ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕೊಂಕ್ಣಿ ಫುಲಯ್, ಕೊಂಕ್ಣಿ ಪಾಲಯ್, ಕೊಂಕ್ಣಿ ಸದಾಂಚ್ ಬಾಳ್ವೊಂಕ್ ಜಾಯ್.
ಸಾಹಿತಿಲಾಗಿಂ ಸಂವಾದ್
ಸಾಹಿತಿಲಾಗಿಂ ಸಂವಾದ್ ಕೆಲ್ಲೊ: ವಲ್ಲಿ ಕ್ವಾಡ್ರಸ್, ಅಜೆಕಾರ್
ಗಿಬ್ಬಾ ಕುಲ್ಶೇಕರ್
ಹಾಕಾ ಕಸಲ್ಯೋಯ್ ಪ್ರಶಸ್ಥ್ಯೊ ಮೆಳೊಂಕ್ ನಾಂತ್ ಜಾವ್ಯೆತ್, ಕೊಂಕ್ಣಿ ಸಾಹಿತಿಕ್ ಶೆತಾಂತ್ ಹೊ ತಿತ್ಲೊ ಫಾಮಾದ್ ನ್ಹಯ್ ಜಾವ್ಯೆತ್, ಹಾಕಾ ಎದೊಳ್ ಪರ್ಯಾಂತ್ ಖಂಯ್ಸರ್ಯೀ ಕಸಲೋಯ್ ಮಾನ್-ಸಮ್ಮಾನ್ ಮೆಳೊಂಕ್ನಾ ಜಾವ್ಯೆತ್, ಪುಣ್ ಕೊಂಕ್ಣಿ ಮಟ್ವ್ಯಾಕಾಣ್ಯಾಂಚಾ ಪ್ರಕಾರಾಂತ್ ಹಾಚೆಂ ನಾಂವ್ ಖಂಡಿತ್ ಆಸಾ, ತೇಂಯ್ ಮನೋರಂಜನಾಚಾ ಥ್ರಿಲ್ಲರ್ ಕಾಣ್ಯಾಂಚಾ ಪ್ರಕಾರಾಂತ್. ಕುವೆಯ್ಟಾಂತ್ ಆಸ್ಚೊ ಭೋವ್ ಮಾಲ್ಘಡೊ ಕೊಂಕ್ಣಿ ಬರವ್ಪಿ ತೊ ಜಾವ್ನಾಸಾ - ಹೊಚ್ ಗಿಲ್ಬರ್ಟ್ ಸಲ್ಡಾನ್ಹಾ ವಾ ಗಿಬ್ಬಾ ಕುಲ್ಶೇಕರ್.
ಜನನ್:
1953 ಇಸ್ವೆಚಾ ಫೆಬ್ರೆರಾಚಾ 8 ತಾರಿಕೆರ್, ಸೆಬಾಸ್ಟಿಯನ್ ಸಲ್ಡಾನ್ಹಾ ಆನಿಂ ಮಿಲಿಯಾನ್ ಮಿನೇಜಾಂಚೊ ಪೂತ್ ಜಾವ್ನ್ ಬೊಂಬೊಂಯ್ತ್ ಜಲ್ಮಾಲೊ.
ಇಸ್ಕೊಲ್:
ಬೊರಿವ್ಲಿಚಾ ಪೊಯ್ಸರ್ ಇಸ್ಕೊಲಾಂತ್ ಇಂಗ್ಲಿಶ್ ಮಾಧ್ಯಮಾಂತ್ ಅಪ್ಲ್ಯಾ ಶಿಕ್ಪಾಚಿ ಸುರ್ವಾತ್ ಕೆಲ್ಲಿ ತರ್ಯೀ ಫುಡ್ಲೆಂ ಶಿಕಾಪ್ ಜೊಡುಂಕ್ ಕುಲ್ಶೇಕರಾಕ್ ಪಾವ್ಲೊ.
ಸಾಹಿತಿಕ್ ಪಿಸಾಯ್:
ಬುರ್ಗೊ ಆಸ್ತಾನಾಂಚ್ ತಾಕಾ ಕೊಂಕ್ಣಿ ಸಾಹಿತ್ಯಾಚಿ ಪಿಸಾಯ್ ಆಸ್ಲ್ಲಿ, ಜೊ.ಸಾ.ಅಲ್ವಾರಿಸ್, ಎ.ಟಿ.ಲೊಬೊ, ಖಡಾಪ್ ಹಾಂಚಿಂ ಬರ್ಪಾಂ ತೊ ಖಾಯ್ಸ್ ಕರ್ತಾಲೊ ತರ್ಯೀ ತಾಕಾ ಬರಂವ್ಕ್ ಪ್ರೇರಣ್ ದಿಲ್ಲೊ ಜಾವ್ನಾಸಾ ವಾಸು ವಾಲೆನ್ಸಿಯಾ (ಎಡ್ವಿನ್ ಜೆ.ಎಫ್.ಡಿ’ಸೊಜ್) ಮ್ಹಣ್ತಾ ತೊ. ವಾಸುಚಿಂ ತವಳ್ಚಿಂ ಬರ್ಪಾಂ - ಪ್ರತ್ಯೇಕ್ ಜಾವ್ನ್ ’ಪಿಲಾತಾನ್ ದಿಲ್ಲೆಂ ಫರ್ಮಾಣ್’ ಕಾದಂಬರಿ ವಾಚುನ್ ಮ್ಹಕಾಯ್ ಸಾಹಿತಿಕ್ ಸುರ್ವಾತ್ ಕರುಂಕ್ ಪ್ರೇರಣ್ ಮೆಳ್ಳೆಂ’ ಮ್ಹಣ್ತಾ ಗಿಬ್ಬಾ ಕುಲ್ಶೇಕರ್.
ಕೊಂಕ್ಣಿ ಪತ್ರಾಂ ಘೆವ್ನ್ ವಾಸ್ಚಾಕ್ ತೊ ಕುಲ್ಶೇಕರ್ ಥಾವ್ನ್ ಹಂಪನ್ಕಟ್ಟಾ ಪರ್ಯಾಂತ್ ಚಲೊನ್ ವಚೊನ್ ವಚೊನ್ ಯೆತಾಲೊ. ಸಭಾರ್ ಪಾವ್ಟಿಂ ತಶೆಂ ಗೆಲ್ಲ್ಯಾವೆಳಾರ್ ಆಜ್ ಪತ್ರಾಂ ಯೇಂವ್ಕ್ ನಾಂತ್ ಫಾಲ್ಯಾಂ ಯೆತಾತ್ ಮ್ಹಳ್ಳೆಂ ಆಯ್ಕೊನ್ ಪಾಟಿಂಚ್ ಗೆಲ್ಲೊ ಹೊ ದುಸ್ರೆ ದಿಸಾ ಪರ್ತುನ್ ಯೆತಾಲೊ.
ಸಾಹಿತಿಕ್ ಸುರ್ವಾತ್:
1968 ಇಸ್ವೆಂತ್ ತಾಚಿ ಪಯ್ಲಿ ಮಟ್ವಿ ಕಾಣಿ ’ವಿಧಿಚಿಂ ಚಿಚಿತ್ರ್ ವಿಧಿ ನಿಯಮ್’ - ಜೊ.ಸಾ.ಅಲ್ವಾರಿಸಾನ್ ’ಝೆಲೊ’ ಚೆರ್ ಪರ್ಗಟ್ಲಿ 1969 ಇಸ್ವೆಂತ್ ಪಯ್ಲಿ ಸಾಂಕಳ್ ಕಾಣಿ ’ತೊ ಖುನಿಗಾರ್ ಕೊಣ್ ಜಾವ್ಯೆತ್?’ ಮ್ಹಳ್ಳಿ ಧಾ ಅವಸ್ವರಾಂಚಿ ಮಿನಿ ಕಾದಂಬರಿ ’ಝೆಲೊ’ ಚೆರ್ ಪರ್ಗಟ್ಲಿ ಆನಿಂ ತೆದ್ನಾಂ ತಾಕಾ ಜೊ.ಸಾ.ಅಲ್ವಾರಿಸಾನ್ 25 ರುಪಯ್ ಸಂಭಾವನ್ ದಿಲ್ಲೆ.
ಸಾಹಿತಿಕ್ ವಿವರ್:
ಮಟ್ವ್ಯೊ ಕಾಣ್ಯೊ: ಚಡುಣೆಂ 50
ಲೇಖನಾಂ/ಅನುವಾದಾಂ: ಚಡುಣೆಂ 5
ಸಾಂಕಳ್ ಕಾಣ್ಯೊ/ಮಿನಿ ಕಾದಂಬರಿ/ನೀಳ್ಗತಾ: ಚಡುಣೆಂ 3
1. ತುಮ್ಚೆ ಪ್ರಕಾರ್ ಮಟ್ವ್ಯೊ ಕಾಣ್ಯೊ ಕಶ್ಯೊ ಆಸಾಜಯ್?
ಮಟ್ವ್ಯೊ ಕಾಣ್ಯಾಂಕ್ ಸರ್ವಾಂಕ್ ಅಪಾಪ್ಲಿಚ್ ಮ್ಹಳ್ಳಿ ಶೈಲಿ ಆಸೊಂಕ್ ಜಾಯ್, ತರ್ಯೀ ಏಕ್ ಬರಿ ಮಟ್ವಿ ಕಾಣಿ ಬರಂವ್ಕ್ ತಾಂತುಂ ಬರಿ ಕಥಾವಸ್ತ್ ಆಸೊಂಕ್ಚ್ ಜಾಯ್, ಆನೀಂ ತಾಂತ್ರಿಕತೆಂತ್ ತಿ ಪರಿಪೂರ್ಣ್ ಆಸಾಜಯ್, ತೊ ತಾಂತ್ರಿಕ್ ಪಾತ್ರ್ವರ್ಗಾಚೆರ್ ಆಸ್ಯೆತ್, ನಾಂವಾಂಚೆರ್ ಆಸ್ಯೆತ್. ಆಪ್ಣಾನ್ ಬರಯಿಲ್ಲಿ ಕಾಣಿಂ ಎಕಾ ವಿಮರ್ಶಕಾಚಾ ನದ್ರೆನ್ ವೊರಾವ್ನ್ ಪಳೆಜಾಯ್ ಆನಿಂ ಗರ್ಜ್ ಪಡ್ಲಿ ತರ್ ಪರತ್ ಪರತ್ ಲಿಖುನ್ ಉಪ್ರಾಂತ್ ಪರ್ಗಟ್ಣೆಕ್ ಧಾಡುಂಕ್ ಜಾಯ್.
2. ನಾಂವಾಂ-ಪಾತ್ರ್ವರ್ಗ್ ಕಾಣ್ಯೆಚಾ ತಾಂತ್ರಿಕತೆಚೆರ್ ಕಸಲೊಪಾತ್ರ್ ಘೆತಾತ್?
ಭೋವ್ ಮಹತ್ವಾಚೊ ಪಾತ್ರ್ ಘೆತಾತ್. ಆತಾಂ ಚಿಂತ್ಯಾಂ ಹಾಂಚ್ ಏಕ್ ಕಾಣಿಂ ಬರಂವ್ಕ್ ಬೊಸ್ಲಾಂ ಯುಪಿಚಾ ಪರಿಸರಾಚಿ, ಆನಿಂ ಥಂಯ್ ಜರ್ ಹಾಂವ್ ಆಂಬ್ರೊಜ್, ರಾಜು ಶೆಟ್ಟಿ, ವ ಗಂಗಾಧರ ಪೂಜಾರಿ ಮ್ಹಳ್ಳಿಂ ನಾಂವಾ ಹಾಡ್ತಾಂ ತರ್ ತಾಂತುಂ ತಾಂತ್ರಿಕತಾ ಸಲ್ವತಾ. ತಾಚಾ ಬದ್ಲಾಕ್ ಯಾದವ್, ಶರ್ಮ ಅಸಲಿಂ ನಾಂವಾಂ ಹಾಡ್ತಾಂ ತರ್ ತಿ ತಾಂತ್ರಿಕತೆಂತ್ ಜಿಕ್ತಾ.
3. ಆತಾಂಚಾ ನವ್ಯಾ ಕೊಂಕ್ಣಿ ಬರವ್ಪ್ಯಾಂಕ್ ತುಮ್ಚಿ ಸಲ್ಹಾ ಕಸಲಿ?
ನವ್ಯಾ ಬರವ್ಪ್ಯಾಂನಿ ಮಿನತ್ ಕರುಂಕ್ ನರ್ಗಾನಾಯೆ, ಅಪ್ಣಾನ್ ಬರಯಿಲ್ಲೆಂ ಸರ್ವ್ ಪರ್ಗಟ್ ಜಾಯ್ಜಯ್ ಮ್ಹಣ್ ತಾಣಿಂ ಚಿಂತಿನಾಯೆ, ಸಂಪಾದಕಾಂಕ್ಯೀ ಆಸ್ಚಿ ಜವಾಬ್ಧಾರಿ ತಾಣಿಂ ಸಮ್ಜೊನ್ ಘೆಜಾಯ್. ಆನಿಂ ಚಡಿತ್ ಶಿಕ್ಚಿ ಉರ್ಭಾ ತಾಂಚೆಲಾಗಿಂ ಆಸೊಂಕ್ ಜಾಯ್ - ಸಕ್ಡಾಂಚಾಕೀ ಚಡ್ ಕೊಂಕ್ಣೆಚೊ ಮೋಗ್ ತಾಂಕಾಂ ಆಸೊಂಕ್ಚ್ ಜಾಯ್.
4. ಆಜ್ಕಾಲ್ ಅಂತರ್ಜಾಳಾಚೊ ಕಾಳ್ ಆನಿಂ ಅಂತರ್ಜಾಳಾಚೆರ್ ಜಾಲ್ಲ್ಯಾ ಪ್ರಗತೆಚೆರ್ ತುಮ್ಚಿ ಅಭಿಪ್ರಾಯ್ ಕಸಲಿ?
ಖಂಚಾ ಮಾಧ್ಯಮಾಂತ್ಯೀ ಜರ್ ಕೊಂಕ್ಣಿ ನವೆಂ ರೂಪ್ ಘೆತಾ ತರ್ ಭಾರಿಚ್ ಸಂತೊಸ್. ಪುಣ್ ಅಂತರ್ಜಾಳ್ ಎದೊಳ್ ಮ್ಹಣಾಸರ್ ಚಡ್ತಾವ್ ವಾಚ್ಪ್ಯಾಂಕ್ ಉಪಲಬ್ಧ್ ಜಾಂವ್ಕ್ನಾ ತರ್ಯೀ ಫುಡ್ಲ್ಯಾ ದಿಸಾಂನಿ ಅಸಲಿಂ ಅಂತರ್ಜಾಳಾಂಚ್ ಮುಖ್ಲ್ಯಾ ಪಿಳ್ಗೆಕ್ ಕೊಂಕ್ಣೆಚಿ ಭಾಸ್/ಸಾಹಿತ್ಯ್ ದೀಂವ್ಕ್ ಸಕ್ತೆಲಿಂ ಮ್ಹಳ್ಳಿ ಮ್ಹಜಿ ಅಭಿಪ್ರಾಯ್.
5. ಆಜ್ಕಾಲ್ ಲಿಪಿಂವಿಶಿಂ ಚಡ್ತಾವ್ ರಿತಿನ್ ಚರ್ಚಾ ಜಾವ್ನ್ ಆಸಾ, ಹ್ಯೇವಿಶಿಂ ತುಮ್ಚಿ ಅಭಿಪ್ರಾಯ್ ಕಸಲಿ?
ಕೊಂಕ್ಣಿ ಸಾಹಿತ್ಯಾಕ್ ಲೆಕಾಕ್ ಧರ್ಚೆಂ ತರ್ ಜಿತ್ಲೆಂ ಕೊಂಕ್ಣಿ ಸಾಹಿತ್ಯ್ ಕಾನಡಿ ಲಿಪಿಯೆಂತ್ ಜಾಲಾಂ ತೆಂ ಕೊಂಕ್ಣೆಚಾ ಹೆರ್ ಖಂಚಾಯ್ ಲಿಪಿಂನಿ ಜಾಂವ್ಕ್ ನಾ. ಜಾವ್ಯೆತ್ ಜೊ.ಸಾ.ಅಲ್ವಾರಿಸ್, ಜೆರಿ ಕುಲ್ಶೇಕರ್, ವಾಸು ವಾಲೆನ್ಸಿಯಾ, ಎ.ಟಿ.ಲೊಬೊ, ಗಬ್ಬು ಉರ್ವಾ. ವಿಕ್ಟರ್ ರೊಡ್ರಿಗಸ್, ಗ್ಲೇಡಿಸ್ ರೇಗೊ, ಡೊಲ್ಫಿ ಕಾಸ್ಸಿಯಾ ವಾ ಹೆರ್. ಗೊಂಯ್ಕಾರಾಂನಿ ತಿಯಾತ್ರಾಂತ್ ಭೋವ್ ಮುಖಾರ್ ಪಾವ್ಲಾಂ ಕಾಡ್ಲ್ಯಾಂತ್ ವ ಜಾಯ್ತೆ ತಿಯಾತ್ರ್ ಪರ್ಗಟ್ ಕೆಲ್ಯಾತ್ ತರ್ಯೀ ಕಾದಂಬರಿ ವಾ ಹೆರ್ ಸಾಮ್ಹಿತ್ಯಾಂತ್ ಕಾನಡಿ ಲಿಪಿಂಚೆಂ ಸಾಹಿತ್ಯ್ಚ್ ಚಡ್ ಪರ್ಗಟ್ಲಾಂ. ಲಿಪಿಯೆಚೊ ವಿವಾದ್ ಭೋವ್ ಪರ್ನೊ, ರಾಶ್ಟ್ರ್ಭಾಸೆಕ್ ಮತಿಂತ್ ಧರುನ್ ದೇವ್ನಾಗರಿ ಲಿಪಿಚ್ ಕೊಂಕ್ಣೆಚಿ ಲಿಪಿ ಕೆಲಿ ತರ್ ಬರೆಂ ಮ್ಹಳ್ಳಿ ಮ್ಹಜಿ ಅಭಿಪ್ರಾಯ್. ರೊಮಿ ಲಿಪಿ ಹಾಡ್ಲಿ ತರ್ ತಾಂತುಂ ಥೊಡೆ ಸಮಸ್ಸೆ ಪರಿಹಾರ್ ಜಾತಿತ್ ತರ್ಯೀ ನವೆ ಸಮಸ್ಸೆ ಸಭಾರ್ ಉದೆಂವ್ಕ್ ಸಾಧ್ಯ್ ಆಸಾತ್, ಪಯ್ಲೊ ಸಮಸ್ಸೊ ಬೊಲಿಚೊ.
6. ಕೊಂಕ್ಣಿ ಸಾಹಿತ್ಯಾಚಾ ವಾಡಾವಳೆಕ್ ತುಮ್ಚಿ ಸಲ್ಹಾ ಕಸಲಿ?
ಕೊಂಕ್ಣೆಚಾ ಜಾಂವ್ ವ ಖಂಚಾಯ್ ಭಾಸೆಚಾ ಸಾಹಿತ್ಯಾಕ್ ಜಾಂವ್ -ಹೆರ್ ಭಾಸಾಂಚಾ ಸಾಹಿತ್ಯಾಚೊ ಅನ್ಭೋಗ್ ನಾತ್ಲ್ಯಾರ್ ಬಾಂಯ್ತ್ಲ್ಯಾ ಮಾಣ್ಕ್ಯಾಪರಿಂಚ್ ಮ್ಹಣ್ಯೆತಾ. ಹೆರ್ ಭಾಸಾಂಚಾ ಸಾಹಿತ್ಯಾಚೊ ಅನ್ಭೊಗ್ ಆಸ್ಲ್ಯಾರ್ ಹೆರಾಂಚೆ ವಿಚಾರ್ ಆಮ್ಕಾಂ ಭೋವ್ ಸುಲಭಾಯೆನ್ ಸಮ್ಜಾತಾತ್ ಆನಿಂ ಆಮ್ಕಾಂ ಆಮ್ಚೆಂ ಸಾಹಿತ್ಯ್ ಖಂಚಾ ದಿಶೆನ್ ಚಮ್ಕೊನ್ ಆಸಾ ಮ್ಹಳ್ಳೆಂ ಸಮ್ಜಾತಾ. ಸಾಹಿತ್ಯಾಚೊ ಭಾಸಾಭಾಸ್ ಜಾಂವ್ಚೊ ಭೋವ್ ಮಹತ್ವಾಚೊ ಆನಿ ಗರ್ಜೆಚೊ. ಅಪುಣ್ ಆನಿಂ ಅಪ್ಣಾಚೆಂ ಸಾಹಿತ್ಯ್ ಮ್ಹಳ್ಳ್ಯಾ ಸಂಸಾರಾಭಾಯ್ರ್ ಜೆದ್ನಾಂ ಏಕ್ ಬರವ್ಪಿ ಚಿಂತುಂಕ್ ಸಕಾನಾ - ತೆದೊಳ್ ಪರ್ಯಾಂತ್ ಭಾಸೆಕ್ ಜಾಂವ್, ಸಾಹಿತ್ಯಾಕ್ ಜಾಂವ್ ಮಹತ್ವಾಚಿ ದೇಣ್ಗಿ ಮೆಳ್ಚಿಚ್ನಾ.
7. ಗಲ್ಫಾಂತ್ಲ್ಯಾ ಅಯ್ಲೆವಾರ್ಚಾ ಕೊಂಕ್ಣಿ ಪರಿಗತೆವಿಶಿಂ ತುಮ್ಚಿ ಅಭಿಪ್ರಾಯ್ ಕಸಲಿ? ಗಲ್ಫಾಂತ್ಲ್ಯಾಂಕ್ ಕಾಂಯ್ ಕಾಮ್ ನಾಂ, ವೇಳ್ ಆನಿಂ ಪೊಯ್ಶೆ ಆಸಾತ್ ದೆಕುನ್ ನಾಂವ್ ಜೊಡ್ಚಾಕ್ ಕಾಮಾಂ ಕರ್ತಾತ್ ಮ್ಹಳ್ಳಿ ಖೊಡ್ ಆಯ್ಕೊಂಕ್ ಮೆಳ್ಚೆಂ ತುಮ್ಕಾಂ ಕಶೆಂ ದಿಸ್ತಾ?
ಹ ಹ (ಹಾಸೊನ್): ಕೊಂಕ್ಣೆಂತ್ ಮಾತ್ರ್ ಅಸಲೆಂ ಕೀಳ್ ಚಿಂತಾಪ್ ಆಸೊಂಕ್ ಸಾಧ್ಯ್ ಆಸಾ ಶಿವಾಯ್ ಹೆರ್ ಖಂಚಾಯ್ ಭಾಸೆಂತ್ ಅಸಲೆಂ ಲ್ಹಾನ್ ಚಿಂತಾಪ್ ಆಸೊಂಕ್ ಸಾಧ್ಯ್ ನಾ. ತುಂ ಆತಾಂ ತುಜೆಂ ಕಾಮ್ ಸಂಪವ್ನ್ ವೇಳ್ ಕಾಡ್ನ್ ಮ್ಹಾಕಾ ಮೆಳೊಂಕ್ ಆಯ್ಲಾಯ್, ನಾಂವಾಖಾತಿರ್ಗೀ? ವಾ ಕಾಮ್ ನಾ ಮ್ಹಣೊನ್? ವಾ ಪೊಯ್ಶ್ಯಾಂಖಾತಿರ್? ಗಲ್ಫಾಗಾರಾಂನಿ ಕಿತೆಂ ಕರುಂಕ್ ನಾ? ಗಾಂವಾಂತ್ ಬಾಂಧ್ಪಾಂ ಉಭಾರ್ಲಿಂ, ಕೊಂಕ್ಣಿ ವಾವ್ರ್ ದೊಡ್ತೊ ಜಾಲಾ, ಕೊಂಕ್ಣಿ ಕಾರ್ಯಿಂ ದೊಡಿಂ ಜಾಲ್ಯಾಂತ್, ಕೊಂಕ್ಣಿ ಪತ್ರಾಂಕ್ಯೀ ಆಧಾರ್ ದಿಲಾ/ದಿತೇಚ್ ಆಸಾ, ಕೊಂಕ್ಣಿ ಕಲಾಕಾರಾಂಕ್ ಮಾನ್-ಸಮ್ಮಾನ್ ಮೆಳ್ಳಾ, ಪುರಸ್ಕಾರ್ ದಿಲಾ, ಕೊಂಕ್ಣಿ ಸಂಘ್-ಸಂಸ್ಥೆ ಘಡ್ಲ್ಯಾತ್.
ಮ್ಹಜೆಪ್ರಕಾರ್ ಕೊಂಕ್ಣೆಂತ್ ಚಡುಣೆಂ ಸಗ್ಳೆಂ ಕೆಲಾಂ. ಆನಿಂ ಕೊಣ್ ಕಿತೆಂ ಸಾಂಗ್ತಾ ಮ್ಹಳ್ಳೆಂ ಚಿಂತುನ್ ಬೊಸ್ಲ್ಯಾಂವ್ ತರ್ ಹಿಂ ಕಾಮಾ ಕೊಣೆಂ ಕರ್ಚಿಂ? ದೆಕುನ್ ತುಮ್ಚೆ ತಸಲ್ಯಾ ಉರ್ಭೆವಂತಾಂನಿ ಎಕ್ಟಾಂಯ್ ಜಾವ್ನ್ ಹಾತಿಂ ಘೆತ್ಲ್ಲೆಂ ಮಿಸಾಂವ್ ಭೋವ್ ಮಾನಾಚೆಂ ಆನಿಂ ವಡ್ಲೆಂ - ಹೆಂ ಮುಖಾರ್ಸುನ್ ವರಾ.. ತುಮ್ಕಾಂ ಜಾಯ್ತೆ ಜಾಯ್ತ್ಯಾ ಥರಾಂಚೊ ಅಡ್ಕಳ್ಯೊ ಹಾಡ್ತೆಲೆ ತರ್ಯೀ ಧಯ್ರ್ ಸಾಂಡಿನಾಕಾತ್.
8. ತುಮ್ಕಾಂ ಕೊಂಕ್ಣೆಶಿವಾಯ್ ಹೆರ್ ಭಾಸಾಂನಿ ಕೊಣ್ ಬರವ್ಪಿ ಖಾಯ್ಸ್ ಜಾತಾತ್?
ಕೊಂಕ್ಣೆಶಿವಾಯ್ ಮ್ಹಾಕಾ ಖಾಯ್ಸ್ ಜಾಂವ್ಚಿ ಭಾಸ್ ಹಿಂದಿ, ಆನಿಂ ಹಿಂದಿಂತ್ ಮ್ಹಾಕಾ ಖಾಯ್ಸ್ ಜಾಂವ್ಚೆ ಬರವ್ಪಿ : ಸುರೇಂದ್ರ ಮೋಹನ್ ಪಾಟಕ್, ವೇದ್ಪ್ರಕಾಶ್ ಶರ್ಮಾ, ಗುಲ್ಶನ್ ನಂದಾ (ಸಾಮಾಜಿಕ್), ಅನಿಲ್ ಮೋಹನ್
9. ಅಖ್ರೇಚೆಂ ಸವಾಲ್ - ಕೊಂಕ್ಣೆಂತ್ ತುಮ್ಚಿ ವಡ್ಲಿ ಆಶಾ ಖಂಚಿ?
ಮ್ಹಜಾ ಮಟ್ವ್ಯಾ ಕಾಣ್ಯಾಂಕ್ ಎಕ್ಟಾಂವ್ನ್ ಏಕ್ ಬೂಕ್ ಕಾಡ್ಚಿ ಆಶಾ ಮ್ಹಜಿ ಏಕ್ ಆಶಾ - ಜಿ ಎದೊಳ್ ಸುಫಳ್ ಜಾಂವ್ಕ್ ನಾ. ದೆವಾನ್ ಬೆಸಾಂವ್ ದಿಲೆಂ ತರ್ ತೆಂ ವೆಗಿಂಚ್ ಜಾತೆಲೆಂ ಮ್ಹಣ್ ಲೆಖ್ತಾಂ.
10. ದೇವ್ ಬರೆಂ ಕರುಂ ಗಿಬ್ಬಾ ಬಾಬಾಕ್ - ತುಮಿಂ ಇತ್ಲ್ಯಾ ಮಾಯ್ಪಾಸಾನ್ ಉಲಯಿಲ್ಲ್ಯಾಕ್.
ದೇವ್ ಬರೆಂ ಕರುಂ ತುಕಾ - ವೇಳ್ ಕಾಡ್ನ್ ಮ್ಹಾಕಾ ಮೆಳೊಂಕ್ ಆಯಿಲ್ಲ್ಯಾಕ್ ಆನಿಂ ಮ್ಹಜಾ ವಾವ್ರಾಕ್ ಲೆಕಾಕ್ ಧರ್ಲ್ಲ್ಯಾಕ್.
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
