ಖಾಸ್

ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್‍ಯಾಂತ್, ಕೊಂಕಣಿ ಖಾತಿರ್.

ವಿಮರ್ಸೊ ಆನಿ ಹೆರ್ ಥೊಡ್ಯೊ ಖಾಸ್ ಅಬಿಪ್ರಾಯೊ $Placeholder: the original page gave this picture no description, and none has been written yet. It came from daaiz\daaiz\articles\ml1.asp.$

ಮರಣ್, ಕ್ರೂರತಾ ಅನಿಂ ಮುಂಬೈಚಾ ಭಯೊತ್ಪಾದಾನಾ ತಸಲಿ ಘಟನಾಂ ಆಮ್ಚೆಂ ಜಿವಿತ್ ಚಿಪುಟ್ ಚೀರ್ ಕರುಂಕ್ ಸೊದ್ತಾನಾ, ಕಿರ್ಕೊಳ್ ಮನಸ್ತಾಪ್, ಎಕಾಮೆಕಾಚೆ ಪಾಂಯ್ ವೊಡ್ಚೆ ಆನಿಂ ತಿತ್ಲೆಂಚ್ ಕಿತ್ಯಾಕ್ ಸಾಹಿತಿಕ್ ಭಾಸಾಭಾಸ್ ಸಯ್ತ್ ಹ್ಯಾ ವೆಳಾರ್ ಖಂಡಿತ್ ಕಿರ್ಕೊಳ್ ದಿಸ್ತಾ. ಚಡ್ ಜಾಂವ್ನ್ ಜೆದ್ನಾಂ ಹ್ಯಾ ಭಾಸಾಬಾಸೆಂತ್ ಮ್ಹನ್ಶಾ ಸಂಯ್ಬಾಚಿ ತಿಂಚ್ ಕಿರ್ಕೊಳ್ ಭಗ್ಣಾಂ ಥೈಂ ಥೈಂ ಉಪ್ಯ್ವೊಂಚಿ ದಿಸ್ತಾನಾ! ತರೀ ’the show must go on!’ ಹಾಂವ್ ಕೊಂಕ್ಣಿ ಮೊಗಿ ಪುಣ್ ದೆವಾಕ್ ಅರ್ಗಾಂ ಜಾಯ್ತೆಂ ಕೊಂಕ್ಣೆಂತ್ಲೆಂ ಸರ್ಕಸ್ ಹಾಂವೆ ಪಳೆಂವ್ಕ್ ನಾಂ. ಏಕ್ ಮಾತ್ರ್ ಖರೆಂ, ಕೊಂಕ್ಣೆಂತ್ ಜಾಯ್ತೆಂ ಬರೆಂ ವಾಚಾಪ್ ಹಾಂವೆ ವಾಚ್ಲಾಂ ಆನಿ ತೆಂ ಹೆರ್ ಭಾಶೆಂಕ್ ಕಾಂಯ್ ಸೊಡ್ನ್ ದೀನಾಂ ಮ್ಹಣ್ ಮ್ಹಾಕಾ ಜಾಯ್ತೆಂ ಪಾವ್ಟಿಂ ಭಗ್ಲಾಂ!

ಎಚ್ಚೆಮ್ ಮ್ಹಜಾ ಪಸಂದಚೊ ಬರವ್ಪಿ. ತಾಚಾ ಕವಿತೆಕೀ ಚಡ್ ತಾಚಾ ವಿಮರ್ಶಾಂಕ್ ಹಾಂವ್ ಖಾಯ್ಸ್ ಕರ್ತಾ. ತಾಚೆ ಮುಕ್ತ್ ಉಲವ್ಪ್ ಖರೆಂಚ್ ಮ್ಹಾಕಾ ’ಲಾಯ್ಕ್’ ಜಾಲೆಂ. ಜಾಯ್ತ್ಯೊ ಸಂಗ್ತಿ ಎಚ್ಚೆಮಾನ್ ಉಲ್ಲೇಕ್ ಕೆಲ್ಲ್ಯೊ ಖಂಡಿತ್ ಖರ್‍ಯೊ. ಖಂಚಾಯ್ ಭಾಶೆನ್ ಬರಯ್ಜಯ್ ತರ್ ತರ್ಬೆತಿ, ಶಿಕಾಪ್ ಜಾಯ್ಜಯ್‌ಚ್. ಎಕಾಮೆಕಾಚಾ ಸಾಹಿತ್ಯಾ ವಿಶ್ಯಾಂತ್ ಉಲಯ್ತಾನಾ ಆಮಿ ದಾಕ್ಷೆಣ್ ಸೊಡಿಜೈ ತೆಂಯ್ ಏಕ್ದಮ್ ಖರೆಂ. ಮ್ಹಾಕಾ ಸುಸ್ತಾತಾ, ಖಂಯ್‌ಗಿ ತಾಣೆ ವಾಪಾರ್ಚಾ ಭಾಶೆ ಅನಿ ’ಬ್ಲಂಟ್’ ಅಬಿಪ್ರಾಯೆ ಮದೆಂ ಏಕ್ ಸತ್ ಆಸಾ, ಏಕ್ ದಿಶ್ಟಾವೊ ಆಸಾ. ಪುಣ್ ಮುಲಾಜ್ ನಾಸ್ತಾಂ ಹೆರಾಂಚೆರ್ ಖೊಡಿ ಕಾಡ್ಚೊ ಎಚ್ಚೆಮ್ ಅಪ್ಣಾಚೆರ್ ಮ್ಹಣ್ಜೆ ಅಪ್ಣಾಚಾ ಬರ್ಪಾಚೆರ್ ತ್ಯಾಚ್ ನಮುನ್ಯಾರ್ ಹೆರ್ ಖೊಡಿ ಕಾಡ್ತಾನಾ ಕಿತೆಂ ಮ್ಹಣ್ತಾ? ಹಿ ಮ್ಹಜಿ ’ಕ್ಯೂರಿಯೊಸಿಟಿ’ ಬಿಲ್ಕುಲ್ ಸ್ಟೇನ್ ಅಗೇರಾ ಮುಲ್ಕಿ ಹಾಣೆ ಕೊಂಕ್ಣೆಂತ್ಲಾ ಬಹುದೂರ್ ವಿಮರ್ಶಾಕಾಂ ವಿರುದ್ಧ್ ಶಿಣ್ ಉಚಾರ್‍ಚಾ ಭಾಶೆನ್!! ಹಾಂ, ಸ್ಟೇನ್ ಅಗೇರಾಚಿ ಪ್ರತಿಕ್ರಿಯಾ ತರೀ ಮ್ಹಾಕಾ ಏಕ್ದಮ್ ಪಸಂದ್ ಜಾಲಿ. ಎಕಾ ವಿಮರ್ಶಾಕಾನ್ ಪಾಳಿಜೈ ಜಾಲಿಂ ನೆಮಾಂ ಅದ್ಬುತ್ ರೀತಿನ್ ತಾಣೆ ದಾಕಂವ್ನ್ ದಿಲ್ಯಾಂತ್ ಆನಿ ಖಂಡಿತ್ ದ ಗ್ರೇಟ್ ಎಚ್ಚೆಮ್ ಹಾಂತುನ್ ಸಲ್ವಲಾ ಮ್ಹಣ್ಯೆತ್ ಕೊಣ್ಣಾ!

ಎಚ್ಚೆಮಾನ್ ಸಾಂಗ್ಚೆ ಶೆಂಬೊರ್ ಠಕ್ಕೆ ಖರೆಂ. ಏಕ್ ಪಾವ್ಟಿಂ ಪ್ರಗಟ್ ಜಾಲೆಂ ಸಾಹಿತ್ ಎಕಾ ನಮುನ್ಯಾರ್ ತೆಂ ವಾಚ್ಪ್ಯಾಚಿ ಆಸ್ತ್ ಆನಿ ವಾಚ್ಪ್ಯಾಕ್ ತಾಚೆರ್ ಅಬಿಪ್ರಾಯ್ ಉಚಾರ್‍ಚೆಂ ಹಕ್ಕ್ ಆಸಾ. ತೀರ್ಪ್ ದಿಂವ್ಚೆಂಯ್ ’ರೈಟ್’ ಆಸಾ. ಹ್ಯಾ ಪ್ರಕ್ರಿಯೆಂತ್ ಕೊಣ್ ಎಕ್ಲೊ ಸಿಸ್ಟಮೆಟಿಕ್ ವಿಮರ್ಶಕ್ ಜಾಲ್ಯಾರ್ ಆಮ್ಚೆಂ, ಕೊಂಕ್ಣೆಚೆಂ ಭಾಗ್, ನಾಂತರ್ ವ್ಹಡ್ ನಾಂ ಮುಕಾರ್ ತಶೆಂ ಜಾಯ್ತ್ ಮ್ಹಣ್ ಭರ್ವಸೊ ದವರ್‍ಯೆತ್. ನಾಂತರ್, ವಿಮರ್ಶಾಕಾಚೊ ವಿಮರ್ಸೊ ಕರುಂಕ್ ಆನಿ ಕೊಣಿ ಖಂಡಿತ್ ತಯಾರ್ ಆಸ್ತಲೊಚ್! (ತ್ಯಾ ದೆಕುನ್ ವಿಮರ್ಶೊ ಕರುಂಕ್ ಸುರು ಕೆಲ್ಲೆಂಚ್ ’ಪರ್ಫೆಕ್ಟ್ ವಿಮರ್ಶಕ್’ ಜಾಯ್ಜಯ್ ಮ್ಹಣ್ ಅಪೆಕ್ಸುಚೆಂ ’ಟೂಮಚ್’). ಹೆಂ ಪ್ರಕೃತೆಚೆಂ ನಿಯಮ್ ಆನಿ ಖಂಡಿತ್ ಸಾಹಿತ್ಯಾಚೆಂ ನಿಯಮ್.

ಆಮಿ ಕೊಣಿ ’ಆನ್‌ಟಚೆಬಲ್’ ನೈಂ! ಜಾಂವ್ ತೊ ’The Bard of Avon’ ಇಂಗ್ಲೆಶ್ ಸಾಹಿತಿ ಶೆಕ್ಸ್‌ಪಿಯಾರ್ ವ ’el Príncipe de los Ingenios’ ಸ್ಪಾನಿಶ್ ಸಾಹಿತಿ ಮಿಗೆಲ್ ಸೆರ್ವಂತೆಸ್ ವ ಇಟೆಲಿಯಾನ್ ’il Sommo Poeta’ ದಾಂತೆ. ಖಂಡಿತ್ ಹಾಚೆರ್ ಹೊಂದೊನ್ ಆಸಾ ಏಕಾ ಖರ್‍ಯಾ ಸಾಹಿತಿಚಿ ಆನಿ ವಿಮರ್ಶಾಕಾಚಿ ಸಯ್ತ್ ಪ್ರಭುದ್ದಾತಾ: ಠಿಕಾ ವ ಖೊಡ್ ಜಿರಂವ್ಚಿ. ಜಿಣ್ಯೆಂತ್ ಕೊಣ್ ಕಶ್ಟಾನಾಂ? ತಾಂತ್ಲ್ಯಾನ್ ತಾಂತು ಸಾರ್ವಜಣಿಕ್ ಬರ್‍ಯಾಕ್ ಖಾಂದ್ ಮಾರ್‍ತಾನಾ ಘಾಮೆಂವ್ಚೆಂ, ಹಾತ್ ಹುಲ್ಪಾಂವ್ಚೆ ’ನೆಚುರಲ್’. ದೆಕುನ್, ಆಮಿ ಕೊಂಕ್ಣೆಕ್ ಜಾಯ್ತೆಂ ಕೆಲಾಂ, ತ್ಯಾ ಖಾತಿರ್ ಆಮ್ಕಾಂ ಅಪಡ್ನಾಕಾತ್, ಆಮ್ಚಾ ಸಾಹಿತಾರ್ ಠೀಕಾ ಕರ್ನಾಕಾತ್ ಮ್ಹಣ್ ಸಾದಾರ್ಣ್ ಕ್ಲೆರೆನ್ಸ್ ಕೈಕಂಬಾ ಭಾಶೆನ್ ಬಾವುಕ್ ಜಾಂವ್ಚೆ ಇಲ್ಲೆಶೆಂ ಇಮ್ಮೆಚುವರ್ ದಿಸ್ತಾ ಮ್ಹಾಕಾ. ’ಐ ಮೆ ಬಿ ರೊಂಗ್’!

ಆನೈಕ್ ವಿಶಯ್ ಮಾತ್ರ್ ಖಡಾಖಡ್ ಸಾಂಗಜೈ ಮ್ಹಾಕಾ. ಜಾಯ್ತೆಂ ಪಾವ್ಟಿಂ, ಕೊಂಕ್ಣೆಂತ್ ಏಕ್ ಬರೊ ಕವಿ ನಾಂ, ಏಕ್ ಬರೊ ಬರವ್ಪಿ ನಾಂ, ಮೊಡೆಲ್ ನಾಂ, ಗುರು ನಾಂ ಮ್ಹಳ್ಳೆಂ ಎಚ್ಚೆಮಾಚೆಂ ರುದಾನ್ ಮಾತ್ರ್ ಇಲ್ಲೆಶೆಂ ’ಒವರ್’ ಜಾಲ್ಲೆಂ ಬರಿಂ ದಿಸ್ತಾ ಮ್ಹಾಕಾ. ಕಾಂಯ್ ಎಚ್ಚೆಮಾಚಾ ಅಪುರ್‌ಬಾಯೆಚಾ ದೂರ್‌ದೃಷ್ಟೆನ್ ತಾಚಾ ಚಾಲ್ತ್ಯಾ ದಿಷ್ಟೆಕ್‌ಚ್ ಹರ್ಕತ್ ಜಾಲ್ಯಾ! ಹಾಂವೀ ಕೊಂಕ್ಣೆಂತ್ ಕ್ವಾಲಿಟೆಕ್ ಖಾಯ್ಸ್ ಕರ್ತಾಂ. ಪುಣ್ ತೆಂ ಸಲಿಸ್ ನೈಂ ಮ್ಹಳ್ಳೆಂ ಮ್ಹಾಕಾಚ್ ಬರಂವ್ಕ್ ಧರ್ತಾನಾ ಸುಸ್ತಾನಾ. ಪುಣ್ ಪ್ರೇತನ್ ಜ್ಯಾರಿ ಆಸಾ. ಮ್ಹಜ್ಯಾ ಪ್ರೇತನಾಂತ್ ಭುಂಯ್ ಪಡ್‌ಲ್ಲೆಂ ಸಗ್ಡಾಂಕ್ ಮೆಚ್ವಜೈ ಮ್ಹಳ್ಳೆಂ ಮಾತ್ರ್ ಹಾಂವೆ ಅಪೇಕ್ಸುಂಚೆ ನೈಂ ಅಶೆಂ ಹಾಂವ್ ಮ್ಹಣ್ತಾಂ. ತಶೆಂ ಮ್ಹಣ್ತಾನಾ ಮ್ಹಾಕಾ ವಲ್ಲಿ ಕ್ವಾಡ್ರಾಸಾಚ್ಯಾ ’ನೊನ್ ಸ್ಟೊಪ್’’ ವಾವ್ರಾಚೆರ್ ಖೂಬ್ ಅಭಿಮಾನ್ ಆಸಾ. ದಾಯ್ಜಾರ್ ’ಕ್ವಾಲಿಟಿ’ ಬರಪ್ ಆಸಾ. ಪುಣ್ ತೆಂ ಸದಾಂಚ್ ಮೆಳ್ಚೆನಾಂ. ಪುಣ್ ತುಂವೆ ಕಾಂಯ್ ತೆಂ ಸಾರೆಂ ಮ್ಹಳ್ಳೆಂ ತರ್ ತ್ಯಾ ಸಾರ್‍ಯಾಂತ್ಲ್ಯಾನ್ ಥೊಡ್ಯೊ ತರೀ ಪುಶ್ಟಿದಾಯೆಕ್ ರೊಂಪಿಯೊ ವಾಡ್ತಾಲ್ಯೊ ಮ್ಹಳ್ಳೆಂ ಕೊಣೆಂಯ್ ಕಶೆಂ ವಿಸ್ರೊಂಚೆಂ? ತರೀ ವಲ್ಲಿ ಕ್ವಾಡ್ರಾಸಾನ್ ’ಕ್ವಾಲಿಟಿ’ ಆನಿ ’ಕ್ವಾಂಟಿಟಿ’ ಮದ್ಲೊ ’ಗ್ಯಾಪ್’ ಉಣೊ ಕೆಲ್ಯಾರ್ ಬರೆಂ ಅಶೆಂ ಕೆದ್ನಾಂ ಕೆದ್ನಾಂ ಮ್ಹಾಕಾ ಭಗ್‌ಲ್ಲೆಂ ಆಸಾ.

ಪಾಂಚ್ವ್ಯಾ ವರ್ಸುಗೆಚಾ ಸಂದರ್ಬಿ ವಲ್ಲಿ ಕ್ವಾಡ್ರಾಸಾಕ್ ಆನಿ ತಾಚಾ ದಾಯ್ಜ್ ಶಿಬಂದೆಕ್ ಪರ್ಬಿ!

- ಮ್ಯಾಕ್ಸಿಮ್ ಲೋಬೊ

ಮುಕ್ತ್ ಉಲವ್ಪ್

ಸಾಹಿತಿಕ್ ಪ್ರತಿಕ್ರಿಯಾ

ಏಕ್ ಉಗ್ತೆಂ ಪತ್ರ್

ದಾಯ್ಜ್ ಪಾನಾಕ್

ಸಜ್ಜಿಗೆ

ವಿಚಾರ್-ಉಚಾರ್

ಫ್ಲಾಯ್ಟ್!?