ಕಸ್ಟ್

ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್‍ಯಾಂತ್, ಕೊಂಕಣಿ ಖಾತಿರ್.

ಆಮ್ಕಾಂ ಕಸ್ಟ್ ಕಿತ್ಯಾಕ್ ಯೆತಾತ್?

ವರಸ್ : 2005

ಅಂಕೊ : 8

ಮಯ್ನೊ : ಫೆಬ್ರೆರ್

ಸಂಪಾದಕೀಯ್ - 8 .

ವಲ್ಲಿ ಕ್ವಾಡ್ರಸ್

ಚರಿತ್ರೆಚಿಂ ಪಾನಾಂ ಉಸ್ತಿಲ್ಯಾರ್ ಆಮ್ಕಾಂ ಆಯ್ಲೆವಾರ್ ಅಖ್ಖ್ಯಾ ಸಂಸಾರಾಕ್ ಥರ್ಥರಾಯಿಲ್ಲ್ಯಾ ’ಸುನಾಮಿ’ ಪರಿಂ ಘಡ್‌ಲ್ಲಿಂ ಸಭಾರ್ ಘಡಿತಾಂ/ಅನ್ವಾರಾಂ ವಾಚುಂಕ್ ಮೆಳ್ತಾತ್.

ತಿ ಚರಿತ್ರಾ ಜಾವ್ಯೆತಾ ನವೊ ಸೊಲ್ಲೊ, ಪರ್ನೊ ಸೊಲ್ಲೊ ಯಾ ಹೆರ್ ಇತಿಹಾಸ್. ತಾಂತ್ಲ್ಯಾ ಥೊಡ್ಯಾಂಚೊ ನಿಹಾಳ್ ಕರ್ಚೊ ತರ್ ಸೊದೊಮ್ ಆನಿಂ ಗೊಮೊರ್ ಶೆರಾಂತ್ ಪಡ್ಲಲೊ ಉಜ್ಯಾಚೊ ಪಾವ್ಸ್ ಜಾವ್ಯೆತ್, ಸಂಸಾರಾಕ್ ಬುಡಯಿಲ್ಲ್ಯಾ ಆವ್ರಾಚೊ ಜಾವ್ಯೆತ್, ತವಳ್ ತವಳ್ ಸಂಸಾರಾಂತ್ ಯೇವ್ನ್ ವೆಚೊ ಬರ್ಗಾಲ್ ಜಾವ್ಯೆತ್ ಯಾ ಬುಡ್ತ್‌ಗೋಲ್ ಜಾವ್ಯೆತ್.

ಹಿಂ ಪ್ರಾಕೃತಿಕ್ ಘಡಿತಾಂ ತರ್ ಪಿಡಾ ಶಿಡೆನ್ ಸಯ್ತ್ ಸಂಸಾರಾರ್ ಎದೊಳ್ ಜಾಯ್ತ್ಯಾಂಕ್ ಲುಟುನ್ ವೆಲಾಂ. ಪಿಡಾ ಜಾವ್ಯೆತಾ ಖೆವಾದ್, ಕ್ಯಾನ್ಸರ್, ಕಾಳ್ಜಾ-ಘಾತ್, ಮೆಂದ್ವಾಚೊ ತಾಪ್, ಯಾ ಪ್ರಸ್ತುತ್ ಕಾಳಾಚಿ ಏಡ್ಸ್ ಪಿಡಾ. ಹ್ಯಾ ಸರ್ವ್ ಅನ್ವಾರಾಂಕ್ ತ್ಯಾ ತ್ಯಾ ವರ್ಗಾಚಾ ಲೊಕಾಂನಿ ತಾಂತಾಂಚೊಚ್ ಮ್ಹಳ್ಳೊ ಅರ್ಥ್ ದಿಲಾ. ವಿಗ್ಯಾನಾನ್ ತಾಚೆಂ ಕಾರಣ್ ದಿಲಾಂ, ಭಾಗೆವಂತಾಂನಿ ದೆವಾನ್ ಕೆಲ್ಲಿ ಪರಿಕ್ಷಾ ಯಾ ದಿಲ್ಲಿ ಶಿಕ್ಶಾ ಮ್ಹಳಾಂ.

ಸತ್ ಕಿತೆಂಯ್ ತೆಂ ಆಸೊಂ ಪುಣ್ ಹಾಂತುಂ ಏಕ್ ಸಂಗತ್ ಸಮಾನ್ ಜಾವ್ನಾಸಾ ಆನಿ ತಿ ಜಾವ್ನಾಸಾ ಹಾಂತುಂ ಜಾಲ್ಲೆಂ ಲುಕ್ಸಾಣ್ ಮನ್ಶಾಂಚೆಂಚ್. ಆನಿಂ ಹರ್‍ಯೆಕಾ ಅಸಲ್ಯಾ ಖುಣಾಂನಿ ಮನ್ಶಾಂಕ್ ಎಕೆಕ್ ಲಿಸಾಂವ್ ಶಿಕೊಂಕ್ ಜರೂರ್ ಆಸಾ.

ಆತಾಂ ಉಭ್ಜತಾ ಏಕ್ ಸವಾಲ್ ’ಆಮ್ಕಾಂ ಕಸ್ಟ್ ಕಿತ್ಯಾಕ್ ಯೆತಾತ್?’

ಹೆಂಚ್ ಸವಾಲ್ ಪರ್ನ್ಯಾ ಸೊಲ್ಲ್ಯಾಂತ್ ಅಬ್ರಹಾಂವಾನ್ ಕೆಲ್ಲೆಂ. ಜೋಬಾಚಾ ಪಾತ್ರಿಯೊರ್ಕಾನ್ ಕೆಲ್ಲೆಂ. ಆನಿಂ ಆಯ್ಲೆವಾರ್ ಹಾವೆಂ ಆಯ್ಕಾಲ್ಲಿ ಏಕ್ ಲ್ಹಾನ್ ಕಾಣಿ ಭೋವ್ಶಾ ಹ್ಯಾ ಸವಾಲಾಕ್ ಜಾಪ್ ದೀಂವ್ಕ್ ಸಕಾತ್;

ಪೊಟ್ಟಾ ರೆತಿರೆಕ್ ಸಭಾರ್ ಗೆಲ್ಯಾತ್, ಸಭಾರ್ ಇರಾದೆ ಘೆವುನ್, ಸಭಾರ್ ಬರೆಂಪಣ್ ಜೊಡುನ್ ಆಯ್ಲ್ಯಾತ್. ಬರೆಂಪಣ್ ಜೊಡುಂಕ್ ಸಕಾನಾಸ್ತಾಂ ಆಯಿಲ್ಲೆ ಯಾ ವಚೊನ್ ಪಯ್ಲೆಂಚಾಕೀ ಪಾಸ್ಟ್ ಜಾಲ್ಲೆ ತಾಂತಾಂಚಾ ಸವಯಾಂನಿ ಶಿವಾಯ್ ಹಾಂತುಂ ಪೊಟ್ಟಾಚೊ ಜಾಂವ್ ಯಾ ಹೆರ್ ಪೂನ್‌ಶೆತಾಂಚೊ ಕಸಲೊಚ್ ಗುನ್ಯಾಂವ್ ಹಾಂತುಂ ನಾ.

ಅಸಲೆಚ್ ಸಭಾರ್ ಇರಾದೆ ಘೆವುನ್ ಗೆಲ್ಲ್ಯಾಂತ್ಲೊ ಎಕ್ಲೊ ಭಕ್ತಿಕ್ ಆಸ್‌ಲ್ಲೊ ಆನಿಂ ತಾಚೊ ಇರಾದೊ ಫಕತ್ ಏಕ್ - ತಾಚಾ ಹಾತಾಚೆಂ ಏಕ್ ಬೋಟ್ ಅವ್ಚಿತ್ ರಿತಿನ್ ವಾಂಕ್ಡೆಂ ಜಾಲ್ಲೆಂ. ದೂಕ್ ನಾತ್‌ಲ್ಲಿ ತರ್‌ಯೀ ತ್ಯಾ ಬೊಟಾಚೊ ಶಿರೊ ಬಿಲ್ಕುಲ್ ಕಾಮ್ ಕರಿನಾತ್‌ಲ್ಲ್ಯೊ. ತಾಣೆಂ ಸಭಾರ್ ವಕ್ತಾಂ ಕೆಲ್ಲಿಂ ತರ್‌ಯೀ ತಾಚೆಂ ಬೋಟ್ ತಶೆಂಚ್ ಆಸ್‌ಲ್ಲೆಂ.

ಸ ದಿಸಾಂಚಿ ರೆತಿರ್ ಬರ್‍ಯಾ ರಿತಿನ್ ಕೆಲಿ ತರ್ ಖಂಡಿತ್ ಜಾವ್ನ್ ದೇವ್ ಅಪ್ಣಾಚೆಂ ಬೋಟ್ ಬರೆಂ ಕರಿತ್ ಮ್ಹಳ್ಳಿ ಪಾತ್ಯೆಣಿ ಘೆವುನ್ ಗೆಲ್ಲೊ ಭಕ್ತಿಕ್ ಬರ್‍ಯಾ ರಿತಿರ್ ರೆತಿರೆಂತ್ ವಾಂಟೊ ಘೆಂವ್ಕ್ ಲಾಗ್ಲೊ. ದಿಸಾನ್‌ದೀಸ್ ತಾಚೊ ಅತ್ರೆಗಾಚೊ ಘಡ್ಯೊ ತಾಕಾ ನವೊ ಭರ್ವಸೊ ಹಾಡಯ್ತಾಲೊ. ಅಶೆಂ ಪಯ್ಲೊ, ದುಸ್ರೊ, ತಿಸ್ರೊ, ಚೊವ್ತೊ, ಪಾಂಚ್ವೊ ಅಶೆಂ ಪಾಂಚ್ ದೀಸ್ ಸಂಪ್ಲೆ ತರ್‌ಯೀ ತಾಚಾ ಬೊಟಾಕ್ ಕಸ್ಲೊಚ್ ಪರಿಹಾರ್ ಲಾಭ್ಲೊನಾ.

ಆತಾಂ ಅಖ್ರೇಚಾ ದಿಸಾ ತೊ ಭಕ್ತಿಕ್ ಚಿಂತುಂಕ್ ಪಡ್ಲೊ, ಅಪ್ಣಾನ್ ರೆತಿರ್ ಇತ್ಲ್ಯಾ ಅಪುರ್ಭಾಯೆನ್ ಕೆಲಿ ತರ್‌ಯೀ ಕಿತ್ಯಾಕ್ ದೆವಾನ್ ಅಪ್ಲೆಂ ಬೋಟ್ ಬರೆಂ ಕರುಂಕ್‌ನಾ? ಭೋವ್ಶಾ ದೆವಾನ್ ಮ್ಹಾಕಾ ದಿಲ್ಲ್ಯಾ ಕಸ್ಟಾಂಕ್ ಕಾಂಯ್ ಮತ್ಲಬ್ ಆಸಾ? ಅಶೆಂ ಚಿಂತುನ್ ತೊ ತಾಚೆ ಭಂವಾರಿಂ ಆಸ್ಚಾ ಹೆರಾಂಕ್ ಪಳೆಲಾಗ್ಲೊ. ಕೋಣ್ ಕೆಪ್ಪೊ, ಕೊಣಾಕ್ ಪಿಶೆಂ ತರ್ ಕೋಣ್ ಕುಡ್ಡೊ, ಕೊಣಾಕ್ ಕ್ಯಾನ್ಸರ್, ತರ್ ಕೊಣಾಕ್ ಏಡ್ಸ್.

ಅಖ್ರೇಚೊ ದೀಸ್ ಉದೆಲೊ ತರ್‌ಯೀ ತಾಚೆಂ ಬೋಟ್ ಬರೆಂ ಜಾಲೆಂಚ್ ನಾ - ಆನಿಂ ತೊ ಭಕ್ತಿಕ್ ದೆವಾಕ್ ಅರ್ಗಾಂ ದೀಲಾಗ್ಲೊ - ಅಪ್ಣಾಚೆಂ ಜಿವಿತ್ ಇತ್ಲೆಂ ಬರೆಂ ಕೆಲ್ಲ್ಯಾ ಖಾತಿರ್. ದೆವಾನ್ ಅಪ್ಣಾಕ್ ಬರಿ ಭಲಾಯ್ಕಿ ದಿಲ್ಲಿ, ಬರೆಂ ಚಿಂತಾಪ್ ದಿಲ್ಲೆಂ. ಆನಿಂ ಅಪ್ಣಾಕ್ ಬೊಟಾರುಪಾರ್ ಕಸ್ಟ್ ಧಾಡ್ನ್ ಹೆರಾಂ ಥಂಯ್ ಆಸ್ಚಿ ಅಪ್ಣಾಚಿ ಜವಾಬ್ಧಾರೆಚೊ ಉಡಾಸ್ ಕಾಡುನ್ ದಿಲೊ. ಆನಿಂ ಖರೆಂ ಸಮಧಾನ್ ತಾಕಾ ಥಂಯ್‌ಚ್ ಲಾಭ್ಲೆಂ.

ಕಸ್ಟ್ ಏಕ್ ಲಿಸಾಂವ್ ಹಾಡುನ್ ಯೆತಾ, ದೊಳೆ ಸೊಡ್ ಮ್ಹಳ್ಳೆಂ ಲಿಸಾಂವ್. ದಿಸಾನ್‌ದೀಸ್ ಮನಿಸ್ ಪ್ರಗತೆಚಾ ಪಾವ್ಲಾಂನಿ ಇತ್ಲೊ ಸಂಕೀರ್ಣ್ ಜಾತೆಚ್ ಆಸಾ ಮ್ಹಳ್ಯಾರ್ ತಾಚೆಂ ಚಿಂತಾಪ್ ಸಯ್ತ್ ಅಶಿರ್ ಜಾತೆಚ್ ವೆತಾ.

ದೆಕುನ್ಂಚ್ ಮಾಲ್ಘಡೆ ಸಾಂಗ್ತಾತ್ - ಜೆನ್ನಾ ಸಂತೊಸ್ ಎಕಾಮೆಕಾ ವಾಂತುನ್ ಘೆತಾತ್ ತೆದ್ನಾಂ ತೊ ವಾಡ್ತಾ. ಜೆದ್ನಾಂ ದೂಕ್ ಎಕಾಮೆಕಾಲಾಗಿಂ ವಾಂಟುನ್ ಘೆತಾತ್ ತೆದ್ನಾಂ ತೆಂ ದೂಕ್ ಉಣೆಂ ಜಾತಾ. ಭೋವ್ಶಾ ಸಂಸಾರಿ ಚಿಂತ್ಪಾಕ್ ಹೆಂ ಚಿಂತಾಪ್ ಉಲ್ಟೆಂ ದಿಸೊಂಕ್ ಪುರೊ, ತರ್‌ಯೀ ಮ್ಹಜಾ ಮತಿನ್ ವೊಪುನ್ ಘೆಂವ್ಚೆಂ ಸಮಧಾನೆಚೆಂ ಚಿಂತಾಪ್ ಹೆಂ;

"ಕಸ್ಟ್ ಮ್ಹಳ್ಯಾರ್ ಕಿತೆಂ ಮ್ಹಳ್ಳೆಂ ಸಮ್ಜೊಂಕ್ ಫಕತ್ ಅಪ್ಣಾಕ್ ಪಳೆನಾಕಾ - ಬಗಾರ್ ಹೆರಾಂಕ್ ಪಳೆ

ಸಂತೊಸ್ ವಾಂಟುಂಕ್ ಹೆರಾಂಚೊ ಸಂತೊಸ್ ಪಯ್ಲೊ ವಿಂಚಿನಾಕಾ - ತುಜೊ ಸಂತೊಸ್ ಪಯ್ಲೊ ವೀಂಚ್"

- ವಲ್ಲಿ ಕ್ವಾಡ್ರಸ್, ಅಜೆಕಾರ್

ಆಧ್ಲಿಂ ಸಂಪಾದಕೀಯಾಂ

ಸಂಪಾದಕೀಯ್ ಮಂಡಳಿಕ್

ಪಾಟಿಂ ದಾಯ್ಜ್ ಪಾನಾಕ್

ಮುಕ್ತ್ ಉಲವ್ಪ್ ವಾ ಸವಾಯೆಚೆಂ (ಚೀಪ್) ಉಲವ್ಪ್?

ಬಿಜಿ ಆಸಾಯ್‌ಗೀ?

[ಆಮಿಂ ಜಯ್ತೆವಂತ್ ಜಾಂವ್ಕ್ ಕಿತೆಂ ಕರಿಜಾಯ್?]