‘ಕವಿತಾ’

ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್‍ಯಾಂತ್, ಕೊಂಕಣಿ ಖಾತಿರ್.

‘ಕವಿತಾ’ ತರ್ಫೆನ್ ಜನೆರ್ 6, 7 ತಾರಿಕೆಂನಿ ಮಂಗ್ಳುರಾಂತ್ ‘ಕವಿತಾ ಫೆಸ್ತ್’

ದುಬಾಯ್, ನವೆಂಬರ್ 24: ಕೊಂಕಣಿ ಕವಿತೆಚೆ ಸಮಗ್ರ್ ವಾಡಾವಳಿ ಖಾತೀರ್ ವಾವುರ್‍ಚೆಂ ಟ್ರಸ್ಟ್ ‘ಕವಿತಾ’ ಹಾಂಣಿ, ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿ ಆನಿ ಮಾಂಡ್ ಸೊಭಾಣ್ ಹಾಂಚ್ಯಾ ಸಹಯೋಗಾನ್ 2007 ಜನೆರ್ 6 ಆನಿ 7 ತಾರಿಕೆಂನಿ ‘ಕವಿತಾ ಫೆಸ್ತ್’ ಮಾಂಡುನ್ ಹಾಡ್ಲಾಂ. ದೇಡ್ ದಿಸಾಂಚೆಂ ಹೆಂ ಫೆಸ್ತ್ ಮಂಗ್ಳುರ್‍ಚ್ಯಾ ಶಕ್ತಿನಗರಾಂತ್ ಆಸ್ಚ್ಯಾ ಕಲಾಂಗಣಾಂತ್ ಚಲ್ಚೆಂ ಆಸೊನ್ ಕರ್ನಾಟಕ, ಗೊಂಯ್, ಮುಂಬಯ್, ಕೇರಳ ತಶೆಂ ಗಲ್ಫಾಂತ್ಲೆ ಕೊಂಕಣಿ ಕವಿ ತಶೆಂ ಸಾಹಿತಿ ಹಾಂತುಂ ಭಾಗ್ ಘೆತಲೆ.

ಜನೆರಾಚೆ ಸ ತಾರಿಕೆರ್ ಕಲಾಂಗಣಾಚ್ಯಾ ಚಾಫ್ರಾ ಪ್ರತಿಭಾ ಶಾಳೆಂತ್ ಕೊಂಕಣಿ ಕವಿತೆಚೆಂ ಕಾಮಾಸಾಳ್ ಚಲ್ತಲೆಂ. ಹಾಂತುಂ ಪಯ್ಲೆಂಚ್ ನಾಂವ್ ನೊಂದಾವ್ಣಿ ಕರ್‍ಚ್ಯಾ ತೀಸ್ ಜಣಾಂಕ್ ಭಾಗ್ ಘೆಂವ್ಕ್ ಆವ್ಕಾಸ್ ಆಸಾ. ಭಾಗ್ ಘೆತಲ್ಯಾಂನಿ ಕಸಲೋಯ್ ದುಡು ಫಾರಿಕ್ ಕರುಂಕ್ ಆಸ್ಚೊನಾ. ಕೊಂಕಣಿ ಕವಿ ಮೆಲ್ವಿನ್ ರೊಡ್ರಿಗಸ್ ಹೆಂ ಕಾಮಾಸಾಳ್ ಚಲವ್ನ್ ವ್ಹರ್‍ತಲೊ. ದೊನ್ಪಾರಾಂ ದೋನ್ ಥಾವ್ನ್ ಸಾಂಜೆರ್ ಸಾತ್ ಪರ್ಯಾಂತ್ ಚಲ್ಚ್ಯಾ ಹ್ಯಾ ಕಾಮಾಸಾಳಾಂತ್ ಭಾಗ್ ಘೆಂವ್ಕ್ ಆಶೆತೆಲ್ಯಾಂನಿ ತಾಂಚಿಂ ನಾಂವಾಂ ಕರ್ನಾಟಕ ಕೊಂಕಣಿ ಅಕಾಡೆಮಿ ದಫ್ತರಾಂತ್ ನೊಂದಾವ್ಣಿ ಕರಿಜಾಯ್. ಭಾಗ್ ಘೆತ್‌ಲ್ಲ್ಯಾ ಸರ್ವಾಂಕ್ ‘ಸರ್ಟಿಫಿಕೆಟ್’ ಲಾಬ್ತಲಿ.

ಜನೆರಾಚೆ ಸಾತ್ ತಾರಿಕೆರ್ ಸಕಾಳಿಂ ಸಾಡೆ-ನೋವ್ ವೊರಾಂಚೆರ್ ‘ಅಂತರ್‌ರಾಷ್ಟ್ರೀಯ್ ಸ್ತರಾಚೆರ್ ಕೊಂಕಣಿ ಕವಿತಾ ಖಂಯ್ ರಾವ್ತಾ?’ ವಿಷಯಾಚೆರ್ ವಿಚಾರ್‌ಸಾತೆಂ ಚಲ್ತಲೆಂ. ಕನ್ನಡಾಚೊ ಫಾಮಾದ್ ಸಾಹಿತಿ, ಲೇಖಕ್ ತಶೆಂ ಕೊಂಕಣಿ ಮನೀಸ್ ಜಯಂತ್ ಕಾಯ್ಕಿಣಿ, ಹ್ಯಾ ವಿಚಾರ್‌ಸಾತ್ಯಾಚೆಂ ಅಧ್ಯಕ್ಷ್‌ಪಣ್ ಘೆತಲೊ. ಗೊಂಯ್ ವಿಶ್ವವಿದ್ಯಾಲಯಾಚಿ ಡೊ. ಕಿರಣ್ ಬುಡ್ಕುಲೆ ತಶೆಂ ಮಂಗ್ಳುರ್‍ಚೊ ಸ್ಟೀವನ್ ಕ್ವಾಡ್ರಸ್ ಪ್ರಮುಖ್ ಉಲವ್ಪಿ ಜಾವ್ನ್ ಆಪ್ಲೆ ಪ್ರಬಂಧ್ ಮಾಂಡ್ತಲಿಂ. ಮುಂಬಯ್ಚೊ ಕವಿ ಜೆ.ಬಿ. ಮೊರಾಯಸ್ ತಶೆಂ ಕೇರಳಾಚೊ ಕವಿ ಆರ್. ಎಸ್. ಭಾಸ್ಕರನ್ ಪಾಲ್ವಿ ಉಲವ್ಪಿ ಜಾವ್ನಾಸ್ತಲೆ. ಭಾಗ್ ಘೆತಲ್ಯಾಂನಿ ತಾಂಚಿಂ ನಾಂವಾಂ ಅಕಾಡೆಮಿ ದಫ್ತರಾಂತ್ ನೊಂದಾವ್ಣಿ ಕರ್‍ಚಿ ಗರ್ಜ್ ಆಸಾ.

ದೊನ್ಪಾರಾಂ ಉಪ್ರಾಂತ್ ರಾಷ್ಟ್ರೀಯ್ ಮಟ್ಟಾಚೆಂ ಕವಿ ಸಮ್ಮೇಳನ್ ಚಲ್ಚೆಂ ಆಸೊನ್ ಹಾಂತುಂ ತರ್ನೆ, ಪರ್ನೆ ಆನಿ ಪ್ರಶಸ್ತಿ ವಿಜೇತ್ ಜಾಯ್ತೆ ಕವಿ ಭಾಗ್ ಘೆತಲೆ. ಹೆ ಕವಿಗೋಷ್ಟಿಂತ್ ಭಾಗ್ ಘೆಂವ್ಕ್ ಆಶೆತೆಲ್ಯಾಂನಿ ತಾಂಚಿ ಮಟ್ವಿ ವೊಳಕ್, ವಾಚುಂಕ್ ಆಶೆಂವ್ಚಿ ಕವಿತಾ ಜನೆರ್ ಪಾಂಚ್ ತಾರಿಕೆ ಭಿತರ್ ಅಕಾಡೆಮಿ ದಫ್ತರಾಂತ್ ದೀಂವ್ಕ್ ಜಾಯ್. ಕಲಾಂಗಣಾಚ್ಯಾ ಗ್ರೇಸಿ ಗಂಗಾ ನಾಯ್ಕ್ ಸಭಾಸಾಲಾಂತ್ ಚಲ್ಚ್ಯಾ ಹೆ ಕವಿಗೋಷ್ಟಿಕ್ ಸರ್ವಯ್ ಲೊಕಾಕ್ ಪ್ರವೇಶ್ ಆಸಾ. ಹಿ ಕವಿಗೋಷ್ಟಿ ಮಂಗ್ಳುರ್‍ಚೊ ಕವಿ ಟೈಟಸ್ ನೊರೊನ್ಹಾ ತಶೆಂ ಗೊಂಯ್ಕಾರ್ ಕವಿ ರಾಜಯ್ ಪವಾರ್ ಚಲವ್ನ್ ವ್ಹರ್‍ತಲೆ.

ಸಾಂಜೆರ್ ಸ ವೊರಾಂಚೆರ್ ಕಲಾಂಗಣಾಚೆ ಉಗ್ತೆ ರಂಗ್‌ಮಾಂಚಿಯೆರ್ ಮ್ಹಯ್ನ್ಯಾಳಿ ಮಾಂಚಿ ಶಿಂಕ್ಳೆಂತ್ಲೆಂ ವರ್ಸಾಚೆಂ ಪಯ್ಲೆಂ ಕಾರ್ಯೆಂ ಜಾವ್ನ್ ‘ಶೆವಿಯೊ-ರೋಸ್’ ಕಾರ್ಯಕ್ರಮ್ ಚಲ್ತಲೆಂ. ಹಾಂತುಂ ಕೊಂಕಣಿಚೆ ಪ್ರಸಿದ್ಧ್ ಪಂದ್ರಾ ಕವಿ ಆಪ್ಲಿ ಕವಿತಾ ಪೇಶ್ ಕರ್‍ತಲೆ ಜಾಲ್ಯಾರ್, ತಶೆಂ ಪೇಶ್ ಜಾಲ್ಲ್ಯಾ ಧಾ ಕವಿತಾಂಕ್ ತಾಳೆ ಬಸವ್ನ್ ‘ಮಾಂಡ್ ಸೊಭಾಣ್’ ಸಾದರ್ ಜಾತಲೆಂ. ಹ್ಯಾ ಕಾರ್ಯಾಕ್ ಮುಕೆಲ್ ಸೈರೊ ಜಾವ್ನ್ ಕೊಂಕಣಿ ಕಾರ್ಭಾರಿ, ‘ಮಿತ್ರ್’, ‘ಝೆಲೊ’, ‘ಕಾಣಿಕ್’ ಪತ್ರಾಂಚೊ ಆದ್ಲೊ ಸಂಪಾದಕ್ ಓಸ್ಟಿನ್ ಡಿ’ಸೋಜಾ ಪ್ರಭು ಹಾಜರ್ ಆಸ್ತಲೊ. ಹರ್ಶೆಂಚೆಬರಿ ಹ್ಯಾ ಕಾರ್ಯಾಕ್ ಟಿಕೆಟ್ ಆಸ್ಚಿನಾ. ಮಾಂಡ್ ಸೊಭಾಣಾಚೆ ಫಾಮಾದ್ ಗಾವ್ಪ್ಯಾಂನಿ ತಶೆಂ ಸಂಗೀತ್‌ಗಾರಾಂನಿ ಭಾಗ್ ಘೆಂವ್ಚ್ಯಾ ಹ್ಯಾ ಕಾರ್ಯಾಕ್ ಕವಿ ಪೂರ್ಣನಂದಾಚಾರಿ ಸುತಾರಿ ಜಾವ್ನಾಸ್ತಲೊ.

ಸರ್ವಯ್ ಕವಿಂನಿ, ಕವಿತಾಸಕ್ತಾಂನಿ, ಭಾಷಾಭಿಮಾನಿಂನಿ ಹ್ಯಾ ಕವಿತಾ ಫೆಸ್ತಾಂತ್ ಚಡಾನ್‌ಚಡ್ ಸಂಖ್ಯಾನ್ ಭಾಗ್ ಘೆವ್ನ್ ಆನಂದ್ ಭೊಗಿಜಾಯ್ ಮ್ಹಣೊನ್ ‘ಕವಿತಾ’ ಉಲೊ ದಿತಾ.

ಮಂಗ್ಳುರಾಭಾಯ್ರ್ ಥಾವ್ನ್ ಹ್ಯಾ ಫೆಸ್ತಾಂತ್ ಭಾಗ್ ಘೆಂವ್ಕ್ ಆಶೆಂವ್ಚ್ಯಾ ಕವಿಂ ಖಾತೀರ್ ರಾವ್ಪಾಚಿ ವೆವಸ್ಥಾ, ವೆವಸ್ಥಾಪಕ್ ಕರ್‍ತಲೆ ಜಾಲ್ಲ್ಯಾನ್, ತಸಲ್ಯಾಂನಿ ತ್ಯಾಖಾತೀರ್ ಪಯ್ಲೆಂಚ್ ಕಳಯ್ಜಾಯ್.

-‘ಕವಿತಾ’ ಭಾತ್ಮಿ

ದಾಯ್ಜ್ ಲೇಖನಾಂ

ದಾಯ್ಜ್ ಪಾನಾಕ್

ಸಜ್ಜಿಗೆ

ವಿಚಾರ್-ಉಚಾರ್

ಫ್ಲಾಯ್ಟ್!?