ಕವಿತಾकविताPoem
ಕೆದಿಂಚ್
This poem is available in its original Kannada only.
ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕವಿತಾಪಾಠ್ ಮ್ಹಳ್ಯಾರ್ ಕಿತೆಂ ಮ್ಹಳ್ಳ್ಯಾಚಾ ಸವಿಸ್ತಾರ್ ವಿವರಾಂಕ್ ಹ್ಯಾ ಪಾನಾಕ್ ಭೆಟ್ ದಿಯಾ
ಆನ್ಸಿ ಪಾಲಡ್ಕಾ:
ಕೊಂಕ್ಣಿ ಸಾಹಿತ್ಯಾಂತ್ ಆನ್ಸಿ ಪಾಲಡ್ಕಾನ್ ಸಭಾರ್ ಪ್ರಕಾರಾಚೆಂ ಸಾಹಿತ್ಯ್ ರಚ್ಲಾಂ, ಕಾಣ್ಯೊ, ಲೇಖನಾಂ, ಕವಿತಾಂ, ಪದಾಂ. ಪುಣ್ ಆಯ್ಲೆವಾರ್ ಭುರ್ಗ್ಯಾ ಸಾಹಿತ್ಯ್ ರಸ್ಚಾಂತ್ ಫಾಮಾದ್ ಜಾಲ್ಲೊ ಮನ್ ಕರಿತ್ ತರ್ ವಿಮರ್ಸೊ ಸಯ್ತ್ ಬರಂವ್ಕ್ ಸಕ್ತಾ.
[ಕಾಳೊಕ್ ನಾತ್ಲ್ಲೊ ಗಾಂವ್ ಬುಕಾಚೆಂ ಪ್ರಸ್ತಾವನ್ ಜಾವ್ನಾಸಾ]
ಆನ್ಸಿ ಪಾಲಡ್ಕಾ
ಹ್ಯಾ ಗಾಂವಾಂತ್ ಕೆದಿಂಚ್ ಕಾಳೊಕ್ ಯೇನಾ ಜಾಂವ್!
ಕವಿತಾಪಾಠ್ ಮ್ಹಳ್ಳ್ಯಾಫರಾ ಮ್ಹಾಕಾ ಉಗ್ಡಾಸ್ ಯೆತಾ ಹಾಂವ್ ಆಮ್ಚೊ ಯುವಕ್ ಪತ್ರಾಚೊ ಸಂಪಾದಕ್ ಜಾವ್ನಾಸ್ತಾನಾ ಆರಂಭ್ ಕೆಲ್ಲ್ಯಾ ’ಕವಿತಾಪಾಠ್’ ಅಂಕಣಾಚೊ. ತೆಂ ಅಂಕಣ್ ಫಕತ್ತ್ ಕವಿತೆಚೆಂ ಭಾವಾನುವಾದ್ ಬರವ್ನ್ ಇನಾಮಾಂ ಜೊಡ್ಚೆಂ ತಸಲೆಂ ಜಾವ್ನಾಸ್ಲ್ಲೆಂ. ಪುಣ್ ವಲ್ಲಿಕ್ವಾಡ್ರಸಾಚ್ಯಾ ಫುಡಾರ್ಪಣಾಖಾಲ್ ದಾಯ್ಜ್ ಡೊಟ್ ಕೊಮ್ಧ್ವಾರಿಂ ಆರಂಭ್ ಜಾಲ್ಲೆಂ ಕವಿತಾಪಾಠ್ ಕೊಂಕ್ಣಿ ಕವಿತೆಚ್ಯಾ ಚರಿತ್ರೆಂತ್ಲಿ ಏಕ್ ಚಳ್ವಳ್ ಮ್ಹಣ್ಯೆತ್.
ಹಾಂಗಾ ಕೋಣ್ಯೀ ಎಕ್ಲೊ ಆಪ್ಲೇಸ್ತಕಿಂ ಬಸೊನ್ ಕವಿತೆಚಿಂ ಸಾಳಾಪಾಳಾಂ ಉಸ್ತುಂಕ್ ವಚಾನಾ. ಬಗಾರ್ ಚಾರ್ ಚವ್ಗ್ ಸಾಂಗಾತಾ ಮೆಳ್ತಾತ್. ಕವಿತಾ ಉಗ್ತ್ಯಾನ್ ವಾಚ್ತಾತ್. ತ್ಯಾ ವಿಶಿಂ ಸಂವಾದ್ ಚಲಯ್ತಾತ್ ಆನಿ ಉಪ್ರಾಂತ್ ಆಪ್ಲಿ ಅಭಿಪ್ರಾಯ್ ಮಂಡನ್ ಕರ್ತಾತ್. ಅಶೆಂ ಹೊ ವಾವ್ರ್ ಎಕ್ಲ್ಯಾಚೊ ನ್ಹಂಯ್ ಬಗಾರ್ ಎಕಾ ಪಂಗ್ಡಾಚೊ.
ಕವಿತಾ ಮ್ಹಳ್ಳ್ಯಾ ಫರಾ ಜಾಯ್ತ್ಯಾ ಜಾಣಾಂಕ್ ಎಲರ್ಜಿ. ತಿ ಆಪುಣ್ ವಾಚುನ್ ಕಾಡ್ಚೆಂ ಸಾಹಿತ್ಯ್ ನ್ಹಂಯ್ ಮ್ಹಳ್ಳಿ ಕಾವ್ಜೆಣಿ. ಪುಣ್ ಜೊ ಕೋಣ್ ಹ್ಯಾವಿಶಿಂ ಥೊಡೆಂ ಪ್ರಯತ್ನ್ ಕರ್ತಾ ಆನಿ ಏಕ್ ಕವಿತಾ ಸಮ್ಜೊಂವ್ಚೆಂ ಪ್ರಯತ್ನ್ ಕರ್ತಾ ತಾಕಾ ಏಕ್ ಸಾಹಿತಿಕ್ ದಾಯ್ಜ್ಚ್ ತಾಚೆ ಫುಡೆಂ ಉಟೊನ್ ಉಭೆಂ ರಾವ್ತಾ. ಕಿತ್ಯಾಕ್ ಏಕ್ ಕವಿತಾ ಕಿತ್ಲೆ ಪಾವ್ಟಿಂ ತೊ ವಾಚ್ತಾ ತಿತ್ಲಿಂ ರುಪಾಂ ತಾಕಾ ತಿ ಕವಿತಾ ದಿತಾ ಆನಿ ತಿತ್ಲಿ ದಾಧೊಸ್ಕಾಯ್ ತಾಕಾ ಭೊಗ್ತಾ.
ಖಂಚೊಯೀ ಸಾಹಿತಿ ತಾಣೆ ಸಾಹಿತಿಕ್ ಕೃತಿ ರಚ್ಲ್ಲ್ಯಾ ಉಪ್ರಾಂತ್ ತಿ ಪ್ರಕಟಣೆಕ್ ರಾಕ್ತಾ. ಪುಣ್ ಎಕಾ ಕವಿಕ್ ಆಪ್ಣೆ ರಚ್ಲ್ಲಿ ಕವಿತಾ ಪ್ರಕಟ್ ಜಾಯ್ಜೆಚ್ ಮ್ಹಣ್ ನಾ. ಆಪ್ಣೆ ರಚ್ಲ್ಲಿ ಕವಿತಾ ವಾಚುನ್ಂಚ್ ಹರ್ ಪಾವ್ಟಿಂ ತ್ಯಾ ಕವಿತೆಂತ್ ದಿಸ್ಚಿಂ ವಿವಿಂಗಡ್ ರುಪಾಂ ದೆಖೊನ್ ತಾಕಾ ಸಂತೊಸ್ ಆನಿ ಉಲ್ಲಾಸ್ ಭಗ್ತಾ. ಮ್ಹಜೊಚ್ ಅನ್ಭೋಗ್ ಸಾಂಗ್ಚೊ ತರ್ ಜಾಯ್ತೆಪಾವ್ಟಿಂ ಹಾಂವ್ ಖಂತ್ಬೆಜಾರಾಯೆಂತ್ ಬುಡ್ಲ್ಲ್ಯಾ ವೆಳಾರ್ ವಾ ದುಃಖಾನ್ ಬುಡ್ಲ್ಲ್ಯಾ ವೇಳಾರ್ ಕವಿತಾ ವಾಚುನ್ ಹಾಂವೆಂ ಮತಿಕ್ ಸಮಧಾನ್ ಜೊಡುನ್ ದಿಲಾಂ.
ಕವಿತಾಪಾಠಾಂತ್ ವಿವಿಂಗಡ್ ರೀತಿಚ್ಯೊ ಕವಿತಾ ಅಧ್ಯಯನಾಕ್ ಆಯ್ಲ್ಯಾತ್. ಕವಿತಾ ವಿಮರ್ಶಕ್ಯೀ ವಿವಿಂಗಡ್ ರಿತಿಚೆ. ಎಕ್ಲೊ ಕವಿತೆಚ್ಯಾ ತೀರ್ಲಾಚೆರ್ ಜೊಕ್ತಾ ತರ್ ಎಕ್ಲೊ ತಾಂತ್ಲೆ ಪ್ರಾಸ್ ಲೆಖ್ತಾ, ಎಕ್ಲೊ ತಾಚಿ ಗುಂಡಾಯ್ ದೆಖ್ತಾ, ಎಕ್ಲೊ ತಾಚಿ ಬಾಂಧಾವಳ್ ತುಕ್ತಾ ಮಾಗಿರ್ ಎಕ್ಲೊ ತಾಂತ್ಲಿಂ ಭೊಗ್ಣಾಂ ಚಾಕ್ತಾ.
ಕವಿತೆಂತ್ ಲಯ್ ವ ಪ್ರಾಸ್ ಜಾಯ್ಜೆಚ್ ಮ್ಹಣ್ ನಾ. ಹೆಂ ಬಾಬ್ ಎಡ್ವಿನಾಚಿ ಕವಿತಾ ಕಾಳಿಜ್ ವಾಚ್ತಾನಾ ಸ್ಪಷ್ಟ್ ಜಾತಾ. ಜರ್ ಏಕ್ ಸುಲಲಿತ್ ಭಗ್ಣಾಂಚೊ ವ್ಹಾಳೊ ಜಾವ್ನ್ ವ್ಹಾಳೊನ್ ಆಯಿಲ್ಲೆಂ ಸಾಹಿತ್ಯ್ ಮನ್ಶಾಚ್ಯಾ ಕಾಳ್ಜಾಮನಾಂತ್ ವಿವಿಂಗಡ್ ಭಗ್ಣಾ ಆನಿ ವಿವಿಂಗಡ್ ರುಪಾಂ ಉಭ್ಜಾಂವ್ಕ್ ಸಕ್ತಾ ತರ್ ತಿ ಏಕ್ ಬರಿ ಕವಿತಾ ಮ್ಹಣ್ಯೆತ್. ಹಿಂ ಸಗ್ಳಿಂ ಲಕ್ಷಣಾ ಬಾಬ್ ಎಡ್ವಿನಾಚ್ಯಾ ಕವಿತೆಂತ್ ಸ್ಪಷ್ಟ್ ದಿಸೊನ್ ಯೆತಾತ್. ಪುಣ್ ಅಶೆಂ ವ್ಹಾಳೊನ್ ಆಯಿಲ್ಲ್ಯಾ ಉತ್ರಾಂಚ್ಯಾ ವಾಳ್ಯಾಂತ್ ಪ್ರಾಸ್ ಆನಿ ತಾಳ್ ಸುಲಲಿತ್ ಜಾವ್ನ್ ಮೆಳೊನ್ ಯೆತಿತ್ ತರ್ ತಿ ಏಕ್ ಕವಿತಾ ಚಡಿತ್ ಪ್ರಭಾವಿಕ್ ಜಾಯ್ತ್. ಕವಿತೆಂತ್ ಪ್ರಾಸ್ ವ ತಾಳ್ ಗರ್ಜ್ ನ್ಹಯ್ ತರೀ ತಾಳಾಂತ್ ಮೆಳಯಿಲ್ಲಿ ಕವಿತಾ ವಾಚುನ್ ಕಾಡುಂಕ್ ಅಥ್ವಿಚ್ ಮಜಾ ಯೆತಾ. ಹೆಂ ಎಡ್ವಿನಾಚ್ಯಾ ಕವಿತೆಂತ್ ಪಾಸೂನ್ ಪ್ರಾಸ್ ನಾ ತರೀ ಎಕಾ ರಿತಿಚೊ ತಾಳ್ ತಾಂತುಂ ಆಸಾ ದೆಕುನ್ ತಿ ಕವಿತಾ ವಾಚುಂಕ್ ಬರಿ ಲಾಗ್ತಾ.
"ಬಾಪಾಚೆಂ ಘರ್" ಸಾದ್ಯಾ ಉತ್ರಾಂನಿ ಉತ್ರಾಯ್ಲ್ಯಾ ತರ್ಯೀ ಏಕ್ ಕ್ರಾಂತಿಕಾರಿ ಚಿಂತಾಪ್ ಕವಿನ್ ಸಮಾಜೆ ಫುಡೆಂ ದವರ್ಲಾಂ. ಜೆಜುಚೆ ಪಾಟ್ಲಾವ್ದಾರಿ ಮ್ಹಣ್ಚೆ ಆಮಿ ಜ್ಯೆಂ ಕಿತೆಂ ಜೆಜುನ್ ಆಡ್ವಾರ್ಲ್ಲೆಂಗೀಂ ತೆಂಚ್ ಪಾಪ್ ಪರತ್ ಆಧಾರುನ್ ಆಸಾಂವ್ ಮ್ಹಣ್ ತೊ ಜಾಗಂವ್ಕ್ ಸೊಧ್ತಾ.
ಎ. ಟಿ. ಲೋಬೊಚಿ ಕವಿತಾ ವಿವಿಂಗಡ್ ವಿಮರ್ಶಕಾಂಚ್ಯಾ ಹಾತಿಂ ವಿವಿಂಗಡ್ ರುಪಾಂ ದೆಖೊಂಕ್ ಸಕ್ಲ್ಯಾ. ಹಿಚ್ ಸೊಭಾಯ್ ಕವಿತೆಚಿ. ಕವಿ ದೆವಾಕ್ ಆನಿ ಕವಿತೆಕ್ ಸಂಬಂಧ್ ರಚ್ತಾ ಮ್ಹಣ್ ಮೆಲ್ವಿನ್ ಜೆ. ವಾಸ್ ಸಾಂಗ್ತಾ ತರ್, ಹೊ ಏಕ್ ನಿರಾಶಿ ಉಲೊ ಮ್ಹಣ್ತಾ ವಲ್ಲಿ ಕ್ವಾಡ್ರಸ್, ದೆವಾಲಾಗ್ಚೆಂ ಕವಿಚೆಂ ಸಂಭಾಶಣ್ ಮ್ಹಣ್ ಭೊಗ್ತಾ ಜೊಮೆಲ್ ಬೊಂದೆಲಾಕ್, ದೋನ್ ವರ್ಗಾಚೆಂ ಚಿತ್ರಣ್ ಕರ್ಚಿ ಕವಿತಾ ಮ್ಹಣ್ತಾ ಆಂಟನಿ ಮಿನೆಜ್ ಪುಣ್ ಎಕಾ ಚಲಿಯೆಕ್, ಪ್ರಿಯಾ ಸಿಕ್ವೇರಾ ಫೆರಾರ್ ಹಿಕಾ ಹೊ ಏಕ್ ಆವಯ್ಚೊ ಉಲೊ ಮ್ಹಣ್ ಭಗ್ತಾ. ಹಿಚ್ಚ್ ವ್ಹಡ್ವಿಕಾಯ್ ಎಕಾ ಕವಿತೆಚಿ. ಏಕ್ ಕವಿತಾ ಹರ್ಯೆಕಾ ವ್ಯಕ್ತಿಕ್ ತಾಕಾ ಕಿತೆಂ ಜಾಯ್ ತೆಂ ದೀಂವ್ಕ್ ಸಕ್ತಾ.
ಮ್ಹಜಿ ಕವಿತಾ ‘ವಾಸ್ತವ್’ ಹಾವೆಂ ೧೯೯೦ವ್ಯಾ ವರ್ಸಾ ಬರಯಿಲ್ಲಿ ಆನಿ ೧೯೯೫ವ್ಯಾ ವರ್ಸಾ ಮ್ಹಜ್ಯಾ ‘ಯೇಗೊ ಬಾಯೆ’ ಕವಿತಾ ಪುಂಜ್ಯಾಂತ್ ಆಸಾ ತಶಿ ಹಾಂವೆಂ ತಿ ಮೆಳಯಿಲ್ಲಿ. ತಿ ಕವಿತಾ ಬರಯ್ತಾನಾ ಹಾಂವ್ ಕವಿತಾತೆಚ್ಯಾ ಬಾಳ್ ಹಂತಾರ್ ಆಸಾಂ. ಕವಿತಾ ಕೋಣ್ಯೀ ಪ್ರಕಟ್ ಕರುಂಕ್ ತಯಾರ್ ನಾಸ್ಲ್ಲೊ ವೇಳ್ ತೊ. ಆತಾಂ ಪರಿಸ್ಥಿತಿ ಬದಲ್ಲ್ಯಾ. ಕವಿತೆಕ್ ಭರ್ಪೂರ್ ಮಾನ್ ಸನ್ಮಾನ್ ಮೆಳೊನ್ ಆಸಾ. ಪುಣ್ ತಿಚ್ಚ್ ಪರಿಸ್ಥಿತಿ ಆತಾಂ ಆಸ್ಲ್ಲಿ ತರೀ ಆಯ್ಚ್ಯಾ ದಿಸಾ ಹಾಂವ್ ತಿ ಕವಿತಾ ಖಂಡಿತ್ ಜಾವ್ನ್ ತಶಿ ಬರಂವ್ಚೊ ನಾತ್ಲ್ಲೊಂ. ಕವಿತೆಕ್ ಸಾರ್ವಜನಿಕ್ ರೀತಿನ್ ಸ್ಥಾನ್ ಮೆಳಾನಾ ತರೀ ಕವಿಚ್ಯಾ ಕಾಳ್ಜಾಂತ್ ಏಕ್ ಮೊಗಾಚೆಂ ಸ್ಥಾನ್ ತಾಕಾ ಮೆಳ್ತಾ. ತಾಚ್ಯಾ ವರ್ತೆಂ ಎಕಾ ಕವಿತೆಕ್ ಕಿತೆಂ ಜಾಯ್? ತ್ಯಾಚ್ ಭಾಶೆನ್ ನೀಸ್-ಪೇಜ್ ಹಾಚಿ ರೂಚ್ ತಿ ಚಾಕ್ಲ್ಲ್ಯಾಕ್ ಮಾತ್ ಕಳಿತ್. ಆನಿ ಹಿ ನೀಸ್ ಪೇಜ್ ಎಕಾ ಕವಿಕ್ ಕವಿತೆಧ್ವಾರಿಂ ಸದಾಂಚ್ ಮೆಳೊನ್ ಆಸಾಂ. ಕಿತ್ಯಾ ಎಕಾ ಕವಿಕ್ ಹರ್ ಪಾವ್ಟಿಂ ಆಪ್ಲ್ಯಾ ಕವಿತೆಚಿಂ ರುಪಾಂ ವಿವಿಂಗಡ್ ದಿಸ್ತಾತ್. ನವ್ಯಾ ಸ್ಪೂರ್ತೆಕ್ ತಿಂ ತಾರಣ್ ಜಾತಾತ್.
ಕವಿತೆಧ್ವಾರಿಂ ಸಮಾಜೆಚೆರ್ ಆರ್ಸೊ ದರ್ಚ್ಯಾಂತ್ ಬಾಬ್ ಸಿಜ್ಯೆಸಾಚೊ ಉಕಲ್ಲಲೊ ಹಾತ್. ಎಕಾ ಕಾಳಾರ್ ಮಂಗ್ಳುರ್ ಮ್ಹಜೆಂ ಕವಿತೆಂತ್ಯೀ ತೊ ತೆಂಚ್ ಕರ್ತಾ. ತಾಚಿಂ ಕವಿತಾ ಚಡಾವತ್ ಹಾಸ್ಯ್ ಮೆಳವ್ನ್ ಕುರ್ಕುರಿತ್ ಆಸ್ತಾತ್ ತರೀ ಹಿ ಏಕ್ ಗಂಭೀರ್ ರಿತಿಚಿ ಮಾರ್ಮಿಕ್ ಕವಿತಾ.
’ಕಾಳ್ಜಾದಾರಾಂ ಸದಾಂಚ್ ಉಗ್ತಿಂ
ಆದ್ಲ್ಯಾ ಮಂಗ್ಳುರ್ಗಾರಾಂಚಿಂ
ಮೊಗಾವಿಣೆ ಜಾಲ್ಯಾಂತ್ ರಿತಿಂ
ಆಯ್ಚ್ಯಾ ಭುರ್ಗ್ಯಾಂ ಬಾಳಾಂಚಿಂ’
ಬೋವ್ ಸಾದ್ಯಾ ಉತ್ರಾಂನಿ ಕವಿತೆಚಿ ಗುಂಡಾಯ್ ಮೆಳವ್ನ್ ತಸಲೊಚ್ ತಾಳೊ ಗುಂತ್ಚೊ ಅಪ್ರೂಪ್ ಕವಿ ವಿಲ್ಫಿ ರೆಬಿಂಬಸ್. ’ಹಾಂವ್ ಯೆತಾಂಗೊ ಘಾಟಿ ದೆಂವೊನ್’ ತಾಚಿ ಏಕ್ ಸಿಂತಿಮೆಂತಾಳ್ ಕವಿತಾ. ದೊಗಾಂ ಮೋಗ್ ಕರ್ಣಾರಾಂ ಮಧ್ಲೆಂ ಏಕ್ ಸಂಭಾಶಣ್ ಮ್ಹಣ್ ದಿಸ್ತಾ ತರೀ ಕವಿತಾ ರಸಿಕಾಕ್ ತಾಂತ್ಲೆಂ ದುಸ್ರೆಂ ರೂಪ್ ಸೊಧುಂಕ್ ವೇಳ್ ನಾಕಾ. ಇಗರ್ಜ್ಯಾಂನಿ ಭಲತ್ಕಾರಾನ್ ಕನ್ನಡ ಮಿಸಾಂ ಘುಸವ್ನ್ ಕೊಂಕ್ಣೆಚಿ ವೀದ್ವಾವ್ಳಿ ಜಾಲ್ಲ್ಯಾ ಘಾಟಾಮುಳಾಂತ್ಲ್ಯಾ ಕೊಂಕ್ಣ್ಯಾಚೆ ಹೆ ಹಾಲ್ ಕಿತ್ಯಾಕ್ ಜಾಂವ್ಕ್ ನ್ಹಜೊ ?
ವಲ್ಲಿ ಕ್ವಾಡ್ರಸ್, ಮೆಲ್ವಿನ್ ರೊಡ್ರಿಗಸ್ ಆನಿ ವಿಲ್ಸನ್ ಕಟೀಲ್ ಹಾಂಚ್ಯಾ ಗಝಲಾಂಸವೆಂ ಕವಿತಾಪಾಠ್ ಮಾತ್ಭಾರ್ಯಾಂನಿ ಗಜಲಾಂವಿಶಿಂ ದಿಲ್ಲೆಂ ವಿವರಣ್ ಹ್ಯಾ ಕವಿತಾಪಾಠ್ ಪುಸ್ತಕಾಕ್ ಏಕ್ ಥಿಕ್ ಮ್ಹಣ್ಯೆತ್. ಕೊಂಕ್ಣೆಂತ್ ಪಾಸೂನ್ ಗಜಲ್ ಬರಂವ್ಚೆಂ ಪ್ರಯತ್ನ್ ಚಲ್ಲಾಂ ತೆಂ ಪ್ರಶಂಸನೀಯ್.
ಕವಿತಾಪಾಠ್ ಏಕ್ ಭೋವ್ ಬರೆಂ ಪ್ರಯತ್ನ್. ಫಕತ್ತ್ ಕುವೇಯ್ಟ್ ಥಾವ್ನ್ ಮಾತ್ ನ್ಹಂಯ್ ಗಾಂವಾಂತ್, ಗೋಯಾಂತ್, ಬೊಂಬಯಾಂತ್ ಆನಿ ಹರ್ ಕೊಂಕ್ಣಿವೆಳೆರೆಂನಿ ಕೊಸಾಪ್ ಜಾಯ್ಜೆ ತಸಲೆಂ. ದಾಯ್ಜ್ ಡೊಟ್ ಕೊಮ್ ಹಾಕಾ ಆನಿ ತಾಚ್ಯಾ ವಾಂಗ್ಡ್ಯಾಂಕ್ ಅಭಿನಂದನ್ ಪಾಟಂವ್ಚ್ಯಾ ಸವೆಂ ತಾಂಚಿ ದೇಖ್ ಹೆರ್ ಕೊಂಕಣ್ ವೆಳೆರೆಂಕೀ ಪಾಂವೊಂದಿ ಮ್ಹಣ್ ಆಶೆತಾಂ.
- ಆನ್ಸಿ ಪಾಲಡ್ಕಾ.
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
More in Daaiz
Send your comments to author on this writing
This is not a comment box. Nothing you write here appears on the site or is shown to any other reader: it is sent to him by email, privately, and he replies to you directly if a reply is called for.