• ದಾಯ್ಜ್ ಮಿಸಾಂವ್

• ಕವಿತಾಪಾಠ್

• ವಿಶೇಸ್ ಅಂಖೆ

• ಕಾಣ್ಯೊ

• ಸಾಹಿತಿಕ್ ಸ್ಪರ್ಧೊ 2004

• ದಾಯ್ಜ್ ಮಂಡಳಿ

• ಕಥಾಪಾಠ್

• ಕಾಮಾಸಾಳಾಂ

• ಅಂಕಣಾಂ

• ಸಾಹಿತಿಕ್ ಸ್ಪರ್ಧೊ 2005

• ಸಂಪಾದಕೀಯಾಂ

• ಕವಿತಾದಾಯ್ಜ್

• ಬೂಕ್ ಸಮೀಕ್ಶಾ

• ಕವಿತಾಂ

• ಸಾಹಿತಿಕ್ ಸ್ಪರ್ಧೊ 2006

• ಕೊಂಕ್ಣಿ ಲೇಖನಾಂ

• ಕಥಾದಾಯ್ಜ್

• ಸವಾಲಾಂ ಜಾಪಿ

• ಚಿಕ್ಲೆಟಾಂ

• ದಾಯ್ಜ್ ಶಿಭಿರ್ 2006

• ವಿಚಾರ್ ಉಚಾರ್

• ಕವಿತಾಮೃತ್

• ಆಶಾವಾದಿ ಬೂಕ್

• ವಿಡಂಬನಾಂ

• ದಾಯ್ಜ್ ಶಿಭಿರ್ 2007

• ಪರ್ಗಟ್ ವಿಚಾರ್

• ಕಥಾಮೃತ್

• ಕೊಂಕ್ಣಿ ಕ್ವಿಜ್

• ವಿಮರ್ಶೆ

• ಕೊಂಕ್ಣಿ ಅಭಿಯಾನ್

ಸರ್ಗಾಂತ್ಲಿಂ ಖರ್ಗಾಂ[ಹೆಂ

ಅಂಕಣ್ ಹರ್ಯೆಕಾ ಮಯ್ನ್ಯಾಚ್ಯಾ ಮಧ್ಲ್ಯಾ ಹಾಫ್ತ್ಯಾಂತ್ ಪರ್ಗಟ್ ಜಾತೆಲೆಂ]

Placeholder: the original page gave this picture no description, and none has been written yet. It came from daaiz\daaiz\column\sgkg\sgkg.asp.

ಥೊಡ್ಯಾ ವರ್ಸಾಧಿಂ ’ದರ್ಭಾರಾಂತ್ಲಿ ಪಿಂರ್‍ಗೊಣ್’ ಕವಿತೆಜಮ್ಯಾಕ್ ರಡ್ತೆಲ್ಯಾ ಜೋಕರಾಚೆಂ ಮುಖ್‌ಪಾನ್ ದಿಲ್ಲೆಂ. ಕೊಂಕ್ಣೆಚ್ಯಾ ಎಕಾ ದರ್ಭಾರಾಂತ್ ಮ್ಹಾಕಾ ಜೋಕರ್ ಕರ್ನ್ ಹಾಸ್ಲೆಲ್ಯಾಂಚ್ಯಾ ಮಾನಾಕ್. ಆತಾಂ ಅನ್ಯೇಕ್ ಜೋಕರ್ ಹಾಂಗಾಸರ್ ದುಖಾಂ ಗಳಯ್ತಾ. ಹಿಂ ದುಖಾಂ ನ್ಹಯ್, ಅನ್ಭೋಗ್, ಸತ್ ಸಾಂಗಾಜಯ್‌ಚ್ಚ್ ಮ್ಹಳ್ಳೊ ನಿರ್ಧಾರ್ ಕರುನ್ ಹ್ಯಾ ಅಭಿವ್ಯಕ್ತೆಕ್ ಫುಡೆಂ ಸರ್ಲಾಂ. ಭಿಲ್ಕುಲ್ ಕೊಣಾಯ್ಚೆರ್ ಜಾಳ್ ವೊಂಕ್ಚ್ಯಾಕ್ ನ್ಹಯ್, ಪುಣ್ ತಾಂಚ್ಯಾ ಸ್ವಭಾವಾಚೆರ್ ಏಕ್ ಆರ್ಸೊ ಧರ್ಯಾಂ ಮ್ಹಳ್ಯಾ ಎಕಾಚ್ಚ್ ಇರಾದ್ಯಾನ್; ಕಿತ್ಯಾಕ್, ಮ್ಹಾಕಾ ಹೆಂ ಸರ್ವ್ ಭಗುಂಕ್ ಮೆಳ್ಳೆಂ, ಪುಣ್ ಹೆರಾಂಕ್ ಹೆಂ ಭಗುಂಕ್ ಮೆಳ್ಳೆಂ ತರ್, ಖಂಡಿತ್ ಜಾವ್ನ್ ತಿಂ ಕೆದಿಂಕ್‌ಚ್ ಕೊಂಕ್ಣೆತೆವ್ಶಿನ್ ಪಾಟಿಂ ಘುಂವೊನ್ ಸಯ್ತ್ ಪಳೆಂವ್ಚಿಂನಾಂತ್. ಕೊಂಕ್ಣಿ ಸಂಪಾದಕ್‌ಪಣ್ ಏಕ್ ಸರ್ಗ್ ಮ್ಹಣ್ ಭಗ್ತೆಲ್ಯಾಂಕ್ ಹಾಂತುಂ ಭಗುಂಕ್ ಮೆಳ್ಚ್ಯಾ ಖರ್ಗಾಂಚಿ ಇಲ್ಲಿ ತರ್‌ಯೀ ಕುರುಃ ದಿಲಿ ತರ್, ಫುಡ್ಲ್ಯಾ ಸಾಹಿತಿಕ್ ವಾವ್ರಾಡ್ಯಾಂಕ್ ಉಪ್ಕಾರಾಕ್ ಪಡಾತ್ ಕೊಣ್ಣಾ.

ಹೆಂ ಅಂಕಣ್ ಕೊಂಕ್ಣಿ ಲೊಕಾಂಕ್ ಭೋವ್ ಮೊಗಾನ್ ಆನಿ ಮಾನಾನ್ ಲೆಖ್ಚ್ಯಾ ಆಸ್ಟಿನ್ ಡಿ’ಸೋಜ್ ಪ್ರಭುಕ್ ಅರ್ಪಿಲಾಂ.

ವಲ್ಲಿ ಕ್ವಾಡ್ರಸ್

1. ರುಂವಾಂತ್ಲೆಂ ಸರ್ಗ್

ಮ್ಹಜ್ಯಾ ಸಂಪಾದಕೀಯಾಂತ್ ಬರಯಿಲ್ಲ್ಯಾ ’ರುಂವಾಂತ್ ಸರ್ಗ್’ ಉತ್ರಾಚೊ ಮತ್ಲಬ್ ವಿಚಾರುನ್ ಮ್ಹಾಕಾ ಥೊಡ್ಯಾಂನಿ ಸಂಪರ್ಕ್ ಕೆಲ್ಲೊ. ಹೆಂ ಅಭಿವ್ಯಕ್ತ್ ಕರುಂಕ್ ಗೆಲೊಂ ತರ್ ಮ್ಹಜಿಚ್ ಆತ್ಮ್‌ಚರಿತ್ರಾ ಜಾಯ್ತ್ ಮ್ಹಳ್ಳ್ಯಾ ಚಿಂತ್ಪಾನ್ ಕಿತ್ಯಾಕ್‌ಗೀ ನಾಕಾ ಮ್ಹಳ್ಳೆಂ ಚಿಂತಾಪ್ ಮತಿಂತ್ ಆಸ್ಲೆಂ. ಪುಣ್ ಕಿತ್ಯಾಕ್‌ಗೀ, ಹೆಂ ಅಭಿವ್ಯಕ್ತ್ ಕರಿಜಯ್ ಮ್ಹಣ್ ಭಗ್ತಾ;

2008-09 ಇಸ್ವೆಂತ್ ಆಯಿಲ್ಲಿ ಆರ್ಥಿಕ್ ದಿವಾಳಿ ಜಾಯ್ತ್ಯಾ ಲ್ಹಾ-ಲ್ಹಾನ್ ಕಂಪ್ಣೆಂಕ್ ಹಾಲಂವ್ಕ್ ಮಾತ್ರ್ ನ್ಹಯ್, ಸತ್ತ್ಯಾನಾಸ್ ಕರುಂಕ್ ಸಕ್ಲಿ. ವ್ಹಡ್ ಕಂಪ್ಣೆಂಕ್ ಹೊಚ್ಚ್ ಏಕ್ ಆವ್ಕಾಸ್. ಹೆಚ್ಚ್ ವೆಳಾರ್ ಹಾಂವ್ ಗಲ್ಫಾಂತ್ಲ್ಯಾ 9 ದೇಶಾಂತ್ಲ್ಯಾ ಐ.ಟಿ. ಇನ್‌ಫ್ರಾಸ್ಟ್ರಕ್ಚರ್ ಪ್ರೋಜೆಕ್ಟ್ಸ್ ಪಳೆವ್ನ್ ಆಸ್‌ಲ್ಲೊಂ ದೆಕುನ್ ಸರಾಗ್ ಮ್ಹಾಕಾ ಪಯ್ಣ್ ಕರುಂಕ್ ಪಡ್ತಾಲೆಂ. (ದುಭಾಯ್, ಖತಾರ್, ಮಸ್ಕತ್, ಬಾಹ್ರೇಯ್ನ್, ಸೌದಿ, ಜೋರ್ಡನ್, ಲೆಬನನ್, ಟರ್ಕಿ ಅನಿ ಕುವೇಯ್ಟ್). ಚಡ್ತಾವ್ ಪ್ರೋಜೆಕ್ಟ್ ಹೆಚ್ಚ್ ವಗ್ತಾಂ ರಾವಯ್ಲೆ ಆಸ್ತಾಂ ಮ್ಹಕಾ ಮ್ಹಜ್ಯಾ ಬೋಸಾನ್ (ಸೀನಿಯರ್ ವಿ.ಪಿ - ಐ.ಟಿ.) ಆಪವ್ನ್ ಹ್ಯೆವಿಶಿಂ ಕಳಯ್ಲೆಂ. ಶೀದಾ ನ್ಹಯ್ ತರ್‌ಯೀ, ಇನ್‌ಡೈರೆಕ್ಟ್ ರಿತಿನ್ ಮ್ಹಕಾ ಖಂಚ್ಯಾ ಗ್ರೂಪಾಕ್ ರಿಗೊಂಕ್ ಮ್ಹಾಕಾ ಜಾಯ್ ಮ್ಹಣೊನ್ ಸಮ್ಜಾಜಯ್ ಆಸ್ಲೆಂ ತಾಕಾ.

[ಗಲ್ಫಾಂತ್ಲ್ಯಾ ಚಡ್ತಾವ್ ಕಂಪ್ಣೆಂನಿ ಹೆಂ ಸದಾಂಚೆಂ; ದೋನ್, ತೀನ್ ಪಂಗಡ್ ಆಸ್ತಾತ್, ಏಕ್ ಮಲ್ಬಾರಿಂಚೊ, ಅನ್ಯೇಕ್ ತಮ್ಳಾಂಚೊ ತರ್ ತಿಸ್ರೊ ನೋರ್ತಾಂಚೊ. ಪುಣ್ ಕೊಂಕ್ಣೆಕ್ ಪಂಗಡ್ ನಾಂತ್, ಕೊಂಕ್ಣೆಂತ್ ಫಕತ್ತ್ ವಾಂಟೆ-ಫಾಂಟೆ, ತೊ ಗೊಂಯ್ಕರ್, ಹೊ ಮಂಗ್ಳುರ್‌ಗಾರ್, ವ ಮಂಗ್ಳುರ್‌ಗಾರಾಂ ಮಧೆಂ ಸಯ್ತ್; ತೊ ಮಂಗ್ಳುರ್ಚೊ ಹೊ ಉಡ್ಪಿ/ಕಾರ್ಕಳ್ಚೊ ವ ಕುಂದಾಪುರ್‌ಚೊ, ಹೊ ಬಾಮ್ಣಾಂಚೊ, ತೊ ಚಾರೊಡಿ, ಹೊ ಘಾಟಾಗಾರ್.. ಇತ್ಯಾದಿ.. ಇತ್ಯಾದಿ.]

ಪುಣ್ ಹಾಂವೆಂ ಮೊಸ್ತ್ ಚಿಂತುನ್ ತಾಕಾ ಸಾಂಗ್ಲೆಂ "ಹಾಂವ್ ಯೆಂವ್ಚ್ಯಾ ವರ್ಸಾ ಎಮ್.ಬಿ.ಎ. ಶಿಕೊಂಕ್ ಚಿಂತುನ್ ಆಸಾಂ ದೆಕುನ್ ಹಾಂವ್ ಕಂಪೆನಿ ಸೊಡುಂಕ್ ಆಶೆತಾಂ". ಭೋವ್ಶಾ ತಾಕಾ ತಿ ಜವಾಬ್ ಪಸಂದ್ ಜಾಲಿ.

ಹ್ಯ ಆರ್ಥಿಕ್ ದಿವಾಳಿನ್ ಜಾಯ್ತ್ಯಾಂಕ್ ವಾಟೆರ್ ಘಾಲ್ಲೆಂ. (ಸರ್ವಾಂ ಆಫಿಸಾಂತ್ ಬೊಸೊನ್ ಕೊಂಕ್ಣಿ ವಾವ್ರ್ ಕರ್ತಾಲಿಂ ದೆಕುನ್ ನ್ಹಯ್). ತಾಂತುಂ ಸಭಾರ್ ಜಣಾಂ ಅಜೂನ್ ಪರ್ಯಾಂತ್ ಪರ್ಗಾಂವಾಂತ್ ಆಸಾತ್, ಕೊಣಾಚೆಂ ರೆಸಿಡೆನ್ಸ್ ನಾ, ಕೊಣ್ ಘರಾ ಭಾಯ್ರ್ ಯೇಂವ್ಕ್ ಸಯ್ತ್ ಭಿಂಯೆತಾ, ತರ್‌ಯೀ "ಗಾಂವಾಕ್ ಗೆಲ್ಯಾರ್ ಎಕಾ ವಾಟೆನ್ ಹಾಸ್ಚೊ ಲೋಕ್, ದುಸ್ರೆ ವಾಟೆನ್ ಘರ್ಚ್ಯಾಂಕ್ ಖಂತ್ ಮ್ಹಳ್ಳಿಂ ಚಿಂತ್ನಾಂ, ದೆಕುನ್ ಜಾತಾ ತಿತ್ಲೆ ದೀಸ್ ಹಾಂಗಾಚ್ಚ್ ಲೊಟ್ಚೆ" - ಅಶೆಂ ಮ್ಹಣ್ತಾತ್ ಥೊಡೆ.

ಹೆಚ್ಚ್ ಸಂಧರ್ಭಾರ್ ಮ್ಹಜೆಸವೆಂ ಸರಾಗ್ ಸಂಪರ್ಕಾರ್ ಆಸ್ಲೊ ಮ್ಹಜೊ ಸಾಹಿತಿಕ್ ಮಿತ್ರ್ ಮೆಲ್ವಿನ್. ಜೆ. ವಾಸ್. ಎಕಾ ದಿಸಾ ಮ್ಹಾಕಾ ಭೋವ್ ಬೆಜಾರಾಯೆನ್ ಆಸ್ಚೆವೆಳಾರ್ ಮ್ಹಾಕಾ ಹ್ಯೇವಿಶಿಂ ವಿಚಾರ್ ಕರಿಲಾಗ್ಲೊ; ಮ್ಹಾಕಾ ಎಕಾ ಮಾಲ್ಘಡ್ಯಾ ಸಾಹಿತಿನ್ ಬರಯಿಲ್ಲೆಂ ಇಮೇಯ್ಲ್ ತಾಕಾ ಧಾಖಯ್ಲೆಂ, ತಾಂತುಂ ಇತ್ಲೆಂಚ್ ಬರಯಿಲ್ಲೆಂ "ಮ್ಹಜೆಂ ಸಾಹಿತ್ಯ್ ಹೆರಾಂನಿ ಪರ್ಗಟ್ ಕೆಲಾಂ, ಹಾಚೊ ಮತ್ಲಬ್ ಹೊ ನ್ಹಯ್‌ಕೀ ತುಕಾ ಫುಂಕ್ಯಾಕ್". ಹೆಂ ಇಮೇಯ್ಲ್ ವಾಚುನ್ ಮ್ಹಜೊ ಸಾಹಿತಿಕ್ ಮಿತ್ರ್ ಮೆಲ್ವಿನ್. ಜೆ. ವಾಜ್ ಭೋವ್ ನಿರಾಸ್ಲೊ ಆನಿ ಮ್ಹಣಾಲೊ; "ಆಸೊಂ ವಲ್ಲಿ, ಆಮಿ ಕೊಂಕ್ಣೆಚೆ ಪಿಶೆ ಮ್ಹಣ್ ಸರ್ವಾಂ ನ್ಹಯ್, ಥೊಡೆ ಕೊಂಕ್ಣೆಂತ್ ಜಲ್ಮಲ್ಲೆ, ವ ಜಿಯೆತಾತ್ ಕೊಂಕ್ಣೆಂತ್ ಪಯ್ಶೆ ಕರುಂಕ್, ದೆಕುನ್ ತಾಚೆಂ ಸಂಭಾವನ್ ಧಾಡ್, ಗರ್ಜ್ ಪಡ್ಲ್ಯಾರ್ ಆಮಿ ರೀಣ್ ಕಾಡ್ಯಾಂ, ಪುಣ್ ಹೆರಾಂಚೆಂ ಅಸಲೆ ಆಣ್ಕಾಣೆಂ ಆಮ್ಕಾಂ ಆಯ್ಕೊಂಕ್ ನಾಕಾ". ಅಶೆಂ ತುರಂತ್ ಹಾಂವೆಂ ತಾಕಾ ತಾಚೆಂ ಸಂಭಾವನ್ ಧಾಡ್ಲೆಂ. (ಮ್ಹಾಕಾ ಬೆಜಾರಾಯ್ ದುಡು ದಿಲ್ಲ್ಯಾಕ್ ನ್ಹಯ್, ಹೆರಾಂಚಿ ಪರಿಗತ್ ಸಯ್ತ್ ಪಾರ್ಕಿನಾಸ್ತಾಂ ದುಡ್ವಾಖಾತಿರ್ ಲೇಖಕ್ ಕಶೆಂ ಎಕಾಮೆಕಾಚಿಂ ಮಾಸಾಂ ಸಯ್ತ್ ಖಾಂವ್ಕ್ ಪಾಟಿಂ ಸೊಡಿನಾಂತ್ ಮ್ಹಳ್ಳೆಂ ಚಿಂತುನ್).

ಹಾಂವ್ ಆಮ್ಚ್ಯಾ ಕಂಪೆನಿಂತ್ ಪಯ್ಲೊ ಐ.ಟಿ.ಪ್ರೋಜೆಕ್ಟ್ ಮ್ಯಾನೆಜರ್ ಜಾವ್ನ್ 2001 ಇಸ್ವೆಂತ್ ಸೆರ್ವಲ್ಲೊಂ. ದೆಕುನ್ ಮ್ಹಾಕಾ ಮ್ಹಜ್ಯಾ ಬೋಸಾನ್ (ಸೀನಿಯರ್ ವಿ.ಪಿ) ಆಪವ್ನ್ ವಿಚಾರ್ಲೆಂ "ತುಂ ಕುವೇಯ್ಟ್ ಸೊಡ್ನ್ ವಚೊಂಕ್ ಆಶೆತಾಯ್? ವ ತುಕಾ ಕಂಪೆನಿನ್ ವಿಜಾ ಮಾರ್ನ್ ದೀಜೆ?". ಹಾಂವೆಂ ಕಂಪೆನಿಚಿ ವಿಜಾ ಮಾಗ್ಲಿ ದೆಕುನ್ ಕಂಪೆನಿನ್ ಮ್ಹಾಕಾ ದೋನ್ ವರ್ಸಾಂಚಿ ವಿಜಾ ಮಾರ್ನ್ ದಿಲಿ, ಆನಿ ಮ್ಹಜಿ ಸಿವಿಲ್ ಐ.ಡಿ ಘೆತ್ಲಿ.

ಮ್ಹಜೆಲಾಗಿಂ ಪಾಸ್‌ಪೋರ್ಟ್ ಆಸ್ಲೊ, ಪುಣ್ ಸಿವಿಲ್ ಐಡಿ ಹಾತಿಂ ನಾತ್ಲಿ. ಹೆಂ ಜೂನ್ ಮಯ್ನ್ಯಾಂತ್ ಘಡ್ಲೆಂ ತರ್, ಜುಲಾಯ್ ಮಯ್ನ್ಯಾಂತ್ ಹಾಂವ್ ಗಾಂವಾಕ್ ಯೆಂವ್ಚ್ಯಾರ್ ಆಸ್ಲೊಂ, ಕಿತ್ಯಾಕ್ ಮ್ಹಳ್ಯಾರ್ ಎಮ್.ಬಿ.ಎ ಪಯ್ಲ್ಯಾ ಸೆಮಿಸ್ಟರಾಚಿ ಪರಿಕ್ಶಾ ಆಸ್ಲಿ ದೆಖುನ್. ಪುಣ್ ಮ್ಹಜಿ ಆವಯ್ ಸರ್ಲಿ - ಅಶೆಂ ದೋನ್ ಮಯ್ನೆ ಕಶೆ ಪಾಶಾರ್ ಜಾಲೆಂ ಮ್ಹಳ್ಳೆಂಚ್ ಕಳ್ಳೆಂನಾ. ರಜೆರ್ ಗೆಲ್ಲೊಂ ’ಐ.ಟಿ.ಐ.ಎಲ್ ಫೌಂಡೇಶನ್ (ITIL v3 Foundation’ ಪರಿಕ್ಶಾ ದೀವ್ನ್ ಹಾಂವ್ ಪಾಟಿಂ ಕುವೆಯ್ಟಾಕ್ ಆಯ್ಲೊಂ.

ಗಲ್ಫಾಂತ್ ಹರ್ಯೆಕಾ ವರ್ಸಾ ಆಪ್ಲಿ ಗಾಡಿಯೆಚಿಂ ಪೇಪರಾಂ ರಿನೀವ್ ಕರುಂಕ್ ಆಸಾತ್, ಪಯ್ಲೆಂ ಗಾಡಿಯೆಚೆಂ ಎಮಿಶನ್ ತಶೆಂಚ್ ಕಂಡಿಶನ್ ಪಾರ್ಕುನ್, ಗಾಡಿ ಸಾರ್ಕ್ಯಾ ಕಂಡಿಶನಾಂತ್ ಆಸಾ ತರ್, ಎಕಾ ವರ್ಸಾಖಾತಿರ್ ಪೇಪರಾಂ ರಿನೀವ್ ಕರ್ನ್ ದಿತಾತ್. ಅಕ್ತೋಬರಾಂತ್ ಮ್ಹಜ್ಯಾ ಗಾಡಿಚೆಂ ಪಾಸಿಂಗ್ ಆಸ್ಲೆಂ, ಹರ್ಯೆಕಾ ವರ್ಸಾಪರಿಂ ಹ್ಯಾ ವರ್ಸಾಯ್ ಹಾಂವೆಂ ಇನ್ಶುರೆನ್ಸ್ ಭರ್ಲೆಂ ಆನಿ ಗಾಡಿಯೆಚೆಂ ಎಮಿಶನ್ ಆನಿ ಕಂಡಿಶನ್ ಚೆಕ್ಕ್ ಕರ್ತಚ್ಚ್, ಪೇಪರಾಂ ಘೆಂವ್ಕ್ ವೆತಾನಾ ಪಯ್ಲೆ ಪಾವ್ಟಿಂ ತಾಣಿಂ ನಂಬರ್ ಪ್ಲೇಟ್ ಬದ್ಲುಂಕ್ ಆಸ್ಲೆಲ್ಯಾನ್ ಮ್ಹಜಿ ಸಿವಿಲ್ ಐ.ಡಿ. ವಿಚಾರ್ಲಿ. ಪುಣ್ ಮ್ಹಜಿ ಸಿವಿಲ್ ಐ.ಡಿ. ಕಂಪೆನಿಕಡೆ ಆಸ್ಲೆಲ್ಯಾನ್ ಹಾಂವೆಂ ತಾಚಿ ಕೋಪಿ ಧಾಖಯ್ಲಿ. ಪುಣ್ ತಿಂ ಮ್ಹಣಾಲಿಂ ’ಒರಿಜಿನಲ್ ಸಿವಿಲ್ ಐಡಿ ಘೆವ್ನ್ ಯೇ’. ಅಶೆಂ ಕಾರಾಚೆಂ ಪೇಪರ್ ರಿನೀವ್ ಜಾಲೆಂ ನಾ. ಆತಾಂ ಸಿವಿಲ್ ಐ.ಡಿ. ಮೆಳಾಜಯ್ ತರ್ ಏಕ್ ವಾಟ್ ಆಸ್ಲಿ, ಹಾಂವೆಂ ಖಾಸ್ಗಿ ವಿಜಾ ಮೊಲಾಕ್ ಘೆತ್ಲಿ ತರ್, ಉಪ್ರಾಂತ್ ಕಂಪೆನಿಚಿ ವಿಜಾ ಕ್ಯಾನ್ಸಲ್ ಕರ್ನ್, ಸಿವಿಲ್ ಐಡಿ ಘೆವ್ಯೆತಾ ಮ್ಹಣೊನ್ ಎಕಾ ಅರ್ಭ್ಯಾಕ್ ಧರ್ನ್ ಮ್ಹಜೊ ಪಾಸ್‌ಪೋರ್ಟ್ ಆನಿ ಪೊಯ್ಶೆ ದಿಲೆ.

ಹ್ಯಾ ದಿಸಾಂನಿ ಮ್ಹಜ್ಯಾ ಹಾತಾಂತ್ ಸಿವಿಲ್ ಐಡಿ ನಾ, ಪಾಸ್‌ಪೋರ್ಟ್ ನಾ, ಗಾಡಿಯೆಚಿಂ ಸಾರ್ಕಿಂ ಪೇಪರಾಂ ನಾಂತ್. ಕೆದ್ನಾಂಯ್ ಖಂಚ್ಯಾಯ್ ಪೊಲಿಸಾನಿ ಧರ್ಲೆಂ ತರ್ ಶೀದಾ ಜಯ್ಲಾಕ್ ಧಾಡ್ಚೆಂ ನಖ್ಖಿ ಜಾಲ್ಲೆಂ. ದುಸ್ರಿ ವಾಟ್ ನಾ. ಘರಾ ಬೊಸೊಂಕ್ ಮನ್ ನಾ, ಭಾಯ್ರ್ ವಚೊಂಕ್ ಕಾಮ್ ನಾ, ಮಿಸಾಕ್ ಗೆಲ್ಯಾರ್ ವ್ಹಳ್ಕಿಚ್ಯಾ ಲೊಕಾಂನಿ ಪಳೆಂವ್ಚ್ಯಾ ನದ್ರೆಂತ್‌ಚ್ ಸರ್ವ್ ಸಂಧೇಶ್ ಮೆಳ್ತಾಲೆ. ದೆಕುನ್ ಮಿಸಾಕ್ ವೆಚೆಂಯ್ ರಾವಯ್ಲೆಂ.

ಸಭಾರಾಂನಿ ಇಮೇಯ್ಲಾಂ ಕರ್ನ್ ಮ್ಹಜಿ ಖಬಾರ್ ಘೆತ್ಲಿ. ಪುಣ್ ಭೋವ್ ಬೆಜಾರಾಯ್ ಜೆದ್ನಾಂ ಭಗ್ತಾಲಿ, ಚಡ್ತಾಂವಾಂಕ್ ಫಕತ್ತ್ ಖಬ್ರೊ ಕರುಂಕ್ ಮ್ಹಜಿ ತನ್ಕಿ ಕರ್ತಾಲಿಂ. ಆಸೊಂ ಮ್ಹಜ್ಯಾ ಹ್ಯಾ ಸ್ಥಿತೆಂತ್ ತರ್‌ಯೀ ಸಮಧಾನ್/ಸುಖ್ ಭಗ್ಚಿಂ ಆಸಾತ್/ಆಸ್ಲಿಂ ನ್ಹಯ್‌ವೆ ಮ್ಹಳ್ಳಿ ಧಾದೊಸ್ಕಾಯ್. ಸಭಾರಾಂನಿ ವಿಚಾರ್ಚೆಂ ಆಸ್ಲೆಂ "ದಾಯ್ಜ್ ಕಿತ್ಯಾಕ್ ಜೆಮೆತಾ/ನಿದ್ಲಾಂ?". ಭಿಲ್ಕುಲ್ ತಾಂಚ್ಯಾ ಸವಾಲಾಂಚೆರ್ ಕಸ್ಲೊಚ್ ರಾಗ್ ನಾ. ಹ್ಯಾ ಜೆಮೆಂವ್ಚ್ಯಾ/ನಿದ್ಲೆಲ್ಯಾ ದಾಯ್ಜಾಕ್ ಏಕ್ ರುಪಯ್ ದಿಶಿಗೀ ಮ್ಹಣ್ ವಿಚಾರ್‌ಲ್ಲೆಂ ತರ್, ತಿಂ ಜೀಣ್‌ಭರ್ ಮ್ಹಜೆಮುಖಾರ್ ಯೆತಿಂ ನಾಂತ್. ಏಕಾ ವಾಟೆನ್ ಹಿಂಚ್ ಚಿಂತ್ನಾಂ ತರ್ ದುಸ್ರೆ ವಾಟೆನ್ ದಾಯ್ಜ್ ಸಾಹಿತಿಕ್ ಸ್ಪರ್ದ್ಯಾಂತ್ ಇನಾಮಾಂ ಜೊಡ್ಲೆಲ್ಯಾಂಕ್ ಇನಾಮಾಂ/ಐವಜ್ ದೀಂವ್ಕ್ ನಾಂ ಮ್ಹಳ್ಳಿ ಖಂತ್ ಧೊಸ್ತಾಲಿ. ಕಿತ್ಯಾಕ್ ಮ್ಹಳ್ಯಾರ್ ಹ್ಯೇ ವಿಶಿಂ ಸಯ್ತ್ ಖಬ್ರೊ ಜಾತಾಲ್ಯೊ ಮ್ಹಣ್ ಮ್ಹಾಕಾ ಆಯ್ಕೊಂಕ್ ಮೆಳ್ಳೆಂ.

ಹ್ಯಾ ಮಧೆಂ ಮ್ಹಜ್ಯಾಚ್ ಖರ್ಚಾರ್ ಬೂಕ್ ಛಾಪುನ್, ಸರ್ವ್ ಬೂಕ್ ವ್ಹರ್ನ್ ತೆಚ್ಚ್ ಬರಯ್ಣಾರಾಕ್ ದಿಲ್ಯಾರೀ, ತಾಚ್ಯಾ ವಯ್ರ್ ಸಯ್ತ್ ಹಾಂವೆಂಚ್ ಪಯ್ಶೆ ದೀಜಯ್ ಆಸ್ಲೆ ಮ್ಹಣ್ ಮ್ಹಜೆವಿಶಿಂ ಖಬ್ರೊ ಕೆಲ್ಲಿ ಗಜಾಲ್ ಆಯ್ಕಾಲ್ಲಿ, ತೆಂಯ್ ಕೊಂಕ್ಣೆಚ್ಯಾ ಮಾನ್ ಲೇಖಕಾಂಚಿ. ದೆಕುನ್ ಪಯ್ಲೆಂ ತಾಂಚೊ ಮುನಾಫೊ (ಕೊಂಕ್ಣೆಂತ್ ತಾಣಿಂ ಉಸ್ವಾಸ್ ಮಾತ್ರ್ ನ್ಹಯ್, ಪುಸ್ಕಿ ಸೊಡ್ಚಿ ತರ್‌ಯೀ ಮುನಾಫೊ ಜೊಡುಂಕ್) ಧಾಡ್ನ್ ದಿಲೊ.

ಹೆಚ್ಚ್ ಸಂಧರ್ಭಾರ್ ಸದಾಂಯ್ ಚಾಟಿಂಗಾಚೆರ್ ಸದಾಂಯ್ ಮ್ಹಜೊ ಏಕ್ ಖಾಸ್ ಮಿತ್ರ್ ಆಪ್ಲ್ಯಾ ಭಯ್ಣಿಚ್ಯಾ ಘೊವಾವಿಶಿಂ ಸಾಂಗೊನ್ ರಡ್ತಾಲೊ, ತೊ ಕಾಮ್ ಕರಿನಾ, ಫಕತ್ತ್ ಸಗ್ಳೊ ದೀಸ್, ಬಾಯ್ಲೆನ್ ಘೊಳೊನ್ ಹಾಡ್‌ಲ್ಲೆಂ ಖಾತಾ, ಆನಿ ಪಿಯೆತಾ". ಹೆಂ ಆಯ್ಕೊನ್ ಹಾಂವೆಂ ಮ್ಹಜೆಯಿತ್ಲ್ಯಾಕ್ ಚಿಂತ್ಚೆಂ ಆಸ್ಲೆಂ "ಕಾಂಯ್ ಮ್ಹಜೆವಿಶಿಂ ಸಯ್ತ್ ಲೋಕ್ ಅಸೊಚ್ಚ್ ಉಲಯ್ತಾ ಕೊಣ್ಣಾ, ಮ್ಹಜಿ ಬಾಯ್ಲ್ ಕಾಮ್ ಕರ್ತಾಲಿ, ಪುಣ್ ಹಾಂವ್ ಘರಾಂತ್‌ಚ್ ಆಸ್ತಾಲೊಂ. ಪಿಯೆಂವ್ಚಿ ಸವಯ್ ನಾ ತರ್‌ಯೀ ಮ್ಹಜೆ ದೊಳೆ ಪಳೆವ್ನ್ ಕೊಣ್‌ಯೀ ಪಾತ್ಯೆಂವ್ಚೆನಾಂತ್ ಹಾಂವ್ ಪಿಯೆನಾತ್‌ಲ್ಲೊಂ ಮ್ಹಣ್". ಅಶೆಂ ಮತಿಂತ್ ಸಯ್ತ್ ನಾನಾ ರಿತಿಚಿಂ ಚಿಂತ್ನಾಂ. ಪುಣ್ ಕೊಣಾಲಾಗಿಂ ಸಾಂಗ್ಚೆಂ?. ಪಿಯೆಂವ್ಚಿ ಸವಯ್ ಆಸ್ತಿ ತರ್, ಕಾಂಯ್ ಪಿಯಿಲ್ಲೊಂ ತರ್ ರಾತ್ಚಿ ನೀದ್ ತರ್‌ಯೀ ಯೆತಿ. ಪುಣ್ ಮ್ಹಕಾ ತಿ ಸಯ್ತ್ ಯೇನಾತ್ಲಿ ಚಡ್ತಾವ್ ಜಾವ್ನ್. ಕಾಣಿ ಬರಯ್ತೆಲ್ಯಾಚಿ ಜಿಣಿ ಇತ್ಲಿ ನಿಶ್ಟುರ್!?. ಅಶೆಂ ಮ್ಹಣೊನ್ ವಾದಾಳ್ ನ್ಹವೆಂ ನ್ಹಯ್ ಮ್ಹಕಾ. ಬೊಂಬೊಯ್ ಆಯಿಲ್ಲೆ ಸುರ್ವೆರ್ ಟೆರೆಸಾಚೆರ್ ನಿದೊನ್ ದೀಸ್ ಸಾರ್ಲ್ಯಾತ್, ತೆಂಯ್ ಖಾಂವ್ಕ್/ಜೇಂವ್ಕ್ ನಾಸ್ತಾಂ ಉಪಾಶಿಂ (ಉದಾಕ್ ಪಿಯೆವ್ನ್) ನಿದೊನ್ ದೀಸ್ ಕಾಡ್ಲ್ಯಾತ್. ತರ್‌ಯೀ ತ್ಯಾ ವೆಳಾರ್ ಹಾಂವೆಂ ಕೊಣಾಕ್ ತರೀ ಕಿತೆಂ ತರೀ ದೀಂವ್ಕ್ ಆಸಾ ಮ್ಹಳ್ಳೆಂ ಗುನ್ಯಾಂವ್ಕಾರ್ ಚಿಂತ್ನಾಂ ನಾತ್ಲಿಂ.

ಹಾಂವೆಂ ಕಾಮ್ ಸೊಡ್‌ಲ್ಲಿ (ವ ಮ್ಹಜೆಂ ಕಾಮ್ ಗೆಲ್ಲಿ) ಖಬಾರ್ ಮ್ಹಜ್ಯಾ ಭಾವಾಂಕ್ ಸಯ್ತ್ ದೀಂವ್ಕ್ ನಾತ್‌ಲ್ಲಿ, ಭೋವ್ ಥೊಡ್ಯಾ ಸಾಹಿತಿಕ್ ಮಿತ್ರಾಂಕ್ ಹಿ ಖಬಾರ್ ದಿಲ್ಲಿ. ಪುಣ್ ಸರ್ವಾಂಕ್ ಆಪಾಪ್ಲ್ಯಾ ರಾಟಾವಳೆಂತ್ ಹೆರಾಂವಿಶಿಂ ಚಿಂತುಂಕ್ ಪುರ್ಸತ್ ಖಂಯ್ ಆಸಾ? ಪುಣ್ ಥೊಡ್ಯಾಂನಿ ಆಪ್ಲ್ಯಾ ಭಾವಾಕ್, ಪುತಾಕ್, ಸುನೆಕ್ ಕಾಮ್ ಸೊಧುನ್ ದೀ ಮ್ಹಣೊನ್ ಘಾಲ್ಲ್ಯಾ ಇಮೇಯ್ಲಾಂಕ್ ಮ್ಹಜ್ಯಾ ತಾಂಕಿನ್ ಜಾಂವ್ಚೆಂ ಪ್ರೇತನ್ ಜರೂರ್ ಕೆಲ್ಲೆಂ. ವಿಶೇಸ್ ಖಂಚೆಂ ಮ್ಹಳ್ಯಾರ್ ಮ್ಹಜ್ಯಾ ವ್ಹಳ್ಕಿಚ್ಯಾ ಥೊಡ್ಯಾಂಕ್ ಕಾಮಾಂ ಸೊಧುನ್ ತಾಂಕಾಂ ಮ್ಹಜ್ಯಾ ವ್ಹಳ್ಕೆಚ್ಯಾಂಚಾ ಲಾಗಿಂ ವ್ಹರ್ತಾಲೊಂ. ಅಶೆಂ ಮ್ಹಾಕಾ ಹೆರ್ ದೇಸಾಂ ಥಾವ್ನ್ ಕಾಮಾಂ ಮೆಳ್ತಾಲಿಂ ತರ್‌ಯೀ ಸದ್ದ್ಯಾಕ್ ವಿಜಾ ಜಾಲ್ಲೆಶಿವಾಯ್ ಮ್ಹಾಕಾ ಸುಟ್ಕಾ ನಾತ್‌ಲ್ಲಿ. ಹೆಚ್ಚ್ ಸಂಧರ್ಭಾಚೆರ್ ಸಭಾರ್ ಲಾಗ್ಸಿಲೆ ಮ್ಹಾಕಾ ಇಮೇಯ್ಲಾಂ ಕರುನ್ ಮ್ಹಜೆವಿಶಿಂ ಸಮ್ಜೊಂಕ್ ಆಶೆತಾಲಿಂ. ಪುಣ್ ಮ್ಹಜಿ ಹಿ ಭೋವ್ ಪರ್ನಿ ಸವಯ್; ದೂಕ್ ಅಪ್ಣಾಸವೆಂ ದವರ್, ಸಂತೊಸ್ ಮಾತ್ರ್ ಹೆರಾಂಕ್ ವಾಂಟ್. (ಮಾಫ್ ಕರಾ, ಹಾಂತುಂ ಹಾಂವ್ ಇಲ್ಲೊ ಕಂಜೂಸ್)

ಮಯ್ನೆ ಉತರ್ಲೆ, ಪುಣ್ ಮ್ಹಜಿ ಖಾಸ್ಗಿ ವಿಜಾ ಜಾಲಿಚ್ ನಾ. ಹಾಂವ್ ಪರತ್ ಎಮ್.ಬಿ.ಎಚ್ಯಾ ದುಸ್ರ್ಯಾ ಸೆಮಿಸ್ಟರಾಚಿ ಪರಿಕ್ಶಾ ದೀವ್ನ್ ಐ.ಟಿ.ಎಸ್.ಎಮ್ (ಐ.ಟಿ.ಸರ್ವಿಸ್ ಮ್ಯಾನೆಜರ್ ITSM - IT Service Management) ಪರಿಕ್ಶಾ ದಿಲಿ. ತಶೆಂಚ್ ಕೋಬಿಟ್ CobIT 4.1 & ValIT (ಐ.ಟಿ.ಗವರ್ನೆನ್ಸ್) ಪರಿಕ್ಶಾ ದೀವ್ನ್ ಪರತ್ ಕುವೆಯ್ಟಾಕ್ ಆಯ್ಲೊಂ. ಅಶೆಂ ಮ್ಹಣೊನ್ ಹಾಂವ್ ಹೆರ್ ಕಾಮಾಕ್ ಪ್ರೇತನ್ ಕರುಂಕ್ ನಾ ಮ್ಹಣ್ ನ್ಹಯ್. ಪುಣ್ ಇಂಟರ್‌ವ್ಯೂಕ್ ಗೆಲ್ಲೆವೆಳಾರ್ ಮ್ಹಾಕಾ ಪಳೆವ್ನ್ "ತುಜೆಂ ಶಿಕಾಪ್/ತುಜೊ ಅನ್ಭೋಗ್ ಹ್ಯಾ ಕಾಮಾಕ್ ಚಡ್ ಜಾಲೊ" ಮ್ಹಣೊನ್ ಮ್ಹಾಕಾ ಆವ್ಕಾಸ್ ಲಾಭ್ಲೊಚ್ ನಾ. ತರ್‌ಯೀ ಮ್ಹಾಕಾ ನಿರಾಸ್ ಜಾಂವ್ಕ್ ನಾತ್‌ಲ್ಲೆಂ.

ಭರ್ತಿ ಇಕ್ರಾ ಮಯ್ನೆ ಜಾಲ್ಲೆ, ಮ್ಹಜೆಂ ಕಾಮ್ ವಚೊನ್, ಅಜೂನ್ ಮ್ಹಜ್ಯಾ ಹಾತಿಂ ಸಿವಿಲ್ ಐಡಿ ನಾತ್ಲಿ, ಗಾಡಿಯೆಚಿಂ ಪೇಪರಾಂ ನಾತ್ಲಿಂ, ಹಾತಾಂತ್ ಪಾಸ್‌ಪೋರ್ಟ್ ನಾತ್‌ಲ್ಲೊ. ಹೆಚ್ಚ್ ವೆಳಾರ್ ಹಾಂವೆಂ ’ಪಿ.ಎಮ್.ಪಿ. PMP (ಸರ್ಟಿಫೈಡ್ ಪ್ರೋಜೆಕ್ಟ್ ಮ್ಯಾನೆಜರ್) ಪರಿಕ್ಶಾ ದಿಲಿ".

ಹಿ ಪರಿಕ್ಶಾ ದಿಲ್ಲ್ಯಾ ಎಕಾಚ್ಚ್ ಮಯ್ನ್ಯಾಂತ್ ಮ್ಹಾಕಾ ಸೌದಿಚ್ಯಾ ಅರಾಮ್ಕೊ ಕಂಪೆನಿಚೆಂ ಕೋಲ್ ಆಯ್ಲೆಂ. ಪಯ್ಲೆಂ ಹಾಂವ್ ಸೆಲೆಕ್ಟ್ ಜಾಲ್ಯಾರ್ ಎಕಾ ಹಾಫ್ತ್ಯಾಭಿತರ್ ಯೇಂವ್ಕ್ ತಯಾರ್ ಆಸಾಂಗೀ ಮ್ಹಣೊನ್ ವಿಚಾರ್ನ್ ಕೋಲ್ ಆಯ್ಲೆಂ. ಉಪ್ರಾಂತ್ ಟೆಲಿಫೋನಾರ್ ಮ್ಹಜಿ ಇಂಟರ್‌ವ್ಯೂ ಜಾಲಿ. ’ಪ್ರೋಗ್ರಾಮ್ ಮ್ಯಾನೆಜರ್’ ಕಾಮಾಕ್. ದೆವಾಚ್ಯಾ ದಯೆನ್ ಇಂಟರ್‌ವ್ಯೂ ಜಾಲಿ, ಆನಿ ಹಾಂವ್ ಪಾವ್ಲೊಂ ಸೌದಿ ಅರಾಮ್ಕೊ ಕಂಪೆನಿಕ್.

ದೆವಾಚಿ ಕಾಕುಳ್ತ್ ಮ್ಹಜೆರ್ ಆಸ್ಲಿ ಜಾಯ್ಜಯ್, ದೋನ್ ಮಯ್ನೆ ಕಾಮ್ ಕೆಲ್ಲೆಂಚ್ ಮ್ಹಾಕಾ ಐ.ಬಿ.ಎಮ್. ಥಾವ್ನ್ ಕೋಲ್ ಆಯ್ಲೆಂ. ಅನ್ಯೇಕ್ ಅಜ್ಯಾಪ್.

ಮ್ಹಾಕಾ ತ್ಯಾ ವೆಳಾರ್ ಕಾಮಾಚಿ ತಿತ್ಲಿ ಗರ್ಜ್ ನಾತ್ಲಿ ದೆಖುನ್ ಹಾಂವೆಂ ಶರ್ತಾಂ ಘಾಲಿಂ; ’ಮ್ಹಾಕಾ ಇತ್ಲೊ ಸಾಂಭಾಳ್ ಮೆಳ್ತಾ ತರ್, ಅಸಲೊ ಪೋಸ್ಟ್ (ಹುದ್ದೊ) ಮೆಳ್ತಾ ತರ್, ಹಾಂವ್ ಪಂದ್ರಾ ದಿಸಾಂನಿ ಯೇಂವ್ಕ್ ತಯಾರ್ ಆಸಾಂ’. ತಾಣಿಂ ತೀನ್ ದಿಸಾಂನಿ ಮ್ಹಾಕಾ ಜಾಪ್ ದಿಲಿ, ಆಫರ್ ಲೆಟರಾಸವೆಂ; ಹಾಂವೆಂ ಮಾಗ್‌ಲ್ಲಿಂ ಸರ್ವ್ ಶರ್ತಾಂ ತಾಣಿಂ ಕಬೂಲ್ ಕೆಲ್ಲಿಂ ಅನಿ ಅಶೆಂ 2010 ಇಸ್ವೆಚ್ಯಾ ಅಗೋಸ್ತ್ ಮಯ್ನ್ಯಾಂತ್ ಹಾಂವ್ ಐ.ಬಿ.ಎಮ್ ಕಂಪೆನಿಂತ್ ’ಪ್ರೋಗ್ರಾಮ್ ಮ್ಯನೆಜರ್’ ಜಾವ್ನ್ ಸೆರ್ವಲೊಂ.

ಹಾಂವೆಂ ಕೆದಾಳಾಕೀ ಮ್ಹಜ್ಯಾ ಫುಡಾರಾವಿಶಿಂ/ಶಿಕ್ಪಾವಿಶಿಂ ಚಿಂತಿಜಾಯ್ ಆಸ್ಲೆಂ, ಪುಣ್ ಚಿಂತುಂಕ್ ನಾ, ಆತಾಂ ಹ್ಯಾ ದೋನ್ ವರ್ಸಾಂನಿ ಮ್ಹಜೆಲಾಗಿಂ ಎಮ್.ಬಿ.ಎ MBA (Information Systems) ಆಸಾ, ಐ.ಟಿ.ಐ.ಎಲ್ ಎಕ್ಸ್‌ಪರ್ಟ್ (ITIL v3 Expert) ಸರ್ಟಿಫಿಕೇಟ್ ಆಸಾ, ಸಿಕ್ಸ್ ಸಿಗ್ಮಾಚೆಂ ಗ್ರೀನ್ ಬೆಲ್ಟ್ (Six Sigma Green Belt) ತಶೆಂಚ್ ಬ್ಲ್ಯಾಕ್ ಬೆಲ್ಟ್ Six Sigma Black Belt) ಅಸಾ. ಆನಿ ಹೆಚ್ಚ್‌ಪರಿಂ ಐ.ಬಿ.ಎಮಾಂತ್ ಆತಾಂ ವೆಸ್ಟ್ ರೀಜನಾಚೊ ’ಕ್ವಾಲಿಟಿ ಆನಿ ಕಂಪ್ಲಾಯೆನ್ಸ್ ಮ್ಯಾನೆಜರ್’ ಮ್ಹಳ್ಳೊ ನವೊ ಹುದ್ದೊ ಆನಿ ಜವಾಭ್ದಾರಿ ಲಾಭ್ಲ್ಯಾ ತರ್ ಹಾಂವ್ ’ರುಂವಾಂತ್ ಸರ್ಗ್ ಆಸಾ’ ಮ್ಹಣೊಂ ತರ್ ಕಾಂಯ್ ಗುನ್ಯಾಂವ್ ಜಾಯ್ತ್?.

[ಹ್ಯಾ ಅಂಕಣಾಚೆರ್/ಆಂಕ್ಡ್ಯಾಚೆರ್ ತುಜಿ ಪ್ರತಿಕ್ರಿಯಾ ಆಸಾ ತರ್ ಆಮ್ಕಾಂ feedback@daaiz.com ಕ್ ಇಮೇಯ್ಲಾ ಮುಖಾಂತ್ರ್ ಧಾಡಾ, ಫುಡ್ಲ್ಯಾ ಅಂಕಣಾಂತ್ ಆಸ್ಟಿನ್ ಕಿತ್ಲೊ ಆನಿ ಕಿತ್ಯಾಕ್ ವ್ಹಡ್ಲೊ?.]

ಸರ್ಗಾಂತ್ಲಿಂ ಖರ್ಗಾಂ

ದಾಯ್ಜ್ ಪಾನಾಕ್

About us | Feedback | Contact us
Copyright © 2004 DAAIZ.COM All rights reserved. Page concept, designed and maintained by Ashawadi Publications