"ತುಜ್ಯಾ ತಕ್ಲೆಕ್ ಆನಿ ತುಜ್ಯಾ ಕಾಳ್ಜಾಕ್ ಸಾರ್ಕ್ಯಾ ದಿಶೆಂತ್ ದವರ್ಶಿ ತರ್, ತುಕಾ ತುಜಾ ಪಾಂಯಾಂಚಿ ಖಂತ್ ಕರ್ಚಿ ಗರ್ಜ್ ನಾ"
ಕಾಳ್ಜಾಂನಿ ನಾಂವಾಂ ಖಂಚ್ಲಿಂ
ವರಸ್ : 2005
ಮಯ್ನೊ : ನವೆಂಬರ್
ಮನ್ಶಾಜಿಣ್ಯೆಂತ್ ಸಭಾರ್ ಹಂತಾಂ (Stages) ಆಸಾತ್, ಜೊ ಕೊಣ್ ಎಕೆಕಾ ಹಂತಾಂನಿ ಮುಕಾರ್ ಚಲೊಂಕ್ ಸಕಾನಾ ತೊ ಎಕಾಚ್ಚ್ ಹಂತಾರ್ ಜೀಣ್ಭರ್ ಆಸ್ತಾ, ಜೊ ಕೊಣ್ ಹ್ಯಾ ಹಂತಾಂನಿ ಮುಕಾರ್ ಪಾವ್ಲಾಂ ಕಾಡ್ಚಾ ಬದ್ಲಾಕ್ ಪಾಟಿಂ ಪಾವ್ಲಾಂ ಕಾಡ್ತಾಂ ತೊ ದಿಸಾನ್ದೀಸ್ ಸಕ್ಲಾಚ್ ದೆಂವ್ತಾ ಆನಿ ಜೊ ವೆಕ್ತಿ ಪಾಟಿಂ ಮುಕಾರ್ ಪಳೆನಾಸ್ತಾಂ ಅಪ್ಲೆಂ ಮಿಸಾಂವ್ ಧರುನ್ ಚಲ್ತಾ, ತೊ ಮಾತ್ರ್ ಜಯ್ತಾಚೊ ಮುಕುಟ್ ಜೊಡುಂಕ್ ಪಾವ್ತಾ.
ಸಂಸಾರಾಂತ್ ಜಿಯೆಂವ್ಚೊ ಕೊಣ್ಯ್ ವೆಕ್ತಿ ಅಪ್ಣಾನ್ ಖೊಟ್ಯೊ ಕರ್ನ್ಯೊ ಕರುನ್ ಖೊಟೊ ಮನಿಸ್ ಜಾವ್ನ್ ಜಿಯೆಜಾಯ್ ಮ್ಹಣ್ ಆಶೆನಾ. ಬಗಾರ್ ಅಪ್ಣಾನ್ ಬರ್ಯೊ ಕರ್ನ್ಯೊ ಕರ್ನ್ ಬರೊ ಮನಿಸ್ ಜಾವ್ನ್ ಜಿಯೆಜಾಯ್ ಮ್ಹಣ್ ಆಶೆತಾ. ತರ್ ತುಜಾ ಮತಿಂತ್ ಏಕ್ ಸವಾಲ್ ಯೇಂವ್ಕ್ ಪುರೊ, ಜರ್ತರ್ ಸಂಸಾರಾಂತ್ ಜಿಯೆಂವ್ಚೊ ಸಗ್ಳೊ ಲೋಕ್ ಬರ್ಯೊ ಕರ್ನ್ಯೊ ಆಧಾರ್ಚೊ ಬರೊ ಮನಿಸ್ ತರ್ ಹ್ಯಾ ಸಂಸಾರಾಂತ್ ಪಾತ್ಕಾಂ ಕಿತ್ಯಾಕ್? ಕಿತ್ಯಾಕ್ ದುಸ್ಮಾನ್ಕಾಯ್? ಕಿತ್ಯಾಕ್ ರಾಗ್-ಧ್ವೇಶ್, ಫಾರಿಕ್ಪಣಾಚೊ ಉಜೊ? ಕಿತ್ಯಾಕ್ ಝಗ್ಡಿಂ-ಝುಜಾಂ? ಕಿತ್ಯಾಕ್ ಅನ್ನ್ಯಾಯ್ ಅನೀತ್?
ಸವಾಲಾಂ ಜಾಯ್ತಿಂ ಆಸಾತ್, ಪುಣ್ ತಾಂಚಿ ಜಾಪ್ಯ್ ಭೋವ್ ಸಂಪಿ; ಸಂಸಾರಾಂತ್ ಸಗ್ಳಿಂ ಬರಿಂ ಕಾಮಾಂಚ್ ಕರ್ತಾತ್. ಪುಣ್ ತಿಂ ’ಬರಿಂ’ ಕಾಮಾಂ ತ್ಯಾ ತ್ಯಾ ವೆಕ್ತಿಚಾ ಚಿಂತ್ಪಾಚೆರ್ ಹೊಂದ್ವೊನ್ ಆಸಾ. ಜಶೆಂ ಆಮಿಂ ಚಿಂತಾಂವ್ ’ತುಕಾ ಗುನ್ಯಾಂವ್ ಕೆಲ್ಲ್ಯಾಕ್ ಭೊಗ್ಶಿ’, ತೆಚ್ಚ್ ಪರಿಂ ಹೆರಾಂ ಚಿಂತುಂಕ್ ಸಕಾನಾಂತ್, ದೊಳ್ಯಾಕ್ ದೊಳೊ, ದಾಂತಾಕ್ ದಾಂತ್ ಮ್ಹಳ್ಳಿಂ ತತ್ವಾಂ ದವರ್ನ್ ಜಿಯೆಂವ್ಚಾ ತಾಂಕಾಂ ತಾಂಚೆರ್ ಅನ್ನ್ಯಾಯ್ ಕೆಲ್ಲ್ಯಾಂಕ್ ಜಿವೆಶಿಂ ಮಾರ್ಚೆಂಚ್ ನೀತ್. ಆನಿ ಸಂಸಾರಾಂತ್ ಅಶಾಂತಿ ಆಸಾ ತರ್ಯ್ ಹೆಚ್ಚ್ ಕಾರಾಣಾಂಕ್ ಲಾಗೊನ್.
ಆಮಿಂ ಬರವ್ಪಿ, ಆಮ್ಚೆಂ ಹಾತೆರ್ ಬರಾಪ್. ಪುಣ್ ಹ್ಯಾ ಹಾತೆರಾಕ್ ಘೆವ್ನ್ ಸಮಾಜೆಂತ್ ಫಕತ್ತ್ ಬರಂವ್ನ್ ಅಪ್ಲೆಂ ಕಾಮ್ ಸಂಪಂವ್ಚೆಂಚ್ ತರ್ ಹಾಚಾಕೀ ಮುಖ್ಲಿಂ ಪಾವ್ಲಾಂ ಕಾಡ್ಚಿಂ ಕೊಣೆಂ? ಸಮಾಜೆಂತ್ ಫಕತ್ತ್ ಬರವ್ಪಿ ಜಿಯೆನಾಂತ್ ಯಾ ಜಿಯೆತೆಲಿಂ ಸಗ್ಳೆ ಬರವ್ಪಿ ನ್ಹಯ್. ತರ್ ಆಮ್ಚಾ ಸಮಾಜೆಂತ್ ಕಸ್ಟಾಂನಿ, ಪಿಡೆಂತ್ ವಳ್ವೊಳೊನ್ ಜಿಯೆತೆಲ್ಯಾಂಕ್ ಆಧಾರ್ ಕೊಣೆ ದಿಂವ್ಚೊ?
ಪ್ರಾಯೆಸ್ತ್ ಆವಯ್-ಬಾಪಾಯ್ಕ್ ಜೆದ್ನಾಂ ತಾಂಚಿಂ ಬುರ್ಗಿಂ ಸಾಂಡ್ತಾನಾ ಕೊಣೆಂ ತಾಂಕಾ ಆಸ್ರೊ ದಿಂವ್ಚೊ? ಅನಾತ್ ಬಾಳ್ಶಿಂ ಖಚ್ರ್ಯಾ ಡಬ್ಬ್ಯಾಂನಿ, ಆನಾತ್ ಬುರ್ಗಿಂ ರಸ್ತ್ಯಾಂನಿ ಗತ್ ಆಧಾರ್ ನಾಸ್ತಾನಾ ಪಡೊನ್ ಆಸ್ತಾನಾ ಕೊಣೆಂ ತಾಂಚಿ ಜತನ್ ಘೆಂವ್ಚಿ?
ಧರ್ಮ್ಧುತಾಂಚಾ ಕೃತ್ಯಾಂತ್ ಆಸ್ಚಾ ವಾಚ್ಪಾಪ್ರಕಾರ್ ’ಆಮಿ ಫಕತ್ತ್ ರಸ್ತ್ಯಾರ್ ಹಿಂವಾನ್ ಆಂಕುಡ್ನ್ ಆಸ್ಚಾ ಭಿಕಾರ್ಯಾಕ್ ತುಂ ಬರೆಂ ನೆಸ್ ಆನಿ ಬರೊ ಜಾ ಹಾಂವ್ ತುಜೆಪಾಸತ್ ಮಾಗ್ತಾಂ’ ಮ್ಹಳೆಂ ತರ್ ಹಿ ಹಿಪೊಕ್ರೆಸಿ ನಾಸ್ತಾನಾ ಆನಿ ಕಿತೆಂ? ಹೊ ನೀಜ್ ಹುಸ್ಕೊ ನ್ಹಯ್.
ನೀಜ್ ಹುಸ್ಕೊ ಹೊ ಜಾವ್ನಾಸಾ ಅಪುಣ್ ತ್ಯಾ ಹಿಂವಾಂತ್ ಆಂಕುಡ್ಚಾಕ್ ಪಾಂಗ್ರುಂಕ್ ಕಿತೆಂಯ್ ದೀಂವ್ಕ್ ಸಕ್ತಾಂ ತರ್. ತ್ಯಾ ಖಾತಿರ್ ಅಪ್ಣಾನ್ ಅಪ್ಣಾಚಿ ಆಸ್ತ್-ಬದಿಕ್ ವಿಕಿಜಾಯ್ ಮ್ಹಣ್ ನಾ. ಫಕತ್ ಅಪ್ಲ್ಯಾ ತಾಂಕಿ ಭಿತರ್ಲೆಂ ಬರೆಂ ಮನ್ ಧಾಖಯ್ಲ್ಯಾರ್ ಮಾತ್ರ್ ಪುರೊ.
ಪುಣ್ ಕೊಣಾಕ್ ಆಮ್ಕಾಂ ವೇಳ್ ಆಸಾ? ಕೊಣಾಕ್ ಹಿ ತಕ್ಲಿ ಫಡಾಫಡ್ ಜಾಯ್? ಆನಿ ಕೊಣಾಕ್ಯ್ ಅಸಲಿಂ ಕಾಮಾಂ ಕರುಂಕ್ ವೆಚೆಂ ಪಳೆತಾನಾ ಕಿತ್ಲ್ಯಾ ಸರ್ವ್ ರಿತಿಂನಿ ತಾಚಾ ವಾಟೆರ್ ಖಾಂಟೆ ಉಡಂವ್ಕ್ ಧರಿನಾಂವ್? ಕುರ್ಲ್ಯಾಂಚಿ ಸಮಾಜ್ ಆಮ್ಚಿ - ಆಮಿ ಜಾವ್ನ್ ಕರಿನಾಂವ್, ಹೆರಾಂನಿ ಕರ್ಚೆಂಯ್ ಪಳೆಂವ್ಕ್ ಸಕಾನಾಂವ್. ಹೆಚ್ಚ್ ಸಮಾಜೆನ್ ಜೆಜುಕ್ ಖುರ್ಸಾಯಿಲ್ಲೊ ತರ್, ಸಾಂ|ತೊಮಸಾಕ್ ಫಾತ್ರಾಯ್ಲೊ ತರ್, ಮದರ್ ತೆರೆಸಾಕ್ ಅಕ್ಮಾನ್ ಕೆಲೊ ತರ್ ಹೆರಾಂ ಕೊಣ್ ಆನಿ ಕಿತೆಂ?
ತರ್ಯ್ ಜಿಣ್ಯೆಚಾ ಹಂತಾಂನಿ ಆಮ್ಚಿಂ ಪಾವ್ಲಾಂ ಧೃಡ್ಚ್ ದೆಕುನ್ ಅಸಲ್ಯಾ ಖಂಚಾಯ್ ಅವ್ಮಾನಾಂಕ್ ಆಯ್ಕೊನ್ ರಡೊನ್ ಬೊಸ್ಚೆಂ ಹಂತ್ ಕೆದ್ನಾಂಗೀ ಉತ್ರೊನ್ ಆಯಿಲ್ಲ್ಯಾ ಆಮ್ಕಾಂ ಅಸಲ್ಯಾ ಸಂಗ್ತ್ಯಾಂನಿ ಕಸಲೊಚ್ ಫರಕ್ ಪಡಾನಾ, ಫಕತ್ ಆಮ್ಚೆಂ ಚಿಂತಾಪ್ ಇತ್ಲೆಂಚ್;
’ಮೀಟ್ ಖೆಲ್ಲ್ಯಾಕ್ ಉದಾಕ್ ಪಿಯೆಂವ್ಕ್ ಆಸ್ತೆಲೆಂಚ್!’. ಹಸ್ತಿನ್ ಚಲೊನ್ ವೆತಾನಾ ವಾಟೆರ್ ಪೆಟೆ ಘೊಂಕ್ತಾತ್ ದೆಕುನ್ ತಿ ಹಸ್ತ್ ರಾವ್ತಾವೆ? ವಾ ಹಸ್ತ್ ತ್ಯಾ ಪೆಟ್ಯಾಂಕ್ ಲೆಖ್ತಾವೆ?
ಕಿತ್ಲೆಶೆ ಸಂಸ್ಥೆ ಆಮ್ಚಾ ಸಮಾಜೆಂತ್ ಆಸಾತ್, ಕಿತ್ಲೆಶ್ಯಾ ಫಿರ್ಗಜೆಚಾ ಭಾಂದ್ಪಾಂನಿ ತಾಣಿಂ ಹಜಾರ್/ಲಾಖಾಂನಿ ದುಡು ದಾನ್ ದಿಲಾ, ಕಿತ್ಲೆಶ್ಯಾ ದುದಾ-ಫಾತ್ರಾಂನಿ ತಾಂಚಿಂ ನಾಂವಾಂ ಖಚ್ಲ್ಯಾಂತ್, ಕಿತ್ಲೆಶ್ಯಾ ಸೊವಿನಿಯರಾಂನಿ ತಾಂಚ್ಯೊ ತಸ್ವೀರ್ಯೊ ಸೊಭ್ಲ್ಯಾತ್, ತರ್ಯ್ ಅಸಲೆಂ ಕಾಮ್ ಕರ್ಚಾಂಚಾ ಕಾಮಾಂಕ್ ಪಳೆಂವ್ಚಿ ದೀಶ್ಟ್ ಕಿತ್ಲೆಶ್ಯಾಂಕ್ ಆಸಾ ಮ್ಹಳ್ಳೆಂ ವ್ಹಡ್ ಸವಾಲ್ ಉಭೆಂ ಜಾತಾ. ಬರೆ ಇರಾದೆ ಆಸ್ಲ್ಯಾರ್ ತೆ ಜ್ಯಾರಿ ಕರುಂಕ್ ಕಸಲೆಚ್ ಸಂಸ್ಥೆ ಗರ್ಜೆಚೆ ನ್ಹಯ್ ಮ್ಹಳ್ಳ್ಯಾಕ್ ಭೋವ್ಶಾ ಹೊ ವಿಶೇಷ್ ಅಂಕೊ ಏಕ್ ರುಜ್ವಾತ್.
ತರ್ಯ್ ಆಮ್ಚಾ ಮಿಸಾಂವಾಂತ್ ಆಮಿಂ ಆಮ್ಚೆಸವೆಂ ಚಲ್ಚಾ ಹರ್ಯೆಕ್ಲ್ಯಾಕ್ ಮಾಯಾಮೊಗಾನ್, ಖಾಲ್ತೆಪಣಾನ್ ಸ್ವಾಗತ್ ಕೆಲಾ ಆನಿಂ ತಾಚೊ ಪರಿಣಾಮ್ ಜಾವ್ನ್ ಆಜ್ ಹೊ ಪಯ್ಲೊ ದಾಯ್ಜ್ ವಿಶೇಷ್ ಅಂಕೊ ಆಮಿ ದಿವೊ ಪತ್ರಾಸವೆಂ ಕಾಡುಂಕ್ ಮುಖಾರ್ ಸರ್ಲ್ಯಾಂವ್. ದಾಯ್ಜ್ ಖಂಚಾಯ್ ವೆಕ್ತಿಚಿ, ಪ್ರಾಂತ್ಯಾಚಿ ವ ಸಂಸ್ಥ್ಯಾಚಿ ಆಸ್ತ್-ವಸ್ತ್ ನ್ಹಯ್ ಆಸ್ತಾಂ ಹಾಂತುಂ ಕಸಲೇಯ್ ’ಗಾರ್’ ಪ್ರಮುಕ್ ಆಸ್ಚೆನಾಂತ್, ಬಗಾರ್ ಸಗ್ಳಿಂ ಆಮಿಂ ಎಕ್ವಟಿತ್ ಜಾವ್ನ್ ಹೊ ವಾವ್ರ್ ಕರ್ತಾನಾ ಆಮ್ಚಾ ಮಿಸಾಂವಾಂತ್, ಜಾಯ್ತ್ಯಾಂನಿ ಕಾಳ್ಜಾಥಾವ್ನ್ ಸಹಕಾರ್-ಪಾಟಿಂಬೊ-ಆಧಾರ್ ದಿಲಾ ಆನಿಂ ತಾಂಕಾಂ ಹಾಂವ್ ದಾಯ್ಜ್ ಪಂಗ್ಡಾಚಾ ನಾಂವಿಂ ಉಪ್ಕಾರ್ ಬಾವ್ಡುಂಕ್ ಫಾವೊ, ಮಸ್ಕತಾಂತ್ಲ್ಯಾ ಬರ್ಪಿ ಮಿತ್ರಾಂಕ್, ದುಭಾಯಾಂತ್ಲ್ಯಾ ದಾಯ್ಜಿಂಕ್, ಬಾಹ್ರೇಯ್ನಾಂತ್ಲ್ಯಾ ಕೊಂಕ್ಣಿ ಕುಟ್ಮಾಕ್, ಕುವೆಯ್ಟಾಂತ್ಲ್ಯಾ, ಖತಾರಾಂತ್ಲ್ಯಾ, ಅಮೆರಿಕಾಂತ್ಲ್ಯಾ ತಶೆಂಚ್ ಸಂಸಾರಾಂತ್ಲ್ಯಾ ಹರ್ಯೆಕಾ ಪ್ರಾಂತ್ಯ್ಂತ್ಲ್ಯಾ ಕೊಂಕ್ಣಿ ಮ್ಹಾ-ಜಣಾಂಕ್ ತಾಣಿಂ ದಿಲ್ಲ್ಯಾ ಪಾಟಿಂಬ್ಯಾಚೊ ಫಳ್ ಜಾವ್ನಾಸಾ ಹೊ ಫುಡ್ಲದ್ ದಾಯ್ಜ್ ವಿಶೇಷ್ ಅಂಕೊ 2005.
ಹ್ಯಾ ವಿಶೇಷ್ ಅಂಕ್ಯಾಕ್ ಬರ್ಪಾಂ ದಿವುನ್, ಪೋಶಕ್ ಜಾವುನ್, ಇಸ್ತಿಹಾರಾಂ ದಿವುನ್ ಪಾಟಿಂಬೊ ದಿಲ್ಲ್ಯಾ ಸರ್ವಾಂಕ್ ಹಾಂವ್ ದೆವಾಚಿಂ ವಿಂಚ್ಣಾರ್ ಆಶಿರ್ವಾದಾಂ ಮಾಗ್ತಾಂ. ದೇವ್ ತಾಂಕಾಂ ಬರೆಂಚ್ ಕರುಂ.
ಹ್ಯಾ ವಿಶೇಷ್ ಅಂಖ್ಯಾ ಮುಖಾಂತ್ರ್ ಏಕ್ ವಿಶೇಷ್ ಇರಾದೊ ಆಮಿ ಆಸಾ ಕೆಲ್ಲೊ ಆನಿ ತೊ ಇರಾದೊ ಭೋವ್ ಸುಫಳ್ ಜಾಲೊ ಮ್ಹಣ್ ಕಳಂವ್ಕ್ ಮ್ಹಾಕಾ ಭಿಮಾನ್ ಭೊಗ್ತಾ. ದಿವೊ ಪತ್ರಾಚಾ ಸಂಪಾದಕಾಕ್ ಮಾನೆಸ್ತ್ ಲಾರೆನ್ಸ್ ಕುವೆಲ್ಹೊಕ್ ತಶೆಂಚ್ ಪತ್ರಾಚಾ ಮಂಡಳಿಕ್ ಹೊ ಆವ್ಕಾಸ್ ಫಾವೊ ಕರುನ್ ದಿಲ್ಲ್ಯಾಕ್ ಹಾಂವ್ ಅರ್ಗಾಂ ದೀಂವ್ಕ್ ಫಾವೊ.
ಹ್ಯಾ ಆಮ್ಚಾ ಮಿಸಾಂವಾಚಾ ಜಯ್ತಾಂತ್ ವಾಂಟೆಲಿ ಜಾಲ್ಲ್ಯಾ ಸರ್ವಾಂಚಿಂ ನಾಂವಾಂ ಖಂಡಿತ್ ಜಾವ್ನ್ ಎದೊಳ್ಚ್ ಖಂಚ್ಲ್ಯಾಂತ್. ನ್ಹಯ್ ದುದಾ ಫಾತ್ರಾಂನಿ, ಬಗಾರ್ ಸಿಯೊನ್ ಆಶ್ರ್ಯಾಂತ್ ಪಿಡೆಂತ್ ವಳ್ವಳ್ಚಾ ಎಕೆಕಾ ಪಿಡೆಸ್ತಾಂಚಾ ಕಾಳ್ಜಾಂನಿ. ಹೆಂಚ್ ಆಮ್ಚೆಂ ಮಿಸಾಂವ್.
ದೇವ್ ಬರೆಂ ಕರುಂ,
ಭೋವ್ ಖಾಲ್ತೆಪಣಿಂ,
ವಲ್ಲಿ ಕ್ವಾಡ್ರಸ್, ಅಜೆಕಾರ್
(ದಾಯ್ಜ್-ದಿವೊ ವಿಶೇಸ್ ಅಂಕ್ಯಾಂತ್ ಬರಯಿಲ್ಲೆಂ ಸಂಪಾದಕೀಯ್)
