ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ -’ದಾಯ್ಜ್ ’-ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಧರ್ಮಾಚ್ಯಾ ನಾಂವಾನ್ ಕರ್ಮಾಂ?! - ಆಸ್ಟಿನ್ ಡಿ’ಸೋಜ್ ಪ್ರಭು
ಆಮಿಂ ಹೆರಾಂಕ್ ಬೋಟ್ ಜೊಕುನ್ ’ತಿಂ ಫಿತಿಸ್ಪಣಾಂ ಆದಾರ್ತಾತ್’ ಮ್ಹಣ್ ಆರಾಬಾಯ್ ದಿತಾಂವ್ ತರೀ ಆಮ್ಚೆ ಮಧೆಂ ಆಸ್ಚಿಂ ತಿಂ ಫಿತಿಸ್ಪಣಾಂ ಲೇಖ್ ಕರುಂಕ್ ಗೆಲ್ಯಾರ್ ತಿ ಲಾಯ್ನ್ ಕನ್ಯಾಕುಮಾರಿ ಥಾವ್ನ್ ಕಾಶ್ಮೀರ್ ಪರ್ಯಾಂತ್ ವಚಾತ್.
ದೆವಾನ್ ಹ್ಯಾ ಸಂಸಾರಿಂ ಮನ್ಶಾಕುಳಾಕ್ ರಚ್ತಚ್ ತಾಣೆಂ ಹ್ಯಾ ಸಂಸಾರಾಂತ್ಲ್ಯಾ ಸರ್ವ್ ವಸ್ತು, ಮನ್ಜಾತಿ, ಮಾಸೆ, ಫುಲ್-ಫಳಾಂ, ರೂಕ್-ಝಡಾಂಚೊ ಜಾಯ್ ತಸೊ ಪ್ರಯೋಗ್ ಕರಾ ಮ್ಹಣ್ ಬೆಸಾಂವ್ ದಿಲ್ಲೆಂ ಮಾತ್ರ್ ಶಿವಾಯ್ ಆಪ್ಣಾಕ್ ಹೊಗಳ್ಸುನ್ ದೀಸ್ ಸಾರಾ ವ ವೇಳ್ ವಿಭಾಡಾ ಮ್ಹಳ್ಳೆಂ ನಾ. ಆದಿಂ ಲೊಕಾಕ್ ಕಾಮ್ ನಾತ್ಲ್ಲೆಂ ತೆನ್ನಾಂ ಲೋಕ್ ಆಪ್ಲ್ಯಾ ದೆವಾಕ್ ಆರಾಧಾನ್ ಕರುಂಕ್ ಲಾಗ್ಲೊ, ಫುಲ್-ಫಳಾಂ ಭೆಟಂವ್ಕ್ ಲಾಗ್ಲೊ, ಮನ್ಜಾತಿಂಕ್ ಜಿವೆಶಿಂ ಮಾರುನ್ ಸಾಕ್ರಿಫಿಸ್ ಭೆಟಂವ್ಕ್ ಲಾಗ್ಲೊ, ತಾಚ್ಯಾ ನಾಂವಾರ್ ಪುಸ್ತಕಾಂ ಬರಂವ್ಕ್ ಬಸ್ಲೊ, ತಾಕಾ ಆರಾಧುಂಕ್ ದೆವಾಳಾಂ ಬಾಂಧುಂಕ್ ಲಾಗ್ಲೊ ಆನಿ ಸಂಸಾರಾಂತ್ಲಿ ಪ್ರಜಾ ಸಂಖ್ಯಾನ್ ವಾಡಾತ್ತ್ ವೆತಾಂ ಹೊ ಏಕ್ ವ್ಯಾಪಾರ್ಚ್ ಜಾಲೊ!
ಮೈಕ್ ಟೈಸನ್ ಆನಿ ಮಹಮ್ಮದ್ ಆಲಿ ಪರಿಂ ತುಜ್ಯಾ ದೆವಾಪ್ರಾಸ್ ಮ್ಹಜೊ ದೇವ್ ವ್ಹಡ್, ಜಯ್ತೆವಂತ್, ಸೊಡ್ವಣ್ದಾರ್, ತಾಚ್ಯಾಲಾಗಿಂ ಮಾತ್ರ್ ಸರ್ಗ್ ಆಸಾ, ಮ್ಹಜೆಂ ಧರ್ಮ್ ಮಾತ್ರ್ ಮೆಲ್ಯಾ ಉಪ್ರಾಂತ್ ಸರ್ಗಾಕ್ ವ್ಹರ್ತಾ, ದೆವಾಕ್ ದಾನ್ ದಿಲ್ಯಾರ್ ತೊ ಧಾ ವಾಂಟ್ಯಾಂನಿ ಪಾಟಿಂ ದಿತಾ - ಅಸಲೆಂ ’ತಾಯ್ಕುಳೊ ಚಿಂತಾಪ್’ ಚಡಾತ್ತ್ ಗೆಲೆಂ. ರಾಜ್ಯ್ ವಿಂಗಡ್ ಜಾಲೆ, ದೇಶ್ ಭೆಸಾಂ ಜಾಲೆ, ಸಾಧ್ಯಾ ಮನ್ಶ್ಯಾಚೆಂ ಸತ್ತ್ಯಾನಾಸ್ಚ್ ಜಾವ್ನ್ ಗೆಲೆಂ.
ಕೊಣೆಂ ದೆವಾಕ್ ಕೊಂಬೊ ದಿಲೊ, ಕೊಣೆಂ ದೆವಾಕ್ ಲಿಂಬೊ ದಿಲೊ, ಕೊಣೆಂ ದೆವಾಕ್ ಆಂಬೊ ದಿಲೊ; ಕೊಣೆಂ ದೆವಾಕ್ ಪಯ್ಶೆ ದಿಲೆ, ಕೊಣೆಂ ದೆವಾಕ್ ವಾತಿ ದಿಲ್ಯೊ; ಸರ್ವ್ಯ್ ದೆವಾಕ್ ಅಭಾರಿ ಜಾಲೆ ಆನಿ ತಾಚಿ ಶ್ಯಾಥಿ ವಾಖಣುಂಕ್ ಲಾಗ್ಲೆ, ತಾಕಾ ಅರ್ಗಾಂ ಭೆಟಂವ್ಕ್ ಲಾಗ್ಲೆ ಆನಿ ಜಿವೆಚ್ ಮಾಂಕ್ಡಾ ಸರ್ಗಾಕ್ ಪಾವ್ಲೆ. ಹಾಂತುಂ ಮುನಫೊ ಜೊಡ್ಲ್ಲೊ - ದೆವಾಳಾಂತ್ಲ್ಯಾ ಆಚಾರ್ಯಾಂನಿ ಮಾತ್ರ್. ದೇವ್ ಆಸಾ ಎಕ್ಲೊಚ್ ತರೀ ದೀವ್ಳ್, ಇಗರ್ಜ್, ಸಿನೆಗೊಗ್, ಪಳ್ಳಿ, ತೇಂಪ್ಲ್, ಇತ್ಯಾದಿ ಬಾಂದ್ಪಾಂಚಿ ರಾಸ್ಚ್ ಪಡ್ಲಿ; ಲೊಕಾನ್ ಹ್ಯಾ ಸಂಸಾರಾಂತ್ ತಾಂಚೆಚ್ ಸರ್ಗ್ ರಚ್ಲೆಂ, ತಾಂಚೆಚ್ ಸಾಂತ್ ರಚ್ಲೆ ಆನಿ ಹೆರ್ ಜಾತಿಚ್ಯಾ ಸಾಂತಾಂಕ್ ತಾಂಚ್ಯಾ ಸರ್ಗಾರ್ ಭಿಲ್ಕುಲ್ ಪ್ರವೇಶ್ ದೀನಾ ಜಾಲೆ!
ಬಾಹಾಯ್, ಬುದ್ಧಿಸ್ತ್, ಕ್ರೀಸ್ತಾಂವ್ (ಹಾಂತುಂಚ್ ಹಜಾರ್ ಪಂಗಡ್ ಜಾಲೆ; ದಾಖ್ಲ್ಯಾಕ್ - ಉತ್ತರ್ ಅಮೇರಿಕಾಂತ್ 12,00 ಕ್ರೀಸ್ತಾಂವ್ ಪಂಗಡ್ ಆಸಾತ್ ತರ್, ಸಂಸಾರಾಂತ್ ಆಜ್ 34,000 ವಿವಿಧ್ ಕ್ರೀಸ್ತಾಂವ್ ಪಂಗಡ್ ಉದೆಲ್ಯಾತ್; ಸರ್ವಾಂಚೊ ರಚ್ಣಾರ್ ತೊಚ್ - ಜೆಜು ಕ್ರೀಸ್ತ್.), ಕನ್ಫ್ಯೂಸಿಯನಿಸಂ, ಹಿಂದು, ಇಸ್ಲಾಮ್, ಜೈನ್, ಜುದೆವ್, ಶಿಂಟೊ, ಸಿಖ್, ತಾವೊ ಆನಿ ವೂಡು ಹೆ ಸಂಸಾರಾಂತ್ಲೆ ಅತೀ ವ್ಹಡ್ ಸಂಖ್ಯಾಂಚೆ ಧರ್ಮ್ ಜಾಲೆ.
ಜೆಜು ಸರ್ಲ್ಲ್ಯಾ ಉಪ್ರಾಂತ್ ಕಿರಿಸ್ತಾಂವ್ ಧರ್ಮ್ ರಚ್ಲೊ, ತೊ ಚಲ್ಚೊ ನಮೂನೊ ಪಳೆವ್ನ್ ಥೊಡೆ ಆಪ್ಲೊ ವಾದ್ ಮುಖಾರ್ ಹಾಡ್ತಾನಾ ಇಗರ್ಜ್ ಮಾತೆನ್ ತಾಂಕಾಂ ಧರ್ಮಾ ಥಾವ್ನ್ ಭಾಯ್ರ್ ಘಾಲೆಂ, ಇಗರ್ಜೆಚ್ಯಾ ಶಿಕವ್ಣೆಕ್ ವಿರೋಧ್ ರಾವೊನ್ ವೈಗ್ಯಾನಿಕ್ ರೀತಿ ಸೊಧುನ್ ಕಾಡ್ಲ್ಲ್ಯಾ ವೈಗ್ಯಾನಿಂಕ್ ತೆನ್ನಾಂಚ್ಯಾ ಪಾಪ್ ಸಾಯ್ಬಾನ್ ಲಗಾಡ್ ಕಾಡುನ್ ತುರ್ಥಾನ್ ಸರ್ಗಾಕ್ ಧಾಡ್ಲೆಂ (ವ ಯಮ್ಕೊಂಡಾಂತ್ ಲೊಟ್ಲೆಂ?), ಭಾಯ್ರ್ ಗೆಲ್ಲೆ ತಾಂಚೊಚ್ ಧರ್ಮ್ ರಚುನ್ ಪ್ರೊತೆಸ್ತಾಂತ್ ಮ್ಹಳ್ಳ್ಯಾ ಬಿಲ್ಲ್ಯಾರ್ ಇಗರ್ಜ್ಯೊ ಭಾಂಧುನ್ ಸಭಾರ್ ಲೋಕಾಕ್ ತಾಂಚ್ಯಾ ಪಂಗ್ಡಾಂತ್ ಹಾಡುಂಕ್ ಪಾವ್ಲೆ. ಧರ್ಮಾಚ್ಯಾ ನಾಂವಾನ್ ಝಗ್ಡಿಂ ಜಾಲಿಂ, ಕೊಣೆ ಸೆಮಿನರಿ ಬಾಂದ್ಲ್ಯೊ, ಕೊಣೆ ಕೊಂವೆಂತಾಂ ಬಾಂದ್ಲಿಂ; ಹಾಂಚ್ಯೆ ಮಧೆಂಯ್ ಹಜಾರ್ ಪಂಗಡ್ ಜಾವ್ನ್ ಜೆಜ್ವಿತ್, ಕಾರ್ಮೆಲಿತ್, ಕಾಪುಚಿನ್, ಬೆಥನಿ, ಭಿತರ್ಲ್ಯೊ, ಚ್ಯಾರಿಟಿ, ಮಿಶಿಯೊನರಿ, ಎಸ್.ವಿ.ಡಿ, ಫಾ| ಆಗ್ನೆಲ್, ಇತ್ಯಾದಿ, ಇತ್ಯಾದಿ ಆಮ್ಚೆ ಮಧೆಂಚ್ ಭರ್ಶಿಕ್ ಮಾಸ್ಳೆಪರಿಂ ವಿವಿಧ್ ಪಂಗಡ್ ಉದೆಲೆ. ಜರ್ ದೇವ್ ಏಕ್ಚ್ ಹ್ಯಾಂ ವಿವಿಧ್ ಪಂಗ್ಡಾಂಚಿ ಗರ್ಜ್ ಕಿತೆಂ? ಹೊಯ್ ಏಕಾ ಥರಾಚೊ ವ್ಯಾಪಾರ್ ವಹಿವಾಟ್? ಕೋಣ್ ಹಾಕಾ ಜಾಪ್ ದೀತ್? ವ ಹಾಂವ್ ಸವಾಲಾಂ ವಿಚಾರ್ನ್ಂಚ್ ಯೆಮ್ಕೊಂಡಾಕ್ ವಚಾನ್??
"ಕ್ರೀಸ್ತಾಂವ್ಪಣಾಚಿ ಸುರ್ವಾತ್ ಜಾಲಿ ಪಾಲೆಸ್ತಿನಾಂತ್ ಲೋಕಾ ಜಮ್ಯಾಂಕ್ ಸಾಂಗಾತಾ ಹಾಡುಂಕ್ ಆನಿ ವೇಳ್ ಖರ್ಚುಂಕ್; ಹೊಚ್ ಧರ್ಮ್ ಗ್ರೀಸಾಕ್ ಗೆಲೊ ಆನಿ ಥಂಯ್ಸರ್ ಜಾಲೊ ತತ್ವಜಾಣ್ವಾಯೆಚೊ ಪಂಗಡ್; ಥಂಯ್ ಥಾವ್ನ್ ತೊ ಇಟೆಲಿ ಗೆಲೊ ಆನಿ ಜಾಲೊ ಏಕ್ ಸಂಸ್ಥೊ; ತೊ ಯೆರೊಪಾಕ್ ಗೆಲೊ ಆನಿ ಜಾಲೊ ಏಕ್ ಸಂಸ್ಕೃತಿ ಉಪ್ರಾಂತ್ ತೊ ಅಮೇರಿಕಾ ಆಯ್ಲೊ ಆನಿ ಜಾಲೊ ಏಕ್ ವ್ಯಾಪಾರ್" ಮ್ಹಣ್ತಾ ಅಮೇರಿಕಾಚೊ ಏಕ್ ಖ್ಯಾತ್ ತತ್ವಜ್ಣಾನಿ ಸ್ಯಾಮ್ ಪಾಸ್ಕೊ.
ಆಜ್ ಸಂಸಾರಾಂತ್ 837 ಮಿಲ್ಯ ಹಿಂದು (13%) ಆಸಾತ್; 1.2 ಬಿಲಿಯಾ ಮುಸ್ಲಿಮ್ ಆಸಾತ್(21%) ಆನಿ ಕ್ರೀಸ್ತಾಂವ್ 2 ಬಿಲಿಯಾ (37%) - ಕಥೊಲಿಕಾಂಚೊ ಸಂಖೊ 1.07 ಬಿಲಿಯಾ ಜಾತಾ.
ಆಜ್ ಸಂಸಾರಾರ್ ಜಾಂವ್ಚಿಂ ಸರ್ವಯ್ ದೇಶಾಂ ಮಧ್ಲಿಂ ಝಗ್ಡಿಂ ಧರ್ಮಾಚ್ಯಾ ನಾಂವಾನ್! ಹಿಂದು-ಮುಸ್ಲಿಮ್, ಕ್ರೀಸ್ತಾಂವ್-ಮುಸ್ಲಿಮ್, ಜುದೆವ್-ಮುಸ್ಲಿಮ್ ಝಗ್ಡಿಂ ಹ್ಯಾಂ ಮಧೆಂ ಪ್ರಮುಖ್ ಜಾವ್ನಾಸಾತ್.
ಅಮೇರಿಕಾ ಏಕ್ ಕ್ರೀಸ್ತಾಂವ್ ರಾಷ್ಟ್ರ್ ಮ್ಹಣ್ ಮುಸ್ಲಿಮ್ ಪಾತ್ಯೆತಾತ್ ಆನಿ ಆಜ್ ಹ್ಯಾ ಏಕಾ ನಿಷ್ಠುರ್ ಕಾರಣಾಕ್ ಲಾಗೊನ್ ಕ್ರೀಸ್ತಾಂವ್-ಮುಸ್ಲಿಮಾಂ ಮಧೆಂ ಝಗ್ಡಿಂ ಚಾಲು ಆಸಾತ್. ಜೆರುಜಲೆಮ್ ಕೊಣಾಚೆಂ ಮ್ಹಳ್ಳ್ಯಾಚೆರ್ ಜುದೆವ್-ಮುಸ್ಲಿಮ್ ಝಗ್ಡೆಂ ಕರುನ್ ಆಸಾತ್ ಆನಿ ಹಾಕಾ ಪಾಲೆಸ್ತಿನ್-ಇಸ್ರಾಯೆಲ್ ಪಂಗಡ್ ಝುಜ್ತಾತ್. ಥೊಡ್ಯಾ ಹಿಂದು ಅನ್ನಾಡ್ಯಾಂನಿ ಭಾರತಾಂತ್ ಹಿಂದು-ಕ್ರೀಸ್ತಾಂವ್ ಝಗ್ಡೆಂ ಆಸಾ ಕೆಲಾಂ - ಧರ್ಮಾಚ್ಯಾ ನಾಂವಾನ್! ಭಾರತಾಂತ್ ಪ್ರಸಾರ್ ಜಾಂವ್ಚಿಂ ಫ್ಯಾಶನಾಂ, ನಾಚ್ಪಾಂ, ಖಾಣ್-ಪೀವನಾಂ ಸರ್ವ್ ವಿದೇಶಿ ಮಾದರಿಚಿಂ ಆನಿ ಹಾಕಾ ಸರ್ವಾಕ್ ಕ್ರೀಸ್ತಾಂವ್ ಕಾರಣ್ ಮ್ಹಣ್ ಹಾಂಚೊ ವಾದ್ ಆನಿ ಹಾಕಾ ಲಾಗೊನ್ ತೆ ಕ್ರೀಸ್ತಾಂವ್ ಲೋಕಾಚೆರ್, ವ್ಹಡಿಲಾಂಚೆರ್ ಬಲಾತ್ಕಾರಾನ್ ಮಾರಾಫಾರ್ ಕರುನ್ ಆಸಾತ್.
ಆದಿಂ ಮಾಗಾ ಕ್ರೀಸ್ತಾಂವ್ ಮಿಶ್ಯೊನರಿ ಭಾರತಾಕ್ ದೆಂವ್ಲೆ ಆನಿ ಆಸ್ಪತ್ರ್ಯೊ, ಶಾಲಾಂ, ಧರ್ಮಾಶ್ರಮಾಂ, ಬಾಂದುನ್ಂಚ್ ಗೆಲೆ ಭಾರತಾಂತ್ಲ್ಯಾ ದುರ್ಬಳ್ ವರ್ಗಾಕ್ ಹಾತ್ ದೀಂವ್ಕ್ ಆನಿ ಫಾವೊ ತೆಂ ಶಿಕಾಪ್, ವಕಾತ್, ಪಾಕೆಂ, ಇತ್ಯಾದಿ ದೀಂವ್ಕ್. ಸಾಂಗಾತಾಚ್ ತಾಣಿಂ ತಾಂಚೊ ಧರ್ಮ್ ಪಾಳುಂಕ್ ಹೆಣೆಂ-ತೆಣೆಂ ಇಗರ್ಜೊ ಬಾಂದ್ಲ್ಯೊ, ಕೊಂವೆಂತಾಂ ಬಾಂದ್ಲಿಂ ಆನಿ ಅತ್ಮೆ ಸಾಲ್ವಾರ್ ಕರುಂಕ್ ಹಿಂದ್ವಾಂಕ್ ಕನ್ವೆಡ್ತರ್ ಕರುಂಕ್ ಪಡ್ಲೆ. ತರಿಪುಣ್ ಆಜ್ ಭಾರತಾಂತ್ ಕ್ರೀಸ್ತಾಂವಾಂಚೊ ಸಂಖೊ ಥೊಡ್ಯಾ ವರ್ಸಾಂ ಆದಿಂ 2.7 ಆಸ್ಲ್ಲೊ ಆತಾಂ ಫಕತ್ 2.3 ಠಕ್ಕೆ ಮಾತ್ರ್ ಆಸಾ. ತರೀ ಹೆ ಥೊಡೆ ಹಿಂದು ಉಗ್ರ್ವಾದಿ ಆಜ್ ಭಾರತಾಂತ್ ಕ್ರೀಸ್ತಾಂವ್ ಹಿಂದ್ವಾಂಕ್ ಕನ್ವೆಡ್ತರ್ ಕರ್ನ್ ಧರ್ಮ್ ಪ್ರಚಾರ್ ಕರ್ತಾತ್ ಮ್ಹಣ್ ಅಪ್ವಾದ್ ಮಾಂಡ್ತಾತ್ ಮಾತ್ರ್ ನ್ಹಂಯ್, ತಾಂಕಾಂ ನಿರಂತರಿಂ ಧೊಸುನ್ಂಚ್ ಆಸಾತ್.
ಹ್ಯಾ ಉಚಾಂಬಳಾಯೆಕ್ ಥೊಡೆಂ ಕಾರಣ್ ಕಿತೆಂಗಿ ಮ್ಹಳ್ಯಾರ್ ಆಮ್ಚೆ ಥೊಡೆ ಪ್ರೊತೆಸ್ತಂತ್ ಭಾವ್ ಉತ್ತರ್ ಭಾರತಾಕ್ ವಚೊನ್ ಆಪ್ಲೆಂ ಬಿಡಾರ್ ಕರ್ನ್, ಥೊಡ್ಯೊ ಲ್ಹಾನ್ ಲ್ಹಾನ್ ಇಗರ್ಜೊ ಬಾಂಧುನ್ ಪಯ್ಶ್ಯಾಂಚಿ ರೂಚ್ ದಾಖವ್ನ್ ಸಭಾರ್ ಹಿಂದು ಉಣ್ಯಾ ಸಂಖ್ಯಾತಾಂಕ್ ಕ್ರೀಸ್ತಾಂವ್ ಕರ್ಚ್ಯಾಂತ್ ಯಶಸ್ವೀ ಜಾಲ್ಯಾತ್. ಹೆಂ ಪಳೆಲ್ಲೆ ಹಿಂದು ಬಜರಂಗ್ದಳಾಚೆ ದ್ರೋಹಿ ಹೊ ಕನ್ವೆಡ್ತರ್ಪಣಾಚೊ ಅಪ್ರಾಧ್ ಸರ್ವಯ್ ಕ್ರೀಸ್ತಾಂವಾಂಚೆರ್ ದಾಳ್ತಾತ್ ಆನಿ ಉಪಾದ್ರ್ ದಿತಾತ್; ಯೆದೊಳ್ಚ್ ತಾಣಿಂ ಸಭಾರ್ ಕಥೊಲಿಕಾಂಚೆ ಜೀವ್ಯ್ ಕಾಡ್ಲ್ಯಾತ್.
ಆಯ್ಲೆವಾರ್ ಕುಂದಾಪುರಾಂತ್ ಏಕಾ ಕಾರ್ಮೆಲಿತ್ ಯಾಜಕಾಕ್ ಆನಿ ತಾಚ್ಯಾ ದೊಗಾಂ ಸಾಂಗಾತ್ಯಾಂಕ್ ಬಜರಂಗ ದಳಾಚ್ಯಾಂನಿ ’ಕನ್ವೆಡ್ತರ್ ಕೆಲೆಂ’ ಮ್ಹಳ್ಳೊ ಅಪ್ರಾಧ್ ಮಾಂಡುನ್ ಸರ್ಸರಿತ್ ವ್ಹಾಜಯ್ಲೆಂ. ಘಾಯೆಲ್ಲೆ ಸಭಾರ್ ದೀಸ್ ಆಸ್ಪತ್ರೆಂತ್ ದಾಖಲ್ ಜಾವ್ನ್ ಸುಸ್ರೂಶಾ ಘೆವ್ನ್ ರಾವ್ಲೆ. ತಾಂಕಾಂ ಪಾಟಿಂಬೊ ದೀಂವ್ಕ್ ಸಭಾರ್ ಹಿಂದು ರಾಜಕೀಯ್ ಮುಖೆಲಿ ಸರ್ವಯ್ ಕ್ರೀಸ್ತಾಂವಾಂಕ್ ಧುರ್ಸೊಂಕ್ ಲಾಗ್ಲೆ, ಕ್ರೀಸ್ತಾಂವಾಂನಿ ಭಾರತಾಂತ್ ಕಠೀಣ್ ರೀತಿರ್ ಕನ್ವೆಡ್ತರ್ಪಣ್ ಸುರು ಕೆಲಾಂ ಆನಿ ಹೊ ಏಕ್ ಹಿಂದು ಜಾತಿಕ್ ಬೃಹತ್ ಮಾರ್ ಮ್ಹಣ್ ಭಾಷಣಾಂ ದೀವ್ನ್ ಅಶಿಕ್ಪಿ ಹಿಂದ್ವಾಂಕ್ ಚಾಳ್ವೊಂಕ್ ಲಾಗ್ಲೆ.
ಸರ್ವಾಂಚೆ ಧರ್ಮ್ ಶಾಂತಿ-ಸಮಾಧಾನ್ ಪ್ರಸಾರ್ತಾತ್ ತರೀ ಆಜ್ ಸಂಸಾರಾರ್ ಧರ್ಮಾಚಾ ನಾಂವಿ ಜಾಂವ್ಚಿ ತಿ ವೀದ್ವಾವ್ಳಿ ಪಳೆತಾನಾ, ಹ್ಯಾ ಸಂಸಾರಾಂತ್ ಮಾನವಾಂಕ್ ಧರ್ಮ್ ಜಾಯ್ಗಿ ಮ್ಹಳ್ಳೆಂ ಸವಾಲ್ ವಿಚಾರುಂಕ್ ಕಾರಣ್ ದಿತಾ. ಆಜ್ ಸಂಸಾರಾಂತ್ ಧರ್ಮಾಚಾ ನಾಂವಾರ್ ಜಾಂವ್ಚೆಂ ಕರ್ಮ್ ರಾವ್ಲ್ಲ್ಯಾ ಬಗಾರ್ ಭಿಲ್ಕುಲ್ ಶಾಂತಿ ಸಮಾಧಾನ್ ಯೆಂವ್ಚೆಂ ನಾ ಮ್ಹಳ್ಳ್ಯಾಕ್ ಸಂಸಾರಾರ್ ಜಾಂವ್ಚಿಂ ಆತರ್ವಣಾಂಚ್ ಸಾಕ್ಸ್ ದಿತಾತ್.
About us | Feedback | Contact us
Copyright ©
2005 DAAIZ.COM All rights reserved.
Page concept, designed, hosted and maintained by Ashawadi Publications
