ಕವಿತಾकविताPoem
ಕಾಳಿಜ್!
This poem is available in its original Kannada only.
ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕವಿತಾಪಾಠ್ ಮ್ಹಳ್ಯಾರ್ ಕಿತೆಂ ಮ್ಹಳ್ಳ್ಯಾಚಾ ಸವಿಸ್ತಾರ್ ವಿವರಾಂಕ್ ಹ್ಯಾ ಪಾನಾಕ್ ಭೆಟ್ ದಿಯಾ
ಕವಿತಾಪಾಠ್ - 20
ಕಾಳಿಜ್ - ಎಡ್ವಿನ್ ಜೆ. ಎಫ್. ಡಿ’ಸೋಜ್
ಎಡ್ವಿನ್ ಜೆ. ಎಫ್. ಡಿ’ಸೋಜ್
ಮ್ಹಜ್ಯಾ
ಎಕ್ಸುರ್ಯಾ ಕಾಳ್ಜಾಕ್
ಎಕ್ ದಾರ್ ಆಸ್ಲ್ಲೆ೦ ಆನಿ
ಕೆನ್ನಾಯ್ ತೆ೦
ಉಗ್ತೆ೦ಚ್ ಆಸ್ತಾಲೆ೦, ಸರ್ವಾ೦ಕ್
ಉಪ್ರಾ೦ತ್ ಎಕಾ ದಿಸಾ
ಲಾಕೊ೦ ಸಾ೦ಗಾತಾ ಮೋಗ್
ರಿಗ್ಲೊ ಆನಿ ಉಡಿ ಚಡ್ಲ್ಯೊ
ಎಕ್ಸುರ್ಪಣ್ ಪೊಳ್ಳೆ೦
ದೂಕ್ ಫಾಸಾಳ್ಳೆ೦
ಫುಲಾ೦ತ್ಲೆ೦ ಮ್ಹೊ೦ವ್ ಹಾ೦ವೆ೦ ಚಾಕ್ಲೆ೦
ಪುಣ್ ಹಾಯ್!
ವೆಗ್ಳಾಚಾರ್ ಆಯ್ಲೊ ತೆಚ್ಚ್
ದಾರಾ೦ತ್ಲ್ಯಾನ್ ಆನಿ
ಘೆವ್ನ್ ಗೆಲೊ ದಿಲ್ಲೆ೦ ಸರ್ವ್
ಆನಿ ಆತಾ೦
ಮ್ಹಜೆ೦ ಕಾಳಿಜ್ ಎಕ್ಸುರಾಯೆನ್
ಬ೦ಜರ್ ಭು೦ಯ್ ಜಾಲಾ೦
ವೀಣೆ ಸರಿಯೊ ತಾ೦ಡುನ್
ರಡ್ತಾ ದುಕಾನ್ ತಾಕಾ
ಬಾ೦ದುನ್ ಘಾಲಾ೦
ಮಾತಿ ಖೆಲ್ಲ್ಯಾ ಸಾ೦ಕ್ಳಿ೦ನಿ
ಕವಿತಾಪಾಠ್ಚೆರ್ ಕೆಲ್ಲಿಂ ಅಧ್ಯಯನ್ ಲೇಕನಾಂ ಬುಕಾರುಪಾರ್ ಪರ್ಗಟ್ ಜಾಲ್ಯಾಂತ್
ಕುವೆಯ್ಟಾಂತ್ಲಿಂ ವೆವೆಗ್ಳಿಂ ಕಾಮಾಸಾಳಾಂ
ಕಾಳಿಜ್! ನಿರಾಶೆಚ್ಯಾ ಪಾವ್ಲಾಂನಿ ಆಶಾವಾದ್ ಪಾಚಾರ್ಚೆಂ ಕವಿತಾ! [ - ವಲ್ಲಿ ಕ್ವಾಡ್ರಸ್]
’ಖಬ್ರೆ ಪತ್ರಾಪರಿಂ ಸಾಂಗೊನ್ಂಚ್ ವೆಚ್ಯಾಕ್ ಹಾಂವ್ ಕವಿತಾ ಮ್ಹಣ್ ಮಾಂದಿನಾ’ - ಮ್ಹಣ್ತಾ ಕೊಂಕ್ಣೆಚೊ ನಾಮ್ಣೆಚೊ ಕವಿ ಎಚ್ಚೆಮ್. ಕವಿತಾಕ್ ಅಮ್ಖೆಂಚ್ ಮ್ಹಳ್ಳೆಂ ವ್ಯಾಖ್ಯಾನ್ ದೀಂವ್ಕ್ ತಿತ್ಲೆಂ ಸಲೀಸ್ ನ್ಹಂಯ್, ತಶೆಂ ಮ್ಹಣ್ ಎಕ್ಲ್ಯಾಣ್ ಎಕಾ ದಿಸಾ ದಿಲ್ಲೆಂ ವ್ಯಾಖ್ಯಾನ್ಂಚ್ ಮೊರ್ತಾಸರ್ ಬದ್ಲಾನಾಸ್ತಾಂ ಉರ್ತೆಲೆಂ ಮ್ಹಳ್ಳೆಂ ಸಾಂಗ್ಚೆಂಯ್ ಕಶ್ಟಾಂಚೆಂ. ಎಕೇಕ್ ಪಾವ್ಟಿಂ ವಾಚ್ತಾನಾ ಎಕೇಕ್ ರಿತಿಚ್ಯಾ ರುಪ್ಣ್ಯಾಕ್ ದೊಳ್ಯಾಂ ಸಮೊರ್ ಹಾಡ್ಚ್ಯಾಕ್ ಕವಿತಾ ಮ್ಹಣ್ತಾತ್ ಜಾಯ್ತೆ ಕವಿ.
ಎಡ್ವಿನ್ ಜೆ. ಎಫ್. ಡಿ’ಸೋಜ್ ಅಪ್ಣಾಕ್ ಅಪುಣ್ ’ಕವಿ’ ಮ್ಹಣ್ ಮಾಂದ್ಚಾಂತ್ಲೊ ಭಿಲ್ಕುಲ್ ನ್ಹಂಯ್. ಕೊಂಕ್ಣಿ ಸಾಹಿತ್ಯಾಂತ್ ಹಾಚಿ ತಶೆಂಚ್ ಹಾಚ್ಯಾ ಸಾಹಿತ್ಯಾಚಿ ವಳೊಕ್ ಕರ್ಚಿ ಗರ್ಜ್ ನಾ. ಏಕ್ ಭಳ್ವಂತ್ ಕಾದಂಬರಿಕಾರ್, ಮಟ್ವ್ಯೊ ಕಾಣ್ಯೆಗಾರ್, ಗೂಂಡ್ ಚಿಂತ್ಪಾಚೊ ಸಾಹಿತಿ, ವಿಮರ್ಶಕ್, ಅಂಕಣ್ಕಾರ್. ಪುಣ್ ಜಿತ್ಲೊ ಫಾಮಾದ್ ಹೊ ಕಾಣ್ಯಾಂನಿ ಜಾಲಾಕೀ ತಿತ್ಲೊ ಫಾಮಾದ್ ಕವಿ ಜಾವ್ನ್ ಜಾಂವ್ಕ್ ನಾ ಜಾವ್ಯೆತಾ ಪುಣ್ ಹಾಚಿಂ ಸಭಾರ್ ಇಂಗ್ಲಿಶ್ ಕವಿತಾಂ ಕುವೇಯ್ಟ್ ಟಾಯ್ಮ್ಸ್ ಪತ್ರಾಚೆರ್ ಪರ್ಗಟ್ಲ್ಯಾಂತ್ ತಶೆಂಚ್ ಹಾಂಚೆಂ ಕೊಂಕ್ಣಿ ಅಣ್ಕಾರ್ಯೀ ಜಾವ್ನ್ ಕೊಂಕ್ಣೆಂತ್ ಪರ್ಗಟ್ಲ್ಯಾಂತ್. ಸಾಂ|ಲುವಿಸ್ ಕೊಲೆಜಿಚ್ಯಾ ಕೊಂಕ್ಣಿ ಕ್ಲಾಶಿಂನಿ ಹಾಚಿಂ ಕವಿತಾ ಶಿಕಯ್ತಾತ್ ಮ್ಹಣ್ತಚ್ ತುಮಿಂ ಮ್ಹಜೊ ವಾದ್ ವಾ ಎಡ್ವಿನಾಚೊ ವಾದ್ ಬಗ್ಲೆಕ್ ದವರ್ನ್ ತುಮ್ಚೊ ವಾದ್ ಮಾಂಡ್ಯೆತಾ.
’ಕಾಳಿಜ್’ ಕವಿತೆಚ್ಯಾ ಅಧ್ಯಯಾಚಿ ಸುರ್ವಾತ್ ಕರ್ಚ್ಯಾಧಿಂ ಹೆಂ ಕವಿತಾ ಪರತ್ ಏಕ್ ಪಾವ್ಟಿಂ ವಾಸ್ಚೆಂ ತರ್;
’ಮ್ಹಜ್ಯಾ ಎಕ್ಸುರ್ಯಾ ಕಾಳ್ಜಾಕ್
ಏಕ್ ದಾರ್ ಆಸ್ಲ್ಲೆಂ ಆನಿ
ಕೆನ್ನಾಂಯಿ ತೆಂ
ಉಗ್ತೆಂಚ್ ಆಸ್ತಾಲೆಂ, ಸರ್ವಾಂಕ್
ಉಪ್ರಾಂತ್ ಎಕಾ ದಿಸಾ
ಲಾಕೊಂ ಸಾಂಗಾತಾ ಮೋಗ್
ರಿಗ್ಲೊ ಆನಿ ಉಡಿ ಚಡ್ಲ್ಯೊ
ಉಕ್ಸುರ್ಪಣ್ ಪೊಳ್ಳೆಂ
ದೂಕ್ ಫಾಸಾಳ್ಳೆಂ
ಫುಲಾಂತ್ಲೆಂ ಮ್ಹೊಂವ್ ಹಾಂವೆಂ
ಚಾಕ್ಲೆಂ
ಪುಣ್ ಹಾಯ್!
ವೆಗ್ಳಾಚಾರ್ ಆಯ್ಲೊ ತೆಚ್ಚ್
ದಾರಾಂತ್ಲ್ಯಾನ್ ಆನಿ
ಘೆವ್ನ್ ಗೆಲೊ ದಿಲ್ಲೆಂ ಸರ್ವ್
ಆನಿ ಆತಾಂ
ಮ್ಹಜೆಂ ಕಾಳಿಜ್ ಎಕ್ಸುರಾಯೆನ್
ಬಂಜರ್ ಭುಂಯ್ ಜಾಲಾಂ
ವೀಣೆ ಸರಿಯೊ ತಾಂಡುನ್
ರಡ್ತಾ; ದುಕಾನ್ ತಾಕಾ
ಬಾಂದುನ್ ಘಾಲಾಂ
ಮಾತಿ ಖೆಲ್ಲ್ಯಾ ಸಾಂಕ್ಳಿಂನಿ’
ಭಿಲ್ಕುಲ್ ಕಸಲ್ಯೊಚ್ ಸಂಕೀರ್ಣ್ ಇಮಾಜ್ಯೊ ಜಾಂವ್, ವಿಶೇಸ್ ಅಲಂಕಾರ್ ಜಾಂವ್ ಹಾಂತುಂ ದಿಸಾನಾಂತ್. ಕಸಲಿಚ್ ಸಾಂಕೇತಿಕ್ ಸ್ವಷ್ಟ್ ರಿತಿರ್ ನಾ, ವಿಚಿತ್ರ್ ಇಮಾಜ್ಯೊಯ್ ಹಾಂತುಂ ನಾಂತ್. ತರ್ಯೀ ಮಾತ್ಶಿ ಗುಂಡಾಯ್ ಘಾಲುನ್ ಜರ್ ಹೆಂ ಕವಿತಾ ಪರತ್ ವಾಚ್ಲೆಂ ತರ್ ಎಕೇಕ್ ಪಾವ್ಟಿಂ ಎಕೇಕ್ ರಿತಿಚೆಂ ರುಪ್ಣೆಂ ಮತಿಂತ್ ಖಂಚೊನ್ ಯೆಂವ್ಚೆಂ ಮಾತ್ರ್ ಸ್ಪಷ್ಟ್. ಪಳೆಯಾಂ ಎಕೇಕಾ ವೊಳಿಕ್ ವಿಂಗಡ್ ಕರುನ್ ಪರತ್ ವಾಚ್ಯಾಂ;
ಮ್ಹಜ್ಯಾ ಎಕ್ಸುರ್ಯಾ ಕಾಳ್ಜಾಕ್
ಏಕ್ ದಾರ್ ಆಸ್ಲ್ಲೆಂ ಆನಿ
ಕೆನ್ನಾಂಯಿ ತೆಂ
ಉಗ್ತೆಂಚ್ ಆಸ್ತಾಲೆಂ, ಸರ್ವಾಂಕ್
ಸಂಪ್ಯಾ ಉತ್ರಾಂನಿ ಸಾಂಗ್ಚೆಂ ತರ್ ಕವಿ ತರ್ನಾಟೊ ಮ್ಹಣ್ ಘೆವ್ಯಾಂ, ಹಿ ಸುರ್ವಾತ್ ಕವಿಚ್ಯಾ ಮೊಗಾ ಜಿಣ್ಯೆಚಿ ಮ್ಹಣ್ ಘೆವ್ಯಾಂ ಆನಿ ಫುಡ್ಲಿ ಪಂಗತ್ ಸಮ್ಜವ್ಯಾಂ.
ಉಪ್ರಾಂತ್ ಎಕಾ ದಿಸಾ
ಲಾಕೊಂ ಸಾಂಗಾತಾ ಮೋಗ್
ರಿಗ್ಲೊ ಆನಿ ಉಡಿ ಚಡ್ಲ್ಯೊ
ಉಕ್ಸುರ್ಪಣ್ ಪೊಳ್ಳೆಂ
ದೂಕ್ ಫಾಸಾಳ್ಳೆಂ
ಫುಲಾಂತ್ಲೆಂ ಮ್ಹೊಂವ್ ಹಾಂವೆಂ
ಚಾಕ್ಲೆಂ
ಭೋವ್ ಮಟ್ವ್ಯಾನ್ ಕವಿ ಅಪ್ಲ್ಯಾ ಜಿಣ್ಯೆಂತ್ ಪಾಶಾರ್ ಜಾವ್ನ್ ಗೆಲ್ಲ್ಯಾ ಎಕಾ ಹಂತಾಚೆಂ ಚಿತ್ರಣ್ ದಿತಾ. ಸಹಜ್ ಜಿರಿಚೆಂ ಘಡಿತ್. ಜ್ಯೆ ಚಡ್ತಾವ್ ಜಾವ್ನ್ ಹರ್ಯೆಕ್ಲ್ಯಾಂಚ್ಯಾ ಜಿಣ್ಯೆಂತ್ ಜಾಂವ್ಚೆಂ ತಸಲೆಂ. ಹಾಂಗಾಸರ್ ವಾಪಾರ್ಲ್ಲಿಂ ಉತ್ರಾಂ ಜಿಕುನ್ ಧರ್ಯಾಂ ’ಮೋಗ್ ರಿಗ್ಲೊ ಆನಿ .. ಎಕ್ಸುರ್ಪಣ್ ಪೊಳ್ಳೆಂ’. ಫುಡ್ಲಿ ಪಂಗತ್ ವಾಚ್ಯಾಂ;
ಪುಣ್ ಹಾಯ್!
ವೆಗ್ಳಾಚಾರ್ ಆಯ್ಲೊ ತೆಚ್ಚ್
ದಾರಾಂತ್ಲ್ತ್ಯಾನ್ ಆನಿ
ಘೆವ್ನ್ ಗೆಲೊ ದಿಲ್ಲೆಂ ಸರ್ವ್
ಹಾಂಗಾಸರ್ ಪಳೆಯಾ ಜ್ಯಾ ದಾರಾಂತ್ಲ್ಯಾನ್ ಮೋಗ್ ಆಯ್ಲೊಕೀ ತೆಚ್ಚ್ ದಾರಾಂತ್ಲ್ಯಾನ್ ವೆಗ್ಳಾಚಾರ್ಯ್ ಆಯ್ಲೊ. ಮ್ಹಳ್ಯಾರ್ ಮನ್ಶ್ಯಾಚೆಂ ಕಾಳಿಜ್ ಏಕ್, ತ್ಯಾ ಕಾಳ್ಜಾಚೆಂ ದಾರ್ ಏಕ್ ಪುಣ್ ಭಿತರ್ ಯೆಂವ್ಚಿಂ ತಶೆಂಚ್ ಪಾಶಾರ್ ಜಾಂವ್ಚಿಂ ಮಾತ್ರ್ ವೆವೆಗ್ಳಿಂ. ವಯ್ಲ್ಯಾ ಪಂಗ್ತೆರ್ ಆಯಿಲ್ಲೊ ಮೋಗ್, ಹ್ಯಾ ಪಂಗ್ತೆರ್ ಆಯಿಲ್ಲ್ಯಾ ವೆಗ್ಳಾಚಾರಾಸವೆಂ ರಾವೊಂಕ್ ಸಕಾನಾ. ಹೊ ವೆಗ್ಳಾಚಾರ್ಯೀ ಕಸ್ಲೊ? ಮೊಗಾನ್ ಹಾಡ್ನ್ ಆಯಿಲ್ಲ್ಯಾ ಸರ್ವಾಕ್ ಎಕಾಚ್ ಖಿಣಾನ್ ಹುಮ್ಟುನ್ ವರ್ಚೆ ತಸ್ಲೊ. ಬರೆಂ ಫುಡ್ಲಿ ಪಂಗತ್ ಪಳೆವ್ಯಾಂ;
ಆನಿ ಆತಾಂ
ಮ್ಹಜೆಂ ಕಾಳಿಜ್ ಎಕ್ಸುರಾಯೆನ್
ಬಂಜರ್ ಭುಂಯ್ ಜಾಲಾಂ
ವೀಣೆ ಸರಿಯೊ ತಾಂಡುನ್
ರಡ್ತಾ; ದುಕಾನ್ ತಾಕಾ
ಬಾಂದುನ್ ಘಾಲಾಂ
ಮಾತಿ ಖೆಲ್ಲ್ಯಾ ಸಾಂಕ್ಳಿಂನಿ
ಕವಿ ಅಖ್ರೇಕ್ ಚುರ್ಚುರ್ತಾ, ಕಳ್ವಳ್ತಾ ಅಪ್ಲ್ಯಾ ಹಾಲಾತೆಕ್ ಪಳೆವ್ನ್. ಕಠೀಣ್ ನಿರಾನ್ ಆನಿ ದೂಕ್ ಉಮಾಳೊನ್ ಯೆತಾ ಕವಿಕ್.
ಆತಾಂ ಇಲ್ಲೆಂ ಗುಂಡಾಯೆನ್ ಹಾಂತ್ಲೆಂ ಎಕೇಕ್ ಸಬ್ಧ್ ವಿಂಚುನ್ ಸಮ್ಜೊಂಚೆಂ ತರ್;
ಮನ್ಶ್ಯಾಜಿಣಿ ಎಕ್ಸುರಿಚ್ ಆನಿ ಎಕ್ಸುರ್ಯಾನ್ಂಚ್ ತಿ ಚಮ್ಕೊಂಕ್ ಆಸ್ತಾಂ, ತಾಚ್ಯಾ ಎಕಾಚ್ ಕಾಳ್ಜಾಂತ್ಲ್ಯಾ ಎಕಾಚ್ ದಾರಾಂತ್ಲ್ಯಾನ್ ಸರ್ವ್ ಯೆತಾ. ಜಿತ್ಲೆಂ ಬರೆಂಗಿ ತಿತ್ಲೆಂಚ್ ವಾಯ್ಟ್. ಜಿತ್ಲೊ ಮೋಗ್ಗೀ ತಿತ್ಲೊ ವೆಗ್ಳಾಚಾರ್, ಜಿತ್ಲೆ ದೀಸ್ಕೀ ತಿತ್ಲಿ ರಾತ್. ಹರ್ಯೆಕ್ ಎಕಾಮೆಕಾಕ್ ತದ್ವಿರುದ್ದ್ ತರ್ಯೀ ಪರಿಪೂರಕ್. ಹೆಂ ಸಂಸಾರಿ ನಿಯಮ್. ಎಕಾ ನಾಣ್ಯಾಚ್ಯೊ ದೋನ್ ಕುಶಿ. ಎಕಾವೀಣ್ ಏಕ್ ರಿತೆಂ. ಪುಣ್ ಮನಿಸ್ ಜ್ಯೆ ಕಿತೆಂ ಅಪ್ಣಾಲಾಗಿಂ ದವರುಂಕ್ ಸಕ್ತಾ ತ್ಯೇ ಪರಿಂ ಮನಿಸ್ ಅಪ್ಲಿ ಜಿಣಿ ಜಿಯೆಂವ್ಕ್ ಪಾವ್ತಾ. ಹ್ಯಾ ಪರಿಗತೆಂತ್ ಜೊ ಮನಿಸ್ ಸಮತೋಲನ್ ಕರ್ನ್ ಜಿಯೆಂವ್ಕ್ ಸಕ್ತಾ - ಆನಿ ತೊ ಜಯ್ತೆವಂತ್ ಜಾತಾ.
ಆತಾಂ ವಯ್ರ್ ಜಿಕುನ್ ಧರ್ಲ್ಲ್ಯಾ ಉತ್ರಾಂಚೆರ್ ಇಲ್ಲೊ ನಿಯಾಳ್ ಕರ್ಯಾಂ - ಕವಿಕ್ ವೆಕ್ತಿಗತ್ ಜಾವ್ನ್ ಹಾಂವ್ ಸಮ್ಜಾಲ್ಲೆಪರಿಂ ಏಕ್ ದೇವ್ ಭಿರಾಂತೆಚಾ ಚಿಂತ್ಪಾಚೊ. ಹೆಂ ಹಾಂಗಾಸರ್ ಉಲ್ಲೇಕ್ ಗರ್ಜ್ ಕಿತ್ಯಾಕ್ ಮ್ಹಳ್ಯಾರ್, ಜಶೆಂ ಚಿಂತಾಪ್, ತಶೆಂ ಸಾಹಿತ್ಯ್. ಸಾಹಿತ್ಯ್ ಏಕ್ ಅಭಿವ್ಯಕ್ತಿ ಮಾತ್ರ್ ತರ್ ಚಿಂತ್ಪಾವಿಣೆಂ ಅಭಿವ್ಯಕ್ತಿ ಅಸಾಧ್ಯ್. ತಶೆಂ ಮ್ಹಣ್ ಕವಿ ದಿಸಾಕ್ ಚೊವೀಸ್ ವೊರಾಂ ದೆವಾಚಿ ಪುಜಾ ಪಾಠ್ ಕರ್ಚೊ ಭಾಗೆವಂತ್ ನ್ಹಂಯ್, ಪುಣ್ ಕ್ರಿಸ್ತೀ ಧರ್ಮಾಚಿಂ ತತ್ವಾಂ ಅಪ್ಲ್ಯಾ ಜಿಣ್ಯೆಕ್ ಲಗ್ತಿ ಕರ್ಚ್ಯಾಂತ್ಲೊ. ಕ್ರಿಸ್ತಾಂವ್ ಧರ್ಮಾಚೆಂ ಮುಳಾವೆಂ ತವ್ತ್ ಖಂಚ್ಯಾಂತ್ ರೆವ್ಡೊನ್ ಆಸಾ? ಫಕತ್ತ್ ಮೊಗಾಚೆರ್. ಆನಿ ತ್ಯಾ ತತ್ವಾ ಫರ್ಮಾಣೆ ಖಂಯ್ ಮೋಗ್ ಆಸಾ ಥಂಯ್ ಹರ್ಯೆಕ್ ಆಸಾ. ದೆಖುನ್ ಹಿ ವೋಳ್ ’ಮೋಗ್ ರಿಗ್ಲೊ ಆನಿ... ಎಕ್ಸುರ್ಪಣ್ ಪೊಳ್ಳೆಂ’ ಮ್ಹಳ್ಳೆಂ ಹ್ಯಾ ಚಿಂತ್ಪಾಚೆರ್ ಆರ್ಸೊ ಧರ್ತಾ.
ಕವಿತಾ ಫ್ರೀ ವರ್ಸಾಚೆರ್ ಬರಯ್ಲಾಂ ತರ್ಯೀ ಮೂಲ್ ಭಾಸೆಂತ್ (ಇಂಗ್ಲಿಶಾಂತ್) ಹೆಂ ಕವಿತಾ ಅಪುರ್ಭಾಯೆನ್ ಸೊಭ್ತಾ. ಜಿತ್ಲೆಂ ಸೊಭಿತ್ ಇಂಗ್ಲಿಶಾಂತ್ ಆಸಾಕೀ ತಿತ್ಲೆಂ ತರ್ಜಣ್ ಜಾತಾನಾ ಆಸಾನಾ, ಹೆಂ ಹರ್ಯೆಕಾ ಭಾಸಾಂನಿ ಆಸ್ಚೊ ಗೂಣ್/ಅವ್ಗುಣ್. ಜಶೆಂ ಚಾ.ಫ್ರಾಚೆರ್ಂ ’ಹಾಡ್ಕುಲೊಗೋ ಬುಡ್ಕುಲೊ’ ಕವಿತಾ ಜರ್ ಸಂಸಾರಾಚ್ಯಾ ಖಂಚ್ಯಾಯ್ ಭಾಸೆಂತ್ ತರ್ಜಣ್ ಜಾಲ್ಯಾರ್ ಕೊಂಕ್ಣೆಂತ್ ಆಸ್ಚಿ ಸೊಭಾಯ್ ತ್ಯಾ ಕವಿತೆಕ್ ಯೇಂವ್ಕ್ ಸಾಧ್ಯ್ ನಾ.
ಆತಾಂ ಹೆಂ ಅಧ್ಯಯನ್ ಸಂಪಂವ್ಚ್ಯಾಧಿಂ ಜರ್ ಕವಿ ಅಖ್ರೇಕ್ ನಿರಾಶೆಚ್ಯಾ ಕೊಂಡಾಂತ್ ಸಂಪೊನ್ ಗೆಲಾ ಮ್ಹಣ್ ಚಿಂತೆಲ್ಯಾಂಕ್ ಏಕ್ ವೋಳ್;
’ಮಾತಿ ಖೆಲ್ಲ್ಯಾ ಸಾಂಕ್ಳಿಂನಿ’
ಹ್ಯಾ ಉತ್ರಾಂಚೊ ಮತ್ಲಬ್ ಕಸಲೊ? ಕೊಣಾಯ್ಚೆಂಯ್ ಕಾಳಿಜ್ ಸಾಂಕ್ಳಿಂನಿ ಬಾಂಧುನ್ ಘಾಲುಂಕ್ ಸಾಧ್ಯ್? ತರ್ ತಿ ಸಾಂಕಳ್ ಮ್ಹಳ್ಯಾರ್ ಕಸ್ಲಿ? ಮಾತಿ ಕೆಲ್ಲಿ ಸಾಂಕಳ್ ಮ್ಹಳ್ಯಾರ್ ಕಸಲಿ? ಭೋವ್ ಸಂಪ್ಯಾನ್ ಸಾಂಗ್ಚೆಂ ತರ್, ಮಾತಿ ಖೆಲ್ಲಿ ಸಾಂಕಳ್ ಮ್ಹಳ್ಯಾರ್ ಆಜ್-ಫಾಲ್ಯಾಂ ತುಟೊನ್ ವೆಚಿ ಸಾಂಕಳ್. ಜರ್ ಸಾಂಕಳ್ ತುಟ್ಲಿ, ತರ್ ಕಾಳಿಜ್ ಸ್ವತಂತ್ರ್!. ಆನಿ ಸ್ವತಂತ್ರ್ ಕಾಳಿಜ್ ಪರತ್ ಫುಲೊಂಕ್ ಸಕ್ತಾ! ಮೊಗಾಕ್ ಆಶೆಂವ್ಕ್ ಸಕ್ತಾ. ಆನಿ ಜರ್ ಜಿಣ್ಯೆಚೊ ವಾದ್ ಮಾಂಡ್ಲೊ ತರ್, ಸುಕಾ ಪಾಟ್ಲ್ಯಾನ್ ದೂಕ್ ಆಸಾ, ವೆಗ್ಳಾಚಾರಾ ಪಾಟ್ಲ್ಯಾನ್ ಪರತ್ ಮೋಗ್ ಸಂಭವ್ ಆಸ್ತಾ.
ಕವಿತಾ ನಿರಾಶೆಚ್ಯಾ ವಾಟೆರ್ ಚಮ್ಕೊನ್, ಆಶಾವಾದ್ ಪಾಚಾರ್ಚೆಂ ಕವಿತಾ ದೆಖುನ್ ಪರತ್ ಪರತ್ ವಾಚುಂಕ್ ಪ್ರೇರಿತ್ ಕರ್ತಾ.
ದೇವ್ ಬರೆಂ ಕರುಂ,
ವಲ್ಲಿ ಕ್ವಾಡ್ರಸ್, ಅಜೆಕಾರ್
ಕವಿತೆಂತ್ಲೆ ನೋವ್ ರಸ್ ಕಸ್ಲೆ?
ಕಾವ್ಯ ಮ್ಹಳ್ಳೊ ಸಬ್ಧ್ ಆಯಿಲ್ಲೊ ಸಂಸ್ಕೃತ್ ಭಾಸೆ ಥಾವ್ನ್ (ಕಾವ್ಯಂ)- ತಶೆಂಚ್ ಶ್ಲೋಕ (ಶ್ಲೋಕಂ), ರಸ (ರಸಂ), ಭಾವ (ಭಾವಂ) ಸಬ್ಧ್ಯೀ ಸಂಸ್ಕೃತಾ ಥಾವ್ನ್ ಹೆರ್ ಭಾಸಾಂಕ್ ವ್ಹಾಳೊನ್ ಆಯ್ಲಾ. ಕಾನಡಿ ಭಾಸೆಂತ್ ಹೆ ಸಬ್ಧ್ಚ್ ಚಡ್ತಾವ್ ವಾಪಾರ್ತಾತ್. ಹಿಂದ್ವಾಂಚಾ ವೇದಾಂತ್ ಪಯ್ಲೆಂ ಕಾವ್ಯೆಂ ರಚ್ಲೆಂ ಮ್ಹಳ್ಳೆಂ ಹಿಂದ್ವಾಂಚ್ಯಾ ಧಾರ್ಮಿಕ್ ಪಂಡಿತಾಂಚೊ ವಾದ್ ಖರೊಯೀ ಆಸೊಂಕ್ ಪುರೊ. ಜಾಂವ್ ಭಗ್ವದ್ಗೀತೆಂತ್ ವಾ ಉಪನಿಶದಾಂತ್ ಕೀರ್ತನಾ ರುಪಾರ್, ಶ್ಲೋಕಾರುಪಾರ್ ಸಭಾರ್, ಸಭಾರ್ ಪ್ರಕಾರಾಚೆಂ ಕಾವ್ಯೆಂ ಆಸ್ಚೆಂ ಕೊಣೆಂಯೀ ನೆಗಾರ್ ಕೆಲ್ಲೆಪರಿಂ ನಾ.
ಫುಡೆಂ ಬಸವಣ್ಣನ್ ಅಪ್ಲಿಂ ವಚನ್ ಸಾಹಿತ್ಯ್ ರಚ್ಲೆಂ ತರ್ಯೀ ತಾಕಾ ಪ್ರೇರಣ್ ಲಾಭ್ಲ್ಲೆಂ ವಾ ದೇಕ್ ಮೆಳ್ಲ್ಲಿ ಭೋವ್ಶಾ ಹೆಚ್ಚ್ ಗೃಂಥಾಂ ಥಾವ್ನ್ ಮ್ಹಳ್ಳೆಂ ಸಭಾರ್ ವಾದ್ ಮಾಂಡ್ತಾತ್. ಸತ್ ಕಿತೆಂ ಮ್ಹಳ್ಳೆಂ ಸಂಸ್ಕೃತಾಂತ್ಲೆಂ ಹೆಂ ಉತಾರ್ ಕವಿತೆಂತ್ಲ್ಯಾ ರಸಾಂವಿಶಿಂ ಗೊವಾಯ್ ದಿತಾತ್;
ಶ್ಲೋಕಮ್: ಶೃಂಗಾರ ಹಾಸ್ಯ ಕರುಣ ರೌದ್ರಾವೀರಾ ಭಯಾನಕ ಭಿಭೀತ್ಸದ್ಬುತ ಶಾಂತಸ್ಕ ನವನ ತ್ಯೇ ರಸಹ್ ಸ್ಮೃತಾಹ್
ಭೋವ್ ಮಟ್ವ್ಯಾನ್ ಕವಿತೆಂತ್ಲ್ಯಾ ನೋವ್ ರಸಾಂವಿಶಿಂ ಹೊ ಶ್ಲೋಕ್ ಸಾಂಗ್ತಾ. ತರ್ ಹೆ ನೋವ್ ರಸ್ ಖಂಚೆ?
1.
ಶೃಂಗಾರ ರಸ್ (ಸೊಭಾಯ್) - (The beauty, love, ectasy. the
aesthetics.)
2.
ಹಾಸ್ಯ ರಸ್ (ಹಾಸ್ಯ್) - (The humor. The basis for wisdom - Dreams + Reality + Humor : WISDOM.)
3.
ಕರುಣಾ ರಸ್ (ಭಿರ್ಮತ್/ದಯಾ). (The
compassion)
4.
ರೌದ್ರ ರಸ್ (ರಾಗ್/ಆಕ್ರೋಶ್). (The
anger.)
5.
ವೀರ ರಸ್ (ಶೂರ್ಪಣ್/ವೀರ್ಪಣ್). (The courage, Heroism)
6.
ಭಯಾನಕ್ ರಸ್ (ಭಿರಾಂಕುಳ್). (The
Fear.)
7.
ಭೀಭತ್ಸ ರಸ್ (The chaos, Disequilibrium).
8.
ಅದ್ಭುತ ರಸ್ (ಅದ್ಭುತಾಂ/ವಿಚಿತ್ರಾಂ). (Terrific/Exclamatory/unimaginable.)
9.
ಶಾಂತ ರಸ್ (ಶಾಂತ್/ಸಮಧಾನ್). (Peace,Tranquility,
Meditation).
ಕವಿತೆಚೆ ಥೊಡೆ ಪಂಡಿತ್ ಕವಿತೆಂತ್ ಆಸ್ಚೆ ರಸ್ ನೋವ್ ನ್ಹಂಯ್, ಧಾ ಮ್ಹಳ್ಳೊ ವಾದ್ ಮಾಂಡ್ತಾತ್. ತಾಂಚೆ ಪ್ರಕಾರ್;
10. ವಾತ್ಸಲ್ಯ್ ರಸ್ (ಭಾಂದ್/ಮಯ್ಪಾಸ್).
ಥೊಡ್ಯಾ ಬುಕಾಂನಿ ಭಕ್ತೆಕ್ ಸಯ್ತ್ ಏಕ್ ರಸ್ ಮ್ಹಣ್ ವೊಲಾಯ್ಲಾಂ ತರ್ಯೀ ’ಭಕ್ತಿ ರಸ್’ ಮ್ಹಳ್ಳೊ ರಸ್ ಕವಿತೆಂತ್ ನಾ.
ರಸ್ ಮ್ಹಳ್ಯಾರ್ ಕಿತೆಂ?
ರಸ್ ಮ್ಹಳ್ಳೊ ಸಬ್ಧ್ ಕಾನಡಿ ಭಾಸೆಚಾ ’ರಸ’ ಥಾವ್ನ್ ವಾ ಸಂಸ್ಕೃತಾಚಾ ’ರಸಮ್’ ಥಾವ್ನ್ ಆಯ್ಲಾ ಮ್ಹಣ್ಯೆತ್. ಪುಣ್ ಮೂಳ್ ಸಂಸ್ಕೃತಾಚಾ ಹ್ಯಾ ಸಭ್ದಾಚೊ ಅರ್ಥ್ ಜಾವ್ನಾಸಾ ’ರೋಸ್’. ರೋಸ್ ಮ್ಹಳ್ಯಾರ್ ಸಾರ್ ಮ್ಹಣ್ಯೆತಾ ವಾ ಜಶೆಂ ಫಳಾಚೊ ಸಾರ್ ಎಕಾ ಗ್ಲಾಸಾಂತ್ ಭರ್ಲ್ಯಾರ್ ತಾಕಾ ಮ್ಹಣ್ಯೆತ್ ಜಾಲ್ಲೊ ಸಬ್ಧ್. ಇಂಗ್ಲಿಶಾಂತ್ Juice/Flavor/Drink ಮ್ಹಣ್ಯೆತಾ.
’ರಸಂ’ ಆನಿ ’ಗುಣಂ’ ಮಧೆಂ ಜರೂರ್ ಫರಕ್ ಆಸಾ, ದೊನ್ಯೀ ಏಕ್ ನ್ಹಂಯ್, ಕವಿತೆಚೊ ಖಂಚೋಯ್ ರಸ್ ತಾಚ್ಯಾ ’ಗುಣಾ’ವಿಶಿಂ ಸಾಂಗೊಂಕ್ ಸಕಾನಾ. ವ್ಯಾಸಚ್ಯಾ ತತ್ವ್ಶಾಸ್ತಿರಾಪ್ರಕಾರ್ ’ರಸ್’ - 24 ಗುಣಾಂಪಯ್ಕಿಂತ್ಲೊ ಏಕ್ ಗೂಣ್ ಜಾವ್ನಾಸಾ.
ಉಪನಿಶದಾಂತ್ ಆಸ್ಚಾ ಷಡ್ರಸ (ಷಡ್ ಮ್ಹಳ್ಯಾರ್ ಸ) ಜಾವ್ನಾಸಾತ್; ಮೀಟ್ (Salt), ಆಂಬೊಟ್ (Sour), ತೀಕ್ (Spice), ಗೋಡ್ (Sweet), ಕೊಡು (Bitter/Pungent). ಹ್ಯಾ ಷಡ್ರಸಾಂಕ್ ಅನ್ಯೇಕಾ ಸಬ್ಧಾಚೆಂ ವ್ಯಾಖ್ಯಾನ್ ದಿಂವ್ಚೆಂ ತರ್ ’ಲೌಕಿಕ್ ರಸ್’ ಮ್ಹಣ್ಯೆತಾ.
ರಸ್ ಸಬ್ಧಾಚೊ ಅರ್ಥ್ ’ರುಚ್’ ಮ್ಹಣ್ಯೀ ಸಂಸ್ಕೃತ್ ಪಂಡಿತಾಂನಿ ವಾದ್ ಕೆಲಾ. ಪುಣ್ ಕವಿತೆಚಾ ಅರ್ಥಾನ್ ಸಾಂಗ್ಚೆಂ ತರ್ ’ರಸ್’ ಎಕಾ ಕವಿತೆಚಾ ತಾಳ್ಯಾಕ್ ವಾ ಪರ್ಮಳಾಕ್ ಎಕಾ ಉತ್ರಾನ್ ದಿಂವ್ಚೊ ಪ್ರಕಾರ್. ಹರ್ಯೆಕಾ ಸಿಂತಿಮೆಂತಾಕ್ ರಸ್ ಗರ್ಜೆಚೊ. ಎಕಾ ಕವಿತೆಚಾ ಮೂಳ್ ಸಿಂತಿಮೆಂತಾಕ್ ಖಂಚೊ ತರ್ಯೀ ರಸ್ ಭೋವ್ ಗರ್ಜೆಚೊ.
ಏಕ್ ಕಾವ್ಯೆಂ ವ ಕವಿತಾ ವಾಚುನ್ ತಾಂತ್ಲೊ ಸ್ವಾದ್ ವಾಚ್ಪ್ಯಾನ್ ಚಾಕಾಜಯ್ ತರ್ ಅಸಲೆ ರಸ್ ಭೋವ್ ಗರ್ಜೆಚೆ. ಜಶೆಂ ಉದಾಕ್, ಲಿಂಬ್ಯಾಚೊ ರೋಸ್ ಆನಿ ಸಾಕರ್ ಭರ್ಸಿಲ್ಯಾರ್ ತೆಂ ಶರ್ಬತ್ ಜಾತಾ. ಆನಿ ತಿ ರುಚ್ ಫಕತ್ತ್ ಉದ್ಕಾನ್ ವಾ ಲಿಂಬ್ಯಾ ರೊಸಾನ್ ವಾ ಸಾಕ್ರೆನ್ ದೀಂವ್ಕ್ ಸಾಧ್ಯ್ ನಾ. ಕವಿತೆಂತ್ಯೀ ಅಸಲೆ ರಸ್ ಭರ್ಸಿಲೆ ತರ್ ಮಾತ್ರ್ ತಾಕಾ ರುಚ್ ಯೆತಾ. ಅಶೆಂಚ್ ಆಮಿ ಖಂಚ್ಯಾಯ್ ಎಕಾ ತಯಾರ್ ಜಾಲ್ಲ್ಯಾ ಖಾಣಾಕ್ (Dish) ಖಾವ್ನ್ ತಾಚಿ ರುಚ್ ಸಾಂಗ್ತಾಂವ್ - ಹೆಂ ಲೌಕಿಕ್ ರಸಾಚಿ ಗೊವಾಯ್. ತಶೆಂಚ್ ಕವಿತೆಂತ್ ಚಿಂತ್ನಾಂನಿ ಉಭ್ಜಾಲ್ಲ್ಯಾ ಉತ್ರಾಂಚೆಂ ಮಿಶ್ರಣ್ ರಸ್ ಜಾವ್ನ್ ಕವಿತೆಕ್ ರುಚ್ ದಿತಾ. ಆನಿ ಜೆದ್ನಾಂ ಅಸಲೊ ರಸ್ ತ್ಯಾ ತ್ಯಾ ರುಚಿಚಾ ಲೊಕಾಂಕ್ ಹೆರ್ ರಿತಿರ್ ಸಯ್ತ್ ಮನರಂಜನ್ ದೀಂವ್ಕ್ ಸಕ್ತಾ.
ಧಾಖ್ಲೊ - ಏಕ್ ಕಾವ್ಯ ನಾಟಕ್ ಜರ್ ಏಕ್ ನಾಚ್ಪಿ ಕವಿತೆಚಾ ರಸಾಕ್ ಲಗ್ತಿ ಜಾಲ್ಲ್ಯಾ ಸಂಗೀತಾಕ್ ತೆಚ್ಚ್ ಪ್ರಕಾರಾಂತ್ ಅಪ್ಲ್ಯಾ ತೊಂಡಾಚೊ ಛಾರೊ (ಭಾವ್) ಪ್ರಕಟ್ ಕರ್ತಾ - ತೆದ್ನಾಂ ತೆಂ ಪಳೆಂವ್ಚೊ ಲೋಕ್ ತ್ಯಾ ನಾಚಾಚೊ ಸ್ವಾದ್ ಚಾಕೊಂಕ್ ಸಕ್ತಾ. ಅಸಲೆ ರಸ್ಚ್ ಮನ್ಶ್ಯಾಚಿಂ ಭಗ್ಣಾಂ ಜಾಗಂವ್ಕ್ ಸಕ್ತಾ ಆನಿ ತಾಕಾ ಪ್ರಚೋದಿತ್/ಉತ್ತೇಜಿತ್ ಕರುಂಕ್ ಪಾವ್ತಾ. ಉಪನಿಶದಾನ್ ಸಾಂಗ್ಚೆ ಪ್ರಕಾರ್ ಲೌಕಿಕ್ ರಸ್ ಆನಿ ಕಾವ್ಯ ರಸ್ ದೊನ್ಯೀ ಮನ್ಶ್ಯಾ ಚಿಂತ್ಪಾಚೆರ್ ಪ್ರಭಾವ್ ಘಾಲುಂಕ್ ಸಕ್ತಾ. ಆನಿ ಫಕತ್ತ್ ಮನ್ಶಾ ಜೀವಿ ಮಾತ್ರ್ ಅಸಲ್ಯಾ ರಸಾಂಕ್ ಅನ್ಭೋಗ್ ಕರುಂಕ್ ಸಕ್ತಾತ್.
ಕವಿತೆಂತ್ಲ್ಯಾ ನೋವ್ ರಸಾಂ ಪಯ್ಕಿ ಆಟ್ ರಸಾಂಕ್ ಭಾರತಾನ್ ಸೊಧುನ್ ಕಾಡ್ಲ್ಲೆಂ, ನೊವೊ ಶಾಂತರಸ ಉದ್ಭಟಾನ್ ಸೊಧುನ್ ಕಾಡ್ಲೊ ಮ್ಹಳ್ಳೆ ಪುರಾವೆ ಆಸಾತ್.
ಶ್ಹರೊ: ಕೊಂಕ್ಣೆಂತ್ ಎಕೆಕಾ ರಸಾಂ ವಿಶಿಂ ವಿವರಾಂತ್ ಬರಂವ್ಕ್ ಪ್ರೇತನ್ ಕೆಲೆಂ ತರ್ಯೀ ಥೊಡ್ಯಾಚ್ ರಸಾಂಕ್ ದಾಖ್ಲೆ ಮೆಳ್ಳೆ ಶಿವಾಯ್ ಸರ್ವ್ ರಸಾಂಕ್ ಧಾಖ್ಲೆ ಮೆಳ್ಳೆನಾಂತ್. ಫುಡೆಂ ಮೆಳ್ತಚ್ ಕೊಂಕ್ಣಿ ಕವಿತೆಂತ್ಲೆ ನೋವ್ ರಸ್ ಆನಿ ಎಕೆಕಾ ರಸಾಂತ್ ಫಾಮಾದ್ ಜಾಲ್ಲ್ಯಾ ಕವಿಂಚಿಂ ನಾಂವಾಂ ತಶೆಂಚ್ ಕವಿತಾಂಚೆ ಧಾಖ್ಲೆ ದಿಂವ್ಚೆಂ ಪ್ರೇಯನ್ ಕರ್ತಾಂ.
ವಲ್ಲಿ ಕ್ವಾಡ್ರಸ್, ಅಜೆಕಾರ್
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
More in Daaiz
Send your comments to author on this writing
This is not a comment box. Nothing you write here appears on the site or is shown to any other reader: it is sent to him by email, privately, and he replies to you directly if a reply is called for.