ಕವಿತಾकविताPoem
ಜಿವಂತ್ಪಣ್
This poem is available in its original Kannada only.
ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
"ಪುನರ್ಜಿವಂತ್ ಜಾಲ್ಲೊ ಸೊಮಿ ಜೆಜು ಸರ್ವಾಂಕ್ ಬರೆಂ ಕರುಂ, ಆಮ್ಚೆ ಭಿತರ್ಲೊ ರಾಗ್-ಧ್ವೇಷ್-ಮೊಸೊರ್ ನಾಸ್ ಕರುಂ"
ಆಂಡ್ರು ಎಲ್. ಡಿ’ಕುನ್ಹಾ, ಕಿನ್ನಿಕಂಬ್ಳ
ಜಿವಂತ್ಪಣ್
ಜಿವಂತ್ಪಣ್ ಸುಲಭ್ ನ್ಹಂಯ್
ಆತ್ಮ್ಯಾ ವೆಗ್ಳಾಚಾರ್ ಭೊಗುಂಕ್ ಆಸಾ
ಧರ್ತೆ ಗರ್ಭಾಂತ್ ಕುಸೊಂಕ್ ಆಸಾ
"ಜಿವಂತ್ಪಣಾ ಪಯ್ಲೆಂ ಮೊರೊಂಕ್ ಆಸಾ"
ಮೊರ್ಚೆಂಯ್ ಸುಲಭ್ ನ್ಹಂಯ್
ಖುರ್ಸಾವಾಟ್ ಚಡೊಂಕ್ ಆಸಾ
ಖಿಳ್ಯಾಂಚೆರ್ ಕದ್ವಳ್ ಫಾಪ್ಸುಂಕ್ ಆಸಾ
"ಮೊರ್ಚ್ಯಾ ಪಯ್ಲೆಂ ಜಿಯೆಂವ್ಕ್ ಆಸಾ"
ಜಿಯೆಂವ್ಚೆಂಯ್ ಸುಲಭ್ ನ್ಹಂಯ್
ಎಕ್ಸುರ್ಪಣಾ ಮೊಳ್ಯಾಂತ್ ರಡೊಂಕ್ ಆಸಾ
ದುಸ್ಮಾನಾಕ್ಯ್ ವೆಂಗೊಂಕ್ ಆಸಾ
"ಜಿಯೆಂವ್ಚ್ಯಾ ಪಯ್ಲೆಂ ಜಲ್ಮೊಂಕ್ ಆಸಾ"
ಜಲ್ಮೊಂಚೆಂ ಕಶ್ಟ್ ನ್ಹಂಯ್!
ಗರ್ಭಾಂತ್ಲೆ ನೋವ್ ಮ್ಹಯ್ನೆ ಉಣೆಂಚ್ ಸಯ್
ಅವಯ್ ಗರ್ಭಾಂತ್ ಸರ್ವ್ ಆಸಾ, ಸರ್ಗ್ ಆಸಾ
ದೇವ್ ಆಸಾ, ಖರೆಂಚ್ ಜಿವಂತ್ ಆಸಾ
ಜಿವಂತ್ಪಣ್ ಸುಲಭ್ ನ್ಹಂಯ್
ಪಯ್ಲೆಂ ಮೊರೊಂಕ್ ಆಸಾ
ಮೊರ್ಚ್ಯಾ ಪಯ್ಲೆಂ ಜಿಯೆಂವ್ಕ್ ಆಸಾ
ಆವಯ್ ಗರ್ಭಾ ಸುಖಾಥಾವ್ನ್
ಧರ್ತೆ ಗರ್ಭಾ ದುಖಾ ಮ್ಹಣಾಸರ್
ಅತ್ಮ್ಯಾಕ್ ಶಾಭಿತ್ ಸಾಂಬಾಳುಂಕ್ ಆಸಾ
^ ವಯ್ರ್
ಎಚ್ಚೆಮ್
ಸಾಳಿಯೊ ಆನಿ ರಾಯ್
ಚಡ್ಚ್ಯಾ ಪಡ್ಚ್ಯಾ ಪರ್ತ್ಯಾನ್ ಪಡೊನ್ ಚಡ್ಚ್ಯಾ
ಆನಿ ಶೆವೊಟಾಕ್ ಪಾಂವ್ಚ್ಯಾ ಸಾಳಿಯೆಕ್ ಪಳೆವ್ನ್
ರಾಯ್ ಉಟೊನ್ ಗೆಲೊ ಫವ್ಜ್ ಬಾಂದುನ್
ದಾವೇ ಪಾವ್ಟಿಂ ದೊಂಡಾಕ್, ನೋವ್ ಪಾವ್ಟಿಂ ಸಲ್ವೊನ್
ಆಜ್ ಜಿಕೊನ್ ಆಯ್ಲೊ
ಸರತಾ ಉಪ್ರಾಂತ್ ನರಾಕ್ ಖಾಂವ್ಚ್ಯಾ
ಸೊರ್ಕೆಲ್ಲ್ಯಾ ರಾಣಿ ಸಾಳಿಯೆಕ್ ಪಳೆಂವ್ನೀ
ಶೆಂಬೊರ್ ರಾಣಿಯಾಂಕ್ ದವರ್ನ್ ಕಾಣ್ಘೆವ್ನ್
ದಿಸಾಕ್ ಎಕ್ಲೆ ಸಾಂಗಾತಾ ಮಿರಂವ್ಕ್ ಲಾಗ್ಲೊ
ಆನಿ ಖೆವಾದ್ ಲಾಗೊನ್ ಮೆಲೊ
^ ವಯ್ರ್
ವಿಲ್ಸನ್ ಕಟೀಲ್
ಮೊಲಾಚಿಂ ಸೊಧ್ನಾಂ
ಪರ್ನೊ, ಪಿಂಜ್ಕರ್
ಧಾ ರುಪ್ಯಾಂಚೊ ನೋಟ್
ಹೊ ನೋಟ್..
ಪಾಗ್ ಜಾವ್ನ್ ಮೆಳ್ಲ್ಲೊ?
ಚೊಟ್ಟ್ಯಾ ಹಾತಿಂ ಹೆಳ್ಲ್ಲೊ?
ದುಬ್ಳ್ಯಾ ಖೊಮ್ಟ್ಯಾಂನಿ ಶೆಳೆಲ್ಲೊ?
ಗ್ರೇಸ್ತಾ ಹರ್ಧ್ಯಾರ್ ದಾಳ್ಲ್ಲೊ?
ದಾನಾ ರುಪಿಂ ವ್ಹಾಳ್ಲ್ಲೊ?
ಲೊಟ್ರಿ ರೆಸಾಂತ್ ಖೆಳ್ಲ್ಲೊ?
ಪಿಂಜ್ಕರ್ ಬೊಲ್ಸಾಂತೂನ್ ಗಳ್ಲ್ಲೊ?
ಲೋಂಚ್ ಜಾವ್ನ್ ಪಿಳ್ಲ್ಲೊ?
ಕಲ್ವಂತಾ ಕೂಡ್ ಮೊಲಾಯಿಲ್ಲೊ?
ಪಾತ್ಕ್ಯಾಂ ಕರ್ನ್ಯಾಂನಿ ಮ್ಹೆಳ್ಲ್ಲೊ?
ಭಕ್ತಿಚೊ ದಂದೊ ಚಲಯಿಲ್ಲೊ?
ಹಾಚೆಸವೆಂ ಭಾಯ್ರ್ ಪಡ್ಲ್ಲೆ ಹೆರ್ ಥೊಡೆ
’ಬ್ಲ್ಯಾಕ್ ಮನಿ’ ಜಾವ್ನ್ ಕಾಳೊಕಾಂತ್ ಕುಸ್ತಾಂ
ಹೊ ಮಾತ್ ಹೊರ್ಬೊಸ್ ಲಾಗ್ಲ್ಲೆಬರಿ
ಜಿಣಿಯೆಚಿಂ ಮೊಲಾಂ ಸೊಧುನ್ ಧಾಂವ್ತಾ
ಆತಾಂ ಮ್ಹಜೆ ಹಾತಿಂ ಪಾವ್ಲಾ
ಆಪ್ಲೆಂ ಮೋಲ್ ವಿಚಾರುನ್ ರಾವ್ಲಾ
’ನಾ.. ನಾ.. ಹೊ ಚಲಾನಾ’
ದುಕಾನ್ವಾಲೊ ಘೆಂವ್ಕ್ ನರ್ಗತಾ
’ಹೆ ಧಾ ರುಪಯ್ ತೂಂಚ್ ದವರ್
ಬದ್ಲಾ ಮ್ಹಾಕಾ
ಪಾಂಚ್ ರುಪ್ಯಾಂಚಿ ಸಿಗ್ರೇಟ್ ದಿ’
ಮ್ಹಜ್ಯಾ ವೊಡ್ನೆಕ್ ತೊ ಭುಲ್ತಾ.
ಹಾಂವ್, ತಾಣೆ ದಿಲ್ಲಿ ಸಿಗ್ರೇಟ್
ವೊಂಟಾಕ್ ಲಾವ್ನ್ ಕಾಡಿ ವೊಡ್ತಾಂ
ಆನಿ.. ಪಾಂಚ್ ರುಪ್ಯಾಂಚೆಂ ಮೋಲ್
ಗೊಬೊರ್ ಕರ್ತಾಂ!
^ ವಯ್ರ್
ಮೆಲ್ವಿನ್ ಜೆ. ವಾಸ್, ಕೆಲರಾಯ್
ಪಯ್ಣಾರಿ
ತ್ಯಾ ತಾಚ್ಯಾ ಹಾತಾಂನಿ ಮ್ಹಾಕಾ ಮೊಳ್ತಾನಾ
ತಾಚ್ಯಾ ಮತಿಂತ್ ಕಸಲೆಂ ಸಪಾಣ್ ಆಸ್ಲ್ಲೆಂ ಜಾವ್ಯೆತ್?
ಹಾಂವ್ ತಾಚ್ಯಾ ಸಪ್ಣಾಂಕ್ ಲಾಗೊನ್ ಮೊಳ್ಳೊಂ
ತಾಚ್ಯಾ ಆಶೆಚ್ಯಾ ಉಜ್ಯಾಂತ್ ಜಿವೊ ಜಿವೊ ಜಳ್ಳೊಂ
ಪಾಂಯಾ ಮುಳಾಂತ್ ಹೆವ್ಶಿಂ ತೆವ್ಶಿಂ ಆಡ್ಚೊನ್ ದೊಳ್ಳೊಂ
ಪೆಟ್ಣ್ಯಾ ಧಾಮಸಾ ಮಧೆಂ ಪೆಟೊನ್ ಆಯ್ಲೊಂ
ಫಕತ್ತ್ ತಾಚ್ಯಾ ಸಪ್ಣಾಂಕ್ ಲಾಗೊನ್.
ತ್ಯಾ ತಾಚ್ಯಾ ಜಿಬೆನ್ ಮ್ಹಾಕಾ ಮೊಲಾಯ್ತಾನಾ
ತಾಚ್ಯಾ ದೊಳ್ಯಾಂನಿ ಕಸಲಿ ಭಿರ್ಮತ್ ಆಸ್ಲ್ಲಿ ಜಾವ್ಯೆತ್?
ಹಾಂವ್ ತಾಚ್ಯಾ ಭಿರ್ಮತೆಕ್ ಭುಲೊನ್ ದೊಡ್ಲೊಂ
ತಾಚ್ಯಾ ಖುಶೆಚ್ಯಾ ಸುಖಾಂತ್ ದೂಖ್ ಜಾವ್ನ್ ವ್ಹಾಳ್ಳೊಂ
ವಾರ್ಯಾ ವಾದಾಳಾಂತ್ ಕಾಂಟ್ಯಾಂಕ್ ಶಿರ್ಕೊನ್ ಫಸ್ಲೊಂ
ಧನ್ಫರಾ ಭರಾ ಖರ್ಕಟ್ಯಾ ಉಜ್ಯಾ ಧಾವೆಂತ್ ಬಾಜ್ಲೊಂ
ಫಕತ್ತ್ ತಾಚ್ಯಾ ದೊಳ್ಯಾಂತ್ಲ್ಯಾ ಭಿರ್ಮತೆಕ್ ಭುಲೊನ್
ತ್ಯಾ ತಾಚ್ಯಾ ಹಾಂಡಿಯೆರ್ ಮ್ಹಕಾ ಚಡಯ್ತಾನಾ
ತಾಚ್ಯಾ ಕಾಳ್ಜಾಂತ್ ಕಸಲೊ ಮಾಯ್ಪಾಸ್ ಆಸ್ಲ್ಲೊ ಜಾವ್ಯೆತ್?
ಹಾವೆಂ ತಾಚ್ಯಾ ಮಾಯ್ಪಸಾಕ್ ಫಟ್ವೊನ್ ಗಳ್ಪಾಸ್ ಘೆತ್ಲೊ
ಮ್ಹಜ್ಯಾಂತ್ಲೊ ಥೆಂಬೊ ಥೆಂಬೊ ಪಾಸೊನ್ ಸುಕಯ್ಲೊ
ತಾಚ್ಯಾ ಬಿಡಾರಾಂತ್ ಜೆಮೆಂವ್ಚ್ಯಾ ದಿವ್ಯಾಕ್ ಜಳಯ್ಲೊ
ವಾಟ್ ವಿಸ್ರೊನ್ ಗೆಲ್ಲ್ಯಾ ಹಾಸ್ಯಾಂಕ್ ತ್ಯಾ ವೊಂಟಾಂನಿ ಚಡಯ್ಲ್ಯೊ
ಫಕತ್ತ್ ತಾಚ್ಯಾ ಕಾಳ್ಜಾಂತ್ಲ್ಯಾ ಮಯ್ಪಾಸಾಕ್ ಫಟ್ವೊನ್
ತ್ಯಾ ಕೊನ್ಶ್ಯಾನ್ ಮ್ಹಾಕಾ ಸ್ವಾಗತ್ ಭಾಸಾಯ್ತಾನಾ
ತಾಚ್ಯಾ ಎಕ್ಸುರ್ಪಣಾಂತ್ ಕಸಲೊ ಉಜೊ ಆಸ್ಲ್ಲೊ ಜಾವ್ಯೆತ್?
ಆತಾಂ ಹಾಂವ್ ತ್ಯಾ ಕೊನ್ಶ್ಯಾಂತ್ಲ್ಯಾ ಉಜ್ಯಾಂತ್ ಜಳ್ತಾಂ
ತುಕಾ ಹಾಸೊಂಕ್ ಶಿಕಯಿಲ್ಲೊ ಹಾಂವ್ ಕೋಣ್ ಮ್ಹಳ್ಳೆಂ ನೆಣಾಂ ಆಸ್ತಾಂ!
^ ವಯ್ರ್
ಆನ್ಸಿ ಪಾಲಡ್ಕಾ
ಲೆಂವ್ಟೊ
ಲೆಂವ್ಟೊ ಸಾಯ್ಬಾ ಲೆಂವ್ಟೊ
ಹೊ ಲೆಂವ್ಟೊಚ್ ಲೆಂವ್ಟೊ
ಜೆವ್ತಾ ಖಾತಾನಾ
ಕಿತೇಂಯ್ ಘೆತಾನಾ
ಮಿತ್ರಾಂಕ್ ಮ್ಹಜ್ಯಾ
ಮಿಠಾಯ್ ದಿತಾನಾ
ಪಿಶ್ಯಾ ಪೆಟ್ಯಾಬರಿಂ
ಲಾಳ್ ಗಳವ್ನ್
ಮ್ಹಾಕಾಚ್ ಚೊಂವ್ಚೊ
ಲೆಂವ್ಟೊ ಸಾಯ್ಬಾ ಲೆಂವ್ಟೊ ಹೊ
ಖಾಣಾ ಜೆವ್ಣಾಚೊ ಲೆಂವ್ಟೊ
ಲೆಂವ್ಟೊ ಸಾಯ್ಬಾ ಲೆಂವ್ಟೊ
ತೊ ಲೆಂವ್ಟೊಚ್ ಲೆಂವ್ಟೊ
ಹುದ್ದ್ಯಾ ಅಬ್ಲೆಶಾನ್
ಕೊಣಾಕಿ ಧರುಂಕ್, ಕೊಣಾಕೀ ಮಾರುಂಕ್
ಕಿತೇಂಯ್ ಫಾರುಂಕ್, ಕಿತೇಂಯ್ ಚೊರುಂಕ್
ಕೆದ್ನಾಂಯ್ ತಯಾರ್ ಆಸ್ಚೊ
ಹುದ್ದ್ಯಾ ಭದೃತೆಕ್
ಲೋಂಚ್ ಘೆವ್ನ್ ವಾ ದೀವ್ನ್
ನಿರಾಪ್ರಾದ್ಯಾಚೆರ್ ಆಪ್ರಾದ್ ಥಾಪ್ಚೊ
ಲೆಂವ್ಟೊ ಸಾಯ್ಬಾ ಲೆಂವ್ಟೊ ತೊ
ಅಧಿಕಾರಾಚೊ ಲೆಂವ್ಟೊ
ಲೆಂವ್ಟೊ ಸಾಯ್ಬಾ ಲೆಂವ್ಟೊ
ಹಾಂವ್ಯೀ ಲೆಂವ್ಟೊ
ಮ್ಹಾಕಾ ಭೆಟ್ಚಿಂ
ಉತ್ರಾಂ, ಚಿತ್ರಾಂ, ಪತ್ರಾಂ, ಲೇತ್ರಾಂ
ಸಾಂಗಾತಾಚ್ ಕಲ್ಪನಾಂತ್ಲಿಂ ಸೂತ್ರಾಂ
ಆರಾವ್ನ್, ಜಿರವ್ನ್, ಖಿರವ್ನ್, ನೆರಾವ್ನ್
ಉತ್ರಾ ಧಾರಿರ್ ಶಿಣ್ ವೊಂಕ್ಚೊ
ಫಾಯ್ದೊ ಉಟವ್ನ್ ಬರ್ಪಾಂ ಲಿಖ್ಚೊ
ಹಾಂವ್ಯೀ ಲೆಂವ್ಟೊ ಸಾಯ್ಬಾ
ಲೆಂವ್ಟೊ ಹಾಂವ್
ಸಾಹಿತ್ಯಾಚೊ ಲೆಂವ್ಟೊ
ಲೆಂವ್ಟೊ ಸಾಯ್ಬಾ ಲೆಂವ್ಟೊ
ತುಂಯೀ ಲೆಂವ್ಟೊ
ಲ್ಹಾನ್ಪಣಿ ಚೀಂವ್ ದಿವುನ್
ಕಶ್ಟ್ ಕಾಡುನ್ ವ್ಹಡ್ ಕೆಲ್ಲೆ
ಕೊಂಕಣ್ ಮಾತೆಕ್ ಖೊಟಾಂವ್ಚೊ
ಚೊರ್ಯಾಂ
ಬೊಲ್ತೆಚೊ ಚೀಂವ್ ವೊಡ್ಚೊ
ಕೊಂಕಣ್ ಝರಿಕ್ ಗುಡ್ದಿ ಚೆಪ್ಚೊ
ತೂಂಯೀ ಲೆಂವ್ಟೊ ಸಾಯ್ಬಾ
ಲೆಂವ್ಟೊ ತುಂ
ಲೆಂವ್ಟ್ಯಾಂಚೊ ಲೆಂವ್ಟೊ ತುಂ
^ ವಯ್ರ್
ಆರ್ಥರ್ ರೋಶನ್ ಪಿರೇರಾ, ಒಮ್ಜೂರ್
ಜಿವಂತ್ಪಣ್
ಸುಕಾ ದುಕಾಕ್
ಮಾಪ್ಚಿ ಕಾಡಿನಾ
ಮನಾಂತ್ಲ್ಯಾ ದಂಡಳ್ಯಾಕ್
ಉಜೊ ಉದಾಕ್
ಪತ್ರಾ ತಳಾಪ್ ದರ್ಯಾ ಉದ್ಕಾಂತ್
ಉಪ್ಯೆವ್ನ್ ಗೆಲ್ಲ್ಯಾ ಬಾಶೆನ್
ಮನ್ಶ್ಯಾ ಜಲ್ಮಾ ಪಾತಾಕ್
ಖುರ್ಸಾರ್ ವ್ಹಾವವ್ನ್
ಹರ್ಯೆಕಾ ಮೆಟಾಂ ಮೆಟಾಕ್ ಕೊಸಾಳ್ನ್
ಭಯ್ಣ್ ವೆರೊನಿಕಾನ್ ಪೊಶೆಲ್ಲೊ ಹಾತ್
ರಗ್ತಾ ಸಂಗಿಂ ಘಾಮ್ ಪೊಶೆವ್ನ್
ಪುಸ್ಲ್ಲೊ ತುವಾಲೊ
ರಗ್ತಾಚೊ ಉಮಾಳೊ
ಭುಮಿ ವಯ್ರ್ ಆವಾಜ್
ಪರ್ಜೆಚಿ ಬೊಬಾಟ್
ಪರತ್ ಪಾಟಿಂ ಯೆಂವ್ಚೊನಾ
ಪಾಟಿಂ ಯೆತಲೊಂ ಕೆದ್ನಾಂ
ಲ್ಹಾನ್ ಭುರ್ಗ್ಯಾಕ್ ಉಕಲ್ನ್
ಮುಖಾಮಳ್ ಪೊಶೆವ್ನ್
ಮನಾ ಕೊನ್ಶ್ಯಾಂತ್ ಗುಟ್ಲೊನ್
ಚಲಿಯಾಂ ಮಧೆಂ ಆವಯ್ ಮರಿ
ಆಸೊನ್ ಆಸಾನಾಸ್ತಾಂ ಉದಾಕ್ ವೊತುನ್ ವಾಡ್ಲ್ಲೆಂ
ಜಡ್ ಬಾವೊನ್ ಸುಕೊನ್ ನಿರ್ಜಿವ್
ಬುಡೊನ್ ಗೆಲ್ಲೊ ಸುರ್ಯೊ
ಉದೆವ್ನ್ ಆಯಿಲ್ಲೊ ಚಂದ್ರ್
ರಾವಾನಾತ್ಲ್ಲೊ ವೇಳ್
ರೊದಾಂ ಬಾಶೆನ್ ಘುಂವೊನ್
ಉಟೊನ್ ಆಯ್ಲೊ ತೊ.....
ಜಿವಂತ್ಪಣಾನ್.
^ ವಯ್ರ್
ಅನಿಲ್ ಪೆರ್ನಾಲ್
ದೀಶ್ಟ್
ಉತ್ರಾಂ-ಉತ್ರಾಂನಿಂ ಜೀವ್ ದೆಖ್ಚೊ
ಕರ್ನ್ಯಾ-ಕರ್ನ್ಯಾಂನಿಂ ದೇವ್ ದೆಖ್ತಾ
ಉತ್ರಾಂ ಅನಿಂ ಕರ್ನ್ಯಾಂ ಮಧೆಂ
ಹಜಾರ್ ಬುರಾಕಾಂನಿ ಭರ್ಲ್ಲೊ
ಅಸತಾಚೊ ಬುರುಜ್ ಉಭೊ
ದೆಖುನ್ಂಚ್ಚ್ ಹಾಂಗಾ.........
ದೇವ್ ದಿಸ್ತಾ ಉಣೊ!
ಸಯ್ತಾನ್ ನಾಚ್ತಾ.........ಶಾಣೊ!!
ಸಾಂಗ್ಚೆಂ ಏಕ್ ಕರ್ಚೆಂ ವೆಗ್ಳೆಂ
ಸಾಂಗ್ಲ್ಲ್ಯಾಬರಿಂ ಕೆಲ್ಲೆಂ ತರ್
ಸಂಸಾರ್ ಹೊ ಸರ್ಗ್ ಅಸ್ತೊ
ಉಲೊಣೆಂ ಏಕ್ ಕರ್ನ್ಯೊ ವೆಗ್ಳ್ಯೊ
ಉತ್ರಾಂ ಸಾಂಗ್ಡ್ಯೊ ಕರ್ನ್ಯೊ ತರ್
ಅಮ್ಚ್ಯಾ ಮಧೆಂಚ್ಚ್ ದೇವ್ ದಿಸ್ತೊ
ಉತ್ರಾಂ-ಉತ್ರಾಂನಿಂ ಜೀವ್ ದೆಖ್ಚೊ
ಕರ್ನ್ಯಾ-ಕರ್ನ್ಯಾಂನಿಂ ದೇವ್ ದೆಖ್ತಾ
ಅಸ್ಮಿತಾಯೆಚಾ ಖೆಳಾಂತ್
ಅಸ್ಥಿತ್ವ್ ದಾಕಂವ್ಕ್ ವದ್ದಾಡ್ಚೊ
ಅಂತಸ್ತಾಚೊ ನಾಚ್ ಕೆದೊ...........
ದೆಖುನ್ಂಚ್ಚ್ ಹಾಂಗಾ
ದೇವ್ ದಿಸ್ತಾ ಉಣೊ!
ಸಯ್ತಾನ್ ನಾಚ್ತಾ......... ಶಾಣೊ!!
ಉತ್ರಾಂ-ಉತ್ರಾಂನಿಂ ಜೀವ್ ದೆಖ್ಚೊ
ಕರ್ನ್ಯಾ-ಕರ್ನ್ಯಾಂನಿಂ ದೇವ್ ದೆಖ್ತಾ
ಕಾಳ್ಜಾ-ಮನಾಂತ್ ಸಾಫ್ ಅಸ್ಚೊ
ಸಂಸ್ರಾಂತ್ಚ್ಚ್ ಸರ್ಗ್ ದೆಖ್ತಾ.
^ ವಯ್ರ್
ಆರ್ಯನ್ ತಾಕೊಡೆ
ಬಸವಾ ಆನಿ ತೊ
ಕೊವ್ಡ್ಯಾ ಬರಿ ದುಕೇಸ್ತ್
ವದನ್ ಘೆವುನ್ ಬಸವಾ
ಘರಾ ದಾರಾಂನಿ, ಆಂಗ್ಡಿ ಬಾಗ್ಲಾಂನಿ
ಉಭೊ ಜಾಲಾ ಭಿಕ್ ಘೆಂವ್ಚ್ಯಾಕ್,
ಆಂಗಾವೂಟ್ ಬದ್ಲಿಲಾಂ
ರಂಗಾಳ್ ಕಾಂಬ್ಳಿ ನ್ಹೆಸಾವ್ನ್
ಗಳ್ಯಾ ಭಂವಾರಿಂ ಸುವಾಸ್ ಫಾಂಕ್ತಾ ಕಳ್ಯಾಂ ಝೆಲೊ
ಸದಾಂಚೊ ವೇಸ್, ಭಿಕ್ ಘೆಂವ್ಚ್ಯಾಕ್,
ನಾಚಯ್ತಲೊ ಉರ್ಮಾಲ್ ರೆವ್ಡಾಂವ್ನ್
ತಂಬೂರ್ ವ್ಹಾಜಂವ್ನ್, ದೊರಿ ಘೆವುನ್
ಹಾತ್ ವಡ್ಡಾಯ್ತಾ ಚಿಲ್ಲರ್ ನಾಣ್ಯಾಂಕ್, ಪೊತಿಯೆಂತ್ ಚೆಪ್ಚ್ಯಾಕ್
ಸದಾಂಚೆ ರಜಾರ್ ಭಿಕ್ ಘೆಂವ್ಚ್ಯಾಕ್,
ಅಮಾಸ್ ಜಾಂವ್, ಪರಬ್ ಜಾಂವ್
ಸದಾಂ ಸವಾರಿ ಗಾಂವಾನ್ ಗಾಂವ್
ಖುಶೆ ಮನಾಚೆ, ಬಿಂದಾಸ್ ಜಾತಿಚೆ
ದಿತೇಚ್ ಗೆಲೆ, ದಿತೇಚ್ ಗೆಲೆ, ಧಾಕ್ಡೆ ಉಭ್ಲೆ
ನಾಚಯ್ತಲೊ ಪ್ರಾಯೆನ್ ಪಿಕ್ಲೊ
ಪಿಡೆನ್ ಲಕ್ಲೊ, ಸಾಂಡುನ್ ಗೆಲೊ
ಕಸಯ್ಗಾರ್ ’ಶರೀಫ್’ ಅಮೃಕೊ ಹಾಸ್ಲೊ
’ಕ್ವಿಂಟಾಲ್ ಪಡಾತ್’ ಮ್ಹಣ್ ಕೊಯ್ತೊ ಪಾಜುಂಕ್ ಲಾಗ್ಲೊ.
^ ವಯ್ರ್
ಮೆಲ್ವಿನ್ ಡಿ’ಸೋಜ್, ಬಜ್ಪೆ
ಕೊಣ್ ಸುಖಿ?
ತೆಂ ಕಾಜಾರಿ ಜೊಡೆಂ ಚಿಂತುನ್ ಕರ್ಗಾತಾಲೆಂ, ಗ್ರೇಸ್ತ್ಕಾಯೆನ್ ಪಿಕ್ಲೆಲೆಂ
ತರ್ಯೀ ಉಸ್ಕ್ಯಾರ್ ಭುರ್ಗ್ಯಾಕ್ ಖೆಳಂವ್ಚೆಂ ಭಾಗ್ ಫಾವೊ ಕಿತ್ಯಾಕ್ ನಾ ಜಾಲೆಂ?
ಮಾತಾರಿ ಏಕ್ ಆವಯ್ ಬಾಪಾಯ್ ಘರಾಂತ್ ಎಕ್ಸುರಿಂ ದುಃಖಾಂ ಗಳಯ್ತಾಲಿಂ
ಕಷ್ಟಾಂನಿ ಭುರ್ಗ್ಯಾಂಕ್ ಪೊಸ್ಲೆಲೆಂ, ಆಜ್ ಪರ್ದೆಶಾಕ್ ಕಿತ್ಯಾಕ್ ಉಭ್ಲೆ?
ಚೆಡುಂ ಏಕ್ ಸೊಭಾಯೆನ್ ಸಾವ್ಳೆಂ, ಗುಣಾ ಶೆಗುಣಾಂನಿ ಭಾಂಗ್ರಾಳೆಂ
ಸಯ್ರಿಕೆ ವಾಟ್ ರಾಕೊನ್ ಥಕ್ಲೆಂ, ಮಾತ್ಯಾಕೇಸ್ ಧವೆ ಜಾಂವ್ಕ್ ಲಾಗ್ಲೆ
ವಿಧವ್ ಸ್ತ್ರೀ ವಿಳಾಪ್ ಕರ್ತಾಲಿ, ದೆವಾ ಪತಿಕ್ ಮ್ಹಜ್ಯಾ ಕಿತ್ಯಾಕ್ ಆಪಯ್ಲೆಂ
ಮಮ್ಮಿ ಡ್ಯಾಡಿಚ್ಯಾ ಕೊಂಡಾಟ್ಯಾ ಭುರ್ಗೊ ವಾಟ್ ಚುಕ್ಲ್ಲೊ
ಅಪ್ಲೆಂಪಣ್ ಹೊಗ್ಡಾವ್ನ್ ತಾಂಕಾಂ ರಡೊಂಕ್ ಸೊಡ್ನ್ ಚಲ್ತಚ್ ರಾವ್ಲೊ
ಅನಾಥ್ ಭುರ್ಗೊ ಆಧಾರಾಖಾತಿರ್ ಆಸ್ರೊ ಸೊಧ್ತಾಲೊ
ಮನ್ಶ್ಯಾಬರಿ ಜಾಂವ್ಚಿಂ ಸ್ವಪ್ಣಾಂ ದಿಸಾ ಉಜ್ವಾಡಾಕ್ಚ್ ದೆಖ್ತಾಲೊ
ಕೊಲ್ವಾಚ್ಯಾ ಘರ್ಚ್ಯಾಂಚಿಂ ಉಭೆಚಿಂ ಸ್ವಪ್ಣಾಂ ಬಂಗ್ಲ್ಯಾಚ್ಯಾ ಆಶೆನ್ ಫಾಂತೆಂ ಜಾತೆಲಿಂ
ಬಂಗ್ಲ್ಯಾ ಭಿತರ್ಲ್ಯೊ ಧಾವೆಚ್ಯೊ ಲಾಸ್ಣ್ಯೊ ಬಾವ್ಡ್ಯಾಕ್ ಕಳಿತ್ಚ್ ನಾತ್ಲ್ಲ್ಯೊ
ಭಿಕಾರಿ ಎಕ್ಲೊ ಬಂಗ್ಲ್ಯಾಭಾಯ್ರ್ ಪೊಟಾಖಾತಿರ್ ಮಾಗ್ತಾಲೊ
ಬಂಗ್ಲ್ಯಾ ಧನಿ ಮತಿ ಸಮಧಾನೆಕ್ ದೆವಾಕ್ ಉಲೊ ಮಾರ್ತಾಲೊ
ಹ್ಯಾ ಸಂಸಾರಿ ಕೊಣಿ ನಾಂತ್ ಸಂಪೂರ್ಣಾಯೆಕ್ ಪೆಚಾಡ್ಚೆಂಚ್ ಜಿವಿತ್ ಆಮ್ಚೆಂ
ಜಿವಿತ್ ಸತಾಂ ಕೊಡು ತರ್ಯೀ ಕೊಡ್ಸಾಣೆಂತ್ ಜಿವಿತ್ ಲಿಪ್ತೆಂ
ದುಃಖಿ ಸಾಯ್ಭಿಣಿಚೆ ಸಾತ್ ದುಖಿ ತರ್ ಮ್ಹಜೆ ತುಜೆ ಹಜಾರ್ ದುಃಖಿ
ದೆಖುನ್ಂಚ್ ಜೀವನ್ ಸಾರ್ತಾಂ ಚಿಂತಾಂ ಸಂಸಾರಿ ’ಕೊಣ್ ಸುಖಿ’
^ ವಯ್ರ್
ವಿನ್ಸಿ, ಮೆಲ್ಕಾರ್
ಅಜೂನ್ ತಿಂಚ್ ದುಖಾಂ
ತುಮಿ೦ ನೆಣಾರ್ಪಾಣಾಚೊ ಮೋಗ್ ಕೆಲೊ
ಜೆರ್ಬಾ೦ದ್ ಮಾರುನ್ ಖೆಬ್ಡಾಯೊ ಕೆಲ್ಯೊ
ಮ್ಹಜ್ಯಾ ಮಾತ್ಯಾರ್ ಕಾ೦ಟ್ಯಾಚೊ ಮುಕುಟ್ ಸಾಣ್ಸಿಲೊ
ತರೀ ಹಾವೆ೦ ಇನ್ಕಾರ್ ಕೆಲೆ೦ ನಾ.....
ಹಾ೦ವ್ ನಿರಾಪ್ರಾದಿ ಜಾಲ್ಯಾರೀ .....
ಇನಾಮ್ ಜಾವ್ನ್ ಭರಾದಿಕ್ ಖುರಿಸ್ ಖಾ೦ದ್ಯಾರ್ ದಿಲೊ
ಖುರಿಸ್ ವ್ಹಾವಾಯ್ತಾ೦..... ನಿತ್ರಾಣ್ ಜಾವ್ನ್ ಪಡ್ಲೊ
ಲೊಳ್ಳೊ೦ ಧುಳಿಚ್ಯಾ ಕಣಾ೦ತ್
ಪುಣ್ ಕೊಣೆ೦ಚ್ ಮ್ಹಜೆರ್ ದೀಷ್ಟ್ ಘಾಲಿ ನಾ.....
ನಾತ್ಲ್ಲಿ ಆಸ್ತ್ ಬದಿಕ್ ಮ್ಹಜೆಲಾಗಿ೦
ಹ್ಯಾ ಆ೦ಗಾರ್ ಆಸ್ಚ್ಯಾ ಧಗ್ಲ್ಯಾ ಶಿವಾಯ್
ತೋಯೀ ವೊಡುನ್, ಪಿ೦ಜುನ್ ವಾ೦ಟೆ ತುಮಿ೦ ಕೆಲೊ.
ಫಕತ್ ಮ್ಹಜೆ೦ ಮೌನ್ಪಣ್ ಜಾಲೆ೦.
ತುಮ್ಕಾ೦ ಸರ್ವಾ೦ಕ್ ಮೊಗಾನ್ ಆರಾಯ್ಲೆ೦ ಹಾತ್
ತೇಯೀ ತುಮಿ೦ ಖಿಳ್ಯಾಂನಿ ಘಾಯ್ ಕೆಲೆ.
ಕಾಳ್ಜಾ೦ ಥಾವ್ನ್ ಮೋಗ್ ಹಾ೦ವೆ ಕೆಲ್ಲೊ
ತೆ೦ ಕಾಳಿಜ್ ತುಮಿ೦ ಪಾಪ್ಸುನ್ ಘಾಲೆ೦.
ಉಗ್ಡಾಸಾ೦ತ್ ಉರ್ಲೆ೦ ನಾ ಕಿತೆ೦ಚ್ ತುಮ್ಚ್ಯಾ
ಹಾ೦ವೆ ಕೆಲ್ಲ್ಯಾ ಬೊರ್ಯಾಪಣಾಚೊ
ಕೊಣೆ೦ಚ್ ದುಖಾ೦ ಗಳಯ್ಲಿನಾ೦ತ್ ಮ್ಹಜೆ ಪಾಸತ್
ಕೊಣೆ೦ಚ್ ಮ್ಹಜ್ಯಾ ಖುರ್ಸಾಕ್ ಖಾ೦ದ್ ದಿಲೊ ನಾ.....
ಪುಣ್ ಹಾ೦ವ್ ಮಾತ್ರ್ ಆಜೂನೀ ಕಷ್ಟಾತಾ೦ ತುಮ್ಚ್ಯಾ ಪಾತ್ಕಾ೦ವರ್ವಿ೦.
ಜಾಲ್ಯಾರೀ ಹೆ೦ ಕೋಣಾಯ್ಕಿ ಸಮ್ಜಾಲೆಂ ನಾ.....
^ ವಯ್ರ್
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
More in Daaiz
Send your comments to author on this writing
This is not a comment box. Nothing you write here appears on the site or is shown to any other reader: it is sent to him by email, privately, and he replies to you directly if a reply is called for.