ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ವಿಮರ್ಶ್ಯಾ ಲೇಖನ್ - 7
ವಿಲ್ಸನ್ ಕಟೀಲಾಚ್ಯಾ ’ಕವಿಂಕ್ ಖಂಯ್ ಪುರ್ಲಾ?’ ಲೇಖನಾಂಚೆರ್ ಪ್ರತಿಕ್ರಿಯಾ ದಿಂವ್ಚೆಂ ಲೇಖನ್.
ಮೆಲ್ವಿನ್ ಪಿಂಟೊ, ನೀರುಡೆ
ಆಧುನಿಕ್ ಕೊಂಕ್ಣಿ ಕಾವ್ಯಾಂತ್ ’ಆವಾಜ್’’ಉಣೊ, ’ವಾಸ್’ ಚಡ್!!
ಕಾವ್ಯಸ್ಯಾತ್ಮಾಃ ಧ್ವನಿ’ಮ್ಹಣ್ತಾ ಭಾರತೀಯ್ ಕಾವ್ಯ್ ಮೀಮಾಸೆಂತ್ ಆನಂಧವರ್ಧನ.
ಧ್ವನಿ ಮ್ಹಳ್ಯಾರ್ ಕಿತೆಂ? ಆವಾಜ್! ವ್ಹಯ್ ಆವಾಜ್!!
’ಜೋಗದ ಸಿರಿ �’ಮ್ಹಣ್ ಕವಿ ಗಾಯ್ತಾನಾ ಜೋಗಾಂತ್ಲ್ಯಾ ಉದ್ಕಾ ಥಾವ್ನ್ ಯಾ ಜೋಗಾಚೆಂ ಉದಾಕ್ ಉಜ್ವಾಡ್ ಜಾವ್ನ್ ಫಾಂಕ್ಚಿ ತಿ ಗುಂಡಾಯೆಚಿ ನದರ್ ಧ್ವನಿ ಜಾತಾ.
’ಸಾಹುಕಾರರ ಬಾಗಿಲಿಗೆ ನಮ್ಮ ಮೂಳೆಯ ತೋರಣ’’ಮ್ಹಣ್ ದಲಿತ್ ಕವಿ ಗಾಯ್ತಾನಾ ಕ್ರೂರ್ ಜಾತಿ ವ್ಯವಸ್ಥೆಂತ್ ಉಬ್ಜಾಲ್ಲಿಂ ಧಾರುಣ್ ಪ್ರತಿಮಾ ಆವಾಜ್ ಜಾತಾತ್.
’ಥೊಡೆ ಪಾವ್ಟಿಂ ಪಾವ್ಸ್ ಪಡ್ತಾ ಕಿತ್ಯಾಕ್ ಆನಿ
ಥೊಡೆ ಪಾವ್ಟಿಂ ರಡ್ತಾ ಕಿತ್ಯಾಕ್?’
ಅಶೆಂ ಚಾ.ಫ್ರಾ. ಉಮಾಳ್ತಾನಾ ಪಾವ್ಸಾನ್ ಹಾಡ್ಚೊ ಸಂಭ್ರಮ್ ಆನಿ ಅತರ್ವಾಣಾಂ ಆವಾಜ್’ಜಾತಾ.
ವಿಲ್ಸನ್ ಕಟೀಲ್ ಹಾಣೆಂ ಲಿಕ್ಲ್ಲ್ಯಾ ಕಡಕ್ಕ್ ಲೇಖನಾಂತ್ ತಾಣೆಂ ಉಚಾರ್ಲಾ ತೊ ಆಕ್ಲಾಸ್’ಖರೊಚ್! ದುರ್ಬಾಗ್ಪಣ್ ಮ್ಹಳ್ಯಾರ್ ಆಜ್ ಆವಾಜ್ ಆಸ್ಚೆಂ ಕಾವ್ಯ್ ಲಿಕ್ಲ್ಯಾರ್ ಆಮ್ಚ್ಯಾ ಸಾದ್ಯಾ ವಾಚ್ಪ್ಯಾಂಕ್ ಆರ್ಥ್ ಜಾಯ್ನಾ ಮ್ಹಳ್ಳೊ ಅಸ್ಕತ್ ಆಕ್ಶೇಪ್ ಚಡ್ ಜಾಲಾ. ದೆಕುನ್ಂಚ್ ಆಜ್ ಸಾದ್ಯಾ ವಾಚ್ಪ್ಯಾಂ ಖಾತಿರ್ ಕುಂಡೊ ದಿಂವ್ಚೆ ಕವಿ’ಧಾರಾಳ್ ಉದೆಲ್ಯಾತ್. ವಾಂವ್ಟ್ ಕಾಡಿನಾಸ್ತಾಂ, ಲಿಕ್ಣಿ ಸಾಣ್ಯಾಕ್ ಧರಿನಾಸ್ತಾಂ ಲಿಕ್ಚ್ಯಾ ಆಯ್ಚ್ಯಾ‘ಆಧುನಿಕ್’ಕವಿಂಚ್ಯಾ ಕಾವ್ಯಾಂತ್ ಆವಾಜ್ ಖಂಯ್ ಥಾವ್ನ್ ಯೆಂವ್ಚೊ? ಯೆಂವ್ಚೊ ವಾಸ್ ಮಾತ್ರ್. ಕೇವಲ್ ಉತ್ರಾಂವೊಳಿ ಆಡ್ ಉಬೊ ಲಿಕುನ್ಂಚ್ ಗೆಲ್ಯಾರ್ ತಿ ಏಕ್ ಕವಿತಾ ಜಾತಾ ಮ್ಹಳ್ಳಿ ಭ್ರಮಿದ್ ಆಮಾ ಪಾಪಿಯಾಂಕ್ ಖಂಯ್ ಥಾವ್ನ್ ಉದೆಲ್ಯಾ ತೆಂ ಕಳಾನಾ. ನಿಜಾಕ್ಯೀ ಹಾಂತ್ಲ್ಯೊ ಥೊಡ್ಯೊ ಥೊಡ್ಯೊ ಕವಿತಾ’ಶೀದಾ ಬರಯ್ಲ್ಯಾರ್ ನಿರ್ಮಳ್ ಗದ್ಯ್ಯೀ ಜಾಯ್ನಾಂತ್. ತಶೆಂ ಕಾಂಯ್ ಶೃದ್ಧಾಂಜಲಿ ಕೊಲಮಾಂತ್‘ಆದೇವ್ಸ್ ಪಾಪ್ಪಾ ತುಕಾ, ಸಾಂಡುನ್ ಗೆಲಾಯ್ ಆಮ್ಕಾಂ’ಮ್ಹಣ್ ಲಿಕ್ಯೆತ್ ಕೊಣ್ಣಾ; ಪುಣ್ ಅಶೆಂ ಕವಿತಾ ಲಿಕುಂಕ್ ಜಾಯ್ನಾ. ಪ್ರಾಸ್ ಕೃತಕ್ ರಿತಿಂ ಘಡುನ್ಂಚ್ ಗೆಲ್ಯಾರ್ ತೆಂ ಕಾಂಯ್ ಏಕ್ ಪದ್ ಜಾಯ್ತ್, ಕವಿತಾ ನ್ಹಂಯ್. ಕವಿತಾಕ್ ತಾಚೆಂಚ್ ಆಮೊಲಿಕ್ ಮೋಲ್ ಆಸಾ. ನಾ ತರ್ ಕನ್ನಡಾಂತ್ ಭೈರಪ್ಪ ತಸಲೊ ಖ್ಯಾತ್ ಕಾದಂಬರಿಕಾರ್, ಕಾರ್ನಾಡ್ ತಸಲೊ ನಾಟಕಿಸ್ತ್ ಆಪ್ಲ್ಯಾ ಖ್ಯಾತೆಚೊ ಫಾಯ್ದೊ ಉಟವ್ನ್ ಕವಿತಾ ಬರಯ್ತೆ. ತಾಣಿಂ ಕಿತ್ಯಾಕ್ ತ್ಯಾ ಶೆತಾಕ್ ಹಾತ್ ಘಾಲುಂಕ್ ನಾ? ತಾಂಚ್ಯಾ ಸಂಯ್ಬಾಕ್ ವೊಂಬಾನಾತ್ಲ್ಲೊ ಪ್ರಕಾರ್ ತೊ ಮ್ಹಣ್ ತಾಂಕಾಂ ಕಳಿತ್ ಜಾಲಾಂ.
ಎಚ್ಚೆಮಾನ್ ಉಚಾರ್ಲ್ಲೊ ವಿಚಾರ್ ಖಂಡಿತ್ ಸತ್. ಖಂಯ್ಚೆಂ ಬರೆಂ ಕಾವ್ಯೆಂ ಖಂಯ್ಚೆಂ ನ್ಹಂಯ್ ಮ್ಹಳ್ಳೆಂ ಸಮ್ಜೊಂಚೆ ಸಂಪಾದಕ್ ಕಿತ್ಲೆ ಆಸಾತ್?‘ಕವಿತಾ’ಮ್ಹಣ್ ಆಪ್ಲ್ಯಾ ಪತ್ರಾಂತ್ ಕಿತೆಂ ತರ್ಯೀ ಆಸಾಜೆ; ದೆಕುನ್ ಆಸ್ಲ್ಲ್ಯಾಂತ್ ಬರಿ ಮ್ಹಣ್ ದಿಸ್ಚಿ ಮಟ್ವಿ ಕವಿತಾ’ಶಿರ್ಕಾವ್ಯಾಂ ಮ್ಹಳ್ಳೆಂ ಚಿಂತಾಪ್ಚ್ ಚಡ್. ಅಶೆಂ ಕೆಲ್ಲ್ಯಾನ್ ಕವಿತಾ ಶೆತ್ ಕಾಸಾಚೆಂ ತರ್ಯೀ ಫುಲ್ತಾ ಮ್ಹಣ್ ಹಾಂವ್ ಪಾತ್ಯೆನಾ. ಕವಿತಾ ಫಾಯ್ಸ್ ಜಾಲ್ಲೊ ಕವಿ ಹ್ಯಾ ನಿಮ್ತಿಂ ಪುಳಕಿತ್ ಜಾವ್ನ್ ಆನಿ ಥೊಡೆಂ ಕಸ್ತಾಳ್ ನೆರಾಯ್ತಾ ಶಿವಾಯ್ ಕಾಂಯ್ ಶಿಕಾನಾ. ಕವಿತಾ ಮ್ಹಳ್ಯಾರ್ ಕಿತೆಂ, ಕಶಿ ಲಿಕ್ಯೆತ್ ಮ್ಹಣ್ ಉದೆತ್ಯಾ ಕವಿಂಕ್ ಮಾರ್ಗ್ದರ್ಶನ್ ದಿಂವ್ಚೆ ಸಂಪಾದಕ್ ಖಂಯ್ ಆಸಾತ್?
ಕವಿ ಜಲ್ಮಾನ್ ಮ್ಹಳ್ಳೊ ವಾದ್ ಹಾಂವ್ ಖರೊಚ್ ಪಾತ್ಯೆತಾಂ. ಪುಣ್ ಜಲ್ಮಾನ್ ಕವಿ ಜಾಲ್ಲ್ಯಾಕ್ಯೀ ಕಶ್ಟ್ ಕಾಡ್ಚೆಂ, ಚಡಿತ್ ಕವಿತಾ ವಾಚ್ಚೆಂ, ಹೆರ್ ಭಾಶೆಚೆಂ ಕಾವ್ಯ್ ಅದ್ಯಯನ್ ಕರ್ಚಿ ಸವಯ್ ನಾ ತರ್ ತೊ ಕವಿ (ಕವಯಿತ್ರಿ) ಬಾಲಿಶ್ ಉರ್ತಾ ಶಿವಾಯ್ ವಾಡಾನಾ. ಸತ್ತ್ ಸಾಂಗ್ತಾಂ, ಥೊಡೆ ಪಾವ್ಟಿಂ ಕವಿ ಮ್ಹಣ್ ಒಲಾವ್ನ್ ಘೆತ್ಲ್ಲ್ಯಾನ್ ಎಕ್ಲ್ಯಾಕ್ ಭಾವನಾತ್ಮಕ್, ಸಿಂತಿಮೆಂತಾಳ್ ತೃಪ್ತಿ ಮೆಳ್ತಾ, ego ಫುಲ್ತಾ. ಕೊಂಕ್ಣೆಂತ್ ಅಶೆಂ ಕವಿ ಮ್ಹಣ್ ಒಲಾವ್ನ್ ಘೆಂವ್ಕ್ ಆವ್ಡೆಂವ್ಚ್ಯಾಂಚೊ ಸಂಕೊ ಕಠೀಣ್ ವಾಡ್ಲಾ. ಪುಣ್ ನೀಜ್ ಕವಿ ಬೊಟಾಂನಿ ಮೆಜ್ಯೆತ್ ತಿತ್ಲೆಯೀ ನಾಂತ್.
ಆಪುಣ್ ಕವಿ ವ್ಹಯ್ಗೀ ನ್ಹಂಯ್ ಮ್ಹಣ್ ಸೊದುನ್ ಕಾಡುಂಕ್ ಏಕ್ ಉಪಾವ್ ಆಸಾ. ಉಣ್ಯಾರ್ ಉಣೆಂ ತೀನ್ ಭಾಸಾಂತ್ಲ್ಯಾ (ಕೊಂಕ್ಣಿ ಧರ್ನ್) ಖ್ಯಾತ್ ಕವಿಂಚಿಂ (ಪರ್ನ್ಯಾ ಆನಿ ನವ್ಯಾ) ಉಣೆಂ ಮ್ಹಳ್ಯಾರ್ ಪಂಚ್ವೀಸಾ ಲೆಕಾನ್ ಕವನಾಂ ವಾಚುನ್, ಜಿರವ್ನ್, ಆರ್ಥ್ ಸೊದುನ್ ವಿಶ್ಲೇಷಣ್ ಕರುಂಕ್ ಸಾದ್ಯ್ಗೀ ತೆಂ ಪಳೆಯಾ. ವಿಶ್ಲೇಷಣ್ ಬಾಲಿಶ್ ನ್ಹಂಯ್, ಪುಣ್ ಗುಂಡಾಯೆಚೆಂ. ಸಾದ್ಯ್ ಜಾಲಾಂ ತರ್ ಭೋವ್ಶಾ ಕವಿ ಕಾಳಿಜ್ ತುಜೆಲಾಗಿಂ ಆಸಾ. ಆತಾಂ ಕೇವಲ್ ಶಯ್ಲಿ ಶಿಕ್ಲ್ಯಾರ್ ಜಾಲೆಂ! ಎಕಾದವೆಳಾ ಅಸಾದ್ಯ್ ತರ್ ದಯಾಳ್ ಕವಿ’ತುಜಿ ಕಾವ್ಯಾಳ್ ಲಿಕ್ಣಿ ಹೆರ್ ಖಂಯ್ಚ್ಯಾ ತರ್ಯೀ ಪ್ರಕಾರಾಕ್ ವಾಪಾರ್ನೆ, ಕಾವ್ಯಾಕ್ ತಿಚೆ ಇತ್ಲ್ಯಾಕ್ ಸೊಡ್.
ಆಧ್ಲೆ ವಿಮರ್ಶೆ: 1, 2, 3, 4, 5, 6
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
