ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾಝರ್ - ವಿಂಚ್ಣಾರ್ ಕೊಂಕ್ಣಿ ಮಟ್ವ್ಯಾ ಕಾಣ್ಯಾಂಚೆಂ ಅಂಕಣ್
ಕಥಾಪಾಠ್
ಥೊಡ್ಯಾ ಅನಿವಾರ್ಯ್ ಕಾರಾಣಾಂಕ್ ಲಾಗೊನ್ ಹೆಂ ಅಂಕಣ್ ಸರಾಗ್ ರಿತಿನ್ ಮುಖಾರುನ್ ವರುಂಕ್ ಜಾಂವ್ಕ್ ನಾ. ಪುಣ್ ಹ್ಯಾ ಫುಡೆಂ ಕೊಂಕ್ಣೆಂತ್ಲ್ಯಾ ವಿಂಚ್ಣಾರ್ ಕಾಣ್ಯೆಗಾರಾಂಚ್ಯಾ ವಿಂಚ್ಣಾರ್ ಕಾಣ್ಯಾಂಚೆರ್ ಚಲಯಿಲ್ಲೆಂ ಅಧ್ಯಯನ್ ಹ್ಯಾ ಅಂಕಣಾಚೆರ್ ತುಮ್ಕಾಂ ವಾಚುಂಕ್ ಮೆಳ್ತೆಲೆಂ.
ಹೆಂ ಅಧ್ಯಯನ್ ಲೇಖನ್ - ಮಟ್ವಿ ಕಾಣಿ ಬರಂವ್ಕ್ ಶಿಕ್ತೆಲ್ಯಾಂಕ್ ಏಕ್ ದಿವ್ಟಿ ಜಾಂವ್ಕ್ ಸಕ್ತಲೆಂ ಮ್ಹಳ್ಳೊ ಆಮ್ಚೊ ಭರ್ವಸೊ. ವಾಚ್ಪ್ಯಾಂಚ್ಯಾ ಪ್ರತಿಕ್ರಿಯೆಕ್ ಸ್ವಾಗತ್ ಆಸಾ.
ಫೆಬ್ರೆರಾಚ್ಯಾ 8 ತಾರಿಕೆರ್ ದಾಯ್ಜ್ ವರ್ಸಾಚೊ ಕಾಣ್ಯೆಗಾರ್ ’ಕ್ಲೆರೆನ್ಸ್ ಕೈಕಂಬ’ ಹಾಚ್ಯಾ ಕಾಣ್ಯಾಂಚೆರ್ ಅಧ್ಯಯನ್ ಚಲ್ತೆಲೆಂ. ಹೆಚ್ಚ್ ಸಂದರ್ಭಾರ್ ಕೊಂಕ್ಣೆಚೆ ನಾಮ್ಣೆಚೆ ಕಾಣ್ಯೆಗಾರ್ ಡೊಲ್ಫಿ ಕಾಸ್ಸಿಯಾ, ಗಿಬ್ಬಾ ಕುಲ್ಶೇಕರ್ (ಕುವೇಯ್ಟಾಂತ್ಲೊ ಭೋವ್ ಲೊಕಾಮೊಗಾಳ್ ಆನಿ ಮಾಲ್ಘಡೊ ಕಾಣ್ಯೆಗಾರ್), ಕೊಂಕ್ಣೆಂತ್ಲ್ಯಾ ಉಂಚ್ಲ್ಯಾ ಕಾಣ್ಯೆಗಾರಾಂ ಪಯ್ಕಿಂತ್ಲೊ ಎಕ್ಲೊ ಕೆವಿನ್ ಡಿ’ಮೆಲ್ಲೊ ಪ್ರಮುಖ್ ಉಲವ್ಪಿ ಜಾವ್ನ್ ಆಸ್ತೆಲೆ.
ಫುಡ್ಲ್ಯಾ ಅಧ್ಯಯನಾಂತ್ ಎಡ್ವಿನ್ ಜೆ.ಎಫ್.ಡಿ’ಸೋಜ್, ಚಾ.ಫ್ರಾ.ದೆ’ಕೋಸ್ತಾ, ಸಿರಿವಂತ್, ಜೆಮ್ಮಾ ಪಡೀಲ್, ಡೊಲ್ಫಿ ಕಾಸ್ಸಿಯಾ, ಸಿಜ್ಯೆಸ್ ತಾಕೊಡೆ, ಹೆರೊಲ್ಪಿಯುಸ್, ಗಬ್ಬು, ಖಡಾಪ್, ಎಟ್ಯೆಲ್, ಜೆರಿ ಕುಲ್ಶೇಕರ್, ವಿಕ್ಟರ್ ರೋಡ್ರಿಗಸ್, ಎಡಿ ನೆಟ್ಟೊ, ಐರಿನ್ ಪಿಂಟೊ (ಕ್ಯಾಸ್ತಲಿನೊ), ವಿಲ್ಫಿ ರೆಬಿಂಬಸ್, ಸ್ಟೇನ್ ಅಗೇರಾ, ಡಾ|ಎಡ್ವರ್ಡ್ ನಜ್ರೆತ್, ವಲ್ಲಿ ವಗ್ಗ, ಹೇಮಾಚಾರ್ಯ, ನಂದಿನಿ ತಶೆಂಚ್ ಹೆರ್ ಉಂಚ್ಲ್ಯಾ ಕಾಣ್ಯೆಗಾರಾಂಚ್ಯಾ ಕಾಣ್ಯಾಂಚೆರ್ ಆಮಿ ಅಧ್ಯಯನ್ ಚಲಯ್ತೆಲ್ಯಾಂವ್.
- ವಲ್ಲಿ ಕ್ವಾಡ್ರಸ್
ಕಥಾಪಾಠ್
ಪ್ರಸ್ತಾವನ್: ಸಂಸಾರಾಂತ್ಲ್ಯಾ ಖಂಚಾಯ್ ಭಾಸೆಂತ್ಲೆಂ ಸಾಹಿತ್ಯ್ ಪಳೆಲೆಂ ತರ್, ತಾಂತುಂ ಮಟ್ವಿ ಕಾಣಿ ಮ್ಹಳ್ಳೊ ಪ್ರಕಾರ್ ಆಸಾನಾಸ್ತಾಂ ರಾವೊಂಕ್ ಸಾಧ್ಯ್ಚ್ ನಾ. ಚಡಿತ್ ವಾಚ್ಪ್ಯಾಂನಿ ವಾಸ್ಚೊ ಹೊ ಪ್ರಕಾರ್ ಖರೆಂಚ್ ಜಾವ್ನ್ ಹರ್ಯೆಕಾ ಸಾಹಿತ್ಯಾಚಾ ಗ್ರೇಸ್ತ್ ಪ್ರಕಾರಾಂ ಪಯ್ಕಿ ಏಕ್. ಜಾಂವ್ ತೊ ಧಾರ್ಮಿಕ್ ಗೃಂಥ್, ಜಾಂವ್ ರಾಜಕೀಯ್, ಜಾಂವ್ ಚ್ರಿತ್ರಿಕ್ ವ ಜಾಂವ್ ಹೆರ್ ಕಸಲೊಯ್ - ಪುಣ್ ಹರ್ಯೆಕಾಂತ್ ’ಕಾಣಿ’ ಮನ್ಶಾಜಿಣ್ಯೆಕ್ ಎಕಾ ನ್ಹಂಯ್ ಎಕಾ ರಿತಿನ್ ಲಗ್ತಿ ಜಾತಾಚ್ಚ್..
ವಾಂಜೆಲಾಚೆಂ ವಾಚಾಪ್ ಆಮಿ ಸುರು ಕರ್ತಾನಾಂಚ್ ಕಾಣಿ ಸುರು ಜಾತಾ "ಏಕ್ ಸಬ್ಧ್ ಆಸ್ಲ್ಲೊ...", ಜೆಜುನ್ ತರ್ಯ್ ಮನ್ಶಾಂಕ್ ಶಿಕವ್ನ್ ದೀಂವ್ಕ್ ವಾಪಾರ್ಲ್ಲಿ ಕಲಾ ಸಯ್ತ್ ’ಕಾಣಿ’. ಜಾಂವ್ ತಾಕಾ ಆಮಿಂ ವೊಪಾರ್ ಮ್ಹಣ್ ವೊಲಾಯ್ತಾಂವ್, ಪುಣ್ ಕಾಣಿ ತಿ ಕಾಣಿಂಚ್.
ಉಪ್ರಾಂತ್ ಆಮಿ ಭುರ್ಗ್ಯಾಪಣಾರ್ ಆಜ್ಯಾ-ಅಜಿಯೆಚ್ಯೊ ಕಾಣ್ಯೊ ಆಯ್ಕೊನ್ ವ್ಹಡ್ ಜಾತಾಂವ್, ಜಾಂವ್ ತ್ಯೊ ಅಕ್ಭರ್
- ಬೀರ್ಬಲ್ಲಾಚ್ಯೊ, ಜಾಂವ್ ತ್ಯೊ ತೆನ್ನಾಲಿ ರಾಮಕೃಷ್ಣಚ್ಯೊ ವ ಜಾಂವ್ ಹೆರ್ ರಾಯಾಂಚ್ಯೊ. ಪುಣ್ ಕಾಣ್ಯೊ ಮನ್ಶಾ ಜಿಣ್ಯೆಂತ್ ಹರ್ಯೆಕಾ ವಾಚ್ಪ್ಯಾಕ್ ಮತಿಕ್ ಉಲ್ಲಾಸ್, ಉಜ್ವಾಡ್ ದೀಂವ್ಕ್ ಸಕ್ಲ್ಯಾತ್.
ದಾಯ್ಜ್ ಪಂಗ್ಡಾನ್ ಪಾಟ್ಲ್ಯಾ ಲಗ್ಬಗ್ ದೋನ್ ತೀನ್ ವರ್ಸಾಂ ಥಾವ್ನ್ ಭೋವ್ ಶಿಸ್ತೆನ್ ಮಾಂಡುನ್ ಹಾಡ್ಲ್ಲೆಂ ಕವಿತಾಪಾಠ್ ಚೆರ್ ಎದೊಳ್ಚ್ ಕವಿತಾಚಾ ಮುಳಾವ್ಯಾ ಸಂಗ್ತೆಚೆರ್ ಗುಮಾನ್ ದೀವ್ನ್, ವೆವೆಗ್ಳ್ಯಾ ರಿತಿಚಾ ಕವಿತಾಂಕ್ ವೆವೆಗ್ಳ್ಯಾ ರಿತಿರ್ ವಾಚುನ್, ಸಮ್ಜೊನ್ ಶಿಕ್ಲ್ಯಾಂವ್. ಎದೊಳ್ಚ್ ಕವಿತಾ ಅಧ್ಯಯನಾಕ್ ಲಗ್ತಿ ಜಾಲ್ಲೆ ದೋನ್ ಬೂಕ್ ಪರ್ಗಟ್ ಕೆಲ್ಯಾತ್ ಆನಿ ಫುಡೆಂಯೀ ಹೆಂ ಮಿಸಾಂವ್ ಆಮಿಂ ರಾವಯ್ನಾಂವ್ - ಬಗಾರ್ ಆಮ್ಚಾ ಸಂದರ್ಭಾ ಪರ್ಮಾಣೆಂ ಚಾಲುಚ್ಚ್ ಆಸ್ತೆಲೆಂ. ಕವಿತಾಪಾಠ್ ಸವೆಂ ಆಮ್ಚಾ ಖಾಂದ್ಯಾರ್ ಅನ್ಯೇಕ್ ಜವಾಬ್ಧಾರಿ ಆಮಿ ತಿತ್ಲ್ಯಾಚ್ ಮೊಗಾನ್ ಆನಿ ಗೌರವಾನ್ ಆಮಿ ಘೆತ್ಲ್ಯಾ - ತಿ ಜಾವ್ನಾಸಾ ಕೊಂಕ್ಣಿ ಮಟ್ವ್ಯಾಕಾಣ್ಯಾಂಚೆರ್ ಎಕಾ ರಿತಿಚೆಂ ಅಧ್ಯಯನ್/ಸಮೀಕ್ಶಾ ಚಲಂವ್ಚಿ.
ಆಮ್ಚೆ ಥೊಡೆ ಮಹಾನ್ ಕೊಂಕ್ಣಿ ಸಾಹಿತಿ ಕಿತ್ಲೆಂ ಹೆರಾಂಚ್ಯೊ ಕಾಣ್ಯೊ ವಾಚ್ತಾತ್? ಕಿತ್ಲೆಶೆ ಮಹಾನ್ ಸಾಹಿತಿ ಹೆರಾಂಚಾ ಬುಕಾಂವಿಶಿಂ ಉಲಯ್ತಾತ್ ವ ಬರಯ್ತಾತ್? ಹೆಂ ಸವಾಲ್ ಕೆಲೆಂ ತರ್ ಮೆಳ್ಚಿ ಜವಾಬ್ ಭೋವ್ಶಾ ’ಭೋವ್ ಉಣೆ’. ಹೆಂ ಕಿತ್ಯಾಕ್? ಹೆರಾಂಚಾ ಸಾಹಿತ್ಯಾಚೆರ್ ವೊರಾವ್ನ್ ಪಳೆಂವ್ಚೆಂ ವ್ಹಡ್ ಮನ್ ಆಮ್ಚಾ ಸಾಹಿತಿಂಕ್ ನಾ-ಆಸ್ಚೆಂ? ವಾ ಆಮಿಂ ಮಹಾನ್ ಸಾಹಿತಿಂಚಾ ಪಟ್ಟೆರ್ ರಿಗ್ತಚ್ಚ್ ಎಕಾಥರಾಚಿಂ ಶಿಂಗಾಂ ಫುಟ್ತಾತ್? ಯಾ "ಕೊಣಾಕ್ ಕಿತೆಂ ಪಡೊನ್ ಗೆಲಾಂ?" ಮ್ಹಳ್ಳೊ ಬೆಪಾರ್ವೊ? ಪುಣ್ ಹೆಚ್ಚ್ ಮಹಾನ್ ಸಾಹಿತಿ ಖಂಚಾಯ್ ಕೊಂಕ್ಣಿ ಕಾರ್ಯಾವೆಳಾರ್ "ಆಮ್ಚೊ ಲೋಕ್ ಕೊಂಕ್ಣಿ ಪತ್ರಾಂ/ಬೂಕ್ ವಾಚಿನಾ, ಮೊಲಾಕ್ ಘೆನಾ..." ಮ್ಹಣೊನ್ ಸಿಸ್ರಿಚಿಂ
ದುಃಖಾಂ ಗಳಯ್ತಾತ್, ಪುಣ್ ಸತ್ ಸಾಂಗ್ಚೆಂ ತರ್ ಹೆಂ ಸಾಂಗ್ಲ್ಲೆ ವ ಸಾಂಗ್ಚೆ ಕಿತ್ಲೆಂ ಹೆರಾಂಚೆಂ ವಾಚಾಪ್ ವಾಚ್ತಾತ್ ಮ್ಹಳ್ಳೆಂ ವ್ಹಡ್ಲೆಂ ಅಧುರೆಂ ಸವಾಲ್..
ಆಸೊಂ ಆಮಿಂ ಮಹಾನ್ ಸಾಹಿತಿಂಚಾ ಪಟ್ಟೆರ್ ನಾಂವ್ ಆನಿ ವೆಚೊ ಹೊರ್ಭೊಸ್ಯ್ ಆಮ್ಕಾಂ ನಾ ದೆಖುನ್ ಆಮ್ಕಾಂ ತಿ ಖಂತ್ ಸದ್ದ್ಯಾಕ್ ತರ್ಯ್ ನಾಕಾ.
ಹ್ಯಾ ಪರಿಗತೆಂತ್ ಥೊಡೆಶೆ ಕೊಂಕ್ಣಿ ಕಾಣ್ಯಾಂಚೆ ಬೂಕ್ ಪರ್ಗಟ್ ಜಾಲೆ... ಕೊಣಾಕ್ ಹ್ಯಾವಿಶಿಂ ಕಾಂಯ್ ಇಲ್ಲಿ ದಾಕ್ಶೆಣ್, ಹುಸ್ಕೊ ವ ಸಂತೊಸ್ ದೆಖುನ್ ಕೊಣೆ ಥೊಡ್ಯಾ ಬಾವ್ಡ್ಯಾಂನಿ ’ಆಸೊಂದಿ ಮೊರೊಂದಿ’ ಮ್ಹಣೊನ್ ಪತ್ರಾಂನಿ, ಸಾಯ್ಟಾಂನಿ ಬುಕಾಂಚಿ ಪರಿಚಯ್ ಛಾಪ್ಲಿ.. ಕೊಣೆ ಥೊಡ್ಯಾಂನಿ ಬುಕಾಚೆರ್ ವಿಮರ್ಸೊಗೀ
/ ಖೊಡಿಗೀ (ವಾ ಮಾತ್ತಿ ಗೊಬೊರ್ಗೀ) ಪರ್ಗಟ್ ಪರ್ಗಟ್ ಕೆಲೆಂ. ಪುಣ್ ಸತ್ ಸಾಂಗ್ಚೆಂ ತರ್ - ಕೊಣೇಂಯ್ ಕೊಂಕ್ಣೆಚಾ ಮೊಗಾನ್ ಬುಕಾಂಚೆರ್ ಸಮೀಕ್ಶಾ ಕೆಲ್ಲಿಗಿ? ಅಂತಸ್ಕರ್ನ್ ಮ್ಹಳ್ಳೆಂ ಅಸ್ಚೆ ಏಕ್ ಘಡಿ ಅಪ್ಲ್ಯಾ ಕಾಳ್ಜಾಕ್ ಹಾತ್ ದವ್ರುನ್ ಅಪ್ಣಾಕ್ ಸವಾಲ್ ಕರಾ ’ಆಮಿಂ ವಿಮರ್ಸೊ/ಸಮೀಕ್ಶಾ ಕೆಲಾ ಕೊಂಕ್ಣೆಚಾ ಮೊಗಾನ್ ವ ಹೆರ್ ಇರಾದ್ಯಾನ್?..’ - ಜರೀ ತರೀ ಕುಸ್ಕುಟಾಯೆಚೊ ಕೊಂಕ್ಣೆಚೊ ಮೋಗ್ ಆಸಾ ತರ್ ತ್ಯಾ ಸವಾಲಾಚಿ ಜಾಪ್ ತುಮ್ಚಾ ಕಾಳ್ಜಾಂತ್ ಉದೆತೆಲಿಚ್ಚ್ - ಆಸೊಂ! ಜಾಂವ್ಚೆಂ ಸಗ್ಳೆಂ ಬರ್ಯಾಕ್ಚ್ಚ್!!.
ಹಾವೆಂ ಹ್ಯಾ ಅಧಿಂಯ್ ಸಾಂಗ್ಲಾಂ ’ಆಮಿ ಫಕತ್ತ್ ಕಾಳೊಕಾಕ್ ದುರ್ಸೊಂವ್ಚೆ ನ್ಹಂಯ್.. ಬಗಾರ್ ಆಮ್ಚಾನ್ ಜ್ಯೆ ಕಿತೆಂ ಕರುಂಕ್ ಸಾಧ್ಯ್ ಆಸಾ ತೆಂ ಕರುಂಕ್ ಪ್ರಾಮಾಣಿಕ್ ರಿತಿನ್ ಪ್ರೇತನ್ ಕರ್ಚೆ’. ಆತಾಂ ಕಥಾಪಾಠ್ಚಿ ಸುರ್ವಾತ್ ಜಾಲ್ಯಾ ಭೋವ್ಶಾ ತೆಚ್ಚ್ ಇರಾದ್ಯಾನ್.. ತುಮ್ಕಾಂ ತರ್ ಹಿಂ ಸಕಯ್ಲಿಂ ಸವಾಲಾಂ ಧೊಸ್ತಾತ್ ತರ್, ತಾಂಚಿಂ ಜಾಪ್ ಅಶಿ ಆಸಾ;
ಕಿತೆಂ ಹೆಂ ಕಥಾಪಾಠ್?
= ಕಥಾಪಾಠ್ ಜಾವ್ನಾಸಾ ಕೊಂಕ್ಣೆಚಾ ಪ್ರಸ್ತುತ್ ಪರಿಗತೆಂತ್ ಪರ್ಗಟ್ಚಾ ಕಾಣ್ಯಾಂಚೆರ್/ಬುಕಾಂಚೆರ್ ಏಕ್ ನದರ್ ಘಾಲ್ಚಿ..
ಸಮೀಕ್ಶಕ್/ವಿಮರ್ಶಕ್ ಕೋಣ್?
= ಮಟ್ವ್ಯಾ ಕಾಣ್ಯೆಚಿ ಮಾಹೆತ್ ಆಸ್ಚಾ ಕೊಣೆಂಯ್ ಹಾಂತುಂ ಮೆತೆರ್ ಜಾವ್ಯೆತಾ. ತೊ ಖಂಯ್ಸರ್ಯೀ ಆಸೊಂ, ಕಿತೆಂಯ್ ಕರುಂ. ಪುಣ್ ತಾಕಾ ಎಕಾ ಬುಕಾಚಾ ಖಂಚಾಯ್ ಕಾಣ್ಯೆಚೆರ್ ಅಪ್ಲಿ ಸಮೀಕ್ಶಾ ಧಾಡುಂಕ್ ಉಗ್ತೊ ಆವ್ಕಾಸ್ ಆಸಾ. ಆನಿ ತಿ ಸಮೀಕ್ಶಾ ಕಥಾಪಾಠ್ಚೆರ್ ಆಮಿ ಪರ್ಗಟ್
ಕರ್ತೆಲ್ಯಾಂವ್. ಕೊಂಕ್ಣೆಂತ್ಲೆ ಫಾಮಾದ್
ಕಾಣ್ಯೆಗಾರ್ ತಶೆಂಚ್ ಉದೆವ್ನ್ ಯೆಂವ್ಚೆ ಭರ್ವಶ್ಯಾಚೆ
ಕಾಣ್ಯೆಗಾರ್ ಸಯ್ತ್ ಹಾಂತುಂ ಭಾಗ್
ಘೆತೆಲೆ ದೆಖುನ್ ಮಟ್ವ್ಯಾ ಕಾಣ್ಯಾಂವಿಶಿಂ
ಆಮ್ಚಾ ಬರವ್ಪ್ಯಾಂಕ್ ಆಸ್ಚಿ ಜಾಣ್ವಾಯ್ ವಾಡಂವ್ಕ್
ಹೆಂ ಅಂಕಣ್ ಉಪ್ಕಾರಾಕ್ ಪಡಾತ್ ತರ್ ಆಮಿ
ಧಾದೊಸ್.
ಕೊಣಾಚ್ಯೊ ಕಾಣ್ಯೊ/ಬೂಕ್ ಹ್ಯಾ ಕಥಾಪಾಠಾಚೆರ್ ಮೆತೆರ್ ಜಾತೆಲೆ?
= ಆಯ್ಲೆವಾರ್ ಪರ್ಗಟ್ ಜಾಲ್ಲೆ ಕಾಣ್ಯಾಂಚೆ
ಬೂಕ್,
ಕಂಗಾಲ್ ಆನಿ ತಾಚಿ ಕುಕ್ಕೆಹಳ್ಳಿ (ವಲ್ಲಿ ಕ್ವಾಡ್ರಸ್),
ಸರ್ಗಾವಯ್ಲಿ
ಮಾಂಯ್ (ರೊನಾಲ್ಡ್ ಒಲಿವೆರಾ),
ಸುಟ್ಕಾ (ಕ್ಲೆರೆನ್ಸ್ ಕೈಕಂಬ), ಬೆಸಾಂವ್ (ಅಶುಂತಾ ಪಿರೇರಾ, ಗಂಟಾಲ್ಕಟ್ಟೆ),
ತಾಂಬ್ಡಿ ಮಿರ್ಸಾಂಗ್ (ಸ್ಟೇನ್ ಅಗೇರಾ, ಮುಲ್ಕಿ),
ಮಾಣ್ಕುಲೆಂ (ಎಡಿ ನೆಟ್ಟೊ) .... ಆನಿ ಹೆರ್ ಎಕೆಕ್ ಬೂಕ್ ಘೆವ್ನ್ ತಾಂಚೆರ್ ಸಮೀಕ್ಶಾ ಚಲಂವ್ಚೆಂ ಮಿಸಾಂವ್.
ಹ್ಯಾ ಬುಕಾಂಚೆರ್ ಎಕೇಕ್ ಬರವ್ಪಿ ಹ್ಯಾ ಬುಕಾಂತ್ ಆಸ್ಚಾ ಬರ್ಯಾ/ವಾಯ್ಟ್ ಕಾಣ್ಯೆಕ್ ವಿಂಚುನ್ ತಾಚೆರ್ ಅಪ್ಲೆ ವಿಚಾರ್/ಸಮೀಕ್ಶಾ ಬರಯ್ತಲೊ. ಆನಿ ತೊ ಆಮಿಂ ಪರ್ಗಟ್ ಕರ್ತೆಲ್ಯಾಂವ್.
ಶರೊ: ವಿಮರ್ಶಕಾಂನಿ ಫಕತ್ತ್ ಬರ್ಪಾಚಿ ಖೊಡಿ ಕಾಡ್ಚ್ಯೊ ಶಿವಾಯ್ ಬರವ್ಪ್ಯಾಚ್ಯೊ ನ್ಹಂಯ್. ಅಸಲ್ಯಾ ಖೊಡಿಯಾಂಕ್ ದಾಯ್ಜಾಚೆರ್ ಆವ್ಕಾಸ್ ಆಸ್ಚೊನಾ.. ಆಮ್ಚೊ ಇರಾದೊ ಮಟ್ವ್ಯಾ
ಕಾಣಿಯಾಂಚೆರ್ ಅಧ್ಯಯನ್ ಕರ್ಚೊ ಶಿವಾಯ್ ಕೊಣಾಕ್ ಧುಂಪಂವ್ಚೊ ಆನಿ ಕೊಣಾಕ್ ಹಲ್ಕುಂಚೊ ಭಿಲ್ಕುಲ್ ನ್ಹಂಯ್. ಹಾಂಗಾಸರ್ ಕೊಣ್ಯ್ ಮಹಾನ್ ಸಾಹಿತಿ ಆಸ್ಚೆನಾಂತ್ ಬಗಾರ್ - ಸಗ್ಳೆ ಎಕ್ಚ್. ಆಮಿಂ ಸೃಜನಾತ್ಮಕ್ ರಿತಿನ್ ವಿಮರ್ಸೊ ಕರ್ಚೊ ಶಿವಾಯ್ ’ಹೆರಾಂಚೆಂ ಉಣೆಂಪಣ್ ಮೆಜುನ್ ಹಾಂವ್ ಬುಧ್ವಂತ್’ ಮ್ಹಳ್ಳೆಂ ಆಣ್ವೆಂ ಚಿಂತ್ಪಾ ಥಾವ್ನ್ ಭಾಯ್ರ್ ಯೆಂವ್ಚೆಂ ಭೋವ್
ಗರ್ಜೆಚೆಂ.
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications