ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾಝರ್ - 33. ಖಾಂದಿ ಖುರಿಸ್
ವಲ್ಲಿ ವಗ್ಗ
ವಲ್ಲಿ ವಗ್ಗ: ಕೊಂಕ್ಣೆಂತ್ ಉಂಚ್ಲ್ಯೊ ಮಟ್ವ್ಯೊ ಕಾಣ್ಯೊ ಬರಂವ್ಚಾಂತ್ಲೊ ಎಕ್ಲೊ ಜಾವ್ನಾಸಾ ವಲ್ಲಿ ವಗ್ಗ. ಹೊ ಕೊಂಕ್ಣಿ ಮಾತ್ರ್ ನ್ಹಂಯ್, ಕಾನಡಿ ಭಾಸೆಂತ್ಯ್ ಕಾಣ್ಯೊ ಬರಂವ್ಚಾಂತ್ ಫಾಮಾದ್ ಜಾಲಾ. ಕಾನಡಿ ಭಾಸೆಂತ್ ರಾಜ್ಯ್ ಮಟ್ಟಾರ್ ಪಯ್ಲೆಂ ಇನಾಮ್ ಜೊಡ್ಲೆಲ್ಯಾ ಕಾಣ್ಯೆಚೆಂ (ಹೆಗಲಿಗೆ ಶಿಲುಬೆ) ಕೊಂಕ್ಣೆಚೆಂ ಅನುವಾದ್ ಹಿ ಕಾಣಿ ವಾಚ್ತಾಂ ವಾಚ್ತಾಂ ಹ್ಯಾ ಕಾಣ್ಯೆಚಿ ತಶೆಂಚ್ ಕಾಣ್ಯೆಗಾರಾಚಿ ತಾಂಕ್ ತುಮ್ಕಾಂ ಸಮ್ಜೊಂಕ್ ಪುರೊ.
(ಕಥೊಲಿಕ್ ಧರ್ಮಾಂತ್ ಆನಿ ಕೊಂಕ್ಣಿ ಕಥೊಲಿಕ್ ಸಮಾಜೆಂತ್ ನವೀಕರಣಾಕ್ ಕೆದ್ನಾಂಯ್ ಸ್ವಾಗತ್ ಆಸ್ತಾ. ಪರ್ನ್ಯೊ ರಿತಿ-ರಿವಾಜಿ, ವೆಳಾ-ಕಾಳಾಕ್ ಸಜ್ಚೆಪರಿ ತೆ ಬದ್ಲಿತಾತ್. ಅಶೆಂ ಆಸ್ತಾಂ, ಲಗ್ಭಗ್ ಶೆಂಬರ್ ವರ್ಸಾಂ ಪಯ್ಲೆಂ, ದಕ್ಷಿಣ್-ಕನ್ನಡ ಜಿಲ್ಲ್ಯಾಚ್ಯಾ ಕೊಂಕ್ಣಿ ಕಥೊಲಿಕ್ ಸಮಾಜೆಂತ್, ಧರ್ಮಾಚೆರ್ ಉಪ್ರಾಟ್ಲೆಲ್ಯಾಂಕ್, ಸ್ಕಾಂದಲ್ ದಿತೆಲ್ಯಾಂಕ್, ಬಹಿಶ್ಕಾರ್ ಘಾಲ್ಚಿ ಆನಿ ತಸಲೊ ಬಹಿಶ್ಕಾರ್ ಪಾಟಿಂ ಕಾಡ್ಚೆ ಖಾತಿರ್, ಪ್ರಾಜಿತಾಚಿ ಶಿಕ್ಷಾ ಜಾವ್ನ್, ‘ಖಾಂದಿ ಖುರಿಸ್’ ದೀವ್ನ್, ತಾಣಿಂ ತೊ ದಿಂಬ್ಯೆರ್ ಪಡೊನ್, ದಾರ್ವಾಟ್ಯಾ ಥಾವ್ನ್ ಆಲ್ತಾರಿ ಪರ್ಯಾಂತ್ ವಾವಂವ್ಕ್ ಲಾಂವ್ಚಿ ರಿವಾಜ್ ಚಾಲು ಆಸ್ಲ್ಲಿ. ಹ್ಯೆ ರಿವಾಜೆಚಿ ರುಜ್ವಾತ್ ಜಾವ್ನ್ ಥೊಡ್ಯೆ ಪರ್ನ್ಯೆ ಇಗರ್ಜೆಂನಿ ಅಸಲೆ ‘ಖಾಂದಿ ಖುರಿಸ್’ ಸಾಂಬಾಳ್ನ್ ದವರ್ಲೆಲೆ ಪಳೆಂವ್ಕ್ ಮೆಳ್ತಾತ್. - ಲೇಖಕ್)
ಪೆಟೊ ಘೊಂಕ್ಲೊ ದೆಕುನ್, ಆನಿ ಲಾಳಿ ಮಾರ್ಲ್ಲ್ಯಾ ಚಾಮ್ಡ್ಯಾಚಾ ವ್ಹಾಣಾಂಚೊ ‘ನರು-ನುರು’ ಆವಾಜ್ ಆಯ್ಕೊನ್, ಮ್ಹಜ್ಯಾ ಕುಡಾಚೆಂ ದಾರ್ ಉಗ್ತೆಂ ಕರುನ್ ಹಾಂವ್ ಭಾಯ್ರ್ ಆಯ್ಲೊಂ.
“ಬೆಸಾಂವ್ ದಿಯಾ ಪಾದ್ರ್ಯಾಬಾಂನೊ.”
“ದೆವಾಚೆಂ ಬೆಸಾಂವ್.”
ತಾಕಾ ದೆಖ್ತಾನಾ, ‘ಹೊ ಆಮ್ಚ್ಯೆ ಫಿರ್ಗಚೆಚೊ ಆಡಳ್ತೆದಾರ್ ಆನಿ ಇಗರ್ಜೆ ವಾಡ್ಯಾಚೊ ಗುರ್ಕಾರ್ ಜುವಾಂವ್ ಕುವೆಲ್’ ಮ್ಹಣೊನ್ ದೋನ್ ದಿಸಾಂ ಪಯ್ಲೆಂ ಆದ್ಲ್ಯಾ ವಿಗಾರಾನ್ ಮ್ಹಾಕಾ ವಳಕ್ ಕರುನ್ ದಿಲ್ಲೊ ಉಡಾಸ್ ಆಯ್ಲೊ.
ತಾಚೊ ತೊ ಧಡಂಗ್ ಜೀವ್, ತ್ಯೆ ಕುಡಿ ತೆಕಿದ್ ದಾರ್ಬ್ಯೊ ದಾಟ್ ಮಿಶ್ಯೊ ದೆಖ್ತಾನಾ, ತೊ ಕಾರ್ಭಾರಿ ಮನಿಸ್ ಮ್ಹಣ್ ಹೆರಾಂನಿ ಮ್ಹಾಕಾ ವಿವರ್ಸುಂಚಿ ಗರ್ಜ್ ನಾತ್ಲ್ಲಿ.
“ತುಜೆಂ ನಾಂವ್ ಜುವಾಂವ್ ಮ್ಹಳ್ಳೆಪರಿ ಉಡಾಸ್ ಮ್ಹಾಕಾ.”
“ತುಮಿ ಸಾಂಗ್ಚೆಂ ಸಾರ್ಕೆಂ. ಹಾಂವ್ ಜುವಾಂವ್ ಕುವೆಲ್, ಫಿರ್ಗಜೆಚೊ ಆಡಳ್ತೆದಾರ್.”
“ಹಾಂವ್ ಜಾಣಾಂ, ಆದ್ಲ್ಯಾ ವಿಗಾರಾನ್ ತುಜಿ ಮ್ಹಾಕಾ ವಳಕ್ ಕರುನ್ ದಿಲ್ಲಿ. ಹಾಂವೆಂ ಮಾತ್ರ್, ಮ್ಹಜ್ಯಾ ಫಿರ್ಗಜ್ಗಾರಾಂಕ್ ನಾಂವಾನ್ಂಚ್ ಉಲೊ ಕರ್ಚೆಂ. ಹ್ಯಾ ಖಾತಿರ್ ಮ್ಹಜೆರ್... ಕಾಂಯ್...”
“ನಾ ..... ನಾ ...... ತಶೆಂ ಕಾಂಯ್ನಾ ಫಾದರ್. ತುಮಿ ಪ್ರಾಯೆನ್ ಲ್ಹಾನ್ ತರ್ಯೀ ಆಮ್ಚೆ ವ್ಹಡಿಲ್.”
“ಬರೆಂ ತರ್, ಆಮಿ ಆತಾಂ ಬಸೊನ್ ಉಲಂವ್ಯಾಂ”. ಹಾಂವ್ ಬಸ್ಲೊಂ ಆನಿ ಮ್ಹಜೆ ಮುಕಾರ್ ಆಸ್ಚೆಂ ಕದೆಲ್ ತಾಕಾ ಹಾಂವೆಂ ದಾಕಯ್ಲೆಂ “ತುಂ ಕಾಂಯ್ ಗರ್ಜೆನ್ ಪುಣೀ ಆಯ್ಲೊಯ್? ವಾ....”
“ಗರ್ಜೆನ್ಂಚ್ ಮ್ಹಣ್ಯೆತ್.” ತಾಣೆ ಹಳ್ತಾರ್ ಖೊಂಕ್ಲಿ ಕಾಡುನ್ ತಾಳೊ ಸಾರ್ಕೊ ಕರುನ್ ಘೆತ್ಲೊ.
“ಯೆಂವ್ಚಾ ನ್ಹಯ್ ವಯ್ಲ್ಯಾ ಆಯ್ತಾರಾ, ಫಿರ್ಗಜೆಚೆ ಸಗ್ಳ್ಯಾ ಲೊಕಾಚೊ ಜೆರಾಲ್ಜುಂತ್ ದವರಿಜಾಯ್.”
“ಪುಣ್...”
“ಕಾರಣ್ ಹಾಂವ್ ಸಾಂಗ್ತಾಂ,” ತಾಣೆ ಮ್ಹಾಕಾ ಚಡ್ತಿಕ್ ಉಲಂವ್ಕ್ ಆವ್ಕಾಸ್ ದಿಲೊನಾ.
“ಹಾಂಗಾಚ್ಯೆ ಇಗರ್ಜೆ ಇಸ್ಕೊಲಾಂತ್ ಎಕ್ಲಿ ವಿಧವ್ ಟೀಚರ್ ಆಸಾ. ತಿಚ್ಯೆರ್ ಫಿರ್ಗಜೆಚ್ಯಾ ಲೊಕಾನ್ ಬಹಿಷ್ಕಾರ್ ಘಾಲಾ.”
“ಕಿತ್ಯಾಕ್?” ಮ್ಹಜೆಂ ಆವ್ಚಿತ್ ಸವಾಲ್ ಆಯ್ಕೊನ್ ತೊ ಘುಸ್ಪೊಡ್ಲೊನಾ.
“ತಿ ಕಾಣಿ ಲಾಂಬ್ ಆಸಾ ಫಾದರ್, ಮಟ್ವ್ಯಾನ್ ಹಾಂವೆಂ ಸಾಂಗ್ಚೆಂ ಜಾಲ್ಯಾರ್, ಆಮ್ಚ್ಯಾ ಲೊಕಾಕ್ ತಿ ಸ್ಕಾಂದಲ್ ದಿತಾಲಿ. ಆಮ್ಚ್ಯೆ ಸಮಾಜೆಕ್ ಆನಿ ಫಿರ್ಗಜೆಕ್ ತಿ ಕಳಂಕ್ ಜಾವ್ನಾಸ್ಲಿ.”
“ತರಿ, ತಿಕಾ ತುಮಿ ಬೂದ್ಬಾಳ್ ಸಾಂಗೊನ್, ಬರ್ಯೆ ವಾಟೆಕ್ ಹಾಡ್ಯೆತಿ.”
“ತುಮಿ ಸಾಂಗ್ಚೆ ಆದಿಂಚ್, ಹೆಂ ಸರ್ವ್ ಆಮಿ ಕರುನ್ ಜಾಲಾಂ. ಅಸಲೊ ಆಮ್ಚೊ ವಾವ್ರ್ ಖಡ್ಪಿ ಫಾತ್ರಾರ್ ಝರ್ ದೆಖೊಂಕ್ ಪ್ರಯತ್ನ್ ಕರ್ಚೆಪರಿ ನಿರ್ಫಳ್ ಜಾಲಾ.”
“ತರ್ ಆತಾಂ ಕಿತ್ಯಾಕ್ ಜೆರಾಲ್ ಜುಂತ್ ಆಪಯ್ಜಯ್?”
“ಸಾಂಗ್ತಾಂ ಆಯ್ಕಾ. ತಿಕಾ ಆಮಿ ಬಹಿಷ್ಕಾರ್ ಘಾಲುನ್ ಸಮಾಜೆ ಥಾವ್ನ್ ಭಾಯ್ರ್ ದವರ್ಲಿಚ್ ದವರ್ಲಿ. ತಿ ಆತಾಂ ಆಪ್ಲೆ ಗುನ್ಯಾಂವ್ ವಳ್ಕೊನ್, ಬರಿ ಜಿಣಿ ಜಿಯೆಂವ್ಕ್ ಕಬೂಲ್ ಜಾಲ್ಯಾ. ಆಶೆಂ ಆಸ್ತಾಂ, ತಿಕಾ ಪರತ್ ಆಮ್ಚ್ಯೆ ಸಮಾಜೆಚ್ಯಾ ಹಿಂಡಾಕ್ ಪಾಟಿಂ ಘೆಂವ್ಚ್ಯಾ ವಿಶ್ಯಾಂತ್ ಜುಂತಾಚೆರ್ ನಿರ್ಧಾರ್ ಕರಿಜಾಯ್.”
“ಭೋವ್ ಬರೆಂ, ಜುಂತಾ ವಿಶ್ಯಾಂತ್ ಮ್ಹಜಿ ಕಸಲಿಚ್ ಅಡ್ಕಳ್ ನಾ. ಕಿತ್ಯಾಕ್, ಎಕ್ಲೊ ಬರೊ ಗೊವ್ಳಿ ಆಪ್ಲ್ಯೆ ಶೆಂಬೊರ್ ಶೆಳಿಯಾಂಚಿ ಪರ್ವಾ ಕರಿನಾಸ್ತಾಂ, ಚುಕೊನ್ ಗೆಲ್ಲ್ಯೆ ಎಕ್ಯೆ ಶೆಳಿಯೆಚ್ಯೆ ಸೊಧ್ನೆಕ್ ಭಾಯ್ರ್ ಸರ್ತಾ ತ್ಯೆ ಪರಿಂ ಮ್ಹಾಕಾಯೀ ಹ್ಯಾ ವಿಶ್ಯಾಂತ್ ವರ್ತೊ ಸಂತೋಸ್.”
“ತರ್ ತುಮ್ಕಾಂ ದೇವ್ ಬರೆಂ ಕರುಂ.” ತಿತ್ಲ್ಯಾರ್ ತೊ ಉಟೊನ್ ಉಬೊ ಜಾಲೊ. “ಚಡ್ ಉಲವ್ನ್ ತುಮ್ಚೊ ವೇಳ್ ಪಾಡ್ ಕರುಂಕ್ ಮ್ಹಾಕಾ ನಾಕಾ. ಯೆಂವ್ಚಾ ಆಯ್ತಾರಾ, ಮುಕ್ಲ್ಯಾ ಆಯ್ತಾರಾಚಾ ಜುಂತಾ ವಿಶ್ಯಾಂತ್ ಲೊಕಾಕ್ ತುಮಿ ವಿವರ್ ದಿತೆಲ್ಯಾತ್ ಮ್ಹಣ್ ಹಾಂವ್ ಪಾತ್ಯೆತಾಂ.”
ಶಿಪಾಯಾಕ್ ಹುಕುಮ್ ದಿಂವ್ಚ್ಯಾ ರಾಯಾಪರಿ ಮ್ಹಾಕಾ ತಾಕಿದ್ ದೀವ್ನ್, ಆಮ್ಚ್ಯೆ ಫಿರ್ಗಜೆಚೊ ಕಾರ್ಭಾರಿ ಜುವಾಂವ್ ಕುವೆಲ್, ಉಬೊ ಜಾವ್ನ್, ವ್ಹಡಾ ಗತ್ತಾನ್ ಮೆಟಾಂ ಕಾಡುನ್ ‘ನರು-ನುರು’ ಆವಾಜ್ ಕರುನ್ ಮ್ಹಜೆ ಮುಕ್ಲೊ ನಾ ಜಾಲೊ.
* * * * *
“ಸಕಾಳಿಂ ತುಮಿ ಕುವೆಲಿಲಾಗಿಂ ಉಲಯ್ತಾನಾ, ಹಾಂವೆಂ ಆಯ್ಕಾಲೆಂ ಸಾಯ್ಬಾಂನೊ” ದೊನ್ಪಾರಾಂ ಜೆವ್ಣಾಚಾ ವೆಳಾ, ರಾಂದ್ಪಿ ಬಾಬಿ ಉಲಯ್ಲೊ. “ತ್ಯಾ ಕುವೆಲಿ ಬಾಬ್ತಿಂ ಸಗ್ಳಿ ಗಜಾಲ್ ತುಮಿ ನೆಣಾಂ ಆಸ್ತೆಲ್ಯಾತ್.”
“ಆದ್ಲ್ಯಾ ವಿಗಾರಾನ್ ವಯ್ಲ್ಯಾಬಾರ್ ಥೊಡೆಂ ಮ್ಹಾಕಾ ಸಾಂಗ್ಲಾಂ. ಹ್ಯೆ ಫಿರ್ಗಜೆಂತ್ ಸಬಾರ್ ಕ್ರಿಸ್ತಾಂವ್ ಲೋಕ್ ತಾಚೆ ಆಸ್ತಿಚೆರ್ ಘೊಳ್ತಾ. ಗ್ರೇಸ್ತ್ ಮನಿಸ್ ಮ್ಹಣ್ತಾನಾ, ಜುವಾಂವ್ ಕುವೆಲಿಚ್ಯಾ ಉತ್ರಾಕ್ ಮಿಕ್ವೊನ್ ವಚೊಂಕ್, ಎಕ್ಲೊಯೀ ಫಿರ್ಗಜ್ಗಾರ್ ಧಯ್ರ್ ಘೆನಾ.”
“ತಿತ್ಲೆಂಚ್ ನ್ಹಯ್, ತಾಚ್ಯಾ ಉತ್ರಾಕ್ ಗುಮಾನ್ ಕರಿನಾತ್ಲ್ಲ್ಯಾಂಕ್ ತೊ ಕೆದಿಂಕ್ಚ್ ಬರ್ಕತ್ ಜಾಂವ್ಕ್ ಸೊಡಿನಾ. ತಾಚ್ಯಾಚ್ ಧೊಶಿಂ ಖಾತಿರ್ ಆದ್ಲ್ಯಾ ವಿಗಾರ್ ಸಾಯ್ಬಾಂನಿ ದುಸ್ಯ್ರೆ ಫಿರ್ಗಜೆಕ್ ವರ್ಗ್ ಮಾಗೊನ್ ಘೆತ್ಲೊ.”
“ಆನಿ ತ್ಯೆ ಟೀಚರಿ ವಿಶ್ಯಾಂತ್ ಕಿತೆಂ ಗಜಾಲ್?”
“ತಿಚಿ ಮ್ಹಾಕಾ ಬಿರ್ಮತ್ ದಿಸ್ತಾ” ಮ್ಹಾತಾರ್ಯಾ ಬಾಬಿಚಾ ತಾಳ್ಯಾಂತ್ ತಿಚೆ ವಯ್ಲಿ ದಯಾ ನಿಶೆತಾಲಿ. “ಬರ್ಯಾ ಗುಣಾಂಚಿ ಸ್ತ್ರೀ ತಿ. ಕಾಜಾರ್ ಜಾವ್ನ್ ತೀನ್ ವರ್ಸಾಂ ಭಿತರ್ ತಿಚೊ ಭರ್ತಾರ್ ಖೆವಾದೆ ವರ್ವಿಂ ಅಂತರ್ಲೊ. ಉಪ್ರಾಂತ್ ತಿ, ಆಪ್ಲ್ಯಾ ಎಕ್ಲ್ಯಾಚ್ ಚೆರ್ಕ್ಯಾ ಭುರ್ಗ್ಯಾಕ್ ಆಪ್ಲೆಂ ಸರ್ವಸ್ವ್ ಮ್ಹಣ್ ಚಿಂತುನ್, ಕೊಣಾಚಾಚ್ ರಗ್ಳ್ಯಾಂಕ್ ವಚನಾಸ್ತಾಂ ಜಿಯೆವ್ನ್ ಆಸ್ತಾನಾ, ಕಿತ್ಯಾಕ್ ಮ್ಹಣ್ ಹಾಂವ್ ನೆಣಾಂ ಕುವೆಲಿಚಿ ತಿ ದುಸ್ಮಾನ್ ಜಾಲಿ!”
“ತರ್ ತಿ ನಿರಪ್ರಾದಿ ಮ್ಹಣ್ ತುಜಿ ಅಭಿಪ್ರಾಯ್?”
“ಖಂಡಿತ್ ಜಾವ್ನ್,” ಬಾಬಿಕ್ ತಿಚೆ ವಯ್ರ್ ವರ್ತೊ ಅಭಿಮಾನ್ ಆಸಾ ಮ್ಹಣ್ ಮ್ಹಾಕಾ ಸ್ಪಷ್ಟ್ ಜಾಲೆಂ.
ಜುವಾಂವ್ ಕುವೆಲಿನ್, ಫಿರ್ಗಜೆಚ್ಯಾ ಸರ್ವ್ ಲೊಕಾಕ್ ಆಪ್ಲ್ಯೆ ಮುಟಿ ಭಿತರ್ ಲಿಪವ್ನ್ ವ್ಯಕ್ತಿಗತ್ ದ್ವೆಷಾ ಖಾತಿರ್, ತಿಚೆರ್ ಬಹಿಷ್ಕಾರ್ ಘಾಲಯ್ಲೊ ಮ್ಹಳ್ಳೆಂ ಕೊಡು ಸತ್ ಮ್ಹಜೆ ಮತಿಂತ್ ಆತಾಂ ಥಿರ್ ಜಾಲೆಂ.
“ಏಕ್ ಕಾಮ್ ಕರ್ ಬಾಬಿ, ಸಾಂಜೆರ್ ಇಸ್ಕೊಲ್ ಜಾಲ್ಲೆ ಕೂಡ್ಲೆ ತ್ಯೆ ಟೀಚರಿಕ್ ಮ್ಹಾಕಾ ಭೆಟೊಂಕ್ ಸಾಂಗ್. ಖುದ್ದ್ ತಿಚೆ ಥಾವ್ನ್ ಸರ್ವ್ ವಿಶಯ್ ಮ್ಹಾಕಾ ಸಮ್ಚೊನ್ ಘೆಜಾಯ್.”
* * * * *
ಸಾಂಜೆರ್ ಪಾಂಚ್ ವ್ಹಾಜ್ತಾನಾ, ಎಕ್ಲಿ ಸ್ತ್ರೀ ಮಾನ್ಸುಗೆಚ್ಯೆ ಚಾಲಿನ್, ಹಾಂವೆಂ ಬಸೊನ್ ಆಸ್ಚ್ಯಾ ‘ಫೊರ್ಟಿಕೊ’ ಕುಶಿಂ ಚಮ್ಕೊನ್ ಯೆಂವ್ಚಿ ಹಾಂವೆಂ ದೆಖ್ಲಿ. ಚಡ್ ಸುಂದರಿ ತಿ ನ್ಹಯ್ ತರ್ಯೀ, ಲಕ್ಷಣ್ವಂತ್ ದಿಸ್ತಾಲಿ.
“ತುಂ ಆಮ್ಚ್ಯಾ ಇಸ್ಕೊಲಾಚಿ ಶಿಕ್ಷಕಿಮೂ?”
“ವ್ಹಯ್ ಫಾದರ್, ಬೆಸಾಂವ್ ದಿಯಾ.”
“ದೆವಾಚೆಂ ಬೆಸಾಂವ್”. ತಿಚ್ಯಾ ಮುಖಮಳಾರ್ ತಿಚ್ಯಾ ಕಾಳ್ಚಾಂತ್ಲಿಂ ಭೊಗ್ಣಾಂ ವಾಚುಂಕ್ ಹಾಂವೆಂ ಪ್ರಯತ್ನ್ ಕೆಲೆಂ. ತ್ಯಾ ವರ್ವಿಂ ತಿ ಕಪಟಿ ನ್ಹಯ್, ಬಗಾರ್ ಸಾದಿ ಬೊಳಿ ಸ್ತ್ರೀ ಮ್ಹಳ್ಳೊ ವಿಶ್ವಾಸ್ ಮ್ಹಜೆ ಥಂಯ್ ರೂಪಿತ್ ಜಾಲೊ.
“ಉಬಿಚ್ ರಾವನಾಕಾ, ಹಾಂಗಾ ಬಸ್” ತಿಕಾ ಹಾವೆಂ ಮ್ಹಜ್ಯಾ ಮೆಜಾ ಸಾಮ್ಖಾರ್ ಆಸ್ಚೆಂ ಕದೆಲ್ ದಾಕಯ್ಲೆಂ.
“ನಾ ಫಾದರ್,” ತಿಚೊ ತಾಳೊ ಕಾಂಪ್ತಾಲೊ. “ತುಮ್ಚ್ಯಾ ಮುಕಾರ್ ಬಸೊಂಕ್ ಹಾಂವ್ ಫಾವೊ ನ್ಹಯ್. ಫಕತ್ ತುಮಿ ಮ್ಹಾಕಾ ಆಪಯ್ಲೆಲೆ ಖಾತಿರ್ ಹಾಂವ್ ಹಾಂಗಾಸರ್ ಆಯ್ಲ್ಯಾಂ.”
ತಿಚೆಂ ಖಾಲ್ತೆಪಣ್ ಮ್ಹಾಕಾ ಮೆಚ್ವಾಲೆಂ. “ಬರೆಂ ತರ್, ತುಜೆ ವಿಶಾಂತ್ ಥೊಡೊ ವಿವರ್ ಹಾಂವೆಂ ಸಮ್ಜೊನ್ ಘೆಜಾಯ್, ಸಾಂಗ್ಲೆಲೆಪರಿ, ತುಜೆಂ ನಾಂವ್......?”
“ಹಿಲ್ಡಾ ಮತಾಯಸ್ ಫಾದರ್, ಮ್ಹಜೊ ಪತಿ ಅಂತರ್ಲಾ.”
“ತೆಂ ಆಸೊಂ ಹಿಲ್ಡಾ, ತುಕಾ ಆನಿ ಜುವಾಂವ್ ಕುವೆಲಿಕ್ ಕಾಂಯ್ ಖಾಸ್ಗಿ ಮನಸ್ತಾಪ್ ಆಸಾ ಮ್ಹಳ್ಳೊ ದುಭಾವ್ ಮ್ಹಾಕಾ.”
“ತ್ಯಾಚ್ ವರ್ವಿಂ ಆಜ್ ಹಾಂವ್.....”, ತಿ ಆಪ್ಲಿಂ ಭೊಗ್ಣಾಂ ಲಿಪಂವ್ಕ್ ಸಕ್ಲಿನಾ. ಘಡ್ಯೆನ್ ತಿಚ್ಯಾ ದೊಳ್ಯಾಂನಿ ದುಖಾಂ ಭರೊನ್ ಆಯ್ಲಿಂ. “ಆಜ್ ಹಾಂವ್ ಆಮ್ಚ್ಯೆಚ್ ಸಮಾಜೆ ಥಾವ್ನ್ ವಿಂಗಡ್ ಜಾಲ್ಯಾಂ, ಸರ್ವಾಂನಿ ಏಕ್ ಜಾವ್ನ್ ಮ್ಹಾಕಾ ತಾಣಿಂ ಪಯ್ಸ್ಲೊಟ್ಲಾಂ.”
“ಪುಣ್ ಕಿತ್ಯಾಕ್...?” ಹಾಂವೆಂ ವಿಚಾರ್ಲೆಂ “ತುಂವೆಂ ತೆದಿ ವ್ಹಡ್ ಚೂಕ್ ಕಸಲಿ ಆದಾರ್ಲ್ಯಾಯ್?”
“ಹಾಂವೆಂ ಆದಾರ್ಲೆಲ್ಯಾ ಖೊಟೆಪಣಾ ವಿಶ್ಯಾಂತ್ ಖುದ್ದ್ ದೊಳ್ಯಾಂನಿ ದೆಖ್ಲೆಲೆಪರಿಂ ಹ್ಯೆ ಫಿರ್ಗಜೆಚ್ಯಾ ಸಬಾರ್ ಜಣಾಂನಿ ಫಟ್ ಸಾಕ್ಷಿ ಸಾಂಗ್ಲ್ಯಾತ್.....” ಆಪ್ಲ್ಯಾ ಕಾಂಪ್ಚ್ಯಾ ತಾಳ್ಯಾಚೆರ್ ಹುಕುಮ್ ಚಲವ್ನ್ ಮ್ಹಳ್ಳೆಪರಿ ತಿಣೆ ಮುಂದರಿಲೆಂ. “ಆಮ್ಚ್ಯಾಚ್ ಲೊಕಾನ್ ಸಗ್ಳ್ಯೆ ಫಿರ್ಗಜೆಚ್ಯಾ ಜುಂತಾಚೆರ್ ಆನಿ ಆದ್ಲ್ಯಾ ವಿಗಾರ್ ಸಾಯ್ಬಾ ಸಾಮ್ಕಾರ್, ‘ಏಕ್ ಪರ್ಕಿ ದಾದ್ಲ್ಯಾ ಸವೆಂ ವಾಯ್ಟ್ ಸಂಬಂಧ್ ದವ್ರುನ್ ಆಸ್ಚಿ ಬಾಜಾರಿ ಸ್ತ್ರೀ’ ಮ್ಹಳ್ಳೊ ನಾಕಾರಿ ಗುನ್ಯಾಂವ್ ಮ್ಹಜೆರ್ ದಾಖಲ್ ಕೆಲೊ”
“.......” ಮ್ಹಾಕಾ ತೆದ್ನಾಂ ಉಲಂವ್ಕ್ ಉತ್ರಾಂ ಸುಟ್ಲಿನಾಂತ್.
“ಕೊಣ್ ಕಿತೆಂಯ್ ಸಾಂಗೊಂದಿತ್ ಫಾದರ್, ಹಾಂವ್ ಮಾತ್ರ್ ಮ್ಹಜ್ಯಾ ನಿಸ್ಕಳ್ಪಣಾ ವಿಶ್ಯಾಂತ್ ನಿತಳ್ ಆಸಾಂ ಜಾಲ್ಲ್ಯಾನ್, ನಿರಪ್ರಾಧಿ ಜಾವ್ನಾಸಾಂ ಆನಿ ಮ್ಹಾಕಾ ಕಸಲಿಯೀ ಭಿರಾಂತ್ ಭೊಗನಾ.”
“ತುಜೆ ಕಳ್ವಳೆ ಆನಿ ಭೊಗ್ಣಾಂ ವಳ್ಕೊನ್, ತುಂ ನಿರಪ್ರಾದಿ ಮ್ಹಣ್ ಮ್ಹಾಕಾ ಸ್ಪಷ್ಟ್ಕಳ್ತಾ ಹಿಲ್ಡಾ. ಪುಣ್ ಹಾಂವ್ ತುಕಾ ಥೊಡಿ ಭುಜಾವಣ್ ಶಿವಾಯ್ ಹೆರ್ ಕಸಲೆಂಚ್ ದೀಂವ್ಕ್ ಸಕನಾ.”
“ಮ್ಹಜ್ಯಾ ವಾಂಟ್ಯಾಕ್ ಹೊಚ್ ವ್ಹಡ್ಲೊ ಉಪ್ಕಾರ್ ಸಾಯ್ಬಾಂನೊ” ಹರ್ದ್ಯಾರ್ ಹಾತ್ ಜೊಡುನ್ ಉಪ್ಕಾರಿ ಮನಾನ್ ತಿ ಮ್ಹಣಾಲಿ.
“ಆದ್ಲ್ಯಾವಿಗಾರಾಂನಿ ಜುಂತಾಚೆರ್ ಮ್ಹಜ್ಯಾ ನಿರಪ್ರಾಧಿಪಣಾ ವಿಶ್ಯಾಂತ್ ತರ್ಕ್ ಕರುನ್ ಮ್ಹಾಕಾ ತೆಂಕೊ ದಿಲ್ಲೊ. ಪುಣ್ ತಾಂಚ್ಯಾ ರಾಜಾಂವಾಕ್ ಜುವಾಂವ್ ಕುವೆಲಿಚ್ಯಾ ಭಿಂಯಾನ್ ಕಾಂಪ್ಚ್ಯಾ ಲೊಕಾನ್ ಮೋಲ್ ದಿಲೆಂನಾ!”
“ಜುವಾಂವ್ ಕುವೆಲಿನ್, ತುಜೆ ವಯ್ರ್ ಇತ್ಲೆಂಯ್ ಜಿದ್ದ್ ದವರುಂಕ್ ಕಾರಣ್ ಕಸಲೆಂ ಮ್ಹಣ್ ಮ್ಹಾಕಾ ಸಮ್ಜನಾ.”
“ತಿ ಕಥಾ ಭೋವ್ ಮಟ್ವಿ. ಕುವೆಲಿಚೊ ಪೂತ್ ಅಲೆಕ್ಸ್ ದೋನ್ ವರ್ಸಾಂ ಥಾವ್ನ್ ಮ್ಹಜ್ಯೆ ಕ್ಲಾಸಿಂತ್, ಮ್ಹಣ್ಜೆ ಪಾಂಚ್ವೆಂತ್ ಲೊಳ್ತಾ. ತೊ ಶಿಕ್ಪಾಂತ್ ಎಕ್ದಮ್ ಪಾಟಿಂ ಆನಿ ಪೊಕ್ರಿಪಣಾಂತ್ ಭೋವ್ ಮುಕಾರ್. ಹಾಂವೆಂ ತಾಕಾ ಖಂಚಾಯ್ರಿತಿನ್ ಉತ್ತೀರ್ಣ್ ಕರಿಜಾಯ್ ಮ್ಹಣ್ ಆದ್ಲ್ಯಾ ವರ್ಸಾ ಕುವೆಲಿನ್ ಮ್ಹಜೆಲಾಗಿಂ ಉಪ್ಕಾರ್ ಮಾಗ್ಲೊ. ಹಾಂವೆಂ ಇನ್ಕಾರ್ ಕೆಲ್ಲ್ಯಾನ್ ತೊ ರಾಗಾರ್ ಜಾಲೊ.”
‘ಯೆದೊಳ್ ಪರ್ಯಾಂತ್ ಖಂಯ್ಚಾಯ್ ಎಕ್ಲ್ಯಾಪುತಾನ್ ಜುವಾಂವ್ ಕುವೆಲಿಚೆಂ ಉತಾರ್ ಕಾಡುನ್ ಉಡಂವ್ಚೆಂ ಧಯ್ರ್ ಘೆಂವ್ಕ್ ನಾ ಹಿಲ್ಡಾ’ ತಾಣೆ ಮ್ಹಾಕಾ ಭೆಶ್ಟಾಂವ್ಕ್ ಪಳೆಲೆಂ.
‘ಆಜ್ ತುಂ ಏಕ್ ವಿಧವ್ ಅಬಲ್ ಸ್ತ್ರೀ, ಜುವಾಂವ್ ಕುವೆಲಿಚಿ ಹುಕುಮ್ ಮಸ್ತುನ್ ಉಡಯ್ತಾಯ್?’
“ಹ್ಯಾ ಏಕ್ ಚಿಲ್ಲರ್ ಆನಿ ಖಾಸ್ಗಿ ವಿಶಯಾ ಖಾತಿರ್ ಜುವಾಂವ್ ಕುವೆಲ್ ತುಜೊ ದುಸ್ಮಾನ್ ಜಾಲೊ ಆನಿ ತಾಣೆ ತುಜೆರ್ ಫಾರಿಕ್ಪಣ್ ಘೆಂವ್ಚೆ ಖಾತಿರ್, ಫಟ್ ಸಾಕ್ಷಿ ತಯಾರ್ ಕರುನ್, ತುಜೆ ವಯ್ರ್ ಬಹಿಷ್ಕಾರ್ ಫಾಲಯ್ಲೊ?”
“ವ್ಹಯ್ ಫಾದರ್ ಕಾರಣ್ ಚಿಲ್ಲರ್ ತರಿ, ಮ್ಹಜ್ಯಾ ಧೃಡ್ಪಣಾ ತೆವ್ಶಿಂ ದೆಖೊನ್ ದರ್ಭಾರಿ ಕುವೆಲಿಚೊ ಸ್ವಾಭಿಮಾನ್ ಗರ್ವಾಕ್ ಪಡ್ಲೊ ಆನಿ ಹಾಂವ್ ತಾಚ್ಯಾ ರಾಗಾಕ್ ಬಲಿ ಜಾಲಿಂ.”
‘ಹ್ಯಾ ಸಂಸಾರಿಂ, ಜುವಾಂವ್ ಕುವೆಲಿ ತಸಲೆ ಧಾರುಣ್ ಕಾಳ್ಜಾಚೆ ಮನಿಸ್ ಲೊಕಾ ಮಧೆಂ ಘನಾ-ಮಾನಾಚೆಂ ಜೀವನ್ ಸಾರುನ್ ಆಸಾತ್’ ಮ್ಹಜೆ ಇತ್ಲ್ಯಾಕ್ ಹಾಂವ್ ಉಲಯ್ಲೊಂ. ‘ನಾಪಾಸ್ ಜಾಲ್ಲ್ಯಾ ಆಪ್ಲ್ಯಾ ಪುತಾಕ್ ಉತ್ತೀರ್ಣ್ ಕರಿನಾತ್ಲ್ಲ್ಯಾ ಎಕಾಚ್ ಕಾರಣಾನ್, ಜುವಾಂವ್ ಕುವೆಲಿನ್ ಹಿಲ್ಡಾಚೆರ್ ಕೆದೊ ವ್ಹಡ್ ಗುನ್ಯಾಂವ್ ಥಾಪ್ಲೊ? ಆನಿ ಹಿಕಾ ಕೆದ್ಯೆ ವ್ಹಡ್ಲ್ಯೆ ನಾಲಿಸಾಯೆಕ್ ವಳಗ್ ಕೆಲಿ?’
“ಆಮ್ಚ್ಯಾಚ್ ಇಸ್ಕೊಲಾಂತ್ ಎಕ್ಲೊ ಹಿಂದು ಕಾಜಾರಿ ಮೆಸ್ತ್ರಿ ಆಸಾ” ತಿಚ್ಯಾ ಉತ್ರಾಂ ವರ್ವಿಂ ಮ್ಹಜಿಂ ಚಿಂತ್ನಾಂ ಥಾಂಬ್ಲಿಂ.
“ಹಾಂವ್ ಆನಿ ತೊ ಅಸೆಂ ಆಮಿ ದೊಗಾಂಚ್ ಶಿಕ್ಷಕಾಂ ಜಾಲ್ಲ್ಯಾನ್, ಸಬಾರ್ ವಿಶಯಾಂನಿ ಆಮಿ ಎಕಾಮೆಕಾ ಏಕಾ ಮನಾನ್ ವಾವ್ರ್ ಕರಿಜಯ್ ಪಡ್ತಾ.”
“ತರ್, ಕುವೆಲಿಚ್ಯೆ ನದ್ರೆಕ್ ಹೊ ವಿಶಯ್ ಸುಲಭಾಯೆನ್ ಸಾಂಪಡ್ಲೊ.”
“ತಾಣೆ ಆಪ್ಲ್ಯಾ ಫಾರಿಕ್ಪಣಾಚಾ ಸ್ವಾರ್ಥಾ ಖಾತಿರ್, ಇಸ್ಕೊಲಾಚ್ಯಾ ಭುರ್ಗ್ಯಾಂ ಆನಿ ತಾಂಚ್ಯಾ ವ್ಹಡಿಲಾಂ ಮಾರಿಫಾತ್ ಏಕ್ ಫಟ್ಕಿರಿ ಕಾಣಿ ಸತ್ ಕರುನ್ ಉಬಿ ಕೆಲಿ. ಆನಿ ಫಟ್ ಸಾಕ್ಷಿ ವರ್ವಿಂ ಮ್ಹಜೆರ್ ಬಹಿಷ್ಕಾರ್ ಘಾಲಯ್ಲೊ”
“ತುಂವೆಂ ಸಾಂಗ್ಚೆಂ ಸರ್ವ್ ಸತ್ ವ್ಹಯ್ ಜಾಲ್ಯಾರ್ ಹಿಲ್ಡಾ, ತುಂ ದೆವಾ ಮುಖಾರ್ ವರ್ತೆಂ ಜಾವ್ನಾಸಾಯ್! ನಿರಪ್ರಾಧಿ ಜಾವ್ನ್ ತುಂವೆಂ ಭಗ್ಲೆಲ್ಯಾ ಕಳ್ವಳ್ಯಾಂಚೆಂ ಇನಾಮ್ ತುಜೆ ಥಾವ್ನ್ ಚುಕೊನ್ ವೆಚೆಂನಾ. ತುಜೆರ್ ಆನಿ ತುಜ್ಯೆ ಸಂತತಿಚೆರ್ ದೆವಾಚಿಂ ಧಾರಾಳ್ ಬೆಸಾಂವಾಂ ಪಡ್ತೆಲಿಂ!”
“ಅಸಲ್ಯಾ ನಿರಾಪ್ರಾಧಿಪಣಾಚ್ಯಾ ಧಯ್ರಾ ವರ್ವಿಂ ಜಿವ್ಘಾತಾಂಚ್ಯೆ ತಾಳ್ನೆಂಚೆರ್ ಹಾಂವೆಂ ಜಯ್ತ್ವ್ಹೆಲಾಂ” ತಿಣೆಂ ಕಳ್ವಳ್ಯಾಂಚ್ಯಾ ಭೊಗ್ಣಾಂಚೊ ಲಾಂಬ್ ಸ್ವಾಸ್ ಸೆವ್ಲೊ. “ಆನಿ ಆತಾಂ ಮ್ಹಜ್ಯಾ ಎಕ್ಲ್ಯಾಚ್ ಪುತಾಚೊ ಫುಡಾರ್ ವಿಭಾಡ್ನಾಯೆ. ಸಾಂಗಾತಾಚ್, ಮ್ಹಜ್ಯೆ ಸಮಾಜೆಚ್ಯಾ ಕ್ರಿಸ್ತಾಂವಾಂಚ್ಯಾ ಜಮ್ಯಾ ಥಾವ್ನ್ ಪಯ್ಸ್ ರಾವೊಂಕ್ ಹಾಂವ್ ಸಕಾನಾತ್ಲ್ಲೆ ವರ್ವಿಂ, ಮ್ಹಜ್ಯಾ ವಯ್ಲೊ ಬಹಿಷ್ಕಾರ್ ಪಾಟಿಂ ಕಾಡ್ಚ್ಯೆಖಾತಿರ್ ಕಸಲೊಯೀ ಸಾಕ್ರಿಫಿಸ್ ಕರುಂಕ್ ಹಾಂವ್ ತಯಾರ್ ಜಾಲ್ಯಾಂ.”
ಹಿಲ್ಡಾಚ್ಯಾ ಬರ್ಯಾ ಮನಾ ಆನಿ ಧಾರುಣ್ ಜಾಯ್ನಾತ್ಲೆಲ್ಯಾ ಮೊವಾಳ್ ಕಾಳ್ಜಾಕ್ ವಳ್ಕೊನ್, ತಿಚ್ಯೆರ್ ಮ್ಹಾಕಾ ವರ್ತೊ ಅಭಿಮಾನ್ ಭೊಗ್ಲೊ.
“ದೆವಾಚಿ ಕುರ್ಪಾ ತುಜೆರ್ ಆಸ್ತೆಲಿ ಹಿಲ್ಡಾ.”
ಹಾಂವ್ ಉಟೊನ್ ಉಬೊ ಜಾಲೊಂ. “ತುಂ ಆತಾಂ ವಚ್, ದೆವಾಚೆಂ ಬೆಸಾಂವ್ ತುಜಿ ರಾಕ್ವಣ್ ಕರ್ತೆಲೆಂ.”
* * * * *
“ಆನಿ ಥೊಡ್ಯಾಚ್ ದಿಸಾಂನಿ ಯೆಂವ್ಚ್ಯಾ, ನಿಮಾಣ್ಯಾ ಸುಕ್ರಾರಾ ಖಾಂದಿ-ಖುರಿಸ್ ತಿಕಾ ದಿಜಾಯ್” ಆಪಾರ್ ಲೊಕಾ ಜಮೊ ಆಸ್ಚ್ಯಾ ಜುಂತಾಚೆರ್ ಜುವಾಂವ್ ಕುವೆಲ್ ಬೊಬಾಟ್ಲೊ. “ಆನಿ ತಿಣೆ ತೊ ಇಗರ್ಜೆಚಾ ದಾರ್ವಾಟ್ಯಾ ಥಾವ್ನ್ ಕುಮ್ಗಾರಾಚ್ಯೆ ಗ್ರಾದಿ ಪರ್ಯಾಂತ್ ದಿಂಬ್ಯೆರ್ ಪಡೊನ್ ಆಪ್ಲ್ಯಾ ಖಾಂದಾರ್ ವಾವಾವ್ನ್ ವ್ಹರಾಜಾಯ್!”
“ತಸೆಂಚ್ ಕರ್ತಾಂ” ಬಾಗಯ್ಲೆಲಿ ತಕ್ಲಿ ವಯ್ರ್ ಉಕಲ್ನಾಸ್ತಾಂ ಹಿಲ್ಡಾ ಟೀಚರ್ ಮ್ಹಣಾಲಿ.
“ಆಮ್ಚ್ಯೆ ಸಮಾಜೆಕ್ ಪಾಟಿಂ ಯೆಂವ್ಚಾ ಖಾತಿರ್ ಏಕ್ ನ್ಹಯ್ ತೀನ್ ಖುರಿಸ್ ತರ್ಯೀ......” ತಿಚೊ ತಾಳೊ ಭರೊನ್ ಆಯ್ಲೊ ಆನಿ ತಿ ಗಳ್ಗಳ್ಯಾಂ ರಡ್ಲಿಚ್!
“ಲೊಕಾ ಮುಖಾರ್ ಆತಾಂ ರಡೊನ್ ಆಪುಣ್ ಸಾಂತಿಣ್ ಮ್ಹಣ್ ಪಾಚಾರ್ಚೆಂ ನಾಕಾ”
ಕುವೆಲಿಚೊ ತೊ ಧೆಂಕ್ಣೊ ಆಯ್ಕೊನ್, ‘ತಾಚ್ಯಾ ಮುಸ್ಕಾರಾಕ್ ಏಕ್ ಥಾಪಡ್ ದಿಂವ್ಯಾಂ’ ಮ್ಹಳ್ಳೊ ರಾಗ್ ಮ್ಹಾಕಾ ಆಯ್ಲೊ. ತರಿಪುಣ್ ‘ಹಾಂವ್ ಎಕ್ಲೊ ಯಾಜಕ್’ ಮ್ಹಳ್ಳೊ ಉಡಾಸ್ ಕರುನ್, ಮ್ಹಜೊ ರಾಗ್ ಹಾಂವೆಂ ಥಂಡ್ ಕರುನ್ ಘೆತ್ಲೊ.
“ಆನಿ......” ಲೊಕಾ ತರ್ಫೆನ್ ಕೊಣ್ಂಚ್ ಉಲಂವ್ಕ್ ಧಯ್ರ್ ಘೆನಾತ್ಲ್ಯಾನ್, ಜುವಾಂವ್ ಕುವೆಲಿನ್ ಲೊಕಾ ಜಮ್ಯಾಚೆರ್, ಗಂಭಿರಾಯೆನ್ ದೀಶ್ಟ್ಚರವ್ನ್ ಆನಿ ದರ್ಭಾರಾನ್ ಅಪ್ಲ್ಯಾ ಮಿಶ್ಯಾಂಚೆರ್ ಹಾತ್ ಖೆಳವ್ನ್ ಮುಂದರಿಲೆಂ “ತುಂವೆಂ ಆಪ್ಲಿ ಖೊಟಿ ಜಿಣಿ ಸಾಂಡುನ್ ಬರ್ಯೆ ವಾಟೆಕ್ ಪರ್ತಾನಾ ಜಾಲ್ಯಾರ್......”
“ಮ್ಹಜ್ಯಾ ಮುಖ್ಲ್ಯಾ ಜಿವಿತಾ ವಿಶ್ಯಾಂತ್ ತುಮಿ ಕೊಣೆಯಿಂ ಖಂತ್ ಕರ್ಚಿ ನಾಕಾ.” ಹಿಲ್ಡಾಚ್ಯಾ ತಾಳ್ಯಾಂತ್ ಆತಾಂ ನಿರ್ಧಾರಾಚಿ ಘಟಾಯ್ ಆಸ್ಲ್ಲಿ. “ನಿಮಾಣ್ಯಾ ಸುಕ್ರಾರಾ, ಖಾಂದಿ ಖುರಿಸ್ ಘೆವ್ನ್ ಜಾತೇಚ್ ಆನಿ ಸಮಾಜೆನ್ ಮ್ಹಾಕಾ ಸ್ವೀಕಾರ್ ಕರ್ತೆಚ್, ದುಸ್ಯ್ರಾಚ್ ದಿಸಾ ಹಾಂವ್ ಹಿ ಫಿರ್ಗಚ್ ಸಾಂಡ್ತೆಲಿಂ. ತ್ಯಾ ಉಪ್ರಾಂತ್ ಮ್ಹಜೆ ಥಾವ್ನ್ ತುಮ್ಕಾಂ ಸ್ಕಾಂದಲ್ ಪಾವೊಂಕ್ ಆವ್ಕಾಸ್ ಮೆಳ್ಚೊನಾ.”
ಸಗ್ಳೊ ಲೋಕ್ ತ್ಯೆ ಘಡಿಯೆ ವಿಜ್ಮಿತ್ ಜಾಲೊ ಆನಿ ಮೌನ್ ಉರ್ಲೊ. ತಿಣೆ ಫಿರ್ಗಜ್ ಸಾಂಡುನ್ ವೆಚೆ ವಿಶ್ಯಾಂತ್ ಕೊಣೆಂಚ್ ಯೆದೊಳ್ ಚಿಂತ್ಲ್ಲೆಂ ನಾ ದೆಕುನ್, ಲೊಕಾ ಮಧೆಂ ‘ಸಾ....ಸೂ....’ ಆಯ್ಕಾಲೆಂನಾ.
* * * * *
ನಿಮಾಣೊ ಸುಕ್ರಾರ್,
ಸಗ್ಳಿ ಇಗರ್ಜ್ ಲೊಕಾಚ್ಯೆ ಖೆಟಿನ್ ಭರೊನ್ ಗೆಲ್ಯಾ. ಆನಿ ಮ್ಹಜ್ಯಾ ದೊಳ್ಯಾಂ ಸಾಮ್ಖಾರ್ ಏಕ್ ಕಾಳೊ ಪಡ್ದೊ ದೆಂವ್ಲಲೆಪರಿಂ ಮ್ಹಾಕಾ ಭೊಗ್ತಾ. ಮ್ಹಜಿಂ ಸಿಂತಿಮೆಂತಾಂ ಮ್ಹಜ್ಯೆ ಮೂಟಿ ಭಿತರ್ ಆರಾವ್ನ್ ಧರುಂಕ್ ಹಾಂವ್ ಸಕನಾಸ್ತಾಂ, ಚಡ್ಪೊಡೊನ್ ಆಸಾಂ.
ಇಗರ್ಜೆಚಾ ದಾರ್ವಟ್ಯಾಚ್ಯಾ ಮಧೆಗಾತ್ ಹಿಲ್ಡಾ ಟೀಚರ್ ದಿಂಬ್ಯೆರ್ ಸರ್ಪಡ್ಲ್ಯಾ. ತಿಣೆ ಆಪ್ಲಿ ತಕ್ಲಿ ಬಾಗಾಯ್ಲ್ಯಾ ಆನಿ ತಿಕಾ ಪಳೆತಾನಾ ಮ್ಹಜೆಂ ಕಾಳಿಜ್ ಕಳ್ವಳ್ಯಾಂಚ್ಯಾ ಭೊಗ್ಣಾಂನಿ ಫುಮಾರೊನ್ ಯೆತಾ. ತಿಚ್ಯೆ ಬಗ್ಲೆಕ್ ಆಮ್ಚ್ಯೆ ಫಿರ್ಗಜೆಚೊ ಆಡಳ್ತೆದಾರ್ ಜುವಾಂವ್ ಕುವೆಲ್, ಅಸ್ಕತ್ ಮನ್ಶಾಕ್ ಉಕ್ಲುನ್ ವ್ಹರೊಂಕ್ ಕಷ್ಟ್ ಮಾರ್ಚೊ ಏಕ್ ದಾಟೊ-ಮೊಟೊ ರುಕಾಡಾಚೊ ಖುರಿಸ್ ಹಾತಿಂ ಘೆವ್ನ್ ‘ಅಪುಣ್ ಗೆಲ್ವಲೊಂ’ ಮ್ಹಳ್ಳ್ಯಾ ಹಂಕಾರಿ ವ್ಹಡ್ಪಣಾನ್ ಉಬೊ ಆಸಾ.
ಕುಮ್ಗಾರಾಚ್ಯೆ ಗ್ರಾದಿಲಾಗಿಂ ರಾವೊನ್ ದಾರ್ವಾಟ್ಯಾ ಲಾಗಿಂ ದೀಶ್ಟ್ ಚರಯ್ತಾನಾ, ಮ್ಹಜೆ ಥಂಯ್ ಆಸ್ಚೆಂ ವಿಗಾರಾಚೆಂ ಮುಖೆಲ್ಪಣ್ ಕಡೊನ್ ಗೆಲ್ಲೆಪರಿಂ ಮ್ಹಾಕಾ ಭೊಗ್ಲೆಂ ಆನಿ ಹಾಂವ್ ಮತಿಂತ್ಚ್ ಸೊಮ್ಯಾಚೊ ಆಧಾರ್ ಮಾಗೊನ್, ಪುಲ್ಪುತ್ರಾ ಕುಶಿಂ ಮೆಟಾಂ ಕಾಡ್ತಾಂ ಆನಿ ಪುಲ್ಪುತ್ರಾರ್ ಚಡೊನ್, ಮ್ಹಜೊ ತಾಳೊ ಸಾರ್ಕೊ ಕರುನ್ ಘೆತಾಂ. “ಮೊಗಾಚಾ ಭಾವಾಂ ಭಯ್ಣಿಂನೊ” ಸಗ್ಳ್ಯೆ ಇಗರ್ಜೆಂತ್ಲೊ ಲೋಕ್ ಚೀತ್ ದೀವ್ನ್ ಮ್ಹಾಕಾಚ್ ಪಳೆತಾ. “ಆಜ್ ಏಕ್ ಸ್ತ್ರೀ ಖಾಂದಿ ಖುರಿಸ್ ಘೆವ್ನ್, ‘ಆಪುಣ್ ಪಾತ್ಕಿಣ್’ ಮ್ಹಣ್ ಪ್ರಾಜಿತ್ ಕರುಂಕ್ ತಯಾರ್ ಜಾಲ್ಯಾ. ನೀಜ್ ಜಾವ್ನ್, ತಿಣೆ ಏಕ್ ಪಾತ್ಕಿಣ್ ಜಾವ್ನ್ ಸ್ಕಾಂದಲ್ ದಿಲಾಂ? ವಾ ಕಸಲ್ಯಾಯೀ ಒತ್ತಡಾಕ್ ಬಲಿ ಜಾವ್ನ್, ನಿರಾಪ್ರಾಧಿ ಜಾಲ್ಯಾರ್ಯೀ, ಹ್ಯಾ ಪ್ರಾಜಿತಾಚ್ಯೆ ಕರ್ನೆಕ್ ಮಾತೆಂ ಮಾರುನ್, ತಿಣೆಂ ಆಪ್ಲ್ಯಾ ಖಾಂದಾರ್ ಖುರಿಸ್ ಘೆವ್ನ್, ಕಥೊಲಿಕ್ ಸಮಾಜೆಕ್ ಪರತ್ ಪಾಟಿಂ ಯೆಂವ್ಚಿ ಗರ್ಜ್ ಪಡ್ಲ್ಯಾ ಮ್ಹಣ್ ಹಾಂವ್ ನೆಣಾಂ” ಉಮಾಳ್ಯಾಂನಿ ಮ್ಹಜೊ ತಾಳೊ ಆತಾಂ ಫುಮಾರೊನ್ ಯೆತಾ. “ತುಮಿ ತುಮ್ಚ್ಯೆ ಸಾಕ್ಷ್ಯೆಂ ವರ್ವಿಂ ಧಾರ್ಮಿಕ್ ವ್ಹಡಿಲಾಂಚ್ಯೆರ್ ಪ್ರಭಾವ್ ಘಾಲುನ್, ತಿಚ್ಯೆರ್ ಬಹಿಷ್ಕಾರ್ ಘಾಲೊ ಆನಿ ಆಜ್ ಪರತ್ ತಿಕಾ ಆಮ್ಚ್ಯಾ ಹಿಂಡಾಕ್ ಪಾಟಿಂ ಘೆಂವ್ಚೊ ನಿರ್ಧಾರ್ ಕೆಲೊ.
“ಹ್ಯೆ ಸ್ತ್ರೀಯೆಚೆರ್ ತುಮಿ ಗುನ್ಯಾಂವ್ ಥಾಪ್ತಾನಾ, ಆನಿ ತಿಚೊ ಗುನ್ಯಾಂವ್ ರುಜು ಕರುಂಕ್ ಸಾಕ್ಷಿ ದಿತಾನಾ, ಅಗಣಿತ್ ನೀತಿದಾರ್ ಸೊಮ್ಯಾ ದೆವಾಚೊ ಉಡಾಸ್ ಕಾಡ್ಲಾ ಮ್ಹಣ್ ಹಾಂವ್ ಧೃಡ್ ಪಾತ್ಯೆತಾಂ!
“ಖಂಯ್ಚಾಯೀ ಕಾರಣಾನ್, ಫಟ್ ಸಾಕ್ಷಿ ತುಮಿ ಸಾಂಗ್ಲ್ಯಾತ್ ವ್ಹಯ್ ತರ್, ಸೊಮ್ಯಾ ದೆವಾಚೊ ಶಿರಾಪ್ ತುಮ್ಕಾಂ ಸೊಧುನ್ ಯೆತಲೊ. ದೆವಾನ್ ದಿಂವ್ಚಿ ಶಿಕ್ಷಾ ತುಮಿ ಕೊಣ್ಂಯೀ ಆಡಾಂವ್ಕ್ ಸಕ್ಚೆನಾಂತ್. ತಶೆಂ ಜಾಯ್ನಾ ಜಾಂವ್ ಮ್ಹಣ್ ಆಮಿ ಮಾಗ್ಯಾಂ!”
ಆನಿ ತ್ಯೆಚ್ ಘಡಿಯೆ ದಾರ್ವಟ್ಯಾ ಲಾಗಿಂ ಉಬೊ ಆಸ್ಚ್ಯಾ ಜುವಾಂವ್ ಕುವೆಲಿಚಾ ಹಾತಾಂತ್ಲೊ ಖುರಿಸ್ ವ್ಹಡಾ ಆವಾಜಾನ್ ಧರ್ಣಿಕ್ ಶೆವ್ಟಾತಾ ಆನಿ ಜುವಾಂವ್ ಕುವೆಲ್ ಲಾಳಿ ಮಾರ್ಲ್ಲ್ಯಾ ಆಪ್ಲ್ಯಾ ಚಾಮ್ಡ್ಯಾಚಾ ವ್ಹಾಣಾಂಚೊ ‘ನರು-ನುರು’ ಆವಾಜ್ ಕರುನ್ ಆಂವ್ಸರಾಚಿಂ ಮೆಟಾಂ ಕಾಡುನ್, ಇಗರ್ಜೆ ಥಾವ್ನ್ ಭಾಯ್ರ್ ವಚೊನ್, ದೊಳ್ಯಾಂಕ್ ಬೊಟಾಂ ಘಾಲ್ಯಾರ್ಯಿ ದಿಸಾನಾತ್ಲ್ಲ್ಯಾ ತ್ಯಾ ಕಾಳೊಕಾಂತ್ ಲಿಪೊನ್, ನಪಂಯ್ಚ್ ಜಾತಾ!
* * *
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
