ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾಂಕರ್ - 5
ಮಟ್ವಿ ವಳೊಕ್: ಕವಿ ಜಾವ್ನ್ ಎದೊಳ್ಚ್ ಕೊಂಕ್ಣಿ ಕವಿತಾಶೆತಾಂತ್ ಅಜ್ಯಾಪಾಂ ಕೆಲ್ಲೆಂ ಬಾಯ್ ಪ್ರಿಯಾ ಥಂಯ್ ಏಕ್ ಲೇಖಕ್ ಆಸ್ಚೆಂ ನಿಜಾಯ್ಕೀ ಸಂತೊಸಾಚೆಂ. ಪಯ್ಲಿ ಕಾಣಿ ಜರ್ ಇತ್ಲಿ ಅಪುರ್ಭಾಯೆನ್ ಬರಂವ್ಕ್ ಹಿ ಸಕ್ತಾ ತರ್ ಕೊಂಕ್ಣೆಂತ್ ಫುಡ್ಲ್ಯಾ ದಿಸಾಂನಿ ಹಿಚೆಥಾವ್ನ್ ಖಂಡಿತ್ ಜಾವ್ನ್ ಬರ್ಯೊ ಕಾಣ್ಯೊ ಅಪೇಕ್ಶಾ ಕರ್ಯೆತ್. ತ್ಯಾ ದಿಶೆನ್ ಮಿನತ್ ಕರುನ್ ಕೊಂಕ್ಣೆಂತ್ ಪ್ರಭುದ್ದ್ ಸ್ತ್ರೀ ಲೇಖಕಿ ಜಾಂವ್ಕ್ ಹಿ ಪಾವೊಂದಿ ಮ್ಹಳ್ಳೆಂಚ್ ಮ್ಹಜೆಂ ಮಾಗ್ಣೆಂ.
ಪ್ರಿಯಾ ಸಿಕ್ವೇರಾ, ಫೆರಾರ್
ಕಥಾಂಕರ್ - 5. ದೋನ್ ಮುಖಾಂ
ಸುರ್ಯೊ ಬುಡೊನ್ ಆಯ್ಲೊ ತರಿ ಸುರೇಶಾಚೊ ಅಜೂನ್ ಪತ್ತೊ ನಾತ್ಲ್ಲೊ. ಸುರೇಶಾಚಿ ಆವಯ್ ಸೆರ್ಪಿನ್ಬಾಯ್ ತಾಚಿ ವಾಟ್ ಪಳೆವ್ನ್ ಥಕೊನ್ ಗೆಲ್ಲಿ. ಸುಧೀರ್ ಸೆರ್ಪಿನ್ಬಾಯೆಚೊ ವ್ಹಡ್ಲೊ ಪೂತ್. ನಿಸ್ತ್ಯಾಕ್ ಕಾಂಯ್ ಹಾಡುಂಕ್ ಸಾಂತೆಂಕ್ ಗೆಲ್ಲೊ ಘರಾಂತ್ ರಿಗ್ತಾನಾ ಆವಯ್ಚೆಂ ಬಾವುಲ್ಲೆಂ ತೋಂಡ್ ಪಳೇವ್ನ್ ಅಜ್ಯಾಪುನ್ "ಮಾಂಯ್ ಕಿತೆಂ ಜಾಲೆಂ?" ಆಶೆಂಯ್ ಕಿತ್ಯಾಕ್ ಗೊಮ್ಟಿ ಲಾಂಬ್ ಕಾಡ್ನ್ ಪಳೆಯ್ತಾಯ್. ಕೊಣಾಕ್ ರಾಕ್ತಾಯ್" ಮ್ಹಣ್ ವಿಚಾರ್ತಾನಾ, "ಸುರೇಶ್ ಅಜೂನಿ ಘರಾ ಯೇಂವ್ಕ್ ನಾ ಪುತಾ, ಕಿತ್ಯಾಕ್ಗಿ ಭಿರಾಂತ್ ದಿಸ್ತಾ" ಮ್ಹಣಾಲಿ.
ದಾಕ್ಟೊ ಪೂತ್ ಮ್ಹಣ್ ಸುರೇಶಾಚೊ ಚಡ್ಚ್ ಕೊಂಡಾಟೊ ಕೆಲ್ಲೊ. ಸುರೇಶ್ ಸುಧೀರಾಚಾಕಿ ಸಾತ್ ವರ್ಸಾಂ ಲ್ಹಾನ್. ವಯ್ರ್ ದವರ್ಲ್ಯಾರ್ ಕಾವ್ಳೊ ವರಿತ್, ಸಕಯ್ಲ್ ದವರ್ಲ್ಯಾರ್ ಮೂಯ್ ವರಿತ್ ಆಶಿ ಜಾಲ್ಲಿ ತಾಚಿ ವಾಡಾವಳ್. ಲ್ಹಾನ್ ಪ್ರಾಯೆರ್ ವಿಧವ್ ಜಾಲ್ಲಿ ಸೆರ್ಪಿನ್ ಬಾಯ್ ಕಷ್ಟಾಂನಿ ದೀಸ್ ಕೂಲಿಚೆಂ ಕಾಮ್ ಕರ್ನ್ ಭುರ್ಗ್ಯಾಂಕ್ ಪೊಸೊನ್ ವ್ಹಡ್ ಕೆಲ್ಲೆಂ. ತಾಂಕ್ ನಾತ್ಲ್ಲಿ ತರೀ ಪಾದ್ರಾಬ್ಯಾಚಾ ಆನಿಂ ಬರ್ಯಾ ಮನಾಚ್ಯಾ ಪೆಲಿಕ್ಸಾಬಾಚ್ಯಾ ಕುಮ್ಕೆನ್ ಸುಧೀರಾನ್ ಪಿಯುಸಿ ದುಸ್ರೆಂ ವರಸ್ ಪಾಸ್ ಕರ್ನ್ ಎಲೆಕ್ಟ್ರಿಶಿಯನ್ ಕೊರ್ಸ್ ಕೆಲ್ಲೊ. ಆವಯ್ಚೆ ಕಷ್ಟ್ ಜಾಣಾಸಲ್ಲೊ ಸುಧೀರ್, ಕುಟ್ಮಾಚಿ ಜವಾಬ್ದಾರಿ ಖಾಂದ್ಯಾರ್ ಘೆವ್ನ್ ಆವಯ್ಕ್ ಸುಶೆಗ್ ದೀಂವ್ಕ್ ಆನಿಂ ಬಾವಾಕ್ ಬರೆಂ ಶಿಕಾಪ್ ದೀಂವ್ಕ್ ಕಾಮಾಚಾ ಸೊಧ್ನೆರ್ ಲಾಗ್ಲೊ. ಹ್ಯಾ ಕಾಳಾರ್
MBA, MSC ಶಿಕಲ್ಲ್ಯಾಂಕ್ಚ್ಚ್ ಕಾಮಾಂ ಮೆಳಾನಾಂತ್. ತರ್
PUC
ಪಾಸ್ ಜಾಲ್ಲ್ಯಾ ಸುಧೀರಾಕ್ ಕೋಣ್ ಕಾಮ್ ದಿತಾತ್?.
ಪುಣ್ ಖಂಯ್ಸ್ರ್ ಮನ್ ಆಸಾಗಿ ಥಂಯ್ಸರ್ ವಾಟ್ ಜರೂರ್ ಆಸಾ ಮ್ಹಳ್ಳಿ ಇಂಗ್ಲಿಷ್ ಸಾಂಗ್ಣಿ ನಿಜಾಯ್ಕಿ ಸತ್. ಸುಧೀರಾಚ್ಯಾ ನಿರಂತರ್ ಸೊಧ್ನೆಂ ಉಪ್ರಾಂತ್ ತಾಕಾ
KEB ಂತ್ ಎಲೆಕ್ಟ್ರಿಶಿಯನ್ ಜಾವ್ನ್ ಕಾಮ್ ಮೆಳ್ಳೆಂ. ಘರಾಂತ್ ಯೇವ್ನ್ ಖುಶೆನ್ ಆವಯ್ಕ್ ವೆಂಗುನ್ "ಮಾಂಯ್ ಆಜ್ ಥಾವ್ನ್ ತುಂವೆಂ ಕಾಮಾಕ್ ವೆಚೆಂ ಬಂದ್" ಮ್ಹಣ್ ಮೊಗಾನ್ ತಾಕಿದ್ ದಿತಾ. ಸುರೇಶಾಕ್ ಬರೆಂ ಕರ್ನ್ ಶಿಕಂವ್ಕ್ ಬೂದ್ ಬಾಳ್ ಸಾಂಗಾಲಾಗ್ಲೊ.
ಸಕ್ಕಡ್ ಮನ್ಶಾಂನಿ ಚಿಂತ್ಲ್ಲ್ಯಾ ಬರಿಂ ಜಾಲ್ಲೆಂ ಜಾಲ್ಯಾರ್? ನೊವ್ಯಾ ಕ್ಲಾಸಿಂತ್ ಶಿಕ್ಚೊ ಸುರೇಶ್ ಪಾಡ್ ಸಾಂಗಾತ್ಯಾ ವರ್ವಿಂ ಎದೊಳ್ಚ್ಚ್, ಸಿಗ್ರೆಟ್ ವೊಡುಂಕ್, ಸೊರೊ ಪಿಯೆಂವ್ಕ್ ಶಿಕಲ್ಲೊ. ಚೆಡ್ವಾಂಕ್ ಚಿಡಾಂವ್ಚೆಂ, ಟೀಚಾರಾಂಕ್ ಪಾಟಿಂ ಉಲಂವ್ಚೆ, ಕ್ಲಾಸಿಕ್ ಚುಕಾರಿ ಮಾರ್ಚೆಂ ತಾಕಾ ಸದಾಂಚೆಂ ಜಾವ್ನ್ ಗೆಲ್ಲೆಂ. ಹೆಡ್ಮೆಸ್ತ್ರಿಣೆ ಥಾವ್ನ್ ಸೆರ್ಪಿನ್ಬಾಯೆಕ್ ಆಪವ್ಣೆಂ ಮೆಳ್ತಾನಾ ಇಸ್ಕಲಾಕ್ ಗೆಲ್ಲಿ. ಥಂಯ್ಸರ್ ತಿಚ್ಯಾ ಪುತಾಚೆ ಗುಣಗಾನಾ ಆಯ್ಕಾತಾನಾ ತಿಚೊ ಜೀವ್ ಮುಯೆ ತೆದೊ ಜಾಲ್ಲೊ. ಚಡ್ ಸಳ್ಗಿ ದಿಲ್ಲ್ಯಾಕ್ ತಿಚೆರ್ಚ್ಚ್ ತಿಕಾ ಶಿಣ್ ಉದೆಲೊ. ಭುರ್ಗ್ಯಾಂಚೆರ್ ಸಂಪೂರ್ಣ್ ಭರ್ವಸೊ ದವರ್ಚಾ ಬದ್ಲಾಕ್, ಆವಯ್ ಬಾಪಾಯ್ನಿಂ ಆಪ್ಣಾಚಿ ಭುರ್ಗಿ ಖಂಯ್ ವೆತಾತ್, ಕಿತೆಂ ಕರ್ತಾತ್ ಮ್ಹಣ್ ವೆಳಾರ್ ಜಾಣಾಂ ಜಾಂವ್ಚೆ ಗರ್ಜೆಚೆಂ. ಘರಾ ಯೇವ್ನ್ ಸುರೇಶಾಚಿ ತನ್ಕಿ ಕರ್ತಾನಾ ಆವಯ್ಕ್ಚ್ಚ್ ’ಆಪುಣ್ ಘರಾಚ್ ಯೇನಾ ಮ್ಹಣ್ ಧಮ್ಕಿ ದೀವ್ನ್ ಗೆಲ್ಲ್ಯಾಚೊ ಪಾತ್ತೊ ನಾತ್ಲ್ಲೊ.
ಸುಧೀರ್ ಆವಯ್ಚಿ ಬೆಜಾರಾಯ್ ಪಳೆಂವ್ಕ್ ತಾಂಕಾನಾಸ್ತಾನಾ ಸುರೇಶಾಚ್ಯಾ ಸೊಧ್ನೆರ್ ಭಾಯ್ರ್ ಪಡ್ಲೊ. ಸಾಂತೆ ಥಾವ್ನ್ ಇಲ್ಲೆ ಪಯ್ಸ್ ಏಕಾ ವೊಣಿಂತ್ ಉಲಂವ್ಚೆಂ ಆಯ್ಕೊನ್ ತ್ಯಾ ಕುಶಿನ್ ಸುಧೀರ್ ಮೆಟಾಂ ಕಾಡ್ತಾನಾ. ಥಂಯ್ಸರ್ ತೊಂಡಾರ್ ಸಿಗ್ರೆಟ್ ದವರುನ್, ಬಚ್ಚಾಲಿ ಚೆಡ್ಯಾ ಸಾಂಗಾಂತಾ ಬಸೊನ್ ಇಸ್ಪೀಟಾ ಖೆಳ್ಚೆಂ ಪಳೆವ್ನ್ ಸುಧೀರಾಕ್ ತೊನ್ಕ್ಯಾನ್ ಮಾರ್ಲ್ಲ್ಯಾ ಪರಿಂ ಜಾಲೆಂ. ಆಪ್ಣಾಚೊ ಭಾವ್ ಆಸೊ ಜಾಯ್ತ್ ಮ್ಹಣ್ ತಾಣೆಂ ಸ್ವಪ್ಣಾಂತ್ ಸಯ್ತ್ ಚಿಂತುಂಕ್ ನಾತ್ಲ್ಲೆಂ.
"ಸುರೇಶ್ ಘರಾ ಚಲ್"
ಭಾವಾಕ್ ಪಳೆವ್ನ್ ಆಜ್ಯಾಪಾನ್ ಹಾಂಕಾರಾನ್ ’ಹಾಂವ್ ತ್ಯಾ ಘರಾ ಯೇನಾ ತುಂ ವಚ್"
ಸುಧೀರ್ ತಾಚೊ ಹಾತ್ ಧರುನ್ ವೊಡ್ತಾನಾ ನಾಖುಶೆನ್ಚ್ಚ್ ಸುರೇಶ್ ತಾಚೆ ಸಾಂಗಾಂತಾ ಚಲಾಲಾಗ್ಲೊ.
ಆಶೆಂ ದೀಸ್ ಹಪ್ತೆಂ, ಮಹಿನೆಂ ಪಾಶಾರ್ ಜಾಲೆಂ. ಸುರೇಶಾನ್ ಇಸ್ಕಲಾಕ್ ವೆಚೆಂ ಪುರ್ತೆಂ ಬಂದ್ ಕೆಲ್ಲೆಂ. ಆವಯ್ನ್, ಭಾವಾನ್ ತಾಕಾ ಸಮಾ ಕರುಂಕ್ ಕೆಲ್ಲೆಂ ಪ್ರಯತ್ನ್ ಸಗ್ಳೆಂ ವ್ಯರ್ಥ್ ಜಾಲ್ಲೆಂ. ಸುರೇಶ್ ಸಕಾಳಿಂ ಘರ್ ಸೊಡ್ನ್ ಗೆಲ್ಯಾರ್ ಆಮೊರಿಚ್ಯಾ ವೆಳಾರ್ ಘರಾ ರಿಗ್ತಾಲೊ. ಖಂಯ್ ವೆತಾ, ಕಿತೆಂ ಕರ್ತಾ ಮ್ಹಣ್ ಕೊಣಾಯ್ಕ್ಯಿ ಖಬಾರ್ ನಾತ್ಲ್ಲಿ.
ಅಶೆಂ ಏಕ್ ದೀಸ್ ಸುಧೀರ್ ಆನಿಂ ಸುರೇಶ್ ಗಜಾಲಿ ಕಾಡುಂಕ್ ಬಸ್ತಾತ್.
"ಸುರೇಶ್ ತುಕಾ ಖಬಾರ್ ಆಸಾವೆ? ವಿನ್ಸಿಯಾಬಾಚ್ಯಾ ಘರಾ ಪೋರ್ ಕೋಣಿ ನಾತ್ಲ್ಲೆಂ ಪಳೆವ್ನ್ ದಿಸಾ ಉಜ್ವಾಡಾಕ್ ಚೊರಿ ಜಾಲ್ಯಾ ಖಂಯ್"
ಸುರೇಶಾಚೆ ತೋಂಡ್ ವಿವರ್ಣ್ ಜಾಲೆ. ತಾಚ್ಯಾ ತೊಂಡಾ ಥಾವ್ನ್ ಉತ್ರಾಂಚ್ ಭಾಯ್ರ್ ಪಡ್ಲಿನಾಂತ್. ಭಾವಾಕ್ ಫುಡ್ ಕರುಂಕ್ ತಾಂಕಾನಾಸ್ತಾನಾ ಥಂಯ್ಸರ್ ಥಾವ್ನ್ ಉಠೊನ್ ಚಲ್ತಚ್ಚ್ ರಾವ್ಲೊ. ಎದೊಳ್ ಮ್ಹಣಾಸರ್ ಖುಶೆನ್ ಗಜಾಲಿ ಕಾಡುನ್ ಆಸ್ಲ್ಲೊ ಸುರೇಶ್ ಚೊರಿಯೆಚಿ ಖಬಾರ್ ಆಯ್ಕೊನ್ ಗೆಲ್ಲೊ ಪಳೆವ್ನ್ ಸುಧೀರಾಕ್ ವಿಜ್ಮಿತ್ ಜಾಲೆಂ. ಸುರೇಶಾನಾಂಚ್ ವಿನ್ಸಿಯಾಬಾಕರ್ ಚೊರಿ ಕೆಲ್ಲಿ ಮ್ಹಣ್ ಸುಧೀರಾಕ್ ಆನಿಂ ಸೆರ್ಪಿನ್ ಬಾಯೆಕ್ ಕಳಿತ್ ಜಾಲೆಂ ತರ್?....
*****************
ಆಯ್ತಾರಾ ಸಕಾಳಿಂ ಸೆರ್ಪಿನ್ ಬಾಯ್ ಮಿಸಾ ಥಾವ್ನ್ ಪಾಟಿಂ ಯೆತಾನಾ ಶೆಟ್ಟಿಚ್ಯಾ ಹೊಟ್ಲಾ ಲಾಗ್ಸಾರ್ ಆಸ್ಚಾ ಟೆರೆಸಾಚ್ಯಾ ಘರಾ ಥೊಡೊಸೊ ಲೋಕ್ ಜಮೊ ಜಾಲ್ಲೊ ಪಳೆವ್ನ್ ತಿಯಿ ಅತುರಾಯೆನ್ ತೆವ್ಶಿನ್ ಮೆಟಾಂ ಕಾಡಿಲಾಗ್ಲಿ. "ಜಾನ್ಸಿಚಿ ಖುನಿ ಜಾಲ್ಯಾ ಖಂಯ್..ಪೊಲಿಸ್ ಆಯ್ಲ್ಯಾತ್" ಆಶೆಂ ಜಮ್ಲ್ಲೊ ಲೋಕ್ ಘುಸು ಘುಸು ಕರ್ತಾನಾ ಸೆರ್ಪಿನ್ ಬಾಯೆಕ್ ವಿಷಯ್ ಸಮ್ಜಾಲ್ಲೊ.
ಜಾನ್ಸಿ ಕಾಜಾರಿ ಬಾಯ್ಲ್. ತಿಚೊ ಘೊವ್ ದಿಸ್ಫಡ್ತ್ಯಾ ಗ್ರಾಸಾ ಖಾತಿರ್ ಸಾತ್ ದರ್ಯಾ ಪಯ್ಸ್ ಅಬುಧಾಬಿಂತ್ ಕಾಮ್ ಕರ್ನ್ ಆಸ್ಲ್ಲೊ. ಸಕಾಳಿಂ ಘರಾ ಘರಾಂನಿ ದೂದ್ ದಿಂವ್ಚೊ ಚೆಡೊ ಕಿತ್ಲೆ ಪಾವ್ಟಿ ಬೆಲ್ಲ್ ಮಾರ್ಲ್ಯಾರ್ಯಿ ಜಾನ್ಸಿ ಬಾಯ್ ಬಾಗಿಲ್ ಉಗ್ತೆ ಕರಿನಾತ್ಲ್ಲೆಂ ಪಳೆವ್ನ್ ಜನೆಲಾ ಥಾವ್ನ್ ತಿಳಿಲಾಗ್ಲೊ. ಆನಿಂ ಥಂಯ್ಸರ್ ರಗ್ತಾಚಾ ಕೊಂಡಾಂತ್ ಪಡೊನ್ ಆಸ್ಲ್ಲ್ಯಾ ಜಾನ್ಸಿಬಾಯೆಕ್ ಪಳೆವ್ನ್ ಚೆಡ್ಯಾನ್ ಭಿಂಯಾನ್ ಶೆಟ್ಟಿಚಾ ಅಂಗ್ಡಿ ಖಬಾರ್ ದಿಲ್ಲಿ. ತಿ ಖಬಾರ್ ವಾರ್ಯಾ ವೇಗಾನ್ ಸಗ್ಳ್ಯಾ ಗಾವಾರ್ ಪಾವೊಂಕ್ ವೇಳ್ ಲಾಗೊಂಕ್ ನಾ. ಆನಿಂ ಆಶೆಂ ಕೊಣೆಂಗಿ ಪೊಲಿಸಾಂಕ್ ಖಬಾರ್ ದಿತಾನಾ ಪೊಲಿಸ್ ಯೇವ್ನ್ ಪಾವ್ಲ್ಲೆ.
ಸುಧೀರ್ ಕಾಮಾ ಥಾವ್ನ್ ಆಯಿಲ್ಲೊಚ್ "ಮಾಂಯ್ ತ್ಯಾ ಸೆಜಾರ್ಚಾ ಜಾನ್ಸಿ ಬಾಯೆಚಿ ಖುನಿ ಜಾಲ್ಯಾ"
"ವಯ್ ರೆ ಪುತಾ, ಕಸಲೊ ಬಿರಾಂಕುಳ್ ಮನಿಸ್ ಕೊಣ್ಣಾ. ತಸಲ್ಯಾಂಕ್ ಕಠಿಣ್ ಶಿಕ್ಶಾ ಮೆಳೊಂಕ್ ಜಾಯ್. ಆವಯ್ ಬಾಪಾಂಯ್ಕ್ ತಸಲೊ ಪೂತ್ ಆಸ್ಲ್ಯಾರ್ ಕಿತೆಂ ನಾಂ ತರ್ ಕಿತೆಂ?"
"ವಯ್ ಮಾಂಯ್, ಪಯ್ಶಾಂ ಖಾತಿರ್ ಕೊಣೆಂಗಿ ತಾಚಿ ಖುನಿ ಕೆಲ್ಯಾ.. ಸುರೇಶ್ ಖಂಯ್ ಆಸಾ? ಅಜೂನಿ ಯೇಂವ್ಕ್ ನಾಂಗಿ"
"ನಾರೆ ಸುಧೀರ್"
ದುಸ್ರೊ ದೀಸ್ ಉದೆಲೊ, ಸುರೇಶಾಚಿ ಅಜೂನ್ಯಿ ಖಬಾರ್ ನಾತ್ಲ್ಲಿ. ಸುರೇಶಾ ಸಾಂಗಾಂತಾ ತಾಚೊ ಅನ್ಯೇಕ್ಲೊ ಈಸ್ಟ್ ಗುರುಯಿ ಮಾಯಾಕ್ ಜಾಲ್ಲೊ. ಸುಧೀರ್ ಆನಿಂ ಸೆರ್ಪಿನ್ಬಾಯ್ ಚಿಂತುನ್ ದೆದೆಸ್ಪಾರ್ ಜಾಲಿಂ. ಸುಧೀರಾನ್ ಸುರೇಶಾಚ್ಯಾ ಸರ್ವ್ ಇಷ್ಟಾಂಚ್ಯಾ ಘರಾ ವಚೊನ್ ಖಬಾರ್ ಕಾಡ್ಲಿ. ಸಗ್ಳೆಂ ವ್ಯರ್ಥ್.
ಹೆವ್ಸಿಲ್ಯಾನ್ ಪೊಲಿಸಾಂಚಿ ತನ್ಕಿ ಚಲೊನ್ಂಚ್ ಆಸ್ಲ್ಲಿ. ಜಾನ್ಸಿಬಾಯೆಚೊ ಘರ್ಕಾರ್ ಅಬ್ದು ಗಲ್ಫಾ ಥಾವ್ನ್ ಬಾಯ್ಲೆಚ್ಯಾ ಮೊರ್ನಾಕ್ ಪಾವ್ಲ್ಲೊ. ಪೊಲಿಸ್ ಇನ್ಸ್ಪೆಕ್ಟರ್ ಮಿಸ್ಟರ್ ದಾಸಾನ್ ತಾಚ್ಯಾ ಖಾಂದ್ಯಾರ್ ಹಾತ್ ದವರುನ್ ಸಮಧಾನ್ ಸಾಂಗ್ತಾನಾ "ಇನ್ಸ್ಪೆಕ್ಟರ್ ಮ್ಹಜ್ಯಾ ಬಾಯ್ಲೆಚ್ಯಾ ಖುನಿಗಾರಾಕ್ ಸೊಧುನ್ ಕಾಡಾ. ತಾಕಾ ಕಠಿಣ್ ಶಿಕ್ಶಾ ಫಾವೊ ಜಾಯ್ಜಾಯ್" ಮ್ಹಳೆಂ.
"ಖುನಿಗಾರಾಕ್ ಆಮಿಂ ಪಾತಾಳಾಂತ್ ಆಸ್ಲ್ಯಾರ್ಯಿ ಸೊಧುನ್ ಕಾಡ್ತೆಲ್ಯಾಂವ್" ಮ್ಹಣ್ ಇನ್ಸ್ಪೆಕ್ಟರ್ ಬಾರಿಚ್ಚ್ ಅತ್ಮ್ವಿಶ್ವಾಸಾನ್ ಜಾಪ್ ದಿತಾ. ದಿಸಾ ಉಜ್ವಾಡಾಕ್ಚ್ ಖುನಿ ಕರ್ನ್ ರಾಜ್ ಕರ್ತೆಲ್ಯಾಂಚೊ ಆಮ್ಚೊ ಗಾಂವ್. ಖುನಿಗಾರ್, ಲುಟ್ಕಾರ್ ಧೈರ್ಯಾನ್ ರಾಜ್ರಸ್ತ್ಯಾಂನಿ ಚಲ್ತಾತ್. ಆಶೆಂ ಆಸ್ತಾ ಕಾಂಯ್ಚ್ಚ್ ಕುರುಃ ಸೊಡಿನಾಸ್ತಾನಾ ಜಾನ್ಸಿಚಿ ಖುನಿ ಕೆಲ್ಲ್ಯಾ ಖುನಿಗಾರಾಕ್ ಹೆ ಪೊಲಿಸ್ ಸೊಧ್ತೆಲೆ ತರಿ ಕಶೆ? ಪೊಲಿಸಾಂಕ್ ಲೊಂಚ್ ದಿಲ್ಯಾರ್ ಆಪ್ರಾಧಿ ಭಾಯ್ರ್....ಪುಣ್ ಕಾಟ್ ಝಡಾಂ ಮಧೆಂ ಕಶೆಂ ಬರಿ ಝಡಾಂ ವಾಡ್ತಾತ್ಗಿ ತಶೆಂಚ್ ಭ್ರಶ್ಟಾಚಾರಾಚಾ ಹ್ಯಾ ಕಾಳಾರ್ ಇನ್ಸ್ಪೆಕ್ಟರ್ ದಾಸ್ ತಸಲೆ ಬರೆಂ, ಪ್ರಾಮಾಣಿಕ್ ಮನಿಸ್ ಆಸಾತ್ ಮ್ಹಣ್ಚೆಂ ಸತ್. ಅಪ್ರಾಧ್ಯಾಂಕ್ ಧರುನ್ ತಾಂಕಾ ಶಿಕ್ಶಾ ಮೆಳಾಶೆ ಕರ್ತಾ ಮ್ಹಣಾಸರ್ ತೊ ಸುಶೆಗ್ ಘೆನಾತ್ಲ್ಲೊ.
*******************
ಇನ್ಸ್ಪೆಕ್ಟರ್ ದಾಸಾಕ್ ಸಕಾಳಿಂ ಫುಡೆಂಚ್ ಬಾಗ್ಲಾರ್ ಪಳೆವ್ನ್ ಸೆರ್ಪಿನ್ಬಾಯ್ ಸಗ್ಳಿ ಕಾಲುಬುಲಿ ಜಾಲಿ. ಉಲಂವ್ಕ್ ಉತ್ರಾಂ ಸುಟನಾಸ್ತಾನಾ ಘಡ್ಬಡ್ತಾನಾ ಸುಧೀರಾಕ್ ಉಲೊ ದೀಲಾಗ್ಲಿ. ಇನ್ಸ್ಪೆಕ್ಟರಾಕ್ ಪಳೇವ್ನ್ ಸುಧೀರಾಕ್ ಏಕಾ ಥರಾಚಿ ಕಾವ್ಜೆಣಿ ಬೊಗ್ಲ್ಯಾರಿ ತೊಂಡಾರ್ ಕ್ರತಕ್ ಹಾಸೊ ಹಾಡವ್ನ್ ಬಸ್ಕಾ ದಾಕಯ್ಲಿ.
ಸೆಜಾರ್ಯಾಂ ಕಡೆಂ ವಿಚಾರ್ ಕರ್ತಾನಾ ಸುರೇಶ್ ಜಾನ್ಸಿಬಾಯೆಕರ್ ಕೆದಾಳಾಯ್ ವೆತಾಲೊ ಮ್ಹಳ್ಳಿಂ ಖಬಾರ್ ಇನ್ಸ್ಪೆಕ್ಟಾರಾಚ್ಯಾ ಕಾನಾಂತ್ ಪಡ್ಲ್ಲಿ. ಆನಿಂ ಸುರೇಶಾಚೊ ನಾಪತ್ತೊಯಿ ತಾಚ್ಯಾ ಗುಮಾನಾಕ್ ಆಯಿಲ್ಲೆಂ. ಹೆಂಚ್ ಕಾರಣ್ ತಾಣೆಂ ಸೆರ್ಪಿನ್ ಬಾಯೆಚ್ಯಾ ಘರಾ ಯೆಂವ್ಕ್.
"ಸುರೇಶ್ ಖಂಯ್ ಆಸಾ?" ಮ್ಹಳ್ಳೆಂ ಕಠಿಣ್ ಸವಾಲ್ ಕಾನಾಕ್ ಪಡ್ತಾನಾ ಸುಧೀರಾನ್ ಏಕ್ಚ್ಚ್ ಪಾವ್ಟಿಂ ಆಂಗ್ ಕಾಡ್ಲೆಂ. ಜಾಲ್ಯಾರಿ ಧೈಯ್ರ್ ಘೆವ್ನ್ "ಸುರೇಶಾಚೆ ಕಾಲ್ ಥಾವ್ನ್ ಖಬಾರ್ ನಾ" ಜಾಪ್ ದಿಲಿ.
"ತೊ ಜಾನ್ಸಿಚಾ ಘರಾ ಕೆದಾಳಾಯ್ ಬೆಟ್ ದಿತಾಲೊ ಖಂಯ್"
ಹೆಂ ಆಯ್ಕೊನ್ ಸುಧೀರ್ ಆನಿಂ ಸೆರ್ಪಿನ್ ಬಾಯ್ ಥಟಕ್ಕ್ ಜಾಲಿಂ
"ತುಂಮಿಂ ಸಾಂಗೊಂಕ್ ಕಿತೆಂ ಸೊದ್ತಾತ್?" ಭಿಂಯಾನ್ ತರಿ ಸುಧೀರಾನ್ ತಕ್ಷಣಾ ಸವಾಲ್ ಕೆಲೆಂ
"ಖುನಿ ಜಾಲ್ಯಾಂ ಉಪ್ರಾಂತ್ ಸುರೇಶಾಚೊ ನಾ ಪತ್ತೊ. ಜಾನ್ಸಿಬಾಯೆ ಕರ್ ಸದಾಂಯ್ ತಾಚಿ ಬೆಟ್. ತಾಣೆಂಚ್ ಖುನಿ ಕೆಲ್ಯಾ ಮ್ಹಳ್ಳ್ಯಾಕ್ ಸಾಕ್ಸ್."
"ನಾ ಇನ್ಸ್ಪೆಕ್ಟರ್ ಮ್ಹಜೊ ಪೂತ್ ಖುನಿಗಾರ್ ನ್ಹಂಯ್. ತೊ ಕೊಣಾಯ್ಚಿ ಖುನ್ ಕರ್ಚೊ ನಾ" ಮ್ಹಣ್ ಸೆರ್ಪಿನ್ಬಾಯ್ ಗಳ್ಗಳ್ಯಾ ರಡೊನ್ ಥಂಯ್ಸರ್ ಮತ್ ಚುಕೊನ್ ಪಡ್ಲಿ.
***************
ಸುರೇಶ್ ಆನಿಂ ತಾಚೊ ಈಶ್ಟ್ ಗುರುಚಿಂ ಸೊಧ್ನಾಂ ಸುರು ಜಾಲ್ಲಿಂ. ಹೆವ್ಶಿಲ್ಯಾನ್ ಸೆರ್ಪಿನ್ಬಾಯ್ ಖಾಣ್ ಪಿಯೆವ್ನ್ ಸೊಡ್ನ್ ದುಃಖಾಂ ಗಳಯ್ತಾಲಿ. ದೇವ್ಬಿರಾಂತೆನ್, ಬರಿ ಬೂದ್ಬಾಳ್ ದೀವ್ನ್ ವ್ಹಡ್ ಕೆಲ್ಲ್ಯಾ ಸುರೇಶ್ ಆಶೆಂ ಜಾಂವ್ಕ್ ಕಾರಣ್ ಕಿತೆಂ ಮ್ಹಳ್ಳೆಂ ತಿಕಾ ಸುಸ್ತಾಲೆನಾಂ. ಏಕಾಚ್ಚ್ ಆವಯ್ಚಾ ಪೊಟಾಂತ್ ಥಾವ್ನ್ ಆಯಿಲ್ಲ್ಯಾ ಪುತಾಂ ಥಂಯ್ ಇತ್ಲೊ ತಫಾವತ್.
ಸುಧೀರ್ ಲೊಕಾಂಕ್ ಫುಡ್ ಕರುಂಕ್ ತಾಂಕಾನಾಸ್ತಾನಾ, ಕಾಮಾಕ್ ಚುಕಾರಿ ಮಾರ್ನ್ ಘರಾಚ್ಚ್ ಬಸಲ್ಲೊಂ. ಸುರೇಶಾ ವಿಶ್ಯಾಂತ್ ಚಿಂತುನ್ ತೊ ವಿರಾರ್ ಜಾಲ್ಲೊಂ.
ದಾರಾರ್ ಠೊಕೆ ಪಡ್ತಾನಾ ಪಾದ್ದೆವ್ನ್ಂಚ್ ಸುಧೀರಾನ್ ಬಾಗಿಲ್ ಉಗಡ್ಲೆಂ. ಸಂಗೀತಾಕ್ ಪಳೆವ್ನ್ ಏಕ್ ಬಾರಿಕ್ ಸಂತೊಸಾಚೆಂ ಕೀರ್ಣ್ ಫಾಂಕವ್ನ್ ಮಾಯಾಕ್ ಜಾಲೆಂ. ಆಯ್ಲೆಂವಾರ್ಚ್ಚ್ ಸುಧೀರಾಕ್
ICYM ಂತ್ ಸಂಗೀತಾಚಿ ವಳಕ್ ಜಾಲ್ಲಿ. ನಿತಳ್ ಮನಾಚ್ಯಾ ಹಾಸ್ತ್ಯಾ ತೊಂಡಾಚ್ಯಾ ಸಂಗೀತಾಕ್ ತೊ ಪಸಂದ್ ಕರ್ತಾಲೊ. ತಾಂಚಿ ಇಷ್ಟಾಗತ್ ದೀಸಾನ್ದೀಸ್ ವಾಡೊನ್ ಯೆತಾಲಿ. ಆನಿಂ ದೊಗಾಂಯ್ ಎಕಾಮೆಕಾಚಾ ಮೊಗಾರ್ ಪಡ್ಲ್ಲಿಂ.
ಆಪುಣ್ ಖುನಿಗಾರಾಚೊ ಭಾವ್. ಖಂಡಿತ್ ಆಮ್ಚಾಂ ಮಧೆಂ ಆಸ್ಚೊ ಸಂಬಂಧ್ ಮೊಡುಂಕ್ ಆಯ್ಲಾಂ ಮ್ಹಳ್ಳೆಂ ತಾಕಾ ಸುಸ್ತಾಲೆಂ.
"ಸಂಗೀತ ಹಾಂವ್ ಜಾಣಾಂ, ಎಕಾ ಖುನಿಗಾರಾಚ್ಯಾ ಭಾವಾ ಲಾಗಿಂ ಸಂಬಂಧ್ ದವರುಂಕ್ ತುಕಾ ಪಸಂದ್ ನಾಂ" ಹಾಂವ್ ತುಕಾ ಅಡಾಯ್ನಾ ಯಾ ಜಬರ್ದಸ್ತಿ ನಾ"
"ಹೆಂ ಕಿತೆಂ ಉಲಯ್ತಾತ್ ತುಂ ಸುಧೀರ್. ಹಾಂವೆಂ ತುಜೊ ಖರೊ ಮೋಗ್ ಕೆಲಾ. ಖಂಚಾಯಿ ಘಡ್ಯೆ ತುಜೊ ಹಾತ್ ಸೊಡಿನಾ ಮ್ಹಣ್ ತುಕಾ ಭಾಸ್ ದಿಲ್ಯಾ. ತುಜೊ ಭಾವ್ ಖುನಿಗಾರ್ ಜಾಲ್ಯಾರ್ ಹಾಂತುಂ ತುಜಿ ಕಿತೆಂ ಚೂಕ್. ಹಾಂವ್ ಜಾಣಾಂ ಮ್ಹಜೊ ಸುಧಿ ಉಜ್ಯಾಂತ್ ಲಾಸೊನ್ ಭಾಯ್ರ್ ಕಾಡ್ಲ್ಲ್ಯಾ ಭಾಂಗಾರಾ ಪರಿಂ"
ಹೆಂ ಆಯ್ಕೊನ್ ಸುಧೀರ್ ಸಗ್ಳೊಚ್ಚ್ ಗಳೊನ್ ಸಂಗೀತಾಕ್ ವೆಂಗುನ್ ದುಃಖಾಂ ಗಳಯ್ಲಾಗ್ಲೊ.
ಸುದೀರ್ ತುಂ ಖಂತ್ ಕರಿನಾಕಾ. ತುಜ್ಯಾ ಆವಯ್ಚಿ ಜತನ್ ಘೆ. ಲೊಕಾಕ್ ಫುಡ್ ಕರಿನಾಸ್ತಾನಾ ಕಿತ್ಲೆ ದೀಸ್ ಮ್ಹಣಾಸರ್ ಘರಾ ಬಸ್ತಾಯ್. ಲೋಕ್ ಕಿತೆಂಯ್ ಉಲಯ್ತಾ. ಹಾಡ್ ನಾತ್ಲ್ಲ್ಯಾ ಜಿಬೆಕ್ ಕೊಣಿಂಯಿ ಅಡಾಂವ್ಕ್ ಸಕನಾಂತ್. ಧಯ್ರ್ ಘೆ."
ಅಸಲಿಂ ಭರ್ವಶ್ಯಾಚಿ ಉತ್ರಾಂ ಸುಧೀರಾಕ್ ಖೂಬ್ ಧೈಯ್ರ್ ದೀಂವ್ಕ್ ಪಾವ್ಲಿಂ. ದುಸ್ರ್ಯಾ ದಿಸಾ ಥಾವ್ನ್ಂಚ್ ತಾಣೆಂ ಕಾಮಾಕ್ ವೆಚ್ಯಾಕ್ ನಿರ್ಧಾರ್ ಘೆತ್ಲೊ. ಸಂಗೀತಾ ಸುಮಾರ್ ವೇಳ್ ಬಸೊನ್ ಸೆರ್ಪಿನ್ಬಾಯೆಕ್ ಸಮಾಧಾನ್ ಸಾಂಗೊನ್ ಘರಾ ಭಾಯ್ರ್ ಸರ್ಲೆಂ.
******
ಇನ್ಸ್ಪೆಕ್ಟರ್ ದಾಸಾಚೆಂ ಖುನಿಗಾರಾಕ್ ದರ್ಚೆಂ ಪ್ರಯತ್ನ್ ವ್ಯರ್ಥ್ ಜಾಂವ್ಕ್ ನಾಂ. ಬೆಂಗ್ಳುರಾಂತ್ ಎಕಾ ಹೊಟೆಲಾಂತ್ ಆಸ್ರೊ ಘೆತ್ಲ್ಲ್ಯಾ ಸುರೇಶಾಕ್ ಆನಿಂ ತಾಚ್ಯಾ ಇಷ್ಟಾಕ್ ಧರುಂಕ್ ಪೊಲಿಸಾಂಕ್ ಕಷ್ಟ್ ಜಾಲೆಂನಾಂತ್. ಸಗ್ಳ್ಯಾ ದಿಸಾಳ್ಯಾಂ ಪತ್ರಾಂನಿ ಹಾಂಚಿ ದೊಗಾಂಯ್ಚಿ ಫೊಟೊ ಛಾಪ್ಲ್ಲಿ. ಸರ್ವ್ ಪೊಲಿಸ್ ಸ್ಟೇಶನಾಂನಿ ಹಾಂಚಿ ಖಬಾರ್ ಪಾವಿತ್ ಜಾಲ್ಲ್ಯಾನ್ ಹ್ಯಾ ದೊಗಾಂಯಿ ಖುನಿಗಾರಾಂಕ್ ಧರುಂಕ್ ಸಾಧ್ಯ್ ಜಾಲ್ಲೆಂ.
ಸುರೇಶ್ ಆನಿಂ ಗುರು ಪೊಲಿಸಾಂಚ್ಯಾ ಹಾತಾಂತ್ ಶಿರ್ಕೊನ್ ಭಿಂಯೆವ್ನ್ ಕಂಗಾಲ್ ಜಾಲ್ಲೆಂ. ಚೊರಿ ಕೆಲ್ಲ್ಯಾ ಪಯ್ಶಾಂನಿ ಮಜೆನ್ ಜಿಣಿ ಸಾರ್ಯೆತ್ ಮ್ಹಳ್ಳೆಂ ಅನ್ನಾಡಿ ಸ್ವಪಾಣ್ ಚೂರಾನ್ ಚೂರ್ ಜಾಲ್ಲೆಂ. ಸುರೇಶಾಕ್ ಕಷ್ಟ್ ಕಿತೆಂ ಮ್ಹಳ್ಳೆಂ ಕಳಿತ್ ನಾತ್ಲ್ಲೆಂ. ಪುಣ್ ಆಜ್ ತಾಚ್ಯಾ ಮುಖಾರ್ ತಾಚಿ ಜಿಣಿ ದಿಸೊಂಕ್ ಲಾಗ್ಲಿ. ಪೊಲಿಸಾಂಕ್ ಹ್ಯಾ ದೊಗಾಂಯಿ ಥಾವ್ನ್ ಸತ್ ಭಾಯ್ರ್ ಕಾಡುಂಕ್ ವೇಳ್ ಲಾಗ್ಲೊ ನಾಂ. ಚೊರಿ ಕರುಂಕ್ ಗೆಲ್ಲ್ಯಾ ವೆಳಾರ್ ಜಾನ್ಸಿಬಾಯೆಕ್ ಜಾಗ್ ಜಾಲ್ಲ್ಯಾನ್ ತಿಚಿ ಖುನ್ ಕೆಲ್ಲ್ಯಾ ಶಿವಾಯ್ ತಾಂಕಾಂ ದುಸ್ರಿ ವಾಟ್ ನಾತ್ಲ್ಲಿಂ. ಖಂಯ್ ಜಾನ್ಸಿಬಾಯ್ ಆವಾಜ್ ಉಟೊವ್ನ್ ಸೆಜಾರ್ಯಾಂಕ್ ಆಪಯ್ತ್ಗಿ? ಆನಿಂ ಪೊಲಿಸಾಂಕ್ ಖಬಾರ್ ದೀತ್ ಮ್ಹಳ್ಳ್ಯಾ ಭಿಂಯಾನ್ ತಿಚೊ ಜೀವ್ಚ್ಚ್ ತಾಂಣಿಂ ಕಾಡ್ಲ್ಲೊ. ಹೆಂ ಸತ್ ಕೊಣೆಂಯಿ ಪಳೆಂವ್ಕ್ ನಾತ್ಲ್ಲ್ಯಾನ್ ತಾಂಕಾಂ ಕೊಣಿಂಯಿ ಧರುಂಕ್ ಸಕ್ಚೆನಾಂತ್ ಮ್ಹಣ್ ತಾಂಣಿಂ ಚಿಂತ್ಲ್ಲೆಂ. ಹ್ಯಾ ಸರ್ವಾಕ್ ಕಾರಣ್ಕರ್ತ್ ಗುರು.
ಗುರುಕ್ ಪಿಯೊವ್ಣ್ಯಾಕ್ ಆನಿಂ ಜುಗಾರಿ ಖೆಳುಂಕ್ ಪಯ್ಶಾಂಕ್ ದಗಲ್ಬಾಜಿ, ಚೊರಿ ಕರ್ಚೆಂ ದಾವ್ಯಾ ಹಾತಾಚೆಂ ಕಾಮ್ ಜಾವ್ನಾಸ್ಲ್ಲೆಂ. ಬೊಂಬಯಾಂತ್ ಕೊಣಾಚಿಗಿ ಖುನ್ ಕರ್ನ್ ಪೊಲಿಸಾಂಚ್ಯಾ ಹಾತಾಂತ್ ಥಾವ್ನ್ ಚುಕೊನ್ ಗಾವಾಕ್ ದಾಂವೊನ್ ಆಯಿಲ್ಲೊ. ಜಾನ್ಸಿಬಾಯೆಚ್ಯಾ ಟೆರೆಸಾಚ್ಯಾ ಘರಾಚೆರ್ ಸುಮಾರ್ ತೇಂಪಾ ಥಾವ್ನ್ ತೊ ದೊಳೊ ದವರ್ನ್ ಆಸ್ಲ್ಲೊಂ. ಸುರೇಶ್ ತಿಚ್ಯಾ ಘರಾ ಯೆಂವ್ನ್ ವಚೊನ್ ಆಸ್ಚೆಂ ಪಳೆವ್ನ್ ಸುರೇಶಾಚಿ ಇಷ್ಟಾಗತ್ ಕೆಲ್ಲಿ. ಸುರೇಶ್ಯಿ ಕಾಮ್ ಕರಿನಾಸ್ತಾನಾ ಭಂವ್ಚೊ ಬಚ್ಚಾಲಿ ಜಾಲ್ಲ್ಯಾನ್ ದೊಗಿ ಈಷ್ಟ್ ಜಾಂವ್ಕ್ ವೇಳ್ ಲಾಗ್ಲೊ ನಾಂ. ಆನಿಂ ಆಶೆಂ ಗುರುನ್ ತಾಕಾ ವಾಪಾರ್ನ್ ಜಾಲ್ಲೆಂ. ಎಕಾ ಮಾಸುಮ್ ಶೆಳಿಯೆಕ್ ಖುನಿಗಾರ್ ಕೆಲೆಂ.
ಸುರೇಶ್ ಚಿಂತುಂಕ್ ಅಸಾಧ್ಯ್ ಜಾಲ್ಲ್ಯಾ ಶಿರಿಗುಂಡೆಂತ್ ಶಿರ್ಕಾಲ್ಲೊ. ಕೊಣಾಯ್ಚಿಯ್ ಖುನಿ ಕರ್ಚಾ ತಿತ್ಲೊ ತೊ ಕಠಿಣ್ ಮನಾಚೊ ನ್ಹಂಯ್ ಜಾವ್ನಾಸ್ಲ್ಲೊಂ. ಆವಯ್ಚೆಂ ಆನಿಂ ಬಾವಾಚೆಂ ರಗಾತ್ ತಾಚೆಂ ಥಂಯ್ಯಿ ವ್ಹಾಳ್ತಾಲೆಂ. ಪುಣ್ ಪಾಡ್ ಸಾಂಗಾಂತಾ ವರ್ವಿಂ ಶೆಳಿ ಹಿಂಡಾಂತ್ ಥಾವ್ನ್ ಪಯ್ಸ್ ಪಾವ್ಲ್ಲಿ. ಜಾನ್ಸಿಬಾಯೆ ಕಡೆ ತಾಚಿ ಖರಿ ಇಶ್ಟಾಗತ್ ಆಸ್ಲ್ಲಿ. ಜಾನ್ಸಿಬಾಯೆಚಿ ಖುನಿ ಜಾತೆಲಿ ಮ್ಹಣ್ ತಾಣೆಂ ಚಿಂತುಂಕ್ ನಾತ್ಲ್ಲೆಂ. ಗುರುಚ್ಯಾ ಐಡಿಯಾ ಪರ್ಮಾಣೆಂ ಕೇವಲ್ ಚೊರಿ ಕರ್ಚಿ ತಾಂಚೊ ಇರಾದೊ ಜಾವ್ನಾಸ್ಲ್ಲೊ. ಪುಣ್ ಗುರುಚ್ಯಾ ಪ್ರೋತ್ಸಾಹಾನ್ ಏಕಾ ಆಯಿನ್ನ್ ಘಡ್ಯೆ ಘಡೊಂಕ್ ನಜೊ ಆಸ್ಲ್ಲೆಂ ಘಡೊನ್ ಜಾಲ್ಲೆಂ.
ಪೊಲಿಸಾಂಚೆಂ ಮಾರ್ ಪಡ್ತಾನಾ "ಮಾಂಯ್" ಮ್ಹಳ್ಳೊ ಸಬ್ದ್ ಸುರೇಶಾಚ್ಯಾ ತೊಂಡಾಂತ್ ಥಾವ್ನ್ ಭಾಯ್ರ್ ಪಡ್ಲೊ. ಪಯ್ಲೆ ಪಾವ್ಟಿಂ ಆವಯ್ಚಿ ಬೂದ್ಬಾಳ್ ಉಗ್ಡಾಸಾಕ್ ಆಯ್ಲಿ. ಬಾವಾಚಿ ಸಮ್ಜಣೆಂಚಿ ಉತ್ರಾಂ ಕಾನಾಂತ್ ಗುಣ್ಗುಣುಂಕ್ ಲಾಗ್ಲಿಂ. ಆವಯ್ಚೆ ತೋಂಡ್ ನಿಯಾಳ್ನ್ ತೊ ಗಳ್ಗಳ್ಯಾಂ ರಡ್ಲೊಂ. "ಮಾಂಯ್ ತುಜೆ ಉತಾರ್ ಹಾಂವ್ ಆಯ್ಕಾಲ್ಲೆಂ ತರ್, ಭಾವಾ ತುಜ್ಯಾ ವಾಟೆನ್ ಹಾಂವ್ ಚಲಲ್ಲೊಂ ತರ್ ಹೊ ದೀಸ್ ಮ್ಹಜ್ಯಾ ಜಿಣ್ಯೆಂತ್ ಯೆತೊ ನಾತ್ಲ್ಲೊ. ಪುಣ್ ವೇಳ್ ಉತ್ರಾಲ್ಲೊ. ಆಪುಣ್ ಜಿಣಿಭರ್ ಹ್ಯಾ ಜಯ್ಲಾಂತ್ ಲೊಳ್ತಾಲೊಂ ಮ್ಹಳ್ಳೆಂ ಕೊಡು ಸತ್ ತಾಕಾ ಅಜೀರ್ಣ್ ಕರುಂಕ್ ಕಷ್ಟ್ ಬೊಗ್ಲೆ. ’ಆಪುಣ್ ಏಕ್ ಚುಕೊನ್ ಗೆಲ್ಲಿ ಶೆಳಿ. ಮ್ಹಾಕಾ ಸೊಧುನ್ ಯೆತಲೊ ಕೋಣ್ಂಚ್ ನಾಂತ್. ವಾಟ್ ಚುಕೊನ್ ಹಾಂಚ್ ಬಾರಿಚ್ಚ್ ಪಯ್ಸ್ ಯೇಂವ್ನ್ ಪಾವ್ಲಾಂ. ಹಿಂಡಾಕ್ ಪಾಟಿಂ ವೆಚಿ ವಾಟ್ ಬಂದ್ ಜಾಲ್ಯಾ’. ಹೆಂ ಸರ್ವ್ ಚಿಂತುನ್ ಮತ್ ತಾಚಿ ಪಿಸಾಂತುರ್ ಜಾಲಿ.
ತ್ಯೊ ವೊಣದಿ "ತುಂ ಖುನಿಗಾರ್...............ಖುನಿಗಾರ್..............ತುಂವೆಂ ನಿರಾಪ್ರಾದಿ ರಗಾತ್ ವ್ಹಾಳಯ್ಲಾಯ್" .....ಆಶೆಂ ಬೊಬಾಟ್ ಮಾರ್ತಾ ತಶೆಂ ತಾಕಾ ಭೊಗ್ಲೆಂ. ತಾಚ್ಯಾ ಹಾತಾಂನಿ ರಗಾತ್ ದಿಸೊಂಕ್ ಲಾಗ್ಲೆಂ. ಸುರೇಶ್ ಪಿಶ್ಯಾ ಬಾಶೆನ್ ಸಗ್ಳ್ಯಾ ಕುಡಾಂತ್ ಧಾಂವಾಲಾಗ್ಲೊ.
ನಾ..............ನಾ........... ಹ್ಯೊ ಬೊಬೊ ಹಾಂವ್ ಆಯ್ಕೊಂಕ್ ಸಕ್ಚೊನಾ... ಹೆಂ ರಗಾತ್ ಮ್ಹಜ್ಯಾನ್ ಪಳೆಂವ್ಕ್ ಜಾಯ್ನಾ. ಮ್ಹಜ್ಯಾ ಮಾಂಯ್ಕ್, ಭಾವಾಕ್ ಹಾಂವ್ ತೋಂಡ್ ದಾಕಂವ್ಕ್ ಫಾವೊ ನ್ಹಂಯ್. ಆತಾಂ ಉರ್ಲ್ಯಾ ಏಕ್ಚ್ಚ್ ವಾಟ್! ಸುಟ್ಕಾ!
ಜೀವ್ಘಾತ್.....ಸುರೇಶ ತಕ್ಷಣಾ ಉಟ್ಲೊ.
ಕೆಲ್ಲೆಂ ಪಾಪ್ ಕರ್ನ್ ಜಾಲ್ಲೆಂ.
ಆನಿಂ ತಾಚ್ಯಾ ವಯ್ರ್ ಅನ್ಯೇಕ್ ಪಾಪ್!!
ತಾಕಾ ತ್ಯಾ ಕೂಡಾಂತ್ ಗ್ಲಾಸಾಚೆ ಜನೆಲ್ ದಿಸ್ಲೆಂ. ಲ್ಹಾನ್ ಜನೆಲ್ ತೆಂ. ಪೊಲಿಸ್ ಭಾಯ್ರ್ ಬಸೊನ್ ಜೆಮೆಂವ್ಚೆಂ ಸುರೇಶಾನ್ ಪಳಯ್ಲೆ. ಲೋವ್ ಜನೆಲಾಚೊ ಗ್ಲಾಸ್ ನಿಕ್ಳಾಯ್ಲೊ. ಗ್ಲಾಸ್ ಸಕ್ಲಾ ಘಾಲ್ನ್ ಫುಟಯ್ಲೊ. ತಕ್ಷಣಾಂ ಗ್ಲಾಸಾಚಿ ಧಾರ್ ಚೂರ್ ಹಾತಿಂ ಘೆವ್ನ್ ತಾಣೆಂ ತಾಚ್ಯಾ ಪೊಟಾಕ್ ತೊಪ್ಲಿ. ರಗ್ತಾಚಿ ವಾಳ್. ದೂಃಕ್ ಸೊಸುಂಕ್ ತಾಂಕಾನಾಸ್ತಾನಾ ಸುರು ಜಾಲಿ ಸುರೇಶಾಚಿ ಬೋಬ್. ಬೊಬೊ ಆಯ್ಕೊನ್ ಡ್ಯೂಟೆರ್ ಆಸ್ಲ್ಲೊ ಪೊಲಿಸ್ ದಾಂವೊನ್ ಯೆತಾನಾ ಸುರೇಶಾಕ್ ರಗ್ತಾಚಾ ಕೊಂಡಾಂತ್ ಪಳೆವ್ನ್ ತಕ್ಷಣಾಂ ಎಂಬುಲೆನ್ಸರ್ ಘಾಲ್ನ್ ಅಸ್ಪತ್ರೆಕ್ ಸಾಗ್ಸಿಲೆಂ.
ಸುರೇಶಾಕ್ ವೆಳಾರ್ ಆಸ್ಪತ್ರೆಕ್ ವೆಲ್ಲ್ಯಾ ವರ್ವಿಂ ಫಾವೊತ್ಯಾ ವೆಳಾರ್ ಚಿಕಿತ್ಸಾ ಮೆಳೊನ್ ಸುರೇಶ್ ವಾಂಚ್ಲೊಂ. ಹಾ ವಿಧಿ! ತುಜೊ ಖೆಳ್.
ಸೆರ್ಪಿನ್ ಬಾಯ್ ಸುರೇಶಾ ವಿಶ್ಯಾಂತ್ ಚಿಂತುನ್ ಸಗ್ಳಿ ಸೈರ್ಬೈರ್ ಜಾಲ್ಲಿ. ಸುಧೀರಾಕ್ ಚಡ್ ರಜಾ ಕಾಡುಂಕ್ ಸಾಧ್ಯ್ ನಾತ್ಲ್ಲ್ಯಾನ್ ತಾಕಾ ಕಿತೆಂ ಕರ್ಚೆಂ ಮ್ಹಳ್ಳೆಂ ಸಮ್ಜಾಲೆಂನಾಂ. ತಿಚೆ ಇತ್ಲ್ಯಾಕ್ ರಡ್ಚೆ, ಖಾಣ್ ಉಡಂವ್ಚೆಂ ಸದಾಂಚೆಂ ಜಾಲೆಂ. ಭೆಟ್ ದೀಂವ್ಕ್ ಆಯಿಲ್ಲ್ಯಾ ಪಾದ್ರ್ಯಾಬಾನ್ ತಿಕಾ ಪಿಶ್ಯಾಂಚಾ ಆಸ್ಪತ್ರೆಕ್ ಭರ್ತಿ ಕರುಂಕ್ ಸುಧೀರಾಕ್ ಸಾಂಗ್ಲೆಂ. ಸುಧೀರಾಕ್ ಬಾರಿಕ್ ಸುವಿಯೆನ್ ಕಾಳ್ಜಾಕ್ ತೊಪಲ್ಲ್ಯಾಚೊ ಅನ್ಬೋಗ್ ಜಾಲೊ. ಆಪ್ಣಾಕ್ ಕಷ್ಟಾಂನಿ ವ್ಹಡ್ ಕೆಲ್ಲ್ಯಾ ಆವಯ್ಕ್ ಸುಖಾನ್ ದವರಿಜಾಯ್ ಮ್ಹಳ್ಳೆಂ ತಾಚೆ ಸ್ವಪಾಣ್ ಪೊಂತಾಕ್ ಪಾವ್ಲೆನಾ. ಆಪ್ಣಾಚ್ಯಾ ಆವಯ್ಕ್ ಪಿಶ್ಯಾಂಚ್ಯಾ ಆಸ್ಪತ್ರೆಂತ್ ಪಳೆಂವ್ಕ್ ಫಾವೊ ಜಾತಾಲೆಂ ಆನಿಂ ಆಪ್ಣಾಚ್ಯಾ ಭಾವಾಕ್ ಜಯ್ಲ್ ಫಾವೊ ಜಾತಲೆಂ ಮ್ಹಣ್ ತಾಣೆಂ ಚಿಂತ್ಲ್ಲೆಂಗಿ?
ದೀಸ್ ಉತ್ರಾಲೆ. ಸೆರ್ಪಿನ್ಬಾಯ್ ಬರಿ ಜಾವ್ನ್ ಯೆತಾಲಿ ತರಿ ಪುತಾಚ್ಯಾ ಖಂತಿನ್ ಕರ್ಗಾತಾಲಿ.
ಸುಧೀರಾಚಾ ಇಷ್ಟಾಚಾ ಪ್ರಯತ್ನಾನ್ ಸುಧೀರಾಕ್ ಅಬುದಾಬಿಂತ್ ಬರೆಂ ಕಾಮ್ ಮೆಳ್ಲ್ಲೆಂ. ಪುಣ್ ಆವಯ್ಕ್ ಸೊಡ್ನ್ ಕಶೆಂ ವೆಚೆಂ? ಪುಣ್ ಹಾಂಗಾಚ್ ಉರ್ಲ್ಯಾರ್ ಮ್ಹಜೆಂ ಭವಿಶ್ಯ್ ಕಿತೆಂ? ಹೆಂ ಪೂರಾ ಚಿಂತುನ್ ತೊ ವಿರಾರ್ ಜಾಲ್ಲೊ.
ಆವಯ್ಕ್ ಪಳೆತಾನಾ ತಾಕಾ ದೂಃಕ್ ಭಗ್ತಾಲೆಂ. ತಿಚ್ಯಾ ತೊಂಡಚೊ ಪ್ರಕಾಸ್ ಮಾಯಾಕ್ ಜಾಲ್ಲೊ. ಪೂತ್ ಕಿತೆಂಚ್ ಉಲಯ್ನಾಸ್ತಾಂ ವೊಗೆಚ್ಚ್ ಆಪ್ಣಾಕ್ ಪಳೆಂವ್ಚೆಂ ಪಳೆವ್ನ್ ತಿಕಾ ಅಜ್ಯಾಪ್ ಬೊಗ್ಲೆಂ. ಸುಧಿ ತುಜೆಂ ತೋಂಡ್ ಕಿತ್ಯಾಕ್ ಬಾವ್ಲಾ. ಹುಶಾರ್ ನಾಂಯ್ಗಿ ತುಂ?"
"ಮಾಂಯ್ ಮ್ಹಾಕಾ ಅಬುದಾಬಿಂತ್ ಕಾಮ್ ಮೆಳ್ಳಾಂ. ಪುಣ್ ತುಕಾ ಸೊಡುನ್ ಕಶೆಂ ವೆಚೆಂ? ತುಕಾ ಸಾಂಬಾಳುಂಕ್ ಕೋಣ್ ಆಸಾತ್"
ಸೆರ್ಪಿನ್ಬಾಯ್ ಚಿಂತುಂಕ್ ಪಡ್ಲಿ. ಎಕಾ ಘಡ್ಯೆಕ್ ತಿಕಾ ದೂಃಕ್ ಬೊಗ್ಲಿ. ತರಿ ಆಪ್ಣಾ ಖಾತಿರ್ ದೀಸ್ ರಾತ್ ಕಷ್ಟೊಂಚ್ಯಾ ಸುಧಿಚೆಂ ಉಜ್ವಲ್ ಭವಿಷ್ಯ್ ತಿಚಾ ಖಾತಿರ್ ಪಾಡ್ ಜಾಂವ್ಚೆಂ ನಾಕಾ ಆಸ್ಲ್ಲೆಂ. ಆಪ್ಣಾಚಾ ಪುತಾನ್ ಬರೆಂ ಜಾಯ್ಜಾಯ್ ಆಶೆಂ ಘಟ್ ನಿರ್ಧಾರ್ ಮತಿಂತ್ ದವರ್ನ್
"ಸುಧಿ ತುಂ ಮ್ಹಜಿ ಖಂತ್ ಕರಿನಾಕಾ. ಮ್ಹಾಕಾ ತುಂ ವ್ರದ್ಧಾಶ್ರಮಾಂತ್ ದವರ್. ತುಜೊ ಸಂತೊಸ್ಚ್ಚ್ ಮ್ಹಜೊ ಸಂತೊಸ್. ತುಂ ತುಜ್ಯಾ ಭವಿಶ್ಯಾವಿಶಿಂ ಚೀಂತ್ ಪುತಾ"
ಆವಯ್ಚಿ ಭರ್ವಶ್ಯಾಂಚಿ ಉತ್ರಾಂ ತಾಕಾ ಧಯ್ರಾನ್ ಭರಿಲಾಗ್ಲಿಂ. ಆವಯ್ಕ್ ವ್ರದ್ಧಾಶ್ರಮಾಂತ್ ದವರ್ನ್ ಸುಧಿ ಗಲ್ಫಾಕ್ ಭಾಯ್ರ್ ಸರ್ಲೊ. ವೆಚ್ಯಾ ಪಯ್ಲೆಂ ಸುರೇಶಾಕ್ ಮೆಳೊಂಕ್ ಮನ್ ಆಯ್ಲೆಂ ತರಿ ತಾಣೆಂ ಕೆಲ್ಲೆಂ ಹೀನ್ ಕಾಮ್ ಚಿಂತುನ್ ತಾಚೆಂ ತೊಂಡ್ ಪಳೆಂವ್ಕ್ ಮನ್ ಆಯ್ಲೆಂನಾಂ. ಸುಧಿ ಗಲ್ಫಾಕ್ ಪಾವ್ಲೊ ಆಪ್ಲ್ಯಾ ಮೊಗಾಚ್ಯಾ ಆವಯ್ಕ್ ಆನಿಂ ಆಪ್ಲ್ಯಾ ಮೊಗಾಕ್ ಆಧೇವ್ಸ್ ಮಾಗೊನ್....
**********************
ಸುರೇಶಾಕ್ ಆನಿಂ ಗುರುಕ್ ಸೆಂಟ್ರಲ್ ಜೈಲಾಕ್ ಧಾಡ್ಲ್ಲೆಂ. ಮೊರ್ತಾ ಮ್ಹಣಾಸರ್ ತಾಂಕಾಂ ದೊಗಾಂಯ್ಕಿ ಜೈಲ್ ಫಾವೊ ಜಾಲ್ಲೆಂ. ಸೆರ್ಪಿನ್ಬಾಯ್ ಅಶ್ರಮಾಂತ್ ಬಸೊನ್ ದುಃಖಾಂ ಗಳಯ್ತಾಲಿ. ತಿಚಿ ಬರಿಚ್ಚ್ ಸಭಾರ್ ಪ್ರಾಯ್ವಂತಾಂ ಥಂಯ್ಸರ್ ಆಸ್ಲ್ಲಿಂ. ತಿಚಿ ಏಕ್ ಕಾಣಿಂ ಜುಸ್ತಿನ್ ಬಾಯೆಚಿ ಅನ್ಯೇಕ್ ಕಾಣಿಂ. ತಿಕಾ ಸ ಜಣಾಂ ಭುರ್ಗಿಂ ಆಸ್ಲ್ಲಿಂ. ಚೋವ್ಗ್ ಚೆಡೆ ಆನಿಂ ದೊಗಾಂ ಚೆಡ್ವಾಂ. ಸರ್ವಾಂಚೆಂ ಬರೆಂ ಫಾಲೆಂ ಜಾಲ್ಲೆಂ. ಪೂತ್ ಬರ್ಯಾ ಹುದ್ದ್ಯಾರ್ ಪಾವ್ಲ್ಲೆ. ಪುಣ್ ಪ್ರಾಯ್ವಂತ್ ಆವಯ್ಚಿ ಜತನ್ ಘೆಂವ್ಕ್ ಚೊವ್ಗಿ ಪೂತ್ ತಯಾರ್ ನಾತ್ಲ್ಲೆಂ. ತಾಂಕಾ ತಿಂ ವೊಜೆಂ ತಶೆಂ ಜಾಲ್ಲೆಂ. ಆನಿಂ ಆಶ್ರಮಾಂತ್ ಹಾಡ್ನ್ ಸೊಡ್ಲ್ಲೆಂ. ಆಶಿ ಸರ್ವಾಂ ಸಾಂಗಾಂತಾ ಮೆಳೊನ್ ತಾಂಚಿ ಸುಖ್
ದುಃಖ್ ಉಲಯ್ತಾಲಿಂ.
ಸೆರ್ಪಿನ್ ಬಾಯ್ ಪಂದ್ರಾ ದಿಸಾಕ್ ಏಕ್ ಪಾವ್ಟಿಂ ಯೆಂವ್ಚಾ ಸುಧಿಚಾ ಪೊನಾಕ್ ಅತ್ರೆಗಾನ್ ರಾಕ್ತಾಲಿ.
ಸುಧಿ ಅಬುದಾಬಿಂತ್ ಕಾಮ್ ಕರ್ನ್ ಖುಶ್ ಆಸ್ಲ್ಲೊ. ಆವಯ್ಚೊ ಉಗ್ಡಾಸ್ ನಿರಂತರ್ ತಾಕಾ ದೊಸ್ತಾಲೊ. ಆಶೆಂ ದೋನ್ ವರ್ಸಾಂ ಪಾಶಾರ್ ಜಾಲ್ಲಿಂ. ಆಚಾನಕ್ ಏಕ್ ದಿಸ್ ತಾಕಾ ತಾಚಾ ಮಾವ್ಳ್ಯಾ ಥಾವ್ನ್ ಪೋನ್ ಆಯ್ಲೆಂ. ಖಬಾರ್ ಆಶಿ
’ಸುರೇಶ್ ದೆವಾಧಿನ್ ಜಾಲೊ’. ಸುಧೀರಾಕ್ ದುಃಕ್ ತಡ್ವೊಂಕ್ ಜಾಲೆಂ
ನಾ. ಗಳ್ಗಳ್ಯಾಂ ತೊ ರಡ್ಲೊ. ತಾಣೆ ಸುರೇಶಾಸಂಗಿಂ ಸಾರ್ಲ್ಲೆ ದೀಸ್ ತಾಕಾ ಉಡಾಸ್ ಆಯ್ಲೆ. ನಿಮಾಣಿ ಏಕ್ ದೀಷ್ಟ್ ಸುರೇಶಾಚೆರ್ ಘಾಲುಂಕ್ ಸುಧೀರ್ ಗಾವಾಕ್ ಭಾಯ್ರ್ ಸರ್ಲೊ.
ಸೆರ್ಪಿನ್ ಬಾಯೆಚೆ ದೋಗ್ ಪೂತ್ ದೋನ್ ಮುಖಾಂಪರಿಂ ಆಸ್ಲ್ಲೆ ದೋನ್ ದಿಶಾಂನಿ ಚಮ್ಕಲ್ಲೆ, ಎಕ್ಲ್ಯಾಕ್ ದುಸ್ರೊ ತದ್ವಿರುದ್ದ್ ಜಾವ್ನ್...
ಸುರೇಶಾಚೆ ಅಂತ್ಯ್ ಜಾಲ್ಲೆಂ ಏಡ್ಸ್ ಪಿಡೆವರ್ವಿಂ.
ಆದ್ಲ್ಯಾ ಕಥಾಂಕರ್ ಪಾನಾಕ್: 1, 2, 3, 4
About us | Feedback
| Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
