ಕೈಕಂಬಭಾಂಗ್ರಾಳೊ

ಭಾಗಿ ಜನನ್ ದಿವಸ್ ತುಕಾ, ಭಾಗಿ ಜನನ್ ದಿವಸ್ ತುಕಾ, ಭಾಗಿ ಜನನ್ ದೀಸ್ ತುಕಾ ಕ್ಲೇರಿಯಾಬ್, ಭಾಗಿ ಜನನ್ ದಿವಸ್ ತುಕಾ....

ಕ್ಲೆರೆನ್ಸ್ ಕೈಕಂಬಭಾಂಗ್ರಾಳೊ

ಜನ್ಮೋತ್ಸವ್

01-09-1958 - 01-09-2008

Placeholder: the original page gave this picture no description, and none has been written yet. It came from daaiz\daaiz\special\cp50.asp.

ಭಾಗಿ 50 ವೊ ಜನನ್ ದಿವಸ್ ತುಕಾ!

ಸಭಾರ್ ಕೊಂಕ್ಣಿ ಲೊಕಾಕ್ ’ಮಸ್ಕತ್’ ಮ್ಹಣ್ಚ್ಯಾ ಬದ್ಲಾಕ್ ’ಕ್ಲೆರೆನ್ಸ್ ಕೈಕಂಬ’ ಮ್ಹಳ್ಯಾರ್ ಮತಿಕ್ ಏಕಾಚ್ಛಾಣೆ ಕಳಿತ್ ಜಾತಾ!. ಎಕೆಕಾ ಗಾಂವಾಂತ್ ಎಕೇಕ್ ’ಸುಪರ್ ಹೀರೊ’ ಆಸಾತ್; ತ್ಯಾಪರಿಂ ಮಸ್ಕತಾಂತ್ ಆಮ್ಚೊ ’ಕ್ಲೆರೆನ್ಸ್ ಕೈಕಂಬ’ ಮ್ಹಣ್ ಹಾಂವೆ ಸಾಂಗ್ಲೆಂ ಜಾಲ್ಯಾರ್ ಅತಿಶಯ್ ಜಾಂವ್ಚೊ ನಾ ತೆಂ ಖರೋಖರ್ ಸತ್.

ಕೊಂಕ್ಣಿ ಕರಿಯಮಣಿ ಮ್ಹಳ್ಳ್ಯಾ ಸರ್ಪಳೆಚೆರ್ ಆಪ್ಲ್ಯೊಚ್ ಲ್ಹಾನ್ ಕಾಣಿಂಯೊಂ ಬರವ್ನ್ ಫಾಮಾದ್ ಜಾಲ್ಲೊ ಕ್ಲೆರೆನ್ಸ್ ಆಜ್ ಆಪ್ಲೊ ಪನ್ನಾಸಾವೊ ಜನನ್ ದಿವಸ್ ಆಚರುಂಚ್ಯಾ ಸಂದರ್ಭಿಂ ತಾಕಾ ಪರ್ಭಿಂ ಮ್ಹಣೊಂಕ್ ಮ್ಹಾಕಾ ಭೋವ್ ಸಂತೊಸ್ ಭಗ್ತಾ. ತಾಚ್ಯೊ ಕಾಣ್ಯೊ ವಾಚುನ್ ಸಭಾರ್ ಕೊಂಕ್ಣಿ ಲೋಕಾನ್ ಉದ್ಗಾರ್ ಕಾಡ್‌ಲ್ಲೊ ಆಸಾ, ತಾಚಿ ಜಾಣ್ವಾಯ್ ಪಳೆವ್ನ್ ವಿಜ್ಮಿತ್ ಪಾವ್‌ಲ್ಲಿಂ ಆಸಾತ್ ತಶೆಂಚ್ ತಾಚ್ಯಾ ಬರ್ಪಾಚಿ ಸೊಭಾಯ್ ಪಳೆವ್ನ್ ತಾಚ್ಯಾ ಮೊಗಾರ್ ಪಡ್‌ಲ್ಲಿಂಯೀ ಆಸಾತ್! ಅಶೆಂ ಮ್ಹಣ್ತಾನಾ ತೊ ಏಕ್ ನಶೀಬ್‌ವಂತ್ ಮ್ಹಣ್ ಹಾಂವೆ ಮ್ಹಣಾನಾಸ್ತಾಂ ತರೀ ಕಸೆಂ ರಾಂವ್ಚೆಂ?

ತಾಣೆಂ ಭಾಷಣ್ ದಿತಾನಾ ತಾಚ್ಯಾ ಉತ್ರಾಂಚೊ ವ್ಹಾಳ್ ಪವಿತ್ರ್ ಗಂಗಾ ನಂಯ್ತ್ ವ್ಹಾಳ್ಚ್ಯಾ ತ್ಯಾ ಪವಿತ್ರ್ ಉದ್ಕಾಪರಿಂ; ತಾಣೆಂ ಏಕ್ ಪತ್ರ್ ಸಂಪಾದ್ಪುನ್ ಪ್ರಕಟ್ತಾನಾ ಉಟ್ಚೊ ಸುವಾದ್ ಎಕಾ ಧವ್ಯಾ ಸುಗಂಧಿಕ್ ಸರಿ; ತಾಣೆಂ ಸಭೆರ್ ಮುಖಾರ್ ಯೇವ್ನ್ ಸಭಾಲಂಕ್ರಿತ್ ಕರ್ತಾನಾ ತಾಚ್ಯಾ ಮುಖೇಲ್ಪಣಾಚಿ ಸುವಾದ್ ಎಕಾ ಗುಲೊಬಾಚ್ಯಾ ಪಾಕ್ಳ್ಯಾಂನಿ ಸೆಜಾರಾ ಹಾಡ್ಚ್ಯಾ ತ್ಯಾ ಕೋಮಲ್ ಪರ್ಮಳಾಪರಿಂ. ತಾಚ್ಯಾ ಖರ್‍ಯಾ ವಾಂವ್ಟಿನ್ ಆಜ್ ಮಸ್ಕತಾಂತ್ ಕೊಂಕ್ಣಿ ಕಾರ್ಯಿಂ ಭಾರಿಚ್ ಗಮ್ಮತಾಯೆನ್ ಚಲ್ತಾತ್, ತಾಚಿ ಪತಿಣ್ ಜೇನ್ ಐಡಾ ಸಾಂಗಾತಾ ಮೆಳ್ತಾನಾ ಕಸಲಿಂಯ್ ಕಾರ್ಯಕ್ರಮಾಂ ಕಿತೆಂಚ್ ಲ್ಹಾರಾಂ ನಾಸ್ತಾಂ ಶಾಭೀತಾಯೆನ್ ಚಲ್ತಾತ್, ದೊಗಾಂ ಭುರ್ಗ್ಯಾಂ ಆಲಿಸ್ಟರ್ ಆನಿ ಅಮಾಂದ ಸಂಗಿಂ ಹ್ಯಾ ಮೊಗಾಳ್ ಕುಟ್ಮಾಚೊ ಸಾಂಗಾತ್ ಆಜ್ ಮಸ್ಕತಾಂತ್ಲ್ಯಾ ಕೊಂಕ್ಣಿ ಸಮಾಜೆಂತ್ ಕಿತೇಂಯ್ ಕರುಂಕ್ ಅಸಾಧ್ಯ್ ನ್ಹಯ್ ಮ್ಹಳ್ಳ್ಯಾಚಿ ಏಕ್ ಖರಿ ಕುರುಃ ಜಾವ್ನಾಸಾತ್.

ಕ್ಲೇರೆನ್ಸಾಚೆಂ ಕುಟಾಮ್ ಸಂಪೂರ್ಣ್; ತಾಚೊ ಸಂತೊಸ್ ಆಜ್ ಹ್ಯಾ ಭಾಗಿ ಸಂದರ್ಭಾರ್ ಏಕಾ ಥಳ್ಥಳಿತ್ ನಕ್ತಿರಾಚೆಂ ಸೊಭಾಯೆ ಕೀರ್ಣ್. ಹಾಂವ್ ಸಭಾರ್ ಮಯ್ಲಾಂ ಪಯ್ಸ್ ಆಸಾಂ ತರೀ ತಾಚ್ಯಾ ತ್ಯಾ ಮಧುರ್ ಹಾಸ್ಯಾಂತ್ ಪಾತ್ರ್ ಘೆಂವ್ಕ್ ಆನಿಂ ಹೆಂ ಗಾಯನ್ ಗಾಂವ್ಕ್ ಭಾರಿಚ್ ಸಂತೊಸ್ ಪಾವ್ತಾಂ ಆನಿಂ ಮ್ಹಣ್ತಾಂ: ಭಾಗಿ ಜನನ್ ದಿವಸ್ ತುಕಾ, ಭಾಗಿ ಜನನ್ ದಿವಸ್ ತುಕಾ, ಭಾಗಿ ಪನ್ನಾಸಾವೊ ಜನನ್ ದಿವಸ್ ತುಕಾ ಮೊಗಾಳ್ ಕ್ಲೇರೆನ್ಸ್, ಭಾಗಿ ಜನನ್ ದಿವಸ್ ತುಕಾ!

ಸರ್ವೆಸ್ಪರಾಚಿಂ ವಿಂಚ್ಣಾರ್ ಆಶೀರ್ವಾದಾಂ ತುಕಾ ಹ್ಯಾ ಭಾಗಿ ಸಂದರ್ಭಾರ್ ಮಾಗ್ಚ್ಯೆ ಬರಾಬರ್, ತುಂ ತುಜಿಂ ಸ್ವಪ್ಣಾಂ ಸ್ವಪ್ಣೆಂವ್ನ್ಂಚ್ ರಾವ್, ತುಜೊ ಮುಖ್ಲೊ ಫುಡಾರ್‌ಚ್ ತುಜೆಂ ಯಶ್ ಜಾಂವ್ ಮ್ಹಣ್ ಆಶೆತಾಂ ಆನಿಂ ಸರ್ವ್ ನಂದನ್ ಮಾಗ್ತಾಂ.

-ಆಸ್ಟಿನ್ ಪ್ರಭು, ಚಿಕಾಗೊ.

ಹೆರಾಂಕ್ ಸದಾಂಚ್ ಬರೆಂ ದಿಂವ್ಚೊ

ಕೊಂಕ್ಣಿ ಮಾಯೆಚೊ ಪ್ರೇಮಿ

ವಿಂಚ್ಣಾರ್ ದೆಂವೆ ಅನಿ ದೆಣಿಂ

ಆಮಾ ಸರ್ವಾಂಚ್ಯಾ ಮೊಗಾ ಭಂಡಾರ್

ಕೊಂಕ್ಣಿ ಕಾಣ್ಯೆಗಾರಾಂಚೊ ಸರ್ಧಾರ್

ವ್ಹಾಳಯ್ತಾ ಮೊಗಾ ಮಯ್ಪಾಸಾಚಿ ಝರ್

ಕೊಂಕ್ಣಿ ಸಾಹಿತಿಕ್ ಸಂಸಾರಾರ್....

ಪಿಂತಾಮಾಗೆಲ್ಯಾ ಕುಟ್ಮಾಂತ್ಲೊ ಪರ್ಮಳಿಕ್ ಕಳೊ,

ಜಾಣ್ವಾಯೆ ಪುಂಜೊ, ಗೂಂಡ್ ಚಿಂತ್ಪಾಚೊ,

ನಿಸ್ವಾರ್ಥಿ ಸ್ವಭಾವಾಚೊ,

ಮ್ಹಜ್ಯಾ ಕಾಳ್ಜಾಕ್ ತೊ ಲಾಗ್ಶಿಲೊ,

ಮಂಗ್ಳುರ್‌ಗಾರಾಂಚೊ ಭಳಾದಿಕ್ ಖಾಂಬೊ

ಮಾಯ್‌ಭಾಶೆಕ್ ಆವಯ್‌ಚೊ ಮಾನ್ ಅರ್ಪುಂಚೊ

ಕಶ್ಟಿ ಜಿಣ್ಯೆಕ್ ಮಾರುನ್ ವೆಂಗ್

ಬರೊ ಸಾಮಾರಿಯಾಗಾರ್ ಸರ್ವಾಂಕ್ ಮೊಗಾಚೊ

ಹೊಚ್ ಮಾನಾಚೊ ಅನಿ ಘನಾಚೊ ವ್ಯಕ್ತಿ ಅಮ್ಚ್ಯಾ ಸರ್ವಾಂಚ್ಯಾ ಮೊಗಾಚೊ ಕ್ಲೇರೆನ್ಸ್ ಪಿಂಟೊ. ಅಸಲ್ಯಾ ಮಾನೆಸ್ತಾಕ್, ಮೊಗಾಚ್ಯಾ ಕ್ಲ್ಯಾರಿಯಾಬಾಕ್ ಪನ್ನಾಸಾವ್ಯಾ ಜಲ್ಮಾದಿಸಾಚೆ ಉಲ್ಲಾಸ್ ಪಾಟಂವ್ಕ್ ಮ್ಹಾಕಾ ವರ್ತೊ ಮಾನ್ ಅನಿ ಅಭಿಮಾನ್ ಭಗ್ತಾ ಅನಿ ಮನ್ ಸಂತೊಸಾಚ್ಯಾ ಲ್ಹಾರಾಂನಿ ಉಪ್ಯೆತಾ. ತಾಕಾ ಹ್ಯಾ ಭಾಗಿ ದಿಸಾ ಭಾಂಗ್ರಾಳೊ ಜಲ್ಮಾ ದಿವಸ್ ಮಾಗ್ತಾಂ. ಜಿಣ್ಯೆಂತ್ ಅನಿ ವಾವ್ರಾಂತ್ ತಾಚಾ ಯಶಸ್ವಿ ಅಶೆತಾಂ. ರಚ್ನಾರ್ ತಾಕಾ ಅನಿ ತಾಚ್ಯಾ ಕುಟ್ಮಾಕ್ ಭಾವ್ಳ್ಯಾಂನಿ ತಾಚಾ ಅರಾವ್ನ್ ಧರುಂ. ಲಾಂಭ್ ಅವ್ಕ್ ಭಳ್ ಭಲಾಯ್ಕಿ ಜಿಣ್ಯೆಂತ್ ತಾಚ್ಯಾ ನಂದನ್ ಜಾಂವ್......... ಹೆಂ ಮ್ಹಜೆಂ ಖಾಲ್ತೆಂ ಪ್ರಾರ್ಥನ್ ಮೊಗಾ ತುರ್‍ಯಾಚೆಂ ಅರ್ಪಣ್.......

-ಅಪೋಲಿನಾರಿಸ್ ಡಿ’ಸೋಜ್.

ತುಜ್ಯಾ ಜಲ್ಮಾದಿಸಾ.. ಮ್ಹಜೆಂ ರುದಾನ್

ಭಾಂಗ್ರಾಳ್ಯಾ ಜಲ್ಮಾದಿಸಾ ತುಜ್ಯಾ

ಪನ್ನಾಸ್ ಸೊಭಿತ್ ಗುಲೊಬಾಂ ತುರೊ

ಅರ್‍ಪುಂಕ್ ತುಕಾ ಆಶೆಲೊಂ ಇಷ್ಟಾ...

ಪೂಣ್...

ಸಂಸಾರಾಂತ್ಲಿ ಸರ್‍ವ್ ಫುಲಾಂ ವೊಡ್ತಾಂ ಮಸ್ತಿಲ್ಯಾರೀ

ತುಜ್ಯಾ ಸೊಭಿತ್ ಶೆಗುಣಾಂ ವರ್‍ತೊ

ಎಕೀ ಗುಲೊಬ್ ಮ್ಹಾಕಾ ಮೆಳ್ಳೊನಾಂ

ಗುಲೊಬ್ ಮ್ಹಾಕಾ ಮೆಳ್ಳೊನಾಂ...

ಭಾಂಗ್ರಾಳ್ಯಾ ಜಲ್ಮಾದಿಸಾ ತುಜ್ಯಾ

ಪನ್ನಾಸ್ ಪರ್‍ಜಳಿಕ್ ನಕ್ತಿರಾಂ ಖುಂಟುನ್

ಮುಕುಟಾರ್ ತುಜ್ಯಾ ಲಾಂವ್ಕ್ ಆಶೆಲೊಂ ಇಷ್ಟಾ

ಪೂಣ್...

ವಯ್ಲ್ಯಾ ಸಾತ್ವ್ಯಾ ಸರ್‍ಗಾರ್ ಸಾಸ್ಪಲ್ಯಾರೀ

ತುಜ್ಯಾ ಪರ್‍ಜಳಿಕ್ ತಾಲೆಂತಾಂಕ್ ಮಿಕ್ವಾಲ್ಲೆಂ

ಎಕೀ ನಕ್ತಿರ್ ಹಾತಾಕ್ ಲಾಗ್ಲೆನಾಂ

ನಕ್ತಿರ್ ಹಾತಾಕ್ ಲಾಗ್ಲೆನಾಂ...

ಭಾಂಗ್ರಾಳ್ಯಾ ಜಲ್ಮಾದಿಸಾ ತುಜ್ಯಾ

ಪನ್ನಾಸ್ ಮೊಲಾಧಿಕ್ ಮೊತಿಯಾಂ ಹಾರ್

ಗಳ್ಯಾರ್ ತುಜ್ಯಾ ಸೊಬೊಂವ್ಕ್ ಆಶೆಲೊಂ ಇಷ್ಟಾ

ಪೂಣ್...

ಸಂಸಾರಾಂತ್ಲೆ ಮಹಾ ಸಾಗೊರ್ ಉಸ್ತಿಲ್ಯಾರೀ

ತುಜ್ಯಾ ಅಮೊಲಿಕ್ ಇಷ್ಟಾಗತೆಕ್ ಮಿಕ್ವಾಲ್ಲೆಂ

ಎಕೀ ಮೊತಿಂ ಮ್ಹಾಕಾ ಮೆಳ್ಳೆಂನಾಂ

ಮೊತಿಂ ಮ್ಹಾಕಾ ಮೆಳ್ಳೆಂನಾಂ...

ಭಾಂಗ್ರಾಳ್ಯಾ ಜಲ್ಮಾದಿಸಾ ತುಜ್ಯಾ

ಗುಲೊಬ್ ಮೊತ್ಯಾಂ ಕಾಣಿಕೊ ವೊಜಿಂ

ಅರ್‍ಪುಂಕ್ ಆಜ್ ಸಕಾನಾಂ ಇಷ್ಟಾ

ಪೂಣ್...

ಹಜಾರೊಂ ಮಯ್ಲಾಂ-ವಾಟ್ ಸ್ಪಿರಿತಾನ್ ಚಮ್ಕೊನ್

ಮೊಗಾಮಯ್ಪಾಸಾನ್ ತುಕಾ ವೆಂಗುನ್ ಆರಾವ್ನ್

ಬೆಸಾಂವಾ ಪಾವ್ಸ್ ಮಾತ್ಯಾರ್ ತುಜ್ಯಾ ಮಾಗೊನ್

ಶೆಣ್ತುರಾಂಕ್ ಪಳೆಂವ್ಚೆಂ ಆವ್ಕ್ ತುಕಾ ಲಾಭೊನ್

ಜಿವಿತಾಂತ್ಲೆಂ ತುಜೆಂ ಸ್ವಪಣ್ ಖರೆಂ ಜಾಂವ್...

ಹೆಂಚ್ ದೆವಾಲಾಗಿಂ ಮ್ಹಜೆಂ ಮಾಗ್ಣೆಂ ಇಷ್ಟಾ

ದೆವಾಲಾಗಿಂ ಮ್ಹಜೆಂ ಮಾಗ್ಣೆಂ...

- ಜೆರಿ ಡಿ’ಮೆಲ್ಲೊ.

- ಗುಣಾಂ ಶೆಗುಂಣಾಚೆಂ ದಾಯ್ಜ್

ಕಾಳ್ಜಾಂ ಪಾನಾಂ ಜಿಣ್ಯೆಂತ್ಲಿಂ ಉಸ್ತೊನ್ ಝಳ್ಕಲ್ಯಾ ಮಹಾನ್ ವ್ಯಕ್ತಿ ಪಾಯ್ಕಿಂ, ಹಾಂವೆಂ ಮ್ಹಜೊ ’ಮೆಸ್ತ್ರಿ’ ಮ್ಹಣೊನ್ ಮಾನ್ ಕರ್ಚೊ ಮಾನೆಸ್ತ್ ’ಕ್ಲೆರೆನ್ಸ್ ಪಿಂಟೊ’. ಹಾಚೊ ಜಲ್ಮ್ ಕೈಕಾಂಬಾಂತ್, ದೆವಾದಿನ್ ಡೆನಿಸ್ ಫ್ರಾನ್ಸಿಸ್ ಪಿಂಟೊ ಅನಿ ಅಲಿಸ್ ಪಿಂಟೊ ಹಾಂಚಾ ಕುಟ್ಮಾ ರಾವ್ಳೆರಾಂತ್ 1 ಸಪ್ಟೆಂಬಾರ್ 1958 ಜಲ್ಮಾಲ್ಲೊ.... ಕ್ಲಾರಿ ತಾಲೆಂತಾಚೊ ಪುಂಜೊ, ಗುಣಾ ಶೆಗುಂಣಾಚೆಂ ದಾಯ್ಜ್. ವಾಡೊನ್ ಯೆತಾನಾ ಅಪ್ಲ್ಯಾ ಲಾನ್ ಪ್ರಾಯೆರ್‌ಚ್ ಕೊಂಕ್ಣೆ ಮಾತೆಸೊ ಮೊಗಾಚೊ ಶಿಸ್ ಜಾವುನ್, ತಿಚೊ ಸಾಹಿತಿಕ್ ಕೀರ್ತೆಚೊ ಬಾವ್ಟೊ ಉಂಚ್ ಉಭಾರಾಯಿಲ್ಲೊ ಅನಿ ಅತಾಂಯ್ ಭರ್ಮಾನ್ ಉಬೊಂವ್ನ್‌ಚ್ ಅಸ್ಚೊ ಎಕ್ ವರ್ತೊ ಕೊಂಕ್ಣಿ ಪ್ರೇಮಿ.

ಕ್ಲಾರಿಚಿ ಮೊಗಾಳ್ ಪತಿಣ್ ಜೇನ್ ಐಡಾ ಪಿಂಟೊ ಅನಿ ಭುರ್ಗಿಂ ಆಲಿಸ್ಟರ್ ಅನಿ ಆಮಾಂದಾ...... ಕ್ಲಾರಿಚಾ ಯಶಸ್ವೆಚೆಂ ಪಂಚಾಂಗ್. ತಾಂಚೊ ಮೊಗಾವ್ಹಾಳೊ ಅನಿ ಸಹಾಕಾರಾಚೊ ಝೆಲೊ... ಕ್ಲಾರಿಚಾ ಜೈತಾಚೊ ಕಳೊ.

ಕ್ಲೆರೆನ್ಸ್ ಕೈಕಂಬ ಮ್ಹಳ್ಯಾ ಫಾಮಾದ್ ಲಿಖ್ಣೆಂ ನಾಂವಾಖಾಲ್ ನಾಂವಾಡ್ಲೆಲ್ಯಾ ಮಾನೆಸ್ತಾಕ್ ಮಟ್ವ್ಯಾ ಕಾಣೆಯೆಚೊ ರಾಯ್ ಮ್ಹಣ್ ತಾಚೆ ಸಭಾರ್ ಅಭಿಮಾನಿ ಆಪಯ್ತಾತ್. ಪಾಟ್ಲ್ಯಾ ಸಭಾರ್ ವರ್ಸಾಂ ಥಾವ್ನ್ ಮಸ್ಕಾತ್ಂತ್ ಕೊಂಕ್ಣಿ ಪ್ರಜೆ ಖಾತಿರ್ ಅನಿ ದುರ್ಭಳ್ಯಾಂಚ್ಯಾ ಉಧರ್ಗತೆ ಖಾತಿರ್ ತೊ ವಾವುರ್ತಾ. ನಿಸ್ವಾರ್ಥಿ ಮನೋಭವ್, ಗರ್ಜೆಂತ್ ಹಾಸ್ತೊ ಅಧಾರ್ ಅನಿ ಖಾಲ್ತೆ ಶೆಗುಣ್ ತಾಚೆ, ಸರ್ವಾಂಚ್ಯಾ ಹೊಗ್ಳಿಕೆಚೆಂ ತಶೆಂಸ್ ಅನಿ ಲೊಕಾ ಮೊಗಾಚೆ. ಮಂಗ್ಳುರ್ ಕಥೊಲಿಕ್ ಕೆಂದ್ರ್ ಮಸ್ಕತ್, ಹಾಚೊ ಅಧ್ಯಕ್ಷ್ ಜಾವ್ನ್ ಹ್ಯಾ ವರ್ಸಾ ತಾಚೊ ಖಳ್ಮಿತ್ ನಾತ್‌ಲ್ಲೊ ವಾವ್ರ್ ತೊ ಬೆಟೊವ್ನ್ ಅಸಾ.

ಅಸಲ್ಯಾ ಎಕಾ ವ್ಯಕ್ತಿಕ್ ಭಾಗಿ ಬಾಂಗ್ರಾಳ್ಯಾ ಜಲ್ಮಾ ದಿವಸಾಚೆ ರಾಸ್ ರಾಸ್ ಉಲ್ಲಾಸ್ ಪಾಟಂವ್ಕ್ ಮ್ಹಾಕಾ ವರ್ತೊ ಅಭಿಮಾನ್ ಭಗ್ತಾ. ಸಗ್ಳೆ ಕೊಂಕ್ಣಿ ಮಾತೆಚ್ಯಾ ಮೊಗಾಳ್ ಬುರ್ಗ್ಯಾಂ ಸಂಗಿಂ ಮೆಳೊನ್, ರಸ್ಮಾಚಾ ತೊರಾಣಾಂನಿ ಮಾಕ್‌ಲ್ಲೊ, ಮೊಗಾಚ್ಯಾ ಉಮಳ್ಯಾಂನಿ ವಿಣ್ಲಲೊ ಎಕ್ ಭಾಗಿ ಜಲ್ಮಾ ದಿವಸ್ ಮಾಗ್ತಾಂ.

ಮಂಗ್ಳುರ್ ಘಾರ್ ಜಳ್ತ್ಯಾ ನೆಕೆತ್ರಾಂ ಸರ್

ಸರ್ವಾಂಕಿ ವೊತ್ತಾಯ್ ಮೊಗಾ ಝರ್

ಅಪಾರಿಮೀತ್ ಗೂಂಡ್ ಜಾಣ್ವಾಯ್ ತುಜಿ

ಸರ್ವಾಂಚ್ಯಾ ಹೊಗ್ಳೆಕ್ ಮೆಚ್ವೊಂಚಿ

ಆವಾಜ್ ತುಜೊ ಝಗ್ಲ್ಯಾಣ್ಯಾಚೊ

ಮೆಸ್ತ್ರಿ ತುಂ ಶಿಸ್ತೆಚೊ,

ತಾಲೆಂತಾಚೊ ಪುಂಜೊ, ಗುಣಾ ಶೆಗುಣಾಚೆಂ ಭಂಡಾರ್

ಗರ್ಜೆಂತ್ ದಿತಾಯ್ ಹಾಸ್ತೊ ಅಧಾರ್.

ತಾಲೆಂತಾಂ ಝಳವ್ನ್ ವೆಳಾ ಕಾಳಾಚೊ ಪ್ರಯೋಗ್

ಕರುನ್ ಸಾಮಾಜ್ ಸೆವಾ ಚಾಲ್ತೊ ಉದ್ಯೊಗ್

ಕಾಳಿಜ್ ತುಜೆಂ ಮೊವಾಳ್ ಖರೆಂ

ಉಪ್ಕಾರಿ ಮನ್ ತುಜೆಂ ಸರ್ವಾಂಕಿ ಮೆಚ್ವಾತಾ ಬರೆಂ

ಹಾಸೊ ತುಜ್ಯೊ ಪಿಶ್ಯಾರ್ ಘಾಲ್ಚ್ಯೊ

ವದನ್ ತುಜೆಂ ಚಂದ್ರಾ ಸಾರ್ಕೆಂ

ನಿಸ್ವಾರ್ಥಿ ಶೆಗುಣ್, ವರ್ತಿ ಹುಮೆದ್

ಹೆಂಚ್ ತುಜೆಂ ಮೊಗಾ ಭವಿಶ್ಯ್

ಪನ್ನಾಸ್ ವರ್ಸಾಂ ಭಾಂಗ್ರಾಳಿಂ

ಪಾಶಾರ್ ಜಾಲಿಂ ಹ್ಯಾ ಸಂಸಾರಿಂ

ದಿಸ್ತಾಯ್ ಪಂಚ್ವೀಸಾಂಚೊ ತರ್ನಾಟೊ

ಜಾವ್ನ್ ಮುಖೆಲಿ ಮಂಗ್ಳುರ್ ಕೆಂದ್ರಾಚೊ

ಮಾರ್ಲಿಯ್ ತುವೆಂ ಆರ್ಧಿ ಸೆಂಚುರಿ

ಮಾಗ್ತಾಂವ್ ಜಾಂವ್ ಭರ್ಪೂರ್ ತಿ

’ಸಚಿನ್ ಸೆಂಚುರಿ’ ಕ್ರಿಕೆಟ್ ಮ್ಯಾಚಾಂತ್,

ತುಜಿ ಸೆಂಚುರಿ ಜಿಣ್ಯೆ ಮೆಟಾಂತ್

ದೀಸ್ ಉದೆಲಾ ವರ್ತ್ಯಾ ಸಂತೊಸಾಚೊ

ತುಜಾ ಪನ್ನಾಸಾವ್ಯಾ ಜಲ್ಮಾ ಅಚರಾಣಾಸೊ

ಧನ್ಯಾ ದೆವಾ ಮಾಗೊನ್ ಧಾರಾಳ್ ಬೆಸಾಂವಾಂ

ಲಾಂಬ್ ಅವ್ಕ್, ಭಳ್ ಭಲಾಯ್ಕಿ, ಯಶಸ್ವಿ, ಅತಾಂ ಅನಿ ಸದಾಂ.

ಸರ್ವ್ ಬರೆಂ ಮಾಗ್ತಾಂವ್ ತುಕಾ ಮೊಗಾಳ್ ಮಿತ್ರಾ.....

ಮೊಗಾಸವೆಂ ಹೆಂ ಕವನ್ ಅರ್ಪಿತಾಂವ್, ಮೈಕಲ್, ನಿಮ್ಮಿ, ಆಂಜ್ ಮೆಲಿಸ್ಸಾ, ಅನಿ ಬಾಳ್ ಮೆಲಿನಾ....

- ನಿರ್ಮಲಾ ಗೋವಿಯಸ್.

ಪನ್ನಾಸಾಂಚ್ಯಾ ಮಯ್ಲಾ ಫಾತ್ರಾರ್........!!

ಮಸ್ಕತಾಂತ್ಲ್ಯಾ ಖಂಚ್ಯಾಯ್ ಕಾರ್ಯಾಂಕ್, ಪ್ರತ್ಯೇಕ್ ಥರಾನ್ ಕೊಂಕ್ಣಿಂ ಕಾರ್ಯಾಂಕ್ ಜರ್, ಏಕ್ ಖುಶಾಲ್ - ಬಾರೀಕ್ ತರೀ ಹಸ್ತಿಚೆಂ ಭಳ್ ಆಸ್ಚ್ಯಾ ಎಕಾ ವ್ಯಕ್ತಿಚೆಂ’ ಮೆತೆರ್ಪೆಣ್ ನಾಂ ತರ್, ಅಶೆಂ ಲಾಗ್ತಾಕೀ, ಮೀಟ್ ನಾತ್ಲೆಲ್ಯಾ ಚಾಪ್ಪೆ ಚಾರಟ್ಟ್ ಜೆವ್ಣಾಪರಿಂ!!

ಮಸ್ಕತ್ ಕೊಂಕ್ಣಿಂ ಸಮುದಾಯಾಚಾ ಹರ್ ಪರ್ಜೆಚಾ ಶಿರಾ-ಶಿರಾಂನಿಂ ಕೊಂಕ್ಣಿಂ ರಗಾತ್ ವ್ಹಾಳಂವ್ಚೆಂ ಸುಫಳ್ ಪ್ರಯತ್ನ್ ಕರುನ್ ವೀರ್ ಜಾಲ್ಲೊ ಕೊಂಕ್ಣಿಂ ಪುರುಷ್, ದುಸ್ರೊ ಕೊಣೀಂ ನ್ಹಯ್, ಬಗಾರ್ ‘ಕ್ಲೇರೆನ್ಸ್ ಡೊನಾಲ್ಡ್ ಪಿಂಟೊ’ ಕೈಕಂಬಾಚೊ, ಯಾನೆ ಮಸ್ಕತಾಂತ್ಲೊ, ಹೀರೊ, ‘ಕ್ಲೇರಿ’.

ಖುದ್ದ್ ಉಣ್ಯಾರ್ ಉಣೆಂ ತೀಸ್ ವರ್ಸಾಂಚೆಂ ಸಾಹಿತಿಕ್ ಫಿಕಾಯ್ ಭರುನ್ ವೊಮ್ತೊಂವ್ಚಾ, ಕ್ಲೇರಿಕ್, ನವೆಸಾಂವಾಂಕ್ ಹಾತ್ ಘಾಲ್ಚೆಂ, ಹೆರಾಂಕ್ ಲಗ್ತಿ ಜಾಲ್ಲಿ ಜವಾಬ್ಚಾರಿ ವ್ಹಯ್ಸುನ್ ದೀವ್ನ್ ಪ್ರೇರಣ್ ಕರ್ಚೆಂ ಶಾಣೆಂಪಣ್, ಧಾ ಜಣಾಂಕ್ ಸಾಂಗಾತಾ ಭರ್ಸುನ್, ತಾಂಚೆ ಥಾವ್ನ್ ಮೊತಿಯಾಂ ಕಾಂತಾವ್ನ್, ತ್ಯಾ ಮೊತಿಯಾಂಚೊ ಹಾರ್ ಹೆರಾಂಚಾ ಗಳ್ಯಾಕ್ ಸುಂದರಂವ್ಚೆಂ ಆಪ್ಲೆಂಪಣ್ ಆಸಾ ತರ್, ಫಕತ್ತ್, ಆಜೀಕ್ ಪನ್ನಾಸಾಂಚೊ ಪಾಗೊರ್ ಉತ್ರೊಂಚಾ ‘ಮಸ್ಕತಚಾ ಮುಕುಟಾಕ್, - ಮಾನೆಸ್ತ್ ಕ್ಲೇರೆನ್ಸ್ ಡೊನಾಲ್ಡ್ ಪಿಂಟೊ’ಕ್ ಮಾತ್ರ್ ಮ್ಹಳ್ಯಾರ್ ಕಾಂಯ್ ಅತೀಶಯ್ ಜಾಂವ್ಚಿನಾಂ!!

‘ಧನ್ಯ್ ತುಮ್ಕಾಂ, ದೆವಾದೀನ್ ದೇನಿಸ್ ಆನಿಂ ಆಲಿಸ್ ಬಾಯೆ!
ಬಾಂಗಾರ್ ತಸಲ್ಯಾ ಕೊಂಬ್ಯಾಕ್ ಜಲ್ಮ್ ದಿಲ್ಯಾಕ್,
ಕೊಂಕ್ಣಿಂ ಪರ್ಜಾ ತುಮ್ಕಾಂ ಸದಾಂ ಋಣಿಂ...!
ತುಮ್ಚೆಂ ಸಾಲ್ವಾರ್ ಜಾಂವ್, ದನ್ಯಾ ದೆವಾಚಾ ಭಾಗಿಂತ್!!’

ಮಾನೆಸ್ತ್ ಕ್ಲೇರೆನ್ಸ್, ಗುರ್ಪುರ್, ಕೈಕಂಬನ್ ಹಾತಿಂ ಧರ್ನಾತ್ಲೆಲೆಂ ಸಾಹಿತ್ಯ್ ನಾಂ.
ಆಪ್ಲ್ಯಾ ಎಕೀನ್ ಶೈಲೆನ್ ಕಾಂಯ್ ಕಾಂಟ್‌ಭರ್ ಮಟ್ವೊ ಕಾಣಿಯೊಂ, ದಾಲಿಭರ್ ಕವಿತಾಂ, ಕುರ್ವೆಂಭರ್ ಲೇಖನಾಂ, ಕುರ್ಪಣೊಭರ್ ಕಾದಂಬರಿಯೊ, ಥೊಡೆಶಿಂ ಕಾರ್ಯೆಂ ನಿರ್ವಾಹಣ್ ಗುರ್ಕಾರ್ಪಣಾಂ, ಫೊಕಾಣಾಂ ಆನಿಂ ಮುಖೇಲ್‌ಪಣಾಂ, ತಾಚಿ ಗೀರೆಸ್ತ್‌ಕಾಯ್ ಸಾಂಗ್ತಿತ್.

ಸಾಂಗಾತಾಚ್ಚ್, ಹೆರಾಂಕ್ ಹುಮೇದಿಚೆಂ ಕಿಟಾಳ್ ಪೆಟಾವ್ನ್, ತಾಂಚೆ ತಾವ್ನ್ ಸಾಹಿತ್ಯ್ ರಸ್ಚಿ ಬುಧ್ವಂತ್ಕಾಯ್, ಎಕಾಚ್ಚ್ ಉತ್ರಾನ್ ಸಾಂಗ್ಚೆಂ ತರ್ ‘ಲೇಖಕಾಂಕ್ ರಚ್ಚೆಂ ತಾಲೆಂತ್’ ಕ್ಲೇರಿ ಥಂಯ್ ಉಟೊನ್ ದಿಸ್ತಾ, ಆನಿಂ ಸಭಾರಾಂನಿ ಹರ್ ಕಾಳಾರ್ ಉಲ್ಲೇಖ್ ಕೆಲಾಂ.

ಸತ್ತ್ ಸಾಂಗ್ಚೆಂ ತರ್, ಆಜ್, ಮಸ್ಕತಾಂತ್ ಕೊಂಕ್ಣಿಂ ಸಕ್ರೀಯ್ ಥರಾನ್ ಜೀವಂತ್ ಆಸಾ ತರ್, ಪಕತ್ತ್ ಕ್ಲೇರಿ ಅನಿಂ ಕ್ಲೇರಿ ತಸಲ್ಯಾ ಬೊಟಾಂನಿಂ ಮೆಜ್ಚಾ ತಸಲ್ಯಾ ಧೀಮಂತ್ ವ್ಯಕ್ತಿಂಚ್ಯಾ ನಿಸ್ವಾರ್ಥಿ, ಪುಂಕ್ಯಾಚ್ಯಾ ವಾವ್ರಾಥಾವ್ನ್. ಹಾಂಕಾಂ ಆಮಿಂ ಅಭಾರಿಂ!

ಅಸಲ್ಲ್ಯಾಚ್ಚ್ ಕಾಲೆತಿಚೊ ಆನ್ಯೇಕ್ ಮಾನೆಸ್ತ್ ಬಾಬ್ ಜೆರಿ ಡಿ’ಮೆಲ್ಲೊ, ಬೆಂದುರ್, ಹಾಚೊ ಉದ್ಗಾರ್ ತರೀ ಆಯ್ಕಾ!!
“ಮ್ಹಜ್ಯಾ ಕಾಳ್ಜಾ ಆಲ್ತಾರಿರ್ ಹಾವೆಂ ಧುಂಪವ್ನ್ ಪುಜಾ ಕರ್ಚೊ... ಮ್ಹಜೊ ಸಾಹಿತಿಕ್ ಗುರು.... ಮಾನೆಸ್ತ್ ಕ್ಲೇರೆನ್ಸ್, ಕೈಕಂಬ”
ಎಕಾ ಅನುಭವಿ ವಾವ್ರಾಡಿ/ಲೇಖಕಾನ್, ಎಕಾ ಮಹಾನ್ ಸಾಹಿತಿಕ್ ದಿಂವ್ಚೊ, ಗೌರವ್ ಆನಿಂ ಸ್ಥಾನ್.

ಎಂ. ಸಿ. ಸಿ. ಪಿ. ಅಜ್ ಏಕ್ ಘನಾನ್ ಮಾತೆಂ ಉಕಲ್ನ್ ಆಸಾ ತರ್, ತ್ಯಾ ಜಿನ್ಸಿಂ, ಕ್ಲೇರಿ ಆನಿಂ ತಾಚ್ಯಾ ಸಾಂಗೊಡ್ಶಾಂಚೊ ವಾವ್ರ್ ಉಲ್ಲೇಕ್ ಕೆಲ್ಲೆ ತಿತ್ಲೊ ಉಣೆಂಚ್ಚ್.

ಅಸಲ್ಲೊಚ್ಚ್ ನಿರಂತರಿ ವಾವ್ರ್ ಕ್ಲೇರಿ ಥಾವ್ನ್, ಮುಖಾರೀಂಯ್ ವ್ಹಾಳೊಂದಿ ಆನಿಂ ಹ್ಯಾ ವಿಶಿಂ ಕಿತೆಂಯ್ ಪುಡ್ಲದ್ ಸ್ವಪ್ಣಾಂ ಆಸಾತ್ ತರ್ ತಿಂ ಖರಿಂ ಜಾವುನ್, ಮಸ್ಕತಾಂತ್ಲ್ಯಾ ಕೊಂಕ್ಣಿಂ ಆನಿಂ ಹೆರ್ ಸಮುದಾಯಾಂಕ್ ಫಾಯ್ದ್ಯಾಮಾನ್ ಜಾಂವ್ದಿತ್ ಮ್ಹಣೊನ್, ಪನ್ನಾಸಾಂಚಿ ಗಡ್ ಉತ್ರೊಂಚಾ ವ್ಹಗ್ತಾ ಮಾಗ್ತಾಂ.

ಆಖೇಯ್ರ್ ಕರ್ಚಾ ಪಯ್ಲೆಂ, ತಾಚಿಚ್ಚ್ ಏವ್ ‘ಶೀಮತಿ ಜೇನ್ ಐಡ ಪಿಂಟೊನ್’ ರಚ್ಲೆಲೆಂ “ತುಜೆವಿಣ್” ಕವಿತೆಚ್ಯೊ ದೋನ್ ಫಂಗ್ತಿ ನ್ಹಾಕಾ ನ್ಹಾಕಾ ಮ್ಹಳ್ಯಾರೀ ಮ್ಹಜ್ಯಾ ಮತಿ-ಪಡ್ದ್ಯಾರ್ ಗಾಬೊ ಜಾತಾತ್:

‘ಹೆಂ ಜೀವನ್ ತುಜ್ಯಾ ಸಾಂಗಾತಾವಿಣ್ ಅಧುರೆಂಚ್ಚ್ ಆಸ್ತೆಲೆಂ
ಹೆಂ ಮ್ಹರಣ್ ಯೀಂ, ತುಜ್ಯೆವಿಣ್ ಅಧುರೆಂಚ್ಚ್ ಉರ್ತೆಲೆಂ’

ತಾಕಾ ಕುಡ್ಸುನ್, ಮ್ಹಜೆಂ:

‘ಹೆಂ ಕೊಂಕ್ಣಿಂ ಮಸ್ಕತ್ ತುಜ್ಯಾವಿಣ್ ವಿಣ್ಗೆಂಚ್ಚ್ ಆಸ್ತೆಲೆಂ’
ತುಜ್ಯೆ ಸಂಗಿಂ, ಹೆಂ ಮಂಗ್ಳುರ್ ಮಸ್ತಕ್ ದೊಂಗ್ರಾರ್ ಉಭೆಂ ನಾಚ್ತೆಲೆಂ’

- ಶಾಲೆಟ್ ನೊರೊನ್ನ, ಮಸ್ಕತ್

ರಾಸ್ ರಾಸ್ ಉಲ್ಲಾಸ್ ತುಕಾ ಕ್ಲೇರಿಯಾಬ್

ಮ್ಹಜಿ ಆನಿ ಕ್ಲೆರೆನ್ಸಾಚಿ ಪಯ್ಲಿ ಮುಲಾಕತ್ ಫಕತ್ ಚಾರ್ ವರ್ಸಾಂ ಪಯ್ಲೆಂಚಿ, ಮಸ್ಕತಾಂತ್ಲಿ. ಹಾಚ್ಯೆ ಪಯ್ಲೆಂ ಹಾಂವ್ ಕ್ಲೆರೆನ್ಸಾಕ್ ಕೊಂಕ್ಣಿ ಪತ್ರಾಂನಿ ವಾಚುನ್ ಮಾತ್ರ್ ವಳ್ಕಾತಾಲೊಂ. ತಾಚೆಂ ಗೂಂಡ್ ಚಿಂತಪ್ ಆನಿಂ ಕೊಂಕ್ಣಿ ಭಾಶೆಂತ್ ತಾಕಾ ಆಸ್ಚಿ ಶ್ಯಾಥಿ ಪಳೆವ್ನ್ ಹಾಂವ್ ನಿಜಾಯ್ಕಿ ವಿಜ್ಮಿತ್ ಪಾವ್‌ಲ್ಲೊಂ ಆಸಾಂ. ಕ್ಲೆರೆನ್ಸಾಚಿ ಸಕತ್, ಉರ್ಭಾ ಆನಿ ಕೊಂಕ್ಣಿ ಸಾಹಿತ್ಯಾಕ್ ಮಾತ್ರ್ ಸೀಮಿತ್ ಕರುಂಕ್ ಜಾಯ್ನಾ. ಮಸ್ಕತಾಂತ್ ಲೊಕಾಮೊಗಾಳ್ ಜಾವ್ನಾಸ್ಚ್ಯಾ ಕ್ಲೆರೆನ್ಸಾಕ್, ತಾಚ್ಯಾ ಖತ್ಕತ್ಯಾ ಉರ್ಭೆ ಸಾಂಗ್ಡಿಚ್ ಕೊಂಕ್ಣಿ ಲೊಕಾಕ್ ಸಾಂಗಾತಾ ಹಾಡ್ಚಿ ವಿಶೇಸ್ ಮುಖೇಲ್‌ಪಣಾಚಿ ಸಕತ್ ದೆವಾನ್ ಫಾವೊ ಕೆಲ್ಯಾ. ತಾಕಾ ಪುರಾಸಣ್ ಮ್ಹಳ್ಳಿಚ್ ನಾ, ಏಕ್ ಕಾಮ್ ಹಾತಿಂ ಘೆತ್ಲೆಂ ತರ್ ತೆಂ ಮುಗ್ದುನ್ ಸೊಡ್ಚ್ಯಾವರೆಗ್ ತಾಕಾ ನೀದ್‌ಯೀ ಪಡಾನಾ. ಗರ್ಜೆವಂತಾಂಚ್ಯಾ, ದುಬ್ಳ್ಯಾ-ದಾಕ್ಟ್ಯಾಂಚ್ಯಾ ಆಕಾಂತಾಂತ್ ಪಾವ್ಚ್ಯಾ ವಾವ್ರಾಂತ್ ತೊ ಫಕತ್ ಏಕ್ ಮೇಟ್ ಪಯ್ಸ್. ಮಸ್ಕತಾಂತ್ಲ್ಯಾ ಬರ್ಪಿ ಮಿತ್ರಾಂಪಯ್ಕಿಂ ‘ಖಡಾಪ್’ ಮ್ಹಣೊನ್ ನಾಂವ್ ವೆಲ್ಲೊ ಲೊಕಾಮೊಗಾಳ್, ಹಟ್ಟಿ ಸಾಹಿತಿ ತೊ.

ಕ್ಲೆರೆನ್ಸ್ ಆಜ್ ಅಪ್ಲೊ ಪನ್ನಾಸ್ ವರ್ಸಾಂಚೊ ಜಲ್ಮಾ ದೀಸ್ ಆಚಾರ್ಸುಂಚ್ಯಾ ಭಾಗಿ ಸಂದರ್ಭಿಂ ಮಸ್ಕತಾಂತ್ ವಸ್ತಿ ಕರ್ನ್ ಆಸ್ಚ್ಯಾ ಸರ್ವ್ ತಾಚ್ಯಾ ಆಭಿಮಾಂನಿಂ ತರ್ಫೆನ್ ತಾಕಾ ಜಿವಿತ್‌ಭರ್ ಅಗಣಿತ್ ಸಂತೊಸ್ ತಸೆಂಚ್ ಅಪರಿಮಿತ್ ಸಮಾಧಾನ್ ಹಾಂವ್ ಮಾಗ್ತಾಂ. ತಾಚೆಂ ಆನಿಂ ತಾಚ್ಯಾ ಕುಟ್ಮಾಚೆಂ ಜಿವಿತ್ ನಂದನ್ ಜಾಂವ್ದಿ ಮ್ಹಣ್ ಮ್ಹಜೆಂ ಮಾಗ್ಣೆಂ ಜಾವ್ನಾಸಾ.

- ದಿಲೀಪ್ ಕೊರೆಯಾ, ಪೆರ್ನಾಳ್.

ರಾಸ್ ರಾಸ್ ಉಲ್ಲಾಸ್ ತುಕಾ ಕ್ಲೇರಿಯಾಬ್

ಬರ್ಪಿ ಮಿತ್ರ್ ಸಂಚಾಲಕ್, ಮೊಗಾಳ್ ಬಾಬ್ ಕ್ಲೆರೆನ್ಸ್,

ಪಾಟಯ್ತಾವ್ ತುಕಾ, ಪನ್ನಾಸಾವ್ಯಾ

ಜಲ್ಮಾದಿಸಾಚೆ ಉಲ್ಲಾಸ್.

ಆಯ್ಚ್ಯಾ ದಿಸಾಚೊ, ಆನಂದ್ ಸೊತೊಸ್

ಉರೊಂ ತುಜೆಸಗಿಂ ಸದಾಂಚ್ಚ್.

ತುಜೆ ಜಿಣ್ಯೆಂತ್ ಸದಾಚ್ಚ್ ತುಕಾ ಯಶ್ ಆವ್ಡೆಂವ್ಚೆ,

ತುಜೆ ಆಮಿಗ್,

$Placeholder: the original page gave this picture no description, and none has been written yet. It came from daaiz\daaiz\special\cp50.asp.$ $Placeholder: the original page gave this picture no description, and none has been written yet. It came from daaiz\daaiz\special\cp50.asp.$

- ಅನಿಲ್ ಪೆರ್ನಾಲ್ ಆನಿ ವಿಲ್ಫ್ರೆಡ್. ಆರ್. ಪಾಂಗ್ಳಾ, ಮಸ್ಕತ್

ಕ್ಲೆರೆನ್ಸ್ ಕೈಕಂಬ - ಆಪ್ಲ್ಯಾ ಮೊಗಾಳ್ ಕುಟ್ಮಾಸವೆಂ

[ಕ್ಲೆರೆನ್ಸ್ ಕೈಕಂಬ ಆಪ್ಲ್ಯಾ ಪತಿಣ್ ಆನಿ ಭುರ್ಗ್ಯಾಂ ಸವೆಂ]

ಭಾಗಿ ಭಾಂಗ್ರಾಳೊ ಜಲ್ಮಾದೀಸ್ ತುಕಾ ಕ್ಲೇರಿಯಾಬ್

ಹ್ಯಾ ಸಂಸಾರಾಂತ್ ದೋನ್ ವರ್ಗಾಚೊ ಲೋಕ್ ಜಿಯೆತಾ, ಏಕ್: ಜೊ ಆಪ್ಣಾಸವೆಂ ಸಂತೊಸ್ ಹಾಡ್ನ್ ಯೆತಾ. ದುಸ್ರೊ: ಆಪ್ಣಾಸವೆಂ ಸಂತೊಸ್ ವ್ಹರುನ್ ವೆತಾ. ಕೊಂಕ್ಣಿ ವರ್ತುಲಾಂತ್ ಭೋವ್ ಥೊಡೆ ಅಸಲೆ ಕಾಣ್ಯೆಗಾರ್, ಸಾಹಿತಿ, ಕವಿ, ವಾವ್ರಾಡಿ ಆಸಾತ್, ಜೆ ಆಪ್ಣಾಸವೆಂ ಸಂತೊಸ್ ಹಾಡುನ್ ಯೆತಾತ್. ತಾಂತ್ಲೊ ಎಕ್ಲೊ ಕ್ಲೆರೆನ್ಸ್ ಕೈಕಂಬ ಮ್ಹಣ್ ಹಾಂವ್ ಮಾಂದುಂಕ್ ಭಿಲ್ಕುಲ್ ಪಾಟಿಂ ಸರಾನಾ.

ಹಾಚೆಪರಿಂ ಪರ್ದ್ಯಾಪಾಟ್ಲ್ಯಾನ್ ವಾವ್ರ್ ಕರ್ತೆಲ್ಯಾ ಅನ್ಯೇಕ್ಲ್ಯಾ ಮಹಾನ್ ವೆಕ್ತಿಕ್, ಜೆರಿ ಡಿ’ಮೆಲ್ಲೊಕ್ ಮೆಳ್ಚೆಂ ಭಾಗ್ ಮ್ಹಾಕಾ ದೋನ್ ವರ್ಸಾಂಧಿಂ ಲಾಭ್‌ಲ್ಲೆಂ - ದೆವಾಕ್ ಅರ್ಗಾಂ. ಪುಣ್ ಕ್ಲೇರಿಯಾಬಾಕ್ ಮುಖಾಮುಖಿ ಭೆಟ್ಚೆಂ ಭಾಗ್ ಸರ್ವೆಸ್ಪರ್ ದೆವಾನ್ ಮ್ಹಾಕಾ ಅಜೂನ್ ಫಾವೊ ಕರುಂಕ್ ನಾ ತರ್‌ಯೀ, ತಾಕಾ ಮೆಳಾನಾಸ್ತಾನಾ ಸಯ್ತ್ ತಾಚ್ಯಾ ಸಾಹಿತ್ಯಾಚೊ, ತಾಚ್ಯಾ ವೆಕ್ತಿತ್ವಾಚೊ ಅಭಿಮಾನಿ ಹಾಂವ್.

ಜಿಣ್ಯೆಚ್ಯಾ ಹರ್ಯೆಕಾ ಸಂಧಿಗ್ಧ್ ಪರಿಗತೆಕ್ ಫುಡ್ ಕರುನ್, ಹರ್ಯೆಕ್ ತ್ರಾಸ್ ಆಪ್ಣಾಂವ್ನ್, ಹೆರಾಂಕ್ ಸದಾಂಚ್ ಸಂತೊಸ್, ಹಾಸೊ, ಬರೆಂ ಮಾಗ್ಚೆ ಕಿತ್ಲೆ ವೆಕ್ತಿ ಹ್ಯಾ ಸಂಸಾರಾಂತ್ ಆಸಾತ್?. ಆಜ್, ಸಪ್ತೆಂಬರ್ 1 ತಾರಿಕ್ ಅಸಲ್ಯಾ ಎಕಾ ಮಹಾನ್ ವೆಕ್ತಿಕ್ ಭಾಂಗ್ರಾಳೊ ಜಲ್ಮಾದೀಸ್ ಆಚರಣ್ ಕರ್ಚ್ಯಾ ಸಂಧರ್ಭಾರ್ ಉಲ್ಲಾಸ್ ಪಾಟಂವ್ಚೆಂ ಮ್ಹಜೆಂ ಭಾಗ್ ಮ್ಹಣ್ ಹಾಂವ್ ಲೆಖ್ತಾಂ.

ಹ್ಯಾ ಸಂದರ್ಭಾರ್ ಮಸ್ಕತಾಂತ್ಲ್ಯಾ ಕೊಂಕ್ಣಿ ಲೊಕಾಂನಿ ಕ್ಲೇರಿಯಾಬಾಕ್ ಉಲ್ಲಾಸ್ ಪಾಟವ್ನ್ ಸಂಧೇಶ್ ಧಾಡ್ಲ್ಯಾತ್, ತೆ ಆಮಿ ಹಾಂಗಾಸರ್ ಪರ್ಗಟ್ಲ್ಯಾತ್.

ಕ್ಲೆರಿಯಾಬಾಚೆರ್ ಹಾಂಚೊ ಹೊ ಮಾಯಾಮೊಗಾಚೊ ಶಿಂವೊರ್ ಪಳೆತಾನಾ ಮ್ಹಾಕಾ ಇತ್ಲೆಂಚ್ ಭಗ್ತಾ; "ಜಿಣ್ಯೆಂತ್ ಏಕ್ ದೀಸ್ ಪುಣಿಂ ಹಾಂವೆಂ ಹ್ಯಾ ವೆಕ್ತಿಕ್ ಮೆಳ್ಚೆಂ ಭಾಗ್ ದೆವಾನ್ ಮ್ಹಾಕಾ ಫಾವೊ ಕೆಲ್ಯಾರ್ ಪುರೊ" - ಸಮೇಸ್ತ್ ದಾಯ್ಜ್ ವಾಚ್ಪ್ಯಾಂ ಸವೆಂ ರಾಸ್ ರಾಸ್ ಉಲ್ಲಾಸ್ ಪಾಟಯ್ತಾಂ.

[ಹ್ಯಾ ವಿಶೇಸ್ ಪಾನಾಚೆಂ ಸುಚನ್ ತಶೆಂಚ್ ಪಾಟಿಂಬೊ ದಿಲ್ಲ್ಯಾ ಬಾಯ್ ನಿರ್ಮಲಾ ಆನಿ ಮಾನೆಸ್ತ್ ಜೆರಿ ಡಿ’ಮೆಲ್ಲೊ ಹಾಂಚೊ ಉಪ್ಕಾರ್ ಬಾವುಡ್ತಾಂ]

- ವಲ್ಲಿ ಕ್ವಾಡ್ರಸ್.

ದಾಯ್ಜ್.ಕೊಮ್‌ಚೆರ್ ಪರ್ಗಟ್‌ಲ್ಲ್ಯೊ ಕ್ಲೆರೆನ್ಸ್ ಕೈಕಂಬಚ್ಯೊ ಮಟ್ವ್ಯೊ ಕಾಣ್ಯೊ

1. ಯಜ್ನ್.

2. ಧುಳ್ ತಿ ಧುಳ್‌ಚ್ಚ್.

3. ಏಕ್ ಕುಡ್ಕೊ ಪಿಜ಼್ಜಾ.

4. ಖೊವ್ಳಾಂ.

5. ಮರುಭುಂಯ್ಂತ್ಲೆಂ ವಾದಾಳ್.

6. ಮರಿ ಘರಾ ಆಯ್ಲಿ.

7. ತುಜೆಂ ಜಿಣೆಂ ಮ್ಹಜೆಂ ನ್ಹಯ್.

8. ಸಾತ್ವ್ಯಾ ಸಾಕ್ರಾಮೆಂತಾಚೊ ಸಾಕ್ರಿಫಿಸ್.

9. ಏಕ್ ಮೌನ್ ಆವಾಜ್.