ಕವಿತಾकविताPoem
ಜಿವಾಳ್
This poem is available in its original Kannada only.
ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
"ಸ್ವಾತಂತ್ರ್ ದಿವಸ್ ಮನ್ಶಾಕುಳಾಕ್ ಸ್ವಾತಂತ್ರ್ ಹಾಡುಂಕ್ ಸಕೊಂದಿ, ಪುಣ್ ಹೆರಾಂಚೆಂ ಸ್ವಾತಂತ್ರ್ ಲುಟಾನಾಂ ಜಾಂವ್!"
ವಲ್ಲಿ ವಗ್ಗ, ಮೈಸೂರ್
* ಜಿವಾಳ್ ಕಲಾ
ರಂಗಾಳ್ ಏಕ್
ಪಿಸೊಳೆಂ
ಧರ್ತಾಂ ಮ್ಹಣ್ತಾನಾಂಚ್
ಉಸಾಳ್ಳೆಂ
** ದೊಂಗ್ರಾ ಫಳಾಂ
ಝಡಾರ್ ಪಳೆ
ತಾಂಬ್ಡಿ ಗುಳಾಂ
ಕಮುನಿಸ್ತ್ ಪಿಲಾಂ
ಪೊಡ್ಕೊಳಾ ಫಳಾಂ!
*** ಉತ್ರಾಂ ತಿಂ ವಜ್ರಾಂ
ಉಲೊಂವ್ಚಾ ಪಯ್ಲೆಂ
ಚಿಂತುನ್ ಪಳೆ
ಉತ್ರಾಂಚೆ ಭಾಲೆ
ಕಾಳ್ಜಾಕ್ ಖಿಳೆ!
^ ವಯ್ರ್
ಎಡ್ವಿನ್ ಜೆ.ಎಫ್.ಡಿ’ಸೋಜ್
* ನೆಕೆತ್ರ್
ತು೦ ಮೊಗಾ ವಿಚಾರ್ತಾಯ್
ಕಿತ್ಯಾಕ್ ಕವಿ ಪಿಯೆತಾಯ್
ತು೦ಚ್ ಮ್ಹಜ಼ೆ೦ ನೆಕೆತ್ರ್ ಮ್ಹಣೊನ್
ಥಕೊನ್, ಸುಕೊನ್ ಆತಾ೦
ಬೊತ್ಲಿ೦ತ್ ತುಕಾ ಸೊದ್ತಾ೦!
** ತಿಸ್ರೆ೦ ದುಕ್
ಎಕ್ ಘೊಟ್ ಮಧುರಸಾಕ್ ಭರ್ಸಿತಾ೦
ತೀನ್ ಹುನೊನಿ ದುಕಾ೦
ದೋನ್ ಮ್ಹಜ಼್ಯಾ ದೊಳ್ಯಾ೦ತ್ಲಿ೦ಚ್
ತಿಸ್ರೆ೦ ಮ್ಹಜ಼್ಯಾ ಕಾಳ್ಜಾಖಾ೦ಚಿ೦ತ್ಲೆ೦;
ಖಿರ್ಲಿ೦ ದೋನ್
ತಿಸ್ರೆ೦ ತಶೆ೦ಚ್ ಉರ್ಲೆ೦.
*** ತಿಬೊ
ದೋನ್ ಫೊ೦ಡ್ಕುಲ್ ಗಾಲಾ೦ಚೆರ್
ಆ೦ಜ಼ಾ೦ನಿ೦ಚ್ ದಿಲ್ಲೆ ಉಮೆ; ಪುಣ್
ತೊ ಕಾಳೊ ತಿಬೊ ಹರ್ಧ್ಯಾರ್
ಸಯ್ತಾನಾಚೊಚ್ ಉಮೊ ಯಾ
ಮ್ಹಜ಼್ಯಾಚ್ ರಗ್ತಾಚೊ ತಿಬೊ?
^ ವಯ್ರ್
ಮೆಲ್ವಿನ್ ಜೆ. ವಾಸ್, ಕೆಲರಾಯ್/ಕುವೇಯ್ಟ್
ಸ್ವತಂತ್ರ್...!
ಸರೊನ್ ಗೆಲ್ಲ್ಯಾ
ತ್ಯಾ ದಿಸಾಂನಿ
ಮ್ಹಜ್ಯಾ ದೇಶಾಚಾ ಗಾಂವಾ ಗಾಂವಾನಿ
ಮಾಸಾಂ ಝಳ್ಳಿಂ, ಕಾಳ್ಜಾಂ ತುಟ್ಲಿಂ
ಪಾಕಿಂ ಕೊಸಾಳ್ಳಿಂ, ಬಾಂಯೊ ಭರ್ಲ್ಯೊ
ಫಾರ್ ಸುಟ್ಲೆ, ಶಿರಾಂನಿ ಫುಟ್ಲೆ
ತಿಳ್ಯಾಂಕ್ ಪುಸ್ಲೆಂ, ರಗ್ತಾಂತ್ ಧುಲೆಂ!
ಕೊಣಾ ಖಾತಿರ್?
ತುಜೆ ಖಾತಿರ್..
ತುಂ ನಾತ್ಲೆಲ್ಯಾ ಹ್ಯಾ ದೇಶಾಂತ್
ಖಂಯ್ ಥಾವ್ನ್ ಕೊಣ್ ಜಾಣಾಂ
ತುಕಾ ಹಾಡುನ್,
ರಾಯ್ ಪಾಟಾರ್ ಬಸಯ್ಲಾ!
ತುಂ ಆಯ್ಲೊಯ್
ಕೊಣಾ ಘಾಮಾ ಥೆಂಬ್ಯಾ ಫಳ್ ಕೊಣಾಕ್ ಪಡೊನ್ ಗೆಲಾಂ?
ಧವ್ಯಾ ಸವೆಂ ತಾಂಬ್ಡೆಂ ಥೆಂಬೆ ಜಿರೊನ್ ಗೆಲ್ಯಾತ್
ವ್ಹಾಳಯಿಲ್ಲೆ ಇರೊನ್ ಸರ್ಲ್ಯಾತ್
ವಾಟೊ ಝರ್ಲ್ಯಾತ್ ಹಾಡಾಂ ಖಿರ್ಲ್ಯಾಂತ್
ಆತಾಂ ತುಜೆಂಚ್ ರಾಜ್
ಮ್ಹಜ್ಯಾ ಗಾಂವಾಕ್ ತುಜೊಚ್ ಗಾಜ್!
ಉದೆವ್ನ್ ಯೆಂವ್ಚಾ
ಹ್ಯಾ ದಿಸಾಂನಿಂಯ್
ಮ್ಹಜ್ಯಾ ದೇಶಾಚಾ ಗಾಂವಾ ಗಾಂವಾಂನಿ
ಮಾಸಾಂ ಝಳ್ತಾತ್, ಕಾಳ್ಜಾಂ ತುಟ್ತಾತ್
ಪಾಕಿಂ ಕೊಸಾಳ್ತಾತ್, ಬಾಂಯೊ ಭರ್ತಾತ್
ಫಾರ್ ಸುಟ್ತಾತ್, ಶಿರಾಂನಿ ಫುಟ್ತಾತ್
ತಿಳ್ಯಾಂಕ್ ಪುಸಯ್ತಾತ್ ರಗ್ತಾಕ್ ವ್ಹಾಳಯ್ತಾತ್!
ತುಂ ಮಾತ್ರ್..
ರಾಯ್ ಪಾಟಾರ್ ಬಸೊನ್
ಸಗ್ಳೆಂ ಪಳೇತ್ ಆಸಾಯ್
ಭೋವ್ಶಾ ಆಜ್ ತುಂ
ನಾಂವಾಚೊ ಮಾತ್ರ್ ಸ್ವತಂತ್ರ್!
^ ವಯ್ರ್
ಆರ್ಥರ್ ರೋಶನ್ ಪಿರೇರಾ, ಒಮ್ಜೂರ್/ದುಭಾಯ್
ಕಿತ್ಯಾಕ್ ತುಂ ಅಯ್ಲೆಂಯ್
ಯೆತಾಯ್ ಮ್ಹಣೊನ್ ಮ್ಹಳ್ಳೆಂಯ್ ತುವೆಂ
ಪುಣ್ ತುಂ ಆಯ್ಲೆನಾಂಯ್
ಕಿತ್ಯಾಕ್ ತುಂ ಆಯ್ಲೆನಾಂಯ್
ಸಾಂಗ್ ಕಿತ್ಯಾಕ್ ತುಂ ಅಯ್ಲೆನಾಂಯ್
ಹಾಂವ್ ರಾವ್ಲ್ಲೊ ರಾಕೊನ್ ತುಕಾ
ಸಾಂಗ್ ಕಿತ್ಯಾಕ್ ತುಂ ಅಯ್ಲೆನಾಂಯ್
ಕಾಳ್ಜಾಕ್ ಮ್ಹಜೆಂ ಭೋವ್ಚ್ ದುಖ್ಲೆಂ
ರಾಕೊನ್ ರಾಕೊನ್ ಕಾಳಿಜ್ ಥಕ್ಲೆಂ
ತುಂ ಕಿತ್ಯಾಕ್ ಅಯ್ಲೆಂನಾಂಯ್
ತ್ಯಾ ದಿಸಾ ತುಂ ಯೇತೆಲೆಂಯ್
ಚೊಯ್ತಾಂ ಚೊಯ್ತಾಂ ದೊಳೆಂ ಮ್ಹಜೆ ಥಕ್ತಲೆ
ಉತ್ರಾಂ ಮ್ಹಜಿಂ ಸಂಪ್ತೆಲಿಂ
ಆಶಾ ಮ್ಹಜಿ ಥಾಂಭ್ತೆಲಿಂ
ನಿಮಾಣೆಂ ಕಾಳಿಜ್ ಮ್ಹಜೆಂ ರಡ್ತೆಲೆಂ
ತುಂ ಕಿತ್ಯಾಕ್ ಅಯ್ಲೆಂಯ್,
ಕಿತ್ಯಾಕ್ ತುಂ ಆಯ್ಲೆಂಯ್?
ಫಾಲ್ಯಾ ತರೀ ಯೆತೆಂ ಆಸ್ಲ್ಲೆಂಯ್
ಹಾಂವ್ ಅಶೆಂಚ್ ರಾಕ್ತೊಂ ಆಸ್ಲ್ಲೊ
ತುಂ ಯೆತೆಲೆಂಯ್,
ಪರ್ವಾನಾ ಹಾಂವ್ ರಾಕ್ತಲೊಂ
ಪುಣ್ ಯೇನಾಂ, ಯೆವ್ಚಿಂನಾ ಮ್ಹಣಾನಾಕಾ
ಯೇನಾಂ ಯೆವ್ಚಿಂನಾ ಮ್ಹನಾನಾಕಾ ಮ್ಹಾಕಾ
ತೆದ್ನಾಂ ಹೆಂ ಕಾಳಿಜ್ ಝಳ್ತೆಲೆಂ
ಉಜ್ಯಾನ್ ಪೆಟ್ತೆಲೆಂ
ಭಿರ್ಮತ್ ಹ್ಯಾಚ್ ಕಾಳ್ಜಾಂತ್
ತುಂಯ್ ಆಸ್ತೆಲೆಂಯ್
^ ವಯ್ರ್
ವಾಯ್ಲೆಟ್ ಜೆ. ಪಿರೇರಾ
ಸ್ವರ್ಗಾರೋಹಣ್ ಆನಿ
ಧ್ವಜಾರೋಹಣ್
ಅಂಕ್ವಾರ್ ಮರಿಯೆಚೆಂ ಸ್ವರ್ಗಾರೋಹಣ್
ಭಾರತ್ ದೇಶಾಂತ್ ಜಾಲೆಂ ಧ್ವಜಾರೋಹಣ್
ದೊಡ್ತ್ಯಾ ಸಂಭ್ರಮಾಚೆಂ ಹೆಂ ಆಚರಣ್
ಆಗಸ್ತ್ ಪಂದ್ರಾ ಲಿಖ್ಲ್ಯಾ ಇತಿಹಾಸ್ ರಚುನ್
ಮರಿಯೆಕ್ ದೆವಾನ್ ಊಂಚ್ ಉಭಾರ್ಲೆಂ
ಕುಡಿ ಆತ್ಮ್ಯಾ ಸವೆಂ ಸರ್ಗಾಕ್ ವ್ಹೆಲೆಂ
ಸರ್ಗಾ ಸಂಸಾರಾಚಿ ರಾಣಿ ಮ್ಹಣ್ ಕುರ್ವಾರ್ ಕೆಲೆಂ
ಸ್ತ್ರೀಯಾಂ ಭಿತರ್ ತಿಕಾಚ್ಚ್ ಸದೆಂವ್ ಭಾಸಾಯ್ಲೆಂ
ಪನ್ನಾಸ್ ಆನಿಂ ನೋವ್ ವರ್ಸಾಂ ಆದಿಂ
ಭಾರಾತಾಕ್ ಬ್ರಿಟಿಷಾಂ ಥಾವ್ನ್ ಸೊಡಂವ್ಕ್ ಝುಜ್ಲೊ ಗಾಂಧಿ
ಸುಟ್ಲೆಂ ಬ್ರಿಟಿಷಾಂ ಥಾವ್ನ್ ಭಾರಾತಾಚೆಂ ಬಂಧನ್
ಜೀಕ್ ಅಪ್ಣಾಯ್ಲಿ ಸ್ವತಂತ್ರ್ ಜಾವ್ನ್ ಭಾರತಾನ್
ಪುಣ್ ಆಜ್ ಭಾರತ್ ಆಸಾಗೀ ಸ್ವತಂತ್ರ್?
ಸಗ್ಳ್ಯಾಂನಿ ಲಡಾಯ್, ಝಗ್ಡೆಂ, ಖುನಿ, ಆತ್ತ್ಯಾಚಾರ್
ಜಾತಿ ಕಾತಿಚಿ ಮುದ್ದಾ ಹಾಡ್ನ್ ಮುಖಾರ್
ದುಸ್ಮಾನ್ಕಾಯ್ ದಾಖಯ್ತಾತ್ ಎಕಾಮೆಕಾಚೆರ್
ಗಾಂಧಿನ್ ಆಹಿಂಸಾಚ್ಯಾ ವಾಟೆನ್ ಚಲೊನ್
ಹಾಡಯ್ಲೊ ಭಾರಾತಾಕ್ ಸ್ವಾತಂತ್ರ್
ಮರಿಯೆನ್ ಆಪ್ಣಾಕ್ಚ್ಚ್ ಸಾಕ್ರಿಫಿಸ್ ಕರುನ್
ಸಮರ್ಪಿಲೊ ಅಪ್ಲ್ಯಾ ಬಾಳಾಕ್ ಹ್ಯಾ ಸಂಸ್ರಾಕ್
ಹ್ಯೊ ದೊನೀ ತ್ಯಾಗಾಚ್ಯೊ ಮೂರ್ತ್ಯೊ
ದೀವ್ನ್ ಗೆಲಿಂ ಲಿಸಾಂವ್ ಆಮ್ಕಾಂ ವ್ಹರ್ತೊ
ನಾಂ ಜಾಲಾಂ ಕೊಣೀ ಹೆಂ ಸರ್ವ್ ಪಾಳ್ಚೊ
ತ್ಯಾಗ್ ಮ್ಹಳ್ಳೊ ಮಾಯಾಗ್ ಜಾಲಾ ಪುರ್ತೊ
^ ವಯ್ರ್
ವಿನ್ಸಿ, ಮೆಲ್ಕಾರ್
ಸ್ವತಂತ್ರ್ ದೆಶಾಚೆ ಸ್ವತಂತ್ರ್ ಭಿಕಾರಿ?
ಜಲ್ಮ್ ಮ್ಹಜೊ ಖಂಯ್ ಹಾಂವ್ ನೆಣಾಂ
ನಾಂವ್ ಮ್ಹಜೆಂ ಭಿಕಾರಿ ಹಾಂವ್ ಜಾಣಾಂ
ವಿಂಚುನ್ ಖಾತಾಂ ಉಡಯ್ಲ್ಯಾ ಖಚ್ರ್ಯಾಂತ್ಲೆಂ
ಹಾಂವ್ ಜಾವ್ನಾಸಾಂ ಸ್ವತಂತ್ರ್ ಭಿಕಾರಿ
ನಾ ಖಂತ್ ಬೆಜಾರಾಯ್
ನಾ ಘರ್ ನಾಂ ಕುಟಾ ಸೆಜಾರಾಂ
ನಾಂತ್ ಈಷ್ಟ್ ಮಂತ್ರ್ ನಾ ಕೊಣ್ಂಚ್
ನಾ ಹಾವೆಂ ಪುಂಜಾವ್ನ್ ದವರ್ಲೆಲೆಂ
ಪೊಟಾಕ್ ಭುಕ್ ಲಾಗ್ಲ್ಯಾರ್
ಮಾಗೊಂಕ್ ವೆತಾಂ ಘರಾಂ ಘರಾಂನಿ
ದೊಳ್ಯಾಂತ್ ನೀದ್ ಆಯ್ಲ್ಯಾರ್
ವಿಶೆವ್ ಘೆತಾಂ ರಸ್ತ್ಯಾ ದೆಗೆಂನಿ ಬಸ್ಸ್ಟಾಂಡಾಂನಿ
ನಾ ಭ್ಯೆಂ ಮ್ಹಾಕಾ ಆಸ್ಲ್ಲ್ಯಾಂಚೆಂ ಗೆಲ್ಲ್ಯಾಂಚೆಂ ವಾ ಮೆಲ್ಲ್ಯಾಂಚೆಂ
ಹಾಂವ್ ಜಾಲಾಂ ಸ್ವತಂತ್ರ್ ಭಿಕಾರಿ...
ನಾ ಮ್ಹಾಕಾ ಜಾತ್-ಕಾತ್, ಭೇದ್ ಭಾವ್
ನಾಂತ್ ಸ್ವಪ್ಣಾಂ ಮುಖ್ಲ್ಯಾ ಫುಡಾರಾಚಿಂ
ನಾಂ ರಾಗ್, ಮೊಸೊರ್, ಹಗೆಂ ಕಿತೆಂಚ್
ಭಂವ್ತಾಂ ಹಾಂವ್ ಮಾರ್ಗಾನ್ ಮಾರೊಗ್
ಹ್ಯಾ ಸ್ವತಂತ್ರ್ ಗಾಂವಾಂತ್
ವಸ್ತುರ್ ಪಿಂಜ್ಕರ್ ಆಧ್ಲ್ಯಾ ಕಾಳಾಚೆಂ
ತೆಂಚ್ ರಾತಿಚೆಂ ತೆಂಚ್ ದಿಸಾಚೆಂ
ನಾಂ ನಾಕಾಕ್ ವ್ಹಾರೆಂ ನಿರ್ಮಳ್
ಪಿಯೆಂವ್ಕ್ ಉದಾಕ್ ಮೆಳಾನಾ ನಿತಳ್
ಜೆವಾಣ್ ಸಯ್ತ್ ಮೆಳ್ತಾ ಬೆಳ್ಶೆಲ್ಲೆಂ
ತರೀ ಹಾಂವ್ ಸ್ವತಂತ್ರ್
ಕೊಣ್ ಬರೆ ಹಾಂಗಾ ಕೊಣ್ ಖೊಟೆ
ಕೊಣಾಚಾಯ್ ಘರಾಂನಿ ನಾ ಸಮಧಾನ್
ಫಕತ್ ಲಡಾಯ್ ಝಗ್ಡೆಂ ಮಾರ್ಫಾರ್
ಅಪ್ರಾದಿ ಸರ್ವ್ ಭಾಯ್ರ್ ಫೆಸ್ತಾಂ ಕರ್ತಾತ್
ನಿರಾಪ್ರಾದಿ ಜಯ್ಲಾಂತ್ ಕುಸ್ತಾತ್
ಆಮಾಯಿಕಾಂಚೆಂ ರಗತ್ ಚಿಂವ್ತಾತ್ ರಾಜ್ಕಾರಣಿ
ಸರ್ಕಾರಿ ಸರ್ವ್ ಲೊಂಚಾಂತ್ ಬುಡ್ಲ್ಯಾತ್
ಆಪ್ಣಾಚ್ಯಾ ಫಾಯ್ದ್ಯಾ ಖಾತಿರ್ ದುಸ್ರ್ಯಾಚಿ ಗೊಮ್ಟಿ ಲುಂವ್ತಾತ್
ವಯ್ರ್ ಚಡ್ಲ್ಯಾಂಕ್ ಸಕ್ಲಾ ವೋಡ್ನ್ ಘಾಲ್ತಾತ್
ಹೆಂ ಕೊಣ್ ತರೀ ಜಾಣಾಂ..?
^ ವಯ್ರ್
ಆರ್ಯನ್, ತಾಕೊಡೆ
ಧರ್ಮ್ ಆನಿ ಕರ್ಮ್
ತಿರುಪತಿ ತಿರುಮಲ ವೆಂಕಟೇಶ
ರಾಕ್ವಣ್ ಕರಿತ್ ಆಸಾ ತುಜಿ ಹಿಂದು ದೇಶ
ದರ್ಶನ್ ತುಜೆಂ ಕೆಲ್ಲ್ಯಾಂಕ್ ವಾಂಟ್ತಾತ್ಮೂ ವ್ಹಡ್ ಲಡ್ಡು
ಖಬಾರ್ ವಿಸ್ತಾರ್ಲ್ಯಾ, ಘಾಬ್ರಿ ಚಡ್ಲ್ಯಾ, ವಾಂಟ್ಪಿ ಜಾವ್ನಾಸಾ
ಕ್ರೀಸ್ತಿ ಪರ್ಜಾ ರೊನಿ, ರೊಕಿ, ಪೊಕಾ, ಎಡ್ಡು
ತುಜಿಂ ಪಾಯ್ಲೆನಾಂ, ಮೂರ್ತಿ ಭಗ್ನ್ ಕೆಲ್ಯಾಂತ್ ಮಿಶಿಯೊನಾರಿಂನಿ
ಖುರಿಸ್ ಉಭಾರ್ಲೊ, ಕ್ರೀಸ್ತ್ ಬಾವ್ಟೊ ಉಭಯ್ಲೊ
ಬೊಬೊ ಘಾಲ್ಯೊ, ಮಠ್ವಾಸಿಂನಿ, ಸೊಮ್ಗೊಳಾಂನಿ
ಸೋನಿಯಾ ಗಾಂಧಿನ್ ಕ್ರೀಸ್ತಿ ಮತಾಂತರಾಚೆಂ ಸುಂಕಾಣ್ ಧರ್ಲಾಂ
ಅಶೆಂ ವಿಹಿಂಪ, ರಾಮ್ಸೇನೆ, ಬಿಜೆಪಿಗಾರಾಂನಿ ಶಂಖ್ ಫುಂಕ್ಲಾ
ಮತಾಂತತ್ ಭಾಷಾಂತರ್ ಭೊಂಗೊಸ್ತೊಳ್
ಬೊಬಾಟ್ತಾ ಸೊಮ್ಗೊಳ್ ಶ್ರೀ ಶ್ರೀ ಪೇಜಾವರ್
ಹಿಂದೂಸೇನೆ, ರಾಮ್ಸೇನೆ ಏಕ್ ಜಾಲಾಂ ಬೊಬಾಟ್ತಾ ಹರಹರ
ಕ್ರಿಸ್ತಾಚೊ ಖಿರಿಸ್ ಕಾಡಾ ಮತ್ಪ್ರಚಾರಾಕಾಂಚೆ ಖಿಳೆ ಮೊಡಾ
ಇಸ್ಲಾಮ್ ಆನಿ ಕ್ರೀಸ್ತಿವಾದಿಂಕ್ ಧಾಂವ್ಡಾಯಾ, ತಿರುಪತಿ ತಿಮ್ಮಪ್ಪಾಕ್ ಮಾತ್ರ್ ಸೊಡಾ
ಕೊಣೀಂ ಸ್ತ್ರೀಯೆನ್ ಅಯ್ಯಪ್ಪಾಚೆಂ ಪಾದದರ್ಶನ್ ಕೆಲೆಂ ತರ್
ಸೊಮ್ಗೊಳ್, ಧರ್ಮಾಂದ್ಳೆ, ಮಠ್ವಾಸಿ ಜಾಲೆಮೂ ಪಿಸಾಂತುರ್
ನಾಂ ಸ್ತ್ರೀಯಾಂಕ್ ಪ್ರವೇಶ್ ಶಬರಿಮಲೆಂತ್, ಸ್ತ್ರೀ ಕಶಿ ಜಾಲಿ ತಾಯಿ ದೇವರು?
ಏ ತಿಮ್ಮಪ್ಪ ಸಾಂಬಾಳ್ ತುಜ್ಯಾ ಧರ್ಮ್ಧುತಾಂಕ್
ಧರ್ಮಾಂಚೆ ವೀದ್ವಾವ್ಳಿ ಕರ್ತೆಲ್ಯಾಂಚ್ಯಾ ಗಳ್ಯಾಕ್
ತುಜೆ ಪ್ರಸಾದಾಚೆ ’ಲಡ್ಡು’ ಶಿರ್ಕಾಲ್ಯಾರ್ ಪುರೊ.
^ ವಯ್ರ್
ಲೂಕಸ್ ಮಾರ್ಕ್ ದಿನಿಜ್, ಗೊಯಾಂ/ಕುವೇಯ್ಟ್
ಸ್ವಪ್ಣಾಂ
ಚಿಂತಾ, ಚಿಂತಾ ದೆಖ್ಲಿಂ ಸ್ವಪ್ಣಾಂ
ಉಲಯ್ತಾ, ಉಲಯ್ತಾ ಜಾಲಿಂ ಅಜ್ಯಾಪಾಂ
ಧಾಂವ್ತಾ, ಧಾಂವ್ತಾ ಉಘಡ್ಲ್ಯೊ ವಾಟೊ
ಖಿಣಾ ಖಿಣಾಂತ್ ಘಡ್ಲ್ಯೊ ಘಡ್ಣ್ಯೊ
ಪಳೆವ್ನ್ ಪಳೆವ್ನ್ ದೊಳೊ ವೊಳ್ಳೊ
ಚಲ್ತಾ ಚಲ್ತಾ ದೀಸ್ ಪರ್ತಲೊ
ಪಾವೊನ್, ರಾವೊನ್ ವೇಳ್ ಸಂಪ್ಲೊ
ಥರ್ಯೀ ಅಖಂಡ್ ರಾವ್ಲೊ ಉಭೊ
ಕಸಲೆ ಆಸೆಕ್ ತೊ ಆಶೆಲೊ?
ವೊತಾ ಗರ್ಮೆನ್ ಘಾಮ್ ಗಳಯ್ಲೊ
ಪಳೆವ್ನ್ ತಾಕಾ ಸುರ್ಯೊ ಕಾಕುತ್ಲೊ
ಸುರ್ಯಾ ಕಿರ್ಣಾಂನಿ ಸಾವೊಳ್ ದಿಲೊ
ಅಜ್ಯಾಪಾಂಚೊ ಮಾರುನ್ ವಾರೊ
ಹಾತಾಂನ್ ಪಡ್ಲೊ ಫುಲಾ ತುರೊ
ಸುರ್ಯೊ ಬುಡೊನ್ ಚಂದ್ರೆಮ್ ಉದೆಲೊ
ತರ್ಯೀ ಆಂಧ್ಳೊ ದಾರಾಂತ್ ಉಭೊ
ದಿಸಾಚಿಂ ತಾಕಾ ನೆಕೆತ್ರಾಂ ದಿಸ್ಲಿಂ
ಸುರ್ಯಾನ್ ಅಪ್ಲಿಂ ಕಿರ್ಣಾಂ ಧಾಂಪ್ಲಿಂ
ಘಡ್ಘಡೊ ನಾಸ್ತಾಂ ಝಗ್ಲಾಣಿಂ ಮಾರ್ಲಿಂ
ಧೊವಾ ಶಿಂಪ್ಣ್ಯಾನ್ ಕರ್ಡಾಂ ಫುಲ್ಲಿಂ
ವಾರ್ಯಾರ್ ಉಭೊನ್ ಘರಾಂ ಭಾಂದ್ಲಿಂ
ರೆಂವೆ ಘರಾ ಲ್ಹಾರಾಂನಿ ಮೊಡ್ಲಿಂ
ತರ್ಯೀ ಮನಾಂತ್ ಸ್ವಪ್ಣಾಂ ಕುಪ್ಶಿಂ
ಜಿವಿಂ ಕರುಂಕ್ ಸೊಧ್ನಾಂ ಜಿಣ್ಯೆಚಿಂ.
^ ವಯ್ರ್
ವಲ್ಲಿ ಕ್ವಾಡ್ರಸ್, ಅಜೆಕಾರ್/ಕುವೇಯ್ಟ್
ಅನ್ಯೇಕ್ ಪೆಟೊ ಮೆಲಾ ಪಳೆ
ಅಳೇ ಅನ್ಯೇಕ್ ಪೆಟೊ ಮೆಲಾ ಥಂಯ್
ರಾಜ್ ರಸ್ತ್ಯಾಚೆರ್ಚ್ ದಿಸಾಚಾ ಮಧೆಂಚ್
ಅಪ್ಲ್ಯಾ ಕುಡಿಂತ್ಲ್ಯಾ ತಾಂಬ್ಡ್ಯಾ ರಗ್ತಾಕ್ ವ್ಹಾಳವ್ನ್
ಸುಶೆಗಾತ್ ಪಾಶಾರ್ ಜಾಂವ್ಚಾ
ದೊಳೆ ಅತ್ಮೊ ಜೀವ್ ಮತ್ ನಾತ್ಲೆಲ್ಯಾ ಮನ್ಶಾಂಸವೆಂ
ಉದಾರೊಚ್ ಪಡೊನ್ ಮೆಲಾ ಪಳೆ
ಕಿತ್ಲ್ಯಾ ವಿಶ್ವಾಸಾನ್ ದೀಸ್ ಕಾಡ್ಲ್ಲೆ ಜಾವ್ಯೆತಾ
ಹ್ಯಾ ಪೆಟ್ಯಾನ್ಯ್
ಜಾಗೊಚ್ ರಾವೊನ್ ದೀಸ್ರಾತ್ ಪಾರೊತ್ ಕರುನ್
ಪರ್ಕ್ಯಾಂಕ್ ಘೊಂಕುನ್
ಅಪ್ಲ್ಯಾಂಕ್ ಶಿಮ್ಟಿ ಕಿತ್ಲಿ ಹಾಲಯಿಲ್ಲಿ ಜಾವ್ಯೆತಾ
ಹಾಡಾಂ ಚಿಂವೊನ್ ಗೊಬ್ರಾರ್ ಪಡೊನ್ ತರ್ಯ್
ಆವ್ಕ್ ಸಂಪಯಿಲ್ಲೆಂ ತಾಣೆಂ
ಹಿಂ ಧನ್ಯಾಂ - ಮನ್ಶಾಂಯ್ ಪಳೆ
ಚೊರಿ ಕರ್ಚಾ ಮಾಜ್ರಾಕ್ ಖಾಟ್ ದಿವುನ್
ಬಾದೂರ್ ಪೆಟ್ಯಾಕ್ ಮುಕಾರ್ ಘಾಲುನ್
ಭಿತರ್ ಲಿಪೊನ್ ತಮಾಸೊ ಚೊಯ್ತಾತ್ ಪಳೆ
ಪಾಲಂವಾಕ್ ಧರುನ್, ವೊಲಿಂಕ್ ಗುಟ್ಲಾವ್ನ್
ಸ್ವಪ್ಣಾಂನಿ ಖೆಳಿಂ ಖಾತೆಲೆ
ಕವಿಂಚಾ ಅತ್ಮ್ಯಾಂಚೊ ವ್ಹೊರ್ ಪಳೆ
ಭಂವ್ತೊಣಿಂ ರಾವೊನ್ ಬೊಬೊ ಘಾಲ್ತಾತ್
ಹಾಂಗಾ ಕ್ರಾಂತಿ ಜಾಂವ್ಚೆಪರಿಂಚ್ ನಾ
ಕ್ರಾಂತೆಚೆ ಹಾಂಗಾ ಪೋಟ್ ಫುಟೊನ್
ಆನ್ಕಿಟೊ ಚಿರೊನ್ ಉದಾರೆಚ್ ಪಡೊನ್
ಹೆಂ ರಂಗ್ಮಂಚ್ಚ್ ಸಾಂಡುನ್ ಗೆಲ್ಯಾತ್
ಕೊಣೆಂಯ್ ವಿಚಾರ್ಲೆನಾಂ ಪಳೆ
ಲೊರಿ ಹಾಂಡ್ಲಿಗಿ ಯಾ ಮರ್ಸಿಡಿಸ್ ಕಾರ್
ಹಾಂಡ್ಲಿಗೀ ಯಾ ಕೊಣೆಯ್ ಕಾಡ್ಲೊಗೀ
ಕೊಣಾಕ್ ಕಿತೆಂ ಪಡೊನ್ ಗೆಲಾಂ
ಅಖ್ರೇಕ್ ಏಕ್ ಪೆಟೊ ಪಳೆ; ಪೆಟೆ ಕಿತ್ಲೆಯ್ ಆಸ್ತಾನಾ
ಪೋಸ್ಟ್ ಮಾರ್ಟಮ್ ಕರ್ಚೆಂಚ್ ಕಿತ್ಯಾಕ್?
^ ವಯ್ರ್
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
More in Daaiz
Send your comments to author on this writing
This is not a comment box. Nothing you write here appears on the site or is shown to any other reader: it is sent to him by email, privately, and he replies to you directly if a reply is called for.