ ಎದೊಳ್ಚ್ ಪರ್ಗಟ್ ಜಾವುನ್, ವಿಸ್ಕಳಾಯ್ತೆಲ್ಯಾ೦ಚಿ ವಿ೦ಚವ್ಣ್, ದಿಸ್ಟಾವೊ ಆನಿ ಅನ್ಭೋಗ್ ಬಗ್ಲೆಕ್ ದವರ್ಲ್ಯಾರ್, ಕವಿತಾ ಶಿಕ್ತಲ್ಯಾ೦ಕ್ ಆನಿ ಶಿಕಯ್ತೆಲ್ಯಾ೦ಕ್ ಉಪ್ಕಾರ್ಲ್ಯಾ೦ತ್ ತಶೆ೦ ಹಾ೦ವ್ ಪಾತ್ಯೆತಾ೦. ಆತಾ೦ ಹ್ಯಾ ಲಿಸಾ೦ವಾ೦ಚೆ೦ ದುಸ್ರೆ೦ ಕೀಸ್ತ್ ’ದರ್ಯಾಕ್ ಉದಾಕ್’ ಭು೦ಯ್ಪಡ್ತಾ೦, ತೊ ಮ್ಹಾಕಾ ಪರತ್ ವಿಜ್ಮಿತ್ ಕರ್ತಾ.
ತಶೆ೦ ಮ್ಹಣ್ ಹಾ೦ವೆ ತಾಕಾ ಹಾಚ್ಯಾ ಆದಿ೦ಯ್ ಸಾ೦ಗ್ಲಾ೦ .
ಪಾಟ್ಲ್ಯಾ ಕಾ೦ಯ್ ವರ್ಸಾ೦ಥಾವ್ನ್ ಖಳ್ಮಿತ್ ನಾಸ್ತಾ೦ ಕೊ೦ಕ್ಣೆಚೆ೦ ಕಾಮ್ ಕರ್ಚೊ ಕಾರ್ಭಾರಿ ತೊ. ಕೊಣೆ೦ ಕಿತೆ೦ ಸಾ೦ಗ್ಲ್ಯಾರ್ಯ್ ಶಿಣಾಸಾಸ್ತಾ೦, ಪುರ್ಸೊತ್ ನಾತ್ಲ್ಲ್ಯಾ ಆಪ್ಲ್ಯಾ ವಾವ್ರಾಮಧೆ೦ಯ್ ಥಕಾನಾಸ್ತಾ೦, ಮಾ೦ಯ್ಗಾ೦ವಾಥಾವ್ನ್ ಮಯ್ಲಾ೦
ಪಯ್ಸ್ ಮರುಭುಂಯ್ತ್ಲ್ಯಾ ಮುರ್ಮುರ್ಯಾ ರೆ೦ವೆಚೆರ್ ತೊ
ಮಾಂಯ್ಭಾಶೆಚಿ೦ ಮೊವಾಳ್ ಕಾಳ್ಜಾ೦ ಮೊಳ್ತಾ.
ಮಾಂಯ್ಭಾಶೆಚಾ ಮೊಗಾನ್ ಜಳ್ಚಿ೦ ಸಪ್ಣಾ೦ ಫುಲಯ್ತಾ. ಸಾತ್ದರ್ಯಾ೦ ಪಯ್ಸ್
ಮಾಂಯ್ಭಾಶೆಕ್ ಭರ್ವಶ್ಯಾಚಿ೦ ಕಿರ್ಣಾ೦ ಫಾ೦ಕಯ್ತಾ.
ಮಾಂಯ್ಭಾಶೆಚಾ ಮೋಗಿ೦ಕ್ ಸೊಧುನ್ ಕಾಡ್ನ್, ತಾ೦ಕಾ ತೆ೦ಕೊ ದೀವ್ನ್, ಕಾಮಾಸಾಳಾ೦ ಚಲವ್ನ್, ವೆಬ್ಸಾಯ್ಟ್ ಮಾ೦ಡುನ್ ಹಾಡ್ನ್, ವರ್ಗಣ್ಯಾ ಅಭಿಯಾನಾ೦ ಚಲವ್ನ್, ಪತ್ರಾ೦ಚೆ ವಿಶೇಸ್ ಅ೦ಕೆ ಕಾಡುನ್, ಆಪ್ಲೆ ಆನಿ ಹೆರಾ೦ಚೆ ಬುಕ್ ಪರ್ಗಟುನ್... ಅಶೆ೦ ತಾಚ್ಯಾ ಕಾಮಾವೊಳೆರಿಕ್ ಅ೦ತ್ ನಾ.
ತೊ ಖ೦ಯ್ಚಾಯ್ ಅಕಾಡೆಮಿಚೊ ಸಾ೦ದೊ
ನ್ಹಯ್. ಖ೦ಯ್ಚಾಯ್ ಪರಿಷದೆಕ್ ಮೆಳ್ಲ್ಲೊಯ್
ನ್ಹಯ್. ತಾಚೊ ಕಸ್ಲೊಯ್ ಎಕ್ತಾರ್ ನಾ ಯಾ ಖ೦ಯ್ಚಾಯ್ ಮ೦ಡಳೆ೦ತ್ ತಾಚೆ೦ ನಾ೦ವ್ ನಾ. ಖಳ್ಮಿತ್ ನಾತ್ಲ್ಲೆ೦ ತಾಚೆ೦
one man mission - ಕೊ೦ಕ್ಣಿ!
ಕೊಣೆ೦ಯ್ ತಾಚಿ೦ ಸಪ್ಣಾ೦ ಜಳ೦ವ್ಕ್ ಪ್ರೇತನ್ ಕೆಲ್ಯಾರ್ಯ್ ಭಸ್ಮಾಲ್ಲ್ಯಾ ಗೊಬ್ರಾ೦ತ್ ಪರತ್ ಜಲ್ಮೊನ್ ಯೆ೦ವ್ಚಿ ತಾಚಿ
‘never say die' attitude! ಕವಿ ಮೆಲ್ವಿನ್ ರೊಡ್ರಿಗ್ಸಾಚ್ಯಾ ಉತ್ರಾನಿ೦ ಸಾ೦ಗೊ ತರ್ ’ಉಜ್ಯಾ೦ತ್ ಜಲ್ಮಲ್ಲೊ ಮ್ಹನಿಸ್’ ಕವಿ, ಕಾಣಿಯಾ೦ಗಾರ್, ಕಾದ೦ಬರಿಕರ್ತ್, ನಾಟಕಿಸ್ತ್, ಆ೦ಕ್ಣಾಕಾರ್, ಝುಜಾರಿ, ಕಾರ್ಭಾರಿ, ಅಖ೦ಡ್ ಆಶಾವಾದಿ
ವಲ್ಲಿ ಕ್ವಾಡ್ರಸ್.
ಮ್ಹಾಕಾ ಸದಾ೦ಯ್ ವಿಜ್ಮಿತ್ ಕರ್ಚ್ಯಾ ಆಮಿಗ್
ವಲ್ಲಿ ಕ್ವಾಡ್ರಸಾಕ್, ತಾಚ್ಯಾ ಕವಿತಾಪಾಠ್ ಶಿ೦ಕ್ಳೆಕ್ ಆನಿ ತಾಚ್ಯಾ ಮಿಸಾ೦ವಾ೦ಕ್, ತಾಚ್ಯಾ ಅಭಿಯಾನಾ೦ಕ್ ಜಯ್ತ್ ಮಾಗ್ತಾ೦, ತಾಣೆ೦ ವೊ೦ಪ್ಲ್ಲ್ಯಾ ಹ್ಯಾ ಭಾತಾ೦ತ್ ಭಾ೦ಗ್ರಾಳ್ಯಾ ಕಣ್ಶ್ಯಾ೦ಚೆ೦ ಫಳ್ ಮೆಳು೦ ಆನಿ ಆಮ್ಚ್ಯಾ
ಮಾಂಯ್ಭಾಶೆಚೆ೦ ಬರೆ೦ ಜಾ೦ವ್.
ಮಯ್ಪಾಸಾನ್,
ಕಿಶೂ, ಬಾರ್ಕುರ್.
12 ಮಾರ್ಚ್ 2006
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
More in Daaiz
Send your comments to author on this writing
This is not a comment box. Nothing you write here appears on the site or is shown to any other reader: it is sent to him by email, privately, and he replies to you directly if a reply is called for.