ಕವಿತಾकविताPoem
ಜೊಮೇಲ್,
This poem is available in its original Kannada only.
ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
"ದಾಯ್ಜ್ ಕವಿತಾ ಸ್ಪರ್ಧೊ 2005 ಹಾಂತುಂ ಇನಾಮಾಂ ಜಿಕ್ಲ್ಲಿಂ ಕವಿತಾ"
ಜೆ.ಬಿ.ಮೊರಾಯಸ್
[ಪಯ್ಲೆಂ ಇನಾಮ್]
[ರುಪಯ್ 5000]
ನೆಂಟ್ಯಾ
ಮತಿಚೊ ವಿಳಾಪ್
"ಸತಾಕ್ ಬಿಲ್ಕುಲ್ ಸಾಂಡಿನಾಕಾ" ವ್ಹಡಿಲಾಂನಿ ಸಾಂಗ್ತಾನಾ
’ವೇದವಾಕ್ಯ’ ಭೊಗ್ಲೆಂ ಮ್ಹಾಕಾ ಕಾನಾರ್ ಮ್ಹಜ್ಯಾ ಪಡ್ಟಾನಾ
ಆಯ್ಲ್ಯಾಂತ್ ಆತಾಂ ಮಂತ್ರಾಂ ನವಿಂ ’ಸತಾಕ್ ಗೆಲ್ಯಾರ್ ಪೊಟಾಕ್ ನಾ’
ನೆಂಟ್ಯಾ ಮತಿಕ್ ಜಾಂಟ್ಯೊ ಬುಧಿ ಯೇನಾಂತ್ ಕಿತ್ಯಾಕ್ ಕಳ್ಳೆಂನಾ.
ಕಾಳ್ಯಾ ಧವ್ಯಾ ರಂಗಾ ಶಿವಾಯ್ ತಿಸ್ರೊ ರಂಗ್ ಶಿಕ್ಲೊಂನಾ.
ಬರ್ಯಾ ವಾಯ್ಟಾ ಗುಣಾಂ ಮಧೆಂ, ಹಜಾರ್ ಮದ್ಲೆ ಚೊಯ್ಲೆನಾ.
ಕಾಟ್ಕಾಯ್, ದಂಗ್ಯಾಂತ್ ವ್ಹಾಳ್ಳೆಂ ಧಾರಾಳ್ ಅಪುಟ್ ತಾಂಬ್ಡೆಂ ದಿಸ್ಲೆಂನಾ.
ನೆಂಟ್ಯಾ ಮತಿಕ್ ಜಾಂಟ್ಯೊ ಬುಧಿ ಯೇನಾಂತ್ ಕಿತ್ಯಾಕ್ ಕಳ್ಳೆಂನಾ.
’ಮೆಜಾವಯ್ಲೆ’, ’ಮೆಜಾಪಂದ್ಲೆ’ - ಫಕಕ್ ಕಿತೆಂ ಗೊಮ್ಲೆಂನಾ.
ಜಿಬೆ ಉತರ್ ದಿಲೆಂ - ಜಾಲೆಂ! ಉಪ್ರಾಂತ್ ತಾಚೆರ್ ಸವಾಲ್ ನಾ!
ಚಿಂತಪ್ ಅಶೆಂ ಲ್ಹಾನ್ಪಣಾಚೆಂ! ಆತಾಂ ರುವೆಚೆಂ ಮೊಲ್ ನಾ!
ನೆಂಟ್ಯಾ ಮತಿಕ್ ಜಾಂಟ್ಯೊ ಬುಧಿ ಯೇನಾಂತ್ ಕಿತ್ಯಾಕ್ ಕಳ್ಳೆಂನಾ.
ಆಜ್ ಬಿಜೆಪಿಂತ್, ಫಾಲ್ಯಾಂ ಎಸ್ಪಿಂತ್! ಶಿರ್ಲೊ ಸಯ್ತ್ ರಡ್ಟೊನಾ?
ಚುನಾವ್ ಕಿತ್ಲೆ ಆಯ್ಲೆ ಗೆಲೆ! ದುಬ್ಳ್ಯಾಚೆಂ ಪೊಟ್ ಭರ್ಲೆಂನಾ.
ಸಂಸದ್ ಭಂವ್ಚಾಂತ್ ಮಾರಾಮಾರಿ! ಉತ್ರಾಕ್ ಉತರ್ ಪಾವಾನಾ.
ನೆಂಟ್ಯಾ ಮತಿಕ್ ಜಾಂಟ್ಯೊ ಬುಧಿ ಯೇನಾಂತ್ ಕಿತ್ಯಾಕ್ ಕಳ್ಳೆಂನಾ.
ಕೊಲೆಜಿಂತ್ ತಿಂ ಶಿಕ್ತಾತ್ ಜಾಯ್ತಿಂ - ಚೆಡೆ-ಚೆಡ್ವಾಂ ಮೆಳ್ಟಾನಾ!
ನ್ಹೆಸಾಣ್ ಅಂರ್ದೊನ್, ಮಧೆಂ ಪಿಂದೊನ್, ಕರ್ತಾತ್ ತಿಂ ಪ್ರದರ್ಶನಾಂ!
ಭುರ್ಗಿಂ ಜಾಣಾಂತ್ ವ್ಹಡಾಂಪ್ರಾಸ್ ಚಡ್! ಖಂಯ್ ಥಾವ್ನ್ ಶಿಕ್ತಾತ್ ಸಮ್ಜಾನಾ
ನೆಂಟ್ಯಾ ಮತಿಕ್ ಜಾಂಟ್ಯೊ ಬುಧಿ ಯೇನಾಂತ್ ಕಿತ್ಯಾಕ್ ಕಳ್ಳೆಂನಾ.
ಪತಿ ಪತಿಣ್ ಮೊರಾ ಪರ್ಯಾಂತ್! ಸಾಂಗ್ಲ್ಯಾರ್ ಕೊಣೀ ಹಾಸ್ಚೊನಾ?
ಘರಾಂತ್ ಪಯ್ಲಿ, ಶೆರಾಂತ್ ದುಸ್ರಿ! ನಾತ್ಲ್ಯಾರ್ ತಾಂತುಂ ಮಝಾ ನಾ!
’ಅಂಕ್ವಾರ್ ಆವಯ್’, ’ಸಲಿಂಗ್ ಕಾಮಿ’ ಅಜ್ಯಾಪ್ ಜಾಯ್ನಾ ಆಯ್ಕಾತಾನಾ.
ನೆಂಟ್ಯಾ ಮತಿಕ್ ಜಾಂಟ್ಯೊ ಬುಧಿ ಯೇನಾಂತ್ ಕಿತ್ಯಾಕ್ ಕಳ್ಳೆಂನಾ.
ಸರ್ಗಿಂ ಪಾವೊಂಕ್ ವಾಟೊ ಸಭಾರ್ - ಶೆವೊಟ್ ಎಕ್ಚ್!
ದುಬಾವ್ಲೊಂನಾ ಭಾಭಾವ್ ಆಮಿ ರಗಾತ್ ಎಕ್ಚ್ ಮುಖಾರ್ ಚಿಂತುಂಕ್ ಸಕ್ಲೊಂನಾ
ತರಿ ವ್ಹಾಳ್ಚ್ಯೊ ರಗ್ತಾ-ನಂಯೊ! ಕಾಳಿಜ್ ರಡ್ಟಾ ಆಟಯ್ತಾನಾ
ನೆಂಟ್ಯಾ ಮತಿಕ್ ಜಾಂಟ್ಯೊ ಬುಧಿ ಯೇನಾಂತ್ ಕಿತ್ಯಾಕ್ ಕಳ್ಳೆಂನಾ.
ಮಳಬ್ ನಿಳೆಂ, ಪಾಚ್ವಿಂ ಫಾಲ್ಕಿಂ, ಸುಗಂಧ್ ವಾರೆಂ ಭೊಗ್ಲೆಂನಾ.
ಶೆರಾಂತ್, ನಾಡಾಂತ್ ಭೊಂವ್ಲೊಂ ಆಶೆನ್ - ವಾರೆಂ ವಿಕಾಳ್ ಚುಕ್ಲೆಂನಾ.
ದುಡ್ವಾ-ದೆವಾಕ್ ಕರ್ತಾತ್ ಪುಜಾ! ಮನ್ಶಾ-ಭಾವಾಕ್ ದೆಖ್ಲೆಂನಾ.
ನೆಂಟ್ಯಾ ಮತಿಕ್ ಜಾಂಟ್ಯೊ ಬುಧಿ ಯೇನಾಂತ್ ಕಿತ್ಯಾಕ್ ಕಳ್ಳೆಂನಾ.
ಕಪಟಿ ಭಾವ್ ಆಯ್ಲೆ ಹಜಾರ್! ಪಾರ್ಕುಂಕ್ ತಾಂಕಾಂ ಸಕ್ಲೊಂನಾ.
ಭಾವಾಕ್ ಖರ್ಯಾ, ದಿಸಾ-ರಾತಿ ಸೊದ್ಲೆಂ ಸಗ್ಳ್ಯಾನ್ - ಮೆಳ್ಳೊನಾ
’ತೊಂಡಾಂತ್ ರಾಮ್ ರಾಮ್! ಖಾಕೆಂತ್ ಸುರಿ’ ದವರ್ತೆಲ್ಯಾಂಕ್ ಪಾರ್ಕಿಲೆಂನಾ.
ನೆಂಟ್ಯಾ ಮತಿಕ್ ಜಾಂಟ್ಯೊ ಬುಧಿ ಯೇನಾಂತ್ ಕಿತ್ಯಾಕ್ ಕಳ್ಳೆಂನಾ.
ಮಿಟಾ ದರ್ಯಾಂತ್ ನಿತಳ್ ಥೆಂಬೊ ಉರ್ಚೊ ಕಸೊ? ಕಳ್ಳೆಂನಾ.
ಚಿಮ್ಟೆ ದಿವೊ ಝೊಡಾ.-ವಾರ್ಯಾಕ್ ಜಿಕಾತ್ ಕಸೊ? ಕಳ್ಳೆಂನಾ.
ನೆಂಟ್ಯಾ ಕಾಳ್ಜಾಂತ್ ಆರಾಯಿಲ್ಲೆಂ ಸರ್ವ್ ಉಭೊನ್ ಗೆಲೆಂ - ಕಳ್ಳೆಂನಾ
ನೆಂಟ್ಯಾ ಮತಿಕ್ ಜಾಂಟ್ಯೊ ಬುಧಿ ಆಯ್ಲ್ಯೊನಾಂತ್ - ಹೆಂ ಕಳ್ಳೆಂನಾ.
^ ವಯ್ರ್
ಆರ್ಥರ್ ರೋಶನ್ ಪಿರೇರಾ
[ದುಸ್ರೆಂ ಇನಾಮ್]
[ರುಪಯ್ 3000]
ವೆಚಿಕ್
ಹಾಂವ್..!
ನಾ ಇಜಾರ್ ನಾ ವಸ್ತುರ್ ನಾ ಕಿತೆಂಚ್ ಮ್ಹಜ್ಯಾ ಆಂಗಾರ್
ಬಗಾರ್ ಸೊಬ್ಲಾ ಪೆಂಕ್ಡಾರ್ ದೋನ್ ಗೇಣಾ ತೀರ್
ಹರ್ಯೇಕಾ ಫಾಂತ್ಯಾರ್ ಭರ್ತಿ ನಿದೆರ್
ವೊತ್ತಾ ಮ್ಹಜೆರ್ ಉಲ್ಯಾಂ ಶಿಂವೊರ್
ಉಠ್ರೆ ಪುತಾ, ಯೇರೆ ಪುತಾ ಚಡ್ಯಾಂ ತಾರ್ವಾರ್
ಕಿತ್ಯಾಕ್, ಬಾಪಯ್ ಮ್ಹಜೊ ಪಾಗಿ
ಆಯ್ಕಾಲೊ ನಾ ಕಾಳಿಜ್ ಆಸೊನ್ಯಿ ರಡ್ಣೆ ರುದಾನ್
ಯೇನಾ ಬಾಬಾ ಯೇನಾ ಮ್ಹಳ್ಳೆಂ ಹಾಂವೆ ಭಿಯಾನ್
ಬೊರ್ಲೆಂ ತಾರುಂ ದೆವಾ ದೆಣ್ಯಾನ್
ನಾಚ್ಲಿ ಮಾಸ್ಳಿ ಬಾಬಾ ಸಂಗಿಂ ತಟಾ ಪಟ್ ತನ್
ಕಿತ್ಯಾಕ್ ಬಾಬ್ ಮ್ಹಜೊ ಪಾಗಿ
ಅಂಕುಡ್ಲ್ಯಾ ಜಿವಾಂತ್ ಉಬ್ಲಾಂ ಕಾಳಿಜ್
ರಡ್ಚ್ಯಾ ದೊಳ್ಯಾಂತ್ ಕೊವ್ಳಾಂ ರಾಚ್
ದರ್ಯಾ ತಾಳ್ಯಾಂತ್ ಕೊಗ್ಳೆ ಆವಾಜ್
ತಾಳಾಕ್ ಮೆಳ್ತಾ ದರ್ಯಾ ನಾಚ್
ಕಿತ್ಯಾಕ್ ಆಮಿಂ ದೊಗಿ ಪಾಗಿ
ಘೆತ್ಲೊ ವಿಶೆವ್ ನಾಸ್ತಾಂ ಗುನ್ಯಾಂವ್
ಆರ್ದೊ ಚಂದ್ರ್ ಜಾಲೊ ಪುನೊವ್
ವಿದ್ವಿ ತಾರ್ವಾಕ್ ದೆಡೊ ಹಾಂವ್
ದೀವ್ನ್ ಬೆಸಾಂವ್ ತುಜೆಂ ಬರೆಂ ಜಾಂವ್
ಬಾಬ್ ಮ್ಹಣಾ ಸರ್ಗಿಂ ಥಾವ್ನ್
ಕಿತ್ಯಾಕ್, ಆಜ್ ಹಾಂವ್ ಜಾಲಾಂ ಭಾಗಿ
ಉದೆಂವ್ಚ್ಯಾ ವಕ್ತಾ ಸುರ್ಯೊ ಕಿತ್ಯಾಕ್ ಪಿಕ್ತಾ
ನೆಣಾಂ ಹಾಂವ್.....?
^ ವಯ್ರ್
ಜೊಮೇಲ್, ಬೊಂದೆಲ್
[ತಿಸ್ರೆಂ ಇನಾಮ್]
[ರುಪಯ್ 2000]
ದೆವಾಚಿ ಭಾಸ್
ಮ್ಹಜೊ ದೇವ್ ಸದಾಂಚ್ ಉಲಯ್ತಾ
ತುಮಿ ಕೊಣೀ ತರಿ ಆಯ್ಕಾಲಾಂ
ದಿಸ್ ಆನಿಂ ರಾತ್ ತೊ ಉಲಯ್ತಾ
ಗುಸ್ಪೊಡ್ ಗೊಂದೊಳ್ ನಾತ್ಲೆಲ್ಯಾಂಕ್
ದೆವಾಚಿ ಭಾಸ್ ಸಮ್ಜಾತಾ.
ದೀಸ್ ಉದೆತಾನಾ
ಮಧುರ್ ತಾಚಿ ಗಾಜ್
ಕೊಂಬ್ಯಾಚೊ ಸಾದ್, ಕೊಗುಳೆಚೊ ನಾದ್
ರಂಗೀನ್ ತಾಳ್ಯಾನ್ ತೊ ಜಾಗಯ್ತಾ
ರುಕಾಚಿ ಪಾನಾಂ ಗಿರ್ಬುಜ್ಯಾಂಚಿ ಗಾಣಾಂ
ಚೀತ್ ದೀವ್ನ್ ಆಯ್ಕೆತೆಲ್ಯಾಂಕ್
ದೆವಾಚಿ ಭಾಸ್ ಸಮ್ಜಾತಾ
ದೀಸ್ ಉದೆತಾ ಆನಿಂ ಬುಡ್ತಾ
ತಿಚ್ಚ್ ಘಡಿ ಪರತ್ ಕೆದ್ನಾ ಉದೆತಾ?
ತಾರಾಂ ಎಕಾಮೆಕಾ ಖೆಳ್ತಾನಾಂ
ಚಂದ್ರಾನ್ ಸುರ್ಯಾಕ್ ಖಭಾರ್ ದಿಲಿ
ಅಶೆಂ ಆನ್ಯೇಕ್ ಸಕಾಳ್ ಉದೆಲಿ
ದೊಳೆ ಉಗ್ತೆ ಕರ್ನ್ ಪಳೆತೆಲ್ಯಾಂಕ್
ದೆವಾಚಿ ಭಾಸ್ ಸಮ್ಜಾಲಿ.
ರಾನಾಂತ್ ಭಂವ್ಚೊ ಉದ್ಕಾ ವ್ಹಾಳೊ
ನಂಯ್ ತೆವ್ಶಿನ್ ಚಡ್ಪಡ್ತಾ
ಲಜೆನ್ ನಂಯ್ ದರ್ಯಾಕ್ ವೆಂಗ್ತಾ
ಇತ್ಲ್ಯಾ ನಂಯಾಚೆಂ ಉದಾಕ್
ಸಾಗೊರಾಂತ್ ಕಶೆಂ ಸಂಪ್ತಾ?
ಸಮ್ಜಣಿ ಅಸ್ಲೆಲ್ಯಾಂಕ್ ಮಾತ್ರ್
ದೆವಾಚಿ ಬಾಸ್ ಕಳ್ತಾ
ಸದಾನೀತ್ ಲಾಖಾಂನಿ ಬಾಳಾಂ ಜಲ್ಮಾತಾತ್
ಎಕ್ಲ್ಯಾ ಸಾರ್ಕೊಚ್ ದುಸ್ರೊ ಖಂಯ್ ಪಳೆಂವ್ಕ್ ಮೆಳ್ತಾ?
ಕಿತ್ಲೆಂಯ್ ದುಡು ಕಮಾಯ್ಲ್ಯಾರೀ
ಕೊಠಾರಾಂನಿ ದಿರ್ವೆಂ ಪುಂಜಯ್ಲ್ಯಾರೀ
ತುಂ ಧುಳಿಕ್ ಸಾರ್ ಜಾಯ್ನಾಸ್ತಾಂ ರಾವುಂಕ್ ಜಾತಾ?
ವೊಗೇ ರಾವೊನ್ ನಿಯಾಳ್ ಕರ್
ತೆಧ್ನಾಂ ದೆವಾಚಿ ಭಾಸ್ ಸಮ್ಜಾತಾ.
ಆಸ್ರ್ಯಾಂತ್ ತೊ ಏಕ್ಸುರೊ ಫಿಂರ್ಗತಾ
ಆಸ್ಪತ್ರೆಂತ್ ದುಖಿನ್ ರಡ್ತಾ
ಬಂದೆಂತ್ ಸಾಂಕ್ಳಿ ಮಧೆಂ ಹಾಕ್ ದಿತಾ
ಕೊಟ್ತಿಂತ್ ನೀತಿಕ್ ಬೊಬಾಟ್ತಾ.
ದಫ್ತರಾಂತ್ ಫಯ್ಲಾಂ ಪಂದಾ ಚಿರ್ಡಾತಾ.
ಕಾನ್ ದಾಟ್ ಜಾಲ್ಲ್ಯಾಂಕ್
ದೆವಾಚೊ ತಾಳೊ ಕಸೊ ಆಯ್ಕಾತಾ?
^ ವಯ್ರ್
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
More in Daaiz
Send your comments to author on this writing
This is not a comment box. Nothing you write here appears on the site or is shown to any other reader: it is sent to him by email, privately, and he replies to you directly if a reply is called for.