ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಬೂಕ್ ಸಮೀಕ್ಶಾ - 18
ಕಾಳ್ಜಾಂತ್ಲೆ ಯಾದ್
ಬೂಕ್: ಕಾಳ್ಜಾಂತ್ಲೆ ಯಾದ್
ಪ್ರಸ್ತಾವನ್: ಜಿಯೋ ಆಗ್ರಾರ್
ಛಾಪ್ಲ್ಲಿ ಲಿಪಿ: ಕಾನಡಿ.
ಪಾನಾಂ: 120 + 4
ಮೋಲ್: ರು. 30
ಪ್ರಕಾಶಕ್: ಆಕಾಶ್ ಪ್ರಕಾಶನ್.
ಪರ್ಗಟ್ ಜಾಲ್ಲಿ ಇಸ್ವಿ: 2006
ಸಮೀಕ್ಶಾ ಚಲಯ್ಣಾರ್: ಮೆಲ್ವಿನ್ ಜೆ. ವಾಸ್
ತಾರಿಕ್: 19 ಜನೆರ್ 2007
ಜಾಗೊ: ಸಾಲ್ಮಿಯಾ, ಕುವೇಯ್ಟ್
ಮೆಲ್ವಿನ್ ಜೆ. ವಾಸ್
ಗ್ಲೇಡಿಸ್ ರೇಗೊ
ವಿಮರ್ಶೆ/ಸಮೀಕ್ಶಾ ಲೇಖನ್ - ಮೆಲ್ವಿನ್ ಜೆ. ವಾಸ್, ಕೆಲರಾಯ್
ಪ್ರಸ್ತುತ್ ಸಮಾಜೆಂತ್ ಚಲಿಯೆಚೆಂ ಅಸ್ಥಿತ್ವ್
[’ಕಾಳ್ಜಾಂತ್ಲೆ ಯಾದ್’ ಕವಿತಾ ಜಮ್ಯಾಂತ್ ಹ್ಯಾ ಸಮಾಜೆಕ್ ಜಾಗಂವ್ಚ್ಯಾ ಹರ್ಯೆಕ್ ವಿಚಾರಾಂಚಿಂ ಕವಿತಾಂ ಆಸಾತ್ ತರ್ಯ್ ಹ್ಯಾ ಸಮೀಕ್ಶಾ ಲೇಖನಾಂತ್ ಫಕತ್ತ್ ಥೊಡ್ಯಾ ಕವಿತಾಂಚಾ ವೊಳಿಂಕ್ ಮಾತ್ರ್ ಹಾವೆಂ ಘೆತ್ಲಾಂ. ಹಾಚೊ ಮತ್ಲಬ್ ಹೊ ನ್ಹಂಯ್ಕೀ ಹಾಂಗಾ ಉಲ್ಲೇಕ್ ಕರಿನಾತ್ಲ್ಲ್ಯಾ ಕವಿತೆಂಕ್ ಆನಿ ಆಮಿಂ ಜಿಯೆಂವ್ಚ್ಯಾ ಸಮಾಜೆಕ್ ಕಾಂಯ್ ಸಂಭಂಧ್ ನಾ ಮ್ಹಳ್ಳೊ. ಮ್ಹಜ್ಯಾ ವಿಚಾರಾನಿಂ ಹ್ಯಾ ಜಮ್ಯಾಚಾ ಸಗ್ಳ್ಯಾ ಕವಿತೆಂಕ್ ಹಾಂಗಾಸರ್ ಉಲ್ಲೇಖ್ ಕೆಲ್ಲ್ಯಾ ಹ್ಯಾ ಥೊಡ್ಯಾಚ್ ಕವಿತೆಂನಿ ಆಟಾಪುಂಚೆಂ ಹಾಂವೆ ಪ್ರಯತ್ನ್ ಕೆಲಾಂ. ಹ್ಯಾ ಕವಿತಾ ಜಮ್ಯಾಂತ್ಲ್ಯಾ ಕವಿತೆಂ ಪಯ್ಕಿ; ’ಸ್ವಾರ್ಥ್ ರುದಾನ್’, ’ಆಂಗ್ಲೆಂ’, ’ದಾತಾರ್’, ’ಗಡಂಗಾಕ್ ಆಜ್ ರಜಾ’, ’ಸಪಾಣ್ ಮ್ಹಜೆಂ’, ’ಹಾಂವ್ ಸಪ್ಣೆತಾಂ’... ಅಸಲ್ಯಾ ಕವಿತೆನಿ ಉಟಯಿಲ್ಲ್ಯಾ ವಿಚಾರಾಂನಿ ಆನಿ ಉಭಾರ್ಲ್ಲ್ಯಾ ಇಮಾಜೆಂನಿ ಸಗ್ಳ್ಯಾ ಮನ್ಶ್ಯಾ ಜಿವಿತಾಕ್ ಹ್ಯಾ ಸಮಾಜೆಂತ್ಲ್ಯಾ ವಾಸ್ತವೀಕ್ಪಣಾಂತ್ ಪಿಂತ್ರಾಯ್ಲಾಂ ಆಸ್ತಾಂ ಹ್ಯಾ ಥೊಡ್ಯಾಚ್ ಕವಿತೆಂಕ್ ವಿಂಚುನ್ ತ್ಯಾ ಕವಿತೆಂಕ್ ಹ್ಯಾ ಸಮಾಜೆ ಮುಕಾರ್ ಪ್ರಸ್ತುತ್ ಕರ್ಚೆಂ ಹೆಂ ಮ್ಹಜೆಂ ಪ್ರಯತ್ನ್.]
ಮನ್ಶ್ಯಾ ಮತಿಂತ್ಲ್ಯಾ ಸಿಂತಿಮೆಂತಾಂಚಿ ಜಾಣ್ವಾಯ್, ತಾಣೆಂ ಪಳಂವ್ಚ್ಯಾ, ತಾಚ್ಯಾ ದಿಸ್ಪೊಡ್ತ್ಯಾ ದೊಳ್ಯಾಂ ದಿಸವ್ಣೆಕ್ ನಾಜೂಕ್ಪಣಿ ಸ್ಪಂದನ್ ಕರ್ಚ್ಯಾ ವಗ್ತಾ ಆಪ್ಲ್ಯಾ ಭಿತರ್ಲ್ಯಾ ಮನ್ಶ್ಯಾಪಣಾಕ್ ಜಾಗಂವ್ಚೆ ಪ್ರಯತ್ನ್ ಕರ್ತಾ. ಹೆಂ ಪ್ರಯತ್ನ್ ಅಚಾನಕ್ ಜಾವ್ನ್ ಉದೆವ್ನ್ ಯೆತಾನಾ ಮಾತ್ರ್ ಹ್ಯಾ ಸ್ಪಂದನಾಚೆಂ ಪರಿಣಾಮ್ ಚಡ್ ಮಾಪಾನ್ ದಿಸೊನ್ ಯೆತಾ. ಆಶೆಂ ದಿಸೊನ್ ಆಯಿಲ್ಲೆಂ ಪರಿಣಾಮ್ ತ್ಯಾ ಮನ್ಶ್ಯಾಚಾ ಮುಕ್ಲ್ಯಾ ಕ್ರಿಯೆಂತ್ ಕ್ರಿಯಾತ್ಮಕ್ ಪಾತ್ರ್ ಖೆಳ್ತಾ. ಹ್ಯಾ ವಗ್ತಾಂ ತೊ ಮನಿಸ್ ಆಪ್ಣೆ ಜಿಯೆಂವ್ಚ್ಯಾ ಸಮಾಜೆ ಸವೆಂ ಕಿತ್ಲ್ಯಾ ಗುಂಡಾಯೆಚ್ಯಾ ಸಂಭಂಧಾಂತ್ ಆಸಾಂ ಮ್ಹಳ್ಳೆಂ ತೆಂ ತಾಚ್ಯಾ ಕ್ರಿಯಾತ್ಮಕ್ ಕಾರ್ಯಾಂನಿ ದಿಸೊನ್ ಯೆತಾ. ಹಾಂಗಾಸರ್ ಸಮಾಜೆ ವಯ್ರ್ ತಾಕಾ ಕಿತ್ಲೊ ಹುಸ್ಕೊ ಆಸಾ ಮ್ಹಳ್ಳೆಂ ತೆಂ ಸ್ಪಶ್ಟ್ ಜಾತಾ.
ಹೆಂಚ್ ಸ್ಪಶ್ಟ್ಪಣ್ ತ್ಯಾ ಮನ್ಶ್ಯಾ ಮತಿಕ್ ಎಕ್ಚ್ ’ಕ್ರಾಂತಿವಾದಿ’ ಕರ್ತಾ ಯಾ ’ಪಲಾಯನ್ವಾದಿ’ ಕರ್ತಾ. ಹ್ಯಾ ತಾಚ್ಯಾ ಅಚಾನಕ್ ಜಾಲ್ಲ್ಯಾ ಟ್ರಾನ್ಸ್ಫೋರ್ಮೇಶನಾಂತ್ [ಪರಿವರ್ತನ್] ತೊ ಕಿತೆಂ ಅಭಿವ್ಯಕ್ತ್ ಕರ್ತಾ ಮ್ಹಳ್ಳೆಂ ತೆಂ ತೊ ಕಸಲ್ಯಾ ಪರಿವರ್ತನಾಂತ್ ಪರಿವರ್ತನ್ ಜಾಲಾ ಮ್ಹಳ್ಳ್ಯಾ ವಯ್ರ್ ಹೊಂದ್ವೊನ್ ಆಸಾ. ಕವಿತಾಯ್ ಹ್ಯಾ ಅಸಲ್ಯಾಚ್ ಪರಿವರ್ತನಾಚೆಂ ಪರಿಣಾಮ್ ಮ್ಹಣೊನ್ ಲೇಖಕಿ ಕವಿಯತ್ರಿ ಮಾನೆಸ್ತಿಣ್ ಗ್ಲ್ಯಾಡಿಸ್ ರೇಗೊ ವೊಪ್ತಾ. [ಮ್ಹಜ್ಯಾ ಉತ್ರಾಂನಿ ನ್ಹಂಯ್ ಬಗಾರ್ ಕವಿಯತ್ರಿಚಾ ಉತ್ರಾಂನಿ] ಅಶೆಂ ಕವಿತಾ ಘಡ್ತಾ ಮ್ಹಣೊನ್ ತಿ ಮ್ಹಣ್ತಾ. ಜೆರಾಲ್ ಸಬ್ದಾನ್ ಹಾಂವ್ ಹಾಂಗಾಸರ್ ಕವಿತಾಚಾ ಬದ್ಲಾಕ್ ಸಾಹಿತ್ಯ್ ಘಡ್ತಾ ಮ್ಹಣೊನ್ ವೊಪ್ತಾಂ.
ಕೆದ್ನಾಂ ತುಜೆಂ ಮನ್ ದುಖ್ತಾ......
ದುಖಿಚೆಂ ಮೇಲ್ ವಾಂವ್ತಾ.....
ಉಸ್ಪತಾತ್ ಕಡ್ವಳಾಚೆ ಕಿಸ್ಫೊರ್ ಕಿಸ್ಫೊರ್
ಮತಿ ಚಿಂತ್ನಾಂಕ್ ಕರುನ್ ಚ್ಯೂರಾನ್ ಚ್ಯೂರ್....
ತವಳ್ ಕವಿತಾ ಘಡ್ತಾತ್ ತವಳ್ ಕವಿತಾ ಘಡ್ತಾತ್. [ಕವಿತಾ ಆಶಿಚ್ಚ್ ಆಸ್ತಾ]
ಹಿ ಕ್ರಿಯಾ!
ದಿಸ್ಪೊಡ್ತ್ಯಾ ಜಿವಿತಾಂತ್ ಮನ್ಶ್ಯಾಚಾ ದೊಳ್ಯಾಂ ದಿಸವ್ಣೆಕ್ ತಾಚಿಂ ಸಿಂತಿಮೆಂತಾಂ ಸ್ಪಂದನ್ ಕರ್ತಾನಾ ಉಬ್ಜೊಂಚಿ ತಾಚ್ಯಾ ಪರಿವರ್ತನಾಚಿ ಕ್ರಿಯಾ!
ಮನಿಸ್ ತಾಣೆ ಜಿಯೆಂವ್ಚ್ಯಾ ಸಮಾಜೆಂತ್ ತೊ ಸ್ಂಘ್ಜೀವಿ. ಆಶೆಂ ಆಸ್ತಾನಾ ತಾಚಿ ಹಿ ಕ್ರಿಯಾ ಫಕತ್ತ್ ತಾಚ್ಯೆರ್ ಮಾತ್ರ್ ಪರಿವರ್ತನ್ ಹಾಡಿನಾ. ಬಗಾರ್ ತ್ಯಾ ಪರಿವರ್ತನಾಚಾ ಪ್ರತಿಕ್ರಿಯಾ ವಯ್ರ್ ಬದ್ಲಾವಣ್ ಹಾಡ್ತಾ.
ಕೆದ್ನಾಂ ಹಾಂವ್ ಮುಕಾರ್
ಕೆದ್ನಾಂ ತೊ ಮುಕಾರ್
ಆತ್ತಾ ತೊ ಆತ್ತಾ ಹಾಂವ್.....
ಆಮ್ಚೆ ಭಿತರ್ಲೆಂ ಝುಜ್ ಚಲ್ತೇ ಆಸಾ! [ತೊ ಆನಿ ಹಾಂವ್]
ಹಿ ತ್ಯಾ ಪರಿವರ್ತನಾಚಾ ಪ್ರತಿಕ್ರಿಯಾಚಿ ಬದ್ಲಾವಣ್! ಹ್ಯಾ ಬದ್ಲಾವಣೆಕ್ ತಾಚೆಂಚ್ ಮ್ಹಳ್ಳೆಂ ಏಕ್ ರೂಪ್ ನಾ. ತಾಕಾ ತಾಚೆಂಚ್ ಮ್ಹಳ್ಳೆಂ ಏಕ್ ಆಸ್ಥಿತ್ವ್ ನಾ. ಪುಣ್ ಹ್ಯಾ ಬದ್ಲಾವಣೆಕ್ ಏಕ್ ನಿರ್ಧಿಶ್ಟ್ ದಿಶಾ ಆಸಾ. ಹ್ಯಾ ದಿಶೆಕ್ ಏಕ್ ನಿರ್ಧಿಶ್ಟ್ ಉದ್ದೇಶ್ ಆಸಾ. ಹೊ ಉದ್ದೇಶ್ ಹಾಂಗಾಸರ್ ಫಕತ್ತ್ ತಾಚ್ಯೆರ್ ಮಾತ್ರ್ ನ್ಹಂಯ್ ಬಗಾರ್ ತಾಣೆಂ ಜಿಯೆಂವ್ಚ್ಯಾ ಸಮಾಜಿಚೆರ್ ಪರಿಣಾಮ್ ಹಾಡ್ತಾ. ಹೊ ಪರಿಣಾಮ್ ತಾಚ್ಯಾ ಪರಿವರ್ತನಾಚಾ ಕ್ರಿಯೆಚೊ ಪರಿಣಾಮ್ ಜಾಲ್ಲ್ಯಾನ್ ಹ್ಯಾ ಪರಿಣಾಮಾ ಥಾವ್ನ್ ಹೆಂ ಸ್ಪಶ್ಟ್ ಜಾತಾ ಕೀ ತೊ ಮನಿಸ್ ತಾಚ್ಯಾ ತ್ಯಾ ಸಮಾಜೆಂತ್ಲ್ಯಾ ಸ್ಪಂದನಾ ಥಾವ್ನ್ ಕಿತ್ಲೊ ಪರಿವರ್ತನ್ ಜಾಲಾ ತೆಂ. ಹ್ಯಾ ಪರಿವರ್ತನಾಚಾ ಪರಿಣಾಮಾಕ್ ಕವಿಯತ್ರಿ ಗ್ಲೇಡಿಸ್ ಬಾಯೆಚಾ ಕವಿತಾ ಸಾಹಿತ್ಯಾಂತ್ ಪಳಂವ್ಚೆಂ ಜಾಲ್ಯಾರ್,
ಮೆಲ್ಲ್ಯಾ ದಾದ್ಲ್ಯಾ ದಾರ್ಭ್ಯಾ ಹರ್ಧ್ಯಾರ್
ಚುರೊ ಜಾಂವ್ಚಿಂ ಮಾತಿಯೆ ಕಾಂಕ್ಣಾಂ.....
ಮೆಲ್ಲ್ಯಾ ಬಾಯ್ಲೆ ಸಾರಿಯೆರ್ ನಿದೊಂಕ್
ದಾದ್ಲೊ ಕಿತ್ಯಾಕ್ ತಯಾರ್ ನಾ? [ಸ್ವತಂತ್ರಾಚಿಂ ಸಾಟ್ ವರ್ಸಾಂ]
ಹ್ಯೊ ಹ್ಯಾ ಕವಿತೆಚ್ಯೊ ವೆವೆಗ್ಳ್ಯೊ ವೊಳಿ. ಹ್ಯಾ ವೊಳಿಯಾಂಕ್ ವಿಮರ್ಶಾಚಾ ನದ್ರೆನ್ ಹಾವೆಂ ಲಾಗಿಂ ಹಾಡ್ಲಾಂ.
ಪಯ್ಲ್ಯಾ ವೊಳಿಂತ್ ಚುರೊ ಜಾಂವ್ಚಿಂ ಕಾಂಕ್ಣಾಂ ಆನಿ ದುಸ್ರ್ಯಾ ವೊಳಿಂತ್ ದಾದ್ಲ್ಯಾಕ್ ಸವಾಲ್! ಮ್ಹಳ್ಯಾರ್ ಹಾಂಗಾಸರ್ ಪಯ್ಲ್ಯಾ ವೊಳಿಂತ್ ಮನ್ ದುಖ್ಲಾಂ ಆನಿ ದುಖಿಚೆಂ ಮೇಲ್ ವಾಂವ್ಲಾಂ. ಹಾಚೊ ಪರಿಣಾಮ್ ಜಾವ್ನ್ ದುಸ್ರ್ಯಾ ವೊಳಿಂತ್, ಕಡ್ವಳಾಚೆ ಕಿಸ್ಫೊರ್ ಜಾತಾತ್ ಆನಿ ಮತಿ ಚಿಂತ್ನಾಂಕ್ ಚ್ಯೂರಾನ್ ಚ್ಯೂರ್ ಕರುನ್ ಸವಾಲಾಕ್ ಉಭೆಂ ಕರ್ತಾತ್! ಹೆಂ ತ್ಯಾ ಕ್ರಿಯೆಚೆಂ ಪರಿವರ್ತನ್! ಹಾಚೊ ಪರಿಣಾಮ್ ತೆಂ ಸವಾಲ್! ತ್ಯಾ ಕ್ರಿಯೆಚೆಂ ಪರಿವರ್ತನ್ ಹ್ಯಾ ಸವಾಲಾಂತ್ ಮಾಫುನ್ ಪಳಯ್ತಾನಾ ಕಳ್ತಾಕೀ ಹೊ ಪರಿಣಾಮ್ ಕಿತ್ಲೊ ಭಳ್ ಆಸಾ ತೊ. ಹ್ಯಾ ಭಳಾಕ್ ಪಾರ್ಕುನ್ ಪಳಂವ್ಚೆಂ ತರ್ ಹೆಂ ಸವಾಲ್ ಕ್ರಾಂತಿಕಾರಿ? ವಾ ಪಲಾಯನ್ವಾದಿ? ಹ್ಯಾ ಸವಾಲಾಕ್ ಜವಾಬ್ ದಿಂವ್ಚಿ ಜಾಲ್ಯಾರ್ ಹೆಂ ಸವಾಲ್ ಖಂಡಿತ್ ಕ್ರಾಂತಿಕಾರಿ!
ಹ್ಯಾ ಕ್ರಾಂತಿಕಾರಿ ಚಿಂತ್ಪಾಕ್ ಫುಡ್ಲ್ಯಾ ಕವಿತಾಂನಿ ಪಳೆಲೆಂ ಜಾಲ್ಯಾರ್,
ಗೊಟ್ಯಾಂತ್ಲಿ ಮೂಕ್ ಗಾಯ್
ಘರಾಂತ್ಲಿ ಗಂಬೀರ್ ಮಾಂಯ್ [ಸ್ವಾರ್ಥ್ ರುದಾನ್]
ಹ್ಯಾ ಮೂಕ್ ಗಾಯೆ ಆನಿ ಗಂಬೀರ್ ಮಾಂಯ್ಚಾ ಮಧೆಂ ಏಕ್ ಅನೋನ್ಯ್ ಸಂಭಂಧ್ ಆಸಾ ಮ್ಹಳ್ಳ್ಯಾ ಪರಿಂ ದಿಸಾನಾ? ಹ್ಯಾ ಗಾಯ್ ಆನಿ ಮಾಂಯ್ಚಾ ಇಮಾಜೆಂಕ್ ಲಾಗಿಂ ಹಾಡ್ಲ್ಯಾರ್ ಹ್ಯೊ ದೊನ್ಯ್ ಇಮಾಜ್ಯೊ ಎಕಾಚ್ ಇಮಾಜೆಚಿಂ ದೋನ್ ರುಪ್ಣಿಂ ಮ್ಹಳ್ಳ್ಯಾ ಪರಿಂ ದಿಸಾನಾ? ಗೊಟ್ಯಾಂತ್ಲಿ ಗಾಯ್ ಹಾಂಗಾ ಮೂಕ್ ಜಶೆಂ ತ್ಯಾ ದಾರ್ಭ್ಯಾ ಹರ್ಧ್ಯಾರ್ ಆಪ್ಲಿಂ ಕಾಂಕ್ಣಾ ಪುಟಂವ್ಚೆಂ ತೆಂ ಬಾಯ್ಲ್. ದೊಗಾಂಯ್ ಮೂಕ್. ಪುಣ್ ಹೆಂ ಬಾಯ್ಲ್ ತೋಂಡ್ ಆಸೊನ್ಯ್ ಮೂಕ್ ಜಾಲಾಂ [ಹ್ಯಾ ಮೂಕ್ಪಣಾಕ್ ಹಿ ಪಾರಂಪರಿಕ್ ಸಮಾಜ್ ಮ್ಹಳ್ಳೆಂ ಹಾಂಗಸರ್ ಉಡಾಸ್ ದವರ್ಚೆಂ] ಆನಿ ಮೂಕ್ ಜಾವ್ನ್ಯ್ ರುದಾನ್ ತರ್ಯ್ ಕರುಂಕ್ ಸಕ್ತಾ. ಪುಣ್ ತಿ ಗಾಯ್ ತಿಚ್ಯಾ ಜಲ್ಮಾನ್ ಮೂಕ್! ಹ್ಯಾ ತಿಚ್ಯಾ ಮೂಕ್ಪಣಾಂತ್ ತಿ ರುದಾನ್ ಪಾಸೊನ್ ಕರುಂಕ್ ಸಕಾನಾ.
ಎಕಾ ಕುಶಿನ್ ಗೊಟೊ ಎಕಾ ಕುಶಿನ್ ಘರ್! ಹ್ಯೊ ದೋನ್ ಪ್ರಭಲ್ ಇಮಾಜ್ಯೊ ಆಮಿಂಚ್ ಜಿಯೆಂವ್ಚ್ಯಾ ವಾಸ್ತವೀಕ್ ಸಮಾಜೆಂತ್ ಆಮಿಂಚ್ ಕೆಲ್ಲೆ ವರ್ಗ್ ಮ್ಹಳ್ಳ್ಯಾಪರಿಂ ದಿಸಾನಾ? ಗೊಟೊ ಆನಿ ಘರ್! ಕಾಂಯ್ ಖೊಮ್ಟೆಂ ಆನಿ ರಾವ್ಳೆರ್? ಆಮ್ಚ್ಯಾ ಆಯ್ಚ್ಯಾ ಭಂಡ್ವಾಳ್ ಶಾಹಿ ಸಮಾಜೆಂತ್ಲೊ ದುಬ್ಳೊ ಆನಿ ಗ್ರೇಸ್ತ್?
ಜೊ ಕೋಣ್ ಘರಾಂತ್ ಜಿಯೆತಾ ತೊ ಆಪ್ಲ್ಯಾ ಫಾಯ್ದ್ಯಾ ಖಾತಿರ್ ಗೊಟೊ ಕರ್ತಾ. ತರ್ ಹೆಂ ತ್ಯಾ ಭಂಡ್ವಾಳ್ಶಾಹಿ ಸಮಾಜೆನ್ ಆಪ್ಲ್ಯಾ ಫಾಯ್ದ್ಯಾಖಾತಿರ್ ವಿಂಗಡ್ ಕೆಲ್ಲ್ಯಾ ಸವ್ಕಾರ್ ಆನಿ ನವ್ಕಾರ್ ಮ್ಹಳ್ಳ್ಯಾ ದೋನ್ ವರ್ಗಾಚೆಂ ದರ್ಶನ್?
ಗೊಟ್ಯಾಂತ್ಯ್ ಪಾಡ್ಕೊ ಜಲ್ಮಾಲಾ. ಆನಿ ಘರಾಂತ್ಯ್ ಪಾಡ್ಕೊ [ಚೆರ್ಕೊ] ಜಲ್ಮಾಲಾ. [ಹಾಂಗಾಸರ್ ಹಾವೆಂ ಘರಾಂತ್ ಪಾಡ್ಕೊ ಜಲ್ಮಾಲಾ ಮ್ಹಳ್ಳ್ಯಾಚೆಂ ಕಾರಾಣ್ ಹೆಂಚ್ ಕೀ ಹ್ಯಾ ಪಾಡ್ಕ್ಯಾಚಿ ಆನಿ ತ್ಯಾ ಚೆರ್ಕ್ಯಾಚಿ ಜಾತ್ ಎಕ್ಚ್! ಮ್ಹಳ್ಯಾರ್ ಚೆಡ್ಯಾ ಜಾತ್!] ಆತಾಂ ದೊನ್ಯೀ ಜಲ್ಮಾಂತ್ ಜಾತ್ ಎಕ್ಚ್ಚ್ ಜಾಲ್ಯಾರ್ ತ್ಯಾ ಜಾತಿಕ್ ಪಾಡ್ಕೊ ಆನಿ ತ್ಯಾ ಜಾತಿಕ್ ಚೆರ್ಕೊ ಮ್ಹಣೊನ್ ವಿಂಗಡ್ ವೊಲಾಯಿಲ್ಲೆಂ ಕೊಣೆಂ. ತ್ಯಾ ಗೊಟ್ಯಾಂತ್ಲ್ಯಾ ಗಾಯ್ನ್ ಭಿಲ್ಕುಲ್ ನ್ಹಂಯ್! ಹಾಂ.. ತ್ಯಾ ಘರಾಂತ್ಲ್ಯಾ ಗಾಯ್ನ್ ಜಾಂವ್ಕ್ ಸಕ್ತಾ. [ಹಾಂಗಾಸರ್ ಹಾವೆಂ ಪಯ್ಲೆಂಚ್ ಸಾಂಗ್ಲ್ಲ್ಯಾಪರಿಂ ಫಕತ್ತ್ ಜಾತಿಕ್ ಪಳಂವ್ಚೆ] ತರ್ ಹೆಂ ಎಕಾಚ್ ಜಾತಿ ಮಧೆಂ ವರ್ಗ್ ರಚ್ಲ್ಲ್ಯಾ ಪರಿಂ ಜಾಯ್ನಾಂ? ಮ್ಹಳ್ಯಾರ್ ಊಂಚ್ ಆನಿ ನೀಚ್!
ಗೊಟ್ಯಾಂತ್ಲ್ಯಾ ಗಾಯ್ಚೆಂ ಕುತಿಯಾಂನಿ ದೂದ್
ಚಿಂವೆಂತ್ಲೆಂಯ್ ಪುತಾ ತುಕಾಚ್ಚ್
ಆಪ್ಲ್ಯಾ ಚಿಂವ್ಯಾಂತ್ಲ್ಯಾ ದುದಾ ಸವೆಂ ಗೊಟ್ಯಾಂತ್ಲ್ಯಾ ಗಾಯ್ಚಾ ದೂದಾಕ್ಯ್ ಆಶೆಂವ್ಚೆಂ ಸ್ವಾರ್ಥ್ ಜಾಲೆಂ ಜಾಲ್ಯಾರ್ ತ್ಯಾ ಗೊಟ್ಯಾಂತ್ಲ್ಯಾ ಪಾಡ್ಕ್ಯಾಚಾ ಹಕ್ಕಾಚೆಂ ವೊಡುನ್ ಘೆಂವ್ಚೆಂ ಶೋಶಣ್ ಜಾಲೆಂ ನಾ? ಹಾಂಗಾಸರ್ ಎಕಾಚ್ಚ್ ವಗ್ತಾಂ ದೊಗಾಂಚೆರ್ ಶೋಶಣ್ ಚಲ್ತಾ! ಏಕ್ ತಿ ಆವಯ್ ಜಾಲ್ಯಾರ್ ದುಸ್ರೆಂ ಜಾವ್ನ್ ತ್ಯಾ ಪಾಡ್ಕ್ಯಾಚೆರ್! ಹ್ಯಾಚ್ ಖಾತಿರ್ ತಿಂ ನಿರಾಸ್ವಾದಿ ಜಾಲ್ಯಾಂತ್?
ಆಶಾವಾದಿ ಜಾವ್ನ್ ರಾಕೊನ್ ರಾವ್ಲ್ಲ್ಯಾಂವ್
ನಿರಾಶೆನ್ ಬಾವೊನ್ ಗೆಲ್ಯಾಂವ್ [ದಾತಾರ್]
ಹಾಂಗಾ ನಿರಾಸ್ ಸ್ಪಶ್ಟ್ ಝಳ್ಕಾತಾ. ಪುಣ್ ಕವಿತಾ ನಿಮಾಣ್ಯಾ ಪಂಗ್ತೆರ್ ಸವಾಲ್ ಉಟಯ್ತಾ [ಕವಿತಾ ವಾಚಾ] ಹೆಂ ಸವಾಲ್ ಹ್ಯಾ ಸಮಾಜೆಂತ್ ಶೋಶಣಾಕ್ ಸೊಸುನ್ ವರ್ಚ್ಯಾ ತ್ಯಾ ವರ್ಗಾಂಚಾಂಕ್ ಜಾಗಂವ್ಚೆಂ ಪ್ರಯತ್ನ್ ಕರಿನಾ?
ಹ್ಯಾ ಕವಿತಾ ಜಮ್ಯಾಂತ್ಲೆಂ ಕಾಂಕ್ಣಾಂಕ್ ಪಿಟೊ ಕರ್ಚೆಂ ತೆಂ ಬಾಯ್ಲ್ ಜಾಂವ್, ತಿ ಗೊಟ್ಯಾಂತ್ಲಿ ಗಾಯ್ ಜಾಂವ್, ಯಾ ಮಾತ್ಯಾರ್ ಭಾಟಿ ಘೆವ್ನ್ ದರ್ಯಾಕ್ ವಚೊಂಕ್ ಭಾಯ್ರ್ ಸರ್ಲ್ಲಿ ತಿ ಆವಯ್ ಜಾಂವ್ [ಭಾಟಿ ಮಾತ್ಯಾ ಘೆವ್ನ್], ಹಿಂ ತ್ಯಾ ದಾತಾರಾಕ್ ರಾಕ್ಚಾ [ದಾತಾರ್] ಆಶಾವಾದಿ ಬಾಯ್ಲೆಚಿಂ ವಿವಿದ್ ರುಪಾಂ ನ್ಹಂಯ್?
ಎಕ್ಲ್ಯಾಕ್ ಸಮಾಜೆಚ್ಯಾ ವಾಸ್ತವೀಕ್ ಪರಂಪರಾನ್ ಮೂಕ್ ಕೆಲಾಂ ಜಾಲ್ಯಾರ್ ದುಸ್ರ್ಯಾಕ್ ಜಲ್ಮಾನ್ ಮೂಕ್ ಕೆಲಾಂ ಆನಿ ತಿಸ್ರ್ಯಾಚಾ ಸಿಂತಿಮೆಂತಾಂಕ್ ತಿಚ್ಯಾ ಆಶಾವಾದಾನ್ ಮೂಕ್ ಕೆಲಾಂ. ಹಾಂಗಾಸರ್ ತಿಚೊ ಆಶಾವಾದ್ಯ್ ತಿಚ್ಯಾಚ್ ಖೊಮ್ಟ್ಯಾಂತ್ ತಿಚ್ಯಾಚ್ ಭುರ್ಗ್ಯಾಂ ಸಾಮ್ಕಾರ್ ಫಕತ್ತ್ ಏಕ್ ಸವಾಲ್ ಮಾತ್ರ್ ಜಾವ್ನ್ ಉರ್ತಾ ತೆಂ ಹಿ ಸಮಾಜ್ ಹ್ಯಾ ವರ್ಗಾಕ್ [ಸ್ತ್ರೀ ವರ್ಗಾಕ್ ಯಾ ಸ್ತ್ರೀ ಜಾತಿಕ್] ಕಿತ್ಲೆಂ ಶೋಶಣಾಕ್ ವಳಗ್ ಕರ್ತಾ ಮ್ಹಳ್ಳೆಂ ಸ್ಪಶ್ಟ್ ಕರಿನಾ?
ಹಾಕಾಚ್ ತದ್ವಿರುದ್ದ್ ಜಾವ್ನ್ ಪಳಂವ್ಚೆಂ ಜಾಲ್ಯಾರ್,
ಗೊಟ್ಯಾಂತ್ಲಿ ಮೂಕ್ ಗಾಯ್
ಘರಾಂತ್ಲಿ ಗಂಭೀರ್ ಮಾಂಯ್
ಹ್ಯಾ ಘರಾಂತ್ಲ್ಯಾ ಮಾಂಯ್ಚೆಂ ಗಂಭೀರ್ಪಣ್ ತಿಕಾ ತಿಚಾ ಸಮಾಜೆಂತ್ ಊಂಚ್ ಕರ್ತಾ. ತಿಕಾ ತಿಚ್ಯಾಚ್ ಜಾತಿಚ್ಯಾ ವರ್ಗಾಂತ್ ಊಂಚ್ ಕರ್ತಾ. ಮ್ಹಳ್ಯಾರ್ ಹೆಂ ಎಕಾಚ್ಚ್ ಜಾತಿ [ಸ್ತ್ರೀ] ಭಿತರ್ಲೆಂ ಶೋಶಣ್ ಜಾಲ್ನಾ? ತ್ಯಾ ಘರಾಂತ್ಲ್ಯಾ ಬಾಯ್ಲೆಕ್ ತಿಚ್ಯಾ ಸಮಾಜೆನ್ ಗಂಬೀರ್ಪಣ್ ದಿಲಾಂ ಆನಿ ತ್ಯಾ ಗೊಟ್ಯಾಂತ್ಲ್ಯಾ ಗಾಯ್ಕ್ ಹ್ಯಾ ಸಮಾಜೆನ್ ಮೂಕ್ಪಣ್ ದಿಲಾಂ! ಮ್ಹಳ್ಯಾರ್ ಹೆ ಆಮ್ಚ್ಯಾ ಸಮಾಜೆಂತ್ಲೆ ವರ್ಗ್ ಜಾಲ್ನಾಂತ್?
ತರ್ ಹ್ಯಾ ಸಮಾಜೆಕ್ ಸಮಾಜ್ಚ್ [ಸ್ತ್ರೀ] ವಿರೋದ್? ಸ್ತ್ರೀಯೆಕ್ ಸ್ತ್ರೀಚ್ ವಿರೋಧ್? ಕಿತೆಂ ಹೆಂಚ್ ಆಮ್ಚ್ಯಾ ಆಯ್ಚಾ ಸಮಾಜೆಚೆಂ ನಾಗ್ಡೆಂ ಸತ್!?
ಗೊಟ್ಯಾಂತ್ ಪಾಡ್ಕ್ಯಾ ಗರಜ್ ನಾ
ತೊ ಮೆಲ್ಯಾರ್ ಲುಗ್ಸಾಣ್ ನಾ! [ಸ್ವಾರ್ಥ್ ರುದಾನ್]
ಚೆರ್ಕೊ ಜಾಲಾ ಘರಾಂತ್
ದಿವೊ ಕಾಳ್ಜಾಂಚೊ ಆಧಾರ್ ಫುಡಾರಾಚೊ [ಸ್ವಾರ್ಥ್ ರುದಾನ್]
ಚೆಡುಂ ಪಿಂಪ್ರ್ಯಾಕ್ ತಾಸಾಯ್ಲಾಂ
ಚೆಡ್ಯಾಕ್ ಮಾತ್ರ್ ಪೊಶೆಲಾಂ [ಗಾಂವಾರ್ ಚೆಡುಂ ನಾ]
ಎಕಾಚ್ಚ್ ಜಾತಿಚಿಂ ತೀನ್ ವಿವಿಧ್ ರುಪಾಂ! ಕವಿತೆಂಚಾ ಹ್ಯಾ ವಯ್ಲ್ಯಾ ವೊಳಿಂನಿ ಎಕಾಚ್ಚ್ ಸಮಾಜೆಚಿಂ ವಿವಿಧ್ ರುಪಾಂ ಉಟೊನ್ ದಿಸಾಂನಾಂತ್? ಘರ್ ನಾಸ್ತಾಂ ಘೊಟೊ ಜಾಯ್ನಾ. ಮನಿಸ್ ಆಪ್ಲ್ಯಾ ಫಾಯ್ದ್ಯಾ ಖಾತಿರ್ಯ್ ಗೊಟೊ ಕರ್ತಾ ಆನಿ ಆಪ್ಲ್ಯಾ ಸ್ವಾರ್ಥಾ ಖಾತಿರ್ ಗೊಟೊ ಕರ್ತಾ. ತ್ಯಾ ಗೊಟ್ಯಾಂತ್ಯ್ ತೊ ಆಪ್ಲೆಂಚ್ ಆಶೆತಾ ಜಶೆಂ ಗೊಟ್ಯಾಂತ್ ಕೆದ್ನಾಂಯ್ ಪಾಡಿಯೆಕ್ ಖಾಯ್ಸ್! ಆನಿ ಘರಾಂತ್ ಕೆದ್ನಾಂಯ್ ಚೆರ್ಕ್ಯಾಚೊ ಹರ್ಬೊಸ್! ಹೊ ತಾಚೊ ಸ್ವಾರ್ಥ್ ಜಾಲ್ಯಾರ್ ತಾಚ್ಯಾ ಗೊಟ್ಯಾಂತ್ ಪಾಡ್ಕೊ ಜಲ್ಮೊಂಚೆಂ ತಾಚ್ಯಾ ಫಾಯ್ದ್ಯಾಚೆಂ ಜಾತಾ. ಕಾರಾಣ್ ತಾಚ್ಯೆ ಥಾವ್ನ್ ತಾಕಾ ಫುಡಾರಾಕ್ ಜಾಂವ್ಚೊ ಫಾಯ್ದೊ!
ಘರಾಂತ್ ಚೆರ್ಕ್ಯಾಕ್ ಖಾಯ್ಸ್! ಚೆರ್ಕ್ಯಾಕ್ ಫುಡಾರಾಚೊ ಖಾಂಬೊ ಜಾವ್ನ್ ಉಭಾರ್ಚಿ ಆಶಾ!
ಗರ್ಬಾಂತ್ ಚೆಡ್ವಾ ಪಿಂಪ್ರ್ಯಾಕ್ ಸುವಾತ್ ನಾ! ಜಶೆಂ ಗೊಟ್ಯಾಂತ್ ಪಾಡ್ಕ್ಯಾಕ್ ಸುವಾತ್ ನಾ! ಮನ್ಶ್ಯಾ ಸ್ವಾರ್ಥಾಂತ್ ಹ್ಯಾ ದೊಗಾಂಯ್ಕ್ಯ್ ಮಾನ್ ಆನಿ ಭಿರ್ಮತ್ ನಾ.
ತರ್ ತೊ ಗೊಟೊ, ತೆಂ ಘರ್ ಆನಿ ಹೊ ಗರ್ಬ್ ಎಕಾಚ್ ಜಿವಾಚೆ ತೀನ್ ವಾಂಟೆ ಜಾಲೆ ನಾಂತ್? ಜಲ್ಮ್ ಮ್ಹಳ್ಳ್ಯಾ ಎಕಾಚ್ ಎಕಾ ಇಮಾಜೆಚಿಂ ತೀನ್ ರುಪಾಂ ಜಾಲಿಂ ನಾಂತ್? ಏಕ್ ಜಲ್ಮ್ ತೀನ್ ಸುವಾತೆಂನಿ ತೀನ್ ವಿಚಾರಾಂಕ್ ಉಗ್ಡಾಪೆಂ ಕರ್ತಾ ಮ್ಹಣ್ತಾನಾ ಹ್ಯಾ ಸಮಾಜೆಂತ್ಲೊ ಮನಿಸ್ ಕಿತ್ಲೊ ಸ್ವಾರ್ಥಿ ಮ್ಹಳ್ಳೆಂ ಅಂದಾಜ್ ಕರ್ಯೆತ್. ಗೊಟ್ಯಾಂತ್ಯ್ ಜಲ್ಮ್ ಜಾತಾ. ಘರಾಂತ್ಯ್ ಜಲ್ಮ್ ಜಾತಾ. ಗರ್ಬಾಂತ್ಯ್ ಜಲ್ಮ್ ಜಾತಾ. ತರ್ ಜಲ್ಮ್ ಮ್ಹಳ್ಳೊ ತೊ ಎಕ್ಚ್ ಮ್ಹಣೊನ್ ಜಾಲೆಂ. ಜಲ್ಮ್ ಜರ್ ಎಕ್ಚ್ ಜಾಲ್ಯಾರ್ ಹ್ಯಾ ಸಮಾಜೆಂತ್ ತ್ಯಾ ಜಲ್ಮಾ ಮಧೆಂ ಇತ್ಲೊ ಫರಕ್ ಕಸೊ? ಹ್ಯಾ ಸಮಾಜೆಂತ್ ತ್ಯಾ ಜಲ್ಮಾ ಮಧೆಂ ವಿಂಚವ್ಣ್ ಕಿತ್ಯಾಕ್?
ಘರಾಂತ್ಲ್ಯಾ ಜಲ್ಮಾಕ್ ಪಳೆಲೆಂ ತರ್,
ಹಾಂವ್ ಮೆಲಿಂ ಜಲ್ಮಾಲಿಂ...
ಕೊಣಾ ಕೊಣಾ ಖಾತಿರ್
ಮ್ಹಜೆ ಖಾತಿರ್ ತಾಚ್ಯೆ ಖಾತಿರ್.... [ಹಾಂವ್ ಮೆಲಿಂ]
ಪರ್ತ್ಯಾಕ್ ಪರ್ತ್ಯಾಕ್ ಮರಣ್ ಆನಿ ಜನನ್! ತೆಂಯ್ ಎಕಾಚ್ಚ್ ಜಲ್ಮಾಂತ್! ತ್ಯಾ ಮೆಲ್ಲ್ಯಾ ಘೊವಾಚಾ ಹರ್ಧ್ಯಾರ್, ತ್ಯಾ ಗೊಟ್ಯಾಂತ್, ತ್ಯಾ ಗರ್ಬಾಂತ್ ಆನಿ...! ಹರ್ಯೆಕಾ ಜಲ್ಮಾಕ್ ಏಕ್ ಮರಣ್ ಆಸಾ. ಪುಣ್ ಜಲ್ಮ್ ಕಿತ್ಲ್ಯಾ ಸಂತೊಸಾಸೊಗೀ ತಿತ್ಲ್ಯಾಚ್ ದುಖಾಚೆಂ ಮರಣ್! ಜಲ್ಮೊನ್ ಮೊರ್ಚೆಂ ಸ್ವಾಭಾವೀಕ್ ಜಾಲ್ಯಾರ್ ಮೊರೊನ್ ಮೊರೊನ್ ಪರ್ತ್ಯಾಕ್ ಜಲ್ಮೊಂಚೆಂ ಎಕಾಚ್ಚ್ ಜಿವಿತಾಚ್ಯಾ ವಾಂಟ್ಯಾಂಕ್ ದೊಳ್ಯಾಂ ಫುಡೆಂ ಹಾಡ್ತಾ. ಹ್ಯಾ ಮೊರೊನ್ ಜಿಯೆಂವ್ಚ್ಯಾ ಜಿವಿತಾಕ್ ಪಳೆಂವ್ಚೆಂ ತರ್,
ಪಳೆಯಾ ಪುತಾ ಬಾಪ್ ತುಮ್ಚೊ ನಿದೊನ್ ಆಯ್ಲಾ
ಕಿತ್ಯಾಕ್ ಪುತಾ ತಾಣಿಂ ತಾಕಾ ವಾವವ್ನ್ ಹಾಡ್ಲಾ! [ದಾತಾರ್]
ದಿಸಾಂದೀಸ್ ಜಲ್ಮೊನ್ ಮೊರ್ಚೆಂ ಏಕ್ ದರ್ಶನ್! ಹ್ಯಾ ಘಡಿಯೆರ್ ತಿ ಆವಯ್ ಕಿತ್ಲೆ ಪಾವ್ಟಿಂ ತಿಚ್ಯಾ ಭುರ್ಗ್ಯಾಂಚ್ಯಾ ದೊಳ್ಯಾಂ ಮುಕಾರ್ ಮೊರ್ತಾ ಆನಿ ತ್ಯಾ ತಿಚ್ಯಾ ಭುರ್ಗ್ಯಾಂಚಾ ದೊಳ್ಯಾಂನಿ ಜಲ್ಮಾತಾ ಮ್ಹಳ್ಳೆಂ ಆಮ್ಚ್ಯಾ ಸಮಾಜೆಂತ್ಲೆಂ ಕೊಡು ಸತ್! ಹೆಂ ತಿಕಾ ತಿಚ್ಯಾ ಜಲ್ಮಾನ್ ಭಾಸಾಯಿಲ್ಲೆಂ ವರದಾನ್? ವಾ ತಿಚ್ಯಾ ಜಲ್ಮಾನ್ ತಿಕಾ ದಿಲ್ಲೆಂ ಮಿಸಾಂವ್?
ರಾಣ್ಯೆಚಾ ಪಾಟಾರ್ ಸೊಭ್ಲ್ಲೆಂ
ಪರ್ಜಳಿಕ್ ವಿಲೂದ್ ಆಂಗ್ಲೆಂ
ಚೊರಿಯೆಚಾ ಅರೊಪಾರ್
ಭಂದಿತ್ ಜಾವ್ನ್ ಜೈಲಾಕ್ ಗೆಲೆಂ [ಆಂಗ್ಲೆಂ]
ಎಕಾ ಕುಶಿಕ್ ರಾಣಿಯೆಚೊ ಪಾಟ್ ದುಸ್ರ್ಯಾ ಕುಶಿಕ್ ಗೊಟೊ! ಎಕಾ ಕುಶಿಕ್ ಪರ್ಜಳಿತ್ ಆಂಗ್ಲೆಂ ದುಸ್ರ್ಯಾ ಕುಶಿಕ್ ತೆಂ ಚೆಡುಂ ಪಿಂಪ್ರೆಂ! ಎಕಾ ಕುಶಿಕ್ ಅರೋಪ್ ಚೊರಿಯೆಚೊ ತರ್ ದುಸ್ರ್ಯಾ ಕುಶಿಕ್ ಚೂಕ್ ಆಪ್ಣೆ ಘೆತ್ಲ್ಲ್ಯಾ ಜಲ್ಮಾಚಿ! ಹಾಚೊ ಪ್ರತಿಫಳ್ ಜಾವ್ನ್ ಮೆಳ್ಚೆಂ ಜಯ್ಲ್! ಜಯ್ಲಾಂತ್ ಕಯ್ದ್!
ಹೆಂ ಫಕತ್ತ್ ಎಕಾ ಆಂಗ್ಲ್ಯಾಚೆಂ ಜಿವಿತ್? ಆಂಗ್ಲ್ಯಾಚಾ ಜಿವಿತಾ ಪಾಟ್ಲ್ಯಾನ್ ತ್ಯಾ ಆಂಗ್ಲ್ಯಾ ಭಿತರ್ಲೊ ಜೀವ್ ಕಿತ್ಲೊ ಕಯ್ದ್ ಮ್ಹಳ್ಳೆ ತೆಂ ಉಗ್ತ್ಯಾನ್ ಪಾಚಾರ್ಚೆಂ ಪ್ರಯತ್ನ್!
ಹಾವೆಂ ವೋಟ್ ದಿಲ್ಲ್ಯಾಕ್
ಮ್ಹಾಕಾ ತಾಣೆ ಸೊರೊ ದಿಲಾ
ಮ್ಹಜ್ಯಾ ವೊಟಾನ್ ತೊ
ಜಿಕೊನ್ ಮಂತ್ರಿ ಜಾಲಾ [ಗಡಂಗಾಕ್ ಆಜ್ ರಜಾ]
ವೋಟ್ ಮ್ಹಳ್ಳ್ಯಾ ಇಮಾಜೆಂತ್ ಕಿತ್ಲಿಂ ಸತಾಂ ಆಟಾಪಿಲ್ಲಿಂ ನಾಂತ್? ಹ್ಯಾ ಸತಾಂಕ್ ವರ್ಣನ್ ಕರ್ಚಿ ಗರ್ಜ್ ಖಂಡಿತ್ ನಾ. ಜೆದ್ನಾಂ ಪಾಸೊನ್ ಆಪ್ಣಾಚೊ ವೋಟ್ ಆಪ್ಣಾಚಾ ಹಾತಿಂ ಭದ್ರ್ ಆಸಾ ತೆದ್ನಾಂ ವರೇಗ್ ಆಪ್ಣಾಕ್ ಮಾನ್. ಹ್ಯಾ ಮಾನಾಕ್ ಆನಿ ಮರ್ಯಾದಿಕ್ ಸಮರ್ಪಿಲ್ಲ್ಯಾಕ್ ಮೆಳ್ಚೆಂ ಇನಾಮ್ ತರ್ಯ್ ಫಕತ್ತ್ ಥೊಡೆಂ ಆಮಾಲ್. ಹೆಂ ಆಮಾಲ್ ಕಸಲ್ಯಾಯ್ ರುಪಾನ್ ಆಸ್ಯೆತ್. ಆಪ್ಲ್ಯಾ ಮಾನಾ ಥಾವ್ನ್ ತೊ ಮಾನ್ ಘೆತ್ಲ್ಲೊ ಜಿಕ್ತಾ ಮ್ಹಳ್ಯಾರ್ ಹೆಂ ಚಲಿಯೆಚ್ಯಾ ಜಿವಿತಾಂತ್ಲೆಂ ನಿಜಾಯ್ಕ್ಯ್ ಲಾಚಾರ್ ಸತ್. ಆಪ್ಣಾಚೊ ಮಾನ್ ಘೆವ್ನ್ ತೊ ಜಿಕ್ತಾ ಆನಿ ತೊ ಮಂತ್ರಿ ಜಾತಾ. ಆಪ್ಣೆ ಜಿಕೊಂಕ್ ಕಾರಾಣ್ ಜಾಲ್ಲ್ಯಾ ಮಾನಾಚೆರ್ಚ್ ರಾಜ್ವಟ್ ಚಲಂವ್ಚ್ಯಾ ಖಾತಿರ್!
ಹ್ಯಾ ಕವಿತಾ ಜಮ್ಯಾ ಥಾವ್ನ್ ಎದೊಳ್ಚ್ ಸಮ್ಜೊನ್ ಘೆತ್ಲ್ಲ್ಯಾ ಪರ್ಮಾಣೆಂ ಹ್ಯಾ ಕವಿತಾ ಜಮ್ಯಾಂತ್ ಸ್ತ್ರೀ ಸಂವೇದನಾತ್ಮಕ್ ವಿಚಾರ್ ಉಟೊನ್ ರಾವ್ಲ್ಯಾತ್. ಜಾಂವ್ ತೆಂ ದಿಸಾಂದೀಸ್ ಜಲ್ಮೊನ್ ಮೊರ್ಚೆಂ ಚಲಿ, ಜಾಂವ್ ತ್ಯಾ ಗೊಟ್ಯಾಂತ್ಲಿ ಗಾಯ್, ಜಾಂವ್ ತೆಂ ಆಪ್ಲ್ಯಾ ಕಾಳ್ಜಾಂತ್ಲ್ಯಾ ಯಾದಿಂಕ್ ಉಡಾಸ್ ಕಾಡುನ್ ಅತ್ರೆಗಾನ್ ಪಾವ್ಸಾಕ್ ರಾಕೊನ್ ರಾವ್ಲ್ಲೆಂ ಚಲಿ....!
ಖಂಯ್ಚ್ಯಾಯ್ ವಾಟೆನ್ ಪಳೆಲ್ಯಾರ್ಯೀ ಹಾಂಗಾಸರ್ ತ್ಯಾ ಕಾಳ್ಜಾಚಾ ಉಜ್ಯಾಕ್ ಥಂಡ್ ಕರ್ಚ್ಯಾ ಪಾವ್ಸಾಚಿ ರಾಕೊಣ್ ಆಸ್ಲ್ಲಿ ಸ್ಪಶ್ಟ್ ಕಳ್ತಾ. ಹಾಂಗಾಸರ್ ರಾಕೊನ್ ಆಸಾ.. ಮಾಗ್ಣೆಂ ಆಸಾ... ಲಿಸಾಂವ್ ಆಸಾ... ಸವಾಲಾಂ ಆಸಾತ್... ಕ್ರಾಂತಿ ಆಸಾ!
ತಾಂಚ್ಯಾ ಘರಾಂತ್ ಸುರ್ಯೊ ಉದೆಲಾ
ತರ್! ಹಾಂಗಾ ಕಿತ್ಯಾಕ್ ತೊ ಮೆಲಾ! [ಸ್ವಾರ್ಥ್ ರುದಾನ್]
ಹ್ಯಾ ದೊನ್ಚ್ ವೊಳಿನಿಂ ಕಿತ್ಲೆಂ ವಿಚಾರಾಂಚೆಂ ಚಿಂತಾಪ್ ಆಸಾ ಪಳೆಯಾ. ಹಾಂಗಾಸರ್ ಎಕ್ಲ್ಯಾಚಾ ಘರಾಂತ್ ಸುರ್ಯೊ ಉದೆತಾನಾ ಎಕ್ಲ್ಯಾಚಾ ಘರಾಂತ್ ಅಂದ್ಕಾರ್! ಹೊ ಅಂದ್ಕಾರ್ ಕಿತ್ಯಾಕ್ ಆನಿ ಕಸೊ? ಹ್ಯಾ ವಿಶಯಾಕ್ ಹ್ಯಾ ಪಯ್ಲೆಂ ಆಮಿ ಪಳೆಲಾಂ ಆಸ್ತಾಂ ಹಾಂಗಾಸರ್ ತ್ಯಾ ಗಾಯ್ನ್ ಉಟಂವ್ಚೆಂ ಸವಾಲ್ ಪ್ರಾಮುಖ್ಯ್ ಜಾತಾ. ಎಕಾ ಮೂಕ್ ಗಾಯ್ಚೆಂ ಏಕ್ ಕ್ರಾಂತಿಕ್ ಜಾಗಂವ್ಚೆಂ ಸವಾಲ್. ಅಸಲಿಂ ಸಭಾರ್ ಸವಾಲಾಂ ಹ್ಯಾ ಕವಿತಾ ಜಮ್ಯಾಂತ್ ಝಳ್ಕಾತಾತ್. ಹ್ಯಾ ಸವಾಲಾಂಕ್ ಹಿ ವಾಸ್ತವೀಕ್ ಸಮಾಜ್ ಕಿತ್ಲಿ ಜವಾಬ್ ದೀಂವ್ಕ್ ಸಕ್ತಾ ಮ್ಹಳ್ಳೆಂ ತೆಂ ಮ್ಹಜೆಂ ಸವಾಲ್. ಕಿತ್ಯಾಕ್ ಮ್ಹಳ್ಯಾರ್ ಹಿ ವಾಸ್ತವೀಕ್ ಸಮಾಜ್, ವಾಟೆರ್ ಪಡ್ಲ್ಲ್ಯಾಕ್ ಪಳೆವ್ನ್ ಚುರ್ಚುರ್ತಾ ಶಿವಾಯ್ ತಾಕಾ ಹಾತ್ ದೀವ್ನ್ ಉಕ್ಲುಂಕ್ ತಿ ತಯಾರ್ ಆಸಾನಾ.
ಸ್ತ್ರೀಯೆಕ್ ಆಜ್ ಆಮ್ಚ್ಯಾ ಸಮಾಜೆಂತ್ ಮಾನ್ ಆಸಾ ಮ್ಹಣೊನ್ ಆಮಿಂ ಉಗ್ತ್ಯಾನ್ ಪಾಚಾರ್ತಾಂವ್. ಪುಣ್ ಹೊ ಮಾನ್ ತಿಕಾ ಕಿತ್ಲೊ ಮೆಳ್ತಾ? ಆಮ್ಚೆ ಭಂವಾರಿ ಚಲಿ ಆಜ್ ಕಿತ್ಲಿ ಸುರಕ್ಶಿತ್ ಆಸಾ? ತಿಚೊ ಜಲ್ಮ್ ತಿಕಾ ಕಿತ್ಲೊ ಫಾಯ್ದ್ಯಾಚೊ ಜಾತಾ? ಹ್ಯಾ ಸವಾಲಾಂಕ್ ಜಾಪಿ ಸೊದ್ಚೆಂ ಪ್ರಯತ್ನ್ ಕವಿಯತ್ರಿನ್ ಹಾಂಗಾಸರ್ ಖೂಬ್ ಕೆಲಾಂ. ತ್ಯಾ ಪಾರಂಪರಿಕ್ ರೀತ್ ರಿವಾಜೆ ಥಾವ್ನ್ ಆಯ್ಚಾ ನವ್ಯಾಸಾಂವಾಂ ಪಾಸೊನ್ ಚಲಿಯೆಚಾ ಜಿವಿತಾಕ್ ಹ್ಯಾ ಸಮಾಜೆಚ್ಯಾ ದೊಳ್ಯಾಂ ಮುಕಾರ್ ದವರ್ಚೆಂ ಪ್ರಯತ್ನ್ ಹ್ಯಾ ಕವಿತಾ ಜಮ್ಯಾಂತ್ ಜಾಲಾಂ.
ಭಾಶೆಚೊ ಮೋಗ್, ದೇಶಾಚಿ ಪರಿಸ್ಥಿತಿ, ರಾಜಕೀಯ್ ಅವ್ಯವಸ್ಥಾಚಾ ವಿಚಾರಾಂಕ್ ಹ್ಯಾ ಕವಿತಾ ಜಮ್ಯಾಂತ್ ವಾಚುಂಕ್ ಮೆಳಾನಾಸ್ತಾನಾ ವಚಾನಾ.
ಆಳ್ಶಿ ಭಿಕಾರ್ಯಾಕ್ ದಿಂವ್ಚೆಂ ಲಿಸಾಂವ್ ನಿಜಾಯ್ಕ್ಯ್ ಮಾಂದುನ್ ಘೆಂವ್ಚೆಂ ತಸಲೆಂ ಜಾಲ್ಯಾರ್ ತ್ಯಾ ಬಾಳ್ ಕಲ್ಲುಕುಟ್ಟಿಕ್ ದಿಂವ್ಚ್ಯಾ ಲಿಸಾಂವಾಂತ್ ಭಳ್ ನಾತ್ಲ್ಲ್ಯಾಪರಿಂ ಜಾಲಾಂ. ಜಶೆಂ
ಸಭಾರ್ ಸ್ತ್ರೀಯೆಂಚ್ಯಾ ಸಮಾನತೆಕ್
ತಾಳೊ ಬಿಗ್ದಿಲ್ಲೊ ದಾದ್ಲೊ
ಘರಾ ಯೆತಚ್ಚ್
ಶಿತಾಕ್ ಮೀಟ್ ನಾ
ನಿಸ್ತ್ಯಾಕ್ ರೂಚ್ ನಾ
ತೆಂ ಸಮಾ ನಾ
ಹೆಂ ಸಾರ್ಕೆಂ ನಾ
ಬಾಯ್ಲೆಕ್ ಸ್ತ್ರೀ ಸಂತತೆಕ್
ಯೆಟುಂಕ್ ಲಾಗ್ಲೊ. [ಸಮಾನತಾ]
ಹ್ಯಾ ಸಮಾನತೆಕ್ ಏಕ್ ಸ್ತ್ರೀ ಆಪ್ಲ್ಯಾ ಸಮಾಜೆಂತ್ ಆಶೆತಾನಾ ಹ್ಯಾ ಕಲ್ಲುಕುಟ್ಟಿಕ್ ತ್ಯಾ ವಿಚಾರಾಂ ಥಾವ್ನ್ ಕಿತ್ಯಾಕ್ ವಂಚಿತ್ ಕೆಲಾಂ? ಸಮಾಜೆಂತ್ ಸಮಾನತಾ ನಾಸ್ತಾನಾ ಬದ್ಲಾವಣ್ ಖಂಯ್ಚ್ಯಾಯ್ ಹಂತಾರ್ ಸಾದ್ಯ್ ನಾ. ಆಶೆಂ ಆಸ್ತಾನಾ ಫಕತ್ತ್ ಹಾಂಗಾ ಶೆರ್ಮಾಂವ್ ಕಾಂಯ್ ಕರುಂಕ್ ಸಕಾನಾ. ಆಶೆಂ ಮ್ಹಣ್ತಾನಾ ಹ್ಯಾ ವಿಚಾರಾಕ್ ಹ್ಯಾ ಕವಿಯತ್ರಿನ್ ಜಾಗಂವ್ಕ್ ನಾ ಮ್ಹಣೊನ್ ನಾ. ಪುಣ್ ಹೊ ವಿಚಾರ್ ಫಕತ್ತ್ ದಾದ್ಲ್ಯಾ ಬಾಯ್ಲೆ ಮಧ್ಲ್ಯಾ ಸಂಭಂಧಾಕ್ ಮಾತ್ರ್ ಸೀಮಿತ್ ಜಾಂವ್ಕ್ ನಜೊ. ಸಮಾಜೆಂತ್ ಸಮಾನತಾ ಮ್ಹಣ್ಚಿ ತಿ ಸಗ್ಳ್ಯಾ ವಾಂಟ್ಯಾನಿ ಮಹತ್ವಾಚೊ ಪಾತ್ರ್ ಖೆಳ್ತಾ.
ಹ್ಯಾ ಕವಿತಾ ಜಮ್ಯಾಂತ್ ಆಶಾ ಆಸಾ, ವಿಚಾರ್ ಆಸಾತ್, ಖಂತಿ ಆಸಾತ್, ದೂಖ್ ಆಸಾ, ರುದಾನ್ ಆಸಾ, ಹುಸ್ಕೊ ಆಸಾ, ಜಾಲ್ಯಾರ್ಯ್ ಚಡಾವತ್ ಕವಿತೆನಿಂ ಭರ್ವಸೊ ಝಳ್ಕಾತಾ. ಹಾಂಗಾಚರ್ ನಿರಾಸ್ ವಾ ಪಲಾಯನ್ ದಿಸೊನ್ ಯೇನಾ. ಹೆಂ ಹ್ಯಾ ಕವಿಯತ್ರಿಚಾ ಕವಿತೆಂಚೆಂ ವೈಶಿಶ್ಟ್. ಸಲ್ವಣೆಕ್ ಮಾಂದುನ್ ಘೆಂವ್ಕ್ ತಿ ಕಬೂಲ್ ಜಾಯ್ನಾಸ್ತಾನಾ ಆಪ್ಲ್ಯಾ ಸಲ್ವಣೆಕ್ ಕಾರಾಣ್ ಜಾಲ್ಲ್ಯಾ ಹ್ಯಾ ದಾದ್ಲ್ಯಾ ರಾಜ್ವಟ್ಕಾಯೆಚಾ ಸಮಾಜೆ ವಯ್ರ್, ತಾಚ್ಯಾ ವಿಚಾರಾಂ ವಯ್ರ್, ಪಾರಂಪರಿಕ್ ರಿತಿ ರಿವಾಜಿಂ ವಯ್ರ್, ಆಧುನಿಕ್ ನವ್ಯಾಸಾಂವಾ ವಯ್ರ್ ಉಟಂವ್ಚಿಂ ಸವಾಲಾಂ ನಿಜಾಯ್ಕ್ಯ್ ಹ್ಯಾ ಸ್ತ್ರೀ ಸಂವೇದನ್ ವಿಚಾರಾಂಚೆಂ ಭಳ್.
ಜಿಯೆಂವ್ಕ್ ಜಾಯ್
ಜಿಯೆಂವ್ಕ್ ಶಿಕೊಂಕ್ ಜಾಯ್
ಮ್ಹಳ್ಳ್ಯಾ ಆಶೆನ್ ಭರ್ವಶ್ಯಾನ್ಚ್
ವಾಂಚೊನ್ ಉರ್ಲ್ಲಿಂ ಹಾಂವ್ [ಜಿಯೆಂವ್ಚ್ಯಾ ಭರ್ವಸ್ಯಾನ್]
ಆಶಾವಾದ್! ಸ್ಪಶ್ಟ್ ಆಶಾವಾದ್! ಆಪ್ಣೆ ಝುಜ್ ಮಾಂಡ್ಲ್ಲ್ಯಾ ಹ್ಯಾ ಸಮಾಜೆ ವಯ್ರ್ ಹ್ಯಾ ಸಮಾಜೆಚ್ಯಾ ವಿಚಾರಾಂ ವಯ್ರ್ ಝುಜೊನ್ ಆಪ್ಣೆ ಜಿಯೆಂವ್ಕ್ ಶಿಕೊಂಕ್ ಜಾಯ್ ಮ್ಹಳ್ಳೊ ಆಶಾವಾದ್! ಹಾಂಗಾಚರ್ ಪೊಳಾಪಳ್ ಯಾ ನಿರಾಶೆಂತ್ ದುಃಖಾಂ ಗಳವ್ನ್ ರುದಾನ್ ಕರ್ಚೆಂ ವಾ ಸಲ್ವಣೆಂತ್ ದೆವಾ ಮುಕಾರ್ ಸರ್ಪಡೊನ್ ಮರ್ಣಾಕ್ ಆಪವ್ಣೆ ನಾ. ಹೆಂ ನಿಜಾಯ್ಕ್ಯ್ ಹ್ಯಾ ಕವಿತಾ ಜಮ್ಯಾಂತ್ಲೆಂ ದುಸ್ರೆಂ ವೈಶಿಶ್ಟ್! ಆಪ್ಲ್ಯಾ ಸಾಮಾಜಿಕ್ ಸಂಭಂಧಾಕ್ ಆನಿ ಆಪ್ಲ್ಯಾ ಖಾಸ್ಗಿ ಸಂಭಂಧಾಕ್ ಖಂಯ್ಚರ್ಯ್ ಸಾಂಗಾತಾ ಹಾಡುಂಕ್ ಪ್ರಯತ್ನ್ ಕೆಲ್ಲೆಂ ಹಾಂಗಾಸರ್ ಝಳ್ಕಾನಾ.
ಗರ್ಬ್ಪಾತಾಚ್ಯಾ ವಿಚಾರಾಂಕ್ ಹ್ಯಾ ಕವಿತಾ ಜಮ್ಯಾಂತ್ ಬರೆಂಚ್ ಉಗ್ಡಾಪೆಂ ಕೆಲಾಂ. ತ್ಯಾ ಶಿವಾಯ್ ಬ್ರೂಣ್ ತಪಾಸ್ಣೆ ವಯ್ರ್ ಆವಾಜ್ ಉಟಯ್ಲಾ ಆಸ್ತಾಂ ಚಲಿಯೆ ಬ್ರೂಣಾಕ್ ನಾಸ್ ಕರ್ಚ್ಯಾ ಆಣ್ವ್ಯಾ ವಿಚಾರಾವಯ್ರ್ ಹಾಂಗಾಸರ್ ಹ್ಯಾ ಕವಿಯತ್ರಿನ್ ಕಮರ್ ಬಾಂದ್ಲ್ಲ್ಯಾ ಪರಿಂ ದಿಸ್ತಾ. ಹ್ಯಾ ಖಾತಿರ್ ತಿ ಸ್ತ್ರೀಯೆಕ್ಚ್ ದುಸ್ಮಾನ್ ಜಾವ್ನ್ ವಿಂಚುಂಕ್ಯ್ ಪಾಟಿಂ ಸರಾನಾ. ಹೆಂ ಹ್ಯಾ ಕವಿಯತ್ರಿಚಾ ಸಮಾನತಾ ವಿಚಾರಾಕ್ ಧರ್ಲಲೊ ಆರ್ಸೊ.
ಸ್ತ್ರೀ-ಸ್ತ್ರೀಯೆಚೊ ದುಸ್ಮಾನ್
ಸ್ತ್ರೀ-ಸ್ತ್ರೀ ಕುಸ್ವ್ಯಾಚೊ ದುಸ್ಮಾನ್
ಆನಿ ತವಳ್ ಬೋವ್ಶಾ
ದಾದ್ಲ್ಯಾನ್ಚ್ ಭರ್ಚೊ ಪಡ್ತಲೊ
ಆಪ್ಲೊ ಕಡ್ವಳ್! [ಸ್ತ್ರೀ-ದುಸ್ಮಾನ್]
ಹ್ಯಾ ಕವಿತಾ ಜಮ್ಯಾಂತ್ಲ್ಯಾ ಕವಿತಾಂಕ್ ವ್ಹಾಳಯಿಲ್ಯಾ ಶೈಲಿಚೆರ್ ಸುದ್ರಾಪ್ ಖಂಡಿತ್ ಸಾದ್ಯ್ ಜಾತೊ. ಥೊಡ್ಯಾ ವಿಚಾರಾಂನಿ ಕವಿಯತ್ರಿ ಥೊಡೆಂ ಆಮ್ಸೊರ್ಲ್ಲೆಂ ದಿಸೊನ್ ಯೆತಾ. ವಿಚಾರ್ ಪ್ರಭಲ್ ಆಸ್ಲ್ಯಾರ್ಯ್ ತ್ಯಾ ವಿಚಾರಾಕ್ ವ್ಹಾಳಯಿಲ್ಲ್ಯಾ ರಿತಿಕ್ ಖಂಯ್ಚರ್ಯೀ ಸದಿಳ್ ಸೊಡ್ಲೆಂ ಜಾಲ್ಯಾರ್ ಕಿತ್ಲೆಂ ಪ್ರಭಲ್ ವಿಚಾರಾಂಚೆಂ ಕವಿತಾ ಪಾಸೊನ್ ಆಪ್ಲ್ಯಾ ವಿಚಾರಾಂಚಾ ಗ್ರೇಸ್ತ್ಕಾಯೆಕ್ ಹೊಗ್ಡಾಯ್ತಾ. ಕವಿತಾ ವಾಚ್ಪ್ಯಾಕ್ ಸುಲಾಭಾಯೆನ್ ಸಮ್ಜೊಂಕ್ ಜಾಯ್ ಮ್ಹಳ್ಳ್ಯಾ ವಿಚಾರಾನ್ ಕವಿತೆಂಕ್ ಲಾಂಭಂವ್ಚೆಂ ವಾ ಸಂಕೀರ್ಣಾತಾಕ್ ಅಜಾಗರುಕತ್ ಕರ್ಚೆಂ ಖಂಡಿತ್ ದುಃಖ್ದಾಯಕ್. ಕವಿತೆನ್ ವಾಚ್ಪ್ಯಾಕ್ ಸಮ್ಜೊಂಚೆಂ ನ್ಹಂಯ್. ವಾಚ್ಪ್ಯಾನ್ ಕವಿತೆಕ್ ಸಮ್ಜೊಂಕ್ ಜಾಯ್! ಹ್ಯಾ ದಿಶೆನ್ ಥೊಡೆಂ ಪ್ರಯತ್ನ್ ಚಲಂವ್ಕ್ ಜಾಯ್. [ಹೊ ಮ್ಹಜೊ ವಿಚಾರ್. ಹೆಂ ಸೂಚನ್ ನ್ಹಂಯ್!]
ಹ್ಯಾ ಜಮ್ಯಾಂತ್ ಉಟಯಿಲ್ಲಿ ವಿಚಾರಾಂಚಿ ಕ್ರಾಂತಿ ಹ್ಯಾ ಸಮಾಜೆನ್ ನಿಜಾಯ್ಕ್ಯ್ ಚಿಂತುನ್ ಆಟಂವ್ಕ್ ಜಾಯ್ ಜಾಲ್ಲಿ. ಪ್ರತ್ಯೇಕ್ ಜಾವ್ನ್ ಎಕಾ ಸ್ತ್ರೀ ಲೇಖಕಿ ಥಾವ್ನ್ ತಿಚ್ಯಾ ಜಲ್ಮಾ ಗೂಣಾಚಾ ಸ್ವಭಾವಾಕ್ [ಸ್ತ್ರೀ ಸ್ವಭಾವಾಕ್] ಪಯ್ಸ್ ಲೊಟುನ್ ಸಮಾಜೆ ಮುಕಾರ್ ತಿ ಫಕತ್ತ್ ರುದಾನ್ ಕರ್ಚಿ ಅಭಲ್ ಸ್ತ್ರೀ ಜಾಯ್ನಾಸ್ತಾನಾ ಧಯ್ರಾಧೀಕ್ ಜಾವ್ನ್, ಆಶಾವಾದಿ ಜಾವ್ನ್, ಕ್ರಾಂತಿಕಾರಿ ಜಾವ್ನ್, ದಿಸೊನ್ ಆಯಿಲ್ಲೆಂ ನಿಜಾಯ್ಕ್ಯ್ ಹ್ಯಾ ಸಮಾಜೆಚಿ ಉದರ್ಗತ್ ಸಾದ್ಯ್ ಮ್ಹಳ್ಳೆಂ ಸ್ಪಶ್ಟ್ ಕರ್ತಾ. ಹ್ಯಾ ತಿಚ್ಯಾ ಬದ್ಲಾವಣೆಕ್ [ಪರಿವರ್ತನೆಕ್] ಹಿ ತಿಚಿ ಸಮಾಜ್ ಭಿವ್ಕುರಿ ಜಾಯ್ನಾಸ್ತಾನಾ ತಿಕಾ ಸಾಂಗಾತ್ ದೀಂವ್ಕ್ ಫುಡೆಂ ಸರ್ತೆಲಿ ಮ್ಹಳ್ಳೊ ಆಶಯ್ ಉಬ್ಜಾಯ್ತಾ.
ಪುಸ್ತಕಾಚಾ ಛಾಪ್ಯಾ ವಿಶಿಂ ಸಾಂಗ್ಚೆಂ ತರ್ ಮಸ್ತ್ ಪ್ರಯತ್ನ್ ಕೆಲ್ಲೆಂ ಸಾರ್ಕೆಂ ಝಳ್ಕಾತಾ.
ಪುಸ್ತಕಾಚಾ ನೆಮಾಳ್ಯಾ ಪರಿಂ ಪುಸ್ತಕಾಚೆಂ ಕವರ್ ಡಿಸೈನ್ ಜಾಲಾಂ ಜಾಲ್ಯಾರ್ಯ್ ಪುಸ್ತಕಾ ಭಿತರ್ಲ್ಯಾ ವಿಚಾರಾಂಕ್ ತೆಂ ಕವರ್ ಡಿಸೈನ್ ಜೆರಾಲ್ ರಿತಿನ್ ಸಂಭಂಧ್ ಜೊಡಿನಾಸ್ತಾನಾ ತ್ಯಾ ವಿಚಾರಾಂಚಾ ಎಕಾ ಮುಖಾಕ್ ಮಾತ್ರ್ ದಾಕಂವ್ಚ್ಯಾತ್ ಯಶಸ್ವಿ ಜಾಲಾಂ. ಜಶೆಂ ಪಾರಂಪರಿಕ್ ಮ್ಹಳ್ಳ್ಯಾ ಪರಿಂ. ಹ್ಯಾ ಪಾರಂಪರಿಕ್ಪಣಾಕ್ ಫುಡಾರಾಂತ್ ನವ್ಯಾಸಾಂವಾ ತೆವ್ಶಿಂ ಬದ್ಲಾವಣ್ ಜಾವ್ನ್ ಘೆಂವ್ಚಿ ಬೋವ್ಶ್ಯಾ ಕೊಂಕ್ಣಿ ಸಾಹಿತ್ಯಾಚಾ ಉದರ್ಗತೆಕ್ ಚಡ್ ಗರ್ಜ್ [ಹಿ ಸಲ್ಹಾ ಭಿಲ್ಕುಲ್ ನ್ಹಂಯ್].
ಲೇಖಕಿನ್ ಕೊಂಕ್ಣಿ ಸಾಹಿತ್ಯಾಂತ್ ಜರಯಿಲ್ಲ್ಯಾ ತಿಚ್ಯಾ ಅನಿಭವ ಮುಕಾರ್ ಹೊ ಕವಿತಾ ಜಮೊ ಪಾವೊಂಕ್ ಜಾಯ್ ಜಾಲ್ಲ್ಯಾ ಪಾಂವ್ಡ್ಯಾಕ್ ಪಾಂವೊಂಕ್ ನಾ. ಹ್ಯಾ ಜಮ್ಯಾಂತ್ ಉಟಯಿಲ್ಲೆ ವಿಚಾರ್ ನಿಜಾಯ್ಕ್ಯ್ ಪ್ರಶಂಸೆಕ್ ಪಾತ್ರ್ ಜಾಯ್ ಜಾಲ್ಲೆಚ್ ಜಾಲ್ಯಾರ್ಯ್ ಲೆಖಕಿಚ್ಯಾ ಸಾಹಿತ್ಯಾಚಾ ತಿಚ್ಯಾ ಅನ್ಭೊಗಾ ಮುಕಾರ್ ಕವಿತೆಂಚಾ ವ್ಹಾಳ್ಯಾಂತ್ ಆನಿ ಅಲಂಕಾರಾಂತ್ ತೊ ಆನ್ಭೋಗ್ ದಿಸೊನ್ ಯೇನಾ. ಪುಣ್ ವಿಚಾರಾಂತ್ ನಿರಾಶಾ ಝಳ್ಕಾನಾ.
ಹ್ಯಾ ಕವಿತಾ ಜಮ್ಯಾಕ್ ದೆ| ಚಾ. ಫ್ರಾ. ದೆ’ಕೋಸ್ತಾ ಕ್ ಅರ್ಪಣ್ ಕರುನ್ ಹ್ಯಾ ಕವಿತಾ ಜಮ್ಯಾಚಾ ಲೇಖಕಿನ್ ಕೊಂಕ್ಣೆಚ್ಯಾ ಎಕಾ ಮಹಾನ್ ಕವಿಕ್ ಮಾನ್ ಕೆಲ್ಲೊ ನಿಜಾಯ್ಕ್ಯ್ ಗೌರವಾಚೊ.
ಕೊಂಕ್ಣಿ ಕವಿತಾ ಸಂಸಾರಾಂತ್ ಸ್ತ್ರೀ ಸಂವೇದನ್ ವಿಚಾರಾಂಚೊ ಬರ್ಗಾಲ್ ಪಡ್ಲಾ ಆಸ್ತಾಂ ಹ್ಯಾ ಕವಿತಾ ಜಮ್ಯಾಂತ್ ಹ್ಯಾ ವಿಚಾರಾಂಕ್ ವ್ಹಾಳಯಿಲ್ಲ್ಯಾ ಮಾನೆಸ್ತಿಣ್ ಗ್ಲೇಡಿಸ್ ರೇಗೊ ಹಿಕಾ ಫುಡಾರಾಕ್ ತಿಚ್ಯಾ ಸಾಹಿತ್ಯಾಚಾ ವಾಟೆರ್ ಸರ್ವ್ ಬರೆಂ ಮಾಗ್ತಾಂ ಆನಿ ಫುಡಾರಾಕ್ ಹ್ಯಾ ಲೇಖಕಿ ಥಾವ್ನ್ ಕೊಂಕ್ಣೆಕ್ ಆನಿಕ್ಯ್ ಬರೆಂ ಆಶೆತಾಂ.
ದೇವ್ ಬರೆಂ ಕರುಂ.
ಮೆಲ್ವಿನ್ ಜೆ. ವಾಸ್.
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
