ಕರೆಜ್ಮಾಂತ್

ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್‍ಯಾಂತ್, ಕೊಂಕಣಿ ಖಾತಿರ್.

"ಆಮ್ಚಾ ಜಿಣ್ಯೆಥಾವ್ನ್ ಆಮಿ ನಿಜಾಯ್ಕೀ ಆಶೆಂವ್ಚಿ ಖಂಡಿತ್ ಬೌತಿಕ್ ಆಸ್ತ್ ನ್ಹಯ್"

ಕರೆಜ್ಮಾಂತ್ ಆಮ್ಚಿ ಜಿಣಿ ಆನಿ ರೆತಿರ್

ವರಸ್ : 2006

ಅಂಕೊ : 22

ಮಯ್ನೊ : ಎಪ್ರಿಲ್

ಸಂಪಾದಕೀಯ್ - 22.

ವಲ್ಲಿ ಕ್ವಾಡ್ರಸ್

ಕರೆಜ್ಮಾಚೊ ಕಾಳ್ ಆಯ್ಲೊ ಮ್ಹಣ್ತಾನಾ ಚಡಾವತ್ ಕ್ರಿಸ್ತಾಂವ್ ಲೋಕ್ ಜಾಗೊ ಜಾತಾ ಆನಿ ಅಪ್ಣಾಲಾಗಿಂ ನಾತ್‌ಲ್ಲ್ಯಾ ವೆಳಾಂತ್ ಥೊಡೊ ವೇಳ್ ಪುಣೀಂ ಅಪ್ಲ್ಯಾ ಅತ್ಮಿಕ್ ನಿಯಾಳಾಕ್ ಗಳ್ಸುಂಕ್ ಸೊಧ್ತಾ. ಖಂಯ್ ಕರೆಜ್ಮಾಚಾ ಕಾಳಾರ್ ಸರಾಗ್ ರೆತಿರ್‍ಯೊ ಆಸಾ ಕರ್ತಾತ್ ತರ್ ಖಂಯ್ ಮಾಗ್ಣಿಂ ವೊರೆಸಾಂವಾಂ, ಖುರ್ಸಾವಾಟೊ ಜಾತಾತ್ ಆನಿ ಜಾಯ್ತೊ ನಿಯಾಳ್. ಹಾಚೆಮಧೆಂ ಉಭೆಂ ಜಾತಾ ಸವಾಲ್ - ಕಿತೆಂ ಮನಿಸ್ ಹ್ಯಾ ಸರ್ವಾಂ ಥಾವ್ನ್ ಕಿತ್ಲೊ/ಕಸೊ ಪರಿವರ್ತಿತ್ ಜಾತಾ?

ಆಯ್ಲೆವಾರ್ ಕುವೆಯ್ಟಾಂತ್ ಪವಿತ್ರ್ ಅತ್ಮ್ಯಾಚೆಂ ಮಾಗ್ಣೆಂ ಕರ್ನ್ ಜಾಯ್ತಿಂ ಅಜ್ಯಾಪಾಂ ಕೆಲ್ಲೊ, ಆಮ್ಚಾ ಭಾರತಾಚೊ ಫಾಮಾದ್ ಭಾವ್ ಪಾವ್ಲ್ ದಿನಕರ್ ಆಯಿಲ್ಲೊ. ಹಜಾರಾಂನಿ ಲೋಕ್ ಹಾಕಾ ಪಳೆಂವ್ಕ್, ಆಯ್ಕೊಂಕ್ ಆಯಿಲ್ಲೊ. ಹಾಂವ್‌ಯ್ ತಾಂಚೆಮಧ್ಲೊ ಎಕ್ಲೊಂ. ಪುಣ್ ವಿಜ್ಮಿತ್ ಕರ್ಚಿ ಗಜಾಲ್ ಖಂಯ್ಚಿಗೀ ಮ್ಹಳ್ಯಾರ್ ಕುವೆಯ್ಟಾಂತ್ಲೆ ಸಭಾರ್ ಅರ್ಭಿ ಸಯ್ತ್ ಹ್ಯಾ ಮಾಗ್ಣ್ಯಾಜಮಾತೆಕ್ ಹಾಜರ್ ಜಾಲ್ಲೆ. ಜಾಯ್ತೆ ಹೆರ್ ಧರ್ಮಾಚೆ ಹೆರ್ ಪಂಗ್ಡಾಚೆ ಹ್ಯಾ ಜಮಾತೆಂತ್ ಹಾಜರ್ ಆಸ್‌ಲ್ಲೆ ಪಳೆತಾನಾ ಕಸಲೊ ಸಂಕೇತ್ ಮೆಳ್ತಾ?

ಭೊವ್ಶಾ ’ಮನಿಸ್ ಆಯ್ಚಾ ಸಂಸಾರಾಂತ್ ಅಪ್ಲೆಭಿತರ್‌ಚ್ ಅಪ್ಲೆಂಪಣ್ ಹೊಗ್ಡಾವ್ನ್, ಸಮಧಾನ್ ನಾಸ್ತಾನಾ ಜಿಯೆವ್ನ್ ಆಸ್ತಾನಾ ತೆಂ ಹೊಗ್ಡಾಯಿಲ್ಲೆಂ ಅಪ್ಲೆಂಪಣ್ ಸೊಧ್ಚಾಕ್ ಹೆಣೆಂ ತೆಣೆಂ ಸೊಧುಂಕ್ ಲಾಗ್ಲಾ, ಹರ್‍ಯೆಕ್ ಎಕಾ ನಾ ಎಕಾ ರಿತಿನ್ ಮಾನಸಿಕ್ ರಿತಿನ್ ಕಶ್ಟಾಂತ್ ಆಸಾ ಆನಿ ಕೆದ್ನಾಂ ಧರ್ಮ್, ಕೆದ್ನಾಂ ವಿಗ್ಯಾನ್ ಮ್ಹಣ್ ಭಂವೊನ್ ಆಸಾ’.

ಕೊಣ್ ಖಾಡ್ ವ್ಹಾಡಯ್ತಾ ತರ್ ಕೊಣ್ ಬಿಡಿ-ಸಿಗ್ರೆಟ್ ವೊಡ್ಚಿ ಸೊಡ್ತಾ ವ ಉಣಿ ಕರ್ತಾ. ಕೊಣ್ ಸುರ್-ಸೊರೊ ಸೊಡ್ತಾ ತರ್ ಕೊಣ್ ಪಿಕ್ಚರಾಂ ಪಳೆಂವ್ಚಿಂ ಸೊಡ್ತಾ. ಆನಿ ಕೊಣ್ ಉಪಾಸ್ ಕರ್ತಾ ತರ್ ಕೊಣ್ ಮಾಸ್ ಮಾಸ್ಳಿ ಖಾಯ್ನಾ ವ ಉಣಿಂ ಕರ್ತಾ. ಕರೆಜ್ಮಾಚೊ ನೀಜ್ ಮತ್ಲಬ್ ಹೊಚ್ಚ್‌ಗಿ? ಏಕ್ ಘಡಿಭರ್ ನಿಯಾಳ್ ಕರ್‍ಯಾಂಗೀ?

ಕರೆಜ್ಮಾಂತ್ ಹೆಂ ಸರ್ವ್ ಸೊಡುಂಕ್ ಧರ್ಮ್ ಪುಸ್ತಕಾಂನಿ � ಸಾಂಗೊಂಕ್ ನಾ, ಹೆಂ ಮನ್ಶಾಂನಿ ಆಸಾ ಕೆಲ್ಲೆಂ ಕಲ್ಪನ್. ಕೊಣ್ ಖಂಚಾಯ್ ಕಾರಾಣಾಂಕ್ ಲಾಗೊನ್ ಕರೆಜ್ಮಾಂತ್ ಸೊಡ್ತಾ/ಧರ್ತಾ ಪುಣ್ ಜ್ಯೆ ಕಿತೆಂ ಮನಿಸ್ ಕರೆಜ್ಮಾವೆಳಾರ್ ಸೊಡ್ತಾ/ಧರ್ತಾ ತೆಂ ಫಕತ್ ಬೌತಿಕ್ ನ್ಹಯ್‌ಗಿ? ಪುಣ್ ಖರೆಂಪಣಿ ಕರೆಜ್ಮಾಂತ್ ಎಕಾ ಕ್ರಿಸ್ತಾಂವಾಕ್/ಭಾವಾರ್ಥಿಕ್ ಕಸಲೆಂ ಕರುಂಕ್ ಸಾಧ್ಯ್?

ಫಕತ್ ಮಾಸ್ ಖಾಯ್ನಾಯೆಂ ರಾಂವ್ಚೆಂ, ಸೊರೊ ಪಿಯೆನಾಸ್ತಾಂ, ಸಿಗ್ರೆಟ್ ವೊಡಿನಾಸ್ತಾಂ ರಾಂವ್ಚೆ ತಿತ್ತುನ್ ಮಾತ್ರ್ ಅಪ್ಲೆಂ ಚಿಂತಾಪ್ ಸೀಮಿತ್ ಕರ್ಚಾಕೀ, ಭೋವ್ಶಾ ಸಾಧನ್ ಕೆಲೆಂ ತರ್ ಅನಿಕ್‌ಯ್ ಥೊಡೆಂ ಕರ್‍ಯೆತ್?

ಉಪಾಸ್ ಕರ್ಚೊ ಪುಣ್ ರಾಗ್ ಆನಿ ಧ್ವೇಶಾಕ್ ಸಾಂಡ್ಚಾಕ್.
ಉಪಾಸ್ ಕರ್ಚೊ ಪುಣ್ ಹೆರಾಂಚಿ ನೀತ್ ಕರ್ಚೆಂ ಸಾಂಡ್ಚಾಕ್.
ಉಪಾಸ್ ಕರ್ಚೊ ಪುಣ್ ಹೆರಾಂಕ್ ಉಜ್ಜೇಜಿತ್ ಕರಿನಾಸ್ತಾನಾ ರಾಂವ್ಚೆಂ ಸೊಡುಂಕ್.
ಉಪಾಸ್ ಕರ್ಚೊ ಪುಣ್ ಹೆರಾಂಚಿಂ ದುರಾಂ/ಖಬ್ರೊ ಸಾಂಗ್ಚ್ಯೊ ಸಾಂಡುನ್.
ಉಪಾಸ್ ಕರ್ಚೊ ಪುಣ್ ಅಪ್ಲ್ಯಾ ಖರ್ಚಾಂತ್ ಇಲ್ಲೆಂ ಉಣೆಂ ಕರ್ನ್ ಗರ್ಜೆವಂತಾಂಕ್ ಪಾಂವ್ಚೆಂ.

ದಾವಿದ್ ರಾಯಾಚಾ ಉತ್ರಾಂನಿ ಸಾಂಗ್ಚೆಂ ತರ್ "ಮನ್ಶಾಕ್ ಕಾನ್ ಆಸಾತ್ ಪುಣ್ ಆಯ್ಕಾನಾ, ದೊಳೆ ಆಸಾತ್ ಪುಣ್ ಪಳೆನಾ" - ಮ್ಹಳ್ಯಾರ್ ಖರಿ ದೀಶ್ಟ್ ಆಸ್ಚೊ ಮನಿಸ್ ಪಯ್ಲೆಂ ಅಪ್ಣಾಕ್ ತಜ್ವೀಜ್ ಕರುನ್ ಪಳೆಂವ್ಕ್ ಸಕ್ತಾ. ರೆತಿರ್ ಮ್ಹಳ್ಯಾರ್ ಫಕತ್ತ್ ಪಳೆಂವ್ಚೆಂ, ಆಯ್ಕೊಂವ್ಚೆಂ ಆನಿ ಕುಮ್ಸಾರ್ ಜಾವ್ನ್ ಪರತ್ ತೆಚ್ಚ್ ಜಿಣ್ಯೆಂತ್ ಆಸ್ಚೆಂ ಭಿಲ್ಕುಲ್ ನ್ಹಯ್. ಬಗಾರ್ ಆಯ್ಚಾ ದಿಸಾ ಅಪ್ಣಾನ್ ಕಶೆಂ ಬರೊ ಜಾವ್ಯೆತ್ ಮ್ಹಳ್ಳೆಂ ಚಿಂತುನ್, ದಿಸಾಕ್ ಏಕ್ ಬರೆಂ ಕಾಮ್ ಕರ್ಚೆಮುಖಾಂತ್ರ್ ಖರೊ ಕರೆಜ್ಮ್/ರೆತಿರ್ ಪರಿಪೂರ್ಣ್ ರಿತಿನ್ ಜಿಯೆಂವ್ಕ್ ಸಾಧನ್ ಕರ್‍ಯೆತ್.

ಅಶೆಂ ಎಕೆಕ್ಲೊ ಪಾಳುಂಕ್ ಸಕಾತ್ ತರ್ ಖಂಡಿತ್ ಕರೆಜ್ಮ್ ಫಕತ್ತ್ ಬೌತಿಕ್ ರಿತಿನ್ ಮಾತ್ರ್ ನ್ಹಯ್, ಅತ್ಮಿಕ್ ರಿತಿನ್, ದೈವಿಕ್ ರಿತಿನ್ ಸಂಸಾರಾಚೆಂ ಬರೆಂಪಣ್ ಲಾಭವ್ನ್ ದೀಂವ್ಕ್ ಸಕಾತ್. ಪುಣ್ ತಾಚಾಕೀ ವ್ಹಡ್ಲೆಂ ಸವಾಲ್ ಹೆಂ ’ಆಮ್ಕಾಂ ಕೊಣಾಕ್ ತಿತ್ಲೆಂ ಚಿಂತುಂಕ್ ಸಾಧ್ಯ್?’ ಮ್ಹಳ್ಳೆಂ.

ದೇವ್ ಬರೆಂ ಕರುಂ,
- ವಲ್ಲಿ ಕ್ವಾಡ್ರಸ್

ಆಧ್ಲಿಂ ಸಂಪಾದಕೀಯಾಂ

ಸಂಪಾದಕೀಯ್ ಮಂಡಳಿಕ್

ಪಾಟಿಂ ದಾಯ್ಜ್ ಪಾನಾಕ್

ಬಿಜಿ ಆಸಾಯ್‌ಗೀ?

ಕಸ್ಟ್

[ಆಮಿಂ ಜಯ್ತೆವಂತ್ ಜಾಂವ್ಕ್ ಕಿತೆಂ ಕರಿಜಾಯ್?]