ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಹಫ್ತ್ಯಾಚಿ ಕಥಾ: ಕಾಳ್ಜಾಥಾವ್ನ್
ಎಚ್.ಜೆ.ಗೋವಿಯಸ್: ಕೊಂಕ್ಣಿ ಸಾಹಿತ್ಯಾಂತ್ ಏಕ್ ಭಳ್ವಂತ್ ಕಾಣ್ಯೆಗಾರ್, ಅಪುರ್ಭಾಯೆಚ್ಯೊ ಮಟ್ವ್ಯೊ ಕಾಣ್ಯೊ, ಸಾಂಕಳ್ ಕಾಣ್ಯೊ ತಶೆಂಚ್ ಕಾದಂಬರಿ ಹಾಣೆ ಬರಯ್ಲ್ಯಾತ್. ವಾಚ್ಪ್ಯಾಂಕ್ ಭರ್ಪೂರ್ ಮನರಂಜನ್ ದಿಂವ್ಚ್ಯಾಂತ್ ಹಾಚ್ಯೊ ಕಾಣ್ಯೊ ಸಲ್ವಾನಾಂತ್. ಹಾಚ್ಯಾ ಕಾಣ್ಯಾಂನಿ ವಾಪಾರ್ಚಿ ಭಾಸ್ ಸಾದಿ, ಆನಿ ವಿಶಯ್ ಸಾಮಾಜಿಕ್ ಮನರಂಜನ್ ದೆಕುನ್ ಚಡಿತ್ ಲೋಕ್ ಹಾಚ್ಯೊ ಕಾಣ್ಯೊ ಖಾಯ್ಸ್ ಕರ್ತಾ. ’ಯೆತಾಂ ತುಜಿ ವಾಟ್ ಧರುನ್’, ’ಕಾಳೊಕಾಂತ್ಲೆ ದೊಳೆ’, ’ಹಾಂವ್ ತುಕಾ ನಾಸ್ ಕರ್ತೆಲಿಂ’, ’ಭುಂಯಾರಾಂತ್ಲೊ ಘುಟ್’ ಹಾಚ್ಯಾ ಲೊಕಾಮೊಗಾಳ್ ಕಾದಂಬರೆ ಪಯ್ಕಿಂತ್ಲ್ಯೊ ಥೊಡ್ಯೊ.
ಹಾಂವ್ ತುಜಿಂ ಜಾಂವ್ಕ್ ಆಶೆತಾಂ, ಮ್ಹಜ್ಯೆ ಆವಯ್ ಖಾತಿರ್, ಕಾಳಿಜ್, ನಿರ್ಧಾರ್, ಅಖ್ರೇಚಿ ರಾತ್, ಫರಾಮಸ್, ಇಶ್ಟಿಣ್ಯೊ, ಮ್ಹಾಕಾ ವೇಳ್ ನಾ!?
ಎಚ್.ಜೆ.ಗೋವಿಯಸ್
"ಎಕಾ ಹಿಂದು ಚೆಡ್ಯಾಸಂಗಿಂ ತುಂ ಕಾಜಾರ್ ಜಾತಾಯ್....? ತುಜಿ ತಕ್ಲಿ ಸಮಾ ಆಸಾಮೂ....?" ರೊಬಿನ್ ಆಪ್ಲ್ಯಾ ದಾಕ್ಟಿ ಭಯ್ಣ್ ಮೆಲಿಸ್ಸಾಕ್ ರಾಗಾನ್ ವಿಚಾರಿಲಾಗ್ಲೊ.
"ಹಿಂದು ಜಾಲ್ಯಾರ್ ಕಿತೆಂ ಜಾಲೆಂ, ತೊ ಮನಿಸ್ ನ್ಹಯ್ಗಿ? ಪರ್ಕ್ಯಾ ಜಾತಿಚಾಂಕ್ ಆಮಿ ತಿತ್ಲ್ಯಾ ಹಲ್ಕ್ಯಾ ನದ್ರೆಂತ್ ಕಿತ್ಯಾಕ್ ಪಳಂವ್ಚೆಂ? ತಾಂಚೆ ಲಾಗ್ಗಿಂ ಮೋಗ್ ಕರ್ಚೆಂ ಕಾಳಿಜ್ ನಾಂಗಿ? ಮೋಗ್ ಆಮಿ ಕ್ರಿಸ್ತಾಂವಾಂಕ್ ಮಾತ್ರ್ ಕರುಂಕ್ ಕಳ್ತಾಗಿ ರೊಬಿನ್.....?" ಮೆಲಿಸ್ಸಾನ್ ಸೊಡುನ್ ದೀಂವ್ಕ್ನಾ.
"ಪುತಾ ಕಿತ್ಯಾಕ್ ಸಮ್ಜನಾ ತುಕಾ...?" ಆವಯ್ ಮದೆಂ ಪಡ್ಲಿ. "ಆಮ್ಚ್ಯಾ ಕುಟ್ಮಾಂತ್ ಕೊಣ್ಯಿ ಪರ್ಕ್ಯಾ ಜಾತಿಚಾಂಕ್ ಹಾಡುನ್ ಯೇಂವ್ಕ್ನಾ ಯೆದೊಳ್. ತಿಂ ವಾಯ್ಟ್ ಮನ್ಶ್ಯಾಂ ಮ್ಹಳ್ಳೊ ಮತ್ಲಾಬ್ ರೊಬಿನಾಚೊ ನ್ಹಯ್. ತುಂ ಇತ್ಲೆಂ ಶಿಕೊನ್, ಇತ್ಲೆಂ ಸೊಭಿತ್ ಆಸೊನ್, ಇತ್ಲ್ಯಾ ಬರ್ಯಾ ಕಾಮರ್ ಆಸೊನ್, ಆಖ್ರೆಕ್ ಮೋಗ್ ಕರುಂಕ್ ತುಕಾ ಪರ್ಕ್ಯಾ ಜಾತಿಚೊಚ್ ಮೆಳ್ಳೊಗಿ?"
"ಮೋಗ್ ಜಾತ್ ಕಾತ್ ಪಳಯ್ನಾ ಮಾಮ್ಮಿ, ತೊ ಆಪ್ಚೊಚ್ ಜಾತಾ, ಹೆಂ ತುಕಾ ಹಾಂವೆಂ ವಿವರ್ಸುಂಚಿ ಗರ್ಜ್ನಾ ಹ್ಯಾ ಕಾಳಾರ್. ಆನಿ ಆನಿಲ್ ಬರೊ ಭುರ್ಗೊ. ಹಾಂವ್ ತಾಕಾ ಎಕಾ ವರ್ಸಾಥಾವ್ನ್ ವಳ್ಕಾತಾಂ. ಆಮಿ ಎಕಾ ಮೆಕಾಕ್ ಕಾಜಾರಾಚಿ ಭಾಸ್ಯಿ ದೀವ್ನ್ ಜಾಲ್ಯಾ. ಹಾಂವ್ ಕಾಜಾರ್ ತಾಚೆ ಲಾಗ್ಗಿಂಚ್ ಜಾತೆಲಿಂ....."
"ಇತ್ಲೊ ಬರ್ಯೊ ಬರ್ಯೊ ಕ್ರೀಸ್ತಾಂವ್ ಚಲ್ಯಾಂಚ್ಯೊ ಸೈರಿಕ್ಯೊ ತುಕಾ ಸೊಧುನ್ ಆಯ್ಲ್ಯೊ, ಖಂಯ್ಚಿಯಿ ಸೈರಿಕ್ ತುಂವೆಂ ಪಸಂದ್ ಕರುಂಕ್ ನಾಂಯ್ ಹ್ಯಾಚ್ ಕಾರಣಾಕ್ ಮ್ಹಣ್ ಆತಾಂ ಮ್ಹಾಕಾ ಸಮ್ಜಾತಾ. ಆಮಿ ತುಜೆ ಇತ್ಲೆ ಭಾವ್ ಆಸ್ತಾನಾ, ತುಕಾ ಖಂಡಿತ್ ಪರ್ಕ್ಯಾ ಜಾತಿಕ್ ವಚುಂಕ್ ಸೊಡ್ಚೆನಾಂವ್...." ರೊಬಿನ್ ರಾಗಾನ್ ಉಜ್ಯಾ ಹಾತಾಚಿ ಮೂಟ್ ದಾವ್ಯಾಕ್ ಮಾರುನ್ ಉಲೈಲೊ.
"ಹಾಂವ್ ತುಮ್ಚಿ ನಿಮಾಣಿ ಭಯ್ಣ್ ಆನಿ ತುಮಿ ಮ್ಹಾಕಾ ಪಾಂಚ್ ಜಣ್ ಭಾವ್ ನ್ಹಯ್ವೆ ರೊಬಿನ್? ಆನಿ ತುಮ್ಚ್ಯೊ ಬಾಯ್ಲ್ಯೊ ಕ್ರೀಸ್ತಾಂವಾಂಚೊಚ್. ಕೊಣ್ ಎಕ್ಲೊತರಿ, ತುಮಿ ತುಮ್ಚ್ಯಾ ಬಾಯ್ಲಾಂಲಾಗ್ಗಿಂ ಮೊಗಾನ್ ಆಸಾತ್? ಕೆದಾಳಾ ಪಳಯ್ಲ್ಯಾರಿ ಅಸಮಾಧನ್ ಆನಿ ರಾಗ್ ತುಮ್ಚ್ಯಾ ಘರಾಂನಿ ರಾಜ್ ಕರುನ್ ಆಸಾ. ಆಮ್ಚಿ ಮಾಮ್ಮಿ ತುಮ್ಚ್ಯಾ ಖಂಚಾಯಿ ಬಾಯ್ಲೆಕ್ ಪಸಂದ್ನಾ. ತಿಚೊ ಮೋಗ್ ಕೊಣ್ಯಿ ಕರಿನಾ. ಕೊಣಾಯ್ಕಿ ತಿ ನಾಕಾ. ಸಾರ್ಕೆಂ ಪಳಂವ್ಕ್ ಗೆಲ್ಯಾರ್, ಆಮ್ಚ್ಯಾ ಜಾತಿ ಪ್ರಾಸ್ ತಿ ಪರ್ಕಿ ಜಾತ್ ಬರಿ. ತಿಂ ಆಮ್ಚ್ಯಾ ಜಾತಿಪರಿಂ ಎಕಾಮೆಕಾ ಝಗ್ಡುನ್ ಪಡಾನಾಂತ್....."
"ತ್ಯಾ ಹಿಂದು ಚಲ್ಯಾಚಾ ಪಾಡ್ತಿನ್ ಸರ್ವ್ ಕ್ರಿಸ್ತಾವಾಂಕ್ ಪಾಡ್ ಮಣ್ಚಿ ಗರ್ಜ್ನಾ ತುಂವೆಂ. ಜರ್ತರ್ ತಾಚೆಲಾಗ್ಗಿಂ ಕಾಜಾರ್ ಜಾತಾಯ್, ಆಪ್ಲ್ಯಾಚ್ ಖರ್ಚಾನ್ ತುಂವೆಂ ಜಾಂವ್ಕ್ ಪಡ್ತೆಲೆಂ. ತುಜೆ ಹೆರ್ ಭಾವ್ಯಿ ಹ್ಯಾ ಕಾಜಾರಾಕ್ ವಪ್ವೊಂಚೆನಾಂತ್ ಆನಿ ಕೊಣ್ಯಿ ತುಕಾ ಏಕ್ ಪಯ್ಸೊಯಿ ದಿಂವ್ಚೆನಾಂತ್. ಕಾಜಾರ್ ಜಾವ್ನ್ ರಾವ್ತಾಯ್ ಖಂಯ್ ಪಳಯ್ತಾಂ...."
"ಮನ್ಶ್ಯಾನ್ ಏಕ್ ದಾರ್ ಬಂದ್ ಕೆಲ್ಯಾರ್ ದೇವ್ ಧಾ ಉಘಡ್ತಾ ಮ್ಹಳ್ಳೆಂ ಉಗ್ಡಾಸ್ ದವರ್ ರೊಬಿನ್. ತುಮಿ ಸರ್ವ್ ಭಾವ್ ಮೆಳೊನ್ ಮ್ಹಜ್ಯಾ ವಿರೊದ್ ರಾವಾ. ಹಾಂವ್ ಕಾಜಾರ್ ಜಾತೆಲಿಂ ತ್ಯಾಚ್ ಹಿಂದು ಚಲ್ಯಾಸಂಗಿಂ ಆನಿ ತುಮ್ಚ್ಯಾ ದಾರಾನಿ ರಾವೊಂಕ್ ಅಸ್ರೊ ಮಾಗೊನ್ ಯೆಂವ್ಚಿನಾ...." ದುಃಖಾಂ ಭರ್ಲ್ಲ್ಯಾ ದೊಳ್ಯಾಂಕ್ ಪುಸೊನ್ ಮೆಲಿಸ್ಸಾ ಉಟೊನ್ ಶಿದಾ ಘರಾ ಭಾಯ್ರ್ ಗೆಲೆಂ.
ಮೆಲಿಸ್ಸಾ ಆಪ್ಲ್ಯಾ ಆವಯ್ಸವೆಂ, ಭಾವ್ ರೊಬಿನಾಸಂಗಿಂ ರಾವ್ತಾಲೆಂ. ರೊಬಿನಾಕ್ ದೊಗಾಂ ಚೆಡ್ವಾಂ ಭುರ್ಗಿಂ. ಬಾಕಿಚೆ ಭಾವ್ ಕಾಜಾರ್ ಜಾವ್ನ್ ಆಪ್ಲ್ಯಾ ಕುಟ್ಮಾಸಂಗಿಂ ವಿಂಗಡ್ ರಾವ್ತಾಲೆ. ರೊಬಿನ್ ಮೆಲಿಸ್ಸಾ ಮುಖ್ಲೊ ಭಾವ್ ಜಾವ್ನ್ ಏಕ್ ಕಾಮ್ಯಾಬ್ ಉದ್ಯಾಮಿ ಜಾವ್ನಾಸ್ಲ್ಲೊ. ಮೆಲಿಸ್ಸಾ 26 ವರ್ಸಾಂ ಪ್ರಾಯೆಚಿ, ಗೊರ್ಯಾ ಕಾತಿನ್ ಸೊಭಾಯೆಚ್ಯಾ ವಡ್ತಾಂತ್ ಫುಲೊನ್ ಆಸ್ಲ್ಲಿ ಬೋವ್ ಸೊಬಿತ್ ಆನಿ ಅಕರ್ಶಿತ್ ಚಲಿ ಜಾವ್ನಾಸೊನ್ ದೋನ್ ವರ್ಸಾಂ ಥಾವ್ನ್ ಡೆಲ್ಟಾ ಎರ್ ಲಾಯ್ನ್ಸಾಂತ್ ಎರ್ ಹೊಸ್ಟೆಸ್ ಜಾವ್ನ್ ಕಾಮ್ ಕರ್ತಾಲೆಂ. ತಾಚಾ ಸೊಭಾಯೆಕ್ ಪಿಸ್ವೊನ್ ಸಭಾರಾನಿ ತಾಚೆಲಾಗ್ಗಿಂ ಕಾಜಾರ್ ಜಾಂವ್ಕ್ ದಾಖಯಿಲ್ಲಿ ಖುಶಿ, ಮೆಲಿಸ್ಸಾನ್ ನಿರಾಕರ್ಸಿಲ್ಲಿ. ಭಾವಾಂನಿ ಹಾಡ್ಲ್ಲ್ಯಾ ಸೈರಿಕೆಂಕ್ಯಿ ತಾಣೆ ಕಾನ್ ಹಾಲಂವ್ಕ್ ನಾತ್ಲ್ಲೆ....."
ತಶೆಂ ಆಸ್ತಾಂ ಆಜ್ ತಾಣೆ ವ್ಹಡಾ ಧೈರಾನ್ ಆವಯ್ ಮುಖಾರ್ ಭಾವಾಕ್ ಆಪ್ಲ್ಯಾ ಕಾಜಾರಾಚಿ ಇಛ್ಛಾ ಸಾಂಗ್ಲ್ಲಿ, ತಾಣೆ ಪಾಟ್ಲ್ಯಾ ಎಕಾ ವರ್ಸಾಂ ಥಾವ್ನ್ ಮೋಗ್ ಕರುನ್ ಆಸ್ಲ್ಲ್ಯಾ ಹಿಂದು ಚಲ್ಯಾವಿಶಿಂ ಸಾಂಗೊನ್. ಪುಣ್ ಭಾವಾನ್ ಆನಿ ಆವಯ್ನ್ ಆಕ್ಷೇಪ್ ದಾಖಯಿಲ್ಲೊ. ಬೆಜಾರ್ ಜಾಲ್ಲೆಂ ಮೆಲಿಸ್ಸಾ ಘರಾ ಭಾಯ್ರ್ ಗೆಲ್ಲೆಂ ಶೀದಾ ಆಪ್ಲ್ಯಾ ಪ್ರೆಮಿಕ್ ಆನಿಲಾಕ್ ವಚುನ್ ಭೆಟ್ಲೆಂ.
ಆನಿಲಾಚಿಂ ಆವಯ್ ಬಾಪುಯ್ ದೊಗಾಂಯ್ ಸರ್ಲ್ಲಿಂ ಆನಿ ಆಸ್ಚಿ ವ್ಹಡ್ಲಿ ಭಯ್ಣ್ ಭಾಯ್ಲ್ಯಾ ಗಾಂವಾಂತ್ ಆಪ್ಲ್ಯಾ ಘೊವಾಸಂಗಿಂ ಜಿಯೆತಾಲಿ. ಆನಿಲ್ ಪಳಂವ್ಕ್ ಬಾರಿ ಸೊಬಿತ್, ಲಾಂಬ್ ಗೊರೊ ಜಾವ್ನಾಸೊನ್ ಅಂತರಾಷ್ಟ್ರಿ ಎರ್ಪೊರ್ಟಾಂತ್ ಆಫ್ರಿಕಾನ್ ಎರ್ಲಾಯ್ನ್ಸ್ ಹಾಂತುಂ ಗ್ರಾಂವ್ಡ್ ಸ್ಟಾಫ್ ಜಾವ್ನ್ ಕಾಮ್ ಕರ್ತಾಲೊ. ಆನಿ ಚೊವ್ಗ್ ಜಾಣಾಸಂಗಿಂ ಎಕಾ ಫ್ಲ್ಯಾಟಾಂತ್ ಪೆಯಿಂಗ್ ಗೆಷ್ಟ್ ಜಾವ್ನ್ ರಾವ್ತಾಲೊ.
ಮೆಲಿಸ್ಸಾಚಾ ಘರಾ ಜಾಲ್ಲೆ ತಕ್ರಾರ್ ಆಯ್ಕೊನ್ ಆನಿಲ್ ಮ್ಹಣಾಲೊ, "ಮೊಗಾ, ಕಾಜಾರ್ ಜಾಂವ್ಕ್ ಮ್ಹಜೆ ಲಾಗ್ಗಿಂ ಪಯ್ಶೆಯಿನಾಂತ್. ಶಿವಾಯ್ ಕಾಜಾರ್ ಜಾಲ್ಯಾ ಉಪ್ರಾಂತ್ ರಾವೊಂಕ್ ಘರ್ಯಿನಾ. ಹಾಂವ್ ಹ್ಯಾ ಸ್ಥಿತೆರ್ ಕಾಂಯ್ ಘರ್ ಕರುಂಕ್ ಸಕಾನಾ, ವ ತುಕಾ ಹಾಂಗಾ ದವರುಂಕ್ಯಿ ಸಕಾನಾ....”
********
ಹೆಣೆ ಆವಯ್ಚೆಂ ಕಾಳಿಜ್ ಭರುನ್ ಆಯಿಲ್ಲೆಂ. ಮೆಲಿಸ್ಸಾ ತಿಚಾ ಮೊಗಾಚಿ ನಿಮಾಣಿ ಆನಿ ಪಾಂಚ್ ಭಾವಾಂಕ್ ಎಕ್ಲಿಚ್ ಭಯ್ಣ್ ಜಾವ್ನಾಸ್ಲ್ಲಿ. ತಿಣೆ ರೊಬಿನ್ ಗೆಲ್ಯಾ ಉಪ್ರಾಂತ್ ಆಪ್ಲ್ಯಾ ಪುತಾಂಕ್ ಫೊನ್ ಕರುನ್ ಮೆಲಿಸ್ಸಾಚಿ ಖಭಾರ್ ತಿಳ್ಸಿಲಿ. ಸಗ್ಳೆ ರೊಬಿನಾಚಾ ಪಾಡ್ತಿನ್ ರಾವೊನ್ ಮೆಲಿಸ್ಸಾಚಾ ವಿರೊದ್ ಜಾಲೆ. ಪುಣ್ ಚೊವ್ತೊ ಭಾವ್ ಜ್ಯೊ ರೊಬಿನಾ ಮುಖ್ಲೊ ಮೆಲಿಸ್ಸಾಚಾ ಪಾಡ್ತಿನ್ ಝುಜೊಂಕ್ ತಯಾರ್ ಜಾಲೊ ಆನಿ ತ್ಯಾಚ್ ದೀಸ್ ರೊಬಿನಾಕ್ ವಚುನ್ ತಾಚಾ ಘರಾ ಭೆಟ್ಲೊ.
"ಪಳೆ ರೊಬಿನ್, ತುಜೆಲಾಗ್ಗಿಂ ಮಸ್ತು ಆಸಾ, ದೆವಾನ್ ತುಕಾ ಮಸ್ತು ದಿಲಾಂ. ಆಮ್ಕಾಂ ಆಸ್ಚಿ ಪಾಂಚ್ ಜಾಣಾಂಕ್ ಎಕ್ಲಿಚ್ ಭಯ್ಣ್. ತಿ ಜರ್ತರ್ ತಿಣೆ ಮೋಗ್ ಕರ್ಚ್ಯಾ ಚಲ್ಯಾ ಕಡೆನ್ ಕಾಜಾರ್ ಜಾಂವ್ಕ್ ಖುಶಿ ವರ್ತಾ ತರ್, ಆಮಿ ತ್ಯಾ ಮೊಗಾವಿರೊಧ್ ತಾಂಚಿಂ ದುಸ್ಮಾನಾಂ ಜಾಂವ್ಕ್ ನಜೊ. ತಾಕಾ ಮನ್ ನಾತ್ಲ್ಲ್ಯಾ ಚಲ್ಯಾಕಡೆನ್ ಜಬರ್ ದಸ್ತೆನ್ ಕಾಜಾರ್ ಕರುನ್ ದೀವ್ನ್ ತಾಣೆ ಖರ್ಗೊಂಚೆಂ ಬರೆಂಗಿ? ತಾಚಿ ಖುಶಿ ಆಮಿ ತಾಕಾ ದಿವ್ಯಾಂ ತ್ಯಾ ಉಪ್ರಾಂತ್ ತಿಂ ತಿಂ ಪಳವ್ನ್ ಘೆಂವ್ದಿತ್". ಜ್ಯೊ ರೊಬಿನಾಕ್ ಸಮ್ಜಾಯ್ಲಾಗ್ಲೊ.
ರೊಬಿನಾನ್ ಜಾಪ್ ದೀನಾತ್ಲಿ ಪಳವ್ನ್, "ಜಾಯ್ತ್ ಹಾಂವ್ ಮ್ಹಜ್ಯಾ ತಾಂಕಿ ಭಿತರ್ಲೆಂ ಕರ್ತಾಂ...." ಜ್ಯೊ ಮ್ಹಣಾಲೊ ಆನಿ ಲಾಗಿಂಚ್ ಆಸ್ಲ್ಲ್ಯಾ ಭಯ್ಣಿಕ್ ಸಾಂಗಾಲಾಗ್ಲೊ, "ಮೆಲಿಸ್ಸಾ, ಮ್ಹಜೆ ಕಡೆನ್ ಪಾಂಚ್ ಲಾಕ್ ರುಪಯ್ ಆಸಾಯ್ ತೆ ಹಾಂವ್ ತುಕಾ ದಿತಾಂ. ತುಂ ಆನಿ ಆನಿಲ್ ಮೆಳೊನ್ ತುಮಿ ಕಾಮ್ ಕರ್ಚೆ ಕಡೆನ್ ಲೊನಾಕ್ ಎಪ್ಲಾಯ್ ಕರಾತ್. ಖಂಡಿತ್ ತುಮ್ಕಾಂ ಪಯ್ಲೆಂ ಏಕ್ ಘರ್ ಕರುಂಕ್ ಸಾಧ್ಯ್ ಜಾತಲೆಂ. ತ್ಯಾ ಉಪ್ರಾಂತ್ ಇಲ್ಲೆಂ ರೀಣ್ ಕಾಡುನ್ ಕಾಜಾರ್ ಜಾಯಾತ್. ಏಕ್ ಪಾವ್ಟಿಂ ತುಮಿ ಏಕ್ವಟಾತ್. ಉಪ್ರಾಂತ್ ಸವ್ಕಾಸ್ ರೀಣ್ ಆನಿ ಲೋನ್ ಫಾರಿಕ್ ಕರ್ಯೆತ್...."
ಜ್ಯೊನ್ ಸಾಂಗ್ಲ್ಲೆಂ ಆಯ್ಕೊನ್ ಮೆಲಿಸ್ಸಾ ಸಂತೊಸಾನ್ ಜ್ಯೊಕ್ ವೆಂಗೊನ್ ರಡ್ಲೆಂ. ಹೆಣೆ ಆವಯ್ ಆಪ್ಲೆ ಬಿಜ್ಲ್ಲೆ ದೊಳೆ ಪುಸಿಲಾಗ್ಲಿ. ರೊಬಿನ್ ತೆಂ ಪಳವ್ನ್ ಪಿಗಳ್ಳೊ ಆನಿ ಮೆಲಿಸ್ಸಾಕ್ ವಿಚಾರಿಲಾಗ್ಲೊ ತಾಕಾ ಕಸೊ, ಕೆದ್ನಾಂ ಆನಿ ಕಿತ್ಯಾಕ್ ಆನಿಲಾಚೊ ಮೋಗ್ ಜಾಲ್ಲೊ ಮ್ಹಣ್.
"ತೊ ದೀಸ್ ಮ್ಹಾಕಾ ಆಜ್ಯಿ ಉಡಾಸ್ ಆಸಾ ರೊಬಿನ್....." ಮೆಲಿಸ್ಸಾ ಆಪ್ಲ್ಯಾ ಮೊಗಾಚಿ ಕಾಣಿ ಸಾಂಗಾಲಾಗ್ಲೆಂ. "ಆದ್ಲ್ಯಾ ವರ್ಸಾ ೨೦೦೩-ಂತ್ ಕ್ರಿಸ್ಮಾಸಾಚಾ ದಿಸಾ ಮ್ಹಾಕಾ ಆನಿಲಾಚಿ ವ್ಹಳಕ್ ಜಾಲ್ಲಿ. ಹಾಂವ್ ಡ್ಯುಟೆರ್ ಫ್ಲಾಯ್ಟಾರ್ ಪ್ಯಾರಿಸ್ ಗೆಲ್ಲಿಂ, 24-ಚಾ ಬುದ್ವಾರಾಚಾ ಮೊಧ್ಯಾನ್ ರಾತಿಂ, ಮ್ಹಳ್ಯಾರ್ ಬುದ್ವಾರ್-ಬ್ರೆಸ್ತಾರಾ ಮದ್ಲ್ಯಾ ಕ್ರಿಸ್ಮಾಸಾಚಾ ಮೊದ್ಯಾನ್ ರಾತಿಂ ೧.೪೦-ಕ್ ಹಾಂವೆಂ ಕಾಮ್ ಕೆಲ್ಲೆಂ ಫ್ಲಾಯ್ಟ್ ಬೊಂಬೈ ಪಾವ್ಲ್ಲೆಂ. ಕ್ರಿಸ್ಮಾಸಾಚಾ ಸಂತೊಸಾನ್ ಹಾಂವೆಂ ಮ್ಹಜ್ಯಾ ಘರ್ಚ್ಯಾ ಸರ್ವಾಂಯ್ಕಿ ಸಭಾರ್ ಕಾಣಿಕೊ ಹಾಡ್ಲ್ಲ್ಯೊ."
"ಕಸ್ಟಮಾಂತ್ ಹಾಂವೆಂ ಹಾಡ್ಲ್ಲಿಂ ಬ್ಯಾಗಾಂ ತಪಸಣ್ ಜಾವ್ನ್ ಭಾಯ್ರ್ ಹಾಡ್ತಾನಾ, ಮ್ಹಾಕಾ ವ್ಹಡಾ ಮಾನಾನ್ ‘ಮೆರಿ ಕ್ರಿಸ್ಮಸ್ ಮಿಸ್ಸ್’ ಮ್ಹಣೊನ್ ಸಮಾನ್ ಟೆಕ್ಷೆ ಪರ್ಯಾಂತ್ ಪಾವಂವ್ಕ್ ಕುಮಕ್ ಕೆಲ್ಲಿ ಆನಿಲಾನ್. ತ್ಯಾ ವೆಳಾ ಹಾಂವೆಂ ತಾಕಾ ತಿತ್ಲೆಂ ಗುಮಾನ್ ಕರುಂಕ್ ನಾತ್ಲ್ಲೆಂ ತರಿ, ಏಕ್ ಆಕರ್ಷಣ್ ತಾಚೆ ಥಂಯ್ ಮ್ಹಾಕಾ ಉಬ್ಜಾಲ್ಲೆಂ. ಕಾರಣ್ ಮ್ಹಜ್ಯಾ ಕ್ರಿಸ್ಮಾಸಾಚಾ ಸಂತೊಸಾಂತ್ ಮ್ಹಾಕಾ ವಿಶ್ಯ್ ಕೆಲ್ಲೊ ಪಯಿಲ್ಲೊ ವ್ಯಕ್ತಿ ಆನಿಲ್ ಜಾವ್ನಾಸ್ಲ್ಲೊ. ತ್ಯಾ ಉಪ್ರಾಂತ್ ಆಮ್ಚಿ ಭೆಟ್ ಸಭಾರ್ ಪಾವ್ಟಿಂ ಜಾಲ್ಲಿ ತಸಲ್ಯಾಚ್ ಸಂದರ್ಭಾನಿಂ, ಆನಿ ಸವ್ಕಾಸ್ ಆಮಿ ಮೊಗಾರ್ ಪಡ್ಲ್ಲ್ಯಾಂವ್. ಜಾಂವ್ಕ್ ತೊ ಹಿಂದು ತರಿ, ಕ್ರೀಸ್ತಾಂವ್ ಸಮಡ್ತಿಕ್ ಮಾನ್ ದಿತಾ. ಮ್ಹಜೆ ಸಂಗಿಂ ಸಭಾರ್ ಪಾವ್ಟಿಂ ಇಗರ್ಜೆಕ್ ತೊ ಆಯ್ಲಾ. ಮರ್ಯೆಚೊ ತೊ ವ್ಹಡ್ಲೊ ಭಕ್ತ್ಯಿ ಜಾವ್ನಾಸಾ. ಶಿವಾಯ್ ಪಳಂವ್ಕ್ಯಿ ಸೊಬಿತ್ ಆಸೊನ್ ಮ್ಹಾಕಾ ಮಸ್ತು ಪಸಂದ್. ತೊಯಿ ಮ್ಹಜೊ ಮಸ್ತು ಮೋಗ್ ಕರ್ತಾ....."
ಆಪ್ಲ್ಯಾ ಭಯ್ಣಿಚೆ ಉಮಾಳೆ ಸಮ್ಜೊನ್ ರೊಬಿನ್ಯಿ ಒಪ್ವಾಲೊ ತಾಚಿ ಖುಶಿ ತಾಕಾ ದೀಂವ್ಕ್.
********
ರೊಬಿನಾನ್ ಆನಿ ಜ್ಯೊನ್ ಮೆಳುನ್ ಮೆಲಿಸ್ಸಾಕ್ ಪಯ್ಲೆಂ ಏಕ್ ತಾಂಚೆಂ ಆಪ್ಲೆಂ ಫ್ಲ್ಯಾಟ್ ಕರುಂಕ್ ಕುಮಕ್ ಕೆಲಿ. ತಶೆಂ 2005-ಂತ್ ಜನೆರಾಚಾ 1 ತಾರಿಕೆರ್ ನವ್ಯಾ ವರ್ಸಾ, ಸನ್ವಾರಾ ದೀಸ್ ಮೆಲಿಸ್ಸಾ ಆನಿ ಆನಿಲಾಚೆಂ ಕಾಜಾರ್ ಕ್ರಿಸ್ತಾಂವ್ ರಿತಿರ್ ಇಜರ್ಜೆಂತ್ಚ್ ಜಾಲೆಂ. ಪುಣ್ ಆನಿಲ್ ಹಿಂದುಚ್ ಉರ್ಲ್ಲೊ.
ಮೆಲಿಸ್ಸಾನ್ ಆಶೆಲ್ಲೊ ತಾಚೊ ಪ್ರೆಮಿ ತಾಕಾ ಮೆಳ್ಲ್ಲೊ ಆಪ್ಲೊ ಜೀವನ್ ಸಾಂಗಾತಿ ಜಾವ್ನ್ ಆನಿ ತೆಂ ಮೊಸ್ತು ಖುಶಿ ಆಸ್ಲ್ಲೆಂ. ಎಕಾ ಮ್ಹಹಿನ್ಯಾಚಾ ರಜೆರ್ ತಿಂ ದೊಗಾಂಯ್ ಹನಿಮೂನಾಕ್ ವಲ್ಡ್ ಟೂರಾರ್ ಭಂವೊಂಕ್ ಗೆಲಿಂ. ದೊಗಾಂಯ್ ಎರ್ಲಾಯ್ನಾಂತ್ ಕಾಮ್ ಕರ್ತಾಲಿಂ ಜಾಲ್ಲ್ಯಾನ್ ತಾಂಕಾಂ ಟಿಕೆಟಿಚಿ ಸವ್ಲತ್ ಮಳ್ಲ್ಲಿ. ಹನಿಮೂನಾಥಾವ್ನ್ ಪಾಟಿಂ ಆಯಿಲ್ಲಿ ತಿಂ ಬೋವ್ ಮೊಗಾನ್ ಆಸ್ಲ್ಲಿಂ.
ಮೆಲಿಸ್ಸಾಸಂಗಿಂ ಮಿಸಾಕ್, ಇಗರ್ಜೆಕ್ ವಚುಂಕ್ ಆನಿಲ್ ಕೆದಳಾಚ್ ನರ್ಗಾನಾತ್ಲೊ. ತೊ ಕೆದ್ನಾಂಯ್ ಮೆಲಿಸ್ಸಾ ಫ್ಲಾಯ್ಟಾರ್ ಡ್ಯುಟೆರ್ ಗೆಲ್ಲೆಂ ಪಾಟಿಂ ಯೆತಾನಾ ತಾಕಾ ಮುಖಾರ್ ಆಪವ್ನ್ ಹಾಡುಂಕ್ ಚುಕಾ- ನಾಸ್ತಾಂ ವೆತಲೊ. ಆನಿ ಹೊಚ್ ಮೋಗ್ ತಾಂಚೆಥಂಯ್ ಚಡ್ ಆನಿ ಚಡ್ ವಾಡೊನ್ ಯೆತಾಲೊ.
ಚಡ್ ಮೋಗ್ ಆಸ್ಲ್ಲೆ ಕಡೆನ್ ರಾಗ್ ಆಸ್ತಚ್ ಮ್ಹಳ್ಲ್ಯಾಪರಿಂ ಹಾಂಚೆ ಮದೆಂಯಿ ಥೊಡ್ಯಾ ಚಿಲ್ಲರ್ ಸಂಗ್ತಿನಿ ತೊ ಉಬ್ಜೊಂಕ್ ಸುರು ಜಾಲೊ. ಥೊಡೆ ಪಾವ್ಟಿಂ ಆನಿಲಾಕ್ ತಾಚಾ ಕಾಮಾ ಮದೆಂ ಮೆಲಿಸ್ಸಾಕ್ ಸ್ವಾಗತ್ ಕರುಂಕ್ ಜಾಯ್ನಾತ್ಲ್ಲೆಂ ಆನಿ ಥೊಡೆ ಪಾವ್ಟಿಂ ತೊ ಆಪ್ಲ್ಯಾ ಕಾಮಾನ್ ಥಕೊನ್ ಘರಾ ನಿದೊನ್ ಆಸ್ಲ್ಲ್ಯಾವೆಳಾ, ಮೆಲಿಸ್ಸಾಕ್ ಎರ್ಪೊರ್ಟಾಥಾವ್ನ್ ಆಪವ್ನ್ ಹಾಡುಂಕ್ ಅಸಾಹಾಯೆಕ್ ಜಾತಾಲೊ. ತೆದ್ನಾಂ ಮೆಲಿಸ್ಸಾಕ್ ಮಸ್ತು ಬೆಜಾರ್ ಜಾತಾಲೆಂ ಆನಿ ತೆಂ ತಾಚೆ ಕಡೆನ್ ಉಲೈನಾತ್ಲೆಂ. ಪಯ್ಲೆಂ ಪಯ್ಲೆಂ ಹೆಂ ದೊಗಾಯ್ನಿ ಎಕಾಮೆಕಾ ಸಮ್ಜೊನ್ ಎಕಾಮೆಕಾಕ್ ಮಾಫ್ ಕರುನ್ ದೀಸ್ ಸಾರ್ಲೆ ತರಿ, ಉಪ್ರಾಂತ್
ಅಸಲೆಂ ಕಾರಣ್ ತಾಂಚಾ ಸಮಾದಾನೆಕ್ ಅಸಮಾದಾನೆಂತ್ ಬದ್ಲುನ್ ಝಗ್ಡ್ಯಾಕ್ ಆಪವ್ಣೆ ದೀಲಾಗ್ಲೆಂ.
ಏಕ್ ದೀಸ್ ಮೆಲಿಸ್ಸಾ ಎರ್ಪೊರ್ಟಾಥಾವ್ನ್ ಘರಾ ಯೆತಾನಾ, ಆನಿಲ್ ನಿದೊನ್ ಆಸ್ಚೆಂ ಪಳವ್ನ್ ತಾಚೊ ರಾಗ್ ಮಸ್ತಕಾಕ್ ಚಡ್ಲೊ. ನಿದ್ಲ್ಲ್ಯಾ ಆನಿಲಾಚಾ ಆಂಗಾವಯ್ಲಿ ಬೆಡ್ಡ್ ಶೀಟ್ ವಡುನ್, "ಊಟ್ ಆಳ್ಶ್ಯಾ, ತುಜ್ಯಾ ನಿದೆ ಮುಖಾರ್ ತುಕಾ ತುಜ್ಯಾ ಬಾಯ್ಲೆಚೆಂ ಪಡೊನ್ ವಚುಂಕ್ನಾ. ಮ್ಹಜ್ಯಾ ಸಾಂಗಾತಾ ಕಾಮ್ ಕರ್ತೆಲ್ಯಾಂಚೆ ಸಗ್ಳೆ ಘೊವ್ ವ ಬಾಯ್ಲಾಂ ತಾಂಕಾಂ ತಿಂ ದೋನ್ ತೀನ್ ದಿಸಾಂ ಉಪ್ರಾಂತ್ ಕಾಮಾ ಥಾವ್ನ್ ಯೆತಾನಾ ಎರ್ಪೊರ್ಟಾಂತ್ ರಾಕೊನ್ ಆಪವ್ನ್ ವರುಂಕ್ ಯೆತಾತ್ ಆನಿ ತುಂ ಪಯ್ಲೆಂ ಇತ್ಲೊ ಮ್ಹಜೊ ಹುಸ್ಕೊ ಕರ್ತಾಲೊಯ್, ಕಿತ್ಲೆಂ ಅರ್ಜಂಟ್ ಕಾಮ್ ಸೊಡುನ್ಯಿ ಮ್ಹಾಕಾ ಮೆಳುಂಕ್ ಯೆಂವ್ಚೊ ತುಂ, ಕಾಜಾರ್ ಜಾವ್ನ್ ಫಕತ್ತ್ ತೀನ್ ಮಹಿನ್ಯಾ ಭಿತರ್ ಇತ್ಲೊ ಬದಲ್ಲೊಯ್? ಆತಾಂ ತುಕಾ ಮ್ಹಜೊ ಮೋಗ್ ಉರ್ಲೊನಾ....?"
ಆನಿಲ್ ನಿಜಾಯ್ಕಿ ಥಕೊನ್ ಥೊಡ್ಯಾಚ್ ಘಂಟ್ಯಾಪಯ್ಲೆಂ ಯೇವ್ನ್ ನಿದ್ಲ್ಲೊ. ತಾಚೆ ಸಾಂಗಾತಾ ಕಾಮ್ ಕರ್ಚೊ ಎಕ್ಲೊ ಯೇಂವ್ಕ್ ನಾತ್ಲ್ಲ್ಯಾನ್ ಆನಿಲಾಕ್ ಎರ್ಪೊರ್ಟಾಂತ್ 24 ವರಾಂ ವಯ್ರ್ ನೀದ್ ಕಳುನ್ ಕಾಮ್ ಕರುಂಕ್ ಪಡ್ಲ್ಲೆಂ ಆನಿ ಘರಾ ಯೇವ್ನ್ ನಿದ್ಲ್ಲೊ ಆಸ್ತಾನಾ, ಮೆಲಿಸ್ಸಾನ್ ಆಪ್ಲೊ ರಾಗ್ ಖರಿ ಗಜಾಲ್ ಸಮ್ಜಾನಾಸ್ತಾಂ ಕಾಡ್ಲ್ಲೊ.
ನೀದ್ ಕಳುನ್ ತಾಂಬ್ಡೆ ಜಾಲ್ಲೆ ದೊಳೆ ಗಷ್ಟುನ್ ಆನಿಲ್ ಉಟ್ಲೊ ಆನಿ ಬಾತ್ ರುಮಾಕ್ ಗೆಲೊ ಕಾಂಯ್ ಉಲೈನಾಸ್ತಾಂ. ತೆದ್ನಾಂ ತಾಕಾ ವಡುನ್ ಮೆಲಿಸ್ಸಾ ಪರಾತ್ ಝಗ್ಡುಂಕ್ ಆಯ್ತೆಂ ಜಾಲೆಂ."ಮ್ಹಾಕಾ ಜಾಪ್ ದೀ ಪಯ್ಲಿ. ಹೆಂ ಮ್ಹಜೆಂ ಘರ್, ಮ್ಹಜ್ಯಾ ಭಾವಾಂನಿ ಕರುನ್ ದಿಲ್ಲೆಂ ಮ್ಹಾಕಾ. ತುಕಾ ನೀದ್ ಕಾಡುಂಕ್ ನ್ಹಯ್. ಹಾಂವ್ ಕಾಮಾಕ್ ವೆತಾಂ ಆನಿ ತುಂ ನೀದ್ ಕಾಡ್ತಾಯ್?"
ಆನಿಲ್ ಬೆಜಾರಾಯೆನ್ ಪಳಂವ್ಕ್ ಪಡ್ಲೊ ಮೆಲಿಸ್ಸಾಕ್. ತಾಕಾ ತಾಚೆಂ ಉಣೆಪಣ್ ಆಜ್ ದಿಸ್ಲೆಂ. ಕಾಜಾರ್ ಜಾಂವ್ಚ್ಯಾ ಆದಿಂ ತಾಣೆ ಸಾಂಗ್ಲ್ಲೆಂ, ಪಯ್ಲೆಂ ಹಾಂವ್ ಮ್ಹಜೆಂ ಆಪ್ಲೆಂ ಘರ್ ಕರ್ತಾಂ ಉಪ್ರಾಂತ್ ಆಮಿ ಕಾಜಾರ್ ಜಾಯಾಂ ಮ್ಹಣ್. ಪುಣ್ ಮೆಲಿಸ್ಸಾಕ್ ಕಾಜಾರಾಚೊ ಆಮ್ಸೊರ್ ಜಾಲ್ಲೊ ಆನಿ ಆಪ್ಲ್ಯಾ ಭಾವಾಂಚಿ ಮಜತ್ ಘೆವ್ನ್ ಆನಿಲಾಕ್ ಸಮ್ಜಾವ್ನ್ ತೆಂ ಕಾಜಾರ್ ಜಾಲ್ಲೆಂ. ಆನಿ ತ್ಯಾಚ್ ತೊಂಡಾನ್ ತೆಂ ಆಜ್ ಆನಿಲಾಚಿ ಮಜ್ಬುರಿ ಜಾಣಾ ಜಾಂವ್ಚೆಂ ಪ್ರಯತ್ನ್ ಕರಿನಾಸ್ತಾಂ ತಾಕಾ ಆಣ್ಕುನ್ ಉಲೈಲ್ಲೆಂ.
ಜಾಪ್ ದೀನಾಸ್ತಾಂ ಆನಿಲ್ ನೆಸೊನ್ ಭಾಯ್ರ್ ಗೆಲೊ. ಎಕಾ ಎಕ್ಸುರ್ಯಾ ಜಾಗ್ಯಾರ್ ವಚುನ್ ಬಸೊನ್ ತೊ ಮಸ್ತು ರಡ್ಲೊ. ಬಾಯ್ರ್ಚ್ ದೀಸ್ ಪಾಚಾರುನ್ ತೊ ಸಾಂಜೆರ್ ಕಾಮಾಕ್ ಗೆಲೊ ಎರ್ಪೊರ್ಟಾಕ್. ಆಶೆಂ ಹ್ಯಾ ಮೋಗ್ ಕರ್ನಾರಾಂ ಮದೆಂ ಝಗ್ಡೆಂ ಸದಾಂಚೆಂ ಜಾಲ್ಲೆಂ. ಆನಿಲ್ ಸೊಸುನ್ ವರ್ತಲೊ ಆನಿ ಮೆಲಿಸ್ಸಾ ಹಂಕಾರಾನ್ ಆಣ್ಕುನ್ ಆನಿ ಖೆಂಡುನ್ ತೊಂಡಾಕ್ ಆಯಿಲ್ಲ್ಯಾ ಉತ್ರಾಂನಿ ಉಲವ್ನ್ ಆಪ್ಲೊ ರಾಗ್ ಕಾಡ್ತಾಲೆಂ. ತಿಂ ಸಾಂಗಾತಾ ಆತಾಂ ನಿದಾನಾತ್ಲ್ಲಿಂ. ದೀಸ್ ವೆತಾಂ ವೆತಾಂ ಮನಾಸ್ತಾಪ್ ಬಳ್ ಜಾವ್ನ್ ಗೆಲೊ ಶಿವಾಯ್ ಖಾಲ್ತಿಂ ದೊಗ್ಯಿ ಜಾಲಿನಾಂತ್. ಉಲೊಣೆಯಿ ತಾಂಚೆ ಮದೆಂ ನಾತ್ಲ್ಲೆಂ. ವಿವಿಂಗಡ್ ಜೆವ್ತಾಲಿಂ. ಏಕಾ ರಾತಿಂ ಮೆಲಿಸ್ಸಾನ್ ಕಾರಣ್ ನಾಸ್ತಾಂ, ಆನಿಲಾಕ್ ಸಾಂಗ್ಲೆಂ, ತುಜಿ ವಾಟ್ ತುಂ ಪಳೆ, ಮ್ಹಾಕಾ ಡೈವೋರ್ಸ್ ಜಾಯ್ ಮ್ಹಣ್.
ಆಯ್ಕಾಲ್ಲೊ ಆನಿಲ್ ಉಡೊನ್ ಪಡ್ಲೊ ಆನಿ ಮೆಲಿಸ್ಸಾಚಾ ಕಾನ್ಸುಲಾಕ್ ಬಳಾಚೆಂ ಥಾಪಾಡ್ ಮಾರಿಲಾಗ್ಲೊ, "ಹಾಂವೆಂ ಯೆದೊಳ್ ಪರ್ಯಾಂತ್ ತುಕಾ ಸೊಸುನ್ ವೆಲೆಂ. ತುಂವೆಂ ಕಿತೆಂ ಮ್ಹಳ್ಯಾರಿ ತುಕಾ ಹಾಂವೆಂ ಪಾಟಿಂ ಜಾಪ್ ದೀಂವ್ಕ್ನಾ. ಉಶೆಂ ಘೆವ್ನ್ ನಿದ್ಚೊ ಜಾಗೊ ಬದ್ಲಿಲೊಯ್, ಉಟ್ತಾಂ ಬಸ್ತಾಂ ತುಜ್ಯಾ ಘರಾಂತ್ ಹಾಂವ್ ಆಸಾಂ ಮ್ಹಣ್ ಆಣ್ಕಿಲೆಂಯ್, ಜೆವಾಣ್ ವಿಂಗಡ್ ರಾಂದುನ್ ಜೇಂವ್ಕ್ ಸುರು ಕೆಲೆಂಯ್, ಹರ್ಯೆಕಾ ತುಜ್ಯಾ ಅವ್ತಾರಾಂಕ್ ಹಾಂವ್ ಸೊಸುನ್ ವೊಗೆಚ್ಚ್ ರಾವ್ಲೊಂ ಫಕತ್ತ್ ಹಾಂವ್ ತುಜೊ ಮೋಗ್ ಕರುನ್ ಆಸ್ಲ್ಲ್ಯಾನ್. ಆನಿ ನ್ಹಯ್ ತುಜ್ಯಾ ಭಾವಾಂಕ್ ಭಿಯೆವ್ನ್ ವ ತುಕಾ ಭಿಂಯೆವ್ನ್. ಪುಣ್ ಆಜ್ ಕಾರಣ್ ನಾಸ್ತಾಂ ತುಂವೆಂ ತಿತ್ಲೆಂ ವ್ಹಡ್ ಉತಾರ್ ಮ್ಹಳೆಂಯ್....?"
"ತುಂವೆಂ ಮ್ಹಜೆರ್ ಹಾತ್ ಉಭಾರ್ಲೊಯ್.....? ಮ್ಹಾಕಾ ಮಾರ್ಲೆಂಯ್....?" ಉತ್ರಾಂ ಬರಾಬರ್ ಮೆಲಿಸ್ಸಾನ್ ಹಾತಾಕ್ ಮೆಳ್ಲ್ಲೆಂ ಪುಲಾಂಚೆ ವಾಜ್ ಕಾಡುನ್ ಆನಿಲಾಕ್ ಮಾರ್ಲೆಂ.ಆನಿಲಾಚಾ ಕೊಪಲಾಕ್ ಲಾಗೊನ್ ಕೊಪಾಲ್ ಪುಟ್ಲೆಂ! ತರಿ ಮೆಲಿಸ್ಸಾಚೊ ರಾಗ್ ನಿವ್ಲೊನಾ. ತೆಂ ಉಟೊನ್ ಉಡ್ಲೆಂಚ್ ಆನಿಲಾ ವಯ್ರ್ ಆನಿ ಆಪ್ಲ್ಯಾ ಹಾತಾಚ್ಯಾ ನಾಕ್ಷೆಂನಿ ತಾಕಾ ಪಾಪ್ಶಿಲಾಗ್ಲೆಂ. "ತುಕಾ ದಾಖೈತಾಂ...." ಉತ್ರಾಂ ಬರಾಬರ್ ತೆಂ ಆನಿಲಾಕ್ ಸೊಡುನ್ ಲಾಗ್ಗಿಂಚ್ ರಾಂವ್ಚ್ಯಾ ಭಾವ್ ರೊಬಿನಾಕ್ ದೂರ್ ದೀಂವ್ಕ್ ಗೆಲೆಂ.
ಆನಿಲಾನ್ ಆಪ್ಲೆಂ ಘಾಯ್ ಜಾಲ್ಲೆಂ ಕಪಾಲ್ ಡೆಟ್ಟೊಲಾನ್ ದುವ್ನ್, ಪಟ್ಟಿ ಲಾಯ್ಲಿ. ಇಲ್ಲ್ಯಾ ವೆಳಾನ್ ರಾಗಾನ್ ಭರ್ಲ್ಲೊ ರೊಬಿನ್ ಭಯ್ಣಿಸಂಗಿಂ ಧಾಂವೊನ್ ಆಯ್ಲೊ.
"ತುಜಿ ಹಿಮ್ಮತ್ ಕಶಿ ಜಾಲಿ ಮ್ಹಜ್ಯಾ ಭಯ್ಣಿಚೆರ್ ಹಾತ್ ಉಬ್ರಾಂವ್ಚಿ.....?" ಮ್ಹಣ್ ರೊಬಿನಾಚಿ ಲೊಂಕ್ಡಾಸಾರ್ಕಿ ಮೂಟ್ ಆನಿಲಾಚಾ ಮುಸ್ಕರಾಚೆರ್ ಪಡ್ಲಿ.
"ತಿ ಮ್ಹಜಿ ಬಾಯ್ಲ್ ಆನಿ ಮ್ಹಾಕಾ ತಿಚೆರ್ ಹಕ್ಕ್ ತುಜೆ ಪ್ರಾಸ್ ಪಯ್ಲೆಂ ಆಸಾ...." ಆನಿಲ್ ಮ್ಹಣಾಲೊ. ಆನಿ ತ್ಯಾಚ್ ವೆಳಾ ರೊಬಿನಾಚಿ ದೀಷ್ಟ್ ಆನಿಲಾಚಾ ಕೊಪಾಲಾಚೆರ್ ಗೆಲಿ. ತೊ ಮುಖಾರ್ ಕಿತೆಂಯ್ ಚಿಂತ್ಚೆಆದಿಂ ಆನಿಲಾಚಾ ಗಳ್ಯಾರ್, ಬಾವ್ಳ್ಯಾಂರ್ ನಾಕ್ಷೆಂಚೆ ಮಾರ್ಯ್ ತಾಕಾ ದಿಸ್ಲೆ.
"ಮೆಲಿಸ್ಸಾ, ತುಂವೆಂ ಆನಿಲಾಕ್ ಸ್ವತಾ ಮಾರುನ್, ಬೊಕ್ರುನ್ ಮ್ಹಜೆಲಾಗ್ಗಿಂ ದೂರ್ ದೀಂವ್ಕ್ ಆಯಿಲ್ಲೆಂಯ್.....?" ಉತ್ರಾಂ ಬರಾಬರ್ ರೊಬಿನಾಚೊ ಹಾತ್ ಮೆಲಿಸ್ಸಾಚೆರ್ ಉಬ್ರಾತಾನಾ, ಎಕಚ್ಫಾರಾ ಆನಿಲಾನ್ ತೊ ಆಡಾವ್ನ್ ಧರ್ಲೊ ಆನಿ ಮ್ಹಣಾಲೊ-
"ತುಕಾ ಪರಾತ್ ಸಾಂಗ್ತಾಂ ತಿ ಮ್ಹಜಿ ಬಾಯ್ಲ್, ತಿಚೆರ್ ಹಕ್ಕ್ ಮ್ಹಾಕಾ ಮಾತ್ರ್ ಆಸಾ, ತುಕಾ ನಾ..."
"ಸೊರ್ರಿ ಆನಿಲ್ ಮ್ಹಾಕಾ ಮಾಫ್ಕರ್, ಆಜ್ ಥಾವ್ನ್ ಹಾಂವ್ ತುಮ್ಚ್ಯಾ ಸಂಗ್ತಿಂತ್ ಮೆತೆರ್ ಜಾಯ್ನಾ. ಇತ್ಲೆಂ ಜಾಣಾ ಜಾಲೊಂಕಿ, ತುಂ ಆಮ್ಚೆಪ್ರಾಸ್ ಬರೊ...." ಜಾಪಿಕ್ ರಾಕಾನಾಸ್ತಾಂ ರೊಬಿನ್ ಥಂಯ್ ಥಾವ್ನ್ ಗೆಲೊ. ಮೆಲಿಸ್ಸಾಯಿ ಆಪ್ಲ್ಯಾ ಚುಕಿಖಾತಿರ್ ಪಶ್ಚತಾಪ್ ಪಾವೊನ್ ಲಜೆಲೆಂ.
********
ತೊ ದೀಸ್ ಬ್ರೇಸ್ತರ್ ಸಪ್ತೆಂಬರ್ 8 ತಾರಿಕೆಚೊ! ಮೊಂತಿಸಾಯ್ಬಿಣಿಚಾ ಫೆಸ್ತಾಚೊ!! ಮೆಲಿಸ್ಸಾಕ್ ಉಗ್ಡಾಸ್ ಆಯ್ಲೊ ತಾಚಿ ಆನಿ ಆನಿಲಾಚಾ ಮೊಗಾಚಿ ಸುರ್ವತ್ ಜಾಲ್ಲ್ಯಾ ಪಯ್ಲ್ಯಾಚ್ ಆಯ್ತಾರಾ ತೆಂ ಆನಿಲಾಕ್ ಘೆವ್ನ್ Our Lady of Grace ಫಿರ್ಗಜೆಕ್ ಪಾವ್ಲ್ಲೆಂ. ಥಂಯ್ಚರ್ ಮೆಲಿಸ್ಸಾನ್ ಮರ್ಯೆಚಾ ಇಮಾಜಿ ಮುಖಾರ್ ದಿಂಬ್ಯೆರ್ ಆನಿಲಾಕ್ ಮಾಗ್ಲ್ಲೆಂ. ಆನಿ ತಾಕಾ ಆನಿಲ್ ಮೆಳ್ಲ್ಲೊ, ಪುಣ್ ಥೊಡ್ಯಾಚ್ ಮಹಿನ್ಯಾಂಕ್ ಮಾತ್ರ್. ಕಾಜಾರ್ ತಾಂಚೆಂ 2005-ಂತ್ ಜನೆರಾಚಾ ಎಕಾ ತಾರ್ಕೆರ್ ಜಾಲ್ಲೆಂ ಆನಿ ಫಕತ್ತ್
ತಿಂ ತೀನ್ ಮಹಿನೆ ಮಾತ್ರ್ ಮೊಗಾನ್ ಆಸ್ಲ್ಲಿಂ. ತ್ಯಾ ಉಪ್ರಾಂತ್ ತಾಂಚೆ ಮದೆಂ ಸದಾಂಚಾ ಝಗ್ಡ್ಯಾನಿ ತಾಂಕಾಂ ಮಯ್ಲಾಂ ಪಯ್ಸ್ ದವರ್ಲ್ಲೆಂ. ಆಜ್ ಮೊಂತಿ ಸಾಯ್ಬಿಣಿಚೆಂ ಫೆಸ್ತ್ ಆನಿ ಕಾಜಾರ್ ಜಾವ್ನ್ ನೋವ್ ಮಹಿನೆ ಜಾಲ್ಯಾತ್ ತರಿ, ಸ ಮಹಿನೆ ಥಾವ್ನ್ ತಿಂ ಎಕಾಮೆಕಾಚಾ ತೊಂಡಾಕ್ ಸೈತ್ ಪಳಯ್ನಾಂತ್. ಎಕಾ ಪಾಕ್ಯಾ ಪಂದಾ ಜಿಯೆತಾತ್ ತರಿ, ಎಕಾಮೆಕಾಚಾ ಮುಖಾರ್ ಪಡಾನಾಂತ್. ಭಿತರ್ಲ್ಯಾ ಭಿತರ್ ಎಕಾಮೆಕಾಕ್ ಆಶೆತಾತ್ ಆನಿ ಎಕ್ವಟೊಂಕ್ ಪೆಚಾಡ್ತಾತ್ ತರೀ, ಮಾಫಿ ಮಾಗೊನ್ ಚೂಕ್ ವಳ್ಕುಂಕ್ ತಯಾರ್ನಾಂತ್.
"ಆಜ್ ಹಾಂವ್ ಪರಾತ್ ಮ್ಹಜ್ಯಾ ಆನಿಲಾಕ್ ಪಾಟಿಂ ಮಾಗ್ತೆಲಿಂ ಮ್ಹಜ್ಯಾ ಮಾಯೆಲಾಗ್ಗಿಂ. ತೊ ಬರೊ ಹಾಂವ್ಚ್ ಪಾಡ್. ಮ್ಹಾಕಾ ಮರ್ಯೆನ್ ಇತ್ಲೊ ಬರೊ ಜಿವನ್ ಸಾಂಗಾತಿ ದಿಲಾ ತರಿ, ಹಾಂವೆಂ ತಾಕಾ ಮ್ಹಜ್ಯಾ ಹಂಕಾರಾರಾನ್ ಆನಿ ಸ್ವಾರ್ಥಾನ್ ಹೊಗ್ಡಾವ್ನ್ ಘೆತ್ಲಾಂ...” ಆಪ್ಣಾಸಂಗಿಂ ತರ್ಕ್ ಕರುನ್ ಮೆಲಿಸ್ಸಾ ಪಾವ್ಲ್ಲೆಂ ತ್ಯಾಚ್ ಫಿರ್ಗಜೆಕ್. ವ್ಹಡಾ ಬಕ್ತಿಪಣಾನ್ ಮೀಸ್ ಆಯ್ಕೊನ್ ಮೆಲಿಸ್ಸಾ ಮರ್ಯೆಚಾ ಇಮಾಜಿ ಮುಖಾರ್ ವಚುನ್ ದಿಂಬ್ಯೆರ್ ಪಡ್ಲೆಂ."
ದೊಳೆ ಧಾಂಪುನ್ ಕಾಳ್ಜಾಂಥಾವ್ನ್ ಖತ್ಕತ್ಯಾ ಭಗ್ಣಾಂನಿ ತಾಣೆ ಆಪ್ಲ್ಯಾ ಚುಕಿಂಚೆಂ ಭಗ್ಸಾಣೆ ಮಾಗೊನ್ ಸಾಯ್ಬಿಣಿ ಲಾಗಿಂ ಆನಿಲಾಚಾ ಮೊಗಾಕ್ ಪಾಟಿಂ ಮಾಗ್ಲೆಂ. ತ್ಯಾ ಮಾಗ್ಣ್ಯಾಂತ್ ತೆಂ ಸರ್ವ್ ವಿಸ್ರುನ್ ಕಿತ್ಲೊ ವೇಳ್ ದಿಂಬ್ಯೆರ್ ಆಸ್ಲ್ಲೆಂ ಮ್ಹಣ್ ತೆಂಚ್ ನೆಣಾ ಜಾಲೆಂ. ಕೊಣ್ಗಿ ಎಕ್ ಸ್ತ್ರೀ ಇಮಾಜಿಚೊ ಉಮೊ ಘೆಂವ್ಕ್ ಆಯಿಲ್ಲಿ, ದಿಂಬ್ಯೆರ್ ಆಸ್ಲ್ಲ್ಯಾ ಮೆಲಿಸ್ಸಾಕ್ ದಾಂಟಾತಾನಾ, ಮೆಲಿಸ್ಸಾ ಮಾಗ್ಣಾಂತ್ಲೆಂ ಜಾಗೆಂ ಜಾಲ್ಲೆಂ. ತೆಂಯಿ ಉಟೊನ್ ಇಮಾಜಿಚೊ ಉಮೊ ಘೆಂವ್ಕ್ ಮುಖಾರ್ ಸರ್ತನಾ, ದಾವ್ಯಾ ಕುಶಿಕ್ ದಿಂಬ್ಯೆರ್ ಆಸ್ಲ್ಲ್ಯಾ ಎಕಾ ದಾದ್ಲ್ಯಾಚೆರ್ ತಾಚಿ ದೀಷ್ಟ್ ಗೆಲಿ. ತ್ಯಾ ದಾದ್ಲ್ಯಾಚಾ ಮಾತ್ಯಾವಯ್ರ್ ಏಕ್ ಉರುಟ್ ಆಕಾರಾಚೊ ಉಜ್ಯಾಚೊ ಸ್ಪ್ರಿರಿತ್ ಘುಂವೊನ್ ಆಸ್ಚೊ ದಿಸ್ಲೊ ಮೆಲಿಸ್ಸಾಕ್ ಆನಿ ತಾಚೆ ಮದೆಂ ಮರ್ಯೆಚೆಂ ಹಾಸ್ತೆಂ ಮುಖಮಳ್!!!
ಸಂತೊಸಾಚಾ ಆತುರಾಯೆನ್ ಭರ್ಲ್ಲೆಂ ಮೆಲಿಸ್ಸಾ ಇಮಾಜಿಚೊ ಉಮೊ ಘೆಂವ್ಚ್ಯಾ ಬದ್ಲಾಕ್ ವಚುನ್ ತ್ಯಾ ದಾದ್ಲ್ಯಾಚಾ ಮಾತ್ಯಾಕ್ ಆಪ್ಡುನ್ ಉಮೊ ಘೆಂವ್ಕ್ಲಾಗ್ಲೆಂ. ಜಾಲ್ಲ್ಯಾ ಹರ್ಕತೆಕ್ ತೊ ದಾದ್ಲೊ ಉಟೊನ್ ಪಾಟಿಂ ಪಳಯ್ತನಾ, ತಾಕಾ ತಾಚಿ ಹೊಕಾಲ್ ಮೆಲಿಸ್ಸಾ ದಿಸ್ಲಿ. ಪುಣ್ ಮೆಲಿಸ್ಸಾಕ್ ಆನಿಲಾZ ಮುಖಮೊಳಾರ್ ಆಸ್ಚ್ಯಾ ಉಜ್ವಾಡಾಪಾಟ್ಲ್ಯಾನ್ ಮರಿ ದಿಸ್ತಾಲಿ ಆನಿ ತೆಂ ಪರಾತ್ ದಿಂಬ್ಯೆರ್ ಪಡ್ಲೆಂ. ಭಂವ್ತೊಣಿಚಾ ಲೊಕಾಕ್ ಮೆಲಿಸ್ಸಾನ್ ಕೆಲ್ಲೆಂ ವಿಚಿತ್ರ್ ದಿಸ್ಲೆಂ, ಶಿವಾಯ್ ಆನಿಲ್ಯಿ ಕಾಂಯ್ ಸಮ್ಜಾನಾ ಜಾಲೊ ಆನಿ ಆಪ್ಲಿ ಹೊಕಾಲ್ ಮರ್ಯೆ ಮುಖಾರ್ ಆಪ್ಣಾಲಾಗಿಂ ಭಗ್ಸಾಣೆ ಮಾಗ್ತಾ ಮ್ಹಳ್ಳ್ಯಾ ಭಾವನಾನ್, ಮೆಲಿಸ್ಸಾಕ್ ವ್ಹಡಾ ಮೊಗಾನ್ ಬಾವ್ಳ್ಯಾಂಕ್ ಧರುನ್ ಉಟೈಲಾಗ್ಲೊ.
ದೊಳೆ ಉಭಾರುನ್ ಪಳಯ್ತಾನಾ ಮೆಲಿಸ್ಸಾಕ್ ಆನಿಲ್ ದಿಸ್ಲೊ ಆನಿ ತೆಂ ಪರಾತ್ ತಾಕಾ ವೆಂಗ್ಲೆಂ. ಮರ್ಯೆಕ್ ಆರ್ಗಾಂ ದೀವ್ನ್ ತಿಂ ಥಂಯ್ ಥಾವ್ನ್ ಭಾಯ್ರ್ ಆಯ್ಲಿಂ. ಉಪ್ರಾಂತ್ ತಾಂಕಾಂ ತಾಂಚೆ ಥಂಯ್ ಘಡ್ಲ್ಲ್ಯಾ ಮರ್ಯೆಚಾ ಕುರ್ಪೆಚಿ ದಯಾ ಆರ್ಥ್ ಜಾಲ್ಲಿ. ಘರ್ ತಾಂಚೆಂ ಮಲಾಡ್ ಆಸ್ಲ್ಲೆಂ ತರಿ, ಆಜ್ ಮೊಂತಿ ಫೆಸ್ತಾದೀಸ್ ತಿಂ ಆಪ್ಣಾಯಿತ್ಲ್ಯಾಕ್ ನಿಚೆವ್ ಕರುನ್ Our Lady of Grace ಫಿರ್ಗಜೆಕ್ ಪಾವ್ಲ್ಲಿಂ. ಆನಿ ಮರ್ಯೆನ್ ತಾಣಿ ಕಾಳ್ಜಾಂಥಾವ್ನ್ ಮಾಗ್ಲ್ಲೆಂ ತಾಂಕಾಂ ವರ್ತ್ಯಾ ಬೆಸಾಂವಾನ್ ದಿಲ್ಲೆಂ.
ಘರಾ ಪಾವ್ಲ್ಲಿಂ ಹಿಂ ದೊಗಾಂಯಿ ನವ್ಯಾ ಮೋಗ್ ಕರ್ನಾರಾಂಪರಿಂ ಲಜ್ಲಿಂ. ಎಕಾಮೆಕಾ ಪರಾತ್ ಆನಿ ಪರಾತ್ ವೆಂಗ್ಲಿಂ. "ಆನಿ ಫುಡೆಂ ಖಂಚಾಚ್ ಕಾರಣಾಕ್ಯಿ ಆಮಿ ಝಗಡ್ಚಿನಾಂವ್" ಮ್ಹಣ್ ತಾಣಿ ನಿಚೆವ್ ಕೆಲೊ. ತಾಂಚೊ ಮೋಗ್ ಜೊ ಸಭಾರ್ ತೆಂಪಾಥಾವ್ನ್ ಕಾಳ್ಜಾಂತ್ ಉಸ್ಮೊಡೊನ್ ಆಸ್ಲ್ಲೊ ಆಜ್ ಭಾಯ್ರ್ ವೊಮ್ತಾಲ್ಲೊ ಅನಿ ತಿಂ ತೊ ವಾಂಟುಂಕ್ ತಯಾರ್ ಜಾಲ್ಲಿಂ. ಸವ್ಕಾಸ್ ತಿಂ ಮೊಗಾಚಾ ಖೆಳಾಂತ್ ಪ್ರವೆಶ್ ಜಾತಾನಾ, ಹ್ಯಾ ತಾಂಚಾ ಮೊಗಾಚಾ ಮಿಲನಾಚೊ ಘುರ್ತ್ ಜಾವ್ನ್ ಮೆಲಿಸ್ಸಾಚಾ ಗರ್ಭಾಂತ್ ನವೊ ಜೀವ್ ಪ್ರವೆಶ್ ಜಾಲ್ಲೊ!
ಮೆಲಿಸ್ಸಾಕ್ ಆನಿಲಾನ್ ತಾಚಾ ಗರ್ಭೆಸ್ತ್ ಪಣಾರ್ ಇತ್ಲ್ಯಾ ಮೊಗಾನ್ ಚಾಕ್ರಿ ಕರುನ್ ಪಳಯ್ಲೆಂಕಿ, ಬಹುಷಾ ಬೋವ್ಚ್ ಥೊಡ್ಯಾಂತ್ ತಸಲೆಂ ಭಾಗ್ ಫಾವೊ ಜಾತಾ. ತಶೆಂ ಮೆಲಿಸ್ಸಾ ಜುನಾಚಾ 10 ತಾರಿಕೆರ್ ಸನ್ವಾರಾ ದೀಸ್ 2006-ಂತ್ ಎಕಾ ಸೊಭಿತ್ತ್ ಚೆರ್ಕ್ಯಾ ಭುರ್ಗ್ಯಾಕ್ ಪ್ರಸೂತ್ ಜಾಲೆಂ. ತಾಕಾ ತಾಣಿಂ ಮೊಗಾನ್ LOVSON ಲಾವ್ಸನ್ (ಮೊಗಾಚೊ ಪುತ್) ಮ್ಹಣ್ ವಲಾಯ್ಲೆಂ.
ಆದ್ಲ್ಯಾ ಮೊಂತಿಸಾಯ್ಬಿಣಿಚಾ ಫೆಸ್ತಾ ದೀಸ್ ಸಪ್ತೆಂಬ್ರಚಾ 8 ತಾರಿಕೆರ್ ಮರ್ಯೆನ್ ದಿಲ್ಲ್ಯಾ ಬೆಸಾಂವಾನ್ ಹಾಂಕಾಂ ಜಲ್ಮಾಲ್ಲ್ಯಾ ಲವ್ಸನಾಕ್, ಹ್ಯಾ ಮೊಂತಿ ಫೆಸ್ತಾ ದೀಸ್ ತೀನ್ ಮಹಿನೆ ಭರ್ತನಾ, ಮೆಲಿಸ್ಸಾ ಆನಿ ಆನಿಲ್ ವ್ಹಡಾ ಸಂತೊಸಾನ್, ತಾಕಾ ತ್ಯಾಚ್ ಫಿರ್ಗಜೆಕ್ ಹಾಡುನ್ ಮರ್ಯೆಕ್ ದಾಖಂವ್ಕ್ ಆಯ್ಲ್ಯಾಂತ್!!!
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
