ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
’ಜೆದ್ನಾಂ ತುಂ ಹೆರಾಂಚಾ ಬರ್ಯಾಪಣಾವಿಶ್ಯಾಂತ್ ಚಿಂತಾಯ್, ತೆದ್ನಾಂ ತುಜೆಂ ಬರೆಂಪಣ್ ಅಪಾಪಿಂ ಜಾತೆಲೆಂ’ - ಡಯಾನ್ ಡಿ’ಸೋಜ್
ಕೊಂಕ್ಣಿ ಕಾರ್ಭಾರಿ - 11.
ಹೊ ಕವಿ ನ್ಹಂಯ್, ಲೇಖಕ್ ನ್ಹಂಯ್ ತರ್ಯ್ ಹಾಚ್ಯಾ ಶಿರಾಂ ಶಿರಾಂನಿ ಕೊಂಕ್ಣಿ ರಗಾತ್ ವ್ಹಾಳ್ತಾ ಮ್ಹಳ್ಳೆಂ ಹಾಕಾ ಲಾಗ್ಸಿಲ್ಯಾನ್ ವಳ್ಕಾಲ್ಲೆ ಕೊಣ್ಯ್ ವೊಪ್ತಾತ್. ಕೊಂಕ್ಣಿ ಭಾಸೆಚೊ, ಕೊಂಕ್ಣಿ ಲೊಕಾಂಚೊ ಭರ್ಪೂರ್ ಪಾಟಿಂಬೊ ದಿಂವ್ಚೊ ಹೊ ಕೊಂಕ್ಣಿ ಲೊಕಾಂಕ್ ಮೊಗಾಳ್ ’ದಾಟ್ಟು’. ಆಯ್ಲೆವಾರ್ ಖತಾರಾಂತ್ ಚಲ್ಲ್ಲ್ಯಾ ಕ್ಲೋಡ್ ನಾಯ್ಟಾವೆಳಾರ್ ಪ್ರತಿಶ್ಟಿತ್ ಸಂಸ್ಥೊ ಜಾವ್ನಾಸ್ಚಾ ’ಎಮ್.ಸಿ.ಸಿ’ನ್ ಹಾಕಾ ಮಾನ್ ಕೆಲ್ಲ್ಯಾ ಸಂದರ್ಭಾರ್, ಹಾಕಾ ದಾಯ್ಜ್ ಉಲ್ಲಾಸ್ ಪಾಟಯ್ತಾ ತಶೆಂಚ್, ಸರ್ವೆಸ್ಪರ್ ದೇವ್ ಹಾಕಾ ಆನಿ ಹಾಚ್ಯಾ ಕುಟ್ಮಾಕ್ ಸದಾಂಚ್ ಬರ್ಯಾ ಭಲಾಯ್ಕೆಂತ್ ದವ್ರುಂದಿ ಮ್ಹಣ್ ಮಾಗ್ತಾ.
[ಕೊಂಕ್ಣೆಂತ್ ದಾಟ್ಟು ಫೆಲಿಕ್ಸ್ ಲೋಬೊ, ಖತಾರ್ಸವೆಂ ಸಿಜ್ಯೆಸಾಬಾಸಾಂಗಾತಾ ಆಯ್ಲೆವಾರ್ ಖತಾರಾಂತ್ ಕೆಲ್ಲೆಂ ಏಕ್ ಸಂವಾದ್]
ಫೆಲಿಕ್ಸ್ ಲೋಬೊ
ಕೋಣ್ ಹೊ ದಾಟ್ಟು?ಅಜೀಕ್
ದೋನ್ ವರ್ಸಾಧಿಂ ಕುವೆಯ್ಟಾಂತ್ ಆಸ್ಚಾ ಶಿರ್ವಾಂಚಾ ಮಾನೆಸ್ತ್ ಲಾರೆನ್ಸ್ ಡಿ’ಸೋಜಾಚೆಂ ಸಂದರ್ಶನ್ ಘೆಂವ್ಚಾ ವೆಳಾರ್ ಮ್ಹಜ್ಯಾ ಕಾಳ್ಜಾ ಥಾವ್ನ್ ಉದೆಲ್ಲಿಂ ಉತ್ರಾಂ ಜಾವ್ನಾಸಾತ್; "ಹಾಚ್ಯಾ ನಾಂವಾರ್ ಶೆಂಭೊರಾಂನಿ ಘರಾಂನಿ ರಾಂದ್ಣಿರ್ ಉಜೊ ಝಳ್ತಾ". ಖರಿಂಚ್ ಜಾವ್ನ್ ಹಿಂ ಉತ್ರಾಂ ಕಾಳ್ಜಾಂತ್ಲಿಂ ಶಿವಾಯ್ ಮತಿಂತ್ಲಿಂ ನ್ಹಂಯ್. ಗರ್ಜೆವಂತಾಂಕ್ ಅಪ್ಲ್ಯಾ ತಾಂಕಿಚಿ ಕುಮೊಕ್ ಸದಾಂಚ್ ಕರ್ಚ್ಯಾ ಹಾಕಾ ಕುವೆಯ್ಟಾಂತ್ಲೊ ಚಡ್ತಾವ್ ಲೋಕ್ ’ಸೀಝರ್ಸಾಚೊ ಲೊರಿಯಾಬ್’ ಮ್ಹಣ್ಂಚ್ ವೊಲಾಯ್ತಾತ್.
ಅಸಲೊಚ್ ಅನ್ಯೇಕ್ ಮನಿಸ್ ಗಲ್ಫಾಂತ್ ಆಸಾ, ಪಳೆಂವ್ಕ್ ಧಡಂಗ್ ಜಿವಾಚೊ, ತೋಂಡ್ಭರ್ ಖಾಡ್ ಆಸೊನ್ ಗಂಭೀರ್ ದಿಸ್ತಾ ತರ್ಯೀ ಕಾಳ್ಜಾಂತ್ ತಿತ್ಲೊಚ್ ಖಾಲ್ತೊ, ಖುಶಾಲಿ ಆನಿ ಮೊಗಾಳಿ, ಖತಾರಾಂತ್ ಮಾತ್ರ್ ನ್ಹಂಯ್, ಅಖ್ಖ್ಯಾ ಕೊಂಕಣ್ ಲೊಕಾಂಕ್ ಮೊಗಾಚೊ ’ದಾಟ್ಟು’ ಜಾವ್ನ್ ವಳ್ಕಿಚೊ ಜಾಲ್ಲೊ ಹೊ ಕೊಂಕಣ್ ಮನಿಸ್ ಹೆರ್ ಕೊಣ್ಯ್ ನ್ಹಂಯ್, ಬಗಾರ್ ಮಾನೆಸ್ತ್ ಫೆಲಿಕ್ಸ್ ಲೋಬೊ.
ಅಜೀಕ್ ದೋನ್ ವರ್ಸಾಧಿಂ ಹಾಕಾ ಭೆಟ್ಚೆಂ ಭಾಗ್ ಮ್ಹಾಕಾ ಲಾಭ್ಲೆಂ. ಹಾಚೆವಿಶಿಂ ಜಾಯ್ತೆಂ ಬರೆಂ ಆಯ್ಕಾಲ್ಲೆಂ, ತಾಕಾ ಮೆಳ್ತಾನಾ ಖರೆಂಚ್ ಭಗ್ಲೆಂ ಜ್ಯೇ ಕಿತೆಂ ಹಾವೆಂ ಆಯ್ಕಾಲ್ಲೆಂ ತೆಂ ಭೋವ್ ಥೊಡೆಂ ಮ್ಹಣ್. ಆಪ್ಲ್ಯಾ ಸಭಾರ್ ರಾಠಾವಳೆಮಧೆಂ ಸಯ್ತ್ ಮ್ಹಾಕಾ ಯೇವ್ನ್, ತಾಚೆಸವೆಂ ಆಪವ್ನ್ ವ್ಹರ್ನ್, ಅಪ್ಲೊ ಜಾಯ್ತೊ ವೇಳ್ ಮ್ಹಾಕಾ ದೀವ್ನ್ ಮಾಯಾಮೊಗಾನ್ ಉಲಯಿಲ್ಲ್ಯಾ ಹಾಚೆಥಾವ್ನ್ ಹಾಂವ್ ಖರೆಂಚ್ ಜಾವ್ನ್ ಮೊಸ್ತ್ ಶಿಕ್ಲ್ಲೊಂ. ಆಯ್ಲೆವಾರ್ ಹಾಣೆಂ ಅಜೀಕ್ ದೇಡ್ ದಾಕ್ಡ್ಯಾಧಿಂ ಸ್ಥಾಪಿತ್ ಕೆಲ್ಲ್ಯಾ ಖತಾರಾಂತ್ಲ್ಯಾ ಪ್ರತಿಷ್ಟಿತ್ ಎಮ್.ಸಿ.ಸಿ ನ್ ಆಯ್ಲೆವಾರ್ ಹಾಕಾ ಮಾನ್ ಕೆಲ್ಲ್ಯಾ ಸಂದರ್ಭಾರ್ ಹಾಂವ್ ಪರತ್ ಹ್ಯಾ ದಾಟ್ಟುಕ್ ಮೆಳ್ಳೊಂ, ಹಾಚೆಸವೆಂ ಕೊಂಕ್ಣೆಂತ್ಲೊ ಮಾಲ್ಘಡೊ ಸಾಹಿತಿ ಸಿಜ್ಯೆಸಾಬ್ ಮೆಳೊನ್ ಆಮಿ ಕೆಲ್ಲ್ಯಾ ಸಂವಾದಾಂತ್ ಖರೆಂಚ್ ಫೆಲಿಕ್ಸಾಬಾಚಾ ವ್ಯಕ್ತಿತ್ವಾಚಿ ಅನ್ಯೇಕ್ ಕೂಸ್ ದಿಸ್ಲಿ, ತಿ ಆತಾಂ ಹಾಂಗಾಸರ್ ದಿಂವ್ಚಾ ಇರಾದ್ಯಾನ್ ದಾಯ್ಜಾನ್ ಕೊಂಕ್ಣಿ ಕಾರ್ಭಾರಿ ಮ್ಹಣ್ ಮಾನೆಸ್ತ್ ದಾಟ್ಟುಕ್ ವಿಂಚುನ್ ಆಮಿಂ ಕೆಲ್ಲೆಂ ಸಂವಾದ್ ವಾಚ್ಪ್ಯಾಂ ಸಮೊರ್ ದವರ್ತಾಂ.
ಸಂವಾದ್ ಚಲವ್ಪಿ: ಸಿಜ್ಯೆಸ್ ತಾಕೊಡೆ ಆನಿ ವಲ್ಲಿ ಕ್ವಾಡ್ರಸ್
1. ಪಯ್ಲ್ಯಾ ಸುವಾತೆರ್ ಖತಾರಾಂತ್ ತುಮಿಂಚ್ ಸ್ಥಾಪಿತ್ ಕೆಲ್ಲ್ಯಾ ಸಂಸ್ಥ್ಯಾನ್ ತುಮ್ಕಾಂ ಮಾನ್ ಕೆಲ್ಲಿ ಗಜಾಲ್ ಭೋವ್ ಸಂತೊಸಾಚಿ. ತುಮಿಂ ಮಾನ್-ಸನ್ಮಾನಾಕ್ ಆಶೆಲ್ಲೆ ತರ್, ಮೊಸ್ತ್ ತೆಂಪಾಧಿಂಚ್ ತುಮ್ಕಾಂ ಹೊ ಸನ್ಮಾನ್ ಘೆವ್ಯೆತೊ. ತುಮ್ಕಾಂ ಹೊ ಮಾನ್ ಫಾವೊ ಜಾಲ್ಲೊ -ದೆಖುನ್ ಉಲ್ಲಾಸ್.
ಜಾ: ಕಷ್ಟಾಂನಿ ವ್ಹಡ್ ಜಾಲ್ಲ್ಯಾ ಮ್ಹಾಕಾ ಹೆರಾಂಚೆ ಕಷ್ಟ್ ಸಮ್ಜೊಂಕ್ ಚಡ್ ತ್ರಾಸ್ ಜಾಯ್ನಾಂತ್, ಅಶೆಂ ಮ್ಹಜ್ಯಾ ತಾಂಕಿಭಿತರ್ಲಿ ಇಲ್ಲಿ ಕುಮೊಕ್ ಹೆರಾಂಕ್ ಕರ್ಚೆಂ ಮ್ಹಜೆಂ ಕರ್ತವ್ಯ್ ಮ್ಹಣ್ ಹಾಂವ್ ಮಾಂಧ್ತಾಂ. ಆನಿ ಜರ್ ಹೆಂ ಹೆರಾಂಕ್ ಬರೆಂ ಕರುಂಕ್ ಸಕ್ತಾ ತರ್ ತೆಂ ಬರೆಂಚ್. ಹೆರಾಂಚೆಂ ಸದಾಂಚ್ ಬರೆಂ ಜಾಂವ್ದಿ - ಹಿಚ್ ಮ್ಹಜಿ ಆಶಾ. ಆನಿ ಹ್ಯಾ ಖಾತಿರ್ ಮ್ಹಾಕಾ ಮಾನಾಕ್ ವಿಂಚ್ಲ್ಲ್ಯಾಕ್ ಹಾಂವ್ ಸ್ವೀಕಾರ್ ಕರ್ತಾಂ.
2. ತುಮಿಂ ಖತಾರಾಂತ್ ಕೆಲ್ಲೊ ಕೊಂಕ್ಣಿ ವಾವ್ರ್ ಜಾಯ್ತ್ಯಾಂ ಥಾವ್ನ್ ಆಯ್ಕಾಲಾ, ತುಮಿಂ ಘರಾನ್ ಘರ್ ವಚೊನ್ ಕೊಂಕ್ಣಿ ಲೊಕಾಂಕ್ ಕೊಂಕ್ಣಿ ಕಾರ್ಯಾಕ್ ಆಪವ್ಣೆಂ ದಿತಾಲ್ಯಾತ್, ಖತಾರಾಂತ್ ಮಾತ್ರ್ ನ್ಹಂಯ್, ಗಲ್ಫಾಂತ್ ಜಾಂವ್, ವಾ ಮಂಗ್ಳುರಾಂತ್ ಜಾಂವ್, ತುಮಿಂ ಕುಮೊಕ್ ದೀನಾತ್ಲ್ಲೆ ಸಂಸ್ಥೆ ನಾಂತ್. ತುಮ್ಕಾಂ ಖತಾರಾಂತ್ಲ್ಯಾ ಕೊಂಕ್ಣಿ ವ್ಹಾಡಾವಳೆವಿಶಿಂ ಕಾಂಯ್ ಸಾಂಗೊಂಕ್ ಆಸಾ?ಜಾ:
ಸತ್ ಸಾಂಗ್ಚೆಂ ತರ್ ಗಲ್ಫಾಂತ್ಲ್ಯಾ ಹೆರ್ ಜಾಗ್ಯಾಂನಿ, ಜಶೆಂ ದುಭಾಯಾಂತ್, ಬಾಹ್ರೇಯ್ನಾಂತ್, ಕುವೆಯ್ಟಾಂತ್, ಮಸ್ಕತಾಂತ್ ಜಾಂವ್ಚೆಪರಿಂ ಕೊಂಕ್ಣಿ ಕಾರ್ಯಿಂ ಖತಾರಾಂತ್ ಜಾಂವ್ಕ್ ಭೋವ್ ಕಶ್ಟ್ ಆಸಾತ್. ಹಾಚಾ ಸುರ್ವಾತೆರ್ ಆಮ್ಚಾ ಸರ್ವ್ ಸಾಂದ್ಯಾಂನಿ ಭರ್ಪೂರ್ ವಾವ್ರ್ ಕೆಲಾ. ತರ್ಯ್ ಆಮ್ಚಾ ಚಡ್ತಾವ್ ಲೊಕಾಂಕ್ ಕೊಂಕ್ಣಿ ಭಾಸೆಚೆರ್ ಆಸ್ಚೊ ತಾತ್ಸಾರ್ ಖರೊಚ್ ಜಾವ್ನ್ ಕೊಂಕ್ಣೆಕ್ ದಿಸಾನ್ ದೀಸ್ ಅಸ್ಕತ್ ಕರುಂಕ್ ಪಾವ್ಲಾ. ಅಶೆಂ ಪಳೆಲ್ಯಾರ್ ಕೊಂಕ್ಣೆಚಿ ಜೆರಾಲ್ ಪರಿಗತ್ ಥಂಯ್ ಹಾಂಗಾ ಇಲ್ಲಿ ಜಿವಾಳೊನ್ ಆಯ್ಲ್ಯಾ ಮ್ಹಳ್ಳೆಪರಿಂ ದಿಸ್ತಾ. ಪುಣ್ ಜೆರಾಲ್ ರಿತಿನ್ ಕೊಂಕ್ಣೆಕ್ ದಿಸಾನ್ ದೀಸ್ ಪಾಟಿಂಬೊ ದಿತೆಲೆ ಉಣೆಂಚ್ ಜಾವ್ನ್ ಆಯ್ಲ್ಯಾತ್ - ಹಿ ಸ್ಥಿತಿ ಭೋವ್ ದುಃಖಾಚಿ.
3. ಕೊಂಕ್ಣಿ ಜಾಗತಿಕ್ ಉತ್ಸವಾಚಾ ಸಂದರ್ಭಾರ್ ಮೊಸ್ತ್ ಪಾಟಿಂಬೊ ಕೆಲ್ಲ್ಯಾಂತ್ ತುಮಿ ಎಕ್ಲೆ. ತುಮ್ಕಾಂ ಹ್ಯಾವಿಶಿಂ ಕಿತೆಂಯ್ ಸಾಂಗೊಂಕ್ ಆಸಾ?ಜಾ:
ಮ್ಹಾಕಾ ಏಕ್ ಘಡಿತ್ ಉಡಾಸಾಕ್ ಯೆತಾ, ಆಮಿ ಚಡಾವತ್ ಆಮ್ಚಾ ಲೊಕಾಂಕ್ ಕೊಂಕ್ಣಿ ವರ್ಗಾನಾ ಮ್ಹಣ್ತಾಂವ್, ಕೊಂಕ್ಣಿ ಜಾಗತಿಕ್ ಉತ್ಸವಾವೆಳಾರ್ ಘಾಟಾಂತ್ಲ್ಯಾ ಫಿರ್ಗಜೆಚಿ ಎಕ್ಲಿ ಕೊಂಕ್ಣಿ ಬಾಯ್ಲ್ ಅಶೆಂ ಮ್ಹಣಾಲಿ; "ಆಮ್ಚಾ ಫಿರ್ಗಜೆಂತ್ ಆಮಿಂ ತಶೆಂ ಥೊಡಿಂ ಮಂಗ್ಳುರಿ ಕೊಂಕ್ಣಿ ಕುಟ್ಮಾಂ ಆಸಾತ್, ಆಮ್ಚಾ ಫಿರ್ಗಜ್ ಪಾದ್ರಿಕ್ ಹಾಫ್ತ್ಯಾಂಕ್ ಏಕ್ ಕೊಂಕ್ಣಿ ಮೀಸ್ ಸಾಂಗೊಂಕ್ ಆಮಿ ಕಿತ್ಲೆ ಪಾವ್ಟಿಂ ವಿನತಿ ಕೆಲ್ಲಿ ಆಸಾ, ತರ್ಯೀ ಆಮ್ಕಾಂ ಕೊಂಕ್ಣಿ ಮೀಸ್ ಮೆಳಾನಾ" ಮ್ಹಣ್ ರಡ್ಲಿ. ತೆಂ ದೃಶ್ಯ್ ಮ್ಹಜ್ಯಾ ದೊಳ್ಯಾಂತ್ ಆಜೂನ್ ಜಿವೆಂಚ್ ಆಸಾ. ಜರೀ ತರೀ ಆಮ್ಕಾಂ ಖರೊ ಕೊಂಕ್ಣಿ ಹುಸ್ಕೊ ಆಸಾ ತರ್ - ಹ್ಯಾ ಬಾಯ್ಲೆಚೆಂ ರಡ್ಣೆಂ ಆಮ್ಕಾಂ ಸಮ್ಜಾತೆಂ. ಹಾಂವ್ ನೆಣಾಂ ತ್ಯಾ ಫಿರ್ಗಜೆಂತ್ ಉಪ್ರಾಂತ್ ಕಿತೆಂ ಜಾಲೆಂ ಮ್ಹಳ್ಳೆಂ, ಎಕಾಧಾವೆಳಾ ಅಜೂನ್ ಹಾಫ್ತ್ಯಾತ್ ಏಕ್ ತರ್ಯೀ ಕೊಂಕ್ಣಿ ಮೀಸ್ ಸುರು ಜಾಂವ್ಕ್ ನಾ ತರ್ ಖರೆಂಚ್ ಹೆಂ ಕೊಂಕ್ಣೆಚೆಂ ದುರ್ಭಾಗ್ಪಣ್.
4.
ಕೊಂಕ್ಣಿ ವಾವ್ರಾಕ್ ಚಡಂವ್ಕ್, ಕೊಂಕ್ಣಿ ಲೊಕಾಂಚೊ ಎಕ್ವಟ್ ಥಿರ್ ಕರುಂಕ್ ಕಸಲಿಂ ಮೆಟಾಂ ಗರ್ಜೆಚಿಂ?
ಜಾ: ಆಮ್ಕಾಂ ಕೊಂಕ್ಣೆಚೊ ವಾವ್ರ್ ಕರ್ಚೆ ಮುಖೆಲಿ ಜಾಯ್. ಆಜ್ ಆಮ್ಚಾ ಇತ್ಲ್ಯಾ ಕೊಂಕ್ಣಿ ಲೊಕಾಂಕ್ ಏಕ್ ಬರೊ ಮುಖೆಲಿ ಆಸಾಗಿ? ಫಕ್ತಾ ಎಕಾಮೆಕಾ ಮೊಸೊರ್ ವೊಂಕ್ಚೊ, ಎಕಾಮೆಕಾಚೆ ಪಾಂಯ್ ವೋಡ್ನ್ ಸಕ್ಲಾ ಘಾಲ್ಚಾಂತ್ ಆಮಿಂ ಚಡಾವತ್ ಮಾಹಿರ್. ಕೊಣಾಕ್ ವೇಳ್ ಆಸಾ ಚಿಂತುಂಕ್? ಪಯ್ಲೆಂಚ್ ತುಟೊನ್ ಪಡ್ಲ್ಲ್ಯಾ ಆಮ್ಚಾ ಕುಟ್ಮಾಂಕ್ ಆಮ್ಚೆ ಚಡ್ತಾವ್ ಪಾದ್ರಿ ಘಡ್ಚುಂಕ್ ವೆಚ್ಯಾ ಬದ್ಲಾಕ್, ತೆ ಭಾಂದ್ಪಾಂ ಭಾಂದ್ಚಾಂತ್ ಮೆತೆರ್ ಜಾಲ್ಯಾತ್. ಖಂಯ್ ಇಗರ್ಜ್ ಆಸ್ಚಾಂಕ್, ಹಾಲ್, ಹಾಲ್ ಆಸ್ಚಾಂಕ್ ತೋರ್, ತೋರ್ ಆಸ್ಚಾಂಕ್ ಇಗರ್ಜ್ ಮೊಡುನ್ ಪರತ್ ಭಾಂದ್ಚೊ ಹೊರ್ಭೊಸ್. ಆಮ್ಚಾ ಲೊಕಾಚಾ ಮತಿಂತ್ಯ್ ಪಾದ್ರಿಚ್ ಸರ್ವೆಸ್ಪರ್ ಜಾಲಾ. ದೆಖುನ್ ಹಾಂಚೆಂಚ್ ರಾಜ್. ಥೊಡೆ ದೆವೊತ್ ಪಾದ್ರಿ ಜರೂರ್ ಆಮ್ಚಾ ಸಮಾಜೆಂತ್ ಆಸಾತ್, ಪುಣ್ ಅಸಲ್ಯಾಂನಿ ಆಸ್ಚೆಂ ಶೆಂಭೊರಾಂನಿ ನ್ಹಂಯ್, ಹಜಾರಾಂನಿ ಏಕ್. ಜೆದೊಳ್ ಪರ್ಯಾಂತ್ ಆಮ್ಚಾ ಸಮಾಜೆನ್ ಹ್ಯಾ ಇಗರ್ಜೆಚ್ಯಾ ಪರಿಧಿಭಾಯ್ರ್ ಚಿಂತುಂಕ್ ಸುರು ಕೆಲೆಂ ತೆದೊಳ್ ಪರ್ಯಾಂತ್ ಕ್ರಿಸ್ತಾಂವ್ ಸಮಾಜೆಂತ್ ಅನ್ವಾರಾಂ ಸಂಪ್ಚಿಂ ನಾಂತ್.
5. ತುಮ್ಕಾಂ ಸಗ್ಳೆ ’ದಾಟ್ಟು’ ಮ್ಹಣ್ತಾತ್, ದೆವಾಚ್ಯಾ ದಯೆನ್ ತುಮ್ಕಾಂ ತುಮ್ಚೆಪರಿಂಚ್ ಮಾಯಾಮೊಗಾಳ್ ಪತಿಣ್ ಆನಿ ಮಯ್ಪಾಸಿಂ ಭುರ್ಗಿಂ ದೆವಾನ್ ದಿಲ್ಯಾಂತ್. ತುಮಿಂ ಏಕ್ ಬಿಜ್ನೆಸ್ಮ್ಯಾನ್ ತರ್ಯ್ ಫಿರ್ಗಜೆಂತ್ ಕಸ್ಟೊನ್ ಆಸ್ಚಾ ಗರ್ಜೆವಂತಾಂಕ್ ಕುಮೊಕ್ ಕರುಂಕ್ ಸದಾಂಚ್ ತುಮಿಂ ಆಸಾತ್, ಕಾಂಯ್ ಪಾರ್ಟ್ ಟಾಯ್ಮ್ ಸೋಶಿಯಲ್ ವರ್ಕ್ ಕರ್ತಾತ್ಗಿ?ಜಾ:
ಸಗ್ಳಿ ದೆವಾಚಿ ಖುಶಿ. ದೆವಾನ್ ಭೋವ್ಶಾ ಮ್ಹಾಕಾ ಇತ್ಲೆಂ ಸರ್ವ್ ದಿಲಾಂ ತರ್ ಖಂಡಿತ್ ಜಾವ್ನ್ ಹಾವೆಂ ಆಮ್ಚಾ ಸಮಾಜೆಂತ್ಲ್ಯಾ ಚಡಿತ್ ಗರ್ಜೆಂತ್ ಆಸ್ಚಾಂಕ್ ಪಾಂವ್ಚಾಕ್ ಜಾವ್ಯೆತ್. ದೆಖುನ್ ಮ್ಹಾಕಾ ಕೊಣಾಚಿಚ್ಚ್ ಶಿಫಾರಸ್ ನಾಸ್ಚೆ, ಕಠೀಣ್ ಗರೀಬ್ ಕೊಣ್ಯೀ ಆಸೊಂದಿ, ತಿಂ ಮ್ಹಜೆಲಾಗಿಂ ಯೇಂವ್ದಿ, ಮ್ಹಜೆಲಾಗಿಂ ಕಾಮ್ ನಾತ್ಲ್ಯಾರ್ ದೇವ್ ಮ್ಹಾಕಾ ಕಾಮ್ ಸೊಧುನ್ ದಿತಲೊ, ಹಾವೆಂ ಅಸಲ್ಯಾ ಗರ್ಜೆವಂತಾಂಕ್ ಕುಮೊಕ್ ಕರುಂಕ್ಚ್ ಜಾಯ್ ಆನಿ ಹಾಂವ್ ತಿ ಕರ್ತಲೊಂ. ಹಾಂತುಂ ಹಾಂವ್ ಮ್ಹಜೆಂ ಭಾಗ್ ಮ್ಹಣ್ ಲೆಕ್ತಾಂ. ಅಶೆಂ ಮ್ಹಾಕಾ ಸಭಾರ್ ಶಿಫಾರಸೆಚಿಂ ಕಾಮಾಂ ಯೆತಾತ್, ಪುಣ್ ತಾಂಚ್ಯಾಕೀ ಗರ್ಜೆಚಿಂ ಕಿತ್ಲೆಶ್ಯಾ ಫಿರ್ಗಜ್ಯಾಂನಿ ಆಸಾತ್ ಮ್ಹಳ್ಳೆಂ ಹಾಂವ್ ಸಮ್ಜತಾಂ. ಆಮ್ಚಾ ಸಮಾಜೆಂತ್ ಥೊಡಿಂ ಗ್ರೇಸ್ತಾಂ ಅನಿಕ್ಯ್ ಅಪ್ಣಾಕ್ ಕಶೆಂ ಗ್ರೇಸ್ತ್ ಜಾವ್ಯೆತ್ ಮ್ಹಳ್ಳೆಂ ಚಿಂತಾತ್ ಶಿವಾಯ್, ಮ್ಹಜ್ಯಾಕೀ ಲ್ಹಾನಾಂಕ್ ಕಶೆಂ ಕುಮೊಕ್ ಕರ್ಯೆತ್ ಮ್ಹಳ್ಳೆಂ ಚಿಂತಾಪ್ ಚಿಂತ್ಚಿಂ ಭೊವ್ ಥೊಡಿಂ. ಆಮ್ಕಾಂ ದೆವಾನ್ ಕಿತೆಂಯ್ ಬರೆಂಪಣ್ ದಿಲಾಂ ತರ್ ಏಕ್ ಜವಾಬ್ಧಾರಿಯ್ ದಿಲ್ಯಾ, ಅಮ್ಚಾ ಪೆಲ್ಯಾಂಚಾ ಗರ್ಜಾಂಕ್ ಪಾವೊಂಕ್. ಆನಿ ಹಿ ಜಾವಾಬ್ಧಾರಿ ಆಮಿಂ ಸ್ವೀಕಾರ್ ಕರಿನಾಂವ್ ತರ್ ತಸಲ್ಯಾ ಬರ್ಯಾಪಣಾಕ್ ಗ್ರಾಸುಂಕ್ ಹೆರ್ ವಾಟೊ ಉದೆತಾತ್. ಹೆಂ ಮ್ಹಜೆಂ ಚಿಂತಾಪ್.
6. ಆತಾಂಚಾ ಯುವಜಣಾಂಕ್ ತುಮ್ಚಿ ಸಲ್ಹಾ ಕಸಲಿ?ಜಾ:
ಯುವಜಣಾಂಕ್ ಖಂಡಿತ್ ಜಾವ್ನ್ ಸಯ್ರಣ್ ಗರ್ಜೆಚೆಂ. ಆಜ್ಕಾಲ್ ಕೊಣ್ಯ್ ಬಿಜ್ನೆಸಾಕ್ ದೆಂವ್ತಾತ್ ಆನಿ ತಕ್ಷಣ್ ಮುನಾಫೊ ಆಶೆತಾತ್. ಹೆಂ ವಾಯ್ಟ್ ನ್ಹಂಯ್, ಪುಣ್ ಏಕ್ ಸಂಸ್ಥೊ ಘಡುಂಕ್, ಆನಿ ತೊ ಸಾಂಭಾಳುಂಕ್ ಜಾಯ್ತ್ಯಾ ರಿತಿಚೊ ಸಾಕ್ರಿಫಿಸ್ ಕರುಂಕ್ ಪಡ್ತಾ. ಹಾಂವೆಂಯ್ ಸುರ್ವಾತ್ ಕರ್ನ್ ಮಧೆಂಚ್ ಹೆಂ ಎಕೀ ನಾಕಾ, ಸಗ್ಳೆಂ ಸೊಡ್ನ್ ಧಾಂವ್ಯಾಂ ಮ್ಹಳ್ಳೆಂ ಚಿಂತಾಪ್ ಚಿಂತ್ಲ್ಲೊಂ ಮನಿಸ್. ಪುಣ್ ಮಿನತ್ ಕರುನ್ ಆಜ್ ಇತ್ತುನ್ ಪಾವ್ಲಾಂ ದೆಖುನ್ ಎಕಾ ಉತ್ರಾಕ್ ಹಾಂವ್ ಮಾನ್ ದಿತಾಂ ’ಮಿನತ್ ಸದಾಂಚ್ ಫಳ್ ದಿತಾ (Hardwork always pays).
7. ತುಮ್ಚ್ಯಾ ಭುರ್ಗ್ಯಾಪಣಾವಿಶಿಂ ಥೊಡೆಂ ಸಾಂಗ್ಯೆತ್ಗಿ?ಜಾ:
ಹಾಂವ್ ಉಪ್ಪಿನಂಗಡಿಂತ್ಲ್ಯಾ ಅನಾಥಾಂಚಾ ಆಶ್ರಮಾಂತ್ ವ್ಹಡ್ ಜಾಲ್ಲೊಂ. ಆಜ್ ದುರಾದೃಷ್ಟೆಂತ್ ತೆಂ ಅನಾಥಾಶ್ರಮ್ ಬಂಧ್ ಪಡ್ಲಾಂ. ಹಿ ಫಿಕಿರ್ ಕೊಣಾಕ್ಚ್ ನಾ. ಕಿತ್ಲಿಂ ಅನಾಥಾಶ್ರಮಾಂ ಬಂಧ್ ಪಡ್ಲ್ಯಾಂತ್, ಆಮ್ಚಾ ಪಾದ್ರಿಂಕ್ ತಶೆಂ ಲೊಕಾಂಕ್ ಫಕತ್ತ್ ಫಿರ್ಗಜೆಂತ್ ಭಾಂದ್ಪಾಂ ಭಾಂದುಂಕ್ ಜಾಯ್ ಶಿವಾಯ್ ಅಸಲ್ಯಾ ಅನಾಥಾಶ್ರಮಾಂತ್ ಕಿತ್ಲೊ ಲೋಕ್ ಶಿಕೊನ್ ವ್ಹಡ್ ಜಾಲಾ ಮ್ಹಳ್ಳೆಂ ಸತ್ ದಿಸಾನ್ ದೀಸ್ ಮಾಜ್ವೊನ್ ಯೆತಾ. ಹಾಂವ್ ಭುರ್ಗ್ಯಾಪಣಾರ್ ಪೊಕ್ರಿ ಜಶೆಂ ಹೆರಾಂ ಭುರ್ಗ್ಯಾಂ ಪರಿಂ. ತರ್ಯ್ ಗರ್ಜೆಂತ್ ಆಸ್ಚಾಂಕ್ ಮ್ಹಜ್ಯಾ ತಾಂಕಿಚಿ ಕುಮೊಕ್ ಹಾಂವ್ ಕರ್ತಾಲೊಂ. ದುಡ್ವಾನ್ ನ್ಹಂಯ್ ತರ್ ಹೆರ್ ರಿತಿಂನಿ.
8. ತುಮ್ಚ್ಯಾ ತರ್ನಾಟ್ಪಣಾರ್ ತುಮಿಂ ಕೆಲ್ಲ್ಯಾ ಖಂಚ್ಯಾಯ್ ಎಕಾ ಪೊಕ್ರಿಪಣಾಚೊ ಉಡಾಸ್ ಕರ್ಯೆತ್ಗಿ?
ಜಾ: ಖಂಡಿತ್, ಏಕ್ ಪಾವ್ಟಿಂ ಇಲ್ಲೊ ತಡವ್ ಜಾಲ್ಲ್ಯಾಕ್, ಆಮ್ಚಾ ಬೊಟ್ಲೆರಾನ್ ಮ್ಹಜ್ಯಾ ಸಾಂಗಾತ್ಯಾಂಕ್ ಸಕಾಳಿಂಚೊ ನಾಸ್ಟೊ ದೀನಾಸ್ತಾಂ ಬೀಗ್ ಘಾಲ್ನ್ ಗೆಲ್ಲ್ಯಾವೆಳಾರ್ ಆಮಿಂ ದಾರ್ ಫೊಡ್ನ್ ನಾಸ್ಟೊ ಕರ್ತಾನಾ, ತೊ ಬೊಟ್ಲೆರ್ ಧಾಂವೊನ್ ಯೇವ್ನ್ ’ತುಜ್ಯಾ ಬಾಪಾಯ್ಚೆಂ ಘರ್ಗೀ ಹೆಂ’ ಮ್ಹಣ್ ಸವಾಲ್ ಕೆಲ್ಲ್ಯಾಕ್, ತಾಕಾ ಧರ್ನ್ ದುಕ್ರಾಚ್ಯಾ ಗುಡಾಕ್ ಘಾಲ್ಲೊ ಉಡಾಸ್ ಅಜೂನ್ ಆಸಾ.
9.
ಆಮ್ಚಾ ಕೊಂಕ್ಣಿ ಪರಿಗತೆಕ್ ಸುಧ್ರಾಂವ್ಕ್ ತುಮ್ಚೆ ಪ್ರಕಾರ್ ಕಿತೆಂ ಗರ್ಜೆಚೆಂ?
ಜಾ: ಹೆಂ ನಿಜಾಯ್ಕೀ ಮ್ಹಜ್ಯಾ ಮತಿಂತ್ ಆಸ್ಚೆಂ ಚಿಂತಾಪ್. ಆಮ್ಚಿ ಸಮಾಜ್ ಕಿತ್ಯಾಕ್ ಮುಖಾರ್ ಯೇನಾ? ಇತ್ಲಿಂ ಫಿರ್ಗಜೆಚಿಂ ಸಂಚಾಲನಾಂ ಆಮ್ಕಾಂ ಆಸಾತ್, ತರ್ಯ್ ಕಿತ್ಯಾಕ್ ಆಮ್ಚಾ ಫಿರ್ಗಜೆಚೊ ಲೋಕ್ ದುಬ್ಳೊ ತೊ ದುಬ್ಳೊಚ್ ಉರ್ತಾ? ಹ್ಯಾ ಸಮಸ್ಸ್ಯಾಕ್ ನಿವಾರುಂಕ್ ಖರೆಂಚ್ ಆಮ್ಕಾಂ ಏಕ್ ಅಸಲಿ ಏಕ್ ವೇದಿ ಗರ್ಜೆಚಿ ಮ್ಹಳ್ಯಾರ್ ಆಮ್ಚಾ ಲೊಕಾಂನಿ ಸ್ವಾಭಿಮಾನಾನ್ ಜಿಯೆಂವ್ಕ್ ಸಕಾಜಯ್. ಹಿ ವೇದಿ ಪರತ್ ಪಾದ್ರಿಂಚ್ಯಾ ಮುಖೇಲ್ಪಣಾಖಾಲ್ ಭಾಂದ್ಪಾಂ ಭಾಂದ್ಚಿ ವೇದಿ ನ್ಹಂಯ್. ಕೊಂಕ್ಣಿ ಬರವ್ಪ್ಯಾನಿ ಸಯ್ತ್ ಕೊಂಕ್ಣಿ ಸಮಾಜೆಕ್ ಬರೆಂ ಕರ್ಚ್ಯೊ ವಾಟೊ ಸೊಧುಂಕ್ ಜಾಯ್. ಆಮ್ಚಾ ಸಮಾಜೆಂತ್ ಊಂಚ್ ಕೀಳ್ ಮ್ಹಳ್ಳೊ ಭೇಧ್ ಪಯ್ಸ್ ಕರುಂಕ್ ಜಾಯ್. ಆಮ್ಚಿ ಕೊಂಕ್ಣಿ ಭಾಸ್, ಆಮ್ಚಿ ಕೊಂಕ್ಣಿ ಸಂಸ್ಕೃತಿ ಮಾತ್ರ್ ಹಾಕಾ ಥಳ್ (Foundation) ಜಾಂವ್ಕ್ ಸಕ್ತಾ. ಹ್ಯಾವಿಶಿಂ ವಿಚಾರ್ ಮಂಥನ್ ಗರ್ಜೆಚೆಂ.
10. ಹರ್ಯೆಕಾ ಬ್ರೇಸ್ತಾರಾ ಸಾಂಜೆರ್ ತುಮ್ಗೆರ್ ಚಡುಣೆಂ ಧಾ ಭಾರಾ ಕುಟ್ಮಾಂ ಎಕ್ವಟ್ತಾತ್, ಆಪ್ಲೆಂ ಸುಖ್ ದೂಃಖ್ ವಾಂಟುನ್ ಘೆತಾತ್, ಖರೆಂಚ್ ಜಾವ್ನ್ ತುಮ್ಕಾಂ ’ದಾಟ್ಟು’ ನಾಂವ್ ಸೊಭ್ತಾ - ತುಮ್ಚೆ ವಿಚಾರ್ ಕಸಲೆ?
ಜಾ: ಹೆಂ ಮ್ಹಜೆಂ ಖರೆಂಚ್ ಭಾಗ್ ಮ್ಹಣ್ ಹಾಂವ್ ಮಾಂಧ್ತಾಂ. ’ದಾಟ್ಟು’ ಮ್ಹಳ್ಳೆಂ ನಾಂವ್ ಮ್ಹಾಕಾ ಖರಿಚ್ ಏಕ್ ಜವಾಬ್ಧಾರಿ. ಹಾಂಗಾ ಆಮಿ ಪರ್ಕಿ ಗಾಂವಾಂತ್ ಆಸ್ತಾನಾ ಆಮಿಂ ಎಕಾಮೆಕಾಚೆಂ ಸುಖ್ ದೂಃಖ್ ವಾಂಟುನ್ ಘೆಂವ್ಚೆಂ ಆನಿ ಎಕಾ ಕುಟ್ಮಾಪರಿಂ ಚಲ್ಚೆಂ ನಿಜಾಯ್ಕ್ಯೀ ದೆವಾಚೆಂ ದೆಣೆಂ. ದೆವಾನ್ ಅಶೆಂಚ್ ಆಮ್ಕಾಂ ಮಾಯಾಮೊಗಾನ್ ದವರ್ಲ್ಯಾರ್ ಪುರೊ. ಸರ್ವಾಂಚೆಂ ಬರೆಂಚ್ ಜಾಂವ್ದಿ ಮ್ಹಳ್ಳಿಚ್ ಮ್ಹಜಿ ಆಶಾ.
11. ದಾಟ್ಟು - ತುಮ್ಕಾಂ ದೇವ್ ಬರೆಂ ಕರುಂ, ತುಮ್ಚ್ಯಾ ಖಾಲ್ತ್ಯಾ ಮನಾಕ್, ತುಮಿ ದಿಲ್ಲ್ಯಾ ಮೊಗಾಕ್. ಖರೆಂಚ್ ತುಮ್ಚೆ ಥಾವ್ನ್ ಶಿಕೊಂಕ್ ಜಾಯ್ತೆಂ ಆಸಾ. ತುಮ್ಚೆಂ ಪ್ರೇರಣ್ ಘೆವ್ನ್ ಇಲ್ಲೆಂ ತರ್ಯ್ ಆಮ್ಚಾ ತಾಂಕಿಪುರ್ತೆಂ ಕರುಂಕ್ ಪ್ರೇತನ್ ಕರ್ತಾಂವ್.
ಜಾ: ದೇವ್ ಬರೆಂ ಕರುಂ.
ಹ್ಯಾ ಆಧ್ಲೆ ಕಾರ್ಭಾರಿ: 1, 2, 3, 4, 5, 6, 7, 8, 9, 10
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
