ಕವಿತಾकविताPoem
ಜಿಯೆಗಾ
ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಉತ್ರಾಂತ್ ಸೂತ್ರಾಂ
ಮಯ್ನ್ಯಾಚೊ ಕವಿ - 10
ಸೂತ್ರ್ 10: ಜಿಯೆಗಾ
ವಿನ್ಸಿ ಮೆಲ್ಕಾರ್
ಜಿಯೆಗಾ
’ನಾ ಮೂಂ ಚುಪಾಕೆ ಜಿಯೋ ಔರ್ ನ ಸರ್ ಜುಕಾ ಕೆ ಜಿಯೊ
ಗಮೋಂ ಕಾ ದೌರ್ ಭೀ ಆಯೇ ತೊ ಮುಸ್ಕುರಾ ಕೆ ಜಿಯೋ’
ಸಾಹಿರ್ ಲುಧ್ಯಾನ್ವಿನ್ ಬರಯಿಲ್ಲ್ಯಾ ಎಕಾ ಗಝಲಾಂತ್ಲ್ಯೊ ವೊಳಿ ಹ್ಯೊ.
’ತೋಂಡ್ ಲಿಪವ್ನ್ ಜಿಯೆನಾಕಾ, ತಶೆಂಚ್ ತಕ್ಲಿ ಬಾಗಾವ್ನ್ ಜಿಯೆನಾಕಾ
ದುಖಾಂಚೊ ಕಾಳ್ ಆಯ್ಲೊ ತರ್ ಹಾಸೊನ್ ಹಾಸೊನ್ ಜಿಯೆ’
ಸಾಂಗೊಂಕ್ ಕಿತ್ಲೆಂ ಸಲೀಸ್ ತರ್ಯೀ ಜಿಯೆಂವ್ಕ್ ಕಿತ್ಲೆ ಕಶ್ಟ್ ನ್ಹಯ್ಗಿ?
ಅಶೆಂ ಪಳೆಂವ್ಕ್ ಗೆಲ್ಯಾರ್ ಮನ್ಶ್ಯಾ ಜಿಣಿಂಚ್ ಅಸಲ್ಯಾ ಗೊಂದೊಳಾಂಚೆಂ ರಾಜ್ ನ್ಹಯ್ಗಿ? ಕೊಣ್ ಆಸಾ ಜಲ್ಮಾ ಥಾವ್ನ್ ಮೊರ್ತಾಸರ್ ಸುಖ್ಚ್ಚ್ ಭಗ್ಲ್ಲೊ? ಕೊಣಾಚ್ಯಾ ಜಿಣ್ಯೆ ವಾಟೆರ್ ಫಕತ್ತ್ ಫುಲಾಂಚಿ ಗಜ್ಡಿಚ್ಚ್ ಹಾಂತುಳ್ಳೆಲಿ? ತರ್ಯೀ ಮನಿಸ್ ಜಿಯೆಲಾ, ಜಿಯೆತಾ ಆನಿ ಜಿಯೆತಲೊ ರಾತಿಚ್ಯಾ ಅಂಧ್ಕಾರಾ ಉಪ್ರಾಂತ್ಲ್ಯಾ ಆಡೊಸಾಕ್, ವೊತಾಚೊ ಪಾಟ್ಲಾವ್ ಕರುನ್ ಯೆಂವ್ಚ್ಯಾ ಸಾವ್ಳೆಕ್ ಆಶೆವ್ನ್ ಜಿಯೆತಾ.
ಅಕ್ತೋಬರ್ ಮಯ್ನ್ಯಾಕ್ ದಿಲ್ಲೆಂ ಸೂತ್ರ್ ’ಜಿಯೆಗಾ’ ಏಕ್ ಸಂಪೆಂ ಸೂತ್ರ್ ತರ್ಯೀ ಹೆಂ ಸೂತ್ರ್ ಅಪ್ಲ್ಯಾ ಕವಿತೆಚ್ಯಾ ಕ್ರಿಯಾತ್ಮಕ್ ಚಿಂತ್ಪಾಕ್ ಗಳ್ಸುಂಕ್ ಸಕ್ಲೆಲೆ ಭೋವ್ ಥೊಡೆ ಮ್ಹಣ್ತಾನಾ ಮಾತ್ಸೆಂ ಅಜ್ಯಾಪ್ ಪಾವ್ತಾಂ. ಪುಣ್ ಥೊಡ್ಯಾಂನಿ ತರ್ಯೀ ಕೆಲ್ಲೆಂ ಪ್ರಾಮಾಣಿಕ್ ಪ್ರೇತನ್ ಉಟೊನ್ ದಿಸ್ತಾ.
ಕವಿ ಬಾಬ್ ಆಸ್ಟಿನ್ ಪ್ರಭುಚ್ಯಾ ಕವಿತೆಚೊ ಹ್ಯೊ ವೊಳಿ ಪಳೆಯಾ;
’ಪಯ್ಶೆ ಮ್ಹಳ್ಳ್ಯಾ ರಾಶಿ ಮಧೆಂ
ಜೀವನ್ ತುಂ ಸಾರ್ತಾನಾ
ಸವಯೊ ಮ್ಹಳ್ಳೆಂ ಕಾಂತ್ಣೆಂ ತುಜೆಂ
ತೆಂ ಪಯ್ಶ್ಯಾಂ ವೊಳೆಂ ಕಾಂತ್ತಾನಾ
ನೆಣಾಂ ಜಾಲೊಯ್ ಕಾಂತುನ್, ಕಾಂತುನ್
ಉರ್ಲಿ ಫಕತ್ ಕಟ್ಟಿ ಮ್ಹಣ್’
ಎಕಾ ದಿಸಾ ಜಿಣೆ ಫಕತ್ತ್ ಕಟ್ಟಿ ಜಾಂವ್ಕ್ ಆಸಾ ತರ್ಯೀ ಜಿವಿತಾ ಆವ್ದೆಂತ್ ಮನಿಸ್ ನಾರ್ಲ್ ಜಾವ್ನ್ ಕೊಣಾಕ್ ರೋಸ್ ದಿತಾ, ಕೊಣಾಕ್ ರುಚ್ ದಿತಾ ಆನಿ ಕೊಣಾಕ್ ತೇಲ್ ದಿತಾ.
ತೆಚ್ಚ್ಪರಿಂ ಕವಿ ಬಾಬ್ ಸ್ಟ್ಯಾನ್ಲಿ ಮೆಂಡೊನ್ಸಾಚೆಂ ಕವಿತಾ ಲಿಸಾಂವ್ ಶಿಕಯ್ತಾ - ಜಿಣ್ಯೆ ಲಿಸಾಂವ್;
’ಜಿಯೆಗಾ ಜಿಯೆಗಾ ಹಕ್ಕ್ ತುಜೆಂ
ಆಸೊಂ ತಾಂತುನ್ ರೀತ್, ನೀತ್
ಮೀತ್ ಕೆದಿಂಚ್ ಮಿರ್ವಾನಾಕಾ
ತುವೆಂ ಜಿಯೆಂವ್ಕ್ ಹೆರಾಂಕ್ ಮಾರಿನಾಕಾ’
ಹೆಚ್ಚ್ಪರಿಂ ಕವಿ ಬಾಬ್ ವಲ್ಲಿ ಕ್ವಾಡ್ರಸಾಚೆಂ ಕವಿತಾ ಸಯ್ತ್ ಅಸಲೆಂಚ್ ಜಿಣ್ಯೆ ಲಿಸಾಂವ್ ಶಿಕಯ್ತಾನಾ ಜಿಣ್ಯೆ ಮಿಸ್ತೆರ್ ಸುಟಯ್ತಾ;
’ಜಿಯೆ ತುಂ ಜಿಯೆಗಾ
ಹೆರಾಂಕ್ಯಿ ಜಿಯೆಂವ್ಕ್ ಸೊಡ್ಗಾ
ದೊಂಗೊರ್ ಚಡೊನ್ ಕೊಡು ಜಿರವ್ನ್
ಝುಜೊನ್ ಝುಜೊನ್ ಲಿಸಾಂವ್ ಶಿಕೊನ್
ಕವಿ ನ್ಹಂಯ್ ತರೀ ಮನಿಸ್ ಜಾವುನ್
ಜಿಯೆಗಾ
ಜಿಣಿಭರ್ ತುಂ ಜಿಯೆಗಾ’
ಆಮಿ ಕಿರಿಸ್ತಾಂವ್ ಪರ್ಜಾ, ದೆವಾನ್ ವಿಂಚುನ್ ಕಾಡ್ಲೆಲಿ ಭಾಗೆವಂತ್, ಕುರ್ಪೆವಂತ್, ಭಾವಾರ್ಥಿ ಪರ್ಜಾ ಮಾತ್ರ್ ಅಸಲಿಂ ಲಿಸಾಂವಾ ಜಲ್ಮಲ್ಲ್ಯಾ ಪಾಳ್ಣ್ಯಾ ಥಾವ್ನ್ ಮೊರ್ನಾಚ್ಯಾ ಪೆಟೆಂತ್ ನಿದ್ತಾಸರ್ ವಾಚುನ್, ಆಯ್ಕೊನ್, ಥಕೊನ್, ಪಿಕೊನ್, ಸುಕೊನ್ ಆಯ್ಲ್ಯಾಂವ್ ತರ್ಯೀ ಆಮ್ಚ್ಯಾ ಕಟ್ಟ್ಯಾಕ್ ಹಿಂ ಲಿಸಾಂವಾ ಗೆಲ್ಲಿಂ ನಾಂತ್ ಯಾ ವೆಚೆಪರೀಂಯ್ ನಾಂತ್. ಕಿತ್ಯಾಕ್ ಜಿತ್ಲಿ ಪವಿತ್ರ್ ಆಮ್ಚಿ ಜಿಣಿಗೀ ತಿತ್ಲೆಂಚ್ ಮಾಟ್ ಪಡ್ಲ್ಲೆಂ ಚಿಂತಾಪ್ ಆಮ್ಚೆಂ. ಹಾಚೊ ಪರಿಹಾರ್ ಸೊಧ್ಚಾಂತ್ ಭೋವ್ಶಾ ಕವಿ ಬಾಬ್ ಮಾ|ಜೋರ್ಜ್ ಒಲಿವೆರಾ ಪ್ರೇತನ್ ಕರ್ತಾ ಹ್ಯಾ ವೊಳಿಂನಿ;
’ತುಜೆ ವಿಶ್ಯಾಂತ್ ಚಿಂತುನ್
ಜಿಯೆಂವ್ಕ್ ಸಾಧನ್ ಕರ್ನಾಕಾ
ಪೆಲ್ಯಾ ವಿಶ್ಯಾಂತ್ ಚಿಂತುನ್
ಜಿಯೆಂವ್ಕ್ ಶಿಕ್ಗಾ!’
ಪುಣ್ ಆಮಿ ಪೆಲ್ಯಾವಿಶಿಂ ಚಿಂತ್ಚೆಂ ಜೆದ್ನಾಂ ಆಮ್ಕಾಂ ತಾಂಚೆ ಥಾವ್ನ್ ಕಾಂಯ್ ಗಿಳುಂಕ್, ಘೊಟುಂಕ್ ವಾ ಪಿಳುಂಕ್ ಮೆಳ್ತಾ ಜಾಲ್ಯಾರ್ ಮಾತ್ರ್ ಶಿವಾಯ್ ಹೆರ್ ಕಸಲ್ಯಾಕ್ಯೀ ನ್ಹಯ್.
ಕವಿ ಬಾಬ್ ಪ್ರಸನ್ನ್ ನಿಡ್ಡೋಡಿ ದೀಸ್ಪಡ್ತ್ಯಾ ಜಿಣ್ಯೆಂತ್ ಕಸೊ ಕೊಣಾ ಕೊಣಾ ಖಾತಿರ್ ಜಿಯೆವ್ನ್ ಅಖ್ರೇಕ್ ಕವಿ ದೆವಾಲಾಗಿಂ ಮಾಗ್ತಾ ಕಿತೆಂ ಮ್ಹಣ್ ಅಶೆಂ ಪಿಂತ್ರಾಯ್ತಾ;
’ಸಂಸಾರಿ ಋಣ್ ಪರಿಯಾರುನ್ ರಾಟಾವಳಿಂತ್ಲೊ ಸುಟೊನ್
ಹಾಂವ್ ಮಾಗ್ತಾಂ - ದೆವಾ ವೆಗಿಂಚ್ ಮ್ಹಾಕಾ ವರ್ಗಾ..!’
ಹೆಚ್ಚ್ಪರಿಂ ಕವಿ ಬಾಬ್ ರೋಶನ್ ರೊಡ್ರಿಗಸ್ ಹ್ಯಾ ಗೊಂದೊಳಾನ್ ಭರ್ಲ್ಲ್ಯಾ ಸಂಸಾರಾಂತ್ ಹ್ಯಾ ಎಕೆಕಾ ಮಿಸ್ತೆರಾಂಕ್ ಸುಟಂವ್ಕ್ ಜಿಣಿಂಚ್ ಏಕ್ ಪರಿಹಾರ್ ಮ್ಹಳ್ಳೆಂ ಚಿಂತಾಪ್ ಅಶೆಂ ವ್ಹಾಳಯ್ತಾ;
’ಫೊಂಡಾರ್ ಮ್ಹಜ್ಯಾ ಮಾರ್ಬಲ್ ಫಾತೊರ್
ಮಯ್ನ್ಯಾ ವರ್ಸಾಚ್ಯಾ ಮಿಸಾಕ್ ಮಾಸ್ ಸೊರೊ
ನಾ ಮ್ಹಜ್ಯಾ ಬಾಡ್ಯಾಚ್ಯಾ ಘರ್ಚ್ಯಾಂಕ್ ನಾಣಿ ಖಾಕುಸ್
ಪೊಟಾಕ್ ನಾಂ ತಾಂಚ್ಯಾ ದಿಸಾಕ್ ಏಕ್ ಜೆವಾಣ್
ಜಿಯೆಗಾ..’
ಕವಿ ಬಾಬ್ ವಿನ್ಸಿ ಮೆಲ್ಕಾರ್ ಆಯ್ಲೆವಾರ್ ಉದೆಲ್ಲೊ ಬೊಂಗೊ ತರ್ಯೀ ತಾಣೆಂ ಕವಿತಾಶೆತಾಂತ್ ಕಾಡ್ಚಿಂ ಪಾವ್ಲಾಂ ನವೊ ಭರ್ವಸೊ ದಿತಾತ್ ಮ್ಹಣ್ಚ್ಯಾಕ್ ತಾಚ್ಯಾ ಕವಿತೆಚ್ಯೊ ಹ್ಯೊ ವೊಳಿ ಗೊವಾಯ್ ದಿತಾತ್;
’ಮೆಟಾಂ ಮೆಟಾಂನಿ ಕಾಂಟೆ ದೂಖ್ ದಿತಿತ್
ತಾನೆನ್ ಜಿಬೆಚಿ ಶೆಳ್ ಸುಕಯ್ತ್
ಭರ್ವಶ್ಯಾಚೆಂ ಕಿರಣ್ ಮತಿಂತ್ ದವ್ರುನ್
ಪಾವ್ಲಾಂ ತುಜಿಂ ಮೆಜ್ತಾಂ ವರೇಗ್
ಜಿಯೆಗಾ ತುಂ ಜಿಯೆ’
ಜಿಣ್ಯೆ ಆವ್ದೆಂತ್ಲ್ಯಾ ಸಲ್ವಣೆಂತ್, ದಣ್ಸಣೆಂತ್, ಚಿರ್ಡೊನ್ ಜಿಯೆಲ್ಯಾರೀ - ನವ್ಯಾ ಭರ್ವಶ್ಯಾನ್ ಜಿಯೆಂವ್ಚೆಂ ಖರೆಂಚ್ ಏಕ್ ಶರ್ಥ್. ಆನಿ ಹೆಂ ಚಿಂತಾಪ್ ಉಟಯಿಲ್ಲ್ಯಾ ಬಾಬ್ ವಿನ್ಸಿ ಮೆಲ್ಕಾರಾಕ್ ಹ್ಯಾ ಮಯ್ನ್ಯಾಚೊ ಕವಿ ಜಾವ್ನ್ ವಿಂಚುಂಕ್ ಆಮ್ಕಾಂ ಭೋವ್ ಸಂತೊಸ್ ಭಗ್ತಾ. ಮಯ್ನ್ಯಾಚ್ಯಾ ಕವಿಕ್ ಉಲ್ಲಾಸ್ ಪಾಟಯ್ತಾಂ
ಉತ್ರಾಂತ್ ಸೂತ್ರಾಂ - 10: ಜಿಯೆಗಾ
[ವಾಂಟೆಲಿ ಜಾಲ್ಲಿಂ]
3. ಸ್ಟ್ಯಾನ್ಲಿ ಮೆಂಡೊನ್ಸಾ, ಯು.ಕೆ.
ಜಿಯೆಗಾ [ಮಯ್ನಾಚೆಂ ಕವಿತಾ]-
ವಿನ್ಸಿ ಮೆಲ್ಕಾರ್
ಬೊಗ್ಣಾ೦ ಚಿತ್ನಾ೦ನಿ ಬುಡವ್ನ್
ಜಿಣ್ಯೆಚೆ೦ ವೊಜೆ೦ ವ್ಹಾವವ್ನ್ ಥಕೊನ್
ದುಖಾಚ್ಯಾ ಕಾಳೊಕಾ೦ತ್ ದಿವೆ ಪಳೆಲ್ಯಾರೀ
ಸುಖಾಚೊ ಉಜ್ವಾಡ್ ಫಾ೦ಕ್ತಾ ವರೇಗ್
ಜಿಯೆ ಗಾ ತು೦ ಜಿಯೆ
ಮೆಟಾ೦ ಮೆಟಾ೦ನಿ ಕಾ೦ಟೆ ದೂಖ್ ದಿತಿತ್
ತಾನೆನ್ ಜಿಬೆಚಿ ಶೆಳ್ ಸುಕಯ್ತ್
ಭರ್ವಶ್ಯಾಚೆ೦ ಕಿರಣ್ ಮತಿ೦ತ್ ದವ್ರುನ್
ಪಾವ್ಲಾ೦ ತುಜಿ೦ ಮೆಜ್ತಾ ವರೇಗ್
ಜಿಯೆ ಗಾ ತು೦ ಜಿಯೆ
ಬೊಗ್ಚೆನಾ೦ತ್ ಕೊಣಾಯ್ಕೀ ತುಜೆ ಆಟವಿಟೆ
ಸಮ್ಜೊ೦ವ್ಚೆ ನಾ೦ತ್ ತುಜ್ಯಾ ದೊಳ್ಯಾ೦ ಥೆ೦ಬೆ
ದುಖಾ೦ ಮಧೆ೦ ಘಾಮ್ ದೆ೦ವೆ೦ಯ್ಶಿ
ಚತ್ರಾಯೆನ್
ಜಿಯೆ ಗಾ ತು೦ ಜಿಯೆ
ಜಿಣ್ಯೆ ಆನಿ ಮರ್ಣಾ ಮಧೆ೦ ಏಕ್ ಅ೦ತರ್
ತುಜ್ಯಾ ಜಿಣ್ಯೆ ಮಧೆ೦ ಉಸ್ವಾಸಾಚೊ ಫರಕ್
ಭಳ್ ದಿತಿತ್ ಕಾಳ್ಜಾ ದಡ್ಬಡೆ
ಫುಣ್ ಉಸ್ವಾಸ್ ಆನಿ ದಡ್ಬಡೆ ರಾವ್ತಾ ವರೇಗ್
ಜಿಯೆ ಗಾ ತು೦ ಜಿಯೆ
ಜಿಯೆ ಗಾ [ - ಮಾ|ಜೋರ್ಜ್ ಒಲಿವೆರಾ]
ಕಿತೆ೦ ಫಾಲ್ಯಾಂ ಕರು೦ಕ್ ಚಿ೦ತಾಯ್
ತೆ೦ ಅಜ್ ಕರ್ ಗಾ!
ಕಿತೆ೦ ಅಜ್ ಕರು೦ಕ್ ಚಿ೦ತಾಯ್
ತೆ೦ ಅತಾ೦ ಕರುನ್ ಜಿಯೆ ಗಾ!
ತುಜೆ ವಿಷ್ಯಾ೦ತ್ ಚಿ೦ತುನ್
ಜಿಯೆವ್ಕ್ ಸಾಧನ್ ಕರ್ನಾಕಾ-
ಪೆಲ್ಯಾ ವಿಷ್ಯಾ೦ತ್ ಚಿ೦ತುನ್-
ಜಿಯೆ೦ವ್ಕ್ ಶಿಕ್ ಗಾ!
ಕಾಲ್ಚೆ೦ ಚಿ೦ತುನ್ ಖರ್ಗಾನಾಕಾ-
ಫಾಲ್ಯಾ೦ಚೆ೦ ಕರಾ೦ದಾಯೆಚೆ ವೊಜೆ೦
ತುಕಾ ಅಜ್ ನಾಕಾ ಗಾ –
ಅಯ್ಚಿ೦ ಚೋವಿಸ್ ವೊರಾ೦ - ಪುರೊಗಾ!
ಸತಾಕ್ ಅಶೆನ್ ಜಿಯೆಗಾ ಅಸತಾಕ್ ನ್ಹಯ್
ನಿತಿ ಖಾತಿರ್ ಅಶೆಗಾ ಅನಿತೆಕ್ ನ್ಹಯ್
ನಿಸ್ವಾರ್ಥಾ ಖಾತಿರ್ ಜಿಯೆಗಾ - ಸ್ವಾರ್ಥಾಕ್ ನ್ಹಯ್
ತವಳ್ ತುಜೆ೦ ಅಸ್ತಿತ್ವ್ ಸಾರ್ಥಕ್ ತರ್, ಜಿಯೆಗಾ!
ಭಾವಾರ್ಥಾನ್ ಜಿಯೆ ಗಾ ದುಬಾವಾನ್ ನ್ಹಯ್:
ಭರ್ವಾಸ್ಯಾನ್ ಜಿಯೆ ಗಾ - ನಿರಾಶೆನ್ ನ್ಹಯ್:
ಮೊಗಾನ್ ಜಿಯೆ ಗಾ ಧ್ವೇಷಾನ್ ನ್ಹಯ್:
ತವಳ್ ಜಿವಿತ್ ದಾತಾರ್ ದೇವ್ ತುಕಾ ಲಾಗಿ೦ –
ಪೆಲ್ಯಾ ಮಧೆ೦ ವರ್ತೊ ದೆವಾ ಖಾತಿರ್ ಜಿಯೆ ಗಾ!
ಜಿಯೆಗಾ [ - ಸ್ಟ್ಯಾನ್ಲಿ ಮೆಂಡೊನ್ಸಾ, ಯು.ಕೆ.]
ಕಷ್ಟ್ ಕಾಡುನ್ ಜಿಯೆಗಾ
ಲೂಟ್ ಕರುನ್ ನ್ಹಯ್
ಗರ್ಜೆ ತೆಕಿದ್ ಉರಯ್ಗಾ
ಪೋಟ್ ಮಾರುನ್ ನ್ಹಯ್
ಆಸೊಂ ಗಡ್ ಸವಯಾಂಕ್ ತುಜ್ಯಾ
ಲಗಾಮ್ ಸೊಡುನ್ ನ್ಹಯ್
ಸ್ವಾಧೀನ್ ಧರುನ್ ಜಿಯೆಗಾ
ಗುಲಾಮ್ ಜಾವ್ನ್ ನ್ಹಯ್
ಸಂತುಷ್ಠ್ ಜಾವ್ನ್ ಜಿಯೆಗಾ
ಕಿತೆಂ ಆಸ್ಲೆಲ್ಯಾಂತ್
ಮೊಸೊರ್ ಕರುನ್ ನ್ಹಯ್ಗಾ
ಚಡಿತ್ ಆಸ್ಲೆಲ್ಯಾಂಕ್
ಗಾಂಚ್ ಘಾಲುಂಕ್ ಪಳೆಗಾ
ಮಧೆಂ ತುಟ್ಲೆಲ್ಯಾಂಕ್
ತೀರ್ ತಿರ್ಕುಟ್ ಕರುನ್ ನ್ಹಯ್
ಯೇರ್ ಆಯ್ಲೆಲ್ಯಾಂಕ್
ಮಾಯಾಮೊಗಾನ್ ಜಿಯೆಗಾ
ಝಗ್ಡಿಂ ಕರುನ್ ನ್ಹಯ್
ಸ್ವಾರ್ಥ್ ಸಾಂಡುನ್ ಜಿಯೆಗಾ
ಹೆರಾಂಕ್ ಕೆಂಡುನ್ ನ್ಹಯ್
ಕಾಮ್ ಕರುನ್ ಪೋಟ್ಭರ್
ಫುಂಕ್ಯಾಕ್ ಖಾಯ್ನಾಕಾ
ಧರ್ನಿಕ್ ಭಾರ್ ಶಿತಾಕ್ ಖಾರ್
ಕೆದಿಂಚ್ ಜಾಯ್ನಾಕಾ
ಮನ್ಶ್ಯಾಪಣಾನ್ ಜಿಯೆಗಾ
ಲಜ್ ಸಾಂಡುನ್ ನ್ಹಯ್
ಧೀರ್ ಜಾವುನ್ ಜಿಯೆಗಾ
ಧೈಯ್ರ್ ಸಾಂಡುನ್ ನ್ಹಯ್
ಜಿಯೆಗಾ ಜಿಯೆಗಾ ಹಕ್ಕ್ ತುಜೆಂ
ಆಸೊಂ ತಾಂತುನ್ ರೀತ್, ನೀತ್
ಮೀತ್ ಕೆದಿಂಚ್ ಮಿರ್ವಾನಾಕಾ
ತುವೆಂ ಜಿಯೆಂವ್ಕ್ ಹೆರಾಂಕ್ ಮಾರಿನಾಕಾ
ಜಿಯೆಗಾ [- ವಲ್ಲಿ ಕ್ವಾಡ್ರಸ್]
ಜಿವಿತ್ ಕಾಲ್ವಾರ್ ದೊಂಗೊರ್
ಮೆಟಾಂಕ್ ಲಕಯ್ತ್
ಮೆಟಾಂಕ್ ಥಕಯ್ತ್
ನದರ್ ಖಂಚವ್ನ್ ಶೆವೊಟ್ ಸಾಂಭಾಳ್ನ್
ದೊಂಗೊರ್ ಹೊ ಚಡ್ ಗಾ
ಜಿಯೆಗಾ
ಚಡೊನ್ ಪಡೊನ್ ಜಿಯೆಗಾ
ಜಿವಿತ್ ಮ್ಹಳ್ಯಾರ್ ಕೊಡ್ಸಾಣ್
ಪಿಡಾ ಧಾಂವ್ಡಾಯ್ತ್
ವೀಕ್ ಭರಾತ್
ಕೊಡ್ಸಾಣ್ ಗೊಡ್ಸಾಣ್ ಮ್ಹಣೊನ್
ಕೊಡು ಕಾಲ್ಸ್ ಪಿಯೆಗಾ
ಜಿಯೆಗಾ
ಕೊಡು ಜಿರವ್ನ್ ಜಿಯೆಗಾ
ಜಿವಿತ್ ಮ್ಹಳ್ಯಾರ್ ಝುಜ್
ಘಡ್ಯೆಚಿ ಜೀಕ್
ಘಡ್ಯೆಚಿ ಸಲ್ವಣ್
ಜೀಕ್ ಸಲ್ವಣೆಚೊ ಹಾರ್
ಜಿಣ್ಯೆ ಗಳ್ಯಾರ್ ಸೊಭವ್ನ್
ಜಿಯೆಗಾ
ಝುಜೊನ್ ಝುಜೊನ್ ಜಿಯೆಗಾ
ಜಿವಿತ್ ಮ್ಹಳ್ಯಾರ್ ಲಿಸಾಂವ್
ಥೊಡೆಂ ಶಿಕ್ಚೆಂ
ಥೊಡೆಂ ಶಿಕಂವ್ಚೆಂ
ಶಿಕೊನ್ ಶಿಕವ್ನ್
ಸಮ್ಜೊನ್ ಸಮ್ಜಾವ್ನ್
ಜಿಯೆಗಾ
ಶಿಕೊನ್ ಸಮ್ಜೊನ್ ಜಿಯೆಗಾ
ಜಿಯೆ ತುಂ ಜಿಯೆಗಾ
ಹೆರಾಂಕ್ಯಿ ಜಿಯೆಂವ್ಕ್ ಸೊಡ್ಗಾ
ದೊಂಗೊರ್ ಚಡೊನ್ ಕೊಡು ಜಿರವ್ನ್
ಝುಜೊನ್ ಝುಜೊನ್ ಲಿಸಾಂವ್ ಶಿಕೊನ್
ಕವಿ ನ್ಹಂಯ್ ತರೀ ಮನಿಸ್ ಜಾವುನ್
ಜಿಯೆಗಾ
ಜಿಣಿಭರ್ ತುಂ ಜಿಯೆಗಾ
ತುಂ ಜಿಯೆಗಾ [- ಪ್ರಸನ್ನ್, ನಿಡ್ಡೋಡಿ]
ಘರ್ ಆಧಾರ್ ಭುರ್ಗ್ಯಾಂಚೆಂ ಭವಿಶ್ಯ್ ಬ್ಯಾಂಕ್ ಎಕಾಂವ್ಟ್
ವಾಡಂವ್ಕ್ ಬಾಯ್ಲ್ ಗುಣ್ಗುಣ್ತಾ - ಭರ್ತಾನಾ ತುಂ ಜಿಯೆಗಾ..!
ಗಲ್ಫಾಚೊ ನವ್ರೊ ಸೊಧುನ್ ಮೊಟಿ ದೋತ್ ದಿವುನ್
ಕಾಜಾರ್ ಕರುನ್ ದೀಂವ್ಕ್ ಧುವ್ ದರ್ವಡ್ರಾ - ಆನಾ ತುಂ ಜಿಯೆಗಾ!
ಬರೆಂ ನೆಸಾಪ್, ಫೀಸ್ ಯೆಟುನ್ ಶಿಕಾಪ್ ಶಿಕವ್ನ್
ಬರೊ ಫುಡಾರ್ ಭಾಂದುಂಕ್ ಪೂತ್ ಆಶೆತಾ - ಡೇಡಿ ತುಂ ಜಿಯೆಗಾ!
ಇಗರ್ಜೆಕ್ ಕುಮೊಕ್, ನವೊ ತೋರ್ ಭಾಂದುಂಕ್ ಆಧಾರ್
ದೀಂವ್ಕ್ ಫಿರ್ಗಜ್ ಪಾದ್ರಿ ವಿನತಿ ಕರ್ತಾ - ಫಿರ್ಗಜ್ಗಾರಾ ತುಂ ಜಿಯೆಗಾ!
ವೋಟ್ ದಿವೊನ್ ಎಲಿಸಾಂವಾಂತ್ ಜಿಕವ್ನ್ ಹಾಡ್ತಾ ಪರ್ಯಾಂತ್
ರಾಜ್ಕಾರಣಿ ಬೊಬಾಟ್ತಾ - ವೋಟ್ಘಾರಾ ತುಂ ಜಿಯೆಗಾ!
ಆಶ್ರಮಾಂತ್ಲ್ಯಾ ಮಾಂ-ಬಾಪಾಚೆಂ ದೆವೆಂ ಫಾರಿಕ್ ಕರುಂಕ್
ಮಾದ್ರಿ ಸಾಂಗ್ತಾ - ಕುವೇಯ್ಟ್ಗಾರಾ - ತುಂ ಜಿಯೆಗಾ!
ಸುರ್ ಸೊರೊ ಘೊಟ್ಲ್ಲೊ ಉನ್ಶೆಂ, ಫಾರಿಕ್ ಕರುಂಕ್ ಆಸಾ
ಗಡಂಗ್ದಾರ್ ಯೆಟ್ತಾ - ಕುಂಪಾದ್ರೆ ತುಂ ಜಿಯೆಗಾ!
ಚಾ ಪಿಯೆವ್ನ್ ನಸ್ಟೊ ಕರುನ್ ಹೊಟೆಲ್ ದಂದೊ ವಾಡಂವ್ಕ್
ಕೊಂಕ್ಣೆ ಲೆಂಬೆತಾ - ಪರ್ಬೊ ತುಂ ಜಿಯೆಗಾ
ಸಂಸಾರಿ ಋಣ್ ಪರಿಯಾರುನ್ ರಾಟಾವಳಿಂತ್ಲೊ ಸುಟೊನ್
ಹಾಂವ್ ಮಾಗ್ತಾಂ - ದೆವಾ ವೆಗಿಂಚ್ ಮ್ಹಾಕಾ ವರ್ಗಾ..!
ಜಿಯೆಗಾ [- ರೋಶನ್ ರೊಡ್ರಿಗಸ್]
ಕೊಣ್ ಸೊಡಿತ್ ಮ್ಹಾಕಾ ಜಿಯೆಂವ್ಕ್ ಹ್ಯಾ ಸಂಸಾರಾಂತ್
ಜಲ್ಮಲ್ಲ್ಯಾ ವೆಳಾರ್ ವಡಾಂ ಭಾವ್ ಭಯ್ಣಿಂ
ತಯಾರ್ ಭುಕೆನ್ ಖಾಂವ್ಕ್ ಖಾಣ್ ಮ್ಹಜೆಂ
ಮೆಳ್ಳೆ ತರ್ ಕೀಸ್ ನಾಂ ತರ್ ದೋನ್ ಚಿಮ್ಟೆ
ಜಿಯೆಗಾ.....
ಪ್ರಾಯೆಕ್ ಆಯ್ಲಿಂ ರುಚ್ಲೆನಾಂತ್ ಮ್ಹಾಕಾ ಜಾತಿಚೆ
ಬೊಣ್ಕೆ, ಮಾಪ್ಳೆ ಮಾರಾಂಚೆ ಜಾತಿ ರುಚಿಚೆ
’ಮೊಂವ್’ ಚಿಂವೊನ್ ’ಚಿಂವಡ್’ ಸೊಡುನ್ ಧಾಂವ್ಲೆ
ರಾಕ್ತಾ ಕೊಣ್ ಕಿರಿಸ್ತಾಂವ್ ಗೊಮ್ಟ್ಯಾಕ್ ಮ್ಹಜ್ಯಾ ಪಡಾತ್
ಜಿಯೆಗಾ...
ಕಸ್ಟಾಂನಿ ಕೆಲೆಂ ಹಾವೆಂ ನವೆಂ ಬಿಜ್ನೆಸ್
ಚಲ್ಲೆಂ ಜ್ಯೊರಾನ್. ಹಜಾರಾಂನಿ ಕಮಾಯ್ಲೆಂ. ದೆಖ್ಲೆಂ ಕಿರಿಸ್ತಾಂವಾಂನಿ
ಜಾಲೆಂ ಎಕ್ಚ್ಚ್ ಬಿಜ್ನೆಸ್ ಕಿರಿಸ್ತಾಂವಾಂಕ್
ಕಿರಿಸ್ತಾಂವಾಂಚೆಂ ಬಂದ್ ಪಡ್ಲೆಂ ಚಲ್ಲೆಂ ಹೆರಾಂಚೆಂ ಬಿಜ್ನೆಸ್
ಜಿಯೆಗಾ..
ದುಭಾಯ್ ಪಾವ್ಲೊ ಅರ್ಧೆಂಕುರೆಂ ಜೆಂವ್ಚೊ ಪಯ್ಶೆ ಉರಯ್ಲೆ
ಗಾಂವಾಕ್ ಪಯ್ಶೆ ಧಾಡುಂಕ್ ಮನ್ಜಾತಿಪರಿಂ ರಾವ್ಲೊ ಕುಡಾಂತ್
ಪುಂಜಾಯ್ಲೆಂ ಬಾಯ್ಲ್ ಭುರ್ಗ್ಯಾಂಚ್ಯಾ ನಾಂವಾರ್, ಜಾಲೊ ರಿಟಾಯರ್ಡ್
ಆತಾಂ ನಾಕಾ ತಾಂಕಾಂ ಬಾಪುಯ್, ಘರ್ಕಾರ್, ಜಾಯ್ ಫಕತ್ ’ಧಿರಾಮ್’
ಜಿಯೆಗಾ..
ಜಾಲಿ ಆತಾಂ ಪ್ರಾಯ್ ಮೊರ್ನಾಚಿ
ನವೆಂ ರೂಪ್ ಆತಾಂ ಮ್ಹಜೆಂ "ಮಾಗ್ಣೆಂ"
ಕಂಯ್ ಜಾಲ್ಯಾರಿ ಜಾಂವ್ ’ಮಾಗ್ಣ್ಯಾಕ್’ ಆತಾಂ ಮುಕಾರ್
ಕಿತ್ಯಾ ಜಿಯೆಂವ್ಕ್ ಜಾಯ್ ಮ್ಹಾಕಾ ಮೊರ್ತಾವರೇಗ್
ಜಿಯೆಗಾ...
ಫೊಂಡಾರ್ ಮ್ಹಜ್ಯಾ ಮಾರ್ಬಲ್ ಫಾತೊರ್
ಮಯ್ನ್ಯಾ ವರ್ಸಾಚ್ಯಾ ಮಿಸಾಕ್ ಮಾಸ್ ಸೊರೊ
ನಾ ಮ್ಹಜ್ಯಾ ಬಾಡ್ಯಾಚ್ಯಾ ಘರ್ಚ್ಯಾಂಕ್ ನಾಣಿ ಖಾಕುಸ್
ಪೊಟಾಕ್ ನಾಂ ತಾಂಚ್ಯಾ ದಿಸಾಕ್ ಏಕ್ ಜೆವಾಣ್
ಜಿಯೆಗಾ..
ಜಿಯೆಗಾ [- ಆಸ್ಟಿನ್ ಪ್ರಭು, ನಂತೂರ್]
ಪಯ್ಶೆ ಮ್ಹಳ್ಳ್ಯಾ ರಾಶಿ ಮಧೆಂ
ಜೀವನ್ ತುಂ ಸಾರ್ತಾನಾ
ಸವಯೊ ಮ್ಹಳ್ಳೆಂ ಕಾಂತ್ಣೆಂ ತುಜೆಂ
ತೆಂ ಪಯ್ಶ್ಯಾಂ ವೊಳೆಂ ಕಾಂತ್ತಾನಾ
ನೆಣಾಂ ಜಾಲೊಯ್ ಕಾಂತುನ್, ಕಾಂತುನ್
ಉರ್ಲಿ ಫಕತ್ ಕಟ್ಟಿ ಮ್ಹಣ್
ಆತಾಂ ಕಶೆಂ ಜಿಯೆತಾಯ್ ತುಂ
ಆದ್ಲ್ಯಾ ಮರ್ಜೆಕ್ ಆಂಯ್ಡೆ ಘೊಟುನ್
ಶಿಂತಿದ್ ಮ್ಹಳ್ಳಿ ಜಾಣ್ವಾಯ್ ತುಂವೆ
ಕಾಶ್ಟೆ ಭಿತರ್ ಲಿಪಯ್ಲಿಯ್
ಕೊಣಾಚಿಚ್ ಫಿಕಿರ್ ನಾಸ್ತಾಂ
ಆಸ್ಲ್ಲಿ ಆಸ್ತ್ ಹೊಗ್ಡಾಯ್ಲಿಯ್
ಸೊರೊ, ಜುಗಾರ್, ಚಲಿಯೊ ಮ್ಹಣ್
ಸದಾಂಚ್ ತುವೆಂ ಮಾರ್ಲಿ ಮಝಾ
ಬಾಯ್ಲೆ ಭುರ್ಗ್ಯಾಂಕ್ ವಾಟೆರ್ ಘಾಲುನ್
ದಿಲಿಯ್ ತಾಂಕಾಂ ಕಠೀಣ್ ಸಜಾ
ಕಾಮ್ ನಾಸ್ತಾಂ ವಾಟೆರ್ ಪಡ್ಲಾಯ್
ಚಿಂತುನ್ ಆದ್ಲೆ ಮಝೆಚೆ ದೀಸ್
ಪಿಯೆಂವ್ಕ್ ಪರ್ಯಾಂತ್ ಮೆಳ್ನಾ ತುಕಾ
ಶಿತ್ ಗಾಳುನ್ ಉಡಂವ್ಚೊ ಪೇಜೆ ನೀಸ್
ಜಿಯೆಗಾ, ಜಿಯೆಗಾ ಆದ್ಲಿಂ ಪಾತ್ಕಾಂ ರಡ್ ತುಂ
ತುಂವೆಂಚ್ ಮಾಗೊನ್ ಘೆತ್ಲೆಂಯ್ ಹೆಂ ಜೀವನ್
ಖೊಂಡ್ಲ್ಲ್ಯಾ ಫೊಂಡಾಂತ್ ಪಡ್ಲಾಯ್ ತುಂ!
About
us | Feedback | Contact us
Copyright
© 2005 DAAIZ.COM All rights reserved.
Page concept, designed and maintained by Ashawadi
Publications
More in Daaiz
Send your comments to author on this writing
This is not a comment box. Nothing you write here appears on the site or is shown to any other reader: it is sent to him by email, privately, and he replies to you directly if a reply is called for.