ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ ’ದಾಯ್ಜ್’ ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಸವಾಲಾಂಕ್ ಜಾಪಿ
ಹ್ಯಾ ಅಂಕಣಾಂತ್ ಇನಾಮಾಂಕ್ ಫಾವೊ ಜಾಲ್ಲ್ಯಾ ಸವಾಲಾಂಚೆಂ ಪೋಶಕ್ ಜಾವ್ನಾಸಾತ್ ಹಿಂ ಕೊಂಕ್ಣಿ ಪತ್ರಾಂ
ದಿವೊ ಹಾಫ್ತ್ಯಾಳೆಂ
ಮಿತ್ರ್ ಹಾಫ್ತಾಳೆಂ
ಸೆವಕ್ ಮಯ್ನ್ಯಾಳೆಂ
ಯಾತ್ರಿ ವಿಶ್ಯಾಂತ್
ಕೊಂಕ್ಣೆಂತ್ ಪಾಟ್ಲ್ಯಾ ಥೊಡ್ಯಾ ವರ್ಸಾಂನಿ ಉದೆವ್ನ್ ಆಯಿಲ್ಲ್ಯಾ ಥೊಡ್ಯಾ ಭರ್ವಶ್ಯಾಚ್ಯಾ ಬರವ್ಪ್ಯಾಂ ಪಯ್ಕಿಂತ್ಲೊ ಎಕ್ಲೊ ’ಯಾತ್ರಿ’ ಕವಿ, ನಾಟಕಿಸ್ತ್, ಕಾಣ್ಯೆಗಾರ್, ವಿಡಂಬನ್ಕಾರ್ ತಶೆಂಚ್ ವಾವ್ರಾಡಿ. ಕೊಂಕ್ಣಿ ಪತ್ರಿಕೋಧ್ಯಮಾಂತ್ ಸಯ್ತ್ ಹಾಣೆಂ ಅಪ್ಲೊ ಹಾತ್ ಭಂವ್ಡಾಯ್ಲಾ ದೆಖುನ್ ಕೊಂಕ್ಣಿ ಲೊಕಾಂಚಾ ಕಾಳ್ಜಾಚೊ ಉಲೊ ಲಾಗ್ಶಿಲ್ಯಾನ್ ಆಯ್ಕೊಂಕ್ ಸಕ್ತಾ. ಹ್ಯಾ ವರ್ಸಾಂತ್ ವಾಚ್ಪ್ಯಾಂಚ್ಯಾ ಸವಾಲಾಂಕ್ ಅಪುರ್ಭಾಯೆಚ್ಯೊ ಜಾಪಿ ದೀಂವ್ಕ್ ಹೊ ಸಕ್ತಲೊ ಮ್ಹಳ್ಳೊ ಆಮ್ಚೊ ಭರ್ವಸೊ.
[ಹೆಂ ಮಯ್ನ್ಯಾಳೆಂ ಅಂಕಣ್ ಜಾವ್ನಾಸಾ, ತುಮ್ಚಿಂ ಸವಾಲಾಂ ವಿಚಾರಾ, ಇನಾಮಾಂ ಜೊಡಾ]
ಜಾಪಿ ದಿತಾ: ಯಾತ್ರಿ
1. ಆಜ್ಕಾಲ್ ಕೊಂಕ್ಣೆಚಿ ಸೆವಾ ಕರ್ತೆಲೆ ಬೊಟಾಂನಿ ಮೆಜುಂಕ್ ಮೆಳ್ತಾತ್, ಆನಿ ತ್ಯಾ ಮನ್ಶ್ಯಾಂಚಿ ಪಾಟ್ ಥಾಪ್ಡುನ್ ತಾಂಕಾ ಉತೇಜನ್ ದಿಂವ್ಚಾ ಬದ್ಲಾಕ್ ತಾಂಚಿ ಖೆಳ್ಕುಳಾಂ ಕರ್ನ್ ತಾಂಕಾ ಖುರ್ಸಾಯ್ತಾತ್. ಹೆಂ ಆಮ್ಚಾ ಕೊಂಕ್ಣಿ ಸಮಾಜೆಂತ್ ಕಿತ್ಯಾಕ್ ಘಡ್ತಾ ಯಾತ್ರಿ ಮಾಮಾ? [ಬಿಂದು ಬೆಂದುರ್] (ಎಕಾ ವರ್ಸಾಚಿ ಸೆವಕ್ ಪತ್ರಾಚಿ ದೇಶಿ ವರ್ಗಣೆಚೆಂ ಇನಾಮ್ ಫಾವೊ ಜಾಲ್ಲೆಂ ಸವಾಲ್)
ಜಾ: ಅಪ್ಣಾವರ್ನಿಂ ಕರುಂಕ್ ಜಾಯ್ನಾತ್ಲೆಂ ಹೆರಾಂನಿ ಕರ್ತಾನಾ ಹಾಂಕಾಂ ಮೊಸೊರ್ ಜಾತಾ. ಪುಣ್ ಉಜಳ್ಚ್ಯಾ ಸುರ್ಯಾಚೊ ಪ್ರಕಾಸ್ ಕೊಣಾವರ್ವಿಂಯೀ ಮಾಜ್ವೊಂವ್ಕ್ ಜಾತಾವೆ?. ದೆಕುನ್ ಮೊಸೊರ್ ಕರ್ಚ್ಯಾ, ಖೆಳ್ಕುಳಾಂ ಕರ್ಚ್ಯಾ ಅಸಲ್ಯಾಂಕ್ ಥಂಯ್ಚ್ ಸೊಡ್ಚೆಂ ಆನಿ ಅಪ್ಲೆಂ ಕಾಮ್ ಕರ್ನ್ ಮುಖಾರ್ ವೆಚೆಂಚ್ ಬರೆಂ ನ್ಹಂಯ್ಗಿ ಬಿಂದು?.
2. ಹಾಂಗಾ ಥೊಡ್ಯಾಂಕ್ ಕರುಂಕ್ ಜಾಯ್ನಾತ್ಲ್ಯಾರೀ, ಹೆರಾಂನಿ ಕರ್ಚೆಂ ಪಳೆವ್ನ್ ಪೊಡ್ಕಾಣಿ ಸುರು ಜಾಲ್ಯಾಮೂ? ಕಹಲೆಂ ವಕಾತ್ ದಿಲ್ಯಾರ್ ಹಿಂ ಸುಧ್ರಾತಿತ್ ಧನ್ಯಾ? [ಸಾಂ.ಮಿಂಗೆಲ್ ದುಭಾಯ್]
ಜಾ: ತಾಂಕಾಂ ವಕಾತ್ ಖೈಂಚ್ಯಾ ಪ್ರಾಚಿತಾಕ್..? ಪೋಟ್ ನಿತಳ್ ಕರ್ಚ್ಯೊ ಗುಳಿಯೊ ದೀಜೆ.
3. ಲಾಲು ಪ್ರಸಾದ್, ರಾಖಿ ಸಾವಂತ್ ಆನಿ ಮುಲಾಯಮ್ ಸಿಂಘ್ ಹಾಂಚೆ ಪಯ್ಕಿ ಕೊಣ್ ಆಮ್ಚಾ ದೆಶಾಚೊ ಪ್ರಧಾನಿ ಮಂತ್ರಿ ಜಾತಿತ್? [ಗಂಗು ಗಂಗೊಳ್ಳಿ, ವಾರಣಾಸಿ]
ಜಾ: ಕೋಣ್ ಜಾತಿತ್ ಜಾಲ್ಯಾರೀ, ಹಾಂವೆ ತುಂವೆ ಘಾಮ್ ಪೀಳ್ನ್ ಘೊಳ್ಚೆಂ ಚುಕಾತ್ಗೀ ಗಂಗೋ..?
4. ಆದಿಂ ಕಸ್ಟಾಂನಿ ಕಾಜಾರಾಂ ಜಾತಾಲಿಂ ತರ್ಯೀ, ಜೀಣ್ಭರ್ ಕಾಜಾರಿಂ ಜಾವ್ನ್ ಉರ್ತಾಲಿಂ. ಪುಣ್ ಆಜ್ಕಾಲ್ ಗಡ್ದಾಯೆನ್ ಕಾಜಾರಾಂ ಜಾವ್ನ್ಯೀ ಮಯ್ನ್ಯಾಂನಿ ಡೈವೋರ್ಸ್ ಜಾತಾಮೂ? [ರೊಜಿಟಾ ನಜ್ರೆತ್, ಮಿರಾರೋಡ್]
ಜಾ: ಕಾಜಾರಾಂ ಸರ್ಗಾರ್ ಘಡ್ಚಿಂ ಖಂಯ್. ಕಶ್ಟ್ ಆನಿ ಸುಲಭ್, ಒಟ್ಟಾರೆ ಆತಾಂಚ್ಯಾಲಾಗ್ಗಿಂ ಸೊಸ್ಣಿಕಾಯ್ ಆನಿ ವಿಶ್ವಾಸ್ ನಾಂ ಜಾಲಾ.
5. ಬ್ಯಾಂಡ್ ಫೋರ್ಚುಗೀಸಾಂಚೆಂ, ದುಕೊರ್ ಗೊರ್ಯಾಂಚೊ, ಕೋಟ್ ಬ್ರಿಟಿಶಾಂಚೊ - ತರ್ ಕೊಂಕ್ಣೆಂತ್ ಆಮ್ಚೆಂ ಮ್ಹಳ್ಯಾರ್ ಕಿತೆಂ ಆಸಾಗಾ? [ಬೋರಿ ಬಸವ, ಅಬ್ಬಾಸಿಯಾ] (ಎಕಾ ವರ್ಸಾಚಿ ಮಿತ್ರ್ ಪತ್ರಾಚಿ ದೇಶಿ ವರ್ಗಣೆಚೆಂ ಇನಾಮ್ ಫಾವೊ ಜಾಲ್ಲೆಂ ಸವಾಲ್)
ಜಾ: ಎಕಾಮೆಕಾಚೆ ಪಾಂಯ್ ವೋಡ್ನ್, ಸೊಭಾಯ್ ದೆಕ್ಚಿ ಕಲಾ ಆಮ್ಚೆಲಾಗಿಂ ನಾಂವೆಗಾ..?
6. ಕಾಜಾರಾ ಉಪ್ರಾಂತ್ ಹನಿಮೂನ್ ತರ್ ಕಾಜಾರಾ ಆಧಿಂ ಕಿತೆಂ ಅಂಕಲ್? [ಪೊಕ್ರಿ ಪಕ್ಕು, ಫಲಿಮಾರ್]
ಜಾ: ಕಾಜಾರಾ ಪಯ್ಲೆಂ ಕಾಜುಚ್ಯಾ ಪಾಡಿಂತ್ ಚೊರ್ಯಾಂ ಚೊರ್ಯಾಂ ಚುನ್-ಮುನ್.
7. ಹಾಂಗಾ ಥೊಡೆ ಕಾಜಾರಾಂ ಸೊಭಾಣಾಂನಿ ಲಾವ್ದಾತೆ ದೋಮಿನೊ ಗಾಯ್ತಾನಾ ವೊಮ್ತೆಂ ಪಡೊನ್ ಹಾಸ್ತಾತ್ ಕಿತ್ಯಾಕ್ ಕುಂಪಾರೆ? [ಕುಮಾದ್ರ್, ಕುಂದಾಪುರ್]
ಜಾ: ಸಾರ್ಕೆಂ ಆಯ್ಕ್ಗಾ - ತೆ ’ಲಾವ್ದಾತೇ ದೋಮಿನೆ’ ಮುಣ್ತಾತ್ಗೀ ವಾ ’ಲಾಂಬ್ತಾತ್ ತೆ ದೋನ್ ಗುಳೆ’ ಮ್ಹಣ್ತಾತ್ ಮ್ಹಳ್ಳೆಂ!
8. ಆಮ್ಚಾ ಸಮಾಜೆಂತ್ ಇತ್ಲಿಂ ಸಂಚಾಲನಾಂ ಆಸೊನ್ಯೀ ಗರ್ಜೆವಂತ್ ಲೋಕ್ ದಿಸಾನ್ ದೀಸ್ ಚಡೊನ್ ಯೆತಾ ಕಿತ್ಯಾಕ್? [ಸಹನಾ, ಕುವೇಯ್ಟ್] (ಎಕಾ ವರ್ಸಾಚಿ ದಿವೊ ಪತ್ರಾಚಿ ದೇಶಿ ವರ್ಗಣೆಚೆಂ ಇನಾಮ್ ಫಾವೊ ಜಾಲ್ಲೆಂ ಸವಾಲ್)
ಜಾ: ಸಂಚಲನಾಂ ಸಭಾರ್ ಆಸಾತ್ ತರೀ, ನಿಸ್ವಾರ್ಥ್ಪಣಿಂ ಸೆವಾ ದಿಂವ್ಚಿ ಭೋವ್ ಥೊಡಿಂಚ್ನೇ ಸಹನಾ..?
9. ಕುಕ್ಕೆಹಳ್ಳೆಕ್ ಡೈರೆಕ್ಟ್ ಫ್ಲಾಯ್ಟ್ ಮ್ಹಳ್ಳಿ ಖಬಾರ್ ಆಯ್ಕಲಿ - ಹಿ ಕುಕ್ಕೆಹಳ್ಳಿ ಖಂಯ್ ಆಸಾ ಮಾಮಾ? [ಅಸ್ಕತ್ ಪಿಲೊ, ಮಸ್ಕತ್]
ಜಾ: ಸರ್ಕಾರಾಕೀ ತೊಚ್ ದುಭಾವ್, ನಾಂ ತರ್ ಎದೋಳ್ ಎರ್ಫೊರ್ಟ್ ಜಾಯ್ನಾಂ ಆಸ್ತೊಗೀ..?
10. ಆಮ್ಚಾ ಗಾಂವಾಂತ್ ಕೊಳಿಂದ್ರ್ ಮಾಜ್ರಾಂಕ್ ಧರುಂಕ್ ಯೆತಾತ್ಮೂ? [ಸಿಲು, ಪುತ್ತೂರ್]
ಜಾ: ಮಾಜ್ರಾಚೆ ನಾಕ್ಶ್ಯೊ ಆನಿ ದಾಂತ್ ಝಡ್ಲ್ಯಾತ್ಗೀ..?. ಪುಣ್ ಸಾಂಗ್ ಮ್ಹಾಕಾ - ಹೆ ಕೊಳಿಂದ್ರ್ ದೋನ್ ಪಾಂಯಾಂಚೆ ಪುಣಿಂ ನ್ಹಂಯ್ಮೂ?
11. ವ್ಹಡ್ಲೆಂ ಫೆಸ್ತ್ ಕರ್ಚೆಂ ಸೊರೊ ಪಿಯೆಂವ್ಕ್ ಕಂಯ್ - ವ್ಹಯ್ವೆ ಸಾಡ್ವಾಂನೊ? [ಬೊಂಬಿಲ್ ಬಾಬುಟಿ]
ಜಾ: ಪಿಯೆತಾಲೆ ತಶೆಂ ಖಂಡಿತ್ ಸಾಂಗ್ಚೆನಾಂತ್. ಆನಿ ಪಿಯೆವ್ನ್ ಇಲ್ಲೆ ಲೇಲೆ ಘಾಲೆನಾಂತ್ ತರ್, ಫೆಸ್ತ್ ಮ್ಹಣ್ ಹೆರಾಂಕ್ ಕಳ್ಚೆಂ ತರೀ ಕಶೆಂ..?
12. ತುಂ ಅಂಕ್ವಾರಿಗಿ ಕಾಜಾರಿ ಯಾತ್ರಿ? [ಅಪುಟ್ ಅಂಕ್ವಾರ್ನ್]
ಜಾ: ಹಾಂವ್ಯೀ ತುಜೆಪರಿಂಚ್ ಅಪುಟ್ ಆಂಕ್ವಾರ್; ಪುಣ್ ಹ್ಯಾ ’ಅಪುಟ್’ ಸಬ್ದಾಂತ್ ಮ್ಹಾಕಾ ಕಿತ್ಯಾಕ್ಗೀ ಪಾತ್ಯೆಣಿ ನಾಂ..!!
ಎಕಾ ವರ್ಸಾಚಿ ದೇಶಿ ವರ್ಗಣಿ ಹ್ಯಾ ಸಕಯ್ಲ್ಯಾಂಕ್ ಫಾವೊ ಜಾತಾ
’ಮಿತ್ರ್ ಹಾಪ್ತ್ಯಾಳೆಂ’
ಬೋರಿ ಬಸವಾ, ಅಬ್ಬಾಸಿಯಾ
’ದಿವೊ ಹಾಪ್ತ್ಯಾಳೆಂ’
ಸಹನಾ, ಕುವೇಯ್ಟ್
’ಸೆವಕ್ ಮಯ್ನ್ಯಾಳೆಂ’
ಬಿಂದು, ಬೆಂದುರ್
(ಇನಾಮಾಂ ಜಿಕ್ಪ್ಯಾಂಕ್ ತಾಂಚಿಂ ಇನಾಮಾಂ ತಾಣಿಂ ದಿಲ್ಲ್ಯಾ ವಿಳಾಸಾಕ್ ಪಾವ್ತೆಲಿಂ, ಚೂಕ್ ವಿಳಾಸಾಕ್ ಆಮಿ ಜವಾಬ್ಧಾರ್ ನಾಂವ್) - ಸಂ.
ತುಮ್ಚಿಂ ಸವಾಲಾಂ ಧಾಡುಂಕ್ ವಿಳಾಸ್: info@daaiz.com
ಹ್ಯಾ ಅಧ್ಲಿಂ ಸವಾಲಾಂ-ಜಾಪಿ: 1, 2, 3, 4, 5, 6, 7, 8, 9, 10, 11, 12, 13, 14
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
