ಕಯ್ದ್ಯಾಚಿ

ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್‍ಯಾಂತ್, ಕೊಂಕಣಿ ಖಾತಿರ್.

ಕವಿತಾಪಾಠ್ - 2

ಲಿಸಾಂವ್ - 2.  ಕಯ್ದ್ಯಾಚಿ ಕವಿತಾ  

  ಕವಿತಾ - ಕಯ್ದ್ಯಾಚಿ ಕವಿತಾ

  ಕವಿ: ಹೆನ್ರಿ ಎಮ್. ಪೆರ್ನಾಲ್ (ಎಚ್ಚೆಮ್)

  ಬೂಕ್: ಕಯ್ದ್ಯಾಚ್ಯೊ ಕವಿತಾ

  ಪ್ರಕಾಶಕ್: ಆಶಾವಾದಿ ಪ್ರಕಾಶನ್

  ಪಾಠ್ ಚಲವ್ಪಿ: ಜೊಮೆಲ್, ಬೊಂದೆಲ್

  ತಾರಿಕ್: 11 ಮಾರ್ಚ್ 2005

ಜಾಗೊ: ಸಾಲ್ಮಿಯಾ, ಕುವೇಯ್ಟ್

ಚಾರ್ ವೊಣದಿಂ ಭಿತರ್ ಹಾಂವ್‌ಗೊ ಆತಾಂ

ಕಯ್ದ್ ಸುಕ್ಣ್ಯಾಪರಿಂ ಜಾಳಿಚ್ಯಾ ಪಿಂಜ್ರ್ಯಾಂತ್

ಸಂಸಾರ್ ದಿಸ್ತಾ ಸೊಭಿತ್ ಭಯ್ಲೊ ಮ್ಹಾಕಾ

ಉಭೊಂಕ್ ಮಾತ್ ಪಾಕಾಟೆ ನಾಂತ್.

ಗುಡೆ ದೊಂಗೊರ್ ನಂಯೊ ದರ್‌ಯೊ

ಭಂವೊನ್ ಖಾವ್ನ್ ಜಿಯೆಲ್ಲೊ ಜೀವ್‌ಗೊ ಮ್ಹಜೊ

ತುಜ್ಯಾ ರಾವ್ಳೆರಾಚೆ ಪಾಗೊರ್ ಇತ್ಲೆಗೊ ಉಭಾರ್

ಚೊವೀಸ್ ವೊರಾಂಯಿ ಮೊಗಾ ಪಾರೊ ಕಾಳ್ಜಾ ದಾರಾರ್

ಭಿತರ್ಲ್ಯಾಂಕ್ ಭಾಯ್ಲೆಂ ಆನಿಂ ಭಾಯ್ಲ್ಯಾಂಕ್ ಭಿತರ್ಲೆಂ

ಅಶೇಂಯಿ ಕಿತ್ಯಾಕ್‌ಗೊ ಪಿಶ್ಯಾರ್ ಘಾಲ್ತಾ?

ಕೆಳ್ಶ್ಯಾಚಾ ಕಾತ್ರಿಕ್ ಖುಶೇನ್ ಪಾಕಾಂ ದಿಲ್ಲೊ ಜೀವ್‌ಯಿ

ಆಜ್ ರಾವ್ಳೆರಾ ಸುಕಾಂತೀ ಕಿತ್ಯಾಕ್ ಫಿಂರ್ಗತಾ?

(ತಸ್ವಿರೆಂತ್ ಆಸ್ಚಿಂ - ದಾವ್ಯಾ ಥಾವ್ನ್ ಉಜ್ವ್ಯಾಕ್)

ಬಸ್‌ಲ್ಲಿಂ: ವೀಣಾ ಮಿನೇಜಸ್, ಪ್ರಿಯಾ ಸಿಕ್ವೇರಾ, ಜಸ್ಭೀರ್ ಸಿಂಘ್ ಧಿಮಾನ್, ಪಾಸ್ಕಲ್ ಪಿಂಟೊ, ಕ್ಯಾರಲ್ ಮಾರ್ಟಿಸ್.

ಉಭಿಂ ಆಸ್ಚಿಂ: ಸಿರಿಲ್ ಪೆರಿಸ್, ಸುನಿಲ್ ಡಿ’ಸೊಜ್, ವಿನ್ಸಿ ನೊರೊನ್ಹಾ, ರಾಬರ್ಟ್ ಕ್ರಾಸ್ತಾ, ಅನಿಲ್ ಮಿನೇಜಸ್, ಲಾರೆನ್ಹ್ ಪಿಂಟೊ, ಜೊನ್ ಕೊರೆಯಾ, ಮೆಲ್ವಿನ್ ವಾಸ್, ಹೆನ್ರಿ ಲುವಿಸ್, ಲತಾ ವಾಸ್, ಆಂಟನಿ ಮಿನೇಜಸ್, ವಲ್ಲಿ ಕ್ವಾಡ್ರಸ್ ಆನಿ ಜೆರಾಲ್ಡ್ ಡಿ’ಸೋಜ್ (ತಸ್ವೇರೆರ್ ನಾ).

ಕವಿಚಿ ವ್ಹಳೊಕ್:

ಹೆನ್ರಿ ಎಮ್. ಪೆರ್ನಾಲ್ (ಎಚ್ಚೆಮ್) ಕೊಂಕ್ಣೆಂತ್ಲ್ಯಾ ವಿಂಚ್ಣಾರ್ ಕವಿಂ ಪಯ್ಕಿ ಎಕ್ಲೊ. ಎಚ್ಚೆಮ್ ಹಾಚಾ ಕವಿತಾಂನಿ ದಿಸ್ಚೊ ಇಮಾಜ್ಯೊಚ್ ಏಕ್ ಸೊಭ್. ಹಾಚಾ ಕವಿತಾಂನಿ, ವಾಚ್ಪ್ಯಾಂಚಾ ಮತಿಂತ್ ವಿಚಾರ್ ಉಟಾಶೆಂ ಕರ್ಚಿ ಶ್ಯಾಥಿ ಆಸಾ. ಪುಣ್ ಹಾಚಿಂ ಚಡ್ತಾವ್ ಕವಿತಾ ಗೂಂಡ್ ಚಿಂತ್ಪಾಚಿಂ ಕವಿತಾ. ಹಾಚಾಧಿಂ ಹಾಚೊ ’ಚಲಿಯಾಂಕ್ ಚತ್ರಾಯ್’ ಕವಿತಾಜಮೊ ಪರ್ಗಟ್ ಜಾಲಾಸ್ತಾಂ, ’ಕಯ್ದ್ಯಾಚ್ಯೊ ಕವಿತಾ’ ಹಾಚೊ ದುಸ್ರೊ ಕವಿತಾಜಮೊ ಜಾವ್ನಾಸಾ. ಏಕ್ ಕವಿ ಮಾತ್ರ್ ನ್ಹಯ್ ಆಸ್ತಾಂ, ಏಕ್ ವಿಮರ್ಶಕ್, ವಿಚಾರ್‌ವಂತ್ ಬರವ್ಪಿ, ಕಾಣ್ಯೆಗಾರ್ ಆನಿಂ ಅಂಕಣ್‌ಕಾರ್‌ಯ್ ಜಾವ್ನಾಸಾ.

ಎಚ್ಚೆಮಾಕ್ ಸಭಾರ್ ಕವಿತಾಸ್ಪರ್ಧ್ಯಾಂನಿ ಇನಾಮಾಂ ಲಾಭ್ಲ್ಯಾಂತ್.

ಆಧ್ಲ್ಯಾ ಕವಿತಾಪಾಠಾಚೊ ವಿವರ್

ಕವಿತಾಪಾಠ್ - 1 . ವಾಟ್ (ಮೆಲ್ವಿನ್ ರೊಡ್ರಿಗಸ್)

1. ಮೆಲ್ವಿನ್ ಜೆ. ವಾಸ್ - ಕೆಲರಾಯ್ 

ಕಯ್ದ್ಯಾಚಿ ಕವಿತಾ’ ಕವಿತೆಂತ್ಲ್ಯಾ ಕವಿನ್ ಹಾಂಗಾಸರ್ ಕವಿತೆಕ್ ವ್ಹಾಳಾಯ್ತಾನಾ ಹ್ಯಾ ಸಂಸಾರಾಂತ್ ಕಯ್ದ್ ಜಾಲ್ಲ್ಯಾ ಮನ್ಶಾಚಿಂ ದೋನ್ ಮುಖಾಂಕ್ ವರ್ಣಿಲಾಂ. ಕವಿತಾ ವಾಚ್ತಾನಾ ಖಂಡಿತ್ ತಿ ಕವಿತಾ ರುಜು ಕರ್ತಾಕೀ ಕವಿಕ್ ಹೊ ಸಂಸಾರ್ ಏಕ್ ಕಯ್ದಿಖಾನೊ ಮ್ಹಳ್ಳೆಪರಿಂ ಭೊಗ್ತಾ ತೆಂ. ಹ್ಯಾ ಕವಿತೆಂತ್ಲ್ಯಾ ಕವಿತಾನಾಯಕಾಚಾ ಕಯ್ದಿಪಣಾಚಿಂ ದೋನ್ ರುಪಾಂ ಮ್ಹಣ್ಜೆ ಭಿತ್ರ್ಲೆಂ ಆನಿಂ ಭಾಯ್ಲೆಂ ಕವಿಚಾ ಉತ್ರಾನಿಂಚ್ ಪಳೆಂವ್ಚೆಂ ತರ್;

"ಚಾರ್ ವೊಣದಿ ಭಿತರ್ ಹಾಂವ್‌ಗೊ ಕಯ್ದಿ ಕಯ್ದ್ ಸುಕ್ಣ್ಯಾಪರಿಂ ಜಾಳಿಚಾ ಪಿಂಜ್ರ್ಯಾಂತ್.." 

"ತುಜಾ ರಾವ್ಳೆರಾಚೊ ಪಾಗೊರ್ ಇತ್ಲೊಗೊ ಉಭಾರ್ ಚೊವೀಸ್ ವೊರಾಂಯ್ ಮೊಗಾ ಪಾರೊ ಕಾಳ್ಜಾ ದಾರಾರ್" ದುಸ್ರೆಂ ಭಾಯ್ಲೆಂ ರೂಪ್..! 

"ಸಂಸಾರ್ ದಿಸ್ತಾ ಸೊಭಿತ್ ಭಾಯ್ಲೊ ಮ್ಹಾಕಾ ಉಭೊಂಕ್ ಮಾತ್ ಪಾಕಾಟೆ ನಾಂತ್.." 

"ಗುಡೆ ದೊಂಗೊರ್ ನಂಯೊ ದರ್‌ಯೊ ಭಂವೊನ್ ಖಾವ್ನ್ ಜಿಯೆಲ್ಲೊ ಜೀವ್‌ಗೊ ಮ್ಹಜೊ..." 

ಭಾಯ್ಲ್ಯಾ ರುಪಾಂತ್ ಆಜ್ ಸೊಭಿತ್ ದಿಸ್ಚೊ ಸಂಸಾರ್ ಕವಿತಾ ನಾಯಕಾನ್ ಗುಡೆ ದೊಂಗೊರ್ ನಂಯೊ ದರ್‌ಯೊ ಭಂವೊನ್ ಉತ್ರೊನ್, ಮ್ಹಳ್ಯಾರ್ ಭುಕೆಕ್ ಗುಡೆ ದೊಂಗೊರ್ ಮಸ್ತುನ್ ತಾನೆಕ್ ನಂಯೊ ದರ್‌ಯೊ ಉತ್ರಾಲಾ ತೊ. ಭೋವ್ ಕಷ್ಟಿ ಜಿವಿತ್. ಹ್ಯಾ ಕಷ್ಟಿ ಜಿವಿತಾಂತ್‌ಯೀ ರಂಗೀನ್ ಸಂಸಾರ್, ಮ್ಹಳ್ಯಾರ್ ಜಿವಿತ್ ಸುಲಭಾಯೆನ್ ಗ್ರೇಸ್ತ್‌ಕಾಯೆಂತ್ ಸಾರ್ಚಾ ಸಂಸಾರಾಕ್ ಆಶೆವ್ನ್..

"ಕೆಳ್ಶ್ಯಾಚ್ಯಾ ಕಾತ್ರಿಕ್ ಖುಶೇನ್ ಪಾಕಾಂ ದಿಲ್ಲೊ ಜೀವ್‌ಯ್"

ಹಾಂಗಾಸರ್ ಕೆಳ್ಶಿ ಮ್ಹಳ್ಯಾರ್ ವಾಂಕ್ಡಿ ವಾಟ್. ಹ್ಯಾ ವಾಂಕ್ಡ್ಯಾ ವಾಟೆಕ್ ಆಪ್ಲ್ಯಾ ಬರ್‍ಯಾಪಣಾಚಿಂ, ಸ್ವತಂತ್ರಾಚಿಂ, ಸತಾಚಿಂ, ಮೊಗಾಚಿಂ, ಸರ್ವ್ ಪಾಕಾಂ ಅರ್ಪುನ್ ದಿಲ್ಲಿಂ ತಾಣೆಂ, ಆತಾಂ..

"ಭಿತರ್ಲ್ಯಾಂಕ್ ಭಾಯ್ಲೆಂ ಆನಿಂ ಭಾಯ್ಲ್ಯಾಂಕ್ ಭಿತರ್ಲೆಂ ಅಶೇಂಯ್ ಕಿತ್ಯಾಕ್‌ಗೊ ಪಿಶ್ಯಾರ್ ಘಾಲ್ತಾ?"

ಕಷ್ಟಾಂಚಾ ಜಿವಿತಾ ಥಾವ್ನ್ ಸುಖಾಚಾ ಜಿವಿತಾಚಾ ಭಿತರ್ಲ್ಯಾ ಕುಡಾಂತ್ ಆಜ್ ತೊ ಪಿಂಜ್ರ್ಯಾಂತ್ ಕಯ್ದ್ ಜಾಲಾ, ಮ್ಹಣ್ಜೆ ಭಾಯ್ಲ್ಯಾ ರುಪಾಂತ್ಲೆಂ ತಾಚೆಂ ಸಗ್ಳೆಂ ಅಸ್ತಿತ್ವ್ ಕಾತ್ರಿಕ್ ಬಲಿ ಜಾವ್ನ್ ಕೆಳ್ಶ್ಯಾಚೊ ಮೊಗ್ ಆನಿಂ ತಾಂಚೊ ಪಾಗೊರ್ ಇತ್ಲೊ ಉಭಾರ್ ಜಾಲಾಕೀ ಉಭೊನ್ ಧಾಂವೊಂಕ್‌ಯ್ ಸಾಧ್ಯ್ ನಾ. ಕವಿತಾ ನಾಯಕಾಕ್ ಆತಾಂ ತೊ ಕಷ್ಟಿ ಭಾಯ್ಲೊ ಸಂಸಾರ್ ಭರೊ ದಿಸ್ತಾ ಆನಿಂ’

"ಆಜ್ ರಾವ್ಳೆರಾ ಸುಖಾಂತ್‌ಯ್ ಕಿತ್ಯಾಕ್ ಫಿಂರ್ಗತಾ?"

ರಾವ್ಳೆರಾ ಸುಖಾಚಾ ಸಂಸಾರಾ ಥಾವ್ನ್ ಆಧ್ಲ್ಯಾ ಕಷ್ಟಿ ಸಂಸಾರಾಕ್ ಆಶೆಂವ್ಚೆಂ ಕವಿತಾ ನಾಯಕಾಚಾ ಪಲಾಯನ್ ಕೆಳ್ಶ್ಯಾಚೊ ಪಾಗೊರ್ ಆಡ್ ಯೆತಾನಾ ಅಶೆಂಚ್ ಕಯ್ದ್ ಜಾಲ್ಲ್ಯಾ ಸರ್‍ವಾಂಲಾಗಿಂ ತೊ ಸವಾಲ್ ಕರ್ತಾ. ಕಷ್ಟಾಂ ಥಾವ್ನ್ ಪೊಳಾಪೊಳ್ ಘೆಂವ್ಚಾಕ್ ಕವಿತಾ ನಾಯಕಾಚೆಂ ಕ್ರಾಂತಿಕಾರಿ ಸವಾಲ್ ಹೆಂ.

"ನಿಶ್ಚಿಂತ್ ಉಭ್ತಾನಾ ಬಂದೆಂತ್ ಆಸ್ಚಿ ಆಶಾ 

ಪಿಂಜ್ರ್ಯಾಂತ್ ಪಡ್ಲ್ಯಾ ಉಪ್ರಾಂತ್ ಉಭೊನ್ ವೆಚಿ ಖಂತ್ 

ಕಾಳ್ಜಾಕ್ಕ್ ಅಶಿ ಕಿತ್ಯಾಕ್ ಧೊಸ್ತಾ?"

2. ಮೊಗಾಚಾ ಪಿಂಜ್ರ್ಯಾಂತ್ ಕಯ್ದಿ ಜಾಲ್ಲೊ - [ವಲ್ಲಿ ಕ್ವಾಡ್ರಸ್, ಅಜೆಕಾರ್]

ಕಯ್ದ್ಯಾಚಿ ಕವಿತಾ ಹಾಂತ್ಲೊ ಕವಿ ಅಪ್ಣಾನ್ ಚಿಂಚ್‌ಲ್ಲ್ಯಾ ಯಾ ಶಿರ್ಕಾಲ್ಲ್ಯಾ ಪಿಂಜ್ರ್ಯಾಂತ್ ಬೊಸೊನ್ ಚುರ್ಚುರ್‍ಯಾಂಚಾ ಉಮಾಳ್ಯಾಚೆಂ ಗೀತ್ ಗಾತಾ. ಕವಿತೆಂತ್ಲೊ ಕವಿ ದೆವಾಕ್ ಸೊಡ್ಲೆಲ್ಯಾ ಪಾಡ್ಯಾಪರಿಂ ಸ್ವತಂತ್ರ್ ಜಿಯೆಲ್ಲೊ ಲಾವಾರಿಸ್ - ಬರೊ ಯಾ ವಾಯ್ಟ್ ಮ್ಹಣ್ಚೆಂ ತರ್ ಕವೆತೆಂತ್ ಮ್ಹಜಾ ದೊಳ್ಯಾಂಕ್ ಹೊ ಪಾಡ್‌ಚ್ ದಿಸ್ತಾ. ತ್ಯಾ ಪಾಡಾರಿ ಮನ್ಶಾಕ್ ಸ್ವಾತಂತ್ರ್ ಮ್ಹಳ್ಳ್ಯಾ ನಾಂವಾರ್ ಕಿತೆಂಯ್ ಕರ್ಚಿ, ಮೆಳ್‌ಲ್ಲೆಂ ಖಾಂವ್ಚಿ ಭುಕ್, ಪಿಯೆಂವ್ಚಿ ತಾನ್, ಭಂವ್ಚಿ ಆಶಾ ಆನಿಂ ಕಳಾನಾಸ್ತಾಂನಾ ಯಾ ಕಳೊನ್‌ಯೀ ಜಾವ್ಯೆತಾ - ಖುಶೇನ್ ಬಂಧಿ ಜಾತಾ ಮೊಗಾನ್.

ಪುಣ್ ಕವಿ ಖಂಯ್ಸರ್‌ಯೀ ಅಪ್ಣಾಕ್ ಬಂದಿ ಕೆಲಾ ಮ್ಹಣಾನಾ ಮ್ಹಣ್ತಾನಾ ತಾಣೆಂ ಬಂಧಿ ಜಾಲ್ಲೆಂ ಖುಶೇನ್ಂಚ್ ಮ್ಹಣ್ಯೆತಾ. ಆನಿಂ ಕೊಂಕ್ಣೆಂತ್ ಏಕ್ ಸಾಂಗ್ಣಿ ಆಸಾ ’ಮಾಂಕ್ಡಾಕಡೆ ಮಾಣಿಕ್ ದಿಲ್ಲೆಂ ಆನಿಂ ಮಾಂಕ್ಡಾನ್ ತೆಂ ಕುಲ್ಯಾಪಂದಾ ದವರ್ಲೆಂ’ ಮ್ಹಣ್. ತಸಲೆಂಚ್ ಚಿಂತಾಪ್ ಎಚ್ಚೆಮ್ ಹಾಂಗಾಸರ್ ಉಟಯ್ತಾ. ಕವಿತೆಂತ್ಲೊ ಕವಿ ಮೊಗಾಚಾ ರಾವ್ಳೆರಾಕ್ ರಾವ್ಳೆರ್ ಮ್ಹಣ್ತಾ, ಹ್ಯಾ ರಾವ್ಳೆರಾಂತ್ಲಿ ಜಿಣಿ ಸುಕಾಳ್ ಮ್ಹಣ್ತಾ ತರ್‌ಯೀ ಮೊಗಾಚೊ ಪಾಗೊರ್ ಊಂಚ್, ಆನಿಂ ಅಪುಣ್ ಕಯ್ದಿ ಆನಿಂ ಅಪ್ಣಾಕ್ ಭಾಯ್ಲೊ ಸಂಸಾರ್ ಸೊಭಿತ್ ದಿಸ್ತಾ ಪುಣ್ ಉಭೊಂಕ್ ಪಾಕಾಟೆ ನಾಂತ್ ಮ್ಹಳ್ಳೆಂ ರುದಾನ್ ಕರುನ್ ವಾಚ್ಪ್ಯಾಂಕ್‌ಯೀ ಗುಸ್ಪೊಡಾಯೆಚಾ ಲೊಟಾಂತ್ ಬುಡಯ್ತಾ.

ಕವಿತಾಂತ್ ಮೊಗಾಚೊ ಇಮಾಜ್ಯೊ ದಿಸ್ತಾತ್, ಪುಣ್ ನಿರಾಶಿ ಮೋಗ್, ಕವಿತೆಂತ್ಲ್ಯಾ ಕವಿಚಿ ತಾನ್/ಭುಕ್ ಅಥ್ವಿಚ್ ಆಸಾ ಜಿ ಹ್ಯಾ ಮೊಗಾಚಾ ರಾವ್ಳೆರಾಂತ್ ಕಯ್ದಿ ಜಾಲ್ಲೆಂ ಪಿಂತುರ್ ಹಾಡಯ್ತಾ.ಹ್ಯಾ ಕವಿತೆಂನಿ ಉಭ್ಯೊ ಕೆಲ್ಲ್ಯೊ ಇಮಾಜೊ ಪಳೆಯಾಂ;

ಪಯ್ಲ್ಯಾ ಪ್ಯಾರಾಂತ್ ಆಸ್ಚೊ ಇಮಾಜ್ಯೊ ಪಳೆಯಾಂ;

’ಸುಕ್ಣೆಂ, ಜಾಳಿಚ್ಯಾ ಪಿಂಜ್ರ್ಯಾಂತ್, ಭಾಯ್ಲೊ ಸಂಸಾರ್, ಪಾಕಾಟೆ’ ಮ್ಹಜಾ ಮತಿಕ್ ಹೆ ಅರ್ಥ್ ದಿತಾತ್;

’ಸುಕ್ಣೆಂ’ ಮ್ಹಳ್ಯಾರ್ ಸ್ವತಂತ್ರ್‌ಪಣಿ ಜಿಯೆಂವ್ಚಿ ಕವಿಚಿ ಆಶಾ ಯಾ ವೊಡ್ಣಿ. ’ಜಾಳಿಚ್ಯಾ ಪಿಂಜ್ರ್ಯಾಂತ್’ ಮ್ಹಳ್ಯಾರ್ ಭಾಂಧ್ ಯಾ ಸಂಬಂಧ್ ಜೊ ಕವಿತೆಂತ್ಲೊ ಕವಿ ಅಪ್ಲ್ಯಾ ಪ್ರೇಮಿಕಾಲಾಗಿಂ ದವರ್ನ್ ಘೆತ್‌ಲ್ಲೊ.

’ಭಾಯ್ಲೊ ಸಂಸಾರ್’ ಮ್ಹಳ್ಯಾರ್ ಯಾದಿಚಿಂ ಲ್ಹಾರಾಂ. ’ಪಾಕಾಟೆ’ ಮ್ಹಳ್ಯಾರ್ ವಾಟ್, ತ್ರಾಣ್, ಧಯ್ರ್ ಯಾ ಸಕತ್.

ದುಸ್ರ್ಯಾ ಪಂಗ್ತೆರ್ ಆಸ್ಚೊ ಇಮಾಜ್ಯೊ ಪಳೆಯಾಂ;

’ಗುಡೆ ದೊಂಗೊರ್, ನಂಯೊ ದರ್‌ಯೊ, ರಾವ್ಳೆರಾಚೊ ಪಾಗೊರ್, ಉಭಾರ್, ಮೊಗಾ ಪಾರೊ ಕಾಳ್ಜಾ ದಾರಾರ್’ ಗುಡೆ ದೊಂಗೊರ್ ಮ್ಹಳ್ಯಾರ್ ಶರ್ಥಾಂ, ಕಸ್ಟ್ ಅನ್ವಾರಾಂ.

ಕವಿತೆಂತ್ಲೊ ಕವಿ ಧಯ್ರಾಧಿಕ್ ಜಾವ್ನಾಸ್‌ಲ್ಲೊ ಮ್ಹಣ್ತಾ ’ನಂಯೊ ದರ್‌ಯೊ’ ಮ್ಹಳ್ಯಾರ್ ಬರೆಂ-ವಾಯ್ಟ್. ನಂಯ್ ಮ್ಹಳ್ಯಾರ್ ಗಾಂವ್ಚಿ (ಬರೆಂ), ದರ್‌ಯೊ ಮ್ಹಳ್ಯಾರ್ ಭಾಯ್ಲೆಂ (ಮಿಠಾಉದ್ಕಾಚೊ) ಮ್ಹಳ್ಯಾರ್ (ವಾಯ್ಟ್) - ಹ್ಯಾ ಇಮಾಜೆಕ್ ಅನ್ಯೆಕಾ ರುಪಾನ್ ದೆಖ್ಚೆಂ ತರ್ - ಸಂಸಾರಾಕ್ ಬರೆಂ-ವಾಯ್ಟ್ ದಿಸ್ಚೆಂ ರುಸ್ಚೆಂ-ರುಚಾನಾಸ್ಚೆಂ ದೊನೀಂ ಕವಿತೆಂತ್ಲ್ಯಾ ಕವಿನ್ ಚಾಕ್ಲಾಂ ಮ್ಹಳ್ಳೆಂ. ’ರಾವ್ಳೆರಾಚೊ ಪಾಗೊರ್’ ಮ್ಹಳ್ಯಾರ್ ಕವಿತೆಂತ್ಲೊ ಕವಿ ಆನಿಂ ತಾಚಿ ಪ್ರೇಮಿಕಾ ಮಧೆಂ ಆಸ್ಚಾ ಸಂಭಂಧಾಚೆ ಭಾಂದ್ಪಾಸ್. ’ಉಭಾರ್’ ಮ್ಹಳ್ಯಾರ್ ಭ್ಹಾಂದ್ಪಾಸ್ ಯಾ ಅಪ್ಲೆ ತಾಂಕಿಭಾಯ್ಲೆಂ ಯಾ ಕಸ್ಟಾಂಚೆಂ ಮ್ಹಳ್ಳೊ ಅರ್ಥ್. ’ಮೊಗಾ ಪಾರೊ ಕಾಳ್ಜಾ ದಾರಾರ್’ ಮ್ಹಳ್ಯಾರ್ ಅಭಿವ್ಯಕ್ತ್ ಕರುಂಕ್ ಸಾಧ್ಯ್ ಜಾಯ್ನಾ ತಸಲೊ, ಪುಣ್ ಭ್ಹಾಂದ್ಪಾಸಾಚೊ ಸಂಕೇತ್.

ತಿಸ್ರ್ಯಾ ಪಂಗ್ತೆರ್ ಆಸ್ಚೊ ಇಮಾಜ್ಯೊ ಪಳೆಯಾಂ; 

’ಭಿತರ್ಲೆ, ಭಾಯ್ಲೆ, ಕೆಲ್ಶಿ, ಕೆಲ್ಶ್ಯಾಚಿ ಕಾತರ್, ಪಾಕಾಂ, ಪಿಂರ್ಗೊಣಿ’ ಇಮಾಜ್ಯೊ ಪಳೆಯಾಂ; ’ಭಿತರ್ಲೆ’ - ಮ್ಹಳ್ಯಾರ್ ಕವಿತೆಂತ್ಲ್ಯಾ ಕವಿಪರಿಂ ಪ್ರೇಮಿಕಾಲಾಗಿಂ ಸಂಬಂಧ್ ದವರ್ಲೆಲೆ. ’ಭಾಯ್ಲೆ’ ಮ್ಹಳ್ಯಾರ್ ಅನೈತಿಕ್‌ಯೀ ಆಸ್ಯೆತಾ ಯಾ ಕಸಲೆಚ್ ಸಂಭಂಧ್ ದವ್ರಿನಾತ್‌ಲ್ಲೆಯೀ ಆಸ್ಯೆತ್. ’ಕೆಲ್ಶಿ’ ಮ್ಹಳ್ಯಾರ್ ಮ್ಹಾಕಾ ಏಕ್ ಭೋವ್ ವ್ಹಡ್ ಇಮಾಜ್ ಉಭಿ ದಿಸ್ತಾ.

ಹಾಂಗಾ ಕೆಲ್ಸಿ ಕಾತರ್ಚೊ - ಮ್ಹಳ್ಯಾರ್ ದಂಧೊ ಕರ್ಚೊ. ’ಕೆಲ್ಶ್ಯಾಚಿ ಕಾತರ್’ ಮ್ಹಳ್ಯಾರ್ ವಯ್ಲ್ಯಾ ಕೆಲ್ಸಿನ್ ಕವಿತೆಂತ್ಲ್ಯಾ ಕವಿಕ್ ಕಾತ್ರುಂಕ್ ಯಾ ಲುಟುಂಕ್ ವಾಪರ್ಚಿ ಸಾಹೆತ್ ’ಪಾಕಾಂ’ ಮ್ಹಳ್ಯಾರ್ ನೈತಿಕ್ ಮೊಲಾಂ, ಸ್ವಾಭಿಮಾನ್ ಯಾ ಗೌರವ್ ಜಾವ್ಯೆತಾ. ’ಪಿಂರ್ಗೊಣಿ’ ಮ್ಹಳ್ಯಾರ್ ವಿರಾರಾಯ್, ಖಂತ್, ಅಪ್ಣಾನ್ ಹೊಗ್ಡಾಯಿಲ್ಲ್ಯಾ ಸುಖಾಚೊ ಉಡಾಸ್.

ಅಖ್ರೇಚಾ ಪಂಗ್ತೆಂನಿ ಇಮಾಜ್ಯೊ ಪಳೆಯಾ; 

’ಬಂದಿಖಾನ್, ಪಿಂಜ್ರೊ, ಉಭೊನ್ ವೆಚಿ’ ಹ್ಯಾ ತಿನೀಂ ಇಮಾಜ್ಯಾಂನಿ ಮ್ಹಾಕಾ ಅಶೆಂ ಸುಸ್ತಾತಾ; ’ಬಂದಿಖಾನೊ’ - ಕವಿತೆಂತ್ಲ್ಯಾ ಕವಿಕ್ ಅಪ್ಲ್ಯಾ ಪ್ರೇಮಿಕಾಲಾಗಿಂ ಆಸ್ಚೊ ಸಂಬಂಧ್. ’ಪಿಂಜ್ರೊ’ - ಮ್ಹಳ್ಯಾರ್ ಜ್ಯಾ ಸಕ್ತೆಕ್ ಕವಿತೆಂತ್ಲೊ ಕವಿ ಕಯ್ದ್ ಜಾಲಾ ಮ್ಹಣ್ತಾ ತೆಂ. ’ಉಭೊನ್ ವೆಚಿ’ ಮ್ಹಳ್ಯಾರ್ ಸುಡ್ಕಾ ಅನ್ಯೆಕಾ ಉತ್ರಾನ್ ಪೊಳಾಪೊಳ್.

ಕವಿತೆಂತ್ಲೊ ಕವಿ ಪೊಳಾಪೊಳೆಚಾ ವಾಟೆರ್ ಆಸಾ ಪುಣ್ ಪೊಳಾಪೊಳ್ ಘೆಂವ್ಚೆಂ ತ್ರಾಣ್ ಹೊಗ್ಡಾವ್ನ್ ಅಸಹಾಯಕ್ ಜಾವ್ನ್ ರುದಾನ್ ಕರ್ತಾ. ಹೆಂಚ್ ತಾಚಾ ಕವಿತೆಂತ್ಲೊ ಸಾರ್ ಮ್ಹಣ್ ಮ್ಹಾಕಾ ಭೊಗ್ತಾ.

3. ಮೊಗಾ ಜಿವಿತಾಂತ್ ಚುರ್‍ಚುರ್ಚೊ ಕಯ್ದಿ - [ಜೊಮೆಲ್, ಬೊಂದೆಲ್]

ಬಂದಿಖಾನ್ಯಾಂತ್ ಕಯ್ದಿಕ್ ಕಿತ್ಲೀಯ್ ಬರ್‍ಯೊ ಸವ್ಲಾತ್ಯೊ ದಿಲ್ಯಾರೀ, ಕಯ್ದಿ ಕಸೊಯ್ ತರೀ ಥಂಯ್ ಥಾವ್ನ್ ಫಳಾಫಳ್ ಘೆಂವ್ಕ್ ಪ್ರಯತ್ನ್ ಕರ್‍ತಾ ಯಾ ಸುಟ್ಕೆಕ್ ಸದಾಂಚ್ ಆಶೆತಾ. ಕಂಚೊಯ್ ಕಯ್ದಿ ಚಾರ್ ವೊಣೊದಿಂ ಭಿತರ್ ಲಾಚಾರ್ ಜಾವ್ನ್ ರಾವೊಂಕ್ ಆಶೆನಾ. ಆಸಲಿಚ್ ಏಕ್ ಆಶಾ ಹ್ಯಾ ಕವಿತಾಂತ್ ಆಮ್ಕಾಂ ಭೋವ್ ಸಾರ್‍ಕ್ಯಾ ಉತ್ರಾನಿ ದಿಸೊನ್ ಯೆತಾ. ಹ್ಯಾ ಕವಿತಾಂತ್ಲಿ ಆಕ್ರೇಚೊ ಚಾರ್ ಪಂಕ್ತಿ ಆಮಿ ಗೂಂಡ್ ರಿತಿನ್ ಅದ್ಯಯನ್ ಕೆಲ್ಯಾರ್, ಆಮ್ಕಾ ಖಂಡಿತ್ ಜಾವ್ನ್ ಕಳೊನ್ ಯೆತಾಗಿ ಕವಿ ಏಕ್ ಕಯ್ದಿ ಜಾಲಾ ಮ್ಹಣೊನ್.

ಹ್ಯಾ ಕವಿತಾಂತ್ ಮೊಗಾಚಾ ಕವಿತಾಕ್ ಸಾರ್ಕ್ಯಾ ರಿತಿನ್ ತಾಳ್ ಪಡ್ತಾ. ಮೊಗಾಚೆಂ ಕವಿತಾ ಜಾಯ್ ಸಾರ್ಕೆಂ ವರ್ಣನ್, ಭಾಸ್ ಕವಿನ್ ಬೊರ್‍ಯಾ ಥರಾನ್ ವಾಪರ್‍ಲ್ಯಾ. ತಾಚಾ ’ಮೊಗಾಕ್’ ತೊ ರಾವ್ಳೆರ್ ಮ್ಹಣ್ ಸಾಂಗ್ತಾನಾ, ರಾವ್ಳೆರಾಚೊ ಪಾಗೊರ್ ಕಠಿಣ್ ಊಂಚ್ ಮ್ಹಣ್ ಪಿಂರ್ಗಾತಾ. ಮ್ಹಣ್ಜೆ ಹ್ಯಾ ಕವಿತಾಂತ್ಲೊ ಕವಿ ತಾಣೆಂಚ್ ವಿಂಚ್‌ಲ್ಲ್ಯಾ ಜಿಣ್ಯೆಚೊ (ಮೊಗಿ) ಯಾ ತಾಚಾ ಪಾಟ್ಲ್ಯಾ ಜಿವಿತಾಂತ್ ’ಉಗ್ಡಾಸಾಂಚೊ’ (ಮೊಗಿಚಿಂ ಚಿಂತ್ನಾ) ಕಯ್ದಿ ಜಾಲಾ. ತೊ ಅಸ್‌ಲ್ಯಾ ಪಿಂಜ್ರ್ಯಾಂತ್ ಶಿರ್ಕೊನ್ ಪಡ್ಲಾಗೀ, ಪಾಕಾಟೆ ಕಾತ್ರಿಲ್ಲ್ಯಾ ಸುಕ್ಣ್ಯಾ ಬರಿ ತಾಚೆಂ ಜಿವಿತ್ ಜಾವ್ನಾಸಾ. ಹ್ಯಾ ಕವಿತಾಂತ್ ತಾಚಾ ’ಮೊಗಾ ಜಿವಿತಾಂತ್ಲೆ ಸಿಂತಿಮೆಂತಾಳ್ ಬೊಗ್ಣಾಂ ದಿಸೊನ್ ಯೆತಾ. ಕವಿತಾಂತ್ ಮೊಗಾಚ್ಯೊ ಇಮಾಜ್ಯೊ ಸ್ಪಷ್ಟ್ ರಿತಿನ್ ದಿಸೊನ್ ಯೆತಾ. ಪೂಣ್ ಹ್ಯಾ ಮೊಗಾಚಾ ಜಿಣ್ಯೆಂತ್ ಕವಿ ಜಿಕ್ಲಾಗೀ ಯಾ ಸಲ್ವಲಾಗೀ ಮ್ಹಣ್ ಸಾಂಗೊಂಕ್ ಸ್ಪಷ್ಟ್ ಕಳಾನಾ.

ಪಯ್ಲ್ಯಾ ಪಂಗ್ತೆರ್ ಕವಿ ಅಪ್ಲ್ಯಾ ಸ್ವಂತ್ ಖುಶೇನ್ ಪ್ರೆಮಿಕಾಲಾಗಿಂ ಮೊಗಾರ್ ಆಸಾ ಮ್ಹಣ್ ಸಾಂಗ್ತಾ. ಮೊಗಾರ್ ಪಡ್‌ಲ್ಲ್ಯಾ ಉಪ್ರಾಂತ್ ಕಸಲ್ಯಾಗೀ ಕಾರಾಣಾಂ ಬಾಬ್ತಿನ್ ತಾಂಚೆ ಮಧೆಂ ತಾತ್ಸಾರ್ ಉದೆತಾ. ಏಕಾ ಥರಾಚೆ ಮನಸ್ತಾಪ್ ಉಬ್ಜಾತಾತ್. ಆನಿ ತೆದಾಳಾ ತಾಕಾ ಆಪ್ಣಾನ್ ಜಿಯೆಲ್ಲಿ ಏಕ್ಸುರಿ ಜಿಣಿ (ಪಯ್ಲೆಂಚಿ ಜಿಣಿ) ಮ್ಹಣ್ಜೆ ಭಾಯ್ಲೊ ಸಂಸಾರ್ ಸೊಬಿತ್ ದಿಸ್ತಾ ತರಿ ಉಭೊನ್ ವಚೊಂಕ್ ಯಾ ಪರತ್ ಸ್ವತಂತ್ರ್‌ಪಣಿ ಜಿಯೆಂವ್ಕ್ ವೊಡ್ಣಿ ಆಸ್ಲ್ಯಾರೀ ಕವಿಕ್ ಧಯ್ರ್ ಯಾ ತ್ರಾಣ್ ನಾ ಮ್ಹಣ್ ತಾಣೆ ಸಾಂಗ್ತಾ.

ದುಸ್ರ್ಯಾ ಪಂಗ್ತೆರ್ ಕವಿ ಕಸ್ಟ್, ಅನ್ವಾರಾಂ, ಬರೆಂ ವಾಯ್ಟ್ ಚಾಕೊನ್ ಜಿಯೆಲಾ. ತಾಚೊ ಪ್ರೆಮಿಕಾಚೊ ಮೊಗ್ ತೊ ರಾವ್ಳೆರಾಂತ್ಲ್ಯಾ ಸುಖಾಕ್ ಸರಿ ಕರ್‍ತಾ. ಆಶೆಂ ಆಸ್ತಾನಾ, ಹ್ಯಾ ರಾವ್ಳೆರಾಂತ್ಲ್ಯಾ ಸುಕಾಂತೀ ತಾಕಾ ಥೊಡೆ ಉಂಚಾಯೆಚೆ ಪಾಗೊರ್ ಯಾ ಬಾಂದ್ಪಾಸ್ ದಿಸ್ತಾತ್. ಹಾಂಗಾಸರ್ ತಾಚಿ ನಿರಾಶಿ ಮೋಗ್ ದಿಸೊನ್ ಯೆತಾ. ಮ್ಹಣ್ಜೆ ತಾಚಾ ಹ್ಯಾ ಮೊಗಾ ಜಿವಿತಾಂತ್ ಸಲ್ವಣ್ ಆಯ್ಲ್ಯಾ ಮ್ಹಣ್ ಪಿಂತ್ರಾಯ್ತಾ.

ತಿಸ್ರ್ಯಾ ಪಂಗ್ತೆರ್ ಕವಿ ಆನಿ ಪ್ರೆಮಿಕಾ ಮದೆಂ ಆಸ್ಚೊ ಆಪ್ತ್ ಸಂಭಂದಾಕ್ ಗುಪ್ತ್ ರಿತಿಚೊ ಯೇರ್ ಯಾ ಫುಟ್ ಆಯ್ಲ್ಯಾ ಮ್ಹಣ್ ಕಳಿತ್ ಜಾತಾ. ಹ್ಯಾ ವರ್ವಿಂ ಲೋಕ್ ಗಾಬ್ (ಖಬ್ರ್ಯೊ) ಕರ್‍ತಾ ಜಲ್ಯಾರೀ, ಕವಿ ತಾಕಾ ಕಸಲಿಚ್ ಫಿಕಿರ್ ಕರಿನಾಸ್ತಾಂ ಆಪ್ಣೆಂ ಹೊಗ್ಡಾಯಿಲ್ಲ್ಯಾ ಸುಖಾಕ್ ಚಿಂತುನ್ ಬೆಜಾರಾಯೆನ್ ಅಪ್ಣಾ ಬಿತರ್‍ಚ್ ಫಿಂರ್ಗಾತಾ.

ಆಖ್ರೇಚಾ ಪಂಗ್ತೆರ್ ಕವಿ ಆಶೆಂ ಚಿಂತಾ, ಏಕ್ಸುರೊಂ ಆಸ್ತಾನಾ, ಮೊಗಾಕ್ ಆಶೆಲೊ (ಬಂದಿಖಾನೊ), ಉಪ್ರಾಂತ್ ತಾಂಚಾ ಮಧೆಂ ಸುರು ಜಾಲ್ಲ್ಯಾ ಬಾಂಧ್ಪಾಸಾ (ಪಿಂಜ್ರೊ) ಥಾವ್ನ್ ಸುಟೊನ್ ಫಳಾಪಳ್ (ಉಭೊನ್) ಕಶೆಂ ಘೆಂವ್ಚಿಗೀ ಮ್ಹಣೊನ್ ತೊ ಆಪ್ಲ್ಯಾ ಇತ್ಲ್ಯಾಕ್ ವಿಸಾರ್ತಾ.

ಪಾಟಿಂ ಕವಿತಾಪಾಠ್ ಪಾನಾಕ್

ಪಾಟಿಂ ದಾಯ್ಜ್ ಪಾನಾಕ್

About us | Feedback | Contact us
Copyright © 2005 DAAIZ.COM All rights reserved. Page concept, designed and maintained by Ashawadi Publications