ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಚಾ.ಫ್ರಾ.ದೆ’ಕೋಸ್ತಾಚಾ ’ಸೊಂಸ್ಯಾಚೆ ಕಾನ್’ ಬುಕಾಕ್ 1989 ವರ್ಸಾಂತ್ ಕೇಂದ್ರಿಯ್ ಸಾಹಿತ್ಯ್ ಅಕಾಡೆಮಿಚಿ ಪ್ರಶಸ್ಥಿ ಲಾಭ್ಲ್ಯಾ
ಕಥಾದಾಯ್ಜ್ - 1
ದೆ|ಚಾ.ಫ್ರಾ.ದೆ’ಕೋಸ್ತಾ
ಕೊಳ್ಸೊ
ಜನನ್: 10 ಅಕ್ತೋಬರ್ 1931
ಮರಣ್ : 2 ಅಕ್ತೋಬರ್ 1992
ದೆ|ಚಾ.ಫ್ರಾ.ದೆ’ಕೋಸ್ತಾ
ವ್ಹಳೊಕ್:
ಪ್ರಶಸ್ತಿ : 1989 ವರ್ಸಾಂತ್ ’ಸೊಂಶ್ಯಾಚೆ ಕಾನ್ (ಕವಿತಾ ಜಮೊ)’ ಬುಕಾಕ್ ಕೇಂದ್ರ್ ಸಾಹಿತ್ಯ್ ಅಕಾಡೆಮಿ ಪ್ರಶಸ್ತಿ.
ಕವಿತಾ ಜಮೊ : ಸೊಂಶ್ಯಾಚೆ ಕಾನ್
ವೆಕ್ತಿತ್ವ್ :
ಏಕ್ ಕವಿ, ಪದಾಂ ಘಡ್ಪಿ, ನಾಟಕಿಸ್ತ್ (22 ನಾಟಕ್), ಚಿಂತ್ಪಿ, ಬೂಕ್ ಪರ್ಗಟ್ಪಿ
ಚಾ.ಫ಼್ರಾನ್ ಸಂಪಾದಕ್ ಜಾವ್ನ್ ಹ್ಯಾ ಪತ್ರಾಂನಿ ವಾವ್ರ್ ಕೆಲಾ;
ಜಾಗ್ಮಾಗ್ (1956), ಪಯ್ಣಾರಿ (1960), ವಿಶಾಲ್ ಕೊಂಕಣ್ (1961), ಉದೆವ್ (1974), ಜಿವಿತ್ (1976)
ವಳೊಕ್ :
ಕೋಣ್ ವಳ್ಕನಾ ಹಾಕಾ? ತೊ ಆಮ್ಕಾಂ ಸಾಂಡುನ್ ಗೆಲಾ ದಾಕ್ಡ್ಯಾಧಿಂ ತರ್ಯ್ ತಾಚೊ ಕಾಣ್ಯೊ ಅಜೂನ್ ಆಮ್ಚಾ ಮತಿಂತ್ ಗುಣ್ಗುಣ್ತಾತ್. ಕೊಂಕ್ಣಿ ಕವಿತಾಂಕ್ ಗ್ರೇಸ್ತ್ ಕೆಲ್ಲ್ಯಾ ಕೊಂಕ್ಣೆಂತ್ಲ್ಯಾ ವಿಂಚ್ಣಾರ್ ಕವಿಂ ಕಯ್ಕಿ ತೊ ಎಕ್ಲೊ. ಏಕ್ ಪ್ರಖ್ಯಾತ್ ನಾಟಕಿಸ್ತ್, ಚಿಂತ್ಪಿ, ಪತ್ರ್ಕರ್ತ್. ಪತ್ರಿಕೋಧ್ಯಮಾಂತ್ಯ್ ಜಾಯ್ತೊ ವಾವ್ರ್ ಕೆಲ್ಲೊ ಮಾನೆಸ್ತ್. ಸಾದಿ ಜಿಣಿ ಜಿಯೆಲ್ಲೊ, ಶೀದಾ ಉಲವ್ಣ್ಯಾಚೊ ಚಾ.ಫ಼್ರಾ ಕೊಂಕ್ಣಿ ಸಮಾಜೆಕ್ ಜಾಯ್ತಿ ಸಾಹಿತಿಕ್ ದೇಣ್ಗಿ ದೀವ್ನ್ ಗೆಲಾ.
ಚಿಂತಾಪ್ :
ಚಾ.ಫ಼್ರಾ.ದೆಕೋಸ್ತಾ ಸಮಾಜೆಚಾ ವೆವಸ್ತೆಚಾ ನಾಂವಾರ್ ಆಸ್ಚಾ ಅವೆವಸ್ತಾಂಕ್ ಕಠೀಣ್ ರಿತಿನ್ ಸವಾಲ್ ಕರ್ಚೊ/ಕೆಲ್ಲೊ ವಿಚಾರ್ವಂತ್ ಬರವ್ಪಿ. ಹಾಚಾ ಬರ್ಪಾಂನಿ, ಕೊಂಕ್ಣಿ ಭಾಸೆಚಿ ಸೊಭಾಯ್ ಉಟೊನ್ ಉಟೊನ್ ದಿಸ್ತಾ, ಉತ್ರಾಂಚಿ ಝಡಾಯ್, ಚಿಂತ್ಪಾಂಚಿ ದಾಟಾಯ್ ಹಿ ಹಾಚಾ ಬರ್ಪಾಂನಿ ರೂಪ್ ರೂಪ್ ದಿಸ್ತಾ.
ವಿಚಾರ್ :
ಕೊಂಕ್ಣೆಂತ್ ಮಟ್ಟ್ ನಾ ಮ್ಹಣ್ಚಾ ಪಂಡಿತಾಂ ಪಯ್ಕಿ ಎಕ್ಲೊಂ ಜಾವ್ನ್ ಹಾವೆಂ ದೆ|ಚಾ.ಫ಼್ರಾ.ದೆ’ಕೋಸ್ತಾಕ್ ಏಕ್ ಪಾವ್ಟಿಂ ತೊ ಮ್ಹಾಕಾ ಭೆಟೊಂಕ್ ಆಯಿಲ್ಲ್ಯಾವೆಳಾರ್ ಸವಾಲ್ ಕೆಲ್ಲೆಂ "ಕೊಂಕ್ಣೆಂತ್ ಮಟ್ಟ್ ನಾ, ಕಿತ್ಯಾಕ್" ತೆನ್ನಾ ತಾಣೆಂ ಸಮಧಾನೆನ್ ಅಶಿ ಜಾಪ್ ದಿಲಿ; "ಕೊಂಕ್ಣೆಂತ್ ಮಟ್ಟ್ ನಾ ಮ್ಹಣೊನ್ ಹಾಂವ್ ಬುರ್ಗೊ ಆಸ್ತಾಂ ಥಾವ್ನ್ ಆಯ್ಕೊನ್ ಆಯ್ಲಾಂ, ತರ್ಯ್ ಅಜೂನ್ ಪರ್ಯಾಂತ್ ಕೊಣೇಂಯ್ ಪುನೆಗೆಲ್ಲ್ಯಾನ್ ತೆಂ ಮಟ್ಟ್ ಮ್ಹಳ್ಯಾರ್ ಕಸಲೆಂ ಮ್ಹಳ್ಳೆಂ ಸಾಂಗೊಂಕ್ ನಾ". ಕೊಂಕ್ಣಿ ಭಾಸೆಚಾ ಸಂಸಾರಾಂತ್ ಚಾ.ಫ಼್ರಾ. ಏಕ್ ಭರ್ಲ್ಲೊ ಕೊಳ್ಸೊ.
ಮಟ್ವ್ಯೊ ಕಾಣ್ಯೊ :
’ಕೊಳ್ಸೊ’ ಏಕ್ ಅಸಲಿಚ್ ಕಾಣಿ, ಜಿ ಅಜೀಕ್ ವೀಸ್ ವರ್ಸಾಧಿಂ ಛಾಪೊನ್ ಆಯಿಲ್ಲಿ. ಹ್ಯಾ ಕಾಣ್ಯೆಕ್ ವೀಸ್ ವರ್ಸಾಂ ಜಾಲಿಂ ತರ್ಯ್ ಹಾಂತ್ಲಿಂ ಭಾಸ್ ಆಯ್ಚಾ ಪರಿಗತೆಂತ್ ಬೊಲ್ತಿ ದಿಸ್ತಾ ಜಾವ್ಯೆತ್ ತರ್ಯ್ ಹಾಂತ್ಲಿ ಕಾಣಿಂ ಅಜೂನ್ ಪರ್ಯಾಂತ್ ಆಮ್ಚಾ ಸಮಾಜೆಂತ್ ಘಡ್ಯೆತ್ ಜಾಲ್ಲೆತಸಲೆ ಯಾ ಘಡೊನ್ ಆಸ್ಚೆತಸಲಿ ಮ್ಹಳ್ಳ್ಯಾಂತ್ ಕಾಂಯ್ ನವಾಲ್ ಆಸ್ಚೆಂನಾ ಮ್ಹಣೊನ್ ಮ್ಹಜೆಂ ಚಿಂತಾಪ್. ಹ್ಯಾ ಕೊಳ್ಸ್ಯಾಂತ್ ಆಸ್ಚೆಂ ಜೊಕುಂಕ್ ಆತಾಂ ತುಕಾ ಉಲೊ ದಿತಾಂ.
ಶರೊ: [ಹಿ ಕಾಣಿ ಜೊಗಾಸಾಣೆನ್ ದಿಲ್ಲ್ಯಾ ದೆ|ಚಾ.ಫ಼್ರಾ.ದೆ’ಕೋಸ್ತಾಚಾ ಧುವೆಚೊ, ಕು|ಸೋನಿಯಾ ದೆ’ಕೋಸ್ತಾಚೊ ಹಾಂವ್ ಉಪ್ಕಾರ್ ಬಾವುಡ್ತಾಂ]
ಕಥಾದಾಯ್ಜ್ - 1. ಕೊಳ್ಸೊ
ಗಿಮಾಚೆ ದೀಸ್.
ಹರ್ಶೆಂ ಸುರ್ಯೊ ಬುಡೊಂಕ್ ವೇಳ್ ಕಾಡ್ತಾಲೊ. ತರಿ ಪಾವ್ಸಾಚೆ ದೀಸ್ ಜಾಲ್ಲ್ಯಾನ್ ಸುರ್ಯಾಕ್ ಆಜ್ ಸೈರಾಣ್ ನಾ. ಆದ್ಲೊ ಕಾಳ್. ಸಿನೆಮಾಂನಿ ಬಸ್ಚೆ ದೀಸ್ ನ್ಹಂಯ್ ತೆ. ಪೆಂಟೆಂತ್ಲ್ಯಾ ರಸ್ತ್ಯಾಂನಿ ಭೊಂವ್ಚೆ, ಹೊಟೆಲಾಂನಿ ರಿಗ್ಚೆ ಬಾರಾನಿಂ ಬಸ್ಚೆ, ಚೆಡ್ವಾಂಕ್ ಲಾಯ್ನ್ ಮಾರ್ಚೆ ದೀಸ್ ನ್ಹಂಯ್ ತೆ.
ಆಡ್ಬೊಸರೆ ಭುರ್ಗೆ ರಬ್ಬರ್ ಬೊಲ್ ಖೆಳ್ತಾಲೆ. ವಿಕೆಟಿಕ್ ದೋನ್ಂಚ್ ಖುಂಟೆ. ಕೊಣಾಚೆ ತರೀ ರಾಗಿಷ್ಟ್ ಆವಯ್ನ್ ಎಕ್ ಖುಂಟೊ ಭಾಣಾಚೆ ರಾಂದ್ಣಿಕ್ ಜಳ್ಲ್ಲೊ. ತ್ಯಾ ದೆಕುನ್ ಪೆರಾಂಚಿ ಎಕ್ ನೀಟ್ಚ್ ಬೊಡಿ ಕಾತ್ರುನ್, ಭೋವ್ ಸೈರಾಣಾನ್ ತಾಸುನ್, ತಾಚೆ ಆಡಿಯೆಕ್ ಎಕ್ ಖಿಳೊ ಧಾಡಾವ್ನ್, ತಿ ಬೊಡಿ ಮಧ್ಲ್ಯಾ ಖುಂಟ್ಯಾ ಬದ್ಲಾಕ್ ಪುರ್ಲ್ಲಿ.
ಮಾರ್ಕೆಟಿ ಭಾಯ್ರ್ ಅಸಲ್ಲ್ಯಾ ಉಗ್ತಾಡ್ ಸುವಾತೆರ್ ದುರ್ಬಳ್ಯಾಂಚೆಂ ಕ್ರಿಕೆಟ್ ಚಲ್ತಾ. ಕುಶಿಚೆ ಗೇಟಿಂತ್ಲ್ಯಾನ್ ಎಕ್ ಮ್ಹಾತಾರೊ ಭಾಯ್ರ್ ಯೆತಾನಾ ಬೊಲ್ ತಾಚೆ ಕುಶಿಕ್ ಮಾರ್ಲೊ. ತೋಯ್ ವಸ್ತಾದ್. ತಾಚೆಂ ಖಾಕಿ ಗೋಲ್ ಹೆಟ್ ಉದಾರೆಂ ಕರ್ನ್ ತೊ ಬೊಲ್ ಧರ್ನ್ ಸೊಡ್ತಾ, ಮಕ್ಕೇರಿಂತ್ ಕಿಜಾನ್ ಧರ್ಲ್ಲ್ಯಾಬರಿ. "ದೀನಾ," ಮ್ಹಣ್ತಾ ಮ್ಹಾತಾರೊ.
ಭುರ್ಗೆ ಪೂರಾಯ್ ತಾಕಾ ವೆಡೊ ಮಾರ್ತಾನಾ ಮಾರ್ಗಾರ್ ಎಡ್ವಿನ್ ದೆನಿಸ್ ಇಗ್ನೇಶಿಯಸ್ ಫೆರೇರಾ ನಾಚಾತ್ತ್ ಧಾಂವೊನ್ ಯೆತಾ. ತಾಚಾ ನಾಂವಾಂಚಿಂ ಇಂಗ್ಲಿಷಾನ್ ಪಯ್ಲಿಂ ಅಕ್ಷರಾಂ ಸಾಂಗಾತಾ ಮೆಳೊವ್ನ್ ತಾಚೆ ಇಂಗ್ಲಿಷ್ ಶಿಕ್ಲ್ಲೆ ಆವಯ್ನ್ ತಾಕಾ "ಎಡಿ" ಮ್ಹಣ್ ಆಪೊಂವ್ಕ್ ಧರ್ಲ್ಲೆಂ. ಆತಾಂ ತೊ ಸಗ್ಲ್ಯಾಂಕ್ಯೀ ಎಡಿ. ಇಸ್ಕೊಲ್ ಸೊಡ್ತಾನಾ ಎಡಿನ್ ಸಾಂಗಾತಿ ಭುರ್ಗ್ಯಾಂಲಾಗಿಂ ಪಂತ್ ಮಾರ್ಲ್ಲೊ. ಚಂದ್ರ ಭವನಾಕ್ ವಚೊನ್, ಫೊಟ್ ಪುಟಾಸಾರ್ ಖಾವ್ನ್ "ಮಂಗೊ" ದಾಕೊವ್ನ್ ಪಾಟಿಂ ಯೆತಾಂ ಮ್ಹಣ್.
"ನಾಕಾರೆ ಎಡಿ,"
ಪರಾತ್ಲೆಲೆಂ ತಾಚ್ಯಾ ದೊಗಾಂ ಸಾಂಗಾತ್ಯಾಂನಿ. ಚಂದ್ರ ಭವನಾಚೊ ಮ್ಹಾಲಕ್ ನಾಗೇಶ್ ಭಟ್ ವ್ಹಡ್ಲೊ ಹರಾಮಿ. ತಶೆಂ ಪೈಶೆ ದೀನಾಸ್ತಾಂ ಧಾಂವ್ಲ್ಲ್ಯಾ ಭುರ್ಗ್ಯಾಂಕ್ ತೊ ತಾಚ್ಯಾ ಕಾಮಾಗಾರಾಂಕರ್ನಾ ಧರೊವ್ನ್ ತಾಚ್ಯಾ ಹೊಟೆಲಾ ಪಾಟ್ಲ್ಯಾ ತೀಸ್ ಮಾಡಾಂಕ್, ಎಕೇಕಾಕ್ ತೀತೀನ್ ಕೊಳ್ಶೆ ಉದಾಕ್ ಘಾಲ್ಯಾ ಶಿವಾಯ್ ಪಾಟಿಂ ಸೊಡಿನಾ.
" ದೆಕುನ್ ತುಂ ವಚಾನಾಕಾರೆ ಎಡಿ,"
ಮ್ಹಣ್ ಪಾಯಾಂಕ್ ಪಡ್ಲ್ಯಾರೀ ಎಡಿ ಆಯ್ಕಾಲೊನಾ. ತಾಚಿ ಮಜಾ ಪಳೆಂವ್ಕ್ ದೋಗ್ ಜಣ್ ಈಷ್ಟ್ ತಾಚ್ಯಾ ಸಾಂಗಾತಾಚ್ ಗೆಲೆ. ತಾಚಾ ಕುಶಿಚಾ ಮೆಜಾರ್ ಬಸೊನ್ ಎಕ್ ಸಜ್ಜಿಗೆ ಆನಿ ಎಕ್ ಚಾ ಪಿಯೆವ್ನ್, ಪೈಶೆ ದೀವ್ನ್, ಭಾಯ್ರ್ ಗೇಟಿಲಾಗಿಂ ರಾಕೊನ್ ರಾವ್ಲೆ. ತೆ ಭಿತರ್ ಆಸ್ತಾನಾ ಎಡಿನ್ ಹಲ್ವೊ ಆನಿ ಮಾಗಿರ್ ಮಸಾಲೊ ಪೊಳೊ ಹಾಡಯಿಲ್ಲೊ, ತೆ ದೊಗ್ಯೀ ಜಾಣಾಂತ್.
ತರಿ ಥೊಡೊಸೊ ವೇಳ್ ರಾಕೊನ್ ರಾವ್ಲ್ಯಾರ್ಯೀ ಎಡಿ ಭಾಯ್ರ್ ಯೇನಾ. ಬಹುಶಃ ಹೊಟೆಲಾಂತ್ಲೆಂ ಪೂರಾಯ್ ಖಾರ್ ಆನಿ ಗೋಡ್ ಖಾಣಾಂ ಭಕಾಯ್ತಾ ಜಾಂವ್ಯೆತ್. ಗಮ್ಮತ್ ಚೆಡ್ಯಾಚೆಂ. ತಿತ್ಲೆಂ ಚಿಂತುನ್ ಕಾಡ್ತಾನಾ ಎಡಿ ಭಾಯ್ರ್ "ಸಾಡೆಸಾತ್ ಅಣ್ಯಾಂಕ್ ಗಡಾಯ್ ದಾಕಯ್ಲೊ," ಮ್ಹಣಾತ್ತ್ ಹಾಂಚ್ಯಾ ಲಾಗ್ಗಿಂ ಪಾವ್ತಾನಾ ತೊ ಡಂಭ ಕೊಚ್ಚಿತ್ತ್ ನಾಚಾಲಾಗ್ಲೊ.
ಆನಿ ಮಾಗಿರ್ ತಾಂಚೆಂ ಮುಸ್ಕಾರ್ಯೀ ಸಮ ಪಳೆನಾಸ್ತಾಂ ತೊ ಬಾಣ್ ಉಸಾಳ್ಳೆಲ್ಯಾಬರಿ ಉಸಾಳ್ಳೊ. ಆನಿ ಸಾಧಾರ್ಣ್ ಎಕಾ ಫರ್ಲಾಂಗಾ ಪಯ್ಸ್ ಆಸ್ಲ್ಲ್ಯಾ ಖೆಳ್ಚ್ಯಾ ಮೈದಾನಾಲಾಗಿಂ ಪಾವೊನ್ ಮಧೆಂ ಮಾರ್ಗಾರ್ ವಾಗ್ ನಾಚೊಂಕ್ ಲಾಗ್ಲೊ.
"ಸಾಡೆಸಾತ್ ಅಣ್ಯಾಂಕ್ ಭೊಟಾಕ್ ಕೊಂಕ್ಕೊ ದಾಕಯ್ಲೊ. ವ್ಹಡೊಳ್ ಮ್ಹಾಕಾ ಆಡಾಯ್ತಾಲೆ ಚೋರ್ ಕೋಣ್ರೆ ತೆ? ಮ್ಹಾಕಾ ಎಕ್ ರುಪಯ್ ದಿಯಾ. ನಾತ್ಲ್ಯಾರ್ ಪೊಟಾಂತ್ಲಿ ಅಂಡ್ಕಿಟಿ ತೊಂಡಾಂತ್ ಹಾಡ್ತಾಂ"
ಮ್ಹಣೊನ್ ತೊ ಕೊಚ್ಚಿತಾನಾ, ಬೊಲ್ ಮ್ಹಾತಾರ್ಯಾಲಾಗ್ಗಿಂ ಪಾವೊನ್ ತೊ ತಾಣೆಂ ಹೆಟಾಂತ್ ಧರುಂಕ್ ಸಮಾ ಜಾಲ್ಲೆಂ. ತಾಕಾ ಆನಿ ಬೊಲಾಕ್ ಥಯಿಂಚ್ ಸೊಡ್ನ್ ಭುರ್ಗೆ ಎಡಿಕ್ ವೆಡೊ ಮಾರುಂಕ್ ಧಾಂವ್ಲೆ.
ಆಪ್ಣಾಕ್ ಲ್ಹಾನ್ ಕೆಲೊ ಮ್ಹಣ್ ನರ್ಗಾಲ್ಲೊ ಮ್ಹಾತಾರೊ, ಆಪ್ಣಾಚ್ಯಾಕ್ಯೀ ವ್ಹಡ್ ಆಕರ್ಷಣ್ ಖಂಯ್ಚೆಂ ಮ್ಹಣ್ ಕಳೊಂಕ್ ಮಾರ್ಗಾಕ್ ಪಾವ್ಲೊ. ಗಜಾಲ್ ತುರ್ತಾನ್ ತಾಕಾ ಕಳ್ಳಿ. ತಾಮ್ಟ್ಯಾಚೊ ಪೂತ್ ಎಡಿ ಹೊಟೆಲಾಕ್ ದಗೊ ದೀವ್ನ್ ಆಯ್ಲಾ ಮ್ಹಳ್ಳೆಂ ಕಳ್ತಚ್ ಬರೊ ಕ್ರಿಸ್ತಾಂವ್ ಜಾಲ್ಲ್ಯಾ ತ್ಯಾ ಮ್ಹಾತಾರ್ಯಾನ್ ತಾಕಾ ಧರ್ಲೊ ಆನಿ ಕ್ರಿಸ್ತಾಂವ್ ಶೆಗುಣ್ ವಿವರ್ಸುಂಕ್ ಸುರು ಕೆಲೆ.
"ಬರ್ಯಾ ಬಾಪಾಯ್ಕ್ ಜಾಲ್ಲೊಯ್ಮುರೆ ತುಂ?"
ಚೊವ್ದಾ ವರ್ಸಾಂಚೊ ಎಡಿ ಆಪ್ಲ್ಯಾ ಖೊಮ್ಸಾಕ್ ಧರ್ಲಾಂ ಮ್ಹಣ್ ತಾಂಬ್ಡೊ ಜಾಲಾ. ತಾಚ್ಯಾ ಗಾಲಾಂಚೆರ್ ಟೊಮೆಟಾಂ ಪಿಕ್ಲ್ಯಾಂತ್. ಸಾಟ್ ಆನಿ ಆಟ್ ವರ್ಸಾಂಚೊ ಮಾಜಿ ತಾಶಿಲ್ದಾರ್ ಪೀಂತ್, ನಿತ್ಳಾಂವ್ಚಾ ಖಾತಿರ್ ಎಕ್ ಮ್ಹೆಳೊ ಅತ್ಮೊ ಧರ್ಲಾ ಮ್ಹಣ್ ಭಾಂಗ್ರಾಳೊ ಜಾಲಾ. ತಾಚ್ಯಾ ಗಾಲಾಂಚೆರ್ ಇರ್ವೊಳ್ ಜೂನ್ ಜಾಲ್ಯಾತ್.
"ಸೊಡ್ಗಾ?"
ಬೊಬಾಟ್ತಾ ಎಡಿ.
"ತುಜ್ಯಾ ಆಜ್ಯಾಯೆದೊ ಜಾಲಾಂ ಪುತಾ, ಮ್ಹಾಕಾ ಅಗಾ ಮ್ಹಣ್ತಾಯ್?" ವಿಚಾರ್ತಾ ಪೀಂತ್.
ಆನಿ ಉಪ್ರಾಂತ್ ತೊ ತ್ಯಾ ಭುರ್ಗ್ಯಾಕ್ ಶಿತ್ ಘಾಲ್ನ್ ಬೊಸ್ಲ್ಲ್ಯಾಬರಿಚ್ ವ್ಹಡ್ಲ್ಯಾನ್ ತಾಚಿ ಮರ್ಯಾದ್ ಕಾಡ್ತಾ.
"ಬರ್ಯಾ ಬಾಪಾಯ್ಕ್ ಜಲ್ಮಾಲ್ಲೊಯ್ಮುರೆ ತುಂ? ಹಡ್ಬ್ಯಾಚ್ಯೊ ಬುದಿ ಕಶೊ ಆಯ್ಲ್ಯೊರೆ ತುಕಾ? ಹೊಟೆಲಾಂತ್ ಫುಂಕ್ಯಾಚೆಂ ಖಾವ್ನ್ ಆಯ್ಲಾಯ್ ಆನಿ ಹಾಂಗಾ ಮಾರ್ಗಾರ್ ರಾವೊನ್ ದರ್ಬಾರ್ ಕೊಚ್ಚಿತಾಯ್""
"ತುಜ್ಯಾ ಬಾಪಾಯ್ಚೆಂ ಖಾವ್ನಾಂಗಾ"
ಎಡಿ ಸೊಡ್ಚೊ ಪೂತ್ ನಹಿಂ. ತೊ ತಾಚೆ ಮ್ಹಾತಾರೆ ಮುಟಿಂತ್ ಉಡ್ಡೊಂಚೊ ತೊ ಸುಟೊಂಕ್ ಮ್ಹಳ್ಳ್ಯಾಬರಿ ಜಾತಾನಾ.... ಪರ್ಕಾಟೆ ಆನಿ ಮ್ಹೆಳೆಂ ಜಾಲ್ಲೆಂ ಬಂಜಾಣ್ ಆನಿ ರೂಂದ್ ಪೊಪ್ಳ್ಯಾಂಚಿ ಲುಂಗಿ ನ್ಹೆಸಲ್ಲೊ ಎಕ್ಲೊ ತ್ಯಾ ಜಾಗ್ಯಾರ್ ಪಾವೊನ್ ತುಳ್ವೆ ಭಾಷೆನ್ ಖರ್ಶೆಲೊ.
"ಹೊಚ್ ತೊ ಚೆಡೊ"
"ಕಿತೆಂ ಕೆಲಾಂ ತಾಣೆಂ?" ಪೀಂತ್ ವಿಚಾರ್ಲಾಗ್ಲೊ.
"ಹೊಟೆಲಾಂತ್ ಮ್ಹೆಳ್ಲ್ಲೆಂ ಖಾವ್ನ್ ಪೈಶೆ ದೀನಾಸ್ತಾಂ ಧಾಂವೊನ್ ಆಯ್ಲಾ. ಧನಿಯಾನ್ ಧರ್ನ್ ಹಾಡುಂಕ್ ಸಾಂಗ್ಲಾಂ."
"ವ್ಹರ್ ತಾಕಾ," ಪಿಂತಾನ್ ಎಡಿಕ್ ಉಕ್ಲುನ್ ಮ್ಹಳ್ಳ್ಯಾಬರಿ ತಾಚ್ಯಾ ಹಾತಾಂತ್ ದಿಲೊ.
"ಚಿಂಚೆಚ್ಯಾ ಆಡಾರಾನ್ ತಾಕಾ ಸಮಾ ಪೊಪಾಂವ್ಕ್ ಸಾಂಗ್ ತುಜಾ ಧನಿಯಾಕ್".
"ತುಂ ತಾಚ್ಯಾ ಧನಿಯಾಚೊ ಮೀಂಡ್ನೆಗಾ ಸೈತಾನ್ ಮ್ಹಾತಾರ್ಯಾ?"
ಎಡಿ ಫಡ್ಪಡ್ಚ್ಯಾ ಪಯ್ಲೆಂ ತಾಚ್ಯಾ ಪಿಂಜೊಂಕ್ ತಯಾರ್ ಜಾಲ್ಲ್ಯಾ ಖೊಮ್ಸಾಕ್ ತ್ಯಾ ಅಗಂತುಕಾನ್ ಧರ್ನ್ ಜಾಲ್ಲೆಂ. ಮಾಗಿರ್ ಸುಣೆಂ ಕುಂಕ್ಡ್ಯಾಚ್ಯಾ ಮೊಡ್ಯಾಕ್ ವೊಡಿತ್ತ್ ವ್ಹರ್ಚ್ಯಾಬರಿ ತೊ ಎಡಿಕ್ ಸಾಗ್ಸಿತಾನಾ ಭುರ್ಗೆ ಬೊಬಾಟ್ಲೆ.
"ಆತಾಂ ಹಾಚೆಕರ್ನಾ ಮಾಡಾಂಕ್ ಉದಾಕ್ ಘಾಲಯ್ತಾತ್."
"ಕೊಂಕ್ಕೊ,"
ಉಡ್ಡಾಲೊ ಎಡಿ ಆಪ್ಲೊ ಎಕ್ ಹಾತ್ ದುಸ್ರ್ಯಾ ಹಾತಾಕ್ ಮಾರ್ನ್ ಆನಿ ಮೂಟ್ ಸಕ್ಲಾ ಬಾಗ್ವಾಯಿಲ್ಲಿ ಕುರು ಕರ್ನ್
"ಮ್ಹಜೆಕರ್ನಾ ಉದಾಕ್ ಘಾಲಯ್ಲ್ಯಾರ್ ತಾಂಚೊ ಕೊಳ್ಸೊಚ್ ವ್ಹಾವವ್ನ್ ಹಾಡ್ತಾಂ. ಹಾಡಿನಾ ಜಾಲ್ಯಾರ್ ಮ್ಹಜ್ಯಾ ಬಾಪಾಯ್ಕ್ ಜಾವ್ನಾ. ಆನಿ ವ್ಹಯ್ಗಾ ಸೈತಾನ್ ಮ್ಹಾತಾರ್ಯಾ, ಪಾಟಿಂ ಯೇವ್ನ್ ತುಕಾ ಎಕ್ ಫೊಂಡ್ ಖೊಡ್ತಾಂ. ತೊ ಉಡ್ಡಾತ್ತ್ ಆನಿ ತೊ ಅಗಂತುಕ್ ತಾಕಾ ವೊಡಿತ್ತ್ ವೆತಾನಾ ತೆ ಪಯ್ಸ್ ಜಾಲೆ. ಕ್ರಿಕೆಟ್ ಸಂಪ್ಲೆಂನಾ, ಸುರ್ಯೊ ತಾಂಬ್ದೊ ಜಾಲೊ, ಸಕ್ಲಾ ಗೆಲೊ ಆನಿ ಬುಡ್ಲೊ. ಉಡಯಿಲ್ಲೊ ಚೆಂಡು ದೊಳ್ಯಾಂಕ್ ಬಿಲ್ಕುಲ್ ದಿಸಾನಾ ಮ್ಹಳ್ಳಿ ಪರಿಸ್ಥಿತಿ ಯೆತಾನಾ ಖೆಳ್ ಸಂಪ್ಲೊ. ಖುಂಟೆ ನಿಕ್ಳಾಯ್ಲೆ. ಭುರ್ಗೆ ಎಡಿಚಿ ಗಜಾಲ್ ವ್ಹಡ್ಲ್ಯಾನ್ ಚರ್ಚೆ ಕರಿತ್ತ್ ಮಾರ್ಗಾಕ್ ಪಡ್ತಾನಾ ಎಡಿ ಚಂದ್ರ ಭವನಾಚೊ ಕೊಳ್ಸೊ ಹಾತಾಂತ್ ಕಾಣ್ಘೆವ್ನ್ ಧಾಂವೊನ್ ಆಯ್ಲೊ.
"ಭೊಟಾಕ್ ಗಡಾಯ್ ದಾಕಯ್ಲೊರೆ" ಉಸ್ಮಡ್ಲೊ ತೊ.
"ಮ್ಹಜೆಕರ್ನಾ ಉದಾಕ್ ಘಾಲಯ್ತಾಲೊ ಆವಯ್ಚ್ಯಾ ಪೊಟಾಂತ್ ರಿಗೊನ್ ಯೇಜೆ" ತಾಚ್ಯಾ ತೊಂಡಾರ್ ಜೈತಾಚಿ ಚೂಡ್ ಜಳ್ಟಾಲಿ. ಗಾಲ್ ಭಿಂರ್ಡಾಬರಿ ತಾಂಬ್ಡೆ ಜಾಲ್ಲೆ.
"ತೊ ಪಿಂತಾಚೊ ಪೂತ್ ಖಂಯ್ ಗೆಲಾ ಪಳೆಯ್ಲೆಂಯೆರೆ ಕೊಣೇಂಯ್?" ತಾಣೆಂ ಆಮ್ಸರೊನ್ ವಿಚಾರ್ಲೆಂ. ಸಗ್ಳೆ ಫೊಳ್ಳ್ ಕರ್ನ್ ಹಾಸ್ಲೆ.
"ಗಡಂಗಾಕ್ ಗೆಲಾರೆ" ಮ್ಹಣಾಲೊ ಎಕ್ಲೊ.
"ನಾಂರೇ ಎಡಿಚ್ಯಾ ಘರಾ ಗೆಲಾ." ಮ್ಹಣಾಲೊ ಅನ್ಯೆಕ್ಲೊ. ಆನಿ ತಿತ್ಲೆಂ ಮ್ಹಣ್ತಾನಾ ಹಾತಾಂತ್ ಎಕ್ ನಾಗ್ ಬೇತ್ ಘೆವ್ನ್ ಎಡಿಚೊ ಬಾಪಯ್ ಆನಿ ತಾಚ್ಯಾ ಕುಶಿಕ್ ವಾರೆಂ ಘಾಲಿತ್ತ್ ಮಾಜಿ ತಾಶಿಲ್ದಾರ್ ಪೀಂತ್ ಮುಖ್ಲ್ಯಾನ್ ಯೆತಾಲೆ.
- 2 -
ಮುಖ್ಲ್ಯಾನ್ ಬಾಪಾಯ್ ಯೆಂವ್ಹೊ ಪಳೆವ್ನ್ ತಾಕಾ ಜಿಮ್ಮ್ ಜಾಲೆಂ. ತಾಚೆಂ ಜಿಮ್ಮ್ ಜಾಂವ್ಚೆಂ ನಿವ್ಚ್ಯಾ ಪಯ್ಲೆಂ ತಾಚೆ ಮಾಣೆಚ್ಯಾ ಕಾಂದ್ಯಾಚೆರ್ ಅಡಾರಾಚೊ ಎಕ್ ಮಾರ್ ಬಸ್ಲೊ. ತೊ ಬಸ್ಲ್ಯಾ ಉಪ್ರಾಂತ್ ದುಸ್ರೊ ತೊ ಚುಕೊಂವ್ಕ್ ಯೆತಾನಾ ತಿತ್ಲೊಚ್ ಚುರುಕ್ ಆಸ್ಲ್ಲ್ಯಾ ಬಾಪಾಯ್ನ್ ತಾಚೆ ಪಾಟಿಚೆರ್ ಆನ್ಯೇಕ್ ಬೇತ್ ವೊಡ್ಲೆಂ.
ಎಡಿಚಿ ಚುರುಕಾಯ್ ಉಣಿ ನ್ಹಂಯ್. ತ್ಯಾ ಮಾರಾಂಚಿ ದೂಕ್ ತಾಣೆ ಸೊಸ್ಲಿ. ಪೂಣ್ ತಾಚೆಂ ಶಿಂತಿದ್ ತೆ ದುಕಿಚೆರ್ ನಾತ್ಲ್ಲೆಂಚ್. ತಾಣೆ ಸರ್ವಯ್ ಬಳಾನ್ ಕೊಳ್ಸೊ ಉಕಲ್ಲೊ. ಕುಶಿನ್ಂಚ್ ಉಭೊರಾವೊನ್ ಪೊಟ್ ಖೊರ್ಪುಂಚ್ಯಾ ಪಿಂತಾಚ್ಯಾ ಪೊಟಾಚೆರ್ ತ್ಯಾ ಕೊಳ್ಸ್ಯಾಚಾ ಪೊಟಾಚೊ ಎಕ್ ಮಾರ್ ಬಸಯ್ತಾನಾ ಪೀಂತ್ ವೊಮ್ತೊ ಉದಾರೊ, ಗುಜೊ ಕೊಸಾಳ್ಳೆಲ್ಯಾ ಭಾಷೆನ್ ಚರಂಡೆಂತ್. ಎಡಿನ್ ಕೊಳ್ಸೊ ಮಾತ್ರ್ ಸೊಡ್ಲೊನಾ. ಬಗಾರ್ ಚಿತ್ಳಾಚಿಂ ಉಡ್ಕಾಣಾಂ ಮಾರ್ನ್ ಆಪ್ಲ್ಯಾ ಘರಾ ಕುಶಿನ್ ಉಸಾಳ್ಳೊ. ತಾಚೊ ಬಾಪಯ್ ಚರಂಡೆಂತ್ ಪಡ್ಲೆಲ್ಯಾ ಪಿಂತಾಚಿ ಶುಶ್ರೂಷಾ ಕರುಂಕ್ ಪಡ್ಲೊ. ತಾಂಚೆ ದೊಗಾಂಯ್ಚೆ ಉಮಾಳೆ ಆದ್ಲಿ ಬದ್ಲಿ ಜಾವ್ನ್ ಬಾಪಾಯ್ ಘರಾ ಪಾವೊಂಕ್ ವೇಳ್ ಆಸ್ಲ್ಲೊ.
"ಮಾಫ್ ಕರಿಜಾಯ್ ಮಿಸ್ಟರ್ ಪಿಂಟೊ. ಹಾಂವ್ ಘರಾ ವಚೊನ್ ತಾಚಾ ಪಾಟಿಚೆಂ ಚಾಮ್ಡೆಂ ನಿಕ್ಳಾಯ್ತಾಂ ಆನಿ ಬರ್ಯೊ ದೋನ್ ವ್ಹಾಣೊ ಶಿಂವವ್ನ್ ದಿತಾಂ"
"ತೊ ಚೆಡೊ ಪಾರ್ಪೊಳ್ ಜಾಲಾ" ಪುಡ್ವೆಂ ಸಮಾ ಕರಿತ್ತ್ ಪೀಂತ್ ಉಸ್ಮಾಡ್ಲೊ.
"ತಾಚಿ ಪಾರ್ಪೊಳ್ಗಿರಿ ಹಾಂವ್ ನಿಸ್ರಾಯ್ತಾಂ" ಭುಜಾವಣ್ ದಿಲಿ ಎಡಿಚ್ಯಾ ಬಾಪಾಯ್ನ್ ಆನಿ ಭುಜಾವಣೆಚಿ ಶೆಳ್ ಮೆಳೊಂಕ್ ದೊಗ್ಯೀ ಜಣ್ ಗಡಂಗಾಕ್ ಗೆಲೆ.
ಎಡಿನ್ ಮಾತ್ರ್ ಕೊಳ್ಸೊ ಕಾಣ್ಘೆವ್ನ್ ಘರಾ ಧಾಂವ್ತಾನಾ ಆಪ್ಲಿ ಆವಯ್ ದೊಳ್ಯಾಂ ಪುಡೆಂ ನಾಚಾಲಾಗ್ಲಿ. ಕಸಲ್ಯಾಗಿ ದುರಾದ್ರಷ್ಟಾನ್ ತಿ ತ್ಯಾ ಕಾಳಾಚಿ ಶಿಕ್ಪಿ ಮಾದ್ರಿಂಗೆರ್ ಆಟ್ವಿ ಶಿಕ್ಲ್ಲಿ ಸ್ತ್ರೀ ತಾಚ್ಯಾ ಬಾಪಾಯ್ಕ್ ಮೆಳ್ಲ್ಲಿ. ತ್ಯಾ ಎಕಾಚ್ ಕಾರಾಣಾನ್ ಜಾಂವ್ಯೆತ್ ತಾಚೊ ಬಾಪಾಯ್ ಶಿಮ್ಟಿ ಕಾತರ್ಲೆಲ್ಯಾ ಕೊಲ್ಯಾಬರಿ ಘರಾಂತ್ ಥಂಡ್ಗಾರ್ ಜಾಲ್ಲೊ. ತಾಣೆ ತಾಂಬ್ಯಾಚ್ಯಾ ತಗ್ಡಾಕ್ ಬಡೊವ್ನ್ ಕರ್ಚೊ ಆವಾಜ್ ಶಿವಾಯ್ ತ್ಯಾ ಘರಾಂತ್ ತಾಚೊ ಆವಾಜ್ ಕೊಣೆಂಯ್ ಆಯ್ಕಾಲೊನಾ. ಹೆ ಥಂಡಾಯೆಂತ್ ಎಡಿ ದೋನ್ ಸಬ್ದ್ ಇಂಗ್ಲಿಜ್ ಶಿಕ್ಲ್ಲೊ.
ತಾಚ್ಯಾ ಬಾಪಾಯ್ಕ್ ಭಾಜುನ್ ಖಾಂವ್ಕ್ ಇಂಗ್ಲಿಷ್ ಯೇನಾತ್ಲ್ಲೆಂ. ತಾಚ್ಯಾ ಮುಖಾರ್ಯೀ ತಾಣೆಂ ಸಾತ್ ವರ್ಸಾಂಚೆ ಪಿರಾಯೆರ್ ಇಂಗ್ಳೆ ಕಾತರ್ತಾನಾ ಬಾಪಾಯ್ಕ್ ಪೊಟಾಂತ್ ಹುಂಬ್ಲೆ ಚಾಬ್ತಾಲೆ. ಹೆ ತಾಚೆ ಸಲ್ವೊಣೆಂತ್ ಎಡಿಚಿ ಆವಯ್ ವ್ಹಡ್ ಜೈತ್ ಜೊಡ್ತಾಲಿ ಆನಿ ಎಕಾಚ್ ಪುತಾಕ್ ಬಾಪಾಯ್ಚ್ಯಾ ಮಾತ್ಯಾರ್ ಚಡೊಂಕ್ ಅವ್ಕಾಸ್ ದಿತಾಲಿ. ಅವ್ಚಿತ್ ತಿಚಾ ಥಾನಾಂಕ್ ಕೆನ್ಸರಾಚಿ ಪಿಡಾ ಲಾಗೊನ್ ತಿ ಅಂತರ್ಲಿಚ್ ಎಡಿಚ್ಯಾ ಬಾಪಾಯ್ಚೆ ಬಾಂಧ್ಪಾಸ್ ಸುಟ್ಲೆ. ಸಬಾರ್ ವಾಯ್ ಎಕಚ್ ಪಾವ್ಟಿಂ ಸುಟೊನ್ ಗೆಲ್ಲ್ಯಾಬರಿ ತಾಕಾ ಭೊಗ್ಲೆಂ.
ಆಪ್ಲೆ ಜಿಣೆಯೆಂತ್ಲಿ ಚೂಕ್ ಆನಿ ಕರಿನಾ ಮ್ಹಣ್ ನಿಚೆವ್ ಕೆಲೊ. ಪುರ್ತೆಂ ವರಸ್ ಸರಾಜಾಯ್ ತರ್ ತೊ ಕಾಜಾರ್ ಜಾಲೊ. ನವೆ ಆಸ್ತ್ರೆಕ್ ಬೊಟ್ ದಾಂಬಿಜಾಯ್ ಜಾಲ್ಯಾರ್ ದುಸ್ರ್ಯಾನ್ ದಾಂಬುನ್ ಧರಿಜಾಯ್ ಪಡ್ತಾಲೆಂ. ತೊಂಡ್ ತಿಚೆಂ ಸಾವ್ಳೆಂ, ಪುಣ್ ವೊಂಟ್ ಕ್ರೂರ್ ಆನಿ ಕಾಳೆ. ಸ್ವಭಾವಾನ್ ಜಳ್ಮುಖಿ, ಉಜ್ಯಾಂತ್ ಮುರ್ಮುರ್ಲೆಲೊ ಕಾಸುಳೆಚೊ ಖೊರ್ಜುಳೊ ಕಾಂದೊ. ತಿಚೊ ಪಾಯ್ ಘರಾಂತ್ ಪಡ್ಲ್ಲೊಚ್ ಎಡಿಚೆಂ ಇಂಗ್ಲೀಷ್ ಜನೆಲಾಂತ್ಲ್ಯಾನ್ ಪೊಳ್ಳೆಂ. ದಿಸಾಕ್ ತೀನ್ ಪಾವ್ಟಿಂ ತಾಚಿಂ ಗಾಲ್ಪುಟಾಂ ಪಿಸ್ಡೊನ್ ಗೆಲಿಂ. ತಾಚೆ ಕಾನ್ ವೊಳಾವ್ನ್ ಧುಮ್ಟಿ ಜಾಲೆ. ತಾಚೆ ಪಾಟಿರ್ ಥಾಪ್ಡಾಂಚಿ ಖತಡ್ ಜಾಲಿ. ತಾಚ್ಯಾ ಮಾತ್ಯಾರ್ ಕುಟಿಂಚಿ ರಾಸ್ ಜಾಲಿ. ಬಾಯ್ಲೆನ್ ಆಪ್ಣಾಕ್ ದಮ್ಕುನ್ ಕಾಬಾರ್ ಕೆಲೊ ಮ್ಹಳ್ಳೊ ರಾಗ್ ತಾಮ್ಟಿ ಫೇರೆರಾಚ್ಯಾ ಹರ್ದ್ಯಾಂತ್ ಶಿಜ್ತಾಲೊ. ತಿ ಮೆಲ್ಲಿಚ್ ತಾಣೆಂ ಪೂರಾಯ್ ಎಕ್ಟಾಂಯ್ ಕರ್ನ್ ಆಪ್ಲ್ಯಾ ಪುತಾಚೆರ್ ಕಾಡುಂಕ್ ಸುರು ಕೆಲೊ.
ಪಾಟಾಪಾಟ್ ತೆಗಾಂ ಚೆಡ್ವಾಂ ತಾಕಾ ದುಸ್ರೆ ಬಾಯ್ಲೆನ್ ದಿಲಿಂ. ತೋಯ್ ಮುಸ್ಮುಸೊ ತಾಚ್ಯಾ ಕುಸಾಳಾಂನಿ ಜಳಾತ್ತ್ ಆಸ್ಲ್ಲೊ. ಹಾಂತುಂ ಎಡಿ ಕರ್ಪೊನ್ ಭಸ್ಮ್ ಜಾಲೊ. ಹಿಂ ಪಿಂತುರಾಂ ಎಡಿಚ್ಯಾ ದೊಳ್ಯಾಂ ಮುಖಾರ್ ನಾಚ್ಲಿಂ. ಘರಾಂತ್ ಆತಾಂ ತಾಕಾ ಬರ್ಕತ್ ಆಸ್ಚೆಂನಾ ಮ್ಹಳ್ಳೆಂಯ್ ಕಳ್ಳೆಂ. ಕೊಳ್ಸೊ ಘೆವ್ನ್ ತೊ ಘರ್ಚೆಂ ಮೆಟ್ ಚಡ್ಚ್ಯಾ ಬದ್ಲಾಕ್ ಪಾಟ್ಲ್ಯಾನ್ ಗೆಲೊ. ಕುಂಕ್ಡಾಚ್ಯಾ ಗುಡಾಂತ್ ಕೊಳ್ಶಾ ಸಮೇತ್ ರಿಗೊನ್ ಬಸ್ಲ್ಲೊ ಕೊಣಾಯ್ಕೀ ಕಳ್ಳೆಂನಾ. ಪೂಣ್ ಘರಾಂತ್ ಕಿತೆಂ ಗಲಾಟೊ? ವಸ್ತು ಆನಿ ಬೆತಾಂಚೊ ಪಿಟೊ ಪಿಟೊ. ಪಿಯೆವ್ನ್ ಆಯಿಲ್ಲೊ ಬಾಪಾಯ್ ಮೆಳಲ್ಲೆಂ ಪಿಂದಿಲಾಗ್ಲೊ. ಕೊನ್ಶಾ ಕೊನ್ಶಾಂನಿ ಸೊಧ್ನಾಂ ಜಾಲಿಂ. ಬಾಯ್ಲೆಕ್ ಮಸ್ತುನ್ ಜಾಲೆಂ. ಧಾಕ್ಟಿಂ ಭುರ್ಗಿಂ ಬೊಬಾಟ್ಲಿಂ.
ನಿಮಾಣೆಂ ಆಪ್ಲೊ ಬಾಪಯ್ ರಾಂದ್ಚ್ಯಾ ಕುಡಾಂತ್ ಕೊಯ್ತೊ ಸೊಧ್ತಾ ಮ್ಹಳ್ಳೆಂ ಗುಡಾಂತ್ ಬಸ್ಲ್ಲ್ಯಾ ಎಡಿಕ್ ಕಳ್ಳೆಂ. ತೊ ಕೊಳ್ಸೊ ಆರಾವ್ನ್ ಧರ್ನ್ ಗುಡಾಂತ್ಲೊ ಸುಟ್ಲೊ. ಮಾಗಿರ್ ಎಕೆ ಸುರಾಂಟೆನ್ ಹಿತಾಲ್ ಉತ್ರೊನ್ ದೊರೊ ಉಡ್ತಾನಾ ಬಾಪಾಯ್ನ್ ಪಳೆಲೆಂ. ಪರಶುರಾಮಾಚೆ ಕುರಾಡೆಬರಿ ಕೊಯ್ತೊ ಉಬೊನ್ ಆಯಿಲ್ಲೊ ತಾಚ್ಯಾ ಪಾಯಾಕ್ ಲಾಗೊನ್, ಮಾಸ್ ಕಾತ್ರುನ್, ಶಿರ್ ಪುಟೊನ್ ರಗ್ತಾಚೆ ವ್ಹಾಳ್ ಜಾಲ್ಲೆ ಎಡೀಯ್ ನೆಣಾಂ. ತೊ ಉಡ್ಲ್ಲ್ಯಾ ಹಿತ್ಲಾಂತ್ ತಾಚ್ಯಾ ಬಾಪಾಯ್ಚಿಂ ದುಸ್ಮಾನಾಂ ರಾವ್ತಾತ್. ತಾಂಕಾಂ ಆನಿ ತಾಚ್ಯಾ ಬಾಪಾಯ್ಕ್ ಉಲೊಣೆಂ ನಾ. ತ್ಯಾ ದೆಕುನ್ ಬಾಪಾಯ್ನ್ ಶಿರಾಪ್ ಘಾಲೆ ತರೀಯ್ ಮುಖಾರ್ ಆಯ್ಲೊನಾ. ಎಕಾ ದಮ್ಮಾಕ್ ಮುಕ್ಲ್ಯಾ ಘರ್ಚೊ ಸೊಪೊ ಚಡೊನ್ ಸಾಲಾಂತ್ ಪಾವ್ತಾನಾ ತೆರಾ ವರ್ಸಾಂಚಿ ಎಕ್ ಅಡ್ಬೊಸರಿ ಚಲಿ ತಾಚ್ಯಾ ಮುಖಾರ್ ಭಿಯಾನ್ ಕಾಂಪ್ಚೆಂ ತಾಣೆಂ ಪಳೆಲೆಂ.
"ಭಿಯೆನಾಕಾ" ಖರ್ಶೆಲೊ ಎಡಿ.
ತೆಂ ಉಲಯ್ಲೆಂನಾ. "ಹೆಂ ಪಳೆ," ಪಾಯಾಚೊ ಘಾಯ್ ಎಡಿನ್ ದಾಕಯ್ಲೊ.
"ಊಂ," ಹಾಂಕ್ರೆಲೆಂ ತೆಂ ಚೆಡುಂ ಆನಿ ತೆಣೆಂ ಹೆಣೆಂ ಧಾಂವ್ ಮಾರ್ನ್ ಕಾಪ್ಸಾಕುಡ್ಕೆ, ಉದಾಕ್ ಆನಿ ವೊಕಾತ್ ಮ್ಹಣ್ ಎಕ್ಟಾಯ್ಲೆಂ.
ಘಡಿಯೆನ್ ತಾಣೆ ತಾಚ್ಯಾ ಪಾಯಾಂತ್ಲ್ಯಾನ್ ವ್ಹಾಳ್ಚೆಂ ರಗತ್ ರಾವೊವ್ನ್ ಹಳ್ತಾಚೆಂ ಬೆಂಡಿಸ್ ಬಾಂದ್ಲೆಂ. "ತುಜೆಂ ನಾಂವ್ ಕಿತೆಂ?" ವಿಚಾರಿ ಎಡಿ.
"ಲಿಲ್ಲಿ"
"ತುಂ ಕೋಣ್ ಹಾಂಗಾಚೆಂ?"
"ಎವ್ಲಿಚ್ಯಾ ಮಾವ್ಶೆಚಿ ಧುವ್. ಹಾಂವ್ ಆತ್ತಾಂ ಸಾಂಜೆರ್ ಪುತ್ತೂರ್ ಥಾವ್ನ್ ಆಯ್ಲಿಂ. ವಾಟೆರ್ ಬಸ್ಸ್ ಪಾಡ್ ಜಾಲೆಂ ಜಾಲ್ಲ್ಯಾನ್ ವೇಳ್ ಜಾಲೊ. ಪೂಣ್ ಹಾಂಗಾ ಯೆತಾನಾ ಬಾಗಿಲ್ ಆಡ್ ಕರ್ನ್, ಘರ್ಚಿಂ ಸಗ್ಳಿಂ ಭಾಯ್ರ್ ಗೆಲ್ಯಾಂತ್."
"ಲಿಲ್ಲಿ" ಮ್ಹಣಾಲೊ ಎಡಿ.
"ತುಕಾ ಹಾಂವ್ ವಿಸ್ರಾನಾ, ಮೊರ್ಚ್ಯಾ ಪಯ್ಲೆಂ ತುಕಾ ಮೆಳ್ಳ್ಯಾ ಶಿವಾಯ್ ರಾಂವ್ಚೊನಾ. ಎವ್ಲಿನ್ ಆನಿ ತಾಚಿ ಆವಯ್ ಆನಿ ತಾಚೆ ಭಾವ್ ಇಗರ್ಚೆಕ್ ಗೆಲ್ಯಾಂತ್ ಆಸ್ತೆಲಿಂ. ತಾಂಚಿ ಆವಯ್ ಬಹುಶಃ ಹೆಣೆಂಚ್ ಶೆಜಾರಾ ಆಸ್ತೆಲಿ. ತಿಂ ನಾತ್ಲ್ಲೀಂಯ್ ಬರೆಂ ಜಾಲೆಂ. ಧರ್ ಹೊ ಕೊಳ್ಸೊ ಮ್ಹಜ್ಯಾ ಉಗ್ಡಾಸಾಕ್ ಸಾಂಭಾಳ್ನ್ ದವರ್ ಹಾಂವ್ ಖಂಯ್ ಪಾವ್ಲ್ಯಾರ್ಯೀ, ವ್ಹಡ್ ಜಾವ್ನ್ ಪಾಟಿಂ ಯೆತಲೊಂ. ಆನಿ ತುಜೆಜ್ಲಾಗಿಂ ಕಾಜಾರ್ ಜಾತಲೊಂ."
ಅಶೆಂ ಮ್ಹಣೊನ್ ತಾಣೆ ತಾಕಾ ಪೊಟ್ಲೊನ್ ಧರ್ಲೆಂ. ಆನಿ ಭೋವ್ ಅಮ್ಸರಾನ್ ತಾಚ್ಯಾ ಗಾಲಾರ್ ಎಕ್ ಹುನ್ವೊನಿ ಉಮೊ ದಾಂಬ್ಲೊ. ಮಾಗಿರ್ ಉಸಾಳ್ಳೆಲ್ಯಾ ಎಡಿಕ್, ತ್ಯಾ ಗಾಂವಾಂತ್ಲ್ಯಾ ಕೊಣೇಂಯ್ ಪಳೆಲೆಂನಾ. ತೆ ರಾತಿಂ ಪಿಂತಾಚ್ಯಾ ಪಾಕ್ಯಾರ್ ವ್ಹಡ್, ವ್ಹಡ್ ಚಾರ್ ಫಾತರ್ ಪಡೊನ್ ನಳೆ ಪಿಟೊ ಜಾಲ್ಯಾತ್ ಮ್ಹಳ್ಳಿ ಖಬರ್ಯೀ ವಿಸ್ತಾರ್ಲಿ.
- 3 -
ಥೊಡ್ಯಾಚ್ ಘಡಿಯಾಂನಿ ಸೆಜಾರಾ ಗೆಲ್ಲ್ಯೊ ಬಾಯ್ಲೊ ಘರಾಂತ್ ಆಯ್ಲ್ಯೊ. ಇಗರ್ಜೆಕ್ ಗೆಲ್ಲ್ಯೊ ಭಿತರ್ ಸರ್ಲ್ಯೊ. ಭುರ್ಗಿಂಬಾಳಾಂ ಲಾಗಿಂ ಸರ್ಲಿಂ. ಘರ್ಚೊ ದಾದ್ಲೊ ಘರಾಂತ್ ಆನಿ ಅಬ್ಳೆ ಸಕ್ಡಾಂಚ್ಯಾ ತೊಂಡಾರ್ ಎಕ್ಚ್ ಗಜಾಲ್: ಎಡಿ ಆನಿ ತಾಚೊ ಕೊಳ್ಸೊ. ಎಡಿನ್ ಕೊಳ್ಸೊ ದಿಲ್ಲಿ ಗಜಾಲ್ ಲಿಲ್ಲಿನ್ ಸಾಂಗ್ಲಿ. ಎಡಿಚೊ ಪಾಯ್ ಕಾತ್ರಾಲ್ಲಿ ಗಜಾಲ್ ಲಿಲ್ಲಿನ್ ಸಾಂಗ್ಲಿ. ಎಡಿಚಾ ಪಾಯಾಕ್ ಬೆಂಡಿಸ್ ಬಾಂಧ್ಲ್ಲಿ ಗಜಾಲ್ ಲಿಲ್ಲಿನ್ ಸಾಂಗ್ಲಿ. ಸಗ್ಳ್ಯಾಂಕ್ಯೀ ಬಿರ್ಮೊತ್ ದೊಳ್ಯಾಂತ್ಲ್ಯಾನ್ ಪಾಚಾರ್ಲಿ. ತೊ ಹರಾಮಿ ಬಾಪಯ್ ಜೀವ್ ಕಾಡ್ಚೋಚ್ ಮ್ಹಣ್ ಜೆರಾಲ್ ಅಭಿಪ್ರಾಯ್ ಜಾಲಿ. ದೆಕುನ್ ಕೊಳ್ಶಾಚಿ ಗಜಾಲ್ ಕೊಣಾಯ್ಕ್ಯೀ ಸಾಂಗ್ಚಿ ನ್ಹಂಯ್ ಮ್ಹಣ್ ವ್ಹಡಾಂಮಧೆಂ ನಿಚೆವ್ ಜಾತಾನಾ ಸಾಂಗಾನಾಯೆ ಮ್ಹಣ್ ಲ್ಹಾನಾಂಕ್ ತಾಕೀದ್ ಜಾಲಿ. ತೀನ್ ದಿಸಾಂನಿ ಲಿಲ್ಲಿ ತ್ಯಾ ಕೊಳ್ಸ್ಯಾ ಸಮೇತ್ ಘರಾ ಪಾಟಿಂ ಆಯ್ಲೆಂ.
"ಘರಾ ನೀಜ್ ಗಜಾಲ್ ಸಾಂಗ್ ಪುತಾ. ಪುಣ್ ತೊ ಕೊಳ್ಸೊ ಮಾತ್ರ್ ಲಿಪೊವ್ನ್ ದವರಾ." ಮ್ಹಣೊನ್ ಜೊಗಾಸಾಣೆನ್ ಸಾಂಗೊನ್ಯೀ ದಿಲೆಂ. ಲಿಲ್ಲಿನ್ ಘರಾ ವಚೊನ್ ಎಡಿನ್ ಕೊಳ್ಸೊ ದಿಲ್ಲಿ ಗಜಾಲ್ ಪರ್ತುನ್ ಸಾಂಗ್ಲಿ. ಎಡಿಚೊ ಪಾಯ್ ಕಾತ್ರಾಲ್ಲಿ ಗಜಾಲ್ ಪರ್ತುನ್ ಸಾಂಗ್ಲಿ. ಎಡಿಚ್ಯಾ ಪಾಯಾಂಕ್ ಬೆಂಡಿಸ್ ಬಾಂಧ್ಲ್ಲಿ ಗಜಾಲ್ ಪರ್ತುನ್ ಸಾಂಗ್ಲಿ. ಪುಣ್ ಎಕ್ ಗಜಾಲ್ ಮಾತ್ರ್ ಲಿಲ್ಲಿನ್ ಬಿಲ್ಕುಲ್ ಸಾಂಗ್ಲಿನಾ. ಎಡಿನ್ ಪಾಟಿಂ ಯೇವ್ನ್, ತೊ ಕೊಳ್ಸೊ ಸೊಧುನ್ ಯೆತಾಂ, ಆನಿ ಆಪ್ಣಾಕಡೆಂಚ್ ಕಾಜಾರ್ ಜಾತಾಂ ಮ್ಹಳ್ಳಿ ಗಜಾಲ್ ಬಿಲ್ಕುಲ್ ಸಾಂಗ್ಲಿನಾ. ಪುಣ್ ಕಿತೆಂ ಪುಗಾಸಾಂವ್ ತ್ಯಾ ಉಮ್ಯಾಚೆಂ! ಗಾಲಾಚೆರ್ ಮಾಣ್ಕೊ ಬಸ್ಲ್ಲ್ಯಾಬರಿ ಲಿಲ್ಲಿಕ್ ಕಿತೆಂ ತರಿ ಜಾತಾ.
ನಿದ್ಲ್ಲ್ಯಾಕಡೆಂ ಆನಿ ಜಾಗೆಂ ಆಸ್ಲ್ಲ್ಯಾಕಡೆಂ ತೊ ಆಕಸ್ಮಿತ್ ಉಮೊ ಖೊರ್ಜುತಾ. ಚಲ್ತಾನಾ, ಧಾಂವ್ತಾನಾ ಯಾ ಕಿತೆಂ ತರಿ ಚಿಂವ್ತಾನಾ ಯಾ ಆಪ್ಲೆಸ್ತಕಿಂ ಚಿಂತ್ನೆ ಸರ್ಗಾರ್ ಧಲ್ತಾನಾ ಲಿಲ್ಲಿಕ್ ಗಾಲಾಚೆರ್ ಮಿಚಿ ಮಿಚಿ ಜಾತಾ. ತೊ ಉಗ್ಡಾಸ್ ವಿಸ್ರಾನಾ. ಘಡಿಯೊ ಗೆಲ್ಯಾರ್ಯೀ ವಿಸ್ರಾನಾ ದೀಸ್ ಗೆಲ್ಯಾರ್ಯೀ ವಿಸ್ರಾನಾ ಮ್ಹಯ್ನೆ ಗೆಲ್ಯಾರ್ಯೀ ವಿಸ್ರಾನಾ ವರ್ಸಾಂ ಗೆಲ್ಯಾರ್ಯೀ ವಿಸ್ರಾನಾ ತಾಕಾ ಸೈರಿಕ್ ಯೇವ್ನ್, ಪಾಂಚ್ ಫುಟಿ ಲಾಂಬಾಯೆ ಭಿತರ್ಲೊ ಎಕ್ ಗುಜಿಗುಂಟ ನೊವ್ರೊ ಮೆಳಾಸಾರ್ಯೀ ವಿಸ್ರಾನಾ. ತೆಂ ರೊಸಾಕ್ ಬಸ್ಲಾಂ, ಆನಿ ಬಾಯ್ಲೊ ವ್ಹೊವಿಯೊ ಮ್ಹಣ್ತಾತ್. ತರ್ಯೀ ತಾಕಾ ಎಡಿಚೊ ಉಮೊ ವಿಸ್ರಾನಾ. ತಾಕಾ ಧೊವೆಂ ನ್ಹೆಸೊವ್ನ್ ಆಲ್ತಾರಿಲಾಗಿಂ ವ್ಹರ್ತಾತ್. ಆನಿ ತೆಂ ವಿಚಾರ್ಲ್ಲ್ಯಾ ಸವಾಲಾಂಕ್ ವ್ಹಯ್ ಮ್ಹಣ್ತಾ. ತರಿ ತೊ ಖೊರ್ಜುಳೊ ಉಮೊ ವಿಸ್ರಾನಾ. ತಾಕಾ ಮೆಳ್ಲ್ಲೊ ನೊವ್ರೊ ಬೆಂಕಾಂತ್ ಕಾಮ್ ಕರ್ತಾ. ಭಿಯಾಚೊ ಪುಕ್ಕೆಲಾ ತರ್ಯೀ ಥೊಡೆಶೆಂ ಉಲಯ್ತಾ. ಆಪುಣ್ ಅರ್ಧೊ ಸಂಸಾರ್ ಜಿಕ್ಲಾಂ ಮ್ಹಣ್ ಸಂಸಾರ್ಭರ್ ಗಾಜಯ್ತಾ. ಪಯ್ಲೇಚ್ ರಾತಿಂ ತಾಕಾ ಆಯಿಲ್ಲ್ಯಾ ಯೆದೊಳ್ಚ್ಯಾ ಪಂದ್ರಾ ಸೈರಿಕಾಂಚಿ ಗಜಾಲ್ ತೊ ಸವಿಸ್ತಾರ್ ತಾಕಾ ಸಾಂಗ್ತಾನಾ ಲಿಲ್ಲಿಕ್ ಹೆಮ್ಮೆಶೆಂ ಭೊಗ್ತಾ.
"ಪೂಣ್ ಲಿಲ್ಲೀ, ತುಜೆಂ ತೊಂಡ್ ಪಳೆತಾನಾ ಮ್ಹಜೆಂ ಕಾಳಿಜ್ ಮಿಡ್ಕೆಲೆಂ." ಲಿಲ್ಲಿ ಅಮ್ರುಕೆಂ ಹಾಸ್ತಾ.
"ತುಜ್ಯಾ ದೊಳ್ಯಾಂನಿ ಮ್ಹಾಕಾ ಶಿಮ್ಟಿ ನೆಕೆತ್ರ್ ದಿಸ್ಲೆಂ" ಲಿಲ್ಲಿ ಮುರ್ಗಟ್ತಾ. "ತುಜೆ ಖಾಡ್ಕೆರ್ ಹಾವೆಂ ಆಂಜ್ ಭೊಡ್ವೊ ಬಸ್ಲ್ಲೊ ಪಳೆಲೆಂ." ಲಿಲ್ಲಿ ಸಂತೊಸಾನ್ ಪಿಂರ್ಗಾತಾ.
"ದೆಕುನ್ ಹಾಂವ್ ತುಜಾ ಮೊಗಾರ್ ಪಡ್ಲೊಂ." ಲಿಲ್ಲಿ ತಾಚಾ ಬಾವ್ಲ್ಯಾಂನಿ ರೆವ್ಡಾತಾ. "ಬಾ" ಪುಸ್ಪುಸ್ತಾ ತೆಂ.
"ಕಿತೆಂ ಮ್ಹಜಾ ಸಾಳಿಯೆರಾ?" ವಿಚಾರ್ತಾ ತಾಚೊ ನೊವ್ರೊ.
"ಹಾವೆಂ ಎಕ್ ಚೂಕ್ ಕೆಲ್ಯಾ"
"ಅಯ್ಯೋ, ತುಜೆ ತಸಲ್ಯಾ ನಿಸ್ಕಳ್ ಪಾರ್ವ್ಯಾನ್ ಕಸಲಿ ಚೂಕ್ ಕರ್ಚಿ ಮ್ಹಜ್ಯಾ ಅಂಜುರಾ?"
ತೆದಾಳಾ ಲಿಲ್ಲಿನ್ ತಾಚಾ ಬಾವ್ಳ್ಯಾಂನಿ ಚಿರ್ಮುಟೊನ್ ಸರ್ವ್ ಗಜಾಲ್ ಪರ್ತುನ್ ಸಾಂಗ್ಲಿ. ಎಡಿನ್ ಕೊಳ್ಸೊ ದಿಲ್ಲಿ ಗಜಾಲ್ ಲಿಲ್ಲಿನ್ ಆಪ್ಲ್ಯಾ ನೊವ್ರ್ಯಾಕ್ ಸಾಂಗ್ಲಿ. ಎಡಿಚಾ ಪಾಯಾಕ್ ಘಾಯ್ ಜಾಲ್ಲಿ ಗಜಾಲ್ ಲಿಲ್ಲಿನ್ ಆಪ್ಲ್ಯಾ ನೊವ್ರ್ಯಾಕ್ ಸಾಂಗ್ಲಿ. ಎಡಿಚಾ ಪಾಯಾಕ್ ಬೆಂಡಿಸ್ ಬಾಂಧ್ಲ್ಲಿ ಗಜಾಲ್ ಲಿಲ್ಲಿನ್ ಆಪ್ಲ್ಯಾ ನೊವ್ರ್ಯಾಕ್ ಸಾಂಗ್ಲಿ. ಎಡಿನ್ ಗಾವಾಕ್ ಪಾಟಿಂ ಯೇವ್ನ್ ತಾಕಾ ಸೊಧುನ್ ಕಾಡ್ನ್ ತಾಚೆಲಾಗಿಂ ಕಾಜಾರ್ ಜಾತಾಂ ಮ್ಹಳ್ಳಿ ಗಜಾಲ್ ತಾಚ್ಯಾ ನೊವ್ರ್ಯಾಕ್ ಸಾಂಗ್ಲಿ.
"ಸೊಡ್ಬಾ, ತೊ ತುಜ್ಯಾಲಾಗ್ಗಿಂ ಯೇತ್ ಜಾಲ್ಯಾರ್ ಹಾಂವ್ ತಾಕಾ ಕಾಬಾರ್ ಕಾಡ್ತಾಂ. ತಾಚಿಂ ಹಾಡಾಂ ಪಿಟೊ ಕರ್ನ್ ತುಜೆ ದಾಂತ್ ಘಾಸ್ತಾಂ. ತಾಚೆಂ ಚಾಮ್ಡೆಂ ವೋಡ್ನ್ ತುಕಾ ಎಕ್ ಹೆಂಡ್ ಬ್ಯಾಗ್ ಕರ್ತಾಂ."
ಅಶೆಂ ನಾನಾಂತೆಂ ಕೊಚ್ಚುನ್ ತಾಚ್ಯಾ ನೊವ್ರ್ಯಾನ್ ತಾಚ್ಯಾ ಗಾಲಾಚೆರ್, ಎಡಿನ್ ದಿಲ್ಲ್ಯಾಚ್ ಜಾಗ್ಯಾರ್ ಪಯ್ಲೊ ಉಮೊ ಬಸಯ್ಲೊ. ಲಿಲ್ಲಿಕ್ ತೊ ಉಮೊ ಕೊಣೆ ದಿಲೊ, ಎಡಿನ್ ಯಾ ಆಪ್ಲ್ಯಾ ನೊವ್ರ್ಯಾನ್ ಮ್ಹಳ್ಳೆಂಚ್ ಕಳ್ಳೆಂನಾ.
- 4 -
ಲಿಲ್ಲಿಚೆಂ ಕಾಜಾರ್ ಜಾಲೆಂ, ತಾಕಾ ಸಾತ್ ಜಣಾಂ ಭುರ್ಗಿಂ ಜಾಲಿಂ ಆನಿ ತಿಂ ಸುಶೆಗಾತ್ ಆಸ್ಲಿಂ. ಸಾತ್ವೆಂ ಭುರ್ಗೆಂ ಜಾಯ್ ಪರ್ಯಾಂತ್ ತಾಚ್ಯಾ ನೊವ್ರ್ಯಾನ್ ಆಪ್ಲೆಂ ಭಾಡ್ಯಾಚೆಂ ಬಿಡಾರ್ ಬದಲ್ಲೆಂನಾ. ಲಿಲ್ಲಿಚಾ ನೊವ್ರ್ಯಾಚೆಂ ನಾಂವ್ ಅಪ್ಲು. ಅಪ್ಲು ತೊಂಡ್ಭಡ್ಕೊ ಮನಿಸ್, ಕಾರ್ಯಾಳ್ ನ್ಹಂಯ್. ತಾಕಾ ಬೆಂಕಾಂತ್ ಘರ್ ಬಾಂಧುಂಕ್ ಜಾಯ್ ತಿತ್ಲೆಂ ರೀಣ್ ಶೆಕ್ಡ್ಯಾರ್ ಚಾರಾಂಚೆ ವಾಡಿರ್ ಮೆಳ್ತಾ ಆಸ್ತಾನಾ ತಾಕಾ ಘರ್ ಕರುಂಕ್ ಕಿತೆಂ ಮ್ಹಣ್ ಸಬಾರ್ ಜಣಾಂನಿ ಸುಚಯ್ಲೆಂ. ಪೂಣ್ ತಾಣೆಂ ಕಾನ್ ಹಾಲಯ್ಲೆನಾಂತ್.
"ಪೆಲ್ಯಾಚ್ಯಾ ಘರಾಂತ್ ದೀಸ್ ಕಾಡ್ಚಿ ಹುಶಾರ್ಗಾಯ್" ಮ್ಹಣ್ಚೆಂ ತಾಣೆ.
"ಆಪ್ಲೆಂ ಕೆಲೊ, ಮೆಲೊ ಹೆಣೆಂ ಟೆಕ್ಸಾಂ ತೆಣೆಂ ಶೆಜಾರ್ಚಿಂ ರಾಕ್ಸಾಂ. ಹೆಣೆಂ ಕೊಸಾಳ್ತಾ ತೆಣೆಂ ಪೊಂವ್ತಾ"
ಆಸಲ್ಯಾ ರಾಜಾಂವಾಂನಿ ದೀಸ್ ವೆತಾಲೆ ತರ್ಯೀ ಲಿಲ್ಲಿ ಮಾಸಾಂ ಖಾತಾಲೆಂ. ತಾಣೆಂ ಲ್ಹಾನ್ ಥಾವ್ನ್ ಕಾಜಾರ್ ಜಾತಾ ಪರ್ಯಾಂತ್ ಬಿಡಾರ್ ಚಿಂತ್ಲ್ಲೇಂಯ್ ನಾ. ಹಿತಾಲ್ ಭರ್ ನಾಚ್ಲ್ಲೊ ಜೀವ್ ತಾಚೊ. "
ಹಾಂಗಾ ಸರ್ವ್ ಮೊಲಾಚೆಂ. ರಾಂಧ್ಣಿಕ್ ದವ್ರುಂಕ್ ಪಿಸೊಂದ್ರಿ ನಾ. ಉದಾಕ್ ಉಸ್ಪುಂಕ್ ಕಟ್ಟಿನಾ. ಕಾಂಯ್ ರೊಂಪೊ-ಚೊಂಪೊ ಲಾಂವ್ಯೆತ್ ಮ್ಹಳ್ಯಾರ್ ಧನಿಯಾಂಗೆಲೆ ಬೊಮ್ಲೆಕ್ ತಿಡ್ಕ್ಯೊ ಮಾರ್ತಾತ್." ಅಶೆಂ ತೆಂ ಪುರ್ಪುರಾತ್ತ್ ರಾವ್ತಾನಾ ಶಹರಾ ಭಿತರ್ ಮೊಲಾಂ ವಾಡ್ತಾಲಿಂ. ಹನ್ಮೊಂತಾಚಿ ಶಿಮ್ಟಿ ವಾಡ್ಲ್ಲ್ಯಾಬರಿ. ದೆಕುನ್ ಶಹರಾ ಭಾಯ್ರ್ ಬಾರಾ ಕಿಲೊಮೀಟರಾಂ ಪಯ್ಸ್ ಅಪ್ಲುನ್ ಎಕ್ ಗುಡ್ಯಾ ಸುವಾತ್ ಘೆತ್ಲಿ. ಬೆಂಕಾಚೆಂ ರೀಣ್ ಘೆತ್ಲೆಂ. ಆನಿ ಸಾರ್ಧಾರ್ಣಿಶೆಂ ಎಕ್ ಘರ್, ಬಾಂಯ್ ಆನಿ ಕವಾತೆ ಮ್ಹಣ್ತಾನಾ ಗಳೊಭರ್ ಜಾಲೆಂ.
ಅಪ್ಲುನ್ ಆಯ್ಲೆವಾರ್ ಉಲೊಂವ್ಚೆಂ ಇಲ್ಲೆಂಶೆಂ ಉಣೆ ಕೆಲೆಂ. ತಾಂಚೆ ದೀಸ್ ಕಷ್ಟಾನ್ ತರ್ಯೀ ಸಮಾಧಾನೆನ್ ಪಾಶಾರ್ ಜಾತಾನಾ ತಾಂಚ್ಯಾ ಘರಾ ಬಗ್ಲೆಚೊ ಎಕ್ ಕುಡ್ಕೊ ಕೊಣೆ ತರ್ಯೀ ಘೆತ್ಲೊ, ಮ್ಹಯ್ನ್ಯಾ ಭಿತರ್ ಘರ್ ಉಭಾರ್ಲೆಂ ಆನಿ ಯೇವ್ನ್ ರಾವ್ಲೊಚ್. ಕೊಣ್ ತರಿ ಗಲ್ಲ್ ಮಿಶಿಯಾಂಚೊ ಗೊರೊ ಗೊರೊ ಪಂಡವ್, ಅಂಕ್ವಾರ್ ಆನಿ ಅಮ್ಸರಿ. ಇಷ್ಟಗತ್ ಕರುಂಕ್ ತಾಚೆ ತಸ್ಲೊ ಮನಿಸ್ ನಾ. ಯೇವ್ನ್ ರಾವೊನ್ ಸಾಂಜೆ ಭಿತರ್ ಅಪ್ಲು ತಾಚ್ಯಾ ಘರಾ ಭಿತರ್, ವಿಸ್ಕೆಚಿ ಬೊತ್ಲ್ ಮೆಜಾರ್, ವಿಲಾಯ್ತಿ ಖಾಣಾಂ ಬಶ್ಯೆಂತ್, ಕೇಕ್ ಆನಿ ಚೀಜ್ ಆನಿ ಸುಖ್ಲ್ಲಿಂ ಫಳಾಂ ಆನಿ ಭಾಜ್ಲ್ಲಿಂ ಸುಂಕ್ಟಾಂ.
ಕಾಳೊಕ್ ಪಡ್ತಾನಾ ದೊಗ್ಯೀ ಟಾಯ್ಟ್. ಆಶಿ ಇಷ್ಟಾಗತ್ಯೀ ವಾಡ್ಲಿ. ಆಯಿಲ್ಲೊ ಅಗಂತುಕ್ ಅಪ್ಲುಗೆರ್ ಆಯ್ಲೊನಾ, ಕಿತ್ಯಾಕ್ ಅಪ್ಲು ತಾಕಾ ಆಪಯ್ನಾ. ತೊ ಮಾತ್ರ್ ದೊರ್ಯಾಲಾಗಿಂ ರಾವೊನ್ ಸುರ್ಯೊ ಸುರ್ಯೆತಾನಾ ಅಪ್ಲುಕ್ ಆಪಯ್ತಾ ಆನಿ ಅಪ್ಲು ತಯಾರ್. ಎಕ್ ದೀಸ್ ಬೀರ್ ಜಾಲ್ಯಾರ್ ದುಸ್ರ್ಯಾ ದಿಸಾ ಬ್ರ್ಯಾಂಡಿ. ಕಂಟ್ರಿ ಸೊಸೊ ತೊ ಸೆಜಾರಿ ವೊಳ್ಕಾಚ್ ನಾ.
ಎಕ್ ದೀಸ್ ಆಯ್ತಾರಾಚೆಂ ಘಡಿತ್. ಗಾಂವಾರ್ ಮ್ಹಾಪ್ಳ್ಯಾಂನಿ ಪಳ್ಳೆಕ್ ಎಕ್ ಬೊಕ್ರೊ ಸೊಡ್ಲ್ಲೊ. ತೊ ಆಯಿಲ್ಲೆ ಅಂಗ್ಡಿ ಕೆಳೆಂ ಖೆಲ್ಯಾರ್ ಗೆಲ್ಲೆ ಅಂಗ್ಡಿ ಲಾಡು ಖಾತಾ.
ಕೊಣಾಚ್ಯಾ ಘರಾಂತ್ಯೀ ಅಲ್ಯಾಪಾಲ್ಯಾಕ್ ಉಭೊ ರಾವ್ತಾನಾ ಖಂಯ್ಚೆ ಬೊಕ್ಡೆಕ್ಯೀ ಬೆಸಾಂವ್ ಘಾಲ್ತಾ. ತ್ಯಾ ಆಯ್ತಾರಾ ಸಕಾಳಿಂ ತ್ಯಾ ಅಗಂತುಕಾಚ್ಯಾ ಹಿತ್ಲಾಂತ್ ತೊ ಯೆಂವ್ಚ್ಯಾ ಆದಿಂ ಥಾವ್ನ್ ವಾಡ್ಲ್ಲಿ ಎಕ್ ದಿವಿ ಗುಜ್ಯಾಚಿ ರೊಂಂಪಿ ಬೊಕ್ರ್ಯಾನ್ ಖಾವ್ನ್ ಸಾಫ್. ಸಾಫ್ ಕರ್ನ್ ಜಾತಾನಾ ತಾಚ್ಯಾ ಕಾಮಾಚ್ಯಾ ಚೆಡ್ಯಾನ್ ಪಳೆಲೆಂ. ತೊ ಬೋಬೊ ಮಾರ್ತಾನಾ ತೊ ಗಲ್ಲ್ ಮಿಶಿಯಾಂಗರ್ ಭಾಯ್ರ್ ಆನಿ ಎಕ್ ವ್ಹಡ್ ಜೈತ್ ಇಟೊ ಬೊಕ್ರ್ಯಾಚ್ಯಾ ಪಾಯಾರ್ ಮಾರ್ತಾನಾ ಪಾಯ್ ಜಖಮ್. ಬೊಕ್ರೊ ಉಟಾನಾ.
"ಬಾಬಾ, ಬಾಬಾ, ತೊ ಪಳ್ಳೆಚೊ ಬೊಕ್ರೊ!" ಕಾಮಾಗಾರಾಚಿ ಬೊಬಾಟ್.
"ತುಜೆ ಆವಯ್ಚೊ ಘೋವ್" ತಾಚೆ ಬೋಬೆಕ್ ತ್ಯಾ ಮಿಶಿಯಾಂಗಾರಾಚಿ ಜಾಪ್. ಬೊಕ್ರೊ ಕಸೋಯ್ ಉಟೊನ್ ಹಿತ್ಲಾಂತ್ಲೊ ಚಲ್ಲೊ ತರ್ಯೀ ಎಕಾ ವೊರಾನ್ ಎಕ್ ಶೆಂಬೊರ್ ಜಣಾಂಚೊ ಹಿಂಡ್ ತಾಚೆ ಗೇಟಿಲಾಗಿಂ ಆಯ್ಲೊ.
"ಕೊಣೆ ಬೊಕ್ರ್ಯಾಚೊ ಪಾಯ್ ಮೊಡ್ಲ್ಲೊ?" ಗೇಟಿಂತ್ಲ್ಯಾನ್ ಪಯ್ಲೊ ರಿಗ್ಲ್ಲ್ಯಾಚೊ ಮೊಟೊ ಆವಾಜ್.
"ಗೇಟಿ ಭಾಯ್ರ್," ಮ್ಹಳ್ಳೆ ಗೊರಜೆ ಸಾಂಗಾತಾ ಗೇಟಿ ಭಿತರ್ ಆಯಿಲ್ಲೊ ಗೇಟಿ ಭಾಯ್ರ್ ಆನಿ ಗೇಟಿಲಾಗಿಂ ತೊ ಅಗಂತುಕ್.
"ಹಿ ಗೇಟ್ ಮ್ಹಜಿ, ತುಜ್ಯಾ ಬಾಪಾಯ್ಚಿ ನ್ಹಂಯ್. ತುಜ್ಯಾ ಬೊಕ್ರ್ಯಾನ್ ಖೆಲ್ಲಿ ದೀವಿಚ್ಯಾ ಗುಜ್ಯಾಚಿ ರೊಂಪಿ ಮ್ಹಜಿ, ತುಜ್ಯಾ ಆವಯ್ಚ್ಯಾ ಘೊವಾಚಿ ನ್ಹಂಯ್."
ಇತ್ಲೆಂ ಉಲಯ್ತಾನಾ ಇಲ್ಲಿಶಿ ಉಚಾಂಬಳಾಯ್, ಮಾಗಿರ್ ಗೇಟಿಂತ್ಲ್ಯಾನ್ ಚಾರ್ ಪಾಂಚ್ ಜಣ್ ಭಿತರ್. ಲಾಗಿಂ ಆಯಿಲ್ಲ್ಯಾ ಎಕ್ಲ್ಯಾಚ್ಯಾ ಮುಸ್ಕರಾಕ್ ಪಡ್ಲ್ಲಿ ಎಕ್ಚ್ ಮೂಟ್ ತಾಚೆ ದೋನ್ ದಾಂತ್ ಝಡೊಂವ್ಕ್ ಪಾವ್ಲಿ. ಪಳೆವ್ನ್ಂಚ್ ಉರ್ಲ್ಲೆ ಭಾಯ್ರ್ ಧಾಂವೊಂಕ್ ವದ್ದಾಡ್ಲೆ. ತರಿ ಭಾಯ್ಲೊ ಹಿಂಡ್ ಜಬರ್ದಸ್ತೆನ್ ಲಾಗಿಂ ಯೆತಾನಾ ತೊ ಅಗಂತುಕ್ ಗುಳ್ಯಾಬರಿ ಘರಾ ಭಿತರ್ ಉಸಾಳ್ಳೊ. ಆನಿ ಮಾಗಿರ್ ಖಿಣಾಭಿತರ್ ಭಾಯ್ರ್ ಯೆತಾನಾ ತಾಚ್ಯಾ ಹಾತಾಂತ್ ಬಂದೂಕ್; ತೊಂಡಾರ್ ಆವೇಸ್, ಪಾಯಾಂತ್ ರಾಗಾಚಿ ಕಾಂಪ್. ಹಿಂಡ್ ಪಾಶಾರ್ ಜಾಲೊ. ಅಗಂತುಕಾನ್ ಉಸ್ವಾಸ್ ಸೊಡ್ಲೊ. ಲಾಗಿಂಚ್ ಅಪ್ಲು ಅಂಕುಡ್ತಾಲೊ. ತಾಚೆಂ ವಸ್ತುರ್ ಸುಮಾರ್ಕಡೆಂ ಭಿಜ್ಲ್ಲೆಂ.
"ಚಲ್ ಅಪ್ಲು," ಮ್ಹಣಾಲೊ ಗಲ್ಲ್ ಮಿಶಿಯಾಂಗಾರ್.
"ಬೊಕ್ರ್ಯಾಚ್ಯಾ ಮಾನಾಕ್ ಇಲ್ಲೆಂಶೆಂ ಘಾಲ್ಯಾಂ"
- 5 -
ಜಾಲ್ಲಿ ಗಜಾಲ್ ದೊಳ್ಯಾಂನಿ ಪಳೆಲ್ಯಾ ಉಪ್ರಾಂತ್ ಅಪ್ಲುಕ್ ಶೆಳೊ ಘಾಮ್ ಸುಟ್ಲ್ಲೊ. ಮಿಶಿಯಾಂಗಾರ್ ಕಿತ್ಲೊ ವೊತುನ್ ದಿತಾ, ತಿತ್ಲೋಯ್ ತೊ ಪಿಯೆತಾಲೊ. ಸಂಸಾರಾಚೆಂ ಭಾನ್ ತಾಕಾ ನಾತ್ಲ್ಲೆಂ. ಘರಾಭಿತರ್ ಕೇವಲ್ ತ್ಯಾ ಅಗಂತುಕಾಚೊ ತಾಳೊ ಆನಿ ಗಡ್ಗಡ್ಯಾಬರಿ ಹಾಸೊ ಮಾತ್ರ್ ಆಯ್ಕಾತಾಲೊ. " ಮಿಸ್ಟರ್ ಅಪ್ಲು ದೊಮೆಲ್?" " ಹೂಂ." " ತುಂ ಮೋಗ್ ಕರ್ನ್ ಕಾಜಾರ್ ಜಾಲ್ಲೊಯ್ಗೀ? ಸೈರಿಕ್ ಜಾವ್ನ್?" " ಸೈರಿಕ್ ಜಾವ್ನ್." " ವ್ಹಡ್ ನಾ. ಕಾಜಾರ್ ಜಾಲ್ಯಾ ಉಪ್ರಾಂತ್ ದರಬಸ್ತ್ ಮೋಗ್ ಕೆಲಾಯ್," ಘೊಡೊ ಹಾಸ್ಲ್ಲ್ಯಾ ಬರಿ ತೊ ಹಾಸ್ಲೊ. " ಹಾಂವ್ ತಸೊ ನ್ಹಂಯ್. ಸೊಳಾ ವರ್ಸಾಂಚೆ ಪಿರಾಯೆರ್ ಹಾವೆಂ ಮೋಗ್ ಕೆಲ್ಲೊ. ಕೇವಲ್ ಎಕ್ಚ್ ಘಡಿಯೆ. ಎಕ್ಚ್ ಉಮೊ ದಿಲ್ಲೊ. ಆನಿ ಆಜ್ ಮ್ಹಣಾಸಾರ್ ತಿ ಘಡಿ ವಿಸಾರ್ನಾಸ್ತಾಂ, ತ್ಯಾ ಚೆಡ್ವಾಚೆ ಸೊಧ್ನೆರ್ ಅಂಕ್ವಾರ್ ರಾವ್ಲಾಂ." ಹೊ ಗಲ್ಲ್ ಮಿಶಿಯಾಂಗಾರ್ ಎಡಿ ಫೆರೆರ್ ಮ್ಹಣ್ ಆನಿ ಲಿಪೊವ್ನ್ ದವರ್ಚಿ ಗರ್ಜ್ಚ್ ನಾ. ಆಜ್ ತೊ ತಾಲಾರ್ ಆಸಾ. ಪಳ್ಳೆಚ್ಯಾ ಬೊಕ್ರ್ಯಾಚೊ ವಿಚಾರ್ ಕರುಂಕ್ ಆಯಿಲ್ಲ್ಯಾಂಕ್ ಪಾಡಾವ್ ಕೆಲ್ಲೆಂ ಜೈತ್ ತಾಚ್ಯಾ ಮಿಶಿಯಾಂನಿ ಖೆಳ್ತಾ. ಕಿತೆಂಗಿ ಪಾಟ್ಲೆ ಜಿಣಿಯೆಚಿ ಶಿರ್ಶಿರೆ ಉಗ್ಡಾಸ್ ತಾಚ್ಯಾ ಶಿರಾಂನಿ ಚರೊನ್ ಯೆತಾತ್. ದೆಕುನ್ ತೊ ಹ್ಯಾ ದೇಡ್ ಮುಟ್ಲ್ಯಾಕ್ ಆಪ್ಲಿ ಕಥಾ ಸಾಂಗ್ತಾ. ಕಶೆಂ ಆಪ್ಣೆಂ ಚಂದ್ರ ಭವನಾಚೊ ಕೊಳ್ಸೊ ಚೋರ್ನ್ ಹಾಡ್ಲ್ಲೊ. ಆನಿ ತೊ ಹಾಡ್ಲ್ಲ್ಯಾಕ್ ಬಾಪಾಯ್ನ್ ತಾಚ್ಯಾ ಪಾಯಾಕ್ ಕೊಯ್ತೊ ಮಾರ್ಲ್ಲೊ. ತೊ ಅಮ್ಸರ್ಯಾಂ ಶೆಜಾರ್ಚ್ಯಾ ಘರಾಂತ್ ಕೊಳ್ಸೊ ಘೆವ್ನ್ ರಿಗ್ಲ್ಲೊ. ಥಂಯ್ಸರ್ ತೆಂ ಪಿಕ್ಯಾ ಟೊಮೆಟಾ ತಸಲೆಂ ಚೆಡುಂ ಆಸ್ಲ್ಲೆಂ. ತಾಣೆ ತಾಚ್ಯಾ ಪಾಯಾಂಕ್ ಬೆಂಡಿಸ್ ಬಾಂಧ್ಲ್ಲೆಂ. ಆನಿ ತ್ಯಾ ಚೆಡ್ವಾಕ್ ತಾಣೆ ಕಾಜಾರ್ ಜಾತಾ ಮ್ಹಣ್ ಭಾಸ್ ದಿಲ್ಲಿ. ಆಪ್ಲ್ಯಾ ಉಗ್ಡಾಸಾಕ್ ತೊ ಕೊಳ್ಸೊ ಸಾಂಭಾಳ್ನ್ ದವ್ರುಂಕ್ ಸಾಂಗ್ಲ್ಲೆಂ. ಮಾಗಿರ್ ತಾಚ್ಯಾ ಗಾಲಾಂಚೆರ್ ಎಕ್ ಉಮೊ ದಿಲ್ಲೊ - ಸಗ್ಳಿ ಖಬಾರ್ ತಾಣೆಂ ಭಾರಿಚ್ ಮೀಟ್ ಮಿರ್ಸಾಂಗ್ ಲಾವ್ನ್ ಸಾಂಗ್ಲಿ. " ಹಾಂವ್ ತ್ಯಾ ಚೆಡ್ವಾಕ್ ಸೊಧುನ್ ಖರ್ಶೆಲೊಂ." " ಆತಾಂ ತಾಚೆಂ ಕಾಜಾರ್ ಜಾಲಾಂ ಕೊಣ್ಣಾಂ," ಆಪ್ಲು ಖರ್ಶೆಲೊ. " ಕಾಜಾರ್ ಜಾಲ್ಲ್ಯಾಚೆಂ ಇಜಾರ್ ಕಾಡ್ತಾಂ ಹಾಂವ್. ಕೊಣ್ ತೊ ಹರಾಮಿ ಮ್ಹಳ್ಳೆಂ ಕಳಾಜಾಯ್ ಮ್ಹಾಕಾ. ತಾಚ್ಯಾ ಘರಾಂತ್ ರಿಗೊನ್ ತಾಚಿ ಗೊಮ್ಟಿ ಚಿರ್ಡುನ್, ತಾಚ್ಯೊ ಬಿಯೊ ಮುಡ್ಡುನ್ ಪೆಟ್ಯಾಕ್ ಖಾವಯ್ತಲೊಂ. ಗಟರಾಂತ್ ಉಡಯ್ತಲೊಂ. ಹಾವೆಂ ತಾಕಾ ಕಾಜಾರ್ ಜಾತಾಂ ಮ್ಹಣ್ ಭಾಸ್ ದಿಲ್ಯಾ. ಆನಿ ತಾಣೆ ಮ್ಹಾಕಾ ರಾಕೊನ್ ರಾವ್ತಾಂ ಮ್ಹಣ್ ಭಾಸ್ ದಿಲ್ಯಾ." ಆನಿ ಅತಿ ವ್ಹಡ್ಲ್ಯಾನ್ ತೊ ಹಾಸ್ಲೊ. ಆಯ್ಕೊನ್ ಆಪ್ಲು ಚೆಪ್ಲೊ. ಆಪುಣ್ ಚಲ್ತಾಂ ಮ್ಹಣ್ ಉಟ್ತಾನಾ ಎಡಿನ್ ತಾಚ್ಯಾ ಖಾಂದ್ಯಾರ್ ಹಾತ್ ದವರ್ಲೊ ಆನಿ ಮ್ಹಳೆಂ: " ಫಾಲ್ಯಾಂ ಮ್ಹಜಿ ಬಾಂಯ್ ಗುಂಡಾವ್ಕ್ ಮನ್ಶ್ಯಾಂಕ್ ಆಪಯ್ಲಾಂ. ತೆ ಯೆತಾನಾ ಘಾಂಟ್ ಹಾಲೊವ್ನ್ ಕಾಮಾಕ್ ಯೆತಾತ್. ಮ್ಹಾಕಾ ತುಜೊ ಕೊಳ್ಸೊ ಜಾಯ್. ಬಾಂಯ್ ಸುಖೊಂವ್ಕ್ ಮ್ಹಜೊ ಚೆಂಬು ಪಾವಾನಾ. ಸಕಾಳಿಂ ತಿಕ್ಕೆ ದಿ." ಜಾಯ್ತ್ ಮ್ಹಣ್ ತಕ್ಲಿ ಹಾಲಯ್ಲಿ ಅಪ್ಲುನ್. ಮಾಗಿರ್ " ಕೊಳ್ಸೊ ಕೊಳ್ಸೊ" ಮ್ಹಣ್ ಗುಣ್ಗುಣಾತ್ತ್ ಘರಾ ಗೆಲೊ.
- 6 -
ಕುಲ್ಕುಲೊ ಯೆತಾ, ಆಪ್ಣಾಕ್ ತಾಪ್ ಯೆತಾ, ಆಪುಣ್ ಜೆವಿನಾ ಮ್ಹಣ್ ನಿದ್ಲ್ಲೊ ಅಪ್ಲು ಆಡ್ ಪಡ್ಲ್ಲ್ಯಾ ತಕ್ಷಣ್ ನಿದ್ಲೊ ತರಿ ತಾಚಿ ತಿ ಅಮಾಲಾಚಿ ಝೆಮ್, ಘಡಿಯೆ ಘಡಿಯೆ ತೊ ಜಾಗೆತಾ, ಆನಿ ಜಾಗ್ ಜಾತಚ್ ಉಲಯ್ತಾ, ಕಿತೆಂ ತರಿ ಗಾಗೆತಾ. ವೊರಾಂ ರಾತ್ಚಿಂ ಇಕ್ರಾ ಜಾತಾನಾ ತಾಚೆಂ ಆಂಗ್ ತಾಪಾನ್ ಕಡ್ಕಡ್ತಾ ಆನಿ ಸ್ವಪ್ಣಾಂತ್ ಕಿಂಕ್ರಾಟ್ ಮಾರ್ಲ್ಲ್ಯಾಬರಿ ತೊ ಬೊಬಾಟ್ತಾ,
"ಕೊಳ್ಸೊ ಕೊಳ್ಶೊ ಹೊ ತುಜ್ಯಾ ಬಾಪಾಯ್ಚೊ ಕೊಳ್ಸೊ ನ್ಹಂಯ್. ತಾಚೆರ್ ನಾಂವ್ ಬರಯಿಲ್ಲೆಂ ಪಳೆ. ಹೊ ಅಪ್ಲು ದೊಮೆಲಾಚೊ ಕೊಳ್ಸೊ."
ಅಶಿ ಬೊಬಾಟ್ ಜಾವ್ನ್ ತೊ ಮಾಂದ್ರೆರ್ ಉಟೊನ್ ಘಾಮಾನ್ ಮುದೊ. ಲಿಲ್ಲಿ "ಕಿತೆಂ, ಕಿತೆಂ?" ಮ್ಹಣ್ ತಾಚ್ಯಾ ಕಾನಾಲಾಗಿಂ ಪುಸ್ಪುಸ್ತಾನಾ ತೊ ತಿ ಆಯ್ಕಾನಾ. ತೊ ಭರ್ಮಿದ್ ದೊಳ್ಯಾಂನಿಂಚ್ ಉಟ್ತಾ. ತೊ ಕಾಂಪ್ಚ್ಯಾ ಪಾಯಾಂನಿ ಉಬೊ ಜಾತಾ. ತೊ ಚಾವಿ ದಿಲ್ಲ್ಯಾ ಯಂತ್ರಾ ಭಾಷೆನ್ ಉಟೊನ್ ಲುಂಗಿ ನ್ಹೆಸ್ತಾ ಆನಿ ಖೊಮಿಸ್ ಶಿರ್ಕಾಯ್ತಾ.
" ಖಂಯ್ ವೆತಾಯ್?" ಅಕಾಂತ್ತಾ ಲಿಲ್ಲಿ.
" ಖಂಯ್ ನಾ," ತೊ ಸಡ್ದೆಶೆಂ ಕರಿನಾ. ರಪ್ಪ್ ಕರುನ್ ರಾಂಧ್ಚ್ಯಾ ಕುಡಾಂತ್ ಧಾಂವ್ತಾ ಆನಿ ತೊ ಕೊಳ್ಸೊ ಆರಾವ್ನ್ ಗುಳ್ಯಾಬರಿ ಉಸಾಳ್ತಾನಾ ಪಾಂಯ್ಶಿಂಕಡೆಂ ಲಕ್ತಾ. ಕೊಳ್ಸೊ ನಾಸ್ತಾನಾ ಪಾ
ಟಿಂ ಆಯಿಲ್ಲೊ ಅಪ್ಲು ಬಾಯ್ಲೆಚ್ಯಾ ಸವಲಾಂಕ್ ಬಲಿ ಜಾತಾ. ಪಿಕಿ ಪೊಪಾಯ್ ಕಾವ್ಳ್ಯಾಚೆ ಬೊಂಚಿಕ್ ಬಲಿ ಜಾಲ್ಲ್ಯಾಬರಿ. " ಖಂಯ್ ಗೆಲ್ಲೊಯ್?"
" ಕೊಳ್ಸೊ ಕಿತೆಂ ಕೆಲೊಂಯ್?"
" ಉಲಯ್ನಾಂಯ್ ಕಿತ್ಯಾಕ್?"
" ತುಕಾ ತಾಪ್ ಯೆತಾ!"
" ವ್ಹಯ್," ಕುಡ್ಕುಡ್ತಾ ಅಪ್ಲು
" ಮ್ಹಜ್ಯಾ ಆಂಗಾರ್ ಕಾಂಬೊಳ್ ಘಾಲ್."
ಲಿಲ್ಲಿನ್ ಬಿರ್ಯಾಂತ್ಲಿ ಬರಿ ಕಾಂಬೊಳ್ ಭಾಯ್ರ್ ಹಾಡ್ನ್ ತಾಚ್ಯಾ ಆಂಗಾರ್ ಘಾಲಿ ಆನಿ ಘಾಲ್ತಾಸ್ತಾನಾ ಚಿಚೊಂದ್ರಿ ಕಿಂರ್ಚೆಲ್ಲ್ಯಾಬರಿ ಆಪ್ಲು ಲಿಲ್ಲಿಲಾಗಿಂ ಸಾಂಗ್ತಾ:
" ಖಂಯ್ ಗೆಲ್ಲೊಂ ಮ್ಹಣ್ ವಿಚಾರ್ತಾಯ್? ತುವೆಂ ಮ್ಹಜೆರ್ ಕಂಟಕ್ ಹಾಡ್ಚೆಂ ಹಾಡ್ಲಾಂಯ್ ಆನಿ ಕೊಳ್ಸೊ ವ್ಹರ್ನ್ ಖಂಯ್ ಗೆಲ್ಲೊಂ ಮ್ಹಣ್ ವಿಚಾರ್ತಾಯ್? ತ್ಯಾ ಕೊಳ್ಶ್ಯಾರ್ ಚಂದ್ರ್ ಭವನಾಚೆಂ ನಾಂವ್ ಆಸಾ."
ಲಿಲ್ಲಿಕ್ ಆಯ್ಕೊನ್ ಜಿಮ್ಮ್ ಜಾಲೆಂ.
" ಕಿತೆಂ ಜಾಲೆಂ?"
" ತೊ ಕೊಳ್ಸೊ ಫಾಲ್ಯಾಂ ತಾಕಾ ಜಾಯ್ ಖಂಯ್!"
" ಕಿತೆಂ ಜಾಲೆಂ?" ಲಿಲ್ಲಿಚೆಂ ಅರ್ಗಂಟ್.
" ಕಿತೆಂ ಜಾಲೆಂ ಕಾಹಲೆಂ? ತೊಚ್ ತೊ ಮನಿಸ್ ತೊ ಕೊಳ್ಸೊ ಚೋರ್ನ್ ಹಾಡ್ನ್ ತುಕಾ ದಿಲ್ಲೊ,"
" ಕಿತೆಂ ಜಾಲೆಂ?" ಲಿಲ್ಲಿ ಆನಿಕೀಯ್ ತಾಕಾ ಚಿಡಾಯ್ತಾ.
"ಕೊಳ್ಸೊ ವಿಚಾರ್ಲ್ಯಾರ್ ತಾಕಾ ದೀ. ತಾಂಗೆರ್ ತುಂ ಭರ್ನ್ ಯೇನಾಯೆ?"
" ತೆಂ ಕೊಳ್ಶಾ ವಯ್ಲೆಂ ನಾಂವ್ ಪಳೆತ್ ಜಾಲ್ಯಾರ್?" " ಕಿತೆಂ ಜಾಲೆಂ? ತಾಕಾ ಅಮ್ಚೆಲಾಗಿಂ ವಿಚಾರುಂಕ್ ಧೈರ್ ಆಸಾಗಿ?"
" ಧೈರ್?" ಅಪ್ಲುನ್ ಎಕ್ ಹಳ್ತಾಚೊ ಹುಂಕಾರೊ ದಿಲೊ. " ತಾಣೆಂ ಅತ್ತಾಂ ಸಾಂಜೆರ್ ಮ್ಹಾಪ್ಳ್ಯಾಂಕ್ ಬಂದೂಕ್ ಜೊಕ್ಲ್ಲಿ ಪಳೆಲಿಯ್ವೆ ತುವೆಂ?"
" ಕಿತೆಂ ಜಾಲೆಂ? ಆಮ್ಗೆರ್ ಯೇತ್ ಜಾಲ್ಯಾರ್, ತು ತಾಚೆಂ ಚಾಮ್ಡೆಂ ಸೊಲ್ ಆನಿ ಮ್ಹಾಕಾ ದೋನ್ ವ್ಹಾಣೊ ಕರ್" ಲಿಲ್ಲಿ ಜೊರಾನ್ ಹಾಸ್ಲಿ.
" ತುಕಾ ಚರಾಬ್. ತೊ ಮನಿಸ್ ಹರಾಮಿ. ತೊ ಕೊಳ್ಸೊ ಅಜುನ್ಯೀ ಸೊಧಿತ್ ಆಸಾ ಖಂಯ್. ತೊ ಕೊಳ್ಸೊ ಘೆತ್ಲ್ಲ್ಯಾ ತ್ಯಾ ಚೆಡ್ವಾಚೆಂ ಕಾಜಾರ್ ಪುಣಿ ಜಾಲಾಂ ಜಾಲ್ಯಾರ್ ಕಾಜಾರ್ ಜಾಲ್ಲ್ಯಾಚೆಂ ತೊ ಇಜಾರ್ ಕಾಡ್ತಾ ಖಂಯ್. ತಾಚ್ಯಾ ಘರಾಂತ್ ರಿಗೊನ್, ತಾಚಿ ಗೊಮ್ಟಿ ಚಿರ್ಡುನ್, ತಾಚ್ಯೊ ಬಿಯೊ ಮುಡ್ಡುನ್ ಪೆಟ್ಯಾಕ್ ಖಾವಯ್ತಾ ಖಯ್"
ಇತ್ಲ್ಯಾರ್ ಎಕ್ ಕುಲ್ಕುಲೊ ತಾಚೆರ್ ಚರೊನ್ ಯೇಂವ್ಕ್ ಆನಿ ಲಿಲ್ಲಿ ವೊಮ್ತಿ ಉದಾರಿ ಪಡೊನ್ ಹಾಸೊಂಕ್ ಸಮ ಜಾಲೆಂ.
" ತುಂ ಹೆ ತಮಾಷೆ ಮ್ಹಣ್ ಚಿಂತಿನಾಕಾ, ಲಿಲ್ಲಿ. ತ್ಯಾ ಮನ್ಸಾಚೆಂ ಗರ್ವ್ ಹಾವೆಂ ದೊಳ್ಯಾಂನಿ ಪಳೆವ್ನ್ ಜಾಲಾಂ ದೆಕುನ್ ಕೊಳ್ಸೊ ಹಾವೆಂ ತಾಮ್ಟ್ಯಾಕ್ ದಿಲೊ ಆನಿ ಸಕಾಳಿಂ ಭಿತರ್ ತಾಚೆ ವಯ್ಲೆಂ ನಾಂವ್ ಮಾಜ್ವೊವ್ನ್ ಮ್ಹಜೆಂ ನಾಂವ್ ಬರೊಂವ್ಕ್ ಸಾಂಗ್ಲೆಂ. ಹಾಂವೆ ಸಕಾಳಿಂ ವೆಗ್ಗಿಂ ಉಟ್ಲೊಂನಾ ಜಾಲ್ಯಾರ್ ಮ್ಹಾಕಾ ಕಾಂಯ್ ತಾಂಕಾನಾ - ಜೆರಿಕ್ (ವ್ಹಡ್ಲೊ ಚೆರ್ಕೊ) ಧಾಡ್ನ್ ಕೊಳ್ಸೊ ಹಾಡಯ್, ಆನಿ ತಾಕಾ ದೀ."
ಸಾಂಗ್ಲ್ಲ್ಯಾಬರಿಚ್ ಅಪ್ಲು ಸಕಾಳಿಂ ಉಟ್ಲೊನಾ. ಪುಣ್ ಫಾಂತ್ಯಾಫಾಂತ್ಯಾರ್ ತಾಣೆ ಕೊಳ್ಸೊ ಹಾಡ್ಚೊ ಉಗ್ಡಾಸ್ ಮಾತ್ರ್ ಜೋರ್ ದಾರ್ ಥರಾನ್ ಕೆಲೊ. ಉದ್ಕಾಕ್ ಲೊಟುನ್ ಫಾಲ್ಲ್ಯಾಬರಿ ಜೆರಿ ಮಿಸಾಕ್ ಮ್ಹಣ್ ನ್ಹೆಸ್ತಾನಾ ಲಾಂಬಾಯ್ ರುಂದಾಯ್ ಜಾಲಿ. ವಯ್ರ್ ಪಾವ್ತಾನಾ ತಾಮ್ಟಿಯ್ ಮಿಸಾಕ್ ಗೆಲ್ಲ್ಯಾನ್ ತೋಯ್ ಭಾಯ್ಲ್ಯಾ ಭಾಯ್ರ್ ಮಿಸಾಕ್ ಗೆಲೊ. ಪಾಟಿಂ ಯೆತಾನಾ ಕೊಳ್ಸೊ ಘೆವ್ನ್ ಯೆಂವ್ಚ್ಯಾ ಭಿತರ್ ಎಡಿ ಫೆರೇರಾನ್ ಕೊಳ್ಸೊ ವಿಚಾರ್ನ್ ಜಾಲ್ಲೊ.
ಬಾಂಯ್ ಗುಂಡಾಂವ್ಚೆ ಜಣ್ ಆಯಿಲ್ಲೆ ಜಾಲ್ಲ್ಯಾನ್ ಎಕ್ ಭುರ್ಗ್ಯಾನ್ ಶಿಕೊವ್ನ್ ದಿಲ್ಲ್ಯಾ ಪ್ರಕಾರ್ "ಕೊಳ್ಸೊ ರಿಪೇರಿಕ್ ದಿಲಾ," ಮ್ಹಣ್ತಾನಾ ಎಡಿನ್ ಗಾಳಿಂಚೊ ಶಿಂವರ್ ವೊತ್ಲ್ಲೊ.
ಸುಮಾರ್ ಎಕಾ ವೊರಾನ್ ಜೆರಿಕರ್ನಾಂಚ್ ಕೊಳ್ಸೊ ದಿವಯ್ತಾನಾ, ತಾಚೆ ವಯ್ಲೆಂ ನಾಂವ್ ಅಪ್ಲುನ್ ಸಮಾ ಪಳೆಲ್ಲೆಂ. ಪಯ್ಲೆಂಚೆಂ ಪುಸುನ್ ಆಪ್ಲೆಂ ಬರಯಿಲ್ಲೆಂ ಸಮಾ ಪಳೆವ್ನ್ ಜಾತಚ್ ಕೊಳ್ಸೊ ದಿವಯಿಲ್ಲೊ. ಕೊಳ್ಸೊ ದೀವ್ನ್ ಜೆರಿ ಪಾಟಿಂ ಯೆತಚ್ ಅಪ್ಲುನ್ ತಾಕಾ ಲಾಗಿಂ ಆಪಯ್ಲಾ.
" ಕಿತೆಂ ಮ್ಹಣಾಲೊ?"
" ಕೊಳ್ಸೊ ಗುಂವ್ಡಾವ್ನ್ ಗುಂವ್ಡಾವ್ನ್ ಪಳೆಲೊ..
" ಹಾಬಾ!"
" ಖಂಯ್ ರಿಪೇರಿಕ್ ದಿಲ್ಲೊ ಮ್ಹಣ್ ವಿಚಾರ್ಲಾಗ್ಲೊ."
" ತುವೆಂ ಕಿತೆಂ ಮ್ಹಳೆಂಯ್?"
" ವಯ್ರ್ ಬಾಬಿಯಾಮಾಲಾಗಿಂ ಮ್ಹಳೆಂ"
" ಜಾಲೆಂ ಪಾಟೊಸಾಕ್ ಲಾಯ್ಲೆಂ, " ಉಸ್ವಾಸ್ ಸೊಡ್ಲೊ ಅಪ್ಲುನ್.
ವಯ್ರ್ ಮಾರ್ಗಾರ್ ತ್ಯಾ ದಿಸಾ ಎಕ್ ಘಡಿತ್ ಬೀರಿಕ್ ಉಜೊ ಲಾಗ್ಲ್ಲ್ಯಾಬರಿ ಫಾಯ್ಸ್ ಜಾಲೆಂ, ಕಿತ್ಯಾಕ್ ತೆಂ ಘಡಿತ್ ಘಡ್ತಾನಾ ದೊಗ್ ತೇಗ್ ಮನಿಸ್ ತಾಮ್ಟಿ ಬಾಬಿಯಾಮಾಚ್ಯಾ ಅಂಗ್ಡಿ ಆಸ್ಲ್ಲೆ. ಕಾಮಾಚ್ಯಾ ಚೆಡ್ಯಾಚ್ಯಾ ಹಾತಿಂ ಕೊಳ್ಸೊ ದೀವ್ನ್ ಅಂಗ್ಡಿ ಪಾವ್ತಾನಾ ಬಾಬಿಯಾಮ್ ಗಜಾಲಿ ಕಾಂತ್ತಾ, ಕಿತ್ಯಾಕ್ ಆಯ್ತಾರಾಚೆಂ ತೊ ಕಾಮ್ ಕರಿನಾ. ಎಡಿನ್ ಕೊಳ್ಸೊ ತಾಚೆ ಮುಖಾರ್ ಧಾಡಾಯ್ತಾನಾ ಬಾಬಿಯಾಮ್ ಥಟಕ್ಕ್.
" ಹೆಂ ನಾಂವ್ ಮಾಜ್ಡೊವ್ನ್ ದುಸ್ರೆಂ ಕೊಣೆ ಘಾಲ್ಲೆಂ?"
" ಹಾ...ಹಾ...ಹಾವೆಂ"
" ಕೊಣಾಯ್ಚೊ ಕೊಳ್ಸೊ ಚೋರ್ನ್ ಹಾಡ್ನ್ ತಾಂಚೆಂ ನಾಂವ್ ಘಾಲ್ ಮ್ಹಳ್ಳ್ಯಾರ್ ತುಂ ಘಾಲ್ತಾಯ್ಗಿ?"
" ರಾವ್ ಸಾಯ್ಬಾ, ಅಪ್ಲು ದೊಮೆಲ್ ವೊಳ್ಕಿಚೊ....."
"ಅಪ್ಲು ದೊಮೆಲಾಚೆ ಆವಯ್ಕ್ ಮ್ಹಾಪ್ಳ್ಯಾನ್ ವ್ಹೆಲೆಂ. ಚಂದ್ರ ಭವನ ಮ್ಹಳ್ಯಾರ್ ಮ್ಹಜೆಂ ಹೊಟೆಲ್. ಅಪ್ಲು ದೊಮೆಲಾಚ್ಯಾ ಬಾಪಾಯ್ಚೇಂಯ್ ನ್ಹಂಯ್, ತುಜ್ಯಾ ವ್ಹಡಿಲಾಂಚೇಂಯ್ ನ್ಹಂಯ್. ಹಾಚ್ಯಾ ಉಪ್ರಾಂತ್ ಅಸಲೆ ಮುಟ್ಠಾಳಾಂಚೆ ದಂಧೆ ಕರ್ಚಿ ಜಾಲ್ಯಾರ್ ಜಾಗ್ರುತ್. ಆನಿ ಎಕಾ ವೊರಾ ಭಿತರ್ ಹೆಂ ನಾಂವ್ ಪುಸುನ್, ಚಂದ್ರ ಭವನಾಚೆಂ ನಾಂವ್ ಘಾಲ್ನ್ ದೀನಾ ಜಾಲ್ಯಾರ್ ಕಳಾತ್ ಖಬಾರ್."
ಇತ್ಲೆಂ ಮ್ಹಣೊನ್, ಚೆಡ್ಯಾಕ್ ಥಂಯ್ ಬಸೊವ್ನ್ ತಾಮ್ಟ್ಯಾನ್ ಕಾಮ್ ಧರ್ಲ್ಯಾ ಆನಿ ಉಪರಾಂತ್ಚ್ ತೊ ಪಾಟಿಂ ಗೆಲೊ. ತೆಚ್ ಸಾಂಜೆರ್ ಕೊಳ್ಸೊ ಪಾಟಿಂ ಪಾವ್ಲೊ. ಅಪ್ಲುನ್ ತಾಚೆಂ ವಯ್ಲೆಂ ನಾಂವ್ ಪಳೆಲೆಂ ಆನಿ ಉಂದ್ರಾಬರಿ ಕಿಂಕ್ರಾಟ್ಲೊ. ತಾಚ್ಯಾ ತೊಂಡಾ ಥಾವ್ನ್ ಉಸ್ವಾಸ್ ಸುಟಾನಾ ಜಾಲೊ. ತೆ ರಾತಿಂ ತಾಕಾ ಬಾಯ್ಲೆನ್ ಆನಿ ಭುರ್ಗ್ಯಾಂನಿ ಆಸ್ಪತ್ರೆಕ್ ವ್ಹೆಲೊ.
- 7 -
ಎಡಿ ಫೆರೆರ್ ಆಪ್ಲ್ಯಾ ನವ್ಯಾ ಘರಾ ಯೇವ್ನ್ ಪಂದ್ರಾ ದೀಸ್ ಜಾಂವ್ಕ್ ಜಾಲ್ಲೆ. ಸಬಾರ್ ಸಂಗ್ತಿ ಘಡೊನ್ ಗೆಲ್ಯೊ. ಪುಣ್ ತ್ಯಾ ಘಡಿತಾಂಚಿ ರಾಣಿ, ಲಿಲ್ಲಿ ಮಾತ್ರ್ ತಾಚೆ ಝಳ್ಕೆಕ್ ಪಡ್ಲೆಂನಾ ಮ್ಹಳ್ಳಿಚ್ ತಾಚಿ ಕರಂದಾಯ್. ತಾಚಾ ತಳ್ಮಟ್ಯಾಂತ್ ಜರ್ಲೆ ರಿಗ್ಲ್ಲ್ಯಾಬರಿ ವಿರಾರಾಯ್. ತ್ಯಾ ದಿಸಾ ತೊ ಕೊಳ್ಸೊ ತಾಚಾ ಹಾತಾಂತ್ ದಿತಾನಾ, ಚಿಮ್ಣೆಲಾಚ್ಯಾ ಉಜ್ವಾಡಾಂತ್ ಡೇಲಿಯಾಚ್ಯಾ ಬೊಂಗ್ಯಾಬರಿ ತೆಂ ದಿಸ್ತಾಲೆಂ. ಆನಿ ಆತಾಂ ಕಿತ್ಲಿಂಶಿಂ ವರ್ಸಾಂ ಉಬೊನ್ ಗೆಲಿಂ ತರೀಯ್ ತಶೆಂಚ್ ದಿಸ್ತಾ. ಪುಣ್, ತೆಂ ಆತಾಂ ಕಾಜಾರ್ ಜಾಲಾಂ, ಮೊರೊಂದಿ.
ಕಾಜಾರ್ ಮ್ಹಳ್ಳೆಂ ತೆಂ ಚೆಡ್ವಾಂಚೆ ಮುಟಿಂತ್ ಆಸಾನಾ. ತಾಕಾ ಸಾತ್ ಜಣಾಂ ಭುರ್ಗಿಂ ಜಾಲ್ಯಾಂತ್, ಮೊರೊಂದಿ, ಭುರ್ಗಿಂ ಜಾಂವ್ಚಿಂ ಚೆಡ್ವಾಂಚೆ ಮುಟಿಂತ್ ಆಸಾನಾ. ಪುಣ್ ತೆಂ ಆಪ್ಲ್ಯಾ ಶೆಜಾರಾ ಆಪುಣ್ಂಚ್ ಆಯ್ಲಾಂ ಮ್ಹಳ್ಳೆಂ ಆತಾಂ ಖಂಡಿತ್ ಜಾಣಾ ಜಾವ್ನ್ ತೆಂ ಆಪ್ಲ್ಯಾ ಘೊವಾಕರ್ನಾ ತ್ಯಾ ಕೊಳ್ಶಾವಯ್ಲೆಂ ನಾಂವ್ ಮಾಜ್ದವ್ನ್ ಆಪ್ಣಾಕ್ ಫಟಯ್ತಾ. ಪಿಸಾಂತುರ್ ಲೊಕಾಕ್ ಬಂದೂಕೆನ್ ಭೆಷ್ಟಾಂವ್ಚ್ಯಾ ಹ್ಯಾ ಮಾಜಿ ಮಿಲಿಟರಿ ಸರ್ದಾರಾಕ್ ಎಕಾ ಅಸ್ಕತ್ ಚೆಡ್ವಾನ್ ದಿಂವ್ಚಿ ಮರ್ಯಾದ್ ಪಳೆನಾಂಯ್!.
ತೊ ತೆ ರಾತಿಂ ನಿದಾನಾ. ತೊ ತೆ ರಾತಿಂ ಬಸಾನಾ. ತೊ ತೆ ರಾತಿಂ ಪಿಸಾಂತುರ್ ಜಾತಾ ಆನಿ ಗುಡ್ಯಾ ವಯ್ಲ್ಯಾನ್ ಪಾಸಯೆಕ್ ವೆತಾ. ಥೊಡಿಂ ನಾಪಾಸ್ ಸುಕ್ಣಿಂ ಕಾಳಾಕಾಂತ್ ಕುಕಾಯ್ತಾತ್. ವೊರಾಂ ಬಾರಾಂ ವಯ್ರ್ ಮಧ್ಯಾನೆಕ್ ತೆಂಕ್ತಾತ್. ಹ್ಯಾ ವೆಳಿಂ ತೊ ಘರಾ ಪರ್ತಾತಾನಾ ಅಪ್ಲು ದೊಮೆಲಾಚ್ಯಾ ಬಾಂಯ್ಲಾಗಿಂ ಕೊಣ್ ತರೀಯ್ ಖೊಂಡ್ತಾ. ತೊ ಪಯ್ಸ್ ಗುಡ್ಯಾರ್ ಥಾವ್ನ್ಂಚ್ ಎಕ್ ಉಲೊ ದಿತಾ:
"ಕೊಣ್ಗಾ ಥಂಯ್?" ತಾಚಿ ಗೊರೊಜ್ ಆಯ್ಕೊನ್ ಖೊಂಡ್ತೊಲೊ ಥಯಿಂಚ್ ಮುಯೆತಾ. ದೊರೊ ಉಡೊನ್ ಎಡಿ ತ್ಯಾ ಜಾಗ್ಯಾರ್ ಪಾವ್ತಾನಾ ಕಾಮಾಗಾರ್ ಖೊರ್ಯಾನ್ ಮಾತಿ ಸಮತಟ್ಟ್ ಕರ್ನ್ ತಾಚೆಲಾಗಿಂ ಉಲಯ್ನಾಸ್ತಾಂ ಚಲ್ತಚ್ ರಾವ್ತಾ. ಎಡಿಕ್ ಅತಿ ವ್ಹಡ್ ಮಿಸ್ತೆರ್. ರಾತ್ ಮಧ್ಯಾನ್ ಜಾಲ್ಲ್ಯಾನ್ ತೊ ಚಡಿತ್ ಗೊಂದೊಳ್ ಕರುಂಕ್ ವಚಾನಾ.
ಸಕಾಳಿಂ ಪುಡೆಂ ಆಪ್ಣಾಚ್ಯಾ ಗುಲೊಬಾಚ್ಯಾ ಝಾಡಾಂಕ್ ಇಲ್ಲಿಶಿ ತಾಂಬ್ಡಿ ಮಾತಿ ಜಾಯ್ ಮ್ಹಣ್, ಕಾಮಾಗಾರಾಚ್ಯಾ ಮಾತ್ಯಾರ್ ಭಾಟಿ ದೀವ್ನ್ ಎಡಿ ಅಪ್ಲುಚ್ಯಾ ಹಿತ್ಲಾಂತ್ ರಿಗ್ಲೊ. ಮೆಟಾರ್ ಧಾಕ್ಟೆಂ ಎಕ್ಲೆಂ ಚೆಡುಂ.
" ಡ್ಯಾಡಿ ನಾಯೆ ಪುತಾ?"
" ನಾ"
" ಮಾಮ್ಮಿನಾಯೆ ಪುತಾ?"
" ನಾ"
" ಹಾಂ, ದೊಗಾಂಯ್ ನಾಂತ್"
xತೊ ಉಲೊವ್ಕ್ ರಾವಾನಾ. ಶೀದಾ ಬಾಂಯ್ಲಾಗಿಂ ವಚೊನ್ ನವಿ ಮಾತಿ ಉಸ್ತಯಿಲ್ಲ್ಯಾಕಡೆಂ ಉಸ್ತಯ್ತಾ. ದೋನ್ ಭಾಟಿಯೊ ಮಾತಿ ಜಾತಾನಾ, ಖೊರ್ಯಾಕ್ ಪುರ್ಲ್ಲೊ ಕೊಳ್ಸೊ ಲಾಗ್ತಾ. ಎಡಿಕ್ ವ್ಹಡ್ ಮಿಸ್ತೆರ್. ಕೊಳ್ಸೊ ಮಾತಿಯೆಂತ್ಲೊ ಕಾಡವ್ನ್, ಮಾತಿ ಆಪ್ಲ್ಯಾ ಘರಾ ವ್ಹರ್ ಮ್ಹಣ್ತಾ ತೊ ಆನಿ ಕೊಳ್ಸೊ ಘೆವ್ನ್ ಅಪ್ಲುಗೆರ್ ಪಾವ್ತಾನಾ, ದಾರಾರ್ ಕೊಣ್ ತೆಂ? ತಿಂ ಲಾಂಬಾಯೆಚಿಂ ಮೆಟಾಂ ತೊ ನಿಟಾಯೆನ್ ಚಲ್ತಾನಾ ತಾಚ್ಯಾ ತಳ್ಮಟ್ಯಾಕ್ ಘಡ್ಗಡೊ ಮಾರಿನಾಮೂ? ಚೊವ್ದಾ ವರ್ಸಾಂಚೆಂ ಲಿಲ್ಲಿ ಆಸಾತಶೆಂ ಮೆಟಾರ್ ಉಭೆಂ.
ತ್ಯಾ ದಿಸಾ ತೊ ಕೊಳ್ಸೊ ಚೋರ್ನ್ ತಾಂಗೆರ್ ಪಾವ್ತಾನಾ ಕಶೆಂ ಆಸ್ಲ್ಲೆಂ ತಶೆಂ. ತಾಚ್ಯಾ ಪಾಯಾಂಕ್ ಬೆಂಡಿಸ್ ಬಾಂಧ್ತಾನಾ ಆಸ್ಲ್ಲೆಂ ತಶೆಂ. ಮ್ಹಾಪ್ಳ್ಯಾಚ್ಯಾ ಹರ್ದ್ಯಾಕ್ ಬಂದೂಕ್ ಧರ್ಲ್ಲ್ಯಾಕ್ ಆತಾಂ, ಪಾಯ್ ಉಕ್ಲಾನಾಂತ್. ತೊ ಲಾಗಿಂ ಯೆತಾನಾ, ಅಂಗಾರ್ ಹುಂಬ್ಲ್ಯಾಂಚಿ ರಾಸ್ ಪಡ್ಲ್ಲ್ಯಾಬರಿ. ಮೆಟಾವಯ್ಲೆಂ ಚೆಡುಂ ದಿಗ್ಮೂಢ್! ತ್ಯಾ ದಿಸಾ ತೊ ಚೊರ್ಲ್ಲೊ ಕೊಳ್ಸೊ ದಿತಾನಾ ಆಸ್ಲ್ಲೆಂ, ತಶೆಂಚ್ ಆಸಾ. ತೆಂಚ್ ಗೊರ್ಶೆಂ ತೊಂಡ್, ತೆಂಚ್ ಅಂಬೊರ್ಪಿಕೆಂ ಹರ್ದೆಂ. ತೆಚ್ ಉರುಟ್ ಖಾಂದೆ. ತೆಚ್ ಕಾಂಡಿಯಾಳೆ ಪಾಯ್. ಭೋವ್ ಲಾಗಿಂ ಪಾವ್ತಾನಾ ಎಡಿಕ್ ಕಳ್ತಾ. ಹೆಂ ಚೆಡುಂ ಲಿಲ್ಲಿ ನ್ಹಂಯ್, ಬಗಾರ್ ಲಿಲ್ಲಿಚಿ ಸಾಫ್ ಸಾಫ್ ಅಚ್ಹಿ. ಪಂದ್ರಾ ದೀಸ್ ಜಾಲ್ಯಾತ್ ತರಿ ಅಪ್ಲುಗೆರ್ ಕೊಣ್ ಕೊಣ್ ರಾವ್ತಾತ್ ಮ್ಹಳ್ಳೆಂ ತಾಕಾ ಕಳಿತ್ ನಾ.
" ತುಂ ಕೊಣ್ಬಾ?" ವಿಚಾರ್ತಾ ತೊ, ಪುತಾ ಮ್ಹಣ್ ಆಪೊಂವ್ಚೆಂ ಧೈರ್ ಪಾವಾನಾಸ್ತಾಂ. ತೆಂ ಲಿಲ್ಲಿಚೆಂ ಮ್ಹಾಲ್ಗಡೆಂ ಚೆಡುಂ. ತಿತ್ಲೆಂ ಕಳೊಂಕ್ ವಿಚಾರಿಜಾಯ್ ಮ್ಹಣ್ ಆಸಾ?
" ತುಜೆಂ ನಾಂವ್ಬಾ?"
" ಲಿನಾ."
" ಪಾಪ್ಪಾ ನಾ?"
" ಅಸ್ಪತ್ರೆಂತ್ ಆಸಾ." ಎಡಿಚ್ಯಾ ತೊಂಡಾರ್ ವಿಚು ಚರ್ತಾತ್.
ತೆಂ ಚೆಡುಂ ಆಪ್ಲ್ಯಾ ಬಾಪಾಯ್ಕ್ ರಾತಿಂ ’ಹಾರ್ಟ್ ಎಟೆಕ್’ ಜಾಲ್ಲೆಂ ಕಳಯ್ತಾ. ಆವಯ್ ಆಸ್ಪತ್ರೆಂತ್ ರಾವ್ಲ್ಲಿ ಗಜಾಲ್ ಸಮ್ಜಾಯ್ತಾ.
" ಹೊ ತುಮ್ಚೊ ಕೊಳ್ಸೊ" ತೆ ಚಲಿಯೆಕ್ ತೊ ಮಾತಿಯೆನ್ ಬುಡ್ಲ್ಲೊ ಕೊಳ್ಸೊ ದಿತಾ.
" ಮಾಮ್ಮಿ ಆಯಿಲ್ಲಿಚ್ ಹಾವೆಂ ಆಪಯ್ಲಾಂ ಮ್ಹಣ್ ಪುತಾ, ನಾತ್ಲ್ಯಾರ್ ಮ್ಹಾಕಾ ಸಾಂಗೊನ್ ಧಾಡ್. "
ಇತ್ಲೆಂ ಮ್ಹಣೊನ್ ತೊ ಚಾವಿ ದಿಲ್ಲ್ಯಾಬರಿ ಚಲ್ತಾ. ಸಕಾಳಿಂ ಪುಡೆಂ ತರೀಯ್, ವಿಸ್ಕೆಚೆ ದೋನ್ ವ್ಹಡ್ಲೆ ಘೊಟ್ ಮಾರ್ತಾ ಆನಿ ಆರಾಮ್ ಕದೆಲಾರ್ ಕೊಸಾಳ್ತಾ.
" ಲಿಲ್ಲಿಚೆಂ ಚೆಡುಂ ಜರ್ ಲಿಲ್ಲಿಬರಿ ದಿಸ್ತಾ, ತರ್ ಲಿಲ್ಲಿ ಆತಾಂ ಕಶೆಂ ದಿಸಾನಾಕಾ? ಹಾಡಾಂ ವಯ್ಲ್ಯೊ ಕಾತಿ ಯಾ ಸಾರ್ ಸುಖ್ಲ್ಲಿ ಮಾತಿ?
ಆಪುಣ್ ಮಿಲಿಟರಿಂತ್ ಸಾರೆಂ ವ್ಹಾವಯ್ತಾನಾ ತ್ಯಾ ಚೆಡ್ವಾನ್ ಕೊಣಾಕ್ ಮ್ಹಣ್ ರಾಕಾಜಾಯ್ ಆಸ್ಲ್ಲೆಂ? ಆನಿ ಆತಾಂ ಚಿಲ್ಲರ್ ವದ್ದುವರಾಂಟಾನ್ ಹಾವೆಂ ತ್ಯಾ ಭಿಯಾಚ್ಯಾ ಪುಕ್ಕೆಲಾಕ್ ಜರ್ ಆಸ್ಪತ್ರೆಕ್ ಧಾಡ್ಲೊ ತರ್ ಕೊಣೆ ಕೊಣಾಕ್ ಅನ್ಯಾಯ್ ಕೆಲೊ? ಲಿಲ್ಲಿನ್ ಮ್ಹಾಕಾ ಯಾ ಹಾವೆಂ ಲಿಲ್ಲಿಕ್?"
ಹೆಂ ಸವಾಲ್ ಆಪ್ಲ್ಯೆ ಮತಿಂತ್ ಮೊಳ್ತಾಂ ಮೊಳ್ತಾಂ ತೊ ಗಳ್ತಾ, ಕೊಸಾಳ್ತಾ ಆನಿ ರಡ್ತಾಯ್. ಕಿತ್ಲೊ ವೇಳ್ ಗೆಲಾ ಕೊಣ್ ಜಾಣಾಂ.
" ಬಾಬಾ, ಭಾಯ್ರ್ ಶೆಜಾರ್ಚಿ ಬಾಯ್ಲ್ ಮನಿಸ್ ಆಯ್ಲ್ಯಾ."
" ಆಪಯ್, ಭಿತರ್ ಆಪಯ್," ಖೊಮ್ಸಾಚೆ ಬುತಾಂವ್ ಸಮಾ ಕರ್ತ ತೊ.
ಲಿಲ್ಲಿ ಭಿತರ್ ಯೆತಾ. ನೀದ್ ನಾಸ್ತಾಂ ಕಂಗಾಲ್ ಜಾಲ್ಯಾ. ತಿಚ್ಯಾ ಹಾತಾಂತ್ ಕೊಳ್ಸೊ, ಮಾತಿ ಧುವ್ನ್ ಕಾಡ್ಲ್ಯಾ. ತಿಕಾ ಪಳೆವ್ನ್, ಸಾತ್ ಭುರ್ಗ್ಯಾಂಚ್ಯಾ ಜಲ್ಮಾನ್ ಜಾಲ್ಲ್ಯೊ ತಿಚ್ಯೊ ಕಾತಿ ಪಳೆವ್ನ್ ಎಡಿ ಗಾರ್. ತಾಂಕಾಂ ಉಲೊಂವ್ಕ್ ಜಾಯ್ನಾ. ಲಿಲ್ಲಿಚ್ಯಾ ದೊಳ್ಯಾಂತ್ಲ್ಯಾನ್ ದುಖಾಂಚ್ಯೊ ಝರಿ, ಎಡಿ ಬೆಪ್ಪಾಬರಿ ಚಪ್ಪೊ.
" ಅಪ್ಲುಕ್ ಕಿತೆಂ ಜಾಲೆಂ?" ಪುಸ್ಪುಸ್ತಾ ತೊ. ಲಿಲ್ಲಿ ರಡೊನ್ ರಡೊನ್ ತಾಕಾ ಪೂರಾಯ್ ಸಾಂಗ್ತಾ. ತಶೆಂ ಸಾಂಗ್ತಾನಾ ತಾಣೆ ತ್ಯಾ ಅನಿಷ್ಟ್ ಕೊಳ್ಶ್ಯಾ ಬಾಬ್ತಿನ್ ಕೆಲ್ಲೆ ಲಾಯ್ಲೂಟಿನ್ ಆನಿ ದಿಲ್ಲ್ಯಾ ಧಮ್ಕ್ಯಾಂನಿ ಆಪ್ಲ್ಯಾ ಘೊವಾಕ್ ಕಿತೆಂ ಕೆಲೆಂ ಮ್ಹಳ್ಳೆ ಹಿಶಾರೇಯ್ ದಿತಾ.
" ಹಾವೆಂ ತುಜಿ ಗಾಂಟ್ ಖೆಲಿ ಆಸ್ಯೆತ್, ಪುಣ್ ತಾಣೆ ತುಕಾ ಕಿತೆಂ ಕೆಲಾ?" ಹುಸ್ಕಾರ್ತಾ ತೆಂ.
ಪುಣ್ ಮ್ಹಾಪ್ಳ್ಯಾಕ್ ಬಂದೂಕ್ ಜೊಕ್ಲ್ಲೊ ಮನಿಸ್ ಲೊಣಿಯೆಬರಿ ಕರ್ಗೊಂಚೊ ಪಳೆತಾನಾ ಲಿಲ್ಲೀ ಗಾರ್. ಮಾಗಿರ್ ಫಟಾ ಫಟಾ ಉಲೊಣೆಂ ಎಡಿ ಥಾವ್ನ್ ಭಾಯ್ರ್ ಸರ್ತಾ. ಅಲ್ಮಾರಿಂತ್ಲೆ ಶೆಂಬೊರಾಂಚೆ ಧಾ ನೋಟ್ ಕಾಡ್ನ್ ತೊ ಲಿಲ್ಲಿಕ್ ವೊಡ್ಡಾಯ್ತಾ ಆನಿ ದಯಾದಾಕ್ಷೆಣ್ ನಾಸ್ತಾಂ ತಾಚ್ಯಾ ಗಾಲಾಚೆರ್ ತ್ಯಾ ದಿಸಾದಿಲ್ಲ್ಯಾಕಡೆಂಚ್ ಎಕ್ ಉಮೊ ದಿತಾ.
" ಲಿಲ್ಲೀ, ಚೂಕ್ ಮ್ಹಜೀಜ್ ಜಾಲಿ. ಹೆ ಪೈಶೆ ಅಪ್ಲುಚ್ಯಾ ಆಸ್ಪತ್ರೆಚ್ಯಾ ಖರ್ಚಾಕ್ ದವರ್. ಹಾಂವ್ ಮ್ಹಜ್ಯಾ ವೊಳ್ಕಿಚ್ಯಾ ದಾಕ್ತೆರಾ ಕರ್ನಾ ಚಿಕಿತ್ಸಾ ಮೆಳಾಶಿ ಕರ್ತಾಂ. ಹೊ ಕೊಳ್ಸೊ ಸದಾಂಕಾಳ್ ಮ್ಹಜ್ಯಾ ಉಗ್ಡಾಸಾಕ್ ದವರ್. ಆನಿ ಮ್ಹಾಕಾ ಎಕ್ ಉಪ್ಕಾರ್ ಕರ್. ಉಪ್ಕಾರ್ ನ್ಹಂಯ್ ಮ್ಹಜೆಂ ರೀಣ್ ಪಾವಯ್.
" ತುಜ್ಯಾ ಲಿನಾಕ್ ಮ್ಹಜೆಂ ಪೊಸ್ಕೆಂಕರ್" ದೊಳ್ಯಾಂನಿಂಚ್ ಖರಾರ್ ಜಾತಾ. ತೆ ಸಾಂಜೆರ್ ತಾಣೆ ಲಿನಾಕ್ ಪೆಂಟೆಕ್ ವ್ಹರ್ನ್ ತಾಕಾ ಘೆವ್ನ್ ದಿಲ್ಲಿ ಮುಸ್ತಾಯ್ಕಿ ಮಾತ್ರ್ ತೆಗಾಂ ವೊಕ್ಲಾಂಕ್ ಪುರೊ ಮ್ಹಣ್ ಲಿಲ್ಲಿನ್ ಉಪ್ರಾಂತ್ ಸಬಾರ್ ಪಾವ್ಟಿಂ ಮ್ಹಳಾಂ.
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
